\id 1PE - Amuesha (Yanesha’) NT [ame] -Peru 2008 (ETEN -2013) \h 1 PEDRO \toc1 Ñeñt̃ Ñanom San Pedro Poʼcarta \toc2 1 San Pedro \toc3 1Pe \mt2 AÑ ÑANOM SAN PEDRO POʼCARTA \mt1 1 SAN PEDRO \c 1 \s1 Att̃o Pedropaʼ quellcan carta allohuenacop ñeñt̃ ameʼñetsa ñeñt̃ att̃a aʼparratseʼtataret̃ \p \v 1-2 Masheñneshachaʼ ñam̃a noc̈haneshachaʼ ñeñt̃es aʼyetaten ñeñt̃ saʼmueroc̈htateneʼ. Oʼ eʼñe sesuanom seney oʼ att̃a aʼparratseʼtataset allemeña anetsoʼmar, all anetso Ponto ñam̃a Galacia, ñam̃a Capadocia, ñam̃a Asia ñam̃a Bitinia. Sapaʼ ñeñt̃es ahuat̃ot̃eñ naseʼt̃ Yompor Parets eʼñe ñocop. Ñapaʼ eʼñe eñotuaseʼt̃ sach aʼcohuentataret̃terrtsa Partsocop. Eʼñe ña Puecamquëñpaʼ ñeñt̃ña saʼcohuentaterreʼña sa att̃ot̃ña eʼñe sameʼñaʼhueraña Jesucristo. Att̃oña ña poʼrraspaʼ ñeñt̃ña oʼ eʼshohuerrnasña soʼchñar. Na Pedron sequellquëneʼña añ carta, napaʼ ñeñt̃en Jesucristo puellsensaren. Eʼñe nehuom̃chaʼteñot̃es sa napaʼ oʼch notas: Yomporepaʼchña atarr sebensareʼtam̃peneʼ, ñepaʼchña socshateneʼña eʼñe sa seyoc̈hro allohuenes. \s1 Eʼñe yeyemteñot̃ Yepartseshar Jesucristo c̈hocmach yecuameʼten ñeñt̃ oʼpatataret̃ey \p \v 3 T̃eʼñapaʼ ayeʼchoc̈htaterrapoʼch Yompor Parets ñeñt̃ Yepartseshar Jesucristo Pompor ñeñt̃ara ñeñt̃ Poʼyomporer pen, t̃arroʼmar oʼ yeʼñalleterra etserra eʼñe ña nanac puemuereñot̃ey. Allempot̃eñña ya eʼñe yeyemteñot̃ ña c̈hocmach yecuameʼteñ esempohuañen t̃arrempohua allempoch ama yaʼrromñat̃terro. Att̃o Jesucristopaʼ oʼ tanterra, ñeñt̃oʼmarña yapaʼc̈hoʼña yecuen yam̃a att̃och amach yaʼrromñat̃terro. \v 4 Ñam̃a yeyemteñot̃ c̈hocmach yecuameʼten ñeñt̃ oʼpatataret̃ey pueʼntañot̃ t̃arroʼmar allpaʼ allña aññoʼtaret̃tenaña alloch yequeshperra. Ñeñt̃ña queshpeñetspaʼ amach ahuañañat̃terro, ñam̃a ama asosyatño, ñam̃a ama am̃llashaʼtño. \v 5 Sapaʼ eʼñe seyemteñot̃ña Cristo Yomporpaʼ aʼnatasepaʼch. Aʼnatasepaʼch c̈hocma att̃och sequeshp̃aʼhuerra esempohuañenchaʼ mellapoterra. Yompor poʼhuamencopaʼ aʼnatasepaʼch att̃och eʼñe señotuerr poʼñoc̈h eʼñech sequeshp̃aʼhuerra. \p \v 6 Ñeñt̃oʼmarña t̃eʼpaʼ allohuenespaʼ socshepaʼch. Amaʼt t̃eʼña att̃o semueroc̈htenapaʼ ñeñt̃paʼ eʼñe mamecpa. T̃arraña amaʼt oʼ c̈haponasa paʼnamen topateñetspaʼ sapaʼ c̈hocmuepaʼch socsheña Yompor. \v 7 T̃arroʼmar nanac huomenc echarr yenteñ, t̃arraña Yomporpaʼ eñochchaʼ ñerraʼm poʼñoc̈h eʼñe yameʼñeña ña. Atet̃ ñerraʼm oropaʼ c̈hoch ñanom atserrtachet huomenc allochñapaʼ oʼch eñochet ñerraʼm poʼñoc̈h ñeñt̃paʼ eʼñet̃eʼ orocheʼ. Ñeñt̃ña amaʼt oropaʼ huañerrchaʼ esempo. Amaʼt nanac tsaʼteʼ oro, t̃arraña att̃o poʼñoc̈h yameʼñera Cristo, ñeñt̃ña ello nanac sherbets. Ñerraʼm poʼñoc̈h yeyemteña ña, yeyemteñot̃ ñapaʼ eʼñech cohuen entyesuerrey esempohuañenchaʼ huerra Jesucristo, att̃ochña eʼñe cohuen yecohuentapretera, eʼñech cohuen yaʼm̃chaʼtaret̃tapretera. \p \v 8 Jesucristo amaʼt ama sentarñepaʼ t̃eʼñapaʼ oʼ semorrentera. Amaʼt ama senteñe, t̃eʼñapaʼ oʼ sameʼñera. Eʼñe socsheñeshocmañen oʼ sameʼñeña, ñeñt̃ña cosheñetspaʼ atarr nanac cohuen. T̃eʼpaʼ amach erra yenerreʼt̃e yeñoñ ñeñt̃chaʼ atet̃ yoterrerr. \v 9 Att̃oña eʼñe sameʼñeñot̃ Cristopaʼ saʼqueshp̃aterrchaʼ secamquëñ. \p \v 10 Ñam̃a oʼch notas, amaʼt ñeñt̃ aʼm̃taʼyesayeʼt̃ Yompor poʼñoñ ahuat̃paʼ ñeñt̃ña serrpareʼteteʼt̃ allempo att̃och orrtaterrnay Yompor puemuereña alloch yequeshperra. T̃arraña ñetpaʼ ama eʼñeyeʼ eñocheteʼt̃e errot̃ent̃eʼña alloch yequeshperra. (Ñehua, allempopaʼ amacaʼye orrtenaʼ Cristo arr patsro.) Ñetpaʼ ñeñt̃ña nanac eʼnetañeʼt̃ errot̃ent̃eʼña ñeñt̃chaʼ aʼqueshp̃atañterrtsa. Ñetpaʼ nanac aʼp̃t̃oʼtannaʼtyeseteʼt̃ eʼñe ñagattseta errot̃ent̃eʼcaʼyeña Yompor puemuereña alloch eʼñe yequeshperra. \v 11 Ñetpaʼc̈hoʼña eʼñe Cristo Puecamquëñña chorrahueteʼt̃ ñeñt̃ña eñotatahueteʼt̃ oʼch orrterra ñeñt̃chaʼ Cristoterrets arr patsro. Oʼch c̈hap añe patsropaʼ elloñapaʼ oʼch mueroc̈htateret. Oʼch amueroc̈htataret̃etuapaʼ allempochña orrtaterranña poʼcohuenña. T̃arraña ñeñt̃ aʼm̃taʼyesayeʼt̃ Yompor poʼñoñ ahuat̃paʼ oʼ alla aʼp̃t̃oʼtannaʼtyerreterr, taʼ, ¿eseshaʼchña