\id 1JN - Agarabi NT [agd] (Papua New Guinea) -2011 bd 
\h 1 Yoni 
\toc1 YONI MA ESÉ ARAÍEN UVANTEIN BOMPON MINO 
\toc2 1 Yoni 
\toc3 1 Yon 
\mt1 YONI MA ESÉ ARAÍEN UVANTEIN BOMPON MINO  
\mt2 (1 Yoni)  
\imt1 Yoni Ma Esé Bompon Uvanteí Pákenai Afova Vaya Ino  
\is1 Ma vompon ma uvantein banta ino.  
\io1 Baya varen orin banta Yoni vei furin ádesí ukhan ma uvarein minon ten manáa afova vanta kéká iniyan mifo ída mana vanta ano fura sen afová ukhen mino.  
\is1 Uvarein orana ino.  
\io1 AD nainti (90) ráké mana antareti (100) ráké mai aúban mino.  
\is1 Ma vompon ma uvantein baru ino.  
\io1 Esiá barafin ma un non akhempá áau orun perápá ma vain baru Efesasí ino.  
\is1 Ma vompon ma uvaman amikhein kéká ino.  
\io1 Efesasí ma vain monó namun má Esiá barafin ma vain monó namun kayo vá inká minó akhen pá ma vain monó namun kayofin mái uvamádan oreraen mino.  
\is1 Nái ana vará ma vompon uvanten nafino.  
\io1 Minó akhempá ma monó tiyain kéká ano ma Yisasintá mumunan iyan ma kamaen ban avúavá ma varan nain má inká pefá ma Yisas Karaisini kama vaya siamikhá ein ma san mi sian amá ukhen mino. Ma vara ráke avúavá bá inká kampun monó doran banta kéká bái avúavá ba san mi ma vompon ma yankafin nain kayo afova amikhen mino. Inká ena avábá uantan ma kákaní ukhein nan tian amá iyáken mi Tiyarafenu ano ma setin avábá usintiyain oniyáké maé mai vará ben aya ven aya vá onon tikhen mino.  
\c 1  
\s1 Ayun Ma Fara Van Oriyan Ban Baya Ino  
\p
\v 1 \x * \xo 1:1 \xt Yon 1:1\x*Minó danasinta ma ída afoká ukhan ma varé ein mano setin má baya siyáká beni Vaya iniyáké oné tiféuno. Béi Yisas Karaisin báken Ayun Ma Fara Van Aunan mi varé íká béin oniyáké aruvé tiféuno.  
\v 2 \x * \xo 1:2 \xt Yon 1:14\x*Pefá mai Aunan manon be Afóen má manafin baré íkan béin maman dákó urá purasé onteruna van mi ayun para van aunan mi véi van mino sé tiretin tiamiyá uno.  
\v 3 Tetí ankan ma fura sé ódaré inikhé tiferuna yana san mi eresí manafin átaru uvé monó teno van tiretin tiamiyá uno. Manafin ma átaru uvé monó té tifanuna mai ve Afóen má be Anin Yisas Karaisintá bái monó tiantá tifanté uno.   
\p
\v 4 \x * \xo 1:4 \xt Yon 16:24\x*Tetí ankampin moéken timusin bíkano van mi ma vompon uvaman amiyá tiféuno.\fig Yoni ma vompon uvariyain mino.|alt="John writing on a scroll" src="cn02103B.tif" size="col" ref="1Yo 1.4" \fig*   
\s1 Tiyarafenui Kakhantá Ma Van Baya Ino  
\p
\v 5 \x * \xo 1:5 \xt 1Ti 6:16; Yem 1:17\x*Ma vaya vá tiretin nan tiameno siren ma véi sisimikhá ein bayan tiretin tiamiyá uno. Tiyarafenu mai kakhan mi vákan béimpin ída sítípa van mino.  
\v 6 \x * \xo 1:6 \xt 1Yn 2:4\x*Máan tukhantíi setí ankan ma manafin átaru uvé Tiyarafenu vá monó tiyá uno siré ma yuntein avúavápin para vá tifanté maé mai kampun mi siré ída fura sikhein avúaváká nó tiféuno.  
\v 7 Máan tiyá tifé umpo Karaisin an dé ma Tiyarafenui kakhakhein avúavápin ma vá tifanté maé mai véin tái manafin átaru uvé monó tiyá tiféuno. Máan tiyá tifékun maen be Anin Yisasini nare ano setinti ume yo sesé usinté iyan mino.   
