\id 1TH -1 Thessalonians -NT2088 -Alamblak -Edmiston 23-Sep-2003 \h 1 Tesalonaika \toc1 Tesalonaika thofroh barkof gontwat Porr dwandfakhato htafmot \toc2 1 Tesalonaika \mt1 Tesalonaika thofroh barkof gontwat \mt2 Porr dwandfakhato htafmot \is1 Barkof kfo nuhas mrokfom \ip Tesalonaika tauntn, tot Masedonia profins rhumoa tu bro taunt. Porr misin hingrneft yihato Filipait tohnimohat to be tfit Tesalonaikako yimor. Ndha yihato ndha misin hingrneft hingrnahato sios kasinyamort. Tesalonaikathu misin hingrnefthu kfo nuhas mrokfom htikfot (Aposer 17.1-9). Porr Tesalonaikat misin hingrneft hingrnamohat, bok metm, yindarim Bro Nkifrarhu mrokfom wany yindhorhato hikmomm. Tfit Judam inji htihato namburmom. Namburhato Porr kfo hutt hikafmomr. Kfo hutt hikafmotmr Korinko yimor. Memom, ror tohwarn gutnius mrokfom ror pthiwatrm yimam bi Jisasr hikwom. Korinko tohetrn Jisasr hik duha yimam sinyahato Tesalonaika Kristenm krhopam hemomm. Timotir brbo Beriat tohetrn htihato wanymorm Tesalonaikathu Kristenroh krhopam. Timotir wanyhato rorn Korinko yihato Porr kfo nuhashemorr. \ip Timotir pthayuk mrokfom Porr yak bugahato tfit Por, Sailas, Timoti, rom husfirpat rhuhato Tesalonaikaroh yufatpno kfo bmta mrokfom wandfamomm. Bro Nkifrarhu rfa borngt rhuyuk mrokfom hti hik bohiket tu dborioh duka tunguna yimam Tesalonaikat yiyuk gontwam htihato kfo memom, “Nd kfo bmta mrokfom rhuyuk gontwatn tot Porr wandfayuk barkof gontwat.” Nd barkof gontwatn htamorm Tesalonaika thofm Jisasr hikmo yuhathu kfo yindhor mrokfom, yo rroh dborioh nefroh kfo yindhor mrokfom. \ip Timotir Porrpno yihato Tesalonaika thofroh kfo ttiwon mrokfom kfo ptha nuhas memorr, “Tesalonaika thofm kfo kangme, ‘Kraisr kto tfit yawihna thombate, finji yawihneruhar? Yo fitoh yuhat nieruhar? Yo nohet yimam finji sinyaruham?’” To nd rroh ttiwon mrokfom Timotir pthamotrm gontwaye tfit kfo nuhas hik bohikmorm. \c 1 \ms1 Porri rorhu hingrnanho yimam Tesalonaika Kristenm mfro dukamo yuhat \mr (Sapta 1—3) \p \v 1 Nom Por, Sailas, Timotironomn ndar gontwat wandfewunomko niko taun Tesalonaikat yorhwa sioshu tuhan yindariko. Niko nmoh Bro Yifemri Nungothet Jisas Kraisrpno frtkafwa tuhan yindariyeko, nikompno ndar gontwat htefiwunomt. Bro Nkifrar yak marnyakahtrko, nikmoh yima yuhum mirhurahmko. \s1 Tesalonaika thofm Jisasr hikmo yuhatpno Porr yindhormor \p \v 2 Niko Bro Nkifrar yakitohwa nmbuhat dukahato yiha yiha Bro Nkifrar kfo yindhorhato kfo bruttne-wunomko. \v 3 Nom htitwonom nikmoh dukefm Jisasrn yihato dborioh nefm hikwoko. Dborioh nefm yakitohetkomn womm htineft kak marnyewukomm. Yo tamoh krhopam nianeft nhai yakrmekahko. Tohhato titewukomm. Krhopam titahato nikmoh dukefm kitm Nungothet Jisas Kraisr hneruha dborioh rhu