\id EPH -Ephesians NT2088 Alamblak -Edmiston 23-Sep-2003 
\h Efesus 
\toc1 Efesus thofroh gontwat  Porr dwandfakhato htafmot 
\toc2 Efesus 
\mt1 Efesus thofroh gontwat  
\mt2 Porr dwandfakhato htafmot  
\is1 Barkof kfo nuhas mrokfom  
\ip Ndar gontwat Porr kalabus tohhato wandfamort. Be wandfamortn Tikikusr hiyafmotr rorn Efesus thofm hanyhemor. Porr hus bro dukeffpno ndar gontwat wandfakmortn Efesus thofmpno htafmort. Barkof kfo nuhas mrokfot kfo memorm, “Kto ndar mounti bbinysoft yorhwa tamoh tamohm Bro Nkifrar yakruharm tfit Kraisrhu tirtn htarahrm. Be tfit Kraisrhu yinhitn rhurahm” (1.10). Ndm kfo nuhashato kfo bmta mrokfom hemorm. Kfo memorm, “Ndar niko htita tamoh tamohm mount yorhwam yo bbinysoft yorhwam kto Kraisrhu yinhitn be rhu bugarahm. Ndnettn niko be rpa yima yuhurpar rhu bugahato Jisas Kraisrpno frtkafhato tohkfot.”  
\ip Barkof mrokfom Porr pthamom afo nd rpa yima yuhuroh toh nmbuham ndm afo pthamor. Kfo memor, “Bro Yifemr kfo hta memor, nom rorhu yon kunyenom. Turhu yon Jisas Kraisrn nom hatohyuk fasoh fasoh nefm fak wus bowusthumorm. Yima yuhum wutham rhumotm, Bro Nkifrarhu Yafothat niahato mithu nawohhato nmoh rhu nmbuham hifa rhuhato rpa yima yuhur korhnom.” Wuroh mrokfot Porr nd kfomot kfo memor, “Niko bi Kraisrpno nayakitohhato tohwoko, ndnettn wommpno nayak marnyahato toh marnyakfot.”  
\ip Nd Kraisrpno nayakitohhato wommpno nayak marnyahato tohneft Porr bok kfo nhombra mrokfom kfomor. Barkoft kfo nhombra memor, “Sioskfot yimar kanjo inji korht. Tu Kraisrn mfhayer. Sioskfot o Kristenm tir wura nd ndem.” Yo womt kfo memor, “Sioskfot kunyr kanjo korht. Kraisr dany rahur kanjo tohhato nd sioskfot hatohwort. Kristen yimam nd dany rahur hatohwa kunyrhu wohnfa hegir tik nd ndem.” Yo womt mett kfo nhombramor. Kfo memor, “Sioskfot metet. Kraisrn ramemer.” Nd nd kfo nhombra mrokfom kfo hta bohtamorm. Porrhu bro dukefr Kraisr yuhuwafhato yura bgre mis mnohhato fasoh fasoh nefm yak thuhato yiha yiha yak marnya bomarnyewa yuhamn ndm kfo nuhas bonuhasmorm Efesus thofm.  
\c 1  
\ms1 Kraisrhu kkupaye Bro Nkifrar fak wus bowus thumorm yimaroh fasoh fasoh nefm  
\mr (Sapta 1—3)  
\p
\v 1 Na Pora, na Jisas Kraisrhu aposer hingrneft tohwa. Tu Bro Nkifrarn nd hingrneft fak htamora. Nann ndar gontwat niko Efesus thofkmoh yufatpno htefiwant. Niko Bro Nkifrar hikhato Jisas Kraisrpno rpat tir nayakitohhato tohwako, nikmoh yufampno ndar gontwat niewut.  
\v 2 Bro Yifemri nmoh Nungothet Jisas Kraisr ayak marnya bomarnyakahtfko nikmoh yima yuhum mirhurahmko.   
\s1 Nd rhu marnyayuk yafothar nomn bi kukatohwor  
\p
\v 3 Bro Nkifrarhu yufat yuta yindhor boyindhorkfot. Bro Nkifrar nmoh Nungothet Jisas Kraisrhu Yifemer. Nmoh toh nmbuhat Kraisrpno nayakitohhato hifa tohwatnom Bro Nkifrar inji htihato nd hefen rifhur yorhwa dborioh dborioh wuskar yak hirahrnom.  
\v 4 Bi ndar bbinysoft tafi hingrna duha bi Bro Nkifrar kfo hta memor, Kraisrpno tir nayakitoh-ruhanomn tu Bro Nkifrar kanjo rhuhato yima yuhum wutham rhuruhamn nhai wom kspitefenm rhuruhatm. Bingot Bro Nkifrarhu yima yuhur bi nompno riruhakmor.  
\v 5 Ndnettn yima yuhur bi Jisasrn duka hta memor, “Jisasrn nohruhatr nd rroh yarim fnahna yuhat yak nukakruhatrt be nd yiha nanpno yarim fnahnehato nanhu yufatn rhurahm.” Inji duka htamor.  
\v 6 Bro Nkifrar nmoh rhu beb nmbuhat htihato be tu bro yuhuwafeft rhumotr. Ndnatn turhu marbit htamoa yonr yakmorr nd yuhatn htamorr. Nd yonr inji htamohat nhai wom dukefm yakitohrmor. Bro yindhoreftpno htamorr. Nom nd Bro Nkifrar yuhuwafmo nmbuhat mhtiyakhato Bro Nkifrar be tu mfro kfo yindhor boyindhorhato rorhu yufat yuta yindhorkfot.   
\p
\v 7 Bro Nkifrar nom be tu mfro mif yuhuwafhato rorhu yon Jisas Kraisr niahato nmoh fasoh fasoh nefm rorn suh nanyormotrm nd fasoh nefm wuthanimom. Bro Nkifrar be mong troh bugamorm nmoh fasoh nefm.  
\v 8 Bro Nkifrar yuhuwafmo nmbuhat finji kforuhanomt? Rorhu yuhuwaf nmbuhat be tu bro mift rhumot. Bro Nkifrarhu riduka aduka yima yuhur be tu bro mifr. Hingrneft finji yiraht o ruheft finji rhuruhat ndm bi yak tkaftetm kakitohworm.  
\v 9 Kraisrpno hingrnamo hingrneftn fak dukamot-nom rorhu wom yima yuhur rhu kafrohmoa dukefr. Nd dukefr be rorhu yima yuhurpar duka htatamorrn be rhumour. Nd yiha mfrpskenamor.  
