\id ROM  - Amele NT and Genesis [aey] -Papua New Guinea 1997 (DBL 2014) 
\h ROM 
\toc1 Pol Uqa Jaqec Je Oso Rom Tamanec Jaqiaden 
\toc2 Rom 
\toc3 Ro 
\mt2 Pol Uqa Jaqec Je Oso  
\mt1 Rom Tamanec Jaqiaden  
\imt1 Aqunec Je  
\ip Pol uqa Kristen tamanec Rom bilegina eu nui feciadecnu gale don. Eunu uqa jaqec je i jaqiaden. Uqa nui feciadimei saen nag ageca bilimei Spen hatuna nui me je ono qasali madigiannu gale don. Pol uqa jaqec je ina Kraisnu me jeca wawaga meleec cobocca eunu uqana cisdoc eu camas sildi jaqen.  
\ip Casac Pol uqa feele adec je jaqimei uqa Rom tamanec eunu saen cunug Anut inondona ec jaqen. Odimei uqana je gug jaqen, eu odi, “Eu wawige meleen jic euna himec ege dana cajaca ititom Anut amegna tawoqona,” en. (Eu 1.17 feiga.) Odimei Juda danaca, Juda dana qee eundecca age cunug silail dana himec bilegina ec jaqen. Odimei Anutna kobol ititom eu dana Jisas Kraisnu waug meleena eu uqa Anut dana ititom ec maden. Odocob dana cunug Jisas Kraisnu wawaga meleena age ijanaga dana ititom adegina ec jaqen. (Eu 3.22 feiga.) Odimei dana Jisas Kraisnu waug meleecebfi uqa Kis Gun umei cebac bilec jic haun toodocnu Anut tulidocob cajena ec jaqen. (Eu 6.4 feiga.) Odimei Kis Gun dana eu cesuldocob silail kobolca, cal mecca ale dana eu cilehdu cofdocnu gagadicca qee nijina ec jaqen. (Eu 6.14 feiga.) Odimei dana eu uqa Anut melah osoca, Krais waliag osoca calena ec jaqen. (Age dac 8 feiga.) Dac 5-8na Pol uqa Anutna loo jena gugca, Kis Gun uqa dana cajaca Jisas Kraisnu wawaga meleena eu agena cebac bilec dunuh bilinaca eunu jaqen.  
\ip Dac 9-11na Pol uqana culumen osonu jaqen. Pol uqa Juda dana oso. Wele Anut uqa Juda dana cajaca age uqana ec maden. Euqa Juda mati bahic age Jisas hibemdoin. Odocobil Juda dana caja qee eundec mati bahic age Jisasnu wawaga meleeceb uqana calein. Pol uqa Juda age cahuldoin ec jaqen. Jisas uqa agena Krais, uqa agena Cahahaadec, euqa Juda age ceteh eu Anut uqa agenu muden eu qee felein. Euqa Pol uqa Juda dana cajaca ageha hibna Jisasnu wawaga meleeceb age uqana caloqagan eu cisdon.  
\ip Jaqec je i uqana cit qocna Pol uqa Kristen age adi coboqagannu jaqen. Kristen age wawaga meleecna cotogail nalunuga megina eu age mele bahic wawaga meleecna cotogail nalunuga meigale ec jaqen. (Eu 12.9 feiga.) Odimei uqa Anut cewel utocca, gabman ilo bisalu bilecca, wawaga meleec age cesuldocobdocobeigale euca eunu jaqen.  
\is1 Je Dunuhnu Dado Mec  
\io1 1. Aqunec je (1.1-15)  
\io1 2. Gug je: Ititom kobol eu Anutnadec (1.16-17)  
\io1 3. Dana caja cunug age ititom qee (1.18-3.20)  
\io2 A. Juda dana qeenu je (1.18-32)  
\io2 B. Juda dananu je (2.1-3.8)  
\io2 C. Libec je: Dana caja cunug (3.9-20)  
\io1 4. Anut uqa dana cajaca age ititom ec maden (3.21-5.21)  
\io2 A. Dana age ititom kobol eu Kraisna himec ogina (3.21-26)  
\io2 B. Dana oso uqa Kraisnu waug meleen uqa dana ititom (3.27-4.25)  
\io3 1. Dana age loo je toodu odocna ijanaga ititom qee ogina, age wawaga meleecna himec ijanaga ititom eu ogina (3.27-31)  
\io3 2. Anut uqa Ebraham dana ititom ec maden (dac 4)  
\io2 C. Dana ititom adi bilina (5.1-11)  
\io2 D. Libec je: Dana age ititom qee, euqa Anut uqa dana cajaca ititom bagol adena (5.12-21)  
\io1 5. Anut uqa dana cajaca ititom adeceb age Kraisca cebac bilegina (dac 6-8)  
\io2 A. Silail kobol eu dana cajaca ititom bilec qee cilehadena (dac 6)  
\io2 B. Anutna loo je eu dana oso uqa dana silail ec madena, euqa uqa Kraisca bilinafi uqa Anut amegna dana ititom bilina (dac 7)  
\io2 C. Dana cajaca ititom age Kis Gunna gagadic euna cebac bilegina (dac 8)  
\io1 6. Anutna kobol eu ititom: Uqa Juda dana cajaca hibemaden (dac 9-11)  
\io2 A. Anut uqa Juda dana cajaca hibemaden eu ceteh tutuc (9.1-29)  
\io2 B. Anut uqa Juda dana cajaca hibemaden eu uqana gug (9.30-10.21)  
\io2 C. Anutna hibemadec eu culumen ben bahic qee (dac 11)  
\io3 1. Anut uqa Juda dana cunug qee hibemadel (11.1-10)  
\io3 2. Anut uqa saen cunugna Juda dana qee hibemadeiaun (11.11-24)  
\io3 3. Anut uqa dana cajaca cunugnu waug qugian (11.25-36)  
\io1 7. Dana cajaca ititom agena coboc (12.1-15.13)  
\io2 A. Wawaga meleec age cotogail nalunuga meigale (dac 12)  
\io2 B. Wawaga meleec age dana cunug nalunuga meigale (dac 13)  
\io2 C. Wawaga meleec gagadicca age wawaga meleec gagadicca qee eu nalunuga meigale (14.1-15.13)  
\io1 8. Cit qoc je (15.14-33)  
\io1 9. Feele adec je (dac 16)  
\c 1  
\s1 Pol uqa uqana aposel uqa cabinu gug maaden  
\p
\v 1 Ija Pol, ija Krais Jisasna cabi dana. Anut uqa ija aposel cabi ocnu utati maten. Uqa Anutna me je maadec cabi ocnu abes miten.   
\p
\v 2 Wele bahic Anut uqana je hahun madec dana maadeceb age me je i jaqein. Me je i Anutna jaqec je gunna bilen.  
\v 3 Eu Anut Melahnu me je. Melah uqa Dewidna sihulnadec eu dana calen.  
\v 4 Odocob Anut uqa cal mecnadec tulidocob cajeceb Kis Gun uqa euna Anut Melah gagadic odocca eu ihacgen. Eu uqa Jisas Krais egena Tibud.  
\v 5 Ege Jisas Krais umna ege ijannu wawige meleeceb dana cajaca age mahana cunug bilegina eu me je maadocomun uqanu wawaga meleeceb uqa jejeg toodoqagannu eelgec uum igecca aposel cabi occa om.  
\v 6 Ageha am eu dunuh bilegina. Age Jisas Kraisna utaec dah mimeig age jejeg toodoin.   
\p
\v 7 Romdec dana age Anut agenu nalunuga mena eu age utaadeceb uqanu dana cajaca qagoc bilegina, eu age ija je i jaqiadigina. Anut ege Memigeca Jisas Krais Tibudca alena eelgec uum igecca malol bilecca adesiale.   
\s1 Pol uqa Rom tamanec meciadecnu waug nijen  
\p
\v 8 Ija je i casac maadigen. Dana cajaca age maha cunugna bilegina, age cunug wawaga meleecca bilegina eunu dogina. Eunu ija agenu Jisas Krais umna ijana Anut hetaga dugina.  
\v 9 Ija Anutna cabi gagadic ugina, eu Melahnu me je maadec cabi. Eu Anut uqa dona, saen cunug ijana inondocna age ijanaga ugina.  
\v 10-11 Ija dolonoga eeldocnu ceteh oso age wawaga gagadic mudigiannu ageca ehi ligennu gale tena. Eunu ija age meciadecnu wawi ben bahic nijia. Eunu Anut uqa cois ifei uqa ihoc jic ihacteceb ageca qila li caligen eunu ija gaid inondugina.  
\v 12 Ijana cisdoc eu odi. Agena wawaga meleec eu ija wawi gagadic mudigian. Odocob ija wawi meleec eu age wawaga gagadic mudigian.   
\p
\v 13 O wawaga meleec cotiel, age du cuhadoqagannu wawi nijia, saen geh bahic ija ageca ono lecnu madem. Euqa saen cunugna ceteh ijana jic aqatitoloi. Ijana cabi oc ija Juda dana cajaca qee eundec cesuladecemin age wawaga meleen, ija cabi eu age gemona odocnu age am leihha odi caloqagannu wawi nijia.  
\v 14 Anut uqa cabi iten, eu ija Grik danaca Grik dana qee eundecca, dana doc silecca ageca dana doc silecca qee ageca eu cunug cesuladoum.  
\v 15 Eunu ija Rom dana cajaca ageha me je qasali maadecnu wawi nijia.   
\s1 Me je eu Anutna gagadic odoc  
\p
\v 16 Ge, me je eu Anutna gagadic odoc dana cunug age wawaga meleec eundec cahahaadigiannu. Eu Juda dananu casac ihoc leceb Juda dana qee eundecnuha ihoc ligian. Eunu ija me jenu qee majani tena.  
\v 17 Ge, Jisasnu me jena Anut uqa ege dana cajacanu ititom ena eu adi odona eu ihacgena. Eu wawige meleen jic euna himec ege dana cajaca ititom Anut amegna tawoqona. Eunu ege wawaga meleen eunu Anut uqa ege dana cajaca ititom ecnu ihoc. Eu odi Anutna jaqec je madena:  
\q1 “Dana cajaca age Anutnu wawaga meleeceb  
\q2 Anut uqa dana cajaca eu ititom ec madeceb age cebac biluqagan,” ena. \rq (Habakuk 2.4)\rq*   
\s1 Dana cajaca cunug age Anut hibemdumeig silail mein  
\p
\v 18 Ege doqona, Anut gemag bec eu sao jobondec nimei camasac mena. Uqa dana cunug age silail mimi kobol me qee odogina eundec wadacdoc ameg me qee adenanu. Dana eu age silail megina euna mele je cilehdogina.  
\v 19 Anut uqa uqana kobol dana cunug wele ihacaden. Eu ageca camasac men. Eunu dana eundec cunug age Anutna kobol mati wele doin. Anut uqadodoc wele ihacaden. Euqa age uqa hibemdoin. Eunu uqa wadacdoc ameg me qee adena.  
\v 20 Wele bahic Anut uqa ceteteh cunug ifanen saen eunadec hocob qila dana age uqa ceteteh ifanen eu fegina. Ifan euna age Anutna jahunec kobol leih dana age docwe qee ec docnu ihoc. Eu Anutna ifan gug bahic odi fegina. Uqa uqana gagadic odoc odi bileceb catanena, uqa Anut bilia eu age docnu ihoc. Odinu dana eundec age agena cahuldoc jajahuni madi ija Anut qee hibemdolom, ija Anutnu qee dugina ecebilfi agena je eu cesuladecnu ihoc qee.   
\p
\v 21 Ge, age Anutnu dogina qa age uqa Anut bahic ec qee cisdoloin. Odimeig binan qee sululein. Odimeig age hegaga qee doloin. Age dalawan aqen. Odocob age agena cisdoc eu silecca qee mimi lecebil tu kauaden.  
\v 22 Age deboii madein, “Ege cisdocca,” ein qa eu age wele dalawan aqec jicna lein.  
\v 23 Odimeig age Anut bileceb catanenana binan sulegina eu hibemdoin. Odimeig age wadacdumeig dana cal menana kadan tibud hahunuga oin, odocob man fululec hahunuga oin, odocob dool hahunuga oin, odocob man sononec hahunuga oin, ceteteh eu binanaga sulein.   
\s1 Dana cajaca cunug age kobol me qee mati bahic odoin  
\p
\v 24-25 Eunu dana cunug age Anutnu mele je culimeig uhulec je oin. Odocob eu age Anut hibemdumeig ceteh Anut ifanen eu binan sulegina, odimeig ceteh eu cewel utogina. Euqa Anut ceteteh cunug ifanen eunu dana ege Anut binan sulocomun cataneiale! Mele. Eunu Anut uqa felacadeceb agena gale adec me qee wawagana nijia eu diadeceb age silail mimi coboin, odocob agedodoc dewenegana kobol gegehinca mudein.   
\p
\v 26 Dana age Anut hibemdoin eunu Anut uqa felacadeceb age agena gale adec me qee toodudu kobol gegehinca odogina. Agena caja age danaca nijec kobol me eu culimeig age wadacwuducdumeig cajaca nijec kobol me qee eu oin.  
\v 27 Odocob danaha age cajaca nijec kobol me eu culimeig age danaca nijec kobol me qee eu wawaga dunuh ja cinigwe cajeceb odi odoin. Dana age kobol majanagaca dana gami odogina. Odimeig agedodoc ameg me qee agena kobol me qeenu wadacdoc ihoc ogina.   
\p
\v 28 Agena cisdocna Anut hewecnu culadein, odocobnu Anut felacadeceb agedodoc agena cisdoc me qee toodogina. Age kobol filfil dana odocwe qee eu odogina.  
