\id JAS - Ambai New Testament 
\h Yakobusi 
\toc1 Kaiwo Anatu Na Yakobusi 
\toc2 Yakobusi 
\toc3 Yak. 
\mt2 Kaiwo Anatu Na 
\mt1 Yakobusi 
\is1 Kaiwo dedung we Yakobusi 
\ip Kaiwo anatu ne Yakobusi soi denatuai we Allai ne inontarai eroaso Yesusio enayai wariai na nunei sentenang fosa. Na kaiwo anatu ne, soi kariri fi bitoya wesa na kaiwo netawea fo, we fiainawiai wesa tuti we deunausa nayai. Amani deunau kariri inontarai Kristenine eminohi toa fo tuti fianai aino enari fo. Ampafe soi wesa, kariri todoni mano ene fi fosa tuti mano ene pari fi fosa fianai aino esodaira fo, kariri todoni enari ne bengfe fo, enemitituai sarawa kaha fo, kariri roasoai tuti ohong kariria fo, kariri kaiwo ariri maduri foi, kariri awaifo, tuti kariri mano enemirorong dedai fosa. Yakobusi kontai deretawansa we wiro etinggai inontarai fanai, wiro etatofa fanai, tuti etawansa, tuti etutang tutisa we Allai. 
\ip Na kaiwo anatu nini Yakobusi deretawanai kontai paria we na eminohi weinontarai Kristeni fo, todoni kontaio eteinawi ene eroasoafo na etohong toa fo. 
\iot Kaiwone deto kutuai toninai: 
\io1 \ior 1:1\ior* Kaiwo reantenang. 
\io1 \ior 1:2-8\ior* Roasoaia mutu na dadira rorong fo tuti utang Sempaisi we dohong awaifo. 
\io1 \ior 1:9-11\ior* Fi kariri mano ene fi fosa tuti mano ene pari fi fosa fianai aino esodaira fo. 
\io1 \ior 1:12-18\ior* Fi weanggari ambori tau wei fo. 
\io1 \ior 1:19-27\ior* Taramioai tuti ohong kaririai. 
\io1 \ior 2:1-13\ior* Wiro iri inontarai kariri ene fifo fanai. 
\io1 \ior 2:14-26\ior* Roasoai tuti ohong kaririai. 
\io1 \ior 3:1-18\ior* Sasari tatapereminei wedayari. 
\io1 \ior 4:1–5:6\ior* Inontarai Kristeni tuti finunei. 
\io1 \ior 5:7-20\ior* Kaiwo arerai we ohong kaririai. 
\c 1  
\s1 Mahikaifea 
\p  
\v 1 Weo doroi bohio mea kiai, amani inontaraio meweriria na Israeli rabuang suraya boruo menayai wariai na nunei sentenang wa mea. 
\p Yau Yakobusi, Allai tuti Seng Yesus Kristusi une womingne yau, yenatu mahikaifeai we mea kiai. 
\s1 Meroasoaia mutu na dadira rorong fo tuti metutang we Sempaisi we ambori dohong mea mesawai 
\p  
\v 2 Doroi bohi, masino mesodai maino dadirafo mani, dohonao menemirorongwai fituaya fe, mae memararising pampang.  
\v 3 Weo mewaitawanaifa we meroasoia mutu na dadira rorong mesodairi nani, wedaya metawang mea.  
\v 4 Meruraifa we ambori mene metawang mea nanai wedaya memasi tuti mebiriu na fiani kontai.  
\v 5 Masino manei na mea wiro sewai kaha mani, todoni kontai dutang Allai ambori dohong awaifo wei, weo Allai mani warang takahetuai funomai ampafe fianai aino utang wea fo dohonai arora, wiro enetituaitafea kaha.  
\v 6 Wape manei dutani mani, yoasoai we fi dutang weai nanai sobua rai, wiro enerorong soriru fanai. Weo mano enerorong soriru nei mani, ne tarai toyari andeisa rawanangrausi. Wanangfoi siai todoni mani, andeisafoi dipu kontai tonanai.  
