\id REV  - Filifita NT (Mufian Fulifita -Ilahita Dialect) [aojF] -Papua New Guinea 1998 (DBL 2013) 
\h KAMAPIM TOK HAIT 
\toc1 Basef Amama Jisas Krais Nihiꞌambamanam Jon Ma Amamaga Anona Nemaf Migꞌi Meatagai 
\toc2 Kamapim Tok Hait 
\toc3 Re 
\mt1 Basef Amama Jisas Krais Nihiꞌambamanam Jon Ma Amamaga Anona Nemaf Migꞌi Meatagai  
\imt1 Basef bandami Jisas Krais nihiꞌamba Jon ma amamaga migiꞌ meatagai  
\io1 1:1-8 Jon nandaꞌ basefa naꞌoh nandondoꞌoh natolomi mafeꞌma esis sios 7-peleim nafela agel Jisas Kraisi luꞌuna  
\io1 1:9–3:22 Jon nati Jisas Krais nafifil endilisi eaꞌ nandaꞌ basef ananimi mafeꞌma esis Kristen hiesi sape sios 7-peleim  
\io1 4:1–8:1 Jon nati heven ilif nati Jisas Krais naloma Ahalomana God maloma ensel hiami eaꞌ nati Jisas natagaha tep 7-peleim  
\io1 8:2–11:19 Jon nati ensel 7-peleim mufapula alelef mandandam  
\io1 12:1–13:18 Satan anona nemaf nopaꞌ noloma ensel Godi hiami miliꞌamonana nisilaꞌi etap anaeꞌ  
\io1 14:1–15:8 Jon nati Jisas anona nemaf nondati siꞌi sipsip noganai noloma ensel wanom moha epes sowaꞌ alafugaha Godi kwapeteꞌas  
\io1 16:1-21 Jon nati anom ensel 7-peleim mahapila maloh mandandam  
\io1 17:1–19:21 God anona nemaf nogwamasa waf aonai epes isima wambel Babilon, eaꞌ Krais nifiꞌi nandati siꞌi aman natoma hos afitinai nafiꞌi  
\io1 20:1–20:15 Satan nandaꞌ kalabus nope hul launai laꞌelaꞌef hihif, eaꞌ God nowaloga epes hiesi  
\io1 21:1-27 Jerusalem dambaiguma  
\io1 22:1-6 Walemb ambal namunai napaimi maloma lawah mola suꞌutip buꞌwami epes sagwaꞌam sefaꞌ ambagof namumi  
\io1 22:7-21 Basef Jisas Kraisi akutaimi nofala epes hiesi sifiꞌmai Anan  
\c 1  
\p
\v 1 Fowaꞌ gani basef amama mape mandambahoꞌ eaꞌ deiꞌ Jisas Krais nandaꞌam mandawalap alihim. God naseꞌanam Jisasa nowalapam nihiꞌambapa anom mandaꞌmana opeh Godi ma mowalapa amamaga mape mandambahiꞌi motaga ulal. Anan naseꞌe gawa afaꞌ wandaꞌ opeha Anan ma amamaga amama. Eaꞌ deiꞌ nasapaꞌ ensel ananinai nafiꞌmai aeꞌ Jon. Aeꞌ deiꞌ andaꞌmana maol Godi, eaꞌ Anan naseꞌe basef amama aeꞌ wapotiꞌ.  
\v 2 Aeꞌ atolom eaꞌ amamaga amama awalapam aꞌiam alihim basef Godi maloma basef amama endilisimi Jisas Krais nandaꞌami mandawalap alihim.   
\m
\v 3 Emi egafis setalifa basef amama Godi mail buk anama ma malogof asasimi ma amamaga anona nemaf migiꞌ meatagai, esis God nondaꞌas sondanifel. Eaꞌ emi egafis someꞌ basef amama ma ukup asasimi, esis sondanifel wapotiꞌ. Deiꞌ main, nemafa amamaga amama migiꞌ meatagai felefeleꞌma motaga.   
\p
\v 4-6 Aeꞌ Jon andaꞌ basef amama ma ipeꞌ Kristen pape wambel 7-peleimi etap hiagoma Esia. God fowaꞌ gani nape, deiꞌ nape, anona nemaf owagama nope laꞌelaꞌef hihif. Anan naloma Jisas Krais maloma ambagof buꞌwami 7-peleim mape felefeleꞌma balata buꞌunai Godi. Aeꞌ aꞌi amam migiambamepa naꞌa mondaꞌepa petaga laꞌifipa moseꞌepa opalef awanem. Jisas Krais Anan naila basef ananimi nandaꞌ maol ananinai andeandeꞌ. Eaꞌ nawalapa basef hiami Godi andeandeꞌ. God naliꞌ nafelona nohafel hiꞌagif. Eaꞌ nape naliꞌma anona nemaf esis sagaꞌi God nofelas sohafel wapotiꞌ. Jisas Krais Anan atona dembinai numafi amam king Dembemi mape etap.  
\p Anan atona okom luꞌunai nainaila apeꞌ hiapai, ma esimbel ananimi atom natagahepa ma waf aonai apeꞌ mandaꞌanai mataga wafifipa. Anan atona nandaꞌapa deiꞌ mape dembipai malomana mumafi epes hiesi siꞌi amam king. Eaꞌ nandaꞌapa mape pris siꞌi mondolalima God mandaꞌ opeha God Ahalomana ananinai. Aeꞌ aꞌi nafifili noloma pepel hianai Ananinai atona nope laꞌelaꞌef hihif. Endilisi.   
\p
\v 7 \x * \xo 1:7 \xt Mt 24:30; Jo 19:34,37\x*Piti, Anan laꞌifinai anona nemaf nifiꞌi noloma otaga esis hiesi sotolona naep asasimi eaꞌ epes isima fowaꞌ sahana wambaꞌwi sotolona wapotiꞌ. Amama atom esis amam nematawa hiesi sape etapi sotolona sogawa solopana kwapeteꞌas ma waf aonai esis sandaꞌanai. Amama anona nemaf motaga naꞌama. Endilisi.  
\v 8 \x * \xo 1:8 \xt Re 1:4; 15:3; Re 21:6; 22:13\x*Dembinai God pepel hiamunai Anan naꞌiam naꞌama naꞌi, “Aeꞌ atowe ape Dembiwei laꞌelaꞌef hihif ape aliꞌi, ape agiꞌi endilisi.”  
\p Eaꞌ Aeꞌ atowe fowaꞌ gani ape, deiꞌ ape, anona nemaf owagama etanima ifiꞌi.   
\s1 Jon nati Krais, God nandandepana nasapaꞌana nafiꞌi  
\p
\v 9 \x * \xo 1:9 \xt Re 6:9\x*Aeꞌ Jon sahalomepa ipeꞌiwei. Aeꞌ alomepa, apeꞌ hiapai Jisasi atepa mape laꞌifipa malomana. Aeꞌ alomepa mandaoꞌoma mofaꞌ nimanimi ma muwis wambota Godi numafiapa. Apeꞌ mape laꞌifipa maloma Jisas eaꞌ ape alomepa mandaoꞌoma apeꞌ hiapai mape soꞌumbel mape maitu laꞌifipa naꞌama etina mofaꞌ nimanimi. Aeꞌ awalapa basef Godi maloma basef endilisimi ma opeh Jisas nandaꞌami. Amama atom deiꞌ esis sandaiwaꞌme sagaloꞌme afiꞌi ape ailan agiliguma saꞌi Patmos.\f + \fr 1:9 \ft  Jon nape ailan Patmos siꞌi sandaꞌ kalabusimana nape.\f*   
\m
\v 10 Anona nemaf Dembinai Sande Ambal Buꞌunai Godi numafi aeꞌ ameꞌ anona maf naꞌi mehip nandameꞌ siꞌi safapula alof, naꞌi nataga alafuga aeꞌanai.   
\p
\v 11 Eaꞌ naꞌipi naꞌi, “Ineꞌ daꞌa basefa amamaga amama nambimb neatulumi mil buk. Eaꞌ nendaꞌ basef amama mil buk anama mefeꞌ amam nematawa Godi sios 7-peleim sape wambel anama 7-peleina atona etin. Wambel anama agofuguma amama. Efesus, Smerna, Pergamum, Taiataira, Sardis, Filadelfia, Laodisia.”   
\p
\v 12 Eaꞌ aeꞌ andamboma aꞌi iti anama naꞌipa aeꞌi. Eaꞌ ati lamifah 7-peleim matoma gol 7-peleim.  
\v 13 \x * \xo 1:13 \xt Dan 7:13; 10:5\x*Laꞌafena gol amama ati anona aman nalomam naitu. Anan nandati siꞌi anona dembinai nataga epen endilisinai. Nala luwaguf laumi mowala mambahoꞌwa boꞌwagah ananimi eaꞌ nowahoꞌ let sandaꞌ gol sandaꞌanai mafata ananinai.  
\v 14 \x * \xo 1:14 \xt Dan 7:9; 10:6\x*Balaga naloma auf malonai afitim endilisi siꞌi auf malo sipsipi o siꞌi elagw amama afitimi. Naep ananimi fandom siꞌi nif ilelowa.  
\v 15 Eaꞌ boꞌwagah ananimi mandaꞌ gambigambis endilisi mandati siꞌi bras kapa batafunai saofam nif luꞌwami. Eaꞌ ameꞌ malogel ananinai nandaꞌam siꞌi embel mawis mehip kululuꞌ etin.  
\v 16 \x * \xo 1:16 \xt Hi 4:12; Re 1:20; Re 2:12,16; Re 19:15,21\x*Anan nahapila ondowa 7-peleim nahapilam lagel daꞌisinai ananinai. Eaꞌ anona bainat hiꞌalina waꞌowaꞌili nawisi nape malogel ananinai. Amaga ananinai nafifil endilisi siꞌi owaf naluwi laꞌifina.   
\p
\v 17 Aeꞌ atolona eaꞌ ewa aꞌoh felefeleꞌma boꞌwagah ananimi andati siꞌi agaꞌi. Eaꞌ anan nasa lagel daꞌisinai ananinai ma aeꞌ naꞌipi naꞌi, “Ineꞌ umbamehena owaꞌ. Aeꞌ ape dembiwei laꞌelaꞌef ape aliꞌi ape agiꞌi endilisi.  
\v 18 \x * \xo 1:18 \xt Ais 44:6; 48:12; Re 2:8; 22:13\x*Fowaꞌ agaꞌ, eaꞌ deiꞌ ape namowe laꞌelaꞌef hihif. Aeꞌ ape Dembiwei aliꞌ ape agiꞌ ma amamaga hiami maloma epes. Eaꞌ ahapila ki ma wambel sagaꞌi sapoma.  
\v 19 \x * \xo 1:19 \xt Re 1:1\x*Eaꞌ aeꞌ aꞌi ineꞌ nendaꞌ basefa amamaga amama deiꞌ ineꞌ natulumi, nendaꞌ basefa amamaga amama deiꞌ mapani maloma amamaga anona nemaf migiꞌ meatagai wapotiꞌ nendaꞌam mil buk.  
\v 20 \x * \xo 1:20 \xt Re 1:16; 2:1; Re 3:1\x*Ineꞌ nati ondowa awama 7-peleim wape lagel daꞌisinai aeꞌanai waloma lamifah amama 7-peleim matoma gol amama 7-peleim. Amama mondolaꞌwifi atom. Basef ofagema amama. Ondowa mondolaꞌwifa ensel mumafi sios amam nematawa hiesi Godi 7-peleim, eaꞌ gol amama mondolaꞌwifa sios amam nematawa Godi amama 7-peleim.   
\c 2  
\s1 Basef mafeꞌma esis Kristen sape Efesusi  
\p
\v 1 \x * \xo 2:1 \xt Re 1:16,20\x*Ineꞌ daꞌa anom basef mofeꞌma ensel anama numafi sios amam nematawa Kristen sape Efesusi. Aeꞌ\f + \fr 2:1 \ft  Basef amama maꞌi Jisas Krais atona.\f*  
\m aman ahapila ondowa amama 7-peleim lagel aeꞌanai daꞌisinai afeꞌ laꞌafena gol amama lamifah matomami 7-peleim. Aeꞌ andaꞌmepago basef amama ipeꞌ.   
\p
\v 2 \x * \xo 2:2 \xt Re 2:19; Re 3:1,8,15; 1 Jo 4:1\x*Aeꞌ egawa amamaga maim ipeꞌ pandaꞌami opeh luꞌwami. Nimanimi matagamepa, paitu laꞌifipa laꞌelaꞌef, ina patanima, owaꞌ. Eaꞌ aeꞌ egawa ipeꞌ paitu laꞌifipa endilisi ma pandaiwaꞌma amama mandaꞌ waf aonai. Ipeꞌ pawaloga amam amama mambasoꞌami maꞌi amam aposel, patolom pegawa amam ina aposel, owaꞌ. Amam mambasoꞌami.  
\v 3 Ipeꞌ paitu laꞌifipa laꞌelaꞌef ma epes isima sandaiwaꞌma agel aeꞌanai ma sandaꞌmepa waf aonai, ina patanima, owaꞌ. Aeꞌ egawa ipeꞌ pandaꞌ opeh aeꞌami luꞌwami laꞌifipa eaꞌ ina umbamahepa pakwahom, owaꞌetin. Ipeꞌ paitu laꞌifipa pefaꞌ nimanimi amama.  
\v 4 Eaꞌ deiꞌ anom basef awami mapomepa. Fowaꞌ dambadamba ukup ipeꞌimi maimaila Aeꞌ pembaleꞌefa Aeꞌ andeandeꞌ, eaꞌ deiꞌ owaꞌetin.  
\v 5 \x * \xo 2:5 \xt Re 2:16,22; Re 3:3,19\x*Deiꞌ ukup miꞌiꞌ waf anama buꞌunai fowaꞌ paliꞌ pandaꞌanai. Eaꞌ pemboma opalef pilana pendaꞌana pigiꞌmana wapotiꞌ siꞌi fowaꞌ dambadamba pandaꞌana. Iꞌi ipeꞌ owaꞌ pemboma opalef, anona nemaf aeꞌ ifiꞌi etagamepa iliꞌamona gol amama ipeꞌimi lam natamonomi.  
\v 6 \x * \xo 2:6 \xt Sam 139:21\x*Eaꞌ deiꞌ anona waf buꞌunai ataꞌ napaipa. Enis epes hiesi agel saꞌi Nikolas Aeꞌ andaiwaꞌ endilisi ma waf esis sandaꞌanai, eaꞌ ipeꞌ wapotiꞌ pewaꞌ alafugahas pandaiwaꞌ endilisi ma waf esis sandaꞌanai.   
\p
\v 7 \x * \xo 2:7 \xt Jen 2:9; Re 22:2,14,19\x*Ipeꞌ emi egafipa aligah mapaipei pemeꞌ andeandeꞌ basef amama Ambal Buꞌunai Godi nawalapama sios esis amam nematawa Godi!  
\p Emi egafis situ laꞌifis siliꞌamona wandafa waf aonai, anona nemaf Aeꞌ iꞌi ahoꞌma esis seaꞌ suꞌutip lawag anama epes seꞌam sofaꞌ ambagof namumi. Lawag anama notawa aof Godi agiliguma Paradais.   
\s1 Basef mafeꞌma esis Kristen sape Smernai  
\p
\v 8 \x * \xo 2:8 \xt Re 1:17\x*Ineꞌ daꞌa anom basef mofeꞌma ensel numafi sios esis amam nematawa Godi sape Smernai. Aeꞌ\f + \fr 2:8 \ft  Niti futnot Kamapim Tok Hait 2:1.\f*  
\m ape Dembiwei laꞌelaꞌef hihif ape aliꞌ, ape agiꞌ endilisi. Fowaꞌ agaꞌ, deiꞌ ehafel wapotiꞌ ape namowe ambal napaiwe. Deiꞌ andaꞌmepago basef amama ipeꞌ aꞌi,  
\v 9 Aeꞌ egawa nimanimi amama matagamipei eaꞌ Aeꞌ egawa ipeꞌ pape kwahupei otamba hiahaom maim aꞌepa. Owaꞌetin. Ipeꞌ amamaga hiami maꞌomepa gani ilif heven. Aeꞌ egawa basef amama awami enis epes saꞌiama ipeꞌ. Amam nematawa isima sambasoꞌmepa saꞌi, ‘Afaꞌ Juda.’ Eaꞌ esis ina saila waf Judai, owaꞌ. Esis sambasoꞌmepa. Esis wambota Satani etis. Aeꞌ egawa amamaga amama.  
\v 10 Ipeꞌ ina umbamehepama nambimb pefaꞌ nimanimi, owaꞌ. Ipeꞌ pemeꞌ! Nambimb Satan nondaꞌ enipa pendaꞌ kalabusa nogwamba ipeꞌ pefaꞌ nimanimi amama nimeguf 10-peleim. Eaꞌ kwawieꞌ, ipeꞌ pembaleꞌefa Aeꞌ pitu laꞌifipa ma enis siꞌi sehepa pegaꞌ, pitu laꞌifipa pembaleꞌefa Aeꞌ. Ama Aeꞌ anona nemaf easeꞌepa ambal namunai ipeꞌ siꞌi amamaga buꞌwami esis sasagih sikilaꞌ sefaꞌami.  
\v 11 Ipeꞌ emi egafipa aligah mapaipei, pemeꞌ andeandeꞌ basef amama Ambal Buꞌunai Godi nawalapama esis amam nematawa Kristen. Emi egafis situ laꞌifisa siliꞌamona wandafa waf aonai, anona nemaf gaꞌ anama neafeꞌma bifi ina nohambombagas nondaꞌas sefeꞌ wambel aonai, owaꞌ.   
\s1 Basef mafeꞌma esis Kristen sape Pergamumi  
\p
\v 12 Ineꞌ daꞌa anom basef mofeꞌma ensel anama numafi sios amam nematawa Kristen sape Pergamumi. Aeꞌ ahapila bainat launai hiꞌalina waꞌowaꞌili. Eaꞌ andaꞌmepago basef amama ipeꞌ aꞌi,  
\v 13 Aeꞌ egawa wambel ipeꞌinai. Satan atona ataꞌ nape dembinai ma wambel anama. Eaꞌ ipeꞌ pahapila agel aeꞌanai laꞌifipei pembaleꞌefa Aeꞌ. Ipeꞌ ina pakwaha pembaleꞌefa Aeꞌ, owaꞌ. Fowaꞌ aman anama Antipas anan nawalapa basef Aeꞌami andeandeꞌ. Eaꞌ sahana nagaꞌ wambel ipeꞌinai Satan napoma. Eaꞌ nogota anama ipeꞌ ina pakwaha pembaleꞌefa Aeꞌ, owaꞌ.   
\p
\v 14 Eaꞌ Aeꞌ aꞌi iꞌipipa anom basefa waf aonai ipeꞌ pandaꞌanai deiꞌ ataꞌ napomepa. Enis amam nematawa sape salomepa Pergamum, esis ataꞌ saila waf anama siꞌi anona aman Balam fowaꞌ nandaꞌanai laꞌifis. Waf aman anama naꞌama. Fowaꞌ gani anan nihiꞌamba anona aman Balak nambasoꞌmana nandaꞌ esis amam nematawa Israelisi sowa sandaꞌ waf aonai. Eaꞌ Balak nafela ukup esis Israeli ma sagwaꞌ mafis maloma gwaꞌaimi amama sasoꞌ god basoꞌomunai sandaꞌ waf aonai soꞌa waolanai.  
\v 15 Eaꞌ naꞌama etin enis amam nematawa saloma ipeꞌ esis ataꞌ saila waf anama aonai enis epes hiesi saꞌi agel Nikolas sandaꞌanai.  
\v 16 Ipeꞌ pemboma opalef pekwaha waf aonai ipeꞌ pandaꞌanai. Iꞌi owaꞌ, Aeꞌ felefeleꞌ aꞌi etagamepa epaꞌ eloma epes isima owaꞌ somboma opalef sifiꞌmai aeꞌi ehas bainat nape malogel aeꞌanai.  
\v 17 Ipeꞌ aligah mapaipei pemeꞌ andeandeꞌ basef amama Ambal Buꞌunai Godi nawalapama esis amam nematawa Kristen. Emi egafis situ laꞌifisa siliꞌamona wandafa waf aonai, Aeꞌ anona nemaf eseꞌasa gwaꞌaimi Aeꞌami buꞌwami mandambahoꞌ mape heveni. Gwaꞌaimi amama agilima mana. Eaꞌ eseꞌasa anom otamba buꞌwami afitimi atona etin, eaꞌ endaꞌ anona agel namunai nil otamba amama. Ina enin epen negawa agel anama, owaꞌetin. Epen nefaꞌ otam anama, enin etin negawana.   
\s1 Basef mafeꞌma esis Kristen sape Taiatairai  
\p
\v 18 Ineꞌ daꞌa anom basef mofeꞌma ensel anama numafi sios amam nematawa Kristen sape Taiatairai. Aeꞌ nogalomana Godi, naep aeꞌami howalagon endilisi siꞌi nif fandom laꞌifim endilisi, boꞌwagah aeꞌami howalam gambigambis endilisi siꞌi bras howalagon.  
