\id 1TI 1 Timothy - Naineri - Andy Minch Jan 2002 
\h 1 Timoti 
\toc1 Angig Ginof Pol Timotim Ningihiana 
\toc2 1 Timoti 
\mt1 Angig Ginof Pol Timotim Ningihiana  
\is1 Ohuna buk enaig esog  
\ip Timoti eba kwablog Kristen el. Afa Pol ehem sufanam so lahlag mo ahsihiakana (Aposel 16:1-3). Afa sumi yi Timoti Efesus siosna amunai el puguna. Eso ohuna mo Pol ginofe ehem ningihiana. Afa angig ginof wa enaig esog. Timoti nofe fefiba ma so mwakwal el Kristen elni olug onigigim gasafihagif. Afa mwakwal el eba enaig onigigi feg mang gawig ohuna bite nai eba amtakwalig. Afa mingba enaig esogog og aman lahlag gaba ofefiba so mingnag fanem kwegi afa angwafig mas fai. Afa Pol ming nalig mog mo eba enaig esog lahlag lotu nihem nangwaghiage nihe mi afa siosna gafugag mi. Afa sumi yi ginof eba enaig esog Timotim og so ma Sisas Kraisna lahlag gafugag el fei afa lahlag nihe mungwali sios elim eseni.  
\c 1  
\p
\v 1 Ka Pol ohuna mo ginofeg. God bigelim kwaganigim afa bigim wambug eso bigelni onigig Krais Sisasnai yi gofi. Afa eheningina sawieg wa eso ka Sisas Kraisna kanog wahiag el feg.  
\v 2 Timoti neana olug onigigba kana mungwalofug eso neba kana leg lofeg eso ohuna mo ka nem ningihianag. Ka membeg God bigelni Humuan i afa Sisas Krais bigelni Ainiyag i so ma nem enaig esahfenai, eso ma nem ismunagim ahkweagfui afa nem afa ahfenai afa olug efihlag nem ahfai.   
\s1 Numwehe nofefiba mwakwal wagfuiag elim  
\p
\v 3 Afa mahim ka Masedonia provins gam akafenaba ati ka nem enaig esonag so na Efesus kimbig wa gafim. Afa mingnag el enanai yi mwakwal olug onigig mog mom sihiag ofifibi so na ehengelim kweni.  
\v 4 So na ehengelim enaig sihififni nofeka autunai mo bihigim afa simbiangana unehlagim suwiginim enam hugna onigiafahufum. Afa enaig mo elni onigigim gasafenig afa enaksag sahig ehengelni onigig wa fapukefeg. Afa elni olug onigig enag mungo Godna minam wagfunig.  
\v 5 Afa ka nem ohuna mo sihinagba eso ka membeg el enaig finim, lahlag olug afa lahlag onigig afa inim olug onigig. Enaigfibi eso mingnag elim hugna membenif.  
\v 6 Afa mingnag el enag nihem wahigim afa amtakwalig ahanaig ahanaig mo bihig higinim eso enmunam mina eteti ahug.  
\v 7 Afa ehengel og ka Godna nihe mo wagfuiag el feg. Afa ehengel mas anwanafig mo enag mo mangim esog. Ehengel kifutig mona sihigim afa ehe mo etetig.   
\p
\v 8 Afa bigel anwanafig el Godna nihe mom lahlag pahlukuiba enag nihe eba lahlag.  
\v 9 Sa big onigi enag nihe mo mang lahlag elim kwaganig mo. Enag nihe mo enaig eseg eba amtakwalig elim kufinig. Eso enaig el nihe mom filafatig afa mas mingnag elni mom higi afa Godum masig fatinig afa ahanaig ahanaig amtakwalig esig afa ehengel Godna nihe kusini afa ohuna bitenaina nihem pahluhug. Afa Godna nihe mo enaig elim gaba kufinigim afa el eso heafgelni humonig mi afa mingnag el mi kwaskofig,  
\v 10 afa el aga taitufig afa kwamblo waunam ahuag afa mingnag elim okwefna wambugum heafgelni gafugag wa wasanig eso isug gafugafiahu, afa el mwakwal mo sihig afa el jasna nof wa enaig esig afa el mingnag nihe esig mas lahlag mog mom pahluhug.  
