\id REV ALUNE - Tim Juni & Okt 2011 
\h Tatike pine Uonore 
\toc1 Tatike pine Uonore 
\mt1 Alla Iaseluke yelu rebe tatike pine uonore ete Yohanese 
\iot Lepate Menai 
\ip Buku meije, ebeteke loko yelu rebe Yesuse Kristuse Isibakelu ete Yohanese. Yesuse ruaI pine Isibake pusue meru. Memenaije Yohanese iselu ile sae me, selui saka Tamata Eni Nanare. Mere Yesuse. Ialike lapu nanuke roma lelale. Kai lereije balie kena maka bali akwa bei mase ime otoi maka tolae lampuaru esi tlelaru (1:12-16). Eleki iselu Domba Anai. Mere Yesuse. Ikele tehaike Alla Eni otoi maka rue ndete surgare (5:6-14). Eleki ile sae isa kuda putile iakneka kena lisa. Mere Yesuse. (19:11-16). Eleki pamulire iselu Domba Anai rebe Ipleta sakesa kai Alla me kota misete Yerusaleme beluke (21:22-23; 22:1-5). 
\ip Buku meije lekie kena tamata rebe hlaleke loko Kristuse esi supu susate le esi esi hlaleke ktilire pe. Kena mere tamata rebe tamata Romaru esi kbasaesi esi supu pleta kena tatu loko Kaisare, tamata Romaru esi kamale. Tamata rebe hlaleke loko Kristuse Esi supu bunu le esi suka tatu loko Kaisare mo. Esi beteke be, batuke Yesuse pine esi Tuhane. Kaisare esi Tuhane mo hoko esi tatu lokoi mo. Po sie leini esi sele bei hlaleke loko Kristuse le rilasi le Kaisare. Hoko hnauna kena buku meije, eono laleisu ktili leke esi sele bei hlaleke loko Yesuse Kristuse yake. 
\ip Buku meije ebeteke yelu rebe Yohanese iselulu. Yelu rebe lepae batleiyele kena buku meije, tamata rebe hlaleke loko Kristuse kena mere esi natie. Po ite pamuli meije ite natie misere, saisa mo. Masike ele mere, tujuane utama kena yelu rebe selulu kai yelu rebe lepae batleyelu natie be, tamata rebe hlaleke loko Kristuse, namake supu susate mei nusa meije po sele bei hlaleke loko Tuhane Yesuse yake le namake pine Inabu pusue musuru kai Ipleta eti pela (11:15). Kai ite rebe luluIje, ite pleta sakesa kaiNi. 
\ip Yelu rebe selulu pine lekie kena buku meije, ebeteke kota itu kai Alla Eni Roa itu (1:4, 11); Miseta itu bei Alla (1:3; 14:13; 16:15; 19:9; 20:6; 22:7; 22:14); Lepata itu kena isike Allare (5:12; 7:12); otoi maka tolae lampua itu (1:12), kai yelu bokala makete lekwe (selu 1:16; 5:1, 6; 8:2; 12:3; 15:6-7; 17:9). Nomore 7 esi natire kurane sasaisa mo, pusue me. 
\iot Isi 
\io1 1. Lepate menai kai hlamate (1:1-8) 
\io1 2. Yelu rebe Yohanese iselue memenaije (1:9-3:22) 
\io2 a. Tamata Eni Nanae ime otoi maka tolae lampuaru esi tlelaru (1:9-21) 
\io2 b. Sulata ete jemate toini me kota ituaru (pasale 2-3) 
\io1 3. Yelu rebe Yohanese Iselulu nomore luare (4:1-16:21) 
\io2 a. Domba Anai rebe Ikele tehaike Alla Eni otoi maka rue ndete surgare (pasale 4-5) 
\io2 b. Domba Anaije Ibara segela ituaru (6:1-8:5) 
\io2 c. Hbue trompeta buai ituaru (8:6-11:19) 
\io2 d. Tanda iture, esi natire susata itu kai yelu makete rebe tatike pine uonore (pasale 12-16) 
\io1 4. Yelu rebe Yohanese iselue nomore telure (17:1-21:8) 
\io2 a. Yohanese iselu bina ntasite, eni nane Babele (17:1-19:10) 
\io2 b. Yesuse, Isa kuda kai Inabu pusue Eni musuaru (19:11-21:8) 
\io1 5. Yelu rebe Yohanese Iselue nomore atare: Iselu bina rebe ikai kai Domba Anaije. Bina mere eni nane Yerusaleme beluke (21:9-22:5) 
\io1 6. Yesuse Iluake suike (22:6-21) 
\c 1  
\s1 Alla Ibeteke saisa rebe tatike pine uonore 
\sr 1:1-3 
\p  
\v 1 Buku meije, ebeteke loko yelu rebe Yesuse Kristuse Isibakelu ete tamata rebe esi layani Eni makerike. Alla ruaI Iulake Yesuse Kristuse Iaseluke pusue meru etesi leke esi rekwa yelu rebe suke uono nere. Yesuse Kristuse Iulake Eni malekate iaselukelu ete au, Yohanese, rebe kerike loko Eni makerike.  
\v 2 Eleki au Yohanese, au alenake pusue Alla Eni hnaune rebe Yesuse Kristuse Iaselukelu rebe au selulu kena mataku ruakue. 
\p  
\v 3 Sire rebe ibaise buku meije kai sie rebe esi lene kai esi lulu lepata meiju, esi supu misete bei Alla le pusue yelu rebe betekelu mei buku meije lau mo uono reneka. 
\s1 Yohanese ibeteke hlamate ete jemate toini itu me otoi Asia 
\sr 1:4-8 
\p  
\v 4-5 Au Yohanese, au leki sulate meije ete imi jemata toini itu me otoi Asia tone. Au kotie loko Alla ete imi leke Iriluke misete ete imi kai lalemi ndene noma. Imi supu misete kai lalemi ndene mere bei Alla, Ro Misete kai Yesuse Kristuse. Alla rebe bei akmena sa Ime peneka, kena meije Eri me kai eti pela Eri me. Ro Misete mere kotiNe Roa Itu\f + \fr 1:4-5 \ft Nomore iture, tamata Yahudiaru esi noake mere manea. Hoko kena ayate meije Roa iture natire Ro Misete Irekwa sasaisa neka.\f* rebe ume Alla oaIje. Yesuse Kristuse mere saksi rebe Ibeteke Alla Eni nkenale kena laleIje titinai kai Ikwana akmena bei tamata matalaru kai Ikbasae pusue kamala mei nusa meije. 
\p Yesuse Ioki ite hoko Eni lalakwe ponikele kena tie ite bei iteki dosaru.  
\v 6 Kai Ilupuke ite kena bangsa esa. Ibitike ite kena imame rebe layani Alla, Yesuse AmaIje. Mai ite IsikeNi le Ikbasa eti pela. Amine. 
\q1  
\v 7 Imi lene mimise! Namake Yesuse Iluake kena moputi 
\q2 kai pusue tamata esi seluI. 
\q1 Kai tamata rebe akmenare esi sipaIje lekwe esi seluIje neka. 
\q1 Kai tatike pine pusue tamata mei nusa esi rani hnasike Yesuse. 
\q2 Tatike pine eono ele meije tinai. Amine. 
\p  
\v 8 Tuhane Alla Ibeteke be, “Aure Alfa kai Omega.\f + \fr 1:8 \ft Alfare sou Yunani esi hurupe menaije yo Omegare hurupe pamulire.\f* Le Akmenare Au me peneka, kena meije Auru mei kai eti pela Auru meije neka.” Au pletae nusa meije kai lanite. 
\s1 Yelu rebe Yohanese iselulu me nusa Patmose 
\sr 1:9-20 
\p  
\v 9 Kwali betaya pusumi, au Yohanese. Ite pusumare esa kena hlaleke loko Yesuse Kristuse eti ite supu susate po ite tahane lale neka. Itere, Alla Ikbasae ite saka kamale. Kai ite lalema ktili kena namake Yesuse. Au supu hetie mei nusa Patmose le Au lepae Alla Eni lepata rebe Yesuse Ibetekelu ete aure.  
\v 10 Petu mere Tuhane Eni petu. Ro Misete Ikbasae au eleki au lene saisa na elake titinai me mulikue, lupe trompete.  
\v 11 Nai mere eombe, “Saisa rebe aselure alekie kena buku kuesa eleki natuele ete jemate toini itua me kota itua meiju: Epsuse, Smirna, Pergamuse, Tiatira, Sardise, Piladelpia kai Laodikia.”  
\v 12 Eleki au hali loko mulikue kena selu sire rebe Ilepa loko au mere. Kena au halire au selu otoi maka tola lampu, buai itu ono bei mase.  
\v 13 Kena otoi maka tola lampu meru esi klelare, au selu Ile sae me seluI saka Tamata Eni Nanare, Ialike lapu nanuke roma lelale. Kai lereIje balie kena maka bali akwa bei mase.  
\v 14 Eni buare puti lakwai esa saka loine labui kai mataIje hita saka auwe klitini.  
\v 15 Eni lelale hita saka tembagare pala kena auwere pine ehitare. NaIje sakesa kai kwele elake etetu lapate esi tuleije.  
\v 16 Eni bala makwanale lalake kmalea itu kai sari nanuke entina leilua esiri bei biruIje kai oalaleIje ehita saka lematai hkwatate esi hitaije. 
\p  
\v 17 Eleki kena au seluIje klolike au me oalaleIje saka tamata rebe imata peneka. Po Itolae Eni bala makwanale kena au eleki Ibeteke loko au be, “Rila yake! Aure Yesuse rebe akmena kai rebe pamuli.  
\v 18 Kai rebe kwana eti pela. Au mata peneka po meije Au kwana eti pela. Kai matale Au kbasaele kai tamata matale esi otoi maka ruere Au kbasaele neka. 
\p  
\v 19 Hoko aleki pusue saisa rebe aselure, rebe aselue meije kai rebe tatike pine aselure.  
\v 20 Kmalea itu rebe aselue kena auku bala makwanale mere esi natire jemata toini ituaru esi malekata ituaru. Kai otoi maka tolae lampua itu rebe ono bei mase, esi natire jemata toini ituaru.” 
\c 2  
\s1 Sulate ete jemate toini me kota Epsuse 
\sr 2:1-7 
\p  
\v 1 Eleki Yesuse Ibeteke ete au be, “Aleki ete malekate rebe iraka jemate toini me kota Epsuse be, 
\p ‘Meije lepata bei Au rebe lalake kmalea itu kena Auku bala makwanale kai Au keu me otoi maka tolae lampua ituaru esi lelale rebe ono bei mase esi klelare. 
\p  
\v 2 Au rekwa pusue imi makerike, imi kerike ktili titinai loko Auku makerike, imi supu susate po imi tahane. Au rekwa be imi sebeie tamata neunaru mo. Kai tamata rebe esi beteke ruaise Auku maka ulake, yo siere Auku maka ulake mo, imi tehekesi eleki imi rekwa be esi nloe.  
\v 3 Au rekwa tamata esi ono susate ete imi po imi tahane kena kerike loko Auku makerike rame le imi hlaleke loko Au.  
\v 4 Po Au lake imi le pamuli meije lalemi titinai loko Au lupe akmenare moneka.  
\v 5 Ele mere eti Au beteke ete imi be nete suike imi atate akmenare, kai leu suike lokole le imi atate pamuli meije lau bei akmenare peneka. Hleke imi atate pamuli meije, rebe ekeri imi kena dosare. Sepo mo, hoko Au luake bori imi otoi maka tolae lampure bei esi otoije.  
\v 6 Po imi hidupe mise toto me le imi suka tamata rebe esi lulu Nikolause eni hnaunaru\f + \fr 2:6 \ft Nikolause eni hnaunaru be ono neune epengaru kena supu hlamate mo le esi noake be nanakwala kai jiware tebikele.\f* esi atate mo rebe Au lekwe suka more neka. 
\p  
\v 7 Sire rebe ilene meije peneka, hoko inete loko saisa rebe Alla Eni Rore Ibetekele ete jemata toinu. 
\p Sire pine ihlaleke loko Kristuse rame eti imata, hoko Au ono ikane ai bui rebe eriluke hidupe rebe eme otoi rebe Alla Irue kenae rebe kotiele Firdause.’ ” 
\s1 Sulate ete jemate toini me kota Smirna 
\sr 2:8-11 
\p  
\v 8 Eleki Yesuse Ibeteke ete au be, “Aleki ete malekate rebe iraka jemate toini me kota Smirnare be, 
\p ‘Au meije rebe akmena kai pamuli, rebe mata peneka po kwana suike. Au beteke be,  
\v 9 Au rekware tamata esi ono susate ete imi kai imi tanei sasaisa mo, po lulu Allare imi tanei boka. Au rekware tamata esi lepae tiae ete imi. Kai masike esi betekise tamata Yahudi, po esi atate lupe tamata Yahudi mo, siere maka lulu ro tiaru esi elake.  
\v 10 Rilami le susate rebe lau mo imi supue bei ro tiaru esi elake yake! Ro tiare esi elake eono sie ila bei imi esi kusu bui kena teheke be imi hlaleke ktili pibe mo. Kai imi supu susate petua butu esa. Suke imi tahane rame kena lulu Au eti esi bunu imi hoko Au riluke hidupe misete ete imi eti pela. Mere hadia le imi lesi. 
\p  
\v 11 Sire pine ilene meije peneka, hoko inete loko saisa rebe Alla Eni Rore Ibetekele ete jemata toinu. 
\p Sire pine ilesi hoko imata suike moneka rebe esi kotiele mata rebai luare.’ ”\f + \fr 2:11 \ft Selu 20:14.\f* 
\s1 Sulate ete jemate toini me kota Pergamuse 
\sr 2:12-17 
\p  
\v 12 Eleki Yesuse Ibeteke ete au be, “Aleki ete malekate rebe iraka jemate toini me kota Pergamuse be, 
\p ‘Au rebe kerike sari nanuke rebe ntina leiluare, beteke ete imi be:  
\v 13 Au rekwa imi ruere, imi rue me otoi kena ro tiaru esi elake ekbasaele. Po imi luluKu rame. Kai masike Antipase Auku saksi rebe nkwakawate esi bunui me imi kota rebe ro tiaru esi elake ekbasaele mere, imi lemake le imi hlaleke loko Aure mo.  
\v 14 Po Au lake imi le oani ilaru meiju. Sie ilaru bei imi, esi lulu Bileame eni hnaunaru. Bileame ianauke Balake leke ilemake loko tamata Israelaru leke esi supu dosa le iumaukesi kena kane manane rebe rilukele ete tuhana tinai more kai leke esi sablia.  
\v 15 Kai leini bei imi lekwe esi lulu Nikolause eni maka luluaru esi hnaune.  
