\id HEB -Hebrews NT2088 Alamblak Edmiston 
\h Hibru 
\toc1 Hibrumpno  yimo gontwat 
\toc2 Hibru 
\mt1 Hibrumpno  
\mt2 yimo gontwat  
\is1 Barkof kfo nuhas mrokfom  
\ip Ndar gontwat Hibru Kristenmpno yimo gontwayet. Hibru Kristenm bok krhopam yak hatohhato memom, “Jisasr ayafhoninomr.” Ndnettn ndar gontwat rroh kfo bmtayuk mrokfom wandfakhato htafmomm. Bro Nkifrar Jisasr yakhato hingrnamo hingrneft Kraisrn Bro Nkifrarhu hingrneft kfo nuhas bonuhasmorm.  
\ip Husfirpa bro mrokfom ndar gontwat kfomom. 1) Jisasr tu Bro Nkifrarhu yon mif mifer. Jisasr ndar bbinysoft tohmohat, boknambok krhopam fakmor. Bro Nkifrar inji htihato to be rorn htamor yimaroh tamoh tamoh nefroh htihato yak marnyayuk yimar (2.10). Ror inji namotr ndnetrn profetm, mounmotm, yo Mosesr nd ndm hingrnamo hingrnefm be inji hingrnamomm. Jisasr hingrnamo hingrneftn tu tpiyet hingrneft hingrnamor. 2) Jisasr pris hingrneft fak htamorr. Ror be nd hingrneftn toh nkifranirahr. 3) Judam yakitohmoa nkifra pris hingrnefthu hingrna yuhat rot be inji, Jisasr hingrnamo pris hingrneftn tu tpiyet hingrneft hingrnamor. Judaroh fasoh fasoh nefm yemro tarioh mthahato kur mtha hikmoa nkifra neft ndt be yafotha hingrneft hingrnamoum. Jisasrn tu tpiyet hingrneft hingrnamor. Tot tu yima rifhuroh yak wus bowusyuk hingrneft.  
\ip Ndar gontwat met yindariroh kfo bmta mrokfom korhmt. Ndnettn bingot tohmo Isrerroh met yindariroh kfo bmta mrokfom korhm Sapta 11. Nda gontwathu mrokfom inji kfiwum tamoh tamoh nefm o krhopam kekwoko, bmbri riyoh dbhurak duha. Jisasr yakitoh bmta kihhato tohhany tohhany wuroh nohneftpno be myafhonikfot. Jisasr krhopam titahato tohmor. Ndnettn niko nd yuhat hikkfot.  
\c 1  
\ms1 Mounmotm Jisasrhu yinhitn tohwom.  
\mr (Sapta 1—2)  
\s1 Bro Nkifrarhu mrokfot Jisasr dhemot  
\p
\v 1 Bingot Bro Nkifrar nmoh nkifram mrokfom hemoahat profetmpno pthamoatrm tfit romn kfo nuhasmoumm met yindarim. Mrokfom hemoahat bok yiham bok yuhamn pthamourm.  
\v 2 Tfit ndar yiham turhu yon Jisasrn mrokfom yakhato kfo ptha nuhas hanitrnom. Jisasr tu Bro Nkifrarhu yonrn, ndnettn tamoh tamoh hingrnefm tamoh tamoh wuskam rorhu tirtn htamorm. Bro Nkifrarn kfomotrr Jisasr ee Jisasr wanyhato ndar bbinysoft yorhwa tamoh tamohm hingrnamorm.  
\v 3 Bro Nkifrar yorhwa ruheft nd yonrn fak nhombramort. Jisasr htineft to mirahko ka Jisasr htitwonom, nhai, Bro Nkifrarhu ruheft htitko. Bro Nkifrarhu ruheft to bi Jisasrn fak nhombramort. Ror tu bro ptha nanyjaretrn ndar bbinysoft ror kfiwatr rorhu tng yuhatn bbinysoft rhu hik hanitwot. Ror nda bbinysofthu yimaroh fasoh nefroh yak thu yuham yak hta bohta marnya tanyhato yimor. Yihato mrhumor tu yura myorhekwa nanyjaret Bro Nkifrarhu tirmifko. Tu bro yufa yakyuk tirko mrhumor.   
\s1 Bro Nkifrarhu yonrn buriwurm mounmotm  
\p
\v 4 Tirmifko mrhuhato rorn bromorm mounmotm. Yo nhaft rorn tu Bro Nkifrarhu yonr rhumor. Mounmotmn tfit rorhu hingrna yimam rhumom. Tamohmpno Jisasr nd bro yufat yakmor?  
\v 5 Yimbu yuhat inji korht. Bingot toh hnamo mounmotm nhai Bro Nkifrar womr kfo marimorr,  
\q1 “Ni nanhu yone.  
\q2 Hrek na bi ninhu yifema.” \rq Sng 2.7\rq*  
\m Yo nhaft Bro Nkifrar nhai wom mounmotr kfo marimorr,  
\q1 “Ni nanhu yonn rhurahn.  
\q2 Nann yifemruhann.” \rq 2 Sml 7.14\rq*  
\p Nhai.  
\v 6 Bro Nkifrarhu nkati yonrpar kfo tkrurafhato ndar bbinysoft yawihna thombat mounmotm kfo mirahrm, “Nd yonrn kfo yuta hagrhakfot.”  
\v 7 Bro Nkifrarhu yonrhu mrokfot kfonihato tfit mounmotroht riyakhato kfo memor,  
\q1 “Mounmotm rom be hingrna yimayem.  
\q1 Wiforti kaht kanjo hingrnewum.  
\q1 Hingrneft afo hingrnaknitamt buha tfit mnoh hmbritm.  
\q1 Hingrnakni tfit buha mnoh hmbritm.  
\q1 Inji hingrnewumt rroh hingrneft.” \rq Sng 104.4\rq*   
\p
\v 8 To tawo turhu yonrn kfo memorr,  
\q1 “O Bro Nkifraye, ninn kingn toh nkifranirahn.  
\q1 Ni tohukatohruha kmim tu hifa dborioh nefrpam yak hta bohtarahnm.   
\q1
\v 9 Ninhu toh nmbuhat fasoh fasoh nefm faso hti bebwonm.  
\q1 Tu hifa dborioh nefrpam hti yindhorwonm.  
\q1 Ndnatn tunhu yifem Bro Nkifrar hti yindhorhato kfo memorn,  
\q1 ‘Ninn kingn tohrahn.  
\q1 Kingn tohhato ndar bbiny-softhu wuskam ninn hti yukatohaf hanyruhann  
\q2 yima yuhur yindhorrahrn.  
\q1 Nhai wom yimam ni yakmo rhu nmbuhat o yufat kanjo yakrmom.’” \rq Sng 45.6-7\rq*   
\p
\v 10 Inji kfonihato tfit wom mrokfot kfo memor,  
\q1 “Bingot ni Bro Najomnn kfomotn bbinysoft trhamot.  
\q1 Ni tunhu tire hingrnamont mount.   
\q1
\v 11 Nd mounti bbinysoft rof mibatini-ruhatf  
\q2 yimanom hti hambrafrahnomf.  
\q1 Ni nhai. Ni nhai hti hambraf-ruhatnomn  
\q2 ni be tahi nrwin kekutrahn.   
\q1
\v 12 Ndar bbinysofthu wuskam tamoh tamohm hwe nmbia manym kanjo  
\q2 hwihany hwi hanyhato mskta-hato yakrirak rihtefiwa kanjo  
\q2 inji narahnf mounti bbinysoft.  
\q1 Yatk wuskam riyak htefiwa kanjo inji riyak htafruhanf  
\q2 tfit nfrim yakhato wondhwa kanjo inji tfit wondh hmbrirahnf nfri wuskaye.  
\q1 Ninhu ruheft nhai wom yihar rhu kriyohnihato  
\q2 tfit wom yihar rhu marnya inji nakahn. Nhai.  
\q1 Ninhu ruheft to be inji rpahtet ruheft korhn.” \rq Sng 102.25-27\rq*   
\p
\v 13 Bro Nkifrar nhai wom mounmotr kfo won marimorr,  
\q1 “Nanhu tirmifko warhukahnn nd ni tone dbombhiwa yimam nann afo htiruhanm.  
\q1 Afo htitwa. Nd yimam mirahm,  
\q2 ‘Finji ananomn,’ tfit nann yakrhoyanmn  
\q2 ninhu yinhitn yak htaruhanm.  
\q1 Tfit ninn brohato tohukatoh-rahnm.” \rq Sng 110.1\rq*   
\p
\v 14 Mounmotm mirahko, “Tamohem?” Rom Bro Nkifrarpno rhuhato rorhu hingrneft hingr-niwayem. Fitoh yimam Bro Nkifrar kangr, “Hifa rhu nmbuhat ahiyanm,” nd yimam mounmotm yitamn thu bmtewumm.   
\c 2  
\s1 Brorhu nrfa htiyak yuhat  
\p
\v 1 Bro Nkifrarhu Yonr be tu bro yufa mift fakmor. Ndnettn nd Yonr kfoyuk mrokfot yakitoh kihkfot. Yakitoh hrufrehrahkomt to be yak frikatiyafrahkomt.  
\v 2 Bingot nkiframpno mounmotm Mosesrpno yimomn kfo borsisha nuhasmomr. Nd borsisha mrokfom Mosesr yakmom tu bro borsisha mrokfom yakhato kfo nuhas-mourm. Yimam nd borsisha mrokfot hanyjbornamoahat tu Bro Nkifrar kfomo yuhatn kak tutfamourm.  
\v 3 Tfit ndar yihat nfri dfa tik yuharhu mrokfot Jisasr kfo nuhaswat yimam hik duha yinyeft, to be finji kafrohruham? Nd Bror yimam nrfa htiyekwa nmbuhat bi turn kfomotr womm wanyhato kfo nuhasmomnom. Ndnettn to mirahko ka kfo furakfoyet.  
\v 4 Tu Bro Nkifrarn thu nawohmoatrm wonk wonk nefm na bugamoumm. Bro Nkifrar yimamn mthu nawohhato pthamoahat duka memour, “Inji yak nuhaskahtanm yimam htiruhamn mirahm, ‘Mrokfom tu fipet mrokfot wanuknom.’” Tu Bro Nkifrarhu Yafothatn rpa rpa nefm kak htamourm rpa rpa yimam.   
\s1 Jisasrhu yufat tohekwot  
\p
\v 5 Bro Nkifrar king toh thombat mounmotm nhai tfit hingrnefm yakitohnhokfot. Nhai.  
\v 6 Bro Nkifrarhu rfa borngtn wom yimar kfo memor,  
\q1 “Yimanom tamohtetnomn ni Bro Nkifraye be mfro dukewannom?  
\q1 Nom yima furayenom. Tamohm-pno yamuka, ‘Adukayanm?’   
\q1
\v 7 Nom yimanom ninn hingrna-monnom.  
\q1 Be dfik yiham mounmotroh yufamn afo mfrfnahnimom.  
\q1 Tfit kto nomn bro yufat hemonnom.   
\q1
\v 8 Nmoh yinhitn hta bugamohat wuskam, nhai wom tamoht rim tohtarmot.” \rq Sng 8.4-6\rq*  
\p Tamoh tamoh shrenm nmoh yinhitn hta bugamorm. Nmoh yinhit htamohat arihat tafi nmoh yinhitn wuskam rhukahtm htikahnomm. Nhai.  
\v 9 Tot wom yimarhu yufat riyorhwot. Nd yimar bbinysoft tohmohat afo mounmotroh yufatpno rorhu yufat ritohtamout. Tfit arihat nohnihato rorhu yufat mfrfnahnihato tohekwot. Nd yimar Jisaser. Nd mounmotroh yufam mfrfnahnimohat duka memor, “Afo bbinysofthu yimaroh tkitt nann yakrhoyantn nohruha. Rroh nohyuk tkitt nann yakrhotant Bro Nkifrar ndt htihato yuhuwafhato yakrahrm.” Ndnetrn Jisasr be tu bro krhopam yakhato nohmor. Nd krhopam ror yakhato nohmom, Bro Nkifrarn thu bmtamotrr ror toh bmtahato nohmor. Kto Bro Nkifrar tfit kasinyamorr. Kasinyafhato bro yufat hemorr.   
\p
\v 10 Bro Nkifrar tor tu ndar bbinysoft yakitohwa yimar. Tur kangr, “Finji finji ayak hta bohtayant, nhai mro-kfom.” Ndnetrn duka memor, “Bbiny-softhu yimam newa fasoh fasoh nefm Jisasrn yiruharn rorn nd bbinysofthu yimaroh tkitt yakhato nohrahr. Nohruhatr yimam ndt htiruhamn tfit nann hikrahm.” Jisasr nd krhopam yakmohat nhai nd krhopamn hta kasuhrmomr. Nhai. Nd krhopam frdbruf thuhato tohmor. Nd krhopam yaknihato dfa tik yuhar htakmorr. Nd dfa tik yuhar yauwa yimam turn nyingako tohekworm.  
\v 11 Froh frohm Jisasr bi fak wus bowusrm, nd yimami Jisasr bi rpa yifemetem. Jisasr kangr, ayutayanm nmemrom, nhai mrokfom. Bi rpa yifemetmn hti yindhorworm.  
\v 12 Kfo memor,  
\q1 “Bro Nkifraye, ni hingrnamo hingrneft nanhu nmemrom kfo ptha srh nuhasruhanm.  
\q1 Bro rifiny swirmn yufat yutahato kfo ptha yindhorruhant.” \rq Aisaia 8.17\rq*   
\p
\v 13 Tfit kfo memor,  
\q1 “Nanhu bro dukeft kanga nd Bro Nkifrar kfoyuk mrokfot amhikakniya.  
\q1 Na afo asoya tohwa Bro Nkifrar hemo yonmpno.” \rq Aisaia 8.18\rq*   
\s1 Nom tamoh nefm yakneft Jisasr toh nuhaknerahrnom  
\p
\v 14 Nd Jisasr kfo memo, nanhu nmemroyem, ndm ndar bbinysoft tohwa yima mifthet met yindarim kfomor. Jisasrhu toh nmbuhat rom kanjo toh nhombramor. Memor, “Rom kanjo toh nhombrakahann kto nohhato nd Satanr yakitohwa noh yafothat yak thuruhant.  
\v 15 Rorn kfo yakrmitatrm yimam kakrmitwom nohneft. Noheft yakrmitatm Satanrhu fasoh dukeftn kak hikwom. Nann noh nuhasrhotanm nhai wom yakrmiruhatm nohneft.”   
\p
\v 16 Jisasr nd krhopam yakhato nohmohat nhai mounmotm dukahato nohrmor. Nhai. Abrahamr tohmo kanjo tohet yimam dukahato nd krhopam yakhato nohmor.  
\v 17 Bro Nkifrar kfo memorr, “Bbinysofthu yimam kangn hifa tkitt ayak htayanm, btn ndhtet neft afo rompno yihato rom tohwa tkitt watohnhokahnm rom krhopam yakneft ni htiruhann hti yuhuwafrahnm. Ninhu yuhuwaf nmbuhat rom hti dukaruhamn rom tamoh krhopam rhunefm ni prisroh bro tohak prisn kanjo rroh krhopam mhiruhatmn tfit ninn yakhato nann yuwa hirahn. Ni be buha tohhato rroh fasoh nefm yak tuhafhikahtnm nanpno nierahm.”  
\v 18 Jisasr yimanom kanjo tohhato wom yiham memour, “Bro Nkifrarhu dukeft ahika,” to nhai, mduka nhitamour. Turn wabbuka sinyahato memour, “Nd Bro Nkifrarhu dukeft ahika,” krhopam fakmour. Ndhtet nefm ror bi mhtiyafetrn btn nom tamoh nefm yakneft bmbri toh nuhaknerahrnom.   
\ms1 Mosesrhu bro yufat Jisasrhu bro yufathu yinhitn korht.  
\mr (Sapta 3.1—4.13)  
\c 3  
\s1 Jisasr yakmo yufatn be tu bro yufat fakmor, Mosesr nhai ndhtet bro yufat yakrmor  
\p
\v 1 Niko froh frohko Bro Nkifrar rpat yak hikwanom, waduka hanyswako. Jisasr nmoh bro prisroh bro tohak priser. Bro Nkifrar nom dukahato kfo tkrurafmorr. Nd yima Jisasrn kfiwonom yak hikneft. Rorn dukefm htakfot.  
\v 2 Bingot Mosesr Bro Nkifrarhu yon kunyr kasinyamo kanjo ror nd hingrneft yakhato Bro Nkifrarhu yon kunyr kasinyamorr. Bro Nkifrarhu kfo tkrur mrokfot yak hikhato nd yon kunyr kasinyamorr.  
\v 3 Yimar yon kunyr kasinya thoft nhai kunyr bro kfo yindhor nmbuhat yikaht. Nhai. Nd yon kunyr kasinyayuk yimarpar kfo yindhorwom. Mosesr hingrnamo hingrnefti Jisasr hingrnamo hingrneft to inji rhumof. Jisasr kasinyamo yon kunysn Mosesr be rim fkniyakmor.  
\v 4 Ndar kasinya hanita yon kunym rpa rpa yimam kasinyewumm. Nd rpa rpa yon kunym tu Bro Nkifrar kfiwatr kasinyewumm.  
\v 5 Mosesr Bro Nkifrarhu yon kunyrhu yonmpno hifa hifa tohhato rorhu hingrnefm kakitohmourm. Tamoh tamoh nefm kto rhuyukm, Bro Nkifrar rorn mthu nawohmoarn pthamourm. Ror nd hingrneftn be hingrna yima furar tohmour.  
