\id 2TH ALY Alyawarr Bible Northern Edition 5 May 09 (Blackman AuSIL) 
\h 2 Thessalonians 
\toc2 2 Thessalonians 
\toc1 Pip Thessalonica-areny-rnem-warl, Namp 2 
\mt1 Pip Thessalonica-areny-rnem-warl, Namp 2  
\imt1 Angka nhenhan alakenh aynteyel  
\ip \it Paul-el Silas-el Timothy-el-akerr rernem pip nhenh thwenew akngerr Akngey-wenh-rnemew apmer Thessalonica-warl. Pip nhenh-angkwarr rernem akngerr ilem, rlterrk anaynteyew Akngeyew, rernemarl pip ingwer-itwew ingwernew-apeny. Pip renh itnewem “Pip Thessalonica-areny-rnem-warl Namp 1.”\it*  
\ip Nhenhan ingwer-anemarl pip, Paul-el Silas-el Timothy-el-akerr ingkwernewarl. Rernemap thwenew-anem Akngey-wenh-rnem-warl apmer Thessalonica-warl. Thessalonica-areny-rnem intem arraty mwerrant-arey anenh Akngeyew, ingwer-rneman arlkarerrenharl ikwer-rnem-wety.  
\ip Ingwerentyan intem iterrenh arlta ikwer, Jesus-arl apetyeyenhew angkep. Ingwer-rneman warrk-wety ipmelherrenh, apmwel-ayeth iterrenh, “Jesus-an angkep rlengk-antey apetyeyenh.” Ingwer-rneman apmwel-ayeth iterrenh, “Jesus-an akwel kel-antey apey-alpew.” Thessalonica-areny-rneman ilpertelelherrenh apal, atererremel anenh.  
\ip Pip nhenh-angkwarr Paul-rnemel alakenh ilew, “Jesus-an apey-alpey-angenh-antey, arrangkw-antey. Akngerr Akngey-wety-tangkwel angkeperrerl-aneyenh. Artwa apmwa ranem aremerreyenh, irrtywerremel ilaynteyew ingkerrew, rernemap apmwangkwarr-anem anerl-aneyenh. Jesus rarl angkep apetyeyenhel, artwa renhap ipmew atweyenh.”  
\ip Paul-rnemelap ilew arrpemarl, “Arrantherr warrkerr-aynteyew intem, apwert inaynteyew, amern payemeleyew.”  
\ip Rernem pip nhenhan ingkwernew, renh-rnem akalty-antheyew arraty-angkwarr. Aleyan angka aynteyel, “Thessalonica-areny-rnemew Namp 2” (2 Thessalonians).  
\c 1  
\nb
\v 1 Atha Paul-el pip nhenh angkakert thweneyel. Atha Silas-el Timothy-el-anem anantherrarl angka nhenh ingkwerneyel arrewantherr Akngey-wenh-rnemew Thessalonica-areny-rnemew. Arrantherran Akngey-wenh-rnemarl, Jesus Christ-arl apenteyel-rnemarl.  
\v 2 Anantherr ayernem Akngey Alerikw Jesus-then, athamerr-aynteyew arrewantherr, inweng-then arternpel-aynteyew.   
\s1 Akngeyelan court-emeleyenh ingkerrenh arraty irrkaty-angkwarr  
\p
\v 3 Anewantherrenh-rnemay Christian-rnem! Anantherran Akngey nakem intem arrewantherr. Mwerr anantherr inkwerelhemel angkem ikwer-warl, arrantherrarl intem apenteyel-antey arraty. Iterreyel rlterrk ikwer-warl irrpeltherrey-angenh. Arrantherrap intemarl ingwer-rnem arntarnt-areyel arraty-angkwarr. Arraty alyep-tangkwel arrantherr apentenh, aleyanap arraty inngangkwarr-anem apenteyel.  
