\id 1JN - Mufian NT (Balif dialect) -Papua New Guinea 1988 (web version -2013 bd) 
\h 1 Jon 
\toc1 Basef Ifimba Jon Nandaꞌafi Fagaliꞌi 
\toc2 1 Jon 
\toc3 1 Jo 
\mt1 Basef Ifimba Jon Nandaꞌafi Fagaliꞌi  
\iot Basef bandafi fagaliꞌi Jon nandaꞌafi  
\io1 1:1-4 Jon naꞌi basef Godi nasaꞌma ukup asasipi ma sandagala  
\io1 1:5-2:29 God anen nogogalaꞌi. Eaꞌ apaꞌ mondafeꞌ mogogalaꞌi ma mondaꞌ waf usiꞌifi ukup pigapigaila epes hiasi hiꞌindalas  
\io1 3:1-24 Apaꞌ mape awasi Godi. Eaꞌ deiꞌ apaꞌ ukup pindapindaila sahin owan apeꞌisi. Apaꞌ epes awasi miniꞌap Seteni sandaꞌ waf awafi atapis.  
\io1 4:1-6 Apaꞌ mowaloga ambagof hiagufi hiꞌindalagofa mogogawa agwafomba Godi aꞌa Satani.  
\io1 4:7-5:21 God nasapaꞌ nogamana ananiai nafiꞌi itap apaꞌe nihimbaꞌmapa waf ukup pagapagailasafi. Eaꞌ mohapifana ma mogape sisihipama anen atona mogofaꞌ ambal namili.  
\c 1  
\s1 Basef ambal namili lagapaifi  
\p
\v 1 Afaꞌ wandaꞌ basef ifimba ma anona aman agilinama Basef, anen nagasoꞌapa ambal namili lagapaipai. Aman anamba fowaꞌ gani dambadamba nagapani. Afaꞌ wameꞌ basef ananifi eaꞌ, watolona naep afaꞌipi wahapilana lagof afaꞌigufi.\x * \xo 1:1 \xt Jo 1:1-2,4,14; 1 Jo 2:13-14\x*  
\v 2 Ambal alamba namili lataga eaꞌ afaꞌ watolol naep afaꞌipi. Isimba atis deiꞌ afaꞌ wawalipipa ma ambal alamba lagape dondol lifilafii. Ambal alamba fowaꞌ lape laloma Ahamapa eaꞌ deiꞌ lataga alihigima watolol.  
\v 3 Hiahaom amamba afaꞌ watolom wagameꞌami deiꞌ waꞌipipam ipaꞌ wapani ma pegape nembel atotombel pegalomafa. Afaꞌ wape wambota atota waloma Ahamapa nagaloma Nogamana ananinai Jisas Krais.\x * \xo 1:3 \xt Jo 16:24\x*  
\v 4 Afaꞌ wandaꞌ basef ifimba ma atiasi dagala apeꞌini negataga luꞌwin siꞌina apaꞌ.\x * \xo 1:4 \xt 1 Ti 6:16; Je 1:17\x*   
\s1 God anen nogogalaꞌ nandaꞌ waf buꞌwafi usiꞌifi atifi  
\p
\v 5 Basef ifimba afaꞌ wameꞌanamef naꞌamba. God anen nogogalaꞌ afitinai. Ina anota akot tailana kwasakwasala, owaꞌatin endilisi.\x * \xo 1:5 \xt 1 Jo 2:4\x*  
\v 6 Iꞌi apaꞌ miꞌi mape nembel atotombel malomana, ama apaꞌ ataꞌ mape mandaꞌ waf awafi siꞌi magape akot atotai, apaꞌ mambasoꞌma apaꞌ atepa ma basef apeꞌifi faloma feꞌ apeꞌini.\x * \xo 1:6 \xt Jo 3:21; Ais 2:5; Hi 9:14; Re 1:5, 7:14\x*  
\v 7 Anen nogogalaꞌ afitinai. Iꞌi mope mogalaꞌ siꞌi anen waf awafi akapa, eaꞌ mope nembel atembel moloma sahin owan hiasi. Eaꞌ esimbel Jisasi Nogamana Godi basaꞌopa waf awafi apeꞌifi hiafi hiꞌalaf, eaꞌ mataga beꞌepa.\x * \xo 1:7 \xt Sam 32:5; Pro 28:13\x*  
\v 8 Iꞌi apaꞌ miꞌi waf awafi akapa, apaꞌ mambasoꞌma apaꞌ atepa eaꞌ basef endilisifi ina fapaepa, owaꞌatin.  
\v 9 Iꞌi apaꞌ mowalapa waf awafi apeꞌifi alihif, atiasi anen nokwahomapa waf hiafi awafi apeꞌifi okom masoꞌanafa nosaꞌopapa mogataga beꞌepa hililiꞌ. Basef fowaꞌ nagalaꞌ lapafi eaꞌ nilif nondaꞌ waf usiꞌifi datima.  
\v 10 Iꞌi apaꞌ miꞌi, “Apaꞌ owaꞌ mondaꞌ waf awafia”, apaꞌ mofala God maꞌi anen aman nagaꞌi basef basoꞌafii. Eaꞌ basef ananifi ina fape opalef apeꞌilifi, owaꞌatin.   
