\id 2PE -2 Peter -NT2088 -Alamblak -Edmiston 24-Sep-2003 
\h 2 Pita 
\toc1 Pitar  dwandfamo husyuk gontwat 
\toc2 2 Pita 
\mt1 Pitar  
\mt2 dwandfamo husyuk gontwat  
\is1 Barkof kfo nuhas mrokfom  
\ip Ndar gontwathu bro dukeft, Kristenroh kfo dukayuk gontwayet. Kristenm Jisasr yakitoh kihhato toh bmtakfot. Tom wom tisam kau htfaswom. Nieruhamn frmmo bammoruhatmm Jisasr yafhohato rom yakitohyuk dborioh nefm yafhorahmm. Aposerm kfoyuk mrokfom yakitoh kihkfot. Yakitohhato hikrahmm be nhai Bro Nkifrari Jisasr myafhoniruhatmf. Aposerm turoh nyingaye htimomr Jisasr kfo tebos mrokfom hemohat. Rom rpat rhuhato wany yakitohmoumm kfo tebos mrokfom Jisasr hemoahat.  
\ip Wom yimam kfo kangm Jisasr nhai yawihneruhatr. Ndar gontwat kfo miraht Jisasr nierahr. Be yudbathu nianeft nhai. Ndt nhai be sfno. Bro Nkifrarhu yima yuhur nhai wofnkahr wom rpar rim tohtaneft. Ror kangr ndar yuht bbinysof bugathu yima bugam afo yima yuhu yak kekut bugam. Ndnetrn rroh toh garineftn yiham yuke hanitm (3.9).  
\c 1  
\ms1 Nmoh toh nmbuham dborioh nefm yakitoh bmtahato tohkfot. Yakitoh bmtahato fasoh dukefmpno niayuk yimam yak tuhafrahnomm.  
\mr (Sapta 1—3)  
\p
\v 1 Na Saimon Pitaya. Na Bro Nkifrarhu hingrneft hingrnewa yimaya. Nann Jisas Kraisr aposer hingrneft fak htamor. Nann ndar gontwat niko Jisas Kraisr hikwa yima-kmoh yufampno htefiwant. Jisas Kraisr nmoh Bro Nkifrar tohwor. Tohhato nrfa htiyakmornom. Nikomi nom Aposernom nmoh rhu nmbuhat Bro Nkifrar htitwort rpahtet ruheft korhnom. Nom Jisasr hikwa yihotat, ndtn kukatohwor. Nhai nom yakitohwa yufamn o maru kunymn o tamoh tamohmn htikahr. Nhai. Nom Jisasr hikwa yuhatn htitr. Nikomi nom Aposernom Jisasr hikwa yuhat hifa rpat niyak tkaf hanitf. Nhai nom Aposernom mfrfnahnihato niko yiho tohkahko. Nhai.  
\v 2 Nmoh Bro Nkifrari Jisasr, nom yak hta bohtiwar, hifa rofpno bi tohwoko. Bro Nkifrarpno kfo bruttna kanga nikmoh rhu nmbuham ayak marnyakahtrm rhu marnya-ruhakomn yima yuhum be mirhurahm.   
\s1 Bro Nkifrarhu yufat korhnom  
\p
\v 3 Jisas Kraisr Bro Nkifrayer. Ror tu bro nanyjar bbukeft hatohwor. Rorhu nd nanyjar bbukeft kfiwut nom Bro Nkifrarhu nefm hikwonom yo dborioh rhu nmbuhat korhwonom. Nd dborioh rhu nmbuhat nom yorhwat be inji rhu nkifraniraht. Nom Kraisrpno nia tohwohat dborioh rhu nmbuhat kahukrnom. Nmoh yukatoh nmbuhat htimonomr Bro Nkifrar kanjo yo bro bbuka nanyjaret yimar kanjo, ndnatn rorhu naku tngr yimohat nom wany-hato nia twanhomonom.  
\v 4 Jisasr Bro Nkifrayer. Ndnatn nom rorpno rim tohmohat Bro Nkifrarhu dukefr hikwonom. Nmoh rhu toh nmbuham, tur kfo htamo yuhamn hifa hifa fak htamorm. Inji yak hta marnyamotrm, niko ariham Bro Nkifrarhu dukefrn kau hikwoko. Yau hikhato ndar bbinysofthu fasoh yima yuhur mong trohwokomr. Ndnettn nhai nd fasoh yima yuhurn yak hatohaforuhatrko fasoh tkit bebt yiruhatko.   