\v 6 Jisasr nhai. Ror tu Bro Nkifrarhu yon mifer. Rorhu hingrneft inji korht. Fitoh yimar Bro Nkifrarhu yon kunyr mfkniyekwor, nd yimar Bro Nkifrarhu yonr rhuhato Jisasr tohukatohworr. Nom be Bro Nkifrarhu mrokfefm yakitoh kihhato nmoh yima yuhumio yindhorhato kangnom, “Bro Nkifrar ayak marnyarnom.” Inji dukarahnom be Bro Nkifrarhu yonnom rhurahnom.   
\s1 Hanyjbornet yimam nhai hifa rhu nmbuhat yakruhatm  
\p
\v 7 Nom Bro Nkifrarhu yon kunyet. Ndnettn rorhu Yafothat niahato inji kfiwut,   
\q1
\v 8 “Arihat mirahko nkifram hanyjbornamo kanjo  
\q2 inji ahanyjbornanomt nd Bro Nkifrarhu nia kfoyuk tngt.  
\q1 Nikmoh nkifram wesan tik furat yau soh hanymohat to inji namom.  
\q1 Hanyjbornahato memom, ‘Afo htirahnom Bro Nkifrar finji naruhar.’  
\q1 Tfit niko rom namo kanjo na duha.  
\q1 Bro Nkifrarhu Yafothat nia pthiwutn hanyjborna duha.   
\q1
\v 9 Na nikmoh nkiframpno foti gunyjimm rompno tohhato  
\q2 fak nuhasmouanm wonk wonk nefm.  
\q1 Nhai nd nefm htihato nanrpaya dukarmoam. Nhai.  
\q1 Na yakmoama mongko yiho htamouma.  
\q1 Mongko yiho htahato turoh duka fijo yimoum.   
\q1
\v 10 Ndnatn na namburhato kfo memoya,  
\q1 ‘Ndar yimam nhai na kfiwa yima yuhur yakkahmr. Nhai.  
\q1 Na kfiwa yuhat mong trohhato tfit turoh dukefmn kauwom.’   
\q1
\v 11 Nd nmbuhatn na namburhato kfo memoyanm,  
\q1 ‘Na tu be kfo mif mifwa, be nhai nanhu rhu wita tkitt nieruhatko.’” \rq Sng 95.7-11\rq*   
\p
\v 12 Yo niko mirahko nikmoh womr fasoh yima yuhu bebr ayakkahann yafothet Bro Nkifrar among trohanr.  
\v 13 Yihof href yihof href tuko nnakfo hi hanykfot nd mrokfot. Nna kfo nuhas hi hany duha rhurahko, be nda bbinysofthu nefmn rhu nhehakruhatmko, Bro Nkifrarhu mrokfom mong trohnirahkomm.  
\v 14 Bi Bro Nkifrarhu mrokfot rifakitoheknomt, to be nd mrokforpat yakitoh kih hanykfot. Yakitoh kihhany be noh nefrpatpno myafhothunikfot. Bro Nkifrarhu mrokfot inji yakitohrahkomt be Jisasrhu yon kunys rhurahko.  
\v 15 Kfo duka mrokfot duka hanykfot.  
\q1 “Arihat mirahko nkifram hanyjbornamo kanjo  
\q2 inji hanyjbornanomt Bro Nkifrarhu Yafothat nia kfoyuk tngt.” \rq Sng 95.7-8\rq*   
\p
\v 16 Fitoh yimamn Bro Nkifrarhu mrokfom hanyjbornamomm? To nd Mosesr Ijift yaknihato hanymo yimamn ndhtet neft namom. Romn Bro Nkifrarhu tngt hanyjbornamomt.  
\v 17 Yo frohmne foti gunyjimm nam-burmorm? To nd fasoh net yimam namburmorm. Namburhato yuhre yima toh duha tkitt tohetmn be inji noh witamom yukuteh yiram noh dborhewa kanjo. Rroh thatipm be nd wesan tik furatn mikfe bdgnimom.  
\v 18 Bro Nkifrar frohmn kfo memor, “Kfo mif mifwa be tu nhai mif nanhu rhu wita tkitt nieruhatm?” To nd yimam rorhu mrokfom hanyjbornamom, romn inji kfomor.  
\v 19 Tumn nhai Bro Nkifrarhu mrokfot yak hikrmomt. Ndnatn nhai yirmom Bro Nkifrarhu rhu wita tkitt.   
\c 4  
\s1 Bro Nkifrar hikwa yimam rhu wita nmbuhat yakrahm  
\p
\v 1 Bro Nkifrar bi kfomornom rorhu rhu wita nmbuhathu yakneft. Ndnettn nom duka yanohefr-pno rhukfot. Nom wofnkahnom rhu wita tkitt yihato nmoh womr Bro Nkifrar hti hambrakneft.  
\v 2 Nom Bro Nkifrarhu mrokfot wanymonomt bingot Isrerm wanymo kindo. Rom nd Isrerm Bro Nkifrarhu mrokfot wanymohat nhai wuthu kmbriyak-rmoamt. Be wanyhato nhai yak nhta inji narmoamt nd mrokfot. Yimam inji be wany marsisataneft Bro Nkifrarhu mrokfot ka hifa yima yuhum kekwom? Ka nhai. Bro Nkifrarhu mrokfot wuthu kmbriyakmt, awi nd mrokfot hifa rhu nmbuhat yakrfom.  
\v 3 Nom fitoh fitoh met yindarinom Bro Nkifrarhu mrokfeft wany yakiowanom, nd rhu wita nmbuhat bi Bro Nkifrar arihatn kahukrnom. Bingot Bro Nkifrar nd nmbuhat dukahato kfo memor,  
\q1 “Nd hanyjbornamo nmbuhatn na namburhato kfo memoyanm,  
\q1 ‘Na tu be kfo mif mifwa niko be nhai nanhu rhu wita nmbuhat yakruhatko.’” \rq Sng 95.11\rq*  
\p Bro Nkifrar kfomor rhu wita nmbuhathu hanyeft. Inji kfomohat nhai be marimor, “Romrpam hiruha nd rhu wita nmbuhat.” Nhai. Nom arihat tohwa yima buganom rpat dukahato inji kfomor. Bingot Bro Nkifrar bbinysoft hingrnamohat kfo memor, “Kto bbinysofthu met yindarim rhu wita nmbuhat hiruhanm.”  
\v 4 Bro Nkifrarhu rfa borngtn korht 7-yuk yiharhu mrokfot. Nd mrokfot inji kfiwut,  
\q1 “Bro Nkifrar mounti bbiny-softhu wuskam hingrna bugahato  
\q2 7-yuk yiharn hingrna tmbhomorn rhu witamor.” \rq Stt 2.2\rq*   
\p
\v 5 To tfit Bro Nkifrar kfo memor, “Nhai tfit womm na kfoyuk rhu wita tkitt nieruhatm.”  
\v 6 To rom tom wom yimam nd kfoyuk rhu wita tkitt yiruham. To nd bi barkof gutnius wanymo yimam nhai yirmomt nd Bro Nkifrar kfomo rhu wita tkitt. Turoh hanyjborna nmbuhatn nhai yirmomt nd tkitt.  
\v 7 Ndnettn nd yimaroh rhu wita tkitthu nia nmbuhat dukahato Bro Nkifrar tfit wom yihar tfit dukamor rroh niayukr. Ndnetrn Defitrn mthu nawohhato kfo memorr,  
\q1 “Arihat mirahko nkifram hanyjbornamo kanjo  
\q2 tfit inji ahanyjbornanom Bro Nkifrarhu Yafothat nia kfoyuk tngt.” \rq Sng 95.7-8\rq*  
\p To nd Defitr kfomo tngt htihato duka kangnom Bro Nkifrar yimaroh rhu nmbuhat dukahato nd yiha tfit yihotat fak nukamort.   
\p
\v 8 Nd Bro Nkifrar kfomo rhu wita tkitt bi Josuarpno ayakmt to nhai tfit Bro Nkifrar wom yiham Defitrpno kformor.  
\v 9 Nd mrokfom mhti dukahato duka kangnom Bro Nkifrar hikwa yimaroh rhu marnya yihar afo tor riyorhwor.  
\v 10 Bro Nkifrar hingrnahany hingrna hanyhato wuroh 7-yuk yihar rhu witamo kanjo inji rhu witarahm ror hikwa yimam.  
\v 11 Ndnettn nom ndar yiham nd rhu wita tkitthu yi dukefrn dukahato toh nnfakfot. Tamoh tamoh dukefm o nefm mong trohkfot. Isrerm namo kanjo nd dukefr myafhoni duha.   
\p
\v 12 Bro Nkifrarhu mrokfot tu yafothayet mrokfoyet. Nd mrokfothu nambur bim nhai yimam yak bsiskfot. Mrokfot yi shoft kfram kanjo yitatn thatipt tasu fnahnitatt tu yiro yima mrokfo yafotha rifhur yorhwa tkitt rim kwitt. Nd mrokfotn rim was-wattnom yimanmoh yima yuhum ee ndnatn hti nhta kangnom o nd neft fasoh nefet, nd neft dborioh nefet. Inji nd mrokfot htihato kak nhtewunomm nom niwa nefm.  
\v 13 Nhai wom tamoht tu Bro Nkifrarn yak htayukt tfit turpno kafrohkfot. Nhai. Tamoh tamohm be tafont yorhwatm htitworm. Tamoh tamoh nefenm nom niwam tu Bro Nkifrarparn yak nhtarahrm. Yak nhtahato nmoh tamoh nefm htihato finji kfoneft, nom finji tfit kfo wokruhanomr?   
\ms1 Jisasr yura hefenrn tohwor nfri hingrnefthu bro tohak pris yima kanjo.  
\mr (Sapta 4.14—10.39)  
\s1 Jisasr nmoh bro tohak priser  
\p
\v 14 Tor nmoh nyingako tohekwa bro prisr tu yura hefenr yihato Bro Nkifrarhu yorhwa tkitt yimor. Nd yimar Bro Nkifrarhu yon Jisaser. Ndnettn nmoh yima yuhum be rorparn htahato rorhu mrokfot yakitoh kihkfot.  
\v 15 Nom krhopam yekwa yakeft hti duka tungunewurt. Nom yekwa krhopam ror fakmoumr. Ror nd krhopam yakmoahat nhai wohsishato suhrmor. Nhai. Ror toh bmtamor.  
\v 16 Ndnettn nom to inji buga, yakrme duha Bro Nkifrarpno brbo yikfot. Ror yima yuhuwafeter. Nom rorpno brbo yinyeft be hti yuhuwafrahrnom. Tamoh krho nmbuham yakneft rorpno yakrmeni-hato be nd rorhu yuhuwafeftn thu kasirahtnom.   
\c 5  
\s1 Fitharhof yimar bro tohak pris hingrneft hingrnamoart?  
\p
\v 1 Bro tohak prisr hingrneft tohwa yimar ndar tu bbinysofthu yimarn Bro Nkifrar yekwarn nd hingrneft kak htewur. Rorn Bro Nkifrarpno brbo yitwarn yeshrim mhtahukrr, womm be tarioh skurn mthewurm. Yimam turoh yindhor nmbuhatn Bro Nkifrar tarioh mtha yibon thoft nhai tum yihato mtarioh mthakahmr. Nhai. Nd bro tohak prisrpno mhtiwatmm rorn Bro Nkifrarpno yihato mtarioh mthewurm. Womnam yimam fasoh nefm newohat nhaf inji buga. Rorpno yemrom mhtiwatmm tfit rorn nd yemrom yaknitwarm Bro Nkifrar mtarioh mthewatr, nd yimaroh fasoh nefm mong trohworm, nhai tfit yukatohekahrm nd fasoh nefm.  
\v 2 Ndar bbinysoft tohwa yimam Bro Nkifrar nhai hik tungunakahmr. Nhai. Womnam toh marnyewum. Womnam suhwom. Nd bro tohak pris hingrneft tohwa yimar to ndar bbinysofthu yimarn Bro Nkifrar kak htewur. Ndnetrn wom yimam Bro Nkifrar hik hanyhato msuhwohat nhai bmbri kfo nyingo fnahaknikahrm. Be hifa yima yuhurn kfo hta bohta marnyewurm.  
\v 3 Ror ndar bbinysoft tohyuk yimar nd hingrneft tohetrn, yimaroh fasoh nefm tarioh mthahukohat barkofpam afo turhu fasoh nefm dukahato tarioh mthefiwur, tur yak marnyani ee tfit mongkorn womroh fasoh nefm tarioh mthewur.   
\p
\v 4 Nhai wom yimar bro tohak prisrhu bro hingrneft be turhu fijo tohkahrt. Nhai. Bro Nkifrar Aronr bro tohak pris hingrneft yak htamo kanjo inji kak htewurm bro tohak pris hingrneft tohyuk yimam.   
\p
\v 5 Jisasr nd bro tohak pris kanjohot hingrneft yakmohat nd yuhatn hikmor. Nhaf nhai turhu fijo bro yufat yakneft yihato nd bro tohak pris hingrneft yakrmort. Nhai. Tu Bro Nkifrarn nd hingrneft fak htamorr. Kfo memorr,  
\q1 “Ni nanhu yone.  
\q1 Hrekrpa mifr na tukann yonr yekanrn  
\q2 yimaroh buha mhurn myak htatahato kfo famuyanm,  
\q1 ‘Ndar yonr bi nanhu yoner.  
\q1 Nanhu tamoh tamohm rorn yakitohnhorahra.’” \rq Sng 2.7\rq*   
\p
\v 6 Tfit wom yiha wom mrokfot kfo memorr,  
\q1 “Ni nd bro tohak pris hingrneft toh thombat  
\q2 be nd bro tohak pris hingrneftn toh nkifranirahn Melkisedekr kanjo.” \rq Sng 110.4\rq*   
\p
\v 7 Jisasr ndar bbinysoft tohmohat Bro Nkifrar kfo naku nurmohat nhai be tngrpatn ptha fura bofurarmorm mrokfom. Nhai. Tu yima rifhurpno masat masat kfo naku nurmorr. Memorr, “Bro Nkifraye, na yahr kmim nia wasaknaneft thu taburkrfona. To nhai. Nd nanhu noh nmbuhat bi tunn kfomo nanhu nohneft. Ndnatn nhai tfit kfo kurneft nanhu nohneft.” Be Jisasr inji kfo bruttnamotr ror nd krhopam yakmohat Bro Nkifrarn thu bmtamorr.  
\v 8 Jisasr Bro Nkifrarhu yoner. To nhai kfo marimor, “Na Bro Nkifrarhu yona, tamohmpno nd krho mis nann titarhoyant.” Ror nhai inji kformor. Nhai. Nd krho mis rorn titamort. Nd krho mis titahato kto tfit htimor Bro Nkifrar yihato thu bmtamorr.  
\v 9 Bro Nkifrar Jisasrpno kfo hta nuhasmo mrokfom Jisasr hik bugamormn wuroht mnohmor. Mnohhato be nd rorhu hingrneft ndha mhingrna tmbhomortne be. Ror yimorn Bro Nkifrarpno mrhumor. Yihotat rorn yak nukamotrt yimam Bro Nkifrar hikneft be rorpno mtoh nkifranirahm.  
\v 10 To be Jisasr Bro Nkifrarpno mrhumohat Melkisedekr hingrnamoa kanjo bro tohak pris hingrneft be rorn hemor.   
\s1 Mirahko yon mumenm kanjo awany mmonom  
\p
\v 11 Jisasr yihato nd Melkisedekr hingrnamo bro tohak pris hingrneft yakmo yuhat kanga akfo nuhasanko, to nhai. Htitwanko yuhre yon mumenm kanjo wany mumiwuko mrokfo psha yuharoh yakneft. Ndnatn to mrokfom pthaneft finji finji yakruhakomm mna mrokfom?  
\v 12 Niko nhai be ar nohof Bro Nkifrarhu mrokfot riwanyakhato rihikakrmokomt. Nhai. Niko bi bingot riwanyakhato rihika-kmokomt. Nikomn arihat wom yimam tfit kfo nuhas hi hanyrfokomm. To nhai, niko tfit muhra kmim kanjo wom yimamn niahato frhik bohik nuhaswomko Jisasrhu barkof rihikak-hato hik hanyneft. Yonenm kanjo yuhre mmemthu mingapam kawuko. Tafi tat yeshrim yekahko.  
\v 13 Yuhre mingapam yewakomn mumiwuko. Nhai hti dukahato mekahko ndart fasoh nefet. Ndartne Bro Nkifrarhu dborioh nefet. Nhai. Be yon mumenm kanjo nammo bomumiwuko.  
\v 14 Bro yimam tat yeshrim yewa kanjo Bro Nkifrarhu tamoh tamoh nefm hti duka tungunanomm. Bro yimam rom bi tamoh tamoh nefm bi mhti fnahetmn tamoh tamoh nefm hti nhtewumm. Fasoh nefm htineft kangm ndt fasoh nefet. Dborioh nefm kangm ndm dborioh nefem.   