\c 2  
\s1 Krais aman nagatopalopapai  
\p
\v 1 Ipaꞌ alipipai aeꞌipai, aeꞌ okom maimailipa, andaꞌ basef ifimba fafeꞌmago ipaꞌ ma ina pendaꞌ waf awafi, owaꞌi. Apaꞌ iꞌi anin epen nendaꞌ waf awafi, anin anona nogatopalopani nape. Anen Jisas Krais boꞌona hililiꞌi. Anen nohaliꞌ Ahamana ma nogakwahoman waf awafi epen inimba okom mosoꞌanaf.\x * \xo 2:1 \xt Jo 1:29, 11:52; Kl 1:20; 1 Jo 4:10,14; Hi 7:25, 9:24\x*  
\v 2 Anen atona nahagofa okom numbutinai Godi nagaꞌ nakwaha waf awafi apeꞌifi. Apaꞌ ina nakwaha waf awafi apeꞌifi atef, owaꞌ. Anen nakwaha waf awafi ma epes hiasi itapasi okom masoꞌanaf.  
\v 3 Iꞌi apaꞌ mila basef Godi banagafi, apaꞌ mogawana endilisi.\x * \xo 2:3 \xt 1 Jo 1:6,8\x*  
\v 4 Epen ami niꞌi, “Aeꞌ egawa God andeandeꞌ”, ama anin owaꞌ nila basef Godia, anin nagambasoꞌami. Eaꞌ basef endilisifi ina fape opaf ananifi, owaꞌ.\x * \xo 2:4 \xt Jo 13:15; Jo 14:21,23; 1 Jo 4:12,17; 1 Jo 5:3\x*  
\v 5 Apaꞌ epen ami nila basef ananifi, anin okom peleleꞌ siꞌim maila God endilisi. Apaꞌ magawa apaꞌ mape sisihipama God naꞌamba.  
\v 6 Epen ami niꞌi, “Aeꞌ ape sisihiwi ma God”, feꞌ ananini nendataga usiꞌin siꞌi feꞌ Jisas Kraisi.\x * \xo 2:6 \xt 2 Jo 5-6; 1 Jo 2:24, 3:11\x*   
\s1 Epen ami okom mogamogaila sahin owan ananisii, inimba nape mogogalaꞌi  
\p
\v 7 Alipipai aeꞌipai, aeꞌ okom maimailipa. Deiꞌ aeꞌ andaꞌ basef ifimba fafeꞌmago ipaꞌ, ina anin muꞌuli dambaini, owaꞌatin. Aeꞌ aꞌipipa muꞌuli inimba atin fowaꞌini, fowaꞌ dambadamba pegegawani. Muꞌuli inimba basef ipaꞌ pagameꞌ eaꞌi.\x * \xo 2:7 \xt Jo 13:34; Ro 13:12; Jo 1:9\x*  
\v 8 Apaꞌ basef banagafi ma muꞌuli inimba deiꞌ andaꞌef fagafeꞌmago ipeꞌi, ifimba dambaifi. Eaꞌ fataga alihifa Krais nagiꞌmif deiꞌ ipaꞌ wapani pagiꞌmif. Deiꞌ main, akot deiꞌ taꞌi peleꞌetata eaꞌ mogogalaꞌi endilisimi mataga mape eaꞌ.\x * \xo 2:8 \xt 1 Jo 3:10,15; 1 Jo 4:20\x*   
\p
\v 9 Epen ami niꞌi, “Aeꞌ ape mogogalaꞌi,” ama anin opaf aofa sahin owan ananisi, epen inimba ataꞌ nape akot atapin.\x * \xo 2:9 \xt Jo 11:9; Ro 14:13\x*  
\v 10 Epen ami okom magamagaila esis sahin owani, anin nagape mogogalaꞌii. Eaꞌ epen inimba ina ataꞌ anef waf awafi fapain fandaꞌan newa, owaꞌatin.\x * \xo 2:10 \xt Jo 11:10, 12:35\x*  
\v 11 Apaꞌ epen ami opaf awasifa sahin owan ananisi niꞌi bousi, epen inimba ataꞌ nape akot eaꞌ nafeꞌ akot atona nasopama naep ananipi. Eaꞌ ina nati ufiaꞌw negawaꞌw, owaꞌatin.\x * \xo 2:11 \xt 1 Ko 6:11\x*  
\v 12 Ipaꞌ awasi aeꞌipai, God nakwaha waf awafi ipeꞌifi hiꞌalafa agol Kraisi okom masoꞌanaf. Isimba atis deiꞌ andaꞌ basef ifimba fafeꞌmago ipaꞌ.\x * \xo 2:12 \xt 1 Jo 1:1\x*  
\v 13 Ipaꞌ ahape, apegawa aman anamba andeandeꞌ fowaꞌ dambadamba nape atapina. Eaꞌ deiꞌ andaꞌ basef ifimba fafeꞌmago ipaꞌ. Ipaꞌ amam saꞌupai, ipaꞌ patofa wandafa aman aunai pikilaꞌana. Isimba atis deiꞌ andaꞌ basef ifimba fafeꞌmago ipaꞌ.  
