\id COL  - Filifita NT (Mufian Fulifita -Ilahita Dialect) [aojF] -Papua New Guinea 1998 (DBL 2013) 
\h KOLOSI 
\toc1 Basef Amama Pol Nandaꞌam Mafeꞌma Esis Kolosi 
\toc2 Kolosi 
\toc3 Kl 
\mt1 Basef Amama Pol Nandaꞌam Mafeꞌma Esis Kolosi  
\imt1 Basef amama bandami Pol nandaꞌam mafeꞌma esis Kolosi  
\io1 1:1-14 Pol nanifela Goda esis Kolosi eaꞌ nandaꞌ betena nandaꞌas sataga laꞌifis  
\io1 1:15–2:19 Krais atona laꞌifinai nape naliꞌi ma amamaga hiami maloma epes hiesi. Naꞌama deiꞌ Anan atona nape naliꞌma esis Kristen sios hiesi  
\io1 2:20–4:6 Apeꞌ magaꞌ maloma Krais eaꞌ mohafel malomana deiꞌ mandaꞌ waf buꞌunai  
\io1 4:7-18 Pol naꞌipasa basef akutaimi eaꞌ nasapaꞌ danifel ananinai nafeꞌma esis Kristen sape Kolosi  
\c 1  
\p
\v 1 Aeꞌ Pol, okom Godi atona nandandepe aposel andaꞌ maol Krais Jisasi. Aeꞌ aloma owalome aeꞌanai Timoti wape naꞌae.  
\v 2 Eaꞌ andaꞌmepago basef amama mafeꞌmago ipeꞌ amam nematawa Godi pape wambel Kolosi, ipeꞌ alupipei pape laꞌifipa paloma Jisas Krais. Afaꞌ biafa waꞌi God ahalomapa apeꞌinai nigiambamepa naꞌa nondaꞌepa pataga laꞌifipa eaꞌ nondaꞌ opalef ipeꞌimi mope awanem.   
\s1 God nawalapa baleꞌef esis Kolosi  
\p
\v 3 Maina nemaf afaꞌ wandaꞌ betena ipeꞌ, laꞌelaꞌef afaꞌ wanifela God anan Dembinai apeꞌinai Jisas Krais Ahalomana. Afaꞌ wanifelona ma pembaleꞌefa Krais andeandeꞌ.  
\v 4 Deiꞌ main, afaꞌ wameꞌ basef ma ipeꞌ naꞌama. Ipeꞌ pembaleꞌefa Krais Jisas eaꞌ ukup ipeꞌimi maimaila amam nematawa Godi hiesi.  
\v 5 Fowaꞌ basef buꞌwami Godi amama endilisimi matagamepa pameꞌama amamaga buꞌwami ipeꞌimi God nandandombam deiꞌ maꞌoh heven ipeꞌ pape pehafami. Amamaga amama buꞌwami ofagema ma baleꞌef ipeꞌinai naloma waf anama ipeꞌ pandaꞌanai ukup maimaila epes hiesi.  
\v 6 Ama ganima etap hiagoma basef buꞌwami amama mawalapai waf buꞌunai ma epes hiesi mataga luꞌum laꞌelaꞌef mikilaꞌ fowaꞌ. Basef amama mandaꞌam naꞌama etin siꞌi fowaꞌ damba damba maliꞌ matagama ipeꞌ pameꞌam pailam. Nemaf anama ipeꞌ paliꞌ pegawa endilisi okom Godi nagiambamepa naꞌa, basef amama mawalapai waf buꞌunai nataga luꞌuna ma ipeꞌ.  
\v 7 Ipeꞌ pemeꞌ basef amama buꞌwami Epafras nawalipipami eaꞌ pegawam. Anan epen buꞌunai afaꞌ ukup maimailana nandaꞌ maola Krais nalomafa wandaoꞌoma wandaꞌ maol atotona. Anan nahoꞌofafa nagiambama ipeꞌ eaꞌ numafi maol Kraisi andeandeꞌ.  
\v 8 Anan naꞌipafa basef amama ma Ambal Buꞌunai Godi nandaꞌepa ukup maimaila amam nematawa Godi hiesi.   
