\id PHP - Amuesha (Yanesha’) NT [ame] -Peru 2008 (ETEN -2013) 
\h FILIPENSES 
\toc1 San Pablo Poʼcarta ñeñt̃ quellcan Filiposoʼmarneshaʼ 
\toc2 Filipenses 
\toc3 Fil 
\mt2 AÑ SAN PABLO POʼCARTA ÑEÑT̃ QUELLCAN FILIPOSOʼMARNESHAʼ 
\mt1 FILIPENSES 
\c 1  
\s1 Pablopaʼ quellcan carta all ayottam̃p̃saret̃tena; añecop quellquëʼ ñeñt̃ ameʼñetsa anetso Filiposo 
\p  
\v 1 Masheñneshachaʼ ñam̃a noc̈haneshachaʼ ñeñt̃es allohuenes oʼ pueyochreshaʼ perres Parets eʼñe separrocmateñot̃ Cristo Jesús all anetso Filiposo, amaʼt ñam̃a saʼm̃chaʼtaret̃erneshohuen ñam̃a ñeñt̃es diáconoc̈hnos ñeñt̃es sherbets all puerahuo. Na Pablon epan masheñ Timoteo ñeñt̃en sequellquëneʼña añ carta.  
\v 2 T̃eʼpaʼ eʼñe nehuom̃chaʼteñot̃es sa, napaʼ oʼch notas: Yomporepaʼchña sebensareʼtam̃peneʼ ñeñt̃ nanac Parets epuet Puechemer Jesucristo ñeñt̃ Yepartseshar yepen. Ñetepaʼchña socshateneʼ eʼñe sa seyoc̈hro allohuenes. 
\s1 Arrpaʼ atet̃ maʼyocham̃penanet Pablo 
\p  
\v 3-4 T̃eʼpaʼ oʼch notas, allempo nemaʼyocheña Yompor ñeñt̃ neyemtena na, neyerpueñot̃espaʼ c̈hocma nocshensa Yomporeshot̃. Ñeñt̃oʼmarña allempo es nenamuennas Yomporpaʼ c̈hocma nocshensa Yomporeshot̃ allohuenes.  
\v 5 T̃arroʼmar allempot̃eñ saguër Cristopaʼ sapaʼ alloʼnaʼt sesen ameʼñatsa t̃emeʼttsen. Eʼñe sameʼñeñot̃paʼ att̃oña sellcapretna att̃och errot̃enot̃paʼ oʼt̃eʼ epaʼhuerra erracmañen añ cohuen ñoñets alloch yequeshperra.  
\v 6 Ñam̃a napaʼ neñotenes att̃o Yomporpaʼ oʼ ameʼñatasa ahuaña, t̃eʼñapaʼ ñepaʼchña alloʼna ahuamencat̃ sep̃aʼnmueʼ eʼñe ñocop, t̃ayot̃eñ amaʼt esempohuañenchaʼ huerra Jesucristo pueʼntañot̃.  
\v 7 Ñeñt̃ atet̃ nentapretenespaʼ ñeñt̃paʼ eʼñe pocteʼ t̃arroʼmar atarr nemorrentensa eʼñe neyoc̈hrocmañen. Ñeñt̃oʼmarña yellcannaʼteñot̃paʼ yeñoteñ Yompor eʼñe puemuereñot̃paʼ amach aʼypoʼñerrno na amaʼt ñam̃a sa. Atet̃ napaʼ amaʼt cárceloʼtsenen Yompor puemuereñot̃enpaʼ amach aʼypoʼñerrno. Ñam̃a ñerraʼm allempo achm̃areʼtenet añ cohuen ñoñets alloch yequeshperra, att̃o napaʼ nemoñena añ cohuen ñoñets, Yompor puemuereñot̃enpaʼ c̈hocma ahuamencat̃ penen. Ñam̃a allempo nameʼñateña acheñeneshaʼ añ cohuen ñoñets alloch yequeshperra, Yompor puemuereñot̃paʼ c̈hocma ahuamencat̃ penen.  
\v 8 Ñeñt̃oʼmarña t̃eʼ Yomporpaʼ eñotenen poʼñoc̈h t̃eʼpaʼ nanac neyerpuensa. Eʼñe atet̃ nanac nemorrentensa ñerraʼm atet̃ morrentenya Jesucristo eʼñe cohuen.  
\v 9 Atet̃ nenamuennas Yompor socoppaʼ atet̃ noten, alloʼnepaʼch sesen morrentannaʼtnomtsa nanac ñam̃a alloʼnepaʼch sesen eñotnomueʼ ñeñt̃ nanac sherbets yamoʼtseshacop. Allochñapaʼ att̃och c̈hocma yorrtaten yemorrenteña eʼñe poʼñoc̈h.  
\v 10 Att̃ochña señoch erraʼtsent̃eʼña nanac cohuen sherbets Yomporecop. Allochñapaʼ eʼñe señoteñot̃paʼ añepaʼchña atet̃ sep̃aʼyen ñeñt̃ eʼñe cohuenareʼ. Allochñapaʼ amach c̈ha saʼyohuaret̃terro ñerraʼm esempohuañenchaʼ huerra Cristo.  
\v 11 Ora atet̃ nenamuennas Yompor socoppaʼ atet̃ noten, eʼñe sameʼñeñot̃ Jesucristo poctacmapaʼ añepaʼchña cohuen atet̃ sep̃aʼyen ñeñt̃ nanac sherbets Yomporecop. Ñerraʼm atet̃ yepenapaʼ att̃ochña eʼñe cohuen yaʼcshapretaret̃tena Yompor poʼcohuenña. 
\s1 Att̃o epatuan allohuenacop Yompor poʼñoñ eʼñe cárcelot̃ 
\p  
\v 12 Ñeñt̃oʼmarña masheñneshachaʼ ñam̃a noc̈haneshachaʼ oʼch neñotatas, amaʼt att̃o ayottam̃p̃saret̃en cárcelo ñeñt̃paʼ ama añecpayaye att̃och oʼch epatareʼtenan cohuen ñoñets alloch yequeshperra. Elloña eʼñe att̃ot̃paʼ alloʼnach sen epaʼhuatsa Yompor poʼñoñ.  
\v 13 Ñeñt̃oʼmarña t̃eʼpaʼ allohuen guardianeshaʼ ñeñt̃ cohuam̃peneʼ am̃chaʼtaret̃epoʼ ñetpaʼc̈hoʼña oʼ eʼñe eñotuanet att̃o ayottam̃p̃saret̃en cárcelopaʼ añot̃ña eʼñe nameʼñeñot̃ Cristo atet̃ pennet. Ñam̃a amaʼt paʼnamen acheñeneshaʼ t̃eʼpaʼ oʼ eñotuanet ñeñt̃ecop nemueroc̈htena.  
\v 14 Ñeñt̃oʼmarña t̃eʼpaʼ shonteʼ masheñneshaʼ eʼñe alloʼna senet yemuetnomuet Yepartseshar Cristo poctacma, t̃arroʼmar ñetpaʼ atet̃ entennet eʼñe nameʼñeñot̃a Cristo nemueroc̈htena cárcelo. Ñeñt̃oʼmarña ñetpaʼc̈hoʼña oʼhuañ mechaʼnaʼtet serrpareʼtet Yompor poʼñoñ. 
\p  
\v 15 Ñehua, poʼñoc̈hpaʼ eñall puesheñaʼtets t̃arrecpach serrpareʼtenet Cristo eʼñe pueʼmatareʼteñot̃etan na. T̃arraña poʼpsheññec̈hnopaʼ eʼñech pocsheñeshocmañen aʼpot̃eññañet Yompor poʼñoñ.  
\v 16-17 Añpaʼ eʼñe puemorrenteñot̃etan atet̃ penet t̃arroʼmar ñetpaʼ eñotennet napaʼ anaret̃en att̃o nach moñenaya añ cohuen ñoñets alloch yequeshperra ñerraʼm esempo achm̃areʼteñet. T̃arraña ñeñt̃ña serrpareʼteneʼ Cristo poʼñoñ eʼñe ñocpuetapaʼ amach pueñmañeshacmayeʼ serrpareʼteneto. Ñetpaʼ c̈hat̃eʼ otenapuetañ alloʼnach atsrreʼmoc̈hen entatnennet amaʼt cárceloʼtsenen. 
\p  
\v 18-19 Ñehua, amaʼt atet̃paʼ nocoppaʼ eʼñe pocteʼ. Amaʼt errot̃eno serrpareʼtenet cohuen ñoñets Cristocop, nocoppaʼ eʼñe pocteʼ nenteñ. T̃arroʼmar amaʼt pueshquëñmeʼchatsa serrpareʼtenet Cristo, amaʼt ñam̃a pueñmañeshot̃chaʼ serrpareʼtenetpaʼ napaʼ ñeñt̃chaʼña nanac nocshateneʼ. Ñeñt̃oʼmarña napaʼ c̈hocmach nocshena t̃arroʼmar napaʼ neñotenes sapaʼ c̈hocma semaʼyocham̃penna ñam̃a neñotena Jesucristo Puecamquëñpaʼ ñeñt̃ña ahuamencat̃ nepeneʼ. Ñeñt̃oʼmarña neñoteñ añ mueroc̈hteñets tsapat̃onet̃paʼ aʼpoctataret̃chaʼ eʼñe cohuen nocop. 
\s1 Att̃o Pablopaʼ ora allpon correʼt̃ arr patsropaʼ ñeñt̃paʼ eʼñe ora Cristocop 
\p  
\v 20 Ñeñt̃oʼmarña eʼñe nocsheñeshaʼ necueñ t̃arroʼmar neñoteñ amach apencataret̃eno amaʼt mamesha. Ñam̃a amach nem̃chaʼnañot̃ayaya neʼñoreno eʼñe cohuen Cristocop. Att̃ochña napaʼ acshapretpoʼ entapretennet Cristo, amaʼt napaʼ errot̃enoʼtsenenchaʼ amaʼt ñerraʼm nerroma amapaʼ ñerraʼm ora nocrrenmeñ. Atet̃ ahuat̃ot̃eñpaʼ t̃eʼpaʼc̈hoʼña att̃ecmuepaʼch pena.  
\v 21 T̃arroʼmar napaʼ allpon nocrrena arr patsropaʼ ñeñt̃paʼ eʼñe ora Cristocop. Ñam̃a amaʼt c̈ho nerromapaʼ ñeñt̃paʼ elloña nanac cohuen nocop.  
\v 22 Ñam̃a ñerraʼm allempo nocrrenmeñpaʼ t̃orrenayanach Yompor poʼtaruas t̃arroʼmar att̃ot̃chaʼña alloʼnach nesherb̃atneññañ Yompor poʼñoñ. Ñeñt̃oʼmarña ñeñt̃chaʼ nanac nemnaʼ t̃eʼpaʼ ama neñoteñe erraʼtsent̃eʼña ñeñt̃ nanac sherbets, ñatoʼ oʼch nerroma t̃ayecma amapaʼ ñatoʼ corretsanach.  
\v 23 Ñeñt̃ nanac t̃orrapoʼ nenten oʼch notas ñeñt̃ atarr cohuen nenten, ñatoʼ oʼch nerroma amapaʼ corretsanach. Napaʼ nemneñeñ oʼhuañchaʼ nocrra añe patsro allochñapaʼ oʼch nec̈hap t̃ecma Cristesho, t̃arroʼmar ñeñt̃paʼ elloña nanac cohuen nocop.  
\v 24 T̃arraña ñerraʼm amach nerromopaʼ ñeñt̃chaʼña nanac sherb̃ats socop.  
\v 25 Ñeñt̃oʼmarña napaʼ neñoteñ amach nerromo, amach nesaʼnerrso, allochñapaʼ alloʼnach nesen seyc̈hatnomueʼ allohuenes att̃o ñerraʼm alloʼna yesen yemtaya Cristopaʼ c̈hocmachña yocshena.  
\v 26 Allochñapaʼ ñerraʼm esempo nec̈herr seshopaʼ allempochña alla neñotaterrserr nanac, att̃och alloʼna sesen nanacocmañen coshaya Cristo. 
\s1 C̈hocmuepaʼch yocrrena eʼñe cohuen ñeñt̃ atet̃ oteney Yompor poʼñoñot̃ 
\p  
\v 27 T̃eʼpaʼ añach notas, c̈hocmuepaʼch socrra eʼñe cohuen ñeñt̃ atet̃ yorrtaten ñeñt̃ey ameʼñenaya Cristo poʼñoñ. Allochñapaʼ ñerraʼm machayot̃a nab̃cherrsaʼ amapaʼ ñerraʼm amaʼtchaʼ ama yab̃channerropaʼ eʼñepaʼchña cohuen neʼmareʼtenes att̃o eʼñe huomenc sepen seyoc̈her att̃och eʼñe pat̃rra soct̃apeʼchen. Ñam̃a oʼch neʼmareʼtas att̃o sapaʼ semaʼyoc̈hrena allohuenes parro att̃och semoñena añ cohuen ñoñets alloch yequeshperra.  
\v 28 Ñam̃a amuepaʼchña aña seyoreʼtatstaye amaʼt mamesha ñeñt̃ seʼmoñeʼteneʼ t̃arroʼmar ñetpaʼ ñeñt̃chaʼña eñotatahuet poʼñoc̈h ñetpaʼ amach queshperreto. T̃arraña yocopñapaʼ ñeñt̃ña yeñotateneʼ poʼñoc̈hpaʼ yequeshp̃aʼhuerrach. Añec̈hnopaʼ Yomporo poct̃ap̃ña.  
\v 29 Ama pat̃rrayaya muenatenye Yompor att̃o oʼ yameʼñera Cristo. Añña eʼñe puemuereñot̃ey muenateney ñam̃a eʼñe yameʼñeñot̃paʼ c̈hochña yemueroc̈hta ñocop.  
