\id 2TI -2 Timothy -NT2088 -Alamblak -Edmiston 23-Sep-2003 
\h 2 Timoti 
\toc1 Timotirhu husyuk gontwat  Porr dwandfakhato htafmot 
\toc2 2 Timoti 
\mt1 Timotirhu husyuk gontwat  
\mt2 Porr dwandfakhato htafmot  
\is1 Barkof kfo nuhas mrokfom  
\ip Timotir Porr hingrna nhomoa yimayer. Ndnettn Porr ndar gontwat wandfakmortn Timotirhu yufatpno htafmort. Timotirhu dborioh nefrparoh yakitoh yuharoh kfo nuhas mrokfomn ndar gontwat htafmort. Mrokfom kfo memor, Timotir Bro Nkifrar hikwa yihotat nhai be wumtnano hikkfot, yo nhai Jisas Kraisrhu gutniuskfothu kfo pthaneft myak htanikfot, yo Timotir Bro Nkifrarhu mrokfot hik marnyakfot. Nd gutnius hingrneft tohhato yimam krhopam kahukmr, ror nd krhopam rihtiyakhato nd Bro Nkifrar hayuk hingrneft myafhoni duha.  
\ip Yimam hnayuk mrokfom nhai tu gutnius kfiwa yuhatn kfo hikkahmt, Timotir nd yimampno brbo yi juha. Ndhtet yimam kfo pthayuk mrokfom toh wany yakitohneft toh nmbuham nhai yi marnyakahm. Timotir Porrhu tohefm dukak hanyhato rorhu tohefm toh hikkfot. Bro Nkifrarhu hikneft, yo noh hmbre yima yuhurpno rhuhato wommpno nayak marnyahato rpat tohneft, yo tamoh krhopam yimam hayukm tohhato nd krhopam titaneft, tom Porr tohmo tohefm. Nd nefmn Timotir yak hikkfot.  
\c 1  
\ms1 Timotir tu mfro hingrna bbuka hanyhato tu Bro Nkifrarhu hingrna yima mifr tohkfot  
\mr (Sapta 1—4)  
\p
\v 1 Na Pora, na Krais Jisasrhu aposer hingrneft yakitohwa yimaya. Tu Bro Nkifrarhu dukef yuhatn nd aposer hingrneft tohwoyantn Kraisrpno frtkafet yimam yekwa rhu nmbuhat tu Bro Nkifrar kfo htamot, nann kfo nuhas htfaswanm.   
\p
\v 2 Timoti, ni tu nanhu yon mifnn ndar gontwat wandfiwann. Bro Nkifrar, nmoh Yifemr yo Krais Jisasr, nmoh Nungothetr, ayuhuwaftwarn yo ninhu rhu nmbuhat ayak marnya bomarnya-kahtrt yima yuhur mirhurahrn.   
\s1 Gutniuskfothu kfo pthaneft yimtna hany juha  
\p
\v 3 Nanhu nkifram Bro Nkifrarhu hingrneft yakitohmoahat, tu wutha yima yuhumpno Bro Nkifrarhu hingr-neft fakitohmoumt. Na ndar aposer hingrneft yakitohwohat na tuka yima yuhur kak nhtewanr na nhai wom tamoh nefm o yima yuhu bebm rhukahma na ndar hingrneft yakitoh-wohat. Yiha yiha yifung marm na kfo bruttnaneft na nhai yak trohnikahann ninhu yufat yutaneft Bro Nkifrar kfo yindhorwanr.  
\v 4 Ninhu nur nyingar yohnemor yuhre duka hanitanr. Kanga ni tohwa kmit aniekahann tuno nahtikahnonn nanhu yima yuhur yindhorrahra.  
\v 5 Na tuka htitann ni Bro Nkifrarhu mrokfom hikwa hikeft to bi tunhu bapem Loisi tunhu mmem Yunis Bro Nkifrar yakitohhato hikmoa kanjo bi inji Bro Nkifrar yakitohhato hikwonr.  
