\id REV - Amanab NT [amn] -Papua New Guinea 2001 (DBL 2014) \h Sumi Yi Puguiag Mo \toc1 Sisas Jonim Sumi Yi Upuguiagim Ogfuna \toc2 Sumi Yi Puguiag Mo \toc3 SPM \mt1 Sisas Jonim Sumi Yi Upuguiagim Ogfuna \imt1 Hwa buk enaig esog \ip Maia el Kristenim amtakwalig esegonfiniba enanam Jon hwa bukba ginofina. Afa mungwali Kristen enaig onigig, Sisas Krais eba ehegelni Ainiyag feg asa ehengel enag kinig flini. Hwa bukna mogba sama Kristen elni olug onigigim wasnehiageg ese ehegel kinig kwaniam nagufwahibi ehegelim pigalapife. Afa mangwal sumi yi sa pugufe enam hwa bukba lasug mo sihiageg. Afa enanam Kristen eba enaig lasug moba ati awenafini, afa afwambanai el eba mas awenafeg mo. Afa lasug mona mog eba enaig esog. Sisas eba Ainiyag. Asa ehena nigana God angoluwagim mungwali pigalapife. Afa Satanim gafa pigaupife. Afa Sisas maia heafna gafugagim auwigiba afa amban Kristen sa wasinei afohiegim afa mas heafgelni olug onigigim fwatig mo. Eba God ehegelim suialag mungwag faife. Afa ehegel afunam Godim wanig aflafiba asa mas kinig pese puguni. Afa mungwali gawigim God esenibi asa pese mulug apukefe. \c 1 \p \v 1 Hwa bukba God mo Sisas Kraisim fainaba mangwal sa ikagna pugufe. Sisas ambangel sa Godim patalfug enam ogfuni. Ehe enaig esena heafna of lanai elim kam mo faigim ningihiana. \p \v 2 Kaba Jon, mangwal sa ka mungwali fahigiageg nasa ka ambala enam osihi. Hwaba Godna mo afa ena nufuna mom Sisas Krais ogfug. \p \v 3 Amban sa hwa buk osuwigfiba sama sifakale. Ambangel sa higig afa patalfug ena mo hwa buk la go enaig esog mangwal sa sumi yi pugufe ehengel gafa sifakali. Afa mas managei eba ikagna pugufe. \p \v 4 Kaba Jon ka hwa ginof nem elegeg la gohug Esia nai provins sios elim faig. Sama God nem esmunagim kwaganig faibi sama olug enesieg nem gohunifi. Sonaig God bigim fafaife eba ehe autunai fegim afa glaunai feg afa autunai la gafa gwese gofufe, afa elegeg la gohug sungwabug heafna pegag sime la afohie. \p \v 5 Afa Sisas Krais eba nufunam ambala sihiaule afa ehe goseg lahagim afa buihiag, afa ehe mungwali bite nai misog elim Ainiyag fenig. \p Ehe bigim fwina membenigim, afa lahagim asa heafna tafna amtakwalig nihe mo la nai bigim tigfe lambigim, \p \v 6 afa lambkug heafna bog megam aitig fwahagim afa bigim esenigbi asa big pris figim sa big heafna God Apiim gafugafini. Afa sa Sisas Krais ehe wahkig unehlag kwania flanam asa mungwali nangwagihiage gofufe. Eba esefe. \q1 \v 7 Afa sa ne nanguibi leangona wahe blofe afa mungwali el i afa Sisasim tigi kahliule el i gafa asa ehem nangufi afa bitenai el mungwali enaig puguiagim oniginim wewatife. Eba nufunam enaig pugufe. \p \v 8 Afa God Ainiyag ehe mungwali kigmogna feg esog, “Kaba kike ka goseg afa kike ka sum feg.” Eba ehe autunai fegim afa glaunai fegim afa autunai la gwese gofufe. \s1 Jon Kraisim nanguna \p \v 9 Ka Jon nengelni nilite, ka Sisasim patalkugum afa ka enag kinig flag asa ati ne nengel gafa enaig flig. Enaig big esigbi eba ati big wasneigim saiyeg Godna bog megam nenge afo. Afa ka Godna mo sihigba ena nufunam moba Sisas ogfug asa ka enag kinig flagim afa kam Patmos ailan gam ningihig. \p \v 10 Afa enanam Ainiyagna osuna Godna Sungwabug kam sulufla wanikina afa ka higinaba elni mengig la fuf lofug kana masigim fwina moasina. \p \v 11 Enaig esona og, “Mangwal sa ne mungwali fahigegba asa ne buk la ginofenam elegeg la gohug siosim fai. Ena siosba Efesus, Smerna, Pergamum, Taiataira, Sardis, Filadelfia, afa Laodisia.” \p \v 12 Afa koka anwenafe amban maia esogo asa ka wahigife nangunaba afa sa elegeg la gohug lam afohiafna. Afa ena lamba eba gol. \p \v 13 Afa lam olyiba eba el lofug gofenamba afa ehena lofug mo mungwanam peka kigim safla gufna afa minailof fatina enaba gol ehe. \p \v 14 Afa ehena misog i lapog i fwinam busiagena ofenaiba lambo busug enaig fena. Afa ehena nofugba suwi meleg lofug kukoitifego. \p \v 15 Afa ehena mongfifagba ofenaiba kapa yimieg ombusug afa ehena moagba ofenaiba bu sisewug kwania lagi. \p \v 16 Afa ehe heafna nihiginai ningana elegeg la gohug bagnofut kike lambgu. Afa ehena mengig la naiba bainat sambaga sig ahgo enaig pugukag. Afa ehena nofbusugba osu lofug fwina pukofakag. \p \v 17 Afa maia ehem nangugba afa ehena kig mong la kam pegim lahag lofeg. Afa sa kam heafna nihiginai ningana tuhugim afa esog, “Nofeka embefe, eba kikehe gof fegim afa ka sumi feg. \p \v 18 Afa ka kike nofkikena feg. Autunam ati kam lahana, afa sa nangu, ilawaba ka nofkikena wahkig gofufe. Asa lahag i afa melig pigiegna kembig i ambe kam ahnai skaufenig. \p \v 19 “Afa sa ati ne enaigim nangug haig haig sa ilawo go afa haig haig sumi yi pugufe, sa ne enam ginofe. \p \v 20 Afa mangwalim sa ne lambusig ena mogim ka nem osihina. Elegeg la gohug bagnofut kana nihiginai ninga la go eba elegeg la gohug siosna of lanai el afa elegeg la gohug lam eba elegeg la gohug sios.” \c 2 \s1 Mo Efesus gam ikana \p \v 1 Ena moba maisim sihiagofna Sisas enaig esona og, sa ne ginofenam Efesus lanai siosna of lanai elim fai. Afa el elegeg la gohug bagnofut nihiginai ninga la lambigim asa elegeg la gohug lam golna olyi ika asa hwaba ehena mo. \p \v 2 Ka ati anwenafeg mangwal sa ne fiagigbi eba ne wasneigim afa ne gwesim fwina gafuga fiaka. Ati ka anwenafeg sa ne amtakwalig elim lambinam ningitigi. Afa el mwakwaligim enaig esogo kangelbi siosna kanog fwatieg el fig afa sa ne enanai yi fahiginigenam sa anwenafi eba mango nufuna mom mo. \p \v 3 Afa ne kana gafugaba feafoba afa sa ne ena kinigbi fligim afa mas ne yiskosinim fwahi. \p \v 4 Afa ka nem osehtigi ne mas kam fwina membinig mo sa ne ilawana esini. \p \v 5 Sa ne enam numwehe onigig autunam sa ne afohieafna enanamba ne ihlafini asa ne olug waikefi ilawana sa ne esig. Afa ne enaig esig fwainigba eba ka blonam neana lam flakun fie eba mas ne afofi. \p \v 6 Afa eba ne suialag olug ufufba, ne Nikolasna elni nihem na olug kakagegonig kable sa ati ka enaig eseg. \p \v 7 Afa amban ne anganaba eba sa ne ena mo higim Godna Sungwabug sa siosim sihinig. Afa amban ne haig haig amtakwaligim filafe fatiba eba ehem fwahaiba sama li fug nofkikenagag faiba sa ma nei. Ena libi Godna aso la heven la go. \s1 Mo Smerna gam ikana \p \v 8 Ena moba maisim sihiagofna Sisas enaig esona, sa ne ginofenam Smerna lanai siosna of lanai elim fai. Afa enag el ehe gof fegim afa ehe sumi feg enag elbi ehem ati lahagim afa ehe pese nofkikena gohug. Hwaba ehena mo. \p \v 9 Afa ka ati anwenafeg ne kinigni feg afa ne gawig fwainig feg afa enaba nebeba numwehifie. Afa minganag esofog og kaba Ju el eba ehe mwakwalig afa eba ehe Satanna lala nai el afa ati ka anwenafeg eba ehe nem amtana mo osihigoni. \p \v 10 Afa maia enaig susug nem sumi yi opugunifibi nofeka embefi. Sa hig ka nem osihin Satan eba nem gihnag fainim afa nem lambinam kalabus lala aitife afa sa ne 10 pela osuna haig haig kinig nem faifie. Afa sa ne kam patalfehfu maia el nengelim kwagi klaitibi eba ka nem suialag misog lofug faifi. Sonagba ogfug ne fagim flafoaule el eba ne enag nofkikena gag flifi. \p \v 11 Afa amban ne anganaba eba sa ne ena mo higim Godna Sungwabug sa siosim sihinig. Afa amban ne haig haig amtakwaligim filafe fatiba eba angigieg lahag mas ehem pugunai. \s1 Mo Pergamum gam ikana \p \v 12 Ena moba maisim sihiagofna Sisas enaig esona sa ne ginofenam Pergamum lanai siosna of lanai elim fai. Afa enag el bainat sambaga signa enaig nafeg. Hwa ehena mo. \p \v 13 Afa ati ka awenafeg nengelni kembigba Satan enanai yi misog el feg. Afa ne mas kam mas fwatinag mo. Afa maia Antipasim kam ambala patalkuiaule el enanai yi ehem tigifatigbi afa ne gweseg kam oniginag na kehlagu. \p \v 14 Afa ka nem osehtigi afa minganag el gwese Balamna onigigim patalfuia. Autunam Balam Balakim mina toahlanag ogma Israel elim amtakwalig nihe la saiye afa sama mwakwal gotim faig fane ahagai afa sama apukenam aga taituna afui. \p \v 15 Afa minganag gwenaig esig Nikolasna elni nihem ogfugonug. \p \v 16 Afa sa ne olug waikefe afa ne awaiegba eba ka mas managei eba ka blonam kikeafna mengig la nai bainatna sonaig el i ahuflafe. \p \v 17 Afa amban ne anganaba eba sa ne ena mo higim Godna Sungwabug sa siosim sihinig. Afa amban ne haig haig amtakwaligim filafefatiba eba ka ehem meaganai heven la nai amba seflig mana faifie. Afa ka ehem fun busug, mulug unehlag enanai yi go enag ka faifie. Afa amban sa flag eba ehe mungohe enag unehlagba anwenafeg. \s1 Mo Taiataira gam ikana \p \v 18 Ena moba maisim sihiagofna Sisas enaig esona sa ne ginofenam Taiataira lanai siosna of lanai elim fai. Hwaba Godna legna mo. Heafna nofugba suwi mileg lofug kukoitifego afa ehena mong fifagba eba mulug kapa lofug. Afa ehe enaig esog. \p \v 19 Afa ati ka anwenafenag ne enaig gafugafeg, afa ne kam oniginag afa elim membenigim afa ne kwaganig afa ne wasneigim afa ne haig haig kinig flag. Afa ilawo ne gafugafegba eba gwesim hilefego. \p \v 20 Afa ka nem osehtigi afa ne mas Jesebelim kwini mo enag angwafig ehe enaig esog og, “Kaba Godna mo fla sihiakaule” afa ehe kana gafugag elim mwakwalenigim afa ehe aga taitunagim ogfuhiageg afa mwakwal godna faig fane ahagagim ogfuhiageg. \p \v 21 Ka ehem fwahag sama sonag angwafig heafna amtakwalig nihem fwahai. Afa ehe mas nihem fwahag mo afa ehe olug waikefegim oksina. \p \v 22 Afa ehe gwenaig esig fwainigba eba ka sonag angwafigim gih fainam afa ka ehem afa ambangel sa ehem fapukefe nafo enam ka lambinam asa ka kifegam lambi taitinam afa sa ka kinig kwania ehengelim faifie. \p \v 23 Afa ambangel sa ehem patalfug eba ka ehem gafa kwagi taitife sama mungwali sios el enam anwenafi kaba olugim afa onigigim fahigeageule asa ka mungu mungu ehengelim mungwag gwena susug faifi. \p \v 24 Afa nengel amban Taiataira nai el ne mas ena angwafigni nihem patalfu mo afa ne mas anwenag flig mo asa seflig Satanna meaganai mo. Afa ka nem enaig sihifenig ka mas nem ming gafugag fai. \p \v 25 Afa sa na kam oniginig gwese wasnei kehli ufufiba sama ikan kike blog la pugui. \p \v 26-27 Afa ambangel sa fagim filafigim afa sa kikeafna gafugag la gwenaig esiafuian ikan asa mungwali awaieg la pugufe eba ka ehengelim mungwalofug unehlag kikeafna alag sa kam faig eba sa ka ehem faibi