\v 11 Enag lahlag mog mo eba Godna lahlag mo nai pugug. Godba lahlag ehe sisi ga enag lahlag mo kam faig og so na sihiage.   
\s1 Pol Godum lahlag onag  
\p
\v 12 Afa bigelni Ainiyag Krais Sisas kam fehianageg eso esog, “Sa ka nem kifutig faig eso ne kana gafugafe.” Eso ka ehem hugna lahlag onag.  
\v 13 Afa autunam kaba amtakwalig el fena. Ka Sisasim amtakwalig mo sihina afa heafna elim kinig faigim afa kwagaitifeg. Afa ka ehem mas anwanafena mo afa kana olug onigig ehem mas ka fena mo. Eso God kam afafenag.  
\v 14 Afa Ainiyag kam enaig esenag heafna afafeg ka nai yi nalig pugugba eso kana olug onigig Krais Sisas nai yi luwug naka mingnag elim hugna membenig.   
\p
\v 15 Afa Krais Sisas ohuna bite wa ati bona eso amtakwalig elim heafgelni amtakwalig nihe nai wambina. Afa kaba amtakwalig elim gosinig. Afa ohuna moba inim so big mungwali enam higinim fi.  
\v 16 Afa ka amtakwalig el afa God kam afafenag eso ma Krais Sisas kam nengigim fenai. Ehe enaig eseba so ma mingnag el sumi kam nangunim so ma Sisas nai yi olug luwoi afa higeg nofkenagag fi.  
\v 17 Afa ehe bigelni misog el eso big higeg heafna unehlagim fingi finim afa lahlag ehem ogna. Afa ehe higeg nofkenagag ga mas wahai afa big mas ehem nofna nangui afa ehe mungo God feg. Eba inim.   
\p
\v 18 O Timoti, kana leg, ohuna mo ka nem sihinag eba mungwalofug eso Godna mo fi sihiaule el autunam nem sihi wahiana. Afa ena mo nem kweafug eso ne God i ahgonam so na ahfenim.  
\v 19 Mahim ne Godna lahlag mo wa gafiba eso neana olug onigig hugna Sisas nai yi kifuti luwafim afa enag nunimu so na feg eba Godna nof wa neana onigig lahlag go. Afa mingnag el heafgelni lahlag onigig esigim yiskosig eso heafgelni olug onigig eba mas kifutig mo eso tutohia apaigog.  
\v 20 Himeneus afa Aleksander eba enaig el ahfeg. Afa ka eheningim Satanna ninga wa hwatig eso eheningi anwana ahfei afa masa ese Godum piske amtakwalig mo ahsihinaf.   
\c 2  
\s1 Pol Godum sahnag nihem mom sios elim sihinigim  
\p
\v 1 Afa ohuna goseg mo ka nem afai. Afa ka hugna onigig el so ma ahanaig ahanaig sahanig Godum finibi eso God mungwali elim lahlag feni. Afa God mungwali elim lahla feni eso ne ehem lahlag ogna.  
\v 2 So na misog el mi afa mingnag gavmanna el mi Godum sahnaiba so ma ehengelim lahlag onigig faibi eso big afoahlanam augu afa big lahlag nihe pahlukufi eso big Godum lahlag oni.  
\v 3 Afa ohuna nihe eba lahlag eso Godum sifakalena. Ehe bigelni kwegfwag el feg,  
\v 4 afa ehe membeg mungwali el ini mom anwanafif eso ehe ehengelim kwaganam piske wambuf.  
\v 5 Afa mungo God ga afa mungo olyi nai el ga. Ehe Godum afa elim olyi fenig. Ehe enag el Krais Sisas.  
\v 6 Afa heafna nofkenagag wahianam eso wahana eso elim piske wambug. Afa enag osuna God sihi wahiag Sisas ati bona afa enag wagfug God membeg mungwali elim piske wambu.  
\v 7 Eso God kam kanog wahiag na ka afwambanai elni wagfuiag el feg. Afa ka inim mo sihig eso ma el Godum olug onigini. Ka mas mwakwale eba ka nem inim sihinig.   
