\id 1TH AL1TH 5 May 09 Alyawarr (Blackman AuSIL) 
\h 1 Thessalonians 
\toc2 1 Thessalonians 
\toc1 Pip Thessalonica-areny-rnem-warl, Namp 1 
\mt1 Pip Thessalonica-areny-rnem-warl, Namp 1  
\imt1 Angka nhenhan alakenh aynteyel  
\ip \it Paul-el Silas-el Timothy-el-akerr rernem pip nhenh thwenew akngerr Akngey-wenh-rnemew apmer Thessalonica-warl. Pip-angkwarr rernem akngerr ilem arraty, rlterrk anaynteyew Akngeyew.\it*  
\ip \it Thessalonica tawen ayntenh apmer Macedonia-itwew. Paul Silas Timothy-akerr alhew apmer ikwer-warl, angka mwerr-angker Jesus-akert ilaynteyew. Apmer ikwer-areny-rnem ampwal ahern-areny-rnemew-tangkwel kwenerrenh. Akngeyan rernem iterl-arey-angenh. Rernemarl angka mwerr-angker Jesus-akert awew, ingwerenty Christian-anem irrew.\it*  
\ip \it Jew ingwer-rneman arlkarerrenh, angka Jesus-akert awewerr. Rernemap arlkarerrenh Paul-rnem-wety, apmer ikwer-they renh-rnem irrentenh. Rernemap anterrew tawen Berea-warl, ikwer-they tawen Corinth-warl-anem. Angka nhenhan aynteyel Acts-itwew (Acts 17:1-16).\it*  
\ip \it Timothy ra angkep alpew Thessalonica-warl, Christian rlengkeny-rnem rlterrkel-aynteyew. Rarl apey-alpew angkakert Corinth-warl Paul-rnem-warl, rernemap pip nhanyem-anem ingkwernew, thwenew-anem Thessalonica-areny-rnem-warl.\it* \fig |src="GT map 1 Thes 1 K.tif" size="col" ref="1 Thessalonians 1:0" \fig*  
\ip Thessalonica-areny-rnem Akngeyew arraty anenh mwerrant-arey. Paul-rnem inkwerelhew ikwer-rnem artewenty. Ingwerentyan intem iterrenh arlta ikwer, Jesus-arl apetyeyenhew angkep. Ingwer-rnem warrk-wety ipmelhew, apmwel-ayeth iterrew, “Jesus angkep rlengk-antey apetyeyenh.” Ingwer-rneman artewenty iterrenh ahaperrewarl-rnemew. Rernem iterrenh apmwel-ayeth, “Jesus-arl angkep apetyeyenhel, ikwerenh-rnem ineyew, ra renh-rnem iwerl-alhewerr.”  
\ip Paul-rnemel alakenh pip nhenhan ingkwernew, renh-rnem akalty-antheyew arraty. Aley-anem angka aynteyel “Thessalonica-areny-rnem-warl Namp 1” (1 Thessalonians).  
\c 1  
\nb
\v 1 Atharl Paul-el pip nhenhan angkakert ingkwerneyel. Atha Silas-el Timothy-el-akerr anantherrarl thweneyel angka nhenhan arrewantherr, Akngey-wenh-rnemew Thessalonica-areny-rnemew. Arrantherran Jesus Christ apenteyel-rnem. Anantherrap Akngeyarl ayern-ayntem, arrewantherr athamerr-aynteyew, inweng-then arternpel-aynteyew.   
\s1 Akngeyel Thessalonica-areny-rnem rlterrkeleyel  
\p
\v 2 Anantherran Akngey nakem, arrantherrarl renh mwerr-angkwarr apenteyel. Anantherrarl angkem Akngey-warl-athek, renhap ayern-ayntem arrewantherr.  
\v 3 Anantherr iterl-areyel, arrantherrarl warrk mwerr-angker mpwarem intem, rlterrk iterremel ikwer. Arrantherran inngarl ilkelheyel ingwer-rnemew, mwerr-angker-then intem mpwareyel ikwer-rnemew. Arrantherrap rlterrk anem, ingwer-rnemelarl arrenhantherrenh irrwernem-angkwarran. Arrantherr arternp arntarnt-arelheyel, Jesus rarl apetyeyenhew angkep.   