nmbuhatn. Nom inji htitanomn Bro Nkifrar kfo yindhor-wonomr. \v 4 Bar yinouroko, Bro Nkifrar be marbit htewatrko, nom inji htihato kfo kangnom, Bro Nkifrar bi turhu yufatn kfo htamorko. \p \v 5 Nom nd gutnius mrokfom nikmoha hnehato kfo ptha nuhasmohat be Bro Nkifrarhu Yafothathu bbukeftpno ahingrna duha yinom, be mrokfo furam kanjo wany huhrasaformokomm. Nd Bro Nkifrarhu Yafothat, nom hatohyukt, nd Yafothatn nikmoh yima yuhum thu yuhurmottko nom pthayuk mrokfom wany yindhorhato wufakmokomm. Nom nikompno yi tohmohat, memonom, “Rompno ai atohkahnomn, nom tohruha toheft rom htiyakruhamn nd yuhat toh hikrahm.” \p \v 6 Niko Bro Nkifrarhu mrokfom wany yakiohato hikmohat, bok yimam inji htihato bok krhopam hemomko. To niko nd krhopam yakmohat niko nmoh nefti Jisas Kraisrhu neft hikhato tohhato nd krhopam titamokomm. Nhai yonenm kanjo kfo nurrmoko. Bro Nkifrarhu Yafothat yima yuhum hemottko nd krhopam yindhortpno titamokomm. \v 7 Ndnettn Masedonia profinsi Akaiat tohyuk Kristen bugam nikmoh nefm rihtiyakhato bi nikmoh nefm hikwom. \v 8 Bro Nungothetrhu mrokfot, niko pthayukt, bi frfnahnitatt kmi kmim bi wanukwomt. Yimam nrwir tanmbarafhato kmi kmi wanyekwa kanjo kmi kmim bi wanukwomt. Nhai be Masedonia profinsi Akaiarpat mrokfot wanykahmt. Nhai. Bi kmi kmim wanukwomt. Bi wanyetmn nom nhai tfit kfohekfot. \v 9 Nom tumn tfit kfo tndh nuhas hanitwomnom nom nikmoha yihato Jisas Kraisrhu mrokfot kfo pthahato niko wanyakiohato nd nkifra tahi yifonm myafhonihato yima yuhu yakkekutmo yuhat, yo niko Bro Nkifrarhu hingrna yimako yorhwa yuhat. Nd ndm kfo tndh nuhaswomnom. \v 10 Yo kfo tndhmomt niko Bro Nkifrar hikhato rorhu Yinemr toh gari hasiwa yuhat. Nd yon Jisasrn nohhato tfit Bro Nkifrar kasinyahato, rorn fak noh-morm Bro Nkifrarhu namburpam bi duka htamom. \c 2 \s1 Porr Tesalonaikat hingrnamo yuhathu kfo nuhas mrokfot \p \v 1 Bar yinouroko, bi tukomn hti-mokomt nom nikmoha hingrnamo hingrneft. Nd nom hingrnamo hingr-neft nhai yi furarmot. Awi, yafothett rhumot. \v 2 Niko bi wanymoko, nom Tesalonaikat yimohat, afo Filipait tohnimonom. Filipait tohnimohat kfo rindho borindhomomnom yo faso faso fak bebmomnom. Huhra krt kanjo mfrhabtotmonom. Filipait tohni tfit Tesalonaikat yimohat, nhaf krhopam fknemonom. To nhai yakrmermonom. Nhai. Bro Nkifrar nmoh yima yuhum thu bmtamotrm nom tohhato gutnius mrokfom kfo nuhasmonomko. \v 3 Niko Jisasrhu hikneft nom niko kfomohat, nom nhai wom dukefmpno yuwi duka marimonom, “Bro Nkifrarhu mrokfom akfo nuhaskahtnomm Jisasr hikruhamn marufam hirahmnom, o nom kfo yindhorhato bro yufat hirahm.” Nom nhai nd nd dukefmpno gutniuskfot kfo nuhasrmonomko. Nhai. \v 4 Bi tu Bro Nkifrarn bi nmoh yima yuhumi nmoh dukefm hti nhombra bonhombrahato ee nd