\v 7-8 Inontarai tonana nei mani enerorong boyari kaha, ampafe wiro meduraia futuayai kariri fianai aino niari fo kaha. Nana mani dohonao enetituai kontai we sobu fieai ria Sempaisi fe. 
\s1 Fi kariri mano ene pari fi fosa tuti mano ene fi fosa 
\p  
\v 9 Doroi Kristeni mano mene pari fi wa mea, mefaraise, we Allai yuai mea ampa.  
\v 10 Tuti inontarai mene fi wa mea, memararising kontai, weo Allai dohong mea meminohi na katai tawawa fo. Weo inontarai ene fi fosa ambori eworu toyari ainari rai.  
\v 11 Wofi dautai piao robongfoi mani, reraungfoi siamorang, ampafe ainarifoi mirurang tuti ne mianafo nai. Tonanai kontai we inontarai ene fi fosa. Erurai tuti ene fifoa tonanai, wape ambori eworu. 
\s1 Fi weanggari tata we ambori tatawai 
\p  
\v 12 Mandoni dino sawani na fi dadira sodaira fo mani, wenani Allai mioani. Weo sawani kawuru na ne tonananea mani ambori sobu fiembaitafo, amani sobu numainu Seng Allai dereri we inontarai mano enemiwawuti fosa fo. 
\p  
\v 13 Manei sobu fio weanggariri we ambori dohong sarawaifa fo mani, dohonao deyo, “Allai dino weanggari yau ne,” fe. Weo Allai mani wiro enerorong dohong we niari fi karira fea kaha, tuti wiro weanggari manei na wea kaha.  
\v 14 Mae manei sobu fi weanggariri tonana fea mani, enerorong dohong we niari fi kerira fo andi wedayari ne, ne tarai kariri keri sofa we diang.  
\v 15 Ampafe dohong kariri enerorong kerira nania mani, wedaya sasarifoi tuti weboyari ria sasarifoi pampang mani, ambori wedaya mararehafoi. 
\p  
\v 16 Doroi enehuwawu mea wa meaine, dohonao menemitituai sarawa fe, weo Allai wiro weanggari manei kaha.  
\v 17 Fiani kontai aino tasobua fo, amani fi bengfo tuti maifo, biari kiai na rorafaisi meu, amani na Allai, mano niari sambewarai na rorafaisi foi. I mani Allai, mano wiro yiwani na wea kaha, tuti fianai aino meduraia fo wiro yiwang ahang kaha.  
\v 18 Na mantauni ne dawiafo, yuai tata we ne arikang tuti yiwang taenemirorongnei weworu, amani na taroaso ne Kaiwo wetarai fo. Niari tonanai we tatafo, weo nano fi kiai niariri na nufi nini mani, tataino diri tata reantenangne. 
\s1 Taramioai tuti ohong kaririai 
\p  
\v 19 Doroi enehuwawu mea wa meaine, meru kaiwo fininaia mutu, amani we mandoni wau kontai ki, wukahera we taramudidau kaiwoariri, wape dohonao wukahera we modu tuti kosou fanai.  
\v 20 Weo mandoni dino kesou mani wiro dohong kariri ne maio Allai eneoa fo kaha.  
\v 21 Ampafe fi kerira tuti fi memunao menariri pampang foi mani, mehabioi weru mea. Mae na menemirorong tewawa meru Allai ne Kaiwo sanamai na menemirorongwai, weo Kaiwo nanai wemambiriu we kia mea mekaharai weru ne karirafo. 
\p  
\v 22 Todoni kontai metohong kariri fianai aino Allai medura fo, dohonao metaramioai tera fe. Weo metaramioai wape metohong kariria kaha mani, mepampamu bera mantaung mea aha.  
