\id 1TH - Agarabi NT [agd] (Papua New Guinea) -2011 bd \h 1 Tesaronika \toc1 PORI MA ESÉ ARAÍEN TESARONIKÁ NANIN BANTA MA UVAMAN AMEIN BOMPON MINO \toc2 1 Tesaronika \toc3 1 Tes \mt1 PORI MA ESÉ ARAÍEN TESARONIKÁ NANIN BANTA MA UVAMAN AMEIN BOMPON MINO \mt2 (1 Tesaronika) \imt1 Tesaronikai Esé Bompon Ma Uvanteí Pákenai Afova Vaya Ino \is1 Ma vompon ma uvantein banta ino. \io1 Baya varen orin banta Pori ino. \is1 Uvarein orana ino. \io1 AD fifti-uvani (51) fin nafi áa fifti-tu (52) fin nafin uvanten mino. Mai maen Pori ma kan dádasí en ma monó doraríen eúkein pimpá ino. \is1 Ma vompon ma uvantein baru ino. \io1 Koriní barurá ma mana orana ifo afápá mana un kádan biyontá ma váken mino. (Aposeri 18:11 fin ná onano). \is1 Ma vompon ma uvaman amikhein kéká ino. \io1 Kan dádasí en ma Pori monó doraríen eúkiyáken Tesaroniká orin ma Kiriki nanin banta ano ará baéden ma monó tiyá ein kékái uvaman amikhen mino. (Aposeri 17:1-9). \is1 Nái ana vará ma vompon uvanten nafino. \io1 Pori iníkan Tesaroniká nanin banta ano Yisasini kama vaya mo oyan amiyaimpin betin ayaen ákona uantano siren Timotin tiantan orikharen ma Masedoniá bara fáké ma ovaránen Koriní eriven ma amusin baya me siamin ma iniren mai van mi esé bompon uvaren mino. Inká 1 Tesaronaika vá 2 Tesaronaika va san máan mi sen iniyan mino. Ma vara kípan akhempá ma yákó inain danasinta vá inká Yisasin ma ovaránen erin nain ma san ma Kiriki kayoi vompon mano ma sikhá ein mi sian amá ukhen mino. \c 1 \s1 Pori Ma Tesaroniká Nanin Banta Amusin Uantein Baya Ino \p \v 1 \x * \xo 1:1 \xt Apo 17:1-9\x*Téi Porin má Sairasin nú Timotin nú bái ma vompon uvaman Tesaroniká kákan barurá ma monó nanin banta váke ma Sifóe Tiyarafenu vá Bafan Yisas Karaisini mái kékasí ma ukhaonan uvaman amé uno. \p Tiyarafenui sarisari vá ará kusin má ano siretin masá bano. \s1 Tesaroniká Nanin Bantai Yoran Nan Ma Pori Amusin Uantein Baya Ino \p \v 2 Ena ena yamú tiretí ankan nan ovaré me iniyáke Tiyarafenu susu sianté timúkuan amiyá tiféuno. \v 3 \x * \xo 1:3 \xt 1Ko 13:13; Kor 1:4-6\x*Máan tiyáké tiretí ankan ma Yisasintá mumunan iyáke ma yoriyaona vá ena nanin banta ará amire ma ayae yoriyáke ma inká tetisi Bafan Yisas Karaisin nan ovaránen erinten mino siren ma ákona inin kauráke ma kama yorarí iyaona van mi ovaré me iniré teti Sifóe Tiyarafenun timúkimpó tiamiyá tiféuno. \p \v 4 Mumunan tiyofi sifá tiváeyan noe, Tiyarafenu ano siretin nan anunu uren be ina e sen aní ukhá tetí ankan afová ukhé uno. \v 5 \x * \xo 1:5 \xt 1Ko 2:4-5\x*Mai fara vara seyo, Yisasini Kama Vaya ma varé eré tiferuna mai vayafó ana va siamé tife raumpo Kantá Aunani ákona fóké bá ino. Mai vaya van tetí ankan puran tinon té afová ukhé uno. Inká teti ma siretí ankan má bákuya setin tivútivá inka sonten nan mai ano yere maman puraí ukhen mino. \v 