\id TIT ALY Alyawarr Bible Northern Edition Moore 25.3.09. 
\h Titus 
\toc2 Titus 
\toc1 Titus 
\mt1 Titus  
\ip \it Akwerlp kwaty alay ampepel, apmer itnan Crete. Artwa ingwer itnan Titus apmer Crete-areny anenh. Paul-el pip thwenek Titus-warl, ingkart arrernetyek apmer ikwer-areny-rnem, rernem angka Akngey-kenh arraty-angkwarr apentetyek. \it*  
\c 1  
\nb
\v 1 Ayeng Paul Akngey-kenh warrkenh, Jesus Christ-kenh angkakert. Atha Akngey-kenh angka arraty akalty-anthetyek, rernem Ingkart-angkwarr arraty innga apenterl-ayntetyek, iterl-arayntetyek.  
\v 2 Awank-akerr Akngeyel arrwekel anwenhantherr alhelek, ingkerrenh itethiletyek, anwantherr intem-antey iteth anayntetyek. Akngeyel ileyel innga, irrtywerremel iley-angenh.  
\v 3 Akngeyel angka anwekantherr arrwekel arrernek, anwantherr renh iterl-aretyek arraty innga. Aley anwantherr-anem Akngey-kenh angka iterl-aretyek innga. Akngeyel ayenh ilanthek, atha arrenhantherr ingkerrenh angka mwerr-angker akalty-anthetyek.  
\v 4 Titus, athan pip nhenh ngkweng-warl thwenem. Ingkart-areny arrpemarl ngan, ayeng-apeny. Aylanth Akngey anyent tnakeyelarl, ikwerant inkwerelheyelarl. Ingkart Akngeyel ngenh arntarnt-arem, atnyenem Jesus Christ-el-then, nga mwerr-angkwarr anetyek Christ Jesus-angkwarr.   
\s1 Titus-el ingkart-rnem rnkernetyek  
\p
\v 5 Apmer Crete-itwek atha ngenh iwerl-alhek, ntwa warrk ngkwenh ywerrelhiletyek, ingkart-rnem-anem rnkerneynetyek, rernem tawen arrpanenhel warrkirr-ayntetyek.  
\v 6 Rernem mwerr-angkwarr anetyek ingkerrenh, ampernem-then ingkerrenh. Rernem anew ikwer-rnem-kenh-akert anayntetyek Ingkart-kenh-angkwarr-antey. Ampernem apmwangkwarr apentey-angenh anetyek, ingwerel-rnem nthakenh ayntarrp-ilemel iley-angenh anayntetyek.   
\p
\v 7 Artwa tyaty-areny Ingkart-kenh atyetyart rernem ayntarrp-ilemel iley-angenh anayntetyek, Akngey-kenh angkant rernem ilayntetyek, ahelirrey-angenh anayntetyek, tnakelhey-angenh anayntetyek, man anyelkel iney-angenh ingwer-rnem-kenh.  
\v 8 Rernem mwerr-angkwarr anayntetyek, ingwer-rnem-akert, renh-rnem arntarnt-aretyek ingkerrenh, angka mwerr nhek inkwerelhemel awelhetyek. Rernem ikwa arraty-angkwarrant itengirretyek, apmwangkwarr apentey-angenh.  
\v 9 Rernem angka arratyant apent-ayntetyek, ingwer-rnemek awelhey-angenh, rernem ingwer-rnem angka arraty akalty-anthayntetyek, ingwer-rnem rernem ilpertelhilerl-anekerr Akngey-kenh angkekety.   
\p
\v 10 Ingwer-rnemel Jew-rnem-angkwarr apenteyel-rnem rernem apmwangkwarr akalty-antheyel.  
\v 11 Rernem manekant iterreyel, Rernem alakenh akalty-antheyel, ingwerel-rnem renh-rnem man anthayntetyek. Arrantherr renh-rnem artweriletyek, rernem apmwangkwarr akalty-antheyel-kety.  
\v 12 Awank-akerr artwa apmer Crete-areny anyent, artwa tyak ra angkek, “Crete-areny-rnem irrtywerremel iley-angker-rnem. Rernem ankety, warrkirrey-angenh-anem, atnwenth ateralth-rnem-apeny. Rernem apmwangkwarr mpwareyel.”   
