\id 2PE  - Filifita NT (Mufian Fulifita -Ilahita Dialect) [aojF] -Papua New Guinea 1998 (DBL 2013) 
\h 2 PITA 
\toc1 Basef Amama Pita Nagiꞌ Nandaꞌami 
\toc2 2 Pita 
\toc3 2 Pi 
\mt1 Basef Amama Pita Nagiꞌ Nandaꞌami  
\imt1 Basef bandami Pita nagiꞌ nandaꞌami  
\io1 1:1-2 Pita nasapaꞌ danifel ananinai naloma basef Godi ma esis Kristen  
\io1 1:3-21 God nosahoꞌ apeꞌ ananipai ma deiꞌ mondaꞌ waf Ananinai buꞌunai hianai mikilaꞌ maliꞌ mape  
\io1 2:1-22 Amam profet mambasoꞌami mandaꞌ waf aonai ma anona nemaf God nogwamam nimanimi luꞌwami  
\io1 3:1-16 Nemaf Dembinai anona nemaf notaga ma nif mofa amamaga hiami hiꞌilam. Eaꞌ apeꞌ mondaꞌ waf buꞌunai mohafana.  
\io1 3:17-18 Pita naꞌipasa basef akutaimi ma mondaꞌas sotaga laꞌifisa baleꞌef  
\c 1  
\p
\v 1 Aeꞌ Saimon Pita andaꞌ maol Jisas Kraisi, anan nandandepe aposel. Aeꞌ andaꞌago basef amama ma ipeꞌ amam nematawa pefaꞌ baleꞌef buꞌunai naꞌama etin siꞌi afaꞌ ofaꞌanai. Baleꞌef anama ipeꞌ pefaꞌana waf buꞌunai Jisas Kraisi, Anan God apeꞌinai nofaꞌapa motanimani.  
\v 2 God nagiambamepa naꞌa nandaꞌ opalef ipeꞌimi mape awanem. Aeꞌ aꞌi amama mope siꞌima ipeꞌ ma eaf anama pegawa God naloma Jisas Krais Dembinai apeꞌinai.   
\s1 God nofalapa nosaheꞌapa ma mape Ananipai atepa  
\p
\v 3 Krais nofalepa ma pefaꞌ pepel howalagon ananimi atom pelomana. Ama pepel God naseꞌanami atom anan naseꞌapa pe buꞌunai amamaga amama buꞌwami hiꞌalama mope andeandeꞌ mila waf Godi. Krais nandaꞌapa naꞌama ma eaf anama mogawa anan atona.  
\v 4 Pepel Ananinai naloma howalagon amama atom Anan naseꞌapa basef ananimi naꞌi endilisi atom. Basef amama luꞌwami buꞌwami endilisi. Basef amama atom ipeꞌ pataga laꞌifipama pefaꞌ ambal namunai ma waf Godi pelomana. Ama pefeꞌ pihiꞌama waf aonai naninani nataga nandaꞌ ukup mohafel endilisi ma waf aonai nape etap anaeꞌi nandaꞌ epes sataga awes.   
\p
\v 5 Ipeꞌ ukup mopoma amamaga amama pendaꞌ maol laꞌifimi endilisi dendeꞌma ikwaf pepel ipeꞌinai piwatania baleꞌef ipeꞌinai pendaꞌ waf buꞌunai. Eaꞌ piwatania waf anama buꞌunai ma pefaꞌ gawa buꞌunai.  
\v 6 Eaꞌ piwatania gawa anama buꞌunai ma waf ukup mopeipa pimafi alop andeandeꞌ. Eaꞌ piwatania waf pimafi alopanai ma waf pitu laꞌifipa nemaf anama nimanimi meatagamipei. Eaꞌ piwatania waf pitu laꞌifipa ma pendaꞌ waf pefela agel ananinai.  
\v 7 Eaꞌ waf anama hianai buꞌunai naliꞌi piwataniana noloma waf ukup mimila sahin owan atona etin pigiambamas. Eaꞌ waf anama ukup maimailasanai piwatania waf buꞌunai pigiambama sahin owan ipeꞌisi.   
\p
\v 8 Ipeꞌ pegawa Jisas Krais dembinai apeꞌinai anan ofagonama waf anama hianai hiꞌalana. Iꞌi waf anama nope ipeꞌ laꞌifipa notaga luꞌuna endilisi nikilaꞌ paliꞌ pandaꞌanai, gawa anama ipeꞌinai ina nambimb nepe naꞌa, owaꞌ. Nambimb notaga nefeꞌ luꞌuna nowalapai waf buꞌunai hianai.  