\v 23 Inontarai mano tarao Allai ne Kaiwofo wape wiro dohong kariria kaha foi mani, ne tarai toyari wedoari deti ureng na kasinai.  
\v 24 Deti urengfo na maia kai, wape da weru kasinaifoia mani aroporo urengfo we ne tarai toa foa.  
\v 25 Wape Allai ne Hukumio kia kaiwasafoi weru mamantiti rorong foi fo, manei detori na mai tuti dohong kaririaifa pampang, wiro taraoai terai mae aroporohai ahang kaha, wenani Allai mioani na fianai aino niari fo. 
\p  
\v 26 Mandoni dino deyo i mani inontarai somi we Sempaisi dine, wape wiro deitawang taperengfoi kaha mani, wenani sofa berahi aha tuti ne yoasoafo wiro wefiea kaha.  
\v 27 Inontarai somi na tarai we Dai Allai tuti mesi na urengreafo ne mani, fiata arikang awata tuti wiwina esodai dadira fosa, tuti i kontai derara ne taraifoi weru fi kerira nunei. 
\c 2  
\s1 Dohonao metiri inontarai kariri ene fifo fe 
\p  
\v 1 Doroi meaine, mea mani inontarai meroaso Yesus Kristusi tane Sengno sambewarai dadai sewa foi, di mea, tonana mani wiro metiri inontarai toyari manei dedai sewai manei siai fanai.  
\v 2 Weo masino inontarai ne ra bitoya manei, sata araha rea keiwewa na warakehafoi tuti sensuni na ansungno mehikai, da to mene katai mefanduhi mea nai wai mau, mayeai inontarai ne pari fi manei, sensuni na ansung karira, da kontai mau,  
\v 3 nana mani mano ne ra bitoya tuti sensuni na ansung mehikai foi andino metatori sewa ne. Weo memadu wei meteyo, “Daie, munohi na kaderao denteng nini,” wape mano ne pari fi foi mani memadu wei meteyo, “Boari na wanai ete munohi na nang wowong nina.”  
\v 4 Menari tonana mani, metitua mene doroifosa, we manea etadai sewa mano wei fosa, tuti deinawiai we menemitituaitawa kerira. 
\p  
\v 5 Nehu doroi enehuwawu mea wa meaine, metarami ma. Inontarai ene pari fi na nuneisa mani, Allai dirisa we ambori titua kariri ene eroasoafo mani, sahusa we inontarai ene fi disa. Inontarai nanisa ambori Allai yuaisa we ne inontarai terai weo eminohi riati na ne weMananufo, kariri ne kaiwo dererai we mano enemiwawutia fosa.  
\v 6 Manamo metoari aha meteikanggani mano ene pari fi fosa aha. Wape mano ene ra bitoya fosa enari kanggani mea. Ansaino etinggai mea tuti eha mea to mangkutu kaiwo fosa ne.  
\v 7 Eaino eteibera wonongno dedai mirarebana foi, amani Yesusi mano ne mea foi. 
\p  
\v 8 Mananufaisi dohong kaiwoariri we tatohong kaririai na Buku Mirarebana foi, amani, 
\qm1 “Menemiwawu inontarai siai kariri menemiwawu bera mantaung mea wa.”\x * \xo 2:8 \xt Imamati 19:18\x* 
\m Metohong kariri kaiwo nana mani menari ne wetaraifo finana.  
\v 9 Mae metiri inontarai toyari manei dedai sewa manei siai, amani metato manea wape manea bereri, nana mani metohong sasari, tuti Allai ne Hukumi dohonai we Musai nanai deinawiai we metohong sara ne Hukumifoi.  
\v 10 Tuti mandoni dino dohong kariri Allai ne Hukumifoi kiai, wape enefunomi na rabuang bei mani, wenani dohong sara Hukumifoi sentenang kontai.  