6 \x * \xo 1:6 \xt Apo 17:5-9\x*Mai ma Tiyarafenui kama vaya ma vareona mai kokhon uman mái vare ompo Kantá Aunan manon ákona amíkaya veni amusin mái vare ono. Mai anon tetin tivútivá bá Bafani avúavá bá maman manaí eono. \v 7 Máan ma eona anon Masedoniá barafa safi inká Akaiá barafa safi ma váken Yisas Karaisintá mumunan iyain nanin bantan aní uante ono. \v 8 Mai siretí ankan ma Bafani vaya sian dákó eona anon ída Masedoniá bá Akaiá bara vápin mana ufen ma asein an den oren mifo minó akhempái oreraen mino. Mai fara vara seyo, inte akhempasá oriya rafu mai sireti ma Tiyarafenurá mumunan iyaona vaya anan tiyá iniyá tiferuna ída evaráné betin tiamiyá bá tifanté uno. \v 9 Mai fara vara seyo, vetí ankan baípá ma oréku ma séin kama ureya sivireona avúava san betiyantá tian dákó iyáken mai ma varará ayarafenu kayo ma me ampire ará baéde fura sen para van oriyan ban Tiyarafenurá ma mumunan iyaona vaya vá dere siyá iné uno. \v 10 Tiyarafenu ano ma ve Anin Yisasin ma furin pintena orun avían mantakhein ma inaru fáké ovaránen erin nain nan ma ave ukhaona van deren tiyá iné uno. Tiyarafenu ano ma ma vara kípan nain damú ma vei aran naná ma vanasi amaniná kain nain pintena Yisasi ano siya é iyan mino. \c 2 \s1 Pori Ma Tesaroniká Barafá Monó Dorarí Ein Baya Ino \p \v 1 Mumunan tiyofi sifá tiváeyan noe, seti ma siretí ankan má o váké doriyá eruna yoran ída fara savifá o afeyóka siretiyantá afová ukha ono. \v 2 \x * \xo 2:2 \xt Apo 16:19-24; 17:1-9\x*Tireti vaonafá ínaimpáké oronté maé Firipaí barurá orékun ma mai ráke nanin banta ano ma setin tiren tisen iyaré ein baya siretí ankan afová ukha ono. Tiretí ankan Tiyarafenui Kama Vaya siamiyákun ara ara aa fáké uman eriyaren mifo Tiyarafenu ano ákona simiyáká ída feranton kasaé beni vaya siamiyaré uno. \v 3 Máan tukhanti afovasá ono. Namu ineinefó tiretin ída mákádé kampun baya kayo siamiyá uno. \p \v 4 \x * \xo 2:4 \xt Kar 1:10\x*Mai fara vara seyo, Tiyarafenu anon tetin nan bei Kama Vaya fura sen banasi siaminten ne siren mai yoran timikhái yoriyá tiféuno. Béin tetisi ineine yaimiyain mi vái véin amusin ameno van doriyá umpo ma varará nanin banta va amusin ameno vara yoriyá tife rauno. Ída ino. \v 5 Tiretí ankan afová ukhená Tiyarafenu avorá pura vayan tiamiyá uno. Tiretin kampun tirékuya setisi vayará anunu uareya manáa yaná timeno vara siretin kampun tiantiya rauno. Ída ino. \v 6 Tiretí ankan nafo áa ena kéká ano fi ída kákan bí timeno van mai yoran doriyá tiféuno. \v 7 Yisas Karaisini aposeri\f * \fr 2:7 \ft Aposeri maen Tiyarafenui vaya varen orin banta ino.