\p
\v 5 Nd bro dukefmpno nikmoh tpim habokkna marnyahato Jisasr yakitoh-kfot. Jisasr yakitohhato dborioh nefm rpat yakitohkfot. Dborioh nefm yakitohhato dborioh dukefm yakhato dborioh dukefmpno yaukfot.  
\v 6 Dborioh dukefmpno yauhato yima yuhum tamohm dukefm sinyewum afo yak nhtakfot. Yima yuhum yak nhtahato toh bmtakfot. Toh bmtahato Bro Nkifrarparhu dukefr hikkfot.  
\v 7 Bro Nkifrarhu dukefr hikhato tuko Jisasr hikwako nayak marnyahato tuko nayakitohkfot. Tuko Jisasr hiketko nayak marnyiwa kanjo wom yima furam inji yak marnyakfot.   
\p
\v 8 Inji tohhany tohhanyrahko to be nd nefrpam bronirahmko. Bronihato nmoh Nungothet Jisas Kraisrhu hik yuham nhai myak mmotaruhatko. Hik marnyaknirahkomr.  
\v 9 Wom yimar nhai nd kfiwa nefm yakitohkahrm, nd yimar nyingam kunyjwatmr nhai hti hikkahrm Bro Nkifrar hti yindhorwa nefm. Hti mmohato nhai mhtiyakkahrt Bro Nkifrar rorhu fasoh nefm yak thuhemo yuhat.  
\v 10 Niko nanhu yimatko kfiwanko, mirahko ndhtet yimaroh fasoh dukefm ahiknom. Nd dborioh dukefm bi kfahukam niko ndmn hik-kfot. Niko Bro Nkifrar yakmohat memor, “Nanhu yon kunys rhurahm.” Ndnettn nd nefmn yakitoh trpaknikfot. Yakitoh trpaknirahko be nhai suhhato mong trohruhatkomr.  
\v 11 Inji nahato nom nrfa htiyakmo bro yima Jisas Kraisr hti yindhorruharnom yakmi-yakrahrnom ror king tohruha kmi hefenr.   
\p
\v 12 Jisas Kraisrhu mrokfot rot hifa wany yindhorhato bi myakitoh bmtak-nitkomt. To na kanga tfit wompam wompam akfo duka hanykahtanko yima yuhum duka hanyrahmm na kfoyuk mrokfom.  
\v 13 Hifa mkfo dukak hanitanko. Kfo duka hanyetkomn mrokfom bi wany hmbrita hanyhato rhurahko. Kto na nohnineft mrokfom nhai yafho thuruhatkomm.  
\v 14 Na tuka kak nhtewa nanhu nohhato ndar thatipthu thu hur sany yihar bi brboh-wor. Nmoh Nungothet Jisas Kraisr bi inji kfo nuhasmora.  
\v 15 Na tohruha yiham afo kfo duka hanyruhanko. Kfo duka hanyetkomn na nohni thoft nd dukefr yakitoh hanyrahkomr. Nhai yafho thuniruhatkomr.   
\s1 Aposerm htimomt Bro Nkifrarhu nuka nanyjareft Kraisr hatohmort bruwohmr katiwa kanjo  
\p
\v 16 Nom aposernom bi kfo ptha nuhasmonomko. Kfo memonomko, “Nmoh Nungothet Jisas Kraisr bro bbuka nanyjaretr tfit yawihnerahr.” Mrokfom nom pthiwam nhai be ptha furakahnomm. Nom tunmoh nyingaye htimonomr Jisasr bruwohmr kanjo katohato funefm yambo hritnamohat. Nom tunmoh nyingaye hti hikhato kfo ptha nuhaswonomko.  
\v 17 Bro Yifemr Jisasr kfo yuta hagrha hanyhato bro nuka nanyjareft hemohat nom tunom tohhato htimonomr. Hefenr tohwa tu Yura Myorhekwa Nkiframifr kfo memor, “Nda yimar nanhu yoner. Nanhu marbit rorn korht. Rorn mfro hti yindhorwa.”  
\v 18 Nd tngt yawihna-mohat nom tunom Jisasrpno rpat hnaru kminysofr toh hasetnomn nd tngt wuwanyakmonomt.  