\v 6 Bro Nkifrar inji yakitoh-hato hikwatnr na wom mrokfot kfiwann. Nd na tir htamo yiha Bro Nkifrar hemo mrokfo rifhur ayuwa muhtwar, mirahr nd mrokfo rifhur amitoh witanir.  
\v 7 Nd Yafothat Bro Nkifrar yahukat nhai wom tamoh nefm mhtihato tfit mongthur mongthur hanykahtnom. Nhai. Nd Yafothatn tpi hiyaf hanittnom. Nd Yafothatn yima yuhum kahuktnom wommpno nayak marnyahato rpat tohneft. Yo nd Yafothatn nmoh toh nmbuham kak hta marnyaf hanittm.   
\p
\v 8 Ndnettn ni mirahn ayimtna hanya Bro Nungothetrhu mrokfothu kfo pthaneft. Na rorhu hingrna yimaya kalabus tohwohat, ni mirahn nann amhtiyakkahann ayimtnak hanya. Nhai. To ni inji yimtnaruhann to nane frohmn tohhato nd gutniuskfothu krhopam titanhorhoma? Ninhu tpim Bro Nkifrar thu habokknamohat to nd krhoparoh titaneftn tpim thu habokknamorn.  
\v 9 Bro Nkifrar buha mitoh rafohato nom tfit yakhato rorhu yufatn tfit fak htamornom. Bro Nkifrar nom tfit yakhato rorhu yufatn tfit yak htamohat, to mirahko ka nom nayuk dborioh nmbuham htihato inji namor. Nhai. Ror be turhu hti yuhuwaf nmbuhatn inji yakmornom tfit turpno rim fak htamornom. Ndar bbinysoft tafi trha duha nd nmoh yakyuk yihotat bi Krais Jisasrpno fak dbkafmort. Memor rorn yihotat yak nukakhirahrm.  
\v 10 Nd mrokfot bi ruhettn nom hel yita yihotako bi tohetnom rorn yihato tfit yakmornom tfit toh nkifraniyuk kmiko yita yihotako hta bugamornom. Nd hel yita yihotat fak thumort. Nd gutnius mrokfom kfiwam, to nd Jisasr nohhato hel yita yihotar yak thuhato toh yifahtaniyuk yihotako hta bugamo yuhathu kfo nuhas mrokfoyem.   
\p
\v 11 Bro Nkifrar nann aposer hingrneft fak htamor. Nann nd aposer hingrneft tohhato gutnius mrokfot kfo hta nuhas bonuhas htfaswanm.  
\v 12 Na inji namota fakmoma. Yakhato kalabus htamoma. Afo yuhre kalabus tohwa. To na nhai yimtna inji nakaha na kalabus tohwohat. Nhai. Jisasrhu nefm bi htiyetann to be na Jisasr riyakitohakmohat to be inji yakitoh hanyruhanr. Na be rorhu tirmn rhuhany rhuhanye ror yawihnerahr.   
\p
\v 13 Kfo yirmoh mrokforoh kfo nuhas yuham bi kfo hta nuhasmoyann. Nd yuhatn wahiktwa. Ninhu toheft Kraisrpno frtkafhato tohkfot. Ninhu toheft inji tohhato tuhan yindarim yak marnya bomarnyahato rpat tohkfot.  
\v 14 Nd gutnius hingrneft ninhu tirt htamot tu dborioh hingrnefet. Wayakitoh marnyatwant. Nom hatohwa Bro Nkifrarhu Yafothatn hti yukatohaf hanyrahtt nd ni yakitohwa hingrneft.   
\p
\v 15 Bi wanyakmo, Asia profinskorhof yimam bi mong trohmoma. Figelus Hermogenes yima husf bi rpat mong trohmoma.   