hingrneft nmoh tirmn htamort. Ndnettn nom nhai mekahnom, “Nom pthayuk mrokfom tuhan yindarimn awany yindhormm.” Nhai. Nom kangnom, “Bro Nkifrarn awany yindhorrm nom pthayuk mrokfom.” \v 5 Htimokmnom, nom nhai wom yiha nikmoh wuskam o tamohm htihato mkfo rhti borhti o mkfo yuhur boyuhur-rmonomko. Nhai. Bro Nkifrar htitwor nom inji kfiwohat, nom nhai wom yiha inji nawonrmonomko. \v 6 Nhai marimonom, nikomn o wom frohmn nmoh yufam yura yura yuta hagrha-rahmm. \v 7 Nom Kraisrhu aposerenom. Nomn aposer hingrneft kakitohwonomt. Be amekahnomn nmoh yufam wayuta hagrhatwakomm, to inji kformonomko. To nhai, nom nhai inji kformonomko. Nom be noh hmbrenano tohhato mmemrom yonm yakitohhato hmnewa kanjo inji fakitohmonomko. \v 8 Nmoh yuhuwaf marbim nikomn rhu mif mifmom. Ndnetnomn nmoh dukefm bi duka memonom, “Nom rroh kmit yihato gutnius hi hanyeftpno kangnom, anohnom o finji anamnom, nhai mrokfom.” Nom be yi tohnhohato kfo bmta mrokfom hemonomko. \p \v 9 Bar yinouroko, nom nikompno tohhato Bro Nkifrarhu gutnius hingr-neft hingrnamohat htimokmnom yonmari marm hingrna krifafmounomm, yifungm hingrna yifungafmounomm. Nhai be marimonom, be nikomn krhopam hirahnom tamoh yeshri hanyeft, o hweyuk tkitroh he, nd nd nefm. Nhai. \p \v 10 Niko Kraisr hiket yimakompno nom tohmo toheft, niko htimokmnom yo Bro Nkifrar htimornom, nom nhai wom fasoh neft rim na nuhasrmonomko. Nmoh toheft toh marnya bomarnya-motnomt htimokomt. \v 11 Tamoh tamoh nefenm nom namoam, yifemr tohhato turhu yinemrom tamoh tamoh nefenm kfo tebos nuhaswa kanjo inji kfo tebos nuhasmounomko. \v 12 Nikmoh yauyefm tohefm mduka krho htatamoahat, nomn kfo kasinya-mounomko, o tamoh krhopam yak-moahat nomn yihato tohnhohato kfo bmta mrokfom hemounomko. Yo kfo tebos botebos nuhasmounomko toh marnyahato Bro Nkifrar tohwa tohefthu toh yuham. Nd tu Bro Nkifrarn fakmorko. Yakhato turhu mofsinhitn yak htatahato toh hongmb hmbremorko. \s1 Tesalonaika Kristenm Bro Nkifrar yakitoh kihhato toh bmta kihmom krhoparoh titaneft \p \v 13 Niko Bro Nkifrarhu mrokfot yakmo yuhat ridukak thombat, Bro Nkifrar nom kfo yindhorwonomr. Niko nom pthayuk mrokfom wanymohat, nhai duka marimoko, “Nd rom pthiwa mrokfom be yimamn pthiwumm. Tamohmpno yakruhanomm?” Nhai inji dukarmoko. Duka memoko, “Bro Nkifrarhu mrokfoyem.” Ndnettn fakmokomm. Nd mrokfot nikmoh yima yuhum rihingrnahato Kraisr hikwoko. \v 14 Bar yinouroko, Judiako rhuyuk siosroh Kristenm yakmo krhopam kanjo niko inji krhopam fakmoko. Nhai be briyo krhopam he furarmomko. Bro Nkifrarhu mrokfom hikmotko tukmoh korhof yimam hti namburhato faso faso fak bebmomko. Judiaroh Kristen sioskfot to turoh korhof Judamn namburhato fak bebmoumm. \v 15 To nd Judarpamn nmoh nkiframpno tohmo profetm