\v 30 Ñeñt̃oʼmarña sapaʼc̈hoʼña eʼñe pocteʼ oʼch saʼmueroc̈htataret̃ta Cristocop eʼñe atet̃ sentenen na ahuat̃ot̃eñ amaʼt t̃emeʼttsenpaʼ seʼmareʼtenen napaʼ alloʼtsenarana all nemueroc̈htena eʼñe nameʼñeñot̃ Cristo. 
\c 2  
\s1 Atet̃chaʼ yentena yañeña eʼñe puesheñaʼttsoy atet̃ enteʼt̃ Cristo eʼñe ñañeña 
\p  
\v 1-2 T̃eʼpaʼ oʼch notas ñam̃a poʼpoñ. Ñerraʼm poʼñoc̈h yameʼñeñot̃ Cristo eʼñech yocshatannena allempoña poʼñoc̈h sapaʼ socshaterrenchaʼ nam̃a. Añña ñeñt̃chaʼ nocshateneʼ eʼñe poctacma ñerraʼm eʼñech pat̃rra soct̃apeʼchuen allohuenes. Ñam̃a ñerraʼm poʼñoc̈h eʼñe yemorrentannaʼteñot̃ eʼñech yeyemtannaʼtuenapaʼ ñehua, t̃eʼñapaʼ c̈hocmuepaʼch semorrentannena amaʼt eʼñe sagattsa ñeñt̃es eʼñe parroʼmarneshacmas. Ñam̃a ñerraʼm allohueney poʼñoc̈h chorraʼhuenya ñeñt̃ara Parets Puecamquëñpaʼ ñeñt̃ot̃chaʼña eʼñepaʼch sepat̃rratuen soct̃ap̃ñot̃ allohuenes. Ñam̃a ñerraʼm poʼñoc̈h eʼñe socsheñeshaʼ semuerannenapaʼ ñeñt̃ot̃chaʼña amach poʼpoñ sentannaʼtuatsto.  
\v 3-4 Ñam̃a amach aña atarr sellcatsto ñeñt̃ eʼñe socpa. Añchaʼña puesheñaʼttsospaʼ sellcapreta ñeñt̃ llecatyeneʼ samoʼts. Ñam̃a amach sañeña entatstatso atet̃ ñerraʼmrrat̃eʼ ñeñt̃es nanac sherbets. Añchaʼña atet̃ sent samoʼts atet̃ ñerraʼmrrat̃eʼ ñetña nanac sherbetset, p̃añapaʼ amach es asherbenayeʼ penteno. 
\p  
\v 5 Añña pocteʼ oʼch senta sañeña atet̃ enteʼt̃ Cristo Jesús eʼñe ñañeña allempo huapa añe patsro.  
\v 6 Ñehua, ñapaʼ amaʼt nanac Paretspaʼ ama ommoʼchaneʼt̃e poʼpartsoña.  
\v 7-8 Ñapaʼ eʼñe pocteʼ encheʼt̃ oʼch atet̃ enteñ acheñeneshaʼ ñerraʼmrrat̃eʼ ñapaʼ ama Partsoyaye, oʼch att̃a orrtena ñerraʼm ama esoyaye atet̃ pena acheñ ñeñt̃ eʼñech pauner ap̃aret̃tena. T̃arraña añecop atet̃ peʼt̃ att̃ot̃chaʼ sherbenan Pompor amaʼt ñam̃a acheñeneshaʼ. Ñam̃a ñapaʼ amaʼt Paretspaʼ oʼ acheñetos arr patsro, eʼñe atet̃ orrtosa ñerraʼm ya ñeñt̃ey arromñat̃ey. Ñañapaʼ alloʼna sen pauner entatatsa att̃ot̃ña eʼñe pueʼm̃ñoteñot̃ Pomporpaʼ eʼñe pocteʼ eñch oʼch rroma corsocho ñeñt̃ nanac apencoc̈hen enteteʼt̃ ñerraʼm eseshaʼ rromats atet̃ corsocho.  
\v 9 Ñeñt̃oʼmarña att̃ot̃ña Pomporpaʼ oʼ alla nanac aʼcohuentater ñam̃a oʼ alla aphuer ello paʼsoʼcheñ ñeñt̃ nanac cohuen sherbets. Ñeñt̃ña soʼchñetspaʼ ello metanaʼtuanenan allohuen poʼpoñec̈hno soʼchñetsoc̈hno.  
\v 10-11 Ñeñt̃oʼmarña esempohuañenpaʼ allohuenet poʼyorñot̃etpaʼ aʼmet̃aʼhueretchaʼ eʼñe poctacma, Jesucristepaʼtña ñeñt̃ nanac partsotets. Allochñapaʼ att̃o eʼñe pameʼñaʼrrteñot̃et Jesús paʼsoʼchñopaʼ concorpaʼrretueretchaʼ allohuenet ñeñt̃ allpon eñall amaʼt allohuen ñeñt̃ entoʼmarneshaʼ ñam̃a allohuen patsoʼmarneshaʼ ñam̃a allohuen oʼponoʼtseneshac̈hno ñeñt̃ patsoʼtsen. Att̃ochña allempopaʼ ayeʼchoc̈htataret̃terra Yompor ñeñt̃ nanac Parets. 
\s1 Añach yemaʼyoc̈hrena att̃och alloʼnach yesen amaʼt acop̃a etsotyesnomueʼ ñeñt̃ poctetsa Cristocop 
\p  
\v 12 T̃eʼpaʼ eʼñe nemorrenteñot̃es masheñnesha ñam̃a noc̈hanesha oʼch notenes, ahuañmoʼchapaʼ c̈hocma seʼm̃ñotneʼt̃ ñeñt̃ atet̃ notaseʼt̃ allempo seshoʼtsenen. T̃eʼpaʼc̈hoʼña att̃ecmach seʼm̃ñoten ñeñt̃chaʼ atet̃ noterrserr amaʼt t̃eʼpaʼ nanac b̃ac̈hayoʼtsenen seshot̃. T̃eʼpaʼ añach notas ñeñt̃chaʼ atet̃ sep̃a. C̈hocmuepaʼch semaʼyoc̈hra att̃och alloʼnach sesen etsotnomueʼ ñeñt̃ cohuen enten Yompor, t̃arroʼmar ñapaʼ ñeñt̃ecopña oʼ aʼqueshp̃aterres. T̃arraña eʼñech sem̃chaʼnaʼteñot̃ seyomcha Yompor t̃arroʼmar yeñoteñ yoroc̈henoʼtsenya ñerraʼm ama Yompor poʼhuamenco yeyemto.  
\v 13 T̃arroʼmar Yompora eʼñe yemnateneʼ eʼñe yeyoc̈hro ñeñt̃ cohuen enten ña. Ñam̃a ñapaʼ ñach ahuamencat̃ yepeneʼ att̃och yetsotoñ amaʼt ora erraʼtsenchaʼ coshateneʼ ña. 