Cristoterrets? ¿Esempoʼtchaʼña orrterra? \v 12 Yomporpaʼ eñotatanet ñeñt̃paʼ amachcaʼye ahuenayeʼ etsoterro; shonteʼch char allempochña etsoterra atet̃ eñotatanet Yompor. T̃arraña ñeñt̃ eñotat allempopaʼ ñeñt̃paʼ ama ñocpuetayaye, ñeñt̃paʼ eʼñechcaʼye yocop. T̃eʼñapaʼ ñeñt̃ seserrpareʼtateneʼ cohuen ñoñetspaʼ ñeñt̃ña señotateneʼ eʼñe cohuen ñeñt̃ atet̃ penaña ñeñt̃ cot̃ap̃ñats. Parets Puecamquëñ ñeñt̃ huetsa pueʼntañot̃paʼ ñeñt̃ña eñotatenahuetña att̃och serrpareʼtataset sam̃a añ cohuen ñoñets. Amaʼt Parets poʼm̃llañot̃eñnaneshar ñetpaʼc̈hoʼña atarr mueneñet oʼch eñochet ñamet ñeñt̃ oʼ señotuerr sa. \s1 Añ poctetsa oʼch yepomhuerra yañeña eʼñe Partsocop \p \v 13 Ñeñt̃oʼmarña t̃eʼpaʼ añ poctetsa eʼñe sa señoteñot̃paʼ eʼñech cohuen soct̃apeʼchen. Eʼñe seyemteñot̃ ñapaʼ oʼch secuameʼteñ esempoch huerra Jesucristo. Allempopaʼ ellochña nanac mueraʼhuerrsa, cohuenchaʼ es aphuerres. \v 14 Seʼm̃ñoch Yompor atet̃ ñerraʼm ñapaʼ puechemereshaʼch perres. Amach aña seyc̈hatsto atet̃ ñerraʼm ahuat̃ allempo ama señoteñaʼ; allempopaʼ aña semnatseʼtyeseʼt̃ ñeñt̃ ama cohuenayaye. \v 15 Yomporpaʼ eʼñe cohuenareʼ es pen. Ñeñt̃ara Yompor ñeñt̃ oʼ huaʼñerrey ya. Ñeñt̃oʼmarña yapaʼc̈hoʼña añ poctetsa oʼch yepomhuerra yañeña eʼñe Partsocop. Atet̃ ñapaʼ eʼñe cohuenareʼ es pen, yapaʼc̈hoʼña añ poctetsa oʼch yep̃aʼ atet̃ es pen ña. \v 16 Atet̃ oteney Yompor poʼñoñot̃ ñeñt̃ anuaret̃ ahuat̃ot̃eñ: “Atet̃ nepena na ñeñt̃en Seyomporer sepen, napaʼ eʼñe cohuenareʼ es nepen, sapaʼc̈hoʼña eʼñepaʼch cohuenareʼ es sepen.” \p \v 17 Yomporpaʼ ñach tsaʼtaterrahuet allpon yec̈hcatyeseteʼt̃ ñeñt̃ ama cohuenayaye. Amach eñalleña amaʼt puesheñarra ñeñt̃chaʼ queshp̃atsa ñeñt̃ ama ameʼñenaye ña. Att̃o yemaʼyocheña Yompor ñeñt̃chaʼ yetsaʼtatuerraya, ñeñt̃epñapaʼ t̃eʼpaʼ am̃chaʼnaʼtpoʼch Yompor. Amaʼt allponmat socrrena arr patsro ñeñt̃paʼ ama saʼnetsreyaye, eʼñech t̃ayot̃eñ sem̃chaʼnaʼtnom̃ Yompor. \v 18 Sapaʼ satañneshañpaʼ apaʼnmaset poct̃ap̃ña atet̃ peteʼt̃ eʼñe orrena. T̃eʼña sapaʼ oʼ señoter Yomporpaʼ oʼ tsaʼtuonasa att̃och sesuanom ñeñt̃ ahuat̃naneshañ poct̃ap̃ña. Ama quellayoyeʼ tsaʼtonaye. Quellepaʼ ahuañaña. \v 19 Añña att̃o tsaʼtonaya poʼrraso Puechemer ñeñt̃ Cristo. Poʼrraspaʼ ñeñt̃ nanac sherbets atet̃ ñerraʼm carrnerot̃ollpaʼ eʼñech coc̈hneshaʼ muetseteʼt̃ Partsocop. \v 20 Amaʼt ama ayec̈hcataret̃tenaʼ pats Yomporpaʼ oʼ nan Puechemer Cristo, ñach tsaʼterraya yoʼchñar. Amaʼt ahuat̃ot̃eñ anaret̃paʼ t̃arraña ama orrteno añe patsro. T̃eʼñapaʼ orrta eʼñe yocop, t̃arroʼmar t̃eʼpaʼ oʼ mellapoterrmocha. \v 21 Yameʼñeñot̃ Cristopaʼ oʼch yeyemterrñaña Pompor, t̃arroʼmar Pomporpaʼ oʼ tantater amaʼt oʼ rromhua. Tantater att̃och alla eʼñe cohuentater Pompor. Ñeñt̃oʼmarña t̃eʼ yapaʼ oʼch yeyemcha Yompor, oʼch yecuameʼtoñ ñeñt̃ oʼpatatenya. \p \v 22 Sapaʼ oʼ sameʼñaʼhua ñoñets ñeñt̃ eʼñe poʼñoc̈h Yompor poʼñoñ. Ñeñt̃oʼmarña eʼñe Parets poʼhuamencot̃ oʼ sesuanom allpon sosyaʼtsañ ñeñt̃ seyoc̈hroʼtsen, att̃ot̃chaʼ eʼñe semorrentannaʼta. T̃eʼñapaʼ semorrentannaʼtepaʼch poctacma eʼñe seyoc̈hrocmañen. \v 23 Eʼñe yameʼñeñot̃ Yompor poʼñoñpaʼ oʼ yeʼñalleterra etserra. Añ eñalleteñetspaʼ ama att̃eyaye ñerraʼm allempo eñalletatey yachor. Att̃o eñalletatey yachorpaʼ ñeñt̃paʼ huañerrchaʼ. Añña Yompor poʼñoñot̃ña yeʼñalleterra ñeñt̃paʼ amach ahuañañat̃terro amaʼt errponaña. \v 24 T̃arroʼmar Yompor poʼñoñ ñeñt̃ anuaret̃ ahuat̃ot̃eñ ñeñt̃paʼ atet̃ oten: \q1 Allohueney ñeñt̃ey arromñat̃eypaʼ att̃ey ñerraʼmrrat̃eʼ taʼteʼ t̃arroʼmar mamecpa yocrrena. Ñam̃a ñeñt̃ cohuen yentyen ya, ñeñt̃paʼ atet̃ ñerraʼmrrat̃eʼ taʼteʼ puerorer. Taʼteʼpaʼ oʼch hueyaʼhua pueʼchorpaʼ puerorerpaʼc̈hoʼña amaʼt coc̈hneshaʼtenañpaʼ shorc̈haʼtuach. \q1 \v 25 T̃arraña ñeñt̃ Parets poʼñoñpaʼ amach ahuañañat̃to amaʼt errponaña. \m Ñeñt̃ poʼñoñpaʼ ñeñt̃ara cohuen ñoñets ñeñt̃ oʼ serrpareʼtatuaset sam̃a. \c 2 \p \v 1 T̃eʼñapaʼ añ poctetsa oʼch sesuanem allohuen ñeñt̃ ama cohuenayeʼ enteno Yompor. Att̃o ora allpon allo seshcannaʼtenapaʼ oʼch sequec̈hpaʼhuer. Añ shecanneñets ñeñt̃ att̃och entenes poʼpsheñeñ eʼñe cohuenpaʼ ñeñt̃paʼc̈hoʼña añ palltetsa t̃eʼpaʼ oʼch sequec̈hpaʼhuer. Att̃o seyeʼchapretannenapaʼc̈hoʼña oʼch sepuesuer ñam̃a. Sasareʼteñetspaʼc̈hoʼña oʼch sepuesuer. \v 2 Añña poctetsa atarrchaʼ yeyeʼcheññaña Yompor poʼñoñ eʼñe atet̃ pena emat̃ollpaʼ nanacchaʼ yeʼchenana puemomos. Yapaʼc̈hoʼña añ poctetsa oʼch yeyeʼchya atet̃ ñerraʼm ñeñt̃ yemomos yepen, t̃arraña ñeñt̃paʼ ñeñt̃ara Yompor poʼñoñ. Yompor poʼñoñpaʼ nanac cohuenareʼ alloch yocshaten yecamquëñ, att̃ot̃chaʼ alloʼna yesen eñotnomueʼ ñeñt̃ poctetsa Yomporecop att̃ochña aʼqueshp̃ataret̃eychaʼ. \v 3 Sapaʼ oʼ señotuerrñañ Yompor puemuereña att̃o ñapaʼ nanac muerensa. Ñeñt̃oʼmarña añ poctetsa sapaʼc̈hoʼña oʼch seyeʼchoña poʼñoñ. \s1 Att̃o Cristo atmaʼntataret̃ta mapueʼ; elloña ñapaʼ nanac sherben alloch eʼñe yocrrerra \p \v 4 Añ poctetsa oʼch separrocmaterr epas Cristo. Cristo ñeñt̃ atarr sherbets atet̃ ñerraʼm mapueʼ ñeñt̃ nenet quellpach paʼrrp̃ot̃ allo orratenet pocoll ñeñt̃ nanac echarr. T̃arraña mapueʼ amaʼt nanac sherbenpaʼ ama añeyaye alloch eʼñe yocrra. Añña Cristo att̃o sherbenpaʼ allochña eʼñe yocrra poʼñoc̈h. Amaʼt acheñeneshaʼ amaʼt ama cohuenayeʼ enteñeto Cristopaʼ Pomporñapaʼ eʼñe pocteʼ enteñ. Pomporñapaʼ ña acreʼ ñeñt̃chaʼ nanac sherb̃ats ñocop atet̃ ñerraʼm mapueʼ ñeñt̃ nanac cohuen allochña t̃omatenan paʼpaquëll. \v 5 Yomporpaʼ paʼpaquëll penan allohuen ñeñt̃ ameʼñenaya ña. Yapaʼc̈hoʼña att̃ey ñerraʼmrrat̃eʼ mapueʼ alloch t̃omatenan paʼpaquëll. T̃arraña yapaʼ att̃eyeñ ñerraʼmrrat̃eʼ mapueʼpaʼ t̃arraña yapaʼ ñeñt̃ey oʼrrerrñat̃ot̃ yocrrena. Yapaʼc̈hoʼña añ poctetsa oʼch yatt̃ecmatuerr ñerraʼmrrat̃eʼ Parets paʼpaquëll. Allñapaʼ yesherberrchaʼ Partsocop. Yecamquëñot̃paʼ oʼch yepomhuerra eʼñe yeyoc̈hrohuen yepomuerra att̃och Paretspaʼ coshena. Yameʼñeñot̃ Jesucristopaʼ oʼch yesherber errot̃enchaʼ muenateney Parets. \v 6 T̃arroʼmar atet̃ oteney Yompor poʼñoñ ñeñt̃ anuaret̃ ahuat̃ot̃eñ, ñeñt̃paʼ atet̃ oten Yompor Cristocop: \q1 All anetso Sión ñeñt̃ara Jerusaléñ oʼch nemñanet puesheñarr ñeñt̃ atarr sherbets ñeñt̃ atet̃ ñerraʼmrrat̃eʼ mapueʼ ñeñt̃ acraret̃ ñeñt̃ nanac sherbets ñeñt̃ alloch nat̃omat nepaquëll. Ñerraʼm eseshaʼ ameʼñenaya ñapaʼ, ñetñapaʼ amach alla eʼnerreteʼt̃e poʼpsheñeñ. \m \v 7 Ñeñt̃ey ameʼñenaya Cristopaʼ eʼñech yocsheñeshocmañen yenteñ. Añña ñeñt̃ at̃pareʼteneʼ Yomporpaʼ atet̃chaʼ enteñet Cristo ñerraʼmrrat̃eʼ mapueʼ ñeñt̃ huaporeʼten ñeñt̃ t̃omateneʼ pocoll t̃arroʼmar atet̃ enteñet Cristo ñerraʼmrrat̃eʼ ama es sherbeno. Ñeñt̃oʼmarña Yompor poʼñoñpaʼ atet̃ oterryerr: \q1 Añ mapueʼ ñeñt̃ huaporeʼten ñeñt̃ t̃omateneʼ pocoll, ñeñt̃ña mapueʼpaʼ Yompor neneʼ ñeñt̃chaʼ nanac sherbets. \m \v 8 Añ ñeñt̃ara Cristo ñeñt̃ tomaʼntenaya \q1 Mapueʼ allchaʼ epot̃oʼtena ñeñt̃ ama ameʼñetso ñeñt̃chaʼña aʼshoratahuet chenquëñtso. \m Añ epot̃oʼteñetspaʼ añ tomaʼntena att̃o at̃pareʼteññañet Cristo poʼñoñ. Ñeñt̃oʼmarña atet̃ anaret̃, ñerraʼm ama yameʼñyopaʼ eʼñech yechencaʼhuerra. \s1 Ya ahuat̃paʼ ama esonaʼtareyayye, t̃eʼñapaʼ eʼñe Yomporenaʼtarey \p \v 9 T̃arraña sapaʼ ama añeyayso ñeñt̃ at̃pareʼteneʼ Yompor. Ya ñeñt̃ey ameʼñenaya Yomporpaʼ atet̃chaʼ enteney ñeñt̃ey acraret̃terrtsa ñocop. Ñam̃a atet̃chaʼ enteney ñeñt̃eychaʼ sherberrets Partsocop, ñeñt̃eychaʼ anaret̃terrtsa ñocop. Ñam̃a eʼñech Yomporenaʼtar enteney. Ñeñt̃oʼmarña yocoppaʼ añ poctetsa oʼch yorrtatyesoñ poʼcohuenña. Oʼch yeserrpareʼtoñ att̃o ñapaʼ cheterrey checmetot̃ all sosyaʼtsañot̃, t̃eʼñapaʼ oʼ c̈hapaterrey eʼñe ña poʼpuetarenño all eʼñe cohuentena ña. \v 10 Ahuat̃paʼ ama esonaʼtareyayye, t̃eʼñapaʼ Yomporenaʼtarey. Ahuat̃paʼ ama amueraret̃eyayye, t̃eʼñapaʼ oʼ yaʼmueraret̃terra. \s1 Att̃o cohuen es yepen att̃ochña eʼñe cohuen yesherbeñ Yompor \p \v 11 Oʼch masheñneshachaʼ ñam̃a noc̈haneshachaʼ eʼñe nemorrenteñot̃es oʼch notas: Sapaʼ amaʼt seyc̈henañ añe patsro ñeñt̃paʼ ama saʼnetsreyaye. Ñeñt̃oʼmarña añ poctetsa oʼch saʼypoʼñam̃pes ñeñt̃ muenatseʼtyeseʼt̃ sechets. Atet̃ muenaʼyen yechetspaʼ ñeñt̃ña quellareneʼña