\v 11 Weo na Hukumifoi Allai medu deyo, 
\qm1 “Wiro metena ria wiwing ete mang siai fanai,” 
\m tuti Hukumi siari nani kontai andino deyo, 
\qm1 “Wiro memung inontarai fanai.”\x * \xo 2:11 \xt Keluaran 20:14; Ulangan 5:18\x* 
\m Ampafe masino wiro metena ria wiwing siai kaha, wape memung inontarai mani, metohong sara ne Hukumifoi sentenang kontai. 
\p  
\v 12 Ampafe fianai aino memadura fo tuti menari fo, metitua weai. Weo Allai kiutu kaiwo kariri mea rai, kariri ne Kaiwo kia kaiwasafoi weru mamantiti rorong foi fo.  
\v 13 Weo mandoni dino wiro deinawi ne aroafo we inontarai siai kaha mani, na rahida wanai Allai kontai deinawi ne aroafo wei kaha. Wape mandoni dino aro inontarai siai mani Allai wiro dohong aiboifo wei kaha. 
\s1 Roasoai tuti ohong kaririai 
\p  
\v 14 Nehu doroi meaine, manei medu deyo i mani inontarai yoasoa dine, wape wiro deinawi kaririai na ne dohong toa fo kaha, nana mani ne yoasoafo kia fiani wei rai? Manei yoasoai tonana mani Allai wiro feriri kaha. 
\p  
\v 15 Tarahio mene doroi manei, ne pari ansung demoyarai we sensuni nayai tuti fiang demoyarai we dang na rahida neungfo kaha.  
\v 16 Wape memadu wei meteyo, “Wau ro mau wa. Nemu mahikai wonsung waua monikapoi feai tuti mahikai bampi fea.” Wape wiro metohong fi dohong weai nana kaha, nana mani we fiani e memadu tonanai wei nina?  
\v 17 Tonanai kontai na taroasoafo, wiro tatohong kariria kaha mani, tane taroasoai nanai wefiea kaha kontai. 
\p  
\v 18 Tarahio manei boyo, “Yau mani, iroasoai teraifa mani demoyarai,” tuti manei wau aha mani boyo, “Yau mani, yohong te ne bengfoa mani demoyarai.” Wape imadu mau yeyo, meteinawiai na kaiwoariri arora kariri mene meroasoawa, ambori yeinawi nehu iroasoane na yohong toa ne we mea.  
\v 19 Kontai meroasoai we Allai mansiari kawuru. Mahikai! Wape metarami ma, inggiranesa eroasoai tonanai kontai, tuti ematai paria. Mano meroasoai wape wiro metohong beng kaha mani, mebeng sewa inggirafosa kaha, weo ea eroasoai kontai, wape etohong kariria kaha. 
\p  
\v 20 Inontarai inggowui wa meaine, tarahio meteyo yeinawiaifa we mea we mewati terai weo roasoaifa wape ohong kariri ne bengfo kaha mani, roasoai tonana nei wefiea kahai.  
\v 21 Mewati tane werengno Abrahami e? Rahida bo deo miung ne kaisungno Isaki na mesba wowongfo kariri kaiwo arerai Allai deyoai wei fo, na fi niari nanai Allai detori we denteng riati aha.  
\v 22 Na fianai aino Abrahami niari nanai, deinawiaia kasau ampa, we roasoafo mani, wiro kaiwo madurai arora fine kaha, mae fio ohong kariria fine. Ampefe na finiarifo mani ne yoasoafo mai.  
\v 23 Finanai mai kariri Sengnei ne Kaiwo rabuang bo dotu deyo, 
\q1 “Abrahami yoaso Allai, 
\q2 tuti na yoasoai nanai Allai detori we inontarai mesi dine.”\x * \xo 2:23 \xt Kejadian 15:6\x* 
\m Ampafe sahui we ne maniwowiri.  
\v 24 Ampafe kasau ampa, we inontarainesa ebeng ria Allai aha fo, wiro na eroasoai tera fo kaha, mae na fi bengno enari fo. 