\p
\v 16 Onesiforus riphar Bro Nkifrarpno kfo bruttnewanm. Kanga Bro Nkifrar akfo bruttnakohtanr hti yuhuwafrahrm. Nd yima Onesiforusrn yiha yiha hifa yima yuhur hnamourr na kalabus tohmohat. Ror kfo pthamoa mrokfom wanymoahat yima yuhur thu jubtwa marnyamoura. Na sene dbkaf htateta rhumoahat nhai yau yimtna hnarmoar nanpno nia pthaneft.  
\v 17 Ror Romr mfnahmohat, rorhu dukeft nanpno ruhettn be nann ttiwon hambrakna twanhomor. Hambrohna hambrohna, mhtimora.  
\v 18 O, Bro Nkifraye, Onesiforusr wayuhuwaftwanr bro kotkfot tohruha yihar. Ni Timoti bi htiyete Onesiforusr na Efesus tohhato ror na yak marnyamoa nmbuhat. Ror inji yak marnyamoatra ndnetann inji kfo bruttnewanr Bro Nkifrarpno.   
\c 2  
\s1 Timotir Kraisrpno rim tohni bugahato rorhu mrokforpam hikkfot  
\p
\v 1 Nanhu yon Timotiye, ninhu toh nmbuhat tohruhant, be Kraisrpno rim tohni bugahato rorpno frtkafhato tohkfot. Mirahn ginyetm kanjo ayesisa. Kraisr Jisasrpno frtkafhato tohkahtn Bro Nkifrar toh natwihrahrn.  
\v 2 Bok tuhan yindariroh nyinga riharpno kfo yirmoh mrokfom kfo yirmoh nuhas bonuhasmoyann. Nd kfo yirmoh mrokfomn wakfo nuhashitwanm Bro Nkifrarhu mrokfom yakitoh kihet yimam. Rom wakfo nuhaskahtnm tfit romn myaknihato womm kfo nuhas hi hanyrahmm.   
\p
\v 3 Ni tu Krais Jisasrhu ami watoh-kahnn ndar hingrnefthu krhopam na titiwam watohkahnn watitanhotwona.  
\v 4 Yimam soldia tohneft nhai rom tfit yima furaroh nefm rom tfit fknehato tohnhokfot. Nhai. Kangm nd tu soldia-roh bro yimar ahti yindhorrnom, nd soldia hingrnefrpat kakitohwom.  
\v 5 Yimar kangr tone resishato praiskfot ayaka, nd yimar nd tone resisyuk kfo hayuk kfo hta mrokfom wanyhato yak hikkfot. Nhai hikkahrm, be nhai winhato praiskfot yakruhatr.  
\v 6 Fitoh yimar mswir htaneft yikiat hatohwor, tor nd yimarn barkof yakyuk yewurit kekwort.  
\v 7 Nd na kfo hne mrokfom wamduka hik marnyak hanyswanm. Myak mumekwonme, nmoh Nungothet Kraisr yima yuhum hiruhatrn mro-kforoh mna yuham yakrahnm.   
\p
\v 8 Duka hanykfot Jisas Kraisr. Nd na kfo pthiwa gutniuskfot kfo kangt, nd yima Jisasrhu nia yuhat, Defit frikef yuhatn niamor. Yopt bi ruhetr tfit Bro Nkifrarn kasinyamorr.  
\v 9 Nd yimarhu gutnius mrokfom kfo ptha htfasmoata, yihotam yau htfaswa yima bebm kanjo htihato fakmoma. Yakhato kalabusn htamoma. To yimayann yakmoma kalabus htamoma. Bro Nkifrarhu mrokfot rot nhai yimam kalabusimtakfot.  
\v 10 Nanhu bro dukeft nd Bro Nkifrarhu yufatpno bi ruhet yimam dukahato ndnetann nd yonmar yonmar krhopam na yekwam nhai wohsiskahanm. Nanhu dukeft duka kanga nd Bro Nkifrar ayak bugarm. Yak bugahato bi hifa tkitt bi fekm, be nhai mrokfom, be nd hifa tkittn be rhu nkifranirahm. Ndnetann rroh duka nmbuhatn krhopam kekwa.   
