\id 2TH  - Ama NT [amm] -Papua New Guinea 2009 (DBL 2014) 
\h 2 Tisolonaika 
\toc1 Ti monoi Imo Poloyo Kumotiki Tisolonaika Nokoso 
\toc2 2 Tisolonaika 
\toc3 2 Tis 
\mt1 Ti monoi Imo Poloyo Kumotiki Tisolonaika Nokoso  
\ip Polo mo ti monoi imo kumotiki, Tisolonaika noko nokolaloso, Isisoso no mulumolo luwaikino no. Noko Siyoliyo amukono monoi toi mo sai muwoi, piyamoki, yasoi tumowo. No monoi no mo kulu wiyotiki, toku no fiyamosokaki no.  
\c 1  
\p
\v 1 Polo asawoi Sailowoi Timotiwoi, koi mo tokumononinukuwo, Kotoso mulumolo luwai noko moiso, Tisolonaika nokonuso no tosinuwo no. Moi mo Koto noko tiwoi tosi tomasikonuwo, moini Apouwoi Isiso Kolaiso Siyoliwoiso.   
\p
\v 2 Koto noko tiyo na tofasinuwo, Apou Siyoliwoi Isiso Kolaiso Siyoliwoiyo. Totiyo noinomo mulu tomokiso na tosinuwo.   
\s1 Wafisu imo, Tisolonaika noko monoi.  
\p
\v 3 Woli iyali, Kotoso wafisu imo na timo unu manonukuwo. No mo afonimaiso muwoi. Na tomulumolo luwai manonuwo. No monoi no. Tokusai mulumolo luwai manokinuwo, ainoso hani lolai mo mulu ami amisoso na tomulumolo luwainuwo. Mulu tukuwano manonuwo. Toku mo koufaso. Lolai mo mulu mo sisiyoli na tukuwanonuwo.  
\v 4 No monoi no Kotoso mulumolo luwai noko nokolalo siyaiso tikalo manonoki mo, moi monoi aino imo mani, tikalonoki. Ulai afonimaiso? Na tomolokimo manonukuwo. Uo nokoyo tuwomosinuwo mo, hani hani kopokoiyauyo tuwokomo manonuwo mo, ulai na tomulumolo luwai manonuwo. Pa tulosukomo manonuwoso, mulu ami amiso na tosinononuwo.   
\s1 Kotoyo suo foli monoi uwokomomoko aino imo.  
\p
\v 5 Moiso no hani haniyo uwomoko no hani monoi? Moiso wiyomoko monoi saso, Koto mo na towiyomoko, suo foli monoi yomukaiyakimo, tani imo mo motu saso. Hani haniyo uwokomakinuwomo, Koto mo mulu ititounikaiyoinuwomo, yomoimo, “Toi mo waliyo, yani auso si monoi. Ya na samukukoimo.” No monoi no hani haniyo tuwokomo manonuwo.  
\v 6 Suo foli monoi yomukaiyakimo, imo motu saso yomukaiyoimo. No monoi no uo nokoyo uwokomakinuwomo, uo foli monoi na uwokaikoimo.  
\v 7 Moisu mo koiwoi si itouniyaimoinuwomo. Kopokoiyauyo uwokomo mo koma na. Koto mo aino yoimo, awitono fiyamosimaiso. Kumokisai amukonoimo, Isiso Siyoli mo, tani kumoki noko ami amiwoi koliyo konoimo. Tawoi imokalo konoinomo.   
\p
\v 8 Noko mo Koto sai somiso mo, na uwokoimo. Moini Isiso Siyoli totani imo itouniyaimo kwai somiso mo, imo kwai somiso foli monoi na uwokoimo.  
\v 9 Na uwokaikoimo. Aniyopa poi poi uwokaiko manoimo. Noko Siyolini auso no hani monoi ti monoi? Tani ami mo siyoli siyoli, wiyouwa wiyou. Ulai toi no hani monoi ki monoi? Na uwokaikoimo.  