\p
\v 13 Angka nhenh arraty inngarl aynteyel. Ntwa Ingkart-areny-rnem artewentyel akalty-anthayntetyek, Akngey-kenh angkek, arraty innga, rernem Akngey-angkwarr arraty anetyek.  
\v 14 Renh-rnem ilay, Jew-rnem-kenh angkek awelhey-angenh anetyek. Angka ilenhan rernemarrp mpwarek arraty-wenyarl. Angka Jesus-akert arratyekant awelh-ayntenherr-arey.   
\p
\v 15 Rernem apmwangkwarr akalty-antheyel. Amern-then aker-then alhewer arlkwetyek, mwerr-angkwarr apenterl-ayntetyek. Amern-then aker-then arlkwemel, nthakenh Akngey-angkwarr apmwelhiley-angenh.  
\v 16 Rerneman ilelhem, rernem Akngeyek akalty-arrpanteyarl. Anantherr areyel, rernemarl apmwangkwarr apenteyel arraty-angkwarr-arrpantey, rernem Akngeyek akwerrp inngarl aneyel. Rernem Akngeyek awelhey-angenh. Rernem mwerr-angkwarr Akngeyek lwewarrernelhey-angenh.   
\c 2  
\s1 Titus-el Ingkart-areny-rnem ingkerrenh akalty-anthetyek  
\p
\v 1 Titus-ay, arraty-angkwarr ntwa akalty-anthayntetyek angka Jesus-akert.  
\v 2 Artwa ampwernem ingkerrenh ilay, wayn akngerr antywey-angenh, rernem iylpareth anayntetyek, Akngey-kenh-angkwarr, rernem arraty-angkwarr apenterl-ayntetyek ipmelhey-angenh.  
\v 3 Arelh ampwernem ilay, rernem mwerr-angkwarr anayntetyek, Ingkartek intem-antey iterrerl-ayntetyek, rernem angka ingwerek iley-angenh anayntetyek, rernem ngkwarl wayn akngerrek artewentyel inkwerelhey-angenh anayntetyek.  
\v 4-5 Rernem arelh-rnem arraty-angkwarr akalty-anthayntetyek, rernem mwerr iterretyek, rernem anew ikwer-rnem-kenhek inkwerelhemel awelhetyek, ampa ikwer-rnem-kenhek inkwerelhetyek, arraty-angkwarr itengirretyek, warl ikwer-rnem-kenh arntarnt-aretyek, anew ikwer-rnem-kenhek awelhetyek. Rernem alakenh arraty apententy, ingwer-rnemel kel renh-rnem arraty-angkwarr tnakem, Akngey-kenh angkek irrpelthirrey-angenh anetyek.   
\p
\v 6 Artwa anthety-rnem ilay, rernem arternpel ilayntetyek, arraty-angkwarr apenterl-ayntetyek.  
\v 7 Nga mwerr-angkwarr anenty, ingwerel-rnem ngenh mwerr-angkwarr apentem. Ntwa ngkwenh-rnem arraty-angkwarr akalty-anthetyek, rernem arraty-angkwarr ngenh apenterl-ayntetyek arrpemarl.  
\v 8 Angka mwerr-angkwarr angkaynta ingwer-rnemek, angka apmwangkwarr angkey-angenh, apmwernemel ngenh ywarn ayntarrp-ilekerr, apmwangkwarr ntwa akalty-antherl-anenty-arrpantey.  
\v 9 Artwa warrkenh-rnem akalty-anthay, rernem atyetyart-rnemek awelh-ayntetyek, ikwer-rnem angkep angkeyney-angenh.   
\p
\v 10 Anyelkel ikwer-rnem-they iney-angenh, mwerr-angkwarr anayntetyek. Rernem mwerr-angkwarr apententy, ingwer-rnem rernemap iterl-arem-anem Akngey-kenh angka renh, “Arraty inngarl nhel-rneman apenteyel.”  
\v 11 Akngey ingkerrenhek inkwerelheyel, rap ahern-areny ingkerrenh itethiletyek.  
\v 12 Ra anwenhantherr akalty-anthek, anwantherr apmwekety ipmelhetyek arraty-angkwarr, mwerr-angkwarr, ahern nhel anetyek.  
\v 13 Anwantherr iterl-areyel, anwantherr ingkerrenh alerl-antey ikwer mpwelheyel, rarl rlterrk ilkwakert apey-alpeyenhek, Jesus Christ, itethiley-angker ilkwa anwekantherrenh.  