\v 29 Age kobol cunug odogina eu me qee himec. Kobol me qee eu cunug dana wawagana am ben. Odocob age kobol qisol mec bahicha odogina, dana osona ceteteh ocnu amaga qona, cad kobolha sulegina. Odocob age dana ceteteh gehca eundec waug me qee migianna isec odogina, age dana qagadogina, gaucgauc gemanaga bena. Odocob age uhulecna dana osona ceteh ogina, age dana me qee mudecnu cabi ogina. Odocob age dananu je me qee hibilemega madegina.  
\v 30 Odocob oso ijan me qee mudecnu je amemeg qasali madegina. Age Anut sagagdogina, odimeig lelandudu cobogina, deboeeig agedodoc binanaga sulegina. Age kobol me qee ifanegina. Age memegail anagailca agena je qee toodogina.  
\v 31 Age cisdocca qee. Age madegina qa agedodoc agena je qee toodogina. Agena sihul eundecnu wawaga lal qocca qee. Age dana osonu qee waloc adena.  
\v 32 Age Anutna loo je dana eundecnu maden eu dogina, “Dana kobol eu odi odogina age cal moqagan,” en. Dana eu age loo je eu odi maden ec du cuhadogina qa age kobol me qee eu odi oodi nijegina. Age eu odi himec qee odogina qa age leih odogina ha binanaga sulegina.   
\c 2  
\s1 Anutna gesilec eu tutuc bahic  
\p
\v 1 Eunu dana cunug age dana gesiladegina, age agena cahuldoc jajahuni madi, ija Anut qee hibemdolom ecebilfi agena je eu cesuladecnu ihoc qee. O dana, ija age osolosol maadigina. Dah maga, hina dana oso gesildogona eu uqana kobol hina himec kobol eu odi odogona. Eunu hina gesildoc dana eu odi odogona eu hinadodoc dewen jeca muduguna.  
\v 2 Ege doqona, Anut uqa ameg me qeena dana kobol odi odogina eundec wadacadena. Odocob Anut dana eundec ameg me qee wadacadena eu gesilec tutuc bahic.  
\v 3 Odocob hina dana leih kobol odi odogina eu gesiladagana qa hinadodocha odi odogona hina adi cisdogona? Hina Anut ameg me qee wadacdoc qee gulucdogaun ec cisdogonafo? Qee bahic! Hina Anut ameg me qee wadacdoc gulucdogan.  
\v 4 Anut uqa hina me bahic odihina odimei saen cecelac sumihina, odocob ameg me qee mahuc qee ihina. Anutna kobol me bahic eu ceteh gauc himec ec cisdogonafo? Anutna kobol me bahic eu hina wawin tului falicdocnu acahna eu hina qee dogonafa?  
\v 5 Euqa hina wawin eu gagadic bahic odocob hina wawin qee tului falicdogona. Kobol eu odina hinana wadachec ameg me qee haudocwe magana. Odocob Anutna gemag bec camasac migian deelna uqana gesilec tutuc deel euna hinana wadachec ameg me qee ogan.  
\v 6 Anut uqa  
\q1 “dana cunug agena odocnana gesiladimei ameg wadacadigian,” en. \rq (Buk Song 62.12; Sindaun 24.12)\rq*   
\m
\v 7 Leih age kobol me eu gagadic hewegina oodoig kobolkobolca ijanaga benca biluqagannuca cebac bilec qee mecwe qee eu megegina. Dana eu agenu Anut uqa cebac bilec gaid bileceb catanigian eu adigian.  
\v 8 Odocob leih age agedodocnu himec cisdogina, odimeig mele je eu hibemdogina, odimeig kobol me qeena jic eu toodogina Anut uqa dana eundecnu gemag beceb ameg me qee bahicna wadacadigian.  
\v 9 Culumen ben sogoecca eu dana kobol me qee odogina eundec cilehadigian. Juda dana age casac ocobil Juda dana qee eundec ageha oqagan.  
\v 10 Euqa dana cunug age kobol me odogina eu Anut uqa kobolkobolca binan benca wawaga malol bilecca eu adigian. Juda dana eu age casac adeceb Juda dana qee eundec ageha adigian.  
\v 11 Ge, mele Anut uqa dana ijancanu cisdudu qee gesilina. Uqa dana cunug age ijanagacafo, qee ijanagaca qeefo ihocihoc cisdudu gesilina.   
\p
\v 12 Eu odi. Dana cunug age Mosesna loo je qee dodoig silail megina eu age loo je qee dodoig fadaloqagan. Odocob dana cunug age loo je dodoig qa silail megina eu Anut uqa loo jena gesiladigian.  
\v 13 Dana age loo je gauc dah megina age Anut amegna ijanaga dana ititom qee. Dana loo je toodu odogina age dana ititom ijanaga eu oqagan.  
\v 14 Juda dana qee eundec age Mosesna loo jeca qee, sihul euqa age leih loo je toodu odogina. Dana eu age loo jeca qee age odi odocobil agena toodu odoc eu agedodocna loo je cinigwe.  
\v 15 Agena odocna loo jenu odoc Anut wawagana jaqen taweia eu camasac men. Odocob agena cisdoc silec ihulahal calena odocob saen leih kobol odogina eunu cois ec madeginafo, qee cois qee ec madeginafo.  
\v 16 Eunu ija me je madigina euna deel osona hibna Anut uqa Jisas Krais umna dana cunug agena cisdoc jahunec nijina eu gesiladigian.   
\s1 Juda dana age loo je himec cesuladigiannu cisdogina  
\p
\v 17 Euqa hina Juda danafi hina adi biliga? Hina loo jenu wawin meleecca eu hina gesilhec saenna ihoc cesulhigian eu odi cisdogona. Hinadodoc binain susuleg madagana, “Ija Anutna dana,” agana.  
\v 18 Hina Anutna cisdoc gale doc eu dogona. Hina loo je eu wele iwaldom eunu hina kobol me himec gale hena.  
\v 19-20 Hina gaid odi cisdogona, “Ija wele loo je iwaldom, odocob ija doc gug mele jeca ha om. Eunu ija ihoc dana amaga galuc mec jic iwaladigen. Ija dana tucana bileig agena fulacdoc. Ija dana docca qee eundec iwaladec dana. Ija mel simsim agena iwaladec,” dogona.  
\v 21 Mele hina dana leih iwaladagana qa hinadodoc ha qee iwaldogonafo? Hina oso heje cain ogaun ec madodog qa hina heje ogonafo?  
\v 22 Hina oso hina dana osona cajaca cain nijuwasin ec madodog qa hinadodoc dana osona cajaca nijesinafo? Hina uhulec kadan tibud qee gale hena qa hina kadan tibud agena cuha jonana ceteteh heje cedaganafo?  
\v 23 Hina hinadodoc binain susuli madagana, “Ija Anutna loo je dugina,” agana qa hinadodoc loo je tefacdogona, odocob kobol euna hina Anut ijan me qee mudugunafo?  
\v 24 Mele eu Anutna jaqec je odi madena:  
\q1 “Juda dana age agena cahuldocna himec Juda dana qee am gemona Anut ijan qesaldogina,” ena. \rq (Aisaia 52.5; Esekiel 36.22)\rq*   
\s1 Deweg ganac cagoc kobol tutuc eu odi  
\p
\v 25 Hina Mosesna loo je toodu odifeg hinana dewen cagu qoc kobol eu kobol me bahic. Euqa hina loo je tefacdufeg dewen cagu qoin eu kobol dewen cagu qee qoc cinigwe.  
\v 26 Eunu dana deweg cagu qee qoc uqa loo je gadac uqana kobol ititom bahic toodufei dana eu uqana deweg cagu qee qoc eu deweg cagu qoc kobolwe caligianfo?  
\v 27 Odocob dana age dewenega cagu qee qoc qa loo je toodu odogina eu age hina dewen cagu qocca loo jeca qa loo je qee toodu odogona eu gesilhoqagan.  
\v 28 Dana oso uqa deweg himec uqa Judafi uqa eu Juda bahic qee. Odocob dewenega cagu qoc kobol eu dewenegana ceteh himec qee.  
\v 29 Dana uqa waugna uqa Juda ena eu uqa Juda bahic. Odocob dewenega cagu qoc kobol eu wawagana ceteh. Eu loo je jaqec gadac himec toodocnu ceteh qee. Eu Anutna Kis ceteh jaqunec. Dana uqa waugna uqa Juda ena eu uqa dana amagana binan sulec qee ona qa uqa Anut amegna binan sulec ona.   
\c 3  
\s1 Kobol me qee eu kobol me wooldoc ihoc qee  
\p
\v 1 Juda dana age cel jicna Juda dana qee eundec wooladegina? Cel ceteh me eu dewenega cagu qoc kobolna calena?  
\v 2 Ese, ceteteh me bahic mati calen. Casac ceteh me bahic oso eu odi, Anut uqana je Juda cofdoqagannu aden.  
\v 3 Mele, leih age je eu qee toodoloin. Euqa eu adi? Age Anutna je qee toodoloinfi Anut uqaha uqana je qee toodoiaunfo?  
\v 4 Qee bahic! Anutna jaqec je odi madena:  
\q1 “O Anut, hinana je cunug eu mele bahic  
\q2 dana cunug eu fegina.  
\q1 Odocob hinana je eu gesilifeig  
\q2 hinana je eu tutuc himec foqagan,” ena. \rq (Buk Song 51.4)\rq*  
\m Eunu dana cunug age uhulegina qa Anut uqa himec saen gaid je mele madena.   
\p
\v 5 Odocob eu adi? Egena kobol tutuc qee eu Anutna kobol tutuc bahic eu camasac mudecebfi ege adi madeqan? Ege madi, Anut ameg me qee wadacgena eunu uqana kobol eu tutuc qee, eqanfo? (Ija danana cisdoc himec toodudu madiga.)  
\v 6 Qee bahic! Anut uqa ititom qeefi dana cajaca agena kobol adi gesiligian?  
\v 7 Dana leih age madegina, “Ijana uhulec je Anutna je mele camasac mudecebfi odocob eu uqa binan sulec mahamaha ihoc lifei uqa cain gesiltimei ija silail dana imei ameg me qeena wadacteiaun,” egina.  
\v 8 Odocob dana oso madigian, “Ege kobol me qee odoqa qa odocob kobol me euna caligian,” igian. Eu dana leih age ijanu um qu mamadi ijana me je madec eunu je me qee i ec madegina. Dana eu age wadacadec ameg me qee oqagan eu mele bahic.   
\s1 Dana ititom oso qee bilel  
\p
\v 9 Odocob eu adi? Ege Juda dana Juda dana qee eundec wooladecfo? Qee bahic! Ija wele maadiga, silail ege dana cunug cilehgen, Juda danaca Juda dana qee eundecca cunug.  
\v 10 Anutna jaqec je odi madena:  
\q1 “Ititom coboc dana oso maha ina qee bilel.   
\q1
\v 11 Dana oso uqa fogo docca qee.  
\q2 Oso uqa Anut megec cabi qee ona.   
\q1
\v 12 Cunug age jic me eu culein.  
\q2 Cunugca odi age dana me qee bahic calein.  
\q2 Osol oso ha kobol me qee odona. \rq (Buk Song 14.1-3; 53.1-3; Saveman 7.20)\rq*   
\q1
\v 13 Age conoga eu qalqal heel cebec cinigwe.  
\q1 Age beilamagana age uhulec je madegina. \rq (Buk Song 5.9)\rq*  
\q2 Age biamaga dunuh eu man sononec agena ceeh sahalic me qeeca. \rq (Buk Song 140.3)\rq*   
\q1
\v 14 Age je me qee gulihinca conogana gaid madegina. \rq (Buk Song 10.7)\rq*   
\q1
\v 15 Age dana qagadocnu mahuc bahic gugulegina.   
\q1
\v 16 Saen cunug age ceteteh me qee mumudi culumen geh dana adegina.   
\q1
\v 17 Age dana malol bilec kobol qee toodogina. \rq (Aisaia 59.7-8)\rq*   
\q1
\v 18 Age Anutnu cumunec nag odi qee dogina,” ena. \rq (Buk Song 36.1)\rq*   
\p
\v 19-20 Odocob ege doqona, Mosesna loo je eu uqa egena silail eu himec ihacgena, eunu dana oso uqa ija dana ititom ec madecwe qee. Eunu cel je loo je madena eu dana cunug age je madecwe qee bilimeig dana maha cunugnadec ege Anut amegna cahuldocca biluquna ec madoqagannu eu dana loo je bisalu bilegina eu age maadena.   
\s1 Dana oso uqa Kraisnu waug meleen uqa dana ititom  
\p
\v 21 Qilaqa Anutna kobol uqa ege dana cajaca ititom ec madena eu camasac men. Eu loo je toodoc jicna qee calel. Eu jic filna calen. Odon qa je eu je hahun madec danana jaqec jenaca Mosesna jaqec jenaca nijia eu Anutna kobol ititom inu je camasac madena.  
\v 22 Anutna kobol ititom eu odi. Dana Jisasnu waug meleena eu uqa Anut dana ititom ec madena. Odocob dana cunug Jisasnu wawaga meleena age ijanaga dana ititom adegina. Anut uqa dana am cunug odi odona eu odoc filna qee odona.  
\v 23 Ge, ege dana cunug ege silail mom eunu ege Anutna fulacdoc ben eu ocwe qee.  
\v 24 Anut uqa eelgec uum igina. Uqa Jisas Krais golacna ege fajigen euna himec uqa ege dana ititom gena.  