\v 19 Aeꞌ egawa ma waf hianai buꞌunai ipeꞌ pandaꞌanai. Aeꞌ egawa ipeꞌ ukup maimaila God naloma epes wapotiꞌ pembaleꞌefa Aeꞌ pandaꞌ opeh hiami pagiambama epes hiesi. Aeꞌ egawepa paitu laꞌifipa ma nimanimi matagamipei. Aeꞌ egawa maol anama buꞌunai ipeꞌ fowaꞌ pandaꞌanai. Ipeꞌ deiꞌ pandaꞌ maol anama buꞌunai hianai pikilaꞌ fowaꞌ pandaꞌanai.  
\v 20 Eaꞌ Aeꞌ anom basefa waf aonai ipeꞌ pandaꞌanai. Ipeꞌ pati nemataꞌw akwama Jesebel kwape kwalomepa. Akwaꞌw kwaꞌi, ‘Aeꞌ profet aꞌi basef Godi mandambahiꞌi.’ Owaꞌ, kwambasoꞌmepa kwawalipa ipeꞌ pandaꞌ maola aeꞌi pandaꞌ waf soꞌa waolanai aonai ma paꞌ gwaꞌaimi amama sondolali sasoꞌ god basoꞌomunai.  
\v 21 Aeꞌ aꞌi akwaꞌw komboma opaf, amama atom deiꞌ Aeꞌ ataꞌ animbaloꞌw kwape anom nimeguf, owaꞌetin. Akwaꞌw ina kwaꞌi komboma opaf kowaꞌ alafugama waf anama aonai soꞌa waolanai, owaꞌ.  
\v 22 Eaꞌ deiꞌ pemeꞌ! Nambimb ikwahoꞌw kowai balata eseꞌakwa nimanimi luꞌwami moloma bumbilita luꞌunai. Eaꞌ esis amam nematawa saila waf aonai akwaꞌunai wapotiꞌ sofaꞌ nimanimi amama. Iꞌi esis owaꞌ somboma opalefa sowaꞌ alafugaha waf anama sandaꞌanai, eseꞌas nimanimi amama luꞌwami.  
\v 23 \x * \xo 2:23 \xt Sam 7:9; Jer 17:20; 2 Ti 4:14; Re 20:12,13\x*Esis isima saila basef akwaꞌumi wapotiꞌ, nambimb ehas sogaꞌ. Ama esis amam nematawa hiesi Godi sogawa Aeꞌ awaloga nomonas maloma ukup epes hiesi andeandeꞌ. Eaꞌ anona nemaf egwamepa amamaga ipeꞌ atona etin, mondahama waf ipeꞌ pandaꞌanai.   
\p
\v 24 Deiꞌ aeꞌ aꞌi iꞌipipa anom basef ipeꞌ enipa amam nematawa pape wambel Taiatairai, ipeꞌ owaꞌ pila basef amama awami akwaꞌumi, owaꞌ pila waf anama sofalana saꞌi, ‘Basef mandambahiꞌi ma waf Satani,’ owaꞌ. Aeꞌ aꞌipipa naꞌama. Aeꞌ ina nambimb eseꞌepa anom nimanimi wapotiꞌ ma ipeꞌ, owaꞌ.  
\v 25 \x * \xo 2:25 \xt Re 3:11\x*Waf hianai buꞌunai ipeꞌ pagiꞌmanai, anama ipeꞌ pembaleꞌef laꞌifipa pefeꞌ ma petaga nogota Aeꞌ iefiꞌianai.  
\v 26-27 \x * \xo 2:26-27 \xt Sam 2:8,9\x*\x * \xo 2:26-27 \xt Re 12:5\x*Ipeꞌ emi egafipa pitu laꞌifipama wandafa piliꞌamona waf aonai ma pila okom Aeꞌanai pefeꞌ petaga nogota hiꞌilana, Aeꞌ anona nemaf eseꞌepa pepel ipeꞌ. Ama pepe dembipei ma amam nematawa hiesi. Naꞌama etin siꞌi fowaꞌ Ahalome naseꞌe pepel ma ape Dembiwei imafi epes hiesi. Ipeꞌ wapotiꞌ pepe dembipei pefaꞌ pepel pimafi enis amam nematawa wapotiꞌ naꞌama. Ipeꞌ pimafias laꞌifipa siꞌi anona aman nahapila kalamuta sandaꞌ ain sandaꞌanai, siꞌi anona aman nawala malep papalalana.  
\v 28 \x * \xo 2:28 \xt Re 22:16\x*Eaꞌ eseꞌepa ondoꞌw kuhumbitaiꞌwi lalaꞌwan.  
\v 29 Ipeꞌ emi egafipa aligah mapaipei pemeꞌ andeandeꞌ basef amama Ambal Buꞌunai Godi nawalapama esis amam nematawa Kristen.   
\c 3  
\s1 Basef mafeꞌma esis Kristen sape Sardisi  
\p
\v 1 \x * \xo 3:1 \xt Re 1:4,16; 2:2\x*Ineꞌ daꞌa anom basef mofeꞌma ensel anama numafi sios amam nematawa Kristen sape Sardisi. Aeꞌ\f + \fr 3:1 \ft  Niti futnot Kamapim Tok Hait 2:1.\f*  
\m ahapila anom ambagof buꞌwami Godi 7-peleim eaꞌ ahapila ondowa amama 7-peleim.  
\p Aeꞌ egawa waf hianai ipeꞌ pandaꞌanai. Esis saꞌi basefa ipeꞌ naꞌama saꞌi, ‘Ipeꞌ ambal napaipa.’ Owaꞌetin. Ipeꞌ siꞌi sagaꞌi.  
\v 2 Ipeꞌ hafel pekwaha paꞌoh pandondoꞌah! Waf hianai aonai ipeꞌ pandaꞌanai ataꞌ napaipa laꞌelaꞌef naꞌi nehepa pegaꞌ. Eaꞌ anona waf buꞌunai kwaieꞌuna ipeꞌ pendaꞌana notaga laꞌifina nape. Deiꞌ main? Waf hianai ipeꞌ pandaꞌanai, Aeꞌ ina ati anona ataꞌ boꞌona ma naep Ahalome Godi, owaꞌ.  
\v 3 \x * \xo 3:3 \xt Re 2:5; 1 Te 5:2\x*Ipeꞌ ukup mopoma basef amama Aeꞌami fowaꞌ paliꞌ pameꞌam pefaꞌam eaꞌi. Pigiꞌmam pemboma opalef pekwaha waf aonai pifiꞌmai Aeꞌ. Iꞌi ipeꞌ owaꞌ pehafel ulal pekwaha koh, nambimb Aeꞌ ifiꞌi endambahoꞌ etagamepa siꞌi epen nandaꞌ wali nafiꞌi nataga eaꞌ ina pegawa maina nogota aeꞌ eatagamepa, owaꞌ.  
\v 4 \x * \xo 3:4 \xt Ju 23\x*Eaꞌ ipeꞌ enipa pape Sardisi owaꞌ pendaꞌ luwaguf maim ipeꞌimi aom, anona nemaf pindawisa luwaguf afitimi dambaimi atom pefeꞌ peloma Aeꞌ. Deiꞌ main, ati ipeꞌ epes buꞌupei ma pefaꞌam amama.  
\v 5 \x * \xo 3:5 \xt Mt 10:32; Lu 10:20; Re 3:18\x*Ipeꞌ paloma enis epes wapotiꞌ sape ambal namunai laꞌelaꞌef agof ipeꞌimi mail anona buk saꞌi buk ambal namunai napainai. Emi egafis situ laꞌifisa siliꞌamona wandafa waf aonai, Aeꞌ eseꞌas luwaguf amama afitimi solam. Eaꞌ ina anona nemaf egagaha agof asasimi mail buk anama, owaꞌetin. Mil laꞌelaef. Ewalapa agof asasimi ma naep Ahalome aeꞌanai noloma amam ensel Ananimi iꞌipam iꞌi epes isima aeꞌasi.  
\v 6 Ipeꞌ emi egafipa aligah mapaipei pemeꞌ andeandeꞌ basef amama Ambal Buꞌunai Godi nawalapama esis amam nematawa Kristen.   
\s1 Basef mafeꞌma esis Kristen sape Filadelfiai  
\p
\v 7 \x * \xo 3:7 \xt Ais 22:22\x*Ineꞌ daꞌa anom basef mofeꞌma ensel anama numafi sios amam nematawa Kristen sape Filadelfiai. Aeꞌ\f + \fr 3:7 \ft  Niti futnot Kamapim Tok Hait 2:1.\f*  
\m buꞌuwei endilisi deiꞌ ahapila ki ma uta anama fowaꞌ king Devit nahapilanai. Iꞌi Aeꞌ ewisiꞌana, anona aman ina laꞌifina ma nowalowana, eaꞌ Aeꞌ iꞌi ewalowana wapotiꞌ, nambimb enin epen ina laꞌifina niwisiꞌana, owaꞌ. Aeꞌ atowe aꞌipipago basef amama ipeꞌ.  
\v 8 \x * \xo 3:8 \xt 1 Ko 16:9; Re 2:2\x*Aeꞌ egawa waf hianai deiꞌ pandaꞌanai hiꞌalana eaꞌ egawa ipeꞌ wapotiꞌ, ataꞌ laꞌifipa kwaikwaieꞌ ma enis epes owaꞌ someꞌ basef ipeꞌimi. Eaꞌ ipeꞌ paila basef aeꞌami andeandeꞌ. Eaꞌ ina pambahoꞌ agel aeꞌanai, owaꞌ.  
\p Ipeꞌ piti, aeꞌ andaꞌ uta nagal napomepa, owaꞌ anona aman laꞌifinama nowalowana, owaꞌ.  
\v 9 \x * \xo 3:9 \xt Re 2:9; Ais 45:14; Ais 49:23; Ais 60:14\x*Ipeꞌ pemeꞌ! Ipeꞌ pegawa epes isima Satani. Esis saꞌi basef saꞌi esis epes Judai, owaꞌetin. Esis ina saila waf Judai, owaꞌ. Esis sambasoꞌami. Aeꞌ anona nemaf endaꞌ epes isima sifiꞌi sindiwa nembawa sotawa felefeleꞌma boꞌwagah ipeꞌimi ma sogawa aeꞌ okom nainailipa.  
\v 10 \x * \xo 3:10 \xt Lu 21:19; 2 Ti 2:12\x*Ipeꞌ paila basef aeꞌami andeandeꞌ paitu laꞌifipa ma nimanimi amama matagamipei. Eaꞌ Aeꞌ deiꞌ imafi ipeꞌ ma nemaf anama amama meagwambipei motagama amam nematawa hiesi etap hiagomai ma God nowalogas waf buꞌunai aonai. Amama ina anona nemaf motagama ipeꞌ, owaꞌ.  
\v 11 \x * \xo 3:11 \xt Re 2:10,16\x*Aeꞌ ifiꞌi etagama ipeꞌ mehip. Waf buꞌunai ipeꞌ pailanai deiꞌ, pilona laꞌifapa laꞌelaꞌef. Naꞌama anona aman nondalombepa amamaga buꞌwami mapoma ipeꞌ ma anona nemaf pefaꞌami.  
\v 12 \x * \xo 3:12 \xt Ais 62:2; 65:15; Esi 48:35; Re 14:1; 21:2\x*Emi egafis situ laꞌifisa siliꞌamona wandafa waf aonai, anona nemaf Aeꞌ endaꞌas situ laꞌifis siꞌi olaf nombaloꞌ ipat luꞌunai Godi Aeꞌanai. Eaꞌ epes isima ina sokwaha ipat anama luꞌunai sotanima suwisi andeꞌ wapotiꞌ, owaꞌ. Sope andeandeꞌ nomon laꞌelaꞌef. Anona nemaf endaꞌ agel Ahalome Godi nila esis noloma agel wambel anama luꞌunai God Aeꞌanai Jerusalem, wambel namunai buꞌunai. Wambel anama anona nemaf nokwaha heven God Aeꞌanai napoma nisilaꞌi. Eaꞌ agel namunai Aeꞌanai wapotiꞌ endaꞌana nila esis.  
\v 13 Ipeꞌ emi egafipa aligah mapaipei pemeꞌ andeandeꞌ basef amama Ambal Buꞌunai Godi nawalapama esis amam nematawa Kristen.   
\s1 Basef mafeꞌma esis Kristen sape Laodisiai  
\p
\v 14 \x * \xo 3:14 \xt Re 1:5; 19:11; Kl 1:15\x*Ineꞌ daꞌa anom basef mofeꞌma ensel anama numafi sios amam nematawa Kristen sape Laodisiai.  
\p Aeꞌ\f + \fr 3:14 \ft Niti futnot Kamapim Tok Hait 2:1.\f*  
\m ofagewe ma basef endilisimi awalapam mafeꞌ andeandeꞌ basef hiami Godi. Laꞌelaꞌef awalapam andeandeꞌ. Aeꞌ Dembiwei ma amamaga hiami God nandaꞌam mape ilif etapi maloma epes hiesi wapotiꞌ. Aeꞌ aꞌipipago basef amama ipeꞌ.   
\p
\v 15 \x * \xo 3:15 \xt Ro 12:11; Re 2:2\x*Aeꞌ egawa waf hianai deiꞌ ipeꞌ pandaꞌanai. Eaꞌ egawa ipeꞌ ina pohalepa, owaꞌ. Eaꞌ ipeꞌ ina nifipa, owaꞌ. Aeꞌ aꞌi ipeꞌ pepe pohalepa o pepe nifipa.  
\v 16 Owaꞌetin. Ipeꞌ nifipa kwaukwawieꞌ. Ipeꞌ owaꞌ nifipa endilisi eaꞌ owaꞌ poholepa endilisi. Eaꞌ Aeꞌ andaiwaꞌmepa aꞌi iguꞌupei malogel aeꞌanai.  
\v 17 \x * \xo 3:17 \xt Hos 12:8; 1 Ko 4:8; Lu 12:21\x*Ipeꞌ paꞌiam naꞌama paꞌi, ‘Apeꞌ moni hianai naloma amamaga hiami maꞌomapa. Apeꞌ ina anom amamaga aꞌapa, owaꞌ.’  
\p Eaꞌ naep Aeꞌami atilipa pape awepa endilisi ma enis epes sati owahipipa. Ipeꞌ pape kwahupa endilisi naep maseꞌepa alop nape naꞌa. Ipeꞌ owaꞌ pegawa amama mowalapa waf aonai ipeꞌ pandaꞌanai, owaꞌ.  
\v 18 Eaꞌ eseꞌepa gawa ma ipeꞌ. Gol Aeꞌami deiꞌ fandom mataga boꞌom endilisi. Andeandeꞌma ipeꞌ petalom petaga buꞌupei amamaga hiami endilisi. Andeandeꞌma petala luwaguf afitimi pelam muliꞌakwa alop ipeꞌinai ma esis ina siti alop ipeꞌinai nope wafifina eaꞌ ambagof aom, owaꞌ. Andeandeꞌma ipeꞌ petala anona marasin pendaꞌana naep ipeꞌimi ma piti andeandeꞌ.  
\v 19 Epes hiesi emi egafis Aeꞌ okom nainailas, isima Aeꞌ endaꞌ megah mohas ehas bolam ma endaꞌ waf asasinai notaga boꞌona. Eaꞌ ipeꞌ wapotiꞌ ukup mopoma waf ipeꞌinai hianai, pemboma opalef pekwaha waf aonai pifiꞌmai Aeꞌ.  
\v 20 Ipeꞌ pemeꞌ, Aeꞌ aha uta aitu. Emi egafis semeꞌ malogel Aeꞌanai ma susiꞌ uta, Aeꞌ iwis nomon epe elomas ope atogon weaꞌ gwaꞌaimi.  
\v 21 Emi egafis situ laꞌifisa siliꞌamona wandafa waf aonai, Aeꞌ anona nemaf iꞌi ahoꞌma esis sope solome ma sope dembesi balata king Aeꞌanai. Naꞌama etin siꞌi fowaꞌ Aeꞌ aitu laꞌifiwi aliꞌamona wandafa waf aonai. Eaꞌ deiꞌ ape aloma Ahalome Aeꞌanai ape balata king Ananinai.  
\v 22 Ipeꞌ emi egafipa aligah pemeꞌ basef amama andeandeꞌ Ambal Buꞌunai Godi nawalapama esis amam nematawa Kristen.”   
\c 4  
\s1 Esis sandaꞌ lotuma God gani heven  
\p
\v 1 Amama mataga eaꞌ, ati gani heven anona uta nandawisiꞌ nape. Eaꞌ maf anama fowaꞌ aeꞌ ameꞌanai naꞌi basef amama siꞌi anona alof nalef eaꞌ naꞌi, “Ineꞌ lotowi naꞌae ilif ihiꞌambena amamaga anona nemaf migiꞌ meatagai.”   
\p
\v 2 Eaꞌ mehip Ambal Buꞌunai Godi nataga laꞌifina ma aeꞌ. Ati gani heven balata kingi ati anona aman Dembinai natoma balata anama nape.  
\v 3 Anan howalagon laꞌifina siꞌi otam buꞌunai agilina ma jaspa naloma otam akwahinai agilina ma konilian. Eaꞌ anona elelina natoma balata anama king natomanai eaꞌ ati elelina anama golotoꞌunai siꞌi anona otam buꞌunai agilinama emeral.  
\v 4 Anom siaifah hiami buꞌwami 24-peleim motawa tulif etina balata anama dembinai kingi. Eaꞌ anom agufumi mala luwaguf afitimi atom matoma mandandamam siaifah amama 24-peleim. Mowaloꞌ hagw dembemi atom mowaloꞌami balagah amamumi sandaꞌ gol sandaꞌami.  
\v 5 Otaga holala natagai balata kingi diwala. Eaꞌ anom amalemb luꞌwami malaꞌ wapotiꞌ balata anama nape natologoma bagah 7-peleim fandumi mape mafifimana. Bagah amama Ambagof buꞌwami Godi 7-peleim.  
\v 6 Eaꞌ anama balata kingi notawa natologoma anom amamaga mape. Amama siꞌi embel naoh luꞌwami. Amama mandati siꞌi mapelaga mati embel mati ambagof.  
\p Eaꞌ anom amamaga biamibiam ambal namunai napaimi mape laꞌafen anama balata kingi maitu. Amam mape naep hiami mapaim hiꞌalam masoꞌala amagah opalef amamumi alafugah hiꞌalam.  
\v 7 Naliꞌi ambal napainai siꞌi anona mafin luꞌunai wandafunai laion. Nagiꞌi anan siꞌi bulmakau suwafunai. Nafeꞌma wanomi anan amaga nandati siꞌi amaga epeni. Eaꞌ nafeꞌma biamibiami nandati siꞌi anona komon luꞌunai nufiaꞌ nafeꞌ ilifi.  
\v 8 Ambagof namumi mapaimi bihinagof wanom wanom mape mandandam. Eaꞌ alop amamunai siꞌina naep atomana hiꞌalana. Eaꞌ owamb alip amam maꞌi laꞌelaꞌef naꞌama maꞌi, “Dembinai God Anan laꞌifina boꞌona endilisi! Fowaꞌ gani Anan nape deiꞌ nape, anona nemaf owagama wapotiꞌ nope laꞌelaꞌef.”  
\p Amam ina mapoma nomaꞌwa maꞌi basef amama, owaꞌ. Mandaꞌam laꞌelaꞌef.  
\v 9 Amam mandanifela God natoma balata kingi nape ambal namunai laꞌelaꞌef. Eaꞌ mafela agel Ananinai manifelona.  
\v 10 Ama nimeguf hiami maina nogota amam mandaꞌam naꞌama, agufumi amama 24-peleim mindiwa nembawa ma naep Dembinai kingi, natoma balata kingi. Eaꞌ amam mandaꞌ lotuma Anan nape laꞌelaꞌef. Amam mowali hagw amamumi golim makwahom mondolaꞌwifa mape owina Anan Dembinai amamunai. Hagw amama mafeꞌ mowa felefeleꞌma balata kingi notawa natologoma eaꞌ maꞌi,   
\q1
\v 11 “Ineꞌ God afaꞌinai Dembinai afaꞌinai. Ineꞌ laꞌifinai buꞌunai endilisi ma epes hiesi sondanifela ineꞌ sofela agel ineꞌinai luꞌuna. Ineꞌ laꞌifinai. Deiꞌ main, ineꞌ nandaꞌ amamaga hiami. Okom ineꞌinai atona naꞌiam nandaꞌam mataga. Eaꞌ deiꞌ amamaga amama hiami mape ambal napaim.”   
\c 5  
\s1 Jon nati anona buk sakolasona naꞌoh  
\p
\v 1 Eaꞌ ati aman anama natoma balata kingi nahapila anona buk lagel daꞌisinai ananinai. Buk anama amef mail nomon andeꞌ. Eaꞌ sandaꞌ tep siꞌi blasta sowaꞌ buk anama. Tep tuꞌwanina 7-peleina sowaꞌana buk anama.  
\v 2 Eaꞌ ati anona ensel laꞌifinai noga naꞌi mehip naꞌama naꞌi, “Emi epen buꞌwani ma atuwasi laꞌifina nehapeꞌ tep anama nowaꞌ buk anama?”   