\q1
\v 11 Nom bi Kraisrpno anohkahnomn,  
\q2 to be tfit rorpno tohrahnom.   
\q1
\v 12 Krhopam yakhato tohrahnom,  
\q2 to be ror king toh thoft nom king hingrneft yakitohnho-rahnomr.  
\q1 Nom mong trohrahnomr,  
\q2 to be ror tu mong trohrahrnom.   
\q1
\v 13 Nom kfoyuk tng yuhat nhai hikrfonomt,  
\q2 ror nhai inji naruhatr. Ror tur kfoyuk tng yuhatn hikrahr.  
\q1 Nom mikfota mkfotarfonom.  
\q2 Ror nhai mikfota mkfotakfot.  
\m Nd mrokfot tu kfo mif mif mrokfoyet.   
\s1 Bro Nkifrar hti yindhorwa hingrnefmn Timotir hingrnakfot  
\p
\v 14 Yiha yiha Kristenm nd mrokfom wahe juka hanyswanm. Mirahn ahti marsisayanm. Mrokfom he juka hanyetmn duka hanyrahmm. Mrokfom hanyeft kfo mekfot, “Na Bro Nkifrar kukatohwora. Na rorhu nyingampno kfiwanko. Mirahko nd nkifra kfo yirmoh mrokfefenmpnon o nkifra yufa yuhampno nakfo hamuh nakfo hamuhnom. Ndhtet tefi mrokfefenm-pno nakfo hamuh nakfo hamuhnefm womm nhai hifa yima yuhum yakkahm. Womm tfit manysifm kanjo mkkitm.”   
\p
\v 15 Tu hingrna yimam kanjo hingrneft hingrnahato Bro Nkifrar hti yindhor-rahrn. Hingrnneft hingrna marnyaruhatn be nhai yimtnaruhatn rorhu nyingam-pno  
\v 16 Tamoh tamoh mrokfom yimam kfo pthayukm afo wany nhtakfot. Nhai tu Bro Nkifrarhu dukef yuhatn mrokfom kfo ptha hikkahmm, ni mirahn ndhtet yimampno brbo aiya. Rroh mrokfom mwany wofnnirahn to be tfit fasoh nefm fknirahn.  
\v 17 Rroh mrokfom hunt kfe rhot hik hanita kanjo inji kitm. Himeneus Filetusrof, tof nd yimaf ndhtet mrokfom kfo pthewaf.  
\v 18 Nd yimaf Bro Nkifrarhu tu yafothet mrokfot bi fafhonimoft. Yimam kfo kangfm, noheh yimaroh sinya yihar bi yimor. Arihat nohyuk yimam nhai tfit sinyaruhatm. Inji kfiwatfm nd Krais Jisasrhu hik yima yuhur, nhai mfro bi sinyakahmm. Womm bi tfit kafhoni hanitmr.   
\p
\v 19 To sioskfothu hatohyuk dany rahur Bro Nkifrar bi kasinyamorr. Nd dany rahur nhai ninor ba inji nakahr. Kangm ka be tuha ftohr. Nd rahurn wandfamo mrokfom inji kfiwum. “Bro Nungothetr bi hti nhtewurm rorhu yufatpno rhuyuk yimam.” Yo, “Fitoh yimam kfo kangm, nom rorhu yufatn korhnom, nd yimaroh tamoh tamoh nefenm mong trohkfot.”   
\p
\v 20 Wom bro kunyrn korhm roh bikm. Wom rohm gorkfoti silvakfoye hingrnayetem. Womm be mi nmbuha furaye yo dif kranyjipaye hingrnayetem. Nd yak marnya bomarnyayet rohm, rom bro yiharpami bro yufet yimarpam-pno yakhato hta mskayukem. Ndwom roh furam rom be yiha yiha hta mska fura hasoyukem.  
\v 21 Bro Nkifrar Kristenm yak nhtiwa yuhat to inji kitt. Fitoh yimam, fasoh nefm mong trohhato Bro Nkifrar hikwam, nd yimam afo kak htefiwurm. Turhu yufat rhuhato turhu hingrnefroh hingrna hayukem.   