\v 25 Anut uqa gemag bec gondocnu Jisas Krais ihandon. Eunu uqa cal meceb uqa golacna dana uqanu wawaga meleena eundec agena silail cagasiadigiannu nesili ehuden. Anut uqa dana weledec camuhulaadei agena silailnu mahuc ameg wadacadecnu qee cisdoloi. Eunu Anut uqa odonna uqana kobol ititom eu camasac ihacgen.  
\v 26 Qilaqa uqa dana agena silailnu cisdona. Eunu uqa uqana kobol ititom eu qila camasac mudigia odona. Eu odina Anut uqa uqadodoc eu ititom bahic ihacgena, odocob dana Jisasnu waug meleena uqaha Anut dana ititom dona.   
\p
\v 27 Eunu egedodoc binanige sulecnu ihocfo? Qee bahic! Jic eu wele menen. Eetana jic eu menen? Acahna loo je toodu odoc kobol euna jic eu menenfo? Qee bahic! Wawige meleec euna jic eu menen.  
\v 28 Ge, ege odi cisdoqona, wawige meleecna himec dana uqa ijan ititom eu ona. Uqa loo je toodu odocna ijan ititom qee ona.   
\p
\v 29 Eu adi? Anut uqa Juda dana agena himecfo? Uqaha Juda dana qee agena Anut qeefo? Ese, uqaha Juda dana qee eundec agena Anut.  
\v 30 Anut uqa osol himec. Odocob Anut uqa dana age deweg cagu qoc agena wawaga meleecna age dana ititom ec adigian. Odocob uqa dana age deweg cagu qee qoc agena wawaga meleecna ageha dana ititom ec adigian.  
\v 31 Eunu ege wawige meleenafi ege loo je hibemdoqonafo? Qee bahic! Ege wawige meleenafi ege loo je eu hehdocomun gagadic tawena!   
\c 4  
\s1 Anut Ebraham dana ititom ec maden  
\p
\v 1 Ebraham uqa dana ege cinigwe odocob uqa ege Juda jajanige. Eunu ege uqanu cel ecnu?  
\v 2 Ebraham uqana tutuc cobocna Anut uqa dana ititom ec madoubmi uqa cetehnu culaecnu ihoc qa Anut amegna culaecnu ihoc qee.  
\v 3 Anutna jaqec je adi madena? Eu odi madena:  
\q1 “Ebraham uqa Anutna jenu waug meleen.  
\q1 Odocob Anut uqa uqana waug meleec fimei dana i ititom ec maden,” ena. \rq (Jenesis 15.6)\rq*   
\m
\v 4 Odocob dana oso uqa cabi uu cabi ameg onafi ameg eu ege bagol himec qee oqona. Uqa cabi ona eunu cabi ameg ona.  
\v 5 Euqa dana oso uqa ititom coboc cabi qee ona qa uqa Anutnu waug meleena, Anut eu uqa silail mec dana eu uqa dana ititom ec madena. Dana eu uqana waug meleec Anut fena eunu uqa dana ititom ec madena.  
\v 6 Odocob Dewid uqaha dana eunu je maden. Dana uqa ititom coboc cabi qee ona qa uqa waug meleena eunu Anut uqa dana eunu dana ititom ec madena eu uqa ceelecca biligian.  
\v 7 Dewid uqa odi maden:  
\q1 “Dana cunug Tibud agena cahuldoc cagasiadimei  
\q2 agena silail jahunaden eu age ceelecca biluqagan.   
\q1
\v 8 Dana oso Tibud uqa uqana silail qee sanijiaun  
\q2 eu ceelecca biligian,” en. \rq (Buk Song 32.1-2)\rq*   
\p
\v 9 Ceelec eu dana dewenega cagu qoc eundec agena himecfo? Qee bahic! Eu dana dewenega cagu qee qoloin eundec agena ha. Ege Anutna jaqec je wele madom eu odi madena, “Ebraham uqa Anutna jenu waug meleen. Odocob Anut uqa waug meleec fen eunu uqa dana ititom ec maden,” ena.  
\v 10 Aria, Ebraham adi bibilen Anut uqa dana ititom ec maden? Uqa deweg cagu wele qonfo, qee cagu qee qolfo? Eu mele, Ebraham uqa deweg cagu qee qoc bibilen Anut uqa dana ititom ec maden.  
\v 11 Wele bahic saen uqa deweg cagu qee qoc bibilen uqa Anutnu waug meleen, eunu Anut uqanu dana ititom ec maden. Odocob eu uqana gadac Anutnadec on sisi mec eu dewenega cagu qoc kobol. Eunu Ebraham uqa dana cunug age dewenega cagu qee qoloin qa age Anutnu wawaga meleeceb Anut uqa eu age dana ititom ec maden eu agena aquniadec memega.  
\v 12 Odocob Ebraham uqa dana dewenega cagu qoc euha uqa memega. Euqa dana dewenega cagu qoc himecha qee. Uqa eu dana dewenega cagu qocca, odocob uqa jaih ceen toodudu wawaga meleena saen uqa wele deweg cagu qee qoc bibili odon odi.   
\s1 Anutna je hahun uqa wele maden eu uqana ameg dana cajaca cunug age wawaga meleena eu age oqagan  
\p
\v 13 Anut uqa Ebraham muguh mec je madi madon, “Hinaca asinel hibna bahic cali hoqaganca age mahamaha cunug oqagan,” don. Ebraham uqa loo je toodon eunu Anut odi qee madel qa uqa Anutnu waug meleeceb Anut uqa dana ititom ec maden eunu age mahamaha cunug oqagan ec maden.  
\v 14 Eu odi. Dana age loo je toodogina eu himec mahamaha cunug ufeig wawaga meleec kobol eu gugca qee, odocob Anutna muguh mec je maden euha uqana gagadic odocca qee.  
\v 15 Ege doqona, dana age loo jeca bileginafi age loo je tefacdogina. Eunu Anut uqa gemag bena. Euqa Moses uqa loo je qee jaqecebfi dana age loo je qee tefacdogina.   
\p
\v 16 Je hahun Anut Ebraham madon gug eu waug meleec. Eunu je hahun eu uqana aig qoc eu gagadic odocca bibileb Anut uqa eelgec uum igec bagolwe Ebraham uqana sihul cunug hibna cali hoqagan eu mahamaha cunug adigian. Je hahun eu dana cajaca age loo je hewegina eu agena himec qee qa dana cajaca Ebrahamna waug meleec jic toodogina eundec cunug agena. Ebraham uqa ege memige matu.  
\v 17 Anutna jaqec je eu odi madena:  
\q1 “Ija dana am hatuhatunadec age memega mihiga,” ena. \rq (Jenesis 17.5)\rq*  
\m Je hahun eu Anut amegna bahic taweia.\f + \fr 4.17 \ft Grik je i uqana gug eu camasac bahic qee. Falicdoc je fil osoha nijia eu odi: Uqa Anut amegna ege memige bilia.\f* Odocob Ebraham uqa Anutnu waug meleen. Anut eu uqa cal mec dana cebac bilec kis haun adena, odimei uqa ceteh qee calel eundec utaadeceb eu calena.   
\p
\v 18 Ebraham uqa Anut ceteh odigiannu maden eu jic qee fel qa dana jic wele fen cinigwe uqa waug mele bahic en. Eunu uqa dana am hatuhatunadec agena memega matu caligian eunu waug meleen. Eu odiwe Anut madon:  
\q1 “Hinana sihul age hibna odi cali hoqagan,” don. \rq (Jenesis 15.5)\rq*   
\m
\v 19 Ebraham uqana cabi gel eu cabi gel 100 odi, eunu uqa deweg ganac eu cal mecwe ec cisdon. Odocob Sera uqa goud bilen. Ebraham uqa eunu cisdon qa uqana waug meleec eu gagadic bahic tawen.  
\v 20 Anut uqa ceteh hib cali hugiannu maden qa Ebraham uqa je hahun eunu waug lecisca qee mel. Uqana waug meleec eu gagadic hewen. Odocob uqa Anut binan sulec qee culoloi.  
\v 21 Odocob uqa Anut madon eu odocob aig camasac migian eu wele don.  
\v 22 Eunu Anut uqa Ebrahamna waug meleec euna uqa dana ititom ec maden.  
\v 23 Euqa je eu Anutna jaqec je taweia Anut uqa uqanu maden eu, “Uqa dana ititom,” en eu uqa Ebrahamnu himec qee madel.  
\v 24 Jaqec je eu egenu ha madena. Ege Anut uqa Jisas egena Tibud cal mecnadec tulidocob cajennu wawige meleena euha Anut egenu dana cajaca ititom ec madena.  
\v 25 Anut uqa Jisas suldocob nimei egena silailnu cal men. Odocob Anut ege dana cajaca ititom ec magigiannu uqa Jisas cal mecnadec haun tulidocob cajen.   
\c 5  
\s1 Anut qila ege dana cajaca ititom ec madena  
\p
\v 1 Egena wawige meleecna Anut ege dana cajaca ititom ec madena. Eunu Jisas Krais Tibud odigeceb ege Anutca malol biluquna.  
\v 2 Ege Jisas Kraisnu wawige meleennu uqa Anutna eelgec uum igecna ehigi ahon. Odocob ege Anutna eelgec uum igec euna qila biluquna. Odocob ege Anutna kobolkobol oqannu wawige meleeceb susumudi biluquna eunu ege culaoqona.  
\v 3-5 Odocob ege eunu himec ceelecnu qee nijel. Odocob Anut uqana Kis Gun ege igina eu odigeceb Anut nalunige mec ege wawigena basecdona. Eunu ege culumen egeca caleginanu ha culaoqona. Ege culumen eu ege wawige gagadic mudina eu doqona. Odocob ege wawige eu gagadic tawecebfi ege dana temdocna gagadic tatawi culumen gahidoc kobol camasac mudina eu doqona. Odocob ege culumen gahidu wooldufob ege wawige meleeceb Anut ceteh cunug igigiannu saciadon eu susumudi biluquna. Eunu ege ceteh saciadon eunu wawige meleeceb ceteh eu susumudi bilifob ege eunu gauc qee susumudi biluquna.   
\p
\v 6 Wele ege egedodoc cesulgecnu gagadic odocca qee bibiluqun saen Anut maden euna himec Krais uqa ege dana Anut hibemdom eundec ceseli cedgigiannu cal men.  
\v 7 Dana oso uqa dana ititom coboc cesuldugiannu cal mecnu qee nijel. Mele, ege oso acahna ihoc waug gagadic mudimei dana me oso cesuldocnu cal migianfa.  
\v 8 Euqa ege silail dana bibiluqun Krais cesulgigiannu cal men. Odoc euna Anut ege nalunige mena eu ihacgena.  
\v 9 Krais uqa cal meceb uqa golacna Anut ege dana cajaca ititom ec ijanige wele qon. Eunu ege qila tutuc bahic doqona, eu ege gehgeh cesulgigian, odocob ege Anutna gemag bec qee gulucdoqaun.  
\v 10 Ge, wele ege Anutca cad bibiluqun saen euna Anut Melah cal men euna uqa cad kobol eu qee mudimei Anut egeca tanawigen. Eunu qila ege Anutca tanawigec biluqa euna Anut uqa Melah cebac bilecna ege cahahagigian eu tutuc bahic doqona!  
\v 11 Eu odi himec qee. Egena Tibud Jisas Krais uqa odigeceb ege Anutca tanawigen eunu qila ege Anutnu ceeloqona.   
\s1 Adam uqa cal mec gug qa Jisas uqa cebac bilec gug  
\p
\v 12 Ege doqona, dana osol uqa silail men, odocob kobol euna silail maha ina calen. Odimei cal mec u ahon. Eunu dana cunug age silail meinnu cal mec dana cunug cedena.  
\v 13 Mele, loo je qee calec saen euna silail maha ina nijen. Euqa loo je euca qeefi Anut uqa silail osolosol qee sanijina.  
\v 14 Euqa Adamna saennadec ninijen hu Mosesna saenna cal mec eu dana cajaca cunug agena cilehadec bilen. Mele, dana cajaca leih age Adam loo je tefacdon odi qee tefacdoloin qa cal mec eu ageha agena cilehadec bilen.  
\p Adam uqa eu dana hib caligian uqanu hahun ihoc men.  
\v 15 Euqa Anutna eelgec uum igecca Adamna silail mecca ceteh lecis eu ale eu caca qee. Eu mele, dana eu uqana silail mennu dana cajaca mati bahic age cal mein. Euqa Anut uqana eelgec uum igec eu wooldona. Odocob dana osol, Jisas Krais, uqana eelgec uum igecna Anut uqa dana cajaca mati bahic uqana bagol adena.  
\v 16 Odocob Anutna eelgec uum igec eu dana osol eu uqana silail mec cinigwe qee. Dana eu uqa silail osol meceb Anut uqa dana cajaca cunug gesiladi maaden, “Age cunug silailca,” aden. Euqa Anutna eelgec uum igec eu odi. Dana cajaca age silail mati mecebil Anut agenu maden, “Age dana cajaca ititom,” en.  
\v 17 Eu mele, dana osol uqa silail men. Odocob dana osol eu uqana silailnu cal mec dana cajaca cunug cilehadena. Euqa dana osol, Jisas Krais, uqana odoc eu wooldon! Dana cajaca age Anutna eelgec uum igecca Anutna ititom eu bagolweca ogina eu cunug age Krais odonna cebac bilec umeig kingwe biluqagan.   
\p
\v 18 Eunu dana osol uqana silail mec eunu Anut uqa dana cajaca cunug gesiladi maaden, “Age cunug silailca,” aden. Eu odiwe dana osol uqana ititom odoc eunu Anut uqa dana cajaca cunug maaden, “Age dana cajaca ititom,” adeceb age cebac bilegina.  
\v 19 Odocob dana osol uqa Anutna je tefacdon, odocob euna dana cajaca mati bahic age silailca calein. Eu odiwe dana osol uqa Anutna je toodon, odocob euna dana cajaca mati bahic age ititom caloqagan.   