\p  
\v 14 Oʼch noterrserr ellonet̃ t̃eʼpaʼ ñeñt̃ ama att̃eyeʼ es sepeno. Amaʼt eseshacpa amach epuoyeʼ es atet̃ sepeno, señoseñeshot̃paʼ amach es sotnareʼtannaʼtatsto.  
\v 15 Allochñapaʼ ñerraʼm ama atet̃ yepenopaʼ eʼñech cohuen entyeney allohuen acheñeneshaʼ, amach eñalle att̃och eseshaʼpaʼ oʼch eñosyenet yocop añoʼ pocteyeʼ es yep̃aʼyeno, t̃arroʼmar eʼñech cohuen es yoct̃apeʼchyen att̃och yorrtaten atet̃ penaña ñeñt̃ poʼñoc̈h oʼ puechemer per Yompor. Amach eñalle ñeñt̃chaʼ aʼsosyateneʼ att̃o yocrrena eʼñe cohuen Yomporecop añe patsro. Eʼñech cohuen yorrtena acheñeneshacop amaʼt ñeñt̃ ama ameʼñetso ñeñt̃ atarr nanac sosey cot̃apeʼchenet. Cohuenchaʼ yorretyena atet̃ ñerraʼmrrat̃eʼ rantoc̈hno ñeñt̃ aʼpuetareneʼ checmeteʼ tsapo.  
\v 16 Att̃och saʼpuetarsam̃p̃sanetpaʼ c̈hoch señotaterranet ñoñets ñeñt̃ huetsa Yomporeshot̃ alloch yocrrerra eʼñe cohuen. Allochñapaʼ ñerraʼm esempohuañenchaʼ huerra Cristopaʼ socshaterrenchaʼ, t̃arroʼmar neñoterchaʼ ama eʼñe orrena nanac net̃orrerro socop.  
\v 17 Ñam̃a amaʼtchaʼ machayot̃a muetsataterrnet arr att̃o napaʼ oʼ nameʼñatasa, napaʼ atarr nocshena ñam̃a t̃eʼpaʼc̈hoʼña nocshapretensa att̃o sameʼñerra. Añña sameʼñeñapaʼ ñeñt̃chaʼ yehuapateññañ Yompor atet̃ ñerraʼmrrat̃eʼ ñeñt̃ amtsaret̃tetsa ñocop. Ñam̃a nerraspaʼ ñeñt̃chaʼ orrtatsa ñerraʼmrrat̃eʼ ñeñt̃chaʼ ashataret̃tatsa all ñeñt̃chaʼ oʼpatateñet Yompor.  
\v 18 Ñeñt̃oʼmarña napaʼ nemneñ sapaʼ amach c̈ha sellcatsto, c̈hochña socshapreterrna ñeñt̃ atet̃ oʼ notuas. 
\s1 Timoteopaʼ nanac cohuen llecapretaneʼt̃ pamoʼtseshaʼ 
\p  
\v 19 T̃eʼpaʼ oʼch notas ñeñt̃ atet̃ noct̃apeʼchen. Añ noct̃apeʼchen oʼt̃eʼ nemñer masheñ Timoteo t̃ayecma oʼch enterrsaʼ, ñerraʼm atet̃chaʼ muenaʼ Yepartseshar Jesús. Allochñapaʼ ñach neñotatuerreʼ errot̃ent̃eʼ sep̃aʼyena, allochñapaʼ att̃och socshaterren ñerraʼm cohuenoʼtsenest̃eʼ.  
\v 20-21 Añchaʼ nemñonas masheñ Timoteo t̃arroʼmar ama eñalle amaʼt puesheñarra ñeñt̃ cot̃apeʼcheneʼ cohuen atet̃ ñerraʼm ña ñeñt̃chaʼ eʼñe poʼñoc̈h sellcapretenaya ñeñt̃ echarr sentyen. T̃arroʼmar amaʼt eñalleñ ñeñt̃ parro yet̃orrena, ama allohuenacmayeʼ llecapretenseto ñeñt̃ echarr sentyen. Añach t̃orraʼyenet ñeñt̃ eʼñe ñocpueta. Amachña añeyeʼ llecapreteneto att̃och t̃orrenet ñeñt̃ nanac sherbets Jesucristocop.  
\v 22 Ñam̃a sapaʼ eʼñe señotueñ atet̃ masheñ Timoteopaʼ eʼñe cohuen p̃aʼyena allempo parro yeserrpareʼtatyen añ cohuen ñoñets alloch yequeshperra. Eʼñe cohuen t̃orrapretenna atet̃t̃eʼña ñerraʼm yechemerpaʼ eʼñech cohuen yenpueney yetaruas.  
\v 23 Ñehua, esempoch eʼñe neñoch ñatoʼ errot̃ent̃eʼ poctetsa nocoppaʼ napaʼ noct̃apeʼcheñ oʼch nemñonas masheñ Timoteo.  
\v 24 Na t̃eʼpaʼ aña necuen Yepartseshar Cristo ñerraʼm ñach muenats, napaʼc̈hoʼña nab̃cherrsaʼch amach atarr natomatatatsche. 
\s1 Att̃o Epafroditopaʼ yenpaʼyesosan Pablo all cárcelo 
\p  
\v 25 Ñam̃a oʼch notas poʼpoñ, eʼñe pocteʼ nenteñ t̃eʼpaʼ oʼch alla nemñer sesho masheñ Epafrodito ñeñt̃ parro yetaruaseñot̃paʼ nanac yet̃orreʼt̃ Yomporecop. Ñeñt̃ara masheñ Epafroditopaʼ ñeñt̃ semñon ahuaña ñach neyenpaʼyesoseʼ all es nepalltena ñeñt̃chaʼ neyenposeʼ arr.  
\v 26 Napaʼ eʼñe pocteʼ nenteñ t̃eʼpaʼ oʼch alla ahuerr sesho, t̃arroʼmar ñapaʼ nanac yerpuensa att̃och oʼch alla entuerres. T̃arroʼmar ñapaʼ añ nanac llecateneʼ att̃o sapaʼ ahuoʼt seʼmareʼch ñapaʼ c̈ha atsnaʼtos arr.  
\v 27 Ñehua, poʼñoc̈h ahuañapaʼ c̈ha atsnaʼtos c̈ha mueneʼ rromañ, t̃arraña Yompor eʼñe puemuereñot̃eypaʼ oʼ alla aʼcrrater att̃o ñerraʼm rromañpaʼ ellot̃eʼ naʼna llecatañ arr cárcelo.  
\v 28 Ñeñt̃oʼmarña eʼñe poctennana oʼch nemñer eʼñe t̃ayecma sesho allochñapaʼ oʼch socshapuera ñerraʼm esempoch c̈herr eʼñe sesho. Allochñapaʼ amach ñaʼna alloʼna nellcatnenaye.  
