\id TIT - Agarabi NT [agd] (Papua New Guinea) -2011 bd 
\h Taitasi 
\toc1 PORI MA TAITASIN UVAMAN AMEIN BOMPON MINO 
\toc2 Taitasi 
\toc3 Tai 
\mt1 PORI MA TAITASIN UVAMAN AMEIN BOMPON MINO  
\mt2 (Taitasi)  
\imt1 Taitasi Vompon Ma Uvanteí Pákenai Afova Vaya Ino  
\is1 Ma vompon ma uvantein banta ino.  
\io1 Baya varen orin banta Pori ino.  
\is1 Uvarein orana ino.  
\io1 AD sikisti-sikisi (66) fin mino. Mai maen Pori ma karavusi finte ma utúantan ma Romú baru me ampiren bei yoraríen nóken mino.  
\is1 Ma vompon ma uvantein baru ino.  
\io1 Masedonia safi Efesasi safi áa Nikoporisi safi sen amino iyan mino. (Taitasi 3:12 fin ná onano.)  
\is1 Ma vompon ma uvaman amikhein banta ino.  
\io1 Ena anan pinte vanta ma Porin arona váken ma ven ayaen monó doraríen noré ein banta Taitasin mino. Máan tiyaren maen Kirití musóká o váken monó dorarí iyan mi uvaman amikhen mino.  
\is1 Nái ana vará ma vompon uvanten nafino.  
\io1 Taitasi ma Kirití musóká monó dorarí iyáken ma uman dosiyain nan mi ará ákona uanten inká manáa yorani aa aní uanten ukhen mino.  
\c 1  
\s1 Pori Ma Taitasin Uvaman Amein Baya Ino  
\p
\v 1 Téi Pori Tiyarafenui miyan ída varan doran bantan báké Yisas Karaisini vaya varen mo siamin banta uno. Béi anon téin tisintein mai ma veyan iyákein nanin bantai mumunan ayaé mo ákona uantékun Tiyarafenui fura sikhein baya vá avúavá bá afová uren béin ánain bákurinten mino.  
\v 2 \x * \xo 1:2 \xt Kor 1:27\x*Ma fura sikhein baya ano mai ma Tiyarafenu ano fara van oriyan ban aunan amenté uno siren iyáantan bain nanin bantai mumunan má afova vá ákona uantanten mino. Pefá ída minó daná afoká ukhan mai ma fara van oriyan ban aunan timeno van tiádan baren mino. Tiyarafenu ano ída setí ankan kampun tisinté iyan mino.  
\v 3 Pefá ma véi siádakaré ein damú pura sen afoká íkan mi vei Kama Vaya maman amasí urái mai Vaya setí ankan minó nanin bantafin tian amá iyá uno. Mai ma setin evaránen tivíkein mai Tiyarafenu ano séin aní uren beni yorarí ino van tisintái ma Vaya minó nanin banta siamiyá uno.   
\p
\v 4 \x * \xo 1:4 \xt Rom 1:7; 2Ko 8:23; Kar 2:3\x*Taitasi oe, erasanti mumunan mano manaí ukha, éi sen tanin an mi yakhen ná ma vompon éin uvaman amé uno. Tetin Tifóe Tiyarafenu vá tetin ma siya uren tiviran banta Yisas Karaisin mái sarisari vá ará kusin masá éimpin bano.   
\s1 Taitasini Yoran Kirití Musóká Ban Mino  
\p
\v 5 Erasan ma ída yóan kípakheruna yoran dóan kípiyákeya séi ma siamerunaí e vá minó kákan baru kayo fimpá Yisasini mumunan nanin bantai yoran banta kayo khaono van mai anarái éin Kirití Musóká me afaé uno.  
\v 6 \x * \xo 1:6 \xt 1Ti 3:2-7; 2Ti 2:24-26\x*Mai yoran bantai avúavá ano vanasi avorá puntákantin be aná bá ana vá puntáden bano.\f * \fr 1:6 \ft Manáa afova vanta kayo ano mai van máa sikhen mino. \fq Mana nanin máa vá barano. \ft Ena afova vanta kayo ano mai van máa sikhen mino. \fq Ída vá anasi máde ifá urú urú en nono. \ft 1 Timoti 3:2, 12 fin dere vá onano.\f* Béin akhafana ano yere vá monópin mana váken be anóe afóeni vaya ída átakharé uren ma fon iyani avúavá ma ída variyantiya vá mai vá ódeya avirano.  