\v 16 Meije au beteke loko imi leke imi hleke bei ono dosa. Sepo mo hoko takwali mo Au luake loko imi leke Au lasasi kena sari nanuke rebe mei biruKue. 
\p  
\v 17 Sire rebe ilene meije peneka, hoko inete loko saisa rebe Alla Eni Rore Ibetekele ete jemata toinu. 
\p Sie rebe esi lesire, Au suka kena esi kane manane rebe kotiele manna rebe bunikele kai Au riluke batu putile papelakesi. Kena batu mere leki nane beluke, rebe tamata makete esi rekwa mo batuke sie rebe esi supure pine esi rekwae.’ ” 
\s1 Sulate ete jemate toini me kota Tiatira 
\sr 2:18-29 
\p  
\v 18 Eleki Yesuse Ibeteke ete au be, “Aleki ete malekate rebe iraka jemate toini me kota Tiatirare be, 
\p ‘Au meije Alla Eni Nanae. Matakue kliti saka Auwe klitini kai Auku lelale ehita saka tembagare kena auwere. Abeteke etesi be, 
\p  
\v 19 Au rekwa pusue rebe imi onore. Au rekwa imi oki lomai. Imi hlaleke loko Au rame. Imi kerike ktili kai tahane kena supu susate. Au rekwa be pamuli meije imi kerike loko Auku makerike ktili lesi bei akmenare.  
\v 20 Po Au blake mise ete imi mo le imi sebeie Isabele rebe inaku be ile nabire iatetuke Auku tamataru kena esi sablia kai esi kane manane rebe rilukele ete tuhane tinai more.  
\v 21 Au beteke ete Isabele leke ihleke bei maka ono dosare po isuka hleke bei maka sabliare mo kai bei riluke manane ete tuhane tinai more mo.  
\v 22 Imi lene mimise. Tatike pine Au blaukeni eti kerakeni kena otoi maka ntulure kai tamata rebe esi sablia lupeije esi supu susate elake sepo esi hleke bei maka ono yelu neuna kai bina mere mo.  
\v 23 Kai eni nanaru Au bunusi leke pusue jemate toini esi rekwa be Au rekwa saisa neka rebe eme tamata laleisu. Kai Au lelie ete imire lulu sae erini nsalale.  
\v 24 Hnauna neuna rebe tamata esi atetukelu meru esi lemake be mere ro tiaru esi elake esi hnauna rebe bunikelu sa. Po ete imi maketa me kota Tiatira rebe imi lulu ro tiaru esi elake esi hnauna meru more, Au beteke ete imi be Au riluke pleta makete ete imi rebe eono susae imire moneka,  
\v 25 batuke saisa rebe imi supu pende imi lulue eti Au luake. 
\p  
\v 26-27 Kai sie rebe lesi kai esi ono saisa rebe Au sukare eti pela hoko Au riluke kbasa etesi lupe Au supu bei AmaKue leke esi kbasae pusue bangsaru. Esi pletae tamata kena toane buai bei pesi\f + \fr 2:26-27 \ft Kena sou Yunanire pleta kena toane buai bei pesire natire pleta kena ktolone.\f* kai esi atia tamata saka reru tau inaije kosae ooaije.  
\v 28 Kai Au riluke kmale pitare etesi kena tanda be esi supu untune.  
\v 29 Sire pine ilene meije peneka, hoko inete loko saisa rebe Alla Eni Rore Ibetekele ete jemata toinu.’ ” 
\c 3  
\s1 Sulate ete jemate toini me kota Sardise 
\sr 3:1-6 
\p  
\v 1 Eleki Yesuse Ibeteke ete au be, “Aleki ete malekate rebe iraka jemate toini me kota Sardise be, 
\p ‘Meije lepata bei Au rebe lalake Roa itu bei Alla kai kmalea itu. Au rekwa saisa rebe imi onore peneka. Tamata makete esi beteke be imi kwana sa. Po tinaije imi matare reneka le imi hlaleke loko Alla ktili moneka.  
\v 2 Raka mimise! Saisa rebe eme sare rebe lau mo emata nere aktilini lele. Le imi hidupe Au selu sae emise ete Alla mo.  
\v 3 Hoko lene mimise, saisa rebe imi selue kai imi leneule, ono lulue kai hleke bei ono dosa! Le sepo imi raka mo, Au luake saka tamata ndeane kai imi rekwa mo be Au luake loko imire kena petu andia.  
\v 4 Po bei imi me Sardise leini esi raka esi hidupe mimise leke esi ono dosa yake saka esi raka mimise leke esi pakianaru ndopo yake. Tatike pine esi keu sakesa kai Au, kai esi alike pakiane putile le esi supu bitike bei Alla.  
\v 5 Sie rebe esi lesire, esi supu alike pakiane putile lupe mere. Kai esi nanaru Au bunu bei buku kena leki tamata rebe esi supu hlamate esi nanaru mo. Po Au naku esi nanaru me AmaKu oaI kai ete Eni malekataru.  
\v 6 Sire rebe ilene meije peneka, hoko inete loko saisa rebe Alla Eni Rore Ibetekele ete jemata toinu.’ ” 
\s1 Sulate ete jemate toini me kota Piladelpia 
\sr 3:7-13 
\p  
\v 7 Eleki Yesuse Ibeteke ete au be, “Aleki ete malekate rebe iraka jemate toini me kota Piladelpiare be, 
\p ‘Meije lepata bei Au rebe mise titinai le Auku dosa sae mo kai nkenale. Auku kbasare lupe akmena kamale Dauta eni kbasare. Kbasa meije lupe kuncire. Sepo Au baeke meture hoko sae makete isupu kobue mo kai sepo Au kobue meture hoko sae makete isupu baeke mo. Hoko Auku kbasare lesi bei kbasa makete.  
\v 8 Au rekwa saisa rebe imi onore. Selu Au baeke meture ete imi peneka, rebe tamata sae isupu kobue mo. Au rekwa, bei imire batuke sie ilaya esi hlaleke loko Au, po imi lulu Auku lepataru, kai masike tamata esi ono susate ete imi po imi hlaleke loko Aure imi hleke mo.  
\v 9 Imi lene mimise! Sie ilaru rebe esi lulu ro tiaru esi elake esi kbasare, sie meru esi betekeise Auku tamata, po esi atate lupe Auku tamataru esi atate mo. Tatike pine Au ono esi lulu imi. Au ulake esi luake kai esi tatu me imi lelalaru kai esi naku be Au oki imi.  
\v 10 Le imi lulu Auku pletaru leke masike imi supu susate po imi hlaleke loko Au rame, hoko Au raka imi bei petu teheke kena supu susate rebe eluake ete pusue nusa kena etehe pusue tamata rebe esi rue mei nusa meije.  
\v 11 Lau moneka Au luake reneka hoko tahane neka leke sae makete irana hadia rebe imi supure bei imi yake. 
\p  
\v 12 Sire rebe ilesi, Au ono irue kena Tuhane Eni Lumare rame saka lili rebe kurule. Hoko namake irue kena Tuhane Eni Lumare, isiri bei ete mere moneka. Kai Au leki Auku Alla Eni nane kai Auku Alla Eni kotare esi nane kai Auku nane beluke kena nanakwalaije. Kota mere Yerusaleme beluke rebe erulu bei ndete surga bei Auku Allare. 
\p  
\v 13 Sire rebe ilene meije peneka, hoko inete loko saisa rebe Alla Eni Rore Ibetekele ete jemata toinu.’ ” 
\s1 Sulate ete jemate toini me kota Laodikia 
\sr 3:14-22 
\p  
\v 14 Eleki Yesuse Ibeteke ete au be, “Aleki ete malekate rebe iraka jemate toini me kota Laodikiare be: 
\p ‘Meije lepata bei Au rebe kotie Aure Amine\f + \fr 3:14 \ft Yesuse IbetekeIne “Amine” natire be Iankenae pusue rebe Alla Italukele.\f*. Au sasike rame kena beteke Alla kena laleKue titinai leke tamata esi rekwa mere tinai Alla Itolae nusa kai lanite meije baue Au.  
\v 15 Au rekwa pusue imi hidupe. Au rekwa be imi hlaleke loko Aure imi hleke mo. Po imi hlaleke ktili mo hoko imi sakesa kai kwele rebe ndiri mo po musu mo. Au sukare imi ndiri, ndiri neka pise imi musu, musu neka.  
\v 16 Po imi ndiri pise musu mo hoko namake Au suka imi mo.  
\v 17 Imi beteke be imi taneia boka kai imi lupuke tanei boka ete imi peneka kai imi susae sasaisa moneka. Po imi rekwa mo be imi sakesa kai tamata rebe esi sasaisa more neka, le imi pakiane sae moneka eti imi kalaku kai imi selu mo kena imi jiware.  
\v 18 Hoko Au ahnau imi leke imi sebeie au hlamate imi bei imi dosaru leke lulu Aure, imi dosa sae moneka saka imi sabe mase bei Au. Kai sebeie Au ono imi nkena leke lulu aure imire tamata nkenale saka imi sabe pakiane putile bei Au leke imi alike pakiane kena obi nanakwalami rebe kalakure kai rebe eono asomire. Kai imi sebeie Au ono laleimu rekwa Au titinai saka imi sabe obate kena ekoa matami leke imi selure.  
\v 19 Sire rebe Au okini, Au lakeni kai Au tetai. Ele mere hoko imi nkwakwa rame kai hleke bei ono dosa noma.  
\v 20 Lene mimise! Au namake imi koti Au kena lupu kai imi leke Au rue sakesa kai imi kai ite lalema ndina sakesa. Mere saka Au kele me metu uluije kai Au lakae meture, sepo sire ilene naKue kai ibaeke meture, hoko Au kusu lokoi kai luama kane sakesa.  
\v 21 Sire rebe ilesi, Au ono irue sakesa kai Au\f + \fr 3:21 \ft Rue sakesa ete meije natire kbasa sakesa.\f* kena Auku otoi maka rue kena pletare lupe Au lesire, Au rue sakesa kai AmaKu kena Eni otoi maka rue kena pletare. 
\p  
\v 22 Sire rebe ilene meije peneka, hoko inete loko saisa rebe Alla Eni Rore Ibetekele ete jemata toinu.’ ” 
\c 4  
\s1 Tanei kwanala ata utatu loko Tuhane ndete surga 
\sr 4:1-11 
\p  
\v 1 Eleki bei mere au selu sae leneka. Au selu metu sae ebaeke ndete surga. Eleki au lene suike nai rebe akmena elepa loko au pende rebe esi tuleije lupe trompete, ebeteke be, “Sa lomei leke Au aseluke saisa rebe tatike pine eonore.”  
\v 2 Eleki Alla Eni Rore Ikbasae au sosoli eleki au selu otoi maka rue kena pleta sae me surga kai Ile sae Irue me otoi maka rue mere.  
\v 3 Ile mere seluI hita saka batu yaspise kai sardise rebe esi belini elake kai tabalakwe ekeholi lutike otoi maka rue mere selue saka batu samrute rebe esi belini elake.  
\v 4 Eleki keholi otoi maka rue mere, otoi maka rue kena pleta butu lua lesini ata me kai kena otoi maka rue butu lua lesini ata meru elaka sie butu lua lesini ata esi rue kenae. Esi alike lapu putile kai kena uluisu, esi alike liute bei mase.  
\v 5 Kai bei otoi maka rue mere silane ehita beie kai kla elake titinai esi tulei beie, kai obora itu ukliti me otoi maka rue mere esi oaije. Mere Roa itu bei Allare. \fig Obora itu rebe uklite, mere roa itu bei Allare|src="BK00154b.tif" size="span" loc="Rev 4:5" ref="Tatike pine Uonore 4:5" \fig* 
\v 6 Kai me otoi maka rue mere esi oaije, oani sae me selu saka meite bei kaca pise kristale selu siba. 
\p Kena otoi maka rue mpe tlare esi leini keholi selu tanei kwanala ata, esi oalaleiju kai esi mulinu penu kena matainai.  
\v 7 Tanei kwanale nomore esare selue saka singa, eleki nomore luare selue saka sape tulene, eleki nomore telure esi oalaleije selue saka tamata kai nomore atare selue saka manu lusire eribure.\f + \fr 4:7 \ft Tanei kwanala meiju natire be: singare ekbasa, sapere ektili, tamata irekwa titinai, manu lusire eribu nunu roma etika neka.\f* 
\v 8 Kai tanei kwanala ata meru esi balakibiti ne papelakelu. Esi matai kena nanakwalaiju kai balakibitu pusulu. Kai tanei kwanala meru pita kai kpetu umenani rame be: 
\q1 “Isike Tuhane Alla. Isike Tuhane Alla, 
\q2 le Eni kbasare ela titinai. 
\q1 Tuhane Imisete titinai le Eni dosa sae mo, 
\q2 misete titinai le Eni dosa sae mo, 
\q2 misete titinai le Eni dosa sae mo. 
\q1 Tuhane bei akmena Amei peneka, 
\q2 kena meije Amei kai eti pelare Amei lekwe.”\f + \fr 4:8 \ft Yes. 6:2-3, Yeh. 1:18, 10:12\f* 
\p  
\v 9 Tanei kwanala ata meru umenanie lagu maka isike Alla kai holmate kai kotie trima kasi bei Ile rebe Irue kena otoi maka rue kena pletare kai eti pelare Imere. Umenani ele mere.  
\v 10 Eleki elaka sie butu lua lesini ata meru esi tatu roma tapele loko Ile rebe Irue kena otoi maka rue mere eleki esi holmate Ile maka rue eti pela mere. Eleki esi tolae esi liuta me uluisu kena otoi maka rue mere kai esi beteke be, 
\q1  
\v 11 “Tuhane Ale amiki Alla, 
\q2 Asupu kbasa kena supu isike kai holmate. 
\q1 Tuhane Amu kbasa, 
\q1 le Atolae pusue yelu, 
\q2 kai lulu Amu sukare pine pusue yelu utola 
\q2 eleki ume.” 
\c 5  
\s1 Buku rebe lulukele kai Domba Anai 
\sr 5:1-14 
\p  
\v 1 Eleki au selu Ile rebe Irue me otoi maka rue kena pleta mere Eni bala makwanale lalake buku rebe lulukele. Buku mere leki kena esi muline kai esi laleije kai tolae segela itu kenae.  
\v 2 Eleki au selu malekate sae me iktili titinai ikloloe be, “Sire isupu kbasa kena bara segelaru bei buku rebe lulukele kai buka bukure leke baisele?”  
\v 3 Po sae bei sie rebe esi ndete lanite pise sie rebe esi mei nusa meije pise tamata matale rebe esi mpe nusa meije esi lebuije lekwe, sae kuesa ikbasa kena ibuka buku rebe luluke mere kai iselu esi laleije mo.  