\v 29 Eʼñech separasyosoʼteñeshaʼ Yepartseshar Cristo oʼch sagapapuer ñam̃a eʼñe socsheñeshocmañen. Ñam̃a oʼch notas, c̈hocmuepaʼch semorrenteña amaʼt erraʼtsena acheñer ñeñt̃ eʼñe atet̃ senten ñerraʼm ña.  
\v 30 Att̃o ñapaʼ eʼñe puemneññot̃ oʼch t̃orra Cristocop c̈ha atsnaʼt amaʼt c̈ha mueneʼ rromañ. Atarr yoreretsot̃ correrra arr, t̃arraña ñapaʼ ama ñeñt̃ayaya mechaʼto att̃och ñapaʼ oʼch yenposen, ñeñt̃ sapaʼ amat̃eʼ errot̃ sepe att̃och sehuac̈haʼta b̃ac̈hayot̃ eʼñe puesheñaʼttsos att̃och seyenpuennaʼ arr. 
\c 3  
\s1 Arrpaʼ all eñotatyesanet ñeñt̃ eʼñe poʼñoc̈h sherbets Yomporecop ñam̃a ñeñt̃ eʼñe orrena cot̃ap̃ñats 
\p  
\v 1 Ellonet̃paʼ oʼch alla masheñnesha ñam̃a noc̈hanesha noterrserr poʼpocheño, eʼñe sameʼñeñot̃ Yepartseshar Cristopaʼ c̈hocmuepaʼch socshena. Amaʼt t̃eʼpaʼ oʼch alla noterrserr atet̃ t̃arroʼmar amach nemuenmeʼche sotareʼteʼ atet̃, t̃arroʼmar ñeñt̃paʼ ñeñt̃chaʼ nanac seyemta sa.  
\v 2 Ñam̃a t̃eʼpaʼ oʼch notas poʼpoñonet̃. Señotaʼt̃ach ñatoʼtña seyemteñaʼ ñeñt̃ acheñeneshar ñeñt̃ añach t̃orrenet ñeñt̃ ama cohuenayaye, ñeñt̃ eʼmoñeʼteneʼ cohuen serrparñats ñeñt̃ alloch poʼñoc̈h yequeshperra. Ñetpaʼ eʼñe atet̃ nentenanet ñerraʼmrrat̃eʼ ochec ñeñt̃ nanac atsenaʼtaret̃. Ñeñt̃ judioneshaʼ ñeñt̃ oʼ notuanmaspaʼ añach maʼyoc̈hrenet cot̃ap̃ñats att̃och tsorrannenet att̃oʼch puechemer perranetañ Yompor.  
\v 3 T̃arraña yapaʼ yaña eʼñe poʼñoc̈h puechemer oʼ enterrey Yompor, t̃arroʼmar yapaʼ eʼñe yeñoteñ ama yetsorrannaʼteñot̃eyeʼ puechemer penye Yompor. Poʼñoc̈h puechemer perrey t̃arroʼmar yapaʼ eʼñe yocsheñot̃ Parets ñeñt̃paʼ eʼñe Puecamquëñot̃ huena. Ñam̃a puechemer oʼ perrey Yompor t̃arroʼmar yapaʼ yocsheññaña Puechemer Cristo Jesús ñam̃a t̃arroʼmar yapaʼ ama añeyeʼ yeyemteno ñeñt̃ atet̃ yetsotaten eʼñe yañeña, ñeñt̃ eʼñech yechtsochaya.  
\v 4 Ñehua, ñerraʼm eseshaʼ ñetpaʼ c̈hat̃eʼ otenapuetañ añt̃eʼ poctetsa oʼch yeyemtena ñeñt̃ allo es yepenañ alloch yequeshperra eʼñe yot̃ot̃apaʼ nocoppaʼc̈hoʼ eñalleñ shonteʼ ñeñt̃ neyemtenañ, t̃arroʼmar ñeñt̃ allpon oʼ netsotatuenpaʼ ello metanaʼtuenan allohuen poʼpsheññec̈hno namoʼtseshac̈hno puetsotateñ.  
\v 5 T̃arroʼmar napaʼ oʼ eʼñe allpon netsotueññañ judioneshaʼ poct̃ap̃ña: Amaʼt poʼpsocmatñot̃eñ allempo neʼñalletuapaʼ napaʼ atsorratat̃olleʼtaret̃en\f + \fr 3:5 \ft Oʼch secueʼ nota San Lucas 1.59.\f* ñeñt̃ atet̃ anuaret̃ allohuen asheñorrot̃olleshacop ñeñt̃ey judioneshay, t̃arroʼmar eʼñe israelenaʼtareshot̃ ñeñt̃ eʼñe judiom̃reyot̃ eñalletñan. Ellonet̃paʼ ñam̃a napaʼ Benjamín poʼm̃renñen. Ñam̃a napaʼ eʼñe hebreoneshan t̃arroʼmar ach ñam̃a apapaʼ eʼñe judioneshet poctacma ñeñt̃ eñets eʼñe ya yeñoño ñeñt̃ara hebreac̈ho. Allot̃paʼ ñam̃a na ahuat̃paʼ eʼñe fariseoneshan ñeñt̃en nanac maʼyoc̈hrayeʼt̃ att̃och netsotua ora allpon ñoñets ñeñt̃ aquellcaʼhuaret̃ judioneshacop.  
\v 6 Nanac netsoteʼt̃ judioneshaʼ poct̃ap̃ña. Eʼñe nemoñseñot̃ yoct̃ap̃ña napaʼ neʼmoñeʼcheʼt̃ allohuen ñeñt̃ oʼ ameʼñerrana Cristo. Ñeñt̃oʼmarña epayeʼch neʼnameʼtaneteʼt̃ att̃och errot̃enot̃paʼ oʼt̃eʼ errot̃ nep̃atanet. Ñam̃a ora atet̃ oteney ñoñets ñeñt̃ atet̃ anaret̃ judioneshacop napaʼ c̈hocma eʼñe atet̃ nep̃ohuahueʼt̃. Ñeñt̃oʼmarña ama eñalleʼt̃e amaʼt pat̃rra ñeñt̃ nepalltena att̃och ello poʼpsheñeñpaʼ oʼch otnet ñeñt̃oʼ nepalltenmeñ.  
\v 7 Allempo atet̃ netsotrroteʼt̃ ñeñt̃ecop nañapaʼ ñeñt̃a notenapañ ñeñt̃t̃eʼña nanac sherbets nocop. T̃arraña t̃eʼñapaʼ eʼñe nemorrenteñot̃ Cristopaʼ oʼ neñoter ñeñt̃ allpon oʼ nep̃ohuahuapaʼ amach es sherberro nocop amaʼt coñeʼt̃a.  