\v 19 Tom profetm kfo pthayuk mrokfom. To mirahko ka kfo fura mrokfoyem. Rom pthayuk mrokfom tu kfo mif kfoyem. Rom kfo ptha htayuk mrokfom htiyak hanyhato yau hikrahkomm dborioh yihotam. Profetroh mrokfom lamrhu nukeftpno yauwa kanjo profetroh mrokfom yak htaf hanyrahmko. Rroh mrokfom yakitoh hasohato Jisasr yawihne thombat Bro Nkifrar nd yiha hti yimbu hikrahkomr. Nd yiha nikmoh yima yuhum mirahm ka dbha ksfut mfnahwa gunyr kutewumr nwindmr tewur.   
\p
\v 20 Wawanyko! Niko tuko wahti dukako. Profetroh mrokfom nhai be turoh yima yuhum wapthakrmomm. Nhai.  
\v 21 Yo nhai wom yimamn ptharmotmm wanyrmomm. Nhai. Tu Bro Nkifrarhu Yafothat kasinyamottm nd mrokfom kfo pthamomm.   
\c 2  
\s1 Profet giamanroh fasoh dukefm  
\r (Jut 4-13)  
\p
\v 1 Bingot Isrermpno yimam profet yufam yaknehato mkfo nheh bonhehmoumm. Arihat to niko hti marnyaf hanykfot. Wom yimam tisa yufam yaknehato kfo fura bofura mrokfefm hnehato mfrnhehruhatmko mhikaknirahkomm. Kfo mirahm, “Jisasr nhai mfha htarmorm nikmoh fasoh nefm.” Yimam inji nayukm nhai rhuruhatm. Be yudbat Bro Nkifrar yak batiyakni twanhorahrm.  
\v 2 Nikmoh wom wom Kristenm nd giaman tisam niahato mfrnhehakruhatmm rroh dohr mikmbrirahm. Mikmbriruhamn ijoh tonanyeft yak nuhasrahmm. Nd Kristenm tisa giamanroh dohr mikmbre-hato ijoh tonirahm, be nd tkittn riruh aruhyuk yimam inji htiruhamn mkkirahm manysifm kanjo. Nhai tfit sinyaruhatm Bro Nkifrarhu hikneft.  
\v 3 Nd giaman tisaroh yima yuhum be maruhamn korhm. Be tum wakfakyuk mrofkom mkfo nhehaknehato maruhenm mtarhoptakni herahmko. Nd rroh nefm Bro Nkifrar bi rihtiyak hatohakmorm. Arihat to bi dukewur yak batinefrpatn. Nhai kfo furakahr. Rorhu mrokfot fipett rhuraht.   
\p
\v 4 Wawanyko! Bingot Bro Nkifrar fasoh nayet mounmotm yakhato hel tumorm. Tumotrm yuhre nd kspita nngrajohet muhr afo tohhato toh garitwom kotkfot.  
\v 5 Bingot Noar tohmo yiham nhaf rpahtet neft rhumot. Nd fasoh fasoh nefm namoa yimam nhai rhurmom. Bro Nkifrar kfomotr, hnutn miptko bati witamom. Noa ripharpar tohmom. Noar hifa toh nmbuhathu toh yuharoh mrokfom uhatone hatonemour.  
\v 6 Yo bingot Bro Nkifrar dukamor Sodomti Gomorathu yak batineft, nd kmif nhai rhurmof. Yuht yimayett rpat wundiatn mikur tounimom. Memour, “Inji anakahta yimam htiruhamn duka yanhorahma.”  
\v 7 Nd kmi Sodom Gomoraf mikur tounimohat Lotrpar nhai kurrmor. Nd hus kmifhu tuhant yindars yiramtieh yiram kanjo yihom yejbohnak myeboh-nakmoahat Lotr nhai yindhormor inji htimoahat. Lotr Bro Nkifrar hikmoatr Bro Nkifrar rorrpar fakmorn nhai kurrmor.  
\v 8 Rorhu toheft fak teh marnyamot. Ror be rhuhato mano mano htimour tuhant yindars yihom yejbohnak myejbohnakmoahat. Htihato rorhu yima yuhur nhai marnyarmoarr.  
\v 9 Nd tndhm wanyhato duka kangnom, Bro Nkifrar bi inji toh rafo hnewurm rorhu mrokfot hiket yimam. Ror hiket yimam tamoh krhopam yekwohat ror tor bi brbo toh tkafworm. Rorhu mrokfom hik duha yimam bi hti hta bohtewur finji finji narhoyanm bro kotkfot tohni thoft. Ndm bi hti htetm korhwom.   