\s1 Pol nandaꞌ betena God nondaꞌ esis Kolosi sataga laꞌifis  
\p
\v 9 Epafras naꞌipafa Ambal Buꞌunai Godi nandaꞌ maol anama buꞌunai ma opalef ipeꞌimi. Eaꞌ afaꞌ biafa wapotiꞌ wameꞌ basef amama. Nemaf naliꞌi wameꞌam, anama atona wasafela beten wandaꞌana ma ipeꞌ wafiꞌi wataga deiꞌ. Afaꞌ ina wakwahepa, owaꞌ. Wandaꞌ betena God nigiambamepa nendaꞌepa pepe siꞌipa ma gawa ananinai endilisi. Gawa anama Ambal Buꞌunai ananinai nasiꞌipanai.  
\v 10 Wandaꞌam naꞌama ma nambimb ipeꞌ petaga laꞌifipama feꞌ pe ipeꞌinai netaga boꞌona endilisi dendeꞌma waf Dembinai. Wandaꞌmepa betena Anan niti waf ipeꞌ pandaꞌanai nendaꞌ okom ananinai boꞌona ipeꞌ nondanifamepa. Ama pendaꞌ maol naninani hianai buꞌunai hiꞌilana pegewana andeandeꞌ pikilaꞌ fowaꞌ paliꞌ pagawana.  
\v 11 Afaꞌ wandaꞌmepa beten wapotiꞌ naꞌama. Waꞌi God nondaꞌepa petaga laꞌifipama pepel Ananinai buꞌunai nafifili endilisi. Ama ipeꞌ nambimb pitu laꞌifipama pefaꞌ maim nimanimi meatagamipei ma pendanifel eaꞌ opalef ipeꞌimi ina mohafel endilisi, owaꞌ. Mope soꞌumbel.  
\v 12 Eaꞌ ondaꞌ betena ipeꞌ ma pinifela Ahalomapa. Anan nandaꞌepa pataga laꞌifipa ma pefaꞌ amamaga amama buꞌwami Anan nandondombama ipeꞌ. Amama anona nemaf pefaꞌam peloma esis amam nematawa Ananisi hiesi wambel Ananinai howalagoma.  
\v 13 Anan natagahepa ma pepel aonai nape owamb eaꞌ nahaponapa mafeꞌ mawis nomona maol Nogalomanai nope Dembinai numafiapa. Nogalomana anama Anan okom naꞌiana endilisi.  
\v 14 Nogalomana ananinai atona natagahepa ma pepel anama ma deiꞌ makwaha waf aonai apeꞌ mandaꞌanai mape wafifipa.   
\s1 Waf naloma maol Krais nandaꞌanai  
\p
\v 15 Krais anan naꞌama etin endilisi siꞌi God anama apeꞌ owaꞌ meatolonai. Anan naliꞌi endilisi ma amamaga hiami God nandaꞌami mape ilif etapi hiꞌalam maloma amamaga ambagof mapaimi maloma epes hiesi wapotiꞌ.  
\v 16 God nandaꞌ amamaga amama hiami mape ilif etapi mataga mape lagel nogalomanai atona. Anan atona nandaꞌ amam laꞌifimi hiami mape maliꞌi mape laꞌafena etap naloma otaga maloma agufumi dembemi maloma amam dembemi ensel maloma amam dembemi laꞌifimi mumafi ambagof. Anan nandaꞌ amamaga amama maloma epes hiesi deiꞌ apeꞌ matolomi maloma amamaga amama apeꞌ owaꞌ meatolom naepi. God nandaꞌ amamaga hiami mataga mape ma lagel Nogalomanai atona. Eaꞌ amamaga amama maloma epes hiesi ananimi atom.  
\v 17 Anan nape naliꞌma amamaga amama hiami eaꞌ amamaga amama mataga pepel Ananinai atona nahapilam laꞌifina mape laꞌelaꞌef.  
\v 18 Anan Dembinai nape naliꞌma esis sios amam nematawa Godi siꞌi alop siꞌina Ananinai. Anan atona ofagonama sios sape namis laꞌelaꞌef. Anan naliꞌ damba damba nohafel hiꞌagif. Eaꞌ deiꞌ Anan atona nape naliꞌma amamaga amama hiami numafiam.  
\v 19 Deiꞌ main, okom Godi naꞌi waf naloma gawa naloma pepel Ananinai hiꞌalana nape nogalomana atona. Deiꞌ naseꞌana amama hiꞌalama Anan mapomana laꞌelaꞌef.  
\v 20 God nandaꞌ amamaga amama hiami mape ilif etapi maloma epes hiesi wapotiꞌ sataga boꞌwes sapoma anan. God nandaꞌam naꞌama ma esimbel Kraisi atom malo nemaf anama nagaꞌ lawag usiꞌinai tuꞌwanainai.   