\p
\v 8 \x * \xo 1:8 \xt Íbo 32:5; Pro 28:13\x*Tetí ankampin ída ume van mino ma sé tifanté mai setiyan mi máká máaka iyá tifékun pura sikhein aváuvá ano setimpin ída van mino.  
\v 9 Máan tukhen mifo setisi ume ma sian amá uan béin amé tifékun maen béi ma sikhein ánain dakhafen mi setinti ume yo sesé usintáden puntákein avúaváká kainten mino.  
\v 10 Tetimpin ída ume van mino ma sé tifanté mai Tiyarafenu van mi kampun banta ino siyá tifékun mai avúavá anon beni vaya van tetin túpin ída van ne sen aní iyan mino.   
\c 2  
\s1 Yisas Karasin Ma Fura Sen Afová In Baya Ino  
\p
\v 1 \x * \xo 2:1 \xt Ibu 7:25‑26\x*Téi ma sinunu ukheruna iyamporinta oe, siretí ankan ída umeí ono van mi ma vompon uvaman amiyá uno. Mana ano ma umeí inteya mai mana vanta váken mi setisi ume ampisintano van Tiyarafenun tiamiyan ban mino. Béi Yisas Karaisi Tiyarafenu avorá puntákein bantan ban mino.  
\v 2 \x * \xo 2:2 \xt Yon 1:29; Kor 1:20; 1Yn 4:10\x*Béi anon tetisi ume van be au fóké ákonte ukhen mino. Máan turen tetisi ume ana ída yo sesé ukhen mifo minó barafá ma vain nanin bantai ume vái yo sesé ukhen mino.   
\p
\v 3 Máan tukhen mifo inté uresá beni nan bá uno sé afová ótifante rafuno. Beni man baya khayo ánain ma vákuró tifanté mai anon beni nan bá uno sé afová ó tifanté uno.  
\v 4 Mana vanta ano ma séi Tiyarafenu afová ukhé uno siren ma veni man baya ánain ma ída vákurinten maen mai véi kampun bantan bákan pura vaya ano veimpin ída van mino.  
\v 5 \x * \xo 2:5 \xt Yon 14:21, 23\x*Máan tukhen mifo fura sen ma Tiyarafenu van anunu ukhein kéká anon beni vaya ánain dakhafiyan mino. Máan ma onté tiféi mai véin masá o súpá ukhe rafu áa ída fi sé afová ó tifanté uno.  
\v 6 Tiyarafenu vá manafin bá uno ma sin nain kéká ano vá Yisas Karaisi ma varé ein avúavá kasá bano.   
\s1 Auyen Man Baya Ino  
\p
\v 7 \x * \xo 2:7 \xt Yon 13:34; 2Yn 5-6\x*Téi ma sinunu ukheruna sirona kéka soe, ma auyen man baya va siretin uvaman amiya rauno. Ída ino. Mai fara vara seyo, ena vá ma avábá in maran ná ono ma sikhein man baya ma araíintá amikhaya o ine eriyá eona fákena vompon mi uvaman amé uno.  
\v 8 \x * \xo 2:8 \xt Yon 1:9; Rom 13:12\x*Máan té umpo mai ma fura sikhein avúaváká ma Yisasin má tiretin má baonarái ven avábá in maran ná ono ma sen peyante man baya ano sikharé ein mai anon tiretimpin auyení ukhen mino. Mai fara vara seyo, sítípa ano inka e kípiyan mi fura oon mano yákó uven kakhaan tiyan mino.   
\p
\v 9 \x * \xo 2:9 \xt 1Yn 4:20\x*Mana vanta ano ma siyáken, “Téi kakhan aúpin bá uno,” ma siren monópin bain afá aváeyan ma safi ayofin ná ba safi ma ará uman daan tiyanten mai véi sítípafin para van mino.  
\v 10 \x * \xo 2:10 \xt Rom 14:13\x*Iye anó ena monó nanin banta van anunu inten nafi mai véi kakhan aúpin mi váken betin ída mamádantin eyúpóen ankaminten mino.  
\v 11 \x * \xo 2:11 \xt Yon 12:35\x*Máan tinten mifo mana ano ma monópin bain afá aváeyan nafi ayofin nafi ma ará namu uantanten mai sítípa yaná ano véin auu yufúkuádan kufan ukhen mino.   
\q1
\v 12 Téi ma sinunu ukheruna iyampon kayo oe,  
\q2 Yisasi ma varein avúavá anoi siretíi ume arúantáká mai van mi ma vompon uvaman amiyá uno.   