yecamquëñ; mueneñ oʼch aʼchencatonay yecamquëñ. \v 12 Ñeñt̃ ama ameʼñetso seshopaʼ añ poctetsa oʼch sorrtatoñ ñeñt̃ atet̃ eʼñe cohuenareʼ es sepen. Allochñapaʼ ñerraʼm mueneñet oʼch sasareʼtasetpaʼ oʼch entonaset att̃o eʼñe cohuenareʼ es sepen. Allochñapaʼ ñerraʼm esempo huerra Cristo att̃och eñotatuerrey ñeñt̃ atet̃ yep̃aʼyena, ñetpaʼc̈hoʼña oʼch ayeʼchoc̈htaterrñañet Yompor. \p \v 13 T̃eʼpaʼ oʼch notas ñam̃a, allpon ñoñets ñeñt̃ nen am̃chaʼtaret̃ añ patsropaʼ añ poctetsa oʼch sameʼñya. Yameʼñeñot̃ Yepartseshar Cristopaʼ añ palltetsa oʼch yameʼñera ñam̃a allpon ñoñets ñeñt̃ nen ñeñt̃ atarr am̃chaʼtaret̃tetsa arr patsro. \v 14 Oʼch sameʼñera ñam̃a ñeñt̃ mueñen am̃chaʼtaret̃ ñeñt̃chaʼ aʼcoñchatueneʼ allohuen ñeñt̃ ama pocteyeʼ es petso, ñam̃a ñeñt̃ara ñeñt̃chaʼ coshapreteneʼ allohuen ñeñt̃ eʼñe cohuenareʼ es pets. \v 15 T̃arroʼmar atet̃ muenen Yompor: c̈hocmach yorrtaten atet̃ eʼñe cohuenareʼ es yepen. Ñatoʼ yorrtateñot̃ eʼñe cohuenpaʼ oʼch quec̈hpaʼhuerret att̃o eñosatseʼtyenet. Ñetpaʼ pat̃pareʼteñot̃et eñosatseʼtyenet t̃arroʼmar ama es eñoteneto. Ñatoʼ yorrtateñot̃ eʼñe cohuenpaʼ oʼch yequec̈hpatuerranet att̃o eñosatseʼtyenet. \p \v 16 Ñam̃a eʼñech sameʼña cohuen amaʼt Yompor poʼñoñpaʼ ama am̃chaʼnoc̈henayeʼ senteñe socop. T̃arraña amaʼt ama am̃chaʼnoc̈hteno poʼñoñ yocoppaʼ amach alloʼna yep̃aʼyesneno ñeñt̃ sosyaʼtsañ. Añchaʼña oʼch atet̃ yameʼña att̃o pueyochreshaʼ perrey Yompor. \v 17 Añ poctetsa oʼch sem̃chaʼnaʼch allohuen acheñ. Oʼch semorrentannaʼta allohuenes ñeñt̃es ameʼñetsa. Oʼch sem̃chaʼnaʼch ñam̃a Yompor. Oʼch sameʼñya ñam̃a ñeñt̃ am̃chaʼtaret̃etyetsa arr patsro. \s1 Añ poctetsa oʼch yemueroc̈htaprecha Cristo \p \v 18 Ñeñt̃es ataruasataret̃espaʼ oʼch notas, añ poctetsa socop. Sem̃chaʼnaʼteñot̃paʼ oʼch sameʼñya samoʼmteʼ. Oʼch sameʼñya samoʼmteʼ ñeñt̃ amueraña. Allot̃paʼ oʼch sameʼñya ñam̃a ñeñt̃ amaʼt ama amueraño. \v 19 Ñam̃a amaʼt poʼpsheñeñ mueroc̈htateney amaʼt allempo yepen ñeñt̃ cohuenareʼ, eʼñe yameʼñeñot̃ Yomporpaʼ amach yaʼtsrreʼmatsto, ñeñt̃paʼ eʼñech pocteʼ enteney Yompor. \v 20 Ñerraʼm esempo c̈ho errot̃ yepeñ poʼpsheñeñ ñerraʼm coñchatuerrey, ñeñt̃paʼ eʼñe pocteʼ yecoñchepaʼ. Amaʼt ama yaʼtsrreʼmo allempo, t̃arraña amach cohuenayeʼ entenye Yompor, t̃arroʼmar ñeñt̃paʼ c̈hocma mueneñ oʼch yecoñcha. T̃arraña ñerraʼm esempo amaʼt yepena ñeñt̃ cohuenareʼ ñatoʼ amaʼt mueroc̈htatey poʼpsheñeñpaʼ ñerraʼm ama yaʼtsrreʼmopaʼ ñeñt̃paʼ eʼñech pocteʼ enteney Yompor. \v 21 Ñeñt̃oʼmarña t̃eʼpaʼ yapaʼ oʼ huaʼñerrey Cristo att̃och yameʼñaʼhuera, allochñapaʼ oʼch yemueroc̈htaprecha ña. Ñapaʼ ña ñanom mueroc̈htatsa, t̃arraña ñapaʼ yec̈hatnerrey att̃och añ poctetsa oʼch yemueroc̈htapretera ña. \v 22 Ñapaʼ ama eñalletataneʼt̃e poʼchñar amaʼt coñeʼt̃a. Ñapaʼ ama shecaʼyeʼt̃e amaʼt parrocha. \v 23 Amaʼt allempo sasareʼcheteʼt̃paʼ ñapaʼ amach ellopaʼ sasareʼterraneto ñam̃a. Amaʼt allempo mueroc̈htacheteʼt̃paʼ ñapaʼ amach ellopaʼ oterraneto oʼch nemueroc̈htaterres sam̃a. Ñapaʼ aña eʼñe yemteʼt̃ Pompor, t̃arroʼmar eñoteñ Pomporpaʼ aʼpoctaterrñañchaʼ, t̃arroʼmar ñapaʼ ña eʼñe pocteʼ es pets. \v 24 Ñapaʼ ña yecoñchaterr eʼñe ya yoʼchñarot̃ allempo mueroc̈hta all corsocho. Allempoña rroma eʼñe ña poʼchtsot̃paʼ oʼ ahuanmam̃perrey yoʼchñar. T̃eʼña yocoppaʼ añ poctetsa oʼch yaʼypoʼñaʼhuerr ora yoʼchñar oʼch yeperra ñeñt̃ atet̃ poctetsa Partsocop. Att̃o atarr atserrp̃aret̃terra ahuat̃ ñeñt̃paʼ att̃oña aʼqueshp̃aterrey ya. \v 25 “Yapaʼ ahuat̃paʼ att̃ey ñerraʼm carrnero. Yaʼypoʼñaʼuyeʼt̃ ñeñt̃ yecuam̃peneʼ.” T̃arraña t̃eʼñapaʼ oʼ alla yoct̃apeʼcherr eʼñe cohuen, oʼ yeyemtera Cristo ñeñt̃ yecuam̃peneʼ, ñeñt̃ara ñeñt̃ Pamoʼmteʼ pen ñam̃a yecamquëñ. \c 3 \s1 Arrpaʼ all cot̃apeʼchatan ñeñt̃ arrollaret̃neshaʼ \p \v 1-2 Sapaʼc̈hoʼña ñeñt̃es arrollaret̃es, oʼch notas sam̃a. Añ poctetsa oʼch sameʼñya serrollar. C̈hocmach sameʼñya serrollar amaʼt serrollarpaʼ ama ameʼñenano Yompor poʼñoñ. Eʼñe cohuen sameʼñeñot̃ serrollarpaʼ amaʼt ama errot̃en es soteno ñatoʼ att̃ot̃paʼ oʼt̃eʼ ameʼñerra ñam̃a serrollar. Ñetpaʼc̈hoʼña