\f* kékái váké tireti vaonafá manáa yanasinta varano van kasaé inanten nunaren mifo anóe ano ma arará iyampon nan kuvein an déi siretí ankantá kamaé dafisé uno. \v 8 Tiretí ankan nan moeké tinunu uré paséi Tiyarafenui Kama Vaya ana va siame raumpo setisi minó danasinta vái amé tiféuno. \p \v 9 \x * \xo 2:9 \xt Apo 20:34\x*Mumunan tiyofi sifá tiváeyan noe, setí ankan ma manáa yana san ékun ma siyain uman ída varano van mi inuran má bayan má miyan baran dorarí iyá uno. Máan tiyái Tiyarafenui Kama Vaya ma siretin tiamé iyaruna van ídá ovaré me iné iya rafono. \v 10 Tiretí ankan má Tiyarafenu vá ano afová ukhen ná pura sen puntáken ma kantasí ukhein avúavápói mumunan ma iyaona nanin banta avorá doré iyá tiféuno. \v 11 \x * \xo 2:11 \xt Apo 20:31\x*Para vara seyo, siretí ankan purase afová ukhen ná afóe ano ma ve akhafanará kama yafisirí iyainí éi sireti mana manará kamaé dafisé iyá tiféuno. \v 12 Kama vaya fókéi siretin ará ákona uantádéi Tiyarafenu avorasá kama e vasin onano siré tiamé iyá tiféuno. Beni khakhan ákona mamareya vei yafisin aúpin ben má ba oriya vano van ariyan mino. \s1 Pori Ma Tesaroniká Nanin Bantai Mumunan Nan Ma Susu Siantein Baya Ino \p \v 13 \x * \xo 2:13 \xt 2Te 2:13\x*Inká beni vaya ma siretin tiaméku mae ma vara ráke vantai vaya va siyan naifo Tiyarafenui Vaya inon tireyan kama e iniyanái ena ena véin tusu sian tiyá tiféuno. Mai vaya ma kama e inireya mumunan eona kékápin mi ákonaen doriyan mino. \p \v 14 \x * \xo 2:14 \xt Apo 17:5\x*Máan tiyan mifo mumunan tiyofi sifá tiváeyan noe, Yudiá barafá ma Tiyarafenui vanasi ano Yisas Karaisintá mumunan ein nan ma Yutan kéká ano uman amiyaré einí ukhein uman manan tiretíi kéká ano amikhen mino. \p \v 15 \x * \xo 2:15 \xt Apo 9:23, 29; 13:45, 50; 14:2, 5, 19\x*Manáa Yutan kéká anoi vetíi sakhanampa vanta kayo vá Bafan Yisasin má aruan púkaren mi saréa setin má dere sirono van mi yakhafiyan mino. Máan tiyáken minó nanin bantan namuroí uantiyákan Tiyarafenu ano ída amusin iyan mino. \v 16 Mai fara va ino. Tiyarafenu ano ena anan nanin banta evaránen aviran nain nan péden beni Kama Vaya ma siamiyaruna aa iyariyan mino. Máan ma iyain avúavá anon betíi ume maman mímí doní iyáin mi Tiyarafenui aran naná ano vetin amaniná ínaimpáké dákó en mino. \s1 Timoti Ma Tesaroniká Doriyain Nan Ma Pori O Onano Van Ein Baya Ino \p \v 17 Máan tukhen mifo mumunan tiyofi sifá tiváeyan noe, siretimpin ma vain Yutan kayo finté manáa ano setin tirono van íká mai anarái sító máará tiretin me ampirákéi ovaráné e onano van túkáké kákan ineine iyáké aa van dosiyá tiféuno. \v 18 Mai fara vara seyo, setí ankan tiretin o onano siré teyantá ara ara aa van dosiyákun mifo Ban Anon mano setisi aa iyaré iyan mino. \v 19 \x * \xo 2:19 \xt Fir 2:15-16; 4:1; 2Te 1:4\x*Máan té iyan mifo Bafan Yisasi ma erin nain damú náinasá baré intí béin mo aní é tifékun ná tetisi yoran nan amusin uren miyan timinten nafino. Ída ifo siretíi vaona Bafan Yisasi ma ovaránen erin nain damú ma ven avorá o mantakhesí ma siretin oniyáké anan kákan timusin onté