asa ma ehengel mungwali elim kwefihianig ofifibi eba mas mangwal weti eyi fwahi eba enaig elim lambinim pwapo mungwali lambi kigafibi asa ofenaiba bite munug lofug enaig esifi. \p \v 28 Afa mingba ka leana nai bagnofut ombusug ehem faife. \p \v 29 Afa amban ne anganaba eba sa ne ena mo higim Godna Sungwabug sa siosim sihinig. \c 3 \s1 Mo Sardis gam ikana \p \v 1 Ena moba maisim sihiagofna Sisas enaig esona sa ne ginofenam Sardis lanai siosna of lanai elim fai. Ena el elegeg la gohug sungwabug Godna ehenai yi gohug afa elegeg la gohug bagnofut ehenai yi go afa sa enag el enaig esog kati anwenafeg mangwal sa ne mungwali eseg. Afa el nem nangugbi eba ne nofkikena go afa eba ne melig lahag lofeg mas ne nufuna gafugafeg mo. \p \v 2 Is, nofeka nongi, sa buihia! Afa nimbeafna suialag nihe amtakwaligim ati meiofe sa ne enam wasnei afla. Afa neana gafugag kana Godna nof la eba mas ihlafeg mo. \p \v 3 Sa ne pese onigim mangwal sa ne higigim afa flag sa gwenam patalkunam sa ne olug waikefe. Afa ne enaig esefe ofe el nongi eba ka ukwef el lofug blofe afa mas ne kam anwenafenai sa ka ahnana neanangum blofe. \p \v 4 Afa mungu mungu el Sardis lanai mas heafgelni nihi lofugim nufwehe skofig mo. Eba ihlafifie busug lofug laitinim asa ka afuamine fififie. \p \v 5 Afa ambangel sa fagim filafig eba ehengel gafa busug lofug laitifi. Afa mas ka ehengelni unehlagim nofkikenagag buk la susuleni. Eba ka kikeafna api mi afa ehena of lanai el mi sihinfie hwa kana el. \p \v 6 Afa amban ne anganaba eba sa ne ena mo higim Godna Sungwabug sa siosim sihinig. \s1 Mo Filadelfia gam ikana \p \v 7 Ena moba maisim sihiagofna Sisas enaig esona sa ne ginofenam Filadelfia lanai siosna of lanai elim fai. Ena elbi afsug fegim afa nufunam feg hwaba ehena mo. Afa enaig eseg Devitna ki gufnaba asa ehe Israelim nangwage hiagegofna, ena elbi heven ki kehlagu asa ehe mungwali nemug nangwage hiagego. Afa ehe mangwaliba pigiba eba mas amban kikise afa ehe mangwaliba kikiseba eba mas amban pigi. Enag el enaig esog. \p \v 8 Ka ati anwenafeg mangwal sa ne fiagig. Sa nangu, mengigba ka nem pigi fwahanag afa mas amban kikise. Ati ka anwenafeg ne gweseg maisim weti wasneigbi gu afa ne kana mo kehla gwese ukwia afa mas ne kana unehlagim mas fatinai. \p \v 9 Afa Satanna lala nai el ehe esogog ka Ju el eba ehe mwakwalig eba ka esinibi asa ambe nengelni kigmongug la apaiyenam afa ehengel anwenafi ka nem fwina membinig. \p \v 10 Afa maia enanam kwania kinig mungwali bite la pugunam elim yuhug faibi. Afa kana mo enaig esog sa numwehe wasnei afofum asa ati ne ena mom patalfug, eba ka nem nangwaghiage gofufe eba mas nem amtakwale saiyi. \p \v 11 Afa eba ka ikagna blofe. Sa ne kam olug onigig wasneig kehli ufu afa masa ukwef el nem haig esegonibi afa maia ne Godna kembig la apukegba eba God mas nem mangwal suialag fai. \p \v 12 Afa amban sa fagim filafeg eba ka ehem sumul lofug kikeafna Godna lala ugu fwahaiba eba mas ehe wahkig enanai fwaha fakafegofi. Afa eba ka kikeafna Godna unehlag i afa heafna kembigna unehlag i ka ehem ginofenafe. Afa eba mulug Jerusalem kikeafna God ningihiaiba asa hevenim fwahanam pe blofe. Afa ka kikeafna mulug unehlag ehem gafa ginofenafe. \p \v 13 Afa amban ne anganaba eba sa ne ena mo higim Godna Sungwabug sa siosim sihinig. \s1 Mo Laodisia gam ikana \p \v 14 Ena moba maisim sihiagofna Sisas enaig esona sa ne ginofenam Laodisia lanai siosna of lanai elim fai. Afa el sihi og, eba esefe hwaba ehena mo. Eba Godna mungwali sawiegim patalkuiaule afa Godna mo nufunam sihiaule. Afa God sa mungwali gafugag fiageg eba ehe mog feg. Ehe enaig esog. \p \v 15 Ka ati anwenafeg mangwal sa ne fiagigbi eba mas ne kam patalkuiagim fwina wasneig mo afa ne mas fwina yiskoseg mo. Hanai yi ne afofufe? Sa ne gosi me awai sumi yi me. \p \v 16 Eba ne olyi gohug ka mas enaigim membeg mo eba ka nem ningihiafe ofenaiba el melfu aitig asa ka nem enaig esenifi. \p \v 17 Ena ne enaig esogog, “Ka kikeafba kaksag kig i gawig i fiasaieg. Ka kikeafba ati ihlafeg.” Afa ne mas anwenafig mo nengel eba amtakwalig el gawig fwainig afa ne nofug etetini afa ne lofug fwainig elig behig. \p \v 18 Sa ne kana onigig flinim asa ne kana gol yimieg nemug kam baimini afa sa ne kig kaksagna el finim asa ne kana busug lofug lambinim asa ne nembeafna eligim kikagu fiaginim afa sa ne kana nofug marasin lambinim sa ne nimbeafna nofug la laitiagibi eba sa ne fahigiagifi. \p \v 19 Afa ambanim sa ka membenag eba ka ehem ninimuiaflaiba asa ma suialag el fe. Asa ne wasneinam olug waikefe. \p \v 20 Sahig, ka neana olug yi tigego ne amban higinam sa ne olug pigiba ka sa blonam enanai yi sefuganam ka sa fane ahne. \p \v 21 Afa amban ne haig haig amtakwaligim filafefatiba sama ka i hawaganam asa ka mungwal nangwagehiag ahfegofufe asa ka haig haig amtakwaligim filafefatig asa ka gwenaig kikeafna Alag i safeg. \p \v 22 Afa amban ne anganaba eba sa ne ena mo higim Godna Sungwabug sa siosim sihinig. \c 4 \s1 Jon itila lofug hevenim nanguna \p \v 1 Afa ka mingim itila lofug nangunaba mengig heven la pigi gofena. Afa ka higinaba elni mengig la fuf lofug fwina moasinam afa esona og, “Au sis gam fuko blo ka nem mungwali mangwal sa sumi yi puguiagegim enam ka nem ogfuna.” \p \v 2 Afa ikagna Godna Sungwabug sulufla heven gam wanikanam afa ka nangunaba el enanai yi misog elni pegag sime la gafena. \p \v 3 Afa ena elbi ehena nofbosugba tafnaiig i gwemaug i enaig ginofna fena enaig funba kig numweheg. Afa tafnag pegag simem wagi go fakana. Ena tafnagba yibiyibug fakanam fwina tonbusiagenam enaig gwemaug fun bus lofug. \p \v 4 Afa mingba 24 misog elni pegag sime ena simem wagigo fakana. Afa 24 saglag el nanai yi auguiafna. Afa busug lofug i afa misog elni gol misog lofug enaigna fiasaina. \p \v 5 Afa enag olyi sime la asa afwei ifiyi ifiyi fiagena afa hug fwina pialele fenam lag kanam afa elegeg la gohug lam ehena nofbusug gam afohiafna. Eba elegeg la gohug Godna sungwabug. \p \v 6 Afa gwenanai yi bu kwania la glas lofug gifini. Eba fwina ombusiagena. \p Afa olyi nai sis lofug sambaga sambaga nof blistanig simem waki fakana. Afa ehengelni nihi yi kaksag nofug afohiegna gifini, fig nofbusug gam afa masigim. \p \v 7 Afa angigba eba ofenaiba laion lofug afa angigiegba eba ofenaiba bulmakau lofug afa olyinaiba eba ehena nofbusugba ofenaiba el afa figniegba eba ofenaiba osianig efugukag lofug. \p \v 8 Afa mungu mungu ehengelni anglagba eba enwesog la gohsaina afa nofug munggwali eligim gohsaina afa anglag skau gohsaina. Afa osuna i afa sinaini i ehengel mwanifi yi gwese fagohegoba og; \q1 God eba wasnei nemug feg ehe afsug feg, afsug fegim, afsug nemug feg. Eba ehe autunai fegim afa glaunai fegim afa autunai la gwese gofufe. \p \v 9 Afa ena sis sambaga sambaga blistanig afohiegim afa enaig mwanifi fatig og, Ne God fwina kwania nemug feg, afa mungwali haig haig gawig nem ahnai skaufinigim afa nem suialag onig. Afa sa elim wahkig ena sime la gaulem esinig. Maia enaig esinibi \p \v 10 asa 24 saglag el ehenai yi apaiyegim afa sonag el eba wahkig gohug ehena unehlagim fingi fig. Afa heafgelni misog elni misog lofug ehenangum lambi aitinig enaba ogfuni og ehe kam nangwaghiawagig wasnei faig afa kagel ehem ahnai skaufinig. Afa ehengel enaig esogona og; \q1 \v 11 Ne kangelni Ainiyag fegim afa God feg. Asa mungwali sama neana unehlag fingi finim afa mungwali nem ningmaginim afa ne kigmog flag afa mungwali gafugafiageg eba nimbiafna sawieg la ne esegba asa gohug. \c 5 \s1 Hwa moba pepa moanmoanig fakig i afa sipsip i \p \v 1 Afa ka nangugba el misog elni pegag sime la gafenaba afa nihiginai ningana pepa moanmoanig kehla uguiafna. Enaba ginof enanai yi ohogam gohna afa ehegam gohna enaig elegeg la gohug ugwanina pakopako fenagini. \p \v 2 Afa ka higinaba Godna of lanai el wasneig el enaig lagfegofena og, “Amban el sa unehlana feg asa ena ugwaniniba hugfo taitinam asa pepaba pigife?” \p \v 3 Afa heven lanai yi, bite nai yi, afa bite menai yi amban el mas ihlafeg mo pepaba pigigim afa enam nangug mo. \p \v 4 Afa ka fwina enam ufwena afa mas amban ihlafeg mo pepaba pigig nangwagba. \p \v 5 Afa ena saglag el blog kam sihina og, “Nofeka ufwe, sa nangu, ena elbi eba Juda nai Laion afa ehe Devitna simbianinga ehe ati fagim filafeg fatig. Eba ehe ihlafefe ugwaninim hugfo taitinam asa pepaba pigife.” \p \v 6 Afa ka nanguba Sipsip Luwalig pegag sime olyi goh. Afa ena simem sambaga sambaga sis blistanafeg afa saglag el enam wakig fakag. Sona sipsip ofenaiba ati lahag afa mas lahag mo. Afa ehe elegeg la gohug aninguog nafeg afa elegeg la gohug nofug feg enaba Godna sungwabug elegeg la gohug God mungwali bitem ningitigi. \p \v 7 Afa ehe blogim el pegag sime naina ena pepa nihiginai ninganai flag. \p \v 8 Afa maia ena pepa flanaba afa sa sambaga sambaga sis blistanig i afa 24 saglag el i Sipsip Luwalig nai yi apaiyena asa ehena unehlag la fingi fig. Afa mungu mungu moag lagwagig lambwagini afa sanda gol disni flini eba suialag fungugni feg enaba Godna elni beten. \p \v 9 Afa ehengel mulug mwanifi enaig fatifini og; \q1 Eba ne pepa flanam ihlafefe ugwanin hugfo aitife, haisegba eba ati nem tigigbi ne lahagim afa taf sugfogim enana elim mungwali mungwa usumuna, afa haig haig mona, afa haig haig lofugna, afa haig haig kembig afa sa lambigim God nangum lambig lamblug pugug. \q1 \v 10 Afa ne ehengelim esinigbi asa pris figim afa sa bigelni Godim gafugafinig asa ehengel mungwali bite nangwaghiagife. \p \v 11 Afa ka nangunam higinaba of lanai el fwina kaksag fiagena afa haig suwigih mo. Enag pegag simem, afa sis blistanig mi, afa saglag el mi enam waki fakana. \p \v 12 Afa sa mwanifi fwina fatini og; \q1 Ena Sipsip Luwaligim tigifatigbi lahag ehe ati ihlafeg eba ehe kwania kigmog feg, afa mungwali gawig feg, afa mungwali anwenafig, afa wasneig feg, afa mungwali ehem ahnai skaufinigbi asa ehe sisi feba afa sa bigel ehena unehlagim fingi fifie. \p \v 13 Afa ka higinaba heven lanai yi, afa bite nai yi, afa bite menai yi, afa bu menai yi enag mungwali God sa gafugafena enag ehengel mwanifi fatini og; \q1 Afa el sa pegag sime la gag mi afa Sipsip Luwalig mi afa sa bigel wahkig eheningina unehlagim fingi fiawag