\p
\v 20 Odocob je tefacdoc ben bahic calecnu Anut uqa dana cajaca loo je aden. Odocob silail kobol eu ben bahic calena qa Anutna eelgec uum igec eu silail kobol wooldon, odimei ihoc len.  
\v 21 Eunu cal mec eu silail kobol cesuldocob ohis bahic calen, eu kingwe bilen. Eu odiwe ititom kobol eu Anutna eelgec uum igec cesuldocob ohis bahic calena, eu kingwe bilina. Odocob Jisas Krais, egena Tibud, uqana cabi ocna ege cebac bilec catanec oqan.   
\c 6  
\s1 Ege Kraisca cal mom  
\p
\v 1 Eunu ege eeta ec madecnu? Ege Anutna eelgec uum igec egeca ihoc ligiannu silail kobolna himec cois bileqan ec madeqan eu coisfo?  
\v 2 Qee bahic! Ege cal mecwe mimeb silail kobol eu wele culom. Odocob eu adi ege silail kobolna gaid biluquna?  
\v 3 Ege Krais Jisasca gabandumeb wa joigec om kobol euna ege cunug uqana cal mecca gabandumeb wa joigec om. Age eunu qee doginafo?  
\v 4 Odocob Memige Anut uqa uqana kobolkobolna Krais Jisas cal mecnadec tulidocob cajen. Eu odiwe egeha sanan mi cebac bilec jic haun toodocnu Anut ege cal mecnadec tuligeceb cajeqannu wa joigecna ege Krais Jisasca gabandom, odocob Anut ege Krais Jisasca osoben qalqalna heel cisigen.   
\s1 Ege Jisasca cebac biluquna  
\p
\v 5 Ege Kraisca gabandumeb uqa cal men eu odi cal mom. Eunu ege uqaca gabandumeb uqa ceseli cajen eu odi egeha ceseli cajeqan.  
\v 6 Ege odi doqona, silail uqana kobol ege dewenigena cabi ona eu qee mudigiannu, odocob silail kobol eu ege uqana cabi dana haun cain biluqaunnu ege wawige hilah eu wele Krais Jisasca gabandumeig na babalecna tuitu qocobil cal mesin.  
\v 7 Ge, dana wele cal men silail kobol eu uqa qee iwaldona eunu uqa silail kobol haun qee odona.   
\p
\v 8 Eu mele, ege Kraisca cal mom eunu ege wawige meleeceb egeha uqaca cebac bileqan.  
\v 9 Ege doqona, Krais cal mecnadec wele ceseli cajen eunu uqa haun qee cal meiaun. Cal mec eu uqa cilehdocnu gagadicca qee.  
\v 10 Uqana cal mec eu uqa saen osolna himec wele cal men, odimei silailna gagadic odoc wooldon. Euqa qila uqa cebac bilina eu uqa Anutnu cebac bilina.  
\v 11 Eunu ageha agedodoc wele cal mein, odocob silailna gagadic odoc cain cilehadecdainnu odi cisdoigale. Odocob age Krais Jisasca gabandumeig Anutnu cebac bilegina ec cisdoigale.   
\p
\v 12 Silail kobol eu age dewenega eu cal mena cain culdocobil cilehadeiaun. Age dewenegana gale doc me qee eu cain toodowain.  
\v 13-14 Qila age loo je bisalu qee bilegina qa age Anutna eelgec uum igec bisalu bilegina. Eunu silail eu agena cilehadec haun qee biluwain. Odimeig age ebenega jaimagaca dewenega amihilon filfil cunugca kobol me qee odocnu silail kobol haun cain utuwain. Euqa age dana eu cal mecnadec ceseli cajen cebac bilia cinigwe age dewenegaca agena cisdocca cunug eu Anut uteiga. Odimeig age dewenega amihilon cunug eu ititom kobol odoqagannu Anut uteiga.   
\s1 Ege ititom kobolna cabi dana biluqa  
\p
\v 15 Eunu ege eeta odocnu? Ege qila loo je bisalu qee biluquna qa ege Anutna eelgec uum igec bisalu biluquna eunu ege silail cois mecnufo? Qee bahic!  
\v 16 Age wele dogina, age dewenega dana oso utimeig uqa co himec toodufeig eu age uqana cabi dana bilegina. Age silail kobol uqana cabi dana bileginafi age euna cal mec gulucdoqagan. Eu odi qeefi age Anutna je toodoc kobol uqana cabi dana bileginafi Anut age dana cajaca ititom ec madigian.  
\v 17 Mele, wele age silail kobolna cabi dana bilein qa hibna age Anutna je gadac dah mimeig age wawaga meleeceb je eu qila tutuc bahic toodogina. Eunu ege Anut hegaga doqale!  
\v 18 Anut uqa age silail kobol uqana cilehadecnadec begesaden. Odimei age ititom kobolna cabi dana maden.  
\v 19 Agena cisdoc eu mahanadec eunu ija dana egena cisdoc toodumig maadigina. Wele age dewenega amihilon cunug kobol gegehinca uqana cabi dana biloloig, odimeig age eunu qisol mec kobol gehgeh odoloig. Qilaqa age dewenega amihilon cunug ititom kobolna cabi dana mudeiga. Odimeig age kobol gun odocnu oodi bileiga.   
\p
\v 20 Wele age silail kobol uqana cabi dana biloloig saen euna age ititom kobol uqana cabi dana qee biloloig.  
\v 21 Euqa saen euna cel ceteh me qila majanaga adena eunadec oin? Ceteh eu agena aig qoc eu cal mec himec!  
\v 22 Qilaqa Anut uqa silail uqana gagadic odocnadec wele begesaden. Odimei uqa uqana cabi dana odi maden. Odocob eu uqana aig qoc eu odi. Age Anutnu gun cocoboig li cebac bilec catanec oqagan.  
\v 23 Ge, silail kobol eu uqana ameg eu cal mec himec. Euqa Anut uqana eelgec uum igec eu cebac bilec catanec. Ege egena Tibud, Jisas Kraisca gabandumeb cebac bilocomun cataneqan.   
\c 7  
\s1 Ege qila wawige kobol haunna cabi oqona  
\p
\v 1 O wawaga meleec cotiel, age loo je du cuhadogina. Eunu ija je maadecemin fogo adigian. Dana uqa cebac bilina saen euna himec eu uqa loo je bisalu bilina.  
\v 2 Ge, caja oso uqa dana ocob uqa gemug cebac bibileb saen euna himec loo je gadac ale gemo bilina. Euqa caja eu gemug uqa cal meceb loo je gadac ale gemo bilen eu qee mena.  
\v 3 Dana uqa cebac bibileb caja uqa dana oso ufei caja danaca bilec me qee mudec caja doqagan. Euqa dana cal mecebfi loo je gadac ale gemo bilina eu qee mena. Eunu uqa dana oso ocobfi eu uqa dana cajaca bilec qee me qee mudina.   
\p
\v 4 Eu odiwe cotiel, age dana oso uqa cal mecnadec ceseli cajen eu ebenna lein, eu ege Anutna kobol me bahic toodu odoqannu age wele Krais deweg ganacca gabandocobil cal mein. Eundec age loo je bisalu qee bilegina.  
\v 5 Wele ege dewenige kobol hilahna himec bilom saen euna loo je odigeceb egena gale gec me qee silail mecnu sililoloi. Odocob cabi eu ege dewenigena cunug ihoc len. Odocob eu cal mec himec cabi euna caloloi.  
\v 6 Qilaqa ege wele cal mimeb ceteteh gagadic gihacgen eunadec ege besigec biluquna. Eunu ege loo je eu bisalu qee biluquna. Eunu ege loo je jaqecna kobol hilahna qee cabi oqona qa ege qila wawige Kis kobol haunna cabi oqona.   
\s1 Silail kobol qigeceb cal mom  
\p
\v 7 Eunu ege eeta ec madecnu? Loo je eu silail odi madecnufo? Qee bahic! Euqa loo je uqa ija silail mecnu qee ihactoubmi ija silailnu qee doum. Eu odi, loo je jaqec madena:  
\q1 “Hina osona cetehnu cain amen qoiaun,” ena. \rq (Kisim Bek 20.17; Loo 5.21)\rq*  
\m Eu odi qee madoubmi ija ami qoc kobolnu qee doum.  
\v 8 Euqa silail mec kobol eu loo jena jic memegi oodi ami qoc kobol filfil wawina calena. Eu mele, loo jeca qee mi silail eu uqa cal mec dana cinigwe himec nijoub.  
\v 9 Wele ija loo jeca qee saen euna ija cebac bilem. Euqa hibna loo jena je ijaca hocob silail kobol cebac men.  
\v 10-11 Odocob silail kobol eu loo jena jic memegi oodi uhulten. Odimei loo je euna qiteceb cal mem. Eunu loo je eu ija cebac bilec ocnu nijen eu qiteceb cal mem eu fem.   
\p
\v 12 Eunu ege doqona, loo je eu gun bahic. Je cunug eu loo je jaqecna bilina euha eu gun, eu tutuc, eu me bahic.  
\v 13 Eunu ceteh me eu qiteceb cal mem eu odifo? Qee bahic! Silail kobol eu ceteh me qee bahic eu camasac migiannu silail kobol eu ceteh me eu umei euna qiteceb cal mem. Odocobnu loo je jaqec eu age cain silail mowain ec madena eu silail kobolna gug bahic eu ceteh me qee bahic ihactena.   
\s1 Dana eu waug lecisca  
\p
\v 14 Loo je eu dolonigenu ceteh eu ege doqona. Euqa ija dana dewegca. Silail kobol eu ija u taciteceb ija uqana cabi ugina.  
\v 15 Ija kobol odigina eu uqana gug qee dugina. Ge, kobol odocnu ija gale bahic tena eu ija qee odigina. Euqa kobol ija sagagdugina eu ija gaidgaid odigina.  
\v 16 Odocob kobol ija gale qee tena eu ija odigina eunu ijana kobol euna ija odi madigina, “Loo je eu me,” igina.  
\v 17 Eunu qila ijadodoc qee odigina qa silail kobol eu ija wawina bilina eu odi odona.  
\v 18 Ija wawina ceteh me oso qee bilel eu ija dugina, eu ija dewenina madigina. Ija wawi hilahnu himec madigina. Ija kobol me odocnu ihoc gale tena qa ija kobol me eu odocnu ihoc qee odigina.  
\v 19 Kobol me eu odocnu gale tena eu qee odigina qa kobol me qee odocnu gale qee tena eu odigina.  
\v 20 Ija gale qee tena eu odiginafi eunu ijadodoc eu qee odigina qa silail kobol eu ija wawina bilina eu odona.   
\p
\v 21 Eunu ija kobol odi gulucdudu biligina. Ija kobol me odocnu gale tena qa kobol me qee odocnu eu ija wawina bilina.  
\v 22 Mele, ijana cisdocna Anutna loo jenu gale bahic tena.  
\v 23 Euqa ija dewenina loo je fil bilina eu odi figina. Eu Anutna loo je ijana cisdocna bilina eu ija gale tena euca cadesina. Odocob eu uqa silail loo je ija dewenina bilina eu uqana gihactec mitina.  
\v 24 O waloc! Ija me qee mec dana bahic! In uqa ija cal mec deweni inadec besitigian?  
\v 25 Ija Anut uqa besitigiannu hetaga dugina! Jisas Krais egena Tibud uqa eu odigian! Eunu ijadodoc ijana cisdocna ija Anutna loo jena cabi ugina igina qa ija wawi hilahna silail uqana loo jena cabi ugina.   
\c 8  
\s1 Krais egena silail cagasimei Kis Gun igen  
\p
\v 1-8 Eunu dana ege Krais Jisasca gabandom ege silail ameg ocnu ec je oso qee nijel. Dana uqana cisdoc eu waug hilah uqana kobol toodufei uqa Anutna loo je qee toodu odona. Uqa odi odocnu ihoc qee. Eunu dana eu uqa Anut cad mudina. Odocob dana wawaga hilah uqana kobolna cobogina age kobol Anut gale dona eu odocwe qee. Eunu dana wawaga hilahna kobolna cobogina eu agena cisdoc eu ceteteh wawaga hilahna eundecnu himec cisdogina. Euqa dana Kisna kobolna cobogina agena cisdoc eu ceteteh Kisna kobolnu himec cisdogina.  
\p Odocob dana uqana cisdoc eu waug hilahna kobolna himec tawenafi dana eu uqa cal migian. Euqa dana uqana cisdoc eu Kisna kobolnu himec cisdonafi dana eu uqa malol bilecca cebac bilecca ugian. Eunu ege wawige hilah eu gagadic odocca qee eunu ceteh eu loo je odocwe qee Anut uqa odon. Loo je eu dana cajaca age kobol ititom odoiga ec madena eu ege wawige hilahna jic coboc kobolna qee coboqona qa Kisna jic coboc kobolna coboqona eu ege kobol ititom ihoc odocnu Anut uqagul Melah suldocob uqa silail deweg eu egena silail dewenigewe u tacimei nen euna silail eu wawige hilahna mena eu qee mecnu odon. Odocob cebac bilec Kisna loo je uqa ege cunug Krais Jisasca gabandoc biluquna eu cebac bilec igen eu silail cal mecca alena loo jenadec besiten. Odocob eunu dana ege Krais Jisasca gabandom ege silail ameg ocnu ec je oso qee nijel.   
\p
\v 9 Euqa age wawaga hilah uqana kobolna qee bilegina. Age Kisna kobolna bilegina, eu mele Anutna Kis age dunuhna bilecebfi. Euqa dana oso uqa Kraisna Kisca qeefi uqa Kraisna dana qee.  