uno. \v 20 Tiretí ankan nan kama kéká inon tiyákayan kákan timusin timiya ono. \c 3 \s1 Pori Ma Tesaroniká Orino Van Timotin Tiantein Baya Ino \p \v 1 \x * \xo 3:1 \xt Apo 17:15\x*Máan tukhái siretin nan ma ída oniyaruna van ma ineine é oriyaruna ano inin tiriyaimpin mi Atensí barurá bano van iné uno. \v 2 \x * \xo 3:2 \xt Apo 16:1-3\x*Máan tukhéi setin tifá tiváe Timoti ma Tiyarafenui yoran banta váken ma Karaisini Kama Vaya siamiyain banta anan tianteruna mai setisi varu varen tiretin o oniyáken ayainti mumunampin ákona ukhe van nono. \v 3 \x * \xo 3:3 \xt 2Ti 3:12\x*Béi anon ayainti mai ma afoká in nain uman kayofin mantaan ákona in nono. Máan uman kayo anon monó nanin banta simaniná afoká inté iya afová ukha rono. \v 4 Tiretí ankan má ma o váké maé mai uman mano setin timaniná dákó inten ne sé tiamikharé ékun mi mai uman mano fura sen dákó íkaya siretí ankan afováe ono. \p \v 5 Mai fara vara seyo, mai van inékun tufá ída kama iyaimpin mi siretí ankan inté eyá mumunan ukhe fono siré afová ono van Timotin tiantékun oren mino. Mákasin banta ano akhenóka intiya siretíi mumunan me ampesin tetisi yoran mano fa savifá o afeyoran nain nan mi sikhokho van iyá uno. \s1 Timoti Ma Seti Nan Amusin Baya Sein Baya Ino \p \v 6 \x * \xo 3:6 \xt Apo 18:5\x*Orikharen taréa uron mi Timoti ovaránen me sisimen tiretíi mumunan nan para ákona ukhan ena ma avábá in avúavá moéken bariyan mino síká iné uno. Tetí ankan ma fefá tiretin o ontaréeruna van ma ovare me iniyákeya setin nan moéke amusin pinté tonano van iya ono. Máan tiyan nái setin má dere simusin pinté tiretin o onano van ineine iyá uno. \v 7 \x * \xo 3:7 \xt 2Te 1:4\x*Máan tukhái mumunan tiyofi sifá tiváeyan noe, siretí ankan ma ákona mumunan iyaona vaya ma iné tiferuna anon kákan uman ma variyaré eruna maman mumunan ákona usinten mino. \v 8 Tiretí ankan ma Bafantá ákona mumunan para ukheona vaya ma inékun mai anon tetin evaránen ákona usinten mino. \p \v 9 Tiretí ankan ma mumunan iyaona van mi Tiyarafenu avorá kákan timusin iyá umpo mai inté uresá tiretin nan béin tusu siantante rafuno. \v 10 Tiyarafenu ano aaí usintantí tiretí ankan baonafá orivé manáa yaná ma mumunan iyáke me áuntanona aya ono siré ena ena inuran má bayan má timúkiyá tiféuno. \s1 Pori Ma Tesaroniká Orin Aa Van Dosein Baya Ino \p \v 11 \x * \xo 3:11 \xt 2Te 2:16-17\x*Máan tiyá tifé umpo setin Tifóe Tiyarafenu vá Bafan Yisasin má ano vá aaí usintantí tiretí ankan baonafá ainé orono. \v 12 Tetí ankan ma siretin avábá iyarunaíen Bafan mano siretin avu inti vá ben moéken avábá in maran iyáke ena nanin banta yere avábá ono. \v 13 Máan tesin ná Karaisi ano siretí ankan ará ákona uantantiya ída fain má aau vá baré inti funtákein nanin bantaí ukhare Bafan Yisasi ma vei kantasí ukhein kéká bá erin nain damusá teti Sifóe Tiyarafenun