\q1
\v 13 Monó bayafin ma karakheona nanin banta oe, esé araíen ma minó danasinta afoká ein bantan Yisas Karaisin báká tiretí ankan béin afova suron ukhen nái ma vompon uvaman amiyá uno.  
\q1 Auyen nanin banta oe,  
\q2 Ban Anon má aruvúde véin maman bararasí ureya ven esantakhen nái ma vompon uvaman amiyá uno.  
\q1 Téi ma sinunu ukheruna iyampon kayo oe, inarufá ma vain Afóen pefái afová ukhen ná ma vompon uvaman amiyá uno.   
\q1
\v 14 Monó bayafin ma karakheona nanin banta oe,  
\q2 esé araíen ma minó danasinta afoká ein bantan Yisas Karaisin bákái siretí ankan béin afova suron ukháen nái ma vompon uvaman amé uno.  
\q1 Auyen nanin banta oe,  
\q2 Tiyarafenui vaya maman ákona ure  
\q2 aúpin denan baréi  
\q2 Ban Anon maman bararasí ureya véin esantakháen nái ma vompon uvaman amé uno.   
\s1 Bararáke Avúava San Ma Ída Anunu In Baya Ino  
\m
\v 15 \x * \xo 2:15 \xt Rom 8:7\x*Ma vara vá maifin ma vain danasinta vá ída vá anunu ono. Mai fara vara seyo, ma vara ráke avúava san ma anunu iyanteya mai Afóen nan ma anunuin ída éimpin bain mi aní iya ono.  
\v 16 \x * \xo 2:16 \xt Rom 13:14\x*Mai fara vara seyo, ma vara ráke avúavá anon ará mantaya ena ina yana san anunu iyákeya au khákan in avúavá maman afoká uádé iya ono. Mai avúava sinta ano ída Sifóen pinté erikhen mifo ma vara finte yanasintan afoká iyan mino.  
\v 17 \x * \xo 2:17 \xt Mat 7:21\x*Ma vara vá maifin ma vain danasinta vá ano inka mo kípiyan mifo Tiyarafenu ma anunu ukhein avúavá ma varan nona kéká anon ayun para va oriya van nono.   
\s1 Yisas Karaisini Namuro Kayo Van Ma Amaan Tikhein Baya Ino  
\p
\v 18 \x * \xo 2:18 \xt Mat 24:5, 24; 2Yn 7\x*Téi ma sinunu ukheruna iyampon kayo oe, ma vara ma kípan damú inka afokáen mino. Pefá ma siretí ankan inen nan ma Yisas Karaisini namuro erinten ne ma siyaré ein mai inka kokhoná afoká ukhen mino. Mai yaná ma oniyá tifesá ma vara ma kípan damú inka afokáen mino sé tifano.  
\v 19 \x * \xo 2:19 \xt Apo 20:30\x*Mai vanta kéká ano setin má baren mifo vetí ankan ída setin tinan báken mi monó pinté me ampiren orikhen mino. Mai ma setin me ampiyain avúavá anon enina ída vá uno sen aní iyan mino.  
\v 20 \x * \xo 2:20 \xt 1Ko 2:15; 2Ko 1:21; 2Yn 2\x*Máan tiyan mifo siretí ankan ída vetin an dakhaono. Mai fara vara seyo, Kantá Aunan mano siretimpin bákayai fura ma sikhein baya afova suron ukha ono.  
\v 21 Máan tukhen nái siretí ankan nan pura vaya ída afová ukhen mino va sé iniresa ma vompon uvaman amiya rauno. Ída ino. Tiyarafenui fura vaya kayo vá kampun baya kayo vá ano ída manafiní ukhá pasé mai vaya afová ono van mi ma vompon uvaman amiyá uno.  
\v 22 \x * \xo 2:22 \xt 1Yn 4:3; 2Yn 7\x*Iyé kákan kampun banta van nafino. Mai ma Yisasin nan Tiyarafenu ano vei vanasi evaránen avirano van ma aní ukhá ein banta va ino ma siyain kéká anon Yisas Karaisini namuro van mino. Mai fara vara seyo, máan kéká anon be Afóen má be Anin má ída afová ukhé uno siren namurói uanté iyan mino.  
\v 23 \x * \xo 2:23 \xt Yon 5:23; 1Yn 4:15; 5:1\x*Mana vanta ano ma ve Anin nan ída afová ukhé uno ma sinten mai véimpin ída ve Afóe vanten mifo iye anó be Anin nan tian páman inten nafi mai véimpin mi ve Afóe vanten mino.   