\p  
\v 25 Kontai mewati Rahapi e? I wiwing diru dine, wape Allai detori we denteng riati, we fianai aino niari fo, amani inontarai Israeli manduo ura wa uwati kariri bendari Yeriho foi, Rahapi dino dediwa suru na ne munufoi, tuti fiata suru uwawu to katai siai aha fo.  
\v 26 Ampafe, kariri tane tarainei weo anseng bireri weia mani, mireha. Tonanai kontai we taroasoafo, wiro tatohong kaririai na fibeng tanari fo kaha mani, taroasoai nanai ne tarai toyari mireha, wiro wefiea kaha. 
\c 3  
\s1 Sasari tatapereminei wedayari 
\p  
\v 1 Doroi meaine, dohonao na mea bitoya merurai we mewemantaunau jemati fe. Weo mewaitawanaifa we mano tawemantaunaune tata mani, Allai kiutu kaiwo we tata fo maraba sewa. 
\p  
\v 2 Tata kiai, wea mani tatohong sarawai. Wape mano wiro medu sara kaiwoariri kaha foi, i mani inontarai mesi dine, amani inontaraio sawang ne taraifoia mitu dine.  
\v 3 Mewati kudanei e, oyo autai nai tuti ambori iruwi we da kariri tatawiafo mani, tabuhi wai na borongfoi ambori wai nani dino iruwi nai we da kariri tatawiafo ne.  
\v 4 Kaparinei kontai tonanai. Kaparifoi watioi we fiebai tonanai tuti wanangfei mani suruoi paria, wape na ne bo irua foi mano siruwi foi siruwi defai na mimoya kariri ne dawiafo.  
\v 5 Tonanai kontai we tatapereminei, i ketui paria wape deparanding tata karira beyari. Mewati adia urengnei, ketui tonanai ki wape enang dininio kesoia kiai nai.  
\v 6 Tatapereminei mani ne tarai kariri adia. I wedaya sasari we tane tarainei sentenang. Fi na tane tarainei kiai mani andino kerira sewa ne. Ampafe kaiwo tamadurai na tatapereminei, ne tarai kariri adia na Soroha rorong foi. Saminseni andi wedaya tatapereminei denggararu tonanai, ambori kia karira we tata na rahida taminohi na nunei ninai. 
\p  
\v 7 Andowa aweng boa foi tuti ne fiafa na arong foi, romu tuti diangnei, aunauwi wori finahang ki, tuti inontaraine etaunauwia finahang ampa.  
\v 8 Wape tatapereminei mani mandoni kontaio wemambiriu we deunauwia finahang we medu sua kaiwo kaha. I memuna, mandoni kontaio wiro taraoi kaha, ne tarai toyari fimemu we memu kaiwasanei.  
\v 9 Tamadu nai tatohong mahikai we Sempaisi, tane Dai Allai, tuti tataperemi siari nani kontai andino takaherawai tuti tateikanggani inontarai siai Allai niarisa kariri mantaunifoi ne.  
\v 10 Ampafe kaiwo fiai fo tuti kaiwo kaherawa fo kawariai ruhiai na tatapereminei. Doroi meaine, finanai kerira paria.  
\v 11 Weo waya ureng boyari deda mandiei mani, wiro dowei memisi tuti dowei pirandima kaha.  
\v 12 Tonana kontai we ai urung nei, wiro webong saituni kaha, tuti anggurinei wiro webong urung kaha. Ampefe waya ureng deda mandiei meuai foi, wiro dedao mereha memisi ahang kaha. 
\s1 Awai kia mai we tata ne mani biari na Allai meu 
\p  
\v 13 Masino na mea manei deyo i mani sewai tuti deitawang Allai ne rangfoi, nana mani todoni kontaio deinawiaifa na dohong toa fo, amani niari fi masi fo tuti ne bengfo na enerorong tewawao weneung na ne awaifo.  