\v 10 Bro Nkifrarhu yima yuhur yorhwa bro yima yuhur to be bi inji rhu hik hanitr. Rhu hikhany rhu hik hanyruharn nd tur bi duka htayuk yiharn be nd mounti bbinysoft yorhwa tamoh tamohm be Kraisrhu tirtn htaruharm be Kraisrhu yinhit rhu bugarahm.   
\p
\v 11 Bro Nkifrar bi tur duka htayuk dukeft hikwarn tamoh tamoh nefm rorhu dukefrn rhu hik hanitm. Nom Judanom to nhaf bi tu Bro Nkifrarhu dukefrn memor, “Nd kmim Kraisrpno tir nayakitohruhamn Bro Nkifrarhu yon mifm rhurahm.”  
\v 12 Nom Juda-nomn tu barkof kminom Kraisrhu mrokfom yakhato hikmonomm. Nom nd kminomn bro nuka nanyjareft hatohet Bro Nkifrarhu yufat yutahato kfo yindhor boyindhorkfot.   
\p
\v 13 Niko yima tangiko to bi wanye-teko gutnius mrokfot. Nd mrokfot wanyhato hikmotkomt, Bro Nkifrar inji htihato fakmorko. Yakhato nikomi nom bi Bro Nkifrarhu yon bugayenom. Bro Nkifrar tur kfo htayuk mrokfot hikhato turhu Yafothat thu hmbremorko. Bro Nkifrarhu Yafothat hatohet yimam to be bi Bro Nkifrarhu yimayem.  
\v 14 Nom Bro Nkifrarhu Yafothat yakmo yimanom to bi tot barkof htatehyuk minghat. Ndt nom mhtiyakhato duka mekfot, froh frohnom bi Bro Nkifrar yakhato bi rim tohni bugiwanom Bro Nkifrarpno mrhuruhanomn hirahrnom nmoh yufampno yorhwa tamoh tamohm. Ndtpno nom nd bro nuka nanyjareft hatohet Bro Nkifrarhu yufat yutahato kfo yindhor boyindhorkfot.   
\s1 Porr kfo bruttnamo yuhathu kfo nuhas mrokfom  
\p
\v 15 Na wanyakmoya niko nmoh Nungothet Jisasrhu mrokfom wany yakiohato hikwa yuhat yo Bro Nkifrar hikwa yimam niko yak marnyewa nmbuham.  
\v 16 Nd ndm wanyakhato na kfo bruttna thombat Bro Nkifrar nikmoh yufam yutahato kfo yindhor-wanr.  
\v 17 Nmoh Nungothet Jisas Kraisrhu Bro Nkifrar, tu bro nuka nanyjareft hatohet Bro Yifemr kfo bruttna thombat kfo kanganr, “O tunga Nkifraye, nmoh Bro Yifeme wayak hta bohtakahnm riduka aduka yima yuhum wahanym. Wahekahtnm ninhu mrokfothu yimbu yuhat yak-rahmt. Yakhato mhti dukakrahmn. Mhti dukakruhamn ninpno nia tohrahm.”  
\v 18 Yo womt na Bro Nkifrar-pno kfo bruttnewat kfo kanganr, “Bro Nkifraye wom riduka aduka yima yuhum wahekahtnm, ninhu naku tngr htafmor nhai yak mmotaruhatmr. Yima yuhum wahekahtnm duka mirahm, ‘Bro Nkifrar nakumohat, nmoh rhu nmbuhathu yak marnya nmbuha yuhatn nakumornom. Nom rorhu mrokfom hikhato rorhu Kristen yimanom tohwatnom dborioh rhu nmbuhat hirahrnom. Nd dukefrn nakumornom.  
\v 19 Dborioh rhu nmbuhat yakruhanomn Bro Nkifrarhu bro bbukeft nierahtnom nom Kristennom.’” Nd bro bbukeft nompno hingrniwat,  
\v 20 to nd bro bbukeftn hingrnamot Kraisr nohmohat. Kraisr bi nohniyetr to Bro Nkifrarhu bbukeftn kfomot Kraisr tfit myenyjwohato Bro Nkifrar yaknimorr hefenr hamuhhato tirmifko htamorr.  
\v 21 Kraisr tu Bro Nkifrarhu tirmifko yorhwatr bro bbukeft korhtr. Kminy-sofroh nkiframi hefenr yorhwa mounmotm rorn yura mtohekworm. Nd bro yimam, gafman yimam, nd bro yufet bro yufet yimam rorrpar toh wasitrm. Arihat yorhwam yo kto rhuruham be rorpar toh wasi hany-rahrm.  
\v 22 Tamoh tamoh hingrnefm, rhu nmbuham, o tamoh tamohm Bro Nkifrar to bi Kraisrparhu tirtn htamorm. Rorn yura mtohekworm bi. Ndnettn Kraisrn sioshu tohak yimar fak htamor.  
\v 23 Nom sioshu tuhan yindarinom Kraisrn nmoh yima mrokfo rifuher. Sioshu tuhan yindarinmoh rhu nmbuhat yau nmbuhat Kraisrn kakitohwort mnat.   
\c 2  
\s1 Bro Nkifrar nmoh yafotham yakmorm kafknehemornom  
\p
\v 1 Bingot tukmoh hanyjbornahato fasoh fasoh nefroh naneftpno yima yafotham bi frfnahmomn bi hel yita yihotarn bi yi hanymom.  
\v 2 Ndar bbinysofthu fasoh fasoh nefm niko yakitohhato na hnamoam, to ndar bbinysoft yakitohwa tmb nyingetr, kutewumr Satanr, rorhu nefm fak hik hnamoko. Bro Nkifrar hanyjborniwa yimaroh toh nmbuham rorn kak hta bohta hnewurm.  
\v 3 Nom buga to nd nefm toh bugamonomm. Tunom mhatoh fnahyuk fasoh nefm fakitoh hnamonom. Bi nd tunom nayuk fasoh fasoh nefmn yak hikafmotmm nmoh yafotham fnahhato bi hel yita yihotar bi fak mmbrafiny hanymom. Be wom yimam kanjo mekahnom nd nefrpam atoh hik hanynom to be Bro Nkifrarhu namburpam yakrfonom.   
\p
\v 4 To hifa Bro Nkifrarhu hti dukefti yuhuwafeft tu brot rhumot.  
\v 5 Kraisr-pno nayakitohmotnom nd nmoh yafotham yak mmbrafinymoam, Bro Nkifrar yakmormn tfit kafknehe-mornom. Hifa Bro Nkifrar hti yuhu-wafhato fakmornom.  
\v 6 Bi Kraisrpno tir nayakitohetnomn to be Bro Nkifrar kafknehemornom. Kafknehato rpat Krais Jisasrpno hefenrhu king hingrneft kakitohnuhiwunomr.  
