\id EPH - Amuesha (Yanesha’) NT [ame] -Peru 2008 (ETEN -2013) \h EFESIOS \toc1 San Pablo Poʼcarta ñeñt̃ quellcan Efesoʼmarneshaʼ \toc2 Efesios \toc3 Ef \mt2 AÑ SAN PABLO POʼCARTA ÑEÑT̃ QUELLCAN EFESOʼMARNESHAʼ \mt1 EFESIOS \c 1 \s1 Att̃o Pablopaʼ quellcan carta añecop ñeñt̃ ameʼñetsa anetso Efeso \p \v 1 Masheñneshachaʼ ñam̃a noc̈haneshachaʼ ñeñt̃es allohuenes pueyochreshaʼ oʼ perres Parets ñeñt̃es ameʼñenaya Cristo Jesús all anetso Efeso. Na Pablon sequellquëneʼña añ carta ñeñt̃en Jesucristo puellsensaren t̃arroʼmar ñeñt̃paʼ atet̃ muenen Yompor. \v 2 T̃eʼpaʼ eʼñe nehuom̃chaʼteñot̃es sa, napaʼ oʼch notas: Yomporepaʼchña sebensareʼtam̃peneʼ ñeñt̃ nanac Parets epuet Puechemer Jesucristo ñeñt̃ Yepartseshar yepen. Ñetepaʼchña socshateneʼ eʼñe sa seyoc̈hro allohuenes. \s1 Att̃o Yomporpaʼ eʼñe paʼnateñot̃ey c̈hocma apueney ñeñt̃ atarr cohuen sherbets yecamquëñecop \p \v 3 T̃eʼpaʼ ayeʼchoc̈htatpahuepaʼch Yompor ñeñt̃ Pompor pen Yepartseshar Jesucristo. Eʼñe yeparrocmateñot̃ epay Cristo, Pomporñapaʼ eʼñe paʼnateñot̃ey c̈hocma cot̃apeʼchateney ora allpon ñeñt̃ esocmañen coc̈hneshaʼtetsa all pueʼntaño ñeñt̃ atarr sherbets yecamquëñecop. \v 4 Atet̃ ahuat̃ paʼmot̃rot̃eñ allempo ama ayec̈hcataret̃tenaʼ añe patserpaʼ Yomporñapaʼ allempot̃eñña acram̃perrey parro epay Puechemer Cristo att̃och yapaʼ aʼparrocmataterreychaʼ epay Puechemer. T̃arroʼmar añecop acram̃perrey Puechemereshot̃ allochña yapaʼ añach eʼñe yemaʼyoc̈hrena ñeñt̃ cohuentetsa Partsocop. Allochñapaʼ att̃ochña eʼñe pocteʼ entueney Yompor, amach eñalle att̃och otteñeʼcherrey amaʼt eʼñe mamesha. \v 5 Ñapaʼ atarr morrentenya; eʼñe puemorrenteñot̃eypaʼ oʼ eʼñe aʼpoctatonay yocop amaʼt ahuat̃ot̃eñ. Ñeñt̃paʼ att̃ochña eʼñe puechemer perrey. Ñeñt̃paʼ añña eʼñe etsotatuerreʼ Puechemer Jesucristo. Yomporpaʼ eʼñe atet̃ aʼpoctatuonay t̃arroʼmar ñeñt̃ att̃o morrentya ñapaʼ atet̃ña muenen. \v 6-7 Ayeʼchoc̈htatpahuepaʼch Yompor att̃o ñapaʼ atarr nanac cohuen muerenya. Att̃o ñapaʼ ahuoʼt mueñonay Puechemer Cristo ñeñt̃ rromosets yocop. Att̃o ashataret̃ta poʼrras ñeñt̃paʼ alloña tsaʼtuerrnaya yoʼchñar. T̃eʼña ya eʼñe yeyemteñot̃ Puechemer, Pomporñapaʼ att̃oña oʼ eʼshohuerrnay ñeñt̃ yoʼchñar yepeʼt̃. Ñeñt̃oʼmarña yapaʼ yeñoteñ ñapaʼ atarr morrentenya. Att̃o atarr morrentenana Puechemer Jesúspaʼ yapaʼc̈hoʼña att̃ecma atarr morrentenya eʼñe yeparrocmateñot̃ Yompor Puechemer. \v 8-10 Yapaʼ yeñoteñ Yomporpaʼ atarr morrentenya t̃arroʼmar ña t̃eʼpaʼ oʼ eñotatuerrey eʼñe ora ñeñt̃ atet̃ cot̃apeʼchen ña amaʼt ñeñt̃ ama eñotpahuo ahuat̃ot̃eñ. Ñapaʼ oʼ eʼñe eñotaterrey yeyoc̈hro ñeñt̃ atet̃ muenen ña. Ñeñt̃paʼ añña atet̃ muenen ña: Ñerraʼm esempoch c̈hap allempoch etsoterra allempo onañcheʼ ahuat̃ Yomporpaʼ, allempoña Cristo ñach etsotatuerreʼ allohuen ñeñt̃ allpon eñall, amaʼt ora allpon ñeñt̃ pueʼntañoʼtsaʼyen amaʼt ñam̃a ora allpon ñeñt̃ añe patsroʼtsaʼyen. Eʼñech Cristesho aʼyapac̈haʼhuerret allchaʼña eʼñe yeparrocmatuerr allohueney. \p \v 11 Yomporpaʼ atarr coc̈hneshaʼ oʼpatatenana Puechemer Cristo. Yaʼnaña eʼñe oʼpatatena att̃o eʼñe yeparrocmateñot̃ Cristo. Ñehua, ñeñt̃paʼ atet̃ cot̃apeʼcheʼt̃ Yompor ahuat̃ yocop. Ñeñt̃oʼmarña t̃eʼpaʼ atet̃ña oʼ perrnay ñeñt̃ atet̃ cot̃apeʼcheʼt̃ ña ñeñt̃ eʼñe pocteʼ enteʼt̃ eʼñe ña pomnenñot̃. T̃arroʼmar Yomporpaʼ ama puenesho poʼñoñ, c̈hocmach eʼñe etsotuerra ñeñt̃ allpon atet̃ onañchen ña. \v 12 Ñeñt̃paʼ atet̃ eʼñe cohuen p̃onay Yompor allochñapaʼ att̃ochña yaʼyeʼchoc̈htaterrñañ ora allohuen ñeñt̃ poʼcohuenña pen ña, allohueney ya ñeñt̃ey yanom oʼ yeyemterrñaña Puechemer ñeñt̃ara Cristo. \v 13 Sapaʼc̈hoʼña t̃eʼpaʼ oʼ seʼmuerrñañ Yompor poʼñoñ ñeñt̃ ñoñets eʼñe poʼñoc̈h alloch sequeshperra sam̃a. Att̃oña sapaʼc̈hoʼña oʼ sameʼñera Cristo. Eʼñe seyemteñot̃a sa, Yomporñapaʼ oʼ chorraterrsa Puecamquëñ ñeñt̃chaʼ señotateʼ poʼñoc̈h oʼ puechemer perres. Ñehua, ñeñt̃paʼ ñeñt̃ara Parets Puecamquëñ ñeñt̃ atet̃ oteʼt̃ ahuat̃ Yompor ñeñt̃chaʼ aphuerrey esempo. \v 14 Ñeñt̃ara Puecamquëñ ñeñt̃ apueney ñanom ñeñt̃paʼ ñeñt̃chaʼña yeñotateʼ orameñ ñeñt̃ oʼpatatenya Yompor. Att̃ochña ñerraʼm esempo aʼqueshp̃aterrey poctacma ñeñt̃ey oʼpatatena, allempochña yaguërr ñeñt̃ allpon orameñ oʼpatatenya. Ñeñt̃oʼmarña añ poctetsa yaʼyeʼchoc̈htatoñepaʼch ora allohuen ñeñt̃ poʼcohuenña pen ña. \s1 Arrpaʼ att̃o maʼyocham̃penanet Pablo \p \v 15 Ñeñt̃oʼmarña na t̃eʼpaʼ oʼch notas, napaʼ oʼ neʼmareʼtas att̃o sapaʼ atarr sameʼñeña Yepartseshar Jesús ñam̃a neʼmareʼtenes att̃o sapaʼ eʼñe cohuen semuerannena allohuenes ñeñt̃es pueyochreshaʼ perres Parets. \v 16 Ñeñt̃oʼmarña napaʼ c̈hocma neparasyosoʼteñ Yompor allempo nemaʼyocham̃pensa. \v 17 Ñam̃a nenamuennas Yompor ñeñt̃ Pompor pen Jesucristo, ñeñt̃ara Yompor ñeñt̃ atarr cohuen Partsotets. Añ nenamuennas, Yompor Puecamquëñot̃paʼ eñotatasepaʼch ñeñt̃ eʼñe atet̃ pena ña poct̃ap̃ña. Att̃ochña sapaʼ eshecchaʼ señoterrña ñeñt̃ atarr cohuen sherbets ñocop ñeñt̃ amaʼt ahuat̃a sapaʼ ama señoteñe. \v 18 Ñam̃a ñapaʼ c̈hapatonaschaʼ seyoc̈hro att̃ochña señoterrñañ ora allpon ñeñt̃ poʼcohuenña ñeñt̃ yecuen ñeñt̃chaʼ aphuerrey Yompor esempo t̃arroʼmar yapaʼ ñeñt̃ecopña c̈horeʼterrey ahuat̃ot̃eñ. Ñam̃a oʼch señoch atarr nanac cohuen ñeñt̃chaʼ aphuerrey Yompor, ñeñt̃paʼ alloch yapaʼ corretsayach errponañohuen allohueney ñeñt̃ey pueyochreshaʼ pen. \v 19-20 Ñam̃a t̃eʼpaʼ oʼch señoterrñañ Yompor poʼhuamenc atarr nanac huomenc ama atpaʼhuapahuo ñeñt̃ atet̃ ahuamencat̃ peney allohueney ñeñt̃ey ameʼñenaya ña. Ñeñt̃paʼ ñeñt̃ara poʼhuamenc ñeñt̃ atarr huomenc orrtatan allo tantaterran Puechemer Cristo allempo rroma. Oʼ tantater ñeñt̃ara poʼhuamencot̃ att̃oña c̈hapater ñesho allñapaʼ anorruerr Pompor poʼcohuenrot̃ all pueʼntaño allña eʼñe partsotuerr epuet Pompor. \v 21 Ña t̃eʼpaʼ atarr am̃chaʼtaret̃tena nanac. Att̃o am̃chaʼtaret̃tena ñapaʼ ñeñt̃paʼ eʼñe metanaʼtuenan ora allpon allohuen ñeñt̃ am̃chaʼtaret̃etyetsa ñam̃a ora allpon allohuen allsensaret̃etyetsa ñam̃a ora allpon allohuen ñeñt̃ ahuamencat̃etyetsa ñam̃a ora allpon allohuen ñeñt̃ ayochreshat̃etyetsa ñam̃a ora allpon allohuen ñeñt̃ cohuen entyetsa amaʼt allohuen soʼchñetsoc̈hno. Cristoña poʼhuamencot̃ eʼñe metanaʼtuenanet allohuenet. Ñam̃a ñapaʼ ama mamecpayaya atet̃ peno, ñapaʼ t̃ayot̃eñña ñam̃a errponañohuenchaʼ atet̃ pena. \v 22 Ñam̃a Yomporpaʼ oʼ nan Puechemer Cristo allochñapaʼ ñach pomnaren peneʼ ora allpon ñeñt̃ esocmañen eñall. Ñam̃a allohuen allpon ñeñt̃ ameʼñenaya, Yomporpaʼ att̃oña apanet Puechemer allochñapaʼ ñach yochreshaʼtenahuet allohuenet. \v 23 Ñatoʼ oʼch netmaʼntacha atet̃: Allohueney allponey ñeñt̃ey ameʼñaʼyenaya Cristo, Cristoñapaʼ eʼñe yeyoc̈her\f + \fr 1:23 \ft Ñehua, poʼñoc̈h Cristopaʼ arr atmaʼntataret̃ atet̃ ñerraʼmrrat̃eʼ ñeñt̃ yoñ yepen.\f* yep̃ohueñ allohueney, yañapaʼ Cristo poʼchets yepeneʼ allohueney. Ñeñt̃oʼmar ñeñt̃ey ameʼñenaya Cristo eʼñe allohueney eʼñe parrocmay, Cristoñapaʼ eʼñe ña yechorraʼhuenaya, t̃arroʼmar ñapaʼ eʼñe poʼchets p̃ohueney allohueney. \c 2 \s1 Att̃o Yomporpaʼ eʼñe puemuereñot̃ey ya oʼ aʼqueshp̃aterrey \p \v 1 Amaʼt atet̃ ñerraʼm sa. Sapaʼc̈hoʼña ahuat̃paʼ aña soct̃apeʼchyeseʼt̃ ñeñt̃ ama cohuenayeʼ enteno Yompor. \v 2 Aña seyc̈heʼt̃ ñeñt̃ atet̃ p̃atseʼtyena acheñeneshaʼ arr patsro ñeñt̃ ama ameʼñetso. Allempo sapaʼ aña sameʼñatayeʼt̃ oneñet̃ ñeñt̃ paʼm̃chaʼtaret̃er pen allohuen ñeñt̃ erracmañen am̃chaʼnoc̈hetyetsa entot̃ ñeñt̃ ama entpahuoyaye. Ñeñt̃ña oneñet̃ poct̃ap̃ñapaʼ ñeñt̃ atarr coshateneʼ allohuen acheñeneshaʼ ñeñt̃ at̃parñat̃tetsa t̃eʼ arr patsro. \v 3 Ñehua, amaʼt allohueney ahuat̃paʼ eʼñe att̃ecma yeyc̈heʼt̃. Aña yoct̃apeʼchyeseʼt̃ ñeñt̃ eʼñe atet̃ yemnatseʼtyen ya, ñeñt̃ atet̃ muenatseʼtateney ya yechets ñam̃a ñeñt̃ cohuen yenteʼt̃ eʼñe yañeña yoct̃ap̃ñot̃. Eʼñe ya yoct̃ap̃ñot̃ ñeñt̃ atet̃ yeyc̈heʼt̃paʼ ñeñt̃aña eʼñe yoct̃apeʼchatseʼtatyesayeʼt̃. Ñeñt̃oʼmarña Yomporpaʼ aña oʼpatatyeʼt̃ att̃och coñchaterrey. Ñehua, amaʼt allohuen poʼpotantañ acheñeneshaʼ ñeñt̃ atet̃ p̃atseʼtyeseteʼt̃paʼ Yomporñapaʼ eʼñe att̃ecma oʼpatataneteʼt̃ ñeñt̃ara coñcheñets. Ñerraʼm allempocmach yerromañpaʼ eʼñech yechencaʼhuerrañ, \v 4 t̃arraña Yomporñapaʼ atarr nanac amorrentña, atarr muerenya. Eʼñe ña puemuereñot̃eypaʼ oʼ aʼqueshp̃aterrey. \v 5-6 Ñatoʼ oʼch netmaʼntacha atet̃ ñerraʼm oʼ yerroma yoʼchñarot̃ t̃arraña Yomporpaʼ oʼ alla tantaterrey. Ñehua, allempo tantaterran Puechemer Cristopaʼ yaʼnaña tantaterr t̃arroʼmar eʼñe yeparrocmaten epay Cristo. Ñam̃a att̃o c̈hapaterran Poʼcristor pueʼntaño allchaʼ atarr cosheñtsoʼtsen, yaʼnaña oʼ c̈hapaterr allchaʼ atarr cosheñtsoʼtseney yam̃a t̃arroʼmar eʼñe yeparrocmaten epay Poʼcristor. Oʼch netmaʼntacha atet̃ ñerraʼmrrat̃eʼ oʼ yec̈hap Yompor pueʼntaño allchaʼ yecohuentapretera Cristo. \v 7 Att̃oña Yomporpaʼ c̈hocmach orrtatennay puemuereña amaʼt errponañohuen. Att̃oña oʼ c̈haphuonaya yeyoc̈hro Yomporpaʼ atarr muerenya nanac. Att̃o atarr muerenana Poʼcristor yaʼnaña atarr muerena t̃arroʼmar yapaʼ yeparrocmaterrñaña Poʼcristor ñeñt̃ara Jesús. \v 8 T̃arroʼmar poʼñoc̈h eʼñe puemuereñot̃ey Yomporñapaʼ aʼqueshp̃aterrey eʼñe yeyemteñot̃a ña. Ama añot̃eyeʼña aʼqueshp̃aterrye att̃o eʼñe cohuenareʼ es yep̃aʼyen ya. Yomporpaʼ eʼñe att̃a aʼqueshp̃aterrey. \v 9 Ñam̃a ama yet̃orreñot̃eyeʼ ñocop aʼqueshp̃aterryeña Yompor att̃och tsaʼterrya ñeñt̃ allpon yet̃orra ñocop. T̃arroʼmar ñerraʼm eʼñe yet̃orreñot̃a yaʼqueshp̃atenañ, yañapaʼ c̈hat̃eʼ atarr cohuen yentena yañeña ñeñt̃ att̃o yaʼqueshp̃atena. Allempoña Yomporpaʼ amat̃eʼ aʼqueshp̃atañeyeʼ yenteñe. \v 10 T̃arraña Yomporpaʼ oʼ etserrataterrnay yoct̃ap̃ña allochñapaʼ att̃och eʼñe cohuen es yep̃aʼyen. Poʼñoc̈h eʼñe yeparrocmateñot̃ Cristo, Yomporñapaʼ oʼ etserra yec̈hcaterrey. T̃arroʼmar ñapaʼ amaʼt ahuat̃ot̃eñpaʼ atet̃ cot̃apeʼcheʼt̃ yocop att̃ochña yapaʼ eʼñepaʼchña cohuenareʼ es yep̃aʼyen. \s1 Cristopaʼ eʼñe cohuen amoʼtstatannaʼtña allohuenacop \p \v 11 Ñehua, t̃eʼpaʼ oʼch alla seyerpuerra ñeñt̃ atet̃ sepeʼt̃ ahuat̃. Allempopaʼ atarr allap̃aroʼtsaʼyenes Yomporeshot̃. Ñehua, sapaʼ atet̃ eñalletñas ama judioneshayayso. Añña ñeñt̃ atet̃ eñalletena judioneshaʼ ñetpaʼ aña yec̈henet oʼch tsorrannenet. Ñeñt̃oʼmarña ñetpaʼ otaret̃tenet atsorraret̃neshaʼ. Ñeñt̃oʼmar ñet sañapaʼ att̃a sochatseʼtenset sapaʼ añoʼ atsorrataret̃neshayayso añoʼ puechemereyayso Yompor. \v 12 Poʼñoc̈h allempo sapaʼ atarr allap̃aroʼtsaʼyenes Cristeshot̃ t̃arroʼmar ama separrocmaterraʼ epas. Ñam̃a amaʼt israelenaʼtarneshaʼ ñeñt̃ otenet Yompor pueyochreshaʼ, sañapaʼ ama parroʼmarneshayayso. Ñam̃a att̃o Yompor aʼpoctatan israelenaʼtar allempo otaneteʼt̃ ñeñt̃chaʼ atet̃ yenpuerranet esempo, saña allempopaʼ amaʼt mameshapaʼ ama seʼmareʼtperaʼ. Ama es secueno amaʼt mamesha ñeñt̃chaʼ saʼqueshp̃aterreʼ t̃arroʼmar allempo sapaʼ ama eñalle Seyomporer ñeñt̃chaʼ poʼñoc̈h seyemtena sam̃a arr patsrot̃. \v 13 T̃arraña t̃eʼ sapaʼ oʼ señoter Cristo Jesús ñeñt̃ rromats ñam̃a socpaʼna. Ashataret̃ta poʼrras amaʼt sam̃a soʼchñarecpaʼna. Ñeñt̃oʼmarña yoten eʼñe poʼrrasot̃ att̃oña oʼ c̈hapaterres sam̃a Yomporesho amaʼt sa ñeñt̃es ahuat̃ atarr allap̃aroʼtsaʼyenes Yomporeshot̃. \v 14 T̃arroʼmar Cristopaʼ atarr amoʼtstatannaʼtña allohuenacop. Amaʼt ya ñeñt̃ey judioneshay ñam̃a sa ñeñt̃es ama judioneshayayso, Cristoñapaʼ ahuoʼt parroʼmarneshatatey allohueney. Ñam̃a ñeñt̃ att̃o atsrreʼmoc̈hen