\v 14 Ipaꞌ awasi, apegawa Ahamapa andeandeꞌ. Eaꞌ deiꞌ andaꞌ basef ifimba fafeꞌmepago. Ipaꞌ ahape apegawa aman anamba fowaꞌ dambadamba nape nafiꞌi nafiꞌi atapina nape. Isimba atis deiꞌ andaꞌ basef ifimba fafeꞌmepago. Eaꞌ ipaꞌ amam saꞌupai, ipaꞌ banagipai ma pendaꞌ waf buꞌwafi. Eaꞌ basef Godi fagape nomon opalef ipeꞌilifi deiꞌ patofa wandafa aman aunai pikilaꞌana. Eaꞌ deiꞌ andaꞌago basef ifimba ma ipaꞌ.\x * \xo 2:14 \xt Ro 8:7\x*   
\s1 Apaꞌ ina aꞌ ukup pipila waf itapafi, hapaifi  
\p
\v 15 Ipaꞌ ina aꞌ ukup pipila waf itapafi o anis hiahawes awasisi sagape itapi, owaꞌi. Iꞌi ipaꞌ ukup pigapigaila waf itapafi, ipaꞌ ina ukup paipaila Ahamapa, owaꞌatin.\x * \xo 2:15 \xt Ro 13:14; Je 4:16; 1 Pi 2:11\x*  
\v 16 Apaꞌ mogawa epes saloma hiahaom hiami magape itapi amamba naꞌamba. Hiahaom amamba opalef apimi mogohafemami maloma epes saloma hiahaom amamba epes satolom nelelemb kowagalamami maloma hiahaom amamba esis gagatomami ma anis satilis sagasaꞌma agof luꞌwagofasami, hiahaom amamba ina mafiꞌi Ahamapa, owaꞌatin. Amamba mataga itap apaꞌe.\x * \xo 2:16 \xt Mt 7:21; 1 Ko 7:31\x*  
\v 17 Waf itapafi feloma hiahaom hiami epes ukup pigahafemami owagama aꞌ higililam, apaꞌ epen mamahina nigaila basefa okom Godi, epen inimba aꞌ nepe lifilafi dondol.\x * \xo 2:17 \xt 1 Pi 4:7; Mt 24:5,24; 2 Jo 7\x*   
\s1 Bounai Kraisi nataga eaꞌ  
\p
\v 18 Ipaꞌ alipipai aeꞌipai aeꞌ okom magamagailipai, deiꞌ nemaf faꞌi aꞌ hiꞌilaf. Fowaꞌ ipaꞌ pameꞌ basefa bounai Kraisi naꞌi nogataga. Apaꞌ deiꞌ bousi ananisi hiasi asataga eaꞌ. Eaꞌ apaꞌ mogawa deiꞌ nogota taꞌi ahiꞌilata.\x * \xo 2:18 \xt Ap 20:30; 1 Ko 11:19\x*  
\v 19 Epes isimba sakwaha apaꞌ eaꞌ. Fowaꞌ epes isimba ina aꞌ apeꞌisi siꞌisi, owaꞌ. Iꞌi apeꞌisi siꞌisiai, esis asope solomapa atapis. Apaꞌ owaꞌ, owaꞌatin. Esis asakwahepa eaꞌ. Isimba atis deiꞌ apaꞌ mogawas andeandeꞌ, epes isimba hiasi owaꞌ miniꞌap apeꞌipia.\x * \xo 2:19 \xt 1 Ko 2:15; 1 Jo 2:27\x*   
\p
\v 20 Apaꞌ ipaꞌ, Krais naseꞌepa Ambal buꞌunai Godi eaꞌ. Deiꞌ ipaꞌ hipai pegawa basef endilisifi eaꞌ.  
\v 21 Ipaꞌ ina pelelama basef ifimba endilisifi ma deiꞌ endaꞌmepago basef ifimbai, owaꞌ. Ipaꞌ apegawef. Eaꞌ pegawa basef basoꞌafi ina fawalapa basef ifimba endilisifi, owaꞌatin. Isimba atis deiꞌ andaꞌago basef ifimba ma ipaꞌ.\x * \xo 2:21 \xt 1 Jo 4:3; 2 Jo 7\x*  
\v 22 Aman nagambasoꞌmasi anen ami? Anen aman anamba nambasoꞌmas nagaꞌi Jisas ina Krais, God nasapaꞌana nagafiꞌii, owaꞌ. Aman anamba bounai Kraisi. Anen nowaꞌ alafugama Ahamapa naloma Nogamana wapani.\x * \xo 2:22 \xt Jo 5:23, 15:23; 1 Jo 4:15, 5:1; 2 Jo 9\x*  
\v 23 Epen ami negewaꞌ alafuga ma Nogamanai, anen newaꞌ alafugama Ahamana wapani. Eaꞌ epen mamahina nagasoꞌ opafa Nogamanai, Ahamapa nape nomona okom ananimi.   
\s1 Ambal buꞌunai Godi nawalipapa ma basef endilisifi  
\p
\v 24 Basef ifimba fowaꞌ dambadamba ipaꞌ pagameꞌafi, ifimba hapilaef ukup ipeꞌipi sisihif. Iꞌi ipaꞌ pihapila basef ifimba paliꞌ pagameꞌafi ukup ipeꞌipi sisihif, bola pepe sisihipama Nogamana noloma Ahamana mope atapim molomepa.\x * \xo 2:24 \xt Jo 3:15, 6:40\x*  
\v 25 Krais anaꞌipapa basef endilisifi banagafi, anen atiasi nosoꞌapa ambal namili mope andeandeꞌ lifilafi.  