oʼch cot̃apeʼcherret eʼñe cohuen ñerraʼm esempo entennaset atet̃ eʼñe cohuenareʼ es sepen. \v 3 Amach eʼñe pat̃rra semaʼyoc̈hratsto att̃o secohuentena eʼñe orrena. Atet̃ ñerraʼm sechpaʼ amach ñeñt̃a sellquëno oʼch saññoʼteñ eʼñe cohuen att̃och enteney yamoʼtseshaʼ eʼñe cohuen, t̃arraña ñeñt̃paʼ eʼñe orrena. Ñam̃a amach eʼñe pat̃rra semaʼyoc̈hratsto att̃och sech alloch secohuenta atet̃ ñerraʼm oro, t̃arraña ñeñt̃paʼc̈hoʼña eʼñe orrena. Amach semaʼyoc̈hratsto ñam̃a att̃och sechorraʼyesa eʼñe coc̈hneshaʼ. Añ aññoʼteñets ñeñt̃ yentapretannena eʼñe yechtsopaʼ ñeñt̃paʼ eʼñe orrena orrtateney eʼñe cohuen. \v 4 Añchaʼña yemaʼyoc̈hra oʼch yecohuentena yeyoc̈hro att̃och Yomporpaʼ entapretey eʼñe cohuen. Añ cohuenteñets yeyoc̈hro ñeñt̃paʼ ama entpahuoyaye t̃arraña ñeñt̃paʼ amach ahuañañat̃terro. Atet̃ ñerraʼm muereñets ñeñt̃paʼ eʼñech cohuen entapreteney Yompor. Ñerraʼm ama atsrreʼmñat̃eyayye ñeñt̃paʼc̈hoʼña eʼñech cohuen entapreteney Yompor. Ñerraʼm eʼñe cohuen yoct̃apeʼchen, Yomporpaʼ entapreteney yoct̃ap̃ña atet̃ ñerraʼm ñeñt̃ nanac sherbets, ñam̃a ñeñt̃ nanac coc̈hneshaʼ. \v 5 Atet̃ p̃aʼyeseʼt̃ ahuat̃ coyaneshac̈hno ñeñt̃ eʼñe cohuenareʼ es p̃aʼyestseʼt̃ Partsocop. Ñetpaʼ eʼñe pueyemteñot̃et Yomporpaʼ eʼñe cohuen ameʼñyeteʼt̃ puerrollaret. Ñetña pueyoc̈hretpaʼ eʼñe aʼcohuencheteʼt̃ Yomporecop. \v 6 Atet̃ peʼt̃ ñam̃a ahuat̃ Sara. Ñapaʼ eʼñe cohuen ameʼñaneʼt̃ puerrollar Abraham. Ñapaʼ eʼñe atet̃ entaneʼt̃ puerrollar ñerraʼmrrat̃eʼ ñeñt̃ pamoʼmteʼ pen, nanac ameʼñyeʼt̃. Sapaʼc̈hoʼña t̃eʼpaʼ sachorchaʼ seper Sara ñerraʼm ama sem̃chañot̃a es pocteʼ sep̃aʼyeno sam̃a. \s1 Att̃ecma cot̃apeʼchatan ñam̃a ñeñt̃ at̃aporet̃neshaʼ \p \v 7 Att̃ecmach notas sam̃a ñeñt̃es at̃aporet̃es. Oʼch semuerya set̃apor eʼñe cohuen. Sapaʼ oʼch senteñ sam̃a set̃apor eʼñe cohuen, t̃arroʼmar coyaneshaʼ ama tama ahuamencat̃e. Añchaʼña oʼch sagaphuer parro ñeñt̃chaʼ apas Yompor. Eʼñe puemuereñot̃es sapaʼ apaschaʼ allochña sapaʼ corretsasach socsheñeshocmañen eʼñe t̃ayot̃eñ errponañohuen. Oʼch seyc̈ha eʼñe cohuen epas set̃apor, att̃ot̃chaʼ Yomporpaʼ eʼm̃ñotas ñerraʼm esempo semaʼyochya. \p \v 8 T̃eʼñapaʼ oʼch notas allohuenes. Añ poctetsa oʼch soct̃apeʼcherr eʼñe pat̃rra ñeñt̃ amuerañtetsa. Ñam̃a oʼch sellcapretannaʼta ñerraʼm esempo es sellcatyeneʼ. Ñam̃a eʼñech cohuen yemorrentannaʼta allohueney ñeñt̃ey ameʼñetsa, ñam̃a eʼñech cohuen yemuerannaʼta. Oʼch es yentaprech poʼpsheñeñ eʼñe cohuen, amachña yañeña eʼñe cohuen entatstatso. \v 9 Ñerraʼm poʼpsheñeñ errot̃ p̃aspaʼ sapaʼ amach setsaʼtatatsche eso. Ñerraʼm poʼpsheñeñ sasareʼtaspaʼ sapaʼ amach sesasareʼtatsterraneto. Añchaʼña oʼch senamoñ Yompor aʼnachepaʼ, t̃arroʼmar atet̃ muenen Yompor atet̃chaʼ yep̃a. Allochñapaʼ ñerraʼm atet̃ yep̃apaʼ ñapaʼ oʼch aʼnatenya yam̃a. \v 10 T̃arroʼmar atet̃ oteney Yompor poʼñoñ: \q1 Ñerraʼm yemneñ oʼch yeyc̈ha eʼñe cohuen, ñam̃a ñerraʼm yemneñ oʼch yocsherrapaʼ ñeñt̃paʼ añ poctetsa, amach yesasareʼtatsto, ñam̃a añ poctetsa, amach yeshcareʼtatsto. \q1 \v 11 Ñerraʼm yemneñ eʼñe cohuen yocsherra, añ poctetsa oʼch yesuanem ñeñt̃ ama cohuenayeʼ enteno Yompor. Ñeñt̃ eʼñe atet̃ muenen Yomporpaʼ ñeñt̃chaʼña atet̃ yep̃a. Ñam̃a añ poctetsa, oʼch yeʼnerr att̃och yentannena eʼñe cohuen epay yamoʼtseshaʼ. T̃eʼñapaʼ alloʼnepaʼch yesen entannaʼttsa eʼñe cohuen. \q1 \v 12 Yomporñapaʼ eʼñech cohuam̃peney ñeñt̃ey eʼñe pocteʼ es pets. Ñapaʼ eʼm̃ñoteney allempo es yenamueñ eʼñe ñesho. Añña ñeñt̃ petsa ñeñt̃ ama pocteyayepaʼ Yomporñapaʼ amach cohuenayeʼ enteñe amaʼt mamesha. \s1 Ñerraʼm esempo eʼñe att̃ot̃a mueroc̈htatenyet yapaʼ atarrchaʼ cosheñtsoʼtseney \p \v 13 Ñerraʼm sapaʼ c̈hocma semaʼyoc̈hrena ñeñt̃ cohuentetsa Yomporecop, allempoñapaʼ amach eseshaʼ errot̃enot̃ semueroc̈htataye. \v 14 T̃arraña ñatoʼ errot̃enopaʼ oʼch mueroc̈htataset amaʼt añ semaʼyoc̈hrena ñeñt̃ cohuentetsa Yomporecop. T̃arraña ñerraʼm eʼñe att̃ot̃a mueroc̈htatasetpaʼ sañapaʼ atarrchaʼ cosheñtsoʼtsenes. Amach sem̃chaʼtatstaneto ñam̃a amach sellcatsto. \v 15 Añchaʼña oʼch seyemcha