\s1 Kwablona i angwafigna i siosna nihe mo  
\p
\v 8 Ka membeg mungwali kimbig sios wa nai kwamblo so ma afsug el fi eso ninga fingi fenam Godum sihini. Afa mahim esigbi afa ehengel mas olug kakaginim afa monagi.  
\v 9 Afa ka onigig angwafig gaba enaig esi, heafgelni eligim lahlag lofugna aitiagig afa enag lofug angwafigni lahlag nihe wagfug. Afa ahanaig ahanaig wagna angwafig heafgelni eligim fiagig masa lapug kikeagig afa egig yi aitiagig afa labana lofug eso kig naligna wambug,  
\v 10 Afa heafgelni lahlag gau so ma heafgelni lahlag nihem wagfui. Afa angwafig Godna nihem pahlukug enag lahlag gau aitig.  
\v 11 Afa angwafig so ma ahnai skaugfinim mwahlai augunam so ma numwehenam mo lahlag anwanafi.  
\v 12 Ka enaig esog, ese angwafig kwablogim puguhafunam afa wagfunaf kwablogim afa angwafig so ma mwahlai augui.  
\v 13 Afa God Adamim gof gafugafena afa Ivum sumi yi gafugafena.  
\v 14 Afa Adam mas mwakwal mo higina mo eba angwafig enag mwakwal mom higinam enaig esenam afa Godna nihe mo filafena.  
\v 15 Afa angwafig so ma enaig esi Godum olug oniginakafi afa elim membenikafi afa heafna nihe lahlag gwenaig gofi. Afa enaig esibi mahim luwal wanigaufiba eso God ehem kweagfunam eso lahlag auguf.   
\c 3  
\s1 Siosna misog el ahanaig el eso fef  
\p
\v 1 Afa el membeg siosna misog el ofefiba afa enag gafugagba ehe membeg eba lahlag. Ohuna mo eba inim.  
\v 2 Afa siosna misog el masa ahanaig ahanaig amtakwalig esef. Ehe so ma mungo angwafigni fei, afa heafna onigig masa ese fabihiafef, so ma afoahlanam fei, afa amunaina onigifei, afa afwambanai elim lala gam wankai afa Godna mo mingnagim wagfunugum eba ma esef.  
\v 3 Afa ehe bu gina negim hwoiyug mas fei afa mas ikagna ninimui afa afahlagna gagim afa nengigim sihiageg afa kig fagim mas hugna onigi.  
\v 4 Afa siosna misog el so heafna luwal angwafigim lahlafi afa heafna luwalig so ma ehem ahnai skaugfinim afa ningmagini.  
\v 5 Afa enag el heafna luwal angwafigim lahlafig hwanigba eba ehe mas anwanafeg mo Godna elim numwehenugegim.  
\v 6 El eso Sisasim yawo olug oniginig ese enag el siosna misog el go fe. Masa heafna unehlagim fingi fef eba God ehem tautig faif eso Satan enaig esenaba eso God ehem tautig faina.  
\v 7 Afa el Sisasim olug onigi hwainig so enag elim sihini og, “Eba lahlag el.” Masa enag elim amtakwalig mo sihinif eso ehem Satanna mime wa pef.   
\s1 Siosna kwegfwag el ahanaig el eso fef  
\p
\v 8 Afa siosna kwegfwag el ehe gaba so ma amunaina onigig lofug fi ese eba mang sambaga mengigna el fef afa mo ehe so sihi eba inim mo Afa ehe bu gina negim hwaiyui afa kig fagim mas hugna onigi.  
\v 9 Afa inim mo God ehe opuguna enag el so kikehlanam og ka Godna nof wa heafna mom pahluku.  
\v 10 Afa yuwana mo so na ehengelni gafugag i nihe i fahigenugenam eso yuhwafeba so ma ehengel siosna kwegfwag elni gafugag esei.  
\v 11 Afa ehengelni angwafigni nihe gaba so ma lahlafi afa esi elim mo sumifinif afa esi mina wa wahgi gofif afa enaig angwafig so sihig eba naho inim mo sihig.  
\v 12 Afa siosna kwegfwag el so mungo angwafigni fei afa heafna luwal angwafigim lahlafi.  