\p
\v 21 Fowaꞌ ipeꞌ wapotiꞌ ataꞌ pape laogona God pewaꞌ alafugahana. Ukup ipeꞌimi ataꞌ pefalona naumbih ma pandaꞌ waf aonai.  
\v 22 Eaꞌ Krais nataga epen endilisinai sahana nagaꞌ, amama atom God nandaꞌepa pataga alupipei opaf atotona palomana ma gaꞌ Nogalomanai atona. Nandaꞌam naꞌama ma nofaꞌepa pifiꞌmai anan pepe boꞌwepa andeandeꞌ, ofagema aꞌepa ma naep Ananimi.  
\v 23 Eaꞌ ipeꞌ pembaleꞌefa basef buꞌwami Godi laꞌifipa laꞌelaꞌef ma pitu laꞌifipa endilisi siꞌi olaf naliꞌi nandaꞌ ipat laꞌifina. Naꞌama ukup moseꞌepama pegawa endilisi anona nemaf pefaꞌ amamaga amama buꞌwami basef buꞌwami Ananimi maꞌiami. Basef amama pameꞌam eaꞌ sawalipasama epes hiesi sape etap hiagoma. Basef amama aeꞌ Pol ataga aman andaꞌ maola awalipasami.   
\s1 Pol nagiambama esis Kolosi  
\p
\v 24 Deiꞌ aeꞌ andanifel ma efaꞌ nimanimi agiambama ipeꞌ Kristen amam nematawa sios Kraisi, ipeꞌ siꞌi alop siꞌina Ananinai. Anom nimanimi afaꞌ wandaꞌ maol Kraisi ofaꞌami, amama ataꞌ mape laꞌelaꞌef. Deiꞌ aꞌi embefa amama efaꞌam alop aeꞌanai andaꞌ maol Kraisi. Aeꞌ aꞌi ewapanimana nimanimi amama ma andaꞌ maol Krais.  
\v 25 Aeꞌ ataga aman andaꞌ maol agiambama sios amam nematawa Godi naꞌama. God nandandepe deiꞌ ataga aman andaꞌ maol aꞌipipa basef hiami ananimi hiꞌalam.   
\p
\v 26 Fowaꞌ nimeguf hiami basef amama mape mandambahoꞌma ukup epes amam nematawa hiesi. Eaꞌ deiꞌ mataga mandawalap alihima ukup esis amam nematawa Godi.  
\v 27 Okom Ananinai nape naꞌama. Anan naꞌi nihiꞌambapa basef amama buꞌwami endilisi agel luꞌunai, mandawalap magiambama esis amam nematawa hiesi. Basef amama naꞌama. Krais nape opalef ipeꞌimi nomona deiꞌ pape pehafa anona nemaf pefaꞌ nafifili Ananinai pelomana.  
\v 28 Eaꞌ afaꞌ wawalapa basef Kraisi wawalipa epes hiesi ma gawa hianai naninani buꞌunai. Afaꞌ waꞌi wihiꞌamba epes hiesi atona etin sefeꞌma Kraisa sope epes Ananisi endilisi sope laꞌifisa Anan.  
\v 29 Eaꞌ deiꞌ maol aeꞌanai andaꞌana luꞌunai endilisi ma pepel hianai Kraisi nandaꞌ maol laꞌifinai laꞌelaꞌef nomon opaf aeꞌanai.   
\c 2  
\s1 Esis sombaleꞌefa Krais laꞌifisa sohagofa basef basoꞌmaimi  
\p
\v 1 Aeꞌ aꞌi ipeꞌ pegawa naꞌama. Aeꞌ andaꞌ maol luꞌunai endilisi ma agiambama ipeꞌ paloma esis Laodisia saloma epes isima hiesi ataꞌ owaꞌ siti amaga aeꞌanai.  
\v 2 Aeꞌ andaꞌam naꞌama ma opalef ipeꞌimi moloma opalef asasimi motaga laꞌifim mope ukup mondaoꞌoma etina sahin owan ipeꞌisi. Ama ipeꞌ peloma esis pefaꞌ gawa buꞌunai endilisi nendaꞌ baleꞌef ipeꞌinai boꞌona ma pegawa basef Godi endilisimi atom. Aeꞌ andaꞌ maol anama ma ipeꞌ peloma esis pegawa basef amama Godi ofagema fowaꞌ mandambahiꞌi maꞌi Krais atona.  