\s1 Kantá Aunan Mano Ma Afova Amiyain Baya Ino  
\p
\v 24 Máan tukhein nan mi mai ma esé araíe ma inikharé eona vaya vá pákaan ákona ono. Máan ma inteyan be Anin má be Afóen mápin o súpá ukheya van nono.  
\v 25 Máan ten ma setin má manafin bantí maéi mai ma Yisas Karaisi ano ma ayun ma fara van oriyan ban aunan ma iyátintákaré ein mai simusin má bará tifanté uno.   
\p
\v 26 Mai ma siretí ankan kampun tiré e avían namu avúavápin kaono van ma iyain mai kéká afová ureya ferano van mi ma vompon uvaman amé uno.  
\v 27 \x * \xo 2:27 \xt Yon 16:13\x*Tiretí ankan inka Kantá Aunan manten nan tiretimpin bákayai ena ano fura vaya siretin ída afova amino van mi iniya ono. Mai fara vara seyo, Kantá Aunan mano siretin minó afova amiran mai fura vayan ban mino. Mai ma Kantá Aunan mano siamein baya ánain para vákure oriya vá inká Yisas Karaisin masá túpá ukhe vá oriya vano.   
\s1 Tireti Tiyarafenu Akhafanan Ba Ono  
\p
\v 28 Téi ma sinunu ukheruna iyampon kayo oe, saréa vá Yisas Karaisin má manafin túpá ukheya mumunan iyaré esin ná béi ma ovaránen erin nain damú ída ayave van ina mantaan ákona ono.  
\v 29 \x * \xo 2:29 \xt 1Yn 3:10\x*Tiyarafenui funtákein avúavá ma afová ukhante mae mai ma funtákein avúavá ma variyain kayo van afová eya ven akhafana inon tin nono.   
\c 3  
\s1 Tiyarafenu Akhafana An Dakhen Ma Van Baya Ino  
\p
\v 1 \x * \xo 3:1 \xt Yon 1:12-13; 16:3\x*Tiyarafenu ano vei anunu moéken tetimpin banaráken te sikhafana oe sen tariyá mai fura sé ben akhafanan bá tiféuno! Máan tukhé tifé umpo varará nanin banta ano Tiyarafenu ída afová ukhen pasen mi ven akhafana ma vá tiferuna mai ída afová ukhen mino.  
\v 2 \x * \xo 3:2 \xt 2Ko 3:18\x*Téi ma sinunu ukheruna sirona kéka soe, inka setí ankan Tiyarafenu akhafanaí ukhé tiféuno. Yisas Karaisi ma erin nain damú inté ukhein bukhafa vasá bá tifante rafu mai ída afová ukhé tifé umpo véi ma erin nain damúi fura sé ben an davé tifékun mi mai ma vaintá béi fara vantí oná tifanté uno.  
\v 3 Mai van ma mumunan in nain kéká anon Yisas Karaisi ma avusese ukhein an den avusese ukhen banten mino.   
\p
\v 4 Umeí ma iyain nanin banta anon Tiyarafenui man baya yurafuriyan mino. Mai fara vara seyo, ume avúavá ma variyain mai Tiyarafenui man bayan durafuriyan mino.  
\v 5 \x * \xo 3:5 \xt Yon 1:29; 1Pi 2:22‑24; 1Yn 2:2\x*Yisas Karaisimpin ída ume vákan mi setisi ume yo arútintano van béi erikhayai siretí ankan afová ukha ono.  
\v 6 Máan tukhantin béin má ma van nain nanin banta ano ída umeí iyan banten mino. Inká ume avúavá ma varen oriyan bain kayo ano véin ída afová en onten mino.   
\p
\v 7 Téi ma sinunu ukheruna iyampon kayo oe, ída vá áesin manáa kéká ano siretin mákáden tavifá aviren orino. Yisas Karaisi funtákein bantan bákan ben an ma yákein nanin banta anon puntákein avúavá ana varé iyan mino.  
\v 8 \x * \xo 3:8 \xt Yon 8:44\x*Máan tiyan mifo vanasi ano ma fara umeíen oriyan banten mai ma araíintá umeí ukhein bantan Ban Anon bákan mi veni kékái vá uno sen aní iyan mino. Máan tiyan mifo Ban Anoni yoran ma varé ein morun asuse ono van mi Tiyarafenu Anin mano eren mino.  