\v 26 Aeꞌ andaꞌ basef ifimba fafeꞌmago ipaꞌ awalapa wafa epes isimbai saꞌi sogambasoꞌmipai.\x * \xo 2:26 \xt Jo 16:13\x*  
\v 27 Apaꞌ ipaꞌ, Krais naseꞌepa Spirit Ambal ananinai. Eaꞌ Ambal ananinai nape nalomepa ukup ipeꞌimi nomon. Isimba atis deiꞌ ipaꞌ ina gawa akepa ma anin epen negawalipipa, owaꞌatin. Spirit Ambal Kraisi nawalipapa ma hiahawes hiasi ina nambasoꞌmapa, owaꞌ. Deiꞌ ipaꞌ hapifa Krais pepe sisihipama anen.\x * \xo 2:27 \xt 1 Jo 3:2, 4:17\x*  
\v 28 Ahoꞌ, ipaꞌ awasi aeꞌipai, aeꞌ okom maimailipa aꞌi pendape sisihipama anen ama anaf notaga nondawalap, apaꞌ ina ambagof awagof, owaꞌ. Apaꞌ mulutu banagepa ma naep ananipi.\x * \xo 2:28 \xt 1 Jo 3:7,10\x*  
\v 29 Ipaꞌ pegawa Krais anen buꞌunai hililiꞌ endilisi. Eaꞌ pegawa anif basef wapani, epes mamahisa sagaila waf buꞌwafi hililiꞌi, esis awasi Godi.   
\c 3  
\s1 Deiꞌ apaꞌ mape awasi Godi  
\p
\v 1 Awasi! Ahamapa God okom maimailapa aꞌowaꞌ. Eaꞌ anen nofalapa awasi ananipai. Endilisi atis, apaꞌ awasi ananipai atepa. Isimba sandaiwaꞌma Godi sagape itap apaꞌi, esis ina sogawa God, owaꞌatin. Isimba atis deiꞌ esis ina sogawa apaꞌ wapani.\x * \xo 3:1 \xt 2 Ko 3:18; Fl 3:21; Jo 1:12-13; Jo 16:3\x*  
\v 2 Ipaꞌ alipipai, aeꞌ okom maimailipa. Deiꞌ apaꞌ mape awasi Godi. Apaꞌ anaf mope miꞌimama, isimba atis apaꞌ ina deiꞌ mogawas, ataꞌ owaꞌ. Apaꞌ owaꞌ, owaꞌatin. Apaꞌ aꞌ mogawa, anafa Krais nogataga alihina, nemaf afamba, daoꞌ aꞌ motolona endilisi eaꞌ motaga mope siꞌi anen nagape.  
\v 3 Epes mamahisa sape sagahafa anen nogafiꞌii esis sape sandondomba opalef asasilifi lifilafi ma sogape boꞌwes hililiꞌ siꞌi Krais nagape.  
\v 4 Epen ami nandaꞌ waf awafii, anin negesambala muꞌuli Godi. Deiꞌ main, waf awafi atef afamba esis satopaꞌ muꞌuli inimba.\x * \xo 3:4 \xt 2 Ko 5:21; 1 Pi 2:22-24; 1 Jo 2:2\x*  
\v 5 Ipaꞌ pegawa Krais nataga ma nogakwaha waf awafi apeꞌifi hiꞌigalaf. Anen ina nandaꞌ anef waf awafi, owaꞌatin.\x * \xo 3:5 \xt Ro 6:1-2,14; 1 Jo 3:9\x*  
\v 6 Ea epen ami nape sisihin nagaloma anini, inimba ina ataꞌ nape naila waf awafi, owaꞌ. Iꞌi epen mamahina nigaila waf awafii, okom ananimi ina aꞌ nati Krais negawana, owaꞌatin.\x * \xo 3:6 \xt 1 Jo 2:29\x*   
\p
\v 7 Ipaꞌ alipipai aeꞌipai, solawaipa andeandeꞌ! Naꞌamba anin epen aꞌ nembasoꞌmepa. Epen ami nendaꞌ waf usiꞌifii, anin nape hililiꞌ siꞌi Krais nagape.\x * \xo 3:7 \xt Jo 8:44\x*  
\v 8 Satan nandaꞌ waf awafi fowaꞌ dambadamba nafiꞌi nafiꞌi deiꞌ ataꞌ nape atapina. Eaꞌ iꞌi epen mamahina nendaꞌ waf awafi atapin negapomafi, anin epen Satani. Nogamana Godi nafiꞌi nataga nandawalapa main? Ma nogahambombaga maol Satani.\x * \xo 3:8 \xt 1 Jo 5:18\x*  
\v 9 Epen ami nagape awani Godi, anin ina nape nandaꞌ waf awafi atapin, owaꞌatin. Deiꞌ main, okom Godi aꞌ nape opaf ananifi eaꞌ anin aꞌ awani Godi. Eaꞌ anin ina laꞌifina ataꞌ nendaꞌ waf awafi atapin, owaꞌatin.  