\v 14 Wape masino menemirorong pirahai we inontarai siai tuti mewati we mene tarai bo meneng wai terai we ambori mewemewonomi mani, dohonao meboi mearomiwa meteyo mesawai fe. Weo na tonanane mebari wera kaiwo wetarai fo.  
\v 15 Mano deyo sewai tonana nei mani, wiro sobu awai nani na rorafaisi meu kaha, mae na nunei ma, tuti awai nani da na Allai Nuaninufoi kaha, mae da na Saminseni ma.  
\v 16 Weo na doni kontai inontarai enemirorong pirahai wesa tuti ewati wesa terai esera we ambori ewewonomi, na nanai kontai ambori inontarai esawasa tuti emamuna wawerasa, tuti enari maino fi karira fo. 
\p  
\v 17 Wape mandoni dino sobu awai na rorafaisi meu mani, reantenang pari mani wenani mesi wiro seyewa kaha, piraise we kia manangfo, deti we inontarai siai, tuti taradidau kaiwo. Enewawu fuba tuti niari ne bengfo. Doa rahanai, wiro enetituai we manei dedai sewa manei siai kaha, tuti wiro tapereng sobaura kaha.  
\v 18 Inontaraio eminohi na mai tuti efata inontarai siai we eminohi ruhiai na mai, nana mani inontarai emasi disa, tuti etohong kariri Allai ne dawiafo. 
\c 4  
\s1 Mewemaniwowiri we finunei fanai mae metato Allai 
\p  
\v 1 Fifiani wedaya mea mesawa mea tuti memamuna wawera mea ne? Finanai dariai na fi karira menemituaiti na menemirorongwai, amani finanai dawi mea pampang we menari ne karirafo.  
\v 2 Metohong paria we mesobu fieai, wape finanai mesobua kaha, wedaya memung wawera mea. Tuti menemititou we inontarai ene fi na menemirorong kerira, wape wiro mesobu fi metawi weai nana kaha. Mesawa mea tuti memamuna wawera mea. Mesobu fi metawi wea fo kaha, weo metutang Allai kaha fefe.  
\v 3 Kontai tarahio metutani kawuru ampa, wape mesobua kaha, weo fio metutang weai nanai, wiro na menemirorong mesi kaha, wape we mantaung mea mefaraiseraifa fine. 
\p  
\v 4 Toyari wiwingno enerorong wiro dohong we ne mangfoi titou ahang kaha tuti dohong sarawai ria mang siai, mea kontai menemirorong dohong te we Allai ahang kaha, mae metohong we finunei. Mewaitawanai kahai we mewemaniwowiri we finunei mani, wedaya meweaiteta we Allaifo ne? Ampafe mandoni dino de wemaniwowiri we finunei mani, wenani weaiteta we Allai kontai.  
\v 5 Dohonao meteyo kaiwo dotu na Sengnei ne Kaiwone sofa fe. Weo Nuaninu Denteng Allai dohoni niayai na tane tarainei dawiai paria we tenemiwawu te Allai tuti tasomi terai wei.  
\v 6 Tonanai ki wape Allai dohong beng fuba sewa we tata. Ampafe doni na Kaiwo Mahikai ne medurai deyo, 
\q1 “Allai dapa mano enemirorong dedai nesa, 
\q2 mae dohong beng we mano enemirorong tewawa nesa.”\x * \xo 4:6 \xt Amsali 3:34\x* 
\p  
\v 7 Ampafe tonana mani metato Allai tuti metapa Saminseni, ambori mito weru mea ki.  
\v 8 Mehefang Allai, ambori Allai kontaio kefang mea. Mano menari sasari wa mea, meruai mewaramiwara mararebanai weru sasari menariri wai, tuti mano menemirorong boru wa mea mani meruai menemirorongwai kontai ambori mirarebanai.  