\v 9 Emi egafis waf anama aꞌasi, esis ina nambimb siti anom amamaga mape laogoma, owaꞌ. Esis siꞌi naep maseꞌasi eaꞌ ukup maseꞌasa God nasaꞌopas nakwahomasa waf aonai hianai esis saliꞌ sandaꞌanai.   
\p
\v 10 Eaꞌ ipeꞌ pendaꞌ waf buꞌunai pepe laꞌifipa endilisi pikilaꞌ fowaꞌ paliꞌ pandaꞌana paila basef amama fowaꞌ God nofalepa nosaheꞌepa ma pape ananipei etipa. Pendaꞌam naꞌama ma pegawa endilisi God nofalepa nosaheꞌepa. Iꞌi ipeꞌ pendaꞌam naꞌama laꞌelaꞌef, nambimb ina pewa ma anona waf aonai, owaꞌ.  
\v 11 Iꞌi ipeꞌ pilam, anona nemaf God nondaꞌ eaf nogal alihina pendanifel pefeꞌ piwis wambel Jisas Krais Dembinai apeꞌinai nape laꞌelaꞌefa. Anan atona nofaꞌapa motanimani.   
\p
\v 12 Endilisi, ipeꞌ pegawa amamaga amama ma basef amama maliꞌi pembaleꞌefam laꞌifipa ma basef amama endilisimi paitu laꞌifipamam. Owaꞌetin, aeꞌ aꞌi ataꞌ iꞌipipa efela ukup ipeꞌimi ma pilam andeandeꞌ.  
\v 13 Nimeguf hiami aeꞌ ape namowe alomepa etap anaeꞌ, okom naꞌi iꞌipipa timbi tambela efela ukup ipeꞌimi ma pila basef amama. Ipeꞌ ina ukup moseꞌepamam.  
\v 14 Aeꞌ egawa nogota bandana nape ma nambimb sehe egaꞌ siꞌi Dembinai apeꞌinai Jisas Krais nihiꞌambe eaꞌ.  
\v 15 Amama atom deiꞌ aꞌi endaꞌ maol luꞌunai dendeꞌma ikwafa pepel aeꞌanai endaꞌ anona eaf ma anona nemaf aeꞌ egaꞌ eaꞌ, ipeꞌ ukup mopoma basef amama hiami aeꞌ aꞌipipami pepe pegawam.   
\s1 Afaꞌ wati pepel howalagon Godi nape Krais  
\p
\v 16 Afaꞌ waꞌipipa eaꞌ pegawa pepel Dembinai apeꞌinai Jisas Kraisi ma anona nemaf notanima nifiꞌi noloma pepel luꞌunai Ananinai. Afaꞌ ina waila anom basef numunefin epes gawaisi saꞌiami waꞌipipa basef amama Kraisi, owaꞌ. Afaꞌ watolona endilisi nofaꞌ pepel laꞌifinai buꞌunai Godi ma naep afaꞌimi, amama atom deiꞌ waꞌipipa.  
\v 17 Nemaf anama afaꞌ wape walomana halaf anama, wati Anan nofaꞌ agel luꞌunai naloma pepel howalagon buꞌunai ma lagel Ahalomana Godi. Nemaf anama anona malogel naꞌi nataga God napoma nafiꞌmai Jisas naꞌi, “Anama Nogalome Aeꞌanai okom nainailana endilisi. Okom Aeꞌanai boꞌona ma Anan.”  
\v 18 Afaꞌ wape walomana halaf anama God nandandepagoma boꞌwagoma eaꞌ wameꞌ basef amama malogel anama naꞌi nataga ilif.   
\p
\v 19 Afaꞌ atofa ukup mapoma basef amama God naꞌiami wameꞌam nemaf anama wape halaf anama. Basef amama God naꞌiami manda basef fowaꞌ amam profet maꞌiami mataga laꞌifim wahapilam laꞌifim waꞌi endilisimi atom.  
\p Iꞌi ipeꞌ pemeꞌ basef amama amam profeti ipeꞌ okokomom pepan, andeandeꞌ. Deiꞌ main, basef amama siꞌi anona nagwapin fandonai nafifil nape laꞌafena owamb. Eaꞌ howalagon nape laꞌelaꞌef nafiꞌi nataga lala. Ama ondoꞌw kuhimbitainai lalaꞌwan mafifil opalef ipeꞌimi nomon.  