\v 3 Anan atona nandaꞌ gawa buꞌunai naloma okom buꞌunai Godi hianai nataga nandawalap alihina. Anama fowaꞌ naliꞌ nape nandambahoꞌ siꞌi epes sambeꞌam maꞌoh mandambahiꞌi satalom otamba hiami, deiꞌ nandawalap alihina ma lagel Krais atona.  
\v 4 Aeꞌ aꞌipipa basef amama. Ipeꞌ pindumafuma andeandeꞌ. Naꞌama enin epen nembasoꞌmepa ma basef usihimi.  
\v 5 Endilisi aeꞌ deiꞌ ina ape alomepa, eaꞌ okom aeꞌanai siꞌi ape alomepa andanifel ma sati ipeꞌ paitu laꞌifipa ma pembaleꞌefa Krais andeandeꞌ.   
\s1 Apeꞌ mape laꞌifipa maloma Krais mofaꞌ ambal namunai  
\p
\v 6 Ipeꞌ pembaleꞌefa Krais Jisas paꞌi Anan Dembinai ipeꞌinai. Naꞌama deiꞌ pefaꞌ pepel ananinai pepe laꞌifipa peloma Anan.  
\v 7 Ipeꞌ pitu laꞌifipama Anan siꞌi lawag nombalef mowala etap owin laꞌifina notawa eaꞌ siꞌi ipat natoma ilifa olalef notawa laꞌifina. Ipeꞌ pembaleꞌef laꞌifipa ma basef amama buꞌwami pefaꞌami pikilaꞌ fowaꞌ paliꞌ pembaleꞌefam eaꞌ pinifela God laꞌelaꞌef.   
\p
\v 8 Ipeꞌ pindumafuma andeandeꞌ. Naꞌama enin epen neseꞌepa basef wafimi o basef gawaimi epes saꞌiami nembasoꞌmepa nomboma opalef ipeꞌimi ma basef amama siꞌi saoloꞌ mafis matoloꞌ esalef. Basef amama ina mataga Krais, owa. Amama bafasapa ehasapa apeꞌisi saꞌipapami mataga waf etapanai atona.   
\p
\v 9 Ipeꞌ pindumafuma andeandeꞌ. Deiꞌ main, ipeꞌ pegawa waf Godi naloma gawa naloma pepel ananinai hianai nape Krais atona laꞌelaꞌef, fowaꞌ gani nafiꞌi nataga nemaf anama nape etap anaeꞌ napomana laꞌelaꞌef.  
\v 10 God naseꞌepa ambal namunai endilisinai napaipa pape laꞌifipa paloma Jisas Krais. Anan dembinai nape naliꞌma ambagof hiami maloma pepel naninani naloma ensel dembemi mape laꞌafena etap naloma otaga hiꞌalam.  
\v 11 Ipeꞌ pape laꞌifipa paloma Krais. Eaꞌ pape laꞌifipa paloma anan, pape siꞌi pandaꞌ waf anama amam Juda matopaꞌ alop. Waf anama ina waf epes sandaꞌana atop atona wafinai, owaꞌ. Krais atona nandaꞌmepana natofa waf apinai ma ukup apimi.  
\v 12 Ipeꞌ pefaꞌ baptais eaꞌ pape laꞌifipa paloma Krais sawepa palomana. Ipeꞌ pembaleꞌefa pepel Godi nafela Krais hiꞌagif, amama atom deiꞌ Anan nafelapai wapotiꞌ paloma Krais.  
\v 13 Fowaꞌ ipeꞌ pagaꞌ eaꞌ. Deiꞌ main, ipeꞌ pandaꞌ waf naninani aonai eaꞌ ipeꞌ owaꞌ Judaipai pelolama miꞌuli God fowaꞌ nasoꞌ Mosesanai. Eaꞌ deiꞌ God nandaꞌepa pataga namipa paloma Krais eaꞌ nakwahomapa waf aonai apeꞌ mandaꞌanai hianai.  
\v 14 Basef amama ma miꞌuli God fowaꞌ nasoꞌ Mosesanai mail buki maꞌi nimanimi apeꞌ mofaꞌama waf apeꞌ mandaꞌanai naloma anom basef ahifima milam, basef amama hiami God naliꞌamonam siꞌi nandolam mail lawag usiꞌinai tuꞌwanainai nalamonam hiꞌalam.  