\v 7 Tiyarafenu ina yanáká ma yafisin bantai avúavá ano vanasi avorá puntáken ná bano. Béi ída vá bei aví daní uren ena aví maman bararasíen ná inká ainen aran ádé bain banta váken ná ída vá óen non naren ná aruvono van ino. Béi ída vá banasii ona kampun tiren baren ná inká moníká ana inin kaen ná ino.  
\v 8 Máan tin nafo ena nanin banta ano ma véin amápin ma erintin ná avábasá ino. Béi minó kama avúava san mana vá anunu iyáken kama ineine ánain bákuriyan dafíken ná bano. Béi vei ineinerá dafíben ná puntáden kantasí ukhen bano.  
\v 9 Mai ma fura vaya véin pefá tiamikhá ein ná pákaaren mantaan ákona ino. Mantaan ma ákona uven maen puntákein bayafó ákonaen banasi siamiyáken ná inká mai ma fura vaya ma namuroí iyain kayo vá puntarano.   
\s1 Kirití Musóká Ma Namu Avúavá Bariyain Kékái Vaya Ino  
\p
\v 10 \x * \xo 1:10 \xt 1Ti 4:7\x*Para vara seyo, vaya ma átakharéin nanin banta kokhon mi Kirití musóká ban mino. Beni ana i vain baya ma sian pura yanasí uren banasi ma máka sen noin kéká kokhon mi van mino. Mai kéká pinté au khavin avúavákái Tiyarafenu ano evaránen aviranten mino ma siyain kéká anon moéken pura ma seiní iyan mino.  
\v 11 \x * \xo 1:11 \xt 2Ti 3:5-6; 1Pi 5:2\x*Pura sikhein baya fókesá betíi aa iyádesin ná betí avaya fákano. Para vara seyo, vetí ankan banasii ona vá moní bá kampun tiriyá barano van ída ma siameren baya e sian more mere iyan banasii van máden asuse iyan mino.  
\v 12 Kiriti kayo van kampun baya ana siyáken afá pon an den nóken avesara ana iyan ban kéká ino sen betíi sakhanampa vanta kayo finté mana ano sian dákó ukharen mino.  
\v 13 \x * \xo 1:13 \xt 2Ti 4:2\x*Ma fura sen afoká ukhein avúavá baya ifo vá mai avúavápin ma oferiyain kéká aufin ná ákona e vaya siamiyasin ná mai ma fura sikhein avúavá ánain mana vá bákurino.  
\v 14 \x * \xo 1:14 \xt 1Ti 4:7\x*Yutan kayoi anafu aráoni maní bayará ma ákonaen tiamen nóken pura vaya ma yo ékiyain kékái vaya ída vá inino.  
\v 15 Ará ma avusese ukhein kayo ina yanasinta minó avusese ukhen mifo ará ma fainí ukhan ída mumunan iyain kayo ina yanasinta ída avusese ukhen mino. Betií ineine vá kama yaná bá namu yaná bá ma afováin asuse ukhen mino.  
\v 16 \x * \xo 1:16 \xt 1Yn 1:6; 2:4\x*Betí ankan oo máa fókéi Tiyarafenu van afová ukhé uno sé iyan mifo vetíi avúavá ano ída véin bákuriyan mino. Máan tiyáken betí ankan Tiyarafenu van ída anunuen inian kaumpan uren baya átakharé iyain ída kanaíen mana kama avúavasí inten mino.   
\c 2  
\s1 Pori Ma Taitasin Nan Puntákein Afova Vá Ameno Sein Baya Ino  
\p
\v 1 Máan tukhen mifo Taitasi oe, intéa vaya ákonaen puntákein ban nafi mai vá banasi siamesin ná afova uren dakhafino.  
\v 2 Anon banta kayo afova amesin ná ída óen non nen asuse en nóken ná betíi ineinerá dafisino. Máan tiyáken inká kama vanta ino siyantin ena van anunu iyáken ná mai fura vayará mumunan ukhen ná mireníen uman eriyantin mantaan ákona ukhen ná bano.  
\v 3 \x * \xo 2:3 \xt 1Ti 3:11\x*Mai ma anon banta kayo siameonaí ana e vá anon nanin kayo siamesin ná betíi avúavá bá inin onan má pura sen Tiyarafenurasá dantin bano. Máan tiyáke ída vá baya uvaman more mere en ena nanin banta aran amiyáken ída vá áintin óen non naren ma óen in anunu ano vetíi inintá dafisino. Mai ma kamaen puntákein avúavá ana vá ena nanin banta aní ino.  