\p
\v 10 Nd giaman tisam bi inji hti hta bohtewur. Nhai Bro Nkifrarhu yinhit rhukahm. Rorhu mrokfom hanyjbor-newum. Turoh yima yuhum sinyewa fasoh dukefm hikwom. Hikhato mfro tuhagrha htfaswom. Ndnetmn be tu nhai yakrmekahm Bro Nkifrarhu mounmotm kfo wokneft.  
\v 11 Nd giaman tisamn mounmotm kfo wokwomm. Bro nngrajohet mounmotm nhai tum Bro Nkifrar nyingahato inji nna kfo wokkahm. Nd giaman tisarpamn inji newumm.   
\p
\v 12 Be tu mmo mifwom. Be tu nhai yimaroh dukefm rhukahmm. Nndo yau fohroh dukefm yorhwatmm womm kfo tukioh fura hanitmm. Be tu fasoh neft hikwom. Inji nayukm Bro Nkifrar tufnah batirahrm foh nungam kanjo.  
\v 13 Womm faso kak bebwomm tawo Bro Nkifrar faso yak bebrahrm. Rom tafont yima nyinga riharpno niwa nefm nhai yimtnakahm. Nhai mekahm, “Kafrohhato narahnom,” nhai. Nikom-pno yi rhuhato nuwa ye shombat be tu bro yimtneft kahukmko.  
\v 14 Nd yimam rroh dukefm nhai wom tamoh dukefm rhukahmm. Be metroh dukefrn frtkaftewarmn nhai fasoh nefm yafho thukfot. Kristenm tafi tat yima yuhum yak duham nd giaman profetm yitamn mkfo yuhur boyuhurwatmm yitamn fasoh nefm newum. Nd giaman tisam fasoh nefm bi nawonfohetmn be nd maruha dukefrparpno korhm. Ndnatn Bro Nkifrar yak batirahrm.  
\v 15 Rom nd fasoh nefm newohat nhai be sfno nakahmm. Tu dborioh yihotar yafho thunimomrn be nd fasoh fasoh nefm fknihato mmo bamumiwum Beorhu yon Balamr namo kanjo. Balamr to inji namor, rorhu bro dukeft memour, “Fasoh fasoh nefm niwa yimam hikrhoyann maruham hirahma.”  
\v 16 Bro Nkifrar rorhu dukefr inji htihato yihotat toh rafomorr. Donkim yimam kanjo ptha duhatm, nd yiha donkir kfo pthamor. Balamr inji htihato be nhai hanysfanihato yirmor. Nd ror hatohmo fasoh yima yuhur ndha fafhomorr.   
\p
\v 17 Nd giaman tisam nhai dborioh yihotam yak nuhasruhatmko. Dborioh dukefm bi be. Kangme, bujurn mikna domtnitr bupen duhater. Rroh mrokfom be tu fipen duhatem. Bro Nkifrar bi htitamort rom tohyuk tkitt. Rom be tu kspita nngrohpam yi toh-rahm. Nhai mar nmbritefenr htiruhatm.  
\v 18 Nd giaman tisam turoh fipa duha mrokfompno yihom kfo bruyohak mkfo bruyohakhato kfo grha fura hasiwum. Inji na hasiwamn to nhowi yitamn womm wuteh kekutwomm. Womm yuhre fasoh nefm yafho thuhato yuhre mtoh tefi hanyetm yo romn tfit metroh mrokfom hanitamm mkfo yuhur boyuhurwatmm tfit yima yuhum sinyewumm.  
\v 19 Yitamn kfo kangmm, “Niko tamohmpno be inji yorhwako? Niko nhai Bro Nkifrarhu yinhitn rhukahko. Waniako. Nom hikrahko be tukmoh wuratn yau fura bofurarahko.” Nd giaman tisam nhai tu dborioh yima yuhumpno yau marnyakahm. Be tu fasoh nefmn kak hta bohtewumm. Bi fasoh nefmn kuny kimomm. Nhai yafho thukfot. Ndt nhai yuwi furakfot. Nhai. Tu kfoyet. Yimar bi fasoh nefmn bi kuny kimr to be finji yafho thukfot?  
\v 20 Wawanyko! Yimam bi nmoh nrfa htiyakyuk yima Jisas Kraisrpno niahato ndar bbiny-softhu fasoh fasoh nefm bi yafho thunihato tfit mkekuthato tfit tum yakitohyuk nefm bi tfit fekmmn bi nd nefm bi tfit kak htewumm, be tu fasoh yima mifm tohrahm.  