\v 7 Nd Bro Nkifrar nom hti dukahato Kraisr hemohat, rorhu tu bro yuhuwaf nmbuhat rhumoatn fak nuhasmornom. Duka memor, “Kto toh hanyuk yimam ndt duka hanyhato ptha tndh hanyrahmt nanhu yuhuwaf nmbuhat.”  
\v 8-9 Ndt nhai tukomn fitoh fitoh yuham yihato Bro Nkifrar htihato yakmiyakrmorko. Nhai. Ndnettn mirahr wom yimar sinyakahann akfo hagrhaya. Nikmoh yima yuhum Kraisr bro dukefm htahato hikmo yuhatn Bro Nkifrar hti yuhuwafhato fakmorko.  
\v 10 Jisas Kraisr nohmotr to be nd yuhatn Bro Nkifrar htihato nmoh yima yuhum yak marnya bomarnyamormn memor, “Na dukewa dborioh dukef yuhatn tfit toh hikrahm.”   
\s1 Kraisr hnamorr gbhu mtir  
\p
\v 11 Niko yima tangiko, niko tfit wamdukaktwakomt niko tafi Bro Nkifrarpno yarim fnahna duhatko tohmohat. Nikmoh nkifram nhai Judam kanjo tha puk hnarmom. Nd yuhatn Judam kutewumko tha puk duha yima tangim.  
\v 12 Niko Kraisrpno tafi nayakitoh duha, nhai bi Bro Nkifrar kfo htayuk kmi Isrermpno bi fknehato rompno nabnothato tohrmoko. Nhai. Niko be inji yau fohm kanjo tohtamoko. Bi frohmn hti dukahato yakrmomko. Bro Nkifrar Isrermpno nakfo tahihato kfo memohat, “Niko Isrerkomn nanhu tannefen mif mifeko.” Inji nakfo tahimohat niko nhai bi yakrmorko Bro Nkifrar. Ndnettn Isrerm yak marnyamo kanjo nhai yak marnya hnarmorko.  
\v 13 To tfit arihatn Kraisr nohmo yuhatn Kraisrpno tir nayakitoh-hato Bro Nkifrarpno brbo tohwoko.  
\v 14 Kraisrn nd gbhu mtir hnamorr. Rorn Judami yima tangim yakhato rpat fak htamorm. Barkofpam afo Isrermi yima tangim Mosesr yakmo nkifra boririfhuthu hik yuhamn fak tndohmotm. Yak tndohhato nahti dbnotmoum. Tfit Kraisr nohhato rorn gbhur hnehato rpat fak htamornom.  
\v 15 Kraisrn niahato nd Mosesrpno yakyuk boririfhu mrokfomi wom kfo yirmoh mrokfom rpat fak thumorm. Nhai be sfno. Barkofpam afo nd boririfhutn Isrermi yima tangim fak tndohmotm. Kraisr nd boririfhut yak thumortn be tfit rorpno rpat fak htamorm. Nhai wom nakfo yiriti inji nakahm. Be bi rpat rhu yemska inji newum.  
\v 16 To be bi Kraisrn yura bgre mis mnohhato Isrermi yima tangim yak nhafohhato rpat fak htamorm. Rpat yak htahato be Bro Nkifrarpno rinayakmiyakhato rinfak nanymakmom.  
\v 17 Kraisr bbinysofko yawihnehato gutnius kfo ptha memor, “Niko kmi kmiko, nikompno nhai bi wom mro-kfom Bro Nkifrarpno. Bro Nkifrar-pno nayakmiyakhato nayak nanyma-rahko.” Nd tngr niko wuri ritohtewa yima tangipakomi Bro Nkifrarpno brbo toh tkafwa Isrer tangim, niko rpat dukahato nd tngr kfomorr.  
\v 18 Bro Nkifrarhu Yafotharpat bi hatoh nhombra bugewunom yima yimanom. Nd yihotar Bro Yifemrpno yiyukr Jisas Kraisr yak htakhemor, nd yima yimanom hatohwa Yafotharn hta tehak hanitrnom.   
\s1 Kristenm Bro Nkifrar mithu nawohwa kunyem  
\p
\v 19 Niko yima tangiko afo gobiyenm kanjo miswamn ttaf hnamoko, tfit arihat nhai bi inji rhukahko. Arihat bi bbinysofeteko. Bi nd Bro Nkifrar yakitohwa kmimpno bi fknihato bi rompno rpat tohwoko.  
\v 20 Niko Bro Nkifrar hingrnayuk kunyrhu hegir, wohnfa, tikeko. Nom aposernomi profetm nd kunyrhu wohnfa rahuye-nom. Tu Kraisr dany rahuyer.  
\v 21 Tu Kraisr nd kunyrhu dany rahur tohhato kunyr hatohwatrr, kunyrhu hegir, tik, wohnfa, tamoh tamoht, rpat nathu dbkaf kihhato korhm. Nd kunyr Bro Nkifrar yuhre yiho hiyak hanitrr. Yiho hiyak hanitatrr kunyr tfit brota hanitr. Brorhu ye wussohyuk kunyr korhr nd kunyr.  
\v 22 Kraisrpno nayakitohwa yuhatn, to be Bro Nkifrar yekwarko nd rpat kak htewurko. To be Bro Nkifrarhu Yafothathu tohyuk kunyko korhko.   
\c 3  
\s1 Porr gutnius mrokfot yima tangimpno hanyhato ptha htfasmo yuhat  
\p
\v 1 Na Pora, na Krais Jisasrhu hingrna yimaya. Na kalabus tohwohat nhai wom tamohmpno kalabus yak htarmoma. Kfo yamukota, yima tangi furam bi Bro Nkifrarpno fknihato tohwom. Inji kfiwuta kalabus fak htamoma.  
\v 2 Na nikompno yihato gutnius mrokfothu kfo ptha nuhas hanyeft ka bi wanymoko. Bro Nkifrar niko hti yuhuwafhato nann fak htamor nikompno yihato kfo nuhas hanyeft.  
\v 3 Nd yima yuhur be Bro Nkifrarparhu yima yuhurpar rhumour. Kto nanrpa-yanpno fak nriyafmorr. Ndthu kfo nuhas mrokfom to bi ndar gontwathu barkof htamo mrokfomn kfo nuhas-moyanko.  
\v 4 Nd Bro Nkifrar Kraisr htafmo yuhathu kafrohet yima yuhur na yakmohat, ndar gontwat yorhwa mrokfom hti hik marnyewukomme, ee btn hti hikrahkomm na nd rorhu kafrohet mrokfom yakmo yuhat.  