\v 8 Amaʼt ellonet̃ allohuen poʼpoñec̈hno ñeñt̃ nenteʼt̃ ñeñt̃oʼch sherb̃atseñ nocoppaʼ t̃eʼña eʼñe neyemteñot̃ Cristopaʼ ama asherbenayeʼ nenteñe, amaʼt coñeʼt̃a, t̃arroʼmar t̃eʼpaʼ oʼ neyemtera Yepartseshar Cristo Jesús ñeñt̃ nanac sherbets. Ñapaʼ ello metanaʼtuenan allohuen poʼpoñec̈hno ñeñt̃ atet̃ nenteʼt̃ na ñeñt̃oʼña nanac sherbets. Ñeñt̃oʼmarña nemorrenteñot̃ Cristo t̃eʼpaʼ oʼ nepuesuerr ora poʼpoñec̈hno, nocop t̃eʼñapaʼ ama esoyeʼ nenteñe eshecchaʼ t̃eʼpaʼ eʼñech nocsheñeshaʼ noct̃er Cristo.  
\v 9 Allochñapaʼ eʼñe yeparrocmateñot̃ Cristo, Pomporpaʼ eʼñech pocteʼ enteney t̃arroʼmar amach añot̃eyeʼ aʼqueshp̃aterrye eʼñe yot̃ot̃a amaʼt yetsotatsetuahua ñoñets ñeñt̃ atet̃ anaret̃ judioneshacop. Añot̃chaʼña t̃eʼpaʼ eʼñech pocteʼ enterrey eʼñe yeyemteñot̃a ñeñt̃ Puechemer pen ñeñt̃paʼ Cristo.  
\v 10 Att̃o eʼñe yeparrocmateñot̃ Cristopaʼ oʼch yaguërrñañ poʼhuamenc att̃o ñapaʼ nanac ahuamencat̃tena allempot̃eñ tanterra puerromñot̃. Ñam̃a eʼñe yeyemteñot̃ Cristopaʼ eʼñech pocteʼ yeñch amaʼt eʼñe errot̃enot̃paʼ oʼch yemueroc̈hta eʼñe ñoʼmara att̃o ñapaʼ nanac amueroc̈htataret̃teʼt̃. Ñam̃a amaʼt yemueroc̈hetuaneñot̃ Cristocopchaʼ yerromapaʼ ñeñt̃paʼ eʼñepaʼch pocteʼ yeñch t̃arroʼmar atet̃chaʼ yerromaprecha Cristo.  
\v 11 Att̃ochña yapaʼc̈hoʼña yetantuerrach esempohuañen. 
\s1 Ñeñt̃ach eʼñe pat̃err llequëʼt̃ Pablo 
\p  
\v 12 Ñehua, napaʼ ama noteno napaʼ oʼ eʼñe poctacma netsotuahuen ora allpon ñeñt̃ pocteʼ enten Cristo. Ñam̃a poʼñoc̈hpaʼ ama noteno napaʼ eʼñe es coc̈hneshareʼ noct̃apeʼchuen. T̃arraña amaʼt atet̃ neñotenapaʼ elloña t̃eʼpaʼ alloʼnaña nesen amaʼt acop̃a oʼch netsotnom ñeñt̃ pocteʼ enten Cristo Jesús, t̃arroʼmar ñapaʼ ñeñt̃ecop oʼ pueyochreshaʼ perren.  
\v 13 Napaʼ masheñnesha ñam̃a noc̈hanesha neñotena poʼñoc̈hpaʼ ama att̃eyeʼ nep̃ohueno ora allpon ñeñt̃ cohuentetsa Cristocop. T̃arraña amaʼt atet̃paʼ amach ñeñt̃a neyerpuerreʼt̃e, c̈hochña nepuesuanom ñeñt̃ atet̃ nep̃atseʼtyeseʼt̃ ahuat̃ot̃eñ. T̃eʼñapaʼ añach nemaʼyoc̈hrena att̃och alloʼnach nesen amaʼt acop̃a etsotayesnomueʼ ñeñt̃ poctetsa Cristocop.  
\v 14 T̃arroʼmar ñeñt̃ecop oʼ c̈horeʼterrey Yompor pueʼntañot̃ att̃och eʼñe yeparrocmateñot̃ epay Puechemer ñeñt̃ Cristo Jesús, esempopaʼ yep̃ohuerrach ora errpont̃eʼ eʼñe pocteʼ enten ña. Allochñapaʼ aphuerreychaʼ ñeñt̃ oʼpatatenya ñeñt̃chaʼ nanac yocshatuerreʼ allohueney ñeñt̃ey oʼ yameʼñera. 
\p  
\v 15 Ñam̃a oʼch notas ñeñt̃es poʼñoc̈h oʼ sameʼñaʼhuera Cristo ahuañmoʼchot̃eñ, t̃eʼpaʼ ñeñt̃ña oʼ notuanmas eʼñepaʼch seyoc̈hreʼcha. Ñam̃a ñerraʼm erraʼtsent̃eʼ soct̃apeʼchyen ñeñt̃ ama att̃eyeʼ poctetso Yomporecoppaʼ ñeñt̃paʼc̈hoʼña eʼñe ña Puecamquëñot̃paʼ ñach eʼñe señotatuerreʼ.  
\v 16 Añchaʼña eʼñe pocteʼ oʼch yep̃ohuena ñeñt̃ allpon oʼ c̈hapatuonay Yompor eʼñe yeyoc̈hro ñeñt̃ yeñoten erraʼtsent̃eʼ eʼñe pocteʼ enten ña. 
\s1 Eʼñech cohuen yocrrena atet̃ correʼt̃ Pablo 
\p  
\v 17 Ñam̃a oʼch masheñneshachaʼ ñam̃a noc̈haneshachaʼ oʼch notas, ñeñt̃ atet̃ sentenen atet̃ nocrrena napaʼ sapaʼc̈hoʼña atet̃chaʼ socrra sam̃a allohuenes. Ñam̃a añchaʼña secuaʼ ñeñt̃ señoten erraʼtsent̃eʼ ñeñt̃ eʼñe atet̃ corretsa cohuen ñeñt̃ atet̃ entenyet ya.  
\v 18 T̃arroʼmar añ patsropaʼ eñall shonteʼ acheñeneshaʼ ñeñt̃ atet̃ penetpaʼ yapaʼ yeñoteñ ama ayemuetpahuoyeʼ enteñeto att̃o Cristopaʼ rroma corsocho att̃ot̃chaʼ yequeshperra. Amaʼt ñeñt̃paʼ shontoch oʼ notuanmas ahuañapaʼ t̃eʼpaʼc̈hoʼña eʼñe nanac nellquëñeshaʼpaʼ oʼ alla noterrserr.  
\v 19 Ñetpaʼ aña oʼpatenahuet att̃och allohuenetpaʼ eʼñech chencaʼhuerret. Añach yom̃aʼyenet att̃och rraʼyenet amapaʼ orrareʼtyenet. Ñeñt̃ atet̃ yom̃atseʼtyenetpaʼ ñeñt̃paʼ atet̃ ñerraʼmrrat̃eʼ ñeñt̃a poʼyomporer penet. Amaʼt ñeñt̃chaʼ pencatahuetañpaʼ t̃arraña ñetñapaʼ ñeñt̃ach atarr coshatenahuet. Ñam̃a añach eʼñe nenet pueyoc̈hro ñeñt̃chaʼ atet̃ coshatseʼtatyenahuet arr patsro.  