\v 13 Afa enag kwegfwag el eso lahlag gafugafeg eba lahlag unehlag fag. Afa ehe kifutigni enaig esog ka Krais Sisasim olug onigina.   
\p
\v 14-15 Afa ka onigig ka mwakwalig fenam so nem bo nangufe afa ka ikagna bo hwanigba ohuna mo ka nem ginofenag so na anwanafe afa big Godna lala nuwaginam afa big ahanaig esif. Afa big Godna el afa God nofkikenafeg bigel heafna sios. Afa enag sios soma ofenaiba kifutig sumil lofug so Godna inim mo gofeg.  
\v 16 Afa big anwanafig inim mo God ehe opuguna afa enag hugna nalig feg. Afa enag inim mo enaig esog;  
\q2 Ehe ohunaig el lofug gohna  
\q2 eso bitenai el heafna mom higinim  
\q2 ehem olug onigini.  
\q2 Afa Godna Sungwag wagfuna ehe lahlag  
\q2 afa ofwanai el ehem nanguni  
\q2 afa ehe heven gam fukukagim God i ahagag.   
\c 4  
\s1 Mwakwal wagfuiag el elni onigigim gasaf wabufif  
\p
\v 1 Godna lahlag Sungwag sihig autunai wa mingnag el Sisasim olug onigig wahigim afa enag el mwakwal sungwagna mom higi afa nimbasa enag wagfufenim eso enam pahluguf.  
\v 2 Afa mwakwalule el so enaig mo sihiakag afa enag elni onigig etetig afa mahim amtakwalig esigim eba mas ahwanifi.  
\v 3 Afa enaig el so enaig sihifeg nofeka angwafig fi afa nofeka ahanaig fane ahgai. Afa ena gau God ehe gafugafeg eso el Godum oniginim afa ini mom anwanafenim afa ma Godum lahlag onam eso ahgai.  
\v 4 Afa mungwali gau God so gafugafena eba lahlag masa big fatif afa big mungwali gawigim lahlag onigibi eba so big fi.  
\v 5 Afa Godna lahlag mona afa bigelni sahig ena gawig eba lahlag mungwali Godna nemug feg.   
\s1 Afa Krais Sisasna lahlag gafugag el ahanaig mahim  
\p
\v 6 Afa ne ohuna mo nilitem sihinibi eba ne Krais Sisasna lahlag gafugag el fef afa Godna lahlag mo wa neana sungwagim kifutig fafe eso ne enag onigig afa anwana lahlagim so na fanam pahluku.  
\v 7 Afa nofeka mwakwal elni mo bihigim onigi. Ena mo mang Godna bo mo afa mas nem kweagfui. So na hugna gwenaig esegofum eso neana nihe Godna minam pahluku.  
\v 8 Afa big gafugafigbi eso bigelni elig kifutig fag enag kwegfwag eba wesigfeg. Afa big gwenaig sungwagim esinigbi enagba naho hugna kweafug afa enag yawo bigim ohunanai yi kweagfui afa autunai wa bigim gwenaig fenif.  
\v 9 Afa ohuna mo eba inim eso ne kikehlinim auguiafim.  
\v 10 Afa bigelni olug so ma nofkenagag Godnai yi luwafi eso ka ohuna gafugam ehengepuseg. Ehe mungwal elni kwagani el eso aman ehem olug oniginag ehengelim piske wambuf.   
\p
\v 11 So na ohuna mo elim sihini afa wagfuni so ma enam pahlukwi.  
\v 12 Afa ese nem enaig onigifif og neba kwablog el feg amo so nimbiafna nihe Godna elim lahlag mina wagfuni. Afa neana mo sihiagim afa gafugam afa membeg afa olug onigini afa lahlag gag so ma el enam nangunim nem pahlukwi.  
\v 13 Afa ka ikagna bog hwanigba so na enaig ese. Afa mungwali elni ang wa so na Godna mo suwiginam afa wagfufenugenam afa sihinuge.  
\v 14 Afa mahim siosna misog el nem kehlinibi afa el nem Godna mo faina eso ne Godna Sungwagni kifutig fana. Afa nofeka enam yiskose.  