\v 20 Eaꞌ ipeꞌ ataꞌ pegawa basef amama laꞌelaꞌef. Ina anona profet atotona naila okom ananinai atona deiꞌ naꞌi anom basef ofagema amam profet fowaꞌ mandaꞌam mail buk Baibeli, owaꞌ.  
\v 21 Deiꞌ main? Fowaꞌ ina enin epen atitin naꞌi anom basef mofaꞌama Godi ma okom ananinai atona, owaꞌ. Ambal Buꞌunai Godi atona nafela ukup amam profeti mail okom Godi atona eaꞌ mofaꞌ malogel Ananinai maꞌi basef amama.   
\c 2  
\s1 Waf amam profet mambasoꞌami mandaꞌanai  
\p
\v 1 Fowaꞌ anom profet mambasoꞌami mataga laꞌafena esis amam nematawa Israel mambasoꞌmasa basef basoꞌmaimi. Deiꞌ naꞌama etin anona nemaf anom amam mambasoꞌami mohafel laꞌafena ipeꞌ wapotiꞌ eaꞌ mondambahoꞌ mifiꞌi mombasoꞌmepa miꞌipipa basef mamumami hiami basoꞌmaimi mahambombaga epesi. Dembinai Anan fowaꞌ nagaꞌ ma natala amam amama natagahoma waf aonai amam mandaꞌanai ma mope andeandeꞌ. Eaꞌ owaꞌ. Amam maseꞌana alafugah Dembinai. Nambimb mondaꞌam naꞌama etin, eaꞌ mehip amam motaga aom.  
\v 2 Amam mandaꞌam naꞌama nambimb enis amam nematawa hiesi sila waf naninani aonai amam mandaꞌanai. Eaꞌ enis siti waf aonai amam mambasoꞌami mandaꞌanai eaꞌ sosambala basef buꞌwami siꞌi basef awami atoma waf buꞌunai endilisi Godi.  
\v 3 Amam amama kowalami endilisi, amama atom nambimb mondaꞌ basef basoꞌmaimi ukup amamumi atom maꞌiami ma mofaꞌ otamba maim ipeꞌimi. Fowaꞌ gani God nogawa nandandepa anona nemaf mapomam ma nowaloga amam mofeꞌ wambel aonai hel. God nandondomba anom amamaga mohamboga amam endilisi ataꞌ mape laꞌelaꞌef mohafa amam. Ina maꞌoh, owaꞌ.   
\p
\v 4 God ina niambaliꞌ amam ensel amama fowaꞌ mandaꞌ waf aonai, owaꞌ. Anan nakwahom mowala wambel aonai hel. Eaꞌ nowaꞌam laꞌifim mape laꞌelaꞌef anama mape mohafa anona nemaf God nowalogama basef luꞌwami.  
\v 5 Anan ina niambaliꞌ esis amam nematawa fowaꞌisi sasoꞌ alafugahanai sape andeandeꞌ, owaꞌ. Anan nandaꞌ embel luꞌwami matef mahas afis hiꞌalas. Anan numafi Noa atona nawalipasa basef buꞌwami Godi nofaꞌana naloma epes 7-peleis wapotiꞌ nofaꞌas sotanimani sape andeandeꞌ.  
\v 6 Eaꞌ nahambombaga epes hiesi sape wambel biefina luꞌunai Sodom naloma Gomora wapotiꞌ. Epes isima wambel anama God nahagon naofagon nif luꞌwami deiꞌ agambeh atom maꞌoh. Anan nagwamasa waf aonai esis sandaꞌanai nandaꞌas siꞌi anona ikwafa nimanimi luꞌwami emi egafis sosambala basef Ananimi anona nemaf seafaꞌami.  
\v 7 God nagiambama aman anama buꞌunai Lot numafiana nofaꞌana notanimani nape andeandeꞌ, ina nagaꞌ, owaꞌ. Anan okom aona endilisima waf aonai soꞌa waolanai amam Sodom mandaꞌanai, mosambala basef Godi.  
\v 8 Aman anama buꞌunai Lot nape nalomas laꞌelaꞌef nameꞌama waf aonai amam mandaꞌanai natolom. Okom ananinai aona endilisi ma waf anama amam mosambala basef Godi mandaꞌanai.  