\v 10 Silailnu age dewenega wele cal men eu mele. Euqa Krais age dunuhna bilecebfi age wele dana cajaca ititom calein. Eunu age dolonoga eu cebac bilina.  
\v 11 Anut uqa Jisas cal mecnadec tulidocob ceseli cajen eu uqana Kis eu age dunuhna bilecebfi Anut uqa Jisas cal mecnadec tulidocob ceseli cajen eu uqa Kis eu age dunuhna bilina euna age cal mec dewenegaha cebac bilec adigian.   
\s1 Kis Gun ege Anut uqana mel migen  
\p
\v 12 Eunu wawaga meleec cotiel, ege walagca biluquna qa eu wawige hilahnanu qee, eu ege wawige hilahna kobolna cobocnu qee.  
\v 13 Age wawaga hilah uqana kobolna cobifeig age cal moqagan. Euqa age Kis uqana gagadic odocna dewenegana kobol me qee eu qee mudifeig age cebac biluqagan.  
\v 14 Dana cunug age Anutna Kis iwalaadi cobona dana eu age, age Anutna mel odi bilegina.  
\v 15 Kis eu Anutnadec oin eu age Anutna begabeg meh cabi dana qee madel, odocob age cucuiec danaha qee madel. Euqa Kis age oin eu uqa age Anutna mel ibuldoin. Odocob Anutna gagadic odocna ege utaii madoqona, “Aba!\f + \fr 8.15 \ft Aram jena age memeg eu aba ein. Aram je eu Jisasna je madec gug. Anut uqa Jisas memeg, eunu Jisas uqa Anut inondodoi uqa Aba ec maden. Age Mak 14.36 feiga.\f* Mei!” oqona.  
\v 16 Anutna Kis uqadodoc ege dolonige utadocob ege Anutna mel odi bilecnu qasali magena.  
\v 17 Odocob ege Anutna mel ibuldufeb egeha Anut huqanehul. Odocob hibna ege Anutna ceteteh me bahic cunug eu oqan. Ege Kraisca osoben ceteteh me bahic eu oqan. Euqa ege uqaca osoben hibna kobolkobol oqannu ege qila uqaca osoben culumen sogoecca gahidoqonafi ege uqaca Anutna ceteteh me bahic oqan.   
\s1 Hibna ege sao jobon cebac bilec oqan  
\p
\v 18-25 Ege doqona, ceteteh cunug Anut ifanen eu caja mel basigia bili dain dona odi dain tebandogina. Odocob ifanec cunugca odi qada qaqaji bibilegin leceb eu qila saen ina calena. Anut uqa ifanec ceteh cunug agena me qee mec gel gihacadec eunadec besiadigian. Odocob ifanec ceteh cunug eu ege Anutna mel ibuldom egeca osoben Anutna ceteh me bahic umeb gihacgec qee himec bileqan. Eunu Anut ceteteh cunug eu me qee bilimeig me qee moqagan ec maden. Eu ifanec ceteteh agena gale adecna eu odi qee calel. Euqa Anut uqa ifanec ceteteh me qee moqagan ec maden eu uqaha ageca ceteh me caligian ec maden. Eunu ceteteh cunug Anut ifanen eu uqa ola suli u meciii ege Anutna mel ibuldumeb camasac mecnu sumudegina.  
\p Odocob ceteteh Anut ifanen eu himec qada qaqaji qee bilegina. Ege Kis wele om. Kis eu Anut uqa sab cabina casac wal mena eu odi bagolwe casac igen. Odocob egeha dain tebandudu qaqaji ege Anut uqa uqana mel mudigigiannu susumudi biluquna, saen eu ege dewenige ibuldocob haun caleqan. Anut uqa ege wele ceseli oigen. Odocob egena aig qoc euna ihoc ligiannu sumuduquna. Euqa ceteh sumudom eu wele fom eu ege haun sumudecnu ihoc qee. Dana oso uqa ceteh wele fenfi eetanu haunhaun sumudina? Euqa ceteh ege qee folom eu ege ocnu geh cisdodob sumuduqunafi ege wawige meleec gagadic tawecnu sumuduquna. Eunu ijana cisdoc eu odi, kobolkobol eu hibna egeca camasac migian eu qila culumen sogoecca gahidoqona eu wooldoc bahic.   
\p
\v 26 Eu odiwe ege cel cetehnu bahic inondocnu eu qee doqona. Eunu Kisha ege dana gagadicca qee eundec cesulgena. Odimei Kis uqadodoc ege cesulgecnu Anut inondona. Kis uqa dana egena jena madecwe qee eu odi sogoii inondona.  
\v 27 Odocob Kis uqa Anutna cisdoc toodudu dana cajaca qagoc cesuladecnu inondona. Eunu Anut uqa dana wawaga memegi camasac fena eu uqa Kisna cisdoc euha camasac fena.   
\p
\v 28-30 Uqa Melah age waliniga matu biligiannu uqa dana cajaca Anut ceseli cedecnu wele maden eu ageha uqa Melah cinigwe caloqagannu nesili ehaden. Odocob uqana mel gehca biluqagan. Odocob dana cajaca age uqana wele nesili ehaden eu ageha utaaden. Dana cajaca utaaden eu ageha dana cajaca ititom ec maden. Dana cajaca ititom ec maden ageha uqana kobolkobol aden. Eunu ege doqona, Anut uqa ceteh cunugna dana cajaca age Anutnu nalunuga megina, eu age Anut ceseli cedecnu wele maden, odimei utaaden eu age me madena.   
\s1 Krais uqana nalunige mec qee culigiaun  
\p
\v 31 Eunu Anut ceteh i cunug odona eunu ege eeta ec madecnu? Anut ege cesulgenafi in uqa egena cad?  
\v 32 Uqa uqagul Melah qee sosogon ol euqa ege cunug cesulgigiannu suldocob nen. Uqa Melah wele igen eunu uqa ceteh cunugha qee igiaunfo?   
\p
\v 33 Dana cajaca Anut uqa uqana nesili cedaden eu age in oso uqa deweneganu balijigian? Anut uqadodoc ege dana cajaca ititom ec madena.  
\v 34 In oso uqa ege dewenigenu balijec je madecnu ihoc? Eu Krais Jisasfo ege dewenigenu balijigian? Qeeo! Uqa cal men, odimei Anut tulidocob ceseli cajen, uqa qila Anut eben meulana bilina oodi cesulgecnu ha inondona.  
\v 35 Krais ege nalunige mena. In oso uqa Kraisna nalunige mecnadec besigigian? Culumen egeca calecebfi qee ege dain tebandocomunfi qee dana age tootoogi qigecebilfi qee ege wen gecebfi qee lotocnu gohic mimeb bical bilocomunfi qee ceteh oso ege me qee migigia odocobfi qee han cadec egeca calecebfi ceteh eu cunug age Kraisna nalunige mecnadec besigecnu ihocfo? Qee bahic! Ceteh eu cunug ihoc qee!  
\v 36 Eu mele, ceteh eu odi eu egeca calena eu Anutna jaqec je odi madena:  
\q1 “Ege hinana dana cajaca biluquna eunu deel cunugna qigecebil cal moqona.  
\q1 Age ege sipsip qagaadecnu himec odiwe mecigegina,” ena. \rq (Buk Song 44.22)\rq*   
\m
\v 37 Eu odi qee! Ege ceteteh i cunug egeca calecebfi dana uqa nalunige mena cesulgeceb ege ceteteh i cunug wooldoqan.  
\v 38 Eunu ija odi wawi mele bahic ena, ceteh oso ege Anutna nalunige mecnadec besigecwe qee. Eu cal mecfo, qee cebac bilecfo, qee Anutna enselfo, qee buga gagadiccafo, qee ceteh qila biliafo, qee ceteh hib caligianfo, qee gagadic odoc filfilfo, qee  
\v 39 ohisdec cetehfo, qee maha dunuhnadec cetehfo, qee ceteh cunug Anut ifanen eundec osofo, qee ceteh cunug eu Anutna nalunige mecnadec besigecwe qee. Anut uqa nalunige mec eu egena Tibud, Krais Jisasna igina.   
\c 9  
\s1 Pol Isrelnu waug qon  
\p
\v 1 Ija Kraisna dana eunu je mele madigina. Ija qee uhuligina. Odocob Kis Gun uqa ijana cisdoc silec cofdona eunu ija qee uhuligina ec ha madena.  
\v 2 Eu mele, ijana dana cajacanu ija waloc teten saen cunug ija wawi dain tena.  
\v 3 Eu age ijaca golanige osol bahic. Eunu ija cotiel agenu eu mele ija odoc jiccami Krais inondocomin ititacteceb agena cudun umig fadaloum.  
\v 4 Age Isrel sihul, Anut uqa uqana mel maden, uqa uqana fulacdoc ben aden. Anut uqa ageca bal je cehaden, uqa uqana loo je aden. Odocob age Anutnu cuha fec kobolca Anutna je hahun madecca oin.  
\v 5 Isrel dana weledec ijanagaca matu eu age jajanagail himec. Odocob agena sihulnadec himec Krais uqa dana ibuldon. [Krais uqa cunug agena ilo, uqa Anut.]\f + \fr 9.5 \ft Grik je eu gadac ina [ ] nijia eu falicdoc je fil osoha nijia, eu odi: Anut uqa cunug agena ilo.\f* Ege binan sulocomun cataneiale! Mele!   
\s1 Pol uqa Anut Isrel dana cajaca adi cofadennu maden  
\p
\v 6 Ija Isrel dana cajacanu saen cunugna waloc tena qa dana cajaca Isrel sihulnadec calein eu age cunug eu age Isrel bahic qee. Eunu ija Anutna je hahun madec qee aig qolnu qee cisadegina.  
\v 7 Eu odiha Ebrahamna sihulnadec calein eu age cunug eu age Ebraham melahul ategul asagul bahic qee. Wele Anut uqa Ebraham madon:  
\q1 “Hina sihulel toohi caloqagan age Aisak sihulna himec caloqagan,” don. \rq (Jenesis 21.12)\rq*   
\m
\v 8 Eu uqana gug eu odi. Mel mel aid age golanaga madec kobolna himec calegina eu age Anutna mel mel aidca bahic qee. Euqa mel mel aidca age Anutna je hahun madecna kobolna calegina eu age himec Ebraham melahul, ategul, asagul caloqagan.  
\v 9 Ge, Anut uqa je hahun madecna eu odi madena:  
\q1 “Ija saen euna ceseli hugen ec wele madem,  
\q2 odocob saen euna Sera uqa mel manahal basigian,” ena. \rq (Jenesis 18.10, 14)\rq*   
\p
\v 10 Eu odi himec qee. Rebekaha uqana mel lecis ale memela osol, eu Aisak ege jajanige.  
\v 11 Euqa Anut uqa uqana cisdoc himec toodona. Eunu uqa uqana dana cajaca biluqagannu uqana cisdocna himec uqadodoc dana cajaca gesiladi ehaden. Uqa danana cabinu qee cisdona. Uqadodoc dana utaadena. Eunu wele mel lecis eu ale qee cali hocna kobol meca me qeeca eu qee odolosin,  
\v 12 saen euna uqa Rebeka madumei madon:  
\q1 “Matu eu milum bisalu biligian,” don. \rq (Jenesis 25.23)\rq*   
\m
\v 13 Eu odiwe Anutna jaqec je odi madena:  
\q1 “Ija Jekobnu nalug mem qa ija Iso sagagdom,” ena. \rq (Malakai 1.2-3)\rq*   
\p
\v 14 Eunu ege eeta ec madecnu? Anut uqa Jekob nesili ehuden qa Iso qee nesili ehudelnu, “Anut uqa kobol ititom qee odi odon ecnu,” odi madecnufo? Qee bahic!  
\v 15 Ge, uqa Moses madon:  
\q1 “Ija dana osonu wawi nijecebfi  
\q2 eu uqanu wawi qugian.  
\q1 Ija dana osonu wawi qocobfi  
\q2 eu uqanu waloc tigian,” don. \rq (Kisim Bek 33.19)\rq*   
\m
\v 16 Eunu Anut uqa dana osoosofo gesildon eu danana cisdocnaca danana cabi ocnaca eu odi qee odona. Euqa Anut uqa uqana waug qocna himec dana gesildon.  
\v 17 Eu mele, Anutna jaqec jena Anut uqa Fero madon:  
\q1 “Ija hina dewenna eu ijana gagadic odoc dana cunug foqagannuca, odocob dana cajaca mahamaha cunugna bilegina eu age ija ijani doqagannuca odihecemin king calem,” don. \rq (Kisim Bek 9.16)\rq*   
\m
\v 18 Eunu Anut uqa osonu waug nijina eu uqanu waug qona. Odocob uqa oso waug menecnu cisdona eu waug menena.   
\s1 Anutna gemag becca uqana waug qocca  
\p
\v 19 Euqa age eundec oso odi matigian, “Eu odifi eetanu Anut uqa danana odoc me qeenu wadacadigen ec madena? In oso uqa Anutna cisdoc toodocnu ihoc qee?” tigian.  
\v 20 Euqa hina cel dana hina Anutna je wadacdu madogona? Hal eu dana muden uqa madona:  
\q1 “Hina eetanu ija edi muditem?” dona \rq (Aisaia 29.16; 45.9)\rq*  
\m eu odi qee nijel.  
\v 21 Hal mudec dana uqa maha cudun osolnadec umei hal lecis mudina, oso eu hal me bahic odocob cabi me ocnu deel benna, oso eu hal gauc cabi ocnu deel cunugna. Eu odi eu cois qee aganafo?   