\v 4 Máan tiyáken ná auyen nanin kayo vá kama afova amintin ná be avafu akhá avábá ino.  
\v 5 \x * \xo 2:5 \xt Efe 5:22\x*Inká betí ankani ineinerá dafíben Tiyarafenu avorá puntáken ban ná mápin kamaen dafisiyáken kama avúavá ana variya ná betí avafunái aránaópasá oriyan bano. Betí ankan mai avúavasí ma intin maen minó nanin banta ano Tiyarafenui vayará ída oyampá baya sinten mino.   
\p
\v 6 Máan mana e vá minó pumara vanta afova amire ayaesin ná betíi ineinerá dafían ákona ino.  
\v 7 \x * \xo 2:7 \xt 1Ti 4:12\x*Minó danasí ma inonafin ná ei kama avúavasá aníesin ná mai fumara vanta ano ódaren ná mai ánain mana vá dakhafino. Inká Tiyarafenui vaya ma sian afova ma ameno van éi fúkekhakhe vá ineine ure funtáde fura vaya ana vá tiameno.  
\v 8 \x * \xo 2:8 \xt 1Pi 2:15\x*Éi ma funtákein baya ana ma siyasin maen maifin ída namu ukhantin banasi ano oman afoká inten mifo namuroí ma iyain kayo ano vetí ma siyain baya van ayave uren ída setin toyampá baya sinten mino.   
\p
\v 9 \x * \xo 2:9 \xt 1Ti 6:1\x*Ída miyan baran doran banta afova amesin ná betíi yafisin banta aránaó báken betíi yoran bariyan ná doran nan ma siantantin ída vá evaránen anona vaya sino.  
\v 10 Inká ída vá betíi yafisin banta kayo ina yanasinta umoyan barantin ná betin oman pura yoraríin kéká ino vá tino. Máan siyantin ná minó daná ma varan nain mano setin ma Evaránen Tivíkein Tiyarafenui vaya ma ena nanin banta ano iniyáken kama vaya ino sinten mino.   
\p
\v 11 Para vara seyo, Tiyarafenui sarisari ano ma vanasi ume fintena ma evaráne avíkein aa inka minó nanin bantafin dákó en mino.  
\v 12 \x * \xo 2:12 \xt 1Yn 2:16\x*Tiyarafenun ma oyan amin avúavá bá inká ma vara ráke namu avúava san ma anunu uren mai ánain bákurin má ifá inon tiren mi mai sarisari ano saréa setin tisimiyan mino. Tiretíi ineinerá kama e yafíbe nóke ákona e mantakhe vá Tiyarafenu van peran kékasá bano sen tetin tisimiyan mino.  
\v 13 Mai ma setisi kákan Yisas Karaisi ano ma Evaránen Tivíkein Tiyarafenu ma vei kakhampin ma afoká inain nan tetí inikhé timusin iyá ave ukhé tiféuno.  
\v 14 \x * \xo 2:14 \xt Eks 19:5; Diu 7:6; Isi 37:23; Kar 1:4; 1Pi 2:9\x*Mai ma setin nare siren ma ve au fóké ma namu avúavá pintena ma miyaní uren ma setin evaránen tivíden tesé uan avusese uren ma ve inaí ukhein mai nanin banta ano kama avúavá ana varano van mi iyan mino.   
\p
\v 15 \x * \xo 2:15 \xt 1Ti 4:12\x*Máan tukhein nan mi Taitasi oe, mai ma éin tiameruna vaya kayo vá ena ena yamú minó nanin banta siamiyáke vá baya ma átakharéin kéka sá ákonae funtarano. Mai ákona éimpin ban mifo ída vá áesin éi ma sinona vaya van mana nanin banta ano oyampá baya sino.   
\c 3  
\s1 Pori Ma Vanasi Van Puntákein Avúavá Ana Vá Barano Sein Baya Ino  
\p
\v 1 \x * \xo 3:1 \xt Rom 13:1-7; 1Pi 2:13-14\x*Banasi evaráne siamesin ná kamanin má beni ánon banta kéká bái aránaópa sá báken betin oo yaiyiyan ná kama avúavá barano van utaaren ná bano.  
\v 2 Inká ída vá ena oyampá baya siren aruve asive iyáken ná bempáke sá ará kusen bano. Betí ankan puntáden báken ná ena nanin banta fura avúavá aní ino.   