\v 21 Nd giaman tisaroh toh nmbuhat to inji riruhakmot. Afo Jisasrpno yimomn rroh fasoh nefm mfafhonimomm. Ndt rot hifa nmbuhatnano. To tfit kto nd aposerm hayuk mrokfom mfafhonimomm. Myafhonihato arihat rroh nefm be tu fasoh mif mifem.  
\v 22 Nd giaman tisam yau fohm kanjo inji newum. Yaum to inji newum, tum yifako yinayuk yem-rom, tfit kmifat yarim hta kthuwamm tfit kaumm. Fohm inji newum. Ar bi yuk marnyahato tham bi hifa fnhuyetm, to nhai miruhatm, nhai tfit bdrt yaknaruhatnom. Nhai. Tfit yitamn buburs yihato wik bowikhato bubur bebt harhuwom.   
\c 3  
\s1 Tamohmpno Jisasr nhai bmbri niakahr?  
\p
\v 1 Bar yinouroko, ndar hus gontwaf nikmoh kfo dukayukef. Kanga, niko wanyuk mrokfom yafhonirah-komm. Mirahko ayafhonomm. Yakitoh-hato dborioh dukefmpno tohhato nikmoh toh nmbuham yak hta bohta marnyakfot.  
\v 2 Bro Nkifrarhu profetm bingot pthayuk mrokfom yakitohhato yo aposerm kfo ptha nuhasyuk boririfhum dukak hanyhato yakitoh hanykfot. Nd boririfhum nmoh nrfa htiyakyuk Nungothetr hemorm.   
\p
\v 3 Jisasrhu yawihna yihar brbo rhu hanyrahr. Yimam turoh fasoh dukefmn yorhwam, nieruhamn mhaninge yukatohhato kfo mirahmko,  
\v 4 “Nikmoh Nungothet Jisas Kraisr kfomohat nianefte to fitoh yiha nieruhar? Aniekahtr afo htirahnomr. Niko kang-nom ka gari furewuko, nhai nieruhatr. Bingot nkiframpno nhai wom yimar hefenr muhhato tfit yawihnarmor. Ndar bbinysofthu ruheft to be rpahtet ruheft korh hik twanhiwut. Nmoh nkifram bi inji mhti fnahmomt. Rom nohnimom arihat to be rpahtet ruheft korht.” Inji kforahmko.  
\v 5 Nd mrokfom rom be turoh fasoh yima yuhur o dukefm ptharahmm. Rroh dukefm nhai dukakahmm Bro Nkifrar ndar bbinysoft hingrnahato yak htamo yuhat. Bingot Bro Nkifrar be tnge kfo pthamotr mount yarim fnah furamot. Tfit bbinysoft tek bari furatn buha mfnahmot. Be buha tek bari furatn mdborhahato tek bupam mano mano frhahir habrimomt.  
\v 6 Tfit Bro Nkifrar kfomotr bro hnut yihato nd bbinysoft wiyauyau hasoyuk tamoh tamoht noh bati wita bugamom.  
\v 7 Arihat to inji tamoh tamohm Bro Nkifrar kfoyuk mrokfo yuhatn be inji korhm. Yorh-wamn be bro kotkfotn garitim. Nd yiha Bro Nkifrar kotim bugarahrm fasoh net fasoh net met yindarim. Kotim wurasohruhatrm bbinysofti mountpno rpat mikur batinirahm.   
\p
\v 8-9 Bar yinouroko, mirahko ammo-nomt wom nmbuhat. Womm kfo kangm, Jisasrhu yawihna mrokfot nhai dimandikaht. To afo attiwonanko, nikmoh dukefti Bro Nkifrarhu dukefte ka rpat korhf? Na kanga ka nhai. Wahtiko, 1,000 gunyjimm nomn htitwonomm be tu boknabok gunyji-mem. Nmoh nyingaye hti yukitwo-nomm. Tfit Bro Nkifrarhu htiyeft htitworm nd 1,000 gunyjimm rpa yihar kanjo. Yo rpa yihar nhaf inji. Nom hti brbohwonomr, tfit rorn nd rpa yihar tfit 1,000 gunyjimm kanjo htitworr. Nmoh dukeft kangnom Jisasr bmbri aniar. Bro Nkifrarhu dukeft htitwor yimamn. Ror nhai wofnkahr wom yimar o mett kaht yinyeft. Rorhu dukeft kangr, yuht bbinysofthu met yindarim yima yuhu ayak kekut bugam afo. Rroh garineftn kot tohyuk yiham yukitm afo.   