\p
\v 22-24 Anut uqa uqana kobolkobol gagadicca egenu uqa waug qoc camasac mudecnu gale don. Ege uqana kobolkobol ceteh me bahic amca ocnu uqa wele hanoigen. Egeha uqa utagen, ege Juda sihulnadec himec qee utagel qa ege Juda dana qee eundec sihulnadec euha utagen. Eunu Anutna odoc eu odiodi odon. Uqa uqana gemag bec camasac mudecnuca, uqana gagadic odoc dana cunug fecnuca eu gale don. Eunu agenu gemag bena uqa fadaladecnu mudaden eu camuhulaadi saen cecelac fadaladecnu sumaden.  
\v 25 Uqaha Hoseana je hahun jaqecna odi maden:  
\q1 “Dana cajaca ijana qee eu age ijana dana cajaca adigen.  
\q1 Odocob sihul eu agenu ija nalunuga qee melem eu ija agenu nalunuga mec adigen. \rq (Hosea 2.23)\rq*   
\q1
\v 26 Odocob cudun ono euna age maaden, ‘Age ijana dana cajaca qee,’ aden  
\q2 cudun euna bahic age Cebac Bilec Anut melahul adoqagan!” en. \rq (Hosea 1.10)\rq*   
\p
\v 27 Odocob Aisaia Isrelnu utai maden:  
\q1 “Isrel sihul eu lanna esic nijina odi fulusdocobfi cois Anut am nag odi himec cahahaadigian.   
\q1
\v 28 Eu mele, Tibud uqa uqana je gesilec eu qee mudimei mahuc bahic dana cajaca mahanadec agena ameg wadacadigian,” en. \rq (Aisaia 10.22-23)\rq*   
\m
\v 29 Odocob Aisaia uqa eunu wele je hahun maden eu odi:  
\q1 “Tibud Gagadicca uqa egena mel mel aidca am nag odi qee culadeceb biloubmi ege fadalgoub eu odiwe uqa Sodom Gomoraca fadaladoub,” en. \rq (Aisaia 1.9)\rq*   
\s1 Isrel age me jenu wawaga qee meleel  
\p
\v 30 Eunu ege eeta ec madecnu? Ege odi madecnu. Juda dana qee eundec age Anutna ititom kobol ocnu cabi qee melein eu age Anutna ititom kobol wele oin. Anutna ititom kobol eu wawaga meleecna oin.  
\v 31 Euqa Isrel age Anutna ititom kobol ocnu loo je euna toodoin eu age Anutna ititom kobol qee gulucdoloin.  
\v 32 Eu eetanu? Age wawaga qee meleecebnu Anutna ititom kobol qee oloin. Eu age cabi ocna odocnudih wawaga nijen. Eunu age jaimaga meenna qeti aqeceb toni mahulein.  
\v 33 Anutna jaqec je oso eu odi madena:  
\q1 “Feiga! Ija Saion ono meen oso migina.  
\q2 Meen eu dana qeti aqeceb toni mahuluqagan.  
\q1 Dana age uqanu wawaga meleigian eu ija agenu majani qee teiaun,” ena. \rq (Aisaia 8.14; 28.16)\rq*   
\c 10  
\s1 Pol Isrelnu inondon  
\p
\v 1 O wawaga meleec cotiel, Anut Isrel dana cajaca cahahaadecnu wawi ben nijia, odocob saen cunugna ija Anut agenu inondugina!  
\v 2 Ija eu agenu du cuhadugina eunu qasali madigina. Eu age Anutna kobol toodocnu gagadic bahic megina. Euqa age odi odogina eu fogo adecca qee.  
\v 3 Age Anutna kobolna ege dana cajaca ititom gena eunu age qee dogina. Odocob agedodoc agena ititom kobol camasac mudec cabi ogina. Age Kraisnu wawaga qee meleel. Eunu age Anutna kobol ege dana cajaca ititom ec madena eunu qee jogoegina.  
\v 4 Ege doqona, Krais uqa loo je eu ihoc toodu li hedon. Eunu dana cajaca cunug Kraisnu wawaga meleena age ijanaga dana cajaca ititom eu ogina.   
\s1 Cunug age Anutnu wawaga meleena Anut cahahaadigian  
\p
\v 5 Moses uqa Anut age dana cajaca ititom ecnu loo je toodoc kobol eu dana cajaca age odi odocnu je jaqen. Uqa odi maden:  
\q1 “Dana oso uqa loo je eu toodu odona eu uqa loo jena jic cobona,” en. \rq (Wok Pris 18.5)\rq*   
\m
\v 6 Euqa dana waug meleeceb Anut dana cajaca ititom ec madec kobol eunu je odi madena:  
\q1 “Hina wawin odi cain madagaun, ‘In uqa sao jobon tigian?’ agaun. \rq (Loo 30.12)\rq*  
\m Hina Krais ehudi ehi nigiannu odogona.  
\v 7 Odocob hina odi cain madagaun:  
\q1 ‘In uqa maha heel ben eu dunuh bahic non gugca qee euna toni nugian?’ agaun. \rq (Loo 30.13)\rq*  
\m Hina Krais ehudi ehi nu cal mec cudunnadec bigiannu odogona,” ena.  
\v 8-9 Euqa hina conna Jisas uqa Tibud ec qasali madaganafi hina wawinna Anut uqa cal mecnadec tulidocob ceseli cajen ec wawin meleenafi Anut hina cahahaheigian. Eunu je eu uqana gug eu odi madena:  
\q1 “Je eu hina cemein bahic bilina.  
\q1 Eu hina connaca wawinnaca bilina,” ena. \rq (Loo 30.14)\rq*  
\m Je eu ege wawige meleec je ege qasali madoqona.  
\v 10-13 Eu odi je hahun jaqec madena:  
\q1 “Dana cunug age Tibud ijan uutaegina eu Anut uqa cahahaadigian,” ena. \rq (Joel 2.32)\rq*  
\m Odocob Juda danaca Juda dana qee eundecca eu age caca himec. Tibud osol himec uqa ege cunug egena Tibud. Uqa uqana eeldoc me bahic dana cunug uqa cesuladecnu utadogina eu age adena. Odocob Anutna jaqec je odi madena:  
\q1 “Dana cunug age uqanu wawaga meleena  
\q2 eu age majanaga qee adeiaun,” ena. \rq (Aisaia 28.16)\rq*  
\m Eunu ege wawige meleeceb Anut egenu dana cajaca ititom ec madena. Odimeb ege conigena wawige meleec qasali madocomun Anut cahahagigian.   
\p
\v 14 Euqa age uqanu wawaga qee meleecebfi adi uqa ijan utadoqagan? Odocob age uqana je qee dufeig eu adi uqanu wawaga meleigian? Odocob oso uqa me je qee qasali maadecebfi eu adi doqagan?  
\v 15 Odocob Anut uqa je qasali madec dana qee suladecebfi eu adi je qasali maadoqagan? Eu odi Anutna jaqec je madena:  
\q1 “Dana age me je ahogina saen euna dana cajaca age me bahic celeboegina!” ena. \rq (Aisaia 52.7)\rq*   
\s1 Isrel dana cajaca cunug age me je qee oloin  
\p
\v 16 Euqa cunug age me je eu qee oloin. Aisaia uqa odi maden:  
\q1 “O Tibud, in uqa egena je eu dah meceb waug meleen?” en. \rq (Aisaia 53.1)\rq*   
\m
\v 17 Eunu oso Kraisnu qasali maadeceb age me je dah megina. Odocob dana cajaca age me je dah mimeig wawaga meleena.   
\p
\v 18 Euqa ija sisiligina, age me je eu qee dah meleinfo? Qee bahic! Age wele dah mein. Anutna je odi madena:  
\q1 “Age jejenega eu maha cunugna ihoc len.  
\q1 Odocob agena je eu wele jobon cunugna ihoc len,” ena. \rq (Buk Song 19.4)\rq*   
\m
\v 19 Euqa ija haun sisiligina, Isrel dana cajaca age me je eunu qee fogo adenafo? Qee bahic! Age wele fogo aden. Moses uqa casac maden:  
\q1 “Ija dana cajaca sihul oso cedigen.  
\q2 Eu age ijanagaca qee, age ceteh gauc, age docca qee.  
\q1 Ija kobol eu odigen, odocob age eunu amaga qocob gemanaga bigian,” en. \rq (Loo 32.21)\rq*   
\m
\v 20 Odocob Aisaia uqaha Anutna je gagadic odi maden:  
\q1 “Dana cajaca ija qee walitelein eu age ija wele guluctein.  
\q1 Dana cajaca age ijanu leih qee sisiladelein eu ija age amagana camasac calem,” en. \rq (Aisaia 65.1)\rq*   
\m
\v 21 Euqa Aisaia uqa Isrelnu odi maden:  
\q1 “Cahineg cunug ija dana cajaca feeii je me qee wadacdu mamadi coboc eundec agenu age cahahaadecnu ebeni mem,” en. \rq (Aisaia 65.2)\rq*   
\c 11  
\s1 Anut uqa Isrelnu waug qon  
\p
\v 1 Eunu ija sisiligina, Anut uqana dana cajaca wele hibemadenfo? Qee bahic! Ijaha Isrel dana. Ija Ebraham jajanig oso. Ija Benjamin sihulnadec.  
\v 2 Anut uqa uqana dana cajaca wele don uqa qee hibemadel. Age Ilaijana dodonu Anutna jaqec je nijia eunu qee doginafo? Ilaija uqa Isrel agena odoc me qeenu Anut odi inondon:   
\q1
\v 3 “O Tibud, age hinana je madec dana aqecebil cal mein.  
\q1 Age hinana ihanec cabal eu wagaladein.  
\q2 Euqa ija himec biliga.  
\q1 Eu age ijaha qituqagannu walitegina,” don. \rq (1 King 19.10, 14)\rq*   
\m
\v 4 Euqa Anut uqa cel je ceseli madon? Uqa odi jejeg hewi madon:  
\q1 “Ija dana 7,000 eu age Baal tibud amegna gob qee cehelein eu ijadodoc hewadem bileiga,” don. \rq (1 King 19.18)\rq*   
\p
\v 5 Eu odiha qila saen ina am nag oso bileiga Anut uqa uqana eelgec uum igecna nesili cedaden.  
\v 6 Euqa uqa age loo je toodoinnu qee ehadel. Uqa age loo je toodoinnu ehadecebfi uqana eelgec uum igec eu uum igec mele bahic qee.   
\p
\v 7 Eunu adi? Isrel dana cajaca age Anutna ititom kobol eu oqagannu walein eu age qee oloin. Dana cajaca Anut nesili cedaden eu age himec oin. Odocob leih wawaga eu menen.  
\v 8 Anutna jaqec je odi madena:  
\q1 “Anut uqa odadeceb amaga amusein.  
\q1 Uqa odadeceb amaga qee mecielein, odocob dahiniga qotum qoin.  
\q1 Odocob eu age odi bibilegin hu qila deel i calen,” ena. \rq (Loo 29.4; Aisaia 29.10)\rq*   
\m
\v 9 Odocob Dewidha odi maden:  
\q1 “Agena ja qoc saenna  
\q2 aisais hewadeceb tonoqagan.  
\q1 Age heel benna tonoqagan,  
\q2 eu agena wadac ameg odi aig qugian.   
\q1
\v 10 Age amaga tu hocob qee meciowain.  
\q2 Odocob hina cois homoga akuldocom odi himec bilecebil catanigian,” en. \rq (Buk Song 69.22-23)\rq*   
\s1 Anut uqa Juda dana sihul qee eundec ceseli ceden  
\p
\v 11 Eunu ija sisiligina, age wele toni aqen odimeig odoc eu odina wele me qee meinfo? Qee bahic! Age Anutna me je hibemdoin eunu jic euna Anut uqa Juda dana sihul qee eundec cahahaaden, odocob Isrel age sihul fil eu Anutna cahahaadec ocobil fimeig wawaga me qee migian.  
\v 12 Isrel age Anutna me je hibemdoin saenna Anut uqa dana cajaca filfil me bahic cesuladen! Odocob age silail meinna Anut uqa Juda dana qee eundec me bahic cesuladen. Eunu Anut uqa Isrel dana cajaca cunug cahahaadi egeca gabangigian saen euna uqa ege dana cunug me bahic cesulgi cuhadugian!   
\p
\v 13-14 Euqa ija qila Juda dana qee eundec age je maadigina. Ija Anutna aposel Juda dana qee eundec age gemo cabi ocnu Anut gesilten. Ija ijana Juda sihul eu age amaga qocomin Anut age leih cahahaadigiannu ijana cabi oc sulecemin ohis tena.  
\v 15 Ge, Anut uqa Isrel ititacaden, odocob eu odocna uqa dana cajaca maha cunugnadec cedadeceb eu age uqaca tanawadecebil wawaga osol mein. Eunu Anut uqa Isrel haun ceseli cedifei eu cal mecnadec haun ceseli cajecwe moqagan.   
\p
\v 16 Age bred mudecnu ooldodoig saen euna age casac ooldoc ceteh eu manecnu cagu umeig am naha oso Anutnu qagu bilecnu abes megina. Eu odi odifeig ooldoc ceteh cunug eu Anutnu qagu bilia. Odocob na bebeig eu Anutnu qagu bilecebfi na batac euha cunug Anutnu qagu bilia.  
\v 17 Isrel age na oliw manan cinigwe. Odocob Anut uqa batac leih na oliw eunadec qahadi helen. Odimei uqa age Juda dana qee eundec oliw batac cus euna na oliw manan eu tubadeceb agena cudunna bilegina. Odocob age na oliw bebeignadec lalo oliw batac leih gami ogina.  
\v 18 Eunu age oliw batac Anut qahadi helen eu age cain fileadowain. Age fileeiga adecebfi casac cisdu cuhadumeig age bebeig eu qee gahidogina qa bebeig age gahiadena.   