gwese ufufim eba enaig eseg sama mungwali eheningim ahnai skaufegonibi asa eheningi sisi ahfefe afa eheningina wasneig gwenaig wahkig gwese ahgofufe. \p \v 14 Afa sambaga sambaga sis blistanig esog, “Eba esefe” afa saglag el apaiyenam eheningina unehlagim fingi fiawagig. \c 6 \s1 Sipsip Luwalig ugwanin hugfo taitig \p \v 1 Afa ka nangunaba pepa la ugwanin elegeg la gohug enaig afohiafna afa Sipsip Luwalig angig ugwaninim hugwafugba afa ka higigba mungu sis blistanig enaig moasifeg ofenaiba hug, Ehe enaig esog og, “Aublo!” \p \v 2 Afa ka ena nangugba el busug hos la fango lambuguia. Afa ehe fagim filafeule elni misog lofug flauguia. Afa ehe fag la akog eba ehe fagim filafeule el lofug feg. \p \v 3 Afa maia Sipsip Luwalig angigieg ugwaninim hugwafugba afa ka higigba angigieg sis blistanig enaig esog og, “Aublo!” \p \v 4 Afa ming hosba eba tafnaig puguna. El enanai yi gagim God ehem esonag og sa ne enaig gafugag bite la esegba asa el hefum fagna hagim kwagaitifig. Afa God ehem bainat kwania faig. \p \v 5 Afa Sipsip Luwalig olyinai ugwaninim hugwafugba afa ka higigba olyinai sis blistanig enaig esog og, “Aublo!” Afa ka nangugba el yimilig hos la skel flauguia. \p \v 6 Afa ka higigba elni mengig lofug sambaga sambaga sis blistanigna olyi enaig lagofena og, “Fane tumeg, el sa mungu osuna gafugafeiba asa kig flanam ena kigna weti fane wit i bali i lambtigi afa nofeka oliv wel mi afa wainbug mi amtakwalig fatiauwag amo asa ma gwese ahgofi.” \p \v 7 Afa maia Sipsip Luwalig fignieg ugwaninim hugwafugba afa ka higigba fignieg sis blistanig enaig esog og, “Aublo!” \p \v 8 Afa ming hosba eba sifikolugum ka nangugba. El enanai yi ga afa ehena unehlagba ‘atilahag’ afa melig pigieg kembig lanai ehem masigim patalfuia. Afa ehengel wasneigni sa figbi asa elim enanai yi pigig eba enaig eseg el fag hagig, afa bini pigi, afa gihe skofeg, afa sangwali sis kwaskofig. Afa enanam sambaga sambaga simbianinga augunaba asa mungu simbianinga namo pigina afa sa gwenaig esefe mungwali bite enaig pugufefe. \p \v 9 Afa maia Sipsip Luwalig afam ugwaninim hugwafugba sa ka nangugba elni sungwabug Godim faig sime la, skau afohiafna. Afa sonag el Godna mom oniginim sihiafuiag ehengelim kwagig klaitig. \p \v 10 Afa ehengel enaig fwina esogog og, “Ne Ainiyag wasneig ne afsug feg afa nufuna nemog feg. Afa ahnana ne bite nai elim kwefihiagefe afa sa ne susug mungwag faig asa kam kwaskofig?” \p \v 11 Afa God ehengelim lofug bosug faigim afa sihinig og, “Sa mwakwalig nengefiba maia ikan minginag gafugag el mi afa nilite el mi kwagi klaitiba asa enag ihlafefe eba enanam God mungwag esenife.” \p \v 12 Afa ka nangugba Sipsip Luwalig enwesog ugwaninim hugwafugba. Afa sa asag kwania pugug ilafogba asa osu yimilig pugug ofenaiba yimilig wula afa was tafnaig pugug ofenaiba taf. \p \v 13 Afa bagnofut of lanai fagahiagim bite gam apaiyeg ofenaiba efef maia blog ifum fisap skofegba asa yifu ambug pwatihiag apaiyegog. \p \v 14 Afa of gweyi awaiyeg ofenaiba kombke moanmoanig fakig afa mungwali mug i afa ailan i heafna kugim fwatig afuahie. \p \v 15 Afa enanam bite nai misog el i, afa saglag el i, afa amini misog el i, afa kaksag kig el i, afa wasneig el i, afa esug gafugag el i, afa mungwali el enag embem afunam mug la saiyeminefefe. \p \v 16 Afa sa mug mi fun mi esogonifi og, “Kam meagam lambi kumu masa el pegag sime nai kam nangwagfe afa enaba masa kam Sipsip Luwalig amtakwalhiagefe. \p \v 17 Enag kwania osuna asa eheningi olug kakag ahfeba afa sa amban mas enaigim kweagfui.” \c 7 \s1 Godna of lanai el Godna elim ginof faka fwahanig \p \v 1 Maia enaig awaienaba, afa ka nangunaba sambaga sambaga Godna of lanai el sambaga sambaga bite ehbegam afohiafna. Ehengel sambaga sambaga efefim kwenagim lambug afo asa efef mas bite mi, bu mi, afa li ni sahini. \p \v 2 Afa mingba of lanai el osu puguiag lanai blogim nana Godna ginof fakag flauguhba. Afa ehe sambaga sambaga of lanai elim fwina unenig. Ehengelim God wasneig faig sa ma bite mi afa bu mi afa li mi amtakwale fati. Ehe enaig esonig og, \p \v 3 “Nofeka ahmona esi. Kagel ma Godna gafugag elim mingig la ginof skonibi asa ne sumi yi enaig mo esi.” \p \v 4 Afa ka higigba hanansi el Godna ginof lambig. Enaig pugufeg 144,000 feg afa Israelna 12 pela simbianinga mungwali el feg. \li1 \v 5 Afa enaig eseg, Judana 12,000 simbianinga puguiageg \li1 afa Rubenna 12,000 simbianinga puguiageg \li1 afa Gatna 12,000 simbianinga puguiageg \li1 \v 6 afa Aserna 12,000 simbianinga puguiageg \li1 afa Naptalina 12,000 simbianinga puguiageg \li1 afa Manasena 12,000 simbianinga puguiageg \li1 \v 7 afa Simeonna 12,000 simbianinga puguiageg \li1 afa Livaina 12,000 simbianinga puguiageg \li1 afa Isakarna 12,000 simbianinga puguiageg \li1 \v 8 afa Sebulunna 12,000 simbianinga puguiageg \li1 afa Josepna 12,000 simbianinga puguiageg \li1 afa Benjaminna 12,000 simbianinga puguiageg. \s1 Kaksag el busug lofugna feasaina \p \v 9 Maia enaig awaienaba afa ka nangugba afa el fwina kaksag feageg afa el haiseg suwigih mo. Eba mungwali mungwa usumuna, afa haig haig kembig, afa haig haig lofugna, afa haig haig mona enag ehengel busug lofug laitiagigim afa li fegeg lambug afo. Sonag el, el pegag sime la gag mi afa Sipsip Luwalig mi eheningina nofbusug la afohieba. \p \v 10 Afa ehe fwina enaig esogog og; \q1 Kagel eheningim sifakal fegonug. Afa kagelni God pegag sime la ga afa Sipsip Luwalig i ehe kam ahlambig. \p \v 11 Afa mungwali of lanai el pegag sime mi afa saglag el mi afa sambaga sambaga blistanig sis la mi enanai yi ambe muhla afohiakanam asa heafgelni nofbusug bite gam apaiyenam Godna unehlagim fingi finim, \p \v 12 enaig esogona og; \q1 Eba nufunam, biafgelni God sisi feba, asa big ehena unehlagim fingi fifie, afa ehe mungwali anwenafeg, sa big ehem suialag oni, sa ma mungwali ehem ahnai skaufini afa ehe wasneig fegim afa kigmog feg. Sa ma enaigna gwese wahkig gofi. Eba nufunam. \p \v 13 Afa saglag el mungu kam sahana og, “Sonag el busug lofugna figbi atiaho ne anwenafeg eba ambangel afa hanai ambeg?” \p \v 14 Afa ka wahigi sihina og, “Saglagluwal, ka mas anwenafeg mo. Sa kam sihina.” Afa ehe enaig sihifena og, “Sonag suialag elbi kwania kinig menai apukeg ambegim afa heafgelni lofug Sipsip Luwaligna taf la gigiafiagigbi asa ehengelni lofug busug feasaieg. \p \v 15 Afa enaig esigbi; \q1 asa Godna pegag sime muhla afohiegim osuna i sinaini i Godna lala gafugagfiafu. Afa sa God ehe nangwagihiagego afa el mas ehengelim pese amtanafehiagi. \q1 \v 16 Afa bini mas pese pigi afa bu hef mas pese feskofe afa osu i afa haig haig i mas aftukuhlaskofe. \q1 \v 17 Afa sonag Sipsip Luwalig pegag sime nai gohugim ehengelim nangwagihiagego, ofenaiba el sipsipim nangwagihiagego. Ehe gose ika sulfu wanblogim nofkikenagag bu faig ofenaiba fun bu. Afa God ehengelni nombim titenigefe asa ehengel mas pese ming kinig flinim wewatigoi.” \c 8 \s1 Elegeg la gohug ugwaninim hugwafugba \p \v 1 Afa maia Sipsip Luwalig elegeg ugwaninim hugwafunaba afa heven lanai mungwali sifinam hap aua gohna. \p \v 2 Afa ka nangugba elegeg la gohug oflanai el Godna nofbusug la afohiaba elegeg la gohug fuf lambig. \p \v 3 Afa ming oflanai el blog Godim faig gol sime la gohba. Ena simeba Godna pegag sime muhla go. Ehe sanda gol disni flaugu eba suialag fungugni feg afa enag kaksag sanda i afa elni beten i lambigim. Afa ehe enanai yi wahenam asa Godim faife. \p \v 4 Afa maia sonag of lanai el sanda disni suwi la tuhlugba asa suwiegig i afa elni beten i namba Godim suialag fungug pugunag. \p \v 5 Afa of lanai el dis flagim Godim faig sime suwi lambig dis yi aitigim maia memtola pugugba asa bite gam kokofeg klaitig afa sa hug fwina pialele fenam lagkafenaba afa afwei fwina falaugu fiafenaba afa asag gweyi ilafona. \s1 Sambaga sambaga of lanai el fuf goagini \p \v 6 Afa enag elegeg la gohug of lanai el fuf lambigim memtola ati kufeg lambfuhie. \p \v 7 Afa angig of lanai el maia fuf gogba asa ais bu fun lofug afa suwi tafna wahenam asa bite gam apaiyenam atiaba sambaga mungu bitefegba maia mungwa mo awaiyeba asa ming sambaga mo ahgofufe. Afa li gwenai esefe atiaba sambaga mungu fegba maia mungwa mo suwi laiba afa sa ming sambaga mo ahgofufe afa sa mungwali suialag pos suwi tuhlu fatig. \p \v 8 Afa maia angigieg of lanai el fuf gogba asa ofenaiba mug enanai yi suwi lasai enag figafogim solwara la peiba afa sa ena bu mugwehegam mo tafna feiba afa sambaganingi mo esug fefe. \p \v 9 Afa bu lanai sisim gwenaig esefe mungwa mo pigiba afa sambaga mo afohiefufe. Afa sip gwenaig esefe mungwa mo amtakwaleiba afa sambaga mo gwese ahgofufe. \p \v 10 Afa olyinai of lanai el maia fuf gogba afa sa bagnofut kwania ofenaiba suwi lagig enaig heven lanai fwahag pe blogim mungwa suialag bu la pegba afa ming sambaga mo esug ahgo. \p \v 11 Enag bagnofutbi ehena unehlagba gifin. Afa ehe maia buum esenagba asa ena bu miaklafeg. Afa maia kaksag el maia ena bu ahagagba asa ehem pigig. \p \v 12 Afa maia fignig of lanai el fuf gogba osu mungwa mo amtakwaleba afa sa ming sambaga mo ahgofufe afa was gwenaig esefe mungwa mo amtakwaleba afa sa ming sambaga mo ahgofufe afa bagnofut gwenaig esefe mungwa mo amtakwaleba afa sa ming sambaga mo ahgofufe. Afa si gwenaig esefe mungwa mo ombusug awaiyeba afa sa ming sambaga mo gwese ombusugugni ahgofufe. Afa osuna gwenaig esefe mungwa mo ombusug awaiyeba afa sa ming sambaga mo gwese ombusugugni ahgofufe. \p \v 13 Afa mingba ka nangugba eba osianig efuguwagiegoba afa ka higigba ehe fwina lagofenaba og, “Hoi, hoi, hoi, mungwali bite nai el niasabanigte afa maia ming sambaga mungu of lanai el fuf goagibi asa mangwal enanai yi pugufe.” \c 9 \s1 Ming of lanai el fuf gogba \p \v 1 Afa ka nangugba afa of lanai el maia fuf gogba bagnofut mungu of lanai fagafonam bite gam pena. Ena bagnofut eba el. Afa ehem ki faibi ena kibi mina tigeflaitiag ki kehlaugu. \p \v 2 Afa maia enag el tigeflaitiag mengig bafogba afa sa ena bume nai suwieg pugug. Enaig suwiegba kwania suwi nai suwieg feg. Afa namba osu mi of mi gigafeg fakagba asa sikulufeg. \p \v 3 Afa suwieg lanai saglig apukegim bite gam afug. Afa ehengelni ninmuiaba gongig lofug. \p \v 4 Afa God ehengelim