\v 15 Lawag anama Anan natalogofa ambagof awami maloma pepel naninani aonai naloma agufumi dembemi mape laꞌafena etap naloma otaga mape owina anan eaꞌ ina laꞌifim. Anan nikilaꞌam eaꞌ nowaꞌam laꞌifim nafeꞌ naliꞌam nafeꞌ amam mafeꞌ mailana eaꞌ epes hiesi sakolasa naep satolom saꞌi amam falafumi.   
\s1 Apeꞌ magaꞌ maloma Krais eaꞌ  
\p
\v 16 Naꞌama deiꞌ ipeꞌ ina piꞌi ahoꞌma anona aman nombasoꞌma ipeꞌ niꞌipipa anona miꞌuli ma waf saꞌ gwaꞌaimi embel ma anona nemaf luꞌunai sandaꞌ lotuwanai o sandaꞌ anom gwaꞌaimi ma aon dambainai notaga o nemaf sabat sapoma nomaꞌwanai, owaꞌ.  
\v 17 Amamaga amama fowaꞌ esis sailami mondolaꞌwifa amamaga anona nemaf migiꞌ meatagai, amama deiꞌ mataga eaꞌ. Eaꞌ amamaga endilisimi atom, amama Krais atona.  
\v 18 Iꞌi emi egafis sepe sinifa naꞌoh nandondoꞌoh asasinai ma amamaga esis satolomi o sambasoꞌmas siꞌi esis soꞌumbelisi sape owina enis epes o sendaꞌ lotu ma amam ensel, ipeꞌ ina piꞌi ahoꞌma epes isima sembasoꞌmepa ma pefaꞌ amamaga buꞌwami ipeꞌimi maꞌomepa ipeꞌ ilif, owaꞌ. Epes isimi naꞌamaisi safela agof asasimi luꞌuma amamaga saꞌoh sandondoꞌoh satolomi eaꞌ ukup mapoma esis etis saila waf anama etapanai.  
\v 19 Esis ina sombaleꞌefa Krais sape laꞌifisa Anan nape naliꞌ endilisima ma apeꞌ, owaꞌ. Anan naliꞌi numafi gwaꞌaimi nataga alop siꞌina eaꞌ nandaꞌ nigis maloma okwatogw maim mandahapima etin alop siꞌina. Eaꞌ deiꞌ God nandaꞌ alop anama nataga luꞌuna laꞌifina.   
\p
\v 20 Ipeꞌ pagaꞌ eaꞌ paloma Krais ma pakwaha waf aonai hianai wafinai etapanai. Deiꞌ maina ipeꞌ ataꞌ pailana pafeꞌ siꞌi ipeꞌ epes etapipei? Deiꞌ maina ipeꞌ ataꞌ pafeꞌ owina miꞌuli anama? Hapainai.  
\v 21 Miꞌuli anama naꞌi naꞌama naꞌi, “Ineꞌ owaꞌ nihapilan, neaꞌan, newaꞌan nepe lagof, hapainai.”   
\p
\v 22 Miꞌuli anama naꞌi amamaga embel gwaꞌaimi maim apeꞌ magwaꞌami. Amamaga amama apeꞌ magwaꞌam eaꞌ higilalam. Deiꞌ main, miꞌuli anama epes etis ukup mopomana sawalapana sawalipa enis.  
\v 23 Endilisi, miꞌuli anama nataga siꞌi miꞌuli gawa buꞌunai napeinai eaꞌ naꞌipapa nafelapa naꞌipapa laꞌifipama mondaꞌ lotu ma amam ensel eaꞌ naꞌipapa moha alop apeꞌinai. Eaꞌ miꞌuli anama ina laꞌifina nagiambamapa matofa waf aonai alopanai ma okom apinai, owaꞌetin.   
\c 3  
\s1 God nafela apeꞌ eaꞌ maloma Krais  
\p
\v 1 God nafela ipeꞌ eaꞌ pape laꞌifipa paloma Jisas Krais. Amama atom ipeꞌ ukup mopoma amamaga mape otaga ilifi, anama Krais nape agilinai felefeleꞌma lagel daisinai Godi.  
\v 2 Ipeꞌ okokoma amamaga mape ilifi laꞌelaꞌef. Amamaga mape etapi owaꞌ, hapaimi.  
\v 3 Deiꞌ main, ipeꞌ pagaꞌ eaꞌ. Ipeꞌ pape laꞌifipa paloma God, deiꞌ ambal namunai ipeꞌinai nape nandabahoꞌ siꞌi Krais deiꞌ nape nandambahoꞌ.  