\v 4 Hoko au rani hnetekeku le sae isupu kbasa kena buka buku rebe lulukele mere kai selu esi laleije mo.  
\v 5 Eleki ile sae bei elaka meru ibeteke loko au be, “Arani yake! Aselu, Yesuse rebe kotiNe Singa bei suku Yehuda, Dauta eni anubu rebe elake, Ilesi peneka. Hoko Isupu kbasa kena Ibara segela itu meru kai Ibuka buku rebe luluke mere.” 
\p  
\v 6 Eleki au selu Domba Anaije kele tehaike otoi maka rue mere. Mere Yesuse. Kai tanei kwanala ata meru kai tamata elaka meru esi keholie. Domba Anai mere bunuI peneka po Ikwana suike, Ikele, Eni sepai itu kai Eni matai itu. Eni matai itu mere Alla Eni Roa itu rebe Iulakesi keu pusue nusare.\f + \fr 5:6 \ft Sepaije esi natire Domba Anaije Eni ktiline. Eni matai iture esi natire Irekwa pusue yelu mei nusa kai ndete surga.\f* 
\v 7 Eleki Domba Anai mere Ilomei rana buku rebe lulukele mere bei Ile rebe Irue kena otoi maka rue mere Eni bala makwanale.  
\v 8 Kena Domba Anaije Irana buku rebe lulukele mere, taneia ata meru kai elaka sie butu lua lesini ata meru esi tatu me Domba Anai mere oaIje roma tapele. Kai pususi lalake kecapi kai oba mase rebe penu kena leite boini ntelete kemenyane. Kemenyane esi natire tamata rebe esi ono Alla Eni tamata pende esi kotie loko Allare. 
\p  
\v 9 Kai esi menanie lagu beluke be: 
\q1 “Asupu kbasa kena rana buku rebe luluke mere 
\q2 kai bara esi segelaru. 
\q1 Le Asupu bunu kai ponike Amu lalakwe 
\q2 ete pusue tamata mei nusa\f + \fr 5:9 \ft Kena sou Yunanire ebeteke be pusue suku, sou, nusa kai bangsare, natire pusue tamata mei nusa. Meije sakesa kai ayata me, 7:9, 10:11, 11:9, 13:7, 14:6 kai 17:15.\f* 
\q2 bei papelake tamata mei nusa. 
\q1 Asabe pususi kena Arilukesi ete Alla.\f + \fr 5:9 \ft Isi. 33:3, 98:1, Yes. 42:10\f* 
\q1  
\v 10 Alupukesi kena bangsa toini esa kai bitikesi kena imame 
\q2 kena layani iteki Alla 
\q2 kai riluke kbasa etesi kena esi pletae nusa meije.”\f + \fr 5:10 \ft Sir. 19:6\f* 
\p  
\v 11 Mere pela, au selu kai au lene malekata bokala esi menani kena na elake. Pususi kele keholi otoi maka rue mere, tanei kwanala ata meru kai elaka meru. Malekata meru boka titinai, lihune kena lihune, sae ineheke ruasi moneka.  
\v 12 Pususi menani kena na elake be, 
\q1 “Domba Anai rebe Imata pende Ilayake 
\q2 kena Isupu kbasa, 
\q1 ite alenake be Eni tanei boka, 
\q1 ite alenake be Irekwa mise titinai, 
\q1 ite alenake be Iktili, 
\q1 ite holmateI, 
\q1 ite ono Eni nane ela, 
\q2 kai ite isikeNi!” 
\p  
\v 13 Kai au lene pusue tanei kwanala ndete surgare kai rebe mei nusare kai tamata matala mpe nusa meije esi lebuije kai yelu ndau meite pususi menani be, 
\q1 “Ile rebe Irue kena otoi maka rue kena pletare 
\q2 kai ete Domba Anaije, 
\q1 ite isikesi, ite holmatesi, 
\q1 ite ono esi nane ela, 
\q2 kai ite alenake esi kbasaru 
\q2 eti pela!” 
\p  
\v 14 Eleki tanei kwanala ata meru beteke be, “Mere tinai.” Kai elaka meru esi tatu eleki esi nobo loko Domba Anaije kai Alla. 
\c 6  
\s1 Domba Anaije Ibara segela ne menaije 
\sr 6:1-17 
\p  
\v 1 Mere pela eleki au selu Domba Anai mere Ibare segele nomore esa bei segela itu rebe tola kena buku rebe lulukele kai au lene tanei kwanale nomore esa bei taneia ata meru elepa be, “Mai!” Esi naije ela saka kla.  
\v 2 Eleki au selu kuda putile\f + \fr 6:2 \ft Kuda putile esi natire tamata rebe ilesi kena lisare.\f* sae me kai tamata rebe isa kenare ilalake busule kai isupu riluke liute kena ulure etei. Imaju saka Ilesi kena lisare. Irulu lope nusa kena lisa kai lesi rame. 
\p  
\v 3 Mere pela, Domba Anai mere Ibara segele nomore luare. Eleki au lene tanei kwanale nomore luare ebeteke be, “Mai!”  
\v 4 Eleki kuda inai makete esiri, kuda mere elala\f + \fr 6:4 \ft Kuda lalakwe esi natire lalakwe rebe ponike kena lisare.\f* titinaije neka kai ile rebe isa kenare isupu kbasa kena ono tamata esi bunu lomai eti sae irue mise kai lomai mei nusa moneka. Hoko isupu riluke sari nanuke elake. 
\p  
\v 5 Eleki Domba Anai mere Ibara segele nomore telure eleki au lene tanei kwanale nomore telure ebeteke be, “Mai!” Eleki au selu kuda inai metene\f + \fr 6:5 \ft Kuda metene esi natire tamata mata manane.\f* kai tamata rebe isa kenare ilalake beule kena ukure manane le manane roma mo.  
\v 6 Kena kuda metene mere sirire au lene lepate bei tanei kwanala ata meru esi tlelare be, “Gaji petu esare batuke panuhu sabe gandume cupa esa pise sabe gandume oani makete cupa telu. Po atia saituna ainaru yake kai atia ndinu anggure yake!” 
\p  
\v 7 Eleki Domba Anai mere Ibara segele nomore atare eleki au lene tanei kwanale nomore atare ebeteke be, “Mai!”  
\v 8 Eleki au selu kuda inai porole\f + \fr 6:8 \ft Kuda porole esi natire matae hukumane.\f*. Tamata rebe isa kenare eni nane Matale. Kai ile sae ikeu lulu muline eni nane Tamata Matale Esi Otoi. Kai esi supu kbasa kena esi bunu tamata mei nusa meije. Esi bunu tamata kena lisa, kena tia seneta, makerake kai binatanaru bunusi. Tamata rebe esi matare sabokae lara atake (1/4) tamata mei nusare. 
\p  
\v 9 Mere pela eleki au selu Domba Anai mere Ibara segele nomore limare. Eleki au selu tamata bokala esi jiwaru kena otoi pala tanei kena rilukele ete Allare esi lebuije. Mere tamata rebe bunusi le esi lepae Alla Eni lepataru kai sie rebe esi naku be Yesuse esi Tuhane sele bei more esi jiwaru.  
\v 10 Kai esi kloloe be, “Tuhane rebe Kbasa Ela Titinai, rebe mise titinai le dosa sae mo kai nkenale. Roma petua ila sa pine Ateu pakala ete tamata rebe esi bunu ami rebe rue mpe nusare kai Ahukumesie?”  
\v 11 Kai Alla Iriluke lapune nanuke putile etesi kena esi alikele. Kai Alla Ibeteke lokosi be, “Namake totonai lekwe eti imi ebea rebe hlaleke loko Tuhane rebe esi layani Au sare, esi supu bunu lupe imire mina. Le sie rebe esi supu bunu le layani Aure, Au Iteu peneka.” 
\p  
\v 12 Eleki au selu kena Domba Anai mere Ibara segele nere, isu elake titinai sosoli. Kai lemataije emete saka buete kai bulane elala saka lalakwe.  
\v 13 Kai kmalea ndete lanite utetu lope nusare lupe balate elake elibuke arare pine esi buai matanaru pleluelu.  
\v 14 Eleki lanite eluluke lori lopai lupe paile rebe luluke eleki sirikele kai ulataru kai nusaru uheti bei esi lakwaije. 
\p  
\v 15 Kai kamala mei nusare, tamata elakaru, solaluaru esi elakaru, tamata rebe esi taneia boka, tamata rebe esi kbasa, tamata makerike kai tamata rebe kerike ete sae makete mo pususi kbuni kena liana benai kai batua ndete ulataru esi tlelaru.  
\v 16 Kai esi beteke loko ulataru kai batu karana meru be, “Ulata nanuke kai batua! Koli sepe ami leke bunike ami bei Ile rebe Irue kena otoi maka ruere kai bei Domba Anai rebe Inasu mere.  
\v 17 Le petu elake kena Alla kai Domba Anaije hukume papelake tamatare meije peneka kai sae isupu hlamate bei hukumane mere mo.” 
\c 7  
\s1 Tuhane Eni tamata sie usate utune esa butu ata lesini ata 
\sr 7:1-8 
\p  
\v 1 Eleki suike bei mere au selu malekata sie ataya esi raka pusue nusa meije esi pele balataru leke ehbue ndau meite yake kai nda kmalane yake kai ehbue aiaru yake.  
\v 2 Eleki au selu malekate makete iluake bei sapleuke lemataije sa. Ikeri Alla rebe Eri mere Eni segele kai ikloloe kena na elake loko malekata ata rebe esi supu pleta kena atia meite kai kmalane.  
\v 3 Ikloloe be, “Atia meite pise kmalane kai aiaru yamina, namake eti ami tolae tanda kena tamata rebe esi kerike ete Allare oalaleisu pela mina!”  
\v 4 Kai au lene tamata rebe tolae tanda kenaise, sie 144.000 (usata utune esa butu ata lesini ata) rebe lilakesi bei pusue tamata Israelaru esi anubuaru. 
\q1  
\v 5 Hoko bei papela anubuaru rana sie 
\q2 12.000 (usata butu esa lesini lua). 
\q1 Mere anubua bei Yehuda, Rubena, Gate, 
\q2  
\v 6 bei Asere, Naptali, Manase, 
\q2  
\v 7 bei Simone, Lewi, Isakare, 
\q2  
\v 8 bei Sebulone, Yusupe kai Benyamine. 
\s1 Tamata boka titinai 
\sr 7:9-17 
\p  
\v 9 Eleki bei mere au selu tamata boka titinai sae ineheke tekwasi moneka, sie meru bei pusue tamata mei nusa\f + \fr 7:9 \ft Selu 5:9 esi catatane kakire.\f* esi kele balale otoi maka rue kena pleta mere kai Domba Anaije. Esi alike lapu nanuke putile kai esi lalake kurma loini.  
\v 10 Kai esi kloloe be, 
\q1 “Ite supu hlamate bei Alla iteki Tuhane 
\q2 rebe Irue kena otoi maka ruere 
\q2 kai bei Domba Anaije!” 
\p  
\v 11 Kai pusue malekataru, elaka meru, tanei kwanala ata meru esi kele keholi otoi maka rue mere. Eleki pususi tatu pine esi nobo bei Alla.  
\v 12 Kai pususi beteke be, 
\q1 “Amine! 
\q1 Ite isike iteki Tuhane mere Alla, 
\q2 ite ono Eni nane ela, 
\q2 ite alenake Irekwa titinai, 
\q2 ite beteke trima kasi eteI, 
\q2 ite holmateI, 
\q2 Ite neheke suike Eni ktiline, 
\q2 kai Eni kbasare, eti pela! 
\q2 Amine!” 
\p  
\v 13 Kai ile sae bei elaka meru itneu au be, “Siasi rebe esi alike lapu nanuke putila meru, kai esi luake bei etia?” 
\p  
\v 14 Eleki au beteke lokoi be, “Ntuane, au rekwasi mo. Ntuane ruamu pine arekwasi.” 
\p Eleki ntuane mere iombe, “Sie meru rebe esi supu susate elake po elia beisi peneka. Kai esi koa esi lapu nanukaru puti kena Domba Anaije Eni lalakwe. Mere saka tamata esi tetake lapune, Alla Iampune iteki dosaru kena Yesuse Eni lalakwe.  
\v 15 Bei mere eti esi kele me Alla oaI me Eni otoi maka rue kena pletare kai esi layaniNi rame pita kpetu me Tuhane Eni Luma. Kai Ile rebe Irue kena otoi maka rue mere Irue kaisi leke Irakasi.  
\v 16 Esi tiasi sene kai kmalakesi moneka kai lematai musute kenasi moneka.  
\v 17 Le Domba Anai rebe me otoi maka rue mere esi leine Irakasi lupe maka raka dombare iraka dombaru, Ikerisi loko kwele bolai rebe eriluke hlamate. Kai Alla Isebeie esi supu susate sasaisa moneka hoko esi rani kwale moneka. 
\c 8  
\s1 Segele nomore iture 
\sr 8:1-5 
\p  
\v 1 Kena Domba Anai mere Ibara segele nomore iture, hoko ndete surgare ndene lakwai esa kasuke olase ului kwatai. 
\p  
\v 2 Eleki au selu malekata itu rebe esi kele me Alla oaIje esi supu riluke trompete buai esa papelakesi. 
\p  
\v 3 Eleki malekate makete iluake kai ikele tehaike otoi maka pala tanei ete Allare. Ilalake otoi maka pala kemenyane bei mase kena ipala kemenyane kenae. Kai isupu riluke kemenyana bokala kena irilukele ete Alla sakesa kai Alla Eni tamataru esi kotie lokoIje. Eleki ipalae kena otoi maka pala tanei ete Alla bei mase rebe eme Alla oaIje.  
\v 4 Eleki malekate rebe ilalake kemenyane, ipala kemenyane mere. Eleki kena mere esi kweine esa loko Alla. Kai Alla Eni tamataru esi kotire roma Alla oaIje.  
\v 5 Eleki malekate mere irana otoi maka pala kemenyane mere eleki irana auwe bei otoi maka pala tanei rebe rilukele ete Allare kena kutele kena otoi maka pala kemenyane mere. Eleki ipoiele lope nusare. Kena mere neka kla elake titinai sakesa kai silane baeke kai isu elake sosoli. 
\s1 Malekate hbue trompeta buai ata menaije 
\sr 8:6-13 
\p  
\v 6 Mere pela malekata sie itua rebe esi lalake trompete mere esi ono kena esi hbue trompete. 