yentannaʼtyeseʼt̃ ahuat̃ ñañapaʼ oʼ huaporeʼtam̃pesyeney ñeñt̃ yellopaʼtetstatyesayeʼt̃ ahuat̃. \v 15 Ñeñt̃paʼ atet̃ p̃onay Cristo allempo rroma yocop. Eʼñe ña poʼchtsot̃paʼ oʼ aʼhuañam̃peney att̃o am̃chaʼnoc̈hen yenten añ ñoñets ñeñt̃ atet̃ anaret̃ ahuat̃ judioneshacop, ñeñt̃ara paʼnamen aʼpoctateñtsoñ ñeñt̃ atet̃ anaret̃tetañ ñocpuet ñeñt̃chaʼ atet̃ p̃ohuetañ. Att̃oña allempot̃eñpaʼ oʼ eʼñe pat̃rra yoct̃apeʼchen ñeñt̃ atet̃ cot̃apeʼchateney Cristo. Allempot̃eñña amach alla atsrreʼmoc̈hen yentannaʼtyerreʼt̃e. Ñatoʼ oʼch yot att̃o ahuat̃ allohuen acheñeneshaʼ ellopaʼtetsteteʼt̃ eʼñe ñet poct̃ap̃ñoʼmareta, Cristoñapaʼ oʼ aʼhuañam̃p̃sanet att̃oña eʼñe parrocmatatuerrey, eʼñe cohuen yamoʼtstannaʼtuerra allohueney. \v 16 Att̃oña epotantoʼmarey eʼñe yeparrocmateñot̃, Cristoñapaʼ eʼñe cohuen amoʼtstaterrya ñam̃a Pomporesho. Eʼñe puerromñot̃ corsochopaʼ ñañapaʼ oʼ aʼpoctatonay Pomporesho. Att̃o ñapaʼ oʼ aʼhuañam̃perrey ñeñt̃ ahuat̃ att̃o c̈hocma yeʼmoñeʼtannaʼtyeseʼt̃. \p \v 17 Ñeñt̃oʼmarña Cristopaʼ huapa. Ñach yeserrpareʼtatoseʼ cohuen ñoñets att̃o ñapaʼ ña amoʼtstannaʼtatañtetsa. Att̃ecma serrpareʼtatosey allohueney, amaʼt sa ñeñt̃es ama judioneshayayso ñeñt̃es atarr allap̃aroʼtsaʼyenes atet̃ entyenesña Yompor. Att̃ecma serrpareʼtatosey amaʼt yam̃a ñeñt̃ey judioneshay ñeñt̃ey eʼñe allameʼttsa entyeney Yompor. \v 18 Att̃oña allohueney amaʼt ñeñt̃ey judioneshatets ñam̃a ñeñt̃ ama judioneshayaye eʼñe Cristeshot̃ecma eʼm̃ñoteneyña Yompor t̃arroʼmar Puecamquëñpaʼc̈hoʼña eʼñe pat̃rra ñeñt̃ yechorrenaya allohueney. \v 19 Ñeñt̃oʼmarña t̃eʼpaʼ oʼch notas, sa ñeñt̃es ama judioneshayayso, t̃eʼpaʼ eʼñe parroʼmarneshacmay enteneyña Yompor, amaʼt allohuen ñeñt̃ pueyochreshaʼ pen Parets, t̃arroʼmar allohueney eʼñe puechemereshaʼ peney Yompor. Ñeñt̃oʼmarña t̃eʼ sa ama att̃eyeʼ entenso atet̃ ñerraʼmrrat̃eʼ ñeñt̃ ama puentare ña, oʼhuañ att̃eyeʼ entenes ñerraʼmrrat̃eʼ ñeñt̃ att̃a huetsa poʼpoñ anetsot̃. \v 20-22 Ñeñt̃ atet̃ entenes t̃eʼpaʼ ñatoʼ oʼch netmaʼntacha ñeñt̃ att̃o yat̃omaten pocoll. Ñehua, att̃o cohuen t̃orraʼyeseʼt̃ allohuen ñeñt̃ allpon Yompor puellsensarneshaʼ epuet ñam̃a allohuen ñeñt̃ allpon aʼm̃taʼyesayeʼt̃ poʼñoñ, ñetpaʼ añ tomaʼnteteʼt̃ ñeñt̃ ñanom yat̃omaten allo echarr yepen yepaquëll. Ñam̃a Jesucristopaʼ añ tomaʼntena pocoll poʼquellpach ñeñt̃ atarr echarr orreneʼ pocoll. Ñehua, sa ñeñt̃ att̃o oʼ separrocmatera Yepartseshar Cristo, pueconer penes ñam̃a pueyop̃acher penes allohuenes ñeñt̃es eʼñe huomenc rremueneʼ pocoll. Att̃oña eʼñe cohuen saʼyec̈hcataret̃terra puepahuarr pocoll, ñeñt̃es paʼpaquëll oʼ perres Parets, att̃oña oʼ yec̈herra Puecamquëñ sesho. \c 3 \s1 Att̃o Pablopaʼ allsensaret̃terra oʼch serrpareʼtatan ñeñt̃ ama judioneshayaye \p \v 1 Ñeñt̃oʼmarña napaʼ c̈hocma nemaʼyochena socop. Neserrpareʼtateñot̃es sa Cristo Jesús ñeñt̃es ama judioneshayayso ñeñt̃oʼmarña na t̃eʼpaʼ yottam̃pennet. \v 2 Ñehua, sapaʼ oʼt̃eʼ seʼmareʼtuan att̃o Yomporpaʼ oʼ llesenserren eʼñe puemuereñot̃en, nach aʼpot̃eneʼ poʼñoñ socop sa ñeñt̃es ama judioneshayayso. \v 3 Señoteñt̃eʼ ñam̃a att̃o gaterren Yompor att̃o t̃eʼpaʼ oʼ neñoterrñañ ñeñt̃ ahuat̃ot̃eñpaʼ ama eñotpahuoyaye. Ñehua, ñeñt̃paʼ oʼ notuanmas mameʼ necartot̃. \v 4 Ñerraʼm esempoch selleyon ñeñt̃ nequellquënnas allempochña señoch napaʼ poʼñoc̈h oʼ c̈hapona neyoc̈hro eʼñe ora ñeñt̃ atet̃ sherbeney Cristo, ñeñt̃ amaʼt ahuat̃ot̃eñ ama eñotpahuoyaye. \v 5 T̃arroʼmar ahuat̃paʼ ama c̈henaʼ allempo pocteʼ enteñ Parets oʼch eñotatey ya ñeñt̃ey arromñat̃eneshay amaʼt ñeñt̃ corretsa allempo. Ñeñt̃oʼmarña allempopaʼ ama eʼñeyeʼ eñotatuaneteʼt̃e atet̃ ñerraʼm t̃eʼpaʼ eʼñe Puecamquëñot̃ eʼñe eñotatuenan allohuen ñeñt̃ pueyochreshaʼ pen ña atet̃ ñerraʼm ñeñt̃ puellsensarneshaʼ pen ñam̃a ñeñt̃ aʼm̃teneʼ poʼñoñ. \v 6 Ñeñt̃ eñotateney t̃eʼpaʼ ñeñt̃paʼ att̃o amaʼt ñeñt̃ ama judioneshayaye, ñetpaʼc̈hoʼña oʼpatapreteretchaʼ Yompor ñeñt̃chaʼ apuerranet att̃ecma oʼpatatenya yam̃a ñeñt̃ey judioneshay. T̃eʼpaʼ eʼñe separrocmateñot̃ Cristo, t̃eʼña sapaʼ eʼñe poʼchets penes atet̃ ñerraʼm ya ñeñt̃ey judioneshay. Att̃oña oʼ eʼñe yeparrocmatuahuerr allohueney. Ñam̃a atet̃ oteʼt̃ Yompor ahuat̃ ñeñt̃chaʼ atet̃ cohuen perrnay esempo eʼñe Cristeshot̃ att̃och aʼqueshp̃aterreypaʼ ñeñt̃paʼ añecpaʼnaña ñeñt̃ ama judioneshayaye. Ñehua, ñet añot̃ aʼqueshp̃ataret̃terret att̃o eʼñe pameʼñeñot̃et añ cohuen ñoñets ñeñt̃ alloch yequeshperra allohueney. \p \v 7 Ñeñt̃oʼmarña napaʼ oʼ naparet̃terra llesens att̃och nach t̃orrerraya serrpareʼterreʼ añ cohuen ñoñets ñeñt̃ alloch yequeshperra. Napaʼ att̃o naparet̃terra amaña añot̃eyeʼ oʼ naparet̃terro att̃o eʼñe cohuen es nep̃aʼyen ñeñt̃ eʼñe nocpa. Ñapaʼ eʼñe puemuereñot̃en oʼ ahuamencat̃ perren, \v 8 amaʼt napaʼ ama esoyayno amaʼt mamesha, atarr coñeʼt̃ot̃ nesherben. Ora allohuen allpon ñeñt̃ pueyochreshaʼ pen Parets ñeñt̃ sherbeneʼ ña, naña ellonet̃paʼ eʼñe atet̃ nentena ñerraʼmrrat̃eʼ atarr coñeʼt̃ot̃ nesherbeñ Parets. T̃arraña amaʼt ama esoyaynopaʼ Yomporña puemuereñot̃ oʼ muenaterren nach serrpareʼtatyeseʼ ñeñt̃ ama judioneshayaye. Att̃ochña nach eñotatyenahuet att̃o Cristopaʼ shonteʼ esocmañen echyen paʼnamen ñeñt̃ña yoʼpatapreteña ñeñt̃ey yemtenaya ña. Amaʼt ya arromñat̃aya amat̃eʼ errot̃enot̃ eʼñe c̈haphuonayo yeyoc̈hro ñeñt̃ ora allpon oʼpatataret̃ey eʼñe yeyemteñot̃ Cristo. \v 9 Ñam̃a nach eñotatyeneʼ amaʼt allohuen acheñeneshaʼ ñeñt̃ atet̃ cot̃apeʼchennay Yompor. T̃arroʼmar ñeñt̃paʼ ahuat̃ot̃eñ ama eñotpahuoyaye t̃arroʼmar ama c̈henaʼ allempoch aʼpot̃errnay Yompor, ñeñt̃ara Yompor ñeñt̃ eʼñe yec̈hcatuahueʼ ora allpon ñeñt̃ yentyen. \v 10 Allochñapaʼ allohuen ñeñt̃chaʼ allpon ameʼñerrtsapaʼ ñetñapaʼ orrtateññañetchaʼ Yompor att̃o ñapaʼ atarr esocmañen es eñoten. Att̃ochña amaʼt allohuen ñeñt̃ am̃chaʼtaret̃etyetsa ñam̃a allohuen ñeñt̃ allsensaret̃etyetsa all ento, ñetpaʼc̈hoʼña eñotueñet att̃o Yomporpaʼ atarr esocmañen es eñoten ñeñt̃ nanac sherbets yocop. \v 11 Ñeñt̃paʼ atet̃ cot̃apeʼcheʼt̃ Yompor ahuat̃ pueyochreshacop ñeñt̃chaʼ sherb̃ats allempot̃eñ eʼñe errponañohuen. Ñam̃a añ onañcheʼt̃ ñeñt̃chaʼ etsoterreʼ poct̃ap̃ña ñeñt̃paʼ añ Cristo Jesús ñeñt̃ara Yepartseshar yepen. \v 12 Ñeñt̃oʼmarña yapaʼ eʼñe yameʼñeñot̃ Cristo eʼñech yeñmañeshaʼ yec̈horeʼteñ Yompor. Amach yem̃chaʼnañot̃eyeʼ yec̈horeʼteñe t̃arroʼmar añ yeyemteññaña Puechemer Cristo ñeñt̃ oʼ aʼpoctaterrey Pomporesho. \v 13 Ñeñt̃oʼmarña napaʼ oʼch notas, att̃o señotenen napaʼ atarr nemueroc̈htena socop, sapaʼ amach sellquëñot̃a seʼcharrtatatsto seyoc̈her. Eʼñepaʼchña cohuen socshapretenna. \s1 Att̃o Cristopaʼ atarr morrentenya \p \v 14 Ñeñt̃oʼmarña napaʼ c̈hocma neconcorpuena Yomporeshonet̃ allot̃ nemaʼyocham̃pensa. \v 15 Ñeñt̃ara Yompor allot̃ huena ora allpon paʼnamen acheñeneshaʼ ñeñt̃ eʼñe pamoʼtsnaʼtarecma p̃annenet amaʼt ñeñt̃ pueʼntañoʼtsaʼyen amaʼt ñam̃a allpon ñeñt̃ patsoʼtsaʼyen. \v 16 Att̃o Yomporpaʼ shonteʼ esocmañen echyen ñeñt̃ atarr nanac cohuenñatsotets Puecamquëñot̃paʼ ñepaʼchña atarr ahuamencat̃ sepeneʼ eʼñe seyoc̈hro. Nemaʼyocheñot̃paʼ atet̃ nenamuennas Yompor. \v 17 Ñam̃a c̈hocmuepaʼch yec̈hena Cristo eʼñe seyoc̈hro eʼñe seyemteñot̃ ña. Allochñapaʼ att̃ochña eʼñe sagapoñ Yompor puemorrenteña att̃och eʼñe huomenc sep̃aʼ seyoc̈her Yomporecop. Atet̃ ñerraʼmrrat̃eʼ tsach ñeñt̃ atarr erc̈hat̃ eʼñech huomenc orrena patso, allochña pueʼchorpaʼ eʼñech cohuen t̃en. \v 18-19 Allochñapaʼ att̃ochña atarrchaʼ huomenc c̈haponasa seyoc̈hro att̃o Cristopaʼ atarr nanac morrentenya. Ñeñt̃ allpon att̃o atarr morrentenyapaʼ ñeñt̃paʼ ama ahuañaño. Ñatoʼ oʼch netmaʼntacha att̃o yechopeʼchen patso. Oʼch ahuey tenonet̃, amaʼtchaʼ yec̈hap b̃ac̈hayo amach yem̃tanhuoñeña ñeñt̃ att̃o morrentenya Cristo. Att̃ecma ñam̃a toponet̃ amaʼtchaʼ yec̈hap b̃ac̈hayo amach yem̃tanhuoñeña ñeñt̃ att̃o morrentenya Cristo. Att̃ecma ñam̃a onnat̃onet̃ amaʼtchaʼ yec̈hap b̃ac̈hayo amach yem̃tanhuoñeña ñeñt̃ att̃o morrentenya Cristo. Att̃ecma ñam̃a enonet̃ ñam̃a oʼpononet̃, amaʼtchaʼ yec̈hap atarr allap̃arpaʼ amach yem̃tanhuoñeña ñeñt̃ att̃o morrentenya Cristo. Amaʼt ñam̃a allohuen ñeñt̃ allpon ñeñt̃ ameʼñenayapaʼ eñochetepaʼch ñamet att̃o atarr morrentenya Cristo. T̃arraña amaʼt ama eʼñeyeʼ eñotpahuoyaye ora allpon ñeñt̃ atet̃ pena Cristo puemorrenteña yocop, t̃arraña sapaʼ señochepaʼch amaʼt eʼñe allpona. Ñeñt̃paʼ atet̃ nenamatennas Yompor. Allochñapaʼ att̃ochña eʼñe poctacma chorrerrsa Yompor. \s1 Ayeʼchoc̈htatpahuepaʼch Yompor allohueney eʼñe yameʼñeñot̃ \p \v 20-21 T̃eʼñapaʼ ayeʼchoc̈htatpahuepaʼch yenteñ Yompor t̃arroʼmar ña ahuamencat̃ yepeneʼ. Ña poʼhuamencot̃paʼ atet̃chaʼ p̃atonay ya ñeñt̃ allpon yenamueñ, elloña ñapaʼ atet̃chaʼ pennay elloch metanaʼtuonay ñeñt̃ allpon yenamueñ. Ñam̃a elloña metanaʼtuennay ñeñt̃ allpon yoct̃apeʼchyen. Elloña nanacocmañen eʼñe cohuen es pennay eʼñe poʼhuamencot̃ ña. Yaʼyeʼchoc̈htatoñepaʼch Yompor allohueney ñeñt̃ey yameʼñeñot̃ c̈hocma yapc̈haʼyena ñocop. Ayeʼchoc̈htatpahuepaʼch t̃ayot̃eñ amaʼt ñam̃a errponañohuen t̃arroʼmar ña yapuerreʼ Puechemer ñeñt̃ Cristo Jesús. Ñeñt̃paʼ att̃etepaʼch Yompore yocop. \c 4 \s1 Att̃och eʼñe yeparrocmatuen allohueney ñeñt̃ey ameʼñenaya Cristo \p \v 1 Ñeñt̃oʼmarña t̃eʼpaʼ añ notenes amaʼt na ñeñt̃en ayottam̃p̃saret̃en eʼñe net̃orreñot̃ serrpareʼteʼ Yepartseshar Cristo. T̃eʼpaʼ oʼch notas: Eʼñech cohuen es sorrtatyen ñeñt̃ atet̃ poctetsa añecop ñeñt̃ oʼ huaʼñerr Yompor ñeñt̃chaʼ pueyochreshaʼ perr atet̃ ñerraʼm sa. \v 2 Amaʼt mameshapaʼ amach sañeña entatstatso ñeñt̃esoʼ atarr nanac sherbets. Eʼñe semorrentannaʼteñot̃ eʼñech acop̃a es sep̃annaʼtyena. C̈hocmuepaʼch saʼhuantannena ñerraʼm errot̃ penes poʼpsheñeñ, amachña seʼmoñeʼtatsche sam̃a. Añchaʼña eʼñech cohuen semorrentannaʼtuena allohuenes. \v 3 Añepaʼchña seʼnen att̃och sepat̃errtat soct̃ap̃ña allohuenes ñeñt̃ eʼñe atet̃ pat̃err cot̃apeʼchatenes Parets Puecamquëñ. Allochñapaʼ eʼñe separrocmateñot̃, eʼñech cohuen sentannena, amachña c̈ha poʼpoñ sentannaʼtueno. \v 4 T̃arroʼmar poʼñoc̈hpaʼ eʼñe yeparrocmatuen allohueney ñeñt̃ey ameʼñenaya Cristo ñam̃a ñeñt̃ara pat̃err Parets Puecamquëñ ñeñt̃ yechorraʼyenaya allohueney. Ñam̃a amaʼt paʼnameney shontey ñeñt̃ey oʼ c̈horeʼterrey Yompor t̃arraña eʼñe ñeñt̃ara yeyemteñot̃ yecuen allohueney ñeñt̃ oʼpatatenya Yompor ñeñt̃chaʼ apaʼyesuerrey. \v 5 Poʼñoc̈hpaʼ eʼñe pat̃rra Yepartseshar Cristo ñam̃a ñeñt̃ara pat̃rra poct̃ap̃ña ñeñt̃ yameʼñaʼhuena allohueney, ñam̃a eʼñe allohueney att̃ecma yapataret̃ta eʼñe yameʼñeñot̃ Cristo. \v 6 Ñam̃a eʼñe pat̃rra Parets ñeñt̃ Yeyomporer yep̃ohuen allohueney, ñeñt̃ara ñeñt̃ yaʼm̃chaʼtaret̃er yep̃ohuen allohueney. Ñam̃a ñeñt̃ara Yompor ñeñt̃ yet̃orratyenaya paʼnamen allohueney ñam̃a ñeñt̃ara Yompor ñeñt̃ yechorraʼyenaya yeyoc̈hro allohueney. \s1 Att̃o Cristopaʼ apaʼyeney allohueney att̃och yet̃orraʼyesa eʼñe poʼpoñeʼttsocma \p \v 7 Ñam̃a Cristopaʼ apaʼyeney allohueney eʼñe poʼpoñeʼttsocma att̃och yet̃orraʼyesa Yomporecop eʼñe paʼnamenot̃. Puesheñaʼttsoypaʼ oʼch apaʼyesey errpont̃eʼ pocteʼ enten ña. \v 8 Ñehua, ñeñt̃paʼ atet̃ oteney Yompor poʼñoñ ñeñt̃ aquellcaʼhuaret̃ ahuat̃ot̃eñ, ñeñt̃paʼ atet̃ oten Cristocop: \q1 Allempo aʼterr pueʼntañopaʼ ahuanerran allohuen ñeñt̃ eʼmoñeʼteneʼ att̃ot̃ña aʼmchechuahuerranet. Allempoñapaʼ eʼñe pocsheñeshot̃ shonteʼ es apaʼyesnerran acheñeneshaʼ. \p \v 9 Ñehua, all oten “aʼterr pueʼntaño.” Ñeñt̃oʼmarña yeñoteñ allempo ama aʼterraʼpaʼ ñapaʼ entot̃ asuaña, c̈hap amaʼt allohuanen patso oʼpono. \v 10 Ñeñt̃ara ñeñt̃ sohuatsa entot̃ ñeñt̃paʼ ñeñt̃ara ñeñt̃ aʼterrets amaʼt eʼñe allohuanen ento. Att̃ot̃ña eʼñe erracmañen epaʼhuena Cristo. \v 11 Ñam̃a ñeñt̃ atet̃ oten ñoñets ñeñt̃ anaret̃ ahuat̃ot̃eñ att̃o shonteʼ es apaʼyenan acheñeneshaʼ ñeñt̃paʼ añ oten ñeñt̃ att̃o ñapaʼ eʼñe poʼhuamencot̃ es apaʼyeney att̃och yet̃orraʼyesa poʼpoñeʼttsocma ñocop. Patantarr acheñpaʼ atet̃ aparet̃tet oʼch t̃orrenet atet̃ ñerraʼm ñeñt̃ allsensaret̃tetsa Yomporecop; poʼpotantaññapaʼ añchaʼ t̃orrenet oʼch aʼm̃teññañet Yompor poʼñoñ; poʼpotantaññapaʼ añchaʼ t̃orrenet oʼch serrpareʼtatoñet poʼñoñ acheñenesheshoʼmar; poʼpotantaññapaʼ añchaʼ t̃orrenet oʼch cohuam̃penan allohuen ñeñt̃ ameʼñetsa ñeñt̃ara ñeñt̃chaʼ yec̈hatenahuet Yompor poʼñoñ. \v 12 Att̃oña ahuamencat̃ p̃aʼyeney allochñapaʼ ñach poʼhuamencaro yet̃orraʼyesa poʼpoñeʼttsocma eʼñe puesheñaʼttsocmay ñeñt̃ey pueyochreshaʼ oʼ perrey Parets. Att̃ochña eʼñe cohuen yeyenpanneñot̃paʼ oʼch huomenc yep̃annaʼta yeyoc̈her Yomporecop allohueney ñeñt̃ey ameʼñenaya Cristo. \v 13 Att̃ochña eʼñe yeparrocmatuen eʼñe yameʼñeñot̃ Yompor Puechemer ñeñt̃ Cristo t̃arroʼmar allohueneypaʼ oʼch yeñotuerr ñeñt̃ eʼñe cohuenareʼ ñeñt̃ atet̃ yec̈hateney Yompor Puechemer. Att̃ochña oʼch eʼñe atet̃ yep̃ohuen yam̃a ora allpon ñeñt̃ cohuentetsa ñeñt̃ atet̃ pena Cristo ñeñt̃ yechorraʼyenaya. Ñatoʼ oʼch netmaʼntacha oʼch not, yapaʼ oʼ eʼñe yepoʼn Cristocop. \v 14 Ya t̃eʼpaʼ ama att̃eye ñerraʼm cheshaneshaʼ ñeñt̃ ama es eñotetso ñeñt̃ epuoyeʼ cot̃apeʼcheneʼ cohuen. Ñehua, atet̃ ñerraʼm cheshaneshaʼ t̃eʼpaʼ ñatoʼ poʼpoñchaʼ cot̃apeʼchyenet, ñatoʼ tsapat̃ñapaʼ oʼchc̈hoʼ cot̃apeʼchyeneterr poʼpoñ. Yapaʼc̈hoʼña atet̃ yepena yam̃a allempo ama yepoʼnenaʼ Cristocop. Yaña ñeñt̃ey ama epuoyeʼ yoct̃eñe Cristopaʼ amach errot̃enot̃ yeʼm̃ñocheña ya ashcañ att̃och ameʼñatya ña poct̃ap̃ña, at̃t̃och oʼch pantatey. \v 15 Yapaʼ añachña eʼñech pat̃rra yoct̃apeʼchen ñeñt̃ eʼñe poʼñoc̈h alloch yequeshperra ñeñt̃ atet̃ oteney Yompor poʼñoñ. Eʼñech yemorrentannaʼteñot̃ es yep̃aʼyen. Att̃ochña eʼñe yep̃ohuen allohuen ñeñt̃ atet̃ cot̃apeʼchateney Cristo. Att̃ochña yapaʼ eʼñech ora yoct̃apeʼchen eʼñe atet̃ cot̃apeʼchen Cristo. Ñeñt̃oʼmarña eshecchaʼña yeparrocmat epay Cristo, ñeñt̃ña Cristopaʼ yeyoc̈her\f + \fr 4:15 \ft Oʼch secueʼ nota 1.23.\f* yepeñ ñeñt̃ c̈hocma yoct̃apeʼchateneʼ cohuen Yomporecop. \v 16 Ñatoʼ oʼch netmaʼntacha ñeñt̃ atet̃ pena yechets. Ñehua, yechetspaʼ amach errot̃enot̃ ellopaʼtetsteno. Amaʼt allemeñ meynaʼten yechets c̈hocma parrocmaten att̃o rremannenet eʼñe cohuen att̃oña yenpannenet. Ñam̃a yapaʼ yameʼñeñot̃ Cristo eʼñe poʼchets p̃ohueney allohueney amaʼt paʼnamen acheñrey. Att̃oña Cristopaʼ eʼñe parrocmatateney ñeñt̃oʼmarña eʼñe yemorrentannaʼteñot̃ oʼch yeyenpannena eʼñe cohuen. Att̃ochña alloʼnach yesen atontatnomueʼ ñeñt̃ atet̃ eñotateney Yompor oʼch yemorrentannerra allohueney. \s1 Att̃o Yomporpaʼ oʼ etserrataterrnay yoct̃ap̃ña ñeñt̃ atet̃ muenen ña \p \v 17 Ñeñt̃oʼmarña t̃eʼpaʼ oʼch notas ñeñt̃ poʼñoc̈h sherbets Yepartsesharecop. Sapaʼ amach alloʼna atet̃ sep̃aʼyesneno ñeñt̃ atet̃ p̃atseʼtyena ñeñt̃ ama ameʼñenayo Yompor. T̃arroʼmar ñeñt̃ atet̃ cot̃apeʼchatseʼtyenet ñetpaʼ ñeñt̃paʼ eʼñe orrena amaʼt mameshapaʼ ama es sherbeno. \v 18 Ñetpaʼ ama c̈henaneto pueyoc̈hreto ñeñt̃ Cristo poct̃ap̃ña. Ñetpaʼ c̈ha ottenet ñerraʼmrrat̃eʼ atarr checmetoʼtsenet. T̃arroʼmar ñetpaʼ atarr echarrtenet pueyoc̈hret att̃och cot̃eret Yompor. Ñeñt̃oʼmarña amach enterreto correñets ñeñt̃ huetsa Yomporeshot̃ t̃arroʼmar ama eñoteñeto Yompor. \v 19 Ñet poʼchñaret amaʼt mamesha oʼhuañchaʼ apencoc̈hen eñchet. Ñetñapaʼ eʼñech pocsheñeshaʼ pomuenet poʼchets att̃ochña eʼñe ñeñt̃a yom̃aʼyenet ñeñt̃ paʼnamen sosyaʼtsañec̈hno ñeñt̃ ama ap̃apahuoyaye amaʼt mamesha. \v 20 T̃arraña sapaʼ amaña att̃eyeʼ seyc̈heno. Sapaʼ añña seyc̈hen ñeñt̃ atet̃ yec̈hateney Cristo. \v 21 T̃arroʼmar napaʼ neñotenes sapaʼ oʼ seʼm̃ñoterrñañ Cristo poʼñoñ allempo yeyc̈hatas ñeñt̃ eʼñe poʼñoc̈h att̃och yeyemtera Jesús. \v 22 Sa ahuat̃paʼ att̃a soct̃apeʼchatseʼtyeseʼt̃ t̃eʼña ñeñt̃paʼ oʼch saʼypoʼñam̃per. Sapaʼ ñeñt̃aña atarr seshcareʼtayeʼt̃ att̃oña añach eʼñe semnatseʼtyeseʼt̃ ñeñt̃ ama cohuenayaye amaʼt mamesha. \v 23 T̃eʼña sapaʼ añepaʼchña setserrataterreʼ Yompor eʼñe ora ñeñt̃ atet̃ soct̃apeʼchyen seyoc̈hro. \v 24 Añepaʼchña chorraterrsa Yompor ñeñt̃chaʼ soct̃apeʼchaterreʼ cohuen eʼñe etserra. Ñeñt̃paʼ att̃ochña etserrataterrnas Yompor soct̃ap̃ña eʼñe atet̃ cot̃apeʼchen ña. Allochñapaʼ att̃och eʼñe pocteʼ es sep̃aʼyen arr patsro ñeñt̃ eʼñe poʼñoc̈h cohuen enten Parets. \s1 Arrpaʼ all cot̃apeʼchatyenanet paʼnamen ñeñt̃ atarr sherbets \p \v 25 Ñeñt̃oʼmarña t̃eʼpaʼ añ poctetsa socop amach alloʼna seshcareʼtannaʼtyesneno. Eʼñe puesheñaʼttsos errot̃en sotannena, eʼñepaʼch poʼñoc̈h saʼpoctaten señoñ samoʼtseshacop. T̃arroʼmar eʼñe yameʼñeñot̃ Cristo eʼñe yeparrocmatuen. \p \v 26 Ñam̃a ñerraʼm esempo saʼtsrreʼmapaʼ amach alla señotatoñaʼ oʼch sorrtat ñeñt̃ ama cohuenayaye. Ñam̃a c̈hocmach semac̈haʼnerr eʼñe mamecma amachña ñeñt̃aña sellap̃sateno. \v 27 Allochñapaʼ att̃och amach yemnatatsche oneñet̃ oʼch atarr topateney, t̃arroʼmar yocop ama pocteyaye oʼch yemnach oneñet̃ oʼch atarr ahuamencat̃ peney. \p \v 28 Ñam̃a ñerraʼm eseshas etetspaʼ añ poctetsa t̃eʼñapaʼ amach alloʼna setyesatsetneno. Ñeñt̃ acheñerpaʼ taruasepaʼña eʼñe ña potot̃. Amaʼt erraʼtsena ñeñt̃chaʼ poʼtaruas p̃aʼpaʼ ñeñt̃ taruaspaʼ eʼñe cohuen ama apencoc̈henayaye. Allochñapaʼ att̃ot̃chaʼ echenan shonteʼ att̃och apaʼyesan ñam̃a poʼpotantañ ñeñt̃ atarr es palltaʼyetsa. \p \v 29 Amach yeñosatseʼtyesatsto ñeñt̃ ama cohuenayaye amaʼt mamesha. Añchaʼña yeñosyen ñeñt̃ eʼñe cohuen entuen allohuen acheñeneshaʼ ñeñt̃chaʼ yenpueneʼ ñeñt̃ eʼm̃ñotets. Att̃ochña ñetpaʼ oʼch huomenc pet pueyoc̈her Yomporecop. \v 30 Att̃ochña amach c̈ha yellcateññañe Yompor Puecamquëñ ñeñt̃ yec̈hetsa yeyoc̈hro ñeñt̃ara ñeñt̃ Puecamquëñ pen ñeñt̃ atarr cohuen Parets. T̃arroʼmar puechorreñot̃ey ya, Parets Puecamquëñ ñeñt̃paʼ ñeñt̃ña yeñotateneʼ yapaʼ puechemer peney Yompor t̃ayot̃eñ ñam̃a esempohuañenchaʼ allempoch yaʼqueshp̃ataret̃terra. \p \v 31 Amach atsrreʼmoc̈hen sentannaʼtatsto amaʼt seyoc̈hra. Allochñapaʼ att̃och amach c̈ha saʼtsrreʼmareʼtatanneno, att̃ochña amach secheʼc̈hameʼtanneno. Ñam̃a amach sesasareʼtannaʼtatsto. Amaʼt mameshapaʼ amach seʼmoñeʼtannaʼtatsto. \v 32 Añchaʼña eʼñech cohuen yentannena ñam̃a eʼñech cohuen yemuerannena. Ñam̃a añña poctetsa c̈hocmach yep̃retnannena att̃o Yomporpaʼ oʼ peretnerrey yam̃a. Ñeñt̃paʼ añot̃ peretnerrey att̃o rroma Puechemer Cristo yocop. \c 5 \s1 Ñeñt̃ey puechemer pen Yomporpaʼ oʼch yorrtaten ñeñt̃ atet̃ muenen ña \p \v 1 Yomporpaʼ atarr morrentenya, att̃oña eʼñe puechemer peney. Ñeñt̃oʼmarña yocoppaʼc̈hoʼña añ poctetsa oʼch yorrtateññañ ñeñt̃ atet̃ cohuenareʼ es p̃aʼyen ña ñeñt̃ Yeyomporer yepen. \v 2 Elloña Cristopaʼ atarr morrentenya. Ñeñt̃oʼmarña eʼñe pocteʼ eñch att̃oña poma ñañeña att̃o rroma yocop atet̃ peteʼt̃ ahuat̃ allempo muetseteʼt̃ carrnero Yomporecop. Ñeñt̃ña eʼñe cohuen enteʼt̃ Yompor eʼñe atet̃ ñerraʼmrrat̃eʼ ñeñt̃ allo atarr eñmosat̃tam̃p̃sacheteʼt̃ ahuat̃ ña. Att̃o atarr morrentya Cristo, yocoppaʼc̈hoʼña añ poctetsa eʼñech cohuen yemorrentannaʼtuena. \p \v 3 Ñam̃a amach yep̃aʼyesatsto ñeñt̃ ama pocteyeʼ enteno ña. Amaʼt parrocha amach yechtatsche ñeñt̃ ama yet̃aporeyaye, ñam̃a coyaneshaʼpaʼ amach agapatstano ñeñt̃ ama puerrollareyaye. Ñam̃a amaʼt mameshapaʼ amach yep̃atsto ñeñt̃ atarr sosyaʼtsañetyets ñam̃a ama es ayeʼchapretannaʼtpahuo. Ñeñt̃ atet̃ poctetsa allohuenacpay ñeñt̃ey pueyochreshaʼ oʼ perrey Parets. Allochñapaʼ amaʼt parrochapaʼ amach errot̃enot̃ otyetoʼ yapaʼ att̃o yepena. \v 4 Ñam̃a serrpareʼtatseʼteñets sosyaʼtsañ ñeñt̃ ama aserrpareʼtpahuoyaye ñeñt̃oʼmarña yapaʼ amach atet̃ yep̃atsto amaʼt mamesha. Ñam̃a otatseʼteñets ñeñt̃paʼ ama sherbeno Yomporecop ñeñt̃oʼmarña yapaʼ amach atet̃ yep̃atsto. Ñam̃a allocchameʼtanneñets ñeñt̃ ama ayellsheñeʼchpahuoyaye allo, ñeñt̃paʼc̈hoʼña amach atet̃ yep̃atsto. Añchaʼña yapaʼ Yomporepaʼchña yeparasyosoʼten. \v 5 Sapaʼ señoteñ ñeñt̃ cañoreshaʼtetspaʼ amach es oʼpaterroña Yomporesho amaʼt eʼñe esempaña allchaʼ am̃chaʼtaret̃terra Cristo epuet Pompor. Ñam̃a allohuen ñeñt̃ eñoteneʼ paʼnamen sosyaʼtsañ, ñeñt̃paʼc̈hoʼña amach es oʼpatataret̃terrtsoña all am̃chaʼtaret̃tena Yompor. Ñam̃a ñeñt̃ atarr es yeʼchapretetsa añña poʼyomporer pen ñeñt̃ atarr es yeʼchatseʼtateneʼ. Ñeñt̃oʼmarña ñapaʼc̈hoʼña amach es oʼpatateñoña Yompor all am̃chaʼtaret̃tena. \v 6 Amach seʼm̃ñotatsche acheñ ñeñt̃ mueneneʼ oʼch shecareʼtas oʼch otas ñeñt̃chaʼ atet̃ sep̃atseʼta sam̃a ñeñt̃paʼ eʼñe pocteʼ Yomporecop. T̃arraña napaʼ oʼch notas, ñeñt̃paʼ ama poʼñoc̈hoyaye, t̃arroʼmar Yomporpaʼ c̈hocmach coñchatuerran allohuen ñeñt̃ atet̃ at̃pareʼtetsa, ñeñt̃paʼ oʼ eʼñe notuanmas. \v 7 Ñeñt̃oʼmarña t̃eʼpaʼ oʼch notas, sapaʼ amach socshapretatstaneto ñeñt̃ atet̃ p̃atseʼtyenet. \s1 Ñeñt̃ atet̃ yorrtatyen allempo oʼ yocrrerra eʼñe cohuen puetaro \p \v 8 Ñehua, sapaʼ ahuat̃paʼ poʼñoc̈h eʼñe atet̃ socshapretatseʼtyeseʼt̃ allempo sapaʼ checmeta socrraʼyeseʼt̃. T̃arraña t̃eʼ eʼñe seyemteñot̃ Yepartseshar oʼ c̈hapatonas seyoc̈hro ñeñt̃ cohuen enten ña. Ñeñt̃oʼmarña t̃eʼ socoppaʼ añ poctetsa oʼch sorrtateññañ ñeñt̃ cohuen enten ña, att̃o sapaʼ oʼ socrrerra puetaro. \v 9 Ñehua, ñerraʼm puetaroch yocrrena, ñeñt̃paʼ atet̃chaʼ yorrtatyen. Eʼñech cohuenacma es yep̃annaʼtyena ñeñt̃ eʼñe pocteʼ enten Yompor ñam̃a ñeñt̃paʼ ama shequëñtsoyaye amaʼt mamesha. \v 10 Ñam̃a socoppaʼ añ poctetsa oʼch semaʼyoc̈hra eñotnomueʼ ñeñt̃chaʼ atarr cohuen entapretenes Yepartseshar. \v 11 Ñam̃a t̃eʼpaʼ oʼch alla noterrserr, amach socshapretatsche ñeñt̃ atet̃ p̃atseʼtyenet, ñeñt̃paʼ ama es sherbeno amaʼt eʼñe mamesha. T̃arroʼmar ñetpaʼ checmeta correnet. Sapaʼ añchaʼña sorrtatyen ñeñt̃ eʼñe cohuenareʼ allochñapaʼ att̃och eñochet ñeñt̃ atet̃ p̃atseʼtyenet ñet, ñeñt̃ amaʼt mameshapaʼ ama cohuenayeʼ enteñe Yompor. Ñeñt̃paʼ ñatoʼ yapaʼ oʼch yot, yapaʼ oʼ yaʼpuetarsam̃p̃sanet ñet ñeñt̃ atet̃ p̃atseʼtyenet checmeto. \v 12 Ñehua, sapaʼ señoteñ ñeñt̃ atet̃ p̃atseʼtyenet aʼnahua. Ñerraʼm yaʼmet̃eʼpaʼ ñeñt̃paʼ atarr apencoc̈hen. \v 13 Ñam̃a ñerraʼm yaʼpuetarsam̃p̃sanet ñet ñeñt̃ p̃atseʼtyenet ñeñt̃ ama cohuenayaye, att̃oña ñetpaʼ oʼch c̈hapanet pueyoc̈hro ñeñt̃ atet̃ penet ñetpaʼ poʼñoc̈h ama cohuenayaye. \v 14 Ñeñt̃oʼmarña socoppaʼ atet̃ ac̈hotenes añ ñoñets: \q1 P̃apaʼ ñeñt̃ep̃ atet̃ p̃atseʼtyetsa eʼñe att̃ep̃ ñerraʼm c̈ha atarr rroma pemuen. T̃eʼñapaʼ oʼch peʼmanerra oʼch petanterra att̃o rroma pemuen. Cristopaʼ ñach p̃aʼpuetarsam̃perreʼ. \p \v 15 Ñeñt̃oʼmarña t̃eʼpaʼ oʼch notas: Señota eʼñe errot̃ent̃eʼ sep̃aʼyen, ñatoʼ cohuent̃eʼ ñatoʼ amat̃eʼ cohuenayaye. Amach atet̃ sep̃atsto atet̃ ñerraʼmrrat̃eʼ ñeñt̃ ama es eñotetso. Añchaʼña atet̃ sep̃aʼyes atet̃ ñerraʼm ñeñt̃ atarr es eñotets ñeñt̃ cohuentetsa Yomporecop. \v 16 T̃eʼpaʼ arosña att̃a es puec̈hatstatsa c̈hochña yet̃orra Yomporecop t̃arroʼmar t̃eʼ acheñeneshaʼ atarr sosey yec̈hcatyenet arr patsro. \v 17 Ñeñt̃oʼmarña notenes amach att̃a es sepc̈hatsto ñeñt̃ atet̃ pena ñeñt̃ ama es