\v 4 Krais ofagonama ambal namunai apeꞌinai anona nemaf notaga nondawalap alihiguma, eaꞌ ipeꞌ wapotiꞌ petaga pefaꞌ nafifili Ananinai pelomana.   
\s1 Apeꞌ mataga epes dambaipai eaꞌ  
\p
\v 5 Ipeꞌ peha waf aonai hianai etapanai opaf apinai nogaꞌ, waf anama naꞌama. Waf soꞌa waolanai naloma waf aonai, waf anama aonai ukup mohafemanai, ukup maꞌi anom amamaga enis epesi. Waf anama siꞌi waf saila god basoꞌomainai.  
\v 6 Epes sandaꞌ waf anama hianai, okom wandafunai Godi anona nemaf notaga nogwana.  
\v 7 Fowaꞌ ipeꞌ etipa paila waf aonai anama hianai pape owina waf anama ukup mohafemanai.   
\p
\v 8 Eaꞌ deiꞌ ipeꞌ pekwaha anona waf aonai hianai naꞌama. Waf migimigahinai, ukup wandafum, opalef aom ma peha enis epes, waf basef awami findiwaimi, basef awami.  
\v 9 Ipeꞌ ina pembasoꞌma esis sahin owan, owaꞌ. Deiꞌ main, ipeꞌ pakwaha waf hianai aonai ma opaf apinai eaꞌ pataga dambaipa. God nandaꞌepa pataga dambaipa ma opaf namunai.  
\v 10 Eaꞌ anan nandaꞌepa pataga dambaipa laꞌelaꞌef ma petaga naꞌama etin siꞌi Anan nape, Anan nandaꞌ opaf anama namunai ma apeꞌ mogawana endilisi.  
\v 11 Eaꞌ deiꞌ Krais atona Dembinai nape naliꞌma epes hiesi. Esis Grik saloma esis Juda saloma enis owaꞌ Judaisi, esis anona diga, isima sape aolopi sololama waf buꞌunai, agufisi, agof aꞌasi, waf saꞌiana epes isima falafunai atona. Krais atona Dembinai nape naliꞌma epes isima hiesi, nape nomona epes hiesi hiꞌalas.   
\s1 Apeꞌ mofaꞌ waf miti enis uwahipis  
\p
\v 12 God anan nandandepepa eaꞌ pape amam nematawa ananipei okom nainailipa endilisi. Eaꞌ ipeꞌ pendaꞌ waf buꞌunai naꞌama. Ipeꞌ piti epes hiesi uwahipis laꞌelaꞌef pigiambamas pendaꞌas andeandeꞌ. Ipeꞌ petalogofa ipeꞌ pepe owina enis epes, pendaꞌ waf soꞌumbilinai ma esis eaꞌ pepe piti esis sondaꞌmepa waf naninani aonai ipeꞌ ma tol pepe opalef awanem.  
\v 13 Iꞌi enin epen ipeꞌini nendaꞌ waf aonai ma enin epen, ina negwamana waf aonai anan nandaꞌmananai, owaꞌ. Nendaꞌan saꞌombeman nekwahomana waf aonai anan nandaꞌmenanai. Dembinai nakwaha waf aonai ipeꞌ pandaꞌanai eaꞌ. Eaꞌ ipeꞌ wapotiꞌ pendaꞌam naꞌama etin.  
\v 14 Ipeꞌ pendaꞌ waf anama buꞌunai hianai aliꞌ aꞌipipanai pilana. Eaꞌ pendaꞌ anona waf buꞌunai wapotiꞌ. Ipeꞌ ukup miꞌi sahin owan ipeꞌisi ma waf anama nakolasepa nandaꞌepa pataga etifipa.   
\p
\v 15 Krais naseꞌapa opaf awanena apeꞌ eaꞌ opaf anama atona numafi ipeꞌ endilisi. God nofalepa pataga alop etifina nape opalef awanem. Ipeꞌ pinifelona laꞌelaꞌef.  
\v 16 Basef Kraisi buꞌwami endilisi mope opalef ipeꞌimi nomon. Ipeꞌ pendaꞌam naꞌama piwalipa esis sahin owan ipeꞌisi piꞌipasa gawa hianai naninani. Ipeꞌ pinifela Goda opalef ipeꞌimi pelomana. Eaꞌ pendaꞌ awalef mail Buk Sami eaꞌ pendaꞌ awalef lotuwimi eaꞌ pendaꞌ awalef mondaꞌ ambagof ipeꞌimi motaga laꞌifim.  