\v 20 T̃arraña yapaʼ oʼhuañ att̃eyeʼ yoct̃apeʼch t̃arroʼmar añ patsropaʼ amaʼt all yeyc̈henañpaʼ t̃arraña poʼñoc̈hpaʼ ama yaʼnetsreyaye. T̃arroʼmar yaʼnetsro allchaʼ yeyc̈herra ya errponohuañenpaʼ ñeñt̃paʼ all Yompor pueʼntaño. Ñeñt̃ara pueʼntañot̃paʼ yecueñ allot̃ esempohuañenchaʼ huerra Yepartseshar Jesucristo ñeñt̃ Yaʼqueshp̃atañer yepen.  
\v 21 Ñerraʼm oʼch huerra añe patsropaʼ ya ñeñt̃ey arromñat̃eypaʼ ñapaʼ oʼch aʼpoʼpoñetuerrnay yechets, allochñapaʼ yapaʼc̈hoʼña yorrterrach eʼñech att̃ey ñerraʼm ña poʼpartsoteñot̃paʼ nanac cohuentena. Eʼñech ña poʼhuamencot̃ aʼpoʼpoñetuerrey ñeñt̃ara poʼhuamencot̃paʼ eʼñech pomnaren p̃ohuerran allohuen allpon ñeñt̃ eñall. 
\c 4  
\p  
\v 1 Ñeñt̃oʼmarña masheñneshachaʼ ñam̃a noc̈haneshachaʼ eʼñe nemorrenteñot̃espaʼ oʼch notas, c̈hocmuepaʼch huomenc sep̃aʼnem seyoc̈her Cristocop ñeñt̃ Yepartseshar yepen. Añpaʼ atet̃ notenes t̃arroʼmar sapaʼ c̈hocma neyerpuensa ñam̃a c̈hocma socshatenen att̃o sapaʼ eʼñe cohuen sameʼñena. Nanac nocshensa t̃arroʼmar napaʼ nentenes atet̃ ñerraʼmrrat̃eʼ necopaʼ ñeñt̃ oʼ naguërr eʼñe net̃orreñot̃ Yomporecop eʼñe soʼmar. Atarr nanac nemorrentensa. 
\p  
\v 2 Ñam̃a oʼch noteñ noc̈haneshaʼ Evodia ñam̃a Síntique, amach alloʼna poʼpoñ entannaʼtatsetneneto t̃arroʼmar eʼñe yameʼñeñot̃ Yepartseshar Cristopaʼ eʼñech cohuen yemuerannena.  
\v 3 Ñam̃a oʼch notas, amaʼt erraʼtsenot̃esa ñeñt̃es poʼñoc̈h nanac neyemtenapaʼ oʼch samoʼtstatannaʼterranet añ epsheña coyaneshaʼ t̃arroʼmar ahuañmoʼchapaʼ eʼñe parrocma nanac yemaʼyoc̈hreʼt̃ att̃och epaʼhua añ cohuen ñoñets alloch yequeshperra, ñam̃a epay Clemente ñam̃a poʼpotantañ ñeñt̃ parrocma nanac yet̃orreʼt̃ ahuañmoʼcha. Ñet paʼsoʼchñec̈hnopaʼ oʼ aquellcaʼhuaret̃terret att̃ochña ñetpaʼ corretsetach. 
\s1 Eʼñe yameʼñeñot̃ Yomporpaʼ c̈hocmuepaʼch yocshena 
\p  
\v 4 T̃eʼñapaʼ oʼch noterrserr atet̃, eʼñe sameʼñeñot̃ Yepartseshar Cristopaʼ c̈hocmuepaʼch socshena. Oʼch alla noterrserr, c̈hocmuepaʼch socshena.  
\v 5 Eñotuasepaʼch allohuen acheñeneshaʼ att̃o sapaʼ eʼñe cohuen acheñres, amach c̈ha poʼpoñ es sentatatsetuenaye, amaʼt errot̃enoʼtsenes. T̃arroʼmar yeñoteñ poʼñoc̈hpaʼ allaʼtsena Yepartseshar Cristo. 
\p  
\v 6 Amach es sellcatsto amaʼt eʼñe mamesha. Añchaʼña amaʼt errot̃enoʼtsenes eʼñe semaʼyocheñot̃paʼ c̈hocmuepaʼch sotue Yompor ñeñt̃ sellcatyeneʼ ñam̃a eʼñe socsheñot̃ Yomporpaʼ c̈hocmuepaʼch senamyeñ ñam̃a ñeñt̃ sepalltaʼyena.  
\v 7 Ñerraʼm atet̃chaʼ c̈hocma sepena, Yomporpaʼ ñachña ama semnatenaye oʼch es senaʼyen seyoc̈hro amaʼt coñeʼt̃a. Att̃och eñmataterrnay Yompor yeyoc̈herpaʼ ya acheñey eʼñe yoct̃ap̃ñot̃apaʼ amat̃eʼ errot̃enot̃ eʼñe yot̃apaʼ yeñmataterro atet̃. Ñeñt̃oʼmarña eʼñe yeparrocmateñot̃ epay Cristo Jesús, Pomporñapaʼ cohuam̃pennaychaʼ yeyoc̈her att̃och amach alloʼna yenaʼneno yeyoc̈hro ñeñt̃ allcatañtetsa. 
\s1 Añchaʼña eʼñe cohuen yoct̃apeʼch ñeñt̃ eʼñe cohuen entuen allohuen acheñeneshaʼ 
\p  
\v 8 T̃eʼña masheñnesha ñam̃a noc̈hanesha eʼñe allohuanenpaʼ oʼch noterres, añchaʼña soct̃apeʼchyes ora erraʼtsent̃eʼ señoten ñeñt̃ eʼñe cohuenetyetsa ñam̃a ñeñt̃ ora cohuen entuapotetsa. Ñeñt̃chaʼña soct̃apeʼchyes ora erraʼtsent̃eʼ ñeñt̃ ama shequëñtsoyaye, allot̃paʼ ñam̃a ora erraʼtsent̃eʼ asherben entpahuotets, allot̃paʼ ñam̃a ora erraʼtsent̃eʼ ñeñt̃ poctetsa, allot̃paʼ ñam̃a ora erraʼtsent̃eʼ ñeñt̃ ama sosyaʼtsañeyaye, ñam̃a ora erraʼtsent̃eʼ amorrentannaʼtatañtetsa, ñam̃a ora erraʼtsent̃eʼ ñeñt̃ eʼñe cohuen aserrpareʼtpahuotets. Ora allpon añec̈hnopaʼ ñeñt̃chaʼña atet̃ soct̃apeʼchyes. 