\v 10 Totani noko nokolalo ititouni mo kaluwaiyaloinomo, tani siyolo mo. Nasu, amukonakimo, mulumolo luwai noko nokolalo komaso mo iyamo unoinomo, “Wiyou, noko siyoli wiyou.” Moi mani, noinoso na. Ulai afonimaiso? Kotoni imo posasoko wiyononikinukuwo mo, waliyo na mulumoloko unumokokinuwo.   
\s1 Kotoso utolumo imo, Tisolonaika noko monoi.  
\p
\v 11 No monoi no mo, koi mo moini Kotowoi imo tolukaso unu manonukuwo, na tutolumo ununukuwo, moiyo molo itouniyaimoso aluwai monoi, toku no aliyonikomokinuwo no, noinoso na. No monoi no waliyo yomu unoinuwomo, totayo mo. Na tutolumo manonoki, totani amiyo noinomo moiyo mulu ititouniwoi saso si monoi, no tiyo manonuwo no. Na tutolumo ununukuwo, totani amiyo noinomo moiyo mi itouniyaimo ano monoi, no tiyo manonuwo no, mulumolo luwai monoi.  
\v 12 No monoi no koi mo Kotoso timo ununukuwo, moiyo aluwai itouniyaimo monoi. Aluwai itouniyaimakinuwomo, moini Isiso Siyolini siyolo na kaluwaiyaloinuwomo. Tota mani, momaini siyolo siyolo kolalaloinuwomo. No mo afonimaiso muwoi, Koto noko ti mo suomoso monoiso tofasikomonuwo, moini Kotowoi Isiso Kolaiso Siyoliwoi mo.   
\c 2  
\s1 Kotoni atolitolotono aino imo.  
\p
\v 1 Woli iyali, moini Isiso Kolaiso Siyoliyo ifou amukono monoi, ainonani monoi amiso na timonukuwo. Tani auso ukouniyaikoku monoi, ainonani monoi na timonukuwo.  
\v 2 Imo topoko nokoni imo monoi noiyo umanokomoiwo. Siyaiyo iyamaloimo, “Polo iyaliyo tiyamo taikiyo, “Noko Siyoli mo ifou yasoi amukonoki.” No mo Kotoni imo muwoi. Koi mo aino pa kumokinokiso. Topoko imo saso. Noiyo umanokomoiwo.  
\v 3 Topoko imo noiyo kwaikoiwo, na ifoluwai komaloinuwomo. Noko Siyoli mo amai amukonoimo, namolisai. Toku mo noko molopoi nokoyo namoliyo alosimoinomo, Kotoso. Tani atolitolotono mani, toku na fiyamosiyoimo, noko no mo Kotoni imoyo no uwokaiyaki no.  
\v 4 Nonani nokota mo wiyou. Nokoyo no lotu ukakino no, to mo namoliyo alosikoimo, tota amu monoi lotu unoimo. Nokoyo no molokikakino no, to mo pa molokiko fasikoiso, tota amu monoiso na molokimoimo. Kotoni lotu nu siyoliso mani, na yousa toimo, tota amu monoi yomoimo, Kota Kotowo.   
\p
\v 5 A, moi no tofufolikomonuwo? Ainonani monoi toku yasoi pimomosikinukuwo, moini auso tolokainomai.  
\v 6 Moi mo sai, lolai mo ami haniyo Kotoni atolitolotonoso tufiyaimomoi. Kotoyo yomukaiyakimo, nomai nosu na fiyamosiyoimo, totani atolitolotono mo.  
\v 7 Ulai lolai mani, nokoyo nonani imo kulali nokotani molo koiyauso taluwaiyalono, wosu woso. Ulai noko amiyo totasu mo tufiyaimomoi, ainoso hani Kotoyo nonani ufiyaimo nokotaso na imoimo, “Tofolo, na pokiyo.”  
\v 8 Kiyo taikiyakimo, nosai no mo atolitolotono mo na fiyamosiyoimo. Ulai Isiso Siyoli mo na amukonoimo, atolitolotonoso na ufosifoliyoimo, na uwokaiyoimo. Wiyouwa wiyou, fiyamosiya konakimo, atolitolotono no moloi tolo monoi? Na uwokaiyoimo, wiyouwa wiyou.   