\p
\v 3 Owaꞌ anin epen atitin nape heveni o nape etap anaeꞌi o nape etap owini laꞌifina nehapeꞌ tep anama nowaꞌ buk anama nati nomonana, owaꞌ.  
\v 4 Aeꞌ ati esis ina sati anin epen laꞌifina nefaꞌ buk anama niti nomonana, owaꞌ. Eaꞌ aeꞌ deiꞌ okom nimanina amama alef ega aꞌi mehip.  
\v 5 Eaꞌ anan agilinai naꞌipi naꞌama naꞌi, “Ineꞌ owaꞌ nelef! Nemeꞌ! Anona aman natagama wambota anama launai esis Judai, aman anama maꞌuna Dembinai nataga wambota anama bafalomepa Deviti. Anan siꞌi anona mafin wandafunai laion, nikilaꞌ wandafa waf aonai. Amama atom deiꞌ atuwasi Anan laꞌifina ma nehapeꞌ tep anama 7-peleina nowaꞌ buk anama naufeniana.”   
\s1 Jon nati sipsip noganai  
\p
\v 6 Aeꞌ ati amama biamibiam ambal napaimi maloma amam agufumi mape malipa anona mafin sipsip noganai. Anan naitu, nandati siꞌi sahana afuna. Anan naitu felefeleꞌma balata anama kingi. Wambawa mataga balagana 7-peleim eaꞌ naep 7-peleim. Naep amama maꞌi Ambagof Buꞌwami Godi 7-peleim nasapaꞌam mafeꞌagon hiꞌalagon etap anaeꞌ hiagoma.  
\v 7 Sipsip anama noganai nafeꞌ nofaꞌai buk anama nape lagel daꞌisinai Ananinai natoma balata anama kingi.  
\v 8 Nofaꞌ buk anama eaꞌ, amamaga amama biamibiam ambal namunai napaimi maloma agufumi amama 24-peleim mindiwa nembawa motawa felefeleꞌma sipsip anama noganai. Agufumi amama hiami atona etin mahapila anona musik siꞌi gitai naloma anom dis gol siꞌinama sanda amama nogoh alogw buꞌwami maꞌami. Sanda amama alogw ambul mataga malata ilif siꞌi beten esis amam nematawa Godi.  
\v 9 Eaꞌ mandaꞌ anona awaf dambainai naꞌama maꞌi,  
\q1 “Ineꞌ buꞌwinai endilisi ma nefaꞌai buk anama nahapeꞌ mandof tep anama hianai mowaꞌanai. Deiꞌ main, esis sahena nagaꞌ, esimbel ineꞌimi matala epes isima wapotiꞌ sotanimani naseꞌanas God. Ineꞌ natala esis amam nematawa hiesi hiꞌalasa epes hiesi wambotagw hiami mamumami, diga naninani hianai, alop naninani hianai ma epes sape etap hiagoma wambel hiagoma ma sotanimani.  
\v 10 Ineꞌ nandaꞌ epes isima hiesi sataga siꞌi pris mondolalima Godi ma Anan nope Dembinai ma esis numafias sondaꞌ maol Ananinai. Eaꞌ esis anona nemaf sope siꞌi king sumafi epes hiesi sape etapi.”   
\s1 Esis safela agola sipsip noganai  
\p
\v 11 Aeꞌ atologon ameꞌ malogof ensel hiami endilisi siambam namba amamunai hiami handet milian tausen, hiami endilisi. Amam maitu malipa balata anama kingi maloma amamaga amama ambal napaimi maloma amam agufumi.  
\v 12 Amam maꞌi maꞌoh mehip maꞌi,  
\q1 “Anama maꞌuna sipsip noganai, fowaꞌ esis sahana nagaꞌi. Anan buꞌunai endilisi ma nofaꞌ namba agel luꞌunai noloma amamaga hiami buꞌwami otamba hiahaom maim moloma pepel luꞌunai noloma gawa buꞌunai noloma howalagon. Anan buꞌunai endilisi ma epes hiesi sefela agel Ananinai sondanifela Anan sinifelona.”   
\p
\v 13 Amama mafeꞌma eaꞌ, Aeꞌ ameꞌ diga ma amamaga hiami maloma epes hiesi God nandaꞌas ambagof mapaisi hiꞌalas. Hiesi sape heveni sape etap anaeꞌ saloma sape etap owini saloma sape naoh embel owini. Ameꞌ amamaga amama hiami maloma epes isima hiesi sape anama hiagomai sandaꞌ anona awaf naꞌama saꞌi,  
\q1 “Dembinai nape balata anama Kingi naloma sipsip noganai wapotiꞌ, amam biam buꞌwami ma mofaꞌ danifel anama hianai naloma agel luꞌunai naloma pepel naloma howalagon. Amam biam buꞌwami ma mofaꞌ amama nimeguf hiami laꞌelaꞌef hihif.”   
\p
\v 14 Eaꞌ amamaga amama biamibiam mape namumi maꞌi, “Endilisi!”  
\p Eaꞌ agufumi amama 24-peleim mindiwa nembawa mandaꞌ lotuma God naloma sipsip noganai.   
\c 6  
\s1 Sipsip noganai nahapeꞌ tep 7-peleina buk anama  
\p
\v 1 Aeꞌ ati sipsip noganai nahapila buk anama tep 7-peleina nowaꞌana nahapeꞌ tep naliꞌi. Eaꞌ ameꞌ anona ma amam amama biamibiami naꞌi basef diga ananinai ameꞌ siꞌi otaga diluluwagala. Anan naꞌi, “Ineꞌ fiꞌi!”   
\p
\v 2 Atologon wapotiꞌ, ati anona mafin hos afitinai epen natomanai nahapila kopaꞌw. Esis saseꞌana anona hat siꞌi sandaꞌ wandaf saliꞌamonana sofaꞌami. Eaꞌ anan laꞌifina nafeꞌ deiꞌ naliꞌamona wandaf okom laꞌifina nape laꞌelaꞌef naꞌi nondaꞌ wandaf luꞌunai nikilaꞌ epes hiesi.   
\p
\v 3 Sipsip noganai nahapeꞌ anona tep nafeꞌma bifi nowaꞌ buk anama eaꞌ ameꞌ anona ma amama biamibiam nafeꞌma bifi naꞌi, “Ineꞌ fiꞌi!”   
\p
\v 4 Eaꞌ anona hos akwahinai howalagon endilisi nataga, anona aman natoma hos anama. Amam amama biamibiam maseꞌana pepel aman anama natoma hosi. Eaꞌ laꞌifina ma niliꞌamona nogota buꞌunai ma amam nematawa etap anaeꞌisi. Eaꞌ esis lupulupaꞌ soꞌoh sogaꞌ. Eaꞌ maseꞌana anona bainat luꞌunai ma nondaꞌ wandaf.   
\p
\v 5 Eaꞌ sipsip noganai nahapeꞌ anona tep nafeꞌma wenifi wapotiꞌ nowaꞌ buk. Ameꞌ anona ma amama biamibiam nafeꞌma wenifi naꞌi, “Ineꞌ fiꞌi!”  
\p Aeꞌ atologon wapotiꞌ ati anona hos alialinai. Aman natomanai nahapila anona skel siꞌi ikwaf dendeꞌma nowaloga gwaꞌaimi nihiꞌambasa ikwaf dendeꞌ.  
\v 6 Eaꞌ ameꞌ anona maf siꞌi anona malogel naꞌi laꞌafena amam biamibiam naꞌi, “Ineꞌ nesahoꞌ anona malep sala suꞌutip witimi ma 3 kina. Eaꞌ nesahoꞌ maloh saꞌumi wanom bali siꞌi wit napaimi ma otamba 3 kina. Ineꞌ owaꞌ nehambombaga wain noloma wel hiꞌilam, owaꞌ!”   
\p
\v 7 Eaꞌ sipsip noganai nahapeꞌ tep nafeꞌma bifibifi nowaꞌ buk, eaꞌ ameꞌ malogel anona ma amam ambagof mapaimi nafeꞌma biamibiami naꞌi, “Ineꞌ fiꞌi!”   
\p
\v 8 Atologon wapotiꞌ ati anona hos batafunai, aman natomanai agel ananinai gaꞌ. Eaꞌ anona aman numafi wambel esis sagaꞌi sapoma nagiꞌmana nafiꞌi. Amam biam mowala amam nematawa hiesi sape etapi sotaga wambotagw biamibiam eaꞌ amam motaga laꞌifima moha enis amam nematawa hiesi sape anona wambota atotona sogaꞌ. Eaꞌ amam biam moha enis sogaꞌ bainat amamunai eaꞌ enis nolomohas sogaꞌ eaꞌ enis awes naninani nondaꞌas sogaꞌ eaꞌ mafis amama wandafumi mape aolupi moha enis sogaꞌ.   
\p
\v 9 Sipsip noganai nahapeꞌ tep anama wapotiꞌ nafeꞌma wenif bifi nowaꞌ buk, ati ambagof enis epes sagaꞌi sape owina balata sondolalima Godi. Fowaꞌ epes isima sombaleꞌefa basef Godi laꞌifis sawalapam saꞌiam saꞌipasama Jisas Krais nagiambamas. Eaꞌ isima sandaiwaꞌma Godi sahas sagaꞌ.  
\v 10 Eaꞌ ambagof amama maꞌi mehip naꞌama maꞌi,  
\p “King dembinai nahapila ilif etap, ineꞌ nape boꞌwena, ineꞌ endilisinai! Afagof maꞌum mefeꞌ hiꞌilam muliꞌ ma ineꞌ nendaꞌ kotima esis amam nematawa sape etapi, ma negwa esimbel apeꞌimi?”   
\p
\v 11 Eaꞌ God naseꞌama anom luwaguf afitimi laumi atona etin naꞌipam naꞌama naꞌi, “Ipeꞌ ataꞌ pepoma nomaꞌw nogota bandana. Anona nemaf esis naumbih soha sahin owan isima ipeꞌ pandaoꞌoma pandaꞌ maol atonai sogaꞌ, siꞌi sahepa pagaꞌ. Anona nemaf dohandohama esis naumbih sohas sogaꞌ sotaga ma ikwaf aeꞌ aꞌianai, egwa esimbel ipeꞌimi.”   
\p
\v 12 Aeꞌ ati sipsip noganai nahapeꞌ tep anama nafeꞌma wenif wenifi nowaꞌ buk deiꞌ atef sowambon luꞌunai nakotoꞌma etap, aon alipunai nataga nandamboma alialina siꞌi lowaf alinai apinai. Eaꞌ aon owambunai nataga akwahina hiꞌalana siꞌi esimbel.  
\v 13 Eaꞌ ondowa mape ilifi mowai etap siꞌi suꞌutip mail lawah figi owaꞌ ataꞌ akume uf nakotoꞌmam mowai.  
\v 14 Ilif wapotiꞌ nafeꞌ hiꞌalagon siꞌi samagwia mat sowaꞌana. Eaꞌ halafutagw hiami maloma ailan hianai makwaha anama mapoma mindikiꞌah mafeꞌ anagon.  
\v 15 Eaꞌ amam king dembemi etapami maloma agufumi maloma amam kepten dembemi mumafi amam soldia maloma amam amamaga hiamumi maloma amam amama aguf luꞌwamumi maloma epes isima hiesi sandaꞌ maola otamba saloma isima hiesi agof aꞌasi sape owina enis epesi, esis hiesi sawis sandambahoꞌ sape hul maim mape etapi eaꞌ mape nomona owah luꞌwami mape halafutagwi.  
\v 16 Eaꞌ sofala halafutagw amama hiami maloma owah hiami saꞌi,  
\p “Ipeꞌ mehip kwaꞌilipei pewai pepeiꞌapa ma pembaheꞌapa ma amaga anan natoma balata kingi naloma okom wandafunai ma sipsip noganai.  
\v 17 Deiꞌ main, nemaf anama luꞌunai ma ukup amam biam wandafuma mogwa waf aonai deiꞌ nataga. Atuwasi emi laꞌifina nitu nikilaꞌ amam? Owaꞌetin.”   
\c 7  
\s1 Esis Israel hiesi 144,000-peleis sefaꞌ ikwaf Godi  
\p
\v 1 Amama mafeꞌma eaꞌ, aeꞌ ati ensel biamibiam maitu waꞌowaꞌola biefigin biefigin etap nafeꞌ netambela, mahapila uf hianai etapanai ma uf ina laꞌifina nehapusa etap o naoh embel luꞌwami o nefaꞌ anona lawag nendaꞌ felifal, owaꞌ.  
\v 2 Eaꞌ ati anona ensel nafeꞌ nalata ilif aon natefima. Anan nahapila ikwaf laꞌifinai Godi nape namunai naꞌi nosahoꞌ epes sandaꞌ maol Godi. Eaꞌ nofala ensel amama biamibiam God naseꞌama pepel ma mohambombaga etap naloma naoh.  
\v 3 Anan naꞌipam mehip naꞌi, “Deiꞌ ipeꞌ ina pehambombaga etap noloma naoh moloma lawah maim, owaꞌ. Ataꞌ owaꞌ. Afaꞌ waꞌi osahoꞌ epes isima sandaꞌ maol God apeꞌinai osaheꞌas uliꞌ. Nambimb andeandeꞌ pehambombaga amamaga amama.”   
\p
\v 4 Eaꞌ ameꞌ esis saꞌi esis amam nematawa isima maꞌumaꞌwis ensel anama nasaheꞌas. Esis nasaheꞌas eaꞌi sataga naꞌama 144,000. Esis amam nematawa hiesi wambotagw hiami epes Israeli.  
\v 5 Deiꞌ esis 12,000 epes hiesi esis wambota Judai saloma 12,000 epes hiesi wambota Rubeni saloma 12,000 epes hiesi wambota Gati.  
\v 6 Eaꞌ esis 12,000 epes hiesi wambota Aseri saloma 12,000 epes hiesi wambota Naptali saloma 12,000 epes hiesi wambota Manasei.  
\v 7 Eaꞌ 12,000 epes hiesi wambota Simeoni saloma 12,000 epes hiesi wambota Livai saloma 12,000 epes hiesi wambota Isakari.  
\v 8 Eaꞌ 12,000 epes hiesi wambota Sebuluni saloma 12,000 epes hiesi wambota Josepi saloma 12,000 epes hiesi wambota Benjamini.   
\s1 Esis amam nematawa hiesi wambota launai sandaꞌ lotu ma God  
\p
\v 9 Amamaga amama hiꞌalam, aeꞌ ataꞌ atologon wapotiꞌ ati esis amam nematawa hiesi endilisi safiꞌi sondowaꞌanima sape. Eaꞌ ina enin epen laꞌifina niamba epes isima sataga maꞌumaꞌwis, owaꞌ. Esis hias endililsi. Epes isima sape etap kantri hiagoma eaꞌ epes hiesi sape wambotagw hiami ma alop anama naninani, diga hianai naninani, isima hiesi hiꞌalas.  
\p Esis saitu anama God natoma balata king ma naep sipsip noganai. Sala anom luwaguf afitimi laumi, sahapila bagah lagof asasimi.  
\v 10 Eaꞌ soga saꞌi mehip naꞌama saꞌi,  
\q1 “God apeꞌinai Anan natoma balata kingi naloma Sipsip noganai, amam biam mofaꞌapa motanimani ma makwaha waf aonai apeꞌ mandaꞌanai.”   
\p
\v 11 Ensel amama hiami mandatama hiꞌalam maitu anama balata kingi eaꞌ agufumi amama 24-peleim maloma amamaga amama biamibiam mape namumi mape mitimaloꞌ mati etap felefeleꞌma balata kingi mandaꞌ lotu mandanifela God.  
\v 12 Amam maꞌiam naꞌama maꞌi,  
\q1 “Endilisi! Apeꞌ mandanifel endilisi ma God apeꞌinai mafela agel ananinai luꞌuna! Anan Dembinai ofagonama howalagon. Anan nomonas hiami buꞌwami mapaina eaꞌ apeꞌ manifelona mafela agel ananinai! Anan pepel hiamunai endilisi! Pepel luꞌunai napoma Anan! Amama hiami ananimi atom laꞌelaꞌef. Endilisi!”   
\s1 Nimanimi esis amam nematawa hiesi hiꞌalam deiꞌ  
\p
\v 13 Eaꞌ anona amam agufumi amama 24-peleim nahaliꞌi naꞌi, “Esis isima sala luwaguf afitimi, esis emi egafis? Esis safiꞌi enima?”   
\p
\v 14 Eaꞌ agwamana basef aꞌi, “Dembinai aeꞌinai, ineꞌ etina negawas.”  
\p Eaꞌ Anan naꞌipi naꞌi, “Epes isima fowaꞌ sape etap sofaꞌ nimanimi luꞌwami ma lagof esis naumbih. Esis sasaꞌopa luwaguf asasimi ma esimbel sipsip anama noganai, deiꞌ mataga afitim.  
\v 15 Eaꞌ saitu balata king Godi natologoma. Owamb alip sandaꞌ opeh ananimi ipat ananinai. Anan nape balata anama kingi, anan atona anona nemaf nope nolomas niliꞌakwas.  
\v 16 Esis ina anona nemaf nolomohas wapotiꞌ, ina sogaꞌma embel iap noseꞌas wapotiꞌ, owaꞌ. Owaf ina anona nemaf laꞌifina nohas, eaꞌ ina anom nif luꞌwami mihihiꞌas sope, owaꞌ.  
\v 17 Deiꞌ main, sipsip noganai naitu felefeleꞌ endilisi ma balata kingi, anan nope numafias. Anan noꞌwas safeꞌma embel amama mataga anona ifata ma sofaꞌ embel amama ambal namunai napaimi. Eaꞌ God anona nemaf nupatiꞌamasa embif hiami naep asasimi ma esis ina ataꞌ selef wapotiꞌ, owaꞌ.”   
\c 8  
\s1 Sipsip noganai nahapeꞌ tep anama nafeꞌma 7i  
\p
\v 1 Eaꞌ sipsip noganai nahapeꞌ tep anama nafeꞌma 7i nowaꞌ buk anama eaꞌ ina ataꞌ owaꞌ anom amamaga mondaꞌam, owaꞌ. Eaꞌ ina anom basef mataga heven mape mafeꞌ mafeꞌma nogota siꞌi awa tuꞌwaninai, owaꞌ.  
\v 2 Amama mafeꞌma eaꞌ, ati ensel amama 7-peleim laꞌelaꞌef maitu naep Godi mofaꞌ biugel anama 7-pelaina nandandam.   
\p
\v 3 Eaꞌ anona ensel nafiꞌi naitu felefeleꞌma balata sondolali ma Goda. Nahapila anona plet gol ama nondaꞌ nogoh alogw buꞌwami maꞌami. Esis saseꞌana sanda hiami ma nondaꞌ nogoh amama ma anan nokolasom moloma beten amam nematawa hiesi Godi. Eaꞌ nandaꞌ ofa ma God balata anama sandaꞌ gol sandaꞌanai notawa felefeleꞌma balata kingi.  
\v 4 Eaꞌ nogoh maloma sanda amama alogw maꞌami maloma beten esis amam nematawa Godi, amama mandatama etifigin malata ilifa naep Godi.  
\v 5 Eaꞌ ensel anama nofaꞌ plet anama doꞌok sanda amama malami eaꞌ nofaꞌ nifa balata sondolalima Godanai nowalam plet, eaꞌ nakwahom muwai etap. Anan nakwahom eaꞌ, otaga holala, anom amamaga mataga mandaꞌam, howalagon nafeꞌ sowambon luꞌunai nasol etin nape.   
\s1 Ensel biamibiam mufapula biugel amamunai  
\p
\v 6 Eaꞌ ensel amama 7-peleim mahapila biugel anama 7-pelaina mandandombola mufapula biugel anama.  
\v 7 Ensel naliꞌi nofapula biugel ananinai eaꞌ ais afitimi siꞌi otamba pohalami maloma nif maloma esimbel lolaꞌam mataga heven eaꞌ nokoloꞌ ais maloma esimbel mowai etap. Amam mawaloga etap hiagoma naloma lawah hiami mataga wenifigin. Eaꞌ nif fando etap waꞌagon eaꞌ biefigin nape. Eaꞌ otalef hiami maluwi amama wapotiꞌ eaꞌ nif fandom hiꞌalam.   
\p
\v 8 Eaꞌ ensel anama nafeꞌma bifi nofapula biugel ananinai, esis sakwaha anom amamaga siꞌi halaf fandonai nandegia nafeꞌ nowala naoh. Eaꞌ sawala naoh mataga wenifigin eaꞌ waꞌam mandamboma mataga esimbel biefigin nape boꞌwagon.  
\v 9 Eaꞌ sawaloga amamaga amama hiami mape naohi ambagof namumi mapaimi sawalogam mataga wenifigin eaꞌ waꞌam magaꞌ biam mape boꞌom. Eaꞌ sawaloga sip hiami mafeꞌ naohi wapotiꞌ sawalogam mataga wenifim eaꞌ waꞌom aom biam mape boꞌom.   