\v 9 Basef amama maꞌipapa alihim maꞌi Dembinai numafi epes buꞌwasi saila waf ananinai andeandeꞌ. Maina nemaf amama meagwambasi motagamas, anan nogawa ma niliꞌakwas sope andeandeꞌ. Eaꞌ Anan nahapila esis sandaꞌ waf aonai ma nogwamasa nimanimi ma waf aonai esis sandaꞌanai sape laꞌelaꞌef sofeꞌ sotagama nemaf anama Anan nowalogasanai.  
\v 10 Basef amama endilisi atom mapoma emi egafis ukup mohafema waf aonai alop atona ma ukup maꞌi basef Dembinai saꞌi falafumi. Epes isima anona nemaf sofaꞌ nimanimi luꞌwami endilisi.  
\p Amam mambasoꞌami matotopaꞌ basef Godi maila ukup amamumi atom mafela agof amamumi atom. Amam ina umbamahama mandaꞌ amam mape ilif heveni findiwam, owaꞌ.  
\v 11 Eaꞌ ensel buꞌwami laꞌifimi mikilaꞌ amam amama mambasoꞌami, amam ina magwam mandaꞌ ensel amama awami findiwama naep Dembinai, owaꞌ.   
\p
\v 12 Amamaga amam mambasoꞌami owaꞌ mogawame, amam maꞌi basef awami ma amam. Amam mambasoꞌami siꞌi mafis mape aolopi owaꞌ ukup buꞌwami miapaimi mape aolop atona. Mafis amama enis epes sagolopam satolom saham afum hiꞌalam eaꞌ naꞌama etina amam amama wapotiꞌ anona nemaf aom hegililam.  
\v 13 Amam mandaꞌ waf naninani aonai maseꞌas nimanimi enis. Eaꞌ anona nemaf God nogwamam mofaꞌ nimanimi wapotiꞌ. Amam okokoma saꞌ gwaꞌaimi embel maim maloma waf aonai soꞌa waolanai eaꞌ sandanifel endilisi ma sandaꞌ waf anama alip. Nemaf anama maꞌ gwaꞌaimi maloma ipeꞌ, waf aonai amam mandaꞌanai siꞌi anona ikwaf aonai laꞌafena ipeꞌ. Amam mape malomepa mandanifela waf aonai amam mandaꞌanai.  
\v 14 Laꞌelaꞌef naep amamumi mati nematawa wandaꞌ waf aonai laꞌelaꞌef ma mondaꞌ waf aonai molomawa eaꞌ amam ina makwaha waf anama, owaꞌetin. Amam makikipa enis epes mombomefas sondaꞌ waf aonai. Amam mogawa endilisima waf anama aonai kowalasanai ma amamaga enis epesi. Anona nemaf God nohambombagam endilisi.  
\v 15 Amam masoꞌ alafugaha eaf buꞌunai, amama atom deiꞌ ukup maseꞌama waf buꞌunai. Amam maila waf anona aman Balami, Beor nogalomana. Anan okom nohafela nandaꞌ waf aonai ma nofaꞌ otamba hiami.  
\v 16 Eaꞌ nemeꞌ basef laꞌifimi maꞌipana mehipa nokwaha waf anama aonai. Basef amama donki ananinai atona noga naꞌipanam siꞌi epen naꞌi nasopama eafa waf anama aonai ukup maseꞌasanai profet anama naꞌi nondaꞌanai.   
\p
\v 17 Amam naꞌamaimi siꞌi ifatagw amama magal mowala etap embel aꞌami. Amam siꞌi elagw uf luꞌunai nufapusam nawalom mafeꞌ deindeiꞌ. God nandondomba akot luꞌunai endilisi ma anona nemaf amam mopaigon.  
\v 18 Amam amama matotopaꞌ basef Godi maꞌi maꞌoh etina basef falafumi awami amamumi. Amam maꞌipa enis epesa waf ukup mohafemanai ma soꞌa waola waf naninani aonai alopunai. Amam mandaꞌ waf anama eaꞌ mambomefa enis epes ataꞌ deiꞌaol sataga saꞌi sokwaha waf aonai epes isima sololama Godi sandaꞌanai eaꞌ mambomefas saila amam.  
\v 19 Amam maꞌipa enis epes maꞌi, “Iꞌi ipeꞌ pila basef afaꞌimi, nambimb ipeꞌ pepe andeandeꞌma ina anom amamaga mowaꞌipai, owaꞌ. Pepe wafifipa.”  