\c 6  
\s1 Niko toh bmtaruhakomn Bro Nkifrar tawo yak marnyarahrko  
\p
\v 1 Jisasrhu mrokfom pthaneft mirahko yon mumenm ptha mumiwa kanjo be rpa mrokforpat waptha thu waptha thu hasonom. Inji narahko to be yimam kuny rahurpam tuhato rahurpam tohnita kanjo inji narahko. Tu kuny hingrnaneft rahum tunihato kunyr kasinyahato kuny nyisofr hingrna hanyhato hingrna pskitwor. Nom inji nakfot. Nhai kuny rahum wakasinya thu wakasinya thuwa kanjo kasinya thu hatohkfot. Ndar mrokfomwe inji korhwom yimam rahurpam wakasinya thu hatohwa kanjo. Mirahko nd nom yak bebwa fasoh nefroh mong troh yuhathu mrokfom yo Jisasrhu mrokforoh wany yakio yuhathu mrokfom  
\v 2 yo baftais-hato tir hta yuhathu mrokfom yo nohhato sinya yuhathu mrokfom yo nd wuroh bro kotkfothu mrokforpam waptha thu waptha thu hasonom.  
\v 3 Wom nfri nfri mrokfom yakhato ndmn rim pthata mpthata hanykfot. Nd bi barkof yimaroh riwanyuk mro-kforoh pthaneft rot nhai mrokfom. Bro Nkifrar kangr tfit, “Wom nfri nfri mrokfom ahiyanko. Hehato ayak hta bohtayanko nd nfri mrokfothu pthaneft.”   
\p
\v 4-6 Niko bi Jisasr nohhato fakmorko. Yakhato Bro Nkifrar fak marnya bomarnyamorko. Bro Nkifrarhu Yafothat bi yimako thu nawoh nhombramottko Bro Nkifrarhu mrokfot niko wanymohat nhai kfo marimoko, “Yuwi furent.” Nhai. Niko wanymohat kfo memoko, “Tu fipet mrokfoyet.” Bro Nkifrarhu bbukapam bi htimo-komm. Kto Jisasrhu yawihna yihar tfit nd rorhu bbukeft htirahkomt. Nd nd nefm niko bi hti hnamokomm. Tfit nikmoh womr kfo smina tanyhato mong trohrahrm, nd yimarhu Bro Nkifrarpno yiyuk yihotat rinnfakraht. Nd yimar inji naneft Jisasr bgre mis kisinyamo yimaroh dukefm kangr ayaka. Jisasr kisinyamo yimam inji namom. Tafontn kisinyamotmr yimam yihom kuninfarni mkuninfarnamoumr. Nd yimam namo yuhatn kangr inji anaya.   
\p
\v 7 Tamohmpno nd yimar Bro Nkifrarhu nayuk nefm kfo smina tanyhato nndo frfnahniyuk yimar nhai tfit nieruhatr brbo Bro Nkifrarpno? Afo wom mrokfot akfokahtant afo wawanyswako. Ndar bbinysoft buriohr wih frifrewatrt yewurit nuhta neft sinya marnyewut. Yimam htihato kfo kangm, “Bro Nkifrar thu warhiwatrm sinyewum.”  
\v 8 Yo mim gondhatahato yapkott sinyewut kangnom, “Nd bbinysoft bi fasohet.” Inji htihato nhai mswir htakaht nd tkitt. Be hta wus furefiwut.   
\p
\v 9 Nd mrokfot be tu bro krho mrokfot fahuyanko. To mirahko ka nd mrokfot kfiwa yuhat kanjo ka be mibatinirah-nom. Awi nhai. Bro Nkifrar tor. Rorn tfit toh raforahrko.  
\v 10 Niko Bro Nkifrar hik htfaswa yimam hti yuhuwafhato hifa kak marnya hnewukomm. Nd dborioh nefm niko na hnewam Bro Nkifrar nhai duka mmoruhatrm. Bro Nkifrar nhai wom yimam kanjo duka mmokahrm. Rorhu hik htfasyuk yimam kak marnyewukomm tawo yak marnyarahrko. Nd niko hikwa yimam yak marnyewa nmbuhat Bro Nkifrar htitwartn hti yindhorworko.  
\v 11 Nd dukeft wayakitohkahkomn nd niko newa nefm wana yakitoh hanys-wakomm. Inji na hany inji na hanyrahko nd Bro Nkifrar kfo memohat Jisasr nikmoh bro tohak prisr rhurahr, to mirahko ka yuwi furewur. Nhai. Kfo mifmor, arihat bi nikmoh bro tohak prisr tohwor.  
\v 12 Nd dukeftpno yima yuhum atohetohtwamko. Mirahko ahhrekkahnomn kaht kanjo nd dborioh nefm aminoh hmbrenim. Bro Nkifrar hik hnamo nkifram kanjo toh bmtakfot. Rom to inji namom. Bro Nkifrar kfomorm dborioh rhu nmbuhathu hanyeft. Be nd ror kfoyuk mrokfot nhai mongko htarmomt. Nhai. Be nd dukefrparpno toh hany toh hanymomn kto htimom nd Bro Nkifrar kfomo mrokfot nhai kfo furarmorm. Tu fipet mrokfot kfomor.   
\s1 Bro Nkifrar bi finji kfir to be tur kfoyuk tng yuhatn hikwor  
\p
\v 13-14 Dukakfot Abrahamrhu tndht. Bro Nkifrar kfo memorr, “Kfo mifwann, nini ninhu frikeft be yak marnya-ruhanko. Yak marnyarhotanko ninhu frikeft rifinysaraht.” Bro Nkifrar dukeft duka memor, “Abrahamr mirahr ka kfo furewura.” Inji dukahato kfo memorr, “Mirahna ka be kfo furewura. Nd na kfo yamuhat nini ninhu frikeft yak marnyarhotanko nd ninhu frikeft rifinysaraht, nd mrokfot kfo mif mifann yak marnya mifruhanko. Kangn na ka yima furaya. Nhai. Na Bro Nkifraya. Na kfiwa tngt kto htirahnt fipet rhuraht.”  
\v 15 Abrahamr nd Bro Nkifrar kfoyuk tngt wanyhato nhai marimor, “Duka mmoruhant.” Nhai. Be yima yuhurn rhumout nd Bro Nkifrar kfoyuk tngt. Memor, “Afo hti hanyruha nd kfoyuk mrokfot fipett rhurahte. Nhai.” Abrahamr duka haso ee kto htimor nd Bro Nkifrar kfoyuk mrokfot fipett rhumot.   
\p
\v 16 Yimam nakfo hanyjborna thoft to inji newum. Womr sinyahato womr kfo famurr, “Nd yiha nd shrt hiruhann.” Tfit womr kfo famur, “Na miruha kfo mifwona. Yuwi furarahna.” Inji kfitr womr kfo famurr, “Bare! Na yon mumena kfiwann? Na nhai kfo furakaha. Na kfo furaneft Bro Nkifrar yak tutfarahra.” Be bi inji kfiwure, be womr kangr, “Awi kfo mifwora.”  
\v 17 Bro Nkifrar bi kfir tamohroh naneft nhai tfit kto kfo kekutkahr. Nhai. Bi kfir tamohroh naneft to be tur kfoyuk tng yuhat kak hikwor. Abrahamr kfo memohat Abraham frikeft yak marnyaruhanm, nom to nd frikeft, nmoh dukefm duka kangm yak marnya twanhorahrnom.  
\v 18 Mrokfotn rpat napthahato yak tkafneft ndt htitwonom Bro Nkifrar yimampno bi fak tkafrt wom mrokfot nhai tfit mtoh kekuthato kfo mikahr, “Nhai inji narhota.” Nhai. Bi finji kfir to be tur kfoyuk tng yuhatn hikwor. Nd rorhu nefm htitwanomn nmoh yima yuhum bmtewumnom. Ndnettn nmoh fasoh nefm thu dbruf thumonommn Bro Nkifrar kakitoh kihwonom. Ndnettn nmoh dukefm nhai wom krhokahnom. Duka kangnom nmoh rhu nmbuham be Bro Nkifrar yak marnyarahrm.  
\v 19 Nd dukeft yorhwattnom nmoh yima yuhum be nd Bro Nkifrar kfoyuk yima yuhurn yak dbkaf kihhato be nd dukefrparpno korhnom. Nhai tfit wom dukefm rhukahmnom. Be nd dukefrn nmoh yima yuhum thu bmtewatrnom Bro Nkifrarhu mrokfot kakitoh kihwonomt.  
\v 20 Jisasr bi nyinga yuhatn bi tohak hanymorn Bro Nkifrarpno yiyuk yihotohat fak nukak hanymort. Bro tohak prisr Bro Nkifrar rhumoa rumt yimoa kanjo inji yimor hefenr. Rorn nd bro tohak pris hingrneft be toh nkifranirahrt Melkisedekr kanjo.   
\c 7  
\s1 Melkisedekr tu bro yufet yimayer  
\p
\v 1 Nd Melkisedekrhu hingrna toh nmbuhat kfo nuhasruhanko. Nd Melkisedekr Salemt tohmour. Rorhu hingrnefm hus hingrneff kakitohmour, king hingrnefti yo yura myorhekwa Bro Nkifrarhu pris hingrneft. Nd hus hingrneff kakitohmour nd bro kmi Salemt tohmoahat. Wom yiha Abrahamrhu wom yinem Lotr yahr kmim yaknimotmr nmbritom Abrahamr mongko tone hikhato memor, “Ayihom nrfa kitohanr.” Yimorn yihom nrfa htiyakhato memor tfit kmiko aiya, buha yihotatn Melkisedekrpno mnafurmof. Mnafurhato Melkisedekr sinyahato Abrahamr yak wus hanyhato kfo memor, “O Bro Nkifraye, Abrahamr wayak marnya bomarnyakahtnr atoh marnyatwar.”  
\v 2 Inji kfonimorr be wom Abrahamr yahrt yihato yakmo wuskam tirhus rmonm htamorm. Wom rmonett yakmortn Melkisedekr hemor. Nd Melkisedekr yufathu yimbu yuhat, “dborioh nefm nayet kingr.” Ror kingmo kmithu yufat, “Salemt.” Salem yufathu yimbu yuhat, “hifa nayak marnyet kmit.” Ror king tohmohat nd kmi Salem thofm kfomoatrm nafak marnyamoum.  
\v 3 Nd Melkisedekrhu toh yuhat nhai Bro Nkifrarhu rfa borngt kfo mekaht, “Yifammetr o nkifretr rhumor.” O nhai kfo mekaht, “Nd yiha mmemt hiyaumotrn nd yiha nohmor.” O rfa borngt nhai kfo mekaht, “Pris hingrneft tohmohat nd yiha hingrna tmbhomor.” Nhai nd kfo nuhas mrokfom rhukahm. Nd mrokfom htitihato duka kangnom, “Ka Bro Nkifrarhu yonr kanjo tohmor nd Melkisedekr.”   
\p
\v 4 Melkisedekr yakitohmo yuhat wadukako. Abrahamr ar Bro Nkifrar hikmoa yimanmoh nkifra nngrajohr. Abrahamr tohhato Melkisedekr htimohat Abrahamrhu dukeft duka memor, “Na nhai ndar yimarhu toheft kanjo tohkaha. Nhai. Ror tu bro yufet yimayer. Ror Bro Nkifrarhu pris hingrneft kakitohwor.” Ndnatn nd ror yihato yakmo wuskam tirhus rmonetm htahato wom rmonett Melkisedekr hemor.  
\v 5 Lifai frikefthu womm pris hingrneft kakitohwomt. Rroh thfa mntwat kfiwut, “Isrerm yakitohyuk tamoh tamoh wuskam o tamohm tirhus rmonm htahato Bro Nkifrarhu yufathu hayuk wom rmonett prism hekfot.” Nd prismi Isrerm nhai nndo nndo rroh toh nmbuhat. Rroh nkifrar rpa Abrahamrpar. Nd rpa nkifrarhu yon kunyshu tamoh tamoh wuskam tirhus rmonm htahato wom rmonett prism kahukwom. Nhai be sfno inji hekahm. Nhai. Rroh dukefm duka kangm, “Prism Bro Nkifrarhu hingrniwa yimayem.”  
\v 6 Nd yima Melkisedekr nhai Lifai frika yuhat niarmor. Ror nndo wom yima furarn nd Abrahamr htamo tirhus rmonroh wom rmonett Abrahamr yakhato hemorr. Bingot Bro Nkifrar Abrahamrpar kfo memorr, “Abrahame, ni yak marnyarhotann wom yimam ndt htiruhamn kfo mirahma, ‘Bro Nkifraye, Abrahamr yak marnyewa kanjo nom inji wayak marnyannom.’” Abrahamrpar inji kfomorr. Nhai Melkisedekr inji kformorr. Nhai. To nhai, Melkisedekrn tohhato tfit Bro Nkifrar kfo memorr, “Bro Nkifraye, Abrahamr wayak marnyatwanr.”  
\v 7 To wom mrokfot wawanykomt. Womr sinyahato Bro Nkifrar kfo naku kangr, “Bro Nkifraye ndar yimar wayak marnyanr,” nd Bro Nkifrar nakuyuk yimar bro yufetrn Bro Nkifrar nakutrr wom yimarhu yak marnyaneft. Ndnettn duka kangnom, “Melkisedekr tu bro yufet yimarn Bro Nkifrar nakumorr Abrahamrhu yak marnyaneft.” Ndt inji korht.   
\p
\v 8 Tfit wom yuhat inji. Lifai frika yuhathu yimam pris tohhato Isrer thofroh tamoh tamoh tirhus rmonm yak htatahato wom rmonett yekwa prism nhai toh yifahtakahm. Nhai. Noh frekiwum.  
\v 9 To Melkisedekr Lifai kanjo pris hingrneft hingrnamohat nhai Lifaim noh frekomo kanjo nohrmor o hingrna hanyhato mhingrna tmbho-rmor. Nhai. Bro Nkifrarhu rfa borngt nhai htikahnom kfo mekaht, “Melkisedekr fnohr o hingrna tmbhir.” Nhai. Ndt htitihato duka kangnom, “Nd ror yakitohmo hingrneft yuhre kakitoh hanitrt.”  
\v 10 Abrahamr ror Lifairoh nkifrar. Ndnettn duka kangnom, Abrahamr yakmo wuskam yak nhtahato wom rmonett Melkisedekr hemohat nhai be sfno inji narmor. Melkisedekrhu yinhitn Abrahamr tohmor. Ndnetrn wom wuskam yak nhtahato hemorr. Lifai frikefthu nkifrayer Abrahamr. Melkisedekr bromohat Abrahamr to tfit rorhu mongko tohyuk Lifai frikeft to be nhai womm brokfot, Melkise-dekrpar bromorm.   
\s1 Ariharhof Jisasr nfri bro tohak prisrhu hingrneftn tu tpiyet hingrneft hingrnewur  
\p
\v 11 Bingot Bro Nkifrar Mosesrpno niahato tarioh skurn mtha yuhathu hingrneft boririfhu nuhasmorr. Tfit Mosesrn Isrerm kfo nuhas memorm, “Bro Nkifrarhu tarioh skurn mthanefthu hingrneft inji korht.” Nd hingrneft Aronrhu frikeftn nd hingrnefthu hingrna yuhat romn yakitohhato kfo hta bohtamoumm Isrerm. Aronr Lifai frikeft niamor. To nd tarioh mtha yuhathu hingrneft rom hingrnamoat nhai tu tpiyet hingrneft hingrnarmoam. Nhai. Yimaroh fasoh nefm nhai yak thu marnyarmoatm. Be kak wunatamoutm yimaroh fasoh nefm. Yimam mi yohwa kanjo be inji yura foh wokmoumt. Nhai tu yimbonett tou yifkasakrmoamt.  
\v 12 Ndnetrn Bro Nkifrar duka memor, “Tfit Melkisedek kanjohot wom nfri prisr yak htaruha. Rorn yimaroh fasoh nefm tou yifkasak marnyarahrm. Nd yatk hingrneft yak tuhaforuhart tfit rorhu nfri hingrnef yuhatn yimam hikrahm.”  
\v 13 Nd Bro Nkifrar yak htamo nfri prisr nndo wom tangishof furar nd pris hingrneft fak htamor. Rorhu frikeft nhai womr pris hingrneft tohhato yimaroh yak tarioh mthayuk yeshrim tarioh mtha wonakrmor. Nhai.  
\v 14 Nmoh Brorhu trha yuhat bi wany bugamokomt. Rorhu trha yuhat nhai nd Lifai frikef yuhat niarmor. Nhai. Ror nndo Juda frikef yuhat niamor. Bingot Mosesr nd pris hingrneft Lifai frikeftn yak htamohat nhai tfit marimor, “Judam yakitohnhotwamm nd pris hingrneft,” tu be nhai. Lifai frikefrpat kfomor nd hingrnefthu yakitohneft.   
\p
\v 15 Bro Nkifrar tfit prisroh yak htayuk wom nfri yuhat hingrnamor. Melkisedekr kanjo tohhato hingrnayuk prisr tfit fak htamor. Rorn tu tpiyet hingrneft hingrnamor.  
\v 16 Lifai frikefthu yimam nd pris hingrneft yakitoh hawihnamohat nhai be sfno nd hingrneft yakitohrmomt. Bi nd tangimn nd hingrneft rifakitohakmomt. Thfa mntwat bi romn kfomot nd hingrnefthu yakitohneft. Ndnettn nd pris hingrneft romrpam fakitoh hawihnamomt. Tfit Jisas Kraisr nd hingrneft myakakni-mohat nhai be Lifai tangishofrn nd hingrneft ror myakaknirmort. Nhai. Ror wom tangishofr. Ror nd hingrneft yakmo nmbuhat nhai be sfno, rorhu toh nmbuhat ror nhai nohkfot. Toh yifahtarahr. Yo nhaft rorn yimaroh fasoh nefm yak thu marnyarahrm. Nhai be yak wuna hasoruhatrm. Ndnetrn rorn nd hingrneft fakmort.  
