\id 2TH - Agarabi NT [agd] (Papua New Guinea) -2011 bd 
\h 2 Tesaronika 
\toc1 PORI MA KAN DÁDASÍEN TESARONIKÁ NANIN BANTA UVAMAN AMEIN BOMPON MINO 
\toc2 2 Tesaronika 
\toc3 2 Tes 
\mt1 PORI MA KAN DÁDASÍEN TESARONIKÁ NANIN BANTA UVAMAN AMEIN BOMPON MINO  
\mt2 (2 Tesaronika)  
\imt1 Kan Dádasí En Ma Tesaronikai Vompon Ma Uvanteí Pákenai Afova Vaya Ino  
\is1 Ma vompon ma uvantein banta ino.  
\io1 Baya varen orin banta Pori ino.  
\is1 Uvarein orana ino.  
\io1 AD fifti-tu (52) fin mi uvaren mino. Esé ma uvarein bompon dan orivin maen manáa viyontá báken mi uvaren mino.  
\is1 Ma vompon ma uvantein baru ino.  
\io1 Koriní barurá ma mana orana ifo afápá mana un kádan biyontá ma váken mino (Aposeri 18:11 fin ná onano).  
\is1 Ma vompon ma uvaman amikhein kéká ino.  
\io1 Tesaroniká barurá ma monó tiyain nanin banta ino.  
\is1 Nái ana vará ma vompon uvanten nafino.  
\io1 Esé araí in bompon ma uváden maen mai oyampáké Pori iníkan Yisasini ma ovaránen erin nain baya ano vanasii ineine máden asuse iyaimpin mi evaránen ma vompon uváden mi maí damú ma yákó inain baya sian amá ukhen mino.  
\c 1  
\p
\v 1 Téi Pori má Sairasin nú Timotin nú bá anon Tesaroniká kákan barurá ma mumunan nanin banta váke setin Tifóe Tiyarafenu vá Bafan Yisas Karaisini kékasí ma ukhaonafin mi ma vompon uvaman amé uno.  
\v 2 \x * \xo 1:2 \xt Rom 1:7\x*Tifóe Tiyarafenun má Bafan Yisas Karaisin má pinté ma eriyain tarisari vá ará kusin má ano vá tiretin má bano.   
\s1 Porini Susu Siantan Má Amúkin Má Baya Ino  
\p
\v 3 Mumunan tiyofi sifá tiváeyan noe, funtákein avúavá baréi siretin nan Tiyarafenu susu sianté iyá uno. Mai fara vara seyo, siretí ankani mumunan mano mo ákonaen kákani iyákayan ben moéken ará amin maran iya ono.  
\v 4 \x * \xo 1:4 \xt 2Ko 7:4; 1Te 2:19\x*Ara ara uman bariyáke ma mai uman kayo van ída ininto ma ákona e mumunan iya ma yorarí iyaona van mi minó akhempá ma Tiyarafenurá mumunan iyain kékápin ma orivé maé tiretí ankan nan amo sé iyá uno.   
\s1 Bafan Yisasi Ma Erin Nain Damú Ma Banasii Avúavá Daimin Nain Baya Ino  
\p
\v 5 Máan tiyá umpo mai ma variyaona uman manon aníen mi Tiyarafenu ano funtáden daimiyan pasen mi siretin e avían bei yafisimpin kainten mino.  
\v 6 \x * \xo 1:6 \xt Rom 12:19\x*Tiretin ma uman amiyain anonafá Tiyarafenu ano vetin daíden uman aminten mino.  
\v 7 \x * \xo 1:7 \xt 1Te 3:13\x*Máan tinten mifo setisi Bafan Yisasi ma vei ákona enisori kayo vá ma inaru fáké ira anamuná bá ma erin nain damúi mai ma uman bariyá ótifanuna kéká tivíkan timinten mino.  
\v 8 \x * \xo 1:8 \xt Ais 66:15\x*Mai ma erin nain damúi Tiyarafenun ma ída afová en ma inká Bafan Yisasini kama vaya ma oyan amiyáin nain kéká uman aminten mino.  
\v 9 \x * \xo 1:9 \xt Ais 2:10\x*Baya ma ída iniyáin nain nanin banta ano ída kípan namu uron ukhein uman mamaren Bafan má beni kakhakhein ákona vái ádé ída vanten mino.  
\v 10 \x * \xo 1:10 \xt Kor 3:4\x*Bei ma ovaránen erin nain damúi mai yanasinta afoká inten mino. Máan ma intin maen kantasí ukháin nain nanin banta ano véin amo siyan aví daní iyantiya siretin má deren maifin ban nono. Mai fara vara seyo, seti ma ontaré ma siameruna vayarái mumunan ukhare ono.   
\s1 Pori Ma Amúkein Baya Ino  
\p
\v 11 \x * \xo 1:11 \xt Kor 1:9; 1Te 1:2-3\x*Máan tukhein nan mi siretí ankan Tiyarafenu ano sesi funtákein nanin banta e siren béi ma araren avíká einíen bei ákonafó tiretí ankani kama ineine vá kama avúavá bá ma mumunan mano afoká uádiyain kanaí ino van mi ena ena simúkuan béin amiyá uno.  