\v 10 Iꞌi apaꞌ miꞌi mogawa epen mamahina, nogamana Satani a mamahina Godi, apaꞌ mogogawas naꞌamba. Epen ami owaꞌ nendaꞌ waf usiꞌifia ma owaꞌ okom mogamogaila alipisi ananisia, anin ina epen Godi, owaꞌatin.\x * \xo 3:10 \xt Jo 13:34\x*   
\s1 Wafa nomonas sindaima atin endilisi ma sahin owan  
\p
\v 11 Basef fowaꞌ dambadamba ipaꞌ pagameꞌafi ifimba. Apaꞌ aꞌ ukup pindaila esis sahin owan endilisi.\x * \xo 3:11 \xt Jen 4:8\x*  
\v 12 Apaꞌ ina aꞌ mila waf Kaini, hapaifi. Kain wambota aman aunai Satani eaꞌ naha owamana Abel nagaꞌ. Deiꞌ maina nahana nagagaꞌ? Anen kowalana ma maol buꞌwani owamana nandaꞌani deiꞌ nahana nagaꞌ. Apaꞌ maol ananini awasini atin.\x * \xo 3:12 \xt Mt 5:11-12; Jo 5:18-19\x*  
\v 13 Ipaꞌ sahin owan aeꞌipai, iꞌi esis sagape itapi sogowaꞌ alafugaha Godi sindaiwaꞌmepa, ipaꞌ ina aꞌ gogolagalasipa, owaꞌi.\x * \xo 3:13 \xt Jo 5:24; 1 Jo 2:11; Mt 5:21-22\x*  
\v 14 Apaꞌ ukup pagapagaila esis sahin owani, isimba apaꞌ mogawas deiꞌ aꞌ makwahef eaꞌ waf afamba gaꞌifi eaꞌ mataga mofaꞌ ambal namili. Deiꞌ main? Apaꞌ ukup paipaila esis sahin owan endilisi. Epen ami owaꞌ okom mogamogaila anin sahin owania, anin ataꞌ nape atapina waf gaꞌifi.\x * \xo 3:14 \xt Re 21:8\x*  
\v 15 Epen ami okom numbutima sahin owan ananisi, anin siꞌi naha anis amam nematawa sagagaꞌi. Eaꞌ ipaꞌ pegawa epen naha anis sagagaꞌi, anin ina deiꞌ aꞌ nefaꞌ ambal namili lapaina negape andeandeꞌ lifilafi, ataꞌ owaꞌatin.\x * \xo 3:15 \xt Jo 13:1; Ga 1:4; 1 Te 2:8\x*  
\v 16 Waf afamba apaꞌ ukup pigapigaila anis daiasafi mogogawaf naꞌamba. Krais nakwaha ambal ananili ma nagatopalopapa. Isimba atis apaꞌ wapani aꞌ mondokwaha ambagof apeꞌimi ma mogatopalopa sahin owan apeꞌisi.\x * \xo 3:16 \xt Diu 15:7\x*  
\v 17 Iꞌi anin epen hiahaom hiamini ma nigati sahin owan hiahaom akani ma anin owaꞌ okom mimila sahin owana, epen inimba ina okom maimaila God, owaꞌatin. Deiꞌ maina epen inimba nagaꞌi, “Okom aeꞌami magamagaila God”? Owaꞌatin, anin nambasoꞌam.\x * \xo 3:17 \xt Je 2:15-16\x*  
\v 18 O, alipipai aeꞌipai, apaꞌ ina aꞌ ukup paipaila esis alipisi ma mugaꞌipasa basefa malogof atogof wafigufi, owaꞌatin. Apaꞌ ukup pindapindaila esis endilisi aꞌ motopalopas mondaꞌ waf buꞌwafi endilisifi mihimbaꞌmasaf.   
\s1 Epen nagahapifana endilisii, anin ina ombal mahana naep Godi, owaꞌ. Anin banagen nape.  
\p
\v 19 Iꞌi apaꞌ mondaꞌ waf afambai ma ukup pipila sahin owan apeꞌisi, apaꞌ mogawa maila basef endilisifi. Waf afamba fandaꞌ opalef apeꞌilifi awanelefa mogape banagepa ma naep Godi.  
\v 20 Iꞌi malogof fagape opalef nomoni fiꞌipapa fiꞌi apaꞌ mandaꞌ waf awafii, God dembinai aꞌ nikilaꞌ ukup apeꞌipi eaꞌ nagawa hiahaom hiami.\x * \xo 3:20 \xt Hi 4:16\x*   
\p
\v 21 Alipipai aeꞌipai, aeꞌ okom maimailipa. Iꞌi malogof fagape opalef nomoni owaꞌ fowalapa anef waf awafi fiꞌipapaia, daoꞌ mefeꞌma God opalef apeꞌilifi awanelef mope banagepa.\x * \xo 3:21 \xt Mt 21:22\x*  
\v 22 Iꞌi apaꞌ miꞌi mondabeten mogahaliꞌana ma anis hiahawes, anen nogasoꞌapasi. Deiꞌ main, apaꞌ maila okom ananimi eaꞌ mandaꞌ hiahawes anen sonahana ma apaꞌ mondaꞌasi.\x * \xo 3:22 \xt Jo 6:29, 13:34\x*  
\v 23 Basef banagafi Godi faꞌi naꞌamba faꞌi apaꞌ mondahapifa agol nogamanai Jisas Krais eaꞌ ukup apeꞌipi pindapindaima atin siꞌi anen nagaꞌipapa dindinip.\x * \xo 3:23 \xt Ro 8:9; 1 Jo 4:13\x*  
\v 24 Epen mamahina nigaila basef Godi banagafi, anin nepe sisihin neloma God eaꞌ God nope sisihina noloman. Anen aꞌ nasoꞌapa Spirit Ambal buꞌunai ananinai eaꞌ deiꞌ mogawa God nape sisihina nalomapa.   