\v 17 Yakhato rorn yimam brbo Bro Nkifrarpno hany hakurahrm. Nhai be sfno inji kfokahnom. Nhai. Bi Bro Nkifrarhu rfa borngtn Bro Nkifrar kfo memorr,  
\q1 “Ni nd bro tohak pris hingrneft toh thombat  
\q2 be nd bro tohak pris hingrneftn toh nkifrarahn Melkisedekr kanjo.” \rq Sng 110.4\rq*   
\p
\v 18-19 Tamohmpno nfri pris yakmonom? Ndt nhai be sfno. Wawanyko. Barkof prisroh hingrneft Bro Nkifrar Mosesrpno kfo nuhashato Lifai frikeft yakitohmot, nhai tu fipet hingrneft hingrnarmoam. Yimam fasoh nefm nahato Bro Nkifrar tarioh mthamoahat nhai yak thu hermoarm. Nhai. Be kak wunatamourm. Ndnettn Bro Nkifrar tfit wom nfri yuhat fak nuhasmornom. Nd nfri yuhat yirahnom, be Bro Nkifrarpno brbo yirahnom. Ndnettn Jisasrn tohhato nd nfri yihotohathu riwita yuhat kak nuhasaf hanitrnom.   
\p
\v 20-21 Bro Nkifrar pris hingrneft Jisasrpno yak htamohat bro mrokfot kfo memorr,  
\q1 “Na kfo mif mifwann, ni nd pris hingrneft yak thoft  
\q2 be ninn toh nkifranirahnt.  
\q1 Na bi kfiwohat nhai tfit kfo kekutrhota.” \rq Sng 110.4\rq*  
\p Ndhtet tngt Bro Nkifrar Jisasrpno kfomot nhai ndhtet kfo nnhu mrokfot wom prisrpno kformor. Nhai. Jisasrparn nd tngt kfomort.  
\v 22 Nd nfri yihotat Jisasr hta tehakmot, tot tu dborioh yihotat. Bro Nkifrar kfo hnamo yihotat Jisasrn hta tehakmornom.   
\p
\v 23 Bingot tohmo prism bokm tohmomt nd hingrneft. Womr tohhany toh hanymoarn bi fnohnir tfit wom nfri yimar kakmourt tkitt. Ror tohhany toh hany bi fnohnir yo tfit wom nfri yimar kakmourt tkitt. Be inji nahnatn bokm toh hnamomt nd hingrneft.  
\v 24 Tfit Jisasr nd tkitt yakmohat nhai wom yimar myak tuhafhato rorhu tkitt myakruhatrt. Tu be nhai mif. Be rorrpar tohwohat rorrpar toh nkifra-nirahr.  
\v 25 Bro Nkifrarpno brbo tohwor. Bro Nkifrarpno brbo tohwarn yimam Bro Nkifrarpno yinyeft Jisasrpno fasoh nefm wuska yohm rimak yifhonita kanjo inji rimak yifhonitwatmm tfit Jisasrn Bro Nkifrarpno yihato kfo dbruf nuhaswatrr yimam Bro Nkifrarpno brbo kitwom.   
\p
\v 26 Yima Jisasr nmoh bro tohak pris tohneft hifa. Rorn nmoh tamoh nefm yak htarahrm. Rorhu toh nmbuham tu dborioh mifm, tu Bro Nkifrarhu toheft toh hikwor. Nhai ror wom fasoh nmbuham. Rorhu rhu toh nmbuham tu hifa tohefm tohwor, nhai wom fasoh nefm. Ndar bbinysoft ror tohhato nd Bro Nkifrarhu thfa mntwathu mrokfom hanyjbornayet yimampno tohmohat, nhai ror marimor, “Rroh yuhat mitohniruha,” nhai. Ror nndo ror turpar. Rorhu nefm ror turpar. Nd fasoh nefm nayetm rom tum inji. Ndnetrn Bro Nkifrar tu yura hefenr fak htamorr. Tu yura myorhekwa tkitt fak htamorr, tu Bro Nkifrar yorhwa tkittn.  
\v 27 Prisroh hingrnefti rorhu hingrneft nndo nndo. Nhai rpahtett. Prism tarioh mthewohat yiha yiha nd hingrneft hingrnewumt. Nd hingrneft nhai yihom tohaf hanykaht. Nhai. Barkofm afo turoh nefm Bro Nkifrar tarioh mthanitamr rroh fasoh nefm mong trohworm. Turohm inji nanihato ee womroh tarioh mthewatmr mong trohahukrm. Ndhtet ndhtet bok hingrnefm hingrnewum. To Jisasr nhai inji wahingrna thu wahingrna thu hatohrmor. Nhai. Rorpar rpa nohrpat nohmohat to be yima bugaroh fasoh nefm rorpar noh wikna buga-morm. Nhai yimam tfit Bro Nkifrarhu tarioh mthayuk yemrom hatone hatohkfot. Rorpar bi nd hingrneft hingrna buga hemornom.  
\v 28 Tfit nd prisroh mrokfot akfoya. Pris hingrneft tohwa yimam Mosesrhu boririfhut hikhato nd tu bbinysoft tohyuk yima frikeftn nd pris hingrneft kak htewum. Ndnettn nd yimam pris hingrneft yakitohneft kangm, “Bro Nkifrar ahiknom,” to nhai, womnam myak nhiyekwom hikneft. Bro Nkifrar turhu yinemr kfo memorr, “Na kfo mifwann, ninn tfit nd tu nyingako mtohekwa prisroh hingrneft yakitohrahnt. Ni nd hingrneft yakni thoft nhai tfit womr yakruhatrt ninhu tkitt. Tu be nhai mif. Na bi inji kfiwohat nhai tfit buha kfo kekutrhota.” Bro Nkifrar htimorr Jisasr tu Bro Nkifrarhu dukeft kak hikmour. Nhai wom fasoh nefm narmoar. Ndnetrn Bro Nkifrar nd mrokfot kfomorr.   
\c 8  
\s1 Jisasr hefenrhu bro tohak priser  
\p
\v 1 Nd Bro Nkifrar htamo nfri prisrhu hingrnefthu hingrneft kanga afrhikkahtant wawanyswakomt. Nd prisrhu hingrneft na kfo hnamot tu kfo mif kfoyet. Jisasr bi tu yura myorhekwa Nkifrarpnonko bro mtohakm yekwa gajis, ror bi nd gajis yakhato korhwor.  
\v 2 Bi yura hefenrn Bro Nkifrarhu rmontn pris hingrneft hingrnewur. Ndt tu Bro Nkifrarhu kunyet nhai yima mifmn kasinyarmomt. Tu Brornko kasinyamort.   
\p
\v 3 Nd asha bbinysoft tohwa rmonthu hingrnayuk bro tohak prism rom nhai rhu furakahm. Rom yeshrim yakhato Bro Nkifrarko tarioh mthewumr. Ndnettn nd ror yakitohwa rmontko nhai be sfno rhu furakfot. Nd rmonr yemror kur mthakfot. Nd rmont kur mthamo yemror nhai wom tamoh yemror yakhato kur mtharmotr yimaroh fasoh nefm mong trohrmorm. Nhai. Jisasrhu kkutn yohnemot. Nd kkut yohnemott Bro Nkifrar htimort.  
\v 4 Nd prism hingrnamoa yemro tarioh mthaneft, nkifra tarioh mtha yuhat afo hikmoum. Jisasr yura hefenrn tohetrn nhai nd Bro Nkifrar htamo prisroh hingrneft hikrmor. Ror tur tohwa kmi hefenrhu nfri hingrneft hikmor.  
\v 5 Rom nd prism hingrnamoa hingrneft, ndar tuha bbinysofthu rmonthu hingrneft hingrnamoum. Nd rom hingrnamoa hingrneft yura hefenr tohyuk rmonthu toh ruhefti hingrneft hingrna nhombramoum. Bingot Mosesri Bro Nkifrar ndar bbinysofthu rmonthu kasinya yuham, rmonthu yuke rifm, bro rifm nnakfo nuhasmohat kfo memorr, “You! Mirahn tunhu duka fijo ahingrnayant. Yura kmi Sainait kfo nuhasmo yuharpat wahingrna hiktwa.” Tu yura hefenrhu rmonthu ruhefthu hingrna yuhat kfo nuhas bonuhasmorr hingrna hikneft.  
\v 6 Prism hingrnamoa hingrneft, rom be nndo bbinysoft tohwa rmonthu hingrnef yuhat hingrna hikmoum. Jisasr ror tu hefenko yiyuk yihotathu pris hingrneft hingrnamor. Rorn tu yafothet hingrneft hingrnamor. Bingotrhof prism hingrnamoa hingrneft nhai yimaroh fasoh nefm yak thurmoamm. Nhai. Prism tarioh mthamoahat Bro Nkifrar nd tarioh skurn gbefr mthatihato nd yimaroh fasoh nefm be kak wunafmourm. Bro Nkifrar bro mrokfot kfo memor, “Nhai mrokfom. Nikmoh fasoh nefm yak thuhirhoyanko, tu dborioh yimakomn nanpno brbo nierahko.”   
\s1 Jisasr htamo nfri yihotathu hingrnef yuhatn tu dboriohet  
\p
\v 7 Nd yatk tarioh mtha yuhat yimam tarioh mthahato fasoh nefm yak wunamoahat Bro Nkifrar nhai kfo marimor, “Tarioh mthakahtko fasoh nefm yak thu hiruhanko,” nhai. Ror be kfo memor, “Fasoh nefroh yak thuyuk nfri yuhat yak hambrak hiruhanko.”  
\v 8 Nkifram yemroye tarioh mthamohat Bro Nkifrar nhai hti yindhorrmort. Yimam tarioh mthamoahat nhai Bro Nkifrarpno brbo yirmoam. Ndnettn Bro Nkifrar htihato kfo memor,  
\q1 “Na Bro Nkifraya kfiwa, afo wawanyko.  
\q1 Wom yihar wom nfri yihotar tfit htakruha.  
\q1 Nd yihotar na tukanpno wukio-ruharn  
\q2 Tfit mano Isrert rhuyuk kmifpno wakiorahr.  
\q1 Mano Isrerm tohwamn yo mano Judam,  
\q2 nd Isrerroh hus kmifpno wakiorahr.   
\q1
\v 9 Nd nfri yihotar nhai ndwom yatk yihotar kanjo rhuruhatr.  
\q1 Nd yatk yihotarn Isrerm Ijift tohhato na yaknamohat  
\q2 Isrerm nhai na kfoyuk tng yuhat yak hikrmom.  
\q1 Nd rroh nefm htihato mong trohmoyanm.   
\q1
\v 10 Tfit kto Isrermpno kndhakruha nfri yihotarhu hingrneft tfit nndo rhuraht.  
\q1 Nanhu boririfhut yimaroh yima yuhumn rhuraht.  
\q1 Yimaroh yima yuhum rhuruhatt  
\q2 nd boririfhutn yak hta bohtarahtm na Bro Nkifraya hikneft.  
\q1 Nhai wom tahi furam o wom tahi nasungwarm kfo tatoruhatm.  
\q1 Nanpraya rroh Nkifraya rhuruha.  
\q1 Tukann hti yukatoh hasoruhanm nd nanhu yon kunyshu tamoh tamoh nefm.   
\q1
\v 11 Rom toh thoft nhai tfit womr sinyahato  
\q2 turhu kmi thofm o turhu tangiyemrom kfo ttiwon miruhatrm,  
\q1 ‘Bro Nkifrar nikmoh tamo-hemer?’  
\q1 Nhai womr sinyahato tfit womr inji kfo ttiwonruhatrr. Nhai.  
\q1 Yufet yimami yufa duha yimam rom tum hti mirahm,  
\q1 ‘Bro Nkifrar nmoh Nkifrayer.’ Nhai womm hti mmo-ruhatma.   
\q1
\v 12 Rom wommpno nayuk tamoh tamoh nefm  
\q2 nann yuhuwafhato yak thuhi-ruhanm.  
\q2 Rom nayuk fasoh nefm nhai tfit dukarhotanm.” \rq Jeremaia 31.31-34\rq*   
\p
\v 13 Nd Bro Nkifrar kfomo wom nfri yihotarhu htaneft, ndt duka hanykfot. Bi nd nkifram hik hnamo yatk yihotar be yau trohaf bugarahnomr. Bufutn rinatuhakrahtr. Nhai tfit wom yihota yimbuyefett rhuruhatt.   
\c 9  
\s1 Bro tohak prism yemro kkut yaknihato Bro Nkifrar mhtahemoa yuhat  
\p
\v 1 Bingot nmoh nkifram afo yatk yihotar hikhato Bro Nkifrar rhu rifinyhato kfo tato inji namoahat nhai be busafon furatn rhu rifinyhato kfo tato inji narmoam, nhai. Tu kfo hta yuhamn kak hikmoamn ser thaye hingrna nhombret rmontn rhu rifiny-hato kfo tatomoumr Bro Nkifrar. Rmont hingrnamohat inji hingrnamoumt.  
\v 2 Rmont kasinyamoa tkitt gna habri htfasmoumt. Gna habrinihato sertha rmonr kasinyamoumr. Kasinyahato gnanhehm gnamoumm. Biko mruhak-moa gnanhehr futamoumr Hnaru Gnar, tfit tu wuroh gurko yiho rhumoa tpurhe kutamoumr tu Nngrajoh Hnaru Gnamifr. Nd barkof mruhakyuk Hnaru Gnanhehrn htamoumm kah hta funamoa lam tndatikt, yo Bro Nkifrar bretpa mhtahemoa tik mkut.  
\v 3 Tfit ndwom tu wuroh gurko yiho rhumoa gnanhehrn tor tu Bro Nkifrar rhumoa tu Nngrajoh Hnaru Gnamif mifr.  
\v 4 Nd barkof biko mruhakyuk Hnaru Gnanhehrn hifa mthet mifipam tariohmoa teborent htamoumt. Hemkuye hingrnamomtn tfit briahakorn gore tarioh trku hmbriyafmomt. Tu Nngrajoh Hnaru Gnanhehmifrn Bokis Kontrakt tohmout. Rot nhaf gore tarioh trku hmbre bugamomt. Yiro nd Bokis Kontrakkfotn rhumoum gore hingrnet mana roht, yo Aronr yaki-tohmo miswa fnahet kio muss, yo tahi mkuf, boririfhum htamo tahi mkuf. Nd nd shrm rhumomt nd Bokis Kontrakt.  
\v 5 Nd Bokis Kontrakthu mnbifatn hus mounmotf Bro Nkifrarpno tohwaf hingrna nhombrakmomfn tnamomf mano mano. Rofhu birnam thu sfondwamomfn toh wasi hmbrimoft tu Bro Nkifrarhu Yafothat o marbir rhumoa tkitt. Nd tkitt futamoumt “Fasoh Nefm Mthu Dbrufyuk Tkitt.” Nd tkitt yemro kkut mthu nembongit-moatmt Bro Nkifrar ndm htihato tfit yuhuwafeft niamoattr yimaroh fasoh fasoh nefenm kak wunafhemourm. Nhai rim kfo hikak bugarhotanm tamoh tamoh mrokfom. Be inji kfonitanm.   
\p
\v 6 Nd yiro rmonthu rawoft to be inji hingrna hta bohtamomt. Inji hingrna hta bohtanihato yo prisroh hingrneft rihingrnakmomt. Yiha yiha nd barkof biko mruhakyuk rumr prism rim fnahni mfnahnamoumr. Yimam Bro Nkifrar naku kfo inji narahnom o tarioh mtha inji narahnom, romn rim hafkneni tfit yarim htafo inji namoumm. Romn nd hingrneft hemorm.  
\v 7 Tu bro tohak prisrpar rim fnah-nimourt tu Nngrajoh Hnaru Gnanheht, tu Bro Nkifrar rhumoa tkitt. Nhai be yiha yiha yirmoart. Nhai. Rpa gunyjimr rpa yiharpar fknenimour. Tfit wom gunyjimr nhaf inji be rpa yiharpar. Nd gnanhehr yihom fknenimoahat nhai be sfno fkne furanirmoar. Nhai. Yemro kkut yaknihato ndm afo Bro Nkifrarpno yihom htamoatrm tu bro tohak prisrhu toh rawofm Bro Nkifrar frwus bowusmourr. Frwusnimoarr ee kto wom yemro kkut htamoatrt met yindarim duka mmonihato namoa fasoh nefm Bro Nkifrar hta wunaf hemourm.  
\v 8 Nd Nngrajoh Hnaru Gnanhehr yima furam yi duha yinyeft rhumoahat nhai be sfno. Bro Nkifrarhu Yafothat tafi yibonrmot yima furam Bro Nkifrarpno brbo yinyeft.  
\v 9 Bro Nkifrar rhumoa tkitt hta rafomoa yuhathu yimbu yuhat inji korht. Yimam yewurit yaknihato Bro Nkifrar womm mhtahehato yo womm tarioh mthamoahat, nhai yak thu hermoarm rroh fasoh nefm. Nhai. Nd tarioh mthamoa skurn gbefr mthatihato be kak wunafhemourm rroh fasoh nefm. Ndnetmn rroh yima yuhum mduka kurhakmoum Bro Nkifrarpno brbo yinyeft.  
\v 10 Yimam brbo Bro Nkifrar yimoahat rorhu boririfhu mrokfomn hikmoum. Boririfhut hikmoa yimam inji namoum. Yemrom yakhato tarioh mthamoumr. Fitoh yeshrim nhai wofnkahr yimaroh yaneft ndm nhai yarmoamm, bupam nhaf inji, yo tamoh nefm namoahat yuk fnah inji namoum. Nd nefm be boririfhu yuhatn hikmoum. Be nd briaha thatipthu hingrneft hingrnamoum. Nhai tu yiro yima rifhurio yak marnyarmoam. Bro Nkifrarhu dukeft duka memor, “Afo nd boririfhut ahik tebfi hanykahmn kto nd fasoh nefroh yak thuyuk yihotat yak nuhasruhanm.”   