\v 15 Afa numwehena nimbiafna gafugam lahla kikehlaf eso ne fag. Afa neana onigi so na ena gafuga wa luwafiba so ma el neana nihem nangunim eba so lahlag gwenaig esahufi.  
\v 16 Afa nimbefum lahla kafefiba so na elim mo sihinug fiakafum afa moba ne osihinifiba so na ini mo sihini afa ne enaig eseba eba God nem afa el eso neana mo higig ehe nem kwaganif.   
\c 5  
\s1 Timotina nihe sios elim enaig eseni  
\p
\v 1 Afa mahim ne ogna amunai elim numwehenug ofefiba nofeka nunimu mona sihinuge. So na negnag mona sihini so na ofenaiba nimbiafna awagim esahfenaf. Afa siosna kwablog elim so na enaig esen eso nimbeafna suminegim esahfenaf.  
\v 2 Afa muhuna angwafigim gaba so na enaig eseni eso ne nimbiafna afagim esahfenaf afa angwaming angwafigim so na enaig esini eso nimbiafna mulwaligim esahfenaf afa nofeka amtakwalig onigig nihe fa.   
\s1 Bulwag angwafigna mo  
\p
\v 3 Afa nofeka bulwag nemug angwafigim eteti waihi so na kweagfu.  
\v 4 Afa so ehe luwaligna afa simbianingana fef so enag luwaligim sihini og, afa yuwanam so na nimbiafgelni afa humuanigim nangwaghiagig eso autunam ehengel nengelim esegoni so na mungwag enaig esegoni. Afa enag nihe eba Godna afa God enam sifakalenag.  
\v 5 Afa bulwag nemug angwafig mas aman ehem wesig gaba kweagfui afa heafna onigig Godum fenagim eso osuna sinaini Godum fasahnaf so ma kam kweagfui.  
\v 6 Afa mingnag bulwag angwafig bitenai onigigim pahluhug afa ehe nofkena feg eligni afa sungwagni ehe wahag lofeg.  
\v 7 So na ehengelim ohunag kifutig mo fai masa el ehengelim sehini.  
\v 8 Afa aman heafna nilitem afa afahumonigim mas nangwaghiage afa enaig el heafna olug onigigim amtakwal fiahfag eso ehe eba amtakwalig el afa afwambanai elim gosinig.   
\p
\v 9 Afa bulwag angwafig eso 60 krismas feg afa enaig bulwag angwafigni unehlag mungo ginofe apaigo goh eso sios ehengelim kwagani. Afa so ehe mungo ligag fanam afa lahlafiah fana.  
\v 10 Afa mungwali el enag angwafigim enaig esonig ehe lahlag nihe esena afa ehe luwaligim lahlafenig afa afwambanai elim heafna lala gam wankag afa Godna elim ahnai skaufenigim eso ehengelni mongim giafenugeg, afa aman kinig yi pef eso ehe ehengelim kwaganig afa ahanaig ahanaig lahlag nihe eseg.   
\p
\v 11 Afa nofeka kwablog bulwag angwafigni unehlag wambu pipali mungwal enanai yi ginofe apaigo goh. Afa autunai wa ehengelni onigig buihiaf ligag wa gagim eso Kraisna nof wa mo enaig sihifena ka mas ligag wa gai eba koka Kraisim gof fafati eso ehe ena mom filafefe.  
\v 12 Afa enag mo Kraisim gof so sihina so enam amtakwalig fatif eso ehem amtakwalig fafe.  
\v 13 Afa ehengel gaba enaig esig afa gafugam mas oniginam gafugafei afa ehe mo fa wa wagiaka eso elni lala fukwapefiaka. Afa ehengel elim mo sumi wagnag afa mingnagna gawigim nangugum afa ehe membeg heafna onigig isug so bu sahoi afa mo bihig mas elim kweagfu so enam sihiagig.  
\v 14 Eso ka membeg kwablog bulwag angwafig so ma piske ligag wa gai afa luwalna fei afa lalam numwehiagei. Afa enaig eseba angoluwag el mas bigim amtakwalig mo sihigoni.  