\v 9 Metatua bera mene taraiwai, mesai tuti metaidu, todoni kontai meriwang memiriwa na mesai tuti memirisingwa na menemirorong fituayai.  
\v 10 Metu menemirorongwaia tewawa na Sempaisi arongreafo, ambori yuai mea metadai ki. 
\s1 Wiro meteibera mene doroifosa fanai 
\p  
\v 11 Doroi meaine, wiro meteibabera mea fanai. Mandoni dino deibera ne doroifoi ete dei we i we dohong sarawai, nana mani ne tarai toyari wenani deibera Allai ne Hukuminei tuti deyo Hukuminei sarawai, weo Hukumi nani deyo todoni kontai enewawu ne doroifoi. Nana mani mene tarai wemangkutu kaiwo we Allai ne Hukumifoi, toyari meteyo fibeng kaha fine. Masino meteibera Allai ne Hukuminei tonana mani, wiro metohong kariri Hukumifoi kaha.  
\v 12 Wape mansiari kawuru andino ne mambiriu we dohong Hukumifi we inontaraine tatane, tuti andino wemangkutu kaiwo we tatane. Mano nani mani Allai dine, andino wemambiriu we feriri tata tuti kebi tata to Soroha rorong foi ne. Ampefe mene mambiriu fiani feaifa ne, meteibera tuti mehutu kaiwo we mene doroifesa nina? 
\s1 Dohonao mearomiporo Sengnei tuti meboi mearomi tuti fi menari wa fe 
\p  
\v 13 Mano memadu meteyo, “Rahida nini ete aha te, ambori torontai to bendari bowani ete bei siai aha, tonayai defuina bei teai we towaworifi torawayanai, we tosera we doi nayai.” Metarami ma.  
\v 14 Fifianai aino aha mesobua fo mewaitawana kahai arorawa. Mene tarai todoni rai? Mene tarai toyario kawario kameai mani watioi tonana mae touraia mani niaia.  
\v 15 Ampafe memadu tonina, “Masino Sengnei eneoa mani, taminohi tatarang tuti tanari fio tate tanari fo.”  
\v 16 Manamo wiro memadu tonana kaha, mae menemirorong dedai paria tuti meboi mearomiwa tuti fi menari fo. Kaiwo fuba meboi mearomiwa naya mani, kerira paria.  
\v 17 Ampafe mandoni dino deitawanaifa we ne bengfo todoni kontai niari, wape wiro niari kariria kaha mani, inontarai nani dohong sasari finanai. 
\c 5  
\s1 Kaiwo aunau we mano ene ra bitoya fosa 
\p  
\v 1 Mano mene ra bitoya wa meaine, metaramio nehu kaiwo finina. Mesai metaidu fafong we dadira bitoya ambori mesodairi foi.  
\v 2 Mene rafi misuhia kiai ampa. Tuti mene ansungfe kantantini kiutuwi kiai ampa.  
\v 3 Mene ra emasi tuti peraki fi raima soi kiai ampa. Raima nani we fiainawiai kariri fianai aino mesodaira fo ki, amani todoni Allai kebi mea tono rawanang adia rorong fo ambori keso mene taraiwai kiai. Weo nunei ne rahida werea naya fe kefang ampa, wape mefanduhi ra bitoya terai. Ampefe mene rawai niai ki tuti mesodai karira bitoya ki.  
\v 4 Mewati ma! Mano erufi we mea na mene romiwai ebibe esahu weo wiro mebaisa kaha fefe. Esai tuti esahu we manei fiatasa, tuti erawamifui nani, mananu Seng Allai taraoi ampa.  
\v 5 Mefanduhi ra bitoya na nunei we mefaraiseri tuti memiang mene taraiwai nai. Nana mani mene tarai toyari sapio ahumia ne tarai fiabai we ambori ani. Mea kontaio tonana, amani na mene ra nani memainenang mea we mesobu ne karirafo.  