avorasá o mantano. \c 4 \s1 Tiyarafenu Ma Amusin Ukhein Avúavaká Ma Van Baya Ino \p \v 1 Mumunan tiyofi sifá tiváeyan noe, Tiyarafenu ma amusin in nain avúaváká bano van mi Bafan Yisasin aviká tiretí ankan aní ukhé uno. Máan tukhare saréa mai avúavá bariyan ná moéke varano van mi ákonaé tiamiyá tiféuno. \v 2 Mai fara vara seyo, Bafan Yisasini ákonará pefái vaya siaméku afová ukha rono. \p \v 3 \x * \xo 4:3 \xt 1Te 5:23; 1Pi 1:16\x*Tiyarafenu ano siretin nan kantasí ukhe vano van mi inikhen mifo famúkuí ma in avúava sinta vará perano. \v 4 \x * \xo 4:4 \xt 1Ko 6:13\x*Inká kantasí ukhein avúavá póké ma siretíi aurá dafían ákona ureya vasin maen ena nanin banta ano amo siyanti van nono. \v 5 Mai ma monó ída inin nanin banta ano ma asuse avúavapin báken Tiyarafenu vá beni avúavá bá ída afová ukhen ma vain an ída yakheya vano van mino. \p \v 6 Máan avúavá póké ída vá mákáde monó afá aváeyan aná ona vare nono. Para vara seyo, máan avúavá ume ma variyain kékái Tiyarafenu ano uman aminten ne sé pefái ákonaé tiamé tiféku afová ukha rono. \v 7 \x * \xo 4:7 \xt Ibu 12:14; 1Pi 1:15-16\x*Para vara seyo, Tiyarafenu ano setin nan namu avúavápin bano vara sarakhen naifo mai kantasí ukhen bano van mino. \v 8 \x * \xo 4:8 \xt Ruk 10:16; 2Ko 1:22\x*Máan tukhan maen mai vaya ma yurafuriyain kéká ano varará bantai man baya ída yurafuriyan mifo Kantá Aunan ma amikhein Tiyarafenui oyan amiyan mino. \s1 Pori Ano Ma Tesaroniká Nanin Bantai Ará Ákona Ein Baya Ino \p \v 9 \x * \xo 4:9 \xt Yon 13:34\x*Máan tiyan mifo ena ma avábá in avúavá páke Tiyarafenui vanasi aní ono vara ma vompon uvaman amiya rauno. Ída ino. Para vara seyo, Tiyarafenu ano fefái ven avábá in maran ma in avúavá aní íkaya afová ukhen ná uno. \v 10 Máan tukheyai sireti ano Masedoniá barafá ma vain mumunan nanin banta kama ure avábá iya ompo mai avúavá moéke varano van mi ákonaé tiamiyá tiféuno. \v 11 \x * \xo 4:11 \xt Efe 4:28\x*Máan tiyáke kama khumanin ma o yosin nará pefá ma siamikhá erunaí eya siretí ina yanasintará inin kaúdákeya au ma ayain doran ná ákona e yorano. \v 12 Máan tesin maen afokhampin ma vain nanin banta ano sireti ma vaona avúava san amo siyanti váke mae ída moni san o afasí iyá uno sire ena vaípá inantin nono. \s1 Bafan Ma Ovaránen Erinaí Pákena Vaya Ino \p \v 13 Mumunan tiyofi sifá tiváeyan noe, mumunan uven ma fúká ein kéká ano ínaimpáké intesá inten nafi mai sireti afová ukha ono. Máan tukheya mai ma afokhampin báken ma Yisasini ovaránen erin nan ma ída avé ukhen bain kéká an deya moékan arunanápin ída vano van muno. \v 14 \x * \xo 4:14 \xt Rom 14:9; 1Ko 15:3-4, 12\x*Mai fara vara seyo, Yisasi ma fúkaren masí pinté orun mantakheintái setí ankan mumunan ukhé tiféuno. Máan tukhéi véi ma ovaránen erin nain damú mai ma mumunan uven púká ein kéká Tiyarafenu ano evaránen