\v 5 Bingot toh hnamo yiham Bro Nkifrar nhai wom yimampno kfo nriyaf hnarmorm rorhu yima yuhur rhuyuk mrokfom. Asot ariharpa tu Bro Nkifrarhu Yafothatn nom rorhu yak htamo aposernomi profetmpno kak nuhaswotnom nd kafrohet mrokfom.  
\v 6 Nd kfo kafrohet mrokfot inji kfiwut: Nd gutnius mrokfot nikompno yitat niko yakhato hikrahkomt, to be nd yuhatn nom Judanmoh skurfitn yarim fnahnerahko. Nompno yarim fnah-nehato nompno rpat tohhato nom yakitohwa Nkifrarpar rpat yakitohrah-nom. Kraisr rpat yakitohhato tohruha-nomn tamoh tamohm Bro Nkifrar kfo htayukm mekahtr, ahiyanm, niko rpat yakrahnomm.   
\p
\v 7 Bro Nkifrar nann hti yuhuwafhato fak htamora gutnius mrokfothu kfo ptha htfasneft. Nd hingrneft yak htatahato gutnius mrokfothu kfo ptha htfasyuk mrokfo yafothar tu Bro Nkifrarhu bbukeft kfomot, nd mrokfo yafothar nann muhmor.  
\v 8 Barkofpam afo Kraisrhu sioskfot fak beb hnamoya. Inji nahnamota fasoh yufa bebt fak-moya. Tmift, Bro Nkifrarhu yuhuwaf nmbuhatn wom hingrnafat fakmora. Yima tangiroh gutnius mrokfothu hanyeft dukahato nd hingrneft fakmora. Nd gutnius mrokfot, Kraisr nompno hingrna hta bohta marnyewa yihotaroh gutnius mrokfoyet.  
\v 9 Bro Nkifrar ndar bbinysoft hingrnanimohat rorhu rhu kafrohet yima yuhur nhai tafont htarmotrr yimam wany bugarmomr. Arihatn nd rorhu yima yuhur rhuyuk mrokfom nann kfomor kfo ptha htfasneft.  
\v 10 Arihat Judami yima tangim bi rpat fak nhafohmormn bi rpat Bro Nkifrarpno fknihato rpat tohwom. Inji yak htamohat duka memor, “Kminysofroh nkiframi hefenr yorhwa mounmotm htirahmr nanhu riduka aduka yima yuhur rhu kafroh-moar.”  
\v 11 Bi bingot Bro Nkifrar nd dukefr bi duka htamorr. Tfit arihat nmoh Nungothet Krais Jisasrpno nd dukefr mfrfnahnamotr htimonom.  
\v 12 Kraisrpno nayakitohhato rorparpno yima yuhum htarahnomm, to be nhai duka kinyaki hanyruhatnom Bro Nkifrarpno brbo yihato tamohm kfo pthaneft.  
\v 13 Niko mirahko tfit na yekwa krhopam mhtiyakhato gutnius aduka amanyom, “O, nom dukahato gutnius mrokfot kfo ptha nuhaswatrnom Judam krhopam kahukmr. Nom be tmifnom nhai rorpno brbo yiruhat-nom.” Mirahko inji adukanom. Na nd gutnius mrokfot akfo ptha nuhas duha yiyanko niko nhai Kraisrhu dukefrn rhurfotko.   
\s1 Efesus thofroh toh bmta nmbuhat Porr kfo bruttnamorm  
\p
\v 14 Na Bro Yifemr bro riduka aduka yima yuhurpno namo bro neft mhti dukewoyann na bangu myuknahato kfo bruttnewanr.  
\v 15 Nom yima nfrinom ror wany yakiohato tohwanom yo ror hiket yimam noh hanitam rorparhu yufatn toh bugewunom.  
\v 16 Na bangu myuknahato kfo bruttna kanga, bro nuka nanyjareft hatohet Bro Nkifrarhu Yafotharhu bbuka rifhur athu bmtarm nikmoh yima yuhum.  
\v 17 Yo niko Kraisr wany yakiohato hikwa nmbuhat, ndt kfo bruttna kanga, Kraisr nikmoh yima yuhum rim rhuhato athu yuhur-kahtrko wommpno nayak marnyahato tohneft yakitohruhakomtn toh bmtarahko mim bbinysoft nembfa thuhato toh bmtewa kanjo.  
\v 18 Niko be tu Kraisrhu marbi miftn korhko. Ndnetann kanga niko, Kraisr hikwa yima bugako afo wahti dukakomr rorhu yima yuhur. Be inji rihtewurkon o marbi mif mift htewurko? Kanga afo tukomn wahti dukakomt ror yima hti yuhuwafwa nmbuhat.  
\v 19 Rorhu yima yuhuwafeft nhai yima mifnom yima yuhuwafwa kanjo inji yima yuhuwafkahr. Nhai. Rorhu yima yuhuwafeft nndo. Na kanga Kraisr yakitohwa yima yuhuwafeft ahikahtrko ndt niko wayakitohko. Nd yima yuhuwafeft wayakitohkahkomn to be nd Bro Nkifrarhu nefrpam rhurahmko.  
\v 20 Bro Nkifrar wukfo ttiwonrahnom rorhu bbuka rifhurhu hanyeft, to be nd bbuka rifhur yakrahnomr.  
\v 21 Ndnettn tu Kraisrpno frtkafwa met yindarim Kraisr nom nrfa htiyakmo yuhatn yiha yiha kfo yuta yindhorhany, kfo yuta yindhorhanye to be inji.   
\ms1 Bro Nkifrarhu nefm hikhato wommpno nayak marnyahato rpat tohkfot  
\mr (Sapta 4—6)  
\c 4  
\s1 Wommpno nayak marnyahato rpat tohneft  
\p
\v 1 Na Pora, na kalabus tohwohat, Brorhu hingrneft uhatone hatonemoatant kalabus fakmoma. Bro Nkifrar memor, “Nanhu yonm tohrahm,” ndnetrn nakumorko. Na kfo bmta mrokfot kahukanko. Hifa nd niko womkompno yiyuk naku tngt wany fakiomokomt. To be niko mirahko tfit finji ananom, be nd naku tngr htafyuk dukefrpar toh hikkfot.  
\v 2 Wom Kristenmpno be dborioh yima yuhurparpno nayak marnyahato rpat rhu marnya bomarnyakfot. Toh nmbuhat be noh hmbre yima yuhur-pno tohkfot. Wom Kristenmpno kfo ptha yima boyima marnyakfot. Tamoh nefm be yak marsisakfot.  