\p  
\v 7 Eleki malekate nomore esare ihbue eni trompete eleki ulane ese sakesa kai auwe utetu kai lalakwe. Pusue meru utetu lope nusare. Eleki nusare kotue, esi elake lara teluke (1/3) nusare. Kotu aiaru kai malataru, esi elake lara teluke (1/3) aiaru kai melataru. 
\p  
\v 8 Eleki malekate nomore luare ihbue eni trompete, saisa lupe ulate elake ekliti esupu poie lorau meite sosoli. Meite eono lelie lalakwe, esi elake lara teluke (1/3) meite.  
\v 9 Hoko binatana rebe undau meite umata, esi bokalaru lara teluke (1/3) binatana rebe me meite kai soa buini kai kapalaru lekwe atialu, esi bokalaru lara teluke (1/3) pusue soa buinu kai kapalaru. 
\p  
\v 10-11 Eleki malekate nomore telure ihbue eni trompete, kmale elake esi nane Nkatile etetu bei ndete lanite sosoli, ekliti saka obore etetu, esepe kwelearu kai kwele bolaiju, esi bokalaru lara telukelu (1/3) hoko unkati. Hoko tamata bokala esi mata le esi kinu kwele nkatile mere. 
\p  
\v 12 Eleki malekate nomore atare ihbue eni trompete, saisa ekena lemataije, bulane kai kmalearu esi elake lara teluke (1/3) lemataije, bulane kai kmalearu. Eti esi hitaiju kurane esi ktiline rebai telu. Hoko kena pitare, lara teluke (1/3) olase kpitare selue mele kai kena kpeture, lara teluke (1/3) olase kpeture selue mele titinai. 
\p  
\v 13 Eleki au selu manu lusi inai sae me eribu kai au lene ekoti kena na elake be, “Atia! Atia! Atia pusue tamata rebe esi mpe nusare kena malekata telu lesinaru esi hbue esi trompetaru.” 
\c 9  
\s1 Trompete nomore limare 
\sr 9:1-12 
\p  
\v 1 Eleki malekate nomore limare ihbue eni trompete eleki au selu kmale sae me emei nusare. Etetu bei ndete lanite. Eleki esi riluke kunci ete kmale mere. Kunci mere matale esi benaije rebe nanu titinai\f + \fr 9:1 \ft Benai nanuke titinai mere ro tiaru supu alese ete mere eti roma petu kena usupu hukumane.\f*, sae isupu esi uweije more esi kuncire.  
\v 2 Eleki ebaeke matale esi benai mere eleki auwe kweine siri bei benai mere saka auwe kweine bei auwe elake titinai. Hoko lemataije kai lanite emele.  
\v 3 Kai kwauaru usiri bei auwe kweini mere kena nusare kai usupu kbasa lupe kalajenkinaru.  
\v 4 Kai kwaua meru supu lake bei Alla leke uatia tapuana pise tnanela kai aiya mei nusare yake. Batuke ono susate ete tamata rebe tanda bei Alla sae kena oalaleije more.  
\v 5 Po kwauwa meru usupu lake lekwe leke bunu tamata yake. Batuke usupu ulake kena onosi supu kera titinai bulana lima. Kwaua meru kete tamatare, esi kerale saka kalajengkine kete tamatare.  
\v 6 Kena bulana lima mere tamata esi nikwa lalane leke mata le esi blake kera kuate hoko esi noake be mise lesi esi mata noma, po saisa mo le teu esi nasite mo. 
\p  
\v 7 Kwaua meru selulu saka kuda rebe aknekaele kena keu lisare kai kena esi uluiju saisa kenae saka liute kena ulure. Ono bei mase. Kai esi oalaleiju lupe tamata oalaleije.  
\v 8 Kai esi buaru nanu saka binaru esi buaru kai esi niseiju ntina saka singare esi niseije.  
\v 9 Kai esi lereiju kopa kena saisa me saka lapune bei pesi. Kai esi balakibitu esi tuleiju saka kuda bokala uneha keretare unaya kena lisare.  
\v 10 Kai sasune kena esi alui rebe untina saka kalajenkine. Hoko uono susate ete tamata bulana lima.  
\v 11 Kai kamale rebe ipletaule, mere malekate bei otoi matale esi benaije. Eni nane kena sou Ibranire, Abadone kai kena sou Yunanire, Apolione. Esi natire maka atia. 
\p  
\v 12 Susate elake nomore esare lia peneka. Eleki susata lua uluake suike. 
\s1 Trompete nomore nere 
\sr 9:13-21 
\p  
\v 13 Eleki malekate nomore nere ihbue eni trompete eleki au lene lepate esiri bei otoi maka pala kemenyane bei mase esi siuti ataru. Otoi maka pala kemenyane mere eme Alla oaIje.  
\v 14 Lepate mere beteke loko malekate nomore nere be, “Tie malekata sie ataya rebe esi supu lo me kwele elake Efrate esi leine.”  
\v 15 Eleki itie malekata ata meru. Malekata ata mere aknekaesi kena olase, petu, bulane kai musune rebe teu peneka kena esi bunu bei tamata sabokae lara teluke (1/3) pusue tamatare.  
\v 16 Kai au lene lepate be, “Solalua rebe esi sa kuda kena lisare sie lihuna utuna lua (200.000.000) esi lupuke lomai peneka. 
\p  
\v 17 Hoko au selu be kudaru kai tamata rebe esi sa kenalu lereisu kopa kena lapu pesi mata lalakwe lupe aure, malae kai porole saka belerane. Kuda meru esi uluije saka singa. Auwe, auwe kweini kai belerane kweini siri bei esi biruiju.  
\v 18 Auwe klitini kai esi kweine kai belerane kweini rebe siri bei kudare esi biruije eono tamata mei nusare esi mata. Tamata rebe matare esi bokalaru lara teluke (1/3) tamata mei nusare.  
\v 19 Kuda meru esi ktiline kena esi biruiju kai esi aluiju. Esi aluiju saka niakwe hoko uono susate ete tamata. 
\p  
\v 20 Po tamata makete rebe esi mata kena susate mere more, esi hleke bei ono neune mo. Esi hleke bei hlaleke loko ro tiaru mo kai tuhane tinai more, rebe esi onoe bei mase, perake, tembaga, batu kai ai rebe uselu pise ulene pise ukeu more mo.  
\v 21 Kai esi hleke bei maka bunu mo, bei atia tamata mo, bei ono ntasite mo kai bei ndeane mo. 
\c 10  
\s1 Buku tone ere baeke 
\sr 10:1-11 
\p  
\v 1 Eleki au selu malekate makete ktiline irulu bei ndete surga, moputire kopai kai tabalakwe ndete ulu babaije kai oalaleije hita saka lemataije ehitare kai eni lelale ehita saka auwe klitini rebe elake esi hitaije.  
\v 2 Ilalake buku tone kena balaije ere baeke. Eni lelale makwanale ekele ndau meite babai kai eni lelale mapale ekele nda kmalane.  
\v 3 Kai ikloloe lupe singare enalare. Eleki kena ikloloe pelare kla toini itu uela titinai ulelelie na elake mere.  
\v 4 Eleki kena kla toini itu meru lepa pela, au suka kena lekie po au lene lepate bei ndete surga be, “Saisa rebe kla toini itu meru betekele asibake yake kai aleki yake!” 
\p  
\v 5 Kai malekate rebe eni lelale kele ndau meite babaije kai nda kmalane mere ibitike eni bala makwanale lolete lanite.  
\v 6 Kai ila kena Alla rebe Irue eti pelare Eni nane. Alla rebe Imei eti pelare, rebe Itolae lanite kai pusue yelu rebe ndete lanite kai pusue yelu rebe umei nusare. Malekate mere ila be “Tinai, Tuhane Isoae petu moneka!  
\v 7 Le kena malekate nomore iture ihbue eni trompete, saisa rebe Alla Italukele peneka po akmenare tamata esi rekwa mosare, Alla Ionoe. Alla Ilulu saisa rebe Ibetekele baue Eni tamata makerikaru, mere Eni nabiaru.” 
\p  
\v 8 Kai lepate rebe bei ndete surga loko aure elepa suike lokoku be, “Keu rana buku tone rebe eme kena malekate rebe ikele kena meite kai kmalane eni balaije.” 
\p  
\v 9 Eleki au keu loko malekate mere kai au kotie beini leke iriluke buku mere ete au. Ibeteke loko au be, “Aranae kai kanele. Eme birumue, enkoto saka maka kinu tuae kwelini po eme tibuimue, esene.  
\v 10 Eleki au rana buku mere bei malekate mere eni balaije, eleki au kanele. Ekena birukue, enkoto saka maka kinu tuae kwelini po kena au kane pela tibukue esene.  
\v 11 Eleki ibeteke loko au be, “Suke alepa Alla Eni lepataru suike lekwe ete pusue tamata mei nusa\f + \fr 10:11 \ft Selu 5:9 esi catatane kakire.\f* kai ete kamalaru.” 
\c 11  
\s1 Alla Eni maka saksia sie luaya 
\sr 11:1-14 
\p  
\v 1 Mere pela eleki au supu riluke ai buai esa saka maka suere, eleki lepate loko au be, “Akeu, sue Tuhane Eni Lumare kai otoi maka pala tanei rebe rilukele ete Allare. Kai aneheke tamata rebe esi ibada me Tuhane Eni Lumare esi laleije.  
\v 2 Po Tuhane Eni Lumare esi ueije keholi sue yake le mere ete tamata bei nusa maketa rebe esi hlaleke lokoI more peneka. Kai tatike pine esi kbasae kota misete titinai le Alla Irue kenae mere musuna telu bulana ne (bulana 42).” 
\p  
\v 3 Kai Au ulake Auku maka sasike sie luaya leke esi beteke Auku lepate musuna telu bulana ne (petua 1.260). Kai esi alike pakiane rebe etiluke be esi susa le tamata esi doaru.  
\v 4 Maka sasika lua meru, saka ai saitune batai lua kai maka tola lampu buai lua rebe ume Tuhane rebe Ikbasae nusa meije oaIje.  
\v 5 Sepo tamata esi tehe kena ono sasaisa tiae etesi hoko aure siri bei biruisu kai ekotu pusue esi musuru. Hoko sie rebe ono tiae eteise esi supu bunure ele mere.  
\v 6 Esi kbasa kena obi lanite leke kena esi beteke Alla Eni lepataru ulane tetu yake. Kai esi kbasae pusue kwelearu kena esi ono ulelie lalakwe, kai esi ono susate bokala ete nusa meije lulu esi sukare. 
\p  
\v 7 Kai kena esi lepae Alla Eni lepataru pela, binatane rebe siri bei matale esi benaije elisa kaisi. Elesi kai ebunusi.  
\v 8 Kai lua nanakwalaisu balila me kota elake rebe paku esi Tuhane ahlake ai bataije kenare esi mahpaite. Kota mere saka Sodome pise Mesire neka le tamata me kota mere esi neu kuate.  
\v 9 Tamata bei pusue nusa\f + \fr 11:9 \ft Selu 5:9 esi catatane kakire.\f* meije esi selusi petua telu kai kwatai kai sae isuka kena hnouke luasi kena liane benai mo.  
\v 10 Tamata nusa meije esi lalesi ndina le maka sasika lua meru esi matare. Esi ono pesta kai esi riluke tanei ete lomai le nabia lua meru esi ono susate bokala ete tamata mei nusare peneka. 
\p  
\v 11 Eleki petua telu kai kwataije elia eleki Alla Iono luasi kwana suike eleki luasi kele hoko pusue tamata rebe esi selu luaise rilasi titinai.  
\v 12 Eleki nabia lua meru esi lene koti loko luasi kena na elake bei ndete surga be, “Mai, sa lomei!” Eleki luasi sa lolete surga, moputire kopa luasi kai luasi musuaru esi kele selu luasi. 
\p  
\v 13 Eleki kena mere neka isu ela titinai hoko kota mere robie esi elake lara butu esake (1/10) kota mere hoko tamata usata itu (7.000) esi mata le isu mere. Kai tamata maketaru rilasi titinaije neka eleki esi isike Alla rebe Indete surgare.  
\v 14 Susate nomore luare lia peneka. Selu susate nomore telure luake reneka. 
\s1 Trompete nomore iture 
\sr 11:15-19 
\p  
\v 15 Eleki malekate nomore iture ihbue eni trompete, eleki ami lene malekata ndete surgare esi kloloe be, 
\q1 “Kena meije, iteki Tuhane kai Ile rebe Tuhane IulakeNi 
\q2 kena hlamate tamatare Ikbasae nusare. 
\q1 Namake Ikbasa eti pela!” 
\p  
\v 16 Kai elaka sie butu lua lesini ata rebe esi rue kena esi otoi me Alla oaIje, esi tatu kai holmate Alla.  
\v 17 Esi beteke be, 
\q1 “Tuhane, Alla rebe Amu kbasa elake, 
\q2 rebe bei akmena Ame peneka kai meije Ame lekwe; 
\q2 ami kotie trima kasi eteMu 
\q2 le Apake Amu kbasa elake peneka. 
\q1 Kai Apleta menai lupe kamale peneka, 
\q1  
\v 18 kai pusue tamata rebe esi hlaleke loko Ale more 
\q2 esi nasukeMu, 
\q1 po petu kena Anasure meije peneka 
\q2 kai petu kena teu pakala 
\q2 ete tamata matale meije peneka. 
\q1 Kai petu kena pusue Amu tamata makerika 
\q2 tone pise elake pususi 
\q2 supu misete bei Ale lulu saisa rebe esi onore. 
\q1 Sie meru nabiaru, kai tamata makete 
\q2 rebe esi dosa sae mo 
\q2 rebe esi hlaleke loko Alere. 
\q1 Kai petu kena Aatia sie 
\q2 rebe esi atia tamata mei nusare.” 
\q1  
\v 19 Eleki Tuhane Eni Luma ndete surgare ebaeke 
\q2 hoko selu peti rebe hnouke Alla Eni hukume kenae, 
\q2 rebe me Tuhane Eni Luma mere. 
\q1 Eleki silane baeke kerike kena lomai 
\q2 kai kla ela titinai 
\q2 kai isu elake 
\q2 kai ulane ese etetu ela titinai. 
\c 12  
\s1 Bina kai naga 
\sr 12:1-6 
\p  
\v 1 Eleki au selu tanda elake ndete lanite. Selu tebikele titinai. Bina sae me ialike lapune rebe ekliti saka lemataije kai ikele kena bulane, kai kmalea buai butu esa lesini lua uhita keholi liute me uluije.  
\v 2 Ikeu blublulu kai petu kena iruere reneka hoko ibiue le iblake kera titinai. 
\p  
\v 3 Eleki au selu tanda makete ndete lanite. Selu tebikele titinaije neka. Naga lalakwe ela titinai esi ului itu kai esi sepai butu esa. Liute, papela esi uluiju.  