\p
\v 10 Eaꞌ ensel anama nafeꞌma wanomi nofapula biugel ananinai, anona ondoꞌw luꞌunai nandegia heven fandona fofol etin siꞌi nembaꞌw fandonai nowai etap. Esis sawaloga walembeh hiami maloma embel hiami motah etapi sawalogam mataga wanom eaꞌ ondoꞌw anama nafeꞌ nowala embel tuꞌwanim motah waꞌili. Waꞌel aom eaꞌ waꞌol biefigin mape boꞌom.  
\v 11 Ondoꞌw agiliꞌnama anama saꞌi, marasin Anama Numbutinai. Eaꞌ sawaloga walembeh embel hiami sawalogam mataga wanom, eaꞌ waꞌom mataga siꞌi marasin numbutinai. Eaꞌ biefigini mape boꞌom. Eaꞌ epes hiesi saꞌ embel amama awami maofa opalef asasimi sagaꞌ hiꞌalas.   
\p
\v 12 Eaꞌ ensel anama nafeꞌma biamibiam nufapula biugel ananinai, esis sawaloga aon owambunai alipunai naloma ondowa sawalogam mataga wanom. Eaꞌ sahambombaga waꞌom mataga akutim. Eaꞌ nemaf aꞌipanama sowalogana wanom. Etifigin akutigin, biefigin howalgon. Eaꞌ owamb tuꞌwanina naꞌama etin siꞌi alip.   
\p
\v 13 Eaꞌ ati anona komon luꞌunai nufiaꞌ nafeꞌ laꞌafen gani ilif ameꞌana naꞌi mehip naꞌi,  
\p “Uwahipis uwahipis endilisi esis amam nematawa sape etapi ma nimanimi luꞌwami wapotiꞌ motagamas. Deiꞌ main, anom ensel wanom maꞌi mufapula biugel amamunai ma nambimb nimanimi amama motagamas!”   
\c 9  
\s1 Ensel nafeꞌma wanom biami nufapula biugel ananinai  
\p
\v 1 Eaꞌ ensel anama nafeꞌma wanom biami nufapula biugel ananinai, ati anona ondoꞌw nakwaha heven ilif nowai etap. Ondoꞌw anama anona ensel. Eaꞌ esis saseꞌana ki utainai ma anona hul nagal nowala etap owin. Hul anama owaꞌ nefeꞌ notambili nowala nafeꞌ etin.  
\v 2 Anan nawisiꞌ uta hul anama eaꞌ nogoh luꞌwami mataga siꞌi nogoh malo nif luꞌwami. Eaꞌ nogoh amama malo maseꞌala aon ilif, eaꞌ aon alipunai naloma owambunai mataga akutim.  
\v 3 Eaꞌ anom asagof siꞌi kwamuꞌwis luꞌwami makwaha nogoh amama mowala etap. Eaꞌ ensel anama naseꞌam pepel siꞌi pepel sipiawa mape etapi maha epesi.  
\v 4 Eaꞌ mofaꞌ basef naꞌama maꞌi,  
\p “Ipeꞌ ina pehambombaga otalef o amamaga mamumami mataga etapi o anom lawah, owaꞌ. Ipeꞌ pehambombagago epes amama atom ikwaf Godi owaꞌ notoma amagah asasimi.”   
\p
\v 5 Eaꞌ amam amama laꞌifima moseꞌasa nimanimi epes isima mefeꞌ mondahama aomb wanom biam, eaꞌ ina mofaꞌ pepel ma mohas sogaꞌ, owaꞌ. Eaꞌ maseꞌasa nimanimi luꞌwami endilisi ma epes isima siꞌi sipiawa maha epes sameꞌ nimanimi luꞌwami.  
\v 6 Nemaf anama epes hiesi sogolopa eafa siꞌi seagaꞌ, owaꞌ. Ina sati anona. Gaꞌ nambimb nondafaꞌmas sofaꞌ nimanimi luꞌwami sope laꞌelaꞌef.  
\v 7 Aeꞌ ati asagof amama siꞌi hos mandondombol maꞌi mopaꞌ. Balagahima mandati siꞌi hagw dembemi atom mowaloꞌami sandaꞌ gol sandaꞌam matoma balagah amamumi. Eaꞌ amagah amamumi siꞌi naep epesi sandaꞌam.  
\v 8 Balagah amamumi auf laomi siꞌi balagah nematawai. Nalelef amamumi siꞌi nalelef mafis wandafumi laionim.  
\v 9 Mafatagw amamumi mala siaogw siꞌi dunduwif siꞌi agofum pepel eaꞌ behenagof amamumi mandaꞌam mehip siꞌi hos mahondoꞌ wilkar luꞌunai hianai masagih mafeꞌma wandaf.  
\v 10 Ahagwalef mailam siꞌi sipiawa eaꞌ nalelef motawama moha hiesi moseꞌasa nombot aonai sefaꞌ nimanimi luꞌwami. Amama mape ahagwalef. Ahagwalef amamumi pepel ma moha epes aomb amama wanom biam.  
\v 11 Amam anona king amamunai numafiam. King anama anan ensel numafi hul anama nagal nowala gani owin endilisi, nafeꞌ etini. Diga esis Hibrui saꞌi agel ensel anama saꞌi, Abadon. Diga esis Griki saꞌi, Apolion. Ofagema maꞌi, “Aman nohambombaga amamaga hiami.”   
\p
\v 12 Nemaf aonai ma nimanimi luꞌwami maliꞌi hiꞌalam. Eaꞌ pemeꞌ! Nimanimi biefim ataꞌ mapani nambimb motaga migiꞌ.   
\s1 Ensel anama nafeꞌma wanom wanomi nufapula biugel ananinai  
\p
\v 13 Eaꞌ ensel anama nafeꞌma wanom wanomi nufapula biugel ananinai, ameꞌ anona malogel naꞌi natagai balata sondolalima Goda sandaꞌ gol sandaꞌanai daꞌmalifinama toꞌwan toꞌwan notawa naep Godi.  
\v 14 Malogel anama naꞌipa ensel anama nufapula biugeli naꞌama naꞌi, “Ensel amama awami biamibiam mandaꞌ kalabusa walemb luꞌunai Yufretis, ineꞌ nekwaha amam mofoꞌo.”   
\p
\v 15 Eaꞌ nakwahom mafeꞌma nambimb meamba esis amam nematawa hiesi sape etapi mowalogas sotaga wenis eaꞌ moha epes hiesi waꞌol sogaꞌ, biefis sope boꞌwes. God nandaꞌ ensel amama mandondombol mape mohafa aua anama ma nemaf anama ma aon anama ma afagel anama atona ma mondaꞌ opeh amama.  
\v 16 Aeꞌ ameꞌ soldia hiami endilisi 200 milian matoma hos amamumi. Ameꞌ seambam mataga hiami endilisi.  
\v 17 Ape siꞌi aꞌoh andondoꞌah ati amam matoma hosi. Amam soldia mala siaogw kapaimi atom. Siaogw amama akwahimi alimi kolotuwaimi maloma batafumi. Balagah hosim siꞌi balagah mafis wandafumi luꞌwami laionim. Eaꞌ nif fandom nogoh mataga otamba batafumi salfa fandom mataga malogof amamumi.  
\v 18 Amam meamba esis amam nematawa hiesi mawalogas sataga wenis eaꞌ maha waꞌol afisa amamaga amama awami wenifim, nif maloma nogoh maloma otam salfa fandumi mataga malogof hosi. Eaꞌ epes hiesi biefis sape boꞌwes.  
\v 19 Laꞌifimi hosi mape malogof maloma ahagwalef amamumi. Deiꞌ main, ahagwalef amamumi siꞌi iguf, balagah mandandam. Eaꞌ deiꞌ maha epesa ahagwalef amama amamumi.   
\p
\v 20 Enis epes hiesi ina afisa amamaga amama awami wenifim, ina samboma opalefa sakwaha waf aonai, owaꞌ. Esis ina sowaꞌ alafugaha amamaga amama sandaꞌam lagof asasimi, owaꞌ. Esis ina deiꞌ sakwaha waf anama sandaꞌ lotuma ambagof awami maloma god anama basoꞌomunai sandaꞌ goli siliwa, bras otamba o lawah hiami maim sandaꞌami, amamaga amama ina mati o maitu mafiꞌi, mameꞌ basef, owaꞌ.  
\v 21 Epes isima saha enis epes sagaꞌi, sandaꞌ maꞌakw sandaꞌ ufiali eaꞌ saila waf soꞌa waolanai, sandaꞌ wali. Eaꞌ esis ina samboma opalefa sowaꞌ alafugaha waf anama aonai, owaꞌ.   
\c 10  
\s1 Anona ensel naseꞌana buk Jon nagwaꞌana  
\p
\v 1 Amama hiꞌalam, ati anona ensel laꞌifinai nisilaꞌi heven. Anan nandambahoꞌ elagw eaꞌ elelina naloma balaga ananinai. Amaga ananinai nafifil howalagon endilisi siꞌi aon alipunai nalatawi eaꞌ boꞌwagah ananimi siꞌi nif fandom malata ilif.  
\v 2 Anan nahapila anona buk soꞌunai lagof ananimi, nandauf naꞌoh. Anan nawamona boꞌwaga ananinai daꞌisinai natoma naoh eaꞌ aonai nahaponana etap wataꞌita.  
\v 3 Eaꞌ nogal naꞌi mehip endilisi siꞌi mafin luꞌunai laion nandaꞌam. Nandaꞌam naꞌama ma eaꞌ, otaga dilili bugwalag 7-peleif. Maꞌi siꞌi anona malogel naꞌi.  
\v 4 Otaga dilili bugwalagw 7-peleif maꞌi basef eaꞌ, aꞌi endaꞌ anom basefa amama, eaꞌ ameꞌ anona malogel naꞌi nataga heven naꞌi, “Basef amama otaga dilili bugwalagw 7-peleif, amama ineꞌ nembahoꞌwam mope okom ineꞌinai atona. Ina nendaꞌam mil buk, owaꞌ.”   
\p
\v 5 Eaꞌ ensel anama aliꞌ atolona naitu naoh maloma etap wataꞌitai anan nasaꞌma lagel daꞌisinai nalata.  
\v 6 Eaꞌ naꞌiam endilisi gani ilifa agel Godi nape namunai laꞌelaꞌef hihif. Anan nandaꞌ ilif naloma etap naloma amamaga hiami ambagof mapaimi maloma amama ambagof aꞌami mape ilif etapi maloma naoh embel luꞌwami maloma amamaga amama hiami mape naoh owin wapotiꞌ.  
\p Eaꞌ ensel anama naꞌi, “Nogota mape mohafanai deiꞌ hiꞌalana.  
\v 7 Nemaf anama ensel anama nafeꞌma 7i niꞌi nufapula biugel ananinai, amamaga amama God nambaheꞌami motaga alihim. God felefeleꞌ nondaꞌam endilisi siꞌi basef fowaꞌ naseꞌamam amam profet mandaꞌ opeh ananimi.”   
\p
\v 8 Eaꞌ malogel fowaꞌ ameꞌana heveni naꞌipi wapotiꞌ naꞌama naꞌi, “Ineꞌ foꞌo faꞌai buk anama nandauf nape lagel ensel naitu naoh maloma etapi.”   
\p
\v 9 Eaꞌ afeꞌma ensel anama aꞌipana aꞌi, “Ineꞌ seꞌe buk anama soꞌunai.”  
\p Eaꞌ naꞌipi naꞌi, “Ineꞌ faꞌana neaꞌana. Anan atuwasi usihina siꞌi aupimbel malogel ineꞌinai, eaꞌ opaf ineꞌinai numbutina.”   
\p
\v 10 Anan naꞌiam eaꞌ, afela buk anama soꞌunai lagel enseli agwaꞌana. Eaꞌ malogel aeꞌanai usihina siꞌi aupimbel hani. Agwaꞌana ameꞌ numbutina opaf aeꞌanai.   
\p
\v 11 Eaꞌ ameꞌ anom basef saꞌipi saꞌi, “Ineꞌ newalapa basef Godi wapotiꞌ ma amamaga nambimb motagama epes amam nematawa alop naninani hianai ma diga anama hianai naninani ma amam king dembemi hiami wapotiꞌ.”   
\c 11  
\s1 Amam biam mawalapa basefi  
\p
\v 1 Eaꞌ esis saseꞌe ikwaf aeꞌ ma indilaꞌwifa amamaga dendeꞌam etin saꞌipi saꞌi, “Ineꞌ hafel nembeꞌ ikwafa ipat luꞌunai Godi noloma balata anama sondolalima Goda. Eaꞌ neamba esis amam nematawa sandaꞌ lotu ma Anani sataga maꞌwis.  
\v 2 Eaꞌ ina nendaꞌ endalelemb amama mape andeꞌma ipat anama, owaꞌ, hapaimi. Deiꞌ main, endalelemb amama esis amam nematawa sololama Godi sofaꞌam. Ama esis anona nemaf sotaga sohambombaga wambel luꞌwagoma Godi buꞌunai sope sefeꞌ sondahama aomb 42-peleim, afagof siꞌimi wanom tuꞌwaninai.  
\v 3 Eaꞌ nambimb Aeꞌ God esapaꞌo amam amama biam aeꞌami endaꞌam laꞌifim mowalapa basef Aeꞌami. Eaꞌ amam nambimb mowahoꞌ begah waꞌami\f + \fr 11:3 \ft  Basef amama amam amama biam mowahoꞌ begah waꞌami siꞌi luwaguf awami maꞌi amam mondolaꞌwifa amam ukup aoma esis owaꞌ somboma opalef sofeꞌma God.\f*  
\m siꞌi luwaguf awami eaꞌ miꞌipasa basef Aeꞌami mofeꞌ mondahama nimeguf 1,260-peleim, afagof wanom tuꞌwaninai.”   
\p
\v 4 \x * \xo 11:4 \xt Sek 4:3,11,14\x*Amam biam siꞌi lawah oliv biam maloma lamifah biam laꞌelaꞌef motawa naep Dembinai ma etap hiagomai.  
\v 5 \x * \xo 11:5 \xt 2 Sml 22:9; 2 Kin 1:10; Sam 97:3; Jer 5:14\x*Iꞌi enis epes siꞌi sondaꞌ amam biam aom, atuwasi nif motaga malogof amamumi fendo esis naumbih amamisi endilisi. Endilisi, emi egafin niꞌi neham, waf anama atona enin negaꞌ.  
\v 6 \x * \xo 11:6 \xt 1 Kin 17:1; Eks 7:17,20; 1 Sml 4:8\x*Amam biam laꞌfima mosopama otaga ma asaf owaꞌetina nimeguf hiami mawalapa basef Godi. Amam agel luꞌunai ma momboma embel hiami motaga akwahim siꞌi esimbel eaꞌ mofaꞌ pepel luꞌunai ma moha esis amam nematawa etapasi ma amamaga awami mamumami. Maina nemaf amam miꞌi mondaꞌam naꞌama, amam laꞌifima mondaꞌam.   
\p
\v 7 \x * \xo 11:7 \xt Dan 7:21; Re 12:17; Re 13:1,7; 17:8\x*Amam mowalapa basef Godi hiꞌilam, anona mafin luꞌunai aonai nokwaha hul anama nagal nowala etini nolatawi ilif. Eaꞌ okom numbutina nopaꞌ nolomam. Eaꞌ noham nofofoꞌasom eaꞌ afum.  
\v 8 \x * \xo 11:8 \xt Lu 13:34\x*Eaꞌ alop amamunai noꞌoh eaf luꞌunai taun anama luꞌwagoma, apeꞌ maꞌiagon basef womun etin maꞌi agel Sodom naloma Isip. Anama taun anama etin fowaꞌ esis saha Dembinai amamunai nagaꞌ lawag usiꞌinai tuꞌwanainai.  
\v 9 Enis epes alop hianai naninani sape wambel etap hiagomai saloma esis diga hianai naninani, epes hiesi siti alop amam biami laꞌelaꞌef sondahama nimeguf wanom siꞌina tuꞌwaninai. Eaꞌ esis ina siꞌi ahoꞌma enis epes sowam hiꞌagilif, owaꞌ.  
\v 10 Eaꞌ esis amam nematawa etapasi sondanifel ma amam magaꞌ eaꞌ sondaꞌ gwaꞌaimi seaꞌam sealemb eaꞌ sandasoꞌama amamaga buꞌwami maloma alupisi asasisi. Deiꞌ main, profet amama biam maseꞌasa nimanimi luꞌwami amam nematawa hiesi sape etapi.   
\p
\v 11 \x * \xo 11:11 \xt Esi 37:5,10\x*Nimeguf siꞌimi wanom tuꞌwaninai hiꞌilam, God nosapaꞌi ambip Ananimi mofeꞌ muwis nomona amam biam eaꞌ ambal nopaim mohafel mitu. Eaꞌ epes sotolom umbamahas endilisi.  
\v 12 Eaꞌ momeꞌ anona malogel niꞌi notagai heven nofalam mehip naꞌama niꞌi, “Ipeꞌ bipa letowi naꞌae ilif!”  
\p Eaꞌ mofeꞌ heven muwis elagw nomon esis naumbih situ sotolom mofeꞌ.  
\v 13 Nogota anama atona, sowambon luꞌunai nokotoꞌ taun anama luꞌwagoma tuꞌwanigin peꞌogon eaꞌ 9-peleigin ataꞌ nope boꞌwagon. Eaꞌ esis amam nematawa 7,000-peleis sogaꞌ ma sowambon anama. Eaꞌ esis enis amam nematawa seapani esis umbamahas endilisi, sefela agel God nape heveni.  
\v 14 Amamaga nimanimi luꞌwami mafeꞌma bifi amama mafeꞌ hiꞌalam, eaꞌ pemeꞌ! Nogota bandana ma nimanimi luꞌwami mafeꞌma wanomi motaga.   
\s1 Ensel anama nafeꞌma 7i nufapula biugel ananinai  
\p
\v 15 Ensel anama nafeꞌma 7i nufapula biugel ananinai, anom malogof moga maꞌi mehip matagai heven naꞌama maꞌi,  
\q1 “Dembinai apeꞌinai naloma Krais Amam biam deiꞌ mefaꞌ pepel mataga king dembemi etap anaeꞌ hiagoma mumafiagon. Eaꞌ Anan nope king Dembinai laꞌelaꞌef hihif!”   
\p
\v 16 Eaꞌ amam amama agufumi 24-peleim natoma balata luꞌunai amamunai ma naep Godi mape etap mindiwa balagah amamumi mati etap mandaꞌ lotu mandanifel ma God  
\v 17 maꞌi,  
\q1 “Dembinai, ineꞌ God pepel hianainai. Fowaꞌ gani endilisi ineꞌ napani, deiꞌ ineꞌ nape. Ineꞌ deiꞌ nefaꞌ pepel hianai ineꞌinai nape king Dembinai numafi epes saloma amamaga hiami. Eaꞌ afaꞌ wanifelina.  
\v 18 Esis sololama Godi opalef aom ukup numbutim, eaꞌ deiꞌ okom ineꞌinai wandafuna nataga eaꞌ. Deiꞌ nemaf ineꞌ newaloga esis sagaꞌi ma sotagama kot. Deiꞌ nemaf ineꞌ noseꞌasa amamaga buꞌwami ma amam profet mandaꞌ opeh ineꞌimi. Deiꞌ ineꞌ noseꞌasa amamaga buꞌwami esis amam nematawa ineꞌisi saloma isima hiesi sandaꞌ lotuminai sape owina ineꞌ, esis agufisi saloma isima agof aꞌasi wapotiꞌ. Deiꞌ nemaf ineꞌ neha epes isima saha epes sape etapi!”   
\p
\v 19 Amam maꞌiam eaꞌ ipat luꞌunai Godi nape heven nandawisiꞌ eaꞌ bokis buꞌwami amama miꞌuli Godi napaimi amama mataga maꞌoh alihiguma nomon ipat Ananinai. Eaꞌ otaga holala pelepeleꞌ, dilili bugwalagw nafeꞌ, etap nalemb etin asaf luꞌunai ondowa luꞌwamunai siꞌi otamba mambip mowai.   
\c 12  
\s1 Nemataꞌw kwaloma kwambon luꞌunai  
\p
\v 1 Eaꞌ anona ikwaf luꞌunai nataga heven nape naꞌama. Anoꞌw nemataꞌw kwape kowahoꞌ aon alipunai alop akwaꞌunai siꞌi lowaf. Eaꞌ aon owambunai nape owina boꞌwagah akwaꞌumi. Eaꞌ anona hat awau agufuwai atowa owaloꞌomi natoma balaga akwaꞌunai. Ondowa 12-peleiwa wailana.  
\v 2 Eaꞌ akwaꞌw opafuꞌw kwameꞌ nimanimi amama matagamaꞌwa kola awani. Eaꞌ kwawal kwalef kwaꞌoh mehip.  
\v 3 Eaꞌ anona ikwaf nataga heven nape naꞌama. Anona kwambon luꞌunai nape. Anan akwahinai balagah 7-peleim mandandana, wambawa mataganai 10-peleim. Eaꞌ hagw 7-peleim dembemi atom mowaloꞌami matoma balagah ananimi.  