\p
\v 22 Ndnettn ni Timotin, ni damiag yimam hatohwa yima yuhu sinyaneft, yo womroh tamohroh hti yuhur hanyeft, nd nd nefm yakitoh duha. Yafho thuhato afo tfit dborioh toh nmbuham, yo Bro Nkifrarhu yakitoh kihneft, yo wommpno rpat tohhato nayak marnyanefm, afo tfit nd nd nefmn tfit yakitohwontwa. Nini yo Bro Nkifrar hti wuthahato ror lotuta yimam, niko buga afo nd na kfiwa nefm yakitoh bugawontwakomm.  
\v 23 Mirahn fipa duha fipa duha mrokfom atohkahann awany yakitohanm. Ndhtet mrokfom yima dukef duha yimamn hatone htfaswomm. Ndhtet mrokfom yimam toh wanyneft yima yuhum tfit kahm kanjo wakur sinya-hato nakfo wok nakfo wokhato nahuttwom.  
\v 24 Ni tu dukaf hanykfot. Ni mirahn wom yimampno nnakfo hamuh nnakfo hamuhnom. Ni dborioh yima yuhur yak nuhaskfot. Ninn Bro Nkifrarhu mrokfom miyaknihato kfo nuhas bonuhaskfot. Bro Nkifrarhu mrokfom kfo nuhas hi hanyhato womm hanyjbornewumm, o hamuh tfa thuwomm to ni mirahn anambura.  
\v 25 Ninn tfit nd mrokfo hanyjbornet yimam yakhato kfo yima boyima marnyakfot. Ni inji narahnm, ka Bro Nkifrar rroh yima yuhum yak kekut-rahrm. Yima yuhum yak kekutruhamn Bro Nkifrarhu tu yafothet mrokfot nd yiha hti dukarahmt.  
\v 26 Afo Satanr yakmormn rorn uhatone ahato-nemoatrm nd dborioh duka yima yuhur afo frfnahnimor. Yima yuhum yak kekuthato ee ndnatn nyingam yoh dborharuhatmm Bro Nkifrarhu mrokfot hti hikruhamtn tfit dborioh yima yuhum nierahmm.   
\c 3  
\s1 Wuroh yihar, fasoh fasoh nefm mfrfnah bugarahm  
\p
\v 1 Ni Timoti, wuroh yiha rhuruha fasoh fasoh nefm bi wawany htatanm. Wuroh yihar brbo rhu hanyrahr htirahn,  
\v 2 yimam turpatm htitahato yemrot, wuss, o tamoh tamoht yakrahmt. Nhai wom frohm hti dukaruhatmm. Maruti wusshu yak dukefr mfro tohrahrm. Nd dukefm mfro tohruhatmm, maruti wuss hmarsi yakt hmarsi yakt yakrahmt. Yimam kmi danym yihom het grhak mhet grhakhato womm faso faso kfo rindho borindho thurahmm. Yonm nhai tfit wom yifammaroh dohr wom kmbri-ruhatm. Mrokfo hanyjbornaneft brorahtm yonm. Nhai kfo yindhor hakuruhatmm. Bro Nkifrarhu dborioh nefm hti kur tanyhato tfit ndar bbiny-softhu nefm tfit hikrahm.  
\v 3 Najohfi mndarehfi toht, nhai tum niyak marnya-hato rpat toh hakuruhatm. Wommpno nnakfonefm o finji nanefm, nhai tfit yi rhuhato nd hutteft o tamoh neft nnakfo dbruf nuhas inji naruhatmm. Nhai. Womroh mrokfom tfit wommn rroh mrokfom kanjo myakni haku-ruhamm rom kuny kuny rim harhuta mharhuta hakurahmm. Tamoh tamoh mrokfompno yima yuhum be kahm kanjo bmbri wakur sinyak hakurahmm. Womm baryutham nhombra hakurahm. Dborioh nefm nayet yimam womm be hti srthu hakurahmm.  