\v 9 \x * \xo 3:9 \xt 1Yn 5:18\x*Tiyarafenui kékápin ma afoká ukhein nanin banta ano veni avúavá bái váken ída umeíen oriyan bá é iyan mino. Tiyarafenun pintéi afoká ukhen pasen betí ankan ída umeíen oriyan banten mino.  
\v 10 Máan tukhanti inte kékasá Tiyarafenu ina van ná inká inte kékasá Ban Anon nina van nafi mai saréan afová ó tifanté uno. Tiyarafenui man baya ánain ma ída vákuren ma inká afá aváen nan ma ída anunu iyain kéká mai ída Tiyarafenu akhafana ino.   
\s1 Ena Vá Ma Avabá In Maran In Baya Ino  
\p
\v 11 \x * \xo 3:11 \xt Yon 13:34\x*Esé araíintá ma inikharé é tiferuna vaya mai ena vasá avábá in maran onon tikharen mino.  
\v 12 \x * \xo 3:12 \xt Esé 4:8\x*Keni ma Ban Anoni kékasí uven ma ve afá aruan purein an ída vá dá tifano. Mai fará béin aruan puren nafino. Mai fara va ino. Keni namu avúavá bariyan maen be afá ano funtákein avúavá bariyaréin pasen mi máan ten mino.  
\v 13 \x * \xo 3:13 \xt Yon 5:18-19\x*Máan tukhein nará mumunan tiyofi sifá tiváeyan noe, varará nanin banta ano ma siretin namu uantantiya mai van ída vá anú duman duman ono.   
\p
\v 14 \x * \xo 3:14 \xt Yon 5:24\x*Mumunan tiyofi sifá tiváeyan ma avábá ó tifanté mairái furin pinté esanté para ma ayun ban oriyan ban aunampin oré uno sé afová ó tifanté uno. Máan ó tifanté umpo avábá in avúavá ma ída vain kéká ano fara fúken ban mino.  
\v 15 \x * \xo 3:15 \xt Rev 21:8\x*Mana vanta ano ma monó nanin banta ma namuroí uanté iyain mai vetin mi aruan puriyan mino. Banta ma aruan puriyain kékápin mi ayun ma fara van aunan ída váka siretí ankan afová ukha ono.  
\v 16 \x * \xo 3:16 \xt Yon 13:1; Kar 1:4\x*Yisas Karaisi ma ve aunan tetin timikhein mai fura avábái vá tetí ankan afová ukhé tiféuno. Máan ma ukhein nará teti siyofi sifá tiváen naro siré tetisi saunan má dere vá ampiádá tifano.  
\v 17 \x * \xo 3:17 \xt Diu 15:7\x*Máan tukhen mifo mana vanta ano ma kokhon danasinta kaúdáken ma amusin iyantin ma ve afá aváe ano manáa yana san ma o afasí ukhantin ma ída aya inten mai inté uren ná Tiyarafenui avábá ano mai vantafin banten nafino.   
\p
\v 18 \x * \xo 3:18 \xt Yem 2:15-16\x*Téi ma sinunu ukheruna iyampon kayo oe, setí ankan ída vá bayafó ana ena avábá iyá uno sé tifan numpo sivútivá pókesá pura sé aní ó tifano.  
\v 19 Pura sikhein avúavá ánain mi vákuriyan mino sen tetisi sivútivá anon aní intíi afová iyáké ída feranton kasaé Bafan avorá o mantá tifanté uno.  
\v 20 Máan tiyákun maen tetin tú bá inin má ano ma ume nanin banta ono sen tisimiyantí maé ída feran kasaé ben avorá o mantanté uno. Mai fara vara seyo, Tiyarafenu ano setin tú bá inin má esantakhen pasen pefái minó afová ukhen mino.   
\p
\v 21 \x * \xo 3:21 \xt Ibu 4:16\x*Téi ma sinunu ukheruna sirona kéka soe, setin tú bá inin má ano sisimen ma ída umeí ukha ono ma sin nain manon ákona simintí ída feran kasaé Tiyarafenu avorá o mantá tifanté uno.  
\v 22 Mantakhé oo yaiyiyáké béi ma amusin ukhein danasinta anan bariyá tifékun pasen mi inan ma senuna yaná kasaen timinten mino.  
\v 23 \x * \xo 3:23 \xt Yon 6:29; 13:34\x*Béi ma sikheiní esá ben anin Yisas Karaisin avíká mumunan iyá ena nanin banta vasá avábá in maran ó tifano. Máan ma in avúavái veni man baya van mino.  