\p
\v 4 Anewantherrenh-rnemay Christian-rnem! Akngey ilkelheyel arrewantherr, arntarnt-areyel mwanty arrenhantherrenh. Anantherran iterl-areyel, rarl arrenhantherrenh ayerrpelew.  
\v 5 Arrantherrap awew, arrakertelarl anantherr ilenh. Inweng Mwerr-angker-akertel anantherr akalty-anthenh, ilek-ilek mwerr-angker mpwaremel. Arrantherran iterl-areyel, anantherrarl arrewantherr-itwew mwerr-angkwarr anenh.  
\v 6 Arrantherrap arew-anem, anenhantherrenhap iwarrernew-anem. Arrantherrap Ingkart-thenarl iwarrernew alakenh. Ikwereng-arey ingwer-rnemel arrenhantherrenh irrwernenh-angkwarran, Inweng Mwerr-angkerel arrenhantherrenh rlterrkelenh, inkwerelhemel awelh-aynteyew angka ikwerew.  
\v 7 Awethem arrantherr yanh-angkwarr irrew, ingwer-rnemel areyew. Apmer atherr-areny-rnemelap arrenhantherrenh arew; Macedonia-areny-rnemel-then Achaia-areny-rnemel-then.  
\v 8 Akngerrel angka Jesus-akert awew apmer ikwer-atherr-itwew, apmer ingwer-rnem-they-then. Rernem ingkerrenhel awew, arrantherrarl Akngeyew iterrew arraty-angkwarr. Nthakenh anantherr iley-angenh arrewantherr-akert, rernemarl kel amentel-antey awew.  
\v 9-10 Apmer ingwer-areny-rnemelarl angka arrewantherr-akert awew, rernemap ingkerrenh ilew. Ingkerrel-anem iterl-areyel, arrantherran Thessalonica-areny-rnem anewantherr inkwerelhew, anantherrarl angka Akngey-wenh mwanty anayntelemel ilew. Rernem ilenh, arrantherr kwenerrenh ampwal apmwa ahern-areny-rnemew-tangkwel itethew-arrpantey. Aleyan arrantherrap ipmelhew-anemarl alakenh-wety. Apmwangkwarr-tangkwel arrantherr iterrenh, aleyan Akngeyewant-anem iterreyel. Rarl anyent itetharl aneyel intem, rap Alerikw ikwerenh itethelew ipmethey. Arrantherr arntarnt-arelhemel mpwelheyel, Jesus-arl angkep apetyeyenhew irrwerl-they. Ikwerenh-rnemarl ra inerl-alpeyenh. Akngey ra nthakenh ikwer-rnem awakelhey-angenh, rarl ingkerrenh court-emelemel ayerneyenheng-areyan.   
\c 2  
\s1 Paul-el angka mwerr-angker ilew Thessalonica-itwew  
\p
\v 1 Anewantherrenh-rnemay Christian-rnem! Arrantherr iterl-areyelarl, anantherran arwa arrkent akalty-anthey-angenh. Arrantherrap iylparethel awew.  
\v 2 Arrantherr iterl-areyel arrpemarl, anantherrarl apmer Philippi-warl-tangkwel alhew. Akngerr apmer ikwer-areny-rnemel iltew, pwarrk anthew anenhantherrenh. Anantherrap alhew apmer arrewantherrenh-warl-anem. Akngeyelanap anenhantherrenh rlterrkelew-antey, ingwer-rnemelarl artewentyel irrwernenheng-arey. Alakenh-angkwarranap anantherr angka mwerr-angker arrewantherr alhewer-anemarl ilenh.  
\v 3 Mwerr-angkwarr anantherr arrenhantherrenh ilenh. Arrenhantherrenh apmwel-ayeth akalty-anthey-angenharl, arrantherr apmwangkwarr alheyew, arrangkw. Anantherran arrkernelhey-angenharl, ilkwa aneyew, arrangkw, arrantherraw areyew nakemel. Anantherr terikemeley-angenh arrenhantherrenh, arrangkw. Alakenhan anewantherrenh-angkwarr-weny.  