\c 4  
\s1 Basef biafifa Ambal buꞌunai Godi naloma ambal aunai lagambasoꞌami  
\p
\v 1 Alipipai aeꞌipai, amom profet magambasoꞌami mafeꞌagon anamba itap hiagoma. Ipaꞌ ina pihapifa epes isimba hiasi sagaꞌi, “Aeꞌ Ambal buꞌwali Godi nagapauwai.” Owaꞌ. Ipaꞌ ataꞌ pegwamba ambagof amamba hiami pendendomam ama pegegawa amom mataga mafiꞌi Spirit Ambal Godi aꞌa owaꞌ.\x * \xo 4:1 \xt 1 Ko 12:3; Mt 7:15; 1 Jo 2:18; 2 Jo 7; 1 Te 5:21\x*  
\v 2 Ipaꞌ pegegawa Ambal Godi naꞌamba. Epen mamahina niꞌi, “Endilisi, Jisas Krais nafiꞌi nataga epen endilisinai”, epen inimba Ambal Godi napain opaf ananifi.\x * \xo 4:2 \xt 1 Jo 2:18; 2 Jo 7\x*  
\v 3 Apaꞌ epen ami owaꞌ nigaꞌias naꞌambai ma Kraisia, Ambal Godi ina nape anin, owaꞌatin. Ambal nagape epen inimbai anen bounai Kraisi. Fowaꞌ pagameꞌ basefa Spirit ambal bounai Kraisi nogafiꞌi, deiꞌ aꞌ nafiꞌi nape eaꞌ itap apaꞌe.\x * \xo 4:3 \xt Mt 12:29; 1 Jo 5:4-5\x*   
\p
\v 4 Ipaꞌ alipipai aeꞌipai, ipaꞌ epes Godi eaꞌ pandaꞌ wandaf paloma amom profet awami magambasoꞌami pikilaꞌam. Deiꞌ main, Ambal Godi nagape nomon opalef ipeꞌilif anen banagonai nikilaꞌ aman aunai nagape itap apaꞌii.\x * \xo 4:4 \xt Jo 15:19\x*  
\v 5 Epes isimba sagaila waf itapafii sagaꞌi basef itapafi atifii, epes itapasi sahapifas. Deiꞌ main, esis isimba itapasi atis.\x * \xo 4:5 \xt Jo 8:47\x*  
\v 6 Apaꞌ apaꞌ, epes Godi. Epen mamahina negegawa Godi, anin nemeꞌ basef apeꞌifi. Apaꞌ epen ami owaꞌ epen Godia, inimba ina nameꞌ basef apeꞌifi, owaꞌatin. Eaꞌ isimba atis deiꞌ ametal inimba nihimbaꞌmapa ma mogogawa epes isimba. Iꞌi Ambal Godi endilisinai nupais, asemeꞌ basef apeꞌifi. Apaꞌ iꞌi ambal nagambasoꞌami nupais, ina semeꞌ apaꞌ, owaꞌ.\x * \xo 4:6 \xt 1 Jo 2:29\x*   
\s1 God okom maimailapa aꞌowaꞌ  
\p
\v 7 Ipaꞌ aeꞌ okom magamagailipai, apaꞌ atepa aꞌ ukup pindaima atin. Deiꞌ main, waf afambai fafiꞌi God. Epen ami okom magamagaila sahin owani, anin awani Godi eaꞌ deiꞌ negawa God aꞌ naila basef ananifi.\x * \xo 4:7 \xt 1 Jo 4:16\x*  
\v 8 Epen ami owaꞌ okom mogamogaila sahin owania, anin ina negawa God, owaꞌ. Deiꞌ main, God okom magamagaila epes hiasii.\x * \xo 4:8 \xt Jo 3:16\x*  
\v 9 God aꞌ nihimbaꞌmapa anen okom maimailapa naꞌamba. Anen nasapaꞌ Nogamana ananinai atotona nafiꞌi itap apaꞌe ma apaꞌ mogofaꞌ ambal namili ma anen.\x * \xo 4:9 \xt Ro 5:8-10; 1 Jo 2:2\x*  
\v 10 Basef kofagefa ma God okom magamagaila apeꞌi ifimba. Apaꞌ ina maliꞌ ukup paipailana, owaꞌatin. Anen naliꞌ okom maimailapa eaꞌ nasapaꞌ Nogamana ananinai nafiꞌi ma nandaꞌ okom numbutimi Godi magaꞌ nakwaha waf awafi apeꞌifi okom magasoꞌanaf.\x * \xo 4:10 \xt Mt 18:33\x*  
\v 11 Ipaꞌ alipipai, waf afamba atef fihimbaꞌmapa God okom maimailapa aꞌowaꞌ. Eaꞌ apaꞌ wapani ukup pindaima atin endilisi.\x * \xo 4:11 \xt Jo 1:18; 1 Jo 2:5-6\x*  
\v 12 Ina anin epen nati God, owaꞌatin. Iꞌi apaꞌ atepa ukup pindaima atin, God nope sisihina ma apaꞌ eaꞌ okom ananimi magamagaila apeꞌi atiasi mope molomapa opalef apeꞌilifi nomona mondaꞌas naꞌamba atin ukup pindaima.\x * \xo 4:12 \xt 2 Ko 1:22; 1 Jo 3:24\x*   
\p
\v 13 Deiꞌ apaꞌ mogawa eaꞌ mape sisihipa maloma God eaꞌ nape nalomapa. Deiꞌ main? Anen nasoꞌapa Ambal ananinai nape nalomapa.\x * \xo 4:13 \xt Jo 3:17\x*  
\v 14 Eaꞌ apaꞌ mogawa Ahamapa nasapaꞌ Nogamana ananinai ma nowambilai epes hiasi sagape itapi nokwahomas waf awafi sogotanimai ma anen. Apaꞌ mati hiahawes isimba ma anen nowambilai epes sogotanimai maꞌipasas.\x * \xo 4:14 \xt 1 Jo 5:5\x*  
\v 15 Epen ami negawalapa basef alihigima nigaꞌi, “Endilisi, Jisas anen Nogamana Godi”, God aꞌ nope sisihina noloman, anin wapani nape sisihina anen.\x * \xo 4:15 \xt 1 Jo 4:8\x*  
\v 16 Isimba atis deiꞌ apaꞌ mogawa mahapifa God anen okom maimailapa aꞌowaꞌ.  