\v 3 Bro Nkifrarhu Yafothatn hemotnom womm-pno nayak marnyahato rpat tohneft. Nd neftn rpat dbkaf hmbritattnom be rpat rhuhato rpa yima yuhur korhnom. Ndnettn nd neft yakitoh nhirtakfot.  
\v 4 Nom Kraisr hikwa yimanom rpa yon kunyenom yo Yafothat rpa Bro Nkifrarhu Yafotharpat kahukrnom. Rpa yima Kraisrhu duka dukahato tohneftn Bro Nkifrar nakumornom.  
\v 5 Kraisr torpar nmoh Bro Nungothetr. Gutniuskfot nhaf rpa gutniuskforpat nom yakitohhato hikwonom. Yo rpa yufarpatpno baftais kekwonom.  
\v 6 Rpa Nkifrarpar tohwor. Nd Nkifrarpar tor yima buganmoh Yifemr. Rorrpa mifr brohato nyingako tohekwor. Rorrpar tuhan yindariroh yima yuhum rhuhato kangrm inji waiko, inji wahingrnako, nd nd nefm wanako. Yo nd Nkifrarpar korhrm rorhu mrokfot hikwa yimam.   
\p
\v 7 Mrokfot rot kfo kangt nom rpa thatipenom. To rpa rpa yimanom Bro Nkifrarhu hingrneftn Kraisr htamor-nom. Turn hti nhtahato fitoh hingrneftn hingrna tafs marnyewunom, to be nd hingrnefthu hingrna yafothat yahu-katrnom hingrnewunom.  
\v 8 To be Kraisr inji yak nhtahato yimam inji yak hta nhombriwohat to be bro gonborngt kfiwa yuhatn Kraisr yimam inji kak hta nhombewurm. To gon-borngt kfo kangt:  
\q1 “Ror yura kmiko muhmohat,  
\q2 nd ror hikakhato yak nhafohmo yahr kmimn hamuhmor.  
\q1 Turn hatohakmorm.  
\q1 Yura mhtahato wuskam yak-morm kmi thofm fak nhtahemor.”\f + \fr 4:8 \ft  (4.8) Wuskam ror yakhato yak nhtamom, ndm nom yahuka yafotham kfomor.\f* \rq Sng 68.18\rq*   
\m
\v 9 To nd mrokfo nmbuhat kfo yamuka “yura kmiko muhmohat” nd mrokfote finji dukahato nd mrokfo nmbuhat inji kfomomt? Ndt to afo yiro ndar bbinysofthu kmi rifhut yohnemorn tfit kto yura muhmor.\f + \fr 4:9 \ft  (4.9) Ndar bbinysofthu kmi rifhut ror yohnemor, ndte yiro Maringour yohnemo yuhathu mrokfoyet.\f*  
\v 10 Nd yima Jisasr yiro yohnemor, yohnehato tfit muhmor. Tu Bro Nkifrar yorhwa tu kmi hefenr muhmor. Yura mrhuhato ndar yuht bbinysofti mount thu nhombra buga-morf.  
\v 11 Rorrparn ndar bbinysofthu yimam hingrna yafothar yo mrokfo ptha yafothar o tamoh tamoh nefm hi hanitrm. Womm aposer hingrnefthu hingrna yafothat hi hanitrm, womm profet hingrneft hingrnayuk hingrna yafothar hi hanitrm, womm gutnius mrokfothu ptha htfasyuk mrokfo rifhur hi hanitrm, wommne pasto hingrnefthu hingrnayuk hingrna yafothar hihato nd hingrneft tohhato Bro Nkifrarhu rfa borngt kfiwa mrokfefm kfo hta bohtewumm.  
\v 12 Kraisr nd hingrna yafothar hi hanitahat kangr, “Nd hingrna yafothar bi ahi hanykahtanm, Bro Nkifrarhu hingrneft hingrna hik marnyarahmt. Nd rom hingrna hta bohtaruha hingrnef yuhamn rroh Kristen toh yuham bmtefm yakni hanyrahm.”  
\v 13 Nd hingrneft be hingr-nahany hingrnahany, be Kraisrhu hik yuhathu rpa yima yuhurpar rhuhato Bro Nkifrarhu Yonr dukiwa dukefr, hingrnewa hingrnefr, niwa nefr, hti hik bohik bugarahnomr. Be ndnatn nd Kristen yihotar mtoh trpnirahnomr. Mtoh trpnihato be tu Kraisr tohwa toheft kanjo toh hikrahnom.  
\v 14 Inji toh hikrahnom, to be nhai tfit yon mumenm kanjo toh mmoruhatnom. Nhai toh mmo hasohato mfrnhehyuk yimam niahato frnheh bonhehaknehato dohm wifort frhammohato doh mfhar nndo yukatohwa kanjo nndo yak yukatohruhatnom. Nhai.  
\v 15 Nom rom kfo nhehwa kfo nheheft yakitoh duha. Nom yima yak marnyaneft yakitohhato tamoh mrokfom womm kfo neft, mrokfom kfo mifkfot. Ndhtet nefm nahanyruhanomn nmoh tohefm nd yuhamn yi marnyakniruhamn be Kraisrhu tohefm yakrahnom. Ror yura mfhayer,  
\v 16 tir wura nd ndm nd rpa mfharpat hatohwotm. Nd mfhat kfiwut tirthu hingrneft hingrnewutt yo mfhat kfiwut wurathu hingrneft hingrnewutt o tamoh tamoh mfharpat hikwamn hingrnefm hingrnewumm nhai tum nnakfo nnakahm. Nhai. Tum nahti duka nahti dukewamn nd thatipt rhu marnyewatn warhiwut.   
\s1 Kristenm nfri nefm yakitohkfot  
\p
\v 17 Ndnettn wom mrokfot kfiwanko. Bro Nungothetrhu yufatpno kfo nnhuwanko. Mirahko tfit Bro Nkifrarhu mrokfom yakitoh duha yita yima tangim kanjo atohnom. Nd yimaroh dukefm nhai tu rhu digr yima yuhum-pno rhukahmm. Nhai. Be inji duka mmbrafiny yima yuhumpno korhwom.  
\v 18 Rroh dukefm be inji nkrtn korhmm. Bro Nkifrarhu mrokfom mhamuh tfanihato mong trohwomr. Ndnetmn nhai Bro Nkifrarpno brbo yikahm. Be inji wuri korhm.  
\v 19 Tamoh tamoh nefroh naneft nhai wom yimtna hanykahm. Tu be nhai mif. Yima yuhum be tohetohwomm, nhai ritohak-kahm. Nndo yaum nhombrewum. Nhai yimat tuhant yakitohkahmt, o froht. Nhai.   
\p
\v 20 Kraisrhu mrokfom niko yimam nia kfo nuhasmom, nhai marimomko, “Yima tangim niwa nefm wahiktwako.” Nhai.  
\v 21 Rom Jisasr hti yindhorwa nefm kfo nuhas memomko, “Jisasr nd nd nefm hti yindhorwor. Ndm yakitoh-kfot.”  
\v 22 Kraisrhu mrokfom inji korhm: bingot niko afo nd fasoh yima yuhurhu nefm, nd womroh tamohm hti yuhur hanyeft, ndm yakitoh hnamokommn bi nd nefmn bi fasoh tkitt hta hany sitamomko. Ndnettn nd niko hatohwa fasoh yima yuhurhu nefm mong troh bugakfot. Yak thu bugakfot.  
\v 23 Tfit nfri yima yuhur yakkfot.  
\v 24 Nfri yima rifhur yakkfot. Nd nfri yima rifhurhu toheft tu Bro Nkifrarn kak htewartn turhu tu dborioh toheft kanjo korht. Nd nfri toh nmbuhat tu Bro Nkifrarhu toheft toh hikwot. Ndnatn Bro Nkifrar yindhorwor.   
\p
\v 25 Nd womroh kfo nheh, frnheh nefm be tmifm ayohnitwam. Mirahko ayakitohnomm. Niko bi rpa thatipeko, ndnettn womm tamoh mrokfom kfiwukomme, tu kfot kfokfot.  
\v 26 Womr tamohm yak nhehtrn yima yuhur namburworn, to mirahn nd nambur rifhur be tfit faso arhuni bugar. Mirahn nd nambur rifhur aharhu krifafoyanr.  
\v 27 Inji narahn to be Satanr hta tehakrahn.  
\v 28 Rikoh yimam mirahm tfit arikohnom. Rom tum hingrnakfot. Tum hingrnahato turoh tirehm yakhato womm hekfot.  
\v 29 Mirahko fasoh fasoh tng bebm akfo pthakahtnom womroh yima yuhum akrho htatamm. Dborioh mrokforpam kfo ptharuhatko womm wanyruhamn yima yuhum thu jubtwarahmm.  
\v 30 Mirahko Bro Nkifrarhu Yafothat ahta krhonomt. Bro Nkifrar nom tanrfak thombat, to tot bi barkof yak nuhasyuk minghat bi turhu Yafothat hi hanitrnom.  
\v 31 Ndnettn nd fasoh yima rifhur mfnahnewa yima kfo mari hany nefenm, yimampno namburhato nakfo huttnefenm, yimaroh kfo yukioh boyukioh nefenm, nd nd nefenm wayafho bugakomm.  
\v 32 Be dborioh yima yuhurpno, dborioh nefrpampno wom Kristenmpno yuhuwafhato rhukfot. Womm tamoh nefm newumko niko tfit dukahany juha. Kraisr nohhato Bro Nkifrar niko namo fasoh nefm yafhohemo kanjo womm nayuk nefm yafhohekfot.   
\c 5  
\s1 Mar nukeft tohkfot  
\p
\v 1 Bro Nkifrar hifa hti dukewarko, rorhu yonko korhko. Ndnettn nikmoh rhu nmbuham be tur dukewa dukef yuhatn rhu hikkfot.  
\v 2 Kraisrhu bro yima yuhur nompno rhumour. Nd dukeftpno rorn nohmor nom dukahato. Rorhu noh nmbuhat yimot dborioh narotwa gbet yemror Bro Nkifrar tarioh narotwewa kanjo. Ndnettn nom tawo womm hifa yima yuhur htakfot.  
\v 3 Niko to bi Bro Nkifrarpno fknihato bi rorhu yoneko. Be inji rorhu yonko rhu mif mifkfot. Mirahko tfit met yindarim nayak kafroh htfaswa nefm tfit ahiknom. Yo mirahko yima yuhum wabbrekwa nefm ahiknom. Yo mirahko be maruha dukefrn arhunom. Nd maruha dukefm yorhwakomn nhai Bro Nkifrar dukakahkomr.  
\v 4 Mirahko womm akfo dbotna bodbotnanomm. Yo mirahko womm fasoh mrokfom akfonomm. Yo mirahko fasoh fasoh nakfo ddonom. Ndhtet nefm tohetnomn Bro Nkifrar fakmornom. Ndnetnomn nom be rhuhato Bro Nkifrar kfo bruttna yindhorkfot.  
\v 5 Na kfo mifwanko, yimam o metm rine auniyetm o yimaroh yima yuhum fasoh nefroh naneftn be tohetoh hasiwam o maruha dukefrpar yorhwam, ndhtet yimam nhai Bro Nkifra Kraisrof kfoyuk tamoh tamohm yakruhatm. Nd nd nefm lotutwomm nkifra tahim kanjo. Dukefm be nd dukefm korhm, nhai Bro Nkifrarhu dukefm rhukahm.   
\p
\v 6 Niko waduka marnya hanyswako. Ndhtet ndhtet net yimam mfrnhehak-ruhatmko rim suhnirahko. Bro Nkifrar ndhtet ndhtet net nefm hikwa yimam namburworm.  
\v 7 Ndnettn mirahko rompno nabnothato rpat awiyauyau-nom, tu be nhai mif.  
\v 8 Niko to rom kanjo afo yiro kspitatn tohmouko. Tfit bi ariha bi Bro Nungothetrhu tuhan yindariyeko. Bi rorhu mar nukeft tohwoko. Ndnettn niko mar nukeft tohwa yimam kanjo tohkfot.  
\v 9 Mar nukeft dborioh dborioh nefm mhfnah-newutm. Nhai yau nmbuham, pthefm, rhu nmbuham, faso faso rine wunekfot. Nhai mikfota mkfotakfot.  
\v 10 Tamoh tamoh nefm nhombra bonhombrawon-kfot. Fitoh neft Bro Nkifrar hti wofnwor, be nd nefrpat yakitohkfot.  
\v 11 Mirahko ndhtet kspitathu nefm nayet yimampno nabnot habrinyom. Nhai. Ndhtet yimam htitkomm tfit kfo hta mekfot, “Bar yinowe, ndhtet neft ni niwat fasohet. Wayafhont.” Nikomn tfit inji kfo htakfot.  
\v 12 Rom niwa nefm tu fasoh yima nyingatik duha hnomha nef mifm newum. Na yimtnewa rom niwa nefm nikom kfo ptha nuhasneft.  
\v 13 To nd Bro Nkifrarhu nukeft, to nd nukeftn nd tamoh tamoh nefroh mnayukm tafon mar nukatn korhm.  