wasmomm, yo tfit Jisasr tohmo yihamn tohyuk Judamn, nmoh Nungothet Jisasr wasmomr, yo tfit arihat nom tohwa yihamn nd Judarpamn, be hti dbnot thuwomnom. Nhai hifa nyingar htakahmnom. Kangnom wom taunm ainyom, kak tuhefiwumnom. Rom inji nahniwa nefm be tu nhai mif Bro Nkifrar hti yindhorkahrm. \v 16 Nhai wofnkahm yima tangim gutnius wany-hato Bro Nkifrarpno rim tohakneft. Ndnetmn ndhtet neft newum. Rom nd nahnewa fasoh fasoh nmbuham bi nahna nahnewamn nd rroh fasoh fasoh nefm bi kminysofm kanjo wayekwamn nd wukier bi tathur yibonwomr. \s1 Porr mfro yibonmour tfit Tesalonaikako yinyeft \p \v 17 Bar yinouroko, nom Judam mhutt hikafhato nndo nndo afo toh-mohat, to mirahko ka mumafonimo-nomko. Nhai. Yonr frtrohhato yifemr yonrhu dukefr yorhwa kanjo nmoh dukefr inji dukamonomko. Yima nyingatikroh nahtineftn, nhai nahti-rmoanom. Nmoh yima yuhum nikmoh dukefrn tohmoatm, ndnetnomn niayuk yihotam rim hambrak mhambrakmou-nom. \v 18 Nikmoh tfit yi hti yibonet-nomn, na Pora dbiyaf hatohmoa yinyeft, to nhai. Satanrn nmoh yiyuk yihotam wuyak ayakmourm. \v 19 Nhai be sfno marimoanom, yihato ahtinomko. Nmoh dukefm be nikomn duka haso-mounom. Kto Jisasr tfit nianeft kfo mirahnomr, “Tesalonaika thofm gutnius mrokfom kfohemohat, yakhato fakitoh kihmomt.” Nd yiha be tu bro yindho-reft yakrahtnom. \v 20 Niko gutnius mrokfom wanymohat, be yakhato fakitoh trp kihmokomm. Nom ndtpno kfo yindhorwonomko. \c 3 \s1 Timotir tfit Tesalonaikako yimor \p \v 1 Niko be tu mfro dukamou-nomko. Nd dukeftpno nhai tfit wom kuknarmonom nikmoh yihato htineft. Ndnetnomn rhu napthamo-nomn no memono, Atensn toh haso-rahno. \v 2 Timotirne Tesalonaikako riyahr. Nd yima Timotir, nmoh hingrna namnou yimayer. Bro Nkifrarhu hingrnafat ror yakitohwartn Kraisrhu gutnius mrokfom kfo ptha nuhas htfasworm. Niko Bro Nkifrar hikwa yuhatpno tamoh krhopam o yima yuhum korhmko, rorn nikompno rhuhato wom dukefm o yima yuhum hiruhatrko yima yuhum thu jubtwa-rahmko. \v 3 Kangnom be nd krhopam o tamoh dukefmpno rhurahko, yima yuhum nhai rhu marnyaruhatmko. Tuko bi wanyeteko, ndhtet krhopam niko yekwam, to be tu Bro Nkifrar kfomo yuhatn nd krhopam kekwoko. Rorhu mrokfot hiket yimam ndhtet krhopam kekwom. \v 4 Bi nikompno tohmohat, bi kfo memonomko, “Yimanom Bro Nkifrar hiketnom, yimam sinyahato krhopam hirahm-nom.” To nd nom kfomo mrokfot to bi tot bi htitwokomt. \v 5 Yimam inji yak bebmoatmko memoya, “Nhai wom kukna hatohrhota rroh yi htineft. Kukna hatohruha, bi yima yuhur mwastiwonyuk yima Satanrn yihato bi rorn rithu nhirakruhatrm nom hingrnamo hingrneft be yi furaraht. Nd dukeftpno Timotir kfo tkruraf-motanr niamor nikmoh hti hafott.” \s1 Timotir Tesalonaika korhof hingrnefthu kfo yindhor mrokfot hanymotrt Porr yindhormor \p \v 6 Timotir nikmoha htanyhato niamohat, bi asha nompno mfnahhato bi ptha nuhas bonuhasmornom nikmoh mrokfom. Kfo memornom, “Awi, tom tohhato Bro Nkifrar kakitohwomr. Bro Nkifrar yakitohhato tum nayak marnya yo womm yak marnya inji newum.” Kfo memornom, “Niko dukewukmnom. Dukahato kangko, ahtinomm.” Yo nom to inji kangnom ai ahtinomko. \v 7 Bar yinouroko, nikmoh Bro Nkifrarhu yakitoh kihwa mrokfot wanyakhato be tu bro yindhoreft fakmotnom. Nd yindhoreft yakmottnom nd nom hatoh hasoyuk krhopam nhai tfit dukarmo-nomm. Tfit yindhorefrpatn bromot-nom. \v 8 To be nhai nom wom tamoh duka kurhefenm rhuruhatmnom, be niko Bro Nkifrarpno rim tohni bugahato myakitoh kihaknineft. \v 9 Nom nikmoh nmbuhatpno yindhorwa yindhoreft finji kforuhanomt? Be tu nndohtet yindhoreft yekwattnom, to finji Bro Nkifrarpno nd yindhoreft kfo hikruha-nomt? \v 10 Nikmoh yi htinefthu dukefr nhai yafhokahnomr. Nd duka yima yuhurpno yifungm, marm kfo bruttna-hato kangnom, “Rompno yi tohhato kfo hta, kfo marnya, kfo bmta inji naruhatnomm nd Bro Nkifrarhu hik duka yima yuhur yi marnyaknirahrm.” \s1 Tu Bro Nkifrarn Porrhu yiyuk yihotat yak nukakkfot \p \v 11 Nom Bro Nkifrarpno yiyuk yihotam kfo bruttnewunomr. Nd Bro Nkifrarn, nmoh Bro Yifemr, yo Nungothet Jisasr, kangnom rof tufn nmoh yiyuk yihotat ayak htakkahtft yi htirahnomko. \v 12 Yo nom nikompno nayakitohwa kanjo nom kfo bruttna kangnom, niko, Jisasr hiket yimako, ndhtet yima yuhum ahikahtrko rpat tir niyakitohhato rpat toh marnya bomarnyarahko. Yo wom yima furam-pno to inji buga nayak nanymahato rpat tohkfot. \v 13 Nom kangnom, inji akfo bruttnakahtnom thu bmtarahrko. Thu bmta hanyruhatrko dborioh nefm hikrahko. Kto nmoh Nungothet Jisas Kraisr turhu mounmotmpno yawihna thombat, yima yuhum be wutham ruhetmn mihtirahrko. \ms1 Tesalonaika thofm dborioh dborioh nefrpam yakitohhato tohkfot \mr (Sapta 4—5) \c 4 \s1 Dborioh toh nmbuhat tohkfot \p \v 1 Bar yinouroko, nd bi wandfa hnayuk mrokforoh wuroh mrokfo nmbuham htaruhanm. Bro Nkifrar hti yindhorwa toheft nom kfomot bi wanymokomt. Niko nd tohefroh kfo nuhas mrokfom wanyhato Bro Nkifrar hti yindhorwa tohefm ritohakmoko. Tfit Jisasrhu yufatpno kfiwunomko, be ndhtet tohefrpat toh hik hanykfot. \p \v 2 Nungothet Jisasrn ndhtet mrokfo duka yima yuhur hiyaf hanymoatrnom kfo hta nuhasmounomko. Ndnettn nd nom kfo nuhasyuk toh yuhatn toh hikkfot. \v 3 Bro Nkifrarhu duka yima yuhur duka kangr, nikmoh tohefm be tur kanjo tohhato turhu dukef yuhatn toh hikhato tamoh tamoh nefm nakfot. Nhai wofnkahr wom tuhanet yimar wom met furatpno yikfot o wom ramet mett wom nndo yima furarpno yikfot. Damiag yimam yo met tmahm nhaf inji buga. Nhai be yima fura met furampno yikfot. \v 4-5 Niko tuhanet yimako yo