\v 15 Afa mingnag bulwag angwafig lahlag mina wahigim Satanna minam pahluhug.  
\v 16 Afa nengel angwafig Godum eso olug onigini eso bulwag angwafig nengel nai yi gofiba so na enag angwafigim kweagfu. Afa ne siosna ninga wa wahibi masa sios enag kinig fa fe. Eso sios so ma bulwag angwafig nemug mungom kweagfui.   
\s1 Siosna misog elni mo  
\p
\v 17 Afa siosna misog el hugna lahlag gafugafe afa enaig el eso sihiagim afa wagfunagim eso sios el enaig elim lahlafe finim afa kig gaba lahlag faif.  
\v 18 Afa Godna mo enaig esog;  
\q1 Afa mahim bulmakau wit wambugum gafuga ofefiba ese ne negim kwenaf. \rq Lo 25:4\rq*  
\p Afa ming mo enaig esog;  
\q1 El so gafugafeg so ma kig fai. \rq Luk 10:7\rq*   
\p
\v 19 Afa el misog elim osehinifiba nofeka enag mo higim. Afa so sambaga me awai sambaga mungo el mungwal mungo mom osehififibi eba so higim.  
\v 20 Afa misog el amtakwalig eseba so na ambagwa siosna nof wa sihibi so ma mingnag enam nangunim embefini.   
\p
\v 21 Afa ka nem kifutig mo osihina God, Krais Sisas, afa Godna ofwanai elni nof wa ka ohuna mo nem osihina so na kana mom lahlag kikehlaf afa mang eso ne eseg so na mungwalofug gwenaig mungwali elim eseni nofeka nimbeafna hihe mungo onigig.  
\v 22 Afa nofeka ikagna elim ningana kikehlanam eso ne esog ne Ainiyagna gafugag kehlagim. Afa enag el eso amtakwalig wa peiba eba neana moawa ne gaba amtakwalig eseg. Afa nimbeafna nihe so na afsug gofum.   
\p
\v 23 Afa Timoti gih ne wafaf eso nofeka bu bihig ne so na wesig wain bug ne so ma neana atagim kweagfui.   
\p
\v 24 Afa mingnag elni amtakwalig ati ambagwa feg afa mungwali anwanafig Ainiyag so ehem kwefihianugenam eso tautig faif. Afa mingnag elni amtakwalig meagam agfoihe eso sumi yi ambagwa puguf.  
\v 25 Afa lahlag nihe gaba ambagwa feg afa mingnag lahlag nihe ambagwa feg mo eba mas meagam seahui.   
\c 6  
\s1 Isug gafugag elni mo  
\p
\v 1 Afa isug gafugag el eso Godum olug onigig eso ehengel heafgelni misog elim lahlafeni afa gafugag lahlafei eso afwambanai el esi Godna unehlag mi afa bigelni mog mom wagfunag mi amtakwalig mo faif.  
\v 2 Afa misog el eba Godna el fegba masa isug gafugag el enaig esof, “Afa misog el kana nilite lofeg” eso ehe mas ehena lahlag gafugafei. Amo, ehengel so hugna ehenge pusug. Eso ehengel Godna elim kweagfugim afa enaig elim membenig.  
\s1 Kig fagim hugna membenag mo  
\p So na ohuna mom wagfunugum afa sihinuge.  
\v 3 Afa aman el eso enmuna mo wagfunag afa mas Ainiyag Sisas Kraisna inim moi afa mo lahlag nihe minam wagfug eso enam kusiba,  
\v 4 afa enaig el eba tutonbusug el feg afa ehe anwana eteti. Afa ehe membeg wesig mom esi eso hefum esim osum fiahgig afa moanagig. Afa enaig mo wa ohunaig onigig puguf elim filafeg, afa elim ismunagim waginig, afa elim amtakwalig mo sihinag, afa elim ismunagim sehinig,  
\v 5 afa elim mas lahlag wangafi. Afa ehengelni onigig amtakwalig eso inim mo mas ehengelni goh mo. Afa ehengel enaig esogog, “Ka Godna mo wa ka fiba ka enaksag gawig wambug gofif.”   