\v 4 Alakenhap anantherr arrenhantherrenh nakayntem, anantherrarl alheyelel, Akngey-wenh-rnem arerl-apaynteyew apmer arrpanenhew. Anantherr renh-rnem ilem, arrantherrarl rlterrk iterremel aneyel Akngeyew, ipmelhey-angenh. Ingwer-rnemel arrenhantherrenh irrwerneyel. Arrantherranap renh apenteyel intem-anteyarl.   
\p
\v 5-6 Anantherr iterrem intem arrewantherr. Rlterrkarl ayntenheng-arey, arrantherr rlterrk-anteyarl anenh. Akngeyelan ikwerenh-rnem arntarnt-arem intem-antey, rlterrkarl anemewan ikwer. Ingwer-ingweran ra ingkerrenh rnkern-ayneyenh, ayern-aynteyew renh-rnem. Court-emeleyenh ra ingwer-rnem, ikwerenh-rnemarl irrwernenhew. Akngey ran ingkerrenhew arraty aneyel intem.  
\v 7 Rap mwerr mpwareyenh anewantherr, rernemarl anenhantherrenh ingkerrenh irrwernenh-wety. Rap alakenh mpwareyenh, Jesus-arl aremerreyenh irrwerl-they antyerl ikwerenh-rnem-akert, rwethen-akert. Rernem ingkerr apetyeyenh arawerrng ilkwakert, rwakert-then.  
\v 8 Akngeyelan pwarrk ilkwa antheyenh renh iterl-arey-angenh-rnemewan. Rernem anenh, angka ikwerenhew Jesus-akertew awelhey-angenh.  
\v 9-10 Nthakenh rernem aney-alpey-angenh Jesus-itwel irrwerl, rarl atyetyart ilkwa aneyel-itwelan. Arlta ikwerel ra renh-rnem irrenteyenh, rarl apetyeyenh arawerrng ilkwakert. Rernemap aney-alpeyenh ament arrpemarl arleng ingwer-rnem-wety intem-antey. Arlta ikwerel ikwerenh-rneman aney-alpeyenh anyentel ikwer-itwel. Ya, Christian-rnem ingkerr aney-alpeyenh, atayel-anem renh nakey-alpeyenh irrwerl-itwew alakenh, “Jesus ran inngarl mwerr-angker!” Arrantherran angka ikwerenhew awelhenh, anantherrarl ilerl-apenhew, arrantherrap ikwer-itwel aney-alpeyenh nakemel arrpemarl.   
\p
\v 11 Alakenh-wety Akngeyan ayernem intem, arrenhantherrenh arntarnt-araynteyew, arrantherraw ikwer-angkwarr anaynteyew. Anantherrap ayernem, arrenhantherrenh rlterrkel-aynteyew, arrantherraw ikwer warrkerr-aynteyew. Arrantherr ikwer warrkerreyew, rlterrk ikwerant iterremel.  
\v 12 Arrantherr ikwer alakenh warrkerrem, ingwer-rnemelap arayntemarl. Rernem inkwerelhem arrewantherr, Jesus nakemel. Arrenhantherrenhap rernem nakem arrpemarl. Akngeyel rethen arrenhantherrenh nakem. Alakenh ayntem, Akngey-then Jesus-then ratherr mwerrarl mpwarem arrewantherr.   
\c 2  
\s1 Artwa Akngey-wetyarl arlkarerreyel apmwa inngakert  
\p
\v 1 Anewantherrenh-rnemay! Angka nhenh anantherr ilew arrewantherr, Jesus-arl apetyeyenh-akert angkep. Anantherr ilew, rarl anenhantherrenh akarreleyenh ikwer-warl ingkerrenh. Angka nhenhanap arrantherr iterl-areyelarl.  
\p Angka ingwer nhenhew-anem awelhenh-arey.  