\p
\v 19 Euqa age madegina, “Anut uqa batac eu agena cudunna ege tubgigiannu qahaden,” egina.  
\v 20-21 Eu mele qa age wawaga mele qee el eunu qahaden. Euqa age wawaga meleena euna gagadic taweiga. Anut uqa na oliw batac bahic eu qee culadel. Eu odiwe uqa ageha qee culadeiaun. Eunu age cain fileowain. Age cois cumuneiga.  
\v 22 Eunu age batut feigale. Anut uqa waug susumulca qa uqaha kobolkobol gagadic odocca. Dana age Anut hibemdogina eu Anut uqa kobolkobol gagadicca odadegina. Euqa Anut uqa agenu waug qona, eu age uqana waug qoc euna bilifeig. Qeefi, ageha Anut qahadi qeladigian.  
\v 23 Odocob Isrel age wawaga qee meleec kobol eu culifeig Anut uqa ihoc ceseli tubadigian. Eunu Anut uqa euna ceseli tubadigian.  
\v 24 Age Juda dana qee eundec, age na oliw cuswe. Odocob Anut uqa age batacwe qetadimei na oliw mananna tubaden. Na eu agena sihul qee bahic. Odocob Isrel dana age na oliw manan cinigwe. Eunu na oliw manan eu agena sihul bahicnu Anut uqa age batacwe na oliw manan euna ceseli tubadecnu cabi hetec bahic.   
\s1 Anut uqa dana cajaca cunugnu waug qon  
\p
\v 25 O wawaga meleec cotiel, age je jahunec i fogo adigiannu ija wawi nijia, age Juda dana qee eundec agedodocnu cisdudu madowain, “Ege cisdoc silecca,” owainnu ija je jahunec i qasali maadigina. Eu odi, Isrel am naha age wawaga meneceb kobol eu ageca biligian, lecebleceb saen Juda dana qee eundec agena sihul eu limei agena wawaga meleec am sanijec eu ihoc ligian.  
\v 26 Odocob eunu kobol eu odina Anut uqa Isrel sihul cunug cahahaadigian. Anutna jaqec je odi madena:  
\q1 “Saion gemo ono cesuladec caligian.  
\q2 Anut uqa Jekob sihul odudeceb age Anut hibemdoc kobol eu culuqagan.   
\q1
\v 27 Odocob ija agena silail cunug cagasiadigen saen euna ija age gemo bal je cehigen,” ena. \rq (Aisaia 59.20-21; 27.9; Jeremaia 31.33-34)\rq*   
\m
\v 28-29 Isrel age Anutna me je hibemdogina eunu agenu, Juda dana qee eundec, age Anutna cad bilegina. Euqa Anut uqa age wele bahic nesili cedaden. Anut uqa age wele utaaden, uqa wele eeladec uum aden. Odocob uqa uqana cisdoc haun hibna qee falicdoiaun. Eunu Anut uqa Isrel jajanagailnu cisdumei Isrel dana cajaca nalunuga mena.   
\p
\v 30-32 Anut uqa dana cajaca cunug age uqana loo je tefacdoginanu uqa ameg me qee wadacadigen ec maden. Eunu uqa dana cajaca cunugnu waug qona. Eunu age Juda dana qee eundec, age wele Anut filedoin. Qilaqa Isrel age Anut filedoinnu Anut agenu waug qoc ageca bilen. Eu odiwe Anut agenu waug qoc ageca bilennu Isrel age Anut agenu waug qoc oqagannu age qila Anut filedogina.   
\s1 Ege Anut binan sulecnu  
\q1
\v 33 Anut uqana kobol me bahic,  
\q2 uqana cisdoc silec,  
\q2 uqana doc eu dunuh bahic,  
\q2 eu macas ameg gemona cinigwe!  
\q1 Dana ege uqana cisdoc gug cunug fecwe qee bahic.  
\q1 Dana ege uqana jic cunug bahic ha toodocwe qee.   
\m
\v 34 Anutna je eu odi madena:  
\q1 “In uqa Tibudna cisdoc wele fen?  
\q2 In uqa cisdoc uten? \rq (Aisaia 40.13)\rq*   
\q1
\v 35 In uqa casac ceteh utennu ceteh eu wadac haun ceseli utigian?” ena. \rq (Job 41.11)\rq*   
\q1
\v 36 Qee bahic! Anut uqa ceteh cunug ifanen.  
\q2 Eunu ceteh cunug bilegina.  
\q1 Odocob ceteh cunug eu Anutnu himec bilegina.  
\q1 Ege uqa binan sulocomun cataneiale! Mele!   
\c 12  
\s1 Ege dewenige eu ihanecwe Anut utecnu  
\p
\v 1 O wawaga meleec cotiel, gug eunu ija niniadigina. Age Anut agenu waug qona, eunu age dewenega Anutnu ihanec cebacca ninijeb odiwe uteigale. Ihanec eu gunca Anut gale docca nijiale. Eu agena Anut cewel utoc bahic nijiale.  
\v 2 Odocob age dana mahanadec cobogina odi cain tooadi cobowain. Euqa age Anut culdecebil agena cisdoc isindocob agena coboc haun ibuldugian. Odocob age Anut eeta gale dona eu doqagan. Euha cel ceteh eu me, eeta odocomun Anut egenu waug nijigian euha doqagan. Cel kobol eu ihoc bahic ege odocnu euha doqagan.   
\s1 Ege Anut wawige meleec igenna cabi ocnu  
\p
\v 3 Odocob Anut eeltec uum itecna ija age cunug osolosol maadigina, age abesabes agedodocnu ija dana binanica wooladec ija meca ec wawaga cain madeiaun. Qee bahic! Age abesabes agedodocnu odi cisdoiga, ija dana binanica wooladec qee biligina ija meca qee ec cisdoiga. Age cunug Anut age wawaga meleec osolosol aden euna agenu ihoc nana cisdu cuhadoiga.  
\v 4 Ege deweg osolna biluquna, odocob deweg eu amihilon mati bahicca. Odocob amihilon mati bahic eu age cabi filfil ogina.  
\v 5 Eu odiwe, ege mati bahicha, ege cunug eu Kraisca gabandoc deweg osol biluquna. Odocob deweg amihilon mati bahic age gabandoc bilia eu odi egeha cunug osolosol gabandoc biluquna.   
\p
\v 6 Anut uqa egenu waug qocob dumanige igec filfil igen eu uqana eelgec uum igecna igen. Eunu dana oso uqa je hahun madecnu duman uteccafi eu uqa cois uqa duman utec ihocna waug meleec ihocna je hahun madigian.  
\v 7 Dana oso uqa dana cotugul cewel uadecnu duman uteccafi eu uqa cois dana cotugul cewel uadec cabi hewigian. Dana oso uqa iwaladecnu duman uteccafi eu uqa cois mele bahic iwaladec cabi hewigian.  
\v 8 Dana oso uqa dana cotugul wawaga gagadic tawecnu duman uteccafi eu uqa cois uqa dana cotugul wawaga gagadic tawec cabi hewigian. Dana oso uqa cotig ceteh utinafi waug lal qocca utigian. Dana oso uqa cabi cofdoc danafi uqa cofdoc cabi eu megameg mimi odigian. Dana oso uqa cotignu waug qocob cesuldonafi eu uqa ceelecca cesuldugian.   
\s1 Ege wawige meleecna cotigeil nalunuga mecnu  
\p
\v 9 Age wawaga meleecna cotogail nalunuga megina eu age mele bahic wawaga meleecna cotogail nalunuga meigale. Qisol mec kobol eu sagagdoiga. Kobol me bahic eu heweigale.  
\v 10 Age wawaga meleecna cotoga eunu age waliagwaliagwe nalug mecebmecebeigale. Age saolal mudecebmudecebecnu megameg meigale.  
\v 11 Age megameg mec eu cain toneiaun. Kis Gun age wawaga dunuh bilia eunu age wawaga Tibud toodocnu gagadic taweiale. Age Tibud cewel utoigale.  
\v 12 Ege ceteh hibna ocnu sumigi bilina eunu cisdumeig wawaga ceeleiale. Culumen ben oso ageca calecebfi age duuec taweigale. Anut inondoc kobol eu cain culuwain gaidgaid hewi cuhadoigale.   
\p
\v 13 Anutna dana cajaca qagoc leih coocooh ihoc qee lec eundec cesuladecnu cain culuwain age loo cahulec bileigale.   
\p
\v 14 Age tootooadi coboc eundec eeladeigale. Mele, cain geladowain! Eeladeiga.  
\v 15 Age ceeli bilegina eundecca ceeleigale. Age qaqaji bilegina eundecca qajeigale.  
\v 16 Age wawaga osol meceb coboigale. Cain deboii cobowain, age jogoii coboigale. Age agedodocnu ege dahinige qolocijec cahulec cain owain.   
\p
\v 17 Dana oso uqa kobol me qee odadecebfi age kobol me qeena cain wadacdowain. Odoc me dana fimeig saolal mudegina eu odocnu cisdoigale.   
\p
\v 18 Agena odocna jiccafi dana cunug gami wawaga osol mimeig bileiga.  
\v 19 O ijana danah bahic, agedodoc cahuldoc age odadegina eu ameg cain wadacdowain. Je cunug Anut culitoigale. Uqa gemag beceb ameg wadacadigian. Ge, loo je jaqec odi nijia, Tibud madena:  
\q1 “Cahuldoc kobol wadacdoc eu ijana cabi.  
\q1 Ijadodoc ameg me qee wadacdugen,” ena ec nijia. \rq (Loo 32.35)\rq*   
\m
\v 20 Euqa loo je jaqec odi madena:  
\q1 “Hinana cad uqa wen docobfi hina sab utugale.  
\q1 Uqa wa gab docobfi wa utugale.  
\q1 Eunu hina odi odocomfi eu hina ja sogca ilona haudocwe megan,  
\q2 odocob uqa kobol me qee odonnu majag dugian,” ena. \rq (Sindaun 25.21-22)\rq*   
\m
\v 21 Qisol mec eu culdecem cain woolheiaun. Qisol mec eu kobol mena wooldogale.   
\c 13  
\s1 Ege cunug gaid gabman ilo bisalu bileqan  
\p
\v 1 Dana cunug age gabman ilo bisalu gaid bileigale. Eu mele, gabman ilo eu gauc qee calena. Gabman ilo uqana cabi cunug eu Anut ebenna himec calen. Odocob gabman ilo cunug bileiga eu Anut uqadodoc madennu bileiga.  
\v 2 Eunu dana oso uqa gabman ilo jejeg wooldona eu uqa ceteh Anut men wooldona. Odocob dana eu age gabman ilo jejeg wooldogina eu age agedodoc agena ameg me qee oqagan.  
\v 3-4 Ge, dana kobol me odogina eundec age gabman ilo cucuiadoqagannu qee odogina. Euqa dana kobol me qee odogina eundec age gabman ilo cucuiadecnu biloub. Hina gabman ilo cucuidoga qee henafo? Uqa Anutna cabi dana uqa hina cesulheheb me bilegan. Eunu cucuidoganfi hina kobol me himec odoga, odocob hina binain suligian. Euqa uqa han sigin eu uqa ebenna bilina eu uqa gauc qee hewena. Uqa Anutna cabi dana dana kobol me qee odona eu ameg me qeena wadacdutocnu bilina. Eunu hina kobol me qee odifeg hina uqanu cucuiegan.  
\v 5 Eunu ege uqa bisalu bilecnu. Ege Anutna ameg me qee wadacdoc qee oqaunnu himec uqa bisalu biluquna qa ege wawigena doqona kobol eu me bahic ec madimeb toodu odoqona eunu uqa bisalu biluquna.   
\p
\v 6 Gug eunu himec agena takis fajec qaig helegina. Eu eetanu? Gabman ilo age Anutna cabi dana bilegina, odocob saen gaid age cabi eu himec cofdocnu gagadic megina.  
\v 7 Age ceteteh filfil dana adecnu cabica eu odi himec dana cunug adeiga. Takis cedec dana filfil eu age qaig adeiga. Dana uqa bisalu bilegina eu uqa bisalu bileiga. Dana age binan sulegina eu uqa binan suleiga.   
\s1 Ege dana cajaca cunug nalunuga mecnu  
\p
\v 8 Dana oso uqa cotignu nalug mena eu uqa loo je bahic toodona. Eunu dana osona ameg age dewenegana cain nijiaun. Ameg osol eu himec saen cunug nijina, age nalug mecebmecebegina.  
\v 9 Loo je leih eu odi gagadic madena:  
\q1 “Hina dana osona cajaca cain uqaca nijuwasin.  
\q1 Hina dana oso cain qocom cal meiaun.  
\q1 Hina cain heje magaun.  
\q1 Hina osona cetehnu cain amen qoiaun,” ena. \rq (Kisim Bek 20.13-15, 17; Loo 5.17-19, 21)\rq*  
\m Loo je eu odocob loo je leihca eu cunug ilo osol himec eu je odi madena:  
\q1 “Hina hinanel nalunin maganawe  
\q2 odi hina utuqain bilec\f + \fr 13.9 \ft Utuqain bilec uqana gug eu odi. Agena loofo, agena kobolfo eu dana osonu nalug magale ec qee madel, cois hina dana eunu nalug magale.\f* eundecnu nalug magale,” ena. \rq (Wok Pris 19.18)\rq*   
\m
\v 10 Dana oso uqa nalug mena eu uqa utuqannu kobol me qee qee odona. Eunu dana uqa nalug mena eu uqa loo je bahic toodona.   