\v 4 Tum yima-tehfim nahndhna nahndhna hakurahm. Tamoh tamoh nefm nhai wom toh dukaruhatm. Mirahm tamoh nefm ananom, be nafurakni hakurahmm. Yufa yura htaneft, turoh yufam be yura yura hta hakurahmm. Bro Nkifrar htirahmr nnarihat kanjo. Tfit ndar bbinysofthu nefmn mwofnni hakurahm.  
\v 5 Ndar nom hikwa Bro Nkifrarhu mro-kfot, tngrpaye frnheh hakurahmt. Yima yuhum rom nndo rhu hakurahmm. Ndhtet ndhtet nefm nayet yimam ni Timoti htitanm, ni mirahn brbo yihato kfo hta mrokfom ahiyanm.   
\p
\v 6 Wom metm turoh kunym rhuhato tum nayuk fasoh nefroh krho yima rifhumpno rhuhato tafi dborioh yima yuhu yak duha rhu hasetm, rom yitamn rroh mrokfom rim kfo brur bobrur nhehwatmm, to be rroh dohrn mikmbre twanhonitm.  
\v 7 Ndhtet metm be womroh nfri nfri mrokfom mhik furaknitam, be nhai yakkfot Bro Nkifrarhu tu yafothet mrokfot.  
\v 8 Bingot Janes Jambresrof to inji namofm Mosesr kfoyuk mrokfom. Rof buha mtohhato tfit rofn kfo wok bawokmofm. Nd giaman tisam to inji newumt Bro Nkifrarhu tu yafothet mrokfot. Nd yimam nhai tu dborioh yima yuhur rhukahrm. Fasoh yima yuhu bebrpno yorhwamn nhai Bro Nkifrarhu tu yafothet mrokfot yakitohkahmt.\f + \fr 3:8 \ft  (3.8) Nd Janes Jambresrof, Judam kfo tndh memoum, Mosesr tohmo yiha to nd hus yimafn Ijifthu kingrhu kiret nyinget yimaf tohmof. For bi sngm to rofn harhumoufm.\f*  
\v 9 Yimam afo mhikaknirahmm nd giaman tisam. Kto nd rroh mmo nmbuhat mhti dukaruhamtn myafho-nirahmm. Janes Jambresrof mhti dukahato myafhonimo kanjo inji mhti dukahato yafhorahmm.   
\s1 Timotir Bro Nkifrarhu mrokfot yakitoh kihkfot  
\p
\v 10-11 To ni Timotin, ni bi nanpno toh hnehato na kfo hta nuhasyuk mrokfom bi fakmonm. Nanhu yau nmbuham, yo nanhu riduka aduka yima yuhur bi fakmonr. Yo Bro Nkifrar hikhato rorpno frtkafhato wom Kristenmpno rpat tohhato nayak marnyamoahat, ndm hti bugamonm. Na Antiok, Aikoniam, Listra nd nd kmim toh hnehato yimam yak beb-moahat htimona. Yo nd na titamoa yonmari yonmari krhopam ni hti buga bobugamonm. To finji htimona? Yakrmehato hingrneft mfak htani-moyant? Nhai. Na tohhato mrokfot kfo pthamoant. Nd yimam hemoa krhopam, tu Bro Nkifrar toh rafohato fak thumourm.  
\v 12 Yimam Krais Jisasrpno frtkafhato Bro Nkifrarhu nefm hikneft, yak bebyuk yimam nierahm. Ndt tu kfo mif kfoyet.  
\v 13 Barkofpam nd yima bebmi giaman tisam afo Satanrn frnhehefiwatrm fasoh yuhat kitm. Tfit rom nd fasoh yihotat tohtahato womm riteh nhirekwomm.   
