\id 1JN -1 John -NT2088 -Alamblak -Edmiston 24-Sep-2003 
\h 1 Jon 
\toc1 Jonr  dwandfamo barkof gontwat 
\toc2 1 Jon 
\mt1 Jonr  
\mt2 dwandfamo barkof gontwat  
\is1 Barkof kfo nuhas mrokfot  
\ip Jonr ndar barkof gontwat wandfamohat, hus bro dukefetrn ndar gontwat wandfamort. Duka memor, “Gontwaye Kristenm bi kfo dukarhotanm Bro Nkifra nitohfpno nayakitohruhamn rpat tohrahm.” Yo nhai wofnrmor kspitat tohyuk yimam yihato Kristenm mfrnheh bonhehakhato rom Bro Nkifrar frtrohneft.  
\ip Nd kspitat tohwa yimam kfo kangm, “Bbinysoft dborhayuk wuskar yo yimam nhai tu dboriohm rhukahm. Tu faso mif korhm. Bro Nkifrarhu yon Jisasr ndar bbinysoft adborhar nhai dboriohr rhurfotr. Yima mifm kanjo inji faso rhurfor.” Yo kfo kangm, “Bro Nkifrar nhai ndar bbinysoft nom tohhato niwa nefm htihato kfo ptha inji nakahr. Nhai. Kukatoh marsisa hasiwurnom. Ndnetnomn nom tamoh neft to frohm kforuhamnom, be nafura bofurakfot. Dborioh nefm o fasoh nefm be nafura bofurakfot. Bro Nkifrar nhai ptha inji nakahrm nom niwa nefm. Ndnetnomn tamoh nefm be tunmoh fijo nafura bofurakfot.”  
\ip Jonr duka memor, “Ndhtet kfet yimam Kristenm wany yakio duha.” Kfo memor, “Jisasr tu yima mif mifr tohmor. Fitoh yimaroh yima yuhum kfo kangm, Jisasr tu yima mif mifr tohmor yo Bro Nkifrar rpat kakitohwomr, nd yimam womm yak marnyakfot.”  
\c 1  
\ms1 Mirahko yifungt ritohwa yimaroh nefm ahiknom. Bro Nkifrarhu nukeft wiyauyaukfot.  
\mr (Sapta 1.1—3.10)  
\s1 Bro Nkifrarhu mrokfot yafothetet  
\p
\v 1 Nda gontwat na wandfiwat wom mrokfot kfo nuhasruhanko. Nd mrokfot tu yafothet mrokfot kfo nuhasruhanko. Ndar bbinysoft tafi trha duha nd mrokfot bi ritohngotakmot. Nom bi riwanyakmonomt nd mrokfot. Yo tunmoh nyingaye htimonomt. Yo tunmoh tire faktiwonmonomt.   
\p
\v 2 Nd yafothet mrokfot yarim fnahmott htimonomt. Nom nd mrokfot htihato kfo nuhaswonomko. Nd rhu nkifrayet mrokfot bingotn bi Bro Yifemrpno rhumout.   
\p
\v 3 Nom htihato wanyuk mro-kfom kangnom akfo nuhaskahtnomko, niko wanyhato nom tohwa toh yuhat rpat tohrahnom. Rpat tohhato nom Bro Nkifrari rorhu yon Jisas Kraisrpno tohwa tohefrpat toh bugarahnom.   
\p
\v 4 Nom kangnom, gontwaye akfo nuhaskahtnomko niko wanyhato be bro yindhorefrparpno rhurahnom.   
\s1 Bro Nkifrarhu nukeft wiyauyaukfot  
\p
\v 5 Jisas Kraisr pthayuk mrokfom nom wanyhato kfo ptha nuhaswam inji kfiwum, “Bro Nkifrar nhai wom tefi kspitefenrpno rhukahr. Nhai. Ror bro mar nukefrparpno korhr.”   
\p
\v 6 Wom yimar kfo kangr, “Na Bro Nkifrarpno hifa hifa tohwa. Nhai na wom nefm nakaha.” Inji kfet yimar wiyauyau marnyakfot. To tfit rorhu wiyauyau nmbuhat nndo nndo rinewunineft, nd yimar be tngrpatn kfo furewur. Nhai Bro Nkifrar hikkahr.   
\p
\v 7 Nom Bro Nkifrarhu mar nukeft tohhato rorhu dborioh nefrpam hikneft, tu Bro Nkifrar dborioh nefm niwa kanjo nom wom Kristenmpno be rpat toh marnya-hato nhai wom beb nmbuham rhu-ruhatmnom. Rpat tohruhanomn rorhu yon Jisas Kraisrhu kkupaye nmoh fasoh fasoh nefm yak wus bowuswatrm nmoh yima yuhum wutham rhurahm.   
\p
\v 8 Nom be tunmoh rhu nmbuharpam hti yukatohhato kfo mirahnom, “Nom nhai wom fasoh nefenm rhukahmnom.” Mrokfot inji kfoneft be tunmoh nefm kak wunewunom. Nhai tu kfo mifkfot kfokahnom.   
\p
\v 9 Nd nom nahnayuk fasoh fasoh nefm Bro Nkifrarpno yihato kfo ptha nriyafrahnomm, nhai wanyhato rhu mongruhatrnom. Tur kfomo yuhatn nd fasoh nefm yak wus bowus thurahrm. Yak wus bowus thuhato duka mumaforahrm nmoh fasoh nefm.   
\p
\v 10 To tfit nom kfo manyeft, “Nom nhai wom fasoh nefenm nakahnom.” Inji kfonefte ka Bro Nkifrar kfo furamor ror dkfo memohat, “Yima bugam fasoh nef bugayetem?” Nd mrokfot ka kfo furamot. Niko ka nhai mdukakkahnom ror bi kfoyuk mrokfom?   
\c 2  
\s1 Kraisr nmoh toh tario yimayer  
\p
\v 1 Bar yinouroko, nann ndar gontwat wandfiwanko. Kanga akfo hta nuhasanko. Mirahko fasoh fasoh nefm ananom. Be toh hanyhato wom fasoh neft mnent, tor nmoh wom toh tario yimar. Tor Bro Yifemrpno tohwor. Nd yimar Jisas Kraiser. Tu dborioh yima mifer. Nom niwa fasoh fasoh nefm tfit rorn Bro Nkifrarpno rhuhato kfo kangrr, “Nd yimaroh nefm nann bi suh nanyormoyanm. Mirahn tfit adukahiyanm.” Rorn nd mrokfom kak hta bohta marnyewurm.   
\p
\v 2 Rorn nmoh ufasoh nefmpno nohmor. To niko mirahko ka be nmoh nefrpamn nohmorm, nhai mif. Nda dodh bbinysof bugathu met yindari bugaroh nefm noh bugamorm.   
\s1 Yimar Bro Nkifrarpno brbo frtkafetr, nd yimar kak hikwort tu Bro Nkifrarhu thfa mntwathu mrokfot  
\p
\v 3 Bro Nkifrarhu thfa mntwathu hikneftpno, Bro Nkifrar hti duka tawisafwonomr.   
\p
\v 4 Wom yimar kfo kangr, “Na bi Bro Nkifrar tawisafwanr.” Tfit rorhu wiyau yau toh nmbuhat nhai Bro Nkifrarhu thfa mntwat kfiwa mrokfo yuhat hik marnyakahrt, nd yimar be tngrpatn furewur. Nhai tu kfo mif mifkahr.   
\p
\v 5-6 Yimar Bro Nkifrarhu mrokfom hiketr, Bro Nkifrar rorhu yima yuhur korhr. Yimar kfo kangr, “Na Bro Nkifrarhu mrokfom kak hikwa.” Inji kfet yimar tu Jisas Kraisrhu wura tfi yuhatn yau hikkfot. Jisasrhu wura tfi yuhat yau hikhato nom htiruhanomn kfo mirahnom, awi, Bro Nkifrarhu toheft toh hikwor.   
\p
\v 7 Bar yinouroko, nd yima nayak marnyanefthu mrokfot na wandfiwat, mirahko ka nfri mrokfoyet. Nhai. Nda mrokfot bi niko Kristenko riwanyakmo mrokfoyet.   
\p
\v 8 To nda mrokfot tu mna yimbu yuhettn, ndnatn nfri mrokfot kanjo wandfiwanko. Nda mrokfot bingot tu yafothett rhumot. Kraisr nd mrokfot hikhato bro hingrneft hingr-namor. Yo niko nd mrofkot wanyhato yifung kspitathu ufasoh nefm htany-hato Brorhu nukeftn wiyauyauwoko.   
\p
\v 9 Wom yimar kfo kangr, “Na Bro Nkifrarhu mar nukefrn tohwa.” Inji kfet yimar tfit wom Kristenm hti srthuworm, nd yimar nhai mar nukefr tohkahr. Yuhre kspitat tohwor.   
\p
\v 10 Yimar wom Kristen yimampno nayak marnyahato rpat tohwar, tor nd yimarn Bro Nkifrarhu mar nukeftn tohwor. Mar nukeft tohyuk yimar nhai suhkahr.   
\p
\v 11 Yimar wom Kristen yimam hti sretr, nd yimar afo yifung kspthu nefm tohwor. Yiro yifung kspt tohwarn nyinga kunyjetm kanjo tur yiyuk yihotat nhai hti dbtakukahrt.   
\p
\v 12 O niko, nanhu yonenko, Bro Nkifrarko Kraisr nohmo nmbuhat mhtiyakhato nikmoh fasoh nefm bi fak wus bowus thumorm. Ndnetann gontwatn wandfahato kfo nuhas-wanko.   
\p
\v 13 Niko bro yimako bi kriyany hmbreyetko, niko bi htimokomr, nd bi ritohngotakmo yimar. Ndar gontwat nikmoh yufampno rpat niewut.  
\p Yo niko damiag yimako, Bro Nkifrarhu bbuka rifhur hatohhato Satanr yahot tkaftahato toh bmtewako, niko inji buga gontwat nikmoh yufam-pno niewut.   
\p
\v 14 Nanhu yonenko, bi Bro Yifemr-pno frtkafetko, nikompno ndar gontwat wandfiwanko.  
\p Niko bro yimako bi kriyany hmbreyetko, niko bi htimokomr, nd bi ritohngotakmo yimar. Ndar gontwat nikmoh yufampno rpat niewut.  
\p O damiag yimako, niko toh bmte-wakomn Bro Nkifrarhu mrokfot yakitohhato nd mrokfotn kak hta bohtewutm nikmoh wiyauyau nmbu-ham. Ror toh tkafwatrko Satanr bi fahot tkafmokomr. Ndnetann ndar gontwat wandfiwanko.   
\s1 Bbinysofthu fasoh nefm yima yuhum sinya duha  
\p
\v 15 Ndnetann kfiwanko mirahko ndar bbinysofti rot haruhwa fasoh fasoh nefm ahti yuhurkahnomn nd fasoh nefmn arim tohninom. Ndar bbinysofthu fasoh nefmn rim toh-nirahko, to be nhai tfit kekutakhato tfit Bro Yifemrpno nieruhatko. Nhai.   
\p
\v 16 To mirahko ka tamoh nefm kfiwur-nom rim tohnineft. To nd nyingaye htihato tfit yima yuhu sinyewohat yo thatipm mwofnnita nefm newohat ee tamoh tamoh nefmpno o wuskampno yufam kfo hagrha bohagrhiwa nefm, nd nefm nhai Bro Yifemrpno niakahm. Nhai. Nd nefm be nda bbinysoftuhem.   
\p
\v 17 Nda bbinysoft mibatiniraht. Yo nda bbinysoft yorhwa fasoh nefm yimam mhti wofnnihato niwam, ndm rpat mibati buganirahm. Yimam tu Bro Nkifrarhu dukef yuhatn toh hikwam, romn toh nkifranirahm.   
\s1 Kraisrhu hti dbnotyuk yimam bi htitkomm  
\p
\v 18 Nanhu yonenko, niko wany hnamo mrokfot kfo memot, bbiny-softhu mibatini yihar Kraisrhu hti dbnotyuk yimar, kutewumr Anti Kraisr, nierahr. Arihar bi htitko bok yimam Kraisrhu hti dbnotyukm bi mfnah hanitm. Ndnatn nom duka kangnom nda bbinysofthu mibatini yihar bi brbohwor.   
\p
\v 19 Nd Kraisr hti dbnotwa yimam afo nompno rpat toh hnamounom. To tfit arihatn bi frfnah-wom. Rom nompno toh hnamohat nhai tu Kraisrhu yima yuhurn toh hnarmom. Tu Kraisrhu yima yuhurn atoh hnam, nhai inji frfnahrmotm. Bi frfnahmotm, ndt htihato kangnom, Kraisrpno be inji toh tariowakmoum. Nhai tu yarim fnahna bugarmom.   
\p
\v 20 To nikom nhai nd Kraisr hti dbnotet yimam kanjo tohkahko. Nhai. Kraisrn Bro Nkifrarhu Yafothar yak-hato yiro yima yuhum htewurko. Nd Yafotharn thu nawohwatrko dborioh yima yuhur niawatr Bro Nkifrarhu tu mrokfom duka dbtak hik bohikwo-komm.   
\p
\v 21 Ndar gontwat nikompno wandfiwa nmbuhat mirahko ka Bro Nkifrarhu mrokfot yak mumiwatkomt na wandfiwanko. Nhai. Niko Bro Nkifrarhu mrokfot bi hti hik bohikwo-komt. Hti hikhato kfo kangko, “Nd Bro Nkifrarhu mrokfot tu kfo mif kfoyet.” Nd nmbuhatpno na wandfiwanko.   
\p
\v 22 Yimam kfo furayetm to frohem? To nd yimam kfo yamukam, mirahko amanyom Jisasr ka nmoh hbhakyuk yima Kraiser. Nhai. Tom inji kfet yimamn Bro Yifemri rorhu Yonr mong trohhato hti dbnotwomf.   
\p
\v 23 Yimar Yinemr frtrohwor, to be Yifemrn frtrohwor. Yimar Yinemr frtkafwor, to be Yifemrn frtkafwor.   
\s1 Kraisrhu tu kfo mif mrokfom Bro Nkifrarhu Yafothar kak nuhas bonuhaswornom  
\p
\v 24 Nd bingot niko Kristenko ritohak-hato riwanyakmo mrokfot, ndtn wayakitoh kih hanyswako. Yakitoh hanyrahkomt, be Bro Yifem nitohfpno rpat frtkafhato tohrahko.   
\p
\v 25 Bingot Kraisr bi kfo hta memornom, “Dborioh rhu nmbuhat hiruhanko. Hirhotanko be nd dborioh rhu nmbuhatn rhu nkifranirahko.”   
\p
\v 26 Yimam yi mfrnhehwatmko, ndnetann nda kfo duka mrokfot wandfiwanko.   
\p
\v 27 To tfit wom dukefr duka kanga, bi Kraisr Bro Nkifrarhu Yafothat thu hmbremotrm bi nd Yafothatn rroh toh nmbuham kak hta bohtaf hanittm. Ndnettn nhai wom yimam yihato mfrnhehruhatmko. Bro Nkifrarhu Yafotharpatn kak nuhas bonuhas marnyewutko tamoh tamohm. Nd Yafothat kfoyuk mrokfom tu kfo mif mrokfom kfiwutko. Niko mirahko ka kfo fura kfoyem. Ndnettn niko nd Bro Nkifrarhu Yafothat kfoyuk tng yuham yak hikhato Kraisrpno brbo frtkafkfot.   
\s1 Arihat bi Bro Nkifrarhu yonenom  
\p
\v 28 Yo nanhu yonenko, nikom Kraisrpno brbo mfrtkafkfot. Inji naneft rorhu fnahnayuk yihar nom nhai yimtnakhato tpikr yihom nahmbri-ruhatnom. Nhai. Nom be bro yindho-rpampno tafont tohhato htiyakrahnomr. Nhai yimtnayefmpno toh htiyak-ruhatnomr.   
\p
\v 29 Nikom htiyeteko Kraisr tu dborioh yima mifer. Ndnatn nikom htikfot fitoh yimar dborioh nefm newurm, nd yimar Bro Nkifrarhu yoner.   
\c 3  
\p
\v 1 Dajohmn, Bro Yifemr nom be tu mondtn hta mifhato kutewur-nom rorhu yonnom. Rorhu yonnom yorhwatno tfit nd Bro Nkifrar hik duha yimam hti mumiwumnom.   
\p
\v 2 Barenko, nom bi Bro Nkifrarhu yonnom korhnom. To kto Kraisr tafont yarim fnahna thombat nom ka finji frdborha rmonruhanom? Ror yarim fnahna thombat nom tunmoh nyingaye htiyakrahnomr. Ndnettn nom turhu ruheft kanjo frdborha rmon bugarah-nom.   
\p
\v 3 Yimam Kraisr yukatoh darwon hasiwam, nd yimaroh yima yuhum yak marnya bomarnyahato wutham korhm tu Kraisr kanjo.   
\p
\v 4 Yimar fasoh nefm nayetr, ndr Bro Nkifrarhu boririfhut hanyjbornet yimayer. Fasoh nefm naneft to Bro Nkifrarhu mrokfothu hanyjbornanefet.   
\p
\v 5 Bi wany hnamokomt Kraisr yawih-nehato nohmo yuhat. Ror yawihnehato nohmohat to nmoh fasoh nefm minoh nhehafomor. Ror tur nhai wom fasoh nefm nahato nohrmor. Be mgogra yimar noh furamor.   
\p
\v 6 Yimar Kraisrpno brbo mfrtkafwar, nd yimar mong troh bugewurm fasoh nefm. Yimar fasoh nefm rim tohak rim tohak na hanitar, nd yimar nhai Kraisrhu yihotar hti dbtakukahrr.   
\p
\v 7 Yo! Nanhu yonenko, ndnettn niko duka marnyakfot. Wom yimam nieruhamn mfrnhehakhato fasoh yihota bebr hanyrahmko. Yimar dborioh yihotar yauwar, nd yimar Kraisr kanjo yauwarn rorhu yima yuhur wuthar korhrr.   
\p
\v 8 Bingotn nda bbinysoft trhamo yiharpno Satanr fasoh nefm rinakhato na hnamorm. Ndnettn fasoh nefm na hnamo yimam to be Satanrhu yinhitn toh hnamom. Bro Nkifrarhu yon Jisas Kraisr inji hti tanyhato yawihnamorn nd Satanrhu fasoh hingrneft fak dbhurakmort.   
\p
\v 9 Fitoh yimam bi Bro Nkifrarhu yonm korhm, nd yimam nhai wom fasoh nefm wanathu wanathunakahmm. Bro Nkifrarhu toheft romn fakmomt. Ndnettn nhai Satanrhu nefm yakitoh hanykahm.   
\p
\v 10 Finji hti nhtahato kfo miruhanom, ndr Bro Nkifrarhu yoner, ndrne Satanrhu yoner? Wanukko. Inji htikfot, fitoh yimar nhai dborioh nefm nakahr yo Bro Nkifrar hikwa yimam nhai yak marnyakahrm, tor nd yimarn nhai Bro Nkifrarhu yonr rhukahr.   
\ms1 Rpa rpa yimanom wommpno nayak marnyakfot  
\mr (Sapta 3.11—5.21)  
\s1 Jisasr fak nuhasmornom wommpno nayak marnyaneft  
\p
\v 11 Bingot riruhakmo mrokfot wany hnamokomt, inji kfomot: Nom wom Kristen yimampno tohneft, nom be nayak marnyahato rpa yima yuhur rhukfot.   
\p
\v 12 Nom Kenr namo nmbuhat yak duha. Ror Satanrhu yimarn turhu nmem Aberr frdbofna furamorr. To tamohmpno inji frdbofnamorr? Kenr nhai wom dborioh neft narmoar. Tfit htimour wom nmemrhu nefm hifa hifa nmbuham namour, ndnetrn frdbofna furamorr.   
\p
\v 13 Niko, nmoh Kristen yimatko, nda bbinysof thofm hti srwomko. Mirahko ndte ka arnhofrhof nefet.   
\p
\v 14 Nom wom Kristen yimatmpno nayak marnyahato rpat tohwohat, nom nd hel yita yihotar yau htafhato tfit nd toh yifahtaniruha kmiko yita yihotar tohwanomn nd nefm newu-nomm. Afo nd hel yita yihotar yuhre atohnom nhai ndhtet nefm narfotnomm.   
\p
\v 15 Mirahko nikmoh yimatm be ahti srthunomm. Womm inji rihti srtuhak-hato wom bro shrm miyakniruhakomn yak nadborrahkomm. Yimar yima wasetr nhai toh yifahtakahr.   
\p
\v 16 Jisas Kraisr nom dukahato nohmor. To nom womm dukahato nohneft to bi Jisas Kraisr fak nuhasmornom. Nom to nd yuhatn hikhato wom Kristen yimatm dukahato nohneft, hifa.   
\p
\v 17 Bro Nkifrar yima hti yuhuwafeter. Ndnettn wom yimar bok wuskam harhuhato nhai wom wuskapa duha Kristen yimatm hti dukakahrm, nd yimar nhai Bro Nkifrarhu yima hti yuhuwafeft yakitohkahrt.   
\p
\v 18 Arenko, mirahko wom Kristen yimatmpno be tngrpaye akfo yindhor boyindhor furanomm. Ndt nhai dborioh neft. Tamohm yakhihato kfo yindhorneft, hifa.   
\s1 Bro Nkifrarhu nyingahato toh bmtakfot  
\p
\v 19-20 Tamoh neft naruhanomn tu nom hti duka miruhanom, Bro Nkifrarhu tu mrokfo mift hikwonomt? Tuko wahtitwako. Womm hti yuhu-wafhato tamohm fahukomm o hingr-nanuhikomm o tamoh tamohm finji nanuhikomm, nd nefmn htihato wamitwako, “Awi, Bro Nkifrarhu mrokfo mift hikwonomt.” Bro Nkifrar hik hanyhato wom yima yuhur kfo kangrn, “Ni Bro Nkifrar nhai hik marnyakahnr.” Nd dukefr mfnahwor, mirahko nd dukefr ahtinom. Bro Nkifrarhu dukefr nhai yima mifnmohr kanjo rhukahr. Nom yorhwa ruheft Bro Nkifrar hti bugewurt. Ror tu yima yuhuwafeter. Be nhowi rhuhato rorrpar yukatohaf hanykfot.   
\p
\v 21 Barenko, yima yuhum duka kangm, nom hifa Bro Nkifrarhu mrokfom hikwonomm. Yima yuhum inji kfiwumnom, to be hifa. Tamohm Bro Nkifrarpno kfo ttiwonneft nhai duka kinyaki hany-ruhatnom.   
\p
\v 22 Yima yuhum inji rhuhato Bro Nkifrar tamohm kfo ttiwonwonomr, awi, kahukrnom. Rorhu mrokfom hikhato ror hti yindhorwa nefm hikwatnom, ndnetrn nom tamohm kfo ttiwonneft kahukrnom.   
\p
\v 23 Bro Nkifrar kfo kangr, “Nanhu yon Jisas Kraisrn yakitohhato wom Kristen yimatmpno nayak marnyahato rpat toh marnya-kfot.”   
\p
\v 24 Wom yimar Bro Nkifrarhu mrokfom yakitohhato hikworm, Bro Nkifrarpno frtkafwor, tfit Bro Nkifrar tawo rorpno frtkafwor. Bro Nkifrar turhu Yafothat yahuka nmbuhat htihato kfo kangnom, “Bro Nkifrar nompno brbo frtkafwor.”   
\c 4  
\s1 Yimam yafotham fknihato kfo pthiwa mrokfom afo wany nhtakfot. Fitoh yafothar fknitatrr pthiwar?  
\p
\v 1 Barenko, bok giman profetm nda bbinysoft wuyauyauwom. Ndnatn yimam niahato kfo kangmko, “Bro Nkifrarhu Yafothar mrokfom yahukatrnom kfo ptha nuhaswo-nomko.” Inji mkfoyuk yimam niko bi mirahko rroh mrokfom awany yakio-wakninomm. Nhai. Afo rhuhato wany nhtakfot. Fitoh yafothar fknihato mrokfom kfo pthiwarm? Bro Nkifrarhu Yafothar fknitrr pthewurr o nhai?   
\p
\v 2 Yimam Bro Nkifrarhu Yafothar fknihato kfo ptha thoft wanyrahnm kfo mirahm, “Jisas Kraisr nda bbinysoft niahato yima mifm kanjo tohmor.” Tom ndhtet kfet yimamn tu Bro Nkifrarhu Yafothar fknitatrm kfo pthewum.   
\p
\v 3 Yimam nhai inji kfo pthakahm, nd yimam wom fasoh yafotham fknitatmm pthewum. Nd yafotham Kraisrpno nahti dbnotwa yafothayem. Bi nd niko wanyaf memo yafotha bebm nierahm, to nd yafothamn bi niewum.   
\p
\v 4 Nanhu yonenko, niko Bro Nkifrarhu Yafothat hatohwoko. Nd Yafothat niko hatohwat tu bro bbuke-fetet. Nd Yafothat kahot tkafwotr Satanr. Nd Yafothathu bbuka rifhurpno kahot tkafwokomm nd giaman profetm.   
\p
\v 5 Nd yimam ndar bbinysoftuhem. Ndnatn rom pthewa mrokfom be nda bbinysofthu mrokfom kfo pthewum. Yimam nda bbinysofthu ufasoh nefm hikwam romn nd yimaroh mrokfom wany yakiowahukmm.   
\p
\v 6 Yimar tu Bro Nkifrarpno frtkafetr, nd yimar womm pthayuk mrokfom wany nhtewurm. Mrokfom wany nhtahato kfo kangr, “Ndm tu yafothet mrokfom, ndm yafotha duhatem.” Nom bi Bro Nkifra-ruhenom. Yimam Bro Nkifrarpno frtkafetm nom pthayuk mrokfom yudbat kekwomm. Bro Nkifrarpno frtkaf duha yimam nhai yudbat yakkahmm.   
\s1 Yimar Bro Nkifrarhu dukefrpno tohwor, wommpno nayak marnyahato tohkfot  
\p
\v 7 Arenko, nom wom Kristen yimatmpno nayak marnyahato rpat tohkfot. Nd wommpno nayak marnya-hato rpat tohneft, ndt Bro Nkifrarnko rihtakmort. Fitoh yimar womm kak marnya bomarnyewurm, nd yimar Bro Nkifrarhu yon mifer. Bro Nkifrar rorn kukatohwor.   
\p
\v 8 Nd wom Kristen yimatmpno nayak marnyahato rpat tohneft, ndt Bro Nkifrar mhatoh fnahmo nefet. Nd yuhatn fitoh yimar womm nhai yak marnyahato hifa yima yuhur hmbrekahrm, nd yimar nhai Bro Nkifrar hti tawisafkahrr.   
\p
\v 9 Bro Nkifrarhu dukefr nomn rhumor. Nd dukefetrn nd ror hatohmo rpa yon mifr tkrurafmotrr nda bbinysoft fawihnamor. Nmoh fasoh nefm rorn suh nanyormorm. Suh nanyormotrm to be nmoh tohefti Bro Nkifrarhu toheft bi nhai wom mrokfom rhukahm-nom. To be rorpno toh nkifranirah-nom.   
\p
\v 10 Wommpno nahti dukahato nayak marnyaneft, ndt Bro Nkifrarhu nefet. To mirahko ka nomn hti duka gngonmonomr Bro Nkifrar. Nhai. Bro Nkifrarn hti duka gngonmornom. Nd dukefetrn turhu yonr kfo tkrurafmotrr nda bbinysoft niahato nmoh fasoh nefm rorn suh nanyormorm.   
\p
\v 11 Barenko, Bro Nkifrar turhu yonr hemo nmbuhat, ndt rorhu bro dukeft nompno rhumo yuhatn fak nuhasmor-nom. Ndnettn nom Bro Nkifrarhu hikneft womm htihato yak marnya-kfot.   
\p
\v 12 Nhai wom yimar htiwonkahrr Bro Nkifrar. Be nd yimam htihato yak marnyaneftn, ee nd tkittn Bro Nkifrar nompno tohwor. Nompno tohhato nd wommpno nayak marnyahato rpat tohneft rhu yakitoh hanyrahtnom.   
\p
\v 13 Bro Nkifrarhu Yafothat nompno yorhwatt, nom ndt htihato kfo kang-nom, “Bro Nkifrar nompno tohwor yo nom Bro Nkifrarpno tohwonom.”   
\p
\v 14 Nd Yonr bbinysof thofroh nrfa htiyakyukr Bro Yifemr kfo tkrurafmor. Nom tunmoh nyingaye hti hikhato kfiwunomko.   
\p
\v 15 Fitoh yimar kfo kamukr, Jisasr Bro Nkifrarhu yoner, nd yimar Bro Nkifrarpno brbo frtkafwor yo nd yimarpno Bro Nkifrar brbo frtkafwor.   
\p
\v 16 Bro Nkifrarhu yuhuwafeft nompno yorhwat htita-nomn duka kangnom Bro Nkifrarhu bro dukefr nompno korhr. Ndnetnomn nom nhai Bro Nkifrar yafhokahnomr.  
\p Bro Nkifrar tu bro yima yuhuwa-feter. Fitoh yimam yima yuhuwafeft korhtm, nd yimam Bro Nkifrarpno frtkafwom yo nd yimampno Bro Nkifrar frtkafwor.   
\p
\v 17 Bro Nkifrarpno inji nafrtkafhato tohrahnom, to be nd wom Kristenmpno nayakitohhato rpat tohneft myakitoh bmtaknirahnomt. Inji narahnom, Bro Nkifrarhu bro mrokfo yakitoh yihar nhai duka yanho hanyruhatnom. Nom nda bbinysoft tohwohat Kraisr kanjo tohwonom. Ndnettn nd yihar nhai duka yanho furaruhatnom.   
\p
\v 18 Yimar wom Kristenmpno nayak marnyahato rpat tohwom, nd yimar nhai Bro Nkifrar yakrmi hanykahrr. To wom yimar nhai wom Kristenmpno nayak marnyahato rpat tohkahm, nd yimar Bro Nkifrarpno mrokfeter. Nd yimar kakrmi hanitrr Bro Nkifrar.   
\p
\v 19 Bro Nkifrarn riyak marnyakmotr-nom nom be nd yuhat hikhato womm kak marnyewunomm.   
\p
\v 20 Fitoh yimar kfo kangr, “Bro Nkifrar be nanhu yuhuwaf marbitn korhr,” ndhtet kfet yimar mirahr be tngrpat afurat Be tngrpatn furahato womm nhai yak marnyakahrm, tone finji dukaruharr nd ror hti duha yita Nkifrar? Nhai. Nd yimar kfo furayeter.   
\p
\v 21 Kraisr kfoyuk mrokfot kfo memor, “Fitoh yimar Bro Nkifrar rorhu yuhuwaf marbitn korhr, wom Kristenm yak marnyakfot.”   
\c 5  
\s1 Kristenroh bbukeftn nda bbinysofthu ufasoh nefroh bbukeft kahot nohwott  
\p
\v 1 Fitoh fitoh yimam Jisasr htihato duka kangm, “Jisasr tor nd yimar Bro Nkifrar kfo tkrurafmor. Rorn yimam hbhakrahrm.” Inji dukayet yimam, Bro Nkifrarhu yonm korhm. Fitoh yimam Bro Yifemr hti yindhorwomr, rorhu wom yonm inji hti yindhorwomm.   
\p
\v 2 Bro Nkifrar nmoh yima yuhum htahato rorhu kfoyuk mrokfom hikrahnom, to be nom rorhu yonm htineft nmoh yima yuhum htarahnomm.   
\p
\v 3-4 Nom Bro Nkifrar hti dukarahnom, rorhu kfoyuk mrokfom hikrahnom. Fitoh yimam Bro Nkifrarhu yonm tohwam, nda bbinysofthu ufasoh nefroh bbukeft kahot nohwomt. Nom Bro Nkifrarhu mrokfom yakitohhato hikwanomn nda bbinysofthu nefm yuwa muh thombat kahot nohwonomm. To be nd yuhatn Bro Nkifrar kfoyuk mrokfot nhai mduka nhiyakkahnomt hikneft.   
\s1 Bro Nkifrar turhu yinemrhu mrokfot kfo ptha hikmort  
\p
\v 5 Frohmn nda bbinysofthu ufasoh nefm yahot nohwamm? Yimam duka yamukam, Jisasr Bro Nkifrarhu yoner, tom nd yimamn nd ufasoh nefroh bbukeft kahot nohwomt.   
\p
\v 6 Jisasr htimonomr tu Bro Nkifrarhu yoner. Jonrpno baftais yakmohat htimonomt Bro Nkifrarhu Yafothat nunga momkrs kanjo yohninehato Jisasr mifakmot. Yo yura bgre mis nohmohat kkut yohnemot. Nd neff htihato duka kang-nom, tu Bro Nkifrarhu yon mifer. Nd Bro Nkifrarhu Yon mifrhu rhu yuhat tfit tu Bro Nkifrarhu Yafothatn kak nuhas bugewutnom. Bro Nkifrarhu Yafothat tu kfo yimbu mifwot.   
\p
\v 7 Jisasr Bro Nkifrarhu yonrhu ruheft, husfirpa yihotam htitanomn duka kangnom, tu Bro Nkifrarhu yoner.   
\p
\v 8 Bro Nkifrarhu Yafothat yak nuhasmohat, yo Jisasr baftaismohat, yo kku bebt harhumohat, nd husfirpa nefm htihato kfo kangnom Jisasr tu Bro Nkifrarhu yoner.   
\p
\v 9 Yima mifm pthayuk mrokfom wany nhtahato wom mrokfom kang-nom, kfo mif mrokfoyem. Womm kangnom kfo fura kfoyem. Rom yima mifmn pthiwatm ndhtet dukefm kekwonom. To Bro Nkifrar kfoyuk mrokfom nhai ndhtet dukefm yakkfot. Ror kfo memohat Jisasr rorhu yoner, ndt kfo mifmort.   
\p
\v 10 Yimar Bro Nkifrarhu yonr yak hikwar, nd yimarn nd Bro Nkifrar kfoyuk mrokfom korhmr rorhu yima yuhur. Yimar nd Bro Nkifrar kfoyuk mrokfom nhai yakitohhato hikkahrm, ndhtet yimar nhai wany yakiokahrm. Kangr, “Bro Nkifrar kfo furewurnom. Jisasr nhai turhu yon mifr rhukahr.”   
\p
\v 11 Yimaroh toh nkifraniyuk yihotar Bro Nkifrar bi fak hta bohtamorr. Turhu yonrn yura bgre mis nohhato nd yimam toh nkifraniyuk yihotat fak marnyakmort. Bro Nkifrarn yihotar inji fak hta nuhasmornom.   
\p
\v 12 Yimam nd Bro Nkifrarhu yonrpno frtkafwam, nd yimamn toh nkifraniyuk yafothar kekwomr. Yimam nhai Bro Nkifrarhu yonrpno frtkafkahm, nd yimam nhai toh nkifraniyuk yafothar yakkahm.   
\s1 Toh nkifranirahnom  
\p
\v 13 Niko Bro Nkifrarhu yonr hikwa tuhan yindariko mirahko bok dukefm yakhato kfo amanyom, “Nd toh nki-franiyuk yafothat ka bi hatohwonomt o ka nhai?” Mirahko ndhtet bok dukefm ayaknom. Nd toh nkifraniyuk yafothat bi fakmokomt. Ndar gontwat to ndthu kfo dukayuk gontwatn kahukanko.   
\p
\v 14 Bro Nkifrarhu dukefrn toh hikhato tamohm kfo bruttnarah-nomr, wanukrnom. Ndnetnomn nhai mduka kinyakiyak hanykahnom rorhu kfo ttiwonneft.   
\p
\v 15 Nom tamohm kfo bruttna thombat wanyhato kahukrnom. Ndnetnomn tamohm kfo bruttnaneft kangnom, he mifrahrnom. Nhai wany marsisaruhatrnom.   
\p
\v 16 Wom Kristenm wom fasoh nef bebm mfsuhm, yo be niko womko rhuhato nd yimam Bro Nkifrarpno kfo bruttnakfot. Kfo bruttnahato Bro Nkifrar tfit yafothat thu hmbrirahrm. Maringou yuhat yak hatohafoyuk nefm mnem, na kfiwa mirahko akfo bruttnanomm.   
\p
\v 17 Fasoh fasoh nefm, fasoh tkit bebm htewumko. Wom nefmn, hel yak hatohaforahmko. Wom nefm, nhai.   
\p
\v 18 Rot htitwonom, yimam, Bro Nkifrarhu yonm yorhwam, nhai fasoh nefm na hanykahm. Nhai. Bro Nkifrarhu yonr tabohifat hmbritatrm Satanr nhai brbo yikahr.   
\p
\v 19 Nmoh toh nmbuhat rot htitwonom Bro Nkifrarpno frtkafwonom. To nda bbinysof bugat rot nndo Satanrhu yinhitn korht. Rorhu bbukeftn kakitohwott.   
\p
\v 20 Bro Nkifrarhu yonr, ror bi niamor. Rorn dukefm kahukrnom. Dukefm yahukatrnom hti yimbu hikwonomr tu Bro Nkifrar. Bro Nkifrari rorhu yon Jisas Kraisrpno frtkafwonom. Jisas Kraisr tu Bro Nkifrayer. Rorn nd toh nkifraniyuk yafothat thu hmbritrnom.   
\p
\v 21 Bar yonenko, mirahko tahi yifonmpno brbo ainyom.