\s1 Fasoh fasoh nefm Kraisr kkutn yohnemott wuthanimom  
\p
\v 11 To tfit arihat, bi Kraisrn bi bro tohak prisr tohwor. Rorn nd Bro Nkifrar kfo hnamo hifa rhu nmbuhat fak htamornom. Ror hefenr yimorn Bro Nkifrarpno brbo mrhumor. Nd ror mrhumo tkitt nhai ndar bbinysoft hingrnamo rmont kanjo rhukaht. Nhai. Nd ror mrhumo tkitt tu be nndoht rothu ruheft. Bro Nkifrar hingrnayettn rothu ruheft nndo. Jisasr nd kmit yimorn tu hifa dborioh hingrneft hingrnamor.  
\v 12 Kraisr nd tu Nngrajoh Hnaru Tkitt yimohat nhai bro tohak prisr namoa kanjo meme kkut o bulmakau kkut yaknihato rim tarioh mthamoa kanjo inji rim tarioh mtharmor. Nhai. Ror tu yimarhu kkutn nd hnaru tkitt rim hafknenimor. Nd kkut rim hafknenimotr to be nd rpa yis yimohat to be nd yiharpa Bro Nkifrar htihato fakmiyakmornom.  
\v 13 Yimam bb kunys ruhetm yo yima tpim fakitohm nhai bi Bro Nkifrarhu rmont fknihato kfo bruttnakahm. Afo prisrpno yihato rorn meme kkut, bulmakau yiramrhu kkut yo bulmakau yogroh kandhi tounpam yekwarn hisop ghaye thu yifakhato frppri wunahato kak wus bowusworm. Nd hingrneft hingrnanitatrm ee Bro Nkifrarhu rmont yinyeft nhai mrokfom.  
\v 14 Nd boririfhut, bingot Bro Nkifrar hingrnamo barkof yihotarhu boririfhut hikwom. Arihat bi Kraisrn tfit tu dborioh yihotar htakmorr. Kraisr nohhato nd nfri yihotar htakmorr. Nhai wom tamoh nefmpno nohrmor. Nhai. Mgogra yimar be noh furamor. Tu Bro Nkifrarhu Yafothatn thu bmtamottr kku bebt hatohmohat nhai marimor, “Yakrmiruha.” Ror hatohmo kkut Bro Nkifrar htihato nd yimam yak bebwa fasoh nefm fak thumorm. Arihat Bro Nkifrarpno yinyeft nhai tfit wom duka kinyaki hanykfot. Be yi furakfot. Ndnatn ror kfiwa yuhatn hikkfot.   
\s1 Jisasrhu kkut kfomot nfri yihotar Bro Nkifrarpno wukiomor  
\p
\v 15 Bi Kraisr nyinga yuhat tohak hanyhato rorhu kkut kfomot nfri yihotar Bro Nkifrarpno wukiomor. Ndnettn yimam rorpno rim tohneft be yakrahm nd Bro Nkifrar kfoyuk rhu nmbuhat. Nd yimam yatk boririfhut hikmoam rom buga Kraisr nohmo nmbuhatn rom rpat noh wikna bugakmorm. Rom nhai wom mrokfom nd nfri yihotar yihato Bro Nkifrarpno brbo yinyeft.   
\p
\v 16-17 Jisasrhu kkut kfohato nfri yihotar hingrnamo nmbuhathu mrokfot afo kfo nuhasrhotanko wawany-swakomt. Nmoh nkifram nhai mkfo fnah marimom, “Womr yuhre yima nfri toh hanyetrn womr bmbri tkitt yakkfot,” nhai. Afo hti hanymoum womr bi fnohnir ee womr tkitt yakhato rorn tfit yifemmourm tamoh tamohm womr noh htaniyukm.  
\v 18 Bingot nd yatk yihotar yimam yau yaknimoahat, nhai be sfno bmbri yau yaknirmoam. Nhai. Barkoft afo wom yemror washato rorhu kkutn Bro Nkifrar htimoarn ee yimam nd yihotar kfo fakiomourm yauneft.  
\v 19 Inji namoum. Barkofpam afo Mosesrn boririfhu mrokfom kfo nuhas hik buganimorm met yindari bugam. You tfit nd bulmakau yogroh kkuti memeroh kkut yakmortn bupiktn rpat yak mortamormn yo hisop ghenm yak tiphato sifsif tmbene mtinet retpela mtine nd hisop ghenm rpat kisipmormn nd kku piktn nd hisop yuhtenm thu yifakmormn barkoft afo gonborngtn frppri wunanimor. Tfit thu yifakhato yimamn thu ppri wunamor.  
\v 20 Thu ppri wuna hanyhato kfo memor, “Nd nfri yihotar bi yima kkupampno bi kak dbkafwanr. Tot nd yuhatn Bro Nkifrar kfomorko hikneft.”  
\v 21 To nd yuhatn Mosesr hikhato yemro kkut yakhato Bro Nkifrar rhumoa rmont thu ppri wunanimortn ee tfit nd yiro rmont rhuyuk wuskar rpat thu ppri wuna bugamorr.  
\v 22 Mosesrhu boririfhut yakitohmohat, yemro kkut kfomout tamoh tamoh nefr wuthar rhumour. Yemro kkut nhai yohnerfot nhai met yindariroh fasoh fasoh nefm mong trohhermoarm.   
\s1 Kraisrhu kkut kfomot fasoh nefm fak thumorm  
\p
\v 23 Nd rmont yimam ndar bbinysoft hingrnamot, Bro Nkifrar yorhwa kmi hefenrhu ruheft hingrna nhombra-moumt. Nd rmont hingrnamot duka memom, “Yemro kkut hta duha yirah-nomt be nhai Bro Nkifrar brbo nieruhatr. Ndnettn thu ppri wunakah-tnomt Bro Nkifrar htiruharn brbo nia toh tkafrahrnom, nom rhu rifinyhato kfo bruttna kfo tatoneft.” Nd hingrneft ndar bbinysofthu rmontn inji hingr-namomt. Yura hefenrko nhai yemro kkut Bro Nkifrar htihato yima yuhur marnyarmorr nom rorpno yinyeft. Nhai.  
\v 24 Yima Jisasrhu kkut kfomot, Bro Nkifrar nd kkut htihato fak miyakmornom. Jisasr nhai nohhato ndar bbinysoft hingrnamo rmontn fknenirmor. Nhai. Ndar bbinysoft hingrnamo rmont be kmi hefen hingrna nhombramom. Jisasr fknenimo kmit rot tu kmi hefenr fkne twanhonimor. Ndnettn arihat Bro Nkifrarpno yorhwarn nom kfo bruttna hasi-wurnom.  
\v 25 Bi nkiframpno ndar bbinysoft tohmoa rmonthu tu Nngrajoh Hnaru Gnanhehr bro tohak prism fknenihato tarioh mthamoahat nhai be sfno fkne furanirmoam. Nhai. Yemro kkut kfomout yihom fkneni-moumt nd Bro Nkifrar rhumoa rumt. Rpa gunyjimr rpa yiharpar fkneni-moumt. Nhai be yakrpak yakrpak fknenirmoamt. Nd bro tohak prisr yaknimoa kkupam nhai turhu yima kkut yaknihato yirmoar. Nhai. Yemro kkupam faknimour. Nd yemro kkutpno fknenimour. Jisasr nhai. Ror nhai yiha yiha yi hatohrmor. Nhai. Ror be rpa yiharpa yihato mnohmohat, to be.   
\p
\v 26 Ndar bbinysoft trhahato ndar yonmari yiham toh hnamom, nhai htirmonom Jisasr nia minohhato tfit hefenr mtoh tany tfit yawihna minoh-hato tfit hefenr muh inji narmor bok yiham. Nhai. Ror rpa niat niahato minohmohat, to be. Bro Nkifrarhu nia yihat bi brbohtn. Ndnatn minohhato to be nd nom kiminysaftamo mtitikt nd yiha puk dbrufakmornom.  
\v 27 Ndar bbinysoft tohwa yimam nhai tahi nrwim kanjo toh nkifranikahm. Nhai. Nohwom. Nohnitamn Bro Nkifrarhu kotkfot toh garitwom.  
\v 28 Krais Jisasr to be rpa yuhat inji namor. Rpa yiharpa mnohhato bok yimaroh fasoh nefm ror nohmo yiharn be Bro Nkifrar fak thumorm. Kraisr noh tany yimohat tfit wompam nierahr. Tfit nia thombat nhai tfit wompam nohruhatrnom. Nhai. Be nieruharn ror toh gari hasoyuk yimam hifa rhu nmbuhat hirahrm.   
\c 10  
\s1 Bingot tarioh mthamoahat fasoh nefm Bro Nkifrar nhai yak thurmoarm  
\p
\v 1 Tamohmpno Jisasr nohmor? Mna yuhat inji korht. Bingot Bro Nkifrar Mosesrpno yihato boririfhu nuhasmohat boririfhu nuhasmorr Bro Nkifrarpno kfo bruttna inji naneft. Kfo hta nuhasmorrn Judam nd mrokfo yuhat hikmoum. Nd rom boririfhu nuhasmo yuhat hikhato kfo tatomoahat memoum, “Ka tot tu hifa rhu nmbuha yakyuk yihotat.” To nhai. Tu hifa rhu nmbuhathu yakyuk yihotat tot rirhumout. Rom be inji mkndh wuna tanymoumt tu yihota yuhat. Rpa rpa gunyjimm rmont yihato Bokis Kontrakt rim frppri wunamoahat yimaroh fasoh nefm nhai yak thurmoarm.  
\v 2 Nd rim frppri wunamoa kkut Bro Nkifrar ndt htihato yimaroh fasoh nefm bi ayak thuherm, nhai tfit duka krho hanyhato wompam yi hatohrfotm. Nhai. Bi nd rpa yispno yak thuhefotrm nd tarioh mtha hingrneft be myafhonirfomt.  
\v 3-4 To nhai, gunyjim gunyjimm kkupam yakhato Bokis Kontrakt thu ppri wunamoahat Bro Nkifrar nhai yak thurmoarm. Nhai. Nd fasoh nefm rhumoatm tfit waduka thu waduka thumoumm.   
\p
\v 5 Ndnatn Jisasr yuhre bbinysoft nia yibon hanyetrn Jisasr sinyahato Bro Nkifrar kfo memorr,  
\q1 “Yeshri mhta hihato tarioh mthamohat  
\q2 nhai hti wofnrmonm.  
\q1 Yemro skurn gbefr nhai wofnrmonr.  
\q1 Inji hti hhrekhato wakfomotn bbinysofthu yimaroh thatipt kanjo fak nhombra-nimoya.   
\q1
\v 6 Yemrom yakhato tarioh kandhi gunahato krn gbefr muhwohat  
\q2 ndm nhai mthatihato yindhor-kahn.  
\q1 Yemro kkut yakhato thu pprimoahat  
\q2 Bokis Kontrakt nhai ndm htihato yima yuhur yindhorrmoarn. Nhai.   
\q1
\v 7 Bro Nkifra, wahtina. Na asoya.  
\q2 Ni tamoh dukefm korhwomn, mirahn aduka kinyakiya.  
\q1 Tunhu bro rfa borngt kfomo yuhatn kanga,  
\q1 ‘Nann anohkahta nanhu kkut htihato  
\q2 yimaroh fasoh nefm yak thuhiyanm, nhai mrokfom.  
\q1 Na yibonwa nohneft.’” \rq Sng 40.6-8\rq*   
\p
\v 8 Nd ror barkof wukfonamo mrokfot tfit wompam kfo memor, “Yeshri mhta hihato tarioh mthewohat nhai hti wofnkahnm. Yemro skurn gbefr nhai wofnkahnr. Yemrom yakhato tarioh kandhi gunahato krn gbefr muhmohat ndm nhai mthatihato yindhorrmoa. Yemro kkut yakhato thu pprimoat Bokis Kontrakt nhai ndm htihato yima yuhur yindhorrmoarn. Nhai.” (Nd nd nefm Mosesr Bro Nkifrarpno yakhato yimam hikmoa nefm nhai yak thurmoamm yimam namoa fasoh nefm.)  
\v 9 Ndnatn Jisasr kfo memor, “Bro Nkifra, wahtina. Na asoya. Ni tamoh dukefm korhwomn, mirahn aduka kinyakiya. Tunhu bro rfa borngt kfomo yuhatn kangn, ‘Nann anohkahta nanhu kkutn htihato yimaroh fasoh nefm yak thuhiyanm nhai mrokfom. Na yibonwa nohneft.’” Ror inji kfomohat to nd nkifra hingrneft nkifram hingrnamoat fak thumort. Tfit turhu nfri hingrnef yuhat fak htamor.  
\v 10 Jisas Kraisr Bro Nkifrar kfomo yuhatn hikmorn nohmor. Nhai bok yiha noh hatohrmor. Nhai. Rpa noht nohmohat to be. Nd yiharpa nmoh fasoh nefm rorn yaknihato mhanohmotrm nom sfno yimanomn Bro Nkifrar htihato yindhorwor. Nhai be sfno, bi Jisasrn mhanohmorm nmoh fasoh nefm.   
\s1 Kraisr nohmo yuhatn tot tu fasoh nefroh yak thu yuhat  
\p
\v 11 Prism tarioh mthaneft hwe fnah hwe fnah tarioh mthewum. Nd rom tarioh mthewa yemrom nhai wom nndohtet nndohtet yemrom yakhato tarioh mthakahm. Nhai. Be rpahtet yemrom yakhato tarioh mthewum. Rom inji newohat Bro Nkifrar nhai nd tarioh narotwa gbefr mthatihato yak thuhikahrm fasoh nefm.  
\v 12 Prism yiha yiha tarioh mtha hatohmoum. Jisasr ror nhai inji na hatohrmor. Ror rpa noht nohmohat to be nd yiharpa yima bugaroh fasoh nef bugam yakni buga hemorm rorn mhanoh bugamorm. Mhanohhato be mrhumor Bro Nkifrarhu tu bro yufa yahuka tirmifko.  
\v 13 Mrhu-hato afo garitr Bro Nkifrarn, kangr, “Nd yimam na Jisasa tone dbombha hatohwa yimam afo Bro Nkifrarn nanhu yinhitn ahtarm.”  
\v 14 Ndnatn Kraisr rpa nohtpno yimaroh fasoh nefm nohmohat to be rroh yima yuhumio wutham rhumom. Nhai wom tamohm wom rhu hasormom. Bi wuthamn Bro Nkifrar frwus hasiwurmio yima yuhum. Kangr turhu ruheft kanjo aruh hasom.   
\p
\v 15 Nd Bro Nkifrar yimaroh fasoh nefm yak thumo nmbuhat, to mirahko ka turpar pthamort nd mrokfot. Nhai. Tu Bro Nkifrarhu Yafothat to be rpa yuhat kfo hikmof. Nd Bro Nkifrarhu Yafothat kfo memot,  
\v 16 “Bro Nkifrar kfo memor, ‘Tfit kto rompno kndhakruha nfri yihotarhu hingrneft tfit nndo rhuraht. Nanhu boririfhut yimaroh yima yuhumn rhuraht. Yimaroh yima yuhum rhuruhatt nd boririfhutn yak hta bohtarahtm na Bro Nkifraya hikneft.’”  
\v 17 Tfit wom kfot kfo memor, “Rom wommpno nayuk tamoh tamoh nefm nann yuhuwafhato yak thuhiruhanm. Rom nayuk fasoh nefm nhai tfit duka-rhotanm.”  
\v 18 Bro Nkifrar bi mong trohefirm nd yimam nayuk fasoh nefm nhai tfit yemrom yaknihato mtarioh mthakfot. Nhai. Ror to be bi mong trohrm nhai tfit wom dukakahrm.   
\s1 Bro Nkifrarhu dukefrparn rhuhato Bro Nkifrarpno brbo yikfot  
\p
\v 19 Barenko, Bro Nkifrarpno brbo yinyeft, bi nhai wom mrokfom. Jisasrhu kkut bi yohnemotn nmoh fasoh nefm bi fak thumorm. Mirahko tfit wom aduka kinyaki hanynom Bro Nkifrar yorhwa tkitt yinyeft.  
\v 20 Nd Bro Nkifrar rhumoa tu Nngrajoh Hnaru Gnar bro yikop rmonthar hir rafomourr. Nhai yimam yihom fnahnikfot. Jisasr nohmo yiha nd rmonthar buha wuyoh tnehakmorn myoh tnehnimorn mku mku rim hir mhirmof. Nd yiha Bro Nkifrar rhumoa tkitt yihotett riruhakmot. Bingot nhai yihotett rhurmot. Jisasrn nd nfri yihotar fak nukakmorr. Tor tu Bro Nkifrarpno yita yihotar.  
\v 21 Jisasr nd nfri yihotar hingrnahato ror yimorn hefenrhu bro tohak prisr tohwor. Tohhato Bro Nkifrar hikwa yimam rorn tohukatohhato kukatohworm.  
\v 22 Bi Jisasrn nohhato nd nom hta rafomoa nefm bi rorhu kkutn frwus bowus thumotm. Frwus bowus thumottm bi mong troh bugamonomm. Mong trohhato baftaismonom. Ndnettn nom Bro Nkifrarpno yinyeft be rorrparn duka duka yikfot. Nom Bro Nkifrarpno yinyeft duka kinyaki hany juha. Bro Nkifrarpno brbo ainyom.  