\v 2 Ingwerentyan apal alakenharl angkem, “Paul-rnemarl anenheng-areyan anewantherr-itwel, Inweng Mwerr-angker ikwer-rnem-angkwarr alakenh angkew, ‘Jesus-an kel weth-antey apetyew ahern nhewarl.’” Ingweran alakenh apal angkem, “Atha awew, Paul alakenh angkenty, ‘Jesus-an kel weth-antey apetyew ahern nhewarl.’” Ingwer-anemarl alakenh apal angkem, “Paul-rneman akwel pip-angkwarr angkew, ‘Jesus-an kel weth-antey apetyew ahern nhewarl.’” Arrantherr awem, alakenh ingwerenty angkenty, ilpertelelherrey-angenh. Artewenty iterrey-angenh.  
\v 3 Menty awelhey-angenh ikwer irrtywerreyelarlew. Anantherran alakenh angkey-angenh, arrangkw.  
\p Ran alakenh aynteyenh, Jesus apetyeyew-alentyan angkep. Akngerr ingwer-rneman angkeperreyenh-tangkwel Akngey-wety. Anyentan aremerreyenh itnan “Artwa Akngey-wetyarl arlkarerreyel apmwa innga”.  
\v 4-12 Arrantherr iterl-aremer, anantherrarl angka ikwer-akert ilenh arrwekel-antey, arrewantherr-itwelarl anenheng-arey. Aleyan akngerran apmwel-ayeth aneyel, Akngeyew awelhey-angenh. Apmwa ingwerentyelan renh-rnem apmweleyel, apmwel-ayeth aneyew. Renhap iterl-arey-angenh anantherr. Irrtyertel aneyel. Ingwerentyan arrngert aneyel ikwer aleyan, ra akngerr apmwelewerr innganem. Ingwer-ingweran artwa apmwa ra irrtyert-aney-angenh-anemarl, rap arwapeny aremerreyelpeyenh. Aleyan arrngert-antey ikwer aynteyel, nthakenh ra aremerreyelpey-angenh-antey, arrangkw-antey. Arrantherran iterl-areyel anyent, rarl arrngert aneyel ikwer. Akngeyelantap arltan rlwaneyenh artwa apmwa ikwer, rarl aremerreyenhewan. Arlta ikwerel Akngeyel tyarleweyenh-anem, artwa rap aremerreyenh-anem. Rarl aremerreyenhel, ilek-ilek lwewarrerneyenh arrenty Satan-wenh arawerrng apmwakertel. Rap aylpeyenh Akngey-wenh tyaty ilkwewarl, rap anerl-aneyenh alakenh angkerl-aneyenh, “Akngerr ingwer-rneman kwenerrem ampwal ahern nhenh-areny-rnemew. Arrangkwarlap yanh-rneman. Akngey irrwerl-arenyanap arrangkw arrpemarl. Ayengant ilkwa innga ingkerr-angkwarr. Atyengant-anem ingkerr kwenerremer, atyengant awelhemel.” Rap irrtywerremelarl ilerl-aneyenh akngerrew, apalelap renh apenteyenh ilkwarrpantey. Rerneman awelhemer angka mwerr-angker Akngey-wenhew, ikwerant iterremel. Alakenh iterrentyan ikwer-itwelap intem-antey aney-alpem. Arrangkwarlap rerneman! Ikwer iterrey-angenh rernem, Akngeyel rap ilperteleyenharl renh-rnem. Artwa apmwa ikwerant-anem rernem awelherl-aneyenh, rarl irrtywerremel ilerl-aneyenhew. Rernemap apmwel-ayethant-anem inkwerelhemel apenteyenh, iylpelant-anem awerl-aneyenh angka Akngey-wenh inngan.  
\p Ikwer-penhap ingwer-ingwer Jesus angkep apetyeyenh, amparrkemel arawerrng ilkwakert. Rap artwa apmwa renh pewelemel atweyenh ipmew-antey. Akngeyelap renh iweyenh-anem rwa ilkwewarl, intemarl ampeyel-warl. Rap ayerneyneyenh-anem ingkerrenh court-emelemel. Artwa apmwarl apentenh-rneman rap renh-rnem apmwa antweyenh, irrentemel intem-antey.   