eñotetso. Sapaʼ añchaʼña oʼch señotoñ ñeñt̃ atet̃ muenen Yepartseshar ñeñt̃chaʼ atet̃ yep̃a ñeñt̃ cohuen enten ña. \v 18 Ñam̃a oʼch notas, amach seposaʼtatsto; ñeñt̃paʼ c̈hach cot̃apeʼchatenes sosyaʼtsañec̈hno att̃och aʼpuerrataterres. Amach seposaʼtatsto, añepaʼchña sechorrenaya ñeñt̃chaʼ socshateneʼ ñeñt̃ara Parets Puecamquëñ. \v 19 Añepaʼchña eʼñe socshapretannena ñeñt̃ atet̃ sac̈hoteñ Yepartseshar. Eʼñepaʼchña socsheñeshaʼ seyoc̈hrocmañen semorrechena allo yaʼyeʼchoc̈htateññañ Parets, ñam̃a allohuen morreñtsoc̈hno ñeñt̃ Partsocop. \v 20 Eʼñe yeyerpueñot̃ Yepartseshar Jesucristo c̈hocmuepaʼch yeparasyosoʼteññañ Pompor allohuenacop paʼnamenacop. \v 21 Eʼñe semorrenteñot̃ Cristopaʼ eʼñepaʼchña cohuen sameʼñannena. Att̃ochña yecohuentateññañ Cristo. \s1 Arrpaʼ all cot̃apeʼchatan yacma epuet puet̃apor \p \v 22 Ñeñt̃es arrollaret̃es oʼch notas, añ pocteʼ serrollarpaʼ ñachña eʼñe sameʼñena atet̃ yepeñ ñam̃a Yepartseshar Cristopaʼ ñachña eʼñe sameʼñena. \v 23 T̃arroʼmar serrollarpaʼ añ poctetsa atet̃chaʼ senteñ ñerraʼmrrat̃eʼ samoʼmteʼ sepeñ. Att̃ecma yepena yam̃a allohueney ñeñt̃ey ameʼñetsa, añ Yamoʼmteʼ yepen Cristo ñeñt̃ yecuam̃peneʼ. T̃arroʼmar ñapaʼ oʼ aʼqueshp̃aterrey ñeñt̃ey oʼ poʼchets perrey. \v 24 Ñeñt̃oʼmar añ pocteʼ serrollarpaʼ ñach pomnaren sepeneʼ allohuenacop, att̃ecmay yam̃a ñeñt̃ey ameʼñetsapaʼ añchaʼ pomnaren yepeneʼ Cristo. \p \v 25 T̃eʼpaʼ oʼch notas sam̃a ñeñt̃es at̃aporet̃es, añ poctetsa eʼñech cohuen semorreñcha set̃apor. Oʼch semuerya nanac atet̃ peney Cristo atarr muerenya yam̃a ñeñt̃ey ameʼñenaya ña. Ñeñt̃oʼmarña puemorrenteñot̃ey ya ñapaʼ eʼñe pocteʼ eñch oʼch rroma yocop. \v 26 Allochñapaʼ att̃ochña eʼñe eʼshohuerrnay allohuen yoʼchñar oʼch aʼcohuentaterrey Partsocop. Ñehua, ñeñt̃ tomaʼntena allempo yapataret̃terra Yomporecop. Ñam̃a poʼñoñpaʼ ñeñt̃ña eʼñe yaʼcohuentaterreʼ. \v 27 Allempoña oʼ yaʼcohuentataret̃terrapaʼ ñapaʼ mueneñ oʼch aguërrey allohueney ñeñt̃ey ameʼñenaya ña. Ñam̃a ya att̃o oʼ yaʼcohuentataret̃terrapaʼ amach alla eñalleterreʼt̃e amaʼt mamesha ñeñt̃chaʼ yaʼsosyaterrayerr. Amach alla enterryeʼt̃e att̃o ama cohuenayeʼ yorrteno amaʼt errot̃ena. Eʼñechña yaʼcohuentataret̃terra Partsocop. \v 28 Poʼñoc̈hpaʼ ñeñt̃es at̃aporet̃espaʼ añ poctetsa socop eʼñepaʼch cohuen semuerya set̃apor eʼñe atet̃ atarr semorrentena sañeña. T̃arroʼmar ñerraʼm atarr yemorrenteña yet̃apor yaʼnaña atarr morrentetsa, t̃arroʼmar yet̃aporpaʼ ñeñt̃ara yechets yepen. \v 29 Ñehua, yapaʼ yeñoteñ amaʼt eʼñe puesheñarrot̃eya ama yetsenaʼtenoña eʼñe ya yechets. C̈hochña eʼñe cohuen yerren eshecchaʼ eʼñe huomencnaʼntateney. Eʼñech cohuen yecuen eʼñe ya yechets. Att̃ecma peney ñam̃a Cristo atarrchaʼ cohuam̃peney ya allohueney ñeñt̃ey ameʼñenaya ña. \v 30 T̃arroʼmar ñapaʼ ña eʼñe poʼñoc̈h poʼchets p̃ohueney ya. Paʼnamenot̃ poʼchets p̃aʼyeney allohueney ñeñt̃ey ameʼñenaya ña. \v 31 Ñehua, Yompor poʼñoñ ñeñt̃ aquellcaret̃ ahuat̃ot̃eñ ñeñt̃paʼ atet̃ oten: “Ñeñt̃oʼmarña ñerraʼm esempo yesnaʼta amapaʼ coyaneshaʼpaʼ oʼch echan puerrollar, añ pocteʼ oʼhuañchaʼ tama yeyemteña yachor ñam̃a yompor. Allochñapaʼ att̃och eʼñe yeparrocmaten epay yet̃apor. Att̃oña eʼñe epsheñoʼmareypaʼ eʼñech pat̃rra yechets yepen.” \v 32 Ñeñt̃paʼ ahuat̃ot̃eñ ama eñotpahuoyaye ñeñt̃ tomaʼntatenya añ cot̃ap̃ñats. T̃arraña t̃eʼpaʼ napaʼ noten añ yetmaʼntenaya ñeñt̃ atarr cohuen ñeñt̃ att̃o eʼñe yeparrocmaten epay Cristo allohueney ñeñt̃ey ameʼñenaya ña, ñeñt̃ara ñeñt̃ poʼchets yepeneʼ allohueney. \v 33 Ñeñt̃oʼmarña oʼch alla noterrserr, eʼñe puesheñaʼttsospaʼ eʼñepaʼch cohuen semuerya set̃apor atet̃ atarr semorrentena eʼñe sañeña. Ñam̃a ñeñt̃es coyaneshaspaʼ oʼch notas, añ poctetsa ñam̃a socop semorrenteñot̃paʼ sameʼñyach serrollar, ñam̃a eʼñech cohuen senteñ. \c 6 \s1 Arrpaʼ all cot̃apeʼchatan cheshaneshaʼ epuet pamoʼmteʼ \p \v 1 T̃eʼ cheshaneshachaʼ oʼch notas ñeñt̃ poctetsa socop ñeñt̃chaʼ atet̃ sep̃a. Eʼñe sameʼñeñot̃ Yepartseshar Cristo c̈hocmuepaʼch eʼñe cohuen sameʼñeña sompor ñam̃a sachor, t̃arroʼmar ñeñt̃ poctetsa socop. \v 2 “Ñam̃a eʼñe semorrenteñot̃ somporpaʼ c̈hocmuepaʼch sem̃chaʼnaʼch ñam̃a sachor” t̃arroʼmar ñeñt̃paʼ ñeñt̃ eʼñe ñanom atet̃ ot Yompor ñeñt̃chaʼ atet̃ yepeñ yamoʼmteʼ allochñapaʼ att̃och eʼñe cohuen aʼnatenya Yompor. \v 3 “Att̃och paʼnateñot̃es eʼñe cohuenpaʼ atomatchaʼ socrrena arr patsro.” \p \v 4 T̃eʼpaʼ oʼch notas sam̃a ñeñt̃es pamoʼmteʼ pen cheshaneshaʼ, seʼmoñeʼteñot̃paʼ amach saʼtsrreʼmareʼtatatsche sacñet̃arneshaʼ. Eʼñechña añet̃ollot̃eñ eʼñe secuam̃peñot̃ cohuenpaʼ oʼch seyc̈hatyenanet eʼñe cohuen att̃och ñetpaʼc̈hoʼña oʼch ameʼñeret ñamet Yepartseshar Cristo. Ñam̃a amach semnatatstaneto oʼch att̃a atarr at̃pareʼtaset. \s1 Arrpaʼ all cot̃apeʼchatan ataruasañ epuet poʼpatronar \p \v 5 T̃eʼpaʼ oʼch notas sam̃a ñeñt̃es ataruasataret̃es ñeñt̃ poctetsa socop. C̈hocmach sameʼñya ñeñt̃ setaruasateneʼ arr patsro. Amaʼt erraʼtsena apuenset ñeñt̃chaʼ setaruas sep̃aʼ eʼñechña sem̃chaʼnaʼteñot̃ setaruasen eʼñe cohuen seyoc̈hrocmañen. Amaʼt acheñecpa setaruasenpaʼ atet̃chaʼ setaruasen ñerraʼmrrat̃eʼ Cristocop setaruasen. \p \v 6 Amachña eʼñe puecuam̃peñot̃esa semaʼyoreʼteno taruasats att̃och eʼñe cohuen socshach sepatronar att̃och eʼñe pocteʼ entenes. Añchaʼña amaʼt acheñecpa setaruasenpaʼ eʼñechña atet̃ sesherbeñ cohuen ñerraʼmrrat̃eʼ Cristo sesherben. Eʼñechña seyoc̈hrocmañen sepena cohuen ñeñt̃ atet̃ muenen Yompor. \v 7 Eʼñe semneññot̃paʼ eʼñech cohuen socsheñeshocmañen setaruasen t̃arroʼmar ama ñapt̃a acheñecop setaruaseno, Yomporecpaʼnaña setaruasen. \v 8 T̃eʼ sapaʼ eʼñe señoteñ amaʼt erraʼtsent̃eʼ cohuen es yep̃aʼyen, Yepartsesharñapaʼ c̈hocmach alla