\v 23 Bro Nkifrar bi kfomor hifa rhu nmbuhat hanyeft. Ror kfoyuk mrokfom nhai kfo furakahrm. Kangnom hefenrko he mifrahrnom nd hifa rhu nmbuhat. Ndnettn nmoh dukefm nd Bro Nkifrar kfoyuk mrokfotn duka duka rhu hasokfot.  
\v 24 Nom Bro Nkifrar hikwanom tunom nahti duka nahti dukakfot. Womr tamoh nefeter, ni womn yihato womr hti dukakfot. Tawo womr ninhu neft htihato ror nd yuhat hikrahr. Tunom inji rinahtiyak rinahtiyak narahnom be nd nefrpat rhurahtnom.  
\v 25 Wanyakmoya memom, “Rhu rifinyneft nhai rpat sinya bugahato rpat rhu rifinykahko.” Womm turoh kunymn korh hasiwum, womm nndo nndo hutraf habriwum. Ndt nhai hifa neft nakahko. Jisas Kraisrhu nia yihar bi brbohwor. Ndnettn tuko rpat rhuhato Jisasrhu mrokfom nakfo bmta nakfo bmtakfot. Nakfo bmta-ruhakomn Jisasrhu mrokfot nhai yafho thuruhatkomt.   
\s1 Bro Nkifrarhu Yonr mong troh duha  
\p
\v 26 Nom bi Bro Nkifrarhu fipet mrokfot wanyetnom ni womn mirahn frfnahnihato akfo amiya, “Bro Nkifrarhu mrokfot afo niko womrpako warihikaf hanykomt. Na afo wurhat rim yau-efiwa.” Ni yima inji wany sany hany-hato mong trohnirahnr, na kfiwann, be tu yohrafo tanyrahnt tfit tunhu niayuk yihotat. To fitoh yuhat tfit nieruha? Bro Nkifrar nhai tfit wom yakmiyak-ruhatrn.  
\v 27 Be bro yakrme dukefrpno Bro Nkifrarhu bro kotkfot toh gari hasorahn. Toh gari hasohato nd bro kotkfotn ni nd Bro Nkifrarhu mrokfom mong trohyuk yimani rorpno nahti dbnotwa yimam rpat yakruharko tu bro funa nanyjaret kahtn yiho turahrko.  
\v 28 Afo yatk yuhat yimam tohmohat Mosesr kfo nuhasmorm Bro Nkifrarhu boririfhut. Nd boririfhut wom yimar kfo hanyjbornanihato yifirn wom neft rim netrt, husf o husfirpa yimam htihato kfo nriyafmr, nd yimar nhai yuhuwafhato rhurmoar. Nhai. Kotkfot tohnihato was hehur thumoumr.  
\v 29 Nd yatk boririfhut hanyjbornamoa yimam inji namoumm. To tfit arihat Jisasr htamo nfri yiho-tarhu boririfhut yimam hanyjborna-nineft ka hifa rhurahm? Na kfiwanko nd yimam be tu bro krho nmbuhat yakrahm. Wom yimar Jisasrhu kkupamn yihotar yak nukektmr rorhu fasoh nefm Jisasrhu kkupaye yuk kifsa thunihato tfit kto mtoh kekuthato Jisasrhu kkupam kfo famurm, “Nd Jisasrhu kkupam be kkupa furayem. Nhai yafotha duhatem.” Nd yimar inji kfoyukr bro krho nmbuhat yakrahr. Yo womt, inji nd yimar kfo famur, “Nd Jisasr hingrnamo hingrneft nhai tu Bro Nkifrarhu Yafothatpno hingr-narmor. Fasoh tahi yifonroh bbukeft-pno hingrnamor.” Nd yimar Bro Nkifrar yak tutfarahrr.  
\v 30 To tamohmpno yak tutfaruharr? Mrokfot Bro Nkifrar bi kfomort. Kfo memor, “Hanyjborniwa yimam na tuka htiruhanm. Nhai wommn. Na tuka.” Wom mrokfot kfo memor, “Tuha kot tohyuk tkittn tukanhu met yindariroh nefm yak nhtaruhanm.” Tot inji Bro Nkifrar kfomo tngt.  
\v 31 Bro Nkifrar tu bro nanyjaret Nkifrayer. Ror namburhato afrwon-tarnom, nhai toh bmtaruhatnom. Mirahm, “Nndo kkr ritmn rim wuttho yibuknewum.”   
\s1 Bro Nkifrar yakitoh kihhato tohkfot  
\p
\v 32 Niko tuko wadukako niko barkof Bro Nkifrarhu mrokfot wanyhato rihikakmohat kmi thofm htihato nambur memom, “Tamohmpno nd Jisasr hikwam?” Inji namburhato memom, “Wom nefm anakahtnom tfit mkekutakrahm.” To nhai. Niko hifa nhai wohsisrmoko. Hifa toh bmtamoko.  
\v 33 Wom yiham yima rifiny buhamn kfo sinou bosinou, kfo yimtna boyimtna, kuninfar wuna inji namoumko. Wom yiham womm bi inji newumme niko womko rpat yihato rpat womm tohnuhaknimoakomm rpat kfo nyingo fnah inji namoumko.  
\v 34 Niko toh hasohato yimam niahato nikmoh womm mkitumakhato kalabus hanymoahat niko womko nhai yakrme trohrmoa-komm o be yukatohrmoakomm. Nhai. Rom finji namoumm niko womko brbo toh tkaf inji namoukomm. Krhopam rpat fakmoukomm. Yo yimam niahato nikmoh wuskam myak rhoptakni hemoahat nhai namburhato tone hik inji narmoakomm. Nhai. Niko be hifa yindhor yima yuhumpno kfo memouko, “Nhai mrokfom, ayaknimm. Nom nhai namburkoft.” Nikmoh dukefm duka memouko, “Tamohmpno nd fasoh wuskampno anamburnom? Nmoh tu dborioh wuskam Bro Nkifrar kfomom yura hefenrn korhwom. Nd fasoh wuskam ayaknimm.” Ndhtet dukefmpno rhumouko.   
\p
\v 35 Niko hifa Jisasr fak hiknamokomr. To tfit mirahko tfit ayafhoninomr. Yakitoh kihhato toh bmta hasorahko, tur yimayer hti dukarahrko. Nd ror kfomo hifa dborioh rhu nmbuhat hirahrko.  
\v 36 Bro Nkifrar kfoyuk yihota yuharpat yak hik hasokfot. Inji yak hik marnya hasorahkomr, be nd Bro Nkifrar kfoyuk hifa rhu nmbuhat wuroh yiharn yakrahkomt.  
\v 37 Kraisrhu yawihna yihar nkifram yakitohmo rfa borngtn kfo memot, “Nd yawihnayuk yimar bi brbohwor yawihnaneft. To mirahko ka wukuknarahr yawihnaneft. Brbo htiyekwokomr.  
\v 38 Yimam nanhu yima yuhurn rhu hasiwamn ror fawihner, na yindhorhato yakrhoyanm nanpno toh nkifranirahm. Yimam nanhu yima yuhur rhu hasohato tfit kto nd yima yuhur fafho thunimr, be nd yimam ror yawihna thombat na nhai yindhorrhotanm.”   
\p
\v 39 Awi nom nhai mrokfot. Mirahko aduka kinyakinom. Nom hifa. Nom nhai wom yimam newa kanjo Bro Nkifrarhu yima yuhur rhu hanyhato tfit kto yafho thukahnomr. Nhai. Nmoh yima yuhum Bro Nkifra hikwa yimaroh yima yuhum kanjo korhm. Ndnetnomn nom Bro Nkifrar yakruharnom rorpno toh nkifrarahnom.   
\ms1 Bro Nkifrar yakitohhato toh bmta kihkfot.  
\mr (Sapta 11—13)  
\c 11  
\s1 Bro Nkifrarhu mrokforoh wany yakio yuhat  
\p
\v 1 Bro Nkifrar kfoyuk mrokfom wany yakioneft finji wany yakiokfot? Wawanyko. Wom mrokfot Bro Nkifrar kfo famur, “Hifa rhu nmbuhat hiruhanko.” Nom nd mrokfot wanyhato nmoh dukefm be nd ror kfoyuk mrokfotn bro yima yuhum htahato duka hasinomm, tot ndhtet dukeft to tu wany yakioneft. Hus yima yuhuf rhuhato duka mirahn, “You ka?” Ndhtet mduka you ta neft, be nhai yakruhatnomt. Ndt nhai tu wany yakioneft. O Bro Nkifrar kfo famur, “Nd yiha inji naruha.” Nhaf to inji. Nom wanyhato nhai bok dukefm yakrfonom. Be nd ror kfoyuk mrokfotn yima yuhum yak tkafhato tohnom, be nd mrokfot fipett rhuraht. Tot tu wany yakioneft.  
\v 2 Nmoh nkifram to inji hik hnamotmr fak marnya hnamorm. Bro Nkifrar kfoyuk mrokfom nhai bok dukefm yakrmoamm. Tamoh mrokfom kfirm be nd ror kfoyuk mrokfom wany yakiohato rroh yima yuhumn fak tkafmoum. Bro Nkifrar inji htihato rroh rhu nmbuham fak marnyamourm.  
\v 3 Nom Bro Nkifrar kfoyuk mrokfom nmoh yima yuhum yakitoh tkafwanomn duka kangnom, “Mounti bbinysoft nhai womm kformotm trharmof. Nhai. Bro Nkifrarn kfomotr trhamof. Ndar bbinysofthu wuskam nom htitam nhai wom shrm yakhato hingrna nhombraf hanyhato trharmom. Nhai. Be tnge pthamotr turoh fijo trha nhombra hanymom. Bingot nhai wom tamohm rhurmotm btn ndm yakhato hingrna nhombraf hanyrmorm.”   
\s1 Aber Inok Noarom Bro Nkifrarhu mrokfot wany yakiomo yuhat  
\p
\v 4 Aberr Bro Nkifrar kfoyuk mrokfomn wany yakiomormn yemrom yakhato tarioh mthamorrko. Kenr ror nhai. Bro Nkifrar kfoyuk mrokfom nhai wany yakiormorm. Aberrpar Bro Nkifrar htihato kfo yindhormorr, memorr, “Aber, ni tu dborioh yimaye.” Aberr nhai wom tohkahr, bi nohngot-mor. To tfit nom arihat ror Bro Nkifrar wany yakiomo kindo nom Bro Nkifrar wany yakiokfot.   
\p
\v 5 Enokr ror nhaf inji. Ror nhaf Bro Nkifrar kfoyuk mrokfom wany yakio-hato tohmour. Ndnetrn Bro Nkifrar be yima tire fakmorr. Nhai nohrmor. Bro Nkifrar yakmotrr yimam hambroti hambroti nhai htirmomr. Enokr yuhre bbinysoft afo tohetrn Bro Nkifrar kfo memor, “Enokr na kfoyuk mrokfom wany yakiowatrm na yindhorwanr.”  
\v 6 Yimam, Bro Nkifrar kfoyuk mrokfom nhai wany yakiokahmm, nd yimam Bro Nkifrar be nhai yindhorruhatrm. Yimam duka kangm, “Bro Nkifrar brbo yorhwarn yak marnyarahrm nmoh tamoh tamoh nefm,” nd yimam nd dukefr yorhwatrm yima yuhum sinyewumm Bro Nkifrarpno brbo yi tohneft.   
\p
\v 7 Noar ror nhaf Bro Nkifrar bi kfo duka hta memorr, “Tu bro hnut nieraht. Nieruhatn bbinysoft rhuyuk tamoh tamohm nd hnutn yak bati bugarahtm.” Nd Bro Nkifrar kfomo hnut bbinysof thofm nhai htirmomt ndhtet hnut. Noar nd Bro Nkifrar kfomo mrokfot wanyhato rorhu yima yuhur fanhomorr. Nd duka yanuheft-pno bro sift hingrnamort. Nd hnut niamohat rori rorhu yon kunys rom nhai hnut fune habohirhato nohrmom. Bro Nkifrarhu mrokfot nd yima Noarpar wany yakiomort. Ndnetrn rorparn mfak htanimorr. Ndwom ndwomt nd hnutpno bati bugamom. Bro Nkifrar kfo memor, “Noarpar nanhu mrokfot wany yakiowartn rorhu toh nmbuhat toh marnyewurt.”   
\s1 Abraham Sararof Bro Nkifrarhu mrokfot wany yakiomo yuhat  
\p
\v 8 Abrahamrhu tndht nhaf inji. Bro Nkifrar Abrahamrpno yihato kfo memorr, “Ni Abrahamn ndar tunhu kmit wahtanykahnt waiswa wuri wom kmitn. Tukann yak htaf hanyrhotann nd na dukayuk kmitn mifnahrahn. Nd ni mifnahruha tkitt be ninhu bbinysoft rhuraht.” Abrahamr nd mrokfot wany-mohat nhai marimor, “Hanyjbornahato rhuruha.” Nhai. Ror be wany yakio-hato sinyahato yimor. Ror yimohat nhai kfo marimor, “Ndha nd kmit kita.” Nhai. Be sinya furanihato yimor. Be nd Bro Nkifrar kfoyuk tngt wany yakiohato hikmor nd Bro Nkifrarhu tng yuhatn.  
\v 9 Abrahamr yimorn Bro Nkifrar wom kmitn fak htamorr. Nd kmit o bbinysoft bi yima tohet tkitt fak htamorr. Abrahamr bi yima tohet tkitt yak htamohat nhai kfo marimor, “Tamohmpno nda yima tohet tkitt Bro Nkifrar yak htamora? Tfit wom tkitm yiruha.” Nhai. Ror be nd Bro Nkifrar bi kfoyuk mrokfot wany yakiohato rorhu dukeft duka memor, “Na bi ndar tkitt fak htamora, to tfit finji wom finji yirhoya?” Be inji dukahato ser kunymn toh habrimom rorhu yon tuhtirpno. Aisak Jekofrof, rof nhaf be nd Abrahamr toh hnamo toheft be inji tohmof. Be nd Bro Nkifrar Abrahamr-pno kfomo tngt wany yakio hatohhato tohmom.  
\v 10 Abrahamrhu dukeft duka memor, “Tamohmpno ndar bbinysoftn kuny kihato kmiyeta rhurhoya. Hndhorma. Bro Nkifrarhu tire hingr-nayuk kmirpat tohruha. Nd kmit nhai mibatiniruhatt. Be inji toh nkifraniraht.”   
\p
\v 11 Yo Abrahamrhu met Sarat, rot nhaf inji. Sarat bi tabon bugahato bi bayett Bro Nkifrar niahato kfo memort, “Ni yon yindarir hiyaurahn.” Rot nd yon yindarirhu hiyau mrokfot wanymohat nhai marimot, “Duka mmoruhant.” Nd mrokfot rothu yima yuhurn hmbritamott. Rothu dukeft duka memot, “Bro Nkifrarhu mrokfom fipetm korhwom. Na kfomora yon yindarirhu hiyauneft nd mrokfot nhai yi furaruhatt.” Rot Bro Nkifrar kfoyuk mrokfot fakitohtamott ndnatn Bro Nkifrar kfomotr yon fanett rhuhato yon yindarir hiyaumotr.  
\v 12 Abrahamr bi tabon bugahato yon kasinya yimbuyef duhatr, nd yonrpno be tu yonmari yon rifhur kasinyamor. Yon rifhur Abrahamr kasinyamor memom, “Nndo guny mounri nungur tik furayer. Nhai yimam thomnakfot.”   
\p
\v 13 Abraham, Aisak, Jekofrom Bro Nkifrar kfoyuk mrokfom nhai mmor-moamm. Rom be nd Bro Nkifrar kfoyuk mrokfom yakitohhato fukatoh hasomoum. Tohhany tohhany rom nohmom. Nd Bro Nkifrar kfoyuk tamohm rom nhai hti htanihato noh-rmom. Nhai. Yima nfrim tohmohat rroh dukeft be duka memom, “Nda bbinysoft nom tohwat be womroh bbinysoft tohekwonom. Kto nd Bro Nkifrar kfoyuk shrm hirahrnom. Hifa, nhai mrokfom.”  
\v 14 Rom kfo memoahat, “Ndart nhai tunmoh darbn bbinysoft tohkahnom,” ndt yuwi wom nfri kmithu yakhato toh yibonetmn inji kfomoum.  
\v 15 Nd rom barkof toh tanymo bbinysoft nhai wom dukarmoamt. Adukamt tfit tum toh tanyukko yirmom.  
\v 16 To nhai. Hefenrn tu hifa nfri tkitt yak yibonetmn nhai wom dukarmom tfit tum toh tanymoko yinyeft. Bro Nkifrar bi fak htatahemorm rorpno toh nkifrayuk kmit. Ndnetmn rom Bro Nkifrar kfo nakuhato kfo memoahat, “Bro Nkifraye ni nmoh nkifra mife,” Bro Nkifrar inji wanymoahat yima yuhur yindhormourr.   
\p
\v 17-18 Bro Nkifrar yihato Abrahamr kfo memorr, “Aisakrn ni Abrahamnhu frikeft kasinyarahrt.” Bro Nkifrar memor, “Afo htiruha Abrahamr nanhu mrokfom hikrahrt?” Ndnetrn memorr, “Abrahame, ninhu rpa yon Aisakr wawaskahnr na watarioh mthatwona.” Abrahamr wany yakiohato nhai hanyjbornarmor. Abrahamr bi memor, “Aisakr washato Bro Nkifrar tarioh mtharuhanr.”  