sihinig og, “Nofeka pos mi, li fegeg mi, afa haig haig fegeg yimilig mi amtakwale skofi. Afa ambangel el sa Godna ginof mingig la gohunug enam nofene ese gon afa sa ne minginagim mungu amtakwale aiti. \p \v 5 Afa sa ne ehengelim susug lambaigoiba sa ma afa pugufeg wasi yi enaig la fei. Afa nofekawo kwagi aiti.” Afa el ena susug flagba eba gongig lofug. \p \v 6 Afa enanam el sa minam yisigifie hefum pigiegim afa eba awai. Afa sa ehengel enaig membig og ma kam pigi afa mas ehem pigina mo. \p \v 7 Afa ena saglig eba enaig feg ofenaiba hos fag la afuofeba hefum wagwagig. Afa ehengelni misog la eba misog elni hat gol lofug laitig afa nofbusugba ofenaiba elni nofbusug lofug. \p \v 8 Afa ehengelni lapo ofenaiba misisna lapog lofug kwina afa ehengelni gog ofenaiba kafana gog. \p \v 9 Afa ehengelni nihiba minailof kapa lofug afohie afa ehengelni lag efugukagna moag ofenaiba kaksag elni watig fag hagig la fafuofe. \p \v 10 Afa ehengelni emblugba ofenaiba gongig emblug lofug afa ehengelni emblug laba nas lofug afohien. Afa sa afa la pugufeg wasi yi enaig susugba elim falambwaigo fiahfo. \p \v 11 Afa ati misog el fenig enaig misog elbi tigeflatiag kembig mina nanguago. Afa hwag misog elni unehlag Hibru monaba eba enaig seflafig ‘Abadon’ afa Grik monaba eba seflig ‘Apolian’ ena unehlag mogba eba enaig eseg ‘mungwali amtakwale hiagofufe’. \p \v 12 Afa ma gof lanai kinig mo awaiyeba afa ming sambaga kinig sumi yi puguiagim mahi ahfe. \s1 Ming of lanai el fuf gofe \p \v 13 Afa maia enwesog of lanai el fuf gogba afa ka nangugba gol sime Godim faig sime Godna muhla gohba afa ka higigba sambaga sambaga ehembeg sime lanai mo pugug. \p \v 14 Afa sona of lanai elim fuf kehlaugu ehem enaig esonag og, “Afa autunam God sambaga sambaga of lanai elim Yufretis kwania bu la kike fwatig sa ne ikanam ehengelim pigi laitin.” \p \v 15 Afa sa ehe ma ika ehengelim pigi fwatiba sa ma afunam elim minginag mo kwagi laitibi afa sa ma sambaga mo ahfofi. Afa God ehe enag sambaga sambaga of lanai elim sa ma ena yiana, afa ena wasni, afa ena osuna gwenanam ehengelim wegi fwatig. \p \v 16 Afa ka higigba ami hos la auguiag ehengelni nambaba 200 million enaig pugufeg. \p \v 17 Afa itila lofug ka nangugba hos i afa el hos la auguiagi. Ehengelni nihi yiba minailof afohien enaba tafnaig suwi meleg lofug, afa ongug umwal fug lofug afa lafweg lambo gigewug lofug. Afa hosna misogba ofenaiba laionna misog lofug. Afa suwi afa suwieg afa salfa ehena mengig la nai apukeg. \p \v 18 Afa sonag sambaga mungu enaig apukenam mungwa mo el ena suwiala pigiba afa sa sambaga mo ahfohie. \p \v 19 Afa hosna wasneigbi mengig la gohug afa efleg la gohug, ehena eflegba sombine lofug misogna feg enana elim susug faig. \p \v 20 Afa ambangel sa mas sona suwi la pigig mo eba ehe mas onigi waikefini mo ehe sa haig haig esig enam. Eba gwenaig maisim esiafu ehe haig haig sanel mi afa mwakwal God mi lotu fegoniafu. Ena mwakwal God eba gol i, silva i, bras i, fun i, afa ungwekig i afa enaba mas nanguinim afa higinim afa afu i. \p \v 21 Afa el mas heafgelni nihem fwahig mo gwenaig maisim el tigifatig i, afa agisu i, afa aga taitu i, afa ukwef i gwenaig go. \c 10 \s1 Of lanai el weti buk kehlaugu \p \v 1 Afa ka nangugba heven lanai ming of lanai el wasneigni pe blog. Afa heafna nihi nai lofug fatiagba eba leangona fenam afa misog sisi mo tafnag fakana, afa ehena nofbusugba ofenaiba osu afa mongug yiba suwi lagi ofenaiba lala sumul suwi lagi. \p \v 2 Afa enag of lanai elbi weti buk ningana bafu ugu. Afa ehena nihiginai mong kwania bu sisi pafe uguba afa sahaganai mong mo bite la pafe uguba, \p \v 3 afa ehe fwina ofenaiba tata gungo amoasi yi afa maia moasigba afa sa elegeg la gohug hug wahigi moasigim lakag. \p \v 4 Afa enag hug maia moasi yi figbi nasa kog kawo ehengelni mom ginofen afa ka higigba el heven la moasig. Ehe enaig esog og, “Asa ne elegeg la gohug hugni mo sa ne meagam kumoahla, nofeka ginofe.” \p \v 5 Afa ena of lanai el sa ka nangugba bu la pafeg afa bite la pafeg enag heafna nihiginai ninga sisi gam nehego. \p \v 6 Asa ehe enaig esog og, “Afa God wahkig gohug ehena nofla ka hwa mo sihig, ehe heven fakagim afa enanai yi mungwali gawig fwatiageg afa ehe bite fakagim afa enanai yi mungwali gawig fwatiageg afa ehe bu fakagim afa enanai yi mungwali gawig fwatiageg nasa ka Godna unehlag la enaig esog, eba mas maisi fefi! \p \v 7 Afa maia enanam elegeg of lanai el fuf ogofiba asa Godna sawieg meagam sefu go afa enag pugunam eseagefe enaba ati Godna gafugag el eba mo fli sihiaule elim naig eso fwahani asa gwenaig esefe.” \p \v 8 Afa heven la nai mo kam pese sihinag ena mo enaig esog og, “Sa ikanam of lanai el sa mong bu la pafeg afa bite la pafeg goh ehe ningana buk bafuag flaugu sa ne enag flag.” \p \v 9 Asa ka ikagim of lanai elim sahana kog, “Kam weti buk fai.” Afa kam enaig sihifenag og, “Flanam asa na ne. Afa maia na neba eba neana mengigim suialafefe ofenaiba laugwe suwig one afa sa sumi mo waikefenam sa nem atag titigefe.” \p \v 10 Afa sa ka ehena ninginai ena weti buk flanam nena. Afa maia ka nenaba nengig mo kam suialafena gofena afa sumi mo waikefenam kam atag titigena. \p \v 11 Afa kam enaig sihifinig og, “Sa ne Godna sihiafule elni mo pese sihiakaiba sa enag mo ogfug mangwal sa mungwali elim mungwa usumuna, afa haig haig kembigna, afa haig haig mona, afa misog elim sa pugunife.” \c 11 \s1 Sambaga el Godna mo ahsihina \p \v 1 Afa kam aga bitem yuhwagig faig eba agat lofug. Afa God kam sihinag og, “Sa ikanam Godna kwania lala mi afa Godim faig sime mi yuhunuge. Afa sa suwigim hanansi el enanai yi afohiegim Godna unehlagim fingi fig. \p \v 2 Afa nofeka Godna kwania lala afwambag la yuhuwage enanai yiba mangofi afa enaba angoluwag elim faifie. Afa sonag el Jerusalem suialag kembim 42 wasiyi sa haig ga esifie. \p \v 3 Afa ka kikeafena sambaganingi elim wasneigna ningitigiba sama amtakwalig lofug aitiag ahfenam enaba ogfug eheningi Godna mo fla ahsihiaule el ahfeg sama kana mo ahsihiag el ahfei. Eheningi enaig namba la sa ahfefe 1,260 enaig osuna sa ahfefe.” (Ena 42 wasbi eba 1,260 osuna feg.) \p \v 4 Sonag sambaga elbi eba sambaga oliv li ahfeg afa sambaga lam ahfeg eheningi Ainiyagna nofbusug la ahgo enaig Ainiyagba mungwali bitem nangwaghiagego. \p \v 5 Afa ambangel sa ona eheningim patigi afa eba suwi eheningina mengig la nai pugunam enag elim amtakwale laitife. Amban enaig onigig fegba eba ehengelim enaig pigifefe. \p \v 6 Afa maia sonaningi Godna mo ahosihifiba ehe asa ma ofim ahkwenaiba asa bu mas fei. Afa eheningi maia heafningina wasneigni sahfeiba asa buum taf fei afa haig haig kinig bite la puguiagiakafe enaigba eba heafningina onigig la esiagahfefe. \p \v 7 Afa maia eheningi Godna gafugag auwig ahfeiba afa sa sangwalinai sis amtakwalig tigeflaitiag bume menai pugunam blofe afa blonam asa sambaganingi ahfei afa ehfei sa hefum bagagifie. Bagagin asa eheningim patigife. \p \v 8 Asa eheningina elig mo kwania kembigna mina la ahgifufe. Ena kembig eheningina Ainiyag ati li katigeg la enanai yi lahag. Ena kembigna kumuhlag unehlagba Sodom i afa Isip i. \p \v 9 Afa sa el mungwali haig haig mona, afa haig haig lofugna, afa haig haig kembig lanai, afa mungwa usumuna mungwali eheningina eligim sambaga mungu osuna afa hap osuna fanangufifi. Afa elim kwegonug masa eheningina eligim ese bite megam kumotigifie. \p \v 10 Afa sonaningi el bite nai elim kinig lambwai ahfeakag asa maia ahlahagba afa sa mungwali sifakaligim hefum buyis i afa gawig esug lambwaigogi enaig feagig. \p \v 11 Afa maia sambaga mungu osuna afa hap osuna awaienaba afa sa God efef fug eheningim faigbi asa ahbuihiag ahgoba. Asa el nangwagigim afa fwina embefeagig. \p \v 12 Afa heven lanai une pugunaba afa sa eheningi ahiginaba og, “Sa fuko ahblo.” Maia enaig esonibi asa heven lanai leango pe blonam lambti fukuiafenaba afa sa mungwali angoluwag el nangwag sigafena. \p \v 13 Afa sa gwenanam asag kwania enag kembig la pugugim gwena mungu bitem amtakwalig fatig afa sa ming 9 pela bite mo afohie. Afa enag asag la 7,000 el enanai yi ati awaieg. Afa minginag el mas pigig mo enag ehengel fwina embefeagigim asa heven lanai Godna unehlag seflinim og God ehe kwania feg. \p \v 14 Afa angigieg kinigbi ati awaieg afa olyi nai kinig eba puguiagim ati meiyofe. \s1 Hwaba elegeg fuf \p \v 15 Afa elegeg of lanai el maia fuf gogba asa heven la mo fwina lagig apukeg afa og; \q1 Bigelni God Ainiyag afa heafna Gisfu Fwahag el i glau gohnanam ehe mungwalim bite naim misog el ahfenig. Ehe gwenaig wahkig sahfe gofufe. \p \v 16 Afa 24 saglag el misog elni pegag sime la Godna nofbusug la afohiegim asa apaiyeg Godna unehlagim fingi fig. \p \v 17 Afa enaig esogog og; \q1 Ne God Ainiyag neba mungwali kigmogna feg afa ne autunai fegim afa glaunai feg. Kangel sifakalig ne nimbiafena wasneigni misog el mungwal elni feg. \q1 \v 18 Afa angoluwag ninimugog afa ilawaba neana olug kakagig opuguhba afa sa enanam ne melig pigieg elim kwefihianugefe. Afa ilawaba ne nimbeafna gafugag el eba mo fli sihiaule el mi afa nimbeafna el mi ne suialafehiageg asa nem ahnai skaufenig afa misog el i esug el i gwenaig nem esinig. Afa ambangel sa bitem amtakwalig fatig enag ilawaba ne gwenaig esenfie. \p \v 19 Afa Godna kwania lala heven la asa enanam pigi gofufe asa nanguibi enanai yi bokis kontrak gofufe. Afa sa afwei ifiyi fegim afa hug pialele feg afa asag ilafog afa ais bu fun lofug pe minefeg. \c 12 \s1 Angwafig i afa kafa kwaniana i mo \p \v 1 Afa Jon mangwal kwaniam of la nanguna ofenaiba angwafig osum lofugna fatina fwahag afa wasbi ehena mong skaugo afa 12 pela bagnofut ehena misog sisi hat lofug la afohie. \p \v 2 Afa afnialigni fegim luwal foklagim meyiofeba afa sa susugim ningisuageafba eyiamo ogo. \p \v 3 Afa ming of la nangunaba eba kwania kafa tafnaiig elegeg la gohug misogna fena afa 10 pela aninguogna fena. Afa misog elni hat ehena misog la afohiena. \p \v 4 Afa sa ehe heafna eflegna bagnofutim kalefeg lambig taitigba asa mungu ehgenai mo bite gam apaiyegba afa ming sambaga mo of la gweyi ahgofufe. \p Afa angwafig ogna luwal foakla, asa ehe ika angwafigni muhla gohba ogna sa luwalim tige ne. \p \v 5 Afa maia enag angwafig fangonai luwalim foaklaiba asa ena luwal autunai la ehe wasneig bite nai elim mungwali lambi lambugufiba asa nangwaghiage gofufe. Afa sa ena luwalim God nangum afa heafna pegag sime gam wanig afufe. \p \v 6 Afa God ati ehem el fwainig la numwehiageg fwahag asa enag angwafig esim ikagna ikafe. Afa sa enanai yi 1,260 osuna numwehefugufufe afa sa fane faifofe. \p \v 7 Afa fag heven la hagna. Afa Godna oflanai el apaiyena afa ehengelni misog el Maikel fena asa kafam afa kafa heafna of lanai el fini sa fag hagna. \p \v 8 Afa sa hagin kafam filafinibi kafa mas heafna of lanai elim enanai yi wan nafi. \p \v 9 Afa ena kwania kafaba eba Satan. Ehe sombine autunai fegim mungwal bitenai elim mwakwalenugego. Enam flig afa heafna of lanai elim lambig asa heven lanai lambi ningitigigbi asa bite gam apaiye ambeg. \p \v 10 Afa ka higigba heven lanai mo enaig esog og; \q1 Afa glau Godna kwefuag ati ambala pugug. Afa heafna wasneigni mungwali bite ehe nangwagihiagego. Afa heafna Gisfu Fwahag el gwenaig esefe. Afa osuna i afa sinaini i Satan Godna nofbusug la gohba Godna elim fasehtigifego afa sa ilawaba ati ehem heven lanai fli ningihig. \p \v 11 Afa Godna el hefum mas onigini mo, hefum pigegiba afa Sipsip Luwaligna taf i afa heafgelni nufuna mo i ehengel ati enana Satanim filafatig. \p \v 12 Afa nengel sa heven la go sa ne sifakali eba ati Satanim enanai ningihi. Afa bite nai i afa bu lanai i niasabanig, Satan ati anwenafeg ehena osuna awaiegim meyiofe. Afa sa nengel nangum pe blonam asa ehe fwina olug kakageagefe. \p \v 13 Afa enag kafa ati anwenafena ehe sa pekana afa ehe pekagim angwafig fangonai luwal wanigagim yisigikag uflag. \p \v 14 Afa ena angwafigim osianigna anglag kwania sambaga faigbi asa enana Satanim fwahagim sa enag anglagna el fwainig gam heafna kugam efugukag. Afa sa enanai yi ehem sambaga mungu afa hap yia enaig la numwehefufufe. \p \v 15 Afa ena kafa maia kausu fegba asa bufle ena mina pugugim angwafigim patalkugim og sama angwafigim petla ukwi. \p \v 16 Afa bite angwafigim kweafug. Afa bite maia kugufegba asa bufle kafana mengig menai blogim ena mina pekag. \p \v 17 Afa sa kafa angwafigim olug kakagenagim asa ona ikanam ehena luwaligim ambangel sa Godna nihe mom patalfuiag mi afa Sisasna mo sihig mi asa ehengelim fagna hagim. \p \v 18 Afa ena kafaba bu blug yi goh. \c 13 \s1 Sis sambaga ahpugug \p \v 1 Afa ka nangugba sis elegeg la gohug misogna bu menai pugugim afa ehena aninguogba eba 10 pela fena afa hatba misog elni hat lofug 10 pela aninguog la afohiafna afa enag misog laba unehlag eyi afohiafna enag unehlagba Godim haig haig moalampinag mo afohiafna. \p \v 2 Ena sisba ofenaiba sangwali nai kwania pusi lepat lofug afa ehena mongwagba ofenaiba bea lofug eba sangwal sis ninimule, afa ehena memtogba ofenaiba laion lofug eba kwania pusi feg. Afa maia kafa ehem heafna kwania wasneig faiba asa ehe misog el lofefe. \p \v 3 Afa maia ehena ming misogim ahpifigba ona laha afa ehe mas lahag mo afa ehe ati suialafe. Mungwali el nangugim sineminefinim asa ehem patalfufe. \p \v 4 Afa kafa maia sisim wasneig faigba asa el kafana unehlagim fingi fig. Afa sisna unehlagim gafa fingi figim afa esogog og, “Amban enaig wasneig sisba feg? Amban sa mas enaig fagimba filafei?” \p \v 5 Afa God ena sisim fwahagba og sa ma haig haig mo sihiage afa sa ma ehena mom flaflafenam afa Godim moalamp mo fai. Afa God ehem fwahagba og sa ma 42 was yi misog el feg. \p \v 6 Afa sa Godim amtakwalig mo sihinagim afa ehena unehlagim pigaupigim afa Godna kembig mi afa ambangel sa enanai yi gohug mi enam moalamp mo faig. \p \v 7 Afa God ehem fwahagba og sa ma God heafna elim fag hagnam sa ma ehengelim filafatinim afa sa wasneinam elim mungwali mungwa usumuna, afa mungwali kembig afa mungwali mona, afa mungwali lofugna asa ehe misog el fenifie. \p \v 8 Afa mungwali bitenai el sa sisna unehlagim fingi fig afa Godna el sa mas enaig esini mo. Afa autunam God maisim bite fakag fwainig fiafenaba enanam ehe ati ehengelni unehlagim nofkikenag gag buk la sko fwahani. Ena bukba Sipsip Luwaligna buk ati ehem tigifatig. \p \v 9 Afa amban ne anganaba eba sa ne ena mo higim. \q1 \v 10 Afa God ati ambangelim wefug fwatigba sa ehengelim kalabus yi afui asa gwenaig esifi. Afa ambangelim sa el pinana kwagi klaitigfifi eba sa ma gwenaig esi. Afa sa ma Godna el olug onigig fwina wasnei afohiefiba nengiafufi. \p \v 11 Afa ka nangugba ming sisba bite menai pugugim afa ehena misog laba sambaga aninguog ahfeg ofenaiba sipsipni aninguog lofug afa ehena moaba ofenaiba kwania kafana mengig. \p \v 12 Afa hwa sumi nai sisna wasneig eba gof lanai sis i mungwalof ahfegim ahgoba. Afa sa ehe mungwali bite nai elim kukusihiageg og sa ma gof lanai sisna unehlagim fingi fini. Ena sisna misogim ati fagna ahpifnaba afa sa ena fagokug ati titigifeg. \p \v 13 Afa hwa sumi nai sis heafna haig haig kigmogim ogfufe afa sa elni nof la eseiba asa suwi oflanai bite gam pe blofe. \p \v 14 Afa maia ehe gof lanai sis i ahgoba afa God ehem fwahag og sa ma bite nai elim haig haigna mwakwalihiage. Afa elim esonigbi asa ma ehengel gof lanai sisna sungwagim nifenaginim fli folfui. Afa ena sis eba ati fagna ahpifna afa sa ehe nofkikena gwesego. \p \v 15 Afa God sumi nai sisim fwahanagba asa ma ehe gof lanai sisna sungwagim nifegim nofkikenag faiba asa ehe mo lagwagegim og, “Amban ne kana unehlagim fingi feg fwainigba eba nem lahafe.” \p \v 16 Afa enag sis sungwagim ginofenig nofkikena flag ehe enaig esog og, “Sa ma mungwali el ginof nihi yi gohonkai. Misog el i afa unehlag fwainig el i, kaksag kigna el i afa kig fwainig el i, gafugag el i afa esug el i sa ma mungwali ginof mingigig la me awai nihiginai ninga la me sa ma lambafwi.” \p \v 17 Afa amban ena ginof fwainigba eba mas kignaba mangwalba flai afa mas mangwalba fai kignaba. Ena ginofba sisna unehlag i afa heafna nambaba unehlagim ogfug. \p \v 18 Afa sa big enam fahigenagenim afa sa amban suialag anwenafegba sa ma enag sisna nambam ambala upugunai ena nambaba elni namba eba 666. \c 14 \s1 144,000 el mulug mwanifi fatini \p \v 1 Afa ka nangugba Sipsip Luwalig afa 144,000 el i Jerusalem la Saion mog la afohie. Afa sonag elbi eba ati Sipsip Luwaligna unehlag i afa heafna Alagna unehlag i ehengelni mingigig la gohun. \p \v 2 Afa ka higig mo heven lanai blog ofenaiba kwania bu sisewug alagi afa ofenaiba hug pialele lagka. Eba ofenaiba gita moag lagsai. \p \v 3 Afa enag el Godna pegag sime la mi, afa sambaga sambaga sis blistanig mi, afa saglag el mi enanai yi muhla afohiegim asa mulug mwanifi fatig. Minginag elim mas enam anwenafi eba 144,000 el God ehe bite nai lambigba enag mungohe anwenafig. \p \v 4 Afa sonaig elbi mas aga taitu feg mo eba awai ehengel afsug el fiasaieg. Afa maia asim Sipsip Luwalig akoba afa ehengel ehem patalfug. Afa God sonaig elim bitenai el nai yi lambigba. Afa gof gosig afuiaba eba God i afa Sipsip Luwalig i ehe ahlambig. \p \v 5 Afa ehengel mas mwakwal mo sihini mo, eba awai, mas ehengel haig fig mo. \s1 Sambaga mungu of lanai elni mo \p \v 6 Afa ka nangugba of lanai el sisi yi of la efukafenaba asa bite nai elim wahkig gohug suialag mo sihinuwageakafna ena moba eba mungwali kembig i, afa mungwali mungwa usumunai i afa mungwali monai i afa mungwali haig haig lofugnai i enam faig. \p \v 7 Ehe fwina enaig sihifeg og, “Enanam God mungwali elim kwefihianugefe afa sa ehem embefinim asa ehena unehlagim mungu fingi fi. Eba ehe mungohe heven i, bite i, kwania bu i, afa fun bu i enag ehe mungwali fwatiageg sa ne ehena unehlagim fingi fi.” \p \v 8 Afa ming of lanai el ehem sum patalkuiahba ehe enaig esonig og, “Kwania kembig Babilon eba ati amtakwale fatig. Enag kembig lanai elbi ehe mungwali minginag kembig lanai elim wanambe minefegim haig haig nihe amtakwalig fiagig. Sonaigba ofenaiba angwafig saglagim uflogna bug wasneig faigim asa ahsahfeg.” \p \v 9 Afa ming of lanai el sambaganingim sum patagikahba ehe enaig esog og, “Ambangel sa sis mi afa sis heafna sungwag mi sa lotu fegonugbi eba ehena ginof mingig la me awai nihiginai ninga la me sa lambfie, \p \v 10 afa enaig elimbi God olug kakageg heafna mungwali faifie asa ehengel enag susug flifie. Afa sonag elbi suwi i salfa i ahlagig yi enanai yi afohiefiba asa Godna of lanai el fi afa Sipsip Luwalig fe afa sa ehengelim nangwagfufufe. \p \v 11 Afa suwi wahkig lagig sonag elim susug faifie enag suwieg wahkig puguiago. Afa ambangel sa sis mi afa sis heafna sungwag mi lotu fegonug i afa ehena unehlag la ginof lambig i asa wahkig osuna i afa sinaini i ena susugba lambafufufe.” \p \v 12 Afa ambangel Godna nihe mo higigim afa Sisasim patalfug, sahig, asa ne wasnei sama Godna gafugag gwese gofi. \p \v 13 Afa ka higig heven lanai mo enaig esog og, “Sa ginofe, ohnanam ilawo fenam ikan autunai la fefe ambanim sa Godna gafugag la lahafe eba sa ma sifakalei.” Afa Godna Sungwabug gafa gwenaig esog og, “Eba nufunam, heafgelni kinig fwahinim hekulifibi afa heafgelni suialag nihe eba ambala pugunifie.” \s1 Fane lambigim ati meyiofe \p \v 14 Afa ka mingim nangugba leango busug yi el bigel lofug ga afa misog elni hat gol fatigim afa ehe ningana pina sig nemog flauguia. \p \v 15 Afa of lanai el Godna kwania lala fwahagim afwambagam pugukahba ehe fwina leango la gag elim enaig esonag og, “Bite nai fane ati ambigoh afa ilawaba ati lambigim feg sa pinana enag fanem higfelambka.” \p \v 16 Asa gwenaig eseg leango la gag el pinana higfehiagegim sa bite nai lambig. \p \v 17 Afa ming of lanai el Godna kwania lala heven lanai fwahagim afa ehe gafa pina sig kehlaugu. \p \v 18 Afa ming of lanai el suwim nangwag gohug Godim faig sime nai fwahagim pina flauguhug elim fwina esona og, “Bite nai wain fug ati ambie skofeg sa ne aso gam ikanam pina na higfehiagenam agoguli.” \p \v 19 Asa ehe gwenaig eseg pinana higfehiagegim sa bite nai wain fug lambigim fun bwiltigefwag lofug la skogim asa mongini pigagegba asa bug pe minefeg. Ena bwiltigefwagba eba God enaig esefe, ninimunam sa amtakwalig elim amtakwale laitife. \p \v 20 Enag bwiltigefwag lofugba eba Jerusalem la ambwafagam goh. Afa ehengelni taf ena bwiltigefwag gam blogim bite gam pegim fafokaminefeg enaba 300 kilomita\f + \fr 14:20 \ft Grik mona enaig esog, ‘1,600 stadia’.