\p Eaꞌ owaꞌ. Amam mape owina waf aonai, anama nombaloꞌam laꞌifim. Deiꞌ main, iꞌi anom amamaga mombomefa enin epen, nambimb epen inima laꞌelaꞌef nape owina amamaga amama mambomefani.  
\v 20 Emi egafis sokwaha waf aonai etapanai nandaꞌ epes awes ma sogawa Dembinai apeꞌinai Jisas Krais nofaꞌas sotanimani, ma iꞌi waf anama aonai nomboma esis wapotiꞌ ma nombaleꞌas laꞌifis, anona nemaf sope laꞌelaꞌef naꞌama. Saliꞌ sape laꞌifisa sondaꞌ waf aonai, ataꞌ sape awes kwaukwawieꞌ. Eaꞌ deiꞌ satanima sandaꞌ waf aonai wapotiꞌ, awes endilisi sandaꞌ waf aonai laꞌelaꞌef.  
\v 21 Iꞌi esis ina sogawa miꞌuli buꞌunai Godi, ataꞌ sope awes kwaukwawieꞌ. Eaꞌ deiꞌ sasoꞌ alafugahana, anona nemaf sope awes endilisi.  
\v 22 Waf anama natagamas siꞌi anom basef endilisimi epes gawaisi saꞌiami maꞌi naꞌama maꞌi, “Nombat notanima nafeꞌ naꞌ naguꞌomi ananimi wapotiꞌ.”  
\p Anom basef wapotiꞌ maꞌi, “Bol nafeꞌ nasaꞌof eaꞌ, natanima nafeꞌ nasaꞌof wambuꞌ awagom wapotiꞌ.”   
\c 3  
\s1 Endilisi etis Dembinai notanima nifiꞌi  
\p
\v 1 Ipeꞌ alupipei endilisi, basef amama mafeꞌma bifi andaꞌam mail okwatih mafeꞌmago ipeꞌ. Basef amama biefim maliꞌi maloma amama aseꞌepam ipeꞌ ma mefela ukup buꞌwami ipeꞌimi ma pegawa basef amama andeandeꞌ.  
\v 2 Aeꞌ aꞌi ipeꞌ ataꞌ ukup mopoma basef amama fowaꞌ gani amam profet Godi mawalapami. Eaꞌ ukup mopoma basef laꞌifimi Dembinai nofaꞌapa motanimani, ipeꞌ pefaꞌama lagof afaꞌ aposel ipeꞌifai.   
\p
\v 3 Ipeꞌ ataꞌ ukup mogawa amama muliꞌ. Nimeguf amama akutaimi anom amam mondaꞌiafipei motaga mila ukup awami amamumi ma waf amam mandaꞌanai. Eaꞌ mondaꞌiafipa naꞌama  
\v 4 miꞌi, “Anan naꞌi basef endilisimi atom naꞌi nifiꞌi wapotiꞌ. Eaꞌ deiꞌ anan ataꞌ nape eti? Nogota fowaꞌ dambadamba bafasapa sagaꞌanai amamaga amama hiami hiꞌalam ataꞌ mape laꞌelaꞌef naꞌama etin siꞌi fowaꞌ dambadamba etap anaeꞌ nataga mafiꞌi mataga deiꞌ.”   
\p
\v 5 Eaꞌ ukup amamumi mandaiwaꞌ, deiꞌ owaꞌ mogawa amamaga amama, owaꞌ. Amam ina ukup mapoma ma fowaꞌ gani God naꞌi etina nandaꞌ etap naloma otaga mataga mape, owaꞌ. Anan nandaꞌ etap nataga nape laꞌafena embel.  
\v 6 Eaꞌ God nandaꞌ embel luꞌwami mataga etap maofeniagon hiꞌalagon maha epes maloma amamaga mape etapi hiꞌalam.  
\v 7 Basef Godi amama atom deiꞌ miliꞌakwa amamaga mape ilifi maloma epes maloma amamaga mape etapi hiꞌalam deiꞌ ataꞌ mape laꞌelaꞌef mohafa nif fandumi nemaf anama God nowaloga epes isima sasoꞌ alafugaha anani ma nondaꞌas hegililas.   
\p
\v 8 Ipeꞌ alupipei endilisi, ipeꞌ owaꞌ ukup moseꞌepama anom amamaga atom. Okom Dembinai naꞌi nemaf atotona siꞌi afagof hiami 1,000-peleim eaꞌ afagof 1,000-peleim siꞌi nemaf atotona.  