\v 6 Mano etohong sarawa kaha fosa meru aiboiosa tuti memunsa, wape wiro enumiai mea kaha. 
\s1 Metawang mea na dadira rorong mesodaira fo weo metamang we rahida Sengnei daraberahi nai ma fo 
\p  
\v 7 Ampafe doroi meaine, metamang tuti metawang mea pariao Sengnei daraberahi aha ma. Metawang mea kariri inontarai mandohong romi nei, i mani sanang aibong na romifoi, mae na wemunudang mani sawani demang pariao we wemetang aha ambori fi sanang fo tifu na mai tuti wetarai.  
\v 8 Mea kontai tonanai, metamang tuti metawang mea, metoaria mutu, weo Sengnei ne rahida daraberahi nai ma foi kefang ampa.  
\v 9 Doroi mea, dohonao menemitituai ete meteibera mea fanai. Weo menari tonana mani Allai dohong aiboi we mea rai. Mearomioaifa we Mangkutu Kaiwofi kefang we da ma ne, meinenang kawuru ampa. 
\p  
\v 10 Doroi meaine, mearomio kariri Allai ne nabio fafongfa emadu na wonong fesara fo. Ea esodai dadirafo tonanai ki, wape etawansa. Ampafe menarisa we fiainawiai we metohong karirisa.  
\v 11 Tarai to, ea mani tatatosa paria, we etawansa fefe. Metaramio Ayupi kontai we sawani na dadira rorong sodairi foi ampa, tuti mewaitawanai kontai kariri fianai aino sobuai ria Seng Allai fo ampa. Weo Sengnei mani aroa sewa tuti enerorong denteng. 
\p  
\v 12 Doroi meaine, ne reantenang pari metohong kaririai konta mani, dohonao mefafora na finunei ete na fi rorafaisi fe, ete na fifiani konta fe. Mae fi meteyoai nanai antu mani meroa terai meteyo yo, mae antu kaha mani meroa meteyo bireri. Ambori Allai dohong aiboifo we mea fanai. 
\p  
\v 13 Masino manei na mea sodai dadira mani, dutang we Allai, mae manei firaise mani wenani yohi fiai Allai.  
\v 14 Manei na mea meninang mani sahu mano ewenunggamiei we jemati fosa, ambori etutang tutiri we Allai tuti episowi na maning na Sempaisi wonongfo.  
\v 15 Masino eroasoai tarai mani, mano meninang nani ambori denteng ki, weo Sengnei waraira ne maninangfoi. Tuti niari sasari mani Sengnei waraira ne sasarifoi kontai ki.  
\v 16 Ampafe mea kiai meteiai wawera mene sasariwai, tuti metutang tuti wawera mea ambori mebeng. Mano enemirorong mesi fosa mani, ene nadifoi wemambiriu paria tuti Allai yoa wei rai.  
\v 17 Mewati Eliai. I mani inontarai batang dine kariri tata, wape yoasoaia mutu dutanai we ambori metang ming fanai, tuti metangfoi wiro ming kahai defuina botoru aburungfeai kaririai.  
\v 18 Mayeai dutang Sempaisi nariai aha, ainanaya metangfoi miung aha, ampafe ninoi tuti fitantanangfoi tetifu aha.\x * \xo 5:18 \xt 1 Mananufosa 17:1–18:45\x* 
\p  
\v 19 Nehu doroi meaine, masino manei na mea wiro da kariri Sengnei ne Kaiwo wetarai ne ahang kaha, mayeai mano yoasoa manei fiatari daraberahi we Kristusi aha,  
\v 20 nana mani mearomio ninai, amani mandoni dino wedaya inontarai sasari manei daraberahi weru ne rang sarawa foi mani, wenani feriri inontaraifoi weru marareha rorong fo tuti wedaya sasari bitoya niariri foi niai. 
\p Mahikaifeai.