\v 12 Minó nanin banta ano siretíi kama avúava san Bafan aví daní intin maen inká béi ano siretin aví daní ino van mi simúkiyá uno. Tetisi Tiyarafenu vá Bafan Yisas Karaisin mái sarisari ano siretin má báken mai yanasinta maman dákó inten mino.   
\c 2  
\s1 Bafani Erin Ádé Iyantin Ma Aní Daná Dakó Inain Baya Ino  
\p
\v 1 Mumunan tiyofi sifá tiváeyan noe, setisi Bafan Yisas Karaisi ma erintí ma ven má manafin bá tifanuna vaya siaméku inin nono.  
\v 2 Manáa vanta ano ma oriven Bafani yamú inka erikhen mino ma sin nain baya van ída vá anú duman duman ono. Máa siren ma setí ankan nan mai vompon uvamádan erikhen mino sen ma inká sakhanampa vaya sen ma intiya mai vaya ída vá ineno.  
\v 3 \x * \xo 2:3 \xt 1Ti 4:1; 1Yn 2:18; 4:3\x*Máan ma sin nain baya kayo ano ída vá tiretin kufa uádano. Mai fara vara seyo, Yisasi ma ída erikhantin maen kokhon nanin banta ano Tiyarafenu vá aruviyantin maen mai ma man baya ma átakharé iyáin nain banta maman dákó inten mino. Mai vantan Tiyarafenu ano kákan uman aminten mino.  
\v 4 \x * \xo 2:4 \xt Isi 28:2; Dan 11:36\x*Mai vanta ano ve aví daní uren maen Tiyarafenun ma araren monó tiyain oyampá baya siren beni kákan monó namumpin un kumamen téi Tiyarafenu umpo sen tiví daní ono sinten mino.   
\p
\v 5 Téi ma siretí ankan má báké maé mai vaya fefa suron mi siamikhá umpo ídá ovare me iniya rafono.  
\v 6 Intéa yaná anó béin pákaran ná baren nafi mai saréa inka afová iya ono. Mai fara vara seyo, veni yamú ma erintin mi yákó inten mino.   
\p
\v 7 Man baya ma átakharéin ákona ano aúpá báken pefái yoriyái fura sé tiamiyá uno. Máan tukhen mifo mai ma iyáká inain banta ma yo avían kaúdantin mi mai yaná dákó inten mino.  
\v 8 \x * \xo 2:8 \xt Ais 11:4; Rev 19:15\x*Mai ma man baya átakharé iyá inain banta ano ma e unen afoká édavuvintin mi ínaimpáké ma Bafan Yisasi erinten mino. Eriven maen bei ákona vayafó mai vanta maman barasí uren khakhan ákona fókéi mai vantai ákona yo varanten mino.  
\v 9 \x * \xo 2:9 \xt Rev 13:11-13\x*Man baya ma átakharéin banta ma erin nain mai Ban Anoni ákona fói yoriyan mino. Máan tiyan pasen enará ukhein avúavá bá inká aní daná bá maman afoká inten mifo mai kampun danasinta ino.  
\v 10 Tiyarafenui aran nanápin ma vain nanin banta kayo mai vanta ano ara ara mákasimpó betin máden kufa uádante mino. Mai fara vara seyo, fura vaya ano vetin ayaintin mumunan ino van iyan mifo mai van beti ída anunu ukhen mino.  
\v 11 Máan tukhantin pasen Tiyarafenu ano ákona mákasin tiantantin mai kéká mákádantin mai kampun bayará pura ino sinten mino.  
\v 12 Máan tintin maen mai ma Tiyarafenui fura yanáká ma ída mumunan inton ma namu avúava san ma anunu ukharéin nain kékái Tiyarafenu ano ínaimpá daíden uman aminten mino.   
\s1 Mumunan Nanin Banta Ano Ma Mantaan Ákona In Baya Ino  
\p
\v 13 \x * \xo 2:13 \xt Efe 1:4; 2Te 1:3\x*Máan tukhein nan mi mumunan tiyofi sifá tiváeyan noe, Bafan mano ma anunu uren avábá uantiyain monó nanin banta van mi ena ena yamú Tiyarafenu vaípá tusu siantiyá tiféuno. Mai fara vara seyo, setin ma evaránen tivíkein daná afová ino siren mi esé araíintá Tiyarafenu ano siretin aní ukharé in mi Kantá Aunani funtákein doran mano sireti maman avusese en mino. Máan turen mi mai ma fura yanáká mumunan iyaonarái evaránen aviren mino.  
\v 14 Mai kama vaya ma siamé tiferunarái setisi Bafan Yisas Karaisini kakhan aúpin bano van béi siretin arakhen mino.   
\p
\v 15 Máan tukhein nará mumunan tiyofi sifá tiváeyan noe, mai ma vompon po safi áa soo fo safi ma siamiyáké afova ameruna vaya vá pákaan ákona uveya mairasá mantano.   