\p
\v 9 Kotoni atolitolotono mo tumakimo, afonimaiso tumowoi muwoi, Sokolo Nokota Waiyo na imo taikiyoimo, na imoimo, “Yani amiwoi na potolano.” No monoi no tumoimo. Wiyouwa wiyou, mulu ifolaluwawoi mi na ano manoimo, asuwo asuwo. Noko nokolaloni molo timai asuwo asuwo na ano manoimo, mulu ifolaluwawoi mi mo.  
\v 10 Koiyau siyoli, imo motu kwai somiso nokoso mo ifoluwaikoimo, asuwo noko itouniyaimowo. Na uwokaikoimo. Imo motuso mulumolo luwai mo waliyo, samiyaikiyo si monoi.   
\p
\v 11 No monoi no mo, Kotoyo kwaikokaiyoimo, ifoluwaiko imo monoi mulumolokoinomo, imo motuwo.  
\v 12 Wiyou nonani foli monoi na uwokoimo. Ulai afonimaiso? Imo motu imoso mulumolo luwaiwoi muwoi, molo koiyau mulu saso, no monoi no na uwokoimo.   
\s1 Samiyaikiyo si aino imo.  
\p
\v 13 Woli iyali, Kotoso wafisu imo na timo unu manonukuwo, totayo moi muwokaikomo monoi. Noko Siyoliyo mulu na tununuwo. Tokuwa toku Koto mo na muwokomokaikinuwo, samiyaikiyo si monoi. Na yomukaiki, “Yani Mulu Itouniyaimo Nokotayo noinomo toi mo yani noko nokolalo ititouni na. Imo motuso mulumolo luwaiyoinomo.” Koto mo aino na muwokaikinuwo.  
\v 14 Koi mo imo itouniyaimo lukasiya tumokinukuwo mo, totayosu mo aliyonikinuwo, “Yani imoso na pukwaimonowo.” Kwaimakinuwomo, moini Isiso Kolaiso Siyoliwoi si tomasimoinuwomo, totani saponimaiso.   
\p
\v 15 No monoi no mo, mulu ami amiso na pa siwo. Woli iyali, Kotoni imoso na pa aluwai manowo, imo no mo koiyo no paiyolokomo mosikinukuwo no. Imo siyai mo moini auso lukasikomokinukuwo. Siyai mo pasosai kulunoni taikiyokinukuwo. Komaso na pa aluwaiko manowo.   
\p
\v 16 Ya tiyomu, Koto noko ti mo waliyo tofasimokono, moini Isiso Kolaiso Siyoli totawoi moini Apouwoi mo. Mulu unumokokino. Suomoso monoiso fasimokokino, na hamukumokokino, no monoi no mulu ami ami tosi manokoni, aniyopa poi poi. Si itouniyaimo monoi tofou sikoni, toku no yomukaikino no.  
\v 17 Nonani noko ti mo waliyo tikikomo itouniyaimonuwo, mulu amikomoinuwomo, molo itouniyaimoso aluwai monoi, imo itouniyaimo lukasikalo mano monoi.   
\c 3  
\s1 Kotowoi imo lukaso aino imo.  
\p
\v 1 Woli iyali, imo topimo mo amai. Siyoli Nokotaso na pa utolumo unumokowo, totani imo posasokalo monoi, somaiso maliyaliyalo monoi. Na pa utolumowo, noko nokolaloyo totani imo monoi molokimo monoi, moiyo no molokimokinuwo no, noinoso na.  
\v 2 Uo noko kopokoiyau monoi samiyaikiyo monoi mani, na pa utolumo unumokowo. Noko mo yapoli, Noko Siyoliso pa tomulumolo luwainoso.  
\v 3 Noko Siyoliyosu mo pa tulosukomomoiso. Mulu na amikomoinuwomo, na samukukomo manoinuwomo, uo nokota wai monoi mo.  