\v 17 Maim amamaga ipeꞌ nambimb piꞌiama basef o pendaꞌ maol, anama ipeꞌ pendaꞌama agel Jisasi. Ama agel ananinai ipeꞌ pinifela God Ahalomapa.   
\s1 Waf amam nematawa sandasoꞌama  
\p
\v 18 Ipeꞌ nematawa, ipeꞌ pefeꞌ owina wauhupipa ipeꞌimi. Waf anama dendeꞌma ipeꞌ Kristen piandaꞌanai.  
\v 19 Ipeꞌ amam wapotiꞌ, ipeꞌ ukup mimila wauhiamepa ipeꞌiwai. Ipeꞌ ina pendaꞌ opalef awaumi aom, owaꞌ.   
\p
\v 20 Ipeꞌ batawisas wapotiꞌ, pemeꞌ basef mamasipei andeandeꞌma waf naloma basef asasimi hiami. Waf anama nandaꞌ okom Dembinai boꞌona.  
\v 21 Ipeꞌ ahapas, ina pendaꞌ opalef batawisipei aom, owaꞌ. Naꞌama ukup asasimi aom.   
\s1 Basef esis agof aꞌasi sandaꞌ maol sape owina esis agufisi  
\p
\v 22 Ipeꞌ agof aꞌepa pape owina enis epes pandaꞌ maolanasi, pila basef amama hiami agufumi. Ipeꞌ ina pendaꞌ maola naep asasimi atom, owaꞌ. Ipeꞌ umbamehepa ma Dembinai, deiꞌ opalef ipeꞌimi mope boꞌoma maol anama pendaꞌana andeandeꞌ.  
\v 23 Eaꞌ maim amamaga ipeꞌ pandaꞌami, amama pendaꞌam laꞌifipa siꞌi pandaꞌ maola Dembinai atona. Ipeꞌ ina pandaꞌ maola epes etis, owaꞌ.  
\v 24 Deiꞌ main, ipeꞌ pegawa anona nemaf Dembinai nofaloꞌmepa neseꞌepa amamaga buꞌwami ipeꞌ. Amama anan nandandepam maꞌoh maꞌoma ipeꞌ epes ananipei. Ipeꞌ pape pandaꞌ maola Krais Dembinai apeꞌinai.  
\v 25 Emi egafis sandaꞌ waf aonai, esis anona nemaf sofaꞌ nimanimi luꞌwami mondahama waf esis sandaꞌanai. Deiꞌ main, God nawaloga epes hiesi agufisi agof aꞌasi ma ikwaf buꞌunai atona.   
\c 4  
\p
\v 1 Ipeꞌ agufipei ma esis agof aꞌasi sandaꞌ maolanipei, ipeꞌ pendaꞌ waf buꞌunai andeandeꞌma esis. Ipeꞌ pegawa Dembinai ipeꞌinai nape otaga ilif.   
\s1 Waf sandaꞌ betenanai naloma waf seafeꞌ andeandeꞌ  
\p
\v 2 Ipeꞌ pendaꞌ beten laꞌelaꞌef. Beten ipeꞌinai, ipeꞌ ukup boꞌom pepe andeandeꞌ pinifela God.  
\v 3 Ipeꞌ pendaꞌ beten pihaliꞌ Goda nagiambamafa wapotiꞌ naꞌama. Anan nusiꞌamafa uta afaꞌ ma owalapa basef Ananimi. Ama awalapa basef amama Krais fowaꞌ mape mandambahiꞌi. Amama atom deiꞌ aeꞌ ape kalabus.  
\v 4 Ipeꞌ pendaꞌ betena nambimb aeꞌ ewalapa basef amama mandambahiꞌi motaga alihim siꞌi okom Godi naꞌi aeꞌ endaꞌam.   
\p
\v 5 Esis sape andeꞌma Kraisi, ipeꞌ ukup mope andeandeꞌma feꞌ pe ki ipeꞌinai. Maim nimeguf eaf nogal ipeꞌ piꞌipasa basef Kraisi, piꞌipasam.  
\v 6 Basef ipeꞌimi laꞌelaꞌef motaga boꞌoma pegwa basefa epes hiesi dendeꞌma amamaga maim ukup asasimi mapomami.   