aphuerrey eʼñe puesheñaʼttsoy ñeñt̃chaʼ atarr cohuen yocshaterreʼ amaʼt añ acheñer ñeñt̃ ataruasataret̃ amapaʼ añ acheñer ñeñt̃ eʼñe cohuenoʼtsen, att̃ecmach apaʼyesuerranet ñeñt̃chaʼ atarr cohuen coshaterrahuet ñet. \p \v 9 Ñam̃a t̃eʼpaʼ oʼch notas ñeñt̃es taruasatets. Sapaʼc̈hoʼña atet̃chaʼ sepoñ saʼtaruasañer ñeñt̃ atet̃ poctetsa, amachña c̈ha sechemamaʼtyenaneto. Señochepaʼch sapaʼc̈hoʼña sechen Samoʼmteʼ Cristo ñeñt̃ pueʼntañoʼtsen. Ñeñt̃ara ñeñt̃ Pamoʼmteʼ pen allohuen saʼtaruasañreneshaʼ. Ñam̃a ñapaʼ ama puesheñaʼttsa morrenteno. \s1 Ñeñt̃ apueney Yompor ñeñt̃chaʼ yemoñenaya att̃och amach alla aʼpuerrataterrye oneñet̃ \p \v 10 Allohuanen arr necartot̃ oʼch masheñneshachaʼ ñam̃a noc̈haneshachaʼ notas, ahuamencat̃epaʼch p̃as Yepartseshar t̃arroʼmar ñapaʼ ña atarr ahuamencat̃tetsa. \v 11 Ñeñt̃oʼmarña añ poctetsa yocop oʼch yaguërrñañ ora allpon ñeñt̃ apueney Yompor allochñapaʼ ñeñt̃chaʼña yemoñenaya att̃och amach alla aʼpuerrataterrye oneñet̃. T̃arroʼmar yeñoteñ oneñet̃paʼ c̈hocma eʼnenan att̃och shecareʼteney. \v 12 T̃arroʼmar poʼñoc̈hpaʼ ama acheñeyeʼ yec̃llareno ñeñt̃ entpoʼ poʼchets. Yapaʼ añña yec̃llaren oneñet̃ec̈hno ñeñt̃ ama errot̃ ap̃apahuo eʼñe ya yotot̃ t̃arroʼmar ñeñt̃paʼ ama entpahuoyaye poʼchets errot̃ent̃eʼña. T̃arraña ñeñt̃paʼ atarr am̃chaʼnoc̈hetyena ñam̃a atarr ahuamencat̃ec̈hno. Att̃oña pomnaren penan allohuen acheñeneshaʼ arr patsro ñeñt̃ p̃atseʼtyeneʼ ñeñt̃ ama cohuenayaye ñeñt̃ checmetoʼtsena. Ñeñt̃ara oneñet̃ec̈hno ñeñt̃ ama cohuenayeʼ yec̈hcatetso ñeñt̃ erracmañen am̃chaʼnoc̈hetyetsa entot̃. \v 13 Ñeñt̃oʼmarña notenes, oʼch saguërrñañ allohuen allpon ora ñeñt̃ apueney Yompor allochñapaʼ ñeñt̃chaʼña allo yemoñena att̃och amach alla aʼpuerrataterrye oneñet̃ ñerraʼm esempo atarr nanac topateney. T̃arraña amaʼt allempo paʼnamenot̃ atarr topateney yañapaʼ amach errot̃enot̃ aʼpuerrataterrye. \v 14 T̃eʼpaʼ oʼch neñotatas ñeñt̃ apueney Yompor ñeñt̃ña yemoñenaya att̃och ama aʼpuerrataterrye oneñet̃ allempo topateney. Ñatoʼ oʼch netmaʼntacha ñeñt̃ atet̃ paʼnamen chorraʼyena solltarneshaʼ allempo quellarenet.\f + \fr 6:14 \ft Ñehua, ñeñt̃paʼ atet̃ chorraʼyeseʼt̃ ahuat̃ solltarneshaʼ allempo quellareteʼt̃.\f* Ñeñt̃ ñanom ñeñt̃paʼ Yompor poʼñoñ ñeñt̃ eʼñe poʼnoc̈h ama shequëñtsoyaye amaʼt mamesha. Ñeñt̃oʼmarña yapaʼ eʼñech yeñmañeshaʼ es yep̃aʼyen, amach yeshcareʼtannaʼtyesatsto. Ñatoʼ oʼch netmaʼntacha ñeñt̃paʼ ñeñt̃ña yechanar yepen ñeñt̃chaʼ ahuamencat̃ yepeʼ atet̃ ñerraʼm solltar apueñet chanarets alloch chanena ñeñt̃ quellaraten. Elloñapaʼ eʼñepaʼch cohuen es yep̃annaʼtyesnoma ñeñt̃ atet̃ eʼñe pocteʼ enten Yompor. Ñeñt̃paʼ añ tomaʼntena asrom atet̃ ñerraʼmrrat̃eʼ ñeñt̃ chorrena solltar ñeñt̃ aʼnateneʼ puesomap allempo quellarena. \v 15 T̃eʼñapaʼ oʼch seʼshpoʼcha eʼñe socsheñeshaʼ oʼch ahues allchaʼ seserrpareʼtyenaʼ att̃o Yomporpaʼ oʼ amoʼtsterrya att̃ochña eʼñe cohuen aʼqueshp̃aterrey. Ñeñt̃paʼ añ tomaʼntena atet̃ pena solltar oʼch nan poʼsapatpaʼ oʼch ahuoʼ allchaʼ quellarosa. \v 16 Elloña ñeñt̃ nanac sherbets ñeñt̃paʼ añ, c̈hocmuepaʼch eʼñe cohuen yeyemteña Yompor ñeñt̃ atet̃ oteney. Ñeñt̃paʼ añ tomaʼntena solltar pueʼscudo allo aʼnatena allochñapaʼ att̃och ama etaret̃teneto. Ñehua, att̃o huomenc topateney oneñet̃ ñatoʼ oʼch netmaʼntacha ñerraʼmrrat̃eʼ ñapaʼ c̈ho sanapecheney poʼchopap̃o ñeñt̃ huoretnets. T̃arraña ya eʼñe yeyemteñot̃ Yompor ñeñt̃paʼ ñeñt̃ña yeʼscudo yepen ñeñt̃chaʼ c̈hocma emayeneʼ oneñet̃ poʼchopap̃ ñeñt̃ huoretnets allo sanapecheney. \v 17 Ñam̃a yapaʼ yeñoteñ Yomporpaʼ t̃eʼpaʼ oʼ aʼqueshp̃aterrey, ñeñt̃ña yemoñenaya. Ñeñt̃paʼ añ tomaʼntena atet̃ pena solltar oʼch naʼnman asret poño att̃och ama ettoʼcheto. Ñam̃a oʼch yerrmoñ Yompor poʼñoñ yeyoc̈hro ñeñt̃ atet̃ eñotateney ña Puecamquëñot̃; ñeñt̃paʼ ñeñt̃ña yepanmet yepen alloña yec̃llareñña oneñet̃. \v 18 Ñam̃a sapaʼ c̈hocmuepaʼch semaʼyochena amaʼt errot̃enoʼtsensa. Añchaʼña seyenpueneʼ Parets Puecamquëñ. Allochñapaʼ att̃ochña c̈hocma semaʼyoc̈hrena maʼyochatsa. Oʼch senam̃ Yompor ora allpon ñeñt̃ sepalltena, ñam̃a c̈hocmuepaʼchña eʼñe semaʼyocham̃pesueña allohuen ñeñt̃ pueyochreshaʼ pen Parets. \v 19 Napaʼc̈hoʼña c̈hocmuepaʼchña semaʼyocham̃penna. Oʼch senamon Yompor nocop allochñapaʼ ñachña neʼñorateneʼ att̃och amach nem̃chaʼnañot̃a neserrpareʼteññañe poʼñoñ. Allochñapaʼ att̃ochña neñotatyesanet cohuen ñoñets ñeñt̃ alloch eʼñe yequeshp̃aʼhuerra allohueney; ñeñt̃paʼ ama eñotpahuoyaye, amaʼt ahuat̃ot̃eñ. \v 20 Napaʼ allsensaret̃en ñeñt̃en eñosyets eʼñe cohuen Yomporecop. Eʼñe neñosyeñot̃ Yomporecop ñeñt̃oʼmarña t̃eʼpaʼ yottam̃pennet. Ñeñt̃oʼmarña nemneñ oʼch semaʼyocham̃penna att̃och amach nem̃chaʼnañot̃a neserrpareʼteno ñeñt̃ eʼñe cohuen ñoñets alloch yequeshp̃aʼhuerra. Att̃ochña eʼñe nocsheñeshocmañen neserrpareʼten t̃arroʼmar ñeñt̃ eʼñe cohuen atet̃ poctetsa nocop. \s1 Arrpaʼ all soʼtnerranet eʼñe poʼcartot̃ \p \v 21-22 T̃eʼñapaʼ oʼch notas, oʼch nemñonas masheñ Tíquico ñeñt̃ atarr nemorrentena. Ñapaʼc̈hoʼña c̈hocma atarr cohuen t̃orrena Yepartsesharecop. Ñapaʼ ñeñt̃oʼmarña oʼ nemñe sesho allochñapaʼ ñach señotatuerreʼ ñeñt̃ atet̃ yepena ya arr. Att̃ochña atarr coshatuerres seyoc̈hro. \p \v 23 T̃eʼña masheñneshachaʼ ñam̃a noc̈haneshachaʼ, Yomporepaʼchña semorrentannaʼtataya eʼñe sameʼñeñot̃, ñeñt̃ara Parets epuet Puechemer Jesucristo ñeñt̃ Yepartseshar yepen. Ñetepaʼchña socshateneʼ seyoc̈hro. \v 24 Ñam̃a ñetepaʼchña eʼñe saʼnatenaya allohuenes ñeñt̃es eʼñe cohuen morrentenaya Yepartseshar Jesucristo. Ñeñt̃ att̃o semorrenteñapaʼ amach ahuañañat̃terro amaʼt eʼñe ahuat̃a. Ñeñt̃ach notas, ñeñt̃paʼ att̃etepaʼch Nompore. Allohua. \pmr \sig Pablo\sig*