\v 24 \x * \xo 3:24 \xt 1Yn 4:13\x*Tiyarafenui man baya ánain ma vákuriyain kayo anon béin má manafin bákan inká béi vetin má ban mino. Kantá Aunan ma setin timikhein manon aní íkái Tiyarafenu ano setin má ban mino sé afová ukhé tiféuno.   
\c 4  
\s1 Kampun Sakhanampa Vanta Kayoi Vaya Ma Yaíden Afová In Baya Ino  
\p
\v 1 \x * \xo 4:1 \xt Mat 7:15; 1Te 5:21; 1Yn 2:18; 2Yn 7\x*Téi ma sinunu ukheruna sirona kéka soe, Kantá Aunan manon ákona simiyá baya siyá uno ma siyain kéká mai Tiyarafenu fintesá mai aunan erikhan ná tiyan nafino van daíde afová ure vá mumunan ono. Mai fara vara seyo, kokhon kampun sakhanampa vanta kayo ano ma varará orera ukhen mino.  
\v 2 \x * \xo 4:2 \xt 1Ko 12:3\x*Yisas Karaisin nan ma sian amá iyáken barará bantaí uven mi afoká ukhan mino ma sin nain sakhanampa vanta van mi Tiyarafenui Aunan mái van mino seya afová in nono.  
\v 3 \x * \xo 4:3 \xt 1Yn 2:18\x*Máan tin nompo Yisas Karaisin nan ma ída máan baya sin nain banta mai véi ída Tiyarafenu vaípáké erikhen mino. Máan banta van mi Yisas Karaisin ma namuroí uantan aunan má ma varará afoká inten ne sen pefá tiami inikharé en nan mai vanta inka e van mino.   
\p
\v 4 \x * \xo 4:4 \xt Mat 12:29; 1Yn 5:4-5\x*Máan tukhen mifo séi ma sinunu ukheruna iyampon kayo oe, siretí ankan Tiyarafenu inan bákeya mai ma kampun sakhanampa vanta kéká bá ma aruviyá eona inka vetin esantakha ono. Mai fara vara seyo, siretí ankampin ma vain Aunan manon ma varafin ma vain aunan esantaren kákaní ukhen mino.  
\v 5 \x * \xo 4:5 \xt Yon 8:47; 15:19\x*Mai ma Tiyarafenui fura vayan tiamiyá uno ma siyain nanin banta mai ma vara rákena kékái váken ma vara rákena afova fói vanasi siamíkan iniren mai vaya ánain bákuriyan mino.  
\v 6 Máan tiyan mifo setí ankan Tiyarafenu inan báken mi véin ma afová ukhein kéká anon tetinti vaya iniyan mino. Inká Tiyarafenu ina ma ída vanten mai seti ma siamenuna vaya ída ininten mino. Máan ma in nain avúavákái ma fura Aunan mái van mino sé inká ma kampun aunan mái van mino sé uré afová ó tifanté uno.   
\s1 Ena Vá Ma Avábá In Maran In Baya Ino  
\p
\v 7 Téi ma sinunu ukheruna sirona kéka soe, ena vá ma anunu in maran in avúavá mai Tiyarafenu finté erikhein mifo erí máan avúavá ana vá baré oriyá bá tifano. Ena van ma anunu in nain mano mai véi Tiyarafenu fintéi afoká ukhen inka véin afová ukhen mino.  
\v 8 Máan tukhen mifo mana ano ma ena van ída anunu inten mai véi ída Tiyarafenu afová inten mino. Mai fara vara seyo, anunu ma in avúavái anan Tiyarafenu van mino.   
\p
\v 9 \x * \xo 4:9 \xt Yon 3:16\x*Tiyarafenu ano ma setin nan anunu ukhein mi aníen be Anin mana iyampon uró tiantan ma varará eren mino. Béin pinté uaren ayun ma fara van oriyan ban aunan barano van mi máan ten mino.  
\v 10 \x * \xo 4:10 \xt Rom 5:8-10; 1Yn 2:2\x*Teti ankan ma Tiyarafenu van tinunu iyá tiferuna vara siya raumpo mai ma véi ano seti nan anunu iyan ma ve Anini furimpó ma setisi ume ampisintákein nan mi siyá uno.   
\p
\v 11 Téi ma sinunu ukheruna sirona kéka soe, Tiyarafenu ano ma setí ankan nan máan anunu ma iyantisá máan mana erá ena van anunu in maran ná ó tifano.  