\p God anen kofagonama okom magamagaila epes hiasii. Epen ami nape okom maimaila God naloma epes hiasi atapin, anin nape sisihin naloma God eaꞌ anen nape sisihina naloman.\x * \xo 4:16 \xt 1 Jo 2:28\x*  
\v 17 Waf ukup pigapigaila esis Kristen alipisi aꞌowaꞌ, afambai fataga beꞌef endilisi ma apaꞌ ina aꞌ mondafaꞌma nemaf afamba luꞌwafi ma God nogowalogapa, owaꞌatin. Deiꞌ main, anen napaipa nomon, eaꞌ mape itap apaꞌe siꞌi Krais nagape. Apaꞌ ina ombal mahapa ma nemaf afamba, owaꞌatin.  
\v 18 God okom maimailapa, apaꞌ wapani ukup paipailana. Eaꞌ ina ombal mahapa, owaꞌatin. Iꞌi waf afambai fetaga beꞌef endilisi ma apaꞌ, afamba eaꞌ fatofa waf ombal magahapamafi fewala hiꞌalaf. Deiꞌ main, kofagema ombal magahas, ombal mahasa hiahaom akafimi anaf God nowalogasa waf awafi nogasoꞌasami. Epen mamahina ombal mogahani, waf okom mogomogaila God ina fataga beꞌef endilisi ma anin, ataꞌ owaꞌatin.   
\p
\v 19 God naliꞌ okom maimailapa aꞌowaꞌ. Isimba atis deiꞌ apaꞌ ukup paipaila anen naloma epes hiasi wapani.  
\v 20 Iꞌi anis epes siꞌi, “Apaꞌ ukup paipaila God,” ama iꞌi esis ukup wandafuma Kristen alipisi, epes isimba sagambasoꞌami. Deiꞌ main? Ina anin epen atitin aꞌ nati God, owaꞌ. Epen ami nati alipini ananini ma owaꞌ okom mogomogailania, epen inimba ina laꞌifina okom mogaila God owaꞌ nogatolona naepia, owaꞌatin.\x * \xo 4:20 \xt Mt 5:44-45; Mk 12:29-31\x*  
\v 21 Basef ifimba Krais nagaꞌipapaef dindinipi ifimba. Epen ami okom magamagaila Godi, epen inimba okom mondaila sahin owan ananisi wapani.   
\c 5  
\s1 Epes sagahapifanai satalogofa waf itapafi  
\p
\v 1 Epen mamahina nagahapifa Jisas anen Krais God nasapaꞌana nagafiꞌii, epen inimba awani Godi. Eaꞌ epes mamahisa ukup pagapagaila ahamas atotonai, esis ukup paipaila awasi ananisi wapani.\x * \xo 5:1 \xt 1 Jo 4:15\x*  
\v 2 Iꞌi apaꞌ ukup pipila God mila basef banagafi ananifi, atiasi waf afambai apaꞌ mogawa ukup paipaila awasi ananisi wapani.\x * \xo 5:2 \xt Jo 14:15,23-24; 2 Jo 6; Mt 11:30\x*  
\v 3 Waf kofagefa ma apaꞌ ukup pigapigaila Godafi afamba. Apaꞌ mondaila basef lo banagafi ananifi, ina ahifif aꞌowaꞌ, owaꞌatin.\x * \xo 5:3 \xt Jo 16:33\x*  
\v 4 Deiꞌ main, awasi mamahisa Godi isimba laꞌifis sagatalogofa waf itapafii. Apaꞌ mahapifa God deiꞌ waf afambai apaꞌ mikilaꞌ wandaf matalogofa waf itapafi awafi.\x * \xo 5:4 \xt Ro 8:37; 1 Jo 4:4\x*  
\v 5 Epen ami nikilaꞌ wandafa waf awafi eaꞌ natalogofa waf itapafi? Epen nagahapifa Jisas nagaꞌi anen Nogamana Godii, anin atin nikilaꞌaf.\x * \xo 5:5 \xt Jo 1:29-34\x*   
\s1 God nawalapa basef alihifa Nogamana Ananinai  
\p
\v 6 Jisas Krais maꞌuna aman anamba aꞌ nafiꞌi. Eaꞌ anen nofaꞌ baptaisa embel, ama main sahana nagaꞌ esimbel ananimbeli balo. Anen ina nafiꞌi ma waf embeli atef, owaꞌ. Anen nafiꞌi ma waf embeli esimbel endilisifi. Ambal buꞌunai Godi kofagonama waf endilisifi hiꞌalaf. Eaꞌ Ambal anamba nawalipasa basef ifimba ma Krais endilisifi.\x * \xo 5:6 \xt Jo 15:26\x*  
\v 7-8 Spirit Ambal Godi naloma embel esimbel isimba wanifis sawalapa basef kofagefa atifif.\x * \xo 5:7-8 \xt Jo 5:32-37; Jo 8:18\x*  
\v 9 Apaꞌ mahapifa basef epes sagawalipasafi. Apaꞌ basef God nagawalipapafi banagef fikilaꞌ basef epesi. Deiꞌ main, basef ifimba faꞌi Nogamana ananinai.\x * \xo 5:9 \xt Ga 4:6\x*  
\v 10 Eaꞌ epen ami nagahapifa Nogamana Godi, basef ifimba endilisifi fape nomon okom ananimi. Apaꞌ epen ami owaꞌ nigahapifa Godia, epen inimba naꞌi God aman nagambasoꞌami. Deiꞌ main, epen inimba ina nahapifa basef ifimba God nagaꞌifa Nogamana ananinai, owaꞌ.  