\v 4 Kai esi aluije eneha lara teluke (1/3) kmalea ndete lanite, epoiele lope nusare. Naga mere ekele me bina rebe iono kena iruele kwetele mere oaije leke elelu kwetele.  
\v 5 Eleki bina mere iruele kwete mokwai rebe tatike pine ipletae pusue tamata mei nusa meije kena toane bua pesire\f + \fr 12:5 \ft Selu catatane kaki 2:26.\f*. Po malekate ihnaku kwetele mere bei binare eleki ikerini loko Alla me Alla Eni otoi maka rue kena pletare.  
\v 6 Eleki bina mere inaya lolete otoi nsekile loko otoi rebe Alla Iaknekaele eteije leke pialaeni ete mere musuna telu bulana ne (petua 1.260). 
\s1 Nagare kala 
\sr 12:7-9 
\p  
\v 7 Eleki lisa elake ndete lanite. Malekataru esi elake Mikaele kai eni malekataru esi lisa kai naga mere. Kai naga elake mere supu tapa bei esi malekataru.  
\v 8 Po Mikaele ilesi naga mere. Eleki Alla Isuka naga mere kai eni malekataru esi rue ndete lanite moneka.  
\v 9 Naga elake mere kai eni malekataru esi supu poie bei lanite lope nusare. Naga mere niakwe ntuane rebe esi nane ro tiare esi elake pise litare esi elake rebe elemake tamata mei pusue nusare.\f + \fr 12:9 \ft Ro tiare esi elake kena sou Ibranire, ‘maka tutuke’, yo litare esi elake kena sou Ibranire ‘musu’.\f* 
\s1 Lagu lesi 
\sr 12:10-12 
\p  
\v 10 Kena nagare kai esi malekataru supu poie lope nusare, au lene na elake bei ndete surga be, 
\q1 “Meije petu kena Alla Ihlamate tamata 
\q2 rebe hlaleke lokoIje. 
\q1 Kai meije Alla Itiluke Eni kbasare 
\q2 leke Ikbasae tamata saka kamale. 
\q1 Kai meije lekwe Kamale rebe Alla ItalukeNi 
\q2 kena Ihlamate tamatare ItilukeNi kbasare, 
\q2 le naga rebe pita kpetu itutuke tamata rame 
\q2 rebe esi hlaleke loko Tuhane me Alla oaIje, 
\q2 esupu poie bei ndete surga lope nusare peneka. 
\q1  
\v 11 Iteki tamata rebe esi hlaleke loko Tuhane 
\q2 esi lesi ro tiaru esi elake peneka 
\q2 le Domba Anaije Imata 
\q2 kai Eni lalakwe ponikele kena iteki dosaru. 
\q1 Kai le rilasi le matale mo 
\q2 po esi ktili lesi kena lepae Alla Eni lepataru 
\q2 kena Yesuse. 
\q1  
\v 12 Ele mere hoko pusue rebe rue ndete surgare 
\q2 suke lalemi ndina. 
\q1 Po yelu mei nusare supu susate 
\q2 le ro tiaru esi elake erulu lokomi peneka 
\q2 kena lale nasute titinai 
\q2 le irekwa be petu 
\q2 kena eono neune lau mo pusure reneka.” 
\s1 Nagare sui binare 
\sr 12:13-18 
\p  
\v 13 Kai kena naga mere erekwa be esupu poie mei nusare peneka, esui bina rebe iruele kwete mokwaije.  
\v 14 Po bina mere isupu riluke balakibiti saka manu lusi elake esi balakibite leke iribu loko otoi sae me otoi nsekile. Bina mere isupu raka ete mere musuna telu bulana ne leke lau bei naga mere.  
\v 15 Eleki naga mere eblutue kwele boka titinai loko bina mere leke kwele emanui.  
\v 16 Po nusare tapa bina mere, hoko enana eleki ehmoso kwele rebe nagare eblutuele bei esi biruije.  
\v 17 Eleki naga mere enasuke bina mere, eleki ekeu lisa kai bina mere eni anubua maketaru. Mere sie rebe esi lulu Alla Eni pletaru kai rebe esi alenake yelu rebe Yesuse Ionoule.  
\v 18 Eleki naga mere ekele ndau laiului. 
\c 13  
\s1 Binatane rebe esiri bei meite 
\sr 13:1-10 
\p  
\v 1 Eleki au selu binatane sae esiri bei meite, esi sepai butu esa kai esi ului itu. Kai liute buai butu esa kena esi sepaiju kai papela esi uluiju leki lepate tiae loko Alla le ebetekele Alla.  
\v 2 Binatane rebe au selue mere selue saka macane tutule. Esi lelale saka beruane esi lelale kai esi biruije saka singare esi biruije. Kai naga minare eluake loko binatane mere kai eono binatane mere ektili saka nagare kai eono binatane mere esupu kbasa elake lupe kamale saka nagare esi kbasare.  
\v 3 Binatane mere esi ului sae esi lakwai elake mahake emata po lakwai mere mutu peneka. Hoko pusue tamata rebe esi hlaleke loko Yesuse more esi lulu binatane mere le esi heranele.  
\v 4 Kai esi tatu loko naga mere le eono binatane mere ekbasa lupe nagare. Kai esi tatu loko binatane mere lekwe le esi noake be binatane mere Tuhane Alla. Kai esi beteke be, “Sae iktili lesi bei binatane meije mo, kai sae ilisa kai binatane meije mo!”  
\v 5 Binatane mere esupu kbasa kena lepae yelu rebe kwakwale kai lepa tiae loko Alla Eni nane. Kai Tuhane Isebeie ekbasa mei nusare musuna telu bulana ne (bulana 42).  
\v 6 Eleki elepa tiae loko Alla, le ebeteke ruale Alla, kai elepae tiae loko Eni otoi maka rue kena pletare kai elepae tiae loko pusue sie rebe esi rue ndete surgare.  
\v 7 Eleki Alla Isebeie elisa kai tamata rebe esi hlaleke loko Tuhane kai elesisi. Kai esupu kbasa kena epletae pusue tamata mei nusa.\f + \fr 13:7 \ft Selu 5:9 esi catatane kakire.\f* 
\v 8 Kai tamata rebe esi rue mei nusare esi tatu loko binatane mere. Batuke sie rebe esi nanaru lekilu me Domba Anai rebe bunure Eni bukure esi tatu loko mo. Kai kena Alla Itolae nusa meije mosare leki sie rebe supu hlamate esi nanaru kena buku mere peneka.  
\v 9 Hoko sepo imi suka lene hoko lene tita meije mimise, 
\p  
\v 10 “Tuhane Alla Iteu sie ilarua peneka kena esi supu alese kai sie ilaya maketa esi supu bunu kena sari. Hoko tinai, tatike pine sie ilaru esi supu alese kai sie ilaru esi supu bunu kena sari. 
\p Ele mere hoko tamata rebe ihlaleke loko Allare suke itahane lale kena susate sasaisa neka kai hlaleke loko Alla titinai rame.” 
\s1 Binatane rebe esiri bei nusa meije 
\sr 13:11-18 
\p  
\v 11 Kai au selu binatane makete esiri bei kmalane kai esi sepai lua saka domba anaije esi sepaije kai esi naije saka nagare esi naije.  
\v 12 Binatane akmenare eono binatane nomore luare esupu kbasa me binatane akmenare esi oaije hoko euma pusue tamata mei nusare kena esi tatu loko binatane akmenare rebe esi lakwai elake mise pende rebe mahake ematare.  
\v 13 Binatane nomore lua mere eono tanda herana bokala kai me tamata bokala meru oaisu eono auwere erulu bei ndete lanite kena nusare.  
\v 14 Kai elemake pusue tamata rebe esi rue mei nusare kena tanda herana rebe eonore yele me binatane akmenare esi oaije. Kai eulake pususi kena esi eleke binatane lakai lupe binatane akmena rebe esupu lakwai bei sarire po ere kwanare leke esi tatu lokole.  
\v 15 Kai esupu kbasa kena eono binatane lakai mere enasi kai elepa leke eulake bunu pusue tamata rebe esi tatu loko binatane lakai mere more.  
\v 16 Kai pusue tamata elake pise tone, tamata rebe esi tanei boka pise esi tanei sae mo kai tamata rebe esi kerike ete tamata makete pise mo, binatane nomore luare eumasi kena esi supu tanda kena esi bala makwanalaru pise esi oalaleisu.  
\v 17 Kai binatane nomore luare elake tamata esi sabe pise abeli mo batuke sie rebe esi supu tanda mere. Le tanda mere pine etiluke binatane akmenare esi nane pise nomore rebe etiluke esi nane.  
\v 18 Pentine ete meije suke rekwa mise titinai leke neheke binatana meru esi nomore rekwae, le nomora meru etiluke be ile tamata. Kai esi nomore utuna ne butu ne lesini ne (666)\f + \fr 13:18 \ft Nomore 666 tamata Yahudiaru esi noakele manea kwale mo.\f*. 
\c 14  
\s1 Domba Anai kai tamata rebe Ihlamateise 
\sr 14:1-5 
\p  
\v 1 Mere pela eleki au selu Domba Anaije Ikele ndete Ulate Sione sakesa kai tamata sie usata utune esa butu ata lesini ata (144.000). Kai Domba Anaije Eni nane kai AmaI Eni nane lekie kena oalaleisu.  
\v 2 Eleki au lene lepate bei ndete surga esi tulei saka kwele elake etetue lapate kai lupe kla elake titinai. Au lene naise saka tamata esi klemake alate musike boka titinai rebe pake snare rebe esi nane kecapire esi tuleije.  
\v 3 Eleki sie usata utune esa butu ata lesini ata (144.000) meru esi menani lagu beluke sae me Alla oaI, kai tanei kwanala ataru kai elaka rebe esi keholi Alla Eni otoi maka rue kena pleta mere oaisu. Lagu mere tamata maketa esi rekwa mo batuke sie usata utune esa butu ata lesini ata meru neka. Sie meru bei nusa meije rebe Yesuse Irubusi bei esi dosaru.  
\v 4 Sie meru tamata rebe esi hlaleke titinai leke esi tatu loko tuhane tinai more yake. Mere saka tamata rebe sablia kai bina mo. Esi lulu Domba Anaije loko etia neka lulu ikeure. Bei pusue tamatare, sie meru rebe Yesuse Irubusi leke onosi kena korbane akmena ete Alla kai ete Domba Anaije.  
\v 5 Esi lemake mo kai esi ono sala sasaisa moneka. 
\s1 Malekata telu rebe beteke lepata bei Allare 
\sr 14:6-13 
\p  
\v 6 Eleki au selu malekate makete iribu ndete lanite. Malekate mere ikeri Sou Misete rebe eti pela sae ilelikele more leke ibetekele ete pusue tamata mei nusare.\f + \fr 14:6 \ft Selu 5:9 esi catatane kakire.\f* 
\v 7 Kai ikloloe kena na elake be, “Rila le Alla kai isikeNi, le petu kena Iteu pakala ete tamatare meije peneka. Kai tatu loko Ile rebe Itolae nusare kai pusue yelu rebe umei kenare.”  
\v 8 Eleki malekate makete nomore luare itutumulieni kai ibeteke be, “Babele kota elake supu atia peneka. Le tamata rebe esi ete mere esi umauke pusue bangsaru leke hlaleke Alla yake saka bina neune rebe iinuke mokwai leke lalesi lokoije.” 
\p  
\v 9 Eleki malekate makete nomore telure itutumulie malekata lua meru kai ikloloe kena na elake be, “Sepo sire itatu loko binatane kai binatane lakai mere kai isupu tanda kena oalaleije pise kena balaije,  
\v 10 hoko tamata mere ikinu Alla Eni anggure rebe nkati titinai rebe toha kwale moneka. Mere isupu nasu bei Alla titinai. LaleIje noasi kwale moneka. Kai isupu susate kena auwe kai belerane kweini me malekata miseta le dosa sae mo meru kai Domba Anaije esi oaisu.  
\v 11 Hoko auwe kweini rebe ono susate eteise esa lolete eti pela, kai pita kpetu esi supu susate rame. Sie meru rebe esi hlaleke loko binatane akmenare kai esi lakaije kai rebe esi supu tanda rebe etiluke binatane akmenare esi nane.”  
\v 12 Kwali betaya, pentine ete meije Alla Eni tamata rebe esi lulu Eni pletaru kai esi hlaleke loko Yesuse rame, suke tahane kena supu sasaisa neka.  
\v 13 Eleki au lene lepate bei ndete surga be, “Leki meije be bei petu meije tamata rebe esi mata le esi hlaleke loko Tuhane esi supu misete elake peneka.” 
\p Eleki Alla Eni Rore Ibeteke be, “Tinai! Esi hleke bei susate kena esi kerike ete Tuhane le esi supu misete lulu esi makerike.” 
\s1 Ulu nusare esi hasile 
\sr 14:14-20 
\p  
\v 14 Eleki au selu moputi. Ile sae irue kena moputi mere esi babaije selui saka Tamata Eni Nanare Ialike maka kopa ulu bei mase kena uluije kai ilalake sabite ntinale.  
\v 15 Eleki malekate makete isiri bei Tuhane Eni Luma rebe ndete surgare kai ikloloe kena na elake loko ile rebe irue kena moputire esi babaije be, “Bitike Amu sabite kena ahukume pusue tamata mei nusare, saka rana ndinu rebe esi hasile plisi kena ranare.”  
\v 16 Kai Ile rebe Irue kena moputire esi babaije Ihloie Eni sabite loko nusare kai Ihukume pusue tamata mei nusare. 
\p  
\v 17 Kai malekate makete isiri bei Tuhane Eni Luma rebe ndete surgare kai ilalake sabite ntinale sae lekwe. 
\p  
\v 18 Kai malekate makete rebe ikbasae auwe me otoi maka pala tanei rebe riluke ete Allare iluake, kai iulake kena na elake loko malekate rebe ilalake sabite ntinale mere leke ekeu hukume pusue tamata me nusa rebe esi hlaleke loko Tuhane more, saka tamata esi tete anggure buaije bei esi aine.  
\v 19 Eleki malekate mere ihloie eni sabite loko nusare kai itete anggure mpe nusare esi buaije kai ipoiele kena otoi maka keleke anggure kena rana esi kweline, ele mere lekwe malekate hukume tamata meru le Alla Inasu titinai.  
\v 20 Anggure buai meru kelekele me kota mulini. Lupe tamata esi keleke anggure kena otoi maka keleke anggure, esi kweline ponikele kai ebele lau titinai. Ele mere lekwe, tamata rebe hlaleke lokoI more esi supu bunu, esi lalakwe ebele saka kwele salaue kilometera utuna telu, kai esi nanuke mahake metera lua. 