\p
\v 6 Afa el Godna mo pahluku afa ehe enaig esog, “Mang gawig so ka feg eba kati yuhwafeg.” Afa enaig elbi mas tumeni ofenaiba enaksag gawigna el lofug feg.  
\v 7 Afa mahim bigim afag fokwanaba mas big mang gawig kehla bona mo ohuna bite wa. Afa mahim bigim awahafiba big mas mang gawig wambukui.  
\v 8 Afa big fane i afa lofug i fef eso big enaig esog mangwesei.  
\v 9 Afa aman so hugna onigig og ka enaksag gawig wambu eso Satan ehem gihnagba eso ahanaig ahanaig amtakwalig onigig fegba eso ehem wegmosug fe fatig. Afa enaig onigig obu seahug afa ehem ati amtakwalig fatig.  
\v 10 Afa kigim membeg nihe eba enaba mog feg eso ahanaig ahanaig amtakwalig onigig ehe nai yi fapukefeg. Afa mingnag el enaig onigig fig eso Godna mina eteti wahigim afa enaksag ahanaig kinig fig.   
\s1 Pol Timotim onigig faina  
\p
\v 11 Afa ne Godna el feg eso enaig nihem embem hilfuka. Eso neana nihe enaig suf eseg so na Godna sawieg pahlukui afa Godna nihe esei afa Godum olug oniginai afa elim membeni afa kinig ne pugunaiba eso ne kifuti goh afa elim afafnam fenugei. So na ohuna nihem hugna kehla.  
\v 12 Afa el eso wagi kikini fakaf so na enaig ese Sisasim olug oniginam kikini enaig kaf eba nimbe higeg nofkenagag fafe. Afa mahim ne enaksag elni nof wa enaig sihifenaba kaba Godna el eso God nem gisfu wahiag eso ne enag nofkenagag fafe.  
\v 13 Afa mungwali gawig eso nofkena feg God ehe mog enag nofkena faig. Afa Krais Sisas heafna lahlag mo Pontius Pailatim sihina. Afa eheningina nof wa ka nem enaig esona,  
\v 14 Enag mo eso God nem faig eso ne enam lahlag gafugafe ese el enanai yi nuhwef mo nanguf. Eso ne enag gafugag kehla okwian eso Ainiyag Sisas Krais bof.  
\v 15 Afa lahlag osuna God ehe ati gisfu wahiag eso Sisas ambagwa puguiba big nanguf. Afa God eba lahlag ehe mungwali gawigim nangwaghiageg, afa ehe mungwali misog elni misog feg, afa ehe Ainiyag mungwali ainiyagim nalig fenig.  
\v 16 Afa ehe mas wahai afa ehe afwambusug nalig nafeg mas aman ika muhwa fenai. Mas aman ehem wesig ga mo nangug mo afa mas aman ika ehem gaba nangui. Afa heafna kigmog gwenaig higeg goh afa big so heafna unehlagim fingi fif. Ei, eba inim.   
\s1 Enaksag gawig elni mo  
\p
\v 17 Afa el enaksag bitenai gawig nafeg so na enaig elim enaig sihifeni og, nofeka tutonbusug el fi. Afa ese enaig onigifif ma kiafna gawig kam kweafuf, amo Godum mungo so na onigini eso ehe bigim mungwali gawig faig eso big enanai yi lahla augu fenam eso sifakalif.  
\v 18 Afa so ehengelim sihini nihe lahlag fi afa enaksag lahlag gafugafi. Mingnagim kwegfwag onigig esenaf eso nimbiafgelni gawig enaksagna kwagani.  
\v 19 Afa enag nihe eba mina eso ehengel hefum enaksag gawig agogluigim eso autunai wa wambuf. Eso nofkenagag fif afa enag nofkenagag eba inim nofkenagag.   
\p
\v 20 O Timoti, gafugag so God nem faig so na enam lahla fiafai. Afa mingnag mwakwalule el enaig esog kagelni anwana onigig eba lahlag afa enam mo bihigim so flafihiagigim afa amtakwalig mo sihig. So na enaig elni mom membifeni.  
\v 21 Afa mingnag el enaig mom sihigim eso Godum olug onigig ena mina ati wahig. Sa ma God afoahlanam nengelim isug kwagani.