\v 19 Abrahamr turhu yonr was hany sitamohat rorhu dukeft duka memor, “Nanhu yonr rpa mifer. Was thoft be Bro Nkifrarn tfit kasin-yarahrr.” Nd mrokfot inji akfonomt. Aisakr bi nohyuk tkitt rhumor. Nohyuk tkitt bi ruhetrn Bro Nkifrar fakmorr. Abrahamr ndt htihato duka memor, “Nanhu yonr bi nohetr, Bro Nkifrarn tfit kasinyamorr.”   
\s1 Aisak Jekof Josefrom Bro Nkifrarhu mrokfom yakitoh tkafmo yuhat  
\p
\v 20 Aisakr ror nhaf inji. Ror Bro Nkifrar kfoyuk mrokfom nhai marimor, “Kfo furewurm.” Ror wanymoahat wanyhato fakitoh tkafmourm. Rorhu yon Jekof Isorof kfo tebos boteboshato kfo hta bohtamorf. Womr niamotr yak marnyanimorrn kfo hta memorr, “Ni kasinyaruha yon frikeft Bro Nkifrarn yak hta bohtarahrt.” Tfit womr niamor nhaf inji kfo hta memorr, “Kto ninhu toh nmbuhat Bro Nkifrar inji yak htarahrt.” Inji inji kfo hta bohtamorf.   
\p
\v 21 Jekofr nhaf inji. Bro Nkifrar kfomoa mrokfom yakitoh tkafhato tohmour. Wuroh noh yibonruha kio musspno rim kio bmtatahato turhu yinem Josefrhu yon Ifrem Manasarof nakuyakmorf. Nakuyakhato yak marnya bomarnyahato kfo memorf, “Kto Bro Nkifrar nifnhu toh nmbuham yak hta marnyarahrm.” Jekofr ror inji.   
\p
\v 22 Tawo Josefr nhaf inji. Bro Nkifrar kfoyuk mrokfom ror yakitoh tkafhato tohmour. Wuroh noh yibonruha turhu tangiyemrom nakuyak bugakmorm. Yimotm kfo nuhas bugamorm Bro Nkifrar rorpno kfo pthayuk mrokfom. Kfo ptha memorm, “Nom Isrernom nda Ijif tohwanom be wom yiha Bro Nkifrar yakniruharnom tfit Kenanko hanyrahrnom. Nhai asha tohruhatnom. Wom mrokfot kfiwanko. Asha yuhre tohhato na nohniya, nanhu tpitikt mirahko arhut. Kitwonom tpitikt yaknihato tu Kenantn tfit hanykfot.”   
\s1 Mosesr Bro Nkifrarhu mrokfom wany yakiomo yuhat  
\p
\v 23 Mosesrhu yifammaf nhaf inji. Bro Nkifrarhu mrokfom nhai tuhaftarmoafm. Rof nhaf wany yakiomoufm. Mosesr nurnimohat rofhu dukeft duka memof, “Nda yonr Bro Nkifrar hifa hti yindhorworr.” Ndnettn Ijifthu kingrhu mrokfot nhai yak hikhato marimof, “Tektn yihom tuhafrahnonr.” Nhai. Tu hifa dborioh yonrn yak rir borirakhato hta kafrohafmofr. Husfirpa yamm nhai yak nriyafrmofr.   
\p
\v 24 Mosesr nhaf inji. Bro Nkifrarhu mrokfom ror be wany yakiohato tohmour. Kingrhu yon mettn duge warhetrn yimam kfo yiritihato kfo memoahat kingrhu yon metthu yoner Mosesr, tu Mosesr inji wanymoahat kfo memorm, “Na inji akfowohkma.  
\v 25 Nanhu sinya tanyukkorhof yimam tu Bro Nkifrarhu yon kunyet. Rompno kanga rpat atohkahnomn rom yekwa krhopam rpat ayaknom, nhai mrokfom. Na wofnkaha kingrpno tohhato rorhu fasoh nefm hikneft. Yimam ndhtet rhu nmbuhat rhuyukm nhai ndhtet rhu nmbuhat toh nkifranikahm. Nhai.”  
\v 26 Mosesr duka memor, “Nom hbhakruha yimar nd frikeftn trharahr. Ndnettn nhai wofnkaha Ijifthu bro yimaya tohhato rorhu fasoh nefm hikneft. Na wofnwa tu Bro Nkifrarhu yon kunyspno rpat tohhato rpat krhopam yakneft. Kto Bro Nkifrar mashoft, ‘Hifa rhu tkitt ahiyanm,’ na rpat yak htarahrnom.”   
\p
\v 27 Mosesr nd dukeftpno Ijift htanymort. Ijifthu kingr nhai hifa htirmorr Mosesr Ijift htanymohat. Mosesr ror bi turn htimort Bro Nkifrar duka htamo dukeft. Ndnetrn wany yakiohato nhai yakrmermorr nd Ijifthu kingr. Nom yima mif nyingetnom nhai Bro Nkifrar htikfot. Mosesrpar Bro Nkifrar yima mif nyingaye htihato nhai marimor, “Wohsisruha tamoh tamoh nefm.” Nhai. Toh bmtamor.  
\v 28 Mosesr Bro Nkifrar Pasofa yuhathu mrokfom kfomohat wany yakiomorm. Wany yakiohato kfomorm turhu yimam sifsifrhu wasneft. Kfo memorm, “Sifsifr wawaskahkomrn, kkut yakkahkomt nikmoh kuny yifhatikroh yirawih mimn kkupam ki hanykfot. Ki hanykahtkomm Bro Nkifrarhu moun-motr niahato yimaroh nkati yonm yak bati hne thombat nikmoh kunym yau trohnirahrm. Nhai nohruhatm nikmoh nkati yonm.”   
\s1 Bok Isrerm Bro Nkifrarhu mrokfom wany yakiomomm  
\p
\v 29 Isrerm nhaf inji. Rom Bro Nkifrarhu mrokfom wany yakiomomm. Ndnetmn Retsit yau hayukmohat bupam mano mano yihom rhu mrhumotm sfnoh bbinysof furatn fau hayukmom. Ijifthu amim memom, “Atone hikkah-nomm arimak kitohnomm,” nd bu rifhu mano mano wuyoh nafurnehato fryifafmofm.   
\p
\v 30 Isrerrpamn nhaf Bro Nkifrarhu mrokfom wany yakiohato Jerikothu yonmari tahi gnam fau habrimotmm nd tahi gnam foh nafurmom. Sikispela marm fau habrimomt nd kmi gnat. Sefenyuk marrpno nd Jerikothu tahi gnam wufoh nafurnamom.   
\p
\v 31 Nd taun Jerikot tohmout wom ijoh tonayet met Rahaft. Rot nd kmit tohhato Bro Nkifrar namoa nefm wanyhato mrokfom fakitohmoutm rothu yima yuhurn. Ndnettn Isrerm toneyaknihato nd Jerikothu hanyjbornet yimam was batiyaknimohat Ra haft nhai wasrmomt. Rahaft was duha yimo nmbuhat nhai be sfno. Jerikot hti tmbho harhuyuk yimaf Josuar tkrurafmof, rotn fak kafrohmotf Jerikothu amim was hany sitamohat. Tom inji wom womroh yufami tndhm Bro Nkifrarhu mrofkom yakitohhato tohmoam.   
\p
\v 32 Tfit wom wom yimaroh yufam Gideon, Barak, Samson, Jefta, Defit, Samuer yo profetm, rom Bro Nkifrarhu mrokfom wany yakiohato Bro Nkifrar tohnhomoahat nhai kfo hik buga-rhotanm rroh tndhm. Be inji kfoni hanyruhanm.  
\v 33 Rroh womm Bro Nkifrar kfoyuk mrokfom wany yakiomoatmm tohnhomourm. Tohnhomoatrm wom kmithu kingrhu amikfotpno yi nnamoahat romn sinyahato yiho hathumoumm. Wom kmim tohukatohmoahat Bro Nkifrarn yak htaf hanymoatrm kmim tohukatoh marnyamoumm. Rroh womm kfo bruttnamoahat Bro Nkifrar wanyhato fak marnyamourm. Yo womm laionm tohyuk muhm tumohat laionm nhai yejborfarmomm. Bro Nkifrar fak tasifmorm laionroh tngm.  
\v 34 Rroh womm kaht tumohat kaht nhai tandhirmotm. Rroh womm memom, “Awasnomm.” To nhai. Yakrmenihato tohmom. Womroh thatipm tatko inji namoahat Bro Nkifrarn tfit thu bmtamourm. Womm yahrt yimoahat Bro Nkifrar thu hamuhmoatrm memom, “Nndo het yaum tohwom.” Wom kmi thofm niahato rroh kmim-pno yuwi mtoh tebfi yaknehato memoum, “Rroh tamoh tamohm ayak rikohnomm.” Yudbat rpa rpa hik tubatuyafmoumm.  
\v 35 Rroh womm bi nohetm tfit sinyamotm mmemrom yindhormom. Womm yahr kmimn kiminysafmoumm. Memoum, “Inji nakahtnomm Bro Nkifrar mong trohrahmr.” To nhai, rroh yima yuhum Bro Nkifrarparn kakitohmoum. Nhai yafho thurmoamr. Duka memom, “Tamoh nefm atoh bmtanom kto tu dborioh rhu nmbuharpat rhu nkifrani-rahnom hefenrn.” Nd dukeftpno yimam finji namoahat yak marsisatamoatm tabot nohmoumm.   
\p
\v 36 Bok yimam nhai be rpahtet krhopam yakrmom. Womm tat noh bonohtahato kfo snouhato kuninfari wunamoumm. Womm sene fohm kanjo mkiyakmoamm kalabus htamoumm.  
\v 37 Womm fohm kanjo tahiye tahiye fryebhoh nohmoumm wom kmimn sinyahato. Womm mim kanjo buha soim tmbhomoumm soye. Womm gon nyisofm kanjo bainate rithuhato hanysekrmoumm. Womm be inji foh nungam kanjo be inji yifamn toh habrimoum. Sifsif meme tham nyuhmoum rmontha mim. Be inji yeshri duha tamoh wuskapa duha be inji toh mmbrafinysamoum. Nhai wom yuhatn hifa rhu nmbuhat yakrmom. Tu be nhai mif. Yima yuhenm nur finynimoumm. Yimam faso fasoh fak bebtamoumm. Nhai tu hifa nefm narmoamm.  
\v 38 Ndnetmn be inji toh habrisamoum yima toh duha tkitmn yo womnam yura kminysofm yimoum. Nhai kuny juha be inji tahi muhmn o tahi yengongmn toh habri-samoum. Womnam be inji yiro bb muhmn tohmoum kmbrum kanjo. Romn sinyahato hifa hifa nefm namoumm kmi thofm. Tawo kmi thofm nhai tawo hifa nefm narmoamm. Romrpamn memoum, “Ka nmoh yima yuheteme, nom hifa nefm anakah-tnomm ndt htiruhamn tawo hti dukarahmnom.” To nhai, fasoh hti srthumoumm. Kmi thofm nhai wofnrmoam Bro Nkifrar hiket yimam-pno tohneft. Ndnetmn yauyenm kanjo tabohikmoumm.   
\p
\v 39 Nd yima yimaroh mrofkom nom bi wany hnem nd yimam Bro Nkifrar kfoyuk mrokfom wany yakiomoumm. Ndnetmn Bro Nkifrar yindhorhato rroh toh rhu wiyauyau nmbuham fak marnyamourm. Nd rom yima nfrim tohhato wany hnamoa hifa rhu nmbuhat Bro Nkifrar kfomoat, bi nohniyetmn nd hifa rhu nmbuhat yakyuk yihotat Jisasr hingrnamort. Nhai hti htanirmomt.  
\v 40 Ndt nhai be sfno inji rhurmot. Bro Nkifrar duka memor, “Kto nd hifa rhu nmbuhat yakyuk yihotat hingrnarhoyantn be rpa yiharpa nd bingot nkiframpno tohhato nanhu mrokfefm hikmoam yo arihathum be rpa yiharpa yak nhafo-hakrhoyanm be nanpno toh nkifra-nirahm.” Bro Nkifrar inji dukamor.   
\c 12  
\s1 Jisasrn nmoh nyingam be rorpar hti hti tonekfot  
\p
\v 1 Nd na kfohne nkifram rom bi yura hefenr yorhwamn nom kukatoh hasiwumnom Bro Nkifrar hikwohat. Ndnettn nom hhrek duha Bro Nkifrarhu hikneft. Bro Nkifrar hikhato dborioh nefm nakfot. Bro Nkifrar hikwohat yimam tone resiswa kanjo inji tonitwonomt. Nmoh nkifram kukatoh hasiwum yura wurhuhato nom Bro Nkifrar hikwohat. Ndnettn nom nd Bro Nkifrarhu resiskfot tohneft, tamoh tamoh kurhet shrm, mfhatn o tirmn o wuram o yimanysoftn korhm, yak thu bugahato yima furanom tonekfot. Ndmpno tonirahnom be nd kurhet shrmn teh krhorahmnom o womnam teh knbasakruhatmnom suhrahnom. Briyoh yima furanomn nd Bro Nkifrarhu resiskfot tonehany tone hanyhato wuroh mtone tmbho tkitt mtone fnahrahnomt.  
\v 2 Nmoh nyingako tohakyuk yima Jisasrn nmoh nyingam be rorrpar hti hti tonekfot. Nhai mano mano riyukatoh ayukatoh hanykfot. Rorn kfo htak hanyruharnom tonihany toni hanyhato be Bro Nkifrar yorhwa tkitt mtone fnahrahnom. Tot mtone tmbhoyuk tkitt. Jisasr bgre misn noh-mohat, nhai marimor, “Yimtnaruha.” Nhai. Rorhu dukeft kto hifa rhu nmbuhathu yakneft dukahato nhai yimtnarmor bgre mis nohmohat. Fura nd yimtna rifhur yak marsisanihato bgre mis nohmor. Ndnetrn arihat bi hifa tkittn Bro Nkifrar yimam bro yufa yahuka mkuko korhr.   
\s1 Bro Nkifrar kfo hta yuham tohrahnom be toh marnyanirahnom  
\p
\v 3 Jisasrhu tndh mrokfot htiyakhato tohkfot. Ror hti srthumoa yimam fasoh nefm namoahat, nhai finji narmoar. Ror be tngt youkihhato tohmour. Be Bro Nkifrarhu dukefrparpno tohmour. Nd ror tohmo yuhat toh hikkfot. Yimam finji naknaneft o krhopam henyeft toh bmtakfot. Inji naruhakomn Bro Nkifrar nhai thu trohruhatkomr.  
\v 4 Niko kmi thofm nayuk nefm hti hhrekhato sinya trohwohat nhai ndt hti namburnihato wasrromko Jisasr wasmo kanjo. Nhai.  
\v 5 Wom kfo bmta mrokfot ka nhai yakitohkahkomt? Bro Nkifrar kangr, “Niko nanhu yoneko.” Rorhu gonborngtn nd mrokfot korht. Nd mrokfot kfo kangt, “Ni nanhu yone, hamumiwatn Bror wom nefm newurn o yimbhindangm frdambong-shiwurn mirahn akfo ameya, ‘Bro Nkifraye, tamohmpno inji newana? Inji newuna, be nhai ninpno brbo tohrhota.’ Nhai inji kfo duha.  
\v 6 Bro Nkifrar htitworn turhu yonn kanjo. Ndnettn ni faso fasoh hamumiwatn inji newurn, ndt htiruhann dukarahn.”   
\p
\v 7 Tamoh krhopam Bro Nkifrar kahukworko mirahko ayakrme trohnomm. Finji newurko tha hekfot. Ndt htiruhakomn duka tungunarahko. Yifemrom yonm kfo hta bohtiwa kanjo inji newurko Bro Nkifrar.  
\v 8 Bro Nkifrar turhu yonroh kfo hta yak htaneft bi rinakngitakmort. Nhai be ar nohofrpa. Yimako Bro Nkifrar nhai kfo dbohfa inji nakahrko, ka nhai rorhu yonmifko rhukahko. Wom rorhu yonko arhuko to kfo dbohfa inji narforko. Ka be inji met tmaht yihota yuhat yauhato yakmo yoneko.  
\v 9 Yo womt, nom damiagnom tohhato hammomoahat nmoh yifemrom kfo nyingo fnah inji namoumnom. Kfo nyingo fnahmoahat nom nhai kfo wokrmoanomm. Nhai. Nom be rom kfoyuk yuhatn hikmounom. Ndnettn Bro Nkifrar finji naneft nom sinyahato Bro Nkifrarko kfo wok duha. Nhai. Nom be tngm youkihhato wany yakitohkfot. Inji narahnom be yiha yiha tohnhorahrnom.  
\v 10 Nom habhi yonennom tohhato nmoh yifammam kfo dbohfa inji na thoft, rom tu yifammamn kfo dbohfa mrokfom kahukmnom. Bro Nkifrar ror nhai be kfo dbohfa furakahrnom. Ror kangr tur tohwa toheft watohko ndnetrn kfo dbohfa mrokfom kahukrnom.  
\v 11 Nd kfo dbohfa mrokfom hayukm afo barkofpam yima yuhum krhorahm. Tfit kto htirahn nd krho yima yuhum kekuthato tu dborioh yima yuhur nieruharn dborioh nefm hikrahm.   
\s1 Bro Nkifrar hikneft hik marnyakfot  
\p
\v 12 Ndnettn niko toh bmtahato yimam resis tonita kanjo Bro Nkifrar inji hikkfot. Mirahko noheh yimam kanjo ayaunom. Tir wuram wunoh minysafekwomnom yak marsisani hanykfot. Mirahn amkkrmita. Bro Nkifrar kangr, wayau bmta hany-kahkomn nd ror kfomo hifa dborioh rhu nmbuhat hirahrko.  