\c 15  
\s1 Malekata ituaru kai hukumane itu bei Allare 
\sr 15:1-4 
\p  
\v 1 Mere pela eleki au selu tanda tiae ndete lanite. Tanda tiae kai tebikele titinaije neka. Au selu malekate sie itua rebe esi kbasa kena susata itu rebe pamulire. Mere Tuhane Alla Eni hukuma itu pamulire.  
\v 2 Kai au selu saisa me saka meite ela titinai po selu siba saka kaca, toha kai auwe. Au selu tamata rebe esi lesi le esi tatu loko binatane mere kai binatane lakaije more kai esi naku mo kena tolae nomore rebe etiluke binatane mere esi nane kena oaleisu more. Tamata rebe esi lesi mere esi kele me meite mere esi leine. Kai esi lalake alate musike rebe pake snare esi nane kecapi rebe Alla Irilukele eteise.  
\v 3 Eleki esi menanie lagu rebe Musa, Alla Eni makerike imenaniele kai lagu rebe Domba Anaije Imenaniele. Lagu mere be, 
\q1 “Tuhane, Alla Maka Kbasa elake titinai. 
\q1 Amu makerikaru pusulu ela kai tebikelu, 
\q1 Kamale ete pusue bangsa, 
\q2 Amu cara kena tapa Amu tamataru nkena kai tinai! 
\q1  
\v 4 Tuhane, sire rilai le Ale mo 
\q2 kai iisike Amu nane more? 
\q1 Le batuke Ale pine Amise titinai 
\q2 le Amu dosa sae mo, 
\q1 Le pusue bangsa esi luake 
\q2 kai esi tatu kai holmate Ale. 
\q1 Le saisa rebe Ateure enkena.” 
\s1 Malekata sie itua kai obai buai itu kena Alla Eni hukumane 
\sr 15:5-8 
\p  
\v 5 Eleki au selu Tuhane Eni Luma ndete surgare. Esi meture baeke eleki au selu otoi mise titinai empai lale rebe tolae Alla Eni hukumaru kenare.  
\v 6 Kai malekata itu rebe esi kbasae susata ituaru esi siri bei mpai Tuhane Eni Luma laleije. Pususi alike lapune putile rebe eputi kai ehita. Kai esi alike maka kopa lere bei mase.  
\v 7 Eleki sae bei tanei kwanala ata meru eriluke oba masa buai esa papelake malekata itu meru. Oba mere epenu kena hukumana le Alla Inasu. Mere Alla rebe Ime eti pelare.  
\v 8 Kai Tuhane Eni Luma mere auwe kweine soue. Auwe kweini mere esi natire Alla Eni hitate elake kai Ikbasa. Sepo hukumana bei malekata itu mere pela mosa, tamata sae ikusu kena Tuhane Eni Luma mere mo. 
\c 16  
\s1 Hukuma itu rebe Alla Ionoe 
\sr 16:1-21 
\p  
\v 1 Eleki au lene na elake bei mpai lale Tuhane Eni Lumare loko malekata itu meru be, “Keu honike yelu bei oba itu meru kena nusare.” Mere natire Alla Eni hukuma itu kena nusare.  
\v 2 Eleki malekate nomore esare ikeu honike eni obare esi laleije lope nusare. Eleki pusue tamata rebe esi pake tanda bei binatane mere kai esi hlaleke loko esi lakaije esi supu usie rebe ntaute rebe kera titinai.  
\v 3 Kai malekate nomore luare ihonike eni obare esi laleije lope meite eleki kwele elelie lalakwe lupe tamata rebe isupu bunure eni lalakwe. Eleki pusue yelu rebe urue kena meite umata pusulu.  
\v 4 Kai malekate nomore telure ihonike eni obare esi laleije lope kwelearu kai kwele bolaiju eti pusulu lelie lalakwe.  
\v 5 Kai au lene malekate rebe ikbasae kwele mere ibeteke be, 
\q1 “Ale rebe Aono hukume meije Ankena, 
\q2 Ale rebe bei akmena sa Ame peneka, 
\q2 Amise titinai le Amu dosa sae mo. 
\q1  
\v 6 Le esi bunu nabiaru kai Tuhane Eni tamata maketaru. 
\q1 Hoko Aonosi kinu lalakwe. 
\q1 Aonosi supu hukumane ele mere panuhu!” 
\p  
\v 7 Kai au lene lepate bei otoi maka pala binatane rebe rilukele ete Allare be, 
\q2 “Alla Amu kbasare ela titinai. Saisa rebe Ateure tinai kai nkena.” 
\p  
\v 8 Kai malekate nomore atare ihonike eni obare esi laleije kena lemataije. Eleki lemataije supu kbasa kena kotu tamata.  
\v 9 Tamata rebe esi supu kotu bei lemataije esi lepae tiae loko Alla rebe Ikbasa kena ono esi supu hukumane elake Eni nane. Yo esi hleke bei ono dosa mo kai esi isike Alla mo.  
\v 10 Kai malekate nomore limare ihonike eni obare esi laleije kena binatane mere kai pusue rebe ekbasaele hoko pusue kpetu. Kai esi kete maisu le esi blake kera kuate.  
\v 11 Kai esi lepa tiae loko Alla ndete lanite le kera kuate kai esi usiaru po esi hleke bei esi ono neunaru mo. 
\p  
\v 12 Kai malekate nomore nere ihonike eni obare esi laleije kena kwele elake kwele Eprate, eleki enseki leke kamala rebe esi luake bei sapleuke lemataije sare esi supu keuele.  
\v 13 Kai au selu ro tiae telu saka lotu. Sae esiri bei nagare esi biruije, sae esiri bei binatane esi biruije kai sae esiri bei nabi tinai more biruije. Nabi tinai mo mere binatane nomore luare.  
\v 14 Ro tiae meru, ro rebe uono tanda herana. Kai esi keu loko pusue kamala mei nusare leke esi lupukesi kena esi lisa kena petu rebe Alla rebe Eni kbasae elake Ihukume Eni musuaru. 
\p  
\v 15 “Lene mimise! Au luake sae irekwa mo, saka tamata ndeane iluake. Hoko nete, raka imi atate kai saisa rebe imi onore mimise leke imi supu misete. Imi ono saka tamata rebe intulu mo po ialike eni pakiane leke ikalaku yake, leke tamata esi seluije iasomi mo.”  
\v 16 Eleki ro tiae meru esi lupuke kamala meru kena otoi sae me esi nane kena sou Ibranire Harmagedone. 
\p  
\v 17 Eleki malekate nomore iture ihonike eni obare esi laleije kena lanite. Kai na elake bei otoi maka rue kena pleta me Tuhane Eni Lumare esi laleije eombe, “Alla Eni hukumana ete tamata neune upelare reneka.”  
\v 18 Eleki silane baeke kerike kena lomai kai kla elake titinai kai isu elake titinai neka. Bei kena Alla Itolae tamata kena nusare isu ele mere rebai sae mosa.  
\v 19 Eleki kota elake Babele setele kena telu kai bangsaru esi kotaru atia pusulu. Alla Inete loko kota elake Babele esi dosaru rame. Hoko Iono tamata kota meru esi kinu bei oba rebe epenu kena Alla Eni hukumane. Alla Ihukume kota elake Babele ele mere.  
\v 20 Kai pusue nusaru sirikelu kai ulataru sae moneka.  
\v 21 Kai ulane ese esi blulute kiloa butu lima etetu bei ndete lanite kena tamata. Kai tamata esi lepae tiae loko Alla le susate bei ulane ese mere kai susate mere ktili kuate. 
\c 17  
\s1 Teu pakala ete kota Babele 
\sr 17:1-18 
\p  
\v 1 Eleki ile sae bei malekata itu rebe esi lalake oba meru iluake loko au kai ibeteke be, “Mai au tiluke ete ale loko hukume ete kota elake Babele rebe tolae me kwelea bokala esi leinu. Kota elake mere esi atate saka bina lalane rebe ineu titinai.  
\v 2 Kamala mpe nusare esi ono lulu Babele esi agamare mere saka esi ono ntasite kai bina mere peneka. Kai pusue tamata mei nusare lulu esi atataru saka esi nseli le esi kinu bina lalane mere eni anggure.” 
\p  
\v 3 Eleki Alla Eni Rore ikbasae au eleki malekate mere ikeri au loko otoi nsekile. Eleki au selu bina sae irue kena binatane inai sae me mahmelane rebe leki lepate tiae loko Alla Eni nane penu esi nanakwalaije. Binatane mere esi ului itu kai esi sepai butu esa.  
\v 4 Bina mere ialike kamale eni pakiane mahmelane kai lalakwe lakwai esa kai andulikeni kena taneia bei mase, permata kai mutiara. Kai ilalake oba bei mase rebe epenu kena atate tiae rebe supue bei bina mere iabelie nanakwalaije kai itatu loko tuhane tinai more esi lakaije.  
\v 5 Kena oalaleije leki nane sae me rebe esi nana bunike esi natire sa. Nane mere, 
\q1 “Babele kota elake! Kota rebe atetuke pusue tamata mei nusa 
\q2 leke esi sablia kai ono tiae 
\q2 rebe Tuhane Isuka kwale moneka.” 
\p  
\v 6 Eleki au selu bina mere laleije ndina titinai kena isuka bunu Alla Eni tamata rebe esi dosa sae mo, rebe esi lepae Yesuse Eni hnaunaru saka tamata rebe isuka titinai kena kinu anggure eti inseli. 
\p Kena au selu bina mere au herane titinaije neka.  
\v 7 Eleki malekate mere ibeteke loko au be, “Aherane yake! Saisa rebe rekwa mo bei bina mere kai sasaisa rebe rekwa mo bei binatane rebe esi ului itu kai esi sepai butu esa rebe irue kenae mere, au betekele ete ale.  
\v 8 Binatane rebe aselue mere, akmenare eme peneka po pamuli meije emata peneka. Takwali mo esiri bei matale esi benaije. Kena esirire, namake pusue tamata rebe kena Alla Itolae nusa meije mosare, esi nanaru lekilu mo kena Buku Tamata Kwanale, esi herane binatane mere. Le binatane mere akmenare me peneka kena meije me moneka po tatike pine eluake suike. Masike ele mere po tatike pine atiae. 
\p  
\v 9 Sire rebe irekwa titinai, namake inati binatane mere. Binatane esi ului itu meru, natire ulata itu rebe bina mere irue kenalu. Kai esi ului itu meru lekwe natire kamala itu.  
\v 10 Lima bei kamala meru esi mata peneka, esa eri pleta sa kai esa lekwe iluake mosa. Sepo tatike pine iluake hoko ipleta po Alla Iteu peneka be suke ipleta takwali mo.  
\v 11 Kai binatane rebe akmenare eme po meije me monde namake iono kamale nomore kwalure. Ile mere sae bei kamale sie ituaru neka rebe ibetu suike iono kamale nomore kwalure. Namake atiai. 
\p  
\v 12 Kai sepai butu esa rebe aselu pende mere kamala butu esa rebe esi pleta mosa. Po esi supu kbasa kena pleta saka kamale sakesa kai binatane mere olase ului esa.  
\v 13 Esi lene loko lomai kai esi lalesi esa, esi ktiline kai esi ono binatane mere supu kbasa.  
\v 14 Esi lisa kai Domba Anaije. Po Domba Anaije kai Eni maka lulua rebe esi lului rame rebe Ikotisi kai Ibitikeise esi lesi kamala meru le Ile Elake lesi bei elaka maketaru kai Kamale lesi bei kamala maketaru.” 
\p  
\v 15 Eleki ibeteke loko au be, “Pusue kwele rebe aselu bina lalane mere irue kenare, mere pusue tamata mei nusaru.\f + \fr 17:15 \ft Selu 5:9 esi catatane kakire.\f* 
\v 16 Kai sepai butu esa rebe aselure, meru kamala butu esare. Namake esi sakesa kai binatane mere, lalesi tiake kota Babele kai esi atiae. Mere saka esi rana pusue bina lalane eni pakiane leke ikalaku, kai esi kahi pusue tinaiju kai esi poiele kena auwe.  
\v 17 Le Alla Iono lalesi esa peneka lulu Eni sukare leke esi ono binatane mere supu kbasa leke epleta eti saisa rebe Alla Ibetekele eono.  
\v 18 Kai bina lalane rebe aseluije, mere kota elake rebe epletae pusue kamala mei nusare.” 
\c 18  
\s1 Kota Babele atiae 
\sr 18:1-20 
\p  
\v 1 Eleki au selu malekate makete irulu bei ndete surga. Eni kbasare ela titinai kai eni hitate elake eono nusare pusue ehita.  
\v 2 Eleki ikloloe kena na elake be, 
\q1 “Babele kota elake atia peneka! Pamuli meije ro tiaru esi otoi maka rue peneka. 
\q1 Kena esi laleije manua rebe ndopona kai rebe tamata esi suka more urue kenae. 
\q1  
\v 3 Kota Babele atiae le esi atate lupe bina lalane neune 
\q2 rebe iinuke mokwai kena anggure leke esi sablia kaini. 
\q1 Ele mere lekwe, tamata rebe esi rue me kota Babele 
\q2 esi umauke pusue tamata mei nusa 
\q2 kena ono dosa kai nsalale 
\q2 kai esi tatu loko tuhane tinai more esi lakaiju. 
\q1 Kamala mei nusaru lekwe esi sakesa kai tamata Babelaru 
\q2 esi ono dosa kai esi ono ntasite 
\q2 lupe mokwai isablia kai bina lalane. 
\q1 Maka abeliaru esi supu taneia boka 
\q2 le tamata Babelaru lalesi loko taneia boka.” 
\p  
\v 4 Eleki au lene Alla Ilepa bei ndete surga be, 
\q1 “Tamata rebe imi hlaleke loko Aure 
\q2 imi siri bei kota mere. 
\q1 Leke imi ono dosa lulu tamata ete meru yake. 
\q1 Kai leke susate rebe esi supure ekena imi yake. 
\q1  
\v 5 Le esi dosaru tebabake lomai roma ndete lanite peneka, 
\q2 hoko meije Au atiae. 
\q1  
\v 6 Au ulake malekate keu atia Babele mere 
\q2 saka tamata Babelaru esi onoe ete Auku tamata 
\q2 rebe esi hlaleke loko Aure. 
\q1 Saisa rebe tamata babelaru esi onore 
\q2 au leliele etesi ktili lesi bei saisa rebe esi onore. 
\q1 Babelaru esi hukumane meije saka oba rebe penu 
\q2 kena sasune rebe rilukele 
\q2 ete tamata Babelaru leke esi kinue, 
\q2 esi ktiline rebai lua bei tamata Babelaru esi rilukele ete tamata makete esi kinure. 