\v 12 \x * \xo 4:12 \xt Yon 1:18\x*Mana ano ída Tiyarafenu onté iyan mifo setí ankan ma ven anunu in maran ma é tifékun maen mi Tiyarafenu ano setin má e váken tetin pinté uaren ena ma anunuin avábá maman kákaní inten mino.   
\p
\v 13 \x * \xo 4:13 \xt 2Ko 1:22; 1Yn 3:24\x*Tiyarafenu ano setin má báken tetin nan beni avúavá ánain bákurino van mi vei Kantá Aunan tetin timikhá mai afová ukhé tiféuno.  
\v 14 Barará nanin banta aya uren evaránen avirano van ma ve Afóe ano ve Anin tiantan ma erakhá ein mai seti suufó ontaréi sian amá iyá uno.  
\v 15 Yisas Karaisin nan ma Tiyarafenu Anin mino ma siren tian dákó inain nanin banta vái Tiyarafenu ano manafin bantin mai kayo ano veni avúavá ánain bákurinten mino.  
\v 16 Tiyarafenu ano ma setin nan moéken anunu ukhein mai afová ukhé tiféi véimpin ákona inin kaiyá tiféuno.  
\p Avábá in avúavá anan Tiyarafenufin bákan mi avábá aúpin ma vain kéká anon Tiyarafenufin bákan inká betimpin béi van mino.  
\v 17 Tiyarafenui avúavá ánain ma vákuriyá tiferuna anon ena ma avábá uantan avúavápin moéké ákona iyá tiféuno. Máan tukhein nan mi vanasi ma yaimin nain damú ida feran kasaé ben avorá o mantá tifanté uno. Mai fara vara seyo, ma varará ma váké maé Yisas Karaisini avúavá ánain mi vákuriyá tiféuno.   
\p
\v 18 Máan anunu ma in manon ída feran bantin inká puntákein avúaváká ma anunun in manon minó peran avúavá do maman karúdanten mino. Mai ma yaimin nain damu san ma iniré tikhokho van é tifékun maen mai anon aníen tetimpin beni anunu ano ída ákona ukhen nen tinten mino.  
\v 19 Tiyarafenu ma esé araíintá tetí ankan nan anunu ukhein nan mi setí ankan ena vá anunu in maran iyá tiféuno.  
\v 20 Mana vanta ano ma ve ayofi afá aváen nan ma ída anunu iyáken ma Tiyarafenu van tinunu iyá uno ma sinten maen mai véi kampun banta ino. Mai fara vara seyo, setí ankan ma oniyá tiferuna siyofi sifá tiváen ma ída sununu ó tifanté mai ma ída oniyá tiferuna Tiyarafenun inté uresá tinunu ó tifante rafuno.  
\v 21 \x * \xo 4:21 \xt Mak 12:29-31\x*Tiyarafenu ano ma man bayan timikhen mino. Tiyarafenun nan ma anunu inain mano vei ayofi afá aváeyan masá anunu ino.   
\c 5  
\s1 Tiyarafenu Anintá Ma Mumunaní Pákena Vaya Ino  
\p
\v 1 \x * \xo 5:1 \xt 1Yn 4:15\x*Minó ano ma Yisasin nan Tiyarafenu ano vei vanasi evaránen avirano van ma aní ukharé ein banta ino sen mumunan inten maen mai vetí ankan Tiyarafenu akhafana ino. Inká minó ano ma Tiyarafenu van anunu inten mai ven akhafana vá inan anunu inten mino.  
\v 2 Tiyarafenu van ma sinunu ó tifanté mai veni man baya ánain mi yakhafiyá ben akhafana vá inan tinunu iyáké afová iyá tiféuno.  
\v 3 \x * \xo 5:3 \xt Yon 14:15, 23-24\x*Tiyarafenu van ma anunu in nan ma siyain mai veni man baya ánain ma funtáden bákurin avúava san mi siyákan mai ída uman dakhen mino.  
\v 4 Mai fara vara seyo, Tiyarafenu akhafana ano ma Yisas Karaisintá mumunan intin maen betin ákona amintin ma vara ráke namu avúavá maman bararasí uren mantaan ákona inten mino.  
\v 5 Yisas Karaisin nan ma Tiyarafenu Anin mino siren mumunan ein kéká anon bara ráke avúavá bá ma aruviyaré ein maman bararasí uren mantaan ákona iyan mino.   