ramet metko yo niko damiagko yo tmahko mirahko Bro Nkifrar hik duha yimam kanjo met fura bofurampno yo yindari fura bofurampno arim fnahnom. Wom mett htihato yima yuhur sinyewur o mett wom yimar htihato yima yuhur sinyewur, nd yima yuhur yudbat yak thukfot o yakrme trohkfot. \v 6 Niko Bro Nkifrar hiket yimako mirahko womr sinyahato womrhu mett amtoh nheh-hiyanr. Bi nikompno tohmohat bi kfo memonomko, ijoh tonayet metm o yindarim Nungothet Jisasr nhai miruhatr, “Nhai mrokfom inji arinaf hanym.” Nhai mif. Ndhtet nayet yimam rorn yakhato nndoh yuhat yak hatoh-aforahrm. \v 7 Bro Nkifrar nom nakuyak-hato ror hikmohat, nhai marimor, “Anakuyakkahtanm aniekahmn, ndhtet ndhtet nefm narahm.” Nhai. Rorhu dukeft duka memor, “Anakuyak-kahtanm aniekahmn na tuka tohwa toheft tohrahm.” Nd dukeftpno nakumornom. \v 8 Tu Bro Nkifrarhu Yafothat yahukatrm yimam rroh toheft Bro Nkifrarhu toheft kanjo tohwom. Fitoh yimam ndar kfo hta bohtayuk mrokfom wanyhato hamuh tfa thuwomm, nhai be nd mrokfo kfoyuk yimarn hamuh tfa thukahm. Nhai. Bro Nkifrar hamuh tfa thuwom. \s1 Dborioh dborioh nefrpam yakitoh kihkfot \p \v 9 Tuko Bro Nkifrar hiket yimakmoh nayakitohhato nayak marnya yuharoh mrokfom nhai tfit gontwatn hta-rhotanm. Ndm bi tu Bro Nkifrarn nd nefm fak nuhas bonuhasmorko. \v 10 Bi Bro Nkifrar nd nefm yak nuhasetkomn, fitoh Masedonia tkitm tohyuk Kristenm, rpat nayakitohwakomn nayak marnya bomarnyewuko. To bar yimako, kfo bmta mrokfot kfiwunomko, nd dborioh nefm, tuko nayak nuhaswam, wayakitoh kihtwakomm. Mirahko ayafhonomm. \v 11 Mrokfom bi kfomonomko niko rhu digr yima yuhur rhu nhombra bonhombrawonkfot. Rhu digr yima yuhurpno nhowi rhu marnyahato tukmoh hingrnefmn hingrna mmo bommokfot. Tukmoh rhu nmbuhat dukahato niko tukmoh tire hingrnahato tukmoh tirehm yakkfot. \v 12 Inji narahko nhai wom tamohm yak kkopentaruhatko. Wom riruh aruhyukm niko yiha yiha rhu hasoyuk rhu nmbuhat hti hikruhamtn kfo yindhor-rahmt nikmoh rhu nmbuhat. \s1 Nungothet Jisasr yawihnehato yak nhafohrahrnom \p \v 13 Bar yimako, noh hanita yimaroh mrokfot kangnom, akfo dukanomko. Womm kfo kangm, nohwa yimam nhai tfit sinyaruhatm. Niko mirahko ndhtet dukefet yimaroh dukefm hikhato yimam nohneft anur yibobi-yafnom. \v 14 Nmoh bro dukeft duka kangnom, Jisasr nohmohat, tfit sinyamor. To nd rorhu mrokfot wany yakiohato nohwam tfit sinyarahm. Tu Jisasr kforahr, Bro Nkifrar tfit kasinyafruhatrm tfit Jisasrpno nierahm. \p \v 15 Tu Bro Nungothet Jisasr kfoyuk mrokfo yuhat nom kfo hikwonom. Bro Nungothet Jisasr yawihna thombat, nhai bi yima nfrinomn nakuhato tohakruhatnom. Nhai. \v 16 Nungothet Jisasr yawihna thombat, barkoft tu Jisasrn kforuhatr, mtohekwa mounmotr naku tawihafrahr, ee tfit noheh yimaroh yakthoyuk