avían mantarantin Yisasin má erinten minon té mumunan iyá tiféuno. \p \v 15 \x * \xo 4:15 \xt 1Ko 15:51-52\x*Bafan pintéi ma vaya fura sen erikhá tiamiyá uno. Bafan ma erin nain damú ma ma ayun para vá tiferuna kéká ano mai ma mumunan uven púká ein kéká ída me ampiré teti nare oró tifanté uno. \v 16 Mai fara vara seyo, Bafan mano veyantá inaru fáké eriyan ákonará baya sintin maen ánon enisori ano kákaníen ovarantin Tiyarafenui ufen mano asinten mino. Máan tintin mumunan uven ma fúkáin nain kayo nare anon masí pinté orun mantanten mino. \v 17 Mantavintí mai ma ayun para vá ó tifanuna kéká bá ano maman manafiní uvé ayompin Bafan o oniyáké ben má típá o vá tifanté uno. \v 18 Máan tukhein nará ma vaya kayo fóké mumunan ákona uantan maran ná ono. \c 5 \s1 Yisasi Ma Ovaránen Erin Nain Nan Ma Útain Baya \p \v 1 Mumunan tiyofi sifá tiváeyan noe, mai yanasinta ma afoká in nain damú bá áau vá pákena ída kanaí é ma vompompin uvaman amenté uno. \v 2 \x * \xo 5:2 \xt Mat 24:42-43; 2Pi 3:10; Rev 3:3\x*Mai fara vara seyo, Bafan ma erin nain damú mai ída ma afová íkan umoyan banta ano ma inuran erein an mi yanté iya siretí ankan afova suron ukha rono. \v 3 \x * \xo 5:3 \xt Mat 24:39; Ruk 21:34-35\x*Banasi ano ma siyáken inka kama yamú afoká ein kamaé bátifanté uno ma siyain má anan anasi ano ma inamun nan iniyáken ai san auriyain an dakhein uman betin aminten mino. Máan ma intin maen betí ankani karan orin aa ída vanten mino. \p \v 4 Máan tinten mifo mumunan tiyofi sifá tiváeyan noe, siretí ankan ída anukheimpin ma vainí ukháesin ma umoyan banta an den Bafan ma erintiya ída anúdin nono. \v 5 \x * \xo 5:5 \xt Rom 13:12\x*Mai fara vara seyo, siretí ankan panu vá kakhan avúavá bá ma non kéká ono. Tetí ankan duntein avúavápin na váké anukheimpin na nó tife rauno. Ída ino. \v 6 Máan tukhé tifé umpo ída vá manáa kéká an davé tuun bariyá báké tuu sapé tikherá dafíké bá tifano. \v 7 Mai fara vara seyo, auun ma varano van ein kéká ano inuran mi varé iyan mino. Inká óen non ma nan kéká ano inuran mi naren óen é iyan mino. \v 8 \x * \xo 5:8 \xt Ais 59:17; Efe 6:14, 17\x*Máan tiyain mifo kakhan aúpin ma vá tiferuna nanin banta ano setisi sivútivá dafíbesá mumunan avúavá bá ena kéká ma ará amin avúavá bá maman tanko an ná dá tifano. Tiyarafenu ano ma sivirano van ma sikhein nará ákona inin kaúdé maman kápa kamamó an daré uré tifékun ná bano. \v 9 Mai fara vara seyo, Tiyarafenu ano vei aran daná tetin timaniná kaono vara anunu ukhen naino. Ída ino. Tetisi Bafan Yisas Karaisin pinté uaré tetin tiya uré tivirano van mi inikhen mino. \v 10 \x * \xo 5:10 \xt Rom 14:8-9; 1Te 4:14\x*Tetí ankan púkaré tife rafu áa ayun para varé tife rafu mai véi ma erin nain damú ben má o vano van mi setin nan e fúken mino. \v 11 Máan tukhein nará mai ma variyaona avúavasí eya