\q1  
\v 7 Babele esupu hukumane elake saka esi kwakwale kai saka epake libuke taneiaya bokalaru. 
\q1 Le bina neune Babele mere inoake be ile tamata elake. Namake iono bina balu moneka kai irani moneka. 
\q1  
\v 8 Hoko masike batuke petu esa isupu manane mo, 
\q2 po irani titinai kai imata peneka. 
\q1 Kai namake kotui. Le Au ruaku pine Au kbasa. 
\q1 Au ruaKu teu pakala kena eni dosaru.” 
\p  
\v 9 Tamata Babela esi taneiaru eono kamala mei nusaru esi taneia boka le pususi ono dosa kai sala, sakesa kai mokwai rebe intulu kai bina lalane le lalesi lokoije, pususi rani hnasike le kota Babele elake mere kotu pusu peneka eleki auwe kweine sou pusue.  
\v 10 Esi kele bei lauke esi limese kota mere koture, le rilasi le supu hukumane mere lekwe. Kamala meru esi beteke be, 
\q1 “Malere, malere titinai! 
\q1 Kota elake rebe tamata bokala esi rekwae, 
\q2 rebe ktiline, yo sasare atia peneka.” 
\p  
\v 11 Kai tamata maka abeli me nusare esi rani hnasike kai esi beteke be, 
\q1 “Malere! 
\q1 Tamata me kota Babele esi luake loko ite 
\q2 kena sabe iteki taneiaru moneka. 
\q1  
\v 12 Namake iteki mase, perake, permata, mutiara, 
\q2 obite misete titinai kai obite mahmelane, obite lalakwe, 
\q2 aia rebe esi boinu ntele, 
\q2 taneia bei gaja nelini, taneia bei ai 
\q2 rebe esi beline elake, bei tembaga, 
\q2 pesi kai bei batu karane rebe kberele kai selua kliti, 
\q1  
\v 13 kai ai nkotone usai, bumbua, tanei boini ntelete, 
\q2 tanei boini ntelete mure 
\q2 kai kemenyane, anggure, leite, 
\q2 tepone kai gandume, sapi, domba, kuda kai kereta. 
\q1 Tamata makerike rebe eni kbasa sae mo 
\q2 kai tamata rebe esi supu kerike kena lisare. 
\q1 Pusue meiju tamata Babelaru esi sabelu moneka.” 
\p  
\v 14 Tamata maka abelia meru esi susa loko kota Babele titinaije neka, esi beteke be, 
\q1 “Tamata kota Babele, taneia rebe imi nikwalu 
\q2 kena imi pakelu leke eono imi tanei bokare 
\q2 atia pusulu peneka.” 
\p  
\v 15 Tamata maka abelia rebe esi tanei boka le piasare tamata Babelaru esi sabe esi taneiaru, rilasi hoko esi kele bei lauke le esi noake be yapine esi supu hukumane mere lekwe. Esi rani hnasike kota Babele rebe ebui mere pende.  
\v 16 Esi beteke be, 
\q1 “Malere! Kota elake rebe tamata bokala 
\q2 esi rekwae mere atia pusu peneka. 
\q1 Kota mere saka kamale eni bina rebe selui kliti 
\q2 le eni pakianaru bei obite misete titinai, 
\q2 obite mahmelana kai lalakwe 
\q2 rebe esi beline ela titinai kai mase, 
\q2 permata kai mutiara. 
\q1  
\v 17 Po batuke sasare yo kota Babele 
\q2 esi tanei bokala meru atia pusulu peneka.” 
\p Kai pusue maka keri kapale, tamata rebe esi sa kapale kai makerike me kapalaru kai pusue tamata rebe esi makerike ndau meite esi kele bei lauke kena selu kota mere.  
\v 18 Pususi kloloe le aure koti pusue kota mere. Esi klolo be, 
\q1 “Ayo! Mei nusa meije kota sae makete 
\q2 esakesa kai kota Babele meije mo.” 
\p  
\v 19 Eleki esi rana lopone eleki esi libuke kena uluisu le lalesi susa kai esi rani hnasike kota mere lekwe. Esi beteke be, 
\q1 “Malere, Kota Babele rebe tamata bokala 
\q2 esi rekwae meije esupu susate elake peneka. 
\q1 Bei kota meije pine pusue tamata 
\q2 rebe esi kapalaru esi taneia boka. 
\q1 Po sasare yo kota meije esi taneiaru atia pusulu peneka.” 
\p  
\v 20 Eleki lepate sae eombe, 
\q1 “Pusue imi ndete surgare suke lalemi ndina 
\q2 le kota elake meije atiare. 
\q1 Hei! Pusue Alla Eni tamata, 
\q2 Yesuse Eni maka ulake kai nabia, 
\q2 suke lalemi ndina! Le Alla Iono hukumane elake mere 
\q2 kena seli saisa rebe tamata Babelaru 
\q2 esi onoe ete imire.” 
\s1 Babele ebetu suike moneka 
\sr 18:21-24 
\p  
\v 21 Eleki malekate sae me iktili titinaije neka ibitike batu sae me esi elaka saka batu maka giline gandume rebe ela titinaije. Eleki ipoiele kena meite kai ibeteke be, 
\q1 “Sakesa kai kota Babele rebe elake mere neka, 
\q2 poie lope tiktili leke atiae. 
\q1  
\v 22 Pusue yelu rebe tamata Babelaru esi onore sae moneka. 
\q1 Kai maka klemake kecapiaru kai maka menaniaru, 
\q2 kai maka hbue suline kai tabuli, sae ilene naisu 
\q2 me kota mere moneka. 
\q1 Kai tamata makerike rebe irekwa titinai, 
\q2 sae itetuesi kena kota mere moneka, 
\q1 kai sae ilene batu maka giline gandume esi tuleije moneka. 
\q1  
\v 23 Kai tamata esi selu lampuaru kliti 
\q2 kena kota mere moneka 
\q1 kai sae ilene tamata naisi kena totliba 
\q2 kena kota mere moneka. 
\q1 Namake kota elake mere supu hukumane ele mere 
\q2 le tamata maka abelia rebe esi rue 
\q2 ete mere esi tanei boka lesi 
\q2 bei tamata makete mei nusaru, 
\q1 kai tamata me kota mere esi ono palmane 
\q2 ete pusue tamata mei nusare 
\q2 esi supu lemake. 
\q1  
\v 24 Tamata Babele esi supu hukume elake titinai 
\q2 le esi bunu nabiaru kai Alla Eni tamata maketaru. 
\q1 Mere esi bunu pusue tamata 
\q2 rebe esi sala sae mo me Alla oaIje.” 
\c 19  
\s1 Pusue sie ndete surgare lalesi ndina 
\sr 19:1-5 
\p  
\v 1 Eleki au lene na elake ndete surga saka tamata bokala esi kloloe be, 
\q1 “Isike Alla. Iteki Allare rebe Ihlamate ite. 
\q1 Ile rebe Ikbasa kai Ihita titinai. 
\q1  
\v 2 Isike Alla le Eni hukume nkena kai tinai. 
\q1 Iteu hukumane ete kota elake, 
\q2 rebe sakesa kai bina lalane 
\q2 rebe piasare isablia kai mokwaiaru. 
\q1 Tamata me kota mere esi uma pusue tamata mei nusa 
\q2 leke esi ono dosa kai tatu loko tuhane tinai more 
\q2 esi lakaije. 
\q1 Tuhane ihukume Babele le tamata rebe me Babele 
\q2 esi bunu Alla Eni tamata makerikaru.” 
\p  
\v 3 Kai sie bokala ndete surgare esi kloloe suike be, 
\q1 “Isike Alla! Ite isike Tuhane suike! 
\q1 Auwe rebe Tuhane Iono ekotu kota elake mere 
\q2 kai auwe kweine bei kota mere 
\q2 eti pelare sirike moneka.” 
\p  
\v 4 Kai elaka sie butu lua lesini ata meru kai binatana ata meru tatu kai holmate Alla rebe Irue kena otoi maka ruere kai esi beteke be, 
\q1 “Amine! Mai ite isike Alla.” 
\p  
\v 5 Eleki nai sae bei otoi maka rue kena pleta mere eombe, 
\q1 ‘Pusue imi rebe Tuhane Eni tamata makerikaru 
\q2 rebe tone kai elake, 
\q2 kai rebe tatu lokoIje, 
\q2 pusumi IsikeNi!” 
\s1 Domba Anaije Eni pesta kaije 
\sr 19:6-10 
\p  
\v 6 Eleki au lene tamata bokala naisi lupe kwele elake etetu lapate esi tuleije kai lupe kla elake esi tuleije be, 
\q1 ‘Isike Alla! Le iteki Allare, Eni Kbasa ela titinai 
\q2 kai Ipleta pusue tamata. 
\q1  
\v 7 Mai ite lalema ndina kai ite holmate Tuhane! 
\q1 Le petu kena Domba Anaije Ikaije emeije peneka. 
\q1 Kai eni bina rebe kaije ialike  
\v 8 pakiane mise titinai 
\q2 rebe kliti rebe Alla Irilukele eteije peneka.” 
\p Pakiane misete titinai rebe kliti mere esi natire saisa rebe Tuhane Eni tamataru esi mei nusare lulu Tuhane enkena. 
\p  
\v 9 Eleki malekate mere ibeteke loko au be, “Aleki elere, ‘Tamata rebe esi supu koti kena pesta Domba Anaije Ikaije, esi supu misete bei Alla.’ ” Kai malekate mere ibeteke lokoku lekwe be, “Meije sou tinai bei Alla.” 
\p  
\v 10 Eleki au tatu me eni lelale kena au holmatei, po ibeteke loko au be, “Ono ele mere yake! Le aure tamata makerike sakesa kai ale kai amu kwalia rebe esi lulu sou nkenale rebe Yesuse Ibetekule neka. Tatu loko Alla! Le saisa rebe nabiaru esi betekele kai saisa rebe au betekele ete ale, mere rebe Yesuse Ibetekule.” 
\s1 Yesuse Inabu pusue Tuhane Eni musua me pusue nusaru 
\sr 19:11-21 
\p  
\v 11 Eleki au selu surga baeke eleki au selu kuda putile. Kai ile rebe sa kenare eni nane, Nkenale kai Persayai le iono lulu Alla Eni lepataru rame. Iteu pakala kena nkenale kai ilisa kena nkenale.  
\v 12 Kai mataIje selu saka auwe klitini kai ndete uluIje liuta boka titinai kai leki nane sae kenae rebe tamata makete esi rekwa mo, batuke ruaI.  
\v 13 Kai Ialike lapune nanuke rebe penu kena lalakwe. Kai kotiNe “Alla Eni Lepate.”  
\v 14 Kai pusue solaua ndete surga esi keu luluI, esi sa kuda putile kai esi alike lapune putile misete titinai.  
\v 15 Kai sari nanuke ntinale esiri bei biruIje kena lasa pusue tamata mei nusa. Kai Ipletaesi kena toane bua pesi\f + \fr 19:15 \ft Selu catatane kaki 2:26-27.\f*. Ikeleke Eni musuaru saka tamata esi keleke anggure buaije kena otoi maka keleke anggure kena rana esi kweline. Tamata mei nusare esi ono dosaru boka kuate, hoko Alla rebe Ikbasare Iaseluke Eni nasute etesi ele mere.  
\v 16 Kena Eni lapu nanuke kai ainueIje lekite matai be Aure Kamale lesi bei kamala maketaru kai Aure Elake lesi bei elaka maketaru. 
\p  
\v 17 Eleki au selu malekate sae me ikele kena lemataije esi hitaije kai ikloloe kena na elake loko pusue manua rebe uribu ndete lanite be, “Mai lomei kai lupuke sakesa kena Alla Eni pesta elake meije.  
\v 18 Leke imi kane pusue kamalaru esi tinaisu, pusue solaluaru esi elakaru esi tinaisu, pusue tamata maka lisaru esi tinaisu, kudaru esi tinaiju kai tamata rebe esi sa kenare esi tinaisu, kai tamata rebe esi kerike ete tamata makete mo pise tamata makerike esi tinaisu kai tamata elake pise tone esi tinaisu.”  
\v 19 Kai au selu binatane mere kai kamala me nusare kai solalua esi lupuke lomai leke esi lisa kai Maka sa kuda putile mere kai Eni solaluaru.  
\v 20 Eleki binatane akmenare esupu kerike sakesa kai nabi rebe tinai mo mere. Nabi mere binatane nomore lua rebe eono tanda herana me binatane akmenare esi oaije. Kena tanda herana meru, binatane mere elemake tamata rebe esi pake tanda binatane mere kai esi tatu loko binatane mere esi lakaije. Eleki binatane mere kai nabi tinai more esi supu poie kena auwe elake lupe meite rebe kliti kena belerane po erisi kwana.  
\v 21 Kai pusue tamata maketaru esi supu bunu kena sari nanuke rebe esiri bei Maka sa kuda putile biruIje. Kai pusue manuaru upilae tinaisu. 
\c 20  
\s1 Petua musune usate esa 
\sr 20:1-6 
\p  
\v 1 Eleki au selu malekate sae me irulu bei ndete surga ikerike matale esi benaije esi kuncire kai ilalake rante elake.  
\v 2-3 Eleki ikerike naga rebe ntua titinai peneka. Naga mere ro tiaru esi elake pise litare esi elake. Kai iloe eleki ipoiele lope matale esi benaije kai ikuncie kai itola segele kenae leke naga mere elemake tamata mei nusare moneka salaue musuna usate esa. Musuna meru pela mina pine esupu tie suike po takwali mo. 
\p  
\v 4 Eleki au selu otoi maka rue kena pleta kai tamata rebe esi rue kenare, esi supu kbasa kena teu pakala. Kai au selu tamata rebe esi supu bunu le esi suka tatu loko binatane neune mere mo kai binatane mere esi lakaije mo. Kai esi pake binatane mere esi tandare kena oalaleisu pise esi balaisu mo. Po esi saksi rame kena Yesuse kai esi lepae Alla Eni hnaunaru, hoko esi selearu supu ribi kai uluisu supu tete. Po meije esi kwana suike peneka eleki esi kbasa saka kamale sakesa kai Maka Hlamate rebe Tuhane ItalukeiNe kai esi kbasa musuna usate esa.  
\v 5 Po kena musuna usate esa mere, tamata matale maketaru sae ikwana suike mosa. Tamata matala esi kwana suike menaije meije.  
\v 6 Sie rebe esi kwana suike kena rebai menaije esi supu misete. Esi ono Alla Eni tamata. Esi mata rebai lua moneka. Mata rebai luare supu poie kena auwe saelae meite. Esi ono imama ete Alla kai imama ete Kristuse. Kai esi pleta sakesa kaiNi musuna usate esa. 