\v 11 Eaꞌ basef ifimba endilisifi naꞌamba. God aꞌ nasoꞌapa ambal namili ma mogape andeandeꞌ lifilafi dondol. Ambal namili alamba anen nasoꞌapala Nogamana ananinai atona.\x * \xo 5:11 \xt Jo 3:36\x*  
\v 12 Epen ami negape sisihina negaloma Nogamanai, inimba deiꞌ nefaꞌ ambal namili. Apaꞌ ami owaꞌ nepe sisihina Nogamana Godia, inimba ina nefaꞌ ambal namili ma negape andeandeꞌ lifilafi, owaꞌatin.\x * \xo 5:12 \xt Jo 20:31\x*   
\s1 Apaꞌ mogawa eaꞌ apaꞌ mofaꞌ ambal namili  
\p
\v 13 Aeꞌ andaꞌ basef fafeꞌmago ipaꞌ pagahipifa agol Nogamana Godi. Andaꞌefa ipaꞌ pegegawa deiꞌ apefaꞌ ambal namili pape andeandeꞌ.\x * \xo 5:13 \xt Jo 14:13, 16:23; 1 Jo 3:21-22\x*  
\v 14 Apaꞌ mogawa, iꞌi apaꞌ mila okom Godi atom mondabetena hiahawes mamahisa hiasi, anen atiasi nogameꞌ beten apeꞌinii. Eaꞌ nemaf mamahefa mefeꞌ felefeleꞌma anen mondabeten, ina ombal mohapa ma anen, owaꞌ. Ukup apeꞌipi pepe banagepa.  
\v 15 Apaꞌ mogawa anen nagameꞌ betena hiahawes mamahisa dei magahaliꞌanamasi. Eaꞌ mogawa deiꞌ aꞌ mape siꞌi mogofaꞌ hiahawes isimba eaꞌi.\x * \xo 5:15 \xt Mt 12:31\x*   
\p
\v 16-17 Waf hiafi hiꞌalaf owaꞌ usiꞌifia afamba waf awafi. Epes sandaꞌ waf awafii sawala basef Godi banagafi. Apaꞌ waf hiafi awafi ina fendaꞌ epes sogagaꞌ lamonasi, owaꞌ. Iꞌi anin epen niti anin sahin owan ananini nendaꞌ anef waf awafi owaꞌ fendaꞌ epen inimba negaꞌ higililana, epen inimba nandaꞌ waf afambai aꞌ nendandaꞌ betena Goda, nogasoꞌan ambal namili. Endilisi, anef waf atetef awafi fandaꞌ epes sogagaꞌ lamonasi. Aeꞌ ina aꞌipipa ma pendabetena epes sandaꞌ waf afambai, owaꞌ.\x * \xo 5:16-17 \xt 1 Jo 3:9; Jo 17:5\x*   
\p
\v 18 Apaꞌ mogawa epes mamahisa sagape awasi Godi, esis ina sape sandaꞌ waf awafi atapis, owaꞌatin. Deiꞌ main, nogamana Godi numafias andeandeꞌma banagami ananimi ma aman aunai ina nohambombagas, owaꞌatin.\x * \xo 5:18 \xt 1 Jo 4:6\x*  
\v 19 Apaꞌ mogawa apaꞌ awasi Godi, apaꞌ isimba owaꞌ awasi Godia sape lafela aman aunai Satan dembinai asasinai.\x * \xo 5:19 \xt Jo 17:3\x*   
\p
\v 20 Apaꞌ mogawa Nogamana Godi nafiꞌi ma nosoꞌapa gawa ma mogogawa anen God endilisinai. Apaꞌ mape sisihipa ma anen endilisinai naloma Nogamana ananinai Jisas Krais. God anamba endilisinai anen kofagonama ambal namili mogape andeandeꞌ lifilafii.\x * \xo 5:20 \xt 1 Ko 10:14\x*   
\p
\v 21 Awasi aeꞌipai, ipaꞌ pewaꞌ alafugaha god basoꞌamunai eaꞌ pendape banagepa.