Tiyarafenurá ma mumunan in avúavá ben ákona uantan maran ná ono. \s1 Pori Ma Sipá Ákona Uantan Baya Sein Mino \p \v 12 Mumunan tiyofi sifá tiváeyan noe, mai ma Bafani yorarí iyáken ma siretintá dafíkein kéká aránaópasá bano. Betí ankan manon tiretin aúbaná ákona yorarí iyáken ída namu avúavá barano van ákonaen baya siamiyan mino. \v 13 Máan tiyan mifo vetin aránaópasá báke veti ma yoriyain nará aúkáké moéke avábá ono. Máan tiyáke vetin masá manafin ará kuse vano. \p \v 14 \x * \xo 5:14 \xt 2Te 3:6, 11\x*Mumunan tiyofi sifá tiváeyan noe, mai ma vetíi yoran mo ampiren avesara iyain kéká ákona e vaya siamesin ída avesara ino van mi siamiyá uno. Akhokho van ma iyain kékái mumunan ákona uantiya inká ma vara ráke avúavá ano ma ineine máden asuse iyain kékáká kama e vá dafiseno. Máan tiyáke minó nanin banta vá ará manafiní ureya vempáké bano van mi siamiyá uno. \p \v 15 \x * \xo 5:15 \xt Rom 12:17; 1Pi 3:9\x*Máan tiya mae namu avúavá ma uantan nain kéká anona ída vá namu avúavá uantiyáke vetin má inká ena kéká bá kama avúavasí in maran mana vá ono. \p \v 16 \x * \xo 5:16 \xt Fir 4:4\x*Máan tiyáke minó damú amusin mana vá iya vano. \v 17 Inká amúkin avúavá ída vá me ampeno. \v 18 \x * \xo 5:18 \xt Efe 5:20\x*Uman nafi kama yana safi ma siretin amaniná afoká inti mae vá minó damú tusu ana vá teno. Mai fara vara seyo, siretí ankan Yisas Karaisini kékasíi ukhen nan mi Tiyarafenu ano mai yanasinta varano van anunu ukhen mino. \p \v 19 \x * \xo 5:19 \xt Efe 4:30\x*Kantá Aunan ma yoriyain aa ída vá iyarano. \v 20 Kantá Aunan manon inin amiyan mi sakhanampa vaya siyan mifo ída vá inian paen danasí ono. \v 21 \x * \xo 5:21 \xt 1Yn 4:1\x*Mai ma siamin nain baya kama e yaíde afová ure vá puntákein baya máa vá pákano. \v 22 Minó namu avúava sinta vará perano. \s1 Pori Ma Sipá Amusin Uantan Baya Sein Mino \p \v 23 \x * \xo 5:23 \xt 2Te 3:3\x*Ará ma kusiantan Tiyarafenu ano vá minó avúavasí ma inonafin ná maman kantasí uantano. Inká tiretíi aunan má aú iyampon má minó bukhafa vá ano avusese ukhanti oriya vare vá tetisi Bafan Yisas Karaisi ma ovaránen erin nain damu sá o afoká ono. \v 24 Mai ma siretin arakhein Tiyarafenu ano véi ma sirein baya ánain pura sen bákuriyain bantin pasen mai ma sirein daná baranten mino. \p \v 25 \x * \xo 5:25 \xt Kor 4:3; 2Te 3:1\x*Mumunan tiyofi sifá tiváeyan noe, setin nará amú kusintano. \v 26 Tiyarafenurá ma monó tiyain nanin banta ano ma avábá iyain avúavá kasá ben avábá in maran ono.\f * \fr 5:26 \ft Kiriki vaya fintéi \fq Tiyarafenurá ma monó tiyain nanin banta ano ma kantasí ukhein amónan maran iyain \ft nan tikhen mino.\f* \p \v 27 Minó mumunan tiyofi sifá tiváeyampin ma vompon dankafesin inino van mi Bafan aviká ákonaé tiamiyá uno. \p \v 28 Máan tukhantin tetisi Bafan Yisas Karaisini sarisari ano vá tiretin má bano.