\v 4 Andep kwambuni nambefa waꞌam sawaloga ondowa mape ilifi sawalogom mataga wenifim nambefam mowai etap. Eaꞌ deiꞌ biefim mape ilif laꞌelaꞌef. Eaꞌ kwambon anama nafiꞌi naitu naep nemataꞌw kwaꞌi kola awani, naitu nohafa akwaꞌwa ataꞌ kolani, mehip nogwaꞌan.   
\p
\v 5 Eaꞌ nemataꞌw akwama kola awani aman. Awani inima anona nemaf owagama laꞌifina numafi esis amam nematawa hiesi sape kantri hiagoma. Anan laꞌifina nohapila bandan sandaꞌ ain sandaꞌanai nope dembinai numafias. Akwaꞌw kolan, mehip esis sofaꞌan safeꞌma balata king Godi nape andeandeꞌ.  
\v 6 Eaꞌ kwasagih kwafeꞌ anagon wafiguma fatauguma. Anama God nandondombagona akwaꞌw. Ama nambimb enis epes sumafiaꞌw soseꞌakw gwaꞌaimi akwaꞌw dahama dahama nimeguf 1,260-peleim, afagof wanom tuꞌwaninai.  
\v 7 Deiꞌ wandaf luꞌunai nataga heven. Ensel dembinai Maikel naloma amam ensel ananimi mapaꞌ maloma kwambon anama luꞌunai. Eaꞌ kwambon anama naoꞌwa amam ensel awami ananimi magwamama wandaf amam mapaꞌ malomam wapotiꞌ.  
\v 8 Eaꞌ kwambon naloma ensel ananimi amam ina laꞌifima muliꞌamona wandaf, owaꞌ. Deiꞌ amam ina ataꞌ mapani gani heven wapotiꞌ, owaꞌ.  
\v 9 Eaꞌ amam ensel Godi makwahai kwambon anama nisilaꞌi. Kwambon anama fowaꞌ ganinai deiꞌ esis saꞌi aman aonai Satan. Anan aman nambasoꞌma esis amam nematawa hiesi etapasi. Amam makwahai anan nafiꞌi etap, makwahai ensel awami ananimi wapotiꞌ misilaꞌi malumanai.   
\p
\v 10 Eaꞌ ameꞌ anona maf naꞌi mehip nataga heven naꞌi naꞌama naꞌi, “Deiꞌ God apeꞌinai nefaꞌapa mutanimani pepel ananinai nataga nandawalap alihiguma ma nope Dembinai king! Krais, God nandandepana nasapaꞌana nafiꞌi Anan laꞌifinai nefaꞌ agel luꞌunai eaꞌ. Deiꞌ main, aman anama nambasoꞌma alupusi sahin owan apeꞌisi owamb alip naꞌipa God apeꞌinai naꞌi esis sandaꞌ waf aonai. Eaꞌ deiꞌ amam ensel Godi makwahona nisilaꞌi eaꞌ.  
\v 11 Esis alupusi sahin owan apeꞌisi sofaꞌ pepel ma esimbel sipsip noganai sawalipasa basef ananimi endilisimi. Esis sandaꞌ waf anama. Amama atom deiꞌ silaiꞌipa wandaf saliꞌamona naumbih ma amama. Esis ina ukup maꞌimaꞌi endilisi ma sope andeandeꞌ etap anaeꞌ, owaꞌ. Esis ina umbamahasa naumbih sohas sogaꞌ, owaꞌ.  
\v 12 Ipeꞌ hipei pape heveni, ipeꞌ pendanifel! Ipeꞌ pape etapi paloma sape naoh embeli, uwahipipa! Deiꞌ main, nimanimi luꞌwami maꞌi motagamepa. Satan nisilaꞌo ma ipeꞌ, anan okom wandafuna endilisi. Deiꞌ main, anan nogawa nogota bandana ma nope nondaꞌ opeh ananimi, felefeleꞌ higililana.”   
\p
\v 13 Amam ensel makwahai kwambon anama luꞌunai nisilaꞌi etap deiꞌ nagawa anan nafiꞌi nape etap nati nemataꞌw akwama kola awani aman natofaꞌw.  
\v 14 Eaꞌ saseꞌakw behenagof biam luꞌwami komonimi akwaꞌw laꞌifikwa kufiaꞌ kofeꞌ wambel akwaꞌunai etap wafiguma fatauguma. Ama ataꞌ kope laogona kwambon anama luꞌunai ma esis sumafiaꞌwa gwaꞌaimi solagaꞌw kofeꞌ kofeꞌ kotambel afagof wanom tuꞌwaninai.  
\v 15 Eaꞌ kwambon anama luꞌunai naguꞌwai embel malogel ananinai. Embel amama mataga siꞌi anona walemb luꞌunai koloꞌ etin mafeꞌ magiꞌma akwaꞌw. Kwambon anama naꞌi embel amama mondahago akwaꞌw kofeꞌ hegililaꞌw.  
\v 16 Eaꞌ owaꞌ. Etap nagiambamaꞌw naꞌama. Malogel etapi nagal alihina naꞌ embel amama kwambon naguꞌami malogel ananinai hiꞌalam.  
\v 17 Eaꞌ anan okom numbutina endilisi ma akwaꞌw nafeꞌ naꞌi nondaꞌ wandaf noloma enis batawisaꞌw akwaꞌusi, esis amam nematawa isima saila miꞌuli hianai Godi sawalapa basef Jisasi sailam.  
\v 18 Eaꞌ kwambon anama nafiꞌi naitu naoh akata.   
\c 13  
\s1 Mafis biam aolupumi mataga  
\p
\v 1 Eaꞌ ati anona mafin nape aolupi nataga naoh embel. Wambawa mataganai 10-peleim eaꞌ balagah 7-peleim mapaina. Wambawa amama mowaloꞌ hagw dembemi atom mowaloꞌami matoma wambawa mandandam. Balagah ananimi sandaꞌ anom agof mail mandandama balagah amama. Agof amama ofagema naꞌama. Basef mamumami awami findiwaimi ma God.  
\v 2 Mafin anama deiꞌ atolona, anan siꞌi anom mafis luꞌwami wandafumi wanom. Anona mafin agel lepat eaꞌ boꞌwalelef ananimi siꞌi boꞌwalelef anona mafin bea, malogel ananinai siꞌi malogel anona mafin laion. Eaꞌ kwambon anama nandaꞌ mafin aolupunai nataga laꞌifina ma pepel luꞌunai ananinai. Anan nandaꞌ mafin anama nataga dembinai ma numafi epes hiesi fowaꞌ anan numafiasi.  
\v 3 Mafin anama balagah 7-peleim anona melet natomana siꞌi sahana afuna. Eaꞌ balaga anama namboꞌwana deiꞌ wafiꞌigin, amboꞌona wapotiꞌ. Eaꞌ epes hiesi sape etapi sohafel gegelalasis kwapeteꞌasa mafin anama aolupunai owaꞌ afunae, sailona.  
\v 4 Kwambon anama naseꞌana pepel ananinai mafin anama aolupunai. Eaꞌ esis hiesi sandaꞌ lotuma kwambon anama naloma mafin anama aolupunai wapotiꞌ safela agel ananinai saꞌi, “Emi nandati naꞌama etin siꞌi mafin aolupunai anama? Owaꞌetin. Emi laꞌifina nepaꞌ nelomana? Owaꞌetin.”   
\p
\v 5 Eaꞌ deiꞌ God nape nati mafin anama naꞌi mehip naꞌi basef awami findiwama God. Anan laꞌifina nape dembinai ma nandaꞌ waf anama nape nogota laona aomb amama 42-peleim, afagof wanom tuꞌwaninai.  
\v 6 Malogel ananinai noga naꞌi basef awami nandaꞌ findiwama God. Anan nandaꞌ agel Godi findiwana wambel Godi naloma wambota anama ananisi sape heveni.  
\v 7 Eaꞌ God ataꞌ nape nati anan ataꞌ nape laꞌifina nefela wandaf nopaꞌ noloma esis amam nematawa Godi eaꞌ naitu nandaꞌ wandaf nahagofas. Anan nofaꞌ pepel ma kwambon anama eaꞌ laꞌifina ma nope dembinai laꞌifinai ma esis epes hiesi saꞌi diga anama hianai ma etap anama wambel hiagoma, alop naninani.  
\v 8 Anona buk ambal namunai napainai naꞌoh. Esis sandaꞌ agof epes Godi etis mape buk anama ma nogota anama fowaꞌ gani God nandaꞌ etap anaeꞌ. Buk anama sipsip anama noganai fowaꞌ esis sahana nagaꞌ. Amam nematawa hiesi etapasi agof asasimi owaꞌ mope buk anama, epes isima hiesi sandaꞌ lotuma mafin anama.  
\v 9 Ipeꞌ epes aligah magalipei, ipeꞌ pemeꞌ basef amama naꞌama.  
\v 10 Iꞌi esis siꞌi sondaꞌ enin epen nefeꞌ nendaꞌ kalabus, enin nefeꞌ nendaꞌ kalabus. Iꞌi esis siꞌi soha enin epen nogaꞌma bainat, enin nogaꞌ ma bainat. Endilisi waf anama nimaninai atona anona nemaf notaga. Ipeꞌ amam nematawa Godi pepe laꞌifipa pembaleꞌefa God laꞌifipa andeandeꞌ.   
\p
\v 11 Eaꞌ ati anona mafin aolupunai wapotiꞌ nohafel nawisi etap owin nalatawi ilif. Wambawa biam matagana siꞌi wambawa mataga sipsip nogami, eaꞌ basefa diga ananinai siꞌi malogel diga anona kwambon luꞌunai.  
\v 12 Mafin anama naitu aolupi naꞌi nafeꞌma bifi nefaꞌ pepel ma mafin anama naliꞌi ma numafi epes hiesi. Eaꞌ nandaꞌ opeh laꞌifimi ma naep mafin anama naliꞌi. Anan nandaꞌ opeh laꞌifimi endilisi ma nondaꞌ esis amam nematawa sape etapi sondaꞌ lotuma mafin anama naliꞌi, fowaꞌ sahana saꞌi nomboꞌma nogaꞌ deiꞌ wafiꞌina eaꞌ.  
\v 13 Mafin anama nagiꞌi, anan nandaꞌ pepel luꞌunai naninani. Pepel anama luꞌunai naꞌama. Naep esis amam nematawai, nandaꞌ nif makwaha heven misilaꞌi etap anaeꞌ.  
\v 14 God ataꞌ nape nati anan nandaꞌ pepel anama naninani ma naep mafin anama naliꞌi. Eaꞌ anan nagiꞌi nandaꞌ waf anama ma nahambombaga esis amam nematawa etapasi. Naꞌipas mehip naꞌama naꞌi, “Ipeꞌ pendomba ambala mafin anama naliꞌi nil anona lawag maina ma pefela agel ananinai luꞌuna. Mafin anama naliꞌi maꞌuna anama fowaꞌ bainat nahana ataꞌ nape namunai laꞌelaꞌef.”   
\p
\v 15 God nape nati mafin anama nagiꞌi naꞌi ahoꞌma anan naseꞌana ambal ambagof mapaimi ma ambal anama mafin aolupunai sandaꞌ lawag sandaꞌanai. Eaꞌ ambal anama noga naꞌi basef eaꞌ laꞌifina ma noha epes sandaiwaꞌma sondaꞌ lotuma anani sogaꞌ.  
\v 16 Eaꞌ mafin anama nagiꞌi laꞌifina nasasapaꞌ epes isima hiesi sondaꞌ anona ikwaf nepe atona etin esis lagof daꞌisimi o amagah asasimi. Ikwaf epes isima agufisi soloma epes agof aꞌasi soloma isima otamba hiamisi soloma isima wafisi. Eaꞌ enis agof aꞌasi sandaꞌ maola enis epes soloma enis agufisi wapotiꞌ.  
\v 17 Eaꞌ epes hiesi sofaꞌ ikwaf anama ma agel mafin anama nape aolupi. Eaꞌ enis sofaꞌ anona namba ma mafin anama agilinama. Iꞌi emi egafis owaꞌ sefaꞌ ikwaf anama, esis ina nambimb sotala amamaga epesi, eaꞌ esis wapotiꞌ ina nambimb sotala amamaga asasimi, owaꞌ.  
\v 18 Apeꞌ ukup mope laꞌifim andeandeꞌma amama. Emi egafis segawa, esis seamba namba mafin anama aolupunai andeandeꞌ. Namba anama basef womun etina anona aman. Namba anama 666.   
\c 14  
\s1 Esis 144,000-peleis sandaꞌ awalef dambaimi  
\p
\v 1 Aeꞌ atologon wapotiꞌ ati sipsip anama noganai naitu halaf Saion eaꞌ amam nematawa hiesi endilisi 144,000-peleis saitu salomana. Agel sipsip noganai naloma agel ahalomana ananinai agof amama mail amagah asasimi.  
\v 2 Eaꞌ ameꞌ anom amamaaga mandaꞌam mafiꞌi gani heven siꞌi embel mowa kululuꞌ etin mafeꞌ, siꞌi otaga dililuwala mehip. Aeꞌ ameꞌ maf anama siꞌi epes saha gita naloma musik mandaꞌam.  
\v 3 Esis sandaꞌ anona awaf dambainai ma anama balata luꞌunai Godi notawa natologoma, ma naep amamaga biamibiam mape namumi maloma naep agufumi 24-peleim. Amam nematawa isima hiesi endilisi 144,000-peleis, God natalis laꞌafena epes hiesi etapasi, amama atom laꞌifisa sogawa awaf anama. Ina enis epes wapotiꞌ laꞌifisa sogawana, owaꞌ.  
\v 4 Epes isima sape boꞌwes endilisi. Amam ina mandaꞌ waf aonai maloma nematawa, owaꞌ. Mape boꞌom. Wambel anama sipsip noganai naꞌi neafeꞌma, esis sagiꞌmana sameꞌ basef ananimi sandaꞌ maol ananinai. God natalis laꞌafena esis amam nematawa hiesi etapasi sape saliꞌi siꞌi ofa buꞌunai naliꞌi God naloma sipsip noganai mofaꞌanai.  
\v 5 Esis ina sandaꞌ anom basef kwamaimi basoꞌmaimi, owaꞌ. Esis basef ofagema ma waf aonai aꞌas.   
\s1 Ensel wanom maꞌi anom basef  
\p
\v 6 Aeꞌ ati anona ensel nufiaꞌ nafeꞌ gani ilif. Nofaꞌai basef buꞌwami Godi mape laꞌelaꞌefi nandaꞌ opeh amama ma naꞌipasa basef amama esis amam nematawa hiesi sape etapi. Nawalapama epes hiesi sape kantri hiagoma gani etap hiagoma saꞌi diga naninani ma alop naninani hianai.  
\v 7 Anan noga naꞌi mehip naꞌama naꞌi, “Nogota nataga eaꞌ ma God nowaloga epes hiesi ma kot. Ipeꞌ umbamehepa ma Anan pila basef ananimi, pefela agel ananinai. Ipeꞌ pendaꞌ lotuma God, Anan nandaꞌ heven naloma etap naloma naoh embel maloma embel amama hiami mataga etap owini.”   
\p
\v 8 Anona ensel nagiꞌmai ensel anama naliꞌi nafiꞌi naꞌi anom basef naꞌi, “Wambel luꞌunai Babilon anama aona eaꞌ! Anan awagon eaꞌ! Epes sape wambel anama sandaꞌ esis amam nematawa hiesi ma saila waf anama sandaꞌ soꞌa waolanai. Waf asasinai aona siꞌi wain laꞌifinai nandaꞌ epes ukup maseꞌas. Wambel anama Babilon naseꞌas embel wainim amama epes hiesi wambel hiagoma sagwaꞌami.”   
\p
\v 9 Eaꞌ anona ensel nagiꞌma amam biam nafiꞌi. Ensel anama nafeꞌma wanomi noga naꞌi mehip naꞌama naꞌi, “Emi egafis sondaꞌ lotu ma mafin anama nape aolupi ma ambal ananinai sandombanai ma nefaꞌ ikwaf anama amaga lagof asasimi,  
\v 10 esis nambimb sope siꞌi sogwaꞌ anona wain. Wain anama basef womun etina okom wandafunai Godi. God ina nati uwahipis, owaꞌ. Anan okom wandafunai luꞌuna endilisi. Anan anona nemaf neseꞌas okom wandafunai epes isima ma nogwa waf aonai esis sandaꞌanai. Ama epes isima sofaꞌ nimanimi luꞌwami ma nif fandumi mahihiꞌasi ma otamba agel salfa nifimi ma naep amam ensel buꞌwami Godi moloma naep sipsip noganai.  
\v 11 Nogoh mataga nif amama maseꞌasa nimanimi epes isima sandaꞌ lotuma mafin anama aolupunai naloma ambal anama ananinai. Epes isima ina anona nemaf sopoma nomaꞌw owamb alip, owaꞌ. Nogoh amama molomolata ilif laꞌelaꞌef mopani.”   
\p
\v 12 Nemaf anama nimanimi amama motaga, enis amam nematawa Godi situ laꞌifis. Esis amam nematawa isima saila miꞌuli Godi ma sombaleꞌefa Jisas laꞌifis andeandeꞌ.   
\p
\v 13 Eaꞌ ameꞌ anona malogel naꞌi nafiꞌi heven naꞌi, “Ineꞌ daꞌa anom basef naꞌama. Esis amam nematawa sombaleꞌefa Dembinai sagaꞌi, deiꞌ nimeguf hiami anona nemaf owagama wapotiꞌ sondanifel!”  
\p Ambal Buꞌunai Godi wapotiꞌ naꞌi, “Esis anona nemaf sokwaha opeh luꞌwami amama esis sandaꞌami sopoma nomaꞌw. Esis ina sope etin, owaꞌ. God nambimb niti waf buꞌunai esis sandaꞌanai eaꞌ nogwamasa anom amamaga buꞌwami esis. Waf buꞌunai esis sandaꞌanai anona nemaf nondawalap alihina.”   
\s1 Okom wandafunai Godi siꞌi waf salaꞌ gwaꞌaimianai etap anaeꞌ  
\p
\v 14 Atologon wapotiꞌ, ati otaga atotona afitinai nape eaꞌ anona epen ambal napainai nape otaga anama. Enin siꞌi anona dembinai nataga epen endilisinai. Anan nowaloꞌ hat buꞌunai nafifili siꞌi gol balaga ananinai nahapila anona nogwatop hiꞌalina endilisi lagel ananinai.  
\v 15 Eaꞌ anona ensel nape ipat luꞌunai Godi nomon nawisi andeꞌ nofala aman anama natoma otagai mehip naꞌi, “Ineꞌ topaꞌ gwaꞌaimi amama maufi ma nogwatop anama ineꞌinai! Deiꞌ main, gwaꞌaimi hiami etapami maof eaꞌ. Amama atom deiꞌ nogota anaeꞌ pelaꞌ gwaꞌaimianai.”   
\p
\v 16 Eaꞌ aman anama nape otagai nahapila nogwatop ananinai nakwahona etap, natopaꞌ gwaꞌaimi maufi etap anaeꞌ.   
\p
\v 17 Eaꞌ anona ensel wapotiꞌ nawisi andeꞌ ma ipat anama luꞌunai Godi nape heven. Anan wapotiꞌ nahapila nogwatop hiꞌalinai endilisi.  
\v 18 Eaꞌ anona ensel wapotiꞌ nakwaha balata anama sondolalima Goda nafiꞌi. Ensel anama laꞌifinai ma numafi nifi. Nofala ensel anama nahapila nogwatopi nofalona mehip naꞌama naꞌi, “Ineꞌ faꞌai nogwatop anama ineꞌinai hiꞌalina endilisi, netopaꞌ suꞌutip gwaꞌaimi maufi mail mandelef waini etap nekolasom moꞌoh! Deiꞌ main, gwaꞌaimi amama hiami maof eaꞌ!”   
\p
\v 19 Eaꞌ ensel anama nahapila nogwatop ananinai nakwahona etap, natopaꞌ gwaꞌaimi suꞌutip akumi mail mandelef waini natamam motawa. Eaꞌ nafela gwaꞌaimi amama nakwahom mowala otam tang luꞌunai nomona safoꞌasom wain embel. Amama mondolaꞌwifa okom wandafunai Godi ma epes isima sosambala basef Ananimi.  
\v 20 Eaꞌ safoꞌasom waina otam tang anama luꞌunai nape andeꞌma taun anama wambel luꞌunai. Esimbel maluwi tang andeꞌ koloꞌ etin mafeꞌ laogon siꞌi 300 kilomita siꞌi walemb embel mafiꞌi matef mataga ilif motambel ain nape malogof hosi.   
\c 15  
\s1 Ensel 7-peleim mahapila amamaga awami endilisi mandandam  
\p
\v 1 Ati anom amamaga laifimi matagai heven eaꞌ okom natanea ma amama. Ati ensel 7-peleim mape eaꞌ amam mahapila amamaga awami endilisi mandandama epes. Iꞌi anona nemaf amamaga amama awami hiꞌilam, ina ataꞌ anom motaga wapotiꞌ, owaꞌ. Deiꞌ main, amamaga amama awami 7-peleim, amama okom wandafunai Godi eaꞌ hiꞌilana endilisi.  