\f* enaig la feg afa mungu fegim afa hap feg enaig mita eba mungwanam fukugag. Afa ena tafba ofenaiba bugogi. \c 15 \s1 Elegeg la gohug of lanai el elegeg la gohug kinig lambug afo \p \v 1 Afa ming alganam enaig ka nangug enaba enmonafeg eba enam el sineminefinig. Afa ka nangugba elegeg la gohug oflanai el elegeg la gohug kinig lambug afo. Sona kinigbi Godna olug kakagig enaba sumi nai nemog feg. \p \v 2 Afa mingba enaig ka nangug ofenaiba bu kwania glas lofug suwina waheg go. Afa el bu blug yi afohieaba gita lofug God lambwaiyigbi asa lambug afo. Ena elbi eba ati sis mi, sis heafna sungwag mi, afa enag namba unehlag ogfuiag mi ati enam filafig. \p \v 3 Afa ehengel gita lambigim afa sa Moses Godna gafugag elna mwanifi i afa Sipsip Luwaligna mwanifi i laitiagig. Afa sa enaig fatifig og; \q1 God Ainiyag ne mungwali wasneigni feg afa neana suialag gafugag enmonafeg afa ka nangugim ka sineminefig. Afa ne mungwali elni misog el fenig afa neana nihe eba nufunam feg afa fwina suialafeg. \q1 \v 4 Afa Ainiyag ne mungohe afsug feg afa sa mungwali el nem embefinim sa ma neana unehlagim fingi fi. Afa mungwali el bite nai sa ma neana nihem nanguinim ambe nem lotufini. \p \v 5 Afa ka nangugba Godna kwania lala heven la pigig go ena lala meg gamba God enanai yi ga. \p \v 6 Afa enag elegeg la gohug oflanai el Godna kwania lala fwahigim elegeg la gohug kinig lambug ambeg. Sonag el ehengelni lofugba fwina busbusiagegim afa gol we heafgelni bahalig yi kagatige fiagig. \p \v 7 Afa sambaga sambaga sis blistanig afohieaba afa sa mungu enanai gol disni flagim elegeg la gohug of lanai elim faig. Ena dis yiba God wahkig gohugna olug kakagig memtola pugugo. \p \v 8 Afa God i afa heafna wasneig i enanai yi Godna kwania lala suwieg lofug puguiagi. Mas amban mungu ika ena lala seaifui eba maia elegeg la gohug kinig ma awaieba. \c 16 \s1 Godna olug kakagig elegeg la gohug disni afo \p \v 1 Afa ka higigba Godna kwania lala la mo elegeg la gohug of lanai elim enaig pugufenig og, “Afa sa ne Godna olug kakagig elegeg la gohug disni afohie afa ena flinim asa ne ufunam bite gam sugufoitifi.” \p \v 2 Afa sa angig oflanai el heafna disni maia bite gam sugoflaitigba asa ambangel sisna ginof fligim sa sisna sungwagim lotufinig asa enaig elim susug nehgug amtakwalig pugunugefe. \p \v 3 Afa angigieg of lanai el heafna disni maia bu kwania la sugoflaitigba asa ofenaiba elni biimp lofug feiba asa bu lanai mungwali pigife. \p \v 4 Afa olyi nai of lanai el heafna disni maia afalig bu mi afa lileg bu la mi sugoflaitiba asa ena gafa taf lofeg. \p \v 5 Afa ka higigba of lanai el buum nangwaghiawageg el enaig esog og; \q1 God ne ilawo nai feg afa autunai feg. Ne God fwina afsug nemog feg. Neana kwefihiawagig eba fwina suialafeg. \p \v 6 Afa el sa God neana el mi afa neana mo fli sihiaule el mi kwagiskug afa ehengelni taf bite la peg asa God amtakwalig elim mungwag faibi s a taf ahagafe. Eba heafgelni moala. \p \v 7 Afa ka higigba Godna faig sime la mo enaig pugufeg og; \q1 God Ainiyag ne mungwali wasneigni feg neana kwefihiawagig eba nufunam feg afa ihlafeg. \p \v 8 Afa fignieg of lanai el heafna disni maia osuwim sugoflaitigba asa osu fwina nolugeagenam elim aftukuhlaitifefe. \p \v 9 Afa sa maia osu elim aftukuhlaitifeba asa ehengel Godna unehlagim moalampbi nagife. Afa ehengel mas olug waikefinim afa mas enaig esogona mo og God ehe wasneig fegim asa enag kinigbi ningitigifeg. \p \v 10 Afa mingba eba afa of lanai el heafna disni maia sis kwania sangwali nai pusi lofug eyi gohug la sugoflaitigba asa enanai yi enag sis nangwaghiageg kembigim kigifenifieba asa enanam susug elim opugunifibi afa sa ehengel gog sifiagifie. \p \v 11 Afa sa enag susug i afa nehgug i maia kwania fiageba asa heven lanai Godim moalampi nagim afa heafgelni amtakwalig nihem mas fwahig mo. \p \v 12 Afa enwesog of lanai el heafna disni maia kwania bu afalig Yufretis yi sugoflaitigba asa bu mungwali heflagegba. Eba osu puguiag misog elim mina numwehe fwahanig. \p \v 13 Afa ka nangugba sambaga mungu sanel amtakwalig miakal lofug kwania kafana mengig la nai afa kwania sangwali sisna mengig la nai afa mwakwal profetna mengig la nai apuke gohug. \p \v 14 Afa enag sanel haig haig kigmog fiahgifi asa ehe afugim mungwali bite nai misog elim unegonigigbi asa ambeg laskuhlag. Afa enag kwania osuna God ehe fwina wasneig el feg asa enanam fwahagba asa ehengel ona hagim. \p \v 15 (Afa Ainiyag enaig esog og, “Sa hig, ka oblofiba eba ofenaiba el ukwefnagim oblo. Amban sa nonigig fwainig heafna lofugim numwehefugufufe afa mas ehe emefwai ikaiba eba ehem afwanefefe. Ena elbi sa ma sifakalei.”) \p \v 16 Afa ena sanel misog elim wanambegim mungu la laskuiahlago. Enaba Hibru monaba og Armageton. \p \v 17 Afa elegeg of lanai el heafna disni maia efefim sugoflaitinagba asa pegag sime la Godna kwania lala nai fwina moasiyigim og, “Hwaba eba gwenaho feg!” \p \v 18 Afa afwei ifyi ifyi fegim afa hug pialefe lakagim afa asag kwania fwina ilafog. Afa autunamba enaig asag mas enaig fena mo. \p \v 19 Afa maia asag enaig liafofenamba asa kwania kembig la bitem sambaga mungu kugufe klaitig afa minginag mungwali kembig amtakwale skofiakana. Afa kwania Babilon kembig fwina amtakwaleaginibi asa God mas ehengelni enaigim etetini mo asa heafna mungwali olug kakagig faig. \p \v 20 Afa mungwali ailan awaieg afa mungwali mug tutoitifeakag. \p \v 21 Afa ais bu fun lofug of lanai elim apaiyenig. Ena ais buba eba 50 kilogram enaig feg. Afa el ena kinigim nangugim maia fwina amtakwaleagegba asa ehengel Godim moalamp mo faig. \c 17 \s1 Mina nai angwafigni mo \p \v 1 Afa elegeg la gohug of lanai el elegeg la gohug dis lambug afohie enanai mungu blog kam sihinag og, “Aublo, ka nem ogfuna sonag mina angwafig eba unehlag kwania feg ehe kaksag bu afalig yi gohba eba God ehem susug faife. \p \v 2 Afa bite nai misog el ehem fapukefe nafo. Afa mungwali bitenai el gafa gwenaig esig. Afa angwafigni amtakwalig nihe ofenaiba uflogna bug ahagagba asa ehengel moetet el fiasaieg.” \p \v 3 Afa maia kam Godna Sungwabug wasneignagba asa of lanai el kam el fwainig gam wanikig afa sa ka enanai yi ka nangugba angwafig sangwalinai sis tafnaiig yi ga. Ena sisba elegeg la gohug misog feg afa 10 pela aninguog ena misog la apuke afohie. Afa ehena nihiba unehlag amtakwalig afohie. Ena unehlagba Godim moalampinag afohie. \p \v 4 Afa enag angwafigbi tafnaiig lofug suialagna afa engig golna afa haig haig wag enaig suialag aitiageg. Afa kaf gol ningina flaugu. Ena kaf laba heafna aga taitu nihe i afa haig haig amtakwalig mo i enanai yi memtola pugugo. \p \v 5 Afa ehena mingig laba laskwas unehlag gofena. Afa ena ginofba enaig esog og: \qc Kaba wasneig Babilon feg, afa mungwali mina nai angwafigni afag afa ena mogba eba amtakwalig nihe bite nai. \p \v 6 Afa ena angwafig Godna el mi afa Sisasna mo ambala sihiule el mi taf nenugeg. Ehengelni taf ofenaiba uflog bug neg asa angwafig moetetiageg. Ka ehem nangugum ka sineminefeg. \p \v 7 Afa enag of lanai el kam sihinag og, “Haisegba sa ne sineminefeg? Ka nem mogim ogfunag sonag sisba eba elegeg la gohug misog feg afa 10 pela aninguogna feg afa angwafig sis laba fukoga. \p \v 8 Afa sona sis sa ne nangugba eba autunam nofkikena gag fena afa ilawaba eba awai. Afa ati tigeflaitiag bume menai muhla fwaha puguiagim ofeba eba ikanam hefum amtakwale fe. Afa autunam God maisim bite fakag fwainig fiafenaba enanam ehe ati minginag elni unehlagim nofkikena gag buk la sko fwahani. Afa ambangel ehengelni unehlag sa ena buk la gohug fwainigfeg eba ehengel sisim nangunim asa sineminefifie. Afa sisba autunam gag afa ilawaba mas gah mo afa eba pese pugufe. \p \v 9 “Afa amban suialag onigigna fegba sa ma enam anwenafi. Afa ena elegeg la gohug misog eba elegeg la gohug mug enanai yi angwafig ga. \p \v 10 Afa mingba eba elegeg la gohug misog el feg. Afa afa la gohug enaba ati pigigba afa ilawaba mungu go afa mingba maisife eba nengigim pugufe. Afa eba pugunam mwakwalig gafe. \p \v 11 Afa enag sangwali sis eba autunam gag afa ilawaba mas gah mo. Afa eba gug misog el fena afa ehe elegeg la gohug la nai fena. Sonaba eba ikanam hefum amtakwale fe. \p \v 12 “Afa sona 10 pela aninguog ne nangugba eba 10 pela el sumi yi apuke misog el fiasaife. Afa ehe wasneig flinim afa sa afunam mwakwalig sis wan gafugafefe. \p \v 13 Afa enag misog el mungwali mungu onigig flinim asa heafgelni wasneig i afa unehlag i sisim faini. \p \v 14 Afa Sipsip Luwalig fei afa ehengel apaiyegog asa hefum hagig afa sa Sipsip Luwalig afa heafna el apaiyeg enag ehengelim filafe fatig. Afa ehe mungwali saglag elni Ainiyag feg afa misog elni misog feg afa ambangel sa ehe kanog fwatig afa sa ehengel ehem fwina patalfug enag ehengel fagim filafig.” \p \v 15 Afa enag of lanai el kam sihinag og, “Afa sa kaksag bu afaligim ne lambusigba asa angwafig enanai yi ga eba mungwali el i afa mungwali kembig i, afa mungwali lofugna i, afa mungwali mona i enaig feg. \p \v 16 Afa ena sis mi afa 10 pela aninguog sa ne nangugba eba enaig eseg eba mina nai angwafigim olug kakagenaginim asa ehena lofug hugfuhia naginim afa sa ehem fwahibi asa gawig fwainig fefe. Afa sa ehena nihigim ahaganam suwi na tuhlufatife. \p \v 17 Afa sa enag 10 pela misog elim God onigig faibi asa gwenaig esifie autunam God ati sihi fwahana. Asa ehengel sisim ahnai skaufinifie asa ikan gwena Godna moa ihla nufunam pugufe. \p \v 18 Afa enag angwafig sa ne nangugba eba kwania kembig enanai yi mungwali misog elim bite naim nangwagehiagego.” \c 18 \s1 Babilon kembig ati amtakwaleg flag \p \v 1 Afa ka nangugba ming of lanai el hevenim fwahagim pe blog. Ehe kwania unehlagna fegim afa ehena ombusugug mungwali bite gam ika minefeg. \p \v 2 Afa ehe fwina enaig esona og; \q1 Babilon kwania kembig eba ati amtakwaleg ena kembigba eba haig haig sanel amtakwalig enanai yi pugu esiagefe. Afa haig haig fwesna twafig i afa nongug mengna twafig i ena kembig la go. \p \v 3 Afa mungwali minginag kembig lanai elim wanambe minefegim haig haig nihe amtakwalig fiagig. Sonaigba ofenaiba angwafig saglagim uflog bug wasneig faigim asa asise fiaflag. Afa bite nai misog el ehem fapukefe nafoba asa Babilon kaksag gawigna feg. Afa ena kembig lanai ogna haig haig kaksag gawig lambwagi afa sa mungwali bisnis el ehem enaig lambwaigogim asa kaksag kig lambig. \p \v 4 Afa ka higigba ming elni mengig heven la pugug. Ehe enaig esog og; \q1 Kana el sonana mo fwahigim asa apuke ambe, masa ne mungwal wahe haig haig nihe eseagifie, masa ne mungwal ena susug flifie. \q1 \v 5 Afa ehena nufwef mo heven la skoa fwaligog fwahi afa God mas enam eteti mo. \q1 \v 6 Afa ehe sa nem esenagba sa ne gwenaig mungwag ehem esena. Afa sa ne ehem mungwag sambaga nagim esenawag. Afa ma nem mungu kinig faiba asa ne ehem kinig mungwag sambaganagim lambtigiai. \q1 \v 7 Afa ehem kaksag susug i afa kinig i faibi eba mungwalofug kaksag gawig i afa heafna unehlag fingi fukuiagi hefum sa fai. Ehe enaig onigig og, ‘Kaba kwin ga, kaba mango alagag fwainig mo, afa kinig mas kam pugunai.’ \q1 \v 8 Afa sa haig haig kinig ikagna ehengelim pugunibi afa sa ehengelim gih puguni, afa ehengel wewatoi, afa ehengel bini pigi afa sa ehem suwi la tuhlu fie. Enaba mungu osuna pugunifie. God Ainiyag ehe wasneig feg asa ehem kwefihianagefe. \p \v 9 Afa mungwali bitenai misog el ehem fapukefe nafogim afa ehena amtakwalig nihem patalfuiag asa enag suwiegim nangugim afa sa kusugu watigo. \p \v 10 Afa ehengel embefigim enag susugim membiyi finigim afohieba afa esogog og; \q1 Hoi yo, Babilon kwania kembig niasabam, autunamba ne wasneig fena afa ikagna amtakwaleg nimbiafena moala nem opuguna. \p \v 11 Afa el mas bisnis elni gawig mas pese lambigoni afa sa ehengel gafa Babilon kembigim kusugunigim wewatigo. \p \v 12 Afa heafgelni gawig eba gol i, silva i, suialag fun i, kopu i, haig haig suialag lofug i, fini i, nemtaiwe i, afa mungwali haig haig wag ginofena ungwekig i, fun i, afa bras i afa kapa i enaig eseagini. \p \v 13 Afa ming gawigba eba sinamon li lofug i, fakseg i, haig haig suialag fungugna sanda i, wain bug i, wel bug i, plaua i, wit i, bulmakau i, sipsip i, hos i, afa hos sime i enaig feg afa esug elim ningitigigim asa enana kig lambig. \p \v 14 Afa bisnis el enaig esog og, “O Babilon, mungwali gau sa ne fwina membeg lambig eba enaba awaiyefe. Neana unehlag i gawig i eba mas gofiba ne mas pese enam nangui.” \p \v 15 Afa ena bisnis el sa enanai yi gafugag feagig afa kaksag kig lambig afa sa ehengel enag susugim membiyi finigim afohiefiba afa sa kusugugim wewatigona. \p \v 16 Afa ehengel enaig esog og; \q1 Hoi yo, Babilon kwania kembig niasabam, autunam ehe haig haig suialag lofug fatina afa gol i, suialag fun i, afa kopu i laitiagena. \q1 \v 17 Afa ikagna ehena mungwali gawig awaiena. \p Afa mungwali sip yi misog el i afa sip yi afuiaule el i, afa sip yi gafugag el i, afa sip nai bisnis el i membiyi afohieba. \p \v 18 Afa sa ena suwieg nangunim enaig esogona og, “Sonag kembigba ehe minginagim gosenig.” \p \v 19 Afa smof lambinim misog gam kokofeaginim afa wewatigona enaig esogona og; \q1 Hoi yo, Babilon kwania kembig niasabam, afa sa sip kaksag gawig ena kembig gam lambkugba asa sipni el kaksag kig enanam lambig. Afa sa enaba mungwali ikagna gweyi awaieg. \q1 \v 20 Afa ma ena mo awaieba sa heven sifakale fe. Afa sa Godna el i, afa kanog fwatieg el i, afa Godna mo fli sihiaule el i sa ne sifakali sa nem haig esehiag lambsiegohug eba God ehe ati mungwag susug faig. \p \v 21 Afa wasneig of lanai el kinigni fun kwania flagim bu gam fwina taitugim afa ehe enaig esog og; \q1 Eba Babilon kwania kembig gwenaig esefe afa el mas pese nangui. \q1 \v 22 Afa gitana moag i, afa fufni moag i, afa fufelona moag i, afa elni mwanifi i mas nem pese pugunai. Afa ambangel sa suialag gafuga fegim anwenafig gafa mas enanai yi gofi afa el mas nasneg moagim pese higi. \q1 \v 23 Afa lamna ombusug mas enanai yi gofi afa enanai yi el angwafig lambigim mas gofi. Afa ena kembig lanai bisnis el kwania unehlagna fegim afa Babilon lanai elim agisu fihiagigim afa sa mungwali mwakwale gonugig. \q1 \v 24 Afa ehe Godna mo fli sihiaule elni taf i afa Godna elni taf i enam ahagagigim afa minginag elim gafa gwenaig esegonigbi asa God Babilonim mungwag susug faig. \c 19 \s1 Heven la nai el sifakalig \p \v 1 Ena mo ma awaiegba afa ka higigba auneh kwania heven la esofua sona elbi eba kaksag el gohba enaig esogog og; \q1 Sa big Godna unehlagim fingi fi, God bigim lambigba, afa sa heafna unehlag kwania fegim, afa ehe wasneig feg. \q1 \v 2 Ehena kwefihiageg eba nufunam fenam ihla fefe. Afa sa mina nai angwafigim kwefihianagefe. Sona angwafig haig haig amtakwalig eseagegim afa elim og sa ma enaig esiagi. Afa Godna gafugag elim kwagi laitig asa God ehem susug mungwag faig. \m \v 3 Afa ehe pese enaig esogona og; \q1 Nawo Godna unehlagim fingi fi. Afa suwieg wahkig ena kembig gwese go. \p \v 4 Afa God heafna pegag sime la gaba afa sa 24 saglag el i afa sambaga sambaga blistanig sis i apaiyegim ehem lotu fenigim enaig esog og; \q1 Eba nufunam, sa big Godna unehlagim fingi fi. \p \v 5 Afa mo sime lanai pugugim enaig esog og; \q1 Sa hig afa ne Godna gafugag el i afa unehlag fwainig el i afa unehlagna el i ambangel sa ne ehem ahnai skaufinig eba sa ne bimbeafgelni Godna unehlagim fingi fi. \s1 Sipsip Luwaligna angwafig buyis \p \v 6 Afa ka higig ofenaiba kaksag el laskuhlagim auneh ho afa ming ofenaiba bu sisewug kwania lagi afa ming ofenaiba hug piale piale ogi afa ehengel enaig esogog og; \q1 Afa bigelni Ainiyag eba God wasneig fegim eba ehe kwania misog el feg sa big ehena unehlagim fingi fi. \q1 \v 7 Afa Sipsip Luwalig angwafig aflahba asa nawo olug suialagna sifakalinim ehena unehlagim fingi fi. Afa enag angwafig hefum ati numweheageg. \q1 \v 8 Afa God ehem fwahanagba asa suialag lofug afsug fegim afa fwina busbusiageg enag fatig. \m (Enag lofugba eba suialag nihe Godna el enaig esini.) \p \v 9 Afa ena of lanai el kam sihina og, “Sa ne enaig ginofe: Ambanim sa God sihinag og sa ma sonag el Sipsip Luwaligna angwafig buyis la bloi asa ma enag elbi sifakale. Hwaba eba Godna nufuna mo.” \p \v 10 Afa sa ka of lanai elni kig muhla pegim ko ka ehem lotu fena, afa ehe enaig esona og, “Mas esi! Ka gafa Godna gafugag el feg afa gwenaig sati neangafa nimbeafena nilite i ne sahfegba asa ehengel Sisasna nufuna mo kehligim patalfug. Afa sa ne Godim mungohe lotu fini.” Sisas sa mangwalim upugunaba asa ena mom Godna fli sihiule el fli sihiafug. \s1 El busug hos la ga \p \v 11 Afa ka nanagogba heven la mengig pigi goba afa busug hos mungu eyi go. Afa el sona hos la ga eba seflig Sawieg El fegim afa Nufunam El feg. Afa heafna kwefihiagegba eba ihlafeg afa fag hagimba eba ihlafeageg. \p \v 12 Afa ehena nofugba ofenaiba suwi lagi afa ehena misog laba eba misog elni kaksag hat lofug afohie. Afa mungu unehlag ehe nai yi gofena enaba ehe mungohe anwenafeg. \p \v 13 Afa ehena lofugim taf gigafena. Ehena unehlagba eba seflig ‘Godna Mo.’ \p \v 14 Afa heven la nai ami busbusiageg lofug laitiagegim afa busug hos la augugim asa ehem patalfug. \p \v 15 Afa pina sig nemog ehena mengig la nai pugunam enana mungwali bite nai elim filafatife. Afa ehe mungwali kembigim wasneinam lambinam bwiltigefwag la skogna asa wasneig God ninimufenam nag lofug sunam laitife. \p \v 16 Afa heafna lofug la i afa bigisig la i enaig ginofig fwahig og: \qc Saglag elni Ainiyag feg afa misog elni misog feg. \p \v 17 Afa ka nangugba of lanai el osu la gohugim afa maia ungwe twafig sisi yi efihi afuhiaba asa ungwem fwina enaig esonig og, “Au ambe Godna kwania buyis la laskuiahla. \p \v 18 Sa ne ambenam misog elni nihigim ahagai afa amini misog elni nihigim ahagai afa wasneig elni nihigim ahagai hos mi afa el hos la auguiaule mi ena nihigim ahagai afa esug el nai yi afa unehlagna el nai yi afa mungwali el nai yi sa ne ehengelni nihigim ahagagi.” \p \v 19 Afa mingba ka nangugba kwania sangwali sis i afa bite nai misog el i afa heafgelni ami i enag ambe laskuhlagim ogna el hos la gag mi afa heafna ami mi sa fag hagim. \p \v 20 Afa sangwali sis mi afa mwakwal profet el mi lambtigim afa sa eheningim nofkikena lambtigianhigbi suwi wahkig lagig yi. Ena suwiba eba fun salfa suwi lagi. Sonag mwakwal profet sis i mungwa si ahogohba afa sa ehe haig haig wasneig ogfunig afa el sati sisna ginof lambig afa ehena sungwagim fingi fig ehe ehengelim mwakwalenig. \p \v 21 Afa enag el hos la gag ehena mengig la nai pina sig pugugim asa mungwali minginag elim enana kwaskofeg. Afa sa tuwafig ambegim ehengelni nihigim ahagawagigba sa enogieskofeg. \c 20 \s1 Satanim 1,000 yia la kikenagig fwahig \p \v 1 Afa ka nangugba of lanai el heven lanai pe blog bume tigeflaitiag ki mi afa wasneig sen mi ningana lambtigigu. \p \v 2 Afa ehe kafa kwaniam kehlagu. Afa ena kafaba eba sombine autunai nemog enaba seflig Satan. Afa of lanai el ehem 1,000 yia la senna kike fwahag. \p \v 3 Afa of lanai el ehem ena bume tigeflaitiag la fla fatigim mengigim pwaka fegim kikiseg fwahag. Afa sa mas elim ehe enanam 1,000 yia la mwakwalhiagei. Afa maia 1,000 yia awaieba afa sa enanam bume nai fwaha mwakwalig pugufe. \p \v 4 Afa ka nangugba misog elni pegag sime afa sa ena sime laba el enanai yi auguia enaba God ehengelim kwefihiageg gafugag faig. Afa ambangel Godna mo fliufuba afa sa Sisasna mo ambala sihig afa sa ehengel mas sis mi afa sisna sungwag mi lotu fegonig mo afa sisna ginof mas ninga la mi mingig la i gohonig mo asa ehengelim kwaskofigbi asa ati ka ehengelni sungwagimba nanguagig. Eba ehengel nofkikena gag pese flinim eba misog el feasainam asa 1,000 yia la Sisas i mungwal nangwagihiagifie. \p \v 5 Afa sonag elbi eba gof la nai hefba pese nofkikena gag lambig. Afa mungwali minginag pigieg el eba maia 1,000 yia awaiba asa nofkikena gag flifie. \p \v 6 Afa ambangel sa gof gam pese bigiagafeg eba afsug finim asa sifakalfie. Afa sumi nai lahagba eba ehengelim mas amtakwale asaiyi. Afa eba God mi afa Krais mi pris feasainam asa 1,000 yia la Sisas i mungwal nangwagihiagifie. \s1 Ati Satan filafeg \p \v 7 Afa maia ena 1,000 yia awaieba afa sa Satanim kalabus lala nai pigi fwahinigbi. \p \v 8 Afa sa ambala pugugim mungwali bite gominefiahba asa elim mwakwalenugiakaba afa sa