\p
\v 14 To ni Timotin, ni nd Bro Nkifra-rhu yafothet mrokfot kfo hta nuhas bonuhasmo yimanom bi htimonnom. Nom tamohtet yimanomn o metnomn kfo hta mrokfom hemonom, bi htimonnom. Nd nom kfo hta nuhasmo mrokfo yuhatn watoh hiktwa.  
\v 15 Ni bi wanurtanihato bi yau tone fnahetnn kfo yirmoh mrokfom bi rihiyakmomn. Nd kfo yirmoh mrokfomn dukefm hiyaf hanyruhatmn Krais Jisasr hikrahnr. Krais Jisasr hikruhann Bro Nkifrar yakrahrn.  
\v 16 Nd Bro Nkifrarhu mrokfot tu Bro Nkifrarhu Yafothat kfomot, nd mrokfot mfnahmot. Nd mfnahmo mrokfot nhai be mfnah furarmot. Nhai. Nd mrokfom Bro Nkifrarhu hik yuharoh kfo hta nuhasaf hanyuk mrokfoyem, yo wiyauyau nmbuham faso faso rine wunyeneft, nd mrokfotn tfit yak hta marnyarah-tnom. Yo dborioh toh yuham nd mro-kfotn yak nuhasrahtnom.  
\v 17 Ndnettn nom, Bro Nkifrarpno tohwa yimanom, nd mrokfotn toh marnya yuham yak nuhaswattnom toh marnyewanomn Bro Nkifrar hti yindhorwa nefm kakitoh marnyewunomm.   
\c 4  
\s1 Timotir kfo pthakfot Bro Nkifrarhu mrokfot  
\p
\v 1 Krais Jisasr yawihneruharn king tohhato ndar bbinysof thofm yakitohrahrm. Ndnettn Bro Nkifrari noheh yimami yima nfri nyinget yimaroh kotkfot yakitohruha yima Krais Jisasr, nd hus yimafhu nyingam-pno na kfo mifwann.  
\v 2 Bro Nkifrarhu mrokfot wakfo ptha hanyswant. Dborioh yihar o yiha bebr, mrokfot kfo pthakfot. Yimam tamoh nefm newum kfo nyinga fnahnihato tfit hifa yima yuhurpno tfit kfo yirmoh mro-kfom hekfot.  
\v 3 Kto, nd Kristenroh toh yuharoh kfo yirmoh mrokfom nhai wom tfit wanyruhatmm. Myafhonirahmm. Rroh yimbhindangm tfit tohetohrahm mrokfo fura bofuraroh wany yakitoh-neftn. Nd mrokforoh wanyneftpno, ndhtet mrokfom haruhet tisam yak bugarahmt. Yak bugahato rom pthayuk mrokfomn rroh yimbhindangm tohetohrahmm mrokfo wanyneft.  
\v 4 Nd Bro Nkifrarhu tu yafothet mrokfot myafhonirahmt. Myafhonihato tfit nd rom wanyuk nkifra tndh mrokfo yuhamn hikrahm.  
\v 5 To ni Timotin, tu dborioh duka yima yuhurpno tohhato ninhu toh nmbuham yak hta bohta marnyahato tohkfot. Tamoh tamoh krhopam niewum ni tohhato titakfot. Hingrneft yafho thu duha. Hingrna yakitoh hanykfot. Ni tu Bro Nkifrarhu hingrna yima mifn tohhato nd Bro Nkifrarhu gutniuskfot kfo pthakfot.   
\s1 Porr wuroh noh yibonneftpno dkfomo mrokfom  
\p
\v 6 Nane nhai wom tohrhota. Na bi noh yibonwa. Nanhu kkut yohniraht Bro Nkifrar wain bupam ofakfot yahuka kanjo. Asot bi nanhu tfkhathu htanyhato yinyeft.  
\v 7 Nd na tonemo resiskfot bi tone hnamoyantn bi makkfot myakmoyantn bi nanhu rim rhu wita yihayer. Bro Nkifrarhu duka yima yuhurpar toh hnamoya. Nhai marimoya finji naruha.  