Cristo eʼñe seyoc̈hrohuen. Oʼch senteñ Cristo atarr cohuen Parets ñeñt̃ Yepartseshar yepen. Ñerraʼm esempo eseshaʼpaʼ oʼch aʼp̃t̃oʼtas ¿esoʼmart̃eʼña atarr sameʼñeñaña Cristo? sapaʼ c̈hocmuepaʼchña eʼñe cohuen señoteñña atet̃chaʼ sanap eʼñe cohuen. Eʼñe semuereñot̃ eʼñech acop̃a sanapanet eʼñe cohuen eʼñe sem̃chaʼnaʼteñot̃anet. \v 16 C̈hocmach eʼñe señmañeshaʼ seyoc̈hro eʼñech cohuenareʼ es sepen. Allochñapaʼ ñerraʼm amaʼt esempo sasareʼtenyetpaʼ ñeñt̃ña att̃o eʼñe pocteʼ es yep̃aʼyen Cristocoppaʼ ñeñt̃paʼ ñeñt̃chaʼña pencatahuet. \v 17 Añ pocteʼ amaʼt yemueroc̈hta att̃o amaʼt eʼñe cohuenareʼ es yepen. Ñerraʼm atet̃ muenen Yomporpaʼ pocteʼ oʼch yemueroc̈hta. Añña ñerraʼm eʼñe yoʼchñarot̃paʼ oʼch yemueroc̈hta, ñeñt̃paʼ orrenach yemueroc̈hta. \p \v 18 Amaʼt Cristopaʼc̈hoʼña ahuat̃paʼ atarr mueroc̈htacheteʼt̃. Ñapaʼ ña rromats eʼñe parrocha allohuenacpay att̃ot̃ña tsaʼtuerrnaya yoʼchñar. Cristo amaʼt ña ñeñt̃ eʼñe pocteʼ es petspaʼ att̃oña rroma yocop ñeñt̃ey ama pocteyeʼ es petso. T̃arroʼmar rroma yocop att̃ot̃chaʼ yeparrocmaterr epay Yompor. Ña amaʼt rroma poʼchtsot̃paʼ puecamquëññapaʼ ama rromo. \v 19 Eʼñe puecamquëñot̃paʼ arr ahuoʼ alloʼtsaʼyen ahuat̃naneshañ puecamquëñneshaʼ ñeñt̃ alla ayottam̃p̃saret̃, ñeñt̃ ama c̈haʼnetso. Ñaña puecamquëñ allñapaʼ serrpareʼtatosanet. \v 20 Ñehua, añ puecamquëñ ñeñt̃ ahuat̃naneshañ ñeñt̃ nanac at̃pareʼtayeʼt̃ Yompor poʼñoñ allempo correʼt̃ Noé. Allempopaʼ Yompor nanac cohuameʼtanetañeʼt̃ oʼch ameʼñyet. Allempot̃eñ Noépaʼ yec̈hcataneʼt̃ poʼcompuer, Yomporpaʼ cohuameʼtaneteʼt̃ eseshaʼch ameʼñatsa. T̃arraña ama eseshayeʼña ameʼñatso, eʼñe posocsheña ñeñt̃ ameʼñatsa. Añ posocsheña ñeñt̃ ameʼñaya Yomporpaʼ ñeñt̃ara posocsheña ama eseshaʼ ñoʼshaʼtso, ñetpaʼ queshpet oñot̃. \v 21 T̃arroʼmar yapaʼc̈hoʼña t̃eʼ ñerraʼm yapataret̃ta oñot̃ Partsocop eʼñe atet̃ pena ñerraʼm ahuat̃ Noépaʼ oʼ queshp̃a eʼñe oñot̃. Ñeñt̃oʼmarña yapaʼc̈hoʼña ñerraʼm yameʼñeñot̃ oʼ yapataret̃ta Partsocop eʼñe oñot̃paʼ yeñoteñ oʼ yequeshp̃a. Ñehua, ñeñt̃ apataret̃teñetspaʼ ama añecpayaye oʼch yapa oño att̃och huañ yepatser. Añchaʼña ñeñt̃ alloch yequeshp̃a. Att̃o yapataret̃ta Partsocop oʼch yenam̃ Yompor etserrataterrnayepaʼ yoct̃ap̃ña eʼñe cohuen. Att̃o yapataret̃ta Partsocoppaʼ yeñoteñ oʼ yequeshp̃a t̃arroʼmar Jesucristo att̃o tanterra amaʼt rromhua. \v 22 Allempo tanterra Cristopaʼ oʼ ahuerr pueʼntaño. T̃eʼñapaʼ alloʼtsen epuet Pompor eʼñe poʼcohuenrot̃, allñapaʼ all partsoten. Amaʼt allohuen ñeñt̃ Pompor poʼm̃llañot̃eñnanesharpaʼ ñetpaʼc̈hoʼña t̃eʼpaʼ eʼñe cohuen ameʼñeñet ñamet. Ñam̃a amaʼt allohuen ñeñt̃ am̃chaʼtaret̃etyetsa pueʼntañopaʼ ñetpaʼc̈hoʼña ello ameʼñaʼhueñet ñamet. Amaʼt allohuen ñeñt̃ ahuamencat̃ec̈hnopaʼc̈hoʼña ello ameʼñaʼhueñet. \c 4 \s1 Att̃o eʼñe yemueroc̈hteñot̃paʼ oʼch huomenc yep̃aʼ yeyoc̈her Yomporecop \p \v 1 Cristo allempo añe patsroʼtsenpaʼ ñapaʼ eʼñe pocteʼ enteñ att̃och mueroc̈htateñet nanac. Ñeñt̃oʼmarña sapaʼc̈hoʼ eʼñepaʼchña pocteʼ senteñ oʼch semueroc̈hta eʼñe ñocop. Eʼñe yemueroc̈hteñot̃paʼ oʼch huomenc yep̃aʼ yeyoc̈her. Yemueroc̈hteñot̃ yechtsopaʼ oʼch yequec̈hpaʼhuerr ñeñt̃ ama pocteyaye Yomporecop. \v 2 Allochñapaʼ amach alloʼna yep̃aʼneno atet̃ muenatyesyeʼt̃ yechets ahuat̃. Yocoppaʼ añ poctetsa oʼch yoct̃apeʼchen ñeñt̃ atet̃ muenen Yompor. \v 3 T̃eʼñapaʼ ñeñt̃eshañach atet̃ sep̃a atet̃ sep̃aʼyeseʼt̃ ahuat̃ot̃eñ ñeñt̃ atet̃ pena t̃eʼ ñeñt̃ ama ameʼñetso. Ñetpaʼ aña paʼnamen p̃aʼyenet ñeñt̃ atarr sosyaʼtsañec̈hno ñeñt̃ allohuen paʼnamen muenatseʼtyeñets sosyaʼtsañ ñam̃a posaʼtarñats ñam̃a coshatseʼteñets ñam̃a orrareʼteñets ñam̃a muechatseʼteñets ñeñt̃ amaʼt mameshapaʼ ama pocteyeʼ enteñe Yompor. T̃eʼñapaʼ ñeñt̃eshañach atet̃ sep̃aʼ ñeñt̃ semnatseʼtyen sa. \v 4 Ñeñt̃ peyemteʼt̃ ahuat̃ ñeñt̃ epap̃ p̃orrareʼteʼt̃paʼ t̃eʼñapaʼ amach c̈hapaneto pueyoc̈hro esoʼmart̃eʼ oʼhuañ p̃orrareʼtapretanet. Att̃oña ñetpaʼ mueneñetchaʼ oʼch achm̃areʼtaset. \v 5 T̃arraña t̃eʼpaʼ oʼch notas, amaʼt ñeñt̃ ama ameʼñetso, esempohuañenpaʼ aʼmet̃atatuerranetchaʼ Yompor. Poʼñoc̈h ñapaʼ ñach tsaʼtaya ñeñt̃ ameʼñetsa. Ñam̃a amaʼt ñeñt̃ ama ameʼñatsopaʼc̈hoʼ ñach tsaʼtatuerrahuet, ora allohuenet, amaʼt ñeñt̃ corretsa, ñam̃a amaʼt ñeñt̃ oʼ collaʼhuena. \v 6 Ñeñt̃oʼmarña amaʼt ñeñt̃ arromñat̃neshaʼ oʼ aserrpareʼtatuaret̃tet cohuen ñoñets. Allochñapaʼ amaʼtchaʼ aʼcoñchataret̃tetañ poʼchtsot̃et atet̃ pena allohuen arromñat̃eneshaʼ, puecamquëñot̃etñapaʼ corraʼhuerretchaʼ eʼñe atet̃ correna Yompor. \p \v 7 T̃eʼñapaʼ oʼ mellapoterrmocha. Ñeñt̃oʼmarña añ poctetsa, eʼñe yeñotateñot̃paʼ oʼch yemaʼyochera Yompor. Eʼñech yetpara es yepen att̃ot̃chaʼ amach yepseñe Yompor maʼyochaya. \v 8 Añpaʼ ñeñt̃ña ñanom nanac sherbets: oʼch yemorrentannaʼta nanac eʼñe yeyoc̈hrocmañen. Yemorrentanneñot̃paʼ oʼch yep̃retnannaʼta att̃o errot̃en yep̃annena. \v 9 Ñam̃a eʼñech socsheñeshaʼ oʼch sagapannena eʼñe sepacllo. \v 10 Yompor puemuereñot̃paʼ oʼ eʼñe apaʼyesuas att̃och set̃orraʼyesa eʼñe ñocop. T̃eʼñapaʼ oʼch notas, oʼch seyenpannaʼta año ñeñt̃ apuenes Yompor. Att̃ochña sesherb̃atyesñañña Yompor puemuereña. \v 11 Ñeñt̃paʼ atet̃ ñerraʼm eseshas serrpareʼtatspaʼ Yomporepaʼchña poʼñoñ seserrpareʼten. Ñerraʼm eseshas yenpueneʼ poʼpsheñeñpaʼ Yomporepaʼchña poʼhuamencot̃ seyenpannena. Allochñapaʼ yeparrocmateñot̃ epay Jesucristopaʼ oʼch yaʼyeʼchoc̈htatuerrñañ Yompor. Yomporepaʼchña ayeʼchoc̈htatuapoʼ allohueney. Am̃chaʼnaʼtpahuepaʼch poʼpartsoña t̃ayot̃eñ errponohuañen. Ñeñt̃paʼ att̃epaʼchña Nompore. \s1 Ñerraʼm esempo sasareʼtenyet att̃o yapaʼ yecristonaʼtarterra yañapaʼ atarrchaʼ cosheñtsoʼtseney \p \v 12 Amach masheñneshachaʼ ñam̃a noc̈haneshachaʼ seyorenatsto ñerraʼm huaponasa topateñets nanac huomenc; t̃arroʼmarchaʼ huaponasa oʼch topatensaʼ. Amach seyorenatsto atet̃ sepena ñerraʼm esempo huaponasa ñeñt̃ ama sentare. Att̃ecma amaʼt masheñneshaʼ ñeñt̃oʼ ameʼñaʼhuapaʼ att̃ecma oʼ topatuanet. \v 13 Allempot̃eñ oʼ semueroc̈htaprecha Cristo, eʼñe semueroc̈hteñot̃paʼ socshepaʼch. Allochñapaʼ ñerraʼm esempoch orrterra poʼcohuenñapaʼ sapaʼc̈hoʼña socshapreterach eʼñe cohuen. \v 14 Ñerraʼm c̈ho sasareʼtenset att̃o oʼ secristonaʼtarterra, sañapaʼ atarrchaʼ cosheñtsoʼtsenes, t̃arroʼmar eʼñe allempot̃eñ Yompor Puecamquëñ ñeñt̃ cohuenñatsotetspaʼ c̈haponasa sesho. Poʼñoc̈h ñetpaʼ Cristoʼna sasareʼtenet t̃arraña sapaʼ eʼñe cohuen secohuentateññañ Cristo. \v 15 Añña ama cohueno oʼch yemueroc̈hta yemtseñot̃ acheñ, amaʼt ñam̃a yeteñot̃, amaʼt ñam̃a yepeñot̃ ñeñt̃ ama cohuenayaye, amaʼt ñam̃a yaʼmet̃am̃peñot̃ att̃ochchaʼ yeʼmoñeʼtannaʼta. Ñerraʼm att̃ot̃ña yemueroc̈htapaʼ ñeñt̃paʼ eʼñech orrena yemueroc̈hta. \v 16 Añña ñerraʼm añecop yemueroc̈hta t̃arroʼmar oʼ yecristonaʼtarta, amach yepencatsto. C̈hocmach yecohuentatoñ Yompor t̃arroʼmar oʼ yanerrñañ paʼsoʼcheñ. \p \v 17 Oʼ c̈hapmoch allempoch Yomporpaʼ acranatuerrey allohueney ya. Yapaʼ yanomchaʼ aʼmet̃err atet̃ enteney amaʼt ñeñt̃ey puechemereshay oʼ perrey Yompor. Ñerraʼm yapaʼ yanomchaʼ aʼmet̃am̃perr amaʼt ñeñt̃ey ameʼñatsapaʼ, allempopaʼ errot̃enot̃uachcaʼ queshperrat̃eʼ ñeñt̃ nanac at̃pareʼteneʼ cohuen ñoñets ñeñt̃ Yompor poʼñoñ. \v 18 Amaʼt ñeñt̃ey eʼñe pocteʼ es petspaʼ eʼñech yemueroc̈henñot̃a yequeshperra, allempopaʼ errot̃enot̃uachcaʼ c̈hapña ñeñt̃ ochñat̃eneshaʼ ñeñt̃ atarr at̃pareʼteneʼ Yompor. \v 19 Ñeñt̃oʼmarña ñerraʼm esempo yemueroc̈hta eʼñe Yompor puemneññot̃paʼ allempopaʼ amach yellcatsto. Añña poctetsa oʼch alla yeyemtera Yompor eʼñe yocsheñeshocmañen yeyoc̈hro, t̃arroʼmar ñapaʼ ña ñeñt̃ yeyec̈hcateʼ. Ñapaʼ ña ñeñt̃ eʼñe pocteʼ es pets, ñapaʼ eʼñech aʼpoctatonay. Añchaʼña alloʼnepaʼch yesen cot̃apeʼcherreʼ ñeñt̃ cohuentetsa Yomporecop. \c 5 \s1 Att̃o cot̃apeʼchatan allohuen ñeñt̃ pomporneshaʼ pen ñeñt̃ ameʼñetsa \p \v 1 T̃eʼpaʼ oʼch notas sam̃a ñeñt̃es pompor pen ñeñt̃ ameʼñetsa sesho. Napaʼc̈hoʼña nach pompor pen ñeñt̃ ameʼñetsa nesho. Napaʼ neñcheʼt̃ atet̃ mueroc̈hteʼt̃ Cristo. T̃arraña ñerraʼm esempo huerra poʼcohuenñopaʼ yapaʼ oʼch yecohuentapretera yam̃a. \v 2 Napaʼ t̃eʼpaʼ oʼch notas sa ñeñt̃es pompor pen ñeñt̃ ameʼñetsa. Atet̃ pena ñeñt̃ cohuam̃peneʼ poʼcarrneror, sapaʼc̈hoʼña secuam̃peschaʼ eʼñe cohuen ñeñt̃ ameʼñetsa sesho, t̃arroʼmar ñetpaʼc̈hoʼ poʼcarrneror penanet Yompor. Amachña sec̃llañot̃a secuam̃p̃satstaneto atet̃ sepeñ ñeñt̃ ama tama cohuenayeʼ senteno. Eʼñechña socsheñeshaʼ secuam̃penanet atet̃ muenen Yompor. T̃arraña amach sagapueñot̃a quelle secuam̃p̃satstaneto. Ñerraʼm quellayecop yecuam̃peñpaʼ oʼch yepenca. Añchaʼña eʼñech yocsheñeshaʼ yecuam̃p̃sanet. \v 3 Amach c̈ha saʼm̃chaʼnoc̈hteñot̃eyeʼ secuam̃penaneto, ñeñt̃es atet̃ anaret̃es sach cohuam̃penahuet. Añchaʼña c̈hocmach yentatanet atet̃ eʼñe cohuen es yepen. Eʼñe yoct̃apeʼchateñot̃ cohuenpaʼ oʼch yeyc̈hatenanet allohuen ñeñt̃ eʼñe poʼcarrneror pen Yompor. \v 4 Cristoñapaʼ ñeñt̃ yecuam̃peneʼ allohueney atet̃ ñerraʼm poʼcarrnerorey. Ñerraʼm esempo huerra, allempopaʼ yapaʼc̈hoʼ atsaʼtaret̃eychaʼ. Atsaʼtaret̃eychaʼ poʼcohuenño ñeñt̃chaʼ atarr nanac yocshaterreʼ ñeñt̃paʼ ama ahuañaño amaʼt errponaña. \p \v 5 Ñeñt̃es huepaneshas, t̃eʼpaʼ napaʼ oʼch notas sam̃a. Añ poctetsa oʼch sameʼñeña ñeñt̃ poʼn yacma ñeñt̃ sompor sepen. Poʼñoc̈h oʼch notas allohuenes, eʼñech cohuen sameʼñannena amach sañeña eʼñe cohuen entatstatso t̃arroʼmar: \q1 Yomporpaʼ ama pocteyeʼ entenano ñeñt̃ atet̃ ommoʼchetsa. Añña ñeñt̃ ama esoyeʼ entetso ñeñt̃ña atarr muerenaña Yompor. \m \v 6 Yapaʼ yeñoteñ Yomporpaʼ nanac ahuamencat̃. Yapaʼ ama ya yehuamencot̃eyeʼ yommoʼcheno. Ñeñt̃oʼmarña yeñoteñ Yomporpaʼ ama cohuenayeʼ entenano ommoʼcheñets. Amach yeyemtatsto eʼñe yañeña, t̃arroʼmar yapaʼ ama es yesherbeno. Añchaʼña eʼñe cohuen yeyemtena Yompor, allochñapaʼ ñerraʼm esempo ña muenats, ñachña yocshatuerreʼña eʼñe cohuen. \v 7 Ora allpon ñeñt̃ yellcateneʼ añ poctetsa oʼch yotue Yompor. T̃arroʼmar ñapaʼ poʼñoc̈h c̈hocma llecapretenya ñeñt̃ yellcateneʼ. Allochñapaʼ ñachña yaʼmetuerreʼ yellquëña att̃och yocshaʼhuerra eʼñe cohuen. \p \v 8 Eʼñe señotateñot̃paʼ señotaʼt̃ach, t̃arroʼmar oneñet̃ ñeñt̃ seʼmoñeʼteneʼpaʼ c̈hocma chopeñeʼchen errap̃aren atet̃ ñerraʼm maʼyarr, c̈hach am̃chaʼnoc̈hetnena eʼnyeseʼ ñeñt̃chaʼ aʼchencat. \v 9 Añchaʼña sat̃pareʼt oneñet̃. Eʼñe yameʼñeñot̃ Cristo oʼch huomenc yep̃aʼ yeyoc̈her. Oʼch señoch att̃ecmach mueroc̈htatuan allohuen masheñneshaʼ amaʼt ñeñt̃ oʼ ameʼñaʼhuerra ora errap̃aren añe patsro. \v 10 Amaʼt mueroc̈htatyesasetchaʼ mameʼ t̃arraña Yomporpaʼ nanac amueraña. Ñapaʼ ñachña aʼpoctatuerreʼña socop, att̃och huomenc perrnas seyoc̈her. Allochñapaʼ amach alla sepuesuere. Atet̃chaʼ p̃atonay Yompor, ñeñt̃ey mueneneʼ oʼch yecohuentaprecha poʼcohuenño. Eʼñe yameʼñeñot̃ Cristo yecohuentapreterach poʼcohuenña ñeñt̃chaʼ ama ahuañañat̃terrtso. \v 11 Yomporepaʼchña ayeʼchoc̈htatuapoʼ allohueney. Am̃chaʼnaʼtpahuepaʼch poʼpartsoña t̃ayot̃eñ errponohuañen. Ñeñt̃paʼ att̃etepaʼchña Nompore. \s1 Arrpaʼ all soʼtnerranet poʼcartot̃ \p \v 12 T̃eʼñapaʼ ñeñt̃ach eʼñe notas necartot̃. T̃eʼpaʼ oʼ notuas oʼch sameʼñaʼhuera eʼñe poʼñoc̈hocmañen. Ñam̃a oʼ notuas añpaʼ ñeñt̃ña eʼñe poʼñoc̈h Yompor puemuereña alloch atarr bensareʼtam̃peney. T̃eʼñapaʼ oʼch alla noterrserr, poʼñoc̈hpaʼ oʼch seyemtoña Yompor puemuereña. Ñeñt̃ masheñ Silvanopaʼ ña nequellcaten att̃och neserrpareʼtatas mameʼ añ necartot̃. Atet̃ nenteñ masheñ Silvano, ñapaʼ nanac cohuen ameʼñenana Yompor. \p \v 13 Ñam̃a ñeñt̃ ameʼñetsa arr Babilonia\f + \fr 5:13 \ft Anets ñeñt̃ paʼsoʼcheñ Roma t̃eʼñapaʼ añ tomaʼntateñet anets Babilonia.\f* mueneñet oʼch huom̃chaʼtaset ñamet añ necartot̃. Ñetpaʼc̈hoʼña oʼ acrerranet Yompor eʼñe atet̃ ñerraʼm sa. Ñam̃a neyocher Marcospaʼc̈hoʼña mueneñ oʼch huom̃chaʼtas ñam̃a necartot̃. \v 14 Eʼñe semorrentannaʼteñot̃ oʼch sehuom̃chaʼtannaʼta.\f + \fr 5:14 \ft Poʼñoc̈h oteney, “Eʼñe semorrentannaʼteñot̃ c̈hoch setsoʼtstsaʼpaʼtannena ñerraʼm esempo sehuom̃chaʼtannaʼtena.” Ñeñt̃paʼ atet̃ yec̈heteʼt̃ ahuat̃.\f* \p Eʼñe seyemteñot̃ Jesucristo, Yomporepaʼchña socshateneʼña eʼñe cohuen seyoc̈hro. T̃eʼpaʼ ñeñt̃ach notas, ñeñt̃paʼ att̃etepaʼchña Nompore. Allohua. \pmr \sig Pedro\sig*