\v 4 Koi mo mulu mo tiwoi muwoi, koi mo sai, imo na tukwaimoko manonuwo. Koi mo sai, no imokinukuwo no, noinoso na taluwainuwo, na aluwai manoinuwomo. Siyoli Nokotawoi tosi tomasimokoni, no monoi no.  
\v 5 Ya tiyomu, Siyoli Nokotayo mo waliyo towiyononinuwo, Kotoyo moi monoi mulu unu monoi. Kolaiso Siyoli tota komiyai pa ulosukomo manoinuwoso, mulu ami amiso si manoinuwomo.   
\s1 Mi ano ufolo aino imo.  
\p
\v 6 Woli iyali, Isiso Kolaiso Siyoliyo imoko taikiyoki, no monoi no imo ami na timonukuwo. Isisoso mulumolo luwai noko mo mi ano ufolumakimo, noiyo si tomasimoiwo. No aiyolokomokinukuwo no, nosoni aluwai somiso mo, noiyo si tomasimoiwo.   
\p
\v 7 Momaisu mo sai, koini moloso aluwaimoko monoi. Yasoi na wiyononikinukuwo. Moini auso simai, ulai koi no mi ano ufolukomomokoki? Mi siyoli na pano manokinoki.  
\v 8 Tuo mo afonimaiso pa noko wanoni manokinukuwoso. Suo mo muwoni nali no. No monoi no muwoni mi mani, panomosikinoki. Ulo ulo amoloki amoloki mi soliyaki pano manokinoki, na pofolokomomoko manoki. Moiyo no nimoko monoi mo wiyou iyamokinoki.  
\v 9 Koiyo pimonukuwo mo, “Na pofasimokowo,” no mo koiyau muwoi, waliyo pimonukuwo. Ulai muwoni mi anokinoki mo, tuo ano monoi mo, no mo moiso wiyononi monoi, mi ami ano mano monoi. Tomoso aluwaimoko mo waliyo.   
\p
\v 10 Moini auso simai na pimomosikinukuwo, noino, “Mi ano ufolumo nokota no koloni no hani monoi noko monoi?”  
\v 11 Ulai imofa tokolo koloma tumo liyai, noko siyaiyo mi ano ufoluko monoi. Mi anowoi muwoi, tulosukomoi, nokoso tokukamiko manono.  
\v 12 Nonani nokoso koi mo imo amiso na tikonoki, “Mi noiyo ano ufolukomoiwo.” Isiso Kolaiso Siyoliyo imoko taikiyoki, no monoi no tikikonoki, wosu woso suomo. Nokoni tuo pa noko watiyoinoso. Mi na ano manowumo, koloni i monoi mo.   
\p
\v 13 Woli iyali, moisu mo molo itouniyaimoso aluwai monoi noiyo ulosukomoiwo.  
\v 14 Ni tokumononinukuwo no, ninani imo nokoyo kwai somiso mo, na pa auwosisimowo. Noiyo si tomasimoiwo, no monoi no auwosimoimo.  
\v 15 Ulai noiyo iyamo unoiwo, woliya woli muwoi. To mo wolino na. Isiso Kolaisoso tomulumolo luwai, no monoi no na pa ikimowo.   
\s1 Imo topimo.  
\p
\v 16 Ya tiyomu, mulu tomoki mulu kiyo nokota siyoli mo waliyo, ta noinomo mulu tomokiso si manoinuwomo, ulo ulo amoloki amoloki. Moi komaso na totolo fasikomonuwo.   
\p
\v 17 Polo asani nainoyo woiyo woiyo imo niya tokumononinukuwo. Asani nainoyo ku mo ninoino nali. Imo komaso ya no kulu taikiyomoi no, komaso mo yani nainoyo ku mo fokufaso ninoino nali yapoli. No monoi no moi mo sai, asani imo mo.   
\p
\v 18 Moi komaso mo moini Isiso Kolaiso Siyoliyo na tofasikomonuwo.