\s1 Pol nasapaꞌ Tikikus naloma Onesimus mafeꞌma esis Kolosi  
\p
\v 7 Tikikus anan sahalomapa apeꞌinai endilisi aeꞌ okom nainailana. Anan nandaꞌ maol Dembinai andeandeꞌ, aeꞌ alomana wandaoꞌoma wandaꞌanai. Anan nambimb nefeꞌmago ipeꞌ nowalapa basef niꞌipipama aeꞌ deiꞌ ape aꞌimama.  
\v 8 Aeꞌ aꞌi esapaꞌana nefeꞌmago ipeꞌ ma pegawa afaꞌ wape waꞌimama ma nondaꞌepa petaga laꞌifipa opalef ipeꞌimi.  
\v 9 Anan noꞌwa Onesimus mefeꞌmago ipeꞌ, anan owalomapa nombaleꞌefanai afaꞌ ukup maimailanai nandaꞌ maol Godi andeandeꞌ. Anan nape wambota ipeꞌinai. Nambimb amam biam miꞌipipago amamaga hiami mataga naꞌae.   
\s1 Pol nasapaꞌi danifel ma nemaf buꞌunai ma esis Kolosi  
\p
\v 10 Aristarkus anan nandaꞌ kalabus nalome, anan wapotiꞌ naꞌiago nemaf buꞌunai ma ipeꞌ. Eaꞌ Mak wapotiꞌ, Barnabas taganamana nandaꞌmepago nemaf buꞌunai ma ipeꞌ wapotiꞌ. Iꞌi netagama ipeꞌ, peꞌwanago siꞌi aeꞌ aꞌipipago.  
\v 11 Eaꞌ Jisas agel waꞌana Jastus, anan wapotiꞌ nandaꞌmepago nemaf buꞌunai ipeꞌ. Ama epes hiesi Juda, amam atom mandaꞌ maol malome ma wihiꞌamba hiesi siowis wambota Godi numafias. Amam magiambame ma maol anama.   
\p
\v 12 Epafras anan nandanifel nandaꞌmepago nemaf buꞌunai ipeꞌ. Anan wapotiꞌ wambota ipeꞌinai, nandaꞌ maol Krais Jisasi nape owina anan. Laꞌelaꞌef nandaꞌ beten laꞌifinai ma ipeꞌ. Anan nandaꞌ betena God nondaꞌ ipeꞌ pitu laꞌifipa siꞌi epes dembipei pegawa God andeandeꞌ ma pembaleꞌef laꞌifipa pila okom Godi laꞌelaꞌef.  
\v 13 Aeꞌ atowe egawa Epafras, naꞌama deiꞌ awalapana aꞌi anan nandaꞌ maol luꞌunai endilisi ma nagiambama ipeꞌ paloma esis amam nematawa wambel anama biefina Laodisia naloma Hierapolis.  
\v 14 Luk anan dokta epen apeꞌinai ukup maimailanai, anan naloma Demas amam mandaꞌago nemaf buꞌunai ma ipeꞌ.   
\p
\v 15 Ipeꞌ peseꞌaso danifel ma nemaf buꞌunai aeꞌanai ma esis alupusi sape Laodisia. Eaꞌ pendaꞌmasago nemaf buꞌunai ma Nimfa kolomago esis Kristen sios sandatama etifigin ipat akwaꞌunai.  
\v 16 Ipeꞌ pitalifa pas amama eaꞌpesapaꞌam mefeꞌmago esis Kristen sios sape Laodisia, ma esis wapotiꞌ satolom sogawam. Eaꞌ pas amama aeꞌ asapaꞌam mafeꞌma esis Laodisia wapotiꞌ, amama ipeꞌ petolom piꞌiam.   
\p
\v 17 Eaꞌ ipeꞌ piꞌipago Arkipus naꞌama piꞌi, “Ineꞌ nimafi maol anama nefaꞌana ma Dembinai andeandeꞌ nimbefana.”   
\p
\v 18 Deiꞌ aeꞌ Pol ahapila pen lagel aeꞌanai atona andaꞌmepago basef amama bandami atom. Deiꞌ andaꞌmepago nemaf buꞌunai ipeꞌ hipei. Ipeꞌ ukup mopoma aeꞌ amam mowaꞌe sen ataꞌ ape kalabus laꞌelaꞌef. Aeꞌ aꞌi okom luꞌunai Godi nigiambamago ipeꞌ naꞌa numafipago nope nolomago ipeꞌ. Eaꞌ maꞌum.