\v 9 Dembinai ina nandaꞌ maol soꞌusoꞌumbela nowalapai amamaga anan okom naꞌi endilisi etina niendaꞌami siꞌi enis epes ukup mapoma maol sandaꞌana soꞌusoꞌumbel, owaꞌ. Anan nandaiwaꞌma enin epen atitin higililan. Anan okom naꞌi epes hiesi hiꞌilas somboma opalef sefeꞌma Anan. Amama atom deiꞌ Anan okom napoma ipeꞌ deiꞌ nape nohafepa palomas.   
\s1 Owagama etap naloma otaga ilif higililam hiꞌilam  
\p
\v 10 Nemaf Dembinai niefiꞌianai anona nemaf nifiꞌi siꞌi epen nandaꞌ wali nafiꞌi. Nemaf anama otaga dilulu bugwalagw mehip higililam. Eaꞌ amamaga amama hiami mapeinai wapotiꞌ fendom mefeꞌ hiꞌilam. Etap anaeꞌ wapotiꞌ neloma amamaga hiami sandaꞌam mape etapi anona nemaf nif fendom fesopamam hiꞌilam.  
\v 11 Endilisi amamaga amama anona nemaf mefeꞌ hiꞌilam naꞌama. Eaꞌ ipeꞌ pendaꞌ main? Ipeꞌ pepe pila waf buꞌunai atona pila waf hianai Godi.  
\v 12 Ipeꞌ pendaꞌam naꞌama ukup mopoma nemaf luꞌunai Godi neataga, pendaꞌ maol Ananinai laꞌifipa pewalapa nemaf anama neataga. Nemaf anama notaga otaga fendona hiꞌilana eaꞌ nif luꞌwami endilisi fendo amamaga amama hiami mape otagai hiꞌilam motaga mumbul mofeꞌ siꞌi embel.  
\v 13 God naꞌi basef endilisimi atoma nondaꞌ otaga etap dambaimi ma waf buꞌunai atona nupe laꞌelaꞌef. Apeꞌ deiꞌ ukup mopoma mohafa amama meataga.   
\s1 Apeꞌ mundumafuma andeandeꞌ ukup mope mohafa nemaf Dembinai  
\p
\v 14 Alupipei aeꞌipei endilisi, ipeꞌ ukup mope mohafa amamaga amama meataga. Eaꞌ ipeꞌ pendaꞌ maol laꞌifipa pimafi ipeꞌ pepe boꞌwepa andeandeꞌma waf aonai aꞌepa ma naep Godi, pepe opalef etifim peloma God.  
\v 15 Dembinai ataꞌ nape nohafa apeꞌ epes hiapai hiꞌalapa. Eaꞌ deiꞌ ipeꞌ ukup mopoma basef amama anan nefaꞌapa motanimani. Amama siꞌi basef amama hiami sahalomapa Pol apeꞌ ukup maimailanai nandaꞌam mafeꞌma ipeꞌ. Anan nandaꞌ basef amama ma gawa buꞌunai endilisi God nasoꞌananai.  
\v 16 Basef hiami anan nandaꞌami ma nemaf anama Dembinai niefiꞌianai nandaꞌ amama atom. Eaꞌ anom basef nandaꞌam mail buki ahifim endilisi ma mogawa ofagema. Basef amama ahifimi, epes isima gawa aꞌasi ma owaꞌ situ laꞌifis isima samboma basef amama maloma anom basef hiami wapotiꞌ mail Baibeli. Eaꞌ esis sahambombaga esis etis anona nemaf hegililas hiꞌilas.   
\p
\v 17 Alupipei endilisi, ipeꞌ pegawa amamaga anona nemaf migiꞌ meatagai. Eaꞌ pindumafuma andeandeꞌ. Naꞌama amam amama mambasoꞌami ma mosambala miꞌuli Godi momboma opalef ipeꞌimi pewa ma waf aonai.  
\v 18 Eaꞌ ipeꞌ pepe pila waf anama Dembinai Jisas Krais nagiambamapa naꞌa nofaꞌapa motanimani. Eaꞌ pitu laꞌifipa ma waf anama noloma gawa anama Kraisi pikilaꞌ fowaꞌ paliꞌ pape pandaꞌam. Aeꞌ aꞌi agel buꞌunai atona deiꞌ laꞌelaꞌef nopomana nefeꞌ anona nemaf owagama wapotiꞌ. Endilisi.