fumrr tohrahr. Ndrpno Nungothet Jisasr moun yuhat yawihnerahr. Yawihnehato nd rorhu mrokfom wany yakioni hanyhato noh hanyukm afo nyingam mfrdborharahm. \v 17 Rom myukatohruhatm ee bt yima nfrinomi rom rpat buga muhnfat kanjo watuhakruharnom rpat mnathu hmbreniruhanomn rpat mounko Jisasrpno mrifinyrahnom. Rorpno mnahtihato ror tohruha tkitrpat toh nkifranirahnom. \v 18 Ndar wandfewa mrokfom yakhato nakfohi hanykah-komn yima yuhum tfit marnyarahmko. \c 5 \s1 Nungothet Jisasrhu nia yihar nom toh gari hasokfot \p \v 1 Bar yinouroko, nhai tfit gontwatn wuroh yiharhu yiharoh kfo nuhas mrokfom kforuhatnomr. \v 2 Nd wuroh yiharhu yiham nieruha yuhat, ndt bi kfo nuhasmotnomko wany hik bohik-moko. Nd yihar be yak fohtasakrahr, rikoh yimam yifung niewa kanjo. \v 3 Bi yimam kfo hany kangm, “Arr bi dborioh yihayer. Rhu marnyarahnom.” Inji kfo hanyhato mirahm, ka hifa kfoyet, yimam yak batiyuk krhopam yudbat nierahm mett yon yakrphewa kanjo. Nhai wom yimar frfnahniruhatr. \v 4 To yinouroko, nd yihar, to nikome kspitat tohwakomn rikoh yimam kanjo yak fohtasakrahkomr? Nhai. \v 5 Nom, Bro Nkifrar hiketnom, nom yima dukefmpno dborioh nefrpam newunom, yimam mar nukeftpno hti hikak hanyhato tamoh nefm niwa kanjo. Nom nhai kspitat yak tato botatiwa kanjo tamoh tamoh nefm na fura bofuraknikahnomm. \v 6 Ndnettn nom, Bro Nkifrar hiket yimanom, mirahnom ahwanyom yifungthu yimam kanjo. Yimam hwitam nhai yima dukefm rhuhato wanykahmm tamoh nmbarefm. Yo nhai htiyakkahmm tamohm niayukm. Nom inji hwe juha. Nom yima dukefmpno rhuhato tamoh tamoh nefm yima dukefmpno yak nhtakfot. \v 7 Htiyeteko, yimam hwitam yifung hwitm yo yimam drinhato spakwam, nhaf yifungtn drinhato spakwom. \v 8 To nom, Bro Nkifrar hiket yimanom, nom mar nukat tohwa yimayenom. Nom yima dukefmpno rhuhato tamoh tamoh nefm htihato yak nhtakfot. Nom soldiam kanjo siot kapakfoti hat kapakfot hmbrihato tohhato yukatoh hasokfot. Nom nd soldiam kanjo toh bmtahato yukatoh hasokfot. Nom Bro Nkifrarhu mrokfom wany yakiohato wom wommpno nayak marnyahato Jisasrhu niayuk yihar toh gari hasokfot. Ror nia thombat miyakruharnom rorhu tirtn rhurahnom. \v 9 Nd kim hegirtayet wukier Bro Nkifrar bi kim hegirtamor, nhai nmoh yufatpno Bro Nkifrar kim hegirtarmorr. Nhai. Nom tu Nungothet Jisas Kraisrn miyak htiyakhato turpno rhuyukenom. \v 10 Nom bi Jisasr suh nanyormo yimayenom. Ndnettn nom be rorpno tohnirahnom. Afo yima nfrinom tohetnomn nier, nhai mrokfom, nom be yinyefrpayet. O bi nohetnomn nier, ndt to nhai mrokfom, nom be yinyefr-payet. \v 11 Ndnettn Bro Nkifrar hiket met yindariko, niko tuko rpat tohhato tuko nakfo bmta, nakfo bmta hasokfot. \s1 Wuroh kfo nuhas mrokfom \p \v 12 Bar yinouroko, wom mrokfo nmbuhat kfiwunomko. Nikmoha frohmn tohhato ndha tohyuk Kristenko yakitohhato kukatohaf hanitwomko, niko be nd yimarpam yukatohhato rroh yinhitn tohkfot. Nd yimam Nungothet Jisasr kak htewurm nikmoh mrokfo hehato yak hta bohta inji naneftn. \v 13 Romn kakitohwomko. Ndnettn niko romn bro yima yuhum htahato nd yimam yak marnyakfot. Niko buga nd yimampno nayak marnya nayak marnyahato rpat tohkfot. \p \v 14 Bar yinouroko, kangnom, wom yima yuhum ahenomko. Wom Kristenm rhu hhrek hasohato nhai turoh rhu nmbuhat dukahato turoh hingrnefm hingrnakahmm, yihato mrokfom hekfot. Yo Yimam boknambok dukefm kasi htatewatmm bok dukefmpno yima yuhum gumuhatewumm, niko yihato rhu wanyhekfot. Rhu wanyhehato hifa yima yuhum hehato hifa yima yuhum yakhato yima yuhum mirhu-rahmm. Yimam Bro Nkifrar hik hanyhato wom nmbuham krhopam yakhato kfo nakutmko, niko yihato rroh krhopam wanyhato kfo hta mrokfom hekfot. Yo wom yimampno yudbat sinyahato namburakni duha. \p \v 15 Yimam sinyahato finji newumko, niko mirahko toh kekuthato tawo finji ananomm. Niko be tfit hifa yima yuhurn tohhato dborioh dborioh nefm yak nuhaskfot nd Bro Nkifrar hiket yimam yo wom yima fura bofuram. \p \v 16 Yiha yiha niko be yindhor yima yuhurpno rhukfot. \v 17 Yindhor yima yuhurpno rhuhato yiha yiha kfo bruttna hasokfot. \v 18 Tamoh tamoh nefm korhmnom, be Bro Nkifrarpno kfo bruttna yindhorkfot. Tot tu Bro Nkifrar dukewa dukef yuhat. Yimam, Krais Jisasrpno frtkafetm, nd yuhatn hikkfot. \p \v 19 Bro Nkifrarhu Yafothat bi wom yimampno mthu dbothathato kahm kanjo hingrna sinyewut, mirahko tfit ahwa tpohnomt. \v 20 Bro Nkifrarhu Yafothat wom yimam thu dbothathato wom mrokfom kfo pthewumm, niko mirahko rom pthayuk mrokfom wany-hato akfo amanyom, “Ndr tur ptha mmbrafinywor. Frohm wanyruhamr?” \v 21 Tamoh mrokfom kfo pthewum, niko rroh mrokfom wanyhato yak nhtakfot. Yak nhtahato fitoh mrokfom hifa wany fughewukomm, ndm yakitohkfot. \v 22 Fitoh mrokfom faso wanukwokomm, yafhokfot. \p \v 23 Nd dborioh noh hmbre yima yuhu hnewa Bro Nkifrarn niko yakhato turpno rim yak htewatrko be rorhu tuhan yindariko rhu buganirahko. Rorpno tohruhakomn nikmoh yafotham yo yima yuhum yo tohefm be nhai faso faso yiruhatm. Nmoh Nungothet Jisas Kraisr nia thombat be nhai mrokfo duhatko rhurahko. \v 24 Nd niko naku-yakmo Bro Nkifrar bi wom mrokfot kfirt, to be kak hik twanhiwurt. Ndnettn nd ror bi kfo htamo mrokfot yak hikrahrt. \p \v 25 Bar yinouroko, Bro Nkifrarpno wakfo bruttnatwakmnom. \p \v 26 Niko lotu yiham rifinyneft, niko tuko Kristenko naki yindhorhato tir nhekfot. \p \v 27 Nungothet Jisasrhu yufatpno kfi-wanko, ndar gontwat Jisasr hiket tuhan yindari bugampno ritim nuhaskfot. \p \v 28 Be injirpa mrokfom. Nmoh Nungothet Jisas Kraisr ayak marnya bomarnyatwarko.