Gok kembig lanai el i afa Magok lanai el i ehem elni enaig esinig lamblug mungu la laskuihlagim asa hagig. Sonag elni nambaba ofenaiba engig bu lanai. \p \v 9 Afa ehe mungwali bite la afu apukegim asa Godna elni kembigim wagigo fakag ena kembigba God fwina membeg. Afa suwi heven la nai pegim elim amtakwaligim lagkumuhlag. \p \v 10 Afa Satan enaig mwakwalenugiakag afa sa God ehem suwi lagig yi afa salfa fun lagig yi enanai yi fatig. Afa enanai yiba sangwali sis i afa mwakwal profet i ati ahgofenaba asa ehengel ena susug wahkig osuna i afa sinaini i lambafofofe. \s1 Sum kwefihiageg feg \p \v 11 Afa ka nangugba kwania busug pegag sime afa el enanai yi gaba. Afa sa heven i afa bite i ehena embem ahkag afa mas nangwagi. \p \v 12 Afa enanai yi melig pigieg misog el i afa esug el i sime muhla afohiaba. Afa buk bambohiagig afa ming bukba bafogba eba nofkikena gag buk. Afa ena buk laba elni haig haig nihe ginof afohiafena asa enag ginofim fahigiagigim afa sa enaig elim kwefihianigig. \p \v 13 Afa mungwali melig pigieg el heafna kembig mi afa kwania bu lanai mi fwahigim afugba asa God ehengelni nihe kwefihianigefe. \p \v 14 Afa God mungwali haig haig la sa el enanai yi pigig enam flag afa melig pigieg la nai kembig flagim asa suwi lagig bume gam lambtianhag. Ena suwi lagig bume enaba ming lahag enanai yi go. \p \v 15 Afa ambangelni unehlag mas nofkikena gag buk la goh mo enaba suwi lagig bume kwania la lambi aitifie. \c 21 \s1 Mulug heven i afa bite i ahpugu \p \v 1 Afa ka nangugba mulug heven i afa bite i ahgo. Afa gof lanai heven i afa bite i ati awaiei ikag afa kwania bu gafa mas gi mo. \p \v 2 Afa Godna afsug kembig eba mulug Jerusalem ka nangug. Eba God heven la nai ningihiaba asa pe blog. Enaba suialag wagna ofenaiba angwafig alagag la ako. \p \v 3 Afa ka higigba elni une pegag sime nai fwina esog og, “Sa hig, Godna lala eba mungwali elni olyi go God elim mungwa si wango afa ehengel heafna el feskofegba afa ehe ehengelni God feg. \p \v 4 Afa ehe ehengelni nombim titenigefe asa ehengelim mas pese pigi afa mas susug i afa kinig i mas pese puguni afa mas pese wewatigoi. Afa enaig autunaiba ati awaieg.” \p \v 5 Afa el misog elni pegag sime la gahba kam enaig esonag og, “Sa hig, ati ka mungwali gau mulug eseageg fwahag. Enaba sa ginofe, ena moba nufunam nemog feg.” \p \v 6 Afa ehe kam sihina og, “Mungwali gafugag ati ihlafeg. Afa kaba kike gof lanai feg afa sumi nai feg. Afa mungwali gawig kike mog feg afa mungwali gawig awaiyegim eba kike mungohe feg. Afa ambanim bu hefegba eba ka ehem bu esug faife ena buba eba nofkikena faig bu. \p \v 7 Afa ambangel sa fagim filafifie eba ehengel sa ma sonaig suialag auguiag fli. Eba ka ehengelni God feniba afa ehengel kana luwalig feasaife. \p \v 8 Afa el ambangel sa lakumuis afug el i, afa mauule el i, afa nufweh el i, afa elim tigifatigule el i, afa aga taitu el i, afa agisu el i, afa mwakwal Godim lotu fenig el i, afa mwakwal el i afa enaig elbi asa suwi lagig kwania bume la enanai yi fun salfa lagi asa enanai yi apaiye afufe. Enaba ming lahag sum go.” \s1 Jon mulug Jerusalemim nanguna \p \v 9 Afa elegeg la gohug of lanai el elegeg la gohug disni lambug afofena enanai yiba elegeg la gohug kinig afoguafna enanai mungu kam sihinag og, “Au blo ka nem ogfuna sonag angwafig eba Sipsip Luwalig flafe.” \p \v 10 Afa Godna Sungwabug kam wasneinagim afa sa kam kwania mug gam wani fokukagim asa afsug kembig mulug Jerusalemim kam ogfunag. God heven lanai ningihiagba asa pe blog. \p \v 11 Ena kembigba Godna ombusugug kaminefeg ofenaiba Jaspa fun suialag glas lofug afsug feg. \p \v 12 Afa ena kembigba bog wagigo fakigba asa fwina fukokageg afa mengigba 12 pela afohie. Afa ena mengig laba Israelna 12 pela simbianingana unehlag afohiakana. Afa 12 pela of lanai el ena mengig laba afohiakana. \p \v 13 Afa ena mengigba osu puguiagam sambaga mungu afohiena afa osu pegam sambaga mungu afohiena afa ming ehbegam sambaga mungu afohiena afa ming ehbegam sambaga mungu afohiena. \p \v 14 Ena 12 pela funba bog enanai yi sisi yi go ena funba bogim wasneinag. Afa enanai yiba Sipsip Luwaligna kanog fwatieg elni unehlag eyi afohiakana. \p \v 15 Afa ena of lanai el kam sihinagba enaba gol aga yuhug flaugu enaba ogna kembigna, bogna afa mengignam yuhuwage. \p \v 16 Afa ehe kembigim yuhuwagenaba afa sa sambaga sambaga ehbeg mungwalof feskofena. Ehbegba eba 12,000 statia\f + \fr 21:16 \ft 12,000 statia eba 2,200 kilomita.\f* afa sisi gam kwag eba gwenaig mungwalofug. \p \v 17 Afa ena bogim yuhuwagenaba 144 kubit\f + \fr 21:17 \ft 144 kubit eba 65 mita.\f* hofulug fena enaba yuhuwagenaba eba mungwalofug el sa sifafifie. \p \v 18 Afa bogba fun Jaspa fena afa kembigba gol suialag nemog fena afa namba glas lofug afsug fena. \p \v 19 Afa ene kembigna bog eyi gohugba eba haig haig ginofna fun suialag afogopina. Afa angig eba fun jaspa, afa angigieg eba ongug fun sapaia, afa olyinai eba busug fun aget, afa fignieg eba gwemaug fun emeral, \p \v 20 afa ming eba afa fun eba satonakis tafnaig busug fun, afa enwesog eba tafnaig fun konilian, afa elegeg eba lafweg fun krisolait, afa gug eba ongug gwemaug fun beril, afa tut eba lafweg fun topas, afa ming tut eba gwemaug lafweg fun karisopres, afa ming gug eba ongug gwemaug fun haiasin, afa ming elegeg eba tafnaig fun ametis. \p \v 21 Afa 12 pela mengig eba 12 pela sale afofena afa ena saleba eba kaksag kigna feg. Afa ena saleba eba mungu mungog mengig la afohiakag. Afa kembig minaba eba gol suialag nemog feg ofenaiba glas lofug afsug feg. \p \v 22 Afa ka mas lotu lala nangug mo afa God Ainiyag ehe wasneig feg afa Sipsip Luwalig enanai yi ehe ahgo afa ehe lalana kifegim ahflag. \p \v 23 Afa ena kembigba God ehe osu lofug ombusugug feg afa Sipsip Luwalig ehe wi lofug gaflagoba asa eheningi ena kembigim ombusugug ahfaig afa osu i was i eba mas ahfeg mo. \p \v 24 Afa mungwali el enag ombusugug i ahwagifgo afa mungwali bitenai misog el heafgelni suialag suialag gawig lambug ambeg enanai yi saiyeg. \p \v 25 Afa osunaba eba mengig gwese pigi go. Enanai yiba sinaini fwainig asa mengig mas kikisi. \p \v 26 Afa mungwali el heafgelni suialag suialag gawig i afa kaksag kig i lambug ambegim enanai yi saiyegohug. \p \v 27 Afa el haig haig esig i afa mwakwal el i mas ena kembig la saigoi. Afa enaig nufwef mo mas ena kembig gofi. Eba ambangelni unehlag sa nofkikena gag buk la go ena mungohe ena kembig laba saiyegofe. \c 22 \s1 Nofkikena gag bu i afa nofkikena gag li i \p \v 1 Afa of lanai el kam afalig buum ogfunag. Eba nofkikena faig bu fegim afa glas lofug falaugufego. Godnai i afa Sipsip Luwalig nai i pegag sime nai pe blogim. \p \v 2 Afa kembig mina ikag la enanai yi ena buba olyi ikagi. Afa ming magig ikag afa ming magig ikag enanai yiba nokikena faig li afohie. Afa ena libi eba mungu mungu wasi yi 12 pela haig haig fug leafo. Afa figegba elim mungwali bite naim suilafetifeg. \p \v 3 Afa God mas amtakwaligimba membena mo enanai yi gohuguba. \p Afa Godna i afa Sipsip Luwaligna i pegag sime kembig la gohun. Afa sa ehena gafugag el ehem lotu finim, \p \v 4 afa sa ehena nofbusugim nanguini afa ehena unehlag ehengelni mingig la afohienfini. \p \v 5 Afa enanai yiba sinaini fwainig eba God Ainiyag ehe ombusugugba feg afa osu i lam i eba esug ahgo. Asa ehengel misog el wahkig gwese afofufe. \p \v 6 Afa of lanai el kam sihinag og, “Hwa moba eba nufunam nemog feg. Afa God Ainiyag ehe Godna mo fli sihiaule elim anwenag faini. Afa sa heafna of lanai elim ningihiagba asa blog gafugag elim ogfunigbi afa sa mangwal ikagna pugufe.” \p \v 7 Afa Sisas enaig esog og, “Sa hig, eba ka ikagna blofe! Hwa buk laba mangwal sa sumi yi pugufe, afa ambangel sa ena mom patalfuiagba eba sama sifakali.” \p \v 8 Afa ka Jon ka higig afa ati ka enaigimba nangug. Afa maia of lanai el kam enam ogfunagba afa koka ehem lotu fena asa ka ehena kigmuhla peg. \p \v 9 Afa ehe kam enaig sihifenag og, “Mas esi! Ka gafa Godna gafugag el gwenaig feg afa gwenaig neangafa afa gwenaig minginag gafa Godna mo fli sihiaule el gafa afa ambangel ena mo buk la patalkuiag gafa gwenaig esi. Sa ne Godna unehlagim mungohe fingi fe!” \p \v 10 Afa ehe pese ming mo gwesim sihina og, “Ena sumi nai mo ati meyi puguiagim ofe asa nofeka ena mo buk lanai kumoahla. \p \v 11 Afa amban sa amtakwaligim eseageg eba sa fwahiba sa ma gwenaig eseakafi. Afa amban nufwef mom eseakafofe eba sa fwahiba sa ma gwenaig eseakafi. Afa amban sa suialag nihem eseagefe eba sa fwahiba sama gwenaig eseakafi. Afa amban afsug fegba eba sa fwahiba sa ma gwenaig fe.” \p \v 12 Afa Sisas enaig esog og, “Sa hig, eba ka ikagna blonam afa sa ka mungu mungu elim mungwag gwenaig faife. \p \v 13 Afa kaba kike gof lanai feg afa sumi nai feg. Afa mungwali gawig kike mog feg afa mungwali gawig awaiyegim eba kike mungohe feg. \p \v 14 “Afa ambangel sa heafgelni lofugim gigiafiagig enaba sama sifakalinim afa sa ma nofkikena gag faig li fug ahaganam afa sa ma kembig mengig megam saiyenam afui. \p \v 15 Afa ambangel sa Godim mas fatinig, afa sa agisu fig, afa aga taitufig, afa elim kwaskofig, afa mwakwal Godim lotu finig, afa mwakwalig enaig elbi eba kembig la afwambala afohiefofe. \p \v 16 Kaba Sisas ka kikeafna of lanai elim ningihiagba ehe ati sios elim ena moba faig. Kaba Devitna biteana luwal fegim afa ka ambagna bufiyi ombusugni feg.” \p \v 17 Godna Sungwabug i afa Sipsip Luwaligna angwafig i enaig sihi ahfe og, “Au sa blo!” Amban sa higig ehe gafa sa ma sihi og, “Au sa blo!” Ambangel sa ne buhefe skofeg sa ne blo nofkikena faig bu ne eba God nem esug faife. \s1 Wasneig mo i afa sumi nai mo i \p \v 18 Kaba Jon wasneig mo osihi amban sa ne ena buk la sumi nai mo go sa ne higim afa amban sa ne algana mo enanai yi pahlafe eba God nem ena kinig sisi pahlanifie. \p \v 19 Afa amban sa ne sumi nai buk la go afa ne enam flafatiba eba God neana nofkikena faig li fugim flafatinibi asa mas heafna kembig la afu saiye hwa buk la enaig esog. \p \v 20 Afa el sa ena mo sihinaba enag ilawo sihig og, “Eba nufunam, eba ka ikagna blofe.” Eba esefe. Sisas Ainiyag au sa blo. \p \v 21 Afa sa ma Sisas Ainiyagna esmunagim kwaganig Godna elim gohoni. Eba nufunam.