\v 14 Ran katy ilwek anwekantherr, anwenhantherr apmwekety itethiletyek. Ra anwekantherr ilkelhek, anwantherr ikwerenh-rnem anayntetyek, ikwerenh-angkwarr arraty apent-ayntetyek.   
\p
\v 15 Ingwer-rnem arraty-angkwarr akalty-anthetyek ywerreyek-atwety. Renh-rnem ilay, mwerr-angkwarr rernem anetyek rlterrk, rernem arntarnt-arelh-ayntetyek. Ingwer akengenty angkenty, ikwer arrkngert angketyek, artweriletyek. Nyerrirrey-angenh renh-rnem ilay, arraty-angkwarr!   
\c 3  
\s1 Mwerr-angkwarr apentetyek  
\p
\v 1 Ntwa renh-rnem akalty-antha, rernem atyetyart ilkwernemek inkwerelhemel iylpareth awelh-ayntetyek.  
\v 2 Rernem mwerrant-arey ingkerrenh anayntetyek, ilterrey-angenh.  
\v 3 Awank anwantherr apmwangkwarr anenh. Ampwal ingwer-kenh-they anwantherr alharlkwerrenh. Anwantherr artwerrety anenh, ingwer-rnem-kety arlkarirrenh, ingwer-rnem anwekantherrety arlkarirrenh arrpemarl.  
\v 4-6 Ikwer-theyan Akngeyel Jesus renh thwenek anwekantherr-warl, anwenhantherr itethiletyek, anwantherr arraty Akngey-angkwarr anayntetyek anwekantherrenh-angkwarr-weny, ikwerenh-angkwarrant anwantherr anayntetyek. Anwekantherr-angkwarr nthakenh anwantherr iteth intem-antey aney-angenh. Ran anwenhantherr arntarnt-arenh. Ingkart Akngeyel Itnweng renh thwenek, Jesus-angkwarr, anwenhantherr lyertenyiletyek, anwantherr iteth intem-antey anayntetyek.  
\v 7 Akngeyel anwenhantherr atnyeneyel ipmelhey-angenhel, anwantherr arraty Akngey-angkwarr anayntetyek, anwantherr iterl-aretyek anwantherr ikwer-itwek intem-antey aney-alpetyek.  
\v 8 Angka nhenh arraty inngarl aynteyel. Ayeng ilkelheyel ntwa angka nhenh rlterrk innga akalty-anthayntetyek, Jesus-arl tnakeyel-rnem rernem mwerr-angkwarr apentetyek, ingwer-rnem arntarnt-aretyek. Angka nhenh rlterrk innga athan ileyel, impen-angkwarr.  
\v 9 Arrwekeleny-rnem-kenh angkethey ilterrey-angenh anayntetyek, Jew-rnem-kenh-they, amentirretyek Jew ikwer-rnem-they.  
\v 10-11 Ahel iltey-angker-rnem rernem apmwangkwarrarl iterreyel, ahel atwerrerl-ayntetyekantarl. Alakenh-angkwarrarl rernem apmwelhileyel. Renh-rnem artweriletyek, “Ahel ilterrey-angenh, anwantherr anetyek mwerrant-arey.” Rernem ngkweng awelhey-angenh irrpelthirremel, ntwap renh-rnem iletyek arrpemarl anyent-inger-antey. Ikwer-theyan ament-anem ikwer-rnem-kety anayntetyek.   
\p
\v 12 Atha artwa Artemas, artwa Tychicus apek ngkweng-warl thwenem. Apetyay, ayenh rlwatetyek apmer Nicopolis-itwek. Ayeng ilenhel ngwang aneyenh alyangkw-kety.  
\v 13 Zenas court-areny-then Apollos-atherr renh-atherr ntwa arntarnt-araynta, ampwal ilek-ilek renh-atherr antha, rernem Akngey-kenh angka ilerl-apayntetyek.  
\v 14 Ingkerrenh mwerr-angkwarr aleth akaltyirretyek, ingwer-rnem arntarnt-arayntetyek, rernem apatemel anerl-anekerr.  
\v 15 Atyeng-angkwarr aneyel-rnem, rernem ngkweng inkwerelheyel. Apmer-areny ilenh-rnem-warl Jesus renharl tnakeyel-rnemek ntwa angka mwerr-angkwarr iley-alha.  
\p Akngeyel arrenhantherr mwantyel arntarnt-arem.