\s1 Akngey rlterrkel-antey apent-aynteyew, ipmelhey-angenhel  
\p
\v 13 Arrantherran Akngey-wetyarl angkeperrem-rnem-apeny-wenyarl, arrangkwarl. Akngeyan arrewantherr ilkelheyel artewenty, intem-anteyap anantherr nakaynteyewan renh. Rarl ayerrpelew arrwekel-antey arrenhantherrenh, ikwerenh-rnem anaynteyew, rarl ahern-then alker-then arnwarnenheng-arey. Inweng ikwerenh arrewantherr anthemel ra ayerrpelew arrenhantherrenh, apmwa irrarlkeyew. Ra alakenh mpwarew, arrantherrarl angka ikwerenhew awelhew, arraty-angkwarr apentemel.  
\v 14 Ya, ra anenhantherrenh ilanthew, angka mwerr-angker arrewantherr ileyew. Rap ilkelheyel, Jesus-apeny arrantherr anaynteyew intem, aney-alpeyew-anem ikwer-itwel intem-antey.  
\v 15 Angka ikwerenhew mwanty-antey iterr-aynteyew, anantherrarl ilenhew weth. Pip angkakert wethew mwanty arrpemarl iterr-aynteyew. Angka ikwer awelheyn-aynteyew intem-antey.   
\p
\v 16-17 Jesus Aynikw ikwerenhel-then ratherr arntarnt-arem anenhantherrenh ingkerrenh. Akngeyel rlterrkelem irrngerney-anthemel. Alakenh-anyemap anantherr inkwerelhemel arntarnt-arelh-aynteyewan Jesus ikwer. Ran arrwekel-antey ilew, rarl apey-alpeyenh akngeyneyew, ikwer-itwel aney-alpeyew intem-antey. Alakenh-anyemarl iterreyelelan anantherr, ingwer-rnem anantherr arntarnt-araynteyew, mwerrant-arey angkerrerl-anemel.   
\c 3  
\s1 Akngey renhan rernem intemarl ayernerl-anemer Paul-ew-rneman  
\p
\v 1 Anewantherrenh-rnemay, angka nhenh-then arrewantherr ileyew. Akngeyan intemarl ayern-ayntenh-arey anewantherr, anantherrarl alheyelewan, angka ikwerenh ilerl-apaynteyew. Anantherr ilkelheyel, apmer arrpanenh-they aweyew angka renh. Rernem inkwerelhemel awelheyew, arrantherrarl awelhew-apeny, anantherrarl ilew-angkwarr.  
\v 2 Apmwernemanap angka Jesus-akertew awelhey-angenharl, arrangkw. Rernemap irrwerneyenharl, anenhantherrenhap atweyenharl. Akngeyantap ayern-ayntenh-arey, anenhantherrenhaw arntarnt-aremel rlterrkel-aynteyew ahelengkw-rnem-wety.  
\v 3 Jesus arrer-anteyarl anayntem ikwerenh-rnem-itwewan, nthakenh iwerl-alhey-angenh. Ra arntarnt-arem arrenhantherrenh, rlterrkelemel arrenty ilkwewety.  
\v 4 Arrantherranap arraty-anteyarl aneyel, anantherrarl ilew-angkwarr-antey. Jesus-elap akalty-anthemarl, intem-antey alakenh anaynteyew.  
\v 5 Anantherr Jesus renh ayern-ayntem arrewantherr, rlterrkel-aynteyew apmwa ayntenty-angkwarran, rarl rlterrk aneyel-apeny. Alakenhanap arrantherr iterl-aremarl, Akngeyarl arrewantherr ilkelheyel artewentyel.   
\s1 Warrkerr-aynteyew; nthakenh arwa aney-angenh  
\p
\v 6 Anewantherrenh-rnemay! Arrwekel-antey anantherr angka nhenh ilew: “Ingkerr warrkerr-aynteyew, apwert inaynteyewan, amern payemeleyew.” Ingwerentyakel iylpelant aweyel, arwa anerl-anemel, ingwer-rnemewant aparelherl-anemel. Jesus rantey angkeyel alakenh: “Warrk-wetyarl arlkarerreyel-rnem-itwel aney-angenh.”  