\p
\v 3 \x * \xo 3:3 \xt 1Ko 6:9-11; Efe 2:1-2; 5:8\x*Pefá tetin má dere vaya átakharé iyáké maka siré óen avúavápin timusin dosé nókun mai ano setin damuádá baré tiféuno. Maifin ma vá tifékun maen namu avúavá bá ume avúavá bá ano setimpin bíkakhá ena ina yana san tiran niyáké ben ará namu uantan maran iyaré uno.  
\v 4-5 \x * \xo 3:4-5 \xt 2Ti 1:9; Ibu 10:22\x*Máan tiyaré tifé umpo setí ankan ma Evaránen Tivíkein Tiyarafenui anunu vá avábá bá ma afoká ein nan mi véi setin evaránen tivíken mifo seti ma funtákein avúavá bariyaré é tiferuna rasa ino. Ída ino. Bei arunanápói setin evaránen tivíken mino. Tiyarafenu ano Kantá Aunan pói setin tesé uren evaránen maman auyení urá bá tiféuno.  
\v 6 \x * \xo 3:6 \xt Apo 2:17-18\x*Tetin ma Evaránen Tivíkein Yisas Karaisin pintéi uaren Tiyarafenu ano vei Kantá Aunan ída fákan tetin timaniná banaen mino.  
\v 7 Máan turanti mae Tiyarafenui sarisarirá tetin nan ída umeí ukhein mino siren para van oriyan ban aunan nan ma iyátintan bain ída aa iyarantí barano van ma ave ukharé eruna kasaé tetí ankan bará tifanté uno.  
\v 8 Taitasi oe, ma ma éin tiameruna vaya vará pura sen puntákein baya ino vá teno. Mai vará éi ma vaya fara e siame oriya vasin ná Tiyarafenurá ma mumunan iyain kéká ano yafíben kama avúavá ana vá barano. Mai vaya ánain ma vákurin nain kéká mai vaya ano kama ayairí inten mino.   
\s1 Porini Kípan Baya Ino  
\p
\v 9 \x * \xo 3:9 \xt 2Ti 2:14, 16\x*Máan tinten mifo mai ma ída kama ineine van ma asuse vaya kayo sen nóken ma vanasii ineine máden namu iyan ma inká be anafu aráon aví para vano van ma séi ven ana ayavéno uno siriyan ma vetíi man bayará bákuriyan ma aruve asive en noin kéká ádé ída vá orono. Mai fara vara seyo, mai vaya kayo maen asuse vaya kayon báken mai ano ída kanaíen éin aya inten mino.  
\v 10 \x * \xo 3:10 \xt Mat 18:15-17\x*Manáa uman afoká inafo vá mai ma nóken betíi vayará ma ákona e nóken kampun baya kayo fóké ma ena monó kéká arápiníen ma noin kéká ma siamesin ída ininti inká evaráne enádá tiamesin ma ída ininti mai ída vá oo aí iya mairasá mo ifá ano.  
\v 11 Éi afová ukha ono. Máan bantai avúavá ano ída funtákan bei umefin bákan mai anon béin daimiyan mino.   
\p
\v 12 \x * \xo 3:12 \xt Efe 6:21-22; Kor 4:7-8\x*Ínaimpáké ma Atemasin nafi Tikikasin nafi ma siantékun ma eni varu varen eni yoran aya ono van ma éi vaonará ma o unintiya éi aine vá aaí ureya Nikoporisí barurá ereno. Mai fara vara seyo, iyon aú ma afoká inaimpin mai varurái o vanté unon té inikhé uno.  
\v 13 \x * \xo 3:13 \xt Apo 18:24; 1Ko 3:5-6\x*Aporosin nú man baya afova vanta Senasin nú ma mairá onóben ma intéa yanasará inten nafi mai éi ayampaí ure vá mai yanasinta ayaesin ná mamaren orino.  
\v 14 \x * \xo 3:14 \xt Efe 4:28\x*Tetin má ma monó tiyain nanin banta ano kama avúavá ana ma varen oriyan bani ana ma afová uren maen mi yunan má ona vá ma ída van nain kéká kasaien aya iyáken asese nanin banta anan banten mino.   
\p
\v 15 Téin má ma minó mumunan nanin banta ma vain mano amusin baya siádákan éi vaípá oren mino. Taitasi oe, éi vá Kirití ma mumunan nanin banta váken tetin nan anunu iyain kékasá amusin baya siameno. Tiyarafenui sarisari ano vá tiretí ankan má bano.