\v 8 Nanhu yima rifhur nhai wom wusswenetr htikahrr Bro Nkifrar. Be hti wuthewurr. Be praiskfothu yaknefrpayet bi. Yimam resishato praiskfot yekwa kanjo nmoh Nungothet Jisasr nd praiskfot hirahra. Turn kot yakitohruha yiha nd praiskfot hirahra. To nhaf nhai be nanrpaya nd praiskfot yakrhota. Nhai. Jisasrhu nia yihar rhu garihato rhu duka darwon hasiwa yimampno rpat nd praiskfot yak hanyrahnom.   
\s1 Porr kfo hta mrokfom hemorr Timotir  
\p
\v 9 Wom fitoh yihotamn afo bmbri nanpno wanietwa.  
\v 10 Demasr bi frtrohmora. Ndar bbinysofthu dukefr yakmotrr taun Tesalonaikako bi yimor. Kresensr, ror bi Galesia profinsko bi yimor. Taitusr, ror nhaf Dalmesia distrikko bi yimor.  
\v 11 Lukrpar asha nanpno tohwor. Ndnettn ni nianeft, Makr wayaknetwa. Nanhu hingrnefm rorn kakitohnho hakutra.  
\v 12 Tikikusr ror bi kfo tkrurafmotanr Efesusko yimor.   
\p
\v 13 Yo ni niewane, taun Troasn nanhu yuke sakethat Karpusrhu kunysn htanymoyant. Htikahnt wayaknahitwona. Yo bukm rpat wayaknetwanm. Nd sifsif thaye hingrnet bukm mirahn ammo mifa yaknaneft. Nd bukmn bro dukeft arhutwat.   
\p
\v 14 Brase hingrnewa wuskam hingrnewa yima Aleksander, wom fasoh neft namotra nanhu yima yuhur nhai marnyakahra. Nhai mrokfom. Ror namo neft kto Nungothet Jisasr htirahrr.  
\v 15 Timoti, ni mirahn nd yimar ka wonfoher. Nom pthiwa mrokfom to fitoh fitoh yimamn kfo wok bawokwamm? To nd yima yimam.   
\p
\v 16 Na tohwonmo barkof kotkfot nhai wom fitoh yimar nanhu kotkfot tohnhormora. Fakrme troh bugamoma. Bro Nkifrar kanga mirahr nd yimam finji anayanm.  
\v 17 Jisas Kraisrn toh tkafmora na nd kotkfot tohmohat. Rorn bbuka rifhur hnamourr. Nd bbuka rifhur hiyaf hanymoatra na tohhato Bro Nkifrarhu mrokfot kfo pthamoyant. Kfo pthamotant nd Romr tohyuk yima tangim wanymomt. Ka Jisas Kraisr atoh tkaf duha yira, ka bi laionroh yatimn yihom kfe bdgrmoya.  
\v 18 Jisasr Kraisr na inji toh tkafmo kanjo na tamoh krhopam yakneft, na toh raforahra. Na be rorhu tirmn rhu hanyhato be tfit ror tohukatohwa kmi hefenr rihawitarahra. Ndnetnomn nom be rorhu yufarpat yiha yiha kfo yuta yindhor nohnikfot. To be inji.   
\p
\v 19 Nanhu kfo yindhorkfot Prisila Akwila sawohfi yo Onesiforusrhu yon tuhanm, rompno wakfohitwona.  
\v 20 Erastusr yuhre taun Korinko afo tohwor. Trofimusre dbohnetrn taun Miletus htanymoyanr.  
\v 21 Bmbri wom fitoh yuhamn bi wanietwa bi ndar yihamn. Awi knga hatohrahn to finji nieruhanm bro gonng wormrpno sinyayuk wifor bum? Yubulusr, Pundensr, Linusr, Klodiat, yo asha tohwa wom Kristenm niko dukahato kfo yindhorkfot htefiwumt nikompno.   
\p
\v 22 Bro Nkifrar atoh natwihtwart ninhu yafothat yo rorhu yuhuwafeft be ninn arhu hanyswat.