\s1 Ege tutuc coboc bahic cobeqan  
\p
\v 11 Eetanu ija kobol eu odi odoqagannu maadigina? Saen qila bilia eunu age wele doin. Qila us nijec cuculeb cajecnu saen. Age dogina, ege wele wawige meleec dana calom, odocob Anut cahahagecnu saen cecelacca nijen. Qilaqa saen i wele gohic mena.  
\v 12 Witic eu qee memen odi cujedugia odona. Eunu tuna kobol eu culecnu. Odimeb han lotoc tacimeb fulacdoc kobolna bilecnu.  
\v 13 Ege ititom coboc dana cam fulacdocna cobona odi cobocnu. Ege cain fileii deboii gad ceu jecomun dalul qigiaun. Ege cecenec kobol cain oodi wal kobol majagca qeena ilag uduqaun. Ege cain fee dadanii dana osona cetehnu amige qoiaun.  
\v 14 Euqa age Krais Jisas Tibud umeig han lotoc cinigwe taqeiga. Odimeig dewenegana gale doc me qee toodocnu cain cisdowain.   
\c 14  
\s1 Age dana oso uqana coboc cain gesiluwain  
\p
\v 1 Odocob dana waug meleena qa uqana waug meleec eu gagadic qee, eu uqa tamanec dunuh ehudi ehi leiga. Euqa age uqa gami cisdoc filfilna cain fee dadanowain.  
\v 2 Dana oso uqa waug meleecnu gagadic bahic, odocob uqa ceteteh filfil cunug jena. Euqa dana cotig oso uqana waug meleec eu gagadic qee eunu uqa cuhun qee jena.\f + \fr 14.2 \ft Age je 1 Korin 8.1na nijia eu feiga.\f*  
\v 3 Odocob dana ceteteh filfil cunug jena uqa dana cuhun qee jena eu cain cewudeiaun. Odocob dana cuhun qee jena uqa dana ceteteh filfil cunug jena eu cain gesildoiaun. Ge, Anut uqa dana euha ehuden.  
\v 4 Hina dana adecnu dana oso uqana cabi dana dumannu gesildogona? Uqana cabina gagadic tawifei qee cabi eu toni qufei eu uqana tibudna ceteh himec. Tibud uqa himec eu ihoc gagadic mudeceb tawigian. Eunu uqa gagadic tawigian.   
\p
\v 5 Dana oso uqa deel oso eu uqa meca bahic cisdona, deel leih wooladec bilina ena. Odocob dana oso uqa deel cunug uqa caca dih bilina ec cisdona. Dana osolosol cunug agedodoc tebandodoig cisdu cuhadoigale.  
\v 6 Dana uqa deel oso me bahicnu cisdona dana eu uqa Tibudnu cisdudu odi odona. Odocob dana uqa ceteteh cunug jena dana eu uqa Tibudnu cisdudu ceteteh cunug jena. Ge, uqa Anut hetaga dumei ceteteh eu jena. Odocob dana uqa cuhun qee jena eu uqa Tibudnu cisdudu sab leihnu cud bilina. Odocob uqaha Anut hetaga dona.   
\p
\v 7 Ege doqona, ege gemona dana oso uqana cebac bilecnu qee cisdona eu uqadodoc uqana ceteh himec. Odocob oso uqa uqana cal mecnu qee cisdona eu uqadodoc uqana ceteh himec.  
\v 8 Ege cebac bilifeb ege Tibudnu biluquna. Odocob ege cal mifeb ege Tibudnu cal moqona. Eunu ege cebac bilifeb qee cal mifeb ege Tibudna himec.  
\v 9 Eu gug inu himec Krais cal mimei haun ceseli cajen. Eunu uqa dana age cal meinca dana age cebac bileginaca eu cunug agena Tibud biligiannu.   
\p
\v 10 Odocob hina eetanu cotinna jic coboc gegesileg je me qee madogona? Odocob hina eetanu cotin cewudogona? Age dogina, ege cunug Anut amegna tawocomun gesilgigian.  
\v 11 Ge, Anutna jaqec je odi madena:  
\q1 “Tibud odi madena, ‘Ija cebac bibilig mele bahic madigina, dana cunug ija amina gob cehoqagan.  
\q1 Odocob dana cunug conogana Anut binan suluqagan,’ ena,” je hahun jaqec odi madena. \rq (Aisaia 45.23)\rq*   
\m
\v 12 Eu odinu ege osolosol cunug egedodoc egena coboc Anut amegna qasali madeqan.   
\s1 Ege ceteh oso cain odocomun cotige tonimei silail meiaun  
\p
\v 13 Eunu ege gesildocobdocobec kobol eu culecnu. Ege jaih qeti qocnu ceteh oso odocomun cotige tonimei silail migiannu cain odoqaun ec odi cisdocnu.  
\v 14 Ija Jisas Tibudca gabandoc biligina eu iwalteceb ija ceteh cunug agedodoc amagana gegehinca qee eunu du cuhadugina. Euqa dana uqa cel cetehnu gegehinca eu odi cisdona uqa cisdonana himec ceteh eu gegehinca.  
\v 15 Ceteh hina jagana euna cotinna cisdoc me qee mudinafi hina nalug mec kobolna qee cobogona. Dana eu Krais uqa cahahadocnu cal men eunu hinana jec sab euna cain me qee mudugaun.  
\v 16 Eunu agena ceteteh memeca eu ceteteh me qee egina cain culuwain.  
\v 17 Ge, Anutna culna gug eu sab jec wa gab jecca kobol qee nijel. Uqana gug eu ititom cobocca malol bilecca ceelec Kis Gun iginaca nijia.  
\v 18 Dana uqa ceteh eu odina Krais cewel utona Anut uqanu gale dugian. Odocob dana age uqa dana me bahic ec cisdoqagan.   
\p
\v 19 Eunu ege kobol cunug euna malol biluquna eu toodocnu. Odocob kobol cunug cotige waug meleec gagadic mudecnu euha cesuldocobdocoboqale.  
\v 20 Hina sab jecnu himec cisdodog Anutna cabi cain me qee mudugaun. Ceteteh cunug eu jecnu me himec. Euqa hinana sabna dana oso qocom tonimei silail mifei eu hinana kobol me qee.  
\v 21 Hina cuhun jejegfo, qee wain jejegfo qee ceteh oso oodog cotin odudecem toni qona hina ceteh eu odi cain odogaun. Kobol eu odi qee odifeg eu kobol me bahic.  
\v 22 Hina hinana wawin meleecnu cisdoga hina wawin meleec eu hina Anutca alena ceteh himec hewaga. Dana uqa ceteh me bahicnu cisdona, odocob uqa waug ceteh eunu qee lecisca mena uqa ceelecca biligian!  
\v 23 Euqa dana oso uqa ceteh osonu waug lecisca meceb u jena euqa uqa eunu waug meleecca qee jenanu Anut uqa dana eunu silail dana ec madena. Ceteh cunug dana uqa waug meleecca qee odona eu silail.   
\c 15  
\s1 Ege Kraisna cisdoc dumanca toodoc bahic toodoqan  
\p
\v 1 Ege wawige meleec gagadicca ege dana wawaga meleec gagadic qee eundec cesuladecnu cabi oum. Agena culumen agedodoc gahidocwe qee eu ege gahidocnu. Egedodoc egena gale gec cain toodoqaun.  
\v 2 Ege osolosol cunug ege utuqanige uqadodoc dana me caligiannu uqana gale doc toodocnu. Odocob utuqanige uqana waug meleec duuec tawigian.  
\v 3 Ege doqona, Krais uqadodoc uqana gale doc qee toodol. Euqa uqanu Anutna jaqec je odi madena:  
\q1 “Dana hina je me qee mahein je me qee eu hu ija jahulten,” ena. \rq (Buk Song 69.9)\rq*   
\m
\v 4 Me je cunug wele Anutna jaqec jena jaqein eu ege iwalgecnu jaqein. Eunu me je jaqein eu odigeceb ege wawige meleec gagadic tatawi gaid biligian. Odocob euna Anut cahahagigiannu susumudi biluquna.  
\v 5 Odocob Anut uqa wawige meleec gagadic tawecca wawige meleec gaid bilecca uqa cesuladeceb age Krais Jisasca gabandoc Kraisna cisdoc toodudu wawaga osol bileigale.  
\v 6 Eu odina age wawaga osol memeig conoga gabandumeig Anut binan suleigale, Anut uqa egena Jisas Krais Tibud Memeg.   
\s1 Krais uqa Juda danaca Juda dana qee eundecca cesuladen  
\p
\v 7 Krais ege cedigen. Eu odiwe age cunug Anutna kobolkobolnu cotogail cedi wagoadecebil wawaga osol mimeig bileigale.  
\v 8 Ge, ija odi madigina, Anut uqa Juda dana jajanagail ijanagaca wele bilein eu je hahun maaden. Eunu Krais uqa Anut ija odigen ec maaden Anut eu uqa hibna odi odon eu mele ihacgecnu uqa dana ibuldumei Juda dana cewel uaden.  
\v 9 Eu odiha Juda dana qee eundec age Anut agenu waug qon eunu Anut binan sulecnu uqa odi odon. Eu odi Anutna jaqec je odi madena:  
\q1 “Eunu ija Juda dana qee eundec age gemona binain suligen.  
\q1 Odimig hina ijainnu due sisilig binain suligen,” ena. \rq (2 Samjuel 22.50; Buk Song 18.49)\rq*   
\m
\v 10 Odocob Anutna jaqec je osoha odi madena:  
\q1 “O Juda dana qee eundec age Anutna dana cajaca gami ceeleigale,” ena. \rq (Loo 32.43)\rq*   
\m
\v 11 Odocob Anutna jaqec je osoha madena:  
\q1 “Juda dana qee eundec cunug Tibud binan suleigale.  
\q2 Dana cajaca cunug Tibud saolal mudeigale,” ena. \rq (Buk Song 117.1)\rq*   
\m
\v 12 Odocob Aisaiaha maden:  
\q1 “Citah eu Jesena na gugna caligian.  
\q2 Dana eu uqa Juda dana qee eundec agena king biligian.  
\q1 Dana eu age uqanu wawaga meleeceb cahahaadigiannu sumudi biluqagan,” en. \rq (Aisaia 11.10)\rq*   
\p
\v 13 Anut uqa cahahagecnu sumudi biluquna uqa uqanu wawaga meleecna odadeceb age ceelecca malol bilecca wawagana ihoc leiale. Eunu Kis Gunna gagadic odocna Anutna saen me ageca hugiannu sumudegina eu age wawagana cunug ihoc ligian.   
\s1 Pol uqa me jenu je gagadic jaqiaden  
\p
\v 14 O wawaga meleec cotiel, ijana wawi meleec eu age wawagana kobol meme geh bahic am ben. Odocob age doc filfilha ihoc am ben. Eunu agedodoc ihoc iwaldocobdocobeeig cotogail cisdoc me bahic adoqagan.  
\v 15 Euqa je leih jaqiadem euna cacanigca. Anut uqa nesili ehitimei uqana cabi me bahic ija iten. Eunu jaqecnu qee jaen qitel. Je eunu ija age dahiniga hewem.  
\v 16 Cabi eu ija Krais Jisasna cewel dana Juda dana qee eundecnu cabi ugina. Ija nawel tawec ihanec danawe Anutna me je qasali maadigina. Eunu Juda dana qee eundec age ihanec caloqagan eu Anut gale dugian. Odocob Kis Gun uqa age Anutnu qaguadeceb age Anutna dana cajaca bahic caloqagan.   
\p
\v 17 Eunu ija Krais Jisasca cabi owona eu Anutna cabi hewiginanu culaigina.  
\v 18 Krais uqa ijana cabina Juda dana qee eundec odadeceb age Anutnu wawaga meleeceb uqana je toodu odoin. Cabi eu ija je madecnaca odocnaca odom eu himec qasali madecnu wawi taweia. Ija ceteh osonu qee qasali madigaun.  
\v 19 Ija cabi eu gaga odocnaca kobolkobol odocnaca Kis Gunna gagadic odocnaca odom. Eunu ija Jerusalem ono sanan mimig Kraisna me je cunug qasali mamadig cocobi nui Ilirikam hatu cunugna nuem.  
\v 20 Cabi ina hatu euna Kraisnu me je qasali maadecnu wawi ben taweia. Dana osona jo nah ohis ijana jo cehigaunnu ija Krais ijan qee doc bileginana me je qasali maadigina.  
\v 21 Euqa Anutna jaqec je odi madena eu gale tena:  
\q1 “Dana am uqa ijannu oso qee maadel eu age eu foqagan.  
\q1 Odocob dana uqana je qee dah melein eu age wawaga fogo dugian,” ena. \rq (Aisaia 52.15)\rq*   
\s1 Pol Rom fecnu cisdoc  
\p
\v 22 Saen geh bahic cabi i ijana jic cadawiten. Odocob ija ageca lecwe qee.  
\v 23 Euqa qila ija hatu inu ene biligina eu cabica qee. Odocob cabi gel madi ija ageca lecnu bahic cisdom.  
\v 24 Eunu hibna ija Spen hatuna nuigen saen euna age casac li meciadimig nuecnu cisdugina. Odocob ija age gami saen nag odi bibilomun wawi me meceb age ehiti Spen hatu jicna ehi nui cultuqagan.   
\p
\v 25 Euqa qila ija Jerusalem ono Anutna dana cajaca qagoc cesuladigennu nuigina.  
\v 26 Ge, Masedonia Akaiaca tamanec age agena qaig leih cedi gabandumeig Jerusalem ono Anutna dana cajaca qagoc cetetehnu sawen bilegina sulduadoqagannu je wele cagoin.  
\v 27 Age ceteh me odocnu cisdoin. Eu me bahic qa eu ageha Jerusalem agena ameg dewenegana nijia. Ge, Juda dana qee eