\id 1CO 1 Corinthians NT2088 Alamblak -Edmiston 22-Sep-2003 
\h 1 Korin 
\toc1 Korin thofroh barkof gontwat  Porr dwandfakhato htafmot 
\toc2 1 Korin 
\mt1 Korin thofroh barkof gontwat  
\mt2 Porr dwandfakhato htafmot  
\is1 Barkof kfo nuhas mrokfom  
\ip Wom taunt futamomt Korin. Nd taunt kantri Griskorhof Akaia profins rhumot. Porr tohhato hingrnamo yiham nd taun Korint nhai be tu kuken taunt rhurmot. Tu bro taunt rhumot. Akaia profinshu kapiter taunt to Korintn rhumout. Porrn tu barkof yimar nd taunt wurat htahato Bro Nkifrarhu mrokfot pthamotrt nd taunt Bro Nkifrarhu mrokfot misuhhato Kristen sios kasinyamort. Kto Porr nd taunt htanyhato bi wom kmimn hingrna htfas hanyetrn nd ror kasinya tanymo sioskfot krhopam fakmom. Porr wanyakhato ndar gontwatn wandfamorm rroh krhoparoh kfohtayuk mrokfom yo rroh yima yuhuroh yak marnyayuk dborioh mrokfom.  
\ip Porrhu dukefr memor, “Nhai yukatoh marsisarhotanm. Yukatoh marsisaruhanm, rroh dborioh nefm yohnirahm.” Ndnettn tuhanet yimaroh krhopam yo ramet metroh krhopam mrokfom hemorm. Yo yimam nhai marimoam Bro Nkifrarhu Yafothathu yak hta yuhatn hikrahnom, nhai. Be turoh dukeftn yaumoatm mrokfom hemorm. Yo Bro Nkifrarhu tu lotu yuham, yo Bro Nkifrarhu Yafothat yahuka dukefrhu hingrna yuham ndm kfo hta bohtamorm. Yo nd noheh yimam sinyaruha yuharoh mrokfom, ndm rpat kfo nuhas bonuhasmorm.  
\ip Nd Korin Kristenm krhopa yakmoa nefroh mrokfom kfo hta bohta nuhas marnyamorm. Porr wandfayuk mrokfom, sapta 13-thu mrokfomn Kristenm tu hifa hti yindhorwomm. Nd saptakfotn Porr kfo memor, “Wom yima fura bofuraroh htihato yak marnya bomarnyaneft, tot tu neft Bro Nkifrar yimam he furiwat.”  
\c 1  
\ms1 Kristenm mirahm tum nakfo nna bonnanom yo turoh yufam akfo yuta yindhornomm  
\mr (Sapta 1—4)  
\p
\v 1 Na Pora, na Krais Jisasrhu aposera. Tu Bro Nkifrarhu duka fijo nd aposer hingrneft fak htamora. Nani nanhu yinowem Sostenesr,  
\v 2 no ndar gontwat wandfewunonko niko Korinthu Kristenko. Niko bi Bro Nkifrar yak wus bowus marnyakhato Krais Jisasrpno bi fak dbkafmorko. Yak dbkafhato turhu yufatpno rim fak htamorko. Yimam nmoh Nungothet Jisas Kraisrhu yufatpno rhu rifinyhato kfo bruttniwam, niko rpat rorhu yufatpno rim fak hta bugamorko. Jisas Kraisrpar tor nmoh rpa Nungothetr.  
\v 3 Nmoh Yifem Bro Nkifrari, nmoh Nungothet Jisas Kraisr ayuhuwafkahfko nikmoh yima yuhum ayak marnyakahtfm mirhurahmko.   
\s1 Porr kfo yindhormorr Bro Nkifrar  
\p
\v 4 Niko bi Jisas Kraisrpno rpat tohwa nmbuhatpno Bro Nkifrar yuhuwafwarko kak marnya bomarnyewurko. Na inji htihato yiha yiha Bro Nkifrar bro kfo yindhoreft htiwanr.  
\v 5 Niko Kraisrpno rpat tohwa nmbuhatpno mrokfo pthefm, riduka aduka yima yuhum yo tamoh tamohm bi yak bugewa yuhampno na htihato Bro Nkifrar tu kfo yindhor mifwanr.  
\v 6 Yo nd Kraisrhu mrokfom nom pthahato niko wanyhato yakmom, bi nd mrokfomn kuny kiwomko.  
\v 7 Ndnettn niko tohhato nmoh Nungothet Jisas Kraisrhu yawihna yihart toh gari hasiwohat, Bro Nkifrar niko nhai mong trohnikahrko. Bro Nkifrarhu Yafothat niko hatohwokomt. Ndnettn tamoh tamoh nefm Bro Nkifrarhu Yafothat kasinyewam, niko nd nefm newukomm.  
\v 8 Jisas Kraisr thu bmtaruhatrko, toh bmtahany, toh bmta hanyruhakomn Nungothet Jisasrhu nia yihar, nhai wom tamoh mrokfetko rhuruhatko.  
\v 9 Nd Bro Nkifrar, niko kfo nakuyakhato turhu yon Jisas Kraisr, nmoh Bro Najomr, rorpno rim htamo Bro Nkifrar, awi nmoh bro dukefm ror htakfot. Tamoh mrokfom ror bi kfo ptha htayukm, nhai yi furakahm. Yafothetm korhm.   
\s1 Mirahko wannakfo nnakhato nafr tndohnom  
\p
\v 10 Bar yinouroko, nmoh Nungothet Jisas Kraisrhu yufatpno bro mrokfot kfiwanko. Tamoh tamoh mrokfom kfo ptharahnom, be rpa yima yuhurn rhuhato mrokfefenm kfo pthakfot. Mirahko mrokfom nateh natehakhato womm yuhuwehakhato womm nndo rim rhu, yo womm rom nndo rim rhu inji ananom. Be rpat tohhato rpa yima yuhur yo rpa dukefrpar rhukfot.  
\v 11 Klowirom kfo memoma, niko tohwohat niko tuko nnakfo nnewuko.  
\v 12 Kfo memoma, niko nnakfo nna thombat, womm kfo kangm, “Nom Porr kfiwa mrokfomn nom kak hikwonom.” Yo womm rirhuhato kfo kangm, “Nom Apolosr kfiwa mrokfomn nom kak hikwonom.” Tfit womm rirhuhato kfo kangm, “Nom Pitar kfiwa mrokfomn nom kak hikwonom.” Yo tfit womm kfo kangm, “Nom tu Kraisr kfoyuk mrokfomn kak hikwonom.”  
\v 13 Tamohmpno Kraisrhu sioskfot bi kasinya hanyett tfit wannakfo nnakhato niyak mku niyak mkutakomt? Ka na Porann niko nayuk fasoh fasoh nefm bgre mis nohhato minoh nhehafmoyanm? O ka na Poranhu yufat yuta hanyhato baftaismoko?  
\v 14 Nd baftais hanyuk yimam, na Krispus Gaiusrofrpaf baftaisimmoya. Womm nhai. Hifa ndrpaf baftaisimmoyann Bro Nkifrar kfo yindhorwanr.  
\v 15 Ndnettn nhai wom yimar kfo miruhatr, “Na Porr baftaisimmo yimaya. Ndnetann na ror kfoyuk mrokfomn hikruha.”  
\v 16 E, tfit asomif tfit dukekwanm Stefanas riphar. Nd ripharpar na baftaisimmoyanm. Nhai tfit wom frohm wom dukakaha na baftaisimyukm.  
\v 17 To hifa nhai bok yimam baftaisimrmoya. Kraisr na kfo tkrurafmohat, to nhai yima baftaisimneft kfo tkrurafrmora. Nhai. Na gutnius mrokfothu kfo ptha htfasneftn kfo tkrurafmora. To na mrokfom kfo pthaneft nhai be nanhu yima yuhurn mrokfom frpsa marnya bomarnya yo yak marnya bomarnyahato yimam be wany yindhorhato mrhunakfot. Nhai. Be nanhu yima yuhurn tamoh mrokfom kfo pthaneft, Kraisr bgre mis nohmo yuhat be nhai duka miruhatm Kraisrhu noh mrokfot tu yafothet mrokfoyet. Nhai. Nd tndh mrokfot be wany huhrasrahmt.   
\s1 Kraisrn hatohwort Bro Nkifrarhu bbukefti dukeft  
\p
\v 18 Nd helko bi yiyet yihotar bi tohet yimam, duka kangm, “Jisasr bgre mis nohmo yuhathu mrokfot yimbuyef duhatet. Mmom kanjo kfo pthewukomt.” To tfit nom, nd hefenr bi yiyet yihotar bi tohet yimanom, htitnomt, nd Jisasr bgre mis nohmo tkittn Bro Nkifrarhu yakitohwa bbukeft hingrnamot.  
\v 19 To nd na kfiwa mrokfot to bingot Bro Nkifrarhu rfa borngt kfongot memot,  
\q1 “Bro duka tungunefr haruhet yimaroh dborioh dukefm yak thuhato  
\q2 mmom tfit rhurahm,  
\q1 yo tamoh tamoh dukefm yimam bi duka hta hanyukm  
\q2 na kforuha nd dukefm nhai hingrnaruhatm.” \rq Ais 29.14\rq*   
\m
\v 20 Tone to fitom nd bro riduka aduket yimam? Yo nd Mosesrhu boririfhut kfo hta bohtiwa yimam? Yo mrokfo kfo ptha marnya bomarnyet yimam? Nd nd yimam nhai tu Bro Nkifrarhu dukef yuham hti hik marnyakahmm. Nhai. Rorhu dukefm myak mmota-hato be turoh yima yuhumn kfo fura bofurewum.   
\p
\v 21 Bro Nkifrar to tu bro riduka aduka yima yuhetrn nhai marimor, ndar bbinysofthu yimam turoh duka yima yuhumn hti hikrahmt ror fasoh nefm nayet yimam yekwa yihotat. Wonk wonk yihotam nhombra bugamomm, to nhai htirmomt Bro Nkifrar yimam yekwa yihotat. Nhai. Ndnettn Bro Nkifrar htamort wom yihotat. Nd nom kfo pthiwa mrokfot, rom kfo yamuka, “Yimbuyef duha mrokfot.” Tot nd mrokfotn yimam wanyhato hikrahmt, Bro Nkifrar yak-rahrm.  
\v 22 Nd nom kfo pthiwa mrokfot Judam kfo kangm, “Afo mirakerkfot afo ahtinom. Ndt htiruhanomn kfo mirahnom, niko kfo pthiwa mrokfot tu yafothet mrokfot kfo pthiwuko.” Yo Grikmn kfo kangmnom, nd nom kfo pthiwa mrokfom yafotha duhatem. Kangm, “Riduka adukayet yimam kfo pthayuk mrokfomn awany yakionom.”  
\v 23 To nom, nom kfo pthewunom Jisas Kraisr bgre mis nohmo yuhat. Ndt kfo pthewunom, Judam wanyhato namburwomnom. Namburhato kfo kangmnom, “Nd mrokfoye kak nnariyefiwokmnom.” Grikm o yima tangim kfo kangmnom, “Mmom kanjo kfo ptha mumiwuko.”  
\v 24 To nd met yindarinom, Bro Nkifrarhu naku tngt wany soneyuknom, nom Judanom yo Griknom htitnom Bro Nkifrar tu bro riduka aduka yima yuhetrn Kraisr bgre mis nohmo yuhat bro bbukeftpno nmoh fasoh fasoh nefm yak thuhato fakmornom.  
\v 25 Ndar bbinysofthu yimam duka kangm, “Dborioh dukef duhat yimam Jisasr bgre mis nohmo yuhat kfo ptha mumiwumt.” To nhai, nd rom kfiwa yima yuhum faso kfiwumm. Tumn nhai Bro Nkifrarhu dborioh dukefmpno inji kfokahm. Yo Jisasr bgre mis nohmo yuhat htihato nhaf kfo kangm, “Bro Nkifrar bbuka duhater. Ndnatn Jisasr bgre mis nohmor.” Inji kfiwum. To nhai, Jisasr nohmo yuhatn Bro Nkifrar nmoh fasoh fasoh nefm yak thuhato fakmornom. Yima mifm nhai fasoh nefm yak thu inji naruhatm.   
\p
\v 26 Bar yinouroko, tfit wamdukaktwakomt niko Bro Nkifrar nakuhato niko Bro Nkifrar rihikakmohat, niko finji htimoko? Ka nikmoh womm ka bro riduka aduka yima yuhetmn Bro Nkifrar rihikakmomr? O, ka kmiroh bro yimakomn fakmorko? O, ka bro yufet yimaroh yonkomn nakuyakmorko?  
\v 27 Bro Nkifrar nhai ndhtet ruhet yimakomn nakurmorko. Nhai. Ndar bbinysofthu yimam kfo kangm, “Ndhtet dborioh dukef duha yimam yo bro bbukef duha yimam ka Bro Nkifrar yak twanhorahrm?” Nd mrokfot inji kfiwatmt, ndnettn nikomn fak tutuhakmor. Memor, “Ndhtet ruhet yimam ayakkahta nd riduka aduket yimam yo nd bro bbuket yimam htiruhamn kfo mirahm, ‘Nom famunom ka nom ndarhtet yimanomn yakrahr. To nhai, bi romn kekwor.’” Tum inji htiruhamn tfit tum bro yimtneft yakrahm.  
\v 28 Bro Nkifrar fakmor yufapa duha yimam, yimam hti behohwam. Bro Nkifrar inji nahato tfit yimam bro yufetm yo bro bbuketm rroh yufam nhai wom mfrfnahkahm. Rroh yufam be mifrfnahnitm.  
\v 29 Ndnettn nhai wom yimar Bro Nkifrarpno rorhu yufat kfo hagrhakfot.  
\v 30 Tu Bro Nkifrar bi yakmorko Krais Jisasrhu tirtn htamorko. Yo Kraisrn htamorr nmoh riduka aduka yima yuhurhu hayuk yimar. Turn nmoh fasoh nefm suh nanyormorm. Nd yima Kraisrparhu yuhatn Bro Nkifrar nom hti wuthewurnom, yo turhu yufatpno korhwonom.  
\v 31 Ndnettn Bro Nkifrarhu rfa borngt kfiwa yuhat wahikko, “Yimar kangr ayindhora, nd yimar to be Brorparhu nayuk nefmn yindhorkfot. Mirahr turhu nefm akfo hagrha yindhora.”   
\c 2  
\s1 Kraisr bgre mis nohmo yuhathu mrokfom  
\p
\v 1 Bar yinouroko, na nikompno yi tohhato Bro Nkifrarhu kafrohet mrokfom tohhato kfohemohat, na nhai marimoya, “Yimayanhu riduka aduka yima yuhumn be mfro rim kfak mkfakhato wany yindhorahmm.” Nhai. Nanhu mrokfom be inji kfoni hanymoanm.  
\v 2 Nanhu dukefr duka memoya, “Na Korint tohruha yiham na nhai wom tamoh mrokfom kfo ptharhota. Be Jisas Kraisrhu mrokforpam kfo ptharuha, yo Jisas Kraisr bgre misn nohmo yuhathu mrokforpam kfo ptharuha.”  
\v 3 Na nikompno yi tohhato mrokfom kfo pthamoahat, be yakrminano tohhato mrokfom kfo pthamoanm. Duka memoa, “Ndarhtet kmimpno tohhato mrokfom kfo ptha-nefte, finji finji mrokfom kfo ptharhotanm, rom wanyhato hikruhamm?” Nd bro duka yanuheft rhumoatta mrokfom kfo pthamoahat yikiat buga htamoant.  
\v 4 Yo na kfoyuk mrokfom yo gutnius mrokfom na kfo pthamom, nhai marimoya duka tungunet yimam kanjo tfit yimayanhu duka tungunefr-pno mrokfom mfro mfro tfit frhik bohikrhotanm mrokfom wanyruhamn yima yuhum yak kekutrahm. Nhai. Mrokfom be inji pthanimoatanm tfit tu Bro Nkifrarhu Yafothatn nikmoh yima yuhum hingrnamotm.  
\v 5 Nanhu yima yuhur duka memoya, “Nhai nanhu ptha dukefrn mrokfom kfo ptharhota, Korin thofm Bro Nkifrar mhikaknikfot. Nhai. Tu Bro Nkifrarhu Yafothatn rroh yima yuhum yak dborhahato Bro Nkifrar hikneft hifa.”   
\s1 Bro Nkifrarhu Yafothat dborioh dukefmi dborioh yima yuhum kahuktnom  
\p
\v 6 Nd yimam bi Bro Nkifrarhu riduka aduka yima yuhum yaketm, nd nom kfo pthiwa mrokfom kekwom. To nd nom pthiwa mrokfom nhai ndar bbinysofthu yimaroh dukefr yakitohhato pthakahnom. Yo nhai ndar bbinysoft yakitohwa yimam, bi nd hel yita yihotat tohwa yimaroh dukefr yakitohhato pthakahnom.  
\v 7 Nhai. Nd nom kfo pthiwa mrokfom, ndm Bro Nkifrarhu duka yima yuhurhu kafrohet mrokfom kfo pthewunom. Nd Kraisrhu yawihnehato ndar bbinysofthu yimaroh fasoh nefm minoh nhehafneft, nd dukefr bingot ndar bbinysoft yorhwa tamoh tamohr tafi hingrna duha, nd dukefr bi duka htangotmorr. Yimam yura hefenr yihato Bro Nkifrar rhu marnyewa kanjo rhuneftn, nd dukefr duka htamorr.  
\v 8 Nd dukefr, nhai wom yimar ndar bbinysoft tohukatohwar nd dukefrpno yakrmorr. Nhai. Bi ayakmr, to nhai nmoh bro bbuka nanyjaret Bro Nungothetr washato bgre misn frdbkafrmomr.  
\v 9 Bro Nkifrarhu mrokfom kfo kangm, “Nd Bro Nkifrar duka htamo dukefr nhai wom yimar htirmorr o wanyrmorr o nhai wom yimar nd dukefr niarmotrr duka marimor, ndhtet neft rhuraht. Nhai. Tu Bro Nkifrarhu yima yuhur ruhet yimam dukahato nd dukefr dukahato fak nhombra htamorr.”  
\v 10 Nd dukefr be afo kafrohetr rhumour. Tu Bro Nkifrarhu Yafothatn nd kafrohet dukefr nompno mfak nriyafmotr. Bro Nkifrarhu Yafothatpno nhai wom tamohm kafrohkfot. Nhai. Tafont rhu bugewum. Ar Bro Nkifrarhu kafrohet dukefm tu Yafothatn hti hikwotm.  
\v 11 Nhai wom yimarhu dukefm ni womn htikfot. Nhai. Nd tu yimarhu yafotharpatn htitwotm nd yimar yorhwa dukefm. Ndnettn nhai wom froh yimar Bro Nkifrarhu yima yuhur rhuyuk dukefm htikfot. Nd turhu Yafotharpat htitwotm Bro Nkifrarhu dukefm.  
\v 12 To nom tu Bro Nkifrarhu Yafothatn hemornom, tur yak marnya bomarnya nmbuhathu hti dukaneft yihato. Nd Yafothatn yak nuhasrahtm, nd dukefetrn turhu Yafothat hemornom. Ndar bbinysofthu dukefr yima dukiwar ayaknom, to nhai hti dukarfotnomm nd Bro Nkifrar yak marnya bomarnyiwa nmbuham.  
\v 13 Nom ndar Bro Nkifrarhu bro riduka aduka yima yuhur rhumoa mrokfom kfo pthewunom. To nd nom kfo pthiwa mrokfom, nhai ndar yimanmoh dukefmn nd mrokfom niakahm. Nhai. Nd mrokfom Bro Nkifrarhu Yafothatn mrokfo dukefr yahukattnom mrokfom kfo pthewunomm. Nd Bro Nkifrarhu Yafothat yahuka mrokfom, nd mrokfom kfo pthiwunomm Bro Nkifrarhu Yafothat ruhet yimampno.   
\p
\v 14 Yimar Bro Nkifrarhu Yafothat rhu duhar, nhai nd Bro Nkifrarhu Yafothathu dukefm hti dukakfot. Nhai. Hti huhrasworm. Ndnettn nhai nd dukefm ror yakkfot. Yimam Bro Nkifrarhu Yafothetm, romrpam rhuhato hti duka nhta yo yak nhta inji newumm nd Bro Nkifrarhu Yafothathu dukefm.  
\v 15 Yimar Bro Nkifrarhu Yafothat ruhetr, tamoh tamohm yak nhta hti nhta bugewurm. To nhai wom yima furar Bro Nkifrarhu Yafothat ruhet yimarhu nefm hti nhta yak nhta inji nakfot. Nhai.  
\v 16 Bro Nkifrarhu rfa borngt kfo kangt,  
\q1 “Frohrn Bro Nkifrarhu dukefr yorhwatrr  
\q2 tfit rorn tohhato Bror kfo hta bohtafrorr?” \rq Ais 40.13\rq*  
\m To nom awi, Kraisrhu dukefr korhrnom.   
\c 3  
\s1 Sios hingrnewa hingrna yimam, ndm Bro Nkifrarhu hingrna yimayem  
\p
\v 1 Bar yinouroko, niko Korint tohwa metko, yindariko, na nikompno yi tohhato mrokfom hemoahat, nhai bi Bro Nkifrar rihikngotakhato Bro Nkifrarhu Yafothat yaket yimam mrokfom yahuka kanjo inji mrokfom kfo hermoyanko. Nhai. Fasoh nefm mhatoh fnahet yimam mrokfom yahuka kanjo inji mrokfom hemoyanko. Nd na yi tohmo yiham nhai bi fitoh dfik Kraisr rihikakrmokomr. Kraisrhu dukefr yuhre yon mumenroh dukefr kanjo nikmoh dukefr inji rhu hanymor.  
\v 2 Be yuhre mingapamn hi hanymoyanko. Nhai bi tat yeshrim bi hermoyanko. To ariham nhaf inji, nhai bi tat yeshrim niko bi yakfot.  
\v 3 Nd mhatoh fnahyuk nefm afo tom rpat kakitoh dbkafwokomm yuhre. Nd wom Kristen yimampno mrokfom nateh natehakhato womm yuhuwehakhato womm nndo rim rhu, yo womm rom nndo rim rhu inji nanefm, ndm tom yuhre korhmko. To nd niko niwa nefenm, ndm to tuko mhatoh fnahyuk fasoh nefem. Ndar bbinysofthu yimaroh nefem nd nefm. Mirahko mrokfom nateh natehakhato womm yuhuwehakhato womm nndo rim rhu, yo womm rom nndo rim rhu inji ananom  
\v 4 Womr sinyahato kfo yamukahat, “Na Porr kfiwa mrokfo yuhat hikwa.” Yo tfit womr sinyahato, “Na Apolosr kfiwa mrokfo yuhat hikwa.” Ndhtet nayak nanyor nayak nanyor nefm ndm ndar bbinysofthu yimaroh nefm newuko.   
\p
\v 5 To no afo wamdukakkmno. Apolosr froher? To na froha? No, no be hingrna yimayeno. Rpa yimarparhu hingrneft hingrnewuno. Hingrnefmn nndoh nndoh hingrnefm hingrnewuno. No nd Kraisrhu hingrneft ahingrna duha yino, to niko to finji Kraisrhu mrokfom htihato rorhu mrokfom hikrfokomm? Nonn nd rorhu hingrneft hingrnamotnont niko tuko hti hik yo wany hikmokomtn hikwokomt.  
\v 6 Nnoh hingrneft, mswir hingrneft kanjo yimot. Nann mrokfot hnehato kfo ptha nuhasmoyanko, yimar yihato yewurit nuhtiwa kanjo. Tfit nanhu mongko Apolosr yihato rorn nd na kfo ptha nuhasyuk mrokfom frhik bohik nuhasmotrko fak duka tungunamokomt, wom yimar yihato bupam yewurim yahuka kanjo. Nnoh hingrnefm inji hingrnamononm. To tu Bro Nkifrarn thu bmtamotrko Kraisrhu mrokfot mfak trpaknimokomt, to tu Bro Nkifrar dborioh bbhar yo bu marm hihato mswirroh yeshrt sinya marnyiwa kanjo.  
\v 7 To htitkomt nd kfo nhombra mrokfot? Yewuri nuhtayuk yimar yo bupa hayuk yimar, nd hus yimaf nhai yufa duhatef. Yimar nd yewurim thu warhiwarn yufeter.  
\v 8 Nd hus yimaf, yewuri nuhtayukr yo bupa hayukr, nd yimaf nhai wom nndoh nndoh dukefrn hingrnarmof. Nhai. Rpat tohhato rpa dukefrn Kraisrhu hingrnefthu hingrna dukefrn hingrnamof. Rof hingrnewa hingrneft Bro Nkifrar ttha thombat, turhu hti fijo ttharahrf.  
\v 9 No rpat rpat Kraisrhu hingrneft hingrnewunont, nikone rorhu mswireko.  
\s1 Sios hingrnewa hingrna yimam kamdam kanjo hingrnewum  
\p Yo niko Bro Nkifrarhu tohyuk kunyko hingrna htamorko.  
\v 10 Bro Nkifrar bi dborioh dukefr hemotra kunyrhu hatohyuk rahum bi ndmn kasinyamoya, bro duka tungunet kamdam kanjo. Tfit womr yauyaknehato rorn wohnfam yo rafonm thu tabotrutnihato hingrnamorr. To tfit niko womko nd kunyshu hingrna buganhoneft, dukefrpno duka marnyahato hingrneft hingrnakfot.  
\v 11 Nd kunyrhu hatohyuk buha dany rahur, Jisas Kraisr Bro Nkifrar bi htamor. Ndnettn nhai tfit wom yimar yihato nd kunyrhu hatohyuk rahum tunda thuhato tfit wom rahum yakhato kasinyakfot. Nhai.  
\v 12 Nd kunyrhu htayuk rafon wohnfam, mingiahum, hegir tikm, womm bro tat mim yakrahm, womm tefi gmohefenm rim yak wokakhato nde htarahmr kunyr. Gahturm, womm darhi mkum, mofnyuk mkum yakhato nde htarahmm. Womm yesuta gmoh mkum o yof mkum htarahm. Nanginy sikr, womm nanginy mifm yakrahm, womm rpa yamt rhuyuk misham yakhato nde dboh tikrahmr kunyr. Kpa gnam, womm mfu mkum o kpam yakhato nde gnarahmm gnam. Wommne be gtwaye thu rabforahmm.  
\v 13-14 Nd rpa rpa yimam hingrnayuk hingrnefm, Bro Nkifrar kfomo kothu yakitohruha yiharn, nd rpa rpa yimam hingrnayuk hingrnefm yak nhtarahrm. Fitoh yimam, rom hingrnayuk hingrnefm yak marnyahato rroh hingrnefm fipetm forhm, nd yimam ttha hanyrahrm Bro Nkifrar.  
\v 15 Yimam nhai hingrna marnyarmomm rroh hingrnefm, nd yimam be nhai ttha hanyruhatrm Bro Nkifrar. Hefenrhu yinyeft, rot riyahm. Tfit yinyeftn nhai bi romn tohakruhatm. Nhai. Rom tu wuroh mongtn tohrahm.   
\s1 Niko Bro Nkifrarhu kunyeko  
\p
\v 16 Niko bi tawisafeteko. Niko yimako, Jisasr hikwako, nikomn bi Bro Nkifrarhu rmonr kasinyewukomr rorhu nia tohyukr.  
\v 17 Niko, Bro Nkifrarhu kunykomn, turhu yufat fak htamorko. Fitoh yimar nd Bro Nkifrarhu nia tohyuk kunyr finji narahrr, nd yimar mrokfetr rhurahr. Ndnettn fitoh yimar fasoh nefm nayuk yihotohat tfit hanirko, nd yimar Bro Nkifrar kaht htarahrr.   
\s1 Yimaroh yufam nom kfo yuta hagrha duha  
\p
\v 18 Mirahko tuko ndar bbinysofthu duka tungunefr yakhato akfo amanyom, nom bro duka tungunefetenom. Nd bbinysofthu duka tungunefr rihtafhato tfit Bro Nkifrarhu duka tungunefr yakkfot. Nd Bro Nkifrarhu duka tungunefr ndar bbinysofthu met yindarim htitmr mumetroh duka tungunefr kanjo.  
\v 19 To ndar bbinysofthu duka tungunefr Bro Nkifrar htitrr mumetroh duka tungunefr kanjo. Bro Nkifrarhu rfa borngt kfo kangt,  
\q1 “Duka tungunet yimam kfo yamukam womm faso ayak bebnomm,  
\q1 rom inji dukewohat, rom be turoh fkneyuk wukier kim hegirwom.” \rq Jop 5.13\rq*   
\m
\v 20 Yo wom mrokfot Bro Nkifrarhu rfa borngtn kfo memot,  
\q1 “Duka tungunet yimaroh dukefm Bro Nkifrar htitrm.  
\q1 Tamoh tamoh dukefm rom duka httatewam,  
\q2 be tu nhai fipa duhatm rhurahm.” \rq Sng 94.11\rq*   
\p
\v 21 Ndnettn mirahko niko hikwa yimam akfo hagrhanomm. Niko nhai rroh tirmn rhukahko. Nhai. Niko Bro Nkifrarhu tirtn korhko. Nikmoh hayuk tamoh tamohm bi tom Bro Nkifrar bi hemotrko ndmpno korhko.  
\v 22 Nikompno nia hingrna tohnhoyuk yima Pora, Apolosr, Pitar, nd nd yimanom tom bi hemorko. Yo Bro Nkifrar ndar bbinysoft hingrna htamo tamoh tamoht to bi nikomn hemotr bi nikmohem. Yo Bro Nkifrarpno toh nkifrani nmbuhat ndt bi fak marnyahemotrko rorpno mtoh nkifranirahko. Yo nikmoh nohhato sinya nmbuhat ndt rot to bi fak marnyahemotrko nikmoh nohneft tfit kasinyarahrko. Ndar yiha yorhwa tamoh tamoht yo kto rhuruha tamoh tamoht, nikmoh bugam rhurahm. Bi fak hta marnyamotrko bi korhkomt rhu nmbuhat.  
\v 23 Niko Kraisruheko. Kraisrne, Bro Nkifraruher.\f + \fr 3:23 \ft  (3.23) 1 Korin 1.12 yo 3.4 Porr kfo memor, Korin thofm tum nakfo yiriti nnamomn, womm kfo memom, nom Porruhenom, womm kfo memom, nom Apolosruhenom. Ndhtet mrokfom yimam kfoyukm, ndm ndar bbinysofthu yimaroh nakfo nnefet. Por Apolosrof, rof be Korin thofroh Kraisrhu mrokfothu kfo nuhashato mrokfothu hikneftn yi tohmof. Be Korin thofm tu Bro Nkifrarhu dukefr ayakmr, kfo marimom, “Por Apolosrof, nmoh hingrna yimayef.” Wahtiko 1 Korin 3.1-9.\f*   
\c 4  
\s1 Kraisrpar turhu hingrna yimaroh hingrnefm htihato kfo nhtakfot yo yak nhtakfot  
\p
\v 1 Nom Kraisrhu hingrna yimanom kanjo wahtikmnom. Nomn nd kafrohet mrokfot Bro Nkifrar nmoh tirmn htamotrt kfo ptha htfaswonomt. Nd hingrneftn Bro Nkifrar fak htamornom.  
\v 2 Wom yimar yihato wom yimar yakhato rorhu hingrneftn fak hterr, nd yimar mrokfom wany yakiohato hikkfot.  
\v 3 Na kanga, yima mifmn na hingrnewa hingrneft htihato kfo kangm, faso hingrnewurt o hifa hingrnewurt, nhai mrokfom. To na tuka hingrnewohat, nhai tfit rhuhato hti nhtakahant tuka hingrnewa hingrneft.  
\v 4 Na kanga hingrneft ka be yi marnyewut. Ndnetann hingrna fura bofuraknita. To na fitoh yuhamn tukanhu hingrneft tuka hti nhtarfoyant? Kto Bro Nungothetrpar nanhu hingrneft hti nhtaruhartn rorrpar kfo mirahra, “Hifa hingrnamon o faso hingrnamo.”  
\v 5 Ndnettn bi mirahko bi nikomn Kraisrhu hingrna yimam hingrnewa hingrnefm bi nikomn akfo amanyom, “Nd yimarhu hingrneft hifa, nd yimar nhai.” Kothu tohyuk yihar afo tor riyorhwor. Bi mirahko bi nikomn akfo nhtanomm o ayak nhtanomm. Bro Nungothetr afo nierahr. Ror nieruharn nd kafrohet kafrohet nefm yo kafrohet kafrohet duka yima yuhum yimam wany won duham yakhato tafontn htarahrm. Nd yiha yima yimanom hingrna hanyuk hingrnefroh kfo yindhor mrokfom, Bro Nkifrar kfohi hanyruham, wany hanyrahnomm.   
\s1 Korin thofm kfo grhamom  
\p
\v 6 Bar yinouroko, no Apolosrpno, nnoh yufampno rim pthakmo mrokfom nhai be sfno rim pthakrmoyanm. Memoya, “Mrokfom inji akfo pthakahtanm dukefm yakruhakomn Bro Nkifrarhu rfa borngt kfiwa yuhatn hik marnyahato nhai wom yimaroh hingrnefm kfo grhahato tfit womrohm kfo bebruhatkomm.”  
\v 7 Frohm memomko, “Bro yimako warhukahkomn Kraisrhu hingrneft hingrnewa yimaroh hingrnefm nikomn hti nhta kfo nhta inji narahkomm?” Nd niko kfo grhiwa yimam, romrpamn ndhtet hingrnayuk dukefm finji yakrfomm? Nd hingrna dukefm Bro Nkifrar hayukem. Ndnettn kfo grha fura duha.   
\p
\v 8 Niko to finji wom kforuhanomko? Nikmoh dukeft duka kangko, “Jisas Kraisrhu hik yuham nom bi fak bugamonomm. Yo Bro Nkifrarhu Yafothat kasinyewa nefm bi fak bugamonomm. Nhai wom yimam niahato tfit kfo nuhas bonuhaskfot.” Yo kangko, “Nom bi Kraisr kanjo king yufat yakhato bi nomn ndar bbinysofti mount bi kakitohwonomf.” Inji kfiwuko. To nom aposernom nom be nndo knbokt rhuyukenom. Ndt rot to hifa. Hifa, niko kingko watohkahtko nom be rpat king hingrnefthu hingrnanhoyukenom.  
\v 9 To ka nhai. Nom nhai king hingrneft yakitohnhokahnomko. Nanhu htiyeft inji htitant. Nom aposernomn, Bro Nkifrar yakmorn tu yiro knbokt htamornom. Nom yimam hti srthuhato yak bebwohat yonent burent hti bugewumnom. Yimam htitwom yo mounmotm htitwom yimam inji newohat.  
\v 10 Yimam kangmnom, “Niko, dborioh dukef duhat yimako Kraisr nohmo yuhat kfo ptha mumiwukomt. Bro Nkifrarhu bbukeft nhai niko rhukahtko.” To nikmoh dukeft duka kangko, “Nom hifa Kraisrpno brbo frtkafwanomn bro duka tungunefr kekwonomr. Yo Bro Nkifrarhu bbukeft harhuwonom.” Nikomn bro yufetkomn, nikmoh yufam met yindars kfo yuta hagrhewumm. To nom yufen duhatnomn yimam nhai nmoh yufam kfo hagrhakahmm.  
\v 11 Nom ndar toh hnewa toheft to be inji yatinoht tohwonom. Hmbresham yoh nmbr bonmbretm ndm fura hiyauwonom. Nom nd toheft ritohakmohat, to be toh hik twanho hanitnomt. Yimam riyekwomnom rir borir thuwomnom. Nom be inji hutraf htfaswonom. Wom kmitn rpa wurat tfit wom kmitn rpa wurat. Rpa kmit tohrfonomn fitha rhurfonom?  
\v 12 Nom tunmoh tireh yeshrim kaunom, yo tunmoh tireh wuskam hmbritnom o tamoh tamohm nom tunom korhnom. Yimam fasoh fasoh mrokfom kahukmnom, nom tfit kfo kangnom, “O Bro Nkifraye, wayak marnyanm.” Fasoh fasoh yak bebmnom, nom nhai kekuthato tawo wom mrokfom hekahnomm. Nhai. Nom be tngm youkihhato korhnom.  
\v 13 Rom fasoh hnomha mrokfom heshombat, nom tfit dborioh mrokfom kahuknomm. Yimam faso hti bebwomnom. Ndt mirahko ka be nohokrhofrpayet. Nhai. Nd neft bi riruhakngotmot.   
\s1 Tu Porrhu nefm Korin thofm hikkfot  
\p
\v 14 Na mrokfom inji wandfiwohat, mirahko ka nikmoh yak yimtnaneftn mrokfom inji wandfiwanm. Nhai. Niko nanhu yon bugakomn kfo hta mrokfom kahukanko.  
\v 15 To na kanga wom mrokfom finji akfoyanko, to nhai wom frohm kfokfot. Yonmari ten tausen tisam yihato Kraisrhu mrokfom tisimrahmko, to niko Kraisr hikwa yuhat, nanrpaya yifemwanko. Nann gutnius mrokfot nikmoha hanyhato mrokfom hemotanko, niko Kraisr rihikakmokomr. Nd yuhatn nanrpaya yifemwanko.  
\v 16 Ndnettn yifema tohwa yuhatn niko hti hikak hanyhato watoh hikko.  
\v 17 Nd dukeftpno Timotir kfo tkrurmoyanr. Gutnius mrokfothu hik yuhatn ror nhaf nanhu yoner. Rorhu hingrneft hifa hti yindhorwant. Bro Nungothetrhu hingrneft ror hifa kakitoh marnyewurt. Nd yonrn nikompno nia tohruharn, rorn na Kraisrpno frtkafhato hikwa hikeft tfit kfo nuhasrahrko. Nd nikompno yi tohhato hiruha mrokfom, na nd mrokfomn kmi kmim rhu htfaswa sios kfo nuhas htfaswanm.   
\p
\v 18 Nanhu nia nmbuhat wanyakti wanyaktihato tuko nakfo nakfo memoko, “Porr nhai nieruhatr.” Inji nnakfomokomn na kfoyuk mrokfom kfo bebmokommn tfit tukmoh mrokfom kfo grha yindhormoko.  
\v 19 To nanhu nia nmbuhat niko kfiwohat, na nieruha. Na bi brbohwa nianeft. Bro Nungothetr kangr fitoh yiha, nd yiha mfnahruha. Na nia thombat, mirahko ka nd niko kfo grha yindhorwa yimaroh mrokforoh wanyneftn nieruha. Nhai. Na be nierhoyann afo hti hikruha nd rom hingrnewa bbukeft.  
\v 20 Yimam bi Bro Nkifrarhu kingdomkfot fknihato bi rorn kak hta bohtewurm, htirahn rorhu bbukeft kforaht, rroh toheft nndo htirahnt. To mirahn ka tngt kfoyuk mrokfomn htiruha. Nhai. Rom nayuk nefmn hti nhtarahn.  
\v 21 Kfo ttiwonwanko. Na nikmoha niahato nd niko womroh mrokfom kfo bebhato tfit womroh mrokfom kfo grha yindhorneft tfit mhtineft finji narhoyanko. Kumbuhu nmbuhaye tathato nd neft yafhorahkomt? Nd neft yafhorahkomt na be nia mhtineft na be yindhor yima yuhurpno mrhuhato htirahkma kfo ptha yindhornhohato hifa yima yuhum hmbriruhanko.   
\ms1 Kristen yimampno buha rhuyuk nefm tum rhuhato nakfo gubhukfot  
\mr (Sapta 5—6)  
\c 5  
\s1 Korin sioshu met yindariroh fasoh beb nmbuhat  
\p
\v 1 Wom yafotha duha neft nikompno rhumot yimam bi kfo ptha habriwomt. Nd neft be tu fasoh beb nmbuhat korhtko. Wanymoya kfo memom, nikmoh sioshu wom Kristen yimar turhu yifemrhu fndoh tuhant hatohmort. Nd ror namo neft, Bro Nkifrar hik duha yimam nhai ndhtet neft nakahm!  
\v 2 To nd neft htitkomt? Ndt tamoh neft yorhwattko tfit niko kfo yindhor yamukako, “Nom hifa korhnom?” Nikmoh womr nayuk neft wahti yimtnakomt. Wahti yimtnakahkomt yima yuhum akrhomko. Yima yuhum krhohato nd yimar nhai tfit nikmoh rifiny swirm o tamoh nefm yi rhunhokfot. Be inji wuri tohkfot. Turn nd neft bi fafho thurt, ee btn niko yakmiyakkfot. Na kanga inji narmokomr.   
\p
\v 3-4 Ar wuri toheta, thatiprpat wuri tohwot, nanhu yima yuhur nikompno korhr. Yima yuhur nikompno yorhwarn nd yimar nayuk neft na bi htimoyant. Ndar na yimaya hatohwa nyingam htita kanjo nd yimarhu neft bi htimoyant. Htihato nd yimarhu finjina finjina yuham bi duka htamoyanm. Ndnettn na nmoh Nungothet Jisasrhu yufatpno kfiwa. Ndhtet neft nayet yimar wayak gnngtattwakomr. Warhu rifinykahkomn nd yimar kangko finji ananomr, mrokfot bi rifiny swirtn wayak dbkaftwakomt. Nanhu duka yima yuhur nd rifiny swirt rhurahr yima mifa yorhwa kanjo. Nd niko yak dbkafruha mrokfom, nmoh Nungothet Jisasrhu bbukeft hingrnarahtm.  
\v 5 Na kfiwanko, nd yimar wayak tuhafotwakomr. Mirahr tfit nikmoh rifiny swirm o tamoh nefm tfit arhunhoyanko. Be inji atoh furatwar. Tur inji toh furaruharn tfit tur htirahrt nd ror tohruha toh nmbuhat finji tohruhart. Tur htiruharn rorhu yima yuhur yak kekutrahrr. Yak kekuthato bro kotkfot toh thombat mrokfo duhatr rhurahr.   
\s1 Korin thofm fasoh net fasoh net yimam yak thukfot  
\p
\v 6 Nd womrhu mett hatohet yimar hatohwakomrn tfit nikmoh sios kfo hagrha yindhorwokomt. Ndt nhai tu neft nakahko. Niko htitwokomt bretparoh hingrneft? Tefi yispenm bretpat rihtafrahnt, htirahnt bretpat tfit kur fannahato bropat rhuraht. Ndnettn nd womrhu mett hatohet yimar tuha siosn hatohrahkomr, to be rorhu neftn womm htiyakhany htiyakhany be nikmoh sios be nd neftn broniraht.  
\v 7 Nd kunym yorhwa yatk yatk yis yak thuwa kanjo nd womrhu mett hatohet yimar wayak thukomr. Nikmoh sios tfit wom toh duha. Inji narahko, nhai tfit wom yispam nikmoh kunym wom rhuruhatm. Niko bi tu Bro Nkifrarn yak wus bowus marnyamorko bi tur kanjo bi ruhetkomn, ndnettn ndhtet fasoh rine wuniyet yimam yak thuhato turpatko Kristenko inji rhukfot. Bi Kraisrn nmoh fasoh fasoh nefm minoh nhehafmorm. Bingot Pasofa burwa yiha Judam sifsifm wasmoa kanjo inji wasmomr. Ndnettn nikom wutha yima yuhumpno rhukfot.  
\v 8 Ndt tu kfot kfiwanko. Nom fasoh fasoh nefm yafhohato Bro Nkifrar hiket yimam kanjo nom inji rhukfot. Nhai tfit tunom toh hnamo yatk yima yuhur kanjo nom tfit inji tohkfot. Nhai. Womroh hti srthu hasohato yuf bunyim kanjo rir borir hasoneft, yafhokfot. Nd nefm yafhohato tfit hifa yima yuhurpno womm yak marnya bomarnyakfot.   
\p
\v 9 Ndwom gontwat na nikompno htafmot, wom mrokfot kfomoyanko. Kfo memoya, “Mirahko nd ijoh tone htfaset yimampno arhunom.”  
\v 10 Na nd mrokfot kfomohat, nhai kfo marimoya, ndar bbinysofthu ijoh tonayet yimam, o wuss hmarsi yakt yaket yimam, o rikohet yimam, o nkifra tahi rmonm o nkifra tahim kfo bruttnayet yimam, rompno brbo arhunom. Ndhtet ndhtet yimam ndar yuht bbinysoft toh htfas bugewumt, ndnettn nhai romn nd kfo rafo mrokfot kformoya.  
\v 11 Na kfomo mrokfot yimot, nd yimam kfo yamuka, “Kristenenom,” to tfit htirahnm metmpno yi habrirahm, wuss hmarsi yakt yakrahmt, nkifra tahim kfo bruttnarahm, womm faso faso kfo rindho borindhorahmm, drin spak htfasrahm, womroh wuskam rikoh htfasrahm, tom ndhtet ndhtet yimamn na kfo memoyanko, mirahko arhunhonomm, o ayemskanhonomm.  
\v 12-13 Mirahko wom yima fura bofuram tafi sios yarim fnahna duhatm nayuk nefm htihato ayak gnngtatnomm. Nhai. Rom Bro Nkifrarn htirahrm. Bi sios tohet rhunefm htihato yak gnngtatneft, nhai mrokfom. Wayak gnngtattwakomm. Bro Nkifrarhu rfa borngt kfiwa mrokfot kfo kangt, “Fasoh fasoh nefm nayet yimar wayak tuhafotwakomr.” Ndnettn nd womrhu mett hatohet yimar rhunho duha.   
\c 6  
\s1 Tuko Kristenko nakotim nakotim duha  
\p
\v 1 Niko Kristenko tuko nakotim nakotimwoko. Ndnetann kfiwanko. Niko tuko Kristenkompno mrokfom rhuneft, tamohmpno Bro Nkifrar hiket yimam myak trohnihato tfit Bro Nkifrar hik duha yimampno mrokfom hanitakomm? Ka tu sioshu yimam yakhato romn nikmoh mrokfom wanyhenefte, ka nhai?  
\v 2 Wawanyko, kto bro kotkfot yakitoh thombat, nom Bro Nkifrarhu yimanomn Kraisrpno rhuhato ndar bbinysofthu yimaroh mrokfom yakitohnhorahnomr. Ndnettn ndhtet tefi mrokfenm tuko Kristenkompno rhuyukm, tamohmpno niko Kristenko nhai yakitohhato yak nohrfotkomm?  
\v 3 Yo mounmotroh mrokfom nomn wany yakitohirahnomm. Ndnettn ndar bbinysofthu tamoh tamoh nefenm yihof href yimam na hasiwam, nomn wany yakitohhato yak nohrfonomm.  
\v 4 Ndnettn niko tuko Kristenkompno rhuyuk mrokfenm tamohmpno tfit Bro Nkifrar hik duha yima furampno tfit hanitakomm? Tukmoh sioshu yimar yakhato rorn yak noh marnyahirahrko.  
\v 5 Wayimtnako niko ndhtet neft newohat. Niko tukmoh sioshu yimam myak htanihato tfit Bro Nkifrar hik duha yimampno mrokfom hanitahat, kangme sios ka ndhtet yima duhattn mrokfom tfit wom yima furampno hanitkomm.  
\v 6 Tamohmpno wom Kristenr sinyahato tfit wom Kristenr kot hanitarr? Kot hanyhato tfit Bro Nkifrar hik duha yimarn mrokfom wanyahukarf.   
\p
\v 7 Nd niko tuko Kristenko niwa neft, wom Kristenr sinyahato wom Kristenr kot hanitahat, ndt be tuko nayak kasuhwoko. Nhai bi Jisasrhu yihotat hikkahn. Tamohmpno ni Kristenn wom Kristenr tamohm yak nhehneft yak marsisa duha yita? O, wuska yak rikohniheneft hti marsisafo duha yitanr? Womr kot hanitnr, to be nd tkittn tu kak suhwo.  
\v 8 To nhai duka mekahko, “Ndhtet dborioh nefm ahiknom.” Nhai. Tfit tuko nayak nheh nayak nhehwoko. Yo tuko narikoh narikohwoko. Ndhtet nefm tuko Kristenkompno korhm.  
\v 9 Niko mrokfom bi wany hneteko, fasoh fasoh nefm nayet yimam nhai Bro Nkifrarhu kingdomkfot fkniruhatm. Mirahm wom yimam niahato amkfo nheh bonhehnomko. Yimam nd ijoh tonitam yo nkifra tahim kfo bruttnewam, yo womroh metm hatohwam, yo yindarim tfit tum yindarim nahti kekutwam,  
\v 10 yo rikohwa yimam, yo wuskat hmarsi yakt yaket yimam, yo drin spaket yimam, yo womm faso faso kfo rindho borindhet yimam, yo womroh wuskam teh hutfaknita yimam, ndhtet ndhtet yimam nhai Bro Nkifrarhu kingdomkfot fknihato tohruhatm.  
\v 11 Nikmoh womm nd tkitt afo tohmoum. To hifa bi Bro Nkifrarn fak wus bowusmorko. Yak wushato bi turhu yufatpno fak nmbtekmorko. Bi yima yuhum bi wuthamn bi dborioh met yindariyeko. Jisasrhu yufati yo Bro Nkifrarhu Yafothathu bbukeftpno bi dborioh tuhan yindariko korhko.   
\s1 Nmoh thatipt Bro Nkifrarhu Yafothathu kunyet  
\p
\v 12 Womm kfo kangm, “Mrokfo duhatenom tamoh tamohroh finjina finjina nefm. Nhai wom kfo rafo mrokfot rhukahtnom.” Tmift, to mirahko ka nd tamoh tamoh nefm ka be na fura bofurahato hifa hifa rhu nmbuhat yakrahnom. Nhai. Kfo kangm, “Mrokfo duhatenom tamoh tamohroh finjina finjina nefm.” Tmift, na tamoh tamohroh naneft, na nhai nd neftn na ttafakhato nd neftn na hatone htfaskfot.  
\v 13 Womm kfo kangm, “Tamoh tamoh yeyuk yeshrt yatithu yiyuket. Yatit yeshri yanyeftn yuhurwot.” Ndt rot hifa. To tfit kfiwa. Kto yati duhatnom rhurahnom. Ndnettn nhai nd yeshri yayuk dukefr rhuruhatr. Nd ijoh tone dukefr ruhet yimam kfo kangm, yatit yeshri yanyeft yuhurwa kanjo thatipt sinyewut ijoh yi htfasneft. Nd dukeft fasohet. Thatipt Bro Nkifrar htamohat nhai marimor, “Ijoh tone htfasyukt ahingrnayant.” Nhai. Thatipt Bro Nungothetruhet, turhu hingrneftn nd thatipt hingrnakfot. Rorn ndar thatipt kakitohwort.  
\v 14 Jisasr bi nohetr, Bro Nkifrarhu bbukeft kfomot kasinyamorr, nom to inji kanjo kasinyarahrnom Bro Nkifrar.   
\p
\v 15 Niko Jisasrpno rim tohnihato hikaknitahat, to nd yiharn niko bi rorpno nathu nanyjhohato kangme bi rpa yima Kraiser. Ndnettn nd Kraisrpno nathu nanyjhohato bi Kraisr kanjo ruhet thatipt nhai tfit wom tirt o wurat o tamoht yakhato tfit ijoh yuhatn htakfot. Inji naneft ndt nhai tu dborioh neft.  
\v 16 Yo wom mrokfom nhaf bi wanyeteko. Yimar nd yima yimampno yi htfaset mettpno bi yifir, to be bi rotpno frtkafwarn bi hti kangm rpa yimayer. Bro Nkifrarhu rfa borngt kfo kangt, “Nd hus met yindarif be rpat nafrtkafruhafn be mirahme rpa yimayer.”  
\v 17 To nd yimar Bro Nungothetrpno frtkafetr, nd yimar bi Bro Nungothetrhu Yafothatpno frtkafwor.  
\v 18 Niko dukefmpno yiha yiha rhukfot. Nd ijoh tone dukefr mfnahwor yak karhukfot. Yimam ndar tamoh tamoh nef furam niwohat nhai turoh yafotham faso yak bebkahmm. Yimar wom metmpno yi htfaswor o mett wom yindarimpno yi htfaswot, nd neft yimam niwat, ndt be turoh yafothat kak bebwom.  
\v 19 Ka nhai hti mikahko, thatipt Bro Nkifrarhu Yafothathu rhuyuk tkitet? Nd tkitt bi tu Bro Nkifrarhu Yafothat rihtamort. Bi rorhu Yafothat rihtamotrt, niko bi rorhuweko. Bi rorhu yinhit korhko. Nhai tukmoh yinhitn wom rhukahko.  
\v 20 Nikmoh nmbuhatpno kmi tiamr fohmomr. Ndt tu bro nmbuhat. Ndnettn tamoh tamoh nefm nikmoh thatipm naneft, afo htikfot. Tamoh nefmn thatipm naruhatm riruh aruhyuk yimam htiruhamn Bro Nkifrar kfo yindhorrahm, nd nefmn nakfot.   
\ms1 Porr kfo ptha memor, “Yimam tuhan yakkfot.”  
\mr (Sapta 7)  
\c 7  
\s1 Tuhan yaknefthu mrokfot  
\p
\v 1 Nd niko wandfamo tuhan yak yuharoh kfo ttiwon mrokfotn, bi afo kfo ptha nuhasaforuhanko. Yimar kangr tuhan yak duha be inji sfno atoha, nhai mrokfom.  
\v 2 Tmift, htitnom met yindarim nhai warhukahm. Thatipm he htfaswom. Ndnettn duka kanga met yindarim nhai toh furakfot. Metm ramet bugam rhukfot yo yindarim tuhanet bugam rhukfot.  
\v 3-4 Metm yindarim ramet bugam yo tuhanet bugam rhuhato tuhanemt nhai hakkrkfot rothu thatipt. Rothu thatipt ramemruhet. Yo ramemr nhaf inji, nhai rorhu thatipt hakkrkfot. Rorhu thatipt tuhanemtuhet. Tuhanemthu thatipt, nhai tu tuhanemtn kfohato ramemr be hikkfot. Nhai. Ramemrhu tngtn rot be wanyhato hikkfot. Ramemrhu thatipt nhaf inji. Nhai tu ramemrn turhu thatipt kfohato tuhanemt be hikkfot. Nhai. Tuhanemthu tngtn ror be wanyhato hikkfot.  
\v 5 Ni ramet metn, yo ni tuhanet yindarin mirahfn thatip nahanyeft nakfo kur o nakfo hhrekno. Bro Nkifrarpno kfo bruttnanefrpatpno kangfn rhu furahato Bro Nkifrar afo kfo bruttnano, ee afo tufnn rhu napthahato hifa yindhorwofnr nd dukefr ee btn inji nakfot. Nd yiharpa rhu furafohato tfit kto rpat tfit hwekfot. Inji na duha yirahfn, Satanr ndha yarim tohnerahr. Yarim tohnehato wom dukefr mtawastiwonrahrn ni metn o yindarin. Mwastiwonruhatrn yima yuhur sinyahato wom mett o yindarirpno yihato msuhrahn.  
\v 6 Ndt be kfo nuhas mrokfot kfiwa. Nhai kfo mikaha inji wahiktwako. Nhai.  
\v 7 Na, na damiag toht tohwa. Nanhu dukeft kanga, na tohwa toheftn niko buga be inji tuhan yak duha atoh furanom. To nhai. Bro Nkifrarn nd tuhan mtitofr harhuworr. Womm nd tuhan dukefr kahukrm, womm nhai. Metm nhaf inji wommn yindari dukefr kahukrm, womm nhai.   
\p
\v 8 Nd brio toh furewa met yindarim yo met dhirm o tuhan yafonm, ndm kfo kanga, rom hifa be inji na tohwa kanjo be inji damiag toht tohneft.  
\v 9 Ndt be tukomn tukmoh yima yuhum yak nhombrakfot. Kak nhombra titko brio toh furaneft, to be ni metn ram yakkfot, yo ni yindarin met yakkfot. Briyo tohrahn, metmpno yo yindarimpno yi htfasneft yak tfaktirahnr.   
\p
\v 10-11 Yimam nd bi ram yaketm o met yaketm wom mrokfot kahukanm. Nd mrokfot mirahko ka nanuhet, nd mrokfot, Bro Nungothetruhet. Nd mrokfot inji kfiwut: Mirahr ramemr turhu mett ayak tuhafoyant, yo mett miraht tuthu ramemr ahtanykohanr ayakrmanyiya. Bi htanysre, nd mett be inji toh fura habrikfot, miraht nfri ramr ayaka. Tutn toh hanyhato tut toh fura habrinyeft kokrwote, tfit tut yakafo tanyuk yimarpno tfit yikfot.   
\p
\v 12 Yo tfit niko wom Kristen met yindarikompno wom mrokfot kfiwa. Nd mrokfot be tukanuhet. Mirahko ka Bro Nungothetruhet. Nann be kfo kanga, wom Kristen yimar, rorhu mett nhai Bro Nkifrar hikkaht, to metthu toh nmbuhat hifa yindhorwot nd Kristen yimarpno tohneft, nd Kristen yimar mirahr ayak tuhafoyant.  
\v 13 Kristen mett nhaf inji. Rot yakyuk yimar nhai Bro Nkifrar hikkahr, to yindarir hifa yindhorwor nd Kristen mettpno tohneft, mett miraht ayak tuhafoyanr.  
\v 14 Kristen yimarhu toh nmbuhat hifa nd Bro Nkifrar hik duha mettpno rpat nafrtkaf marnyahato rpat tohwof, nd sawohf Bro Nkifrar hifa hti yindhorhato nd Kristen yimarhu mett Bro Nkifrar kukatohaf hanitrt. Kristen mett nhaf inji. Nd Bro Nkifrar hik duha yimarpno hifa rpat nafrtkafhato tohwof, Bro Nkifrar hifa hti yindhorhato rothu ramemr Bro Nkifrar kukatohaf hanitrr. Ndnettn nd sawohfhu yonm Bro Nkifrar nhai hti marsisakfot. Tur hiket tuhan yindarim kanjo rorhu tirtn korhm.  
\v 15 Bro Nkifrar hik duha mett kangt nd rot yakyuk Kristen yimar ahtanyanr, nhai mrokfom. Kristen yimar hti marsisafokfot. Yo Bro Nkifrar hik duha yimar nhaf inji. Kangr nd ror yakyuk Kristen mett ahtanyant, nhai mrokfom. Kristen mett hti marsisafokfot. To tfit Bro Nkifrarhu bro dukefr nhai wofnkahr nafrtndohneft. Kangr be inji rpat watohfn.  
\v 16 Ka rpat tohhato Bro Nkifrar hik duha yimar, ni nd ror yakyuk Kristen metnhu rhu nmbuhatn yak kekutruhattr Bro Nkifrar yakrahrr. Yo Bro Nkifrar hik duha mett nhaf inji. Ka rot yakyuk Kristen yindarinhu rhu nmbuhatn, yak kekutruhattt Bro Nkifrar yakrahrt.   
\s1 Bro Nkifrar kfo htamo toh yuhatn nom toh hikkfot  
\p
\v 17 Nom rpa rpa yimanom, bi tu Nungothet Jisasrhu hti fijo bi fak hta nhombramornom. Ni womn bi tuhan yakniyetnn Bro Nkifrar fakmorn, to be tuhanetn tohhato Bro Nkifrar hikkfot. O finji finji tohetn Bro Nkifrar fakmorn, ni be nd toheft tohhato Bro Nkifrar hikkfot. Na kmi kmiroh sios yi htfas thoft, to be nd na kfiwa mrokforpat kfo ptha htfaswanm.  
\v 18 Wom yimar bi tha pukniyetrn Bro Nkifrar fakmorr, to be tha puketr rhukfot, nhai tfit that rimakhato yak nanyjhokfot. O tafi tha puk thu duhatrn Bro Nkifrar fakmorr, to be tha puk duhatr rhukfot, nhai tfit that puk hhrif thukfot.  
\v 19 Nhai tha puketnomn Bro Nkifrar htihato hti yindhorkahrnom. Nhai. Nd tha puk hhrif thu hingrneft nd nndo thatipthu hingrnefet. Ror kfo pthayuk mrokforoh hikneftn tot tu Bro Nkifrar yimam hti yindhorwat.  
\v 20 Finji finji tohetnomn Bro Nkifrar fakmornom, nom to be nd toheft toh hikkfot.  
\v 21 Ka nikmoh wom yimam o metm bi slef tohetmn Bro Nkifrar fakmorm Kraisrhu hikneft. Slef tohetmn Bro Nkifrar yak thombat, to be mirahm nd yimam o metm yima yuhum krhohato akfo amanyom, “O nom slef tohwanomn nhai Kraisr hik marnyaruhatnomr.” Bi inji kfakni duha. Tum yak hanyuk yimaroh duka fijo kangm ayafhonomm, to be hifa.  
\v 22 To fitoh yimamn o metmn slef tohetmn Bro Nkifrar fakmorm Kraisrhu hikneft, nd yimam o metm be bi fnahmomn bi Kristenem. Fitoh yimamn o metmn slef toh duhatmn Bro Nkifrar fakmorm, nd yimam o metm be bi tfit Kraisrhu slef yimayem o metem bi.  
\v 23 Nd fasoh fasoh nefm yak nhirtamoa mtitikt be bi thu nyusakmokomtn be bi nhai wom mtitoft yakitohkahtko, be bi tfit Kraisruheko. Niko dukahato turhu yonr niahato rorn nikmoh nohyuk tkitt yakhato rorn nohmor. Ndnettn yimam kfo kangmko, inji inji watohkahkomn o inji inji waikahkomn Bro Nkifrar hti yindhorrahrko, mirahko yimam kfoyuk tngmn ahiknom.  
\v 24 Bar yinouroko, tfit wompam nd na kfi mrokfot mkfekwant. Nom finji finji tohetnomn Bro Nkifrar yakhato Kraisr mhikaknimonomr, to be tunom tohyuk toh yuhatn tohhato Bro Nkifrar yakitohkfot.   
\s1 Tuhan duha yimami ram duha metroh mrokfom  
\p
\v 25 Tuhan duha, yo ram duha met yindariroh mrokfom niko kfo ttiwonmot, ndtn afo kfo ptharuha. Met yindarim tafi ram yak duham yo tuhan yak duham, ndm Bro Nungothetr nhai rompno yiyuk wom tamoh mrokfom kformorm, be nanhu duka yima yuhurn wom kfo hta mrokfom kfo ptharuhanm. Nd na kfoyuk mrokfom niko yakkfot. Nd tamoh tamoh riduka aduka yima yuhum na kfiwam Bro Nkifrar nann hti yuhuwafhato nd riduka aduka yima yuhum hemora. Ndnettn nd na kfoyuk mrokfom niko yakkfot.  
\v 26-27 Nom Bro Nkifrar hiket yimanom be tu fasoh yiha bebr tohwanomn bro krhopam kekwonom. Ndnettn kfo kanga frohm bi tuhanetem rom be inji tuhanetm tohkfot. Mirahm tfit wom fitoh yuhamn tuhanemrom ayak tuhafonomm. Frohm damiagm tohwom rom be inji damiagm tohkfot. Mirahm tuhan yakneft adukanom.  
\v 28 Kto tuhan yakrahn, ndt mirahn ka Bro Nkifrarpno mrokfeta rhuruha. Nhai. Yo Bro Nkifrar hiket tuhan tmaht, tafi yindari dukefr toh duha met tmaht, nhaf inji, kto wom yimar yakneft miraht ka ndt Bro Nkifrarpno mrokfeta rhuruha. Nhai. Yimam tuhanetm rhuneft bok krhopam yakrahm, ndnetann nhai wofnkaha niko tuhanetko rhuhato ndhtet krhopam yakneft. Nd dukeftpno nd mrokfom kfiwanko.   
\p
\v 29 Bar yinouroko, nhai be sfno inji kfokahanko. Yiham bi kkopen hnewum. Ndnettn ndar dfik yiham Kraisr nom toh gari hasoruham, tuhanet yimam Bro Nkifrarn barkof bro dukeft htakfot. Nhai tuhanemromn. Yo metm nhaf inji. Bro Nkifrarn barkof bro dukeft htakfot. Nhai ramemromn.  
\v 30 Bro Nkifrar hiket yimako tamoh nmbuhampno yima yuhum dukahato nurwoko, mirahko nd nefmn bro dukefm ahtanom. Nd nefm nhai wom rhuruhatm. Yo tamohmpno yima yuhum yindhorwomko, mirahko be nd yindhoreftn bro dukefr ahtanom. Nd yindhoreft nhai wom rhuruhatt. Kristen yimam wuss wiknewam nhaf inji. Be nd tum wiknayuk wussn bro dukefm hta duha. Nd wuss nhai romn tfit wom yakitohruhatmm.  
\v 31 Ndar bbinysofthu kur bnka yihar to bi brboh hanitr. Ndhtet hingrnefenm nom hingrnewam, ndm bbinysoftpno rpat hti hambrafrahnomm. Ndnettn yima yuhum mirahm be nd bbinysofthu hingrnefmn yo dukefmn afrtkafm.   
\p
\v 32 Tfit wom mrokfot kforuhant. Na nhai wofnkaha niko bok krho dukefmpno rhuneft. Niko htitwokomm tuhan duha yimam hingrnewa yuhat. Rom nhai wom bok dukefm rhukahmm. Rroh dukeft duka kangm, “Hifa be damiagnom tohhato Bro Nungothetrhu hingrna dukefrpar tohneft. Bro Nkifrar hifa hti yindhorwornom.” Rroh dukeft inji korhtm.  
\v 33 To tfit tuhanet yimar nhai rorhu dukefr inji rhukahrr. Nhai. Rorhu dukefr tuhanemtn bro dukefr afo kitr. Kangr, rhu nmbuhat yak marnya bomarnyahato mett yindhorraht.  
\v 34 Ndnetrn yindarirhu dukefr bok dukefm kekwomr. Bro Nungothetrhu hingrnefm dukaf hany yo tfit turhu mett dukaf hany inji newarn hus bok dukefetr korhr. Ram duha mett o wom yimarpno tafi yi juha mett, rothu dukefr Bro Nungothetrhu hingrnefthu hingrna dukefrpar korhrt. Kangt, “Be Bro Nkifrarpno rim fnahni bugahato yuht thatipti yima yuhu bugam Bro Nkifrarpar he bugakfot.” Ram duha metthu dukefr inji korht. To tfit ramet metthu dukefr nndo korhrt. Rot, tuthu yindarirhu hti yindhor nmbuhat dukahato tamoh tamoh kunyshu hingrnefenm yak kars, hingrna kars, yo briahakorhof hingrnefenm hingrna, yo tufhu sawoh rhuyuk rhu nmbuham ndm dukaf hany ndhtet ndhtet bok dukefmi hingrnefmn korht ramet mett.  
\v 35 Na nd nd mrokfom kfo pthiwohat, nikomn dukahato nd mrokfom kfo pthiwanm. Ndm nhai nikmoh kfo rafoyuk mrokfom kfo pthakahanko. Nhai. Kanga dborioh nefm wahikkahkomn Bro Nungothetrhu hingrneft wahingrnako. Na wofnkaha nikmoh yima yuhum krho hanyhato Bro Nungothetrhu hingrneft yakitohneft.   
\p
\v 36 Wom nakfo nanfet met yindarif tohhany tohhany, yindarir nhai wofnkahr toh hatoh furaneft, kangr, “Be yudbat mett ayaka,” nd yima yuhur be mfro tohworr, to be nhai mrokfom yudbat niyakneft. Bro Nkifrar nhai finji kforuhatr.  
\v 37 To yimar met dukefr nhai bmbri tohkahrr, kangr, “Be inji afo toh furarahno, nhai bmbri niyakruhatno,” ndr tu dborioh dukef mifer.  
\v 38 Ndnettn yimar turhu kfo nanf tuhant nuwat kanjo yatinohwort yudbat yakneft, ndt dborioh nefet. To yimar nd kfo nanf tuhant nhai nuwat kanjo yatinohkahrt yudbat yakneft, kangr be inji afo atoh furano, ndt tu dborioh dukef mifet.   
\p
\v 39 Tfit ramemrom noh htanita metroh mrokfotn tfit kfo ptharuha. Niko bi wany hneteko. Mett tafi rot yakyuk yindarir noh duha, afo rpa raft kakitohwotf. Nd rot yakyuk yimar bi fnohnir, nd raft nhai wom rpat yakitohkahtf. Kangt, wom nfri ramr ayaka, nhai mrokfom. Tmift nfri yimar yakneft, hti hanyhato Kristen yimarn yakkfot.  
\v 40 Be nanhu duka yima yuhurn duka kanga nd yindarir nohtaniyet mett tfit wom yimar yak duha yinyeft hifa, rothu rhu nmbuhat rhu yindhorrahtt. Na inji htita, na nd kfiwa mrokfom, Bro Nkifrarhu Yafothat yorhwotta mrokfom kfo pthiwanm.   
\ms1 Tahi yifonm rim htahuka nuwa rikat ka Kristenm yakfot o nhai?  
\mr (Sapta 8—10)  
\c 8  
\s1 Tahi rmonm rim htahuka nuwa rikathu mrokfot  
\p
\v 1 Tahi rmonm rim htahuka nuwa rikathu ya nmbuhat kfo ttiwonmokma. Nd mrokfotn tfit kfo ptharuhanko.\f + \fr 8:1 \ft  (8.1) Porr nd kmi Korinko hingrnamoa yiham Bro Nkifrar hik duha yimam (haidenm), fohm, nungam, kmbrum, nd ndm yaknimoamm turoh nkifra tahi rmonm rim htamoumm. Kto tfit nd yemrom yaknimoamm maket swirmn htamoatmm yimam wiknamoumm. Kristenm ndhtet nefm htimoamn kfo ttiwon mrokfot Porrpno htamomt.\f* Wom Kristen yimam kfo kangm, “Tahi rmonm rim htayuk yeshriroh ye hik yuham nom nhai wom mmokahnomm, nom bi tawisaf bugewunom. Ndm rom hifam. Nd yeshrim rimakhato yak yerahnomm, Bro Nkifrar nhai faso htiruhatrnom.” Hifa kfiwum. To tfit kfiwa, ndhtet dukefet yimaroh mrokfom kfo pthaneft, nhai wom nfri Kristenm dukahato pthakahm. Mrokfom be kfo grhanano kfo pthewumm. Wom Kristenm afo hti dukahato tamoh mrokfom kfo pthanefm, ndm hifa. Tfit womm wanyruhamn dukefm yakruhamn myakitoh trpaknirahmt Bro Nkifrarhu mrokfot.  
\v 2 Yimam kfo yamukam, “Nom tahi rmonroh tamoh tamoh yeshri ye yuham nom nhai bi wom mmokahnom, nom bi kak bugewunomm yeshri ye yuham.” Na kfiwa ndhtet kfet yimam kfo furewum, nhai tafi dukefm yakkahm.  
\v 3 Yimar marbitn Bro Nkifrar htewar Bro Nkifrar bi htitworr.   
\p
\v 4 Tahi rmonm rim htahuka nuwa rikathu ya nmbuhat nom Kristennmoh htiyeft inji htitnom, nkifra tahi rmonm nhai yafotha duhatem. Yo htitnom, nhai Bro Nkifrar kanjohot nkifrar ndar bbinysoft rhukahr. Nhai. Rpa Bro Nkifrarpar ndar yuht bbinysoft kakitohwort.  
\v 5 Rom tom yimam kfo yamuka kmi yarhm, tek yarhm, tkit nkim, tangi tangiroh nkifram, yo mar gunyr, yamt, mim, foh nungam yiram tamoh tamohm kfo tndhet bugam korhm. Kangm nmoh nkifra shrem. Ndm rom hifa nd tndh mrokfom korhm,  
\v 6 to nom Kristennmoh htiyeft htitnom, rpa Bro Nkifrarpayer. Rorn tor nmoh Yifemr. Rorrpar kfomor tamoh tamohm nom htitam dborhamom. Yo yimanom rorn hingrnamornom. Hingrnahato nmoh dukefmpno, yima yuhu bugampno toh hikwonomr. Yo rpa Bro Nungothetrpar korhr, ndr Jisas Kraiser. Tamoh tamohm rorn hingrnamorm. Ror kfiwur nom korhnom.   
\p
\v 7 Wom Kristenm nhai mekahm, nkifra tahi rmonm yafotha duhatem. Rom bi hti hnamoumm tahi rmonm yemrom rim htahehato bbukeft hingrnamoahat. Ndnettn nd nkifra tahi rmonm rim htayuk yemrom yanyeft bok dukefm kekwomm. Wom dukefr kangrm wayak wayakomm, tfit wom dukefr kangrm mirahko ayak ayanomm nd nkifra tahi rmonm htayet yemrom. Ndhtet bok dukefm yekwamn yima yuhum be krho htatewumm.  
\v 8 Mirahko ka yeshr ye yuhamn Bro Nkifrarpno brbo yirahnom. Nhai. Bro Nkifrar nhai nd yeshr ye hik yuham dukakahr. Nd yeshrim rimakhato yak yerahnomm, Bro Nkifrar nhai faso htiruhatrnom, o kfo kurrahnomm nd tahi rmonm htayuk yeshrim, nhai toh marnyaruhatnom Bro Nkifrarhu nyingampno.  
\v 9 To niko bi ritohngotaket Kristenko dukefmpno niko nkifra tahimpno rim htayuk yemrom yakfot. Nfri Kristenroh nyingampno niko ye fura bofura duha. Rom kfo kuryuk yeshrim niko rihtiyakhato yeruhammn yima yuhum tfit mkrhotarahmm.   
\p
\v 10 Ni yima bi Kristen tohngotetn nd tahi rmonm htayuk nuwa rikat yak yanyeft afo rihti ahtihato yak yiyaknikfot. Wom nfri Kristenr rorhu yima yuhur yuhure yonenrohr kanjo rhu hanyetr, rorhu nyingampno yak yerahn, to be ror inji mhti wofnnihato yerahr.  
\v 11 To be ninn mrokfot yiraht. Nd Kristenr bi Kraisr nohhato nrfa htiyakmor ninn fe nhehmotnr ror yehato suhmor.  
\v 12 Wawanyko. Wom Kristenm tafi tohngot duhatm rroh yima yuhum yuhure yon mumenrohm kanjo yuhure korhmm. To niko inji narahkomm niko Kraisrpno mrokfetko rhurahko.  
\v 13 Ndnettn na wom yemropat yehato wom Kristenr mhti wofnnihato yehato fsuhr, to be na nhai tfit ndhtet yemropat wom yiha womroh nyingampno yakfot.   
\c 9  
\s1 Porr aposer hingrneft hingrnamoahat nhai marimoar, tir htaruhanm ror hingrnamoa kmim  
\p
\v 1 Nhai wom tamoht yakitohkahta. Kraisr kfiwa yuharpat hikwa. Kraisr kfiwa yuharpat hikwoyann, aposer hingrneft kakitohwa. Kraisrhu kfotpno nd hingrneft kakitohwant. Na tukianhu nyingaye nmoh Nungothet Jisasr htimoyanr. Na Jisas Kraisrhu mrokfom kfo pthamohat, to bi toko nikomn bi Jisas Kraisr hikwokomr.  
\v 2 Yimam htitma yima furam kanjo. Niko nhai inji htikahkma. Bro Nungothetrhu mrokfot na kfo pthamot, niko wany yakiohato hikmokomtn Jisas Kraisrpno brbo frtkafwoko. Nd yuhatn niko htitkma aposerm kanjo.   
\p
\v 3 Na hingrnewa hingrnefthu maruha yakneft wom yimam kfo ptha yamukahat, “Tamohmpno hti dukaruhanomr,” mrokfom inji kfiwanm:  
\v 4 Nom yimanom aposer hingrneft yaknihato kmi kmikompno yi tohwanom, ka nhai yeshriyenm yakhato yak hekfot?  
\v 5 Nom nmoh Kristen metm ka nhai Pitar yo wom aposerm yo Bro Nungothetrhu nmemrom turoh metmpno rpat yi htfaswa kanjo nom tunmoh metmpno kmi kmi rpat yi htfaskfot?  
\v 6 Ka no Barnabasetno nonrpanonn wom maruha hingrnefenm hingrnakfot? Ka nhai womm nikmoh tirm rhuwa kanjo no nikmoh tirmn rhukfot?  
\v 7 Yimar wom amikfotn soldia tohneft nhai turn yeshri wiknahato yak yekahr. Nhai. Yimar nnari fanm nuhtewohat, rorhu hingrneft nhai yi furakaht, tfit tur nuhtayuk nnari mishu nnarihamn yakhato kawur. Yimar sifsifmi memem tohukatoh htfaswohat, nhaf inji, tur tohukatohwa sifsifroh mingapam yekwarn tfit kawur. Ndnettn nom aposer hingrneft hingrnayuk yimanom nikmoh tirmn arhunom.   
\p
\v 8 To mirahko ka be yimaroh mrokfo kfo pthiwa yuhatn hikhato kfo pthiwa. Nhai. Ndt nkifra boririfhut kfiwa yuhatn kfo hikwa.  
\v 9 Nkifra mrokfot Mosesr wandfamot, kfo memor, “Bulmakaur wit yukham kahot rofworm, mirahn tngt akitasifkahtanr ror yi yak hany juha.” Nd mrokfot ka bulmakaurpam kfomot? Ka nhai yimanom nd mrokfot rpat kfokaht?  
\v 10 Nd mrokfot rpat yimanompno niamot. Yimar bbinysoft tou yibufrwar yo wit yukham tmbrahato krha rmonwar nhai hingrna furakahr, rorhu hingrnefthum kekwor womm. Nd yuhatn wom Kristen yimar wom kmitn yi hingrnaneft nd kmi thofmn ror wiknakfot.  
\v 11 Kraisrhu mrokfom, Bro Nkifrar kfoyukm, nom nikompno yi tohhato kfo ptha nuhasmohat, yimam yewurit nuhtiwa kanjo inji yihato nuhtamonomt. Nom inji namohat, tawo niko nom tamohm hanyefte fasoh nefet?   
\p
\v 12 Wom yimam nikompno yi tohhato Bro Nkifrarhu mrokfom yahukahat niko tawo kahukkomm wuskenm, yeshrim tamohm. Nom to aposerenom. Aposer hingrneft hingrnayuk yimanom nikmoh tirmn arhunom.  
\p To nhai. Nom nhai kfo mikahnom, “Nom rroh tirmn rhurahnom tamoh tamohm.” Nom nhai inji nakahnom. Kangnom, “Nhai romn tfit krhopam hiruhatnom. Nom tunmoh wuramn tohkfot. Rroh tirmn rhurahnom, hingrneft nhai yi marnyaruhatt. Kraisrhu gutnius mrokfot, nom pthayukt, nhai wany yakioruhatmt. Kfo mirahm, ‘Maruha dukefrparpno hingrnewum.’”  
\v 13 Niko htiyeteko, Bro Nkifrarhu temperrhu hingrneft yakitohwa yimam, romn tu Bro Nkifrarhu temperr rim htayuk yeshrimn kawum. Nd tarioh mthiwa yemroroh yemropamn kawum. Tu Bro Nkifrarhu kfo yuhatn kak hikwom.  
\v 14 To be nd yuhatn, yimam gutnius mrokfom kfo ptha htfaswam, to nd rom mrokfom hta htfaswa kmimn tawo rroh rhu nmbuhat hti dukakfot. Tu Bro Nungothetr inji kfo htamor.   
\p
\v 15 Na ndar yimaya, na nhai kfohna marimoya, “Na aposera. Na gutnius kfo hanyuk kmimn na tamoh tamohm hti dukarahma.” Nhai inji kfo hnarmoya. Nhai. To tfit mkfekwa, na ndar mrokfom inji wandfiwohat, mirahko ka wuskam o tamohroh hanyeft dukahato mrokfom inji htewanm. Nhai. Na wofnkaha na hingrnewa hingrneft maruha yakneft. Ka btn womroh tirm hirhotma maruham yakruha.  
\v 16 Na ndar gutnius mrokfot kfo ptha habriwohat, na nhai tuka kfo grhahato kfo mekaha, “Na ndar yimayann gutnius mrokfot kfo ptha habriwotant kmim wanukmt.” Na nhai inji kfo grhakaha. Rot nd gutnius mrokfothu kfo ptha htfasneft, ndt tu Bro Nungothetrn nd hingrneft hemotra hingrnewant. Na nhai nd hingrneft yafhokfot. Na nd gutnius mrokfot na yakitohyukt akfo ptha htfas duha yiyant, Bro Nkifrar krhopam herfora.  
\v 17 Na gutnius mrokfothu kfo ptha htfasneft be tukanhu duka fijo nd hingrneft ahingrna furayant, ee btn marufa yakrfoyant. Ndar hingrneft tu Bro Nungothetrn hemotra hingrnewant.  
\v 18 Ndnettn tone tamoht yakrhoya na ndar hingrneft hingrnewohat? Na kmi kmimpno gutnius mrokfot kfo ptha htfaswohat, nhai mekaha, “Na gutnius mrokfot kfo ptha htfaswa aposera, Kristenmn marufam tamohm hirahma.” Na nhai inji nakaha. Nanhut to be bro yindhorefrpat kekwota. Kmi kmim na mrokfom kfo ptha htfaswam mrokfom yakhato hikwatmm, na nd yindhorefrpatpno korhwa. Nhai marufam na kfokfot.   
\s1 Porr yima yimaroh hingrna yimar tohmor  
\p
\v 19 Na, na be inji tohwa. Na nhai wom yimarhu yinhitn tohhato rorn hikkfot. Na ndar tohwohat, na be inji tohhato yima yimaroh hingrna yimaya. Na kanga, inji tohakni hanyhato gutnius mrokfot watuhiruhanm, be wuyak marnyaruhamtn hikrahmt.  
\v 20 Ndnetann na Judampno tohhato Jisas Kraisrhu mrokfom kfo pthamoahat, na Judaroh toh yuhatn na toh hikmoa. Na kanga, rroh toh yuhatn inji tohakni hanyhato gutnius mrokfot watuhiruhanm, be wuyak marnyaruhamtn hikrahmt. Mosesrhu boririfhuthu yinhithu tohneftn na nhai boririfhuthu yinhitn tohkfot. To boririfhut hiket yimampno tohmoahat, be rhu mska inji naneft boririfhut hiket yimam kanjo boririfhuthu yinhitn tohmoa. Na kanga, inji tohakni hanyhato gutnius mrokfot watuhiruhanm, be wuyak marnyaruhamtn hikrahmt.  
\v 21 Yo yima tangim, Mosesrhu nkifra boririfhut yakitoh duha kmim, rompno tohmoahat, nhaf to Mosesrhu boririfhut yakitoh duha yimam kanjo tohmoa. Na kanga, inji tohakni hanyhato gutnius mrokfot watuhiruhanm, be wuyak marnyaruhamtn hikrahmt. To mirahko ka Bro Nkifrarhu borsisha mrokfom myafhonihato tohwa. Nhai. Na Kraisrhu kfo borsishayuk mrokfomn hikwa.  
\v 22 Yo yimam Jisas Kraisrhu hik yuham o tohefm tafi tu bro duka tungunefm yak duha yimampno tohmoahat, na to be rom kanjo tohmoa. Na kanga, inji tohakni hanyhato gutnius mrokfot watuhiruhanm, be wuyak marnyaruhamtn hikrahmt. Na Kraisrhu mrokfom kfohemoahat, womhtet womhtet tohefm tohet yimam, womhtet womhtet boririfhut yakitohet yimam o tamoh ruheft ruhet yimampno yi tohmoahat, na be rroh yuhat fknihato tohmoa. Duka memoa, rroh ruhefm o tohefm tohakni hanyhato gutnius mrokfot watuhiruhanm, be wuyak marnyaruhamtn hikrahmt.  
\v 23 Na ndhtet ndhtet nefm namoahat, memoa ndar nom yakitohwa gutnius mrokfot kmi kmim awany bugamt, nd dukeftpno inji inji yimoa. Memoa awany bugakahtmt romi na nd Bro Nkifrar kfomo dborioh rhu nmbuhat rpat yak bugarahnomt.   
\s1 Niko praiskfot yakneft dukahato tone tmbhoyuk makkfot hti hti tonekfot  
\p
\v 24 Niko htiyeteko, yimam tone resiskfot tonitam, rpa yimarpar praiskfot kekwor. To inji kanjo niko nd tonita resiskfot watonekahkomt praiskfot yakrahko.  
\v 25 Yimar tone resiskfot yiyukr, ror bi wuri yihamn ror bi tur tone nhombra bonhombrakfot. Kto nd tone yihar ror mtohhato tonineft nhai wuram bmbri minysafhato buha msuh hasoruhatr. Bi tone nhombrayetrn nd tone resiskfot fnahnineft, nd resiskfot winhato praiskfot yakrahr. Nd praiskfot nom kfiwat ndt be ndar bbinysofthu toniyefthu praiskfoyet nhai rhu buhtaruhatt. Nd praiskfot nom Kristennom dukewat yakneft, ndt nhai finji naruhatt. Nd praiskfot be inji rhu nkifraniraht.  
\v 26 Ndnetann na tu tonita yimam kanjo nhai na rihti ahti hanykaha o mongko yiho hti thu tanykaha. Nhai. Nanhu dukefr, nanhu nyingam makkfot hti hti tonita. Yo boksam nnewa kanjo tirt tutahat nhai yi furakaht.  
\v 27 Nhai. Bi tukann tukanhu yatit tukanhu tirm yak kufhahato tananh bonanhhato yatit bi tattewut. Kto wommpno nnahato womroh tirm yak kufhahato tananhneft nhai yironakhato suhrhota. Nanhu toheft to be inji kanjo tohwant. Nanhu tohefm, nanhu wiyauyau nmbuham, nanhu pthefm duka hik marnya bomarnyahato tohkfot. Na wofnkaha gutnius mrokfom womrpam hehato romrpamn praiskfot yakkfot. Ndnetann nanhu tir wuram, nyingam, yimbhindangm, yima yuhum, tamohm na tukann yak hta bohtahato praiskfot yakkfot.   
\c 10  
\s1 Tahi yifonm kfo bruttna duha  
\p
\v 1-2 Bar yinouroko, kanga wadukaf hanyswakomt nmoh nkifram, Mosesrpno nungur tik furat yau fnahmo yuhathu tndht. Rom yimohat, Mosesrn tohakmotr Isrerm rom be Mosesr hikmoum. Yura Bro Nkifrar htamort gribfat. Ndtn yura hir hanymoatt yimam ndtn wuhtiyakhany wuhtiyakhany fau hikmoum. Nd gribfatn hanymotm hanymotm Retsi barit fau hayukni marnyamomt. To nd tndht tfit ariharhof mrokfot to tfit finji kfiwatt? Yimam Mosesr hik hanyhato gribfathu yinhit yau hanymohat yo Retsit yau hayuknimohat, ndt nom Jisasr hikhato baftais yekwa kanjo inji yimot nd tndht.  
\v 3 Nd yima rifhur yimor, yura moun yuhat yiha yiha yawihnamoa bretpam yak hutuhahato fi hanymoum. Ndm Bro Nkifrar thu brurhemoatrm yakhato famoumm.  
\v 4 Yo rom ye habrimoa bupam nhaf inji. Bro Nkifrar kfomoatr bu rifhut harhumoa bu tahis rpat yimampno yi htfasmoatt ndtn bupam yakhato famoum.\f + \fr 10:4 \ft  (10.4) Mosesr tahis tathato bupam yakmo yuhat, hus gonborngfn kfo tndhmoft. Wom tndh kfot korht Kisim Bek 17.1-7 yo wom tndh kfot korht Namba 20.1-13. Judam nd hus bukf kfo tndhmo tahishu mrokfot htimohat, rpa tahishu tndhrpat kfomof. Nd tahis Isrerm fitoh fitoh tkitm yimoahat nd tahis rpat yimoum.\f* To nd bu tahis yimampno yi habrimoate tu tahi mift yi habrimout o frohmn kfo nhombriwat? Nd bu tahis Kraisr kfo nhombrewut. Kraisrn hik htfasmourm rom yimoa tkitm.  
\v 5 To nd yima rifhur nd nungur tik furat yau fnahmoroh nefm Bro Nkifrar nhai hti wofn hanyrmoarm. Ndnettn tu bro rifuhetr buha nungur tik furatn noh wurasohmotm htanimomm.   
\p
\v 6 Nd Isrermpno rhumo nefm ndm be kfo nhombra mrokfoyem. Nom rroh tndh mrokfom mhtiyakhato nom yima yuhum yakhato nom nhai rom namo kanjo yima yuhum sinyahato fasoh nefm nakfot.  
\v 7 Yo mirahko rom namo kanjo nkifra tahi yifonm yeshri mhtahihato kfo tatonomm. Bro Nkifrarhu rfa borngt kfo kangt, “Rom rhuhato nd tahi yifonr htayuk yemro burwat ye yehato yo drin spakmomn met yindarim sinyahato tir mniyaknihato grhahato nd tahi yifonr grha yindhormomr.”  
\v 8 Nom mejuha rom namo kanjo metm wom yimampno waiswako yo yindarim wom metmpno waiswako. Rom inji namomn yonmari 23 tausen met yindarim be rpa marrn bafinat yimom.  
\v 9 Yo mirahko aduka amanyom, “Fasoh nefm naruhanomn afo htirahnom Kraisr finji naruharnom.” Mirahko inji ananom. Rroh womm inji namotm nandomm wasmotmm nohmom. Nd gnngr yakitoh hanykfot.  
\v 10 Yo mirahko gutnius mrokfot kfohayuk tohak yimam wom tamoh kfo hutt mrokfom akfonomm. Rroh womm Moses Aronrofpno kfo huttmohat nhai rhurmom. Noh yafothat hatohyuk mounmotr fukatohmotrm noh wita bugamom.   
\p
\v 11 Nd bingot tohmo nkiframpno ndhtet ndhtet nefm rhu hnamom, ndm nmoh ariharhof yak duka tungunayuk nefmn yimam Bro Nkifrarhu rfa borngtn wandfa htamomm. Bi wuroh yiharhu yiham bi tohwanomn kfo dukayuk mrokfom wandfa htamomm.  
\v 12 Ndnettn wom Kristenr kfo kangr, “Nanhu toh nmbuhat awi hifa tohwoyann toh bmtewa.” To ndhtet kfet Kristenr, to tfit mirahr asuha.  
\v 13 Tamoh tamoh nefm o dukefm niahato nikmoh yima yuhum mtawastiwonwam, to mirahko ka womm ndhtet dukefm o nefm nhai yakkahmm. Nhai. Nd nefm yima yima kekwomm. To ndhtet nefm o dukefm nikompno rhunefm, niko finji duka duha, Bro Nkifrar toh tkafruhatrko, Bro Nkifrar tur bi kfoyuk mrokfom hikhato toh tkafhato yima yuhum thu bmtarahrko. Nhai tamoh tamoh nefm yak kasuhruhatmko.   
\s1 Nkifra tahi yifonmi Bro Nkifrar rpat yakitohhato kfo bruttna duha  
\p
\v 14 Ndnettn niko nanhu dborioh yimatko kfiwanko, yimam kfo bruttniwa nkifra tahi yifonmpno brbo yi juha.  
\v 15 Niko htitanko, tamoh tamoh mrokfom kfoyukm awi kak nhtewukomm. Ndnettn nd na niko yahuka mrokfom wayak nhtatwakomm. Tu yafothet mrokfot kfiwankon o nhai?  
\v 16 Barkof mrokfot inji akfoyanko. Nd wain bupam yorhwa kafti yo bretpat, nd hus shrf nom kfo bruttna yindhornihato nayahukaf, ndf inji korhf: Wain bupame Kraisrhu kkupayem yo bretpate rorhu nmpayem. Nd hus shrf nom yekwanomn to be Kraisr yak nhafohwarnom kak hongmb hmbritrnom.  
\v 17 Nd rpa bretparpat niyak tif nhombrahato yewat, ndtn ar boknabok yimanom kak nhafohwotnom. Yak nhafohhato rpa thatipnom korhnom.  
\v 18 Niko nmoh nkifra Isrerm namoa neft dukewukomt? To inji kanjo kitt. Nmoh nkifra Isrerm Bro Nkifrar rim htahemoa nuwa rikat ye ttnamoahat,\f + \fr 10:18 \ft  (10.18) Wahtiko Wkp 7.6, 7.15\f* fitoh fitoh yimam nd altarpno rifinyukm, Bro Nkifrar kak hongmb hmbremourm.   
\p
\v 19 To tfit wadukakomt tahi rmonm rim htahuka nuwa rikathu ya nmbuhat. Na nhai kfo mekoha tahi rmonm rim htahuka yemrom wom nndoh ruheft korhm. Yo nhai kfo mekaha tahi rmonmn tom tu yafothetm.  
\v 20 Nhai. Nhai inji kfokaha. Na kfo kanga yima tangim yemrom yakhato tahi rmonmpno rim htewohat, ndm nndo Satanrhu hingrnet yakitohwa yafothamn rim htahukm. Nhai tu Bro Nkifrar rim htahekahm. Yo nhai wofnkaha niko nd Satanrhu hingrneft yakitohwa yafothampno rhuyuk tamoh tamoh nefm fknekfot.  
\v 21 Nhai niko Bro Nungothetrhu kafti Satanrhu hingrneft yakitohwa yafotharoh kaft rpat yakhato yakfot. Yo niko nhai Bro Nungothetrhu teborti Satanrhu hingrneft yakitohwa yafotharoh tebort rhuhato nuwa yakfot.  
\v 22 Nom Bro Nungothetr yakitoh hany tfit mano wom tirtn tfit tahi rmonm yakitoh hanyneft, ka be yuwi kangnom, “Bro Nungothetr anamburrnom.” Ka nmoh namburefti rorhu nambureft rpahtett?   
\s1 Bro Nkifrarhu yufarpat nom yiha yiha kfo yuta grha yindhorkfot  
\p
\v 23 Na nd bi barkof kfoyuk mrokfot tfit kfiwanko. Womm kfo kangm, “Mrokfo duhatenom tamoh tamohroh finjina finjina nefm. Nhai wom kfo rafo mrokfot rhukahtnom.” Tmift, to mirahko ka nd tamoh tamoh nefm ka be na fura bofurahato hifa hifa rhu nmbuhat yakrahnom. Nhai. Kfo kangm, “Mrokfo duhatenom tamoh tamohroh finjina finjina nefm.” Tmift. To mirahko ka nd tamoh tamoh nefm ka be na fura bofurayukmn wom Kristenm htineft hifa toh bmtarahm. Nhai.  
\v 24 Tamoh tamohroh naneft mirahko tuko dukahato tamoh tamoh nefm be ana fura bofurakninomm. Womm dukaf hanyhato tamoh tamoh nefm nakfot. Womrhu nyingampno ni wom neft na thombat, womr hti marsisahato toh bmtarahr o finji naruhar? Ndhtet dukefm yakkfot.   
\p
\v 25 Tamoh tamoh yeshrim maket htayukm niko wiknahato ye fura bofurakfot. Mirahko bok dukefm yakhato tfit nd yemroparoh niayuk yuhat nakfo ttiwon hiknomt.  
\v 26 Bro Nkifrarhu rfa borngt kfo kangt, “Ndar bbinysoft Broruhet. Yo nd bbinysoft harhuwa tamoh tamoht Brorparuhet.”   
\p
\v 27 Yo tfit wom mrokfot kfo dukewanko. Jisasr hik duha yimar kfekworn rorhu kunyshu nuwa yanyeft, yo ni kangn aiya, mirahn bok dukefm ayaka ror htayuk yemroroh yanyeft. Tamoh yeshrim hter, be ye fura bofurakfot. Tfit kfo ttiwon me juha, “Ndar yeropame, fitha yakmokomm?” Inji tfit kfo ttiwon hik duha.  
\v 28-29 Be yimar yemropam htihato yimako hti yo yemropam hti inji hti hasohato kfo ttiwon kangrko, “Nda tahi yifonmpno htayet yemropame yakhato keswanhiwokomm?” Bi ndhtet mrokfot wanukomt, to be mirahko nd yemropam ayanomm. Yerahkomm, nd kfo nuhasyuk yimarn kfo mirahr, “Tamohmpno nd yimam bi tahi yifonmpno mhtayet yemropam tfit yewamm? Ndt fasoh neft newum. Na nhai ndhtet yemropam yarfota.” Ndnettn nd kfo nuhasyuk yimarhu yima yuhur dukahato nd yemropam ye juha.  
\p Nikmoh womm kfo mirahma, “Nd ror kfo pthiwa mrokfom tur kfo ptha mmbrafinyworm. Frohm wanyhiruhamr? Nom, nom tunmoh dukeft hikrahnom.  
\v 30 Nd tahi yifompno htayet yemropam Bro Nkifrarpno kfo bruttna yindhornihato be ye furarahnom.”   
\p
\v 31 Bro mrokforpat kfiwanko, nd yemrom htihato nikmoh yima yuhum finji dukahato kangko finji ananom afo dukakfot. Niko nd neft na thombat, yimam htihato Bro Nkifrar kfo yindhorrahmr o nhai? Nd dukefrpat mdukakhato ee btn tamoh nefm nakfot.  
\v 32 Tamoh tamoh nefm naneft afo mdukakkfot, wom Juda thofr tohhany nom nd neft na thombat finji dukaruhar o Grik thofr tohhany o sioshu wom yimar o mett tohhany nom nd nefm nanefm finji dukaruham? Ndhtet dukefm afo dukakfot. Mirahko wom tamoh nefm ana nhehkahtnomm womm nd nefm nahato asuhm.  
\v 33 Na tohwa toh yuhatn toh hikkfot. Na kanga yimam o kmi thofm ahti yindhorma, nanhu toh yuham yo nanhu nefm to be rroh yuhatn hikkfot. Kanga, inji tohhato Bro Nkifrar tfit yakrahrm.   
\c 11  
\p
\v 1 Kraisr yorhwa ruheft na htiyakhato nd yuhat korh hikwa. Niko tfit na yorhwa ruheft htiyakhato nd yuhat warhu hikko.   
\ms1 Bro Nkifrarhu Yafothat yahuka hingrna dukefmi yo tu Kristenroh tamoh tamoh rifiny yuharoh mrokfom Porr kfo pthamor  
\mr (Sapta 11—14)  
\s1 Mfharoh kasi yuharoh mrokfom Porr kfo pthamor  
\p
\v 2 Na kfo yindhorwanko. Na nhai duka mmokahkma. Dukiwakomn na kfo hayuk mrokfom kak hikwokomm.  
\v 3 To tfit kanga wom kfo nuhas mrokfot akfo nuhasanko. Kraisr hikwa yindari bugam tu Kraisrn mfhako mtohekwarn turn kak hta bohtewurm. Yo mett nhaf inji. Tuthu ramemrn mfhako mtohekwarn mett kfo hta bohtewurt. Yo tfit Kraisr nhaf inji. Bro Nkifrarn Kraisrhu mfhako mtohekwarn Kraisr kfo hta bohtewurr.  
\v 4 Ndtn kanga akfo nuhasanko. Wom yimar kangr mfhat kasihato bro lotu swirm kfo bruttnayan o wom mrokfom Bro Nkifrar hayukm kangr nd kongrigesenkfot akfo nuhasanm, nd yimar be tur tfit kak yimtnewur. Metroh mfha kasiyeft tfit kak hikwor. Metroh nefrpayet mfha kasihato lotu swirm kfo bruttnakfot o Bro Nkifrar hayuk mrokfom kfo nuhaskfot nd kongrigesenkfot.  
\v 5-6 Yo mett mfhat tohyuk kasi that yak thuhato brioh mfha furat tohhato bro lotu rifiny swirm kfo bruttnaneft o Bro Nkifrar hayuk mrokfom kongrigesenkfot kfo hanyeft, kangme yindarir tohwor. Ka kangt yindarim kanjo atohane, to be rothu tmars yohhato bijis rhukfot yindariroht kanjo. To nhai. Nhai inji naruhatt. Inji naraht to be tut bro yimtneft yakraht. Ndnettn mett bro rifiny swirm tohhato kfo bruttnaruhan o Bro Nkifrar hayuk mrokfom kfo ptharuha, nd metthu mfhat kasi thett mfhat rhukfot.  
\v 7 Yindarir myorhekwor. Bro Nkifrar yorhwa ruheft rhu hikwor yo rorn bro yufat kahukrr Bro Nkifrar. Ndnettn rorhu mfhat brioh kasi tha duhatt rhukfot. To mett, rot yindarir bro yufat kahukt. Ndnettn rothu mfhat kasi thett rhukfot.   
\p
\v 8 Bro Nkifrar yimar barkof hingrnamohat nhai metthu kkrespir yakhato hingrnarmorr. Nhai. Yindarirhu kkrespir yakhato mett hingrnamort.  
\v 9 Bro Nkifrar nhai mett dukahato yindarir hingrnarmorr. Nhai. Yindarir dukahato mett hingrnamort.  
\v 10 To ndnatn mett bro lotu rifiny swirm tohhato kfo bruttnaneft o Bro Nkifrar hayuk mrokfom kongrigesenkfot kfo ptha nuhas hanyeft mfhat kasikfot. Mfha kasiyet mett bi yufayett bro rifiny swirm kfo bruttnaneft o Bro Nkifrar hayuk mrokfom kongrigesenm kfo ptha hanyeft. Mounmotm mfha kasi that hti nhtaruhamn duka mirahm, awi nd mett rifiny swirroh kfo bruttnaneft o Bro Nkifrar hayuk mrokfom kfo pthaneft bi yufayetet.   
\p
\v 11 To arihat Kristen mett nhai rot tut tohkahtt rothu toh nmbuhat yo Kristen yindarir nhai ror tur tohkahrt rorhu toh nmbuhat. Nhai. Mett yindarirhu tohnhoyuk toh tamnou metet yo yindarir metthu tohnhoyuk toh tamnou yindariyer.  
\v 12 Bro Nkifrar mett hingrnamohat, yindarirhu kkrespir kfomor mett mfnahmot. To tfit ndar bbinysoft, arihat mett kfiwut ndar bbinysoft yimett korht. Tu Bro Nkifrar bi inji hingrna nhtamorm ndhtet ndhtet yihotam.   
\p
\v 13 Niko tukomn nd mrokfot wayak nhtakomt: Mett mfha kasi duha tohhato bro lotu rifiny swirm kfo bruttnaneft ka dborioh nefet?  
\v 14 Nom yimanmoh htiyeftn hti kangnom, yimar yuke bro tmari hatohetr faso korhr. Tfit metm kanjo tmars hatohwort.  
\v 15 Mett yuke tmars hatohneft ndt hifa. Yuke tmarim metroh wondhet. Bro Nkifrar bi inji kfo hta memor, “Yuke tmarim rroh mfharoh kasiyukem.”  
\v 16 To nd na kfo hawihne mrokfom fitoh yimar wanyhato rorhu yima yuhur nhai mikmbrekahr, nd yimar adukatwar, nomi Bro Nkifrarhu siosroh met yindarim nhai wom fitoh yuhat hikkahm. Nom buga be nd na kfiwa mrokfo yuharpat hikwonom.   
\s1 Bro Nungothetrhu bretpati wain buparoh ye yuhat Porr kfo ptha nuhasmorm Korinm  
\p
\v 17 Tfit wom kfo hta mrokfom kfo ptha hta nuhasruhanko. Na nikmoh rifiny yuharoh mrokfom wanymohat nhai wany yindhorrmoya. Niko Kristenko rifiny shombat, nhai mekahko, “Be rpat rifiny marnyarahnom.” Nhai.  
\v 18 Barkof mrokfot na kforuhat, wanyakmoya kfo memoma niko Kristenkmoh rifinyneft rifinyhato Bro Nungothet Jisasr ya nyuhas tanymo yeshrt dukakhato tfit niko rifinyhato nd yeshrt htahato ye shombat, tuko nnakfo nna nnakfo nnewakomn nafrtndohwoko. Womm rom nndo, yo tfit womm rom nndo. Inji inji nayak nhtewuko. Na inji wanyakmohat nanhu dukeft duka memoya, ka nd mrokfot tu kfoyet.  
\v 19 Tukmoh toh nmbuhathu nahti nhombraneftn, kangko, “Nafrtndohkahnomn htirahnom fitoh yimamn tu hik mif mifwamr Bro Nkifrar.”  
\v 20 Niko tuko Kristenkmoh rifinyneft rifinyhato nd Bro Nungothet Jisasr ya nyuhas tanymo yeshrt niko tfit ye dukaneft rhu rifinyhato ye shombat, nhai nd yeshrthu tu ye yuhat yak hik marnyakahko.  
\v 21 Wom yimam yeshrim hanitwohat, be yudbat mhta thuhato yudbat nd yeshrt yakhato kiyefiwumt. Nhai womm gariyakhato wommpno rpat nayak nhtahato yekahmm. Nhai. Womm yewamn tfit womm yatinoht korhm. Wain bupam nhaf inji womrohm tum mhtahato yeyehato spakwom. Nhai wommpno nayak nhtakahmm. Nhai womm hti dukaf hanykahkomm. Ndt nhai tu dborioh nmbuhat nakahko.  
\v 22 Kangane ka nhai kuny juhateko tukmoh kunymn yeshri ya yo bupa ya inji naneft? Ndnetkomn tfit nd Kristenroh rifinyhato yeyuk yeshrt rpa yimakomrpakomn yudbat kiyefiwukomt? Bro Nkifrar hikwa Kristen yimam niko ka nhai duka mikahko ndhtet yimam Bro Nkifrar kukatohworm? Ndnettn yeshri duha yimapam niayukm ke hatitohefiwukomm. Inji newatkomm tfit tum yimtnewum. Finji kangko akfoyanko nd niko niwa neft? Ka akfo yindhoranko? Nheno. Nhai kfo yindhorrhotanko nd niko niwa neft.   
\s1 Nungothet Jisasr hemorm disaiperm bretpami wain bupam  
\r (Matyu 26.26-29 yo Mak 14.22-25 yo Luk 22.14-20)  
\p
\v 23 Nd bretpa wain bupa ye yuhathu mrokfot na niko kfohemot, Bro Nungothetrpno fakmoyant. Nd mrokfot inji kfomot: Bro Nungothet Jisasr hndhnamo yifungrn turhu disaipermpno nuwa famom. Bretpat yakmortn,  
\v 24 Bro Nkifrar wuyak nuhasakhato kfo bruttna yindhornimorrn fak tif botifmort. Yak dbif rmonnihato kfo memorm, “Ndar na yak dbif rmon bretpam nanhu nmpayem, nikmoh yak marnyayukem. Wadukakahkma wayetwakomm.”  
\v 25 Bretpam yenyihato tfit wain kaft wafakmort. Wayakhato nhaf Bro Nkifrar wuyak nuhasakhato kfo bruttna yindhornimorn kfo memorm, “Ndar wain bupam nanhu kkupayem. Na nohhato nanhu kkut yohniruhatt fasoh fasoh nefm wayaknirahm. Ndar wain bu kaft tfit niko yekwat, nd nfri dfa tik yuhar hingrnaruha hingrnefet. Kto na nohhato nanhu kkut yohni thombat nd kkupamn nd nfri hingrneft be yak dbkafrahtt. Yiha yiha wain bupam yenyeft tfit wadukak hanyswakomt nanhu kkut yohniruha yuhat.”  
\v 26 Ndnettn niko yiha yiha nd bretpami wain bupam yewohat, ndt kak nuhas hany kangko nikmoh fasoh fasoh nefm bi Bro Nungothetrn fak wus bowusmorm. Nd neft be inji nahany nahanykahkomtn kto Jisasrhu nia yiha miyak htanirahkomt.   
\s1 Nikmoh yima yuhum yak nhta marnyahato ee Bro Nungothetrhu yeshrt rhunhohato yakfot  
\p
\v 27 Ndnettn fitoh yimam kangm, “Be yeshri furam yewa kanjo wom dukefen duha be aye fura bofuranomt,” nd yimam mrokfetm rhurahm. Nhai Jisasr nohmo yuhat mduka hikakhato nd bretpami wain bupam yekahmm.  
\v 28 Yimar afo tur duka hik marnya, tu hifa hifa korhr, ee btn nd bretpami wain bupam yak yakfot.  
\v 29 Yimar nhai Jisasr nohmo yuhat mduka hikakhato ke fura bofurewurt yeshri furat kanjo, nd yimar be mrokfetr korhr.  
\v 30 To nd ye fura bofuraneftn nikmoh bokm rhu kriyohtewum yo wadbohna thu wadbohna thunewum, yo bokm bi noh wurasohwom.  
\v 31 Be tunom nd yeshrt duka hik marnyahato ayanomt, nhai ndhtet nefm rhurfotmnom.  
\v 32 To nd nefm Bro Nungothetr newohat, hifa ndhtet nefm newurnom. Rorhu dukeft duka kangr inji anakahtanm dukefm yakruhamn dborioh nefm hikrahm. Dborioh nefm hikhato kto nohneft nhai fasoh nefm nayet yimampno hel yiruhatm.   
\p
\v 33 Ndnettn, yinouroko, nd Bro Nungothetrhu yeshrt rhuhato yanyeft, afo narhukatohak narhukatohak marnyakfot. Bi mfnah bugeme ee btn rpat rhuhato rpat yakfot.  
\v 34 Wom yimar yudbat yatinoheter, duka kangr womroh rhu gari hatohneft yudbat yatinohruha, ee ndhtet yimar bi turhu kunyko ye bmtanehato niakfot nd rifiny swirt. To rorn yudbat yatinohakhato ror yudbat mirahr ayeya, be nd rhu rifiny swirt rhuyuk yimam mrokfetm rhurahm. Nd wom wom kfo nuhas mrokfom kto tuka nieya nikmoh htit ee nd yiha kfo nuhas marnya bomarnyaruhanko.   
\c 12  
\s1 Bro Nkifrarhu Yafothat yahuka wonk wonk hingrna dukefm  
\p
\v 1 Kfo ttiwonmokma Bro Nkifrarhu Yafothatpno hingrnayet yimaroh hingrneft. Bar yinouroko, mirahko ayak mmonomt rorhu Yafothat hingrnewa yuhat.  
\v 2 Niko bi tuko htiyeteko, niko afo Bro Nkifrar hikhna duha tohhnamohat, nd tng ptha duha tahi rmonm tohyuk yifonmn nndo nndo yak hatohafomoatmko nikmoh yau nmbuhat faso yimot.  
\v 3 Ndnettn kanga wom mrokfom akfo nuhas marnyayanko. Bro Nkifrarhu Yafothat yak hatohet yimarhu mrokfom kfo pthaneft, nhai kfo towa miruhatr, “Jisasr kaht aiswar.” Bro Nkifrarhu Yafothat yak hatohet yimar kfo mirahr, “Jisasr Bro Nungotheter.”   
\p
\v 4 Nndohtet nndohtet hingrna dukefm yimam yakitohwam, rpa Yafotharpatn nd nndohtet nndohtet hingrna dukefm kasinya hakuttm.  
\v 5 Yo nd nndohtet nndohtet hingrnefm yimam yakitoh hakutam, nhaf rpa Bro Nungothetrhu hingrnefrpat hingrna hakutm.  
\v 6 Yo nd nndohtet nndohtet hingrna yuham hingrnewam, to rpa nd Bro Nkifrarpar nd hingrna dukefm kasinya hakutatrm Kristen bugam hingrna hakutmm.  
\v 7 Nd nndohtet nndohtet hingrna dukefm yima yima hingrna hakutam, sioshu rhu marnya nmbuhat dukahato yima yima bi Yafothat thu nawohhato kahukattm nndohtet nndohtet hingrnefm hingrnewum.   
\q1
\v 8 Womr Bro Nkifrarhu Yafothat kasinya hakuttr sioshu tuhan yindariroh yak hta bohta marnyaneft.  
\q1 Tfit nd rpa Yafotharpat womr kasinya hakuttr Bro Nkifrarhu mrokfo yimbu yuharoh kfo nuhas hik bohik marnyaneft.   
\q1
\v 9 Yo tfit womr nhaf nd rpa Yafotharpat kasinya hakuttr Bro Nkifrarpar rorhu bro dukefm yinyeft.  
\q1 Tfit nd rpa Yafotharpat womr kasiny hakuttr dbohnefroh yak marnyaneft.   
\q1
\v 10 Yo tfit womr mirakerkfothu hingrnaneft kasinya hakuttr.  
\q1 Womr Bro Nkifrar hayuk mrokforoh kfo pthaneft kasinya hakuttr.  
\q1 Womr nndohtet nndohtet yafotham yimam fknihato mrokfo kfo pthiwaroh yak nhtanefthu dborioh dukefr kasinya hakuttr.  
\q1 Womr wom nndoh yarmumaye Bro Nkifrarpno kfo bruttnayuk yarmuma pthaneft kasinya hakuttr.\f + \fr 12:10 \ft  (12.10) Tu nd yimar wom yarmumaye kfo bruttnayukr nhai ror kfoyuk yarmumat wanykfot. Bro Nkifrarhu Yafothatn kasinyahato kfoyet mrokfomn ndnettn nhai tu yima mifr wanykfot ror kfo pthayuk mrokfom.\f*  
\q1 Tfit wom nndoh yimarn womr kfo bruttnayuk mrokfom Bro Nkifrarhu Yafothat kasinya hakuttr tfitn kfo kekutneft.   
\m
\v 11 To nd rpa Yafotharpat nd yima yimam nndohtet nndohtet hingrnefm he nhombra hanittm. Tu nd Yafothathu hti duka fijo womr kasinyewutr wom hingrneft yo tfit womr wom hingrneft kasinyewutr. Inji he nhombra hanittm.   
\s1 Yima yima buganom yimar hatohwa tir, wura, mfha, nd ndenom  
\p
\v 12 Yimar rpayer. Nd yimar hatohwa tir, wura, mfha, nd tamoh tamoht boknambokem. Nd shrkar yimar hatohwar nhai rpa hingrneft hingrnakahm. Nhai. Nndoh nndoh hingrnefetem. Nd nndoh nndoh shrkar rpa yimar rhuhato hingrna nhombrewumm nndoh nndoh hingrnefm. To Kraisrhu hingrneft to inji kitt. Yimar rpayer. Nd yimar hatohwa tir, wura, mfha, nd tamoh tamoht boknambokem. To Kraisrhu yon kunys to inji korht. Rorhu yon kunys rpayet. Nd yon kunys yorhwa yimam boknambokem.  
\v 13 Nom Kraisrhu yon kunyshu yimanom nhai rpa kmithunom o rpa rhu nmbuhat ruhetnom hikkahnomr. Nhai. Nndoh nndoh kmiyetenom yo nndoh nndoh ruhefetenom. Nmoh womm Judayem yo womm Grikem yo womm slefem yo womm nhai slef tohkahm. To Bro Nkifrarhu rpa Yafotharpatpno yima buganom baftaismotnom kangme bi rpa yima bugayer. Yo rpa Yafotharpat Bro Nkifrar htewurnom yima yimanom.   
\p
\v 14 Yimar nhai wurarpafn htihato kfo mikahnom yimayer. Nhai. Yuht wurasif bugat yo wurasift yorhwa tamoh tamohr yo yuht yima nyisof bugat yo yima nyisoft yorhwa tamoh tamohr yo mfhat yo mfhat yorhwa shrka bugar nd ndm hti nhombra bugahato kangnomr yimayer.  
\v 15 Wuraf sinyahato akfo amef, “No nhai tirf kanjo rhukahno. Ndnettn nhai yimar hatohkahrno.” Ndt ka tu kfoyet? Nhai. Nd wuraf to yimar hatohworf. Nhai rof ndhtet kfo hhrif mrokfot kfo pthakfot.  
\v 16 Yo yimbhindangaf akfo amef, “No nhai nyingaf kanjo rhukahno. Ndnettn nhai yimar hatohkahrno.” Ndt ka tu kfoyet? Nhai. Nd yimbhindangf to yimar hatohworf. Nhai rof ndhtet kfo hhrif mrokfot kfo pthakfot.  
\v 17 Be yukatohyuk nyingarpaf yimar aharhur, to tamohe mrokfom wanyrform? Yo yimbhindangrpaf yimar aharhur, to tamohe gbefr mthatirforr?  
\v 18 To hifa Bro Nkifrar turhu hti duka fijo tamoh tamohm hingrna hta nhombra bugamorm, yo hta fijo htihato hta nhombra bonhombramorm turoh rhuyuk tkitmn.  
\v 19 Be wurarpaf arhuf, to nhai kfo marifotnom yimayer. Nhai.  
\v 20 Yimar nhai inji rhukahr. Yimar tireter, wurayeter, yimbhindangeter, tngeter, tmarifayeter, nd ndeter. To nd shrkar yimar hatohworm. Kraisrhu yon kunys to inji korht. Rorhu yon kunys rpayet. Nd yon kunys yorhwa yimam boknambokem.   
\p
\v 21 Nhai nyingaf sinyahato tirf kfo merfotff, “Nifn tirfn arhu duha yifn no banuha rhu marnyarfono.” Yo nhai mfhat sinyahato wuraf kfo merfotf, “Nifn wurafn arhu duha yifn na turpeta banuha rhu marnyarfoya.”  
\v 22 Nhai inji nakfo nna nakfo nnahato nayak thukfot. Thatipt yorhwa tamohm nom htihato kfo yamuka, “Tamohmpno ndarm rhumom?” Nd kfiwa tamoh tamohm hingrna bugefetem.  
\v 23 Yo wom tkitm faso hti bebwom hmbresha duha rhuneft, tfit yimanomn hmbresham yakhato hmbre hutefiwunomm. Yo fitoh tkitm briyo rhuhato yimam htineft tham bbnarofwom, hmbresham yakhato hmbre hutefiwunom.  
\v 24 Yo nd wom wom tkitm be inji rhu furewum. To nd nd tkitm bi tu Bro Nkifrarn bi inji hingrna nhombra htamotrm inji korhm. Womm hmbresha duha korhm, womm wondhetm korhm.  
\v 25 Bro Nkifrar yimarhu thatipt bi inji rpat hingrna nhombra htamort. Memor, “Inji ahingrna hta nhombrakahtant nd nd tkitm nhai nafrtndohhato nahti marsisaruhatm. Tum nahti duka nahti dukarahm.”  
\v 26 Ndnettn wom fitoh tkitt kaut o ke nyrikewut, yuht yimar yironewurt nd ye nyrikeft. Fitoh tkitt bro yufat kekwot, yuht yimar yindhor bugewur.   
\p
\v 27 Niko Kraisrhu yima thatipeko. Womr tirer, yo womr wurayer, yo womr yimbhindanger.  
\v 28 Bro Nkifrar nndohtet nndohtet hingrnefm yakitohet met yindarim sios hta nhombramorm.  
\q1 Barkofm aposerm htamor.  
\q1 Yo tfit rompno Bro Nkifrar hayuk mrokfom kfo pthayukm htamorm.  
\q1 Yo tfit rompnonwe Bro Nkifrarhu mrokfo mna yuharoh kfo nuhas hik bohik marnyayuk yimam htamorm.  
\q1 Ee btn miraker hingrnayuk yimam htamorm.  
\q1 Yo dbohnefroh yak marnyayuk yimam,  
\q1 yo wom yimaroh hti dukayuk yimam,  
\q1 sios hingrnefroh yak nhtahato kfo hta bohtayuk yimam,  
\q1 yo nndohtet nndohtet yarmumaye kfo bruttnayuk yimam htamorm.\f + \fr 12:28 \ft  (12.28) Wahti 12.10 kfo nuhasyuk mrokfot.\f*   
\m
\v 29 Bro Nkifrar nhai marimor be aposer bugam tohrahm o profet bugam tohrahm o Bro Nkifrarhu mrokfo mna yuharoh kfo nuhas hik bohik marnyayuk yima bugam tohrahm o mirakerkfothu hingrnayuk bbukeft yak bugarahm  
\v 30 o dbohnefroh yak marnyayuk bbukeft yak bugarahm o wom nndoh yarmumaye kfo bruttnayuk mrokfot yak bugarahm o wom nndoh yarmumat kfo bruttnayuk mrokfom be yima bugam tohhato nd mrokfom tfit kfo kekutrahmt. Nhai. Bro Nkifrar nhai hingrneft inji yak htarmort. Yima yima nd hingrna dukefm he nhombra hanymorm.  
\v 31 Kangko, Bro Nkifrarhu Yafothat yahuka hingrna dukefm ayaknom, sioshu kasinya nnuhakniyuk hingrna dukefm mfro yakkfot.  
\s1 Wom met yindarimpno nayak marnyahato rpat tohkfot  
\p Bro Nkifrarhu Yafothathu kasinyewa nefm, rom hifa yakrahkomm. To tfit kfo nuhasruhanko tu toh marnya yuhathu tu bro mna mrokfot.   
\c 13  
\p
\v 1 Na ndar bbinysof thofm kfo bruttniwa wom nndoh nndoh yarmumatn o mounmotm kfo bruttniwa yarmumatn Bro Nkifrar akfo bruttnayanr, to nd na kfo bruttnayuk yimaya, nanhu tu yiro yima yuhurio nhai wom yima fura bofuram htihato yak marnya bomarnyakahanm, nanhu kfo bruttneft fipa duhatet. Nrwir frdbrango fura bofuriwa kanjo inji dbrango fura bofuriwa.  
\v 2 Yo na tohhato Bro Nkifrar hayuk mrokfom akfo pthayanm o Bro Nkifrarhu kafrohet kafrohet yima yuhum bi nann aharuhanm o rorhu mrokfo yimbu yuham akfo hik bohikanm o nanhu yima yuhur Bro Nkifrarpar rhuhato rorhu yufat yutahato kminysoft kfo tkrurhato nndo arim toht, rom nd nefm mrokfo duhatem, tmift nanhu tu yiro yima yuhurio nhai wom yima fura bofuram htihato yak marnya bomarnyakahanm, na tu be yima furapaya.  
\v 3 O nanhu yonmari yonmari wuss yakhato wuska duha wuska duha yimam ahiyan, o nanhu thatipt kahe kahe akandhi nohma, rom nd nefm mrokfo duhatet. Tmift nanhu tu yiro yima yuhurio nhai wom yima fura bofuram htihato yak marnya bomarnyakahanm, nd na nayuk dborioh dborioh nefm be yi furarahm.   
\p
\v 4 Yimar wom yima fura bofuram htihato marbitn htewurm, htirahnr womm finji naknerahmr ror nhai finjina finjinakahrm. Hifa yima yuhur hmbritrm. Yo ror nhai wom yimaroh marut o wuss htihato kfo yuhuwehkahr o kfo dabiny kfo nurkahr. Yo ror tamoh nefm nanefm nhai rorhu yufat tur kfo yuta hagrhakahrt.  
\v 5 Yo ror nhai wom yimam fasoh fasoh nefm yak nuhaskahrm o mrokfom kfokahrm. Yo nhai ror turpar dukakahr. Nhai ror tamoh nefm be yudbat namburaknikahr. Wom yimam rorpno finji naneft nhai rroh nefm tfit duka hanyhato thomna hanykahrm.  
\v 6 Fasoh fasoh nefm na haset yimam nhai hti yindhor hasokahrm. Dborioh nefm na haset yimam hti yindhorworm.  
\v 7 Womr sinyahato wom fasoh neft nerr, nhai yudbat rorhu fasoh neft mhtiyakhato kfo mikahr, “O be tmifa nd yimarpno tfit wom dborioh nefm naneft.” Nhai. Nhai yudbat rorhu yima yuhur bi inji yiyaknikahr. Nd yimarpno bi barkof tohhnayuk rofhu dborioh toh nmbuham mhtiyakhato to be rofhu dborioh toh nmbuhat be inji rhu yakitoh hanitwotf.   
\p
\v 8 Nd wom yima furaroh marbithu htaneft be inji rhu yakitoh hanyraht. Nhai minohniruhatt. Nd yimam sinyahato Bro Nkifrar hayuk mrokforoh kfo pthaneft minohniraht. Nhai wom rhuruhatt. Yo nd nndoh nndoh yarmumaye Bro Nkifrar kfo bruttnaneft minohniraht. Nhai tfit wom nndoh nndoh yarmumaye kfo bruttnaruhatmm.\f + \fr 13:8 \ft  (13.8) Wahti 12.10 kfo nuhasyuk mrokfot.\f* Yo nd Bro Nkifrarhu mrokforoh pthayuk bro riduka aduka yima yuhum, ndm nhaf nhai tfit yimam wom yak hanyruhatmm. Kto Bro Nkifrar nmoh rhu nmbuhat yak marnya bomarnyani thombat, nd nd nefm nhai wom rhuruhatm.  
\v 9 Nom ndar yiham tohhato Bro Nkifrarhu mrokfo yimbu yuham kfo nuhas hik bohikwohat, nom nhai Bro Nkifrarhu dukefm yorhwa yima yuhum bi yak bugahato frhik bugakahnomm. Nhai. Yo nom Bro Nkifrar hayuk mrokfom kfo pthiwohat, nom nhai bi Bro Nkifrarhu dukef bugam yak bugahato kfo pthakahnomm. Nhai. Be inji nmbuha nmbuha dukefrpam yakhato kfo pthewunomm.  
\v 10 To tfit kto, Bro Nkifrar tur duka htewa duka yuhatn nmoh rhu nmbuhat yak marnya bomarnyani buga thombat, nd tamoh tamoh duka nmbuham nom yakitohwam, be myafhonirahm.  
\v 11 Na afo yuhre yon mumena waruhakmohat nanhu ptheft, dukeft, htiyeft yon mumen rhut kanjo rhumot. Kto warhonimoya nd yonroh nefm mfafhonimoyanm.  
\v 12 Ariham Bro Nkifrarhu nefm nom htitwohat, nom be binasoht hti mmrtiwa kanjo rorhu nefm hti mmrtewunomm. To tfit ktone, ee tu Bro Nkifrarhu nyingatikt hti wutharahnomt. Yo ariham Bro Nkifrarhu dukefm frhikwohat, na be nmbuha nmbuham frhikwa. To kto Bro Nkifrarhu dukefm frhik bugaruhanm ariham ror na hti hik bugewa kanjo.  
\v 13 Husfirpa bro nefm rhu hanyrahm. Barkof husf, Bro Nkifrarn bro yima yuhum yihato rorn duka duka rhu gari hasoneft, ee wuroh neft, yima furaroh htihato marbitn htaneft. Nd husfirpa nefm rhu yakitoh hanyrahm. Tu bro neft, wom yima fura bofuraroh htihato yak marnya bomarnyaneft. Tot tu bro neft.   
\c 14  
\s1 Bro Nkifrarhu Yafothat yahuka hingrna dukefr  
\p
\v 1 Yima yak marnya yuk duka yima yuhurn niko dukakfot yakneft. Yo nd Bro Nkifrarhu Yafothat yahuka hingrna duka tungunefroh yak dukefr dukafot. To nd dukefr dukewunome, to afo barkoft profetm hingrnamoa hingrna dukefr, ndr barkofr yakkfot.  
\v 2 To yimam Bro Nkifrarhu Yafothatn kasinyahato wom nndoh yarmumatn mrokfom kfo bruttna thoft, nhai yima mifroh kfo hayuk mrokfomn bt yima mifm wanykfot. Nhai. Tu Bro Nkifrarpno kfo hayuk mrokfomn yima mifm wany mmotewum.  
\v 3 To profetm Bro Nkifrarpno mrokfom yakhato kfo pthiwa mrokfomn, yimam wanukwamn dukefm yakhato Bro Nkifrar myakitoh nnuhaknitm, yo dukefm kekwom yo nd mrokfom wanyhato yima yuhum bmtewumm.  
\v 4 Yimar wom nndoh yarmumat kfo bruttnewar, ror turn inji pthewarn tpi kekwor. To profetr Bro Nkifrarpno mrokfom yakhato kfo pthiwam, nd mrokfom sioshu yimam wanukwamn tpi kekwom.  
\v 5 Nanhu yima yuhur kanga wom nndohtet yarmumat kfo bruttnayuk yafothar wayak bugakahkomn wom nndoh yarmumatn wakfo bruttnako. To wom bro dukefr kanga Bro Nkifrarpno profetm mrokfom yakhato mrokfom kfo pthiwa kanjo mrokfom inji wakfo ptha htfasko. Yimar Bro Nkifrarhu Yafothatn mrokfo rifhur thu hmbrihato wom nndoh yarmumatn mrokfo ptha sinyaneft rot hifa, tmift nd mrokfot kfo kekut yimar tohhato kfo kekutkfot. Wom yimarm mrokfom kfo kekutruhatrm tuhant yindars mrokfom wanyhato tpi yakrahm.  
\v 6 Bar yinouroko, nd na kfoyuk mrokfom waduka hik marnyatwakomm. Na wom yiham nikompno niahato wom yarmumatn na kfo bruttneya, to nd na kfoyuk kfo bruttna mrokfom finji naruhamko? Na Bro Nkifrarpno yakyuk kafroh mrokfom kfoheruhanko hifa. O Bro Nkifrarhu mrokfo yimbu yuharoh mrokfom kfo nuhasruhanko hifa. O Bro Nkifrarpno yakyuk kfo hta bohta mrokfom kfoheruhanko hifa. O Bro Nkifrarhu yuhat kfo boririfhu nuhasruhanko hifa.   
\p
\v 7 Tng duha shrkam, akfonom yirofinym dbint, nd yirofinym dbint yimam yakhato nhai tu yirofinymt yakyuk windohm windohkahm, to yimam finji wany miruham yirofinymt windohwot?  
\v 8 Yahrt yiyuk tanmbar nrwir nhaf inji. Yimar guryukr tu tanmbar nrwir kanjo gur hta marnya duha yirahrr, womm finji wany hikruhamn kfo miruham yahrt yiyuk nrwiyer?  
\v 9 Niko to inji. Bro Nkifrarhu Yafothatn niko kasinyahato wom nndoh yarmumatn kfo bruttnaneft, womm rhu wanyukm to finji wanyruhamm nd niko kfo pthayuk mrokfom? Mrokfom wany mmotarahmm.  
\v 10 Wom mrokfot tfit kfo ptharuha. Ndar bbinysofthu kmi kmim nndoh nndoh yarmumat kfo pthewum. Rpa yarmumat kfetm rom turoh mrokfotn mrokfom nakfo pthahato nawanukm.  
\v 11 Wom yimar nanpno niahato turhu yarmumatn kfo pthahato na nhai wanyrfoyanr. Kfo mirahr no wom nndoh nndoh kmi thofeno.  
\v 12 Nikmoh yima yuhum kekwanko, kangko Bro Nkifrarhu Yafothathu kasinyewa nefm ayaknom. To nd dukefetekone, sioshu tpi heyuk yafotham yakkfot.   
\s1 Nndoh nndoh yarmumathu kfo bruttna yuham  
\p
\v 13 To nd nmbuhatpno kfo kanga, yimar wom nndoh yarmumaye kfo bruttnayuk mrokfot Bro Nkifrarhu Yafothat kasinyewutr kfo pthaneft, nd yimar tfit Bro Nkifrarpno akfo bruttnakahtr Bro Nkifrar tfit wom yafothat hirahrr, nd tur kfo bruttnayuk mrokforoh kfo kekutyuk yafothar.  
\v 14 Tfit akfo nhombraya. Na wom yarmumatn akfo bruttnaya, nd na kfoyuk mrokfom nhai na yimayanhu dukefr rhuyuk mrokfom kfokaha. Nhai. Mrokfom be tukanhu yafothatn mhfnahnewutm.  
\v 15 To ndnettn finji narhoya? Na kfo bruttnaneft, rot yafothat htayuk mrokfom kfo bruttnaruha, to tfit yiro yima yuhur rhuyuk mrokfom kfo bruttnaruha. Yo windohneft nhaf inji. Yafotha htayuk windohyuk windohefm mfnahrahm, yo yiro yima yuhur rhuyuk windohroh windohefm windohruha.  
\v 16 Be yafothat htayuk mrokforpam Bro Nkifrar kfo bruttna yindhorrahnr to finji nd yiro lotu swirt rhuyuk yimam wany hik hanyhato wuroh yak dbkafyuk mrokfom miruham, “To be inji?” Wom nndoh yarmumatn mrokfom kfo bruttna hanyetmn yimam nhai wany hik hanyruhatmm.  
\v 17 Nd ni kfo bruttnahato kfo yindhoryuk mrokfom hifa kfo yindhorrahnm, to mirahn ka wany yindhorhato tpi yakrahm. Nhai.  
\v 18 Na Bro Nkifrar kfo yindhorwanr, nanrpaya wom yarmumatn kfo bruttna hakuta, niko nhai na kanjo wom nndoh yarmumatn kfo bruttnakahko.  
\v 19 To na sioshu bro lotu rifiny swirm yinyeft, be tirfa mrokfo nmbuha marnyam, tu yimam wany hik marnyiwam, ndrpam kekwa. Kanga wom nndoh yarmumathu yonmari 10 tausen mrokfo nmbuham yakhato kfo pthiruhanm, yimam nhai wanyhato yima yuhum yakruhatm.   
\p
\v 20 Bar yinouroko mirahko yon mumenroh dukefm kanjo nikmoh dukefm arhumnom. Tu bro yimaroh dukefm kanjo rhukfot. Fasoh fasoh nefroh nanefm yon mumenm kanjo inji rhu mmokfot.  
\v 21 Bro Nkifrarhu boririfhu mrokfot kfiwut,  
\q1 “Bror kfiwur, ‘Wom nndoh yarmumat kfet yimam kforhota  
\q2 romn yihato wom nndoh yarmumatn nanhu yon kunys mrokfom kfo pthahirahmm.  
\q1 To nhai wany yakioruhatm.’” \rq Ais 28.11-12\rq*   
\m
\v 22 Ndnettn yimam Bro Nkifrarhu Yafothat kasinyahato wom nndoh yarmumatn kfo bruttna thombat, ndt nhai Bro Nkifrar bi hiket yimaroh yak nuhasyuk hingrneft rhukaht. Nhai. Ndt Bro Nkifrar hik duha yimaroh yak nuhasyuk hingrnefet. Tmift profet kanjo Bro Nkifrarpno mrokfom yakhato pthaneft, ndtne bi Bro Nkifrar hiket yimaroh yak nuhasyuk hingrnefet, nhai Bro Nkifrar hik duha yimaroh yak nuhasyuk hingrneft rhukaht.   
\p
\v 23 Ndnettn niko sioshu tuhant yindars rpat rifiny bugahato wo nndoh nndoh yarmumamn mrokfom kfo bruttnarahkomm, nd Bro Nkifrar hik duha yima furam fknenihato wanyruhamn kfo mirahmko, “Mmohato mrokfom wom yarmumamn kfo bruttna mumiwum.”  
\v 24 To niko nd profet mrokfom rifiny swirtn ptha hasetkomn nd Bro Nkifrar hik duha yima furam nd niko rifinyyuk kunyr rim fknenihato nd profet mrokfom wanumm, nd mrokfomn tafont htarahmm rroh nefm.  
\v 25 Rroh fasoh fasoh dukefm, rhu kafrohyukm, Bro Nkifrar tafont htaruhatrm mtabokme rmonhato nyingatikm yohniruhamn Bro Nkifrar naku kforahm. Bro Nkifrar nakuruhamn kfo mirahm, “Dajohmn, Bro Nkifrar tohnho mifworko.”   
\s1 Lotu yiharoh hingrnefm hingrna hik marnyakfot  
\p
\v 26 Bar yimako, ndnettn niko lotu yiha rifinyhato lotuneft inji nakfot. Womr windoheter, rorhu windoht windohkfot. Womr kangr Bro Nkifrarhu mrokfo yimbu yuharoh mrokfom akfo nuhasanm, ror sinyahato kfo pthakfot. Womr Bro Nkifrar wom mrokfom yahutrr kangr nd mrokfom womm akfo nuhasanm, ror nhaf sinyahato rorhu mrokfom kfo pthakfot. O womr wom nndoh yarmumatn kangr akfo bruttnaya, ror sinyahato kfo bruttnakfot. Yo womr Bro Nkifrar nd kfo bruttna mrokforoh kfo kekutyuk yafothar yahutrr kangr apthaya, be tfit rorn sinyahato nd womr wom yarmumatn kfo bruttnayuk mrokfom rorn tfit kfo kekutkfot. Nd tamoh tamoh nefm niko nayukm, sioshu met yindarim htiruhamn yo wanyruhamn tpi yakrahm. Ndnettn lotu yiham rifinyhato loturahnom, inji inji hingrna hikkfot.  
\v 27 Kangm wom yimam wom nndoh yarmumatn akfo bruttnanom, husf o husfirpa yimarpam kfo bruttnakfot. Nhai be rpat tipetm sinyahato mrokfom kfo bruttnakfot. Nhai. Rpa rpa sinyahato kfo bruttnakfot. Yo mrokfo kfo kekutyukm rom nhaf yimam nhombrahato tohhato mrokfom kfo kekutkfot.  
\v 28 Nd yimam kfo bruttnayuk mrokforoh kfo kekutyuk yimam kak hambriwokome, to be nd wom yarmumat kfo bruttnayuk yimam tohhato kfo bruttna duha. Be nhowi rhuhato yima yuhurio Bro Nkifrarparpno kfo bruttnakfot.  
\v 29 Yo Bro Nkifrarpno mrokfo yakyuk yimam kfo pthaneft hus yimaf o husfirpa yimarpam mrokfom kfo pthakfot. Womm be rhuhato nd rom kfo pthayuk mrokfom wanyhato yak nhtakfot.  
\v 30 Yo wom yimar Bro Nkifrarhu mrokfot kfo ptha hanitrn, tfit nd rifiny swirt rhuyukm Bro Nkifrar womr wom mrokfom yahutrr kangr sinya tohhato akfo pthaya, nd barkof yimar afo rorhu mrokfom kfo ptha tmbhonikfot. Bi kfo ptha tmbhonirm ee btn womr sinyahato rorhu mrokfom kfo pthakfot.  
\v 31 Lotu yiharoh hingrna yuham inji yi marnyarahm. Htirahko womr pthayuk mrokfomn wom dukefm yakrahm tift womrpno wom dukefm yakrahm tfit womrpno wom dukefm yakrahm, yima yimam kfo pthayuk mrokfom sioshu met yindarim wany hik bohikakruhamn dukefm yakruhamn toh bmtarahm.  
\v 32-34 Bro Nkifrar nhai mekahr mrokfom rpatn nathu mrkaknihato tfit womroh yima yuhum myak mmotarahmm. Nhai. Kangr mrokfo kfo pthaneft rpa rpa kfo pthahato rpa yima yuhur rhurahnom. Ndnettn yimam Bro Nkifrarpno mrokfom yakhato mrokfo kfo ptharahm, nhai be rpat sinyahato mrokfom thu mrkaknikfot. Rpa rpa sinyahato mrokfom kfo pthakfot.  
\p Bro Nkifrarhu yimaroh lotu rifiny swir bugam metm sinyahato mrokfom kfo ptha duha. Mosesr kfo boririfhumo mrokfot hikhato metm rom be yindariroh yinhitn rhukfot.  
\v 35 Nd lotu swirtn wom mett wom yima yuhur nietrt kangt akfo ttiwona, nhai tuha rifiny swirtn sinyahato kfo ttiwonkfot. Inji naraht fasoh yimtnayuk neft naraht. Tamoh ttiwon nmbuham korhm kto kunyko yihato tuthu ramemrn kfo ttiwonkfot.  
\v 36 Tone finji? Nd Bro Nkifrarhu mrokfote ka nikompno misuh gungonmot? Ka nikomrpakomn mrokfot fakmokomtn, womme ka nhai yakrmomt?  
\v 37 Wom yimarhu dukeft duka kangr, Bro Nkifrarpno mrokfom yakhato met yindarimpno kfo ptha he htfasyuk yimaya, o duka kangr Bro Nkifrarhu Yafothat kasinyet yimaya, nd yimar adukatwart ndar na wandfiwa mrokfot, Bro Nungothetrhu boririfhu nuhasyuk mrokfoyet.  
\v 38 Nd yimar ndar na wandfiwa kfo nuhas mrokfom nhai hikkahrm, kfiwanko nd yimar mirahko aduka amanyom ka nd Bro Nkifrarpno mrokfom yakhato womm kfo hanyeft ka tu Bro Nkifrarn nd hingrneft hemorr. Nhai.  
\v 39 Ndnettn, bar yinouroko, Bro Nkifrarpno mrokfom yakhato met yindarimpno mrokforoh kfo ptha habrinyeft, ndt niko Bro Nkifrar kfo ttiwonhato nd hingrnaneft yakkfot. Yimam Bro Nkifrarhu Yafothat kasinyewattm wom nndoh yarmumatn kfo bruttnewum, niko mirahko akfo rafonomm.  
\v 40 Tmifm lotu yiharoh hingrnefroh yak hta bohta marnya nmbuhamn yak hta bohta marnyakfot.   
\ms1 Noheh yimam tfit sinyarahm  
\mr (Sapta 15)  
\c 15  
\s1 Kraisr nohhato sinyamo yuhat  
\p
\v 1 Bar yinouroko, nd gutnius mrokfot na niko kfo nuhashehato niko bi nd wany yakiohato yakitohwat, nd mrokfotn kanga tfit akfo dukayanko.  
\v 2 Nd gutnius mrokfot, nikmoh yima yuhum yakitoh kih hanyhato hikrahkomt, htirahko Bro Nkifrar yakmiyakrahrko. Yakitoh duha yirahkomt, Bro Nkifrar be hik furarahkomr.   
\p
\v 3 Nd bro mrokfot bingot Bro Nungothetrpno fakmoyant. Nd mrokfot inji kfomot: Nmoh fasoh fasoh nefm Kraisr suh nanyormorm. Bro Nkifrarhu rfa borngt inji kfo tndhmott.  
\v 4 Nohmotr, yakhato tahi muht htamomr. Husfirpa marm tahi muht rhuhato tfit sinyamor. Bro Nkifrarhu rfa borngt to inji kfo tndhmott.  
\v 5 Tfit sinyanimohat Pitarpno mfnahmotr Pitar htimorr, yo tfit nd 12-pela aposermpno mfnahmotr htimomr.  
\v 6 Yo tfit 500 Kristen met yindarimpno mfnahmotr rom htimomr. Nd htiyafoyuk yimam bokm tom yuhre tohwom, wommne bi nohmom.  
\v 7 Tfit kto Jemsrpno mfnahmotr Jemsr htimorr. Yo tfit kto aposer bugampno mfnahmotr rom htimomr.   
\p
\v 8 Bi nd wom wommpno yak nuhashna yak nuhashnamorn ee kto tu wuroht nanpno mfnahmotr htimoyanr. Na memome, “Yiro yatit rhuhato fasoh bebtamotr mett bmbri hiyautr.”  
\v 9 Aposer hingrneft hingrnewa yimam na ndar yimena hingrnanuhiwanm. To mirahko ka rom aposer yufat yutewa kanjo na inji aposer yufat ka yutakfot. Nhai. Na namo fasoh beb nmbuhathu tndh mrokfot broyet. Nann Bro Nkifrarhu sioskfot faso faso fak bebhnamoyant.  
\v 10 Tu hifa Bro Nkifrar yuhuwafmora. Rorhu yuhuwaf nmbuhatn na bi ndarhtet hingrneft bi kakitohwant. Yo nd rorhu yuhuwaf nmbuhat nhai be yi furarmot. Nhai mif. Na hingrnewa hingrnafat htitant wom aposerm nhai na hingrnewa kanjo inji mfro hingrnakahm. Nhai. Na tu mfro hingrniwant. Nanhu fijo ndarhtet yonmari hingrneft finji hingrnarfoyant? Bro Nkifrar yuhuwafhato bbuka rifhur yahukotra hingrnefm hingrnewanm.  
\v 11 Na hingrnewa hingrnafat yo wom aposermn hingrnewa hingrnafat, nom nhai wom nndo mando hingrneft hingrnakahnom. Nhai. Romi na, nom hingrnewa hingrneft rpa Kraisrhu nohhato Bro Nkifrar kasinyamo yuhathu mrokfot kfo pthewunom. Nd mrokfom nom kfo pthamotnomm niko wany yakiomokomt.   
\s1 Noheh yimam kto tfit sinyarahm  
\p
\v 12 Nom Kraisrhu nohhato Bro Nkifrar kasinyamo nmbuhat kfo ptha hakutwohat, to tamohmpno nikmoh womm wanyhato kfo yamukam, “Bi nohet yimam nhai tfit sinyaruhatm.”  
\v 13 Niko tu kfo mif thombat, ka Bro Nkifrar nhai kasinya mifrmorr Kraisr. Ka yuhre yopt tohwor.  
\v 14-15 Ndnettn rorhu nohhato tfit sinya nmbuhat nom kfo ptha htfaswat be kfo fura htfaswonomt. Nom be tu yimam frnheh htfas kangnomm Bro Nkifrar kasinyamorr Kraisr. Yo niko nom kfoyuk mrokfot wany yakiowako, mrokfot be wany yakio furewukomt. Bro Nkifrar be tu nhai kasinya mifkahrm noheh yimame, to ndhtet neft Kraisr nhai kasinyarmorr.  
\v 16 Tu kfo mifwanko. Bro Nkifrar be tu nhai mif noheh yimam kasinyakahrm, to be Bro Nkifrar nhai kasinyarmorr Kraisr.  
\v 17 Bro Nkifrar be tu nhai mif kasinyarmorr Kraisr, to nd niko mrokfom hikwa nmbuhat be hik furewukomm. Nikmoh fasoh fasoh nefm tom yuhre korhmko.  
\v 18 Yo yimam Kraisr hikhato bi noh hanymom nhai wom rhukahm. Be nohhato hel yimohat mmbrafinyinimom.  
\v 19 Nom Kraisr hikhato kukatohwonom nmoh rhu nmbuhathu yak marnyaneft. To mirahnom nmoh rhu nmbuhat bi ndar bbinysofrpat ayak marnyatwatrt, to tfit Kraisrpno yiyuk bro dukeft be yi furaraht.   
\p
\v 20 To nhai. Nhai inji. Kraisr bi noh mifmor. Nohmotr bi Bro Nkifrar tfit kasinyamorr. Nd noh hanita yimam to rorn bi tor barkof yimar sinya gngonmor. Bi ror inji namotr to be kto noheh yimam tfit sinyarahm.  
\v 21 Wom yimar namo nmbuhatpno noheft niamot. Tfit wom yimar namo nmbuhatpno yimam tfit sinyarahm.  
\v 22 To inji korht. Adamr hanyjbornamo yuhatn nd ror kasinyamo frikar rinohakmom. Tfit Kraisr wany yakiomo yuhatn to be tfit arihat Kraisrpno frtkafyuk yimam tfit sinya bugarahm.  
\v 23 To nom buga, nmoh sinya yihar nierahr, nom sinya bugarahnom. Barkofr bi Kraisr sinyamor. Kto tfit ror nieruha yiharn nom rorhu buganom, sinya buga hanyrahnom.   
\p
\v 24 Nd yiharn Kraisr hingrna hnayuk hingrnefm mhingrna tmbhorahrm. Kminysof kminysofm thu yurmo tongr, kminysof kminysofroh yarhm, kmikmiroh gafman yimam Kraisr yak bisisruhatrm rom hatoh hnayuk bbuka nanyjareft yohniraht. Nd rorhu kingdomkfot yakruhartn Bro Nkifrar, nmoh Yifemr, rorhu tirtn htaruhatrt, rorn yakitohrahrt.  
\v 25 Afo tu Kraisrn king yufat yakhato kingr tohrahr. Kingr tohhato yahrt afo rorn yahot tpohhato rorhu mofsinhitn htarahrm yimam.  
\v 26 Nd rorhu yahr kmim bi mofsinhitn hterm ee tfit yimam nohwa yuhat frtittafrahrt.  
\v 27 Bro Nkifrarhu rfa borngtr kfo kangt, “Bro Nkifrarn nd tamoh tamohm yakmorm Kraisrhu yinhitn htamorm.” Bro Nkifrarpar nhai Kraisrhu yinhitn tfit rhukfot.  
\v 28 Kto, nd tamoh tamohm bi Kraisrhu yinhitn bi forhni bugem, ee Bro Nkifrarhu Yonr tfit Bro Nkifrarhu yinhitn tfit rim rhurahr. Barkofpam Bro Nkifrar afo nd tamoh tamohm Yinem Yonrhu tirtn htamotrm rorn fakitohmorm. To tfit Yinem Yonr turhu Yifemrhu yinhitn rim rhu thombat, tfit nd yiha Bro Nkifrarn tfit yura mrhurahr.   
\p
\v 29 Yimam bi nohetm sinya duha yi shombat, to tamohmpno nd yimam tafi baftaisnihato nohwam tfit yima nfrimn nohehroh yufam tfit baftaisahukamm?  
\v 30 To nome tamoh nmbuhatpno ndar nom hingrnewa hingrneftpno be nohyuk tkitt yorhwanom? Yimam bi nohetm sinya duha yi shombat, to tamohmpno be nd noheh yimaroh mrokfotn yihom pthak mpthak hasohato nhai yafhowonkahnomt?  
\v 31 Bar yinouroko, niko bi Krais Jisasr, nmoh Nungothetr, hikwatko bro yindhor nmbuhat korhta. Ndnetann na kfo mifwanko. Na yiha yiha be nohyuk tkitt korhakuta.  
\v 32 Yimam bi nohetm sinya duha yi shombat, to tamohmpno na Efesus tohhato nd namburet namburet fohmpno nnayurmoya? Ka be tuka ndar bbinysofthu toh nmbuharpat dukahato nd fohmpno nnayurmoya?\f + \fr 15:32 \ft  (15.32) Womm duka memom ka tu foh mifm Porr kfomor. Rom gafmanr neft inji namour. Wom yimar wom fasoh neft mner, fohmpno yak htatamoatmr nd fohmpno nnamour, akfonom laionmpno nnamoum. To nd mrokfot bok yimam duka kangm Porr nhai tu namburet foh mifm kformor. Nhai. Ndt ror waskfot kfomoa yimamn kfomor.\f* Nhai. Nanhu dukeft duka memoya, “Nd fohmpno nna hanyhato mfnoha, nhai mrokfefm. Tfit sinyaruha.” To yimam bi nohetm sinya duha yi shombat, to be, tamoh tamoh nefm nafura bofura hasohato nohokne be miyawitanitnom.   
\p
\v 33 Mirahko wom yima fura bofuram arihti marsisakkahtnomm aniekahmn afrmmo bammomko. Niko wom mrokfot bi wanyeteko, nd mrokfot inji kfiwut, “Fasoh nefm nayet yimampno nabnothato tamoh tamoh nefm rpat finji na finji narahnom, to be nmoh dborioh nefm yohniruhamn to be tfit rroh fasoh yuhatn mhikaknirahnom.”\f + \fr 15:33 \ft  (15.33) Nd mrokfot Grikkorhof wom safemanr kfomo mrokfoyet.\f*  
\v 34 Nikmoh fasoh mmo nmbuhat wayafhotwakomt. Wayafhokahkomt tfit dborioh yima dukefm wayaktwako. Yo nikmoh fasoh nefm wayafhotwakomm. Nikmohart, tom womm tafi Bro Nkifrarhu dukef yuhat hikkahm. Nhai. Hti mmo bomumiwum. Nd mrokfot na niko inji kfiwohat wayimtnakomt.   
\s1 Nfri thatipt tfit sinyaruhat nndo rhuraht  
\p
\v 35 Ka womm rirhuhato kfo ttiwon mirahm, “Yimam nohwam finji kanjo sinyaruham? Sinya thombat to rroh thatipm finji rhuruham?”  
\v 36 Ndt tamohtet mmoroh ttiwon mumefet? Niko wom yewuri tpim bbinysoft nuhtiwam htitwokomm. Yewuri tpim tou yoprahkomm afo yiro bbinysoft rhuhato tpim rinohrahm. Kto tfit htirahkomm tfit frdborharahm.  
\v 37 Nd ni nuhtayuk wit tpim o tamohm frdborha thombat nhai tfit tu wanuhtewa tpi furam kanjo rhukahm. Nhai. Tfit nndo korhm.  
\v 38 Tu Bro Nkifrar kfiwur, nd yewuri tpim o tamohm frdborhahato sinyewamn twa rfetm, yuhtetm, nyisofetm, thetm korhm. Tu Bro Nkifrarn kangr nd yewuri tpim finji arhum, ee inji sinyahato inji korhm.  
\v 39 Yimam, fohm, nungam, yiram, tamohm nhai rpahtet ruheft rhukahm. Nhai. Yimaroh ruheft nndohet, fohroh ruheft rot nndohet, nungaroh ruheft rot nhaf nndohet, yiraroh ruheft rot nndohet.  
\v 40 Yura mount hatohwa wondht rot nndoh korht rothu ruheft. Yo ndar bbinysoft hatohwa wondht rot nndo korht.  
\v 41 Marr hatohwa wondht nndohet. Yamt hatohwa wondht rot nhaf nndohet. Yo rpa rpa gunym hatohwa wondht nndoh nndoh wondht hatohwom.   
\p
\v 42 Yimam nohhato sinya thombat inji rhuraht. Ndar nom hatohwa thatipt yopefiwohat mikfe bdgnitt. Tfit Bro Nkifrar kasinyaruha thatipt rot nhai tfit nohruhatt.  
\v 43 Thatipt nohhato yopefiwat fasoh rhu bebwot. Nd thatipt tfit sinyaruhat, ginafm frdborhewa kanjo inji frdborharaht. Yo thatipt yopefiwat nhai bmtakaht. Yudbat mikfe bdgnitt. Nd thatipt tfit sinyaruhat tu tat thatipt sinyaruhatn nhai tfit mikfe bdgniruhatt.   
\p
\v 44 Ndar nom yopefiwa thatipt ndar bbinysofthu thatipet. Nd tfit sinyaruha thatipt tu hefenrhu thatiptn tfit sinyaraht.  
\p Mirahko ka rpahtet thatipt hatohwonom. Ndar bbinysofthu tohyuk thatipt, rot womet yo hefenr tohyuk thatipt, rot womet.  
\v 45 Bro Nkifrarhu rfa borngt inji kfiwut, “Barkof hingrnamo yima Adamrn, Bro Nkifrar ssfoneft hemotrr tohmor.” Tfit kto wom nfri Adamr niamor.\f + \fr 15:45 \ft  (15.45) Nd wom nfri Adamr kto niamor, ndr Kraiser. Mrokfot htikfot 15.21-22 yo Rom 5.14-19.\f* Nd nfri Adamr Kraiser. Ror niahato Bro Nkifrar tu toh nkifraniyuk yafothat hemotrr tfit Kraisrn nd toh nkifraniyuk yafothat hemornom nom.  
\v 46 Nhai bi hefenr toh nkifraniyuk yafothatn bi niahato tohkaht. Nhai. Afo ndar bbinysoft tohyuk yima mif thet yima thatipt niewut. Rot niewatt ee btn yafothat niewut.  
\v 47 Barkof Adamr Bro Nkifrar hingrnahato htamor, ndar tu bbinysofthu bbpaye yak yeny nhombramo Adamer. Tfit ndwom mongko niamo Adamr, ndr yura hefenkorhof Adamer.  
\v 48 Ndar bbinysoft tohyuk yimam korh nhombrewum nd bbpaye yak nhombramo yimar kanjo. Yimam, hefenr tohyukm, korh nhombrewum tu hefen yuhat niayuk yimar kanjo.  
\v 49 Arihart afo nd bbpaye yak nhombramo yimar kanjo inji afo korhnom. Kto tfit nd hefenrhu yimar kanjo rhurahnom.   
\p
\v 50 Bar yinouroko, na kfiwa mrokfom inji akfo wutha hikkahtanm wawany hik marnyatwakomm. Ndar nom hatohwa thatipm, nhai Bro Nkifrarhu kingdomkfot fknihato tohkfot. To nhaf womt, ndarhtet mikfe bdgniyuk thatipm nhai toh nkifranikfot.  
\v 51-52 Wom kafroh mrokfot kfo ptharhotant wawanyswakomt. Nom ndar yima buganom nhai noh bugaruhatnom. Ndar bbinysofthu toh bnkayuk kfo dukayuk fumrr toh hanyrahr, yudbat toh mhunfat kanjo frdborha rmon bugarahnom. Nd noh hanyuk yimam rom sinyahato frdborhahato nd hefenr toh nkifraniyuk thatipt yakrahm. Yo ndar yima nfrinom nhaf nd fumrrpno frdborha bugarahnom.  
\v 53 Ndar thatipt nohhato mikfe bdgnitat, ndt thu hrur tuhraht. Thu hrur tuhhato tfit nfri thatipt yakrahnom. Nd nfri thatipt nhai tfit nohruhatt. Be inji toh nkifraniyuk thatipt tfit yakrahnom.  
\v 54 Nd nmbuhat bi inji forhnit, ndar nohhato mikfe bdgnita thatipt bi frdborhanihato bi tfit toh hatohyuk thatipt bi feknom, be kfo mirahnom nd nkifra mrokfot bi nkiframpno rhumot bi asot fipetet. Rom nd kfo memo, “Bro Nkifrar noheft bi fak nohrt.”  
\v 55 “Ni nd noh yafothaye, fitot ni nd hatonita nohefthu bbukeft? Ni nd noh yafothaye, to fitot yima wasyuk kfrat ni nd hatonitat?”   
\p
\v 56 Nd noheft hatonita kfrat to fasoh nefet. Mosesrhu boririfhutn kfiwohat, mirahn inji anaya, ee yimaroh fasoh yima yuhum mfro risinyewatm fasoh nefmn misuhm.  
\v 57 Tu hifa Bro Nkifrar fitha arhu duha yir nom finji narfonom? Hifa rorn kfomor nmoh Nungothet Jisas Kraisr nohhato nd fasoh nefm yak thuhato nfri yafothar tfit thu hmbremornom.   
\p
\v 58 Ndnettn bar yinouroko, niko toh bmtakfot. Mirahko tamoh tamoh nefenm awohsisnom. Wadukako, nd niko Brorhu hingrneft hingrnewat nhai yi furaruhatt. Ndnettn yiha yiha Brorhu hingrneft hingrnakfot.   
\ms1 Porr turhu hingrnayuk mrokfo yuharoh mrokfo yuham kfo pthamor  
\mr (Sapta 16)  
\c 16  
\s1 Jerusalemt tohyuk Kristenroh maruharoh htafhe yuhat Porr kfo pthamor  
\p
\v 1 Kfo ttiwon mrokfot kfo ttiwonmokma Jerusalemt tohyuk Kristenroh maruha hta nhafohhato htaf hanyeft. Ndthu yuhatn kanga akfo nuhasanko. Maruham kangko hta nhafohhato Jerusalem thofm ahtaf hanyomm, na Galesia thofm kfo nuhasmo yuhatn hikkfot.  
\v 2 Niko yiha yiha yakyuk maruham, Sande yihamn niko rpa rpako tuko rhuhato maruham yak nhtahato womfam nndo yak htafkfot. Wom wikr yakyukm Sande yiha rhuhato yak nhtakfot. Yo tfit wom wikr yakyukm nhaf be inji. Inji na hanysn maruham brorahm. Kto na nia kfoneft, bi yak hta nhafohtayetmn be yakhato hirahkma, nhai tfit yak hambroruhatko.  
\v 3 Na nia mfnah thombat, tukomn wom yimam wayakkahkomn romn nd maruhami yo na wandfayuk kfo nuhas gontwampno rpat Jerusalemko hanyrahmm.  
\v 4 Be tukann, kanga tukanpno rpat ainyom, be tukanpno rpat riyahnom.   
\s1 Korin thofroh yi hti yuhat Porr kfomor  
\p
\v 5 Na nia thombat afo Masedonia profins tohyuk yimampno inji hti hnerhoyanmn ee kto nikompno mfnahruha.  
\v 6 Nikompno ka dfik yiham mtohnho nahneruhanko. Afo htiyaf hanyruha ka nd frfon wormr ka nikompno tohruha afo. Nd frfon wormr bi ftohnir ee btn sinyaniruha. Na tfit wom kmit yi shombat wahti dukaf hanyswakomt nanhu yi nmbuhat.  
\v 7 Na ndar niat nia thombat, na nhai wofnkaha na be yifrar mtohni hanyneft. Bror kangr wom yiham afo ndha watohni ee wom yiham tohniruha.  
\v 8 Pentikos yihar afo ar tuha Efesusn afo tohruha.\f + \fr 16:8 \ft  (16.8) Pentikos yiharhu kfo nuhas mrokfot htikfot Aposer 2.1.\f*  
\v 9 Asha htita Bro Nkifrarhu mrokfothu pthaneft bi yihoteta. Bro Nkifrar bi fak wuthamotrt na nhai nd hingrneft mhtanikfot. Tot nanhu tu bro hingrneft. Nd dukeftpno afo asha tohruha. To htita na hingrnewa hingrneft yimam wahtewumt.   
\p
\v 10 Timotir nikmoha mfnahwor, wayaktwakomr. Mirahko finji anakahtnomr be yakrme yima yuhurpno kukroht arhur. Turhu kmit yorhwa kanjo inji arhutwar. Ror Brorhu hingrneft hingrnewur na tuka hingrnewa kanjo.  
\v 11 Mirahko ka yima furarn nyingarpaye ayukatohnomr. Nhai. Nd yimar na hingrnewa hingrneft kanjo hingrnewur. Rorhu nia yihar watoh kafho marnyakahtkomr yihotar nia marnyarahrr. Rori rorpno yiyuk yimam rpat nia marnyarahmr yihotar.   
\p
\v 12 Apolosrhu ndkorhof nia nmbuhat kfo tkrur titamoyanr ndko wom yimampno rpat yinyeft. To nhai, nd yiha yima yuhur nhai sinyarmorr yinyeft. Kto turn wom yiham yibonwore, ee btn nierahr.   
\s1 Wom mrokfom  
\p
\v 13 Yo niko! Niko tuko duka marnyaf hanykfot. Bro Nkifrarhu dukefrparpno rhuhato toh bmtakfot. Toh bmtahato tamoh tamohm duka yakrmi duha.  
\v 14 Tamoh tamoh hingrnefm hingrnarahnomm, hifa yima yuhurpno hingrnefm hingrnakfot.   
\p
\v 15 Bar yinouroko, niko Stefanas riphari rorhu kunys tohyuk yimaroh mrokfot wanymokomt. Romn nd Akaia profins Bro Nkifrarhu mrokfom rihik gungonakmomm. Romn bi tohhato Bro Nkifrarhu met yindarim mfnah hanyukm romn wafakitohakmomm. Tfit kfiwanko,  
\v 16 ndhtet yimampno niko yi tohneft, niko be yihato romi rompno hingrnewa yimampno, rroh yinhitn niko tohakkfot.   
\p
\v 17 Nanhu yima yuhur niko duka darwon hasomoar, hifa Stefanas, Fortunatus, Akaikusromn niamotm to be romn na htihato yima yuhur miyorhwora.  
\v 18 Romn niahato nanhu yima yuhur mirhumora yo nikmoh yima yuhum mirhumomko. Ndhtet yimaroh mrokfom wany yakitohkfot.   
\p
\v 19 Asia profins yorhwa kmi kmiroh sioshu met yindars niko dukahato kfo yindhor mrokfot htefiwumt. Akwila Prisila sawohfi rofhu kunys lotunefm rhu rifiny hakuta Kristenm, rom buga Jisasrhu yufatpno kfo yindhor mrokfot htefiwumt.  
\v 20 Nom asha Kraisr hikwa Kristen buganom, nom buga kfo yindhor mrokfot htefiwunomt.  
\p Niko tuko Kristenko tir nhekfot.  
\v 21 Na Pora, na tukanhu tire kfo yindhor mrokfom wandfiwanm.\f + \fr 16:21 \ft  (16.21) Porrhu gontwam nhai tu Porrn wandfa hnarmorm. Rorhu mrokfom wommn wandfamoumm. Womm wandfamoatmm ror be kfo yindhor mrokfomi yufa sainimnefrpatn Porr yikt yakhato wandfamour.\f*   
\p
\v 22 Yimar nhai Bro Nungothetrhu yima yuhur rhukahr, “O, Bro Nkifraye, nd yimar wayak tutfatwanr. Na kfiwa nmoh Nungothetr ayawihnar.”   
\p
\v 23 Bro Nungothet Jisasrhu yuhuwafeft arhuwatko.  
\v 24 Jisas Kraisrhu yuhatn nanhu yima yuhur nikomn korhr.