\s1 Mounti bbinysoft mibatinirahf  
\p
\v 10 Bro Nkifrarhu wuroh yihar nhai yiha duhater be hti fohtasakrahr rikoh yimam kanjo. Nd yihar yura mountko wamir nadidar sinyahato mount rim fnahniraht. Mount yorhwa gunym tamohm kahtn kandhi ras witarahtm. Ndar bbinysoft yo bbinysoft rhuyuk tamoh tamoht kahtn kandhi witarahtm.  
\v 11 Wahtiko, nhai wom tamohr rim tohtaruhatr. Kur wus bugarahm tamoh tamohm. Ndnettn nikmoh yau nmbu-ham tu Bro Nkifrar dukewa yima yuhurn wayau hiktwako.  
\v 12 Bro Nkifrarhu toheft toh hikhato nd Bro Nkifrarhu wuroh yihar toh gari haso-kfot. Yo toh marnya hasokfot. Inji narahko Bro Nkifrarhu wuroh yihar dimandinerahr. Nd yihar mount nhai rhuruhatt. Kahtn kandhi witarahtt. Kaht mfro funa nanyjarhato nd tamoh tamoht kandhi bati witarahtm.  
\v 13 Tot wom mrokfot Bro Nkifrar kfomot. Kfo memor, “Tfit nfri mounti bbinysoft hingrnaruha. Nd nfri mounti bbinysoft tohruha met yindarim be dborioh nefrpam yakitohhato tohrahm.” Ndnettn nmoh dukefm be nd Bro Nkifrar kfiwa dukef yuhatn hti yukatoh hasorahnom.   
\s1 Dborioh nefrpam yakitohhato Brorhu wuroh yihar toh gari hasokfot  
\p
\v 14 Bar yinouroko, yima yuhum yak hta marnyakfot. Bok dukefm yak duha. Yima yuhum be Bro Nkifrarpar yikfot. Yima yuhum inji yak htarah-komm to be Brorhu wuroh yihar kfo mirahrko, “Niko nhai wom tamohm rhukahmko. Nikmoh yima rifhum wuthayem. Nikomi na bi rpa yima yuhur korhnom.”  
\v 15 Brorhu wuroh yihar inji bmbri nia duha yitahat, rorhu dukeft kangr, ndar bbinysofthu yima bugam afo ayarim tohna bugam na tukanpno. Rroh garineftn nhai yudbat niakahr. Bro Nkifrar tu hifa dborioh dukefr hemorr Porr, nmoh Kristen yimatr. Jisasrhu nia yihar rorpno wom kfo nuhas mrokfom kfo nuhasmornom.  
\v 16 Ror nikompno gontwam wandfamoahat to be nd Jisasrhu nia yuharoh kfo nuhas mro-kfom kfo nuhasmourko. Rorhu wom mrokfom kfo pthamoam fak mmota-mounomm. Wom yimam Bro Nkifrarhu mrokfom wany ffi hasiwam yo Bro Nkifrar hik marnya duha yitam, romn faso faso kfo kekut bokekutmoumm Porrhu mrokfom yo ndwom Bro Nkifrarhu rfa borngthu mrokfom. Nd yimam be tu Bro Nkifrar htirahrm.   
\p
\v 17 Niko nanhu Kristen yimatko, nd giaman tisaroh nefm bi hti hik bohik bugamokomm. Rom be tu hanyjborna nngrajohwomm Bro Nkifrarhu mrokfom. Ndnettn niko dukefmpno tohkfot. Rroh fasoh yima yuhum hneruhamm faso faso kfo hta bohtaruhatmko Bro Nkifrarhu tu dborioh mrokfot niko yakitohwat myak htaniruhakomt tfit rroh dukefm hikrahko.  
\v 18 Jisas Kraisr nmoh Broyer. Nom rorn nrfa htiyakhato rhu nmbuhat yak marnyamo yimayer. Rorpno frtkafrahko be toh bmtahato Bro Nkifrarhu dborioh nefm hikrahko. Nanhu dukeft duka kanga be rorhu yufarpat abronikahtn tuhant yindars be rorhu yufarpatn ariyuta hagrhak-kahmn yihof href be rorhu yufarpat yutahany yutahanye, to be inji.