\p  
\v 9 Ñam̃a oʼch noterrserr poʼpoñ ñeñt̃chaʼ atet̃ sep̃a. Allpon oʼ neyc̈hatuas, ñam̃a allpon oʼ nec̈hapatuonas seyoc̈hro, ñam̃a allpon oʼ neñotatyesas, ñam̃a allpon sentenen ñeñt̃ atet̃ es nep̃aʼyena napaʼ sapaʼc̈hoʼña t̃eʼñapaʼ eʼñepaʼchña atet̃ es sep̃aʼyen sam̃a. Allochñapaʼ Yompor ñeñt̃ acshatañtetsa yeyoc̈hropaʼ ñachña parroʼtsenes allohuenes. 
\s1 Att̃o filiposoʼmarneshaʼpaʼ es apueñet Pablo ñeñt̃ palltaʼyena 
\p  
\v 10 Ñam̃a oʼch notas, eʼñe neyemteñot̃ Yepartseshar Cristo, napaʼ atarr nocshena t̃arroʼmar sapaʼ oʼ alla seyerpuerrna. Ñehua, napaʼ ama notenso oʼt̃eʼ sepuesuerren, añña noten sapaʼ amaʼt errot̃ sepeñe att̃och seyenpaʼn.  
\v 11 Ama c̈ho es nemnapreteñot̃eyeʼ notenso atet̃, t̃arroʼmar na t̃eʼpaʼ oʼ c̈hapona neyoc̈hro ñeñt̃ atet̃ cohuentetsa, ñeñt̃oʼmarña t̃eʼpaʼ oʼ att̃am̃a neyc̈ha amaʼt errot̃enoʼtsenanapaʼ t̃arraña att̃achña c̈hocma nocshena neyoc̈hro.  
\v 12 Ñehua, napaʼ neñotena errot̃enopaʼ nanacchaʼ es nepalltaʼyeseʼt̃ att̃o yocrrena añe patsro, ellonet̃ña errot̃enopaʼ esocmañenchaʼ nechyeseʼt̃. T̃arraña amaʼt errot̃enoʼtsenenpaʼ na t̃eʼpaʼ oʼ neñoch oʼch att̃am̃a neyc̈ha; ñerraʼm es nepalltena errot̃enopaʼ amach c̈ha llecatenno, amaʼt c̈ho esocmañen es nechyes errot̃enopaʼ amach c̈ha nommoʼcheño. Ñam̃a att̃ecmach nocshena amaʼt esempo eñall shonteʼ nerrar ñeñt̃chaʼ neyetena, amapaʼ esempo ama eñalle ñeñt̃chaʼ nerren, amach es neʼneno.  
\v 13 Ñeñt̃oʼmarña napaʼ eʼñe neñoteñ, yapaʼ amaʼt errot̃enoʼtsenyapaʼ c̈hocmach ahuamencat̃ey t̃arroʼmar Cristopaʼ ñach nanac ahuamencat̃ yepeneʼ.  
\v 14 T̃arraña amaʼt oʼ notuanmas atet̃paʼ eʼñe pocteʼ nenteñ att̃o sapaʼ sellcapretenna ñeñt̃ nemueroc̈htateneʼ arr. 
\p  
\v 15 Ñam̃a sa ñeñt̃es filiposoʼmarneshas eʼñe señotueñ allempo ñanom neserrpareʼtnom cohuen ñoñets alloch yequeshperra, allempo non Macedoniot̃, allempopaʼ amaʼt allemeñ anetsoʼmarpaʼ ama eñalle acheñeneshaʼ ñeñt̃ atet̃ apc̈herrtsa Yomporecop ñeñt̃chaʼ nellcapretenaya att̃och eʼñe parrocma es yapannaʼta. Sapaʼ saña eʼñe sapt̃a ñeñt̃es es napueneʼ ñeñt̃ allpon nepalltena.  
\v 16 Napaʼ amaʼt ahuañmoʼcha allempo Tesalónicoʼtsenenpaʼ ama parrochot̃ayaya sapaʼ c̈hocma soñmaten ñeñt̃ sapuenen añecop ñeñt̃ nepalltaʼyena all.  
\v 17 Ñehua, napaʼ ama nocpayeʼ nemnapretenso oʼch es sapuenen. Añña nemnen ñam̃a allochñapaʼ socoppaʼc̈hoʼña ellopaʼ oʼch atonetnoma att̃och coshatuerres Yompor.  
\v 18 T̃eʼpaʼ oʼ aposen masheñ Epafrodito ñeñt̃ allpon soñmaten nocop. Ñeñt̃ allpon oʼ nagaponaspaʼ t̃eʼpaʼ ama es nepallteno amaʼt coñeʼt̃a, elloña c̈ha metanuosan allpon ñeñt̃ nepalltena. Ñeñt̃ allpon sapuanpaʼ napaʼ eʼñe att̃ecoptar nenteñ ñerraʼmrrat̃eʼ ñeñt̃ apuenet Yomporecop ñeñt̃ eñmosat̃tetsa ñeñt̃chaʼ eʼñe pocteʼ enten, ñam̃a ñeñt̃chaʼ nanac coshateneʼ ña.  
\v 19 Ñam̃a Yompor ñeñt̃ eʼñe neyemtena napaʼ ñachña sapuerreʼ sam̃a amaʼt ora ñeñt̃ allpon sepalltaʼyena sa, t̃arroʼmar eʼñe yeparrocmateñot̃ epay Puechemer ñeñt̃ Cristo Jesús ñeñt̃ eʼñe esocmañen es echyetspaʼ nanacocmañenchaʼ esocmañen apuerrey yam̃a.  
\v 20 Ayeʼchoc̈htataret̃tepaʼch Yompor ñeñt̃ atarr Parets. Ñeñt̃paʼ att̃etepaʼch amaʼt t̃ayot̃eñ errponohuañen. 
\s1 Arrpaʼ all soʼtnerranet eʼñe poʼcartot̃ 
\p  
\v 21 Ñam̃a oʼch notas, oʼch sehuom̃chaʼch allohuen ñeñt̃ pueyochreshaʼ oʼ perr Cristo Jesús. Ñam̃a allohuen masheñneshaʼ ñeñt̃ eʼñe parroʼtseneypaʼ ñetpaʼc̈hoʼña mueneñet oʼch huom̃chaʼtaset ñamet arr necartot̃.  
\v 22 Ñam̃a allohuen ñeñt̃ pueyochreshaʼ oʼ perranet Parets arr Romopaʼ ñetpaʼc̈hoʼña mueneñet oʼch huom̃chaʼtaset ñamet necartot̃. Ñeñt̃ nanac muenets atet̃paʼ ñeñt̃paʼ ñeñt̃ parro yec̈hena ñeñt̃ atarr am̃chaʼtaret̃tetsa arr Romo. 
\p  
\v 23 Eʼñe Yepartseshar Jesucristopaʼ ñepaʼchña eʼñe saʼnatenaya allohuenes. T̃eʼpaʼ ñeñt̃ach notas, ñeñt̃paʼ att̃etepaʼchña Nompore. Allohua. 
\pmr \sig Pablo\sig*