\v 7 Anantherran arwa aney-angenh alakenh-anyem, arrewantherr-itwelarl anenheng-areyan. Warrkant irrenh anantherran, arrantherrap iterlarl-areyel. Anantherr-apenyap arrantherr anemeran.  
\v 8 Ingwerentyelarl amern anthenh-penh, apwertarlap ikwer angkep antheynenhan. Itwernew-then ingwel-then anantherr warrkerrenh artewentyelarl, apwert inaynteyewan. Ingwer-rnemew anantherr aparelhey-angenh, arrangkw.  
\v 9 Kel warrkenh Akngey-wenh-rnem anantherr mwerr ingwer-rnem ayernem amernew, Akngey-wenhewarl angkew anantherr akalty-antheyel. Anantherranap iterrew, “Nthakenh ayerney-angenh alakenh. Mwerr-angkwarrant akalty-anthaynteyew.” Warrkerrenh anantherr, arrantherraw areyew-awaty alakenh iterremel, “Ya, anantherr warrkerremer arrpemarl Paul-rnem-apeny.”  
\v 10 Arrewantherr-itwelarl anenheng-arey, anantherr alakenh arratyelenh: “Ingwerentyarl warrk-they ipmelhem, rap amern-wenyarl aneman.”   
\p
\v 11 Ingwerentyel anenhantherrenh ilew, ingwer-rneman arrantherr arwarl aneyel-rnemarl, warrkerrey-angenh. Arwarl ampererremel alherl-apeyel, ingwer-rnemew tyel-angkerl-apeyel, ingwer-rnem-thenap warrk-itwew apatelhelerl-apeyel.  
\v 12 Anantherrap renh-rnem ileyel pip nhenh-angkwarr, “Jesus-arl angkeyel-angkwarr, ‘Arratyerreyew! Warrkerr-aynteyew intem, amern inaynteyew!’”  
\v 13 Arrenhantherrenh anantherr ingkerrenh-antey ileyel, “Warrk-wety ipmelherrey-angenh-antey! Intem-antey arraty anayntenherr-arey!”   
\p
\v 14 Ingwer-ingwer arrantherr akarrerreyenh tyaty-warl. Ingwerentyel pip nhenh reytemeleyenh, arrantherrap aweyenh-anem. Anyent apekan awelhey-angenharl angka nhenhew. Apmwel-ayetharlap ra iterreman. Kel tyaty-areny-rnem ilenh-arey, ament arrpemarl ikwer-wety aneyew. Ra apek nyerrerreyew mwanty iterremel.  
\v 15 Kel arrantherr ikwer mwanty iterrenh-arey, ran Akngey-wenh arrpemarl. Akeleytan ikwer angkenh-arey ahelerrey-angenh, raw arraty-angkwarr-anem aneyew.   
\s1 Kel angka nhenh ywerrelhelem-anem  
\p
\v 16 Jesus-elant anenhantherrenh akeleytelem. Anantherrap renh ayern-ayntem, arrer anaynteyew arrewantherr-itwel, inweng-then arternpel-aynteyew.   
\p
\v 17 Athanem Paul-el nhenhan ingkwerneyel. Ingwerentyakel katy ingkwernew angka nhenh pip-warl. Athanem nhenhan itep atyenhel-anemarl ingkwerneyel pip akert-warl. Alakenh-anyem atha ingkwernerl-aneman. Arrantherrarl alakenh-anyem arem, arrantherrap iterl-arem, atharl thwenewarl pip nhenhan. Ingwerentyakel thweney-angenharlap renhan, arrangkw.   
\p
\v 18 Anantherran Jesus Christ ayern-ayntem, arrenhantherrenh arntarnt-araynteyew intem-antey mwanty.  
\p Kel-antey.