\v 14 Wom shrt bi marrhu nukeft fektt, to be nd shrt tfit mar nukeft hatohwott. Ndnettn wom mrokfot kfo kangt,  
\q1 “Ni yima hwes rhut hwes rhut rhu hasiwa,  
\q2 be tmifn wamfryurnikahnn wasinya warhun.  
\q1 Yima yopt wathu trohkahtnt,  
\q2 Kraisrhu nukeft yakrahtn.” \rq Aisaia 26.19, 60.1\rq*   
\p
\v 15 Ndnettn nikmoh rhu toh nmbuham duka marnyahato tohkfot. Mirahko dukef duha yimam kanjo arhu mmo bammonom. Tu yima duket yimam kanjo tohkfot.  
\v 16 Arihat yimam be tu fasoh nefm fknitamn fasoh nefrpam korhmm. Ndnettn yima duket yimam kanjo tohhato dukef duha yimam kfo hta bohta marnyaf hanykfot.  
\v 17 Mirahko be mmom kanjo tamoh tamoh nefm mtusohnihato amhik fura bofurakninomm. Bro Nungothetrhu dukefr mhti hikak hanyhato hikkfot. Ror finji finji kak htewurn be ror yak htiwa yuhatn hikkfot.   
\p
\v 18 Mirahko drinkfot masat masat aye mmokahnomn ammo bammonom. Inji narahko to be nikmoh rhu nmbuhat nhai hifa rhuruhatt. Bro Nkifrarhu Yafothatn yuht yimako thu nhombrahato be nd Yafothatn yak hta bohtakfot.  
\v 19 Yimampno rifinyhato lotuneft, Windoh Gonborngthu windoh mrokfompno windohnhokfot yo Bro Nkifrarhu windoh furam windohnho-kfot. Niko Bro Nkifrar kfo yindhorhato Windoh Gonborngthu windohm yo nd Bro Nkifrarhu windoh furam, nd nd windohm windohkfot.  
\v 20 Yiha yiha nmoh Nungothet Jisas Kraisrhu yufatpno Bro Yifemr tamoh tamoh nefm kfo yindhor buga bugakfot.   
\s1 Porr pthamort ramet tuhanmi tuhanet yindariroh mrokfot  
\p
\v 21 Niko Kraisrhu yinhit toh buge-wuko. Ndnettn niko tuko Kristenko nawany yakio nawany yakiokfot. Nawany marsisa duha.  
\v 22 Niko Kristen metko, Jisasrhu yinhit tohwa kanjo yindariroh yinhitn rhuhato rroh tngm hikkfot.  
\v 23 Nhai sfno inji kfokahanko. Kraisr sioshu mfhako tohwa kanjo yindarimn metroh mfhako tohwom. Sios Kraisrhu thatipet ndnettn nnrfa hbhamort.  
\v 24 Sioskfot tu Kraisrhu yinhitn korht. Ndnettn niko metko nd yuhat hikhato tukmoh yindariroh yinhitn rhu hanykfot.   
\p
\v 25 Niko yindariko tukmoh metm marbitn htakfot. Sioskfotn Kraisr marbit htahato mfha htamo kanjo niko yindariko ndhtet dukefr yakhato nikmoh metm marbit htakfot.  
\v 26 Ror inji namohat Bro Nkifrarhu yufatpno yimaroh yak htaneftn inji namor. Rom rorhu mrokfot yakhato hikmo yuhatn yo baftais yakmo yuhatn Kraisr fak wus bowus marnyamormn yima yuhum wutham rhumomm.  
\v 27 Rorhu dukeft nhai wofnrmor sioskfot wuspenm o krtafenm rhukfot. Rorhu dukeft memor, “Be inji Bro Nkifrar yorhwa ruheft kanjo arhukahmn nhai wom tamoh nefenm rhukfot.”  
\v 28 Ndnettn niko yindariko tukmoh thatipm yak marnyiwa kanjo tukmoh metm yak marnyakfot. Yimar turhu mett yak marnyiwar, nd yimar turhu thatipt hti wofnhato yak marnyiwa kanjo inji kak marnyewurt mett.  
\v 29 Nhai wom yimar turhu thatipt tfit turn krjbowur inji nakahrt. Nhai. Rot yak marnya bomarnyiwartn yeshri kahukrt. Kraisr sioskfot yak marnyiwa kanjo inji newurt turhu thatipt.  
\v 30 Nom Kraisrhu thatipthu tir, wura, nyinga nd ndenom.  
\v 31 Bro Nkifrarhu gonborngt kfo kangt, “Ndnettn yindarir turhu yifammam htanyhato turhu yak tuhantpno frtkafhato rpat tohkfot rpa yimar kanjo. Nhai tfit husf tfit rhukfot.”  
\v 32 Nd kfo nhombra mrokfot tu bro mnetet. Nd kfo nhombra mrokfot kfiwut Kraisri rorhu sioskfot o ror hikwa met yindarim.  
\v 33 To mirahko nd mrokfot ka Kraisri ror hikwa yimarpampno kitwot nd mrokfot. Nhai. Nd mrokfot to rpat kitwot niko rpa rpa yimako yo rpa rpa metko. Ni yindarin, tunhu yak gb tuhant marbit htakfot. Tunhu thatipt yak marnyiwa kanjo mett inji yak marnyahato yakitohkfot. Yo ni metn tamoh nefm naruha, tunhu yindarir mhti yakrmiyak hanykfot.   
\c 6  
\s1 Porr pthamort yonmi yifammaroh mrokfot  
\p
\v 1 Niko yonko, yifammam tamoh tamohm kfiwumko, hanyjborna duha. Be rroh tng yuhamn hikkfot. Tot tu neft. Ndhtet neft Bro Nkifrar hti yindhorwort.  
\v 2-3 Bro Nkifrarhu yirmoht kfo kangt, “Yifammaroh yinhit tohhato rroh mrokfom hikkfot. Yifammaroh mrokfom hikrahko, nikmoh tamoh tamoh hingrnefm yi marnyaruhamn ndar bbinysoft toh yifahtarahko.” Ndnettn nd boririfhut be tu bro mrokfoyet.   
\p
\v 4 Niko yifammako mirahko yonm fasoh nmbuhat ayak nuhasnomm. Inji narahko, to be fasoh nmbuhat wahiyaforahkomm. Tfit nikompno nakfo nna inji narahm. Niko yifa-mmako be hifa yima yuhurpno yonmpno rhuhato Bro Nungothetrhu mrokfom kfo nuhas bonuhaskfot.   