\v 2 Eaꞌ ati anom amamaga siꞌi naoh embel luꞌwami mandati siꞌi glas amama sandaꞌam maloma nif. Epes isima saitu laꞌifis saliꞌamona wandafa waf aonai sahagofa mafin anama luꞌunai nape aolupi naloma ambal ananinai maloma ikwaf ananinai 666, esis saitu naoh amama daꞌmalifima siꞌi glas. God naseꞌas anom musik siꞌi gita sahapilam.  
\v 3 Esis sandaꞌ awaf Moses nandaꞌmana opeh Godi naloma awaf sipsip noganai. Awaf anama naꞌama.  
\q1 “Dembinai, ineꞌ God pepel hianainai. Opeh hiami ineꞌ nandaꞌami, amama laꞌifimi eaꞌ afaꞌ watolom ukup matameamam hiahiam! Ineꞌ king numafi epes hiesi eaꞌ waf ineꞌinai boꞌona endilisinai hiꞌalana!  
\v 4 Dembinai, ineꞌ etina nape boꞌwena. Deiꞌ emi egafis owaꞌ umbamahasa ineꞌ? Owaꞌetin. Hiesi umbamahasa ineꞌ sandaꞌ lotu ma ineꞌ etina. Emi egafis owaꞌ sefela agel ineꞌinai? Owaꞌetin. Epes wambotagw hiami ma etap hiagoma anona nemaf sifiꞌi sondaꞌ lotu ma ineꞌ etina. Deiꞌ main, waf buꞌunai ineꞌinai nataga alihiguma nandawalap.”   
\p
\v 5 Amama mafeꞌma eaꞌ, atologon wapotiꞌ ati ipat buꞌunai Godi notawa gani heven. Ipat anama nagal alihina ati nomon ipat anama nape sandaꞌ sel sandaꞌanai God napeinai.  
\v 6 Eaꞌ ensel amama 7-peleim mahapila amamaga awami endilisi mandandam nohambamboga epes, makwaha ipat anama mawisi andeꞌ. Eaꞌ mowahoꞌ luwaguf afitimi buꞌwami endilisi howalagon mafifil endilisi. Mowahoꞌ legw siꞌi goli managam mefetagw amamumi.  
\v 7 Eaꞌ anona laꞌafena amam biamibiam mape namumi naseꞌama dis luꞌwami 7-peleim sandaꞌ gol sandaꞌami mandandama amam ensel atona etin. God nape namunai laꞌelaꞌef okom wandafunai ananinai nape siꞌinama dis amama 7-peleim.  
\v 8 Eaꞌ nogoh amama mataga mafifili ma pepel Godi, amama siꞌima ipat anama Godi. Eaꞌ ina enin epen laꞌifina nefeꞌ nuwis ipat anama nomon, owaꞌ. Esis sape sohafa ensel 7-peleim mondaꞌ opeh hiꞌilam amamaga amama awami mahapilam mandandami ataꞌ miliꞌ.   
\c 16  
\s1 Dis 7-peleim okom Godi wandafunai napaim  
\p
\v 1 Ameꞌ anona malogel naꞌi natagai mehip ipat luꞌunai Godi nomon. Malogel anama naꞌi nofala ensel amama 7-peleim naꞌi, “Ipeꞌ pefeꞌ pekoloꞌwa dis amama 7-peleim okom wandafunai Godi napaimi ma koloꞌolam mofeꞌ etap.”   
\p
\v 2 Eaꞌ ensel naliꞌi anama nafeꞌ nakoloꞌwa dis amama ananimi mafeꞌ etap eaꞌ maselis mamumami luꞌwami endilisi mataga etap epes isima ikwaf anama mafin aolupunai nailas ma epes isima sandaꞌ lotuma ambal ananinai.   
\p
\v 3 Eaꞌ ensel anama nafeꞌma bifi wapotiꞌ nafeꞌ nakoloꞌwa dis ananimi embel naoh luꞌwami. Eaꞌ naoh amama mandamboma mataga siꞌi esimbela epes hiesi sagaꞌi. Eaꞌ amamaga mape nomon naohi magaꞌ hiꞌalam.   
\p
\v 4 Eaꞌ ensel anama nafeꞌma wenifi nakoloꞌwa dis ananimi embel walemb luꞌwami maloma anama embel motah mahagofowa. Embel amama hiami mandamboma mataga esimbel.  
\v 5 Eaꞌ ameꞌ ensel anama numafi embel naohi walemb hiami naꞌi, “Ineꞌ buꞌwinai endilisi, nandaꞌ kot ineꞌinai andeandeꞌ naila ikwaf buꞌunai atona nawaloga esis sandaꞌ waf aonai.  
\v 6 Deiꞌ main, esis amam nematawa hiesi saha amam nematawa buꞌwasi Godi ineꞌisi afis saloma profet ineꞌimi wapotiꞌ eaꞌ esimbel asasimi malo. Eaꞌ deiꞌ naseꞌasa esimbel epes isima sandaꞌ waf aonai ma sogwaꞌ embel. Ineꞌ nagwamasam mandahama waf aonai esis sandaꞌanai.”   
\p
\v 7 Eaꞌ ameꞌ anona maf nataga balata anama sondolalima Godanai noga naꞌi, “Endilisi Dembinai, ineꞌ God pepel hianai napainai. Ineꞌ nowaloga epes ma kot eaꞌ kot ineꞌinai endilisi buꞌunai hiꞌalana.”   
\p
\v 8 Eaꞌ ensel anama nafeꞌma biamibiami nakoloꞌwa dis ananimi ma aon alipunai eaꞌ God nape nati owaf naofa epes nif.  
\v 9 Nif amama luꞌwami nigisigeim endilisi ma epes isima. Eaꞌ saꞌi basef findiwaimi awami ma God numafi amamaga amama awami. Esis ina samboma opalefa sakwaha waf aonai esis sandaꞌanai ma sefela agel Ananinai, owaꞌ.   
\p
\v 10 Eaꞌ ensel anama nafeꞌma wanom biami nakoloꞌwa dis ananimi balata kingi luꞌunai anama mafin aolupunai. Eaꞌ owamb luꞌunai nataga anama mafin aolupunai nahopogoma. Eaꞌ esis sail waf ananinai sofaꞌ nimanimi luꞌwami. Eaꞌ sogwa afegah asasimi nalelef tilili talalaꞌ sondolaꞌwifa sofaꞌ nimanimi luꞌwami.  
\v 11 Esis ukup mapoma nimanimi maloma maselis asasimi, deiꞌ saꞌi basef awami findiwaimi ma God nape heveni. Ina samboma opalef sowaꞌ alafugaha waf anama aonai esis sandaꞌanai, owaꞌ.   
\p
\v 12 Eaꞌ ensel anama nafeꞌma wanom wanomi nakoloꞌwa dis ananimi walemb luꞌunai Yufretis. Eaꞌ walemb embel mafaꞌ hiꞌalama mondondomba eaf amam king dembemi mufiꞌi anama aon natefima.  
\v 13 Eaꞌ ati ambagof awami wanom mandati siꞌi kwahowa luꞌwami matagai malogel kwambon anama luꞌunai naloma malogel mafin anama aolupunai naloma malogel profet anama nambasoꞌami.  
\v 14 Ambagof amama awami endilisi mandaꞌ ikwaf pepel naninani ma esis sotolona sogawana. Amam mafeꞌma amam king dembemi mumafi epes hiesi sape wambel hiagomai. Amam maꞌi mokolasa amam atogon mondaꞌ wandaf nemaf anama luꞌunai ma God pepel hianai napainai.   
\p
\v 15 “Pemeꞌ! Anona nemaf aeꞌ etagamepa siꞌi sandaꞌ wali safiꞌi sataga. Atagamepa anona nemaf ipeꞌ owaꞌ pegawa piꞌi aeꞌ iefiꞌianai. Iꞌi epes ukup matamea sope sowahoꞌ luwaguf asasimi andeandeꞌma owaꞌ soꞌoh, esis ina sofeꞌ alop atona wahifina solomas siti alop asasinai ambagof aom, owaꞌ. Isima sondanifel.”   
\p
\v 16 Eaꞌ ambagof awami makolasa king hiami anagon etap tuꞌwanina diga Hibrui saꞌi Armagedon.   
\p
\v 17 Ensel anama nafeꞌma 7i nakoloꞌwa dis ananimi eaꞌ uf nofaꞌam. Eaꞌ anona malogel naꞌi natagai balata king luꞌunai nomon ipat luꞌunai Godi naꞌi mehip naꞌi, “Amama deiꞌ eaꞌ hiꞌalam!”   
\p
\v 18 Eaꞌ otaga holala nafeꞌ, peleleꞌala nafeꞌ eaꞌ otaga dililu bugwalagw, sowambon luꞌunai nakotoꞌ. Sowambon anama anan luꞌunai endilisi ma nimeguf hiami epes sape etapi ina sameꞌ anona sowambon nakotoꞌ luꞌuna fowaꞌ siꞌi anama, owaꞌ.  
\v 19 Taun anama wambel luꞌunai nandawal wenifigin. Eaꞌ wambel hiagoma etap hiagoma kantri awagon hiꞌalagon. Eaꞌ God okom napoma epes sandaꞌ waf aonai sape taun anama luꞌwagoma Babilon, deiꞌ okom ananinai wandafuna nandaꞌ esis saꞌ embela kap wain nalami nahas kwapeteꞌas. Wain anama womun etina okom wandafunai Godi.  
\v 20 Eaꞌ ailan hianai nafaꞌ nafeꞌ higilalana hiꞌalana eaꞌ ina ataꞌ anona halaf atotona nape, owaꞌ.  
\v 21 Eaꞌ asaf ondowa luꞌwamunai siꞌi otamba ais afitimi mowai mahas. Asaf ondowa luꞌwamunai nimanimi endilisi siꞌi beg kopi luꞌunai atona etin. Eaꞌ saꞌipana awagon God ma asaf ondowa luꞌwamunai mowai maha esis.   
\c 17  
\s1 Nemataꞌw dembeꞌwi kwandaꞌ soꞌa wauli kofaꞌ nimanimi luꞌwami  
\p
\v 1 Anona ensel atotona laꞌafena amam ensel 7-peleim mahapila dis amama 7-peleim nafiꞌi naꞌipi naꞌama naꞌi, “Ineꞌ fiꞌi! Nemataꞌw akwama kwandaꞌ soꞌa wauli kwatoma embel luꞌwami ilif anona nemaf kofaꞌ nimanimi luꞌwami akwaꞌumi. Aeꞌ aꞌi ihiꞌambena amama.  
\v 2 Amam dembemi king etapami mandaꞌ waf hianai aonai soꞌa waolanai maloma nemataꞌw akwama. Eaꞌ epes etapasi hiesi wapotiꞌ sandaꞌ waf soꞌa waolanai salomaꞌw. Eaꞌ sataga sahaga sagaol siꞌi epes saꞌ embel wainim laꞌifimi ukup mahaga magaol.”   
\p
\v 3 Ambal Buꞌunai Godi nataga laꞌifina ma aeꞌ ameꞌ siꞌi naꞌoh nandondoꞌoh. Ensel anama nofaꞌe afeꞌ etap wafiguma fatauguma. Anama ati anoꞌw nemataꞌw kwatoma anona mafin ilif nape aolupi akwahinai. Mafin anama agof hiami mail alop ananinai hiꞌalana. Agof amama basef awami findiwaimi hiami mamumami ma God. Mafin anama balagah 7-peleim mandandana wambawa 10-peleim matagana.  
\v 4 Nemataꞌw akwama kwala luwaguf akwahimi biam ina mandati naꞌama etin, eaꞌ sosaf naninani gol maloma sosaf esis sandaꞌ otamba sandaꞌanai naloma ombahigis salatamam otamba luꞌwami. Akwaꞌw kwahapila kap gol lagel akwaꞌunai. Waf hianai aonai nape kap anama nomoni anama. Waf naninani aonai hiꞌepina endilisi ma naep Godi, waf naninani aonai endilisi ma waf anama soꞌa waolanai ma nemataꞌw akwama kwaloma amamaga amama hiami awami mape siꞌima kap anama.  
\v 5 Eaꞌ amef akwaꞌumi ma agel akwaꞌunai nail amaga akwaꞌunai. Agel anama basef mandambahiꞌi maꞌi naꞌama maꞌi, “Taun luꞌwagoma Babilon, anama nondofala mamaꞌwawa nematawa hiawai wandaꞌ soꞌa wauli ma waf hianai aonai endilisi ma etap anaeꞌ.”   
\p
\v 6 Nemataꞌw akwama kwaha esis amam nematawa Godi sembaleꞌefa Jisasi sawalapa agel ananinai sagaꞌ. Eaꞌ ati akwaꞌw kwaꞌ esimbel asasimi kwataga kwahaga kwagaol. Ati akwaꞌw gegelalasowe kwapeteꞌe endilisi okom natanea hiahian.   
\p
\v 7 Eaꞌ ensel anama naꞌipi naꞌi, “Deiꞌ maina ineꞌ gegelalasina kwapeteꞌena? Naꞌama owaꞌ. Atuwasi ihiꞌambena basef ofagema mape mandambahoꞌma nemataꞌw akwama kwaloma mafin anama nofaꞌakwi. Mafin anama balagah 7-peleim mapainai eaꞌ wambawa 10-peleim mataganai.  
\v 8 Mafin anama nape aolupi, ineꞌ natolona eaꞌ. Fowaꞌ anan nape, deiꞌ ina ataꞌ nape, owaꞌ. Anona nemaf nokwaha hul anama nowala owaꞌ notambili nolatowi ilif eaꞌ nefeꞌ higililana owaꞌetin. Enis epes etapasi God ina nandaꞌ agof asasimi mape buk ambal namunai ma nemaf anama fowaꞌ dambadamba anan nandaꞌ etap, owaꞌ. Amam nematawa isima anona nemaf siti mafin anama nape aolupi gegelelesis kwapeteꞌas. Deiꞌ main, fowaꞌ anan nape, deiꞌ owaꞌ, anona nemaf, anan notaga wapotiꞌ.   
\p
\v 9 Epen emi okom buꞌunai napainai, enin nogawa amamaga amama andeandeꞌ. Balagah amama 7-peleim basef womun etina halafutagw 7-peleim nemataꞌw akwama kwatomam.  
\v 10 Eaꞌ balagah amama 7-peleim womun etina anom king dembemi 7-peleim wapotiꞌ. Wanom biam eaꞌ magaꞌ, anona deiꞌ nape dembinai numafi amamaga. Eaꞌ anona ina deiꞌ nataga dembinai king, ataꞌ owaꞌ. Anona nemaf notaga, anan atona ataꞌ nope dembinai nogota bandata.  
\v 11 Mafin anama nape aolupi fowaꞌ napani, deiꞌ owaꞌ nopani, anama siꞌi king dembinai anama nafeꞌma 8i. Anan amam wambota atotona naloma king amama 7-peleim ama anona nemaf higiligalana.   
\p
\v 12 Eaꞌ wambawa amama 10-peleim ineꞌ natolom eaꞌi, amama basef womun etina anom king dembemi 10-peleim. Ina deiꞌ mataga king dembemi, ataꞌ owaꞌ. Eaꞌ amam anona nemaf mofaꞌ pepel moloma mafin anama nape aolupi, motaga king mope dembemi nogota bandata siꞌi awa atotona.  
\v 13 Amam king amama maꞌi basef mandameꞌmama ukup etifim maꞌi anona nemaf mosoꞌ pepel amama amamunai hiꞌilana mafin anama nape aolupi ma momeꞌ basef ananimi.  
\v 14 Anona nemaf mopaꞌ moloma sipsip noganai. Eaꞌ sipsip noganai nikilaꞌam. Epes saila fala ananinai naloma basef ananimi andeandeꞌ, isima nandandepas ananisi etis, epes isima anona nemaf laꞌifisa solomana sigikilaꞌ wandaf anama.”   
\p
\v 15 Eaꞌ ensel anama naꞌipi naꞌi, “Ineꞌ natolom embel amama luꞌwami nemataꞌw kwandaꞌ soꞌa wauli kwatomami. Embel amama basef womun etina esis amam nematawa hiesi epes afaꞌisi sandatama etifigin sape eaꞌ esis amam nematawa hiesi alop naninani saloma diga hianai naninani hiꞌalas.  
\v 16 Eaꞌ wambawa amama 10-peleim ineꞌ natulumi, amama moloma mafin anama ukup amamumi wandafuma nemataꞌw akwama kwandaꞌ soꞌa wauli. Anona nemaf mofaꞌ amamaga hiahaom maim akwaꞌumi ma akwaꞌw atoꞌw kope etin alupusi aꞌakw. Eaꞌ mowalimaꞌw luwaguf akwaꞌumi mohaꞌw kogaꞌ meaꞌ ambegw akwaꞌumi mofaꞌ alop akwaꞌunai nif fendona hiꞌilana.  
\v 17 Deiꞌ main, God atona nafela ukup amamumi ma mondaꞌ amamaga amama motaga. Fowaꞌ anan naꞌiam naꞌi, Anona nemaf amam ukup etifim eaꞌ pepel anama mape dembemi kingi moseꞌanana hiꞌilana nofeꞌma mafin anama nape aolupi. Eaꞌ mondaꞌam naꞌama etin mefeꞌ motagama nemaf anama God nandaꞌam mandahama amamaga amama Anan naliꞌ naꞌiam.  
\v 18 Nemataꞌw akwama ineꞌ natoloꞌwi, akwama basef womun etina taun anama wambel luꞌunai nape siꞌi dembinai nape naliꞌma amam king ma etap anama hiagoma.”   
\c 18  
\s1 Wambel luꞌunai Babilon anama awagon  
\p
\v 1 Amama mafeꞌma eaꞌ, ati anona ensel nakwaha heven nisilaꞌi. Anan pepel napainai endilisi, sosaf ananinai howalagon nandaꞌ etap hiagoma mafifil howalagon.  
\v 2 Anan noga naꞌi mehip endilisi naꞌi, “Nemataꞌw akwama aoꞌw hiꞌalakw. Akwaꞌw basef womun etina wambel luꞌunai Babilon agel luꞌunainai awagon hiꞌalagon! Deiꞌ nataga wambel aonai ma ambagof awami maloma amiguf awami mapaigon.  
\v 3 Deiꞌ main, fowaꞌ esis wambel anama saꞌipa amam nematawa hiesi sasasapaꞌas saꞌ wain asasinai numbutinai. Wain anama basef womun etina waf hianai aonai soꞌa waolanai esis sandanai. Eaꞌ amam dembemi king etapami hiami wapotiꞌ mandaꞌ waf anama soꞌa waolanai maloma esis wambel anama. Eaꞌ epes etapasi sandaꞌ bisnis sofaꞌ otamba hiami ma waf naninani aonai esis wambelisi sandaꞌanai.”   
\p
\v 4 Eaꞌ ameꞌ anona malogel naꞌi natagai heven naꞌi, “Ipeꞌ amam nematawa aeꞌipei, kwaha wambel anama piwisi andeꞌ. Naꞌama ipeꞌ nambimb pendaoꞌoma peloma wambel anama pefaꞌ nimanimi luꞌwami ma waf aonai esis sandaꞌanai.  
\v 5 Waf anama aonai luꞌuna endilisi siꞌi mahanip notawa ilif nalata gani heven. Eaꞌ God okom napoma waf anama.  
\v 6 Ipeꞌ pegawa waf anama nemataꞌw akwama kwandaꞌ soꞌa wauli kwandaꞌanai. Ipeꞌ pegwa waf akwaꞌunai dendeꞌana endilisi piwapanimaꞌw waf wamanai wapotiꞌ. Akwaꞌw kwakolefa waf aonai kwandaꞌanai nataga endilisi. Eaꞌ pekolefa nimanimi luꞌwami hiami mikilaꞌ waf akwaꞌinai ma pegwam mafeꞌma akwaꞌw. Akwaꞌw kwamboma embel laꞌifimi mala kap anama. Eaꞌ naꞌama etin ipeꞌ awi pekolefa embel laꞌifimi peseꞌakwam akwaꞌw kweaꞌama komeꞌ nimanimi awami mogwam mofeꞌma akwaꞌw mondogwama.  
\v 7 Nemataꞌw akwama kwafela agel akwaꞌunai atona kwandaꞌ waf hianai naninani ma kope andeandeꞌ. Eaꞌ ipeꞌ peseꞌakw nimanimi hiami akwaꞌw mondahama aligah maseꞌakw. Eaꞌ pendaꞌ akwaꞌw kondaꞌ kwelef etin. Akwaꞌw okom naꞌi naꞌama kwaꞌi, ‘Aeꞌ ataga ape kwin dembiwei. Aeꞌ ina siꞌi alifiwei, owaꞌ. Nimanimi ina nambimb motagame ma elef, owaꞌ.’   
\p
\v 8 Eaꞌ amamaga mamumami awami endilisi nambimb motagama wambel anama anona nemaf atotona. Awes luꞌunai hianai notaga eaꞌ epes hiesi nambimb selef kwapeteꞌ nolomeahas luꞌunai notagamas. Eaꞌ nif motaga fendo wambel anama Babilon hiꞌilagon. Deiꞌ main, Dembinai God nawaloga wambel anama nagwamasa nimanimi luꞌwami esis. Anan pepel luꞌunainai laꞌifinai endilisi.   