\v 13 Bro Nkifrar hikneft hik marnyakfot. Nikmoh toheft hifa toh marnyakfot. Wom yimam Bro Nkifrar hik hanyhato buha msuhneft niko womko htihato rom tfit sinya tohrahm.   
\p
\v 14 Nikmoh rhu nmbuham be masat ndar bbinysofthu rhu nmbuharoh dukefm yak duha. Yima yuhum mirhuhato Bro Nkifrar yorhwa kanjo rhukfot. Yimam ndhtet rhu nmbuhat rhu duhatm be nhai htiruhatmr Bro Nkifrar.  
\v 15 Yima yuhum aduka hanyswamko. Bro Nkifrar nomn yuhuwafhato Jisasr tkrurafmotrr niamorn minohmor. Ndnettn rorhu tamoh tamoh mrokfom hanyjborna duha. Womr bi Jisasr hikwor tfit womn rorpno yihato ninhu fasoh nefm hanyhato rorpno yihato myak nuhas duha. Inji narahn be nd yimar tfit ninhu nefm rim suhnirahr.  
\v 16 Mirahko nikmoh womr metroh dukefmn be ahika. Yo mirahko Isor namo neft ahiknom. Isor nhai duka marimor, “Nann nkati yona, na tukann tohrhota Bro Nkifrar kfoyuk mrokfo yafothar muhrahra.” Nhai. Yatit dukahato nkati yon yufat nhai wom dukarmort. Inji dukahato tfit wom habhirn tkitt yakhato ror mrokfo yafothar muhmor. Najomr nhai.  
\v 17 Bro Nkifrarhu mrokfo yafothar bi wom habhirn ptha hmbriyetrn kto najomr yihato mkfo nurmor kfo hmbrineft kfo memorr, “To fitha rhumo? Mrokfo yafothar bi wom habhirn muhmor. To finji tfit yakhato ninn tfit herhoya?”   
\s1 Bro Nkifrarhu kmitpno brbo niamoko  
\p
\v 18-20 Tfit afo waduka nmoh nkifram hikmoa yihotati tfit nom arihat hikwa yihotat. Nom arihat hikwa nfri yihotat nhai wom kfo rafo mrokfot rhukaht Bro Nkifrarpno brbo yinyeft. Bingot nkifram hikmoa yihotarn to finji kforuhanom? Bro Nkifrarpno brbo yinyeft be tu mfro fakrmemoum. Bro Nkifrar barkof boririfhu mrokfom hemo yiha yura kminysoftnko yawihnehato mirhuhato pthamohat, nhai marimom, “Ptha finji narahnom?” Tuha kmi tpit rim tohneft kfomohat be fura yakrme rifhurpno rim tohmom. Bro Nkifrar bro kfo kars mrokfom kfo memorm, “Wom fohr kmi tpit yarim tayouti duha. Rim tayoutineft tahiye tahiye fryebhoh gukfot.” Nd mrokfot wanyhato fanhomom. Kmi tpit rim tohhato kmi mfhar wuhtimomr kahr wafuna sinyahato yura mountko toh hamuhmor kah funefr. Nd yuht kminysof bugat grib rifhut thu kasi bugamott. Mount wumirmohat yuht bbinysofett mir bugamout. Toh bu wiform wasinya-mohat be tuha ktpir ktpirt tohmom. Asha tfit wanymomko fumrrko toh-mohat. Fumrr tohnimotr tfit kto Bro Nkifrarhu tngt wanymomt. Bro Nkifrarhu tngt wanyhato be tuha mifoh rihanimom. Miyoh rihanihato Mosesr kfo memomr, “Mosese, apthawahr Bro Nkifrar nom kakrmitwonom Bro Nkifrarhu tngthu wanyneft.”  
\v 21 Nki-fram nd tamoh tamoh nefm Bro Nkifrar yawihnamo yiha htimohat masat fanhomom. Mosesr to inji fanho bugamom. Mosesr memor, “Na to inji yakrmitayann kangm gi nunes kekwota.”   
\p
\v 22 Nd mrokfom bi kfim, yatk yiho-tarhu mrokfom wanuko. Tfitn nfri yihotat wadukakomt. Nd nfri yihotar niamokomn be turpno brbo niamoko turhu kmirn. Hefenrhu kminysof Saionr mfnahmoko. Nd kmir Bro Nkifrarhu bro kmiyer. Kutewunomr hefenrhu Jerusalemr. Tu be yonmari rifuhet mounmotm grha yindhor hasiwa kmir mfnahmonom.  
\v 23 Bi nd Bro Nkifrarpno nohnita yimam rifinywa kmi hefenr mfnahmoko. Rroh fasoh nefm Jisasr bi yak thuhemotrm Bro Nkifrarpno tohwomko. Bro Nkifrarhu nkati yonm kanjo tohwomko bi. Rroh yufam Bro Nkifrar htamorm nd kmi hefenr tohyuk yimaroh yufa htayuk gonborngtn. Bro Nkifrarpno niamoko. Turparn yimam ndar bbinysoft tohwa nmbuham kak nhtewurm yimaroh toh nmbuham.  
\v 24 Bi Jisasrpno niamoko. Tor rorrpar nd nfri yihotar kndh hanyhato Bro Nkifrarpno mkndh fnahmorr. Jisasr turhu kkupaye thu pprihato nmoh fasoh nefm yak thumo tkitt mfnahmoko. Jisasrhu kkut Bro Nkifrar htihato nom nhai kfakkfot rorpno brbo yinyeft. Ken, Aberrof namo neft rot nndo. Kenr sinyahato Aberr wasmohat Bro Nkifrar htimort Aberrhu kkutn. Bro Nkifrar htimohat duka memor, “Nd yimar Aberr wasyukr tawo yak tutfaruhanr.”   
\s1 Bro Nkifrarhu mrokfom wanyeft mirahko awany ffi hasonom  
\p
\v 25 Ndnettn duka marnyakfot. Bingotrhof gnngr yakitoh hanyhato arihat Bro Nkifrarhu mrokfom wany-neft mirahko awany ffi hasonomm. Bingot nmoh nkifram to inji namom. Bro Nkifrar Sainait mirhuhato kfomo mrokfom nhai wany yakiormomm. Turoh nd wany ffi haso nmbuhatn Bro Nkifrar fak tutfa wurasohmorm. Tfit arihat hefenr rhuhato pthewatrm wanukwonomm. Nd mrokfom ror pthiwam nom wany yakio duha rhuneft finji dukewako? Hifa rhurahnom? Be tu nhai mif.  
\v 26 Bro Nkifrar Sainait mirhuhato pthamohat nhai wom shrt rfnrmot. Tfit arihat mekahtr, wompam finji anaya, waduka marnya hany-swako. Mrokfot bi kfo htatamort. Kfo memor, “Wompam mekahta finji anaya, nhai be bbinysofrpat finji narhota. Nhai. Mounti bbinysoft rpat mirahm nndo nunes kekwotf.”  
\v 27 Ndt nom dukaf hanykfot. Bro Nkifrar kfo yamukohat, “Wompam thu ninor-ruhanf mounti bbinysoft,” ndt duka-kfot. Mekahtr finji akfoya, be nhai wom tamohm rhuruhatm. Mibatiniyuk tamoh tamohm nd yiha yak bati thurahrm. Rhu hanyukrpam myak htanirahrm.   
\p
\v 28 Ndnatn nom yimanom turhu kmi hefenrhu shrkaroh tohukatohnhoyuknom fak htamornom. Nhai marimor, “Hta tefikahanm tfit kto yak batiruhanm.” Nhai. Bro Nkifrar yuhu-wafhato hifa kak hta marnyewurnom. Nom nd rorhu yuhuwaf nmbuhat htihato kfo yindhorkfot. Nmoh yima yuhum yakrmi hanykfot rorhu mrokforoh hanyjbornaneft. Yakrme hanyhato kfo bruttnakfot. Bro Nkifrar nmoh kfo bruttnaneft wanyhato yima yuhur yindhorrahrr.  
\v 29 Yimam rorhu mrokfom hanyjbornaneft, to be kahthu mikur gufuhaniyukem.   
\c 13  
\s1 Bro Nkifrar hti yindhorwa nefm kanga akfo nuhasanko  
\p
\v 1 Niko tuko Bro Nkifrar yak hikwako tuko nayak marnya nayak marnyakfot.  
\v 2 Kmi kmiroh yimam Bro Nkifrar kak hikwomr. Ndnettn wom kmithur niewur ni womnhu kmit, ni womn yakhato hifa rikabukurn yak htakfot. Bingot tohmo nkifram to inji namom. Mounmotm yima mif tham yak nhombranamoatm memoum, “Yima mifm kak marnyewu-nom.” Kto hti duka tungunahato kfo memoum, “Be merfotnom ahti marsisafonomm, be Bro Nkifrarhu mounmotmn hti marsisaforfonom.” Kto inji dukamoum.   
\p
\v 3 Niko Bro Nkifrar hikwako, nikmoh womr kalabus kak htewumr, niko womko rorhu krhopam yaknhokfot. Ni nd kalabus tohneft ni nhai wofnkahn be turpa krhopam yakneft. Wom yi tohnhoneft ni yindhorwo. Womm krhopam yakneft rpahtet neft nakfot.   
\p
\v 4 Wom met yindarif bi fak tatrutmf nd sawohf yifammam heyuk mrokfo yuharpamn hikkfot. Yindarim bi metetm turoh metrpampno yikfot. Mirahko arim fnahni mfnahninom wom wom metmpno. Metm nhaf inji buga. Niko tukmoh yindarirpampno yikfot. Mirahko wom wom yindarim-pno arim fnahni mfnahninom. Yimam inji rine wuneyetm kto Bro Nkifrarhu kotkfotn tohrahm.   
\p
\v 5 Yo mirahko be maruharoh dukefrpar arhu hasonom. Finji finji harhuwoko ndrpampno rhukfot. Mirahko masat masat marut yakkah-nomn maru wuska buharn arhunom. Finji korhwo Bro Nkifrar htitworn. Bingot yatk rfa borngtn kfo memor, “Nikmoh rhu nmbuham nhai hti marsisarhotanko. Nikmoh rhu toh nmbuham nanhu tirmn rhurahko.” Bro Nkifrar bi inji kfomor.  
\v 6 Ndnettn nom toh bmtahato kfo mekfot,  
\q1 “Na nhai yakrme hanyrhota tamoh tamoh nefm yimam finji naneft.  
\q1 Yimam finji naneft Bro Nkifrar tor hti yukatohaf hany-rahra.” \rq Sng 118.6\rq*   
\s1 Nd Jisasr hingrnamo yuhat hikneft mirahko awohsisnom  
\p
\v 7 Bro Nkifrarhu yon kunys tohuka-tohmoa yimam mirahko duka mmonomm. Romn hifa tohhato Bro Nkifrarhu mrokfot kfo pthamotmt wanymokomt. Rom tohmohat be Jisasrn hikhany hik hanyhato be mnohmom. Nhai thu trohrmomr Jisasr. Niko rom Jisasr hikmo hikeft hikkfot.  
\v 8 Jisasr rom toh hbhamo kindo nom toh hbhewurnom yo toh hbha hatohrahrm wom yimam.  
\v 9 Ndnettn mirahko nd wom wom mro-kfomn wanykahnomn Bro Nkifrarhu yihotat ayau htafnomt. Mirahko nd nkifram hik hnamo kfo tebos mrokfom, nd tir kifsaneft, yuk fnahneft, mirahko nd nd yak kars hingrneft ahiknom. Be nd yeshri ye karsnefrpat hikruhakomn Bro Nkifrar nhai hik marnyahato toh bmtaruhatko. Nd yatk boririfhut mumafkfot. Bro Nkifrar nom hti yuhuwafmo nmbuhat nom htihato Bro Nkifrarhu yihotarn tohhato toh bmtakfot.  
\v 10 Jisasr nmoh fasoh nefm bi hanohmorm. Yimam nd yatk nkifram hikmo yihotar yaurahm be Jisasr nhai yak thuhiruhatr rroh fasoh nefm.  
\v 11 Bingot nkifram yakitohmoa yatk tarioh mtha yuhat, inji namoum. Yemror wasmoumr. Nd yemrorhu kku mmbrm bro tohak prisr yaknimoarm Bro Nkifrarhu rhuyuk rumtn hanyhato thu pprimoatr Bro Nkifrar hta wunafhemourm fasoh nefm. Kkut Bro Nkifrarhu rumt hanymoumt, yemro nyisoftne wuri hanymoamtn tarioh-moumt. Yemro nyisofm hanymoamm kmi yoh tmbhefmn tariohmoumm.  
\v 12 Ndnettn Jisasr nohmohat, nhai yiro Jerusalemtn nohrmor. Kmi Jerusalem gnat hehurnihato nndo busafon furako was nohmomr. Nmoh fasoh nefm rorhu kkut fak thumotm. Yak thumottm nom ndnatn Bro Nkifrar kanjo fak htamornom.  
\v 13 Ndnetnomn nd nkifram hingrnamoa yatk yemro tarioheft mong trohkfot. Tfit Jisasr hingrnamo nfri yihotat hikkfot. Nd Jisasr hingrnamo yuhat hikneft yimam kfo yimtnarahmnom. To mirahko awohsisnom. Yimam kmi taunthu briahako nohyukm faso haninge kfo yukioh inji namoumm. Nom Jisasr namo yuhat inji narahmnom yimam.  
\v 14 Yakrme duha. Nd asha bbinysoft nhai wom taunt rhu nkifranikaht. Nhai. Nmoh dukefm be yikfot kto rhuruha kmi hefenrn.  
\v 15 Jisasr bi nmoh fasoh nefm mhanohmorm. Ndnettn nmoh bro kfo yindhor nmbuham Bro Nkifrarn kfo yindhorefm yikfot. Nhai tfit wom finji kfokfot. Nhai. Nmoh kfo yindhor nmbuham Jisasrpar yikfot.  
\v 16 Met yindarim dborioh nefm yak nuhaskfot. Wom hmbresham o tamohm kak nafwom, niko yakhato hekfot. Mirahko womroh wuska hanyeft ayafhonom. Bro Nkifrar nikmoh dborioh nefm htiruharmn yindhorrahrko.   
\s1 Bro Nkifrar yak marnyarahrnom  
\p
\v 17 Nikmoh nyingako tohekwa yimam yiha yiha kukatoh marnya hasiwumko. Kto nd rom hingrnewa hingrneft Jisasr kfo nuhasrahmr. Ndnettn niko rroh mrokfom yak hikrahkomm be rom ndt htiruhamn rroh hingrneft yindhorhato hingrna marnyarahmt. Tfit niko mhta yuhu-wehrahko tawo rom mhta yuhuweh-hato nhai hingrna marnyaruhatm.   
\p
\v 18 Nmoh toh nmbuham wakfo bruttnatwakmnom. Nom tunmoh rhu nmbuham nhai wom fasoh rhu nmbuham htikahnom ndm htihato btn Bro Nkifrarpno brbo yinyeft yimtnakahnom.  
\v 19 Nanhu bro dukeft dukewa nikmoh nia htineftn. Ndnatn kanga, wakfo bruttnakahtko Bro Nkifrar yihotat hingrnahirhotra, nia htiruhanko.   
\p
\v 20 Na tawo niko dukahato kfo bruttnewanko. Kanga kfo bruttna-kahtanr thu bmtarahrko. Yo yima yuhum be rhu marnyarahmko. Nhai tamoh tamoh dukefm yakruhatmko. Nd Bro Nkifrarn Jisasr yopt rhumohat tfit thu kasinyamorr. Jisasrn nohhato nd nmoh fasoh fasoh nefm mhanoh-morm. Nd ror nohmo yiharpa Bro Nkifrar yihato mtoh nkifraniyuk yihotat fak nukakmort. Nom tohukatoh thombat yimam sifsifm tohukatohwa kanjo inji tohukatohwornom.  
\v 21 Kfo bruttnewa kanga, “Bro Nkifraye, wathu bmtakahtnm be ni Bro Nkifranhu yima yuhurpar hikrahm. Yo rroh toh nmbuham be ni Bro Nkifranhu dborioh nefrpam hikrahm.” Inji kfo bruttnewanko. Jisasrn yima yuhum yak hta bohtaruhatrko, wiyauyau marnyarahko. Wiyauyau marnya-ruhatko Bro Nkifrar hti yindhorrahrko. Yiha yiha rorrpar nom kfo yuta yindhorkfot. Be injirpa.   
\s1 Wuroh kfo yindhor mrokfom  
\p
\v 22 Barenko, bro mrokfot kfiwanko, na ndar gontwat htewa mrokfom hti marnyakfot. Nikmoh toh nmbuharoh kfo bmta mrokfoyem. Nhai be yuke mrokfom kfokahanko. Nhai.  
\v 23 Wom mrokfot kanga akfo nuhasanko. Timotir, nom ndar hingrneft hingrnanhomoa yimar, kalabus yimohat, bi fnahnihato toh furewur. Bi yudbat nia mhtitwo-rane, rpat niahato mhtirahnonko.   
\p
\v 24 Na asha tohwohat dukahato kfo yindhor mrokfot kahukwanko niko tohak yimako yo Bro Nkifrar hikwa yima bugako. Ako kantri Italithu yimam, Bro Nkifrar hikwam, rom nhaf dukewamko kfo yindhor mrokfot kahukmko.   
\p
\v 25 Be injirpa Bro Nkifrar toh natwih bugarahrko.