\s1 Ro tiare supu hukume 
\sr 20:7-10 
\p  
\v 7 Eleki kena musuna usate esa mere liare ro tiaru esi elake tiele bei matale esi benaije.  
\v 8 Eleki ikeu umauke tamata me pusue nusare rebe kotise Goke kai Magoke. Ro tiare esi elake lemakesi kai lupukesi leke esi lisa. Tamata meru esi boka titinai sabokae ume ndau meite.  
\v 9 Eleki esi luake bei pusue otoi mei nusare kena esi keholi tamata rebe esi lulu Allare me kota rebe Alla Iokire. Po aure erulu bei ndete lanite ebunu pususi.  
\v 10 Eleki ro tiaru esi elake rebe ilemake sie meru namake isupu poie kena auwe elaka kai belerane saka meite mere. Binatane akmenare kai nabi tinai more esi supu poie akmena ete mere peneka. Nabi tinai mo mere binatane nomore luare. Esi blake kera titinai pita kpetu eti pela. 
\s1 Hukume rebe pamulire 
\sr 20:11-15 
\p  
\v 11 Eleki au selu otoi maka rue kena pleta rebe putile elake kai Ile rebe Irue kenare. Lanite kai nusare sirikele bei oaIje le atia pusulu peneka.  
\v 12 Kai au selu tamata matale elake tone esi kele me otoi maka rue mere esi oaije. Eleki bukuaru baekele. Eleki buku makete me baekele, buku mere Buku Tamata Kwanale. Eleki tamata matalaru esi supu hukumane lulu saisa rebe esi onoe, rebe lekie me bukuaru.  
\v 13 Hoko tamata rebe esi mata ndau meite kai tamata rebe esi mei tamata matale esi otoi maka ruere lekwe esi supu hukumane lulu saisa rebe esi onore lekwe.  
\v 14-15 Tamata rebe esi nane kena buku tamata kwanale more poiesi kena auwe saelae meite mere. Mere pela eleki Matale kai Nusa tamata matale sae moneka le pusue tamata rebe esi kusu nusa beluke more esi supu poie kena auwe saelae meite peneka. Auwe saelae meite mere esi kotiele mata rebai luare. 
\c 21  
\s1 Lanite kai nusa beluke 
\sr 21:1-8 
\p  
\v 1 Eleki au selu lanite beluke kai nusa beluke. Lanite akmenare kai nusa akmenare sirikele kai meite lekwe selu moneka.  
\v 2 Eleki au selu kota moli, rebe kotiele Yerusaleme beluke kai erulu bei ndete surga, mere Alla Ionoe. Kota mere ehita kena hitate elake bei Tuhane Alla saka bina rebe selui hita le eni pakianaru le iono kena ikai kai mokwai sae me.  
\v 3 Eleki au lene na elake bei otoi maka rue kena pleta mere be, “Kena meije Alla Irue sakesa kai tamata. Hoko siere Alla Eni tamata kai batuke esi tatu lokoI.  
\v 4 Iono esi supu susate sasaisa moneka hoko esi rani kwale moneka. Sae imata moneka. Sae isusa moneka pise kerake moneka le yelu rebe akmena ite supure, pamuli meije sae moneka.” 
\p  
\v 5 Eleki Ile rebe Irue kena otoi maka rue mere Ibeteke be, “Kena meije Au ono pusulu belu!” Ibeteke lokoku lekwe be, “Leki pusue lepate meije le tinai hoko namake tamata esi lene lokole. 
\p  
\v 6 Meije Au ono pelae yelu rebe Au taluke pende! Aure Alfa kai Omega, rebe memenai kai rebe pamuli. Sire rebe ioki Au, irue kai Au eti pela. Saka tamata rebe kmalakeni, Au ono ikinu bei kwele rebe eboboke kai iseli mo.  
\v 7 Sie rebe esi lesi ro tiaru esi elake le esi tatu lokoi mo kai esi hlaleke titinai loko Au tatike pine Au riluke misete rebe Au talukele ete imi pusuime. Kai Au ono Alla etesi kai esi kotie Aure Ama.  
\v 8 Po tamata rebe esi sele le rilasi, kai rebe esi hleke bei hlaleke loko Yesuse, rebe esi ono atate rebe eandopoke nanakwalaisu, tamata maka bunu, tamata maka ono ntasite, tamata rebe pake-pake, tamata maka hlaleke loko tuhane tinai mo kai pusue tamata nloene, esi supu poie kena auwe saelae meite kai belerane rebe ekliti rame mere. Mere mata rebai luare.” 
\s1 Yerusaleme Beluke 
\sr 21:9-22:5 
\p  
\v 9 Malekate esa bei malekata itu rebe esi lalake yelu rebe kute susata itu pamulire iluake loko au kai ibeteke be, “Mai! Au tiluke bina rebe iono kena ikaije etemu. Bina mere Domba Anaije Eni bina.”  
\v 10 Eleki Alla Eni Rore Ikbasae malekate mere leke ikeri au lolete ulate nanuke titinai. Iaseluke Yerusaleme kota molire ete au. Kota mere erulu bei ndete surga, mere Tuhane Alla Ionoe.  
\v 11 Kota mere ehita kena hitate elake bei Alla. Kota mere ehita saka batu hitate permata rebe nteki titinai, saka batu permata yaspise rebe li siba lupe kacare.  
\v 12 Temboke rebe keholire nanu kai ela. Kai esi metua butu esa lesini lua kai malekata butu esa lesini lua esi raka metua meru. Nusa tamata Israela butu esa lesini luaru esi nanaru kena metua meru. Papelake meture suku esa esi nane.  
\v 13 Metua telu balale lemataije sa, telu ubalale lemataije sa sapleuke makwanale, telu balale lemataije sa sapleuke mapale kai telu balale lemataije suni.  
\v 14 Batua inai butu esa lesini lua ulukue temboke mere. Domba Anaije Eni maka ulake sie butu esa lesini luaru esi nanaru kena batua meru. Papelake bature Domba Anaije Eni maka ulake esa eni nane. 
\p  
\v 15 Malekate rebe ilepa kai au mere ikerike toane buai maka sue bei mase kena sue kota mere, esi metuaru kai esi temboke.  
\v 16 Kota mere esi nanuke kai esi lebare sakesa. Eleki malekate mere isuele kena toane buai maka sue mere. Hoko esi nanuke kiloa usata lua utuna ata (2.400) \f + \fr 21:16 \ft Kiloa usata lua utuna atare (2.400) sakesa kai stadia usata butu esa lesini lua (12.000). \f*. Esi lebare kai esi nanuke loletere sakesa kai esi lori lopaije nanuke neka.  
\v 17 Eleki kena malekate mere isue esi temboke, esi nanuke loletere metera butu ne \f + \fr 21:17 \ft Metera butu ne (60) sakesa kai hastaya utune esa butu ata lesini ata (144).\f*. Malekate esi alate maka suere sakesa kai tamata eni alate maka suere neka.  
\v 18 Kota mere esi temboke bei batu misete permata yaspise kai kotare ruale bei mase misete titinai, li siba saka kaca.  
\v 19 Batua rebe kena kota mere esi uweije kerikelu bei batu misete permata. Batu nomore esare batu malae rebe kotiele batu yaspise, batu nomore luare batu malae rebe kotiele batu nilame, batu nomore telure batu malae rebe kotiele batu mira, batu nomore atare batu malae rebe kotiele batu samrute.  
\v 20 Batu nomore limare batu lalakwe kai putile rebe kotiele batu uname, batu nomore nere batu lalakwe rebe kotiele batu sardise, batu nomore iture batu porole rebe kotiele batu ratna cempaka, batu nomore kwalure batu malae rebe kotiele batu berile, batu nomore sikware batu porole rebe kotiele batu krisolite, batu nomore butu esare batu malae rebe kotiele batu krisoprase, batu nomore butu esa lesini esare batu malae rebe kotiele batu lasuardi kai batu nomore butu esa lesini luare batu mahmelane rebe kotiele batu kecubune.  
\v 21 Kai metua butu esa lesini lua meru bei mutiara butu esa lesini lua, metu esare ono bei mutiara esa. Lalane me kota mere ono bei mase misete titinai kai selue hita saka kacare. 
\p  
\v 22 Au selu Tuhane Eni Lumare kena kota mere mo le Alla Maka Kbasa elake kai Domba Anaije esi me kota mere hoko tamata esi tatu me oaIsu neka.  
\v 23 Kota mere perlu lematai pise bulane ehita moneka, le Alla Eni hitate elake ehitae kai Domba Anai mere Iono saka lampu ete kota mere.  
\v 24 HitaIje ehita pusue tamata bei nusa kai kamala bei nusa rebe esi luake keri taneiaru me kota mere.  
\v 25 Kota mere esi meturu ebaeke rame sae ikobue moneka le ete mere kpeture sae mo.  
\v 26 Pusue tamata esi keri esi taneiaru leke esi rilukelu ete Alla kena esi holmateI.  
\v 27 Po tamata rebe esi ono yelu rebe uandopoke nanakwalare, pise tamata rebe esi tatu loko yelu rebe Tuhane more, esi supu kusu kota mere mo. Tamata rebe supu kusu kota mere esi laleije batuke tamata rebe eni nane lekie me Buku Tamata Kwanale, Domba Anaije Eni bukure. 
\c 22  
\p  
\v 1 Malekate mere iaseluke kwele rebe eono tamata ikwanare lekwe. Kwele mere endina titinai saka kaca. Ebele bei Alla Eni otoi maka rue kena pleta kai Domba Anai mere,  
\v 2 ekeue lalane esi tlaije me kota mere. Me kwele mere esi leine, aia rebe uono tamata ikwanare ukusu ndi teba mpai teba. Musune esare aia meru ubua rebai butu esa lesini lua. Hoko bulane esare rebai esa. Esi tetuiju eono obate ete pusue tamata mei nusa.  
\v 3 Me kota mere Alla Ikutuke sasaisa moneka. Alla kai Domba Anai mere Esi otoi maka rue kena pletare namake pine eme kota mere. Kai Eni makerikaru esi tatu lokoI,  
\v 4 kai esi seluI. Kai Eni nane lekie me oalalesi sapleuke matabului babaisu.  
\v 5 Esi perlu lampu kai kabalane moneka le kpeture sae mo le Tuhane Alla ruaI hitasi. Tatike pine sie rebe esi hlaleke lokoIje esi pleta sakesa kaiNi eti pela. 
\s1 Yesuse Iluake suike 
\sr 22:6-17 
\p  
\v 6 Eleki malekate mere ibeteke lokoku be, “Pusue lepata meiju rebe lepaelu peneka kena aselulu pende tatike pine tinai, lemake mo kai tatike pine tamata rebe esi hlaleke lokoIje esi lene lokole. Alla rebe Iriluke Eni Rore ete nabiaru Iulake Eni malekate kena itiluke saisa rebe eonore nere ete Eni makerikaru peneka. 
\p  
\v 7 Yesuse Ibeteke be, ‘Au luake reneka. Sie rebe esi lulu lepata rebe mei buku meije esi supu misete.’ ” 
\p  
\v 8 Au Yohanese, au lene kai au selu pusue meiju peneka. Eleki kena au lene kai au selu pusue meru pelare, au tatu loko malekate rebe iaseluke meru ete aure,  
\v 9 po ibeteke loko au be, “Yake, tatu loko au yake! Po tatu loko Alla! Le aure makerike lupe ale neka kai pusue kwali betaya rebe nabiaru kai rebe esi lulu hnauna mei buku meije neka.” 
\p  
\v 10 Eleki ibeteke lokoku leneka be, “Bunike lepata mei buku meije yake, le takwali moneka pusue meiju uono reneka.  
\v 11 Sie rebe esi ono tiare kai sie rebe esi tatu loko tuhane tinai more esi lakaiju, sebeie esi ono ele mere rame. Po sie rebe esi ono saisa rebe nkenale kai sie rebe batuke esi tatu loko Allare esi ono ele mere rame eti pela.” 
\p  
\v 12 Imi nete Yesuse Eni hnaune meije: “Takwali mo Au luake suike reneka kena Au lelie ete pusue tamata lulu saisa rebe esi onore.  
\v 13 Aure rebe Alfa kai Omega le Aure menai kai pamuli. 
\p  
\v 14 Alla Iono tamata rebe esi tetake esi lapu nanukaru eti uputire lalesi ndina le esi supu kbasa kena kusu kota mere esi meture leke esi kane ai rebe eono tamata ikwanare esi buaiju.  
\v 15 Po tamata rebe esi ono ndopone kai tamata maka atiaru, tamata lalanaru, tamata maka bunu, tamata maka tatu loko tuhane tinai more esi lakaiju kai tamata maka lemake rame, sie meru esi rue me kota mere esi mulini. 
\p  
\v 16 Au meije Yesuse, Au ulake Auku malekate lokomi peneka leke ibeteke saisa rebe epentine ete jemate toini rebe esi hlaleke Tuhane. Au rulu bei kamale Dauta, Aure kmale pita rebe esi hitai elake.” 
\p  
\v 17 Alla Eni Rore kai Domba Anaije Eni bina rebe iono kena kaije\f + \fr 22:17 \ft Domba Anaije Eni bina ete meije natire pusue tamata rebe hlaleke loko Tuhane.\f* esi koti be, “Mai!” Sire rebe ilene, suke ibeteke lekwe be, “Mai!” Kai sire rebe kmalakeni, lomei! Kai sire isuka, irana kwele rebe eono tamata ikwana eti pelare, kwele mere seli mo. 
\s1 Lepate mulini 
\sr 22:18-21 
\p  
\v 18 Sire rebe ilene loko lepata kena buku meije, au Yohanese, au ahnau be, 
\q1 “Imi tapa sasaisa kena lepata meiju yake, 
\q2 mo hoko Alla Itapa imi hukumane kena susata elaka 
\q2 rebe lekilu kena buku meije ete imire. 
\q1  
\v 19 Kai imi hleke sasaisa bei lepata meiju yake, 
\q1 mo hoko Alla lekwe Iono imi kusu kota misete titinaije mo, 
\q2 kena ikane ai buai rebe eono tamata ikwanare, 
\q2 rebe lekie mei buku meije.” 
\m  
\v 20 Ile rebe Ibeteke lepata mei buku meije Iombe, 
\q1 “Tinai, Au suka luake reneka!” 
\p Au Yohanese, au ralake be, 
\q1 “Tinai! Tuhane Yesuse, Aluake noma! 
\q1  
\v 21 Ariluke misete ete pusue tamata 
\q2 rebe hlaleke loko Allare noma! 
\q2 Amine.” 
\cls Hlamate, \sig Yohanese \sig*