\p
\v 9 Amam king etapami mandaꞌ waf soꞌa waolanai aonai maloma akwaꞌw eaꞌ mandaꞌ waf hianai aonai malomaꞌw. Nambimb amam king amama miti akwaꞌw feandoꞌwa nogoh luꞌwami motagaꞌw eaꞌ melef kwapeteꞌ.  
\v 10 Anona nemaf amam umbamoham kwapeteꞌ endilisi ma nimanimi amama akwaꞌw kofaꞌami. Eaꞌ mitu laogona akwaꞌw miꞌiam miꞌi, ‘Owahipipa owahipipa endilisi ma wambel Babilon! Ipeꞌ taun wambel laꞌifinai! Nogota bandana atona siꞌi aua atotona mehip ipeꞌ pefaꞌ nimanimi amama ma waf aonai ipeꞌ pandaꞌanai!’   
\p
\v 11 Eaꞌ epes sape sandaꞌ opeh bisnis etapi ukup mopoma wambel anama eaꞌ solopagon sope opalef nimanimagon sope. Deiꞌ main, ina nambimb enin epen netala hiahaom ananimi wapotiꞌ, owaꞌetin.  
\v 12 Hiahaom maim amama, gol buꞌwami satalom otamba hiami siliwa maloma anom otamba buꞌwami, ombahigis buꞌwami malatamam endilisi, luwaguf buꞌwami akwahimi mamumami maloma anom luwaguf silk sahapilam gogwafim maloma lawah amama amamaga alogw buꞌwami maꞌami maloma amamaga hiami esis sandaꞌ nalelef elefanim sandaꞌami, amamaga amama hiami sandaꞌ lawah satalom otamba luꞌwami sandaꞌami maloma amamaga sandaꞌ bras howalagon buꞌwami sandaꞌami maloma amamaga sandaꞌ ain sandaꞌami maloma anom amamaga sandaꞌ otamba buꞌwami sandaꞌami.  
\v 13 Eaꞌ hiahaom naꞌama. Lawah nembawa sagwaꞌami agilima sinamon maloma paura nogoh alogw buꞌwomumi maloma gris saꞌi mer maloma sanda amama buꞌwami frankinsens maloma wain naloma wel sandaꞌ suꞌutip oliv sandaꞌami maloma plaua maloma wit maloma bulmakau, sipsip, hos maloma karis siꞌi wilkar maloma epes wapotiꞌ. Epes isima agof aꞌasi sandaꞌ maol etini sape owina enis epes. Epes isima anom dembemi maꞌi esis ina epes buꞌwasi. Eaꞌ masoꞌasas sotalis siꞌi satal hiahaom maim. Amamaga amama hiami esis ina nambimb satalom wapotiꞌ, owaꞌ.  
\v 14 Epes sandaꞌ maol bisnis siꞌipas naꞌama siꞌi, ‘Gwaꞌaimi amama opalef ipeꞌimi mohafema pefaꞌami, amama hiami makwaha ipeꞌ mafeꞌ eaꞌ. Amamaga hiami buꞌwami atom, otamba maim luꞌwami atom maloma sosaf maim ipeꞌimi amamaga hiami amama makwahipa mafeꞌ. Ama ipeꞌ ina piti amama mope wapotiꞌ, owaꞌ.’   
\p
\v 15 Eaꞌ epes isima sandaꞌ bisnisa amamaga amama ma sofaꞌ otamba hiami wambel anama esis umbamohas endilisi ma nemanimi awami wambel anama sofaꞌami. Esis situ laogona anama opalef nimanim selef sope.  
\v 16 Eaꞌ siꞌi, ‘Owahipigin, owahipigin endilisi wambel anama luꞌunai Baibilon! Fowaꞌ epes sape wambel anama sala luwaguf sosaf buꞌunai atona afitimi maloma luwaguf akwahimi mamumami sofaloꞌma alop asasinai ma gol maloma otamba buꞌwami maloma ombahigis buꞌwami salatamam endilisi.  
\v 17 Nogota bandana atona amamaga amama hiami otamba maloma sosaf maim amama eaꞌ aom hiꞌalam.’  
\p Eaꞌ kepten hiami mumafi sip, maloma epes hiesi satala sip sofeꞌ anona wambel, saloma epes isima hiesi sandaꞌ boskru ma sipi, saloma epes hiesi sandaꞌ maol bisnisa naoh embeli, epes isima hiesi situ laogona wambel anama.  
\v 18 Nemaf anama situ siti akwaꞌw wambel anama fendona nogoh molo, eaꞌ siꞌi mehip naꞌama siꞌi, ‘Wambel luꞌunai enima nape nandati naꞌama etin siꞌi wambel anama? Owaꞌetin.’   
\p
\v 19 Eaꞌ esis sela walombuf balagah asasimi sondahomagon selef mehip opalef aoma wambel anama awagon. Eaꞌ siꞌi, ‘Owahipigin, owahipigin endilisi ma wambel anama luꞌunai! Ama amam hiami mumafi sipi maloma amam matala sip mafeꞌ naoh embeli amam mefaꞌ otamba hiami endilisi ma otamba hiami wambel anama. Owahipigin endilisi. Ama nogota bandana atona awagon hiꞌilagon!’   
\p
\v 20 Ipeꞌ pape heven ilifi peloma ipeꞌ amam nematawa Godi paloma ipeꞌ aposel paloma ipeꞌ profet, ipeꞌ hipei pendanifel ma amamaga amama deiꞌ matagama wambel luꞌunai anama. Deiꞌ main, God nawaloga wambel anama luꞌunai eaꞌ nagwa nimanimi luꞌwami ma anama. Anan nagwa waf anama aonai esis sape wambel anama Babilon sandaꞌanai.”   
\p
\v 21 Basef amama hiꞌalam, ati anona ensel laꞌifinai nafela anona owap luꞌunai siꞌi owap luꞌunai sokaꞌisa witanai. Anan nafela owap anama nakwahona nafeꞌ nowala embel naoh. Eaꞌ naꞌi, “Eaꞌ naꞌama etin anona nemaf esis sefela wambel anama luꞌunai Babilon sokwahogon mehip notaga awagon nefeꞌ nowa siꞌi owap anama nowala naoh ama epes ina sotologon wapotiꞌ, owaꞌetin.  
\v 22 Eaꞌ gita anama apeꞌ mofala musik anama hianai naninani moloma batagwi alelef, maguf anama ina anona nemaf ataꞌ pemeꞌam wapotiꞌ wambel anama, owaꞌ. Eaꞌ epes isima gawaisi sandaꞌ opeh mamumami, ipeꞌ ina anona nemaf piti epes isima sope wambel anama wapotiꞌ, owaꞌ. Maf owap anama luꞌunai nokaꞌisa olelemb witi, anona nemaf ina ataꞌ someꞌ anona wapotiꞌ wambel anama, owaꞌ.  
\v 23 Elelowa lamifah ina anona nemaf ataꞌ mififil mope wambel anama wapotiꞌ, owaꞌ. Eaꞌ malogel aman anama naꞌi neasoꞌ nemataꞌwi o malogel nemataꞌwi kwaꞌi kweasoꞌ amani, ipeꞌ ina anona nemaf ataꞌ pemeꞌ esis wambel anama wapotiꞌ, owaꞌ.  
\p Fowaꞌ epes wambel anama sape sandaꞌ bisnis sape dambesi etapasi. Eaꞌ esis wambel anama sambasoꞌma epes hiesi ma aop ufial basoꞌomunai naninani sandaꞌami.  
\v 24 God nati wambel luꞌunai anama naha profet hiami magaꞌ maloma amam nematawa hiesi Godi. Amama atom deiꞌ ofagema mapoma wambel anama. Eaꞌ epes hiesi sape etap anaeꞌ esis naumbih sahas sagaꞌi, ofagema amama wapotiꞌ mapoma anama atogon.”   
\c 19  
\s1 Esis amam nematawa Godi sandanifel ma Babilon awagon  
\p
\v 1 Amama mafeꞌma eaꞌ, ameꞌ anom amamaga mameꞌ siꞌi mif luꞌwami esis amam nematawa hiesi sape heven ilifi. Esis saꞌi naꞌama saꞌi, “Apeꞌ mefela agel Godi luꞌuna! God apeꞌinei atona nefaꞌ apeꞌ motanimani. Anan agel luꞌunainai, pepel luꞌunainai, nafifili napeinai.  
\v 2 Basef luꞌwami ma kot, anan nawaloga epesa waf endilisinai buꞌunai andeandeꞌ hiꞌalas. Nemataꞌw akwama dembeꞌwi kwandaꞌ soꞌa wauli kwasapala esis amam nematawa hiesi etapasi ma sandaꞌ waf aonai soꞌa waolanai salomaꞌw. Eaꞌ God nandaꞌmakwa basef. Akwaꞌw kwaha esis sandaꞌmana maol Godi sagaꞌ. Eaꞌ deiꞌ God nagwamaꞌwa ofagema amama akwaꞌumi mafeꞌma akwaꞌw.”   
\p
\v 3 Eaꞌ esis sakolasa mif wapotiꞌ naꞌama saꞌi, “Apeꞌ mefela agel Godi luꞌuna wambel anama luꞌunai fandona nif nogoh malo. Amama malo malata ilif laꞌelaꞌef hihif!”   
\p
\v 4 Eaꞌ amam agufumi dembemi 24-peleim maloma amama biamibiam ambal namunai napaimi mindiwa nembawa balagah motawa mandaꞌ lotuma God natoma balata luꞌunai. Amam maꞌiam mehip maꞌi, “Endilisi, apeꞌ mefela agel Godi luꞌuna!”   
\p
\v 5 Ama balata luꞌunai Godi anona malogel naꞌi nafiꞌi naꞌi, “Ipeꞌ pandaꞌmana maol Godi ma umbamahepama Anan paila basef ananimi, ipeꞌ epes agof aꞌepa paloma epes isima agufisi, ipeꞌ hipei pekolasa pefela agel Godi! Anan God apeꞌinai!”   
\s1 Sipsip noganai nasoꞌ nemataꞌw eaꞌ gwaꞌaimi luꞌwami mataga  
\p
\v 6 Eaꞌ ameꞌ anom amamaga siꞌi basef hiami matagama epes amam nematawa hiesi sandatama sapani. Sape saꞌi mimil siꞌi embel mowa kululuꞌ etin. Eaꞌ anom amamaga mandaꞌam siꞌi otaga dilulu bugwalag, maf anama naꞌiam mehip naꞌama naꞌi, “Apeꞌ mefela agel Godi! Dembinai anan God apeꞌinei. Anan pepel hianainai! Deiꞌ anan nataga king endilisi ma numafi amamaga hiami hiꞌalam.  
\v 7 Deiꞌ apeꞌ mondanifel mefela agel Ananinai. Deiꞌ main, nemaf nataga eaꞌ ma sipsip noganai naꞌi nosoꞌ nemataꞌw. Eaꞌ nemataꞌw ananiꞌwi kwandandombol kwape.  
\v 8 God naseꞌakw luwaguf afitimi buꞌwami mafifili endilisi. Akwaꞌw kwala amama ma alop akwaꞌunai.”  
\p Luwaguf amama mondolaꞌwifa waf buꞌunai esis amam nematawa Godi sandaꞌanai.   
\p
\v 9 Eaꞌ ensel anama naꞌipi naꞌi, “Ineꞌ daꞌa basef amama. Epes isima God nofalas sofiꞌmai gwaꞌaimi luꞌwami ma sipsip noganai nosoꞌ nemataꞌw akwama, isima esis sondanifel.”  
\p Eaꞌ anan naꞌipi wapotiꞌ naꞌi, “Basef amama basef Godi endilismi.”   
\p
\v 10 Eaꞌ aeꞌ indiwa nembawa balaga etawa felefeleꞌma boꞌwagah enseli ma endaꞌ lotumana, eaꞌ naꞌipi naꞌi, “Ina nendaꞌam naꞌama, owaꞌ. Aeꞌ alupuwei ineꞌiwei aloma ineꞌ naloma sahopena ineꞌimi, afaꞌ wandaoꞌoma wandaꞌ opeh Godi atom waloma esis hiesi sembaleꞌefa basef endilisimi Jisas nawalipasami. Ineꞌ nendaꞌ lotuma God atona. Apeꞌ mogawa basef amama endilisimi Jisas nawalapama ipeꞌami, amama mafela amam profet mawalipasa basef Godi.”   
\s1 Anona aman anan Krais natoma hos afitinai nafiꞌi  
\p
\v 11 Eaꞌ ati otaga heven nandawisiꞌ nogal, ati anona hos afitinai nape. Epen natomanai agel ananinai saꞌi, “Epen numafi opeh ananimi andeandeꞌ, nandaꞌ waf endilisinai atona.”  
\p Anan naila waf buꞌunai atona nowaloga esis amam nematawa ma basef luꞌwami eaꞌ nandaꞌ wandafa waf buꞌunai atona.  
\v 12 Naep ananimi siꞌi nif fandumi eaꞌ hagw buꞌwami hiami siꞌi dembemi king atom mowaloꞌami mape balaga Ananinai. Anom amef mail alop ananinai, anama agel ananinai. Anan atona nogawa agel anama, enis epes owaꞌ.  
\v 13 Esimbel masaꞌopa luwaguf ananimi laumi nalami. Eaꞌ esis sofala agel ananinai saꞌi, “Basef Godi.”  
\v 14 Anan nape naliꞌma amam soldia mape heveni matoma hos amama afitimi amamumi mailana mafeꞌ. Alop amamunai esis sowahoꞌmama luwaguf afitimi buꞌwami endilisi.  
\v 15 Eaꞌ anona bainat hiꞌalina endilisi nape malogel Ananinai nawisi andeꞌ. Anan naꞌi noha amam nematawa hiesi sape etap hiagomai ma bainat anama.  
\q1 “Anona nemaf Anan numafi epes hiesi sape etap hiagoma. Numafias laꞌifina siꞌi nahapila anona bolam sandaꞌ ain sandaꞌanai.”  
\p Anan nofaꞌasa suꞌutip wain ma otam tang anama waini, amama mondolaꞌwifa okom luꞌunai wandafunai Godi, Anan laꞌifinai ma amamaga hiami.  
\v 16 Anom amef agel Ananinai mailana nimbe naloma luwaguf ananimi. Agel anama naꞌama. Dembinai king ma amam king hiami, Dembinai ma dembemi hiami.   
\p
\v 17 Eaꞌ ati anona ensel naitu felefeleꞌma aon alipunai nape natalogoma. Anan naꞌi mehip naꞌipa amiguf hiami mufiaꞌ mafeꞌ ilif otagai naꞌi, “Ipeꞌ pindowaꞌanima pifiꞌmai gwaꞌaimi anama luꞌwami Godi!  
\v 18 Ama peaꞌ alop amam king dembemi noloma mafis amam kepten mumafi amam soldiai moloma mafisa amam amama dembemi laꞌifimi moloma mafis hosi moloma mafis epes hiesi satumami wapotiꞌ. Ipeꞌ peaꞌ mafis epes hiesi hiꞌilas naꞌama. Epes hiesi, enis agof aꞌasi sandaꞌ opeh sape owina enis epes, enis agufisi sumafi enis epes sandaꞌ opehi, enis dembesi agufisi, enis agof aꞌasi.”   
\p
\v 19 Eaꞌ ati mafin anama luꞌunai nape aolupi naloma dembemi king amama etapami maloma soldia amamumi mandatama mape. Amam maꞌi mopaꞌ moloma aman anama natoma hos afitinai naloma soldia ananimi.  
\v 20 Aman anama natoma hos afitinai nikilaꞌ mafin anama nape aolupi naloma profet anama nawalapa basef basoꞌmaimi nikilaꞌam nandaꞌam mandaꞌ kalabus. Profet anama fowaꞌ nandaꞌ pepel siꞌi God atona nandaꞌanai ma naep mafin anama nape aolupi. Waf anama atona nambasoꞌma epes sofaꞌ ikwafa mafin anama nape aolupi eaꞌ sandaꞌ lotuma ambal atona ananinai. Mafin anama naloma profet anama nambasoꞌami amam biam ataꞌ mape ambagof namumi sokwahom mafeꞌ nif luꞌwami fandom otam batafumi agel salfa hul luꞌunai nowala owaꞌ notambili.  
\v 21 Anom soldia maila mafin anama aolupunai maloma profet anama nambasoꞌmasi, amam ataꞌ mape. Eaꞌ aman anama natoma hosi naha amam soldia amamumi magaꞌ. Anan naham bainat anama launai nape malogel ananinai. Eaꞌ amiguf hiami mafiꞌi maꞌ alop amamunai eaꞌ opalef amigufi elihim endilisi.   
\c 20  
\s1 Satan nandaꞌ kalabus nape afagof 1,000-peleim  
\p
\v 1 Eaꞌ ati anona ensel nakwaha heven nisilaꞌi. Anan nahapila ki utainai ma hul anama launai nogal nowala gani ma owaꞌ notambili. Eaꞌ nahapila sen luꞌunai wapotiꞌ.  
\v 2 Anan nahapila kwambon anama duꞌutinai laꞌifinai, kwambon anama fowaꞌinai endilisi. Anan “Aman nambasoꞌma epes hiesi.” Anan Satan. Eaꞌ ensel anama nowaꞌana sen nape nandaꞌ kalabus nandahama afagof 1,000-peleim.  
\v 3 Ensel anama nakwahona nafeꞌ nowala hul anama launai eaꞌ nowalowamana uta ilif laꞌifina. Eaꞌ Satan ina anona nemaf laꞌifina ma nombasoꞌma amam nematawa hiesi wapotiꞌ, owaꞌ. Anan ataꞌ nope nohafa afagof 1,000-peleim ama ataꞌ hiꞌilam eaꞌ, ensel anama notagahona wapotiꞌ nefeꞌagon ganigani ma nogota bandana.   
\p
\v 4 Amama mafeꞌma eaꞌ, ati anom balatagw luꞌwami kingi maꞌoh eaꞌ enis epes satoma balatagw amama. God naseꞌasa agel luꞌunai ma sowaloga waf esis amam nematawa hiesi sandaꞌanai ma kot. Eaꞌ ati ambagof epes isima hiesi. Esis owaꞌ sondaꞌ lotuma mafin nape aolupi naloma ambal ananinai sambalonai, eaꞌ owaꞌ sofaꞌ ikwaf aonai mafin anama amagah lagof asasimi. Epes isima sembaleꞌefa basef Godi laꞌifis sawalapa basef endilisimi Jisasi. Waf anama atona sandaꞌ opeh buꞌwami, deiꞌ esis naumbih satopaꞌ bagafowas afis. Sohafel wapotiꞌ sofaꞌ ambal namunai sope dembesi king soloma Krais sope sondahama afagof 1,000-peleim.  
\v 5 Nemaf anama niliꞌi ma esis sagaꞌi siliꞌ sohafel hiꞌagilif. Eaꞌ epes isima fowaꞌ sagaꞌi ina sofaꞌ ambal namunai nemaf anama, ataꞌ owaꞌ. Esis ataꞌ sope sohafa afagof amama 1,000-peleim mefeꞌma hiꞌilam.  
\v 6 Epes isima sotanima sohafel nemaf anama naliꞌi, esis sandanifel sope boꞌwes andeandeꞌ. Eaꞌ gaꞌ anama niegiꞌi ina laꞌifina nohagofa epes isima, owa. Esis sope pris Godi sope pris Kraisi sondolalimam. Eaꞌ sope dembesi soloma Kraisa sumafi enis epes afagof 1,000-peleim.   
\s1 Satan nokwaha kalabus nogota bandana eaꞌ nofaꞌ nimanimi endilisi  
\p
\v 7 Afagof amama 1,000-peleim hiꞌilam, uta nindausiꞌ ma kalabus eaꞌ Satan nokwaha kalabus ananimi nuwisi andeꞌ.  
\v 8 Anan nuwisi andeꞌma nombasoꞌma epes amam nematawa hiesi sape etap anaeꞌ hiagoma biefigin biefigin nafeꞌ notambela, esis epes hiesi Gok saloma Magok. Eaꞌ Satan nokolasa esis sondaꞌ wandaf. Epes hiesi asasisi isima hiesi sandahama wesan naꞌoh naoh akata.  
\v 9 Eaꞌ sefeꞌ ganima etap hiagoma laogoma sondowasaꞌ saitu tulif sindiwapagon anama amam nematawa Godi sapoma, anama wambel taun anama God okom maꞌiana endilisi. Eaꞌ nif misilaꞌi heven fando soldia amama Satani hiꞌalam.  
\v 10 Amama mataga eaꞌ, God nokwaha aman anama Satan nambasoꞌmasi nefeꞌ hul anama nowala owaꞌ notambili nif fandom luꞌum otam salfa laꞌelaꞌef mapani. Amam ensol maliꞌ makwaha mafin nape aolupi naloma profet anama nambasoꞌami mowala mape hul anama. Amam biam moloma Satan mope anama laꞌelaꞌef hihif mofaꞌ nimanimi owamb alip anama nif fandumi mapoma.   