\p
\v 16 Tetisi Bafan Yisas Karaisin má Tifóe Tiyarafenu vá ano setin tivábá uren mi vei sarisari fóké para van oriyan ban ará ákona vá inká kamaen báken ma avein avúavá bá timen mino.  
\v 17 Béi ano vá tiretin ma minó kama avúavá bariyaona vá inká kama vaya kayo ma siyaonafin masá ákona uantano.   
\c 3  
\s1 Porin Amúkuantano Van Ma Inaúkein Baya Ino  
\p
\v 1 Mumunan tiyofi sifá tiváeyan noe, ma sípá bayan té uno. Mai ma Bafani kama vaya ma siretí ankan inire ma mai aránaópá baona vaya minó akhempá tiamé orera ékun banasi ano iniren mai vaya aránaópá bano van mumpo vá amúkusintano.  
\v 2 Amúkesin ná namu vanta kayo ano ma setin uman timiyain pinte vá Tiyarafenu ano siya ino. Mai fara vara seyo, minó ano ída Bafantá mumuman ukhen mino.  
\v 3 Máan tukhen mifo Bafan mano ma sirein baya ánain pura sen bákuriyain mi vantin tiretin ákona amiren dafíkantin Ban Anon mano siretin ída uman aminten mino.  
\v 4 \x * \xo 3:4 \xt 2Ko 7:16; Kar 5:10\x*Mai ma siretin nan barano van ma siamé tiferuna yanasinta kama e variyan nan Bafan mano setin ineine simí afová ukheruna ínaimpá deren mai avúavá pákaresin banten mino.  
\v 5 Áesin ná Bafan mano siretin ayainti vá Tiyarafenu ano ma vanasi avábá iyain má inká Yisas Karaisi ma mantaan ákona uven uman barein má afová ure vá mai ma einí ono.   
\s1 Ída Ma Avesara In Baya Ino  
\p
\v 6 \x * \xo 3:6 \xt Rom 16:17\x*Mumunan tiyofi sifá tiváe oe, setisi Bafan Yisas Karaisin avíkái ma man baya siamé uno. Mai ma siamikhé tiferuna vaya ánain ma ída yakhafiyan ma avesaraen noin kéká áde ída vá orono.  
\v 7 \x * \xo 3:7 \xt Fir 3:17\x*Mai fara vara seyo, siretin má ma váké maé tetí ankan ída sivesara iyákuya fefái afová ukha ompo setinti sivútivá ánain mana vá bákurono.  
\v 8 \x * \xo 3:8 \xt 1Te 2:9\x*Ída mana yunan para variyá umpo miyaní uré anan bariyá uno. Máan tiyái siretin ída uman ameno van pasé inuran má baya má ákona yorarí uré mai yanasinta variyá uno.  
\v 9 \x * \xo 3:9 \xt 1Ko 9:4; 1Te 1:6\x*Tetí ankan kasaé dunan inantiré nanunaren mifo mai avúavá ódareya mai ánain bákurono van mi siretin aní é uno.  
\v 10 Para vara seyo, siretí ankan má ma váké maé ma man bayan tiamikhá uno. “Mana vanta ano ma avesara uren ída yoranten maen mai vanta ano ída vá dunan nano.”\fig Doran nanin banta ino.|alt="farmer plowing field" src="cn02081b.tif" size="col" ref="2Te 3.10" \fig*   
\p
\v 11 \x * \xo 3:11 \xt 1Ti 5:13\x*Máa sé tiamikharéi inékun tiretin aúbanté manáa ano avesaraen nóken ena kékái yoran aa iyáden avesera amiyan ne sen me sisimí iniyá tiféuno.  
\v 12 \x * \xo 3:12 \xt 1Te 4:11\x*Máa sé iniréi Bafan Yisas Karaisin avíká máan nanin banta van manará báken dunan dóden nano van mi ma man baya siamiyá uno.  
\v 13 \x * \xo 3:13 \xt Kar 6:9\x*Máan tiyantiya mumunan tiyofi sifá tiváeyan noe, puntákein avúavasí in nan ída vá avesara ono.   
\p
\v 14 Ma vompompin ma siamé tiferuna vaya ánain ma ída yakhafin nain nanin banta vá ída o muntesin ná betíi avúava san ayave van ino.  
\v 15 \x * \xo 3:15 \xt 1Te 5:14\x*Ída vá béin namuro an de vá afá aváen ma man baya siameinisá ono.   
\s1 Porini Amusin Baya Ino  
\p
\v 16 Ara ara uman mano siretin amaniná erinten mifo áesin ná ará kusin benafo Bafan mano ena ena ará kusin amiren ná tiretin má bano.   
\p
\v 17 Téi Pori anon te siyampókéi ma kípan baya uvádéi sesi aní daná mairá kaé uno. Minó bompon kayorá máan manan ukhé uno.   
\p
\v 18 Tetisi Bafan Yisas Karaisini sarisari ano siretin má banti vá bano.