\s1 Tohakmi hingrna yimaroh mrokfom Porr kfo pthamor  
\p
\v 5 Niko hingrna yimako, niko tukmoh tohak yimaroh tng yuhamn hingrna hikkfot. Tamoh tamohm romn mhti yakrmiyak hanyhato romn hikkfot. To mirahko brumharpam apthanom. Yima yuhumpno pthahato rroh mrokfom hikkfot niko Kraisrhu mrokfom hikwa kanjo.  
\v 6 Mirahko be rroh yima yuhuroh yak marnya nmbuhatn rroh nyingahato tamoh tamoh hingrnefm ahingrna marnya bomarnyanomm. Nikmoh dukefm Bror duka yanhohato be dborioh hingrna yihotam hingrnakfot. Kraisrhu hingrna yima mifko tohhato hingrnafat hingrnakfot.  
\v 7 Yindhortpno yindhortpno tamoh tamoh hingrnefm yakitohkfot. Brorhu hingrnefet. Nhai yima mifroh hingrneft rhukaht.  
\v 8 Tu Nungothet Kraisr kukatohworm niko niwa nefm yo hingrniwa hingrnefm. Kto niko froh frohko ttha hanyrahrko. Nd nmbuhat bi wanyeteko.   
\p
\v 9 Niko hingrnefroh tohak yimako, tukmoh hingrna yimam dborioh nefm yak nuhaskfot. Mirahko akfo yakrme boyakrmenomm. Nikomi tukmoh hingrna yimam hefenr tohwa tohak yimarpa mifrhu hingrna yima bugayeko. Ror yimam yak marnya thombat nhai hti tuthahato kfo mekahr, “Nd ndrpam yak marnyaruha, nd ndm nhai.” Ror nhai inji nakahr. Rpat kak marnya bugewurnom.   
\s1 Kristenm soldiam kanjo tohkfot  
\p
\v 10 Wuroh mrokfot kfiwanko. Nikmoh toh nmbuham Bro Nungothetrpno frtkafkfot. Rorpno frtkafhato rorhu bro bbukeft yakkahkomtn toh bmtakfot.  
\v 11 Yahrt tonayuk wondh tham Bro Nkifrar yahukamn, niko ndm hmbrihato tohkfot. Nd wondh tham hmbrihato frdbfaknirahkomm Satanr tuyuk kfram.  
\v 12 Nhai be yima mifrpampno nd yahrt tohkahnomt. Nhai. Nda bbinysofthu Satanr uhatone hatonita fasoh fasoh nefm kangm, ayak kasuh-nomm, nom tfit wabbuka sinyahato nd fasoh fasoh nefm kangnom frdbfa thuhato amtohnomm. Inji natoh natohwonom. Yo namburet namburet yarhm, tahi nasungarm, nthonm, nd ndmpno nd yahrt tohwonomt.  
\v 13 Ndnettn Bro Nkifrar yahuka fitohtet fitohtet wondh bugat yakhato hmbrekfot. Nhai rhu fura bofura hasokfot. Satanrhu yahrt nianeft nhai kfrat o rikat o tamoht yak hambro-ruhatn. Satanr tuyuk kfrat frdbfa thurahnt. Satanr mnhombratiruharn nhai tfit wom yiha nieruhatr.   
\p
\v 14 Kangko atoh bmtanom, tu Bro Nkifrarhu mrokfo mif mift yakhato bro let bando tham kanjo nd mrokfom yakhato yufur mtintn nyuh tkafkfot. Yo Kraisrhu hayuk wutha yima yuhur yakhato mondt hta kafrohyuk siot kapakfot kanjo nd yima yuhur yakhato dbkafkfot.  
\v 15 Bro Nkifrarpno rpat tfit tir nayakitoh yuhathu gutnius mro-kfothu kfo nuhas htfas nefthu wayibon sinyaneft, nd dukeft su wuram kanjo hmbrekfot.  
\v 16 Nd nd wondh wuskar yak bugahato yahrt tohkfot. Bro Nkifrarhu wany yakio nmbuhat, ndt wohn rikat kanjo hmbrekfot. Nd wohn rikat hmbrehato hta tfakrahkomm Satanr tuyuk kahet kahet kfram.  
\v 17 Bro Nkifrar nrfa htiyakmo yuhat dukahato nd dukefr hat kapakfot kanjo nd dukefr mfhat htahato rhukfot. Bro Nkifrarhu Yafothathu bainat kimt yakitohkfot. Nd bainat kimt Bro Nkifrarhu mrokfoyet.  
\v 18 Nd nd nefm kangko ananomm, Bro Nkifrar kfo bruttnahato nd nd nefm nakfot. Tu Bro Nkifrarhu Yafothatn yak hta bohtakahttko nd Yafothathu dukeftpno kfo bruttnakfot. Mirahko arhu wita-nom kfo bruttnaneft. Kraisr hiket yimaroh yufam yutahato kfo bruttna hatohkfot.  
\v 19 Nanhu yufat mirahko ammonomt. Nanhu yufat yutahato kfo bruttnakfot. Na kanga, Bro Nkifrar turhu mrokfot nanhu yima yuhur ahtakahtrt apthayant. Nhai yakrme yima yuhur rhu hanykfot. Bro tat yima yuhurpno nd gutnius mrokfot Bro Nkifrar hta kafrohmoat ptha nuhasruhanm tuhan yindarim.  
\v 20 Nd nd gutniuskfot kfo ptha htfaswa yimaya. Ndtpno na kalabus tohwa. Ndnettn wakfo bruttnakahtkma Bro Nkifrar yakrme yima yuhur yak thukahtrr tat yima yuhur ahikahtra gutnius mrokfot kfo ptharuhant.   
\s1 Wuroh mrokfot  
\p
\v 21 Tikikusr kfo nuhas hik bohik-rahrko na hingrnewa hingrnafat. Tikikusr nompno rpat nabnothato rpat tohnuhiwa yimayer. Bro Nungothetrhu hingrnafat ror hifa kakitoh marnyewurt.  
\v 22 Rorn nikompno nieruharn tndh hik bohik nuhasrahrko nom yorhwa ruheft. Kfo nuhasruhatrko yima yuhum bmtarahmko.   
\p
\v 23 Bro Yifemri Nungothet Jisas Kraisr ahitwafko noh hmbre yima yuhum. Noh hmbre yima yuhum ahikahtfko wom yimam hifa yima yuhur hmbrihato Bro Nkifra Jisasrofhu dukefr nhai yafho thuruhatkomr.  
\v 24 Nanhu dukefr kanga Bro Nkifrar ayak marnyarm nmoh Nungothet Jisas Kraisr yafho thu duha yita met yindarim.