\p
\v 6 \x * \xo 5:6 \xt Yon 1:29-34\x*Yisas Karaisi ma monó non perein má daa unkamádantá ma vei nare vanaein má anon Tiyarafenu Anin muno sen aníen mifo non máa fo saino. Ída ino. Non má nare vá póké ino. Máan tukhan mi Kantá Aunan mano yere ma siyain mai fura vayan bákan tetin tisimiyan mino.  
\v 7 Kanú manaú daná anon Yisasin nan puran tino sen aní ukhen mino.  
\v 8 \x * \xo 5:8 \xt Yon 15:26\x*Mai yaná ma vain mai Aunan ban non ban nare van ukhen mino.  
\v 9 \x * \xo 5:9 \xt Yon 5:32-37\x*Tetí ankan ma vara ráke vantai vayará mumunan iyá tifé umpo Tiyarafenui vaya ano moéken kákaní ukhen mino. Para vara seyo, Tiyarafenu ano ve Anin nan mi sian amá uran ban mino.  
\v 10 \x * \xo 5:10 \xt Yon 5:36-40\x*Mai vaya van mi Tiyarafenu Anintá ma mumunan iyain kayo ano mai furan tikhen ne sen afová iyan mino. Mai fara vara seyo, ída ma mumunan iyain kayo ano Tiyarafenu van kampun banta inon tiyáken ben Anini vaya ma sian amá iyain nan ída mumunan iyan mino.   
\p
\v 11 Máan tiyan mi Tiyarafenu ano mai van tian amá ukhen mino. Be Anini avúavá ánain ma vákuriyá tiferuna kékái ayun ma fara van oriyan ban aunan Tiyarafenu ano simikhen mino.  
\v 12 \x * \xo 5:12 \xt Yon 3:36\x*Máan tukhan maen iye anó Tiyarafenu Anin maman aúpin dan ban nafi mai véi fara van aunan manten mifo Tiyarafenu Anin ma ída mantein mano mai aunan ída manten mino.   
\s1 Yoni Ma Kípan Bayafó Tian Ákona Ukhein Baya Ino  
\p
\v 13 \x * \xo 5:13 \xt Yon 20:31\x*Tiyarafenu Anintá ma mumunan ukheona kayo ano ayun para van aunan manté uno sire afová ono van mi ma vompon uvaman amé uno.  
\v 14 \x * \xo 5:14 \xt Yon 14:13-14; 1Yn 3:21-22\x*Tetí ankan ma ákonaé mumunan iyáké ma veni anunurá mana yana san inantékun maen béi setinti vaya ininten mino.  
\v 15 Inká béi inikhái inan tiyá uno ma siré afová iyáké ma inantenuna yaná mai véi kanaíen timinten mino sé afová ukhéi inanté tifanté uno.   
\p
\v 16 \x * \xo 5:16 \xt Mat 12:31\x*Tiretin pinté mana ano ma onesin e ayofi fi afá aváe fi ma furimpin ída ororen ukhein umeí ma iyanti vá amúkuantesin ná Tiyarafenu ano véin aunan ná amino. Inká purimpin ma aviren oré iyain ume váé iyan mifo mai ume ma variyain kéká amúkuantano vara siya rauno. Ída ino.  
\v 17 Minó namu avúavá ma vain mai ume ifo manáa ume kayo ano ída furimpin aviren oré iyan mino.   
\p
\v 18 \x * \xo 5:18 \xt 1Yn 3:9\x*Tetí ankan afová ukhé tifékun Tiyarafenui kékasí ma ukhein kayo ano ída umeí ana en oré iyan mino. Mai fara vara seyo, Tiyarafenu Anin manon betin pákaan ákona uren dafíkan mi Ban Anon mano ída kanaíen betí au aruvé iyan mino.  
\v 19 Tetí ankan Tiyarafenu akhafanan bá afová ukhé tifékun mi ma vara ma eúkukhein mai Ban Anoni ákona aránaópái vákan beni inintái minó daná bariyan mino.  
\v 20 Tetí ankan nan pura sikhein Tiyarafenu afová ino van mi ve Anin mano setin morun afova simikhá afová iyá tiféuno. Máan tukhái setí ankan ma ven Anin Yisas Karaisimpin baruna van mi Tiyarafenu fin bá tifere siyá uno. Beyáká anan pura sikhein Tiyarafenu váken ayun ma fara van oriyan ban aunan mi van mino.   
\p
\v 21 Téi ma sinunu ukheruna iyampon kayo oe, kampun ayarafenu kayo ano Tiyarafenui varu varen tiretí aúpin kumanin nafo yafían ná ákona ono.