\s1 God nawaloga epes sandaꞌ waf aonai sagaꞌi ma basef luꞌwami  
\p
\v 11 Eaꞌ ati balata luꞌunai kingi afitinai notawa, anona aman natoma balata anama. Etap anaeꞌ naloma otaga ilif mafeꞌma Anan eaꞌ owaꞌ anagon ma amam mopaigon, owaꞌ. Epes hiesi ina anona nemaf sotolom wapoti, owaꞌ.  
\v 12 Eaꞌ ati esis sagaꞌi sape, epes isima agufisi saloma isima agof aꞌasi saitu naep balata kingi. Eaꞌ aman anama natoma balata anama nefaꞌ anom buk eaꞌ naufam. Eaꞌ naufa anona buk wapotiꞌ, agof esis sofaꞌ ambagof namumi mailanai. Eaꞌ nati amef mail buk amama, maꞌi maina waf esis sandaꞌanai nawaloga esis sagaꞌi sandahama waf hianai esis saliꞌ sandaꞌanai.  
\v 13 Wambel sagaꞌi sapoma naloma naoh embel makwaha epes isima sagaꞌi sotanimani ma nogota anama. Eaꞌ Anan natoma balata kingi nawaloga esis hiesi atona etin sandahama waf hianai esis sandaꞌanai.  
\v 14 Eaꞌ nakwaha gaꞌ naloma wambel sagaꞌi sapoma mafeꞌ mowala hul anama launai nif luꞌwami fandumi mapeinai. Hul anama siꞌi gaꞌ nafeꞌma bifi notagama epes hiesi.  
\v 15 Iꞌi Anan natoma balata kingi owaꞌ nieti agel anin epeni nope buk anama, nefelen nokwahin newala hul anama nif amama fandumi mapeinai.   
\c 21  
\s1 Etap naloma otaga mataga dambaim  
\p
\v 1 Deiꞌ aeꞌ ati etap naloma otaga dambaimi mape. Heven ilif naloma etap apimi mafeꞌ higilalam hiꞌalam. Eaꞌ naoh wapotiꞌ ina ataꞌ motah, owaꞌ.  
\v 2 Eaꞌ ati taun wambel buꞌunai Godi, anama Jerusalem dambaiguma. Ati taun anama nape naloma God, nakwaha heven ilif nisilaꞌi. Wambel anama nandaꞌ sosaf buꞌunai atona nandandombol siꞌi nemataꞌw kwaꞌi kosoꞌ amani kwandaꞌ sosaf buꞌunai atona ma kosoꞌ aman akwaꞌunai.  
\v 3 Eaꞌ ameꞌ anona malogel nataga balata kingi naꞌi mehip naꞌama naꞌi, “Pemeꞌ! Deiꞌ ipat luꞌunai Godi notawa naloma epes. Ama Anan nope laꞌafena esis ma sope amam nematawa ananisi eaꞌ Anan nope God esis sandaꞌ lotumanai. Endilisi, God Anan atona nape nalomas.  
\v 4 Anan anona nemaf nopatiꞌmasa embif hiami ma naep asasimi. Ama ina anona nemaf sogaꞌ wapotiꞌ opalef nimanim eaꞌ esis ina selef someꞌ nimanimi wapotiꞌ, owaꞌetin. Deiꞌ main, amamaga amama fowaꞌimi mafeꞌ mowala higilalam hiꞌalam.”   
\p
\v 5 Eaꞌ aman anama nape balata luꞌunai kingi naꞌi, “Pemeꞌ! Deiꞌ Aeꞌ andaꞌ amamaga hiami mataga dambaim hiꞌalam!”  
\p Eaꞌ naꞌipi wapotiꞌ naꞌi, “Ineꞌ daꞌa basef amama. Deiꞌ main, basef amama endilisimi atom ma sembaleꞌefam endilisi.”   
\p
\v 6 Eaꞌ naꞌipi wapotiꞌ naꞌi, “Aeꞌ andaꞌ amamaga amama dambaimi hiami mataga hiꞌalam. Aeꞌ atowe ape Dembiwei laꞌelaꞌef hihif ape aliꞌ ape agiꞌ endilisi. Aeꞌ ofagewe ma ahapila amamaga hiami hiꞌalam eaꞌ ape agiꞌ andaꞌ opeh hiami aeꞌami hiꞌalam. Emi egafis siꞌi iap noseꞌas, anona nemaf eseꞌas embela ifata embel ambal namunai napaimi. Eaꞌ eseꞌasam naꞌa siꞌi presen buꞌunai.  
\v 7 Emi egafis situ laꞌifisa siliꞌamona wandafa waf aonai, esis anona nemaf sofaꞌ amamaga amama hiami buꞌwami doꞌok aꞌipipami. Eaꞌ aeꞌ epe God asasisiwei, esis sope awasi aeꞌasi.   
\p
\v 8 Epes isima umbamahasa sotanima, isima owaꞌ sombaleꞌefa Godi, epes sandaꞌ waf naninani aonai endilisi soloma epes isima saha enis sagaꞌi soloma epes isima sandaꞌ waf aonai soꞌa waolanai soloma isima sandaꞌ muꞌuhupi soloma epes isima sandaꞌ lotuma god anama basoꞌmainai, soloma epes isima hiesi sambasoꞌomi, epes isima hiesi sofaꞌ wambel asasinai ma hul anama luꞌunai nif luꞌwami fandumi otam salfa napoma. Hul anama launai siꞌi gaꞌ nigiꞌ neatagai.”   
\s1 Jerusalem dambaiguma  
\p
\v 9 Eaꞌ anona ensel nafiꞌmai aeꞌ. Ensel anama atotona ma amam ensol 7-peleim mahapila dis amamaga mahambombaga epesi malami mandandam. Amamaga amama awami meagiꞌi endilisi. Anan naꞌipi naꞌi, “Ineꞌ fiꞌi, ma ihiꞌambena nemataꞌw sipsip noganai wauluꞌmana.”  
\v 10 Eaꞌ Ambal Buꞌunai Godi nafela okom aeꞌanai, ensel anama nofaꞌe afeꞌ alata anona halaf launai gani ilif. Eaꞌ nihiꞌambe taun wambel anama buꞌunai Godi Jerusalem, anama nape naloma God eaꞌ nakwaha heven nafiꞌi ataꞌ nisilaꞌi etin.   
\p
\v 11 Wambel anama nafifili laꞌifinai siꞌi nagwapin Godi mafifil taun anama. Elelowa nafifili Ananinai anona nafifili siꞌi otam buꞌunai satalona otamba hiami. Endilisi, nafifili anama siꞌi otam jaspa peleleꞌ endilisi siꞌi glas.  
\v 12 Taun anama endalelemb luꞌwami laumi endilisi malata ilif. Endalelemb amama utagw 12-peleim eaꞌ ensel 12-peleim maitu felefeleꞌ mandandama utagw amama. Eaꞌ agof amama mandahama wambotagw 12-peleim esis Israeli mail mandandama utagw amama.  
\v 13 Endalelemb waꞌam titi gani waꞌol aon natefima utagw wanom. Eaꞌ waꞌol aon natopaꞌ nonafama sandaꞌ utagw wanom eaꞌ gani aon natopaꞌ nombaꞌma sandaꞌ wanom eaꞌ waꞌol aon nowalama nasoꞌma sandaꞌ wanom.  
\v 14 Endalelemb amama ma taun anama, otamba luꞌwami 12-peleim mape mosohapa endalelemb etapama. Eaꞌ agof amam aposel 12-peleim sipsip noganai mail mandanda otamba amama.   
\p
\v 15 Eaꞌ ensel anama nalome naꞌi nahapila bandan gol siꞌi ikwaf nosahoꞌ taun anama ma endalelemb naloma utagw.   
\p
\v 16 Taun anama luꞌwagoma. Endalelemb amama dindiwaisa biefigin biefigin eaꞌ usiꞌim endilisi. Wambel anama tef wala, waꞌol waꞌol naꞌama etin. Ensel nosahoꞌagon nondolaꞌwifa taun anama ma ikwaf ananinai eaꞌ wambel anama tef wala ikwaf nataga 2,400 kilomita. Eaꞌ waꞌol waꞌol biefigin biefigin tasa ikwaf naꞌama etin 2,400 kilomita. Wambel anama dogwala owin nalata nataga ilif, ikwaf anama nataga naꞌama etin 2,400 kilomita.  
\v 17 Anan nandandepa endalelemb nondolaꞌwif wapotiꞌ etap nalata nataga ilif. Eaꞌ ikwaf endalelembi nikilaꞌ nataga 144 alogof bandami mita. Mita anama, anan siꞌi epes sondolaꞌwifa hiahaomanai siꞌi rula. Eaꞌ ensel nondolaꞌwifa endalelemb amama ma ikwaf anama atona.  
\v 18 Endalelemb miliꞌakwa tauni amama God atona nandaꞌam otamba amama jaspa. Eaꞌ taun anama God nandaꞌ gol atom nandaꞌana. Taun anama howalagon nafifil endilisi siꞌi glas.  
\v 19 Endalelemb owinama ma taun anama, God nofaloꞌmama otamba mamumami buꞌwami sataloma moni hianai. Otam gologowinai buꞌunai naliꞌi nombaloꞌ endalelemb owinama agel jaspa. Otam nagiꞌi kolotuꞌunai agel sapaia. Eaꞌ anona nagiꞌi ma wanomi afitinai agel aget. Eaꞌ anona nafeꞌma biefinai biefina ulitinai agel emeral.  
\v 20 Eaꞌ anona nafeꞌma wanom biefinai agel sandonikis, anama anan nandaꞌ apohi akwahina afitina. Eaꞌ nafeꞌma wanom wanom anan akwahinai agel konilian. Eaꞌ nafeꞌma 7-peleinai batafunai agel krisolait. Eaꞌ nafeꞌma 8-peleinai anama ulitinai anom mandati naꞌa agel beril. Eaꞌ anona nafeꞌma 9-peleinai batafunai nandati naꞌa agel topas. Eaꞌ anona nafeꞌma 10-peleinai agel krisopres anama nandaꞌ apoh batafunai ulilitinai. Eaꞌ nafeꞌma 11-peleinai anona kolotuꞌunai nandati naꞌa agel haiasin. Eaꞌ anona nafeꞌma 12-peleinai anama anona akwahinai agel amatis.  
\v 21 Utagw amama 12-peleim siꞌi ombahigis afitimi 12-peleim salatamam endilisi. Anona uta sandaꞌana anona bahigin luꞌunai atotona. Taun anama eaf atotona. Eaf anama gol atom mafifili howalagon peleleꞌ endilisi siꞌi glas sandaꞌana.   
\p
\v 22 Aeꞌ ina ati ipat Godi luꞌunai sandaꞌ lotuwanai notawa taun anama, owaꞌ. Deiꞌ main, Dembinai God laꞌifinai nikilaꞌ laꞌifimi hiami hiꞌalami naloma Sipsip Noganai, amam biam mape siꞌi ipat luꞌunai Godi ma taun anama.  
\v 23 Eaꞌ taun anama aon owambunai alipunai maol nandaꞌanai owaꞌ ma wambel anama howalagoma, owaꞌ. Deiꞌ main, mafifili luꞌwami Godi atom mumafiagon mandaꞌagon howalagon. Eaꞌ Sipsip Noganai anan atona siꞌi nagwapin anama.  
\v 24 Epes etapasi hiesi hiꞌilas anona nemaf sofaꞌ nafifili atoma taun anama eaꞌ sefeꞌ. Eaꞌ amam king mumafi etapi anona nemaf mofaꞌai sosaf otamba maim amamumi mifiꞌmai wambel anama.  
\v 25 Alip esis ina sowalo utagwa endalelemb amama, owaꞌ. Magal laꞌelaꞌef mape. Deiꞌ main, owamb ina aonona nemaf notaga taun anama wambel luꞌunai, owaꞌ.  
\v 26 Sosaf buꞌunai noloma otamba moni maim maꞌoh wambel kantri hiagoma epes hiesi anona nemaf sofaꞌam suwisa wambel anama sombeꞌam.  
\v 27 Eaꞌ amamaga awami moloma epes emi sandaꞌ waf naninani aonai soloma emi egafis saꞌi basef basoꞌmaimi soloma emi egafis sandaꞌ waf aonai nandaꞌ epes ambagof aom, epes isima ina sefeꞌ siwisa wambel anama, owaꞌ. Sipsip Noganai nandaꞌ agof enis epesi mail buk anama agof epes sofaꞌ ambal namunai mailanai, epes isima etis anona nemaf sefeꞌ suwis wambel anama.   
\c 22  
\s1 Embel walemb maloma lawag epes sogwaꞌam sofaꞌ ambal namunai sope laꞌelaꞌef  
\p
\v 1 Eaꞌ ensel anama nihiꞌambe anona walemb luꞌunai. Walemb anama howalagon peleleꞌ endilisi siꞌi glas. Walemb anama nandambe nafiꞌi balata luꞌunai Godi natomanai naloma balata luꞌunai Sipsip Noganai natomanai eaꞌ koloꞌ etin nafeꞌ.  
\v 2 Walemb anama nafeꞌ laꞌafena eaf luꞌunai ma taun wambel anama luꞌwagoma. Walemb fisanai fisana lawah biam ambal namunai motawa. Amam mail mola suꞌutip danda laꞌelaꞌef mandanda aomb atona etina afagof hiami atona etin. Nohotagw 12-peleim mandahama aomb 12-peleim. Emi egafis sogwaꞌ suꞌutip amama, esis sofaꞌ ambal namunai sope andeandeꞌ laꞌelaꞌef. Soh apulima mondaꞌ epes hiesi awes nandaꞌasi sape kantri hiagoma sotaga boꞌwes.  
\v 3 Wambel anama amamaga hiami God nandaiwaꞌmam endilisi ma naꞌi niliꞌamonami, amama ina nambimb mope wapotiꞌ, owaꞌ.  
\p God noloma Sipsip Noganai, amam anona nemaf motoma balata luꞌwami kingi mope mumafi epes isima. Esis sandaꞌ opeh Godi sope sondaꞌ lotumana sefela agel ananinai.  
\v 4 Anona nemaf siti amaga Ananinai ma nondaꞌ agel ananinai nil amagah asasimi.  
\v 5 Anona nemaf owamb ina notaga wapotiꞌ, owaꞌ. Eaꞌ ina ataꞌ anom mafifili moloma lam nogwahis o owaf aon alipunai, owaꞌ. Amama opeh aꞌam. Deiꞌ main, Dembinai God nififima esis, sope siꞌi king sumafi enis epes laꞌelaꞌef.   
\s1 Anona nemaf Jisas nifiꞌi mehip  
\p
\v 6 Eaꞌ ensel anama naꞌipi naꞌama naꞌi, “Basef amama hiami mape buk anaeꞌ endilisimi atom andeandeꞌma epes hiesi sombaleꞌefam. Dembinai God nasoꞌ Ambal Buꞌunai Ananinai amam profet. God Anan nasapaꞌai ensel Ananimi ma mihiꞌamba esis sandaꞌ maola Anani ma amamaga amama felefeleꞌ meatagai.”   
\p
\v 7 Eaꞌ Jisas naꞌi, “Pemeꞌ! Anona nemaf Aeꞌ ifiꞌmai ipeꞌ mehip. Basef Godi mape buk anaeꞌ, basef amama amamaga hiami maꞌi anona nemaf migiꞌ meatagai. Emi egafis sila basef amama, esis sondanifel.”   
\p
\v 8 Aeꞌ Jon ameꞌ basef amama ati amamaga amama ameꞌam eaꞌ. Eaꞌ indiwa nembawa etawa felefeleꞌma ensel anama nihiꞌambe amamaga amama ma endaꞌ lotuma anan.  
\v 9 Eaꞌ ensel anama naꞌipi naꞌi, “Ineꞌ owaꞌ nendaꞌam naꞌama, owaꞌ. Aeꞌ ina dembiwei, owaꞌ. Aeꞌ alomena wandaoꞌoma wandaꞌ opeh etini waloma sahopena ineꞌimi profet fowaꞌimi maloma epes isima hiesi saila basefa buk anaeꞌ. Ineꞌ nendaꞌ lotu ma God atona.”   
\p
\v 10 Eaꞌ naꞌipi naꞌi, “Basef amama Godi mape buk anama, ina nembahoꞌam nesapamam mope, owaꞌ. Deiꞌ main, nogota God naꞌi nondaꞌ amamaga amama, anama felefeleꞌma notaga hiꞌilana.  
\v 11 Emi egafis sondaꞌ waf aonai, esis sondaꞌana laꞌelaꞌef. Emi egafis sondaꞌ waf aonai endilisi, esis sondaꞌana laꞌelaꞌef. Emi egafis sondaꞌ waf buꞌunai, esis sondaꞌana laꞌelaꞌef. Eaꞌ emi egafis sepe epes buꞌwasi Godi, esis sope boꞌwes Ananisi naꞌama etin laꞌelaꞌef.”   
\p
\v 12 Eaꞌ Jisas naꞌi, “Pemeꞌ! Anona nemaf Aeꞌ etaga mehip. Eaꞌ ifiꞌi eloma amamaga buꞌwami awami, ewaloga esis amam nematawa hiesi egwamasam atona etin mondahama waf esis sandaꞌanai.  
\v 13 Aeꞌ atowe ape Dembiwei laꞌelaꞌef, ape aliꞌi ape agiꞌ endilisi. Aeꞌ ofagewe ma amamaga hiami endaꞌam efeꞌ efeꞌ embefam andeandeꞌ hiꞌilam.   
\p
\v 14 Esis amam nematawa sasaꞌopa luwaguf asasimi ma sataga boꞌwes, esis sondanifel. Esis isima anona nemaf God naꞌi esis boꞌwes ma sefaꞌ gwaꞌaimi ma lawag anama ambal namunai napainai eaꞌ laꞌifisa sefeꞌ suwis uta anama ma wambel anama buꞌunai.  
\v 15 Epes sandaꞌ waf aonai siꞌi bogof nombagw mandaꞌanai soloma epes isima sandaꞌ muꞌuhupi, epes isima sandaꞌ waf aonai soꞌa waolanai soloma epes saha enis sagaꞌi soloma epes isima sandaꞌ lotuma god basoꞌmainai soloma epes isima hiesi ukup maila waf basoꞌomunai maimailana, epes isima anona nemaf sope andeꞌma wambel anama Godi.”   
\p
\v 16 Eaꞌ Jisas naꞌiam wapotiꞌ naꞌi, “Aeꞌ asapaꞌ ensel aeꞌanai nafeꞌmago ipeꞌ ma nowalapa basef amama ma ipeꞌ sios amam nematawa Godi. Aeꞌ atowe aeꞌ dapana nandala nombaf lawag Deviti, bafalomana ananiwei ataga wambota ananinai. Aeꞌ siꞌi ondoꞌw anama lalaꞌwan mafifili endilisi nalatawi kuhimbita.   
\p
\v 17 Ambal Buꞌunai Godi naloma nemataꞌw Sipsip Noganai noseꞌakwi esis saꞌi, ‘Ipeꞌ fiꞌi!’ Eaꞌ emi egafis semeꞌ basef amama, esis siꞌi basef amama atom siꞌi, ‘Ipeꞌ fiꞌi.’ Eaꞌ emi egafis iap noseꞌasa embel, esis sifiꞌi. Emi egafis saꞌi sogwaꞌ embel, esis sifiꞌi seaꞌ embel ambal namunai napaimi siꞌi presen buꞌunai God noseꞌasana naꞌai, owaꞌ sotalona otambai.   
\p
\v 18 Ipeꞌ epes emi egafipa pameꞌ basef Godi ma amamaga amama mail buk anaeꞌ anona nemaf meatagai, Aeꞌ aꞌipa ipeꞌ hipei mehip, ipeꞌ pindumafuma andeandeꞌ. Iꞌi emi egafis siwatani anom basef wapotiꞌ moloma basef Godi, anona nemaf amamaga amama aom endilisi God naꞌiami ma buk anaeꞌ, amama anona nemaf God nokolefamanam esis.  
\v 19 Iꞌi emi egafis sogagaha anom basef tuꞌwanim Godi maꞌi amamaga anona nemaf meatagai ma niliꞌamonama buk anaeꞌ, anona nemaf God niliꞌamona epes isima nogaloꞌmas. Eaꞌ esis ina anona nemaf laꞌifisa sefaꞌ gwaꞌaimi ma lawag anama ambal namunai napaimi, owaꞌ. Anona nemaf ina laꞌifisa sefeꞌ sepe andeandeꞌ wambel anama buꞌunai buk anaeꞌ naꞌiagoma, owaꞌetin.”   
\p
\v 20 Aeꞌ Dembiwei aꞌi basefa amamaga mail buk anaeꞌ, Aeꞌ aꞌi amama endilisimi atom. Eaꞌ deiꞌ aꞌi, “Endilisi, Aeꞌ anona nemaf ifiꞌi mehip!”  
\p Endilisi, Dembinai Jisas, ineꞌ nifiꞌi!   
\p
\v 21 Aeꞌ aꞌi Dembinai Jisas nigiambamepa naꞌa nope nolomepa, ipeꞌ God Ananipei. Endilisi.