\v 4-5 Nthakenh anantherr ingwer-rnem ikwer-rnem-wenh-angkwarr iley-angenh, rernemaw nheng awelheyew-awaty, rernemap apwert antheyew-awaty anewantherr ikwer-penh. Arrangkw. Nthakenh anantherr irrtyertel ingwer-rnem nakey-angenh, renh-rnem irrngerney-antheyew. Arrangkw. Akngey renhant anantherr irrngerney-anthaynteyew. Ra iterl-areyelarl, anantherr ikwerenh-angkwarr iterreyel. Anantherr arraty-angkwarr angkem intem-antey apmelerrel-ayeth. Akngeyel awem, rap angkem, “Rernem arraty-angkwarr angkeyel. Rernemap angka atyenhan intem-antey ileyn-aynteyew.” Ranap aweyelarl, anantherrarl alakenh angkeyel arrewantherr.  
\v 6 Anantherrap warrkerreyel ikwerenh-angkwarr. Alakenhap anantherr ilkelhey-angenh, ingwer-rnemel anenhantherrenh nakaynteyew, ilkwa antwemel.   
\p
\v 7 Anantherr alhew arrewantherr-warl, Christ rarl thwenew anenhantherrenh. Artwa ilkwernem-apenyap anantherran. Kel pwerep-anthey-angenh arrenhantherrenh, arrangkw. Alyepel-antey angkenh arrewantherr athamerremel, amikwarl ampa ikwerenh-rnemew athamerrem-apeny-angkwarr.  
\v 8 Anantherrap ilkelhew arrewantherr artewenty inngarl, anyent-anem irremel arrewantherr-itwel. Inkwerelhemelap arrenhantherrenh ilew angka mwerr-angker, Akngeyel rarl anthew.  
\v 9 Arrantherr iterl-areyelarl, anantherrarl iltyel warrkerrenh, arrenhantherrenharl akalty-anthenheng-arey. Arlta arrpanenhelap warrkerrenh anantherr, apwert amernew ineyewan, arrewantherrew aparelhey-angenhel.   
\p
\v 10 Anantherr anew-anenh arraty-angkwarr arrewantherr-itwel, arrantherr arenh. Akngeyelan arew arrpemarl irrwerl-theyan.  
\v 11 Arrantherr iterl-areyelarl, anantherrarl arrenhantherrenh arntarnt-arenh, aynelikwarl alerikw ikwerenh-rnem arntarnt-arem-apeny. Alakenh. Akalty-antherl-apenh rlterrkelemel arrenhantherrenh.  
\v 12 Ilemel arrenhantherrenh, arraty anaynteyew, Akngeyaw inkwerelheyew-ayteng. Rlwaneynew ra arrenhantherrenh, alpeyew aney-alpeyew ikwer-itwel irrwerl, rarl atyetyart ilkwa aneyel-itwel.   
\p
\v 13 Anantherrarl anenh arrewantherr-itwel, angka Akngey-wenh ilenh, arrantherrap inkwerelhemel iylpareth awelhew. Aleyan Akngeyan nakemel iterl-arem anantherr, arrantherrarl arraty iterrenh alakenh: “Angka nhenhanap artwewenh-weny, arrangkw. Innga angka Akngey-wenharl nhenhan.” Akngeyan arrewantherr angkew, alakenh rlterrk-ayteng iterr-aynteyew ikwer. Aleyan ra angkeyel-antey.   
\p
\v 14 Anewantherrenh-rnemay! Arrewantherrenh-rnemel arrenhantherrenh irrwampenh-anthenh. Apmer ingwer-itwew Judea-itwew-tangkwel alakenh ayntew arrpemarl. Jew ahelengkw-rnemel Christian-rnem atwenh apmer ikwer-itwew.  
\v 15 Awank-akerr Jew ahelengkw-rnemel atwenh ipmew angkakert Akngey-wenh-rnem-tangkwel. Alakenh arrpemarl Jew ahelengkw ingwer-rnemelan Jesus renh ipmew atwew. Aleyan anwenantherrenh-anemarl irrentew apmer ingwer-rnem-they. Rerneman akngerr-wety ilkelhey-angenharl. Kel Akngeyan ikwer-rnem inkwerelhey-angenh arrpemarl.  
\v 16 Nthakenh anantherr alethang-rnem angka mwerr-angker iley-angenh, ahelengkw-rnemel-anem anenhantherrenh artwerelenharl. Alakenhan ingwer-rnem apatelhelenh, angka awewerr, angkeperrenhey-alpewerr Akngey-warl-athek. Rernem intemarl apmwelhelenh alakenh, apmwa innganemap mpwarew artewenty. Kel Akngeyanap artewenty inngarl ahelerreyel ikwer-rnem, rap renh-rnem irrwampenh-antheyenh-anem artewenty.   
\s1 Paul-rnem ilkelheyel, Thessalonica-areny-rnem areyew  
\p
\v 17 Jew ahelengkw-rnemel anenhantherrenh artwerelenh, anantherrap alpew-tangkwel Thessalonica-they. Anantherrap alharntew arrewantherr, ampa akely iwerl-alhenty-apeny. Anantherr artewentyel iterrenh arrewantherr intem-antey, ywarn iterremel, arrenhantherrenh arerl-alpeyew.  
\v 18 Ayeng Paul arrkernelhew akngerr-inger, arrenty ilkwelanap arrngertewew.  
\v 19-20 Anantherr inkwerelheyel innga arrewantherr. Jesus-arl apey-alpeyenhel, ingkerrenh ayerneyew, anantherrap inkwerelhemel ileyenh angka arrewantherr-akert. Ya, innga anantherran inkwerelheyel arrewantherr.   
\c 3  
\p
\v 1 Kel arleng-alenty anantherr anenh tawen Athens nhenh-itwew, alharntemel anenh arrewantherr. Silas aylanth angkerrew, “Mwerrangay aylanth arteny anem? Timothy-ant apek alhemer Thessalonica-warl.”  
\v 2 Renhantap aylanth thwenew arrewantherr-warl. Anantherr ingkerr warrkerreyel, angka mwerr-angker Akngey-wenh ilerl-apaynteyew apmer arrpanenh-itwew. Renhap aylanth thwenew, rlterrkelemel akalty-anthaynteyew arrenhantherrenh.  
\v 3 Akngeyel ilew arrwekel-antey, ingwer-rnemelarl irrwernerl-aneyenh. Rernemap apmelerr-angkwarr irrwernem Christian-rnem anenhantherrenh. Anantherran iterrew arrewantherr, angkeperrewerr apek Akngey-wety, ingwerentyel arrenhantherrenh irrwernentyel.  
\v 4 Anantherrarl anenh arrewantherr-itwel, anantherr ilenh alakenh, “Ingwer-rnemelan Christian-rnem anenhantherrenh irrwerneyenh, apmwangkwarr mpwaremel.” Inngarlap anewantherr alakenh-anyem aynteyel.  
\v 5 Alakenh-wety anantherr artewentyel iterrenh arrewantherr, angkeperrewerr arrantherr. Anantherr iterrenh alakenh, “Alep Akngeyant rernem apenteyel-antey? Arrangkw apek. Ywarn apek akalty-anthenh renh-rnem. Arrenty ilkwel apek renh-rnem arrkernew, rernem Akngey-wety ipmelhenheyew.” Alakenh-wety aylanth Timothy thwenew. Anantherr iterl-areyew, arrantherr arraty anentyew Akngeyew.   
\s1 Timothy inkwerelhemel apey-alpew angkakert  
\p
\v 6 Aylanthap mpwelhenh arrpemarl Timothy-ew, rarl apey-alpenhew. Rarl apey-alpewel, iley-alpew-anem aylewanth, “Weth-rnem arraty-antey aneyel Akngey-angkwarr, Jesus apentemel. Mwerrant-arey aneyel arntarnt-arerremel. Rernem inkwerelhemel arrpemarl iterreyel anewantherr. Rerneman ilkelheyel, mpwelenhanthenh areyew arrpemarl.”  
\v 7 Ya, aylantharl angka awew, aylanthap inkwerelhew artewenty. Angkap arrewantherr-akert awew, aylernanthenhap irrngerney-anthew. Ingwer-rnemel irrwerneyel-antey anenhantherrenh, arlkanap alpwelyeleyel. Anantherranap inkwerelhemel-antey iterreyel arrewantherr.  
\v 8 Aleyan arlka mwerr-anem anantherr awelhem iterl-aremel, arrantherrarl Akngeyew aneyel-antey intem rlterrk.  
\v 9 Ya, anantherr iterl-areyel alakenh, Akngeyelarl arrenhantherrenh arntarnt-areyel. Alakenh-anyem ra anenhantherrenh irrngerney-anthem. Anantherr intem-antey inkwerelhemel renh nakem, arrantherrarl ikwer awelheyneyel.  
\v 10 Anantherr rlterrkel mwanty Akngey ayernem, thweneyew angkep arrewantherr-warl. Arrantherran akaltyerreyel-antey Akngey-wenh-angkwarr. Anantherran intem-antey akalty-anthaynteyew arrenhantherrenh.   
\p
\v 11 Alakenhewarl Akngeyan anantherr ayerneyel Jesus-then, “Thwenenh-atherr, anantherr alheyew Thessalonica-warl, renh-rnem areyew.”  
\v 12 Anantherrap Jesus ayernem, arrantherraw mwerrant-arey anaynteyew, arntarnt-arerr-aynteyew athamerremel ingwer-rnemew-then. Anantherrarl arrewantherr athamerrem-apeny, alakenh.  
\v 13 Jesus anantherr ayernem, arrenhantherrenh rlterrkeleyew, arrantherr arraty anaynteyew intem-antey. Akngeyelap arem, arrantherrarl arraty aneyel apmwewety. Rap inkwerelheyenh arrewantherr, Jesus-arl apey-alpeyenhel irrwerl-they antyerl ikwerenh-rnem-akert.   
\c 4  
\s1 Intem-antey anaynteyew alakenh, Akngey inkwerelh-aynteyew  
\p
\v 1-2 Anewantherrenh-rnemay! Anantherr akalty-anthenh, Akngeyew arraty anaynteyew, raw inkwerelheyew. Arrantherrap awelhew. Akngeyan inkwerelhem artewentyel arrewantherr. Aleyan Jesus ilkelhem, anantherr ileyn-aynteyew arrpemarl: arraty-angkwarr anaynteyew, anantherrarl akalty-anthenh-angkwarr arrwekel-antey. Nthakenh anantherr angka anewantherrenh iley-angenh, arrangkw. Angka Jesus-wenhant anantherr ilenh.   
\p
\v 3 Akngeyanap ilkelhem alakenhew: arrantherran ingwer-rnem-apeny-weny anem, apmwel-ayeth aney-angenh. Artwethen arelh-then ingwer-wenh angwarey-angenh, arrangkw.  
\v 4-5 Akngeyan ilkelhem, arelh Christian anaynteyew artwa anyentelant. Artwan irrkaty-angkwarr arrpemarl anaynteyew arelh anyent-akert. Nthakenh iwerrey-angenh! Arntarnt-arerr-aynteyew! Ingwer-rnem-apeny irrey-angenh, Akngey iterl-arey-angenh-rnem-apeny. Artwethen arelh-then rernem rakerrem.  
\v 6 Akngeyan angkeyel, “Nthakenh ingwerentyak-wenh irrtyert-ingwey-angenh.” Artwa apekarl ywerrem arleng, arelh nthakenh ingwey-angenh anteng. Akngeyanap ahelerremarl ikwer artewenty, rap pwarrk anthem irrtyert-awarr renh. Arrantherr iterl-areyel-anem, anantherrarl angka nhenh ilenh arrwekel-antey arrpemarl arrewantherr.  
\v 7 Akngeyelan anenhantherrenh ayerrpelew, ikwerenh-anem anaynteyew. Alakenh-anyem anantherr intem-antey mwerr anerl-anemer rapeny, angkepelarreng apmwelheley-angenh.  
\v 8 Ingwer-rnemelanap angka ikwerenh iylpelant aweyel. Angka nhenhan artwewenh-wenyarl, arrangkw. Angka Akngey-wenhan rernem iylpelant aweyel. Akngeyel rantap Inweng Mwerr-angker anthew arrewantherr. Inweng Mwerr-angker renhanap nthakenh iylpelant awey-angenh, arrangkw.   
\p
\v 9 Akngey ra arrenhantherrenh akalty-anthew, mwerrant-arey arntarnt-arerr-aynteyew. Arrantherrap ikwer awelhewarl. Nthakenh anantherran akalty-anthey-angenh arrpemarl pip nhenh-they.  
\v 10 Anantherr iterl-areyel, arrantherrarl arntarnt-areyel Christian ingwer-rnem apmer arrpanenh-areny apmer Macedonia-itwew. Anantherr pip nhenh-angkwarr ileyneyel, arrantherr intem-antey alakenh mpwaraynteyew.  
\v 11 Mwerr-angkwarr aynteyel, arraty-anem anaynteyew akeleyt. Ingwer-rnem irrwerney-angenh, ingwer-rnemew-then tyel-angkey-angenh. Mwerr-angkwarr arrpemarl alakenh aynteyel. Arrantherr warrkerremer, apwert inaynteyew, arnkwethen amern-then payemeleyew. Anantherr ilanthew alakenh arrwekel-antey.  
\v 12 Akngey iterl-arey-angenh-rnemel areyel, arrantherrarl arraty aneyel mwerr, rernemap arrenhantherrenh nakemarl. Arrantherr arraty anenty intem-antey, arrantherrap inkwerelhemel anenhem, ingwer-rnemew aparelhey-angenh-anem.   
\s1 Alakenh-anyem aynteyenh, Jesus-arl angkep apetyeyenhel  
\p
\v 13 Anewantherrenh-rnemay! Arrantherran iterl-areyel, Christian ingwer-rneman ahaperrewarl. Rernemarl iteth anenhel, rernemap Akngey apentenh. Nthakenh arrantherr intem-antey amperrngerrey-angenh ikwer-rnemew, arrangkw. Akngey iterl-arey-angenh-rnemant intem-antey artnemel anem apal. \fig |src="GT grieving.tif" size="col" ref="1 Thessalonians 4:13" \fig*  
\v 14 Anantherr ingkerrel Akngey iterl-areyel, Alerikw ikwerenharl Jesus itethelew ipmethey. Anantherrap iterl-areyel, Christian ikwerenh-rnem ra itethelem arrpemarl ipmethey irrkaty-angkwarr. Rernem itetherreyenhel, Akngeyelap renh-rnem akarreleyenh Jesus-warl irrwerl. Rernemap aney-alpeyenh intem-antey Akngey-itwel, Christian ingkerr.   
\p
\v 15-16 Christian ingwer-rnem-alew, aleyarl ahern nhenh-itwew iteth aneyel-rnem? Nthakenharl rernem irrem, Jesus-arl apey-alpeyenhel? Jesus-el ilenh alakenh. Rarl apey-alpeyenhel, alakenh-tangkwelap irreyenhan. Antyerl ilkwan arlkeyenh. Antyerl ingwerelan angkelh-angkelheleyenh terampet atayel innga. Jesus ranem atwarreyenh irrwerl-they, atayel ilanthemel, Christian ipmepenh-rnem itetherrenhey-alpeyew. Rernem-tangkwelap itetherreyenhan ipmethey. Christian iteth-rnem nthakenh arrwekel irrey-angenh, Akngey-itwel aney-alpeyew.   
\p
\v 17 Ikwer-theyan Akngeyel Christian iteth-rnem anenhantherrenh ineyenh, rap akarreleyenh ingkerrenh-anem anenhantherrenh kwenpay-angkwarr. Jesus-anem rlwateyenh irrwerl alker-itwew, rarl apetyeyenh ingweyew anenhantherrenh. Anantherr aney-alpeyew ikwer-itwel intem-antey.  
\v 18 Arrantherr Thessalonica-areny-rneman intem-antey ilerrerl-anemer angka nhenh impen arlta ikwerew-atety, irrngerney-antherremel.   
\c 5  
\p
\v 1-2 Anewantherrenh-rnemay! Arrantherr iterl-areyelarl angka weth, Jesus-arl apetyeyenh-akert. Nthakenh anantherr akalty-anthey-angenh intem pip nhenh-they. Anantherr ingkerrel iterl-arey-angenharl, rarl apetyeyenhan. Ikwereng-arey akngerran anerl-aneyenh apal, angka Akngey-wenhew awelhey-angenh. Wetharl irrtyert-awarr alhem-apeny apmer ingwer-warl ingwel, ran aynteyenh. Apmer ikwer-areny-rnemap apelparl ayntem, ikwer arntarnt-arelhey-angenh. Irrkaty-angkwarr arrpemarl Jesus ran apetyeyenh anamerl-antey, akngerr ikwer arntarnt-arelhey-angenh anerl-aneyenh.  
\v 3 Ikwerel-antey akngerr angkerrerl-aneyenh apal alakenh, “Anantherran mwerrarl aneyel. Nthakenh ingwer-rnemel anenhantherrenh atwey-angenh!” Akngeyelanap renh-rnem pwarrk antheyenh arwapenyarl. Nthakenh irrtyert anterrey-angenh, irrtyert aylpeyew, arrangkw. Mwerrant-arey rernem apal anew-anerl-aneyenh arlengew-alenty. Ikwer-penhan renh-rnem Akngeyel pwarrk antheyenh arwapeny artewenty innga.   
\p
\v 4-8 Arrantherran ingwer-rnem-apeny-wenyarl, Akngey iterl-arey-angenharl. Atemwengkel-apeny rernem aneyel. Atemwengkel nthakenh arey-angenharl wethey. Christian-rnemew anewantherr alakenh-wenyarl. Lyenentyel-apeny anantherran aneyel. Lyenenty-angkwarran anayntarl arem. Anantherrap intem arntarnt-arelhemer Jesus ikwer, rarl apey-alpeyenhew. Ingwer-rneman ankwel atwenty-apeny aneyel. Wetharl ingwerenty atyek-atyek arntarnt-arelhem-apeny, alakenh arrpemarl aynteyel anewantherr Akngey-angkwarran alakenh-anyem. Anantherrap mwerrant-arey arntarnt-arerremer, iterl-arerl-anemel, anantherrarl aney-alpeyenh ikwer-itwel intem-antey.  
\v 9 Ra anenhantherrenh ayerrpelew ikwerenh-anem, nthakenh anewantherr awakelhey-angenh. Ra anewantherr ilkelhew, anantherr Jesus apenteyew. Jesus rap anenhantherrenh akngeyneyenh, Akngey-itwel aney-alpeyew intem-antey.  
\v 10 Rarl katy ilwew anewantherr, anantherrap alpeyenh, aney-alpeyew ikwer-itwel intem-antey. Christian anyent iylpelerlewem anantherr, kel mwerrarlap alakenhan. Christian ipmepenh iteth-rnem-then ingkerrenh alpeyenh, aney-alpeyew ikwer-itwel.  
\v 11 Arrantherr angka nhenh aley ilerreyel-antey, arrantherrap rlterrkerremarl alakenhan. Intem-antey ilerrerl-ayntenh-arey, arrantherr aneyew inkwerelhemel, intem apentemel.   
\s1 Alakenh-anyem intem aneyew Akngeyew  
\p
\v 12 Anewantherrenh-rnemay! Mwanty-antey awelh-ayntenh-arey angka nhanyemew. Akngeyel irrpetyap arrernew, atyetyart aneyew Christian-rnemew arrewantherr. Rernem arrewantherr artewenty warrkerrem, mwantyel arntarnt-araynteyew arrenhantherrenh.  
\v 13 Arrantherran ikwer-rnem awelhemer, rernemarl arrenhantherrenh akalty-antheyel, arraty-angkwarr Akngeyew anaynteyew. Intemarlap ikwer-rnem ilkelh-ayntenh-arey, rernemarl Akngeyew warrkerreyelewan. Akeleyt mwerrant-arey anayntenh-arey, akwetyemel angkey-angenh.   
\p
\v 14 Angka ingwerew nhenhew arrantherr awelhemer arrpemarl. Arrantherr ingwer-rnem warrk-wety ipmelhew. Renh-rnem ilemer, rernem warrkerr-aynteyew intem-antey. Ingwer-rnem atererremel anem. Alyep ikwer-rnem angkemer, rernem inkwerelheyew. Ingwer-rneman arlka rlterrk-weny, angkeperrem apek Jesus-wety. Alyep arrpemarl ikwer-rnem angkemer, rlterrkelemel renh-rnem. Anamerl-antey ingwer-rnemew ahelerrey-angenh, arwa alpemelemant renh-rnem.  
\v 15 Ingwerentyel apek apmwel-ayeth mpwarem ingwerew. Ra apek ikwer awakelhewerr, arrantherrap renh artwerelemarl. Mwerr arrpemarl anayntenh-arey Christian-rnem arrantherran. Mwerrant-arey anayntenh-arey Jesus iterl-arey-angenh-rnemewan.   
\p
\v 16 Inkwerelhemel anayntenh-arey intem-antey.  
\v 17 Akngeyew intem-antey angkayntenh-arey, ipmelhey-angenh.  
\v 18 Rlterrk apek anem arrewantherr aleyan. Kel mwerrarl alakenhan. Intem-antey renh nakayntenh-arey. Akngeyan ilkelheyel, intem-antey anaynteyew alakenh, Jesus-wenh-anemarl arrantherran.   
\p
\v 19 Inweng Mwerr-angker apek angkenty, iylpelant awey-angenh.  
\v 20 Ingwerenty apek angkem, “Inweng Mwerr-angker atyeng angkew.” Mwantyap awelhenh-arey angka ikwer.  
\v 21-22 Akngeyap ayernenh-arey alakenh, “Arratyang ra angkeyel?” Arraty apekarl ra angkeyel, awelhenh-arey angka ikwer. Arrangkwel apekan, angka ikwer awelhey-angenharl. Ra apek angka arraty awey-angenh. Angka arratyewant awelh-ayntenh-arey. Angka apmwan mentyarl awayntenh-arey.   
\p
\v 23 Anantherr Akngey ayerneyel, arrenhantherrenh arntarnt-araynteyew mwanty, arrantherr inkwerelhemel mwerrant-arey anaynteyew. Anantherr ayerneyel renh, arntarnt-araynteyew arrenhantherrenh inweng-then arlkethen ingkerr-antey, arrantherrap anayntem apmwewenyarl. Jesus-arl apetyeyenhel angkep, rap arrenhantherrenh mwerr antweyenh. Nthakenh ingwerentyakel ayntarrp-iley-angenh.  
\v 24 Inngarlap Akngeyelan mpwarem alakenh arrewantherr, rarl ayerrpelew arrenhantherrenh. Rap nthakenh iwerl-alhey-angenh arrenhantherrenh, arrangkw-anemarl.   
\p
\v 25 Anewantherrenh-rnemay! Anewantherran Akngey ayern-ayntenh-arey arrpemarl.  
\v 26 Arrantherrarl akarrerreman ingkerrenh, inkwerelhemelap atnyenerrenh-areyan.   
\p
\v 27 Angka ingwerant-anem anyent atha Paul-el ileyew arrewantherr, Jesus-elarl aweyel-wety: “Pip nhenhan inenh-arey, reytemelemel Akngey-wenh-rnem ingkerrew, rernemarl akarrerremew ingkerr.” \fig |src="GT Bible teaching.tif" size="col" ref="1 Thessalonians 5:27" \fig*   
\p
\v 28 Anantherrap Akngeyarl ayern-ayntem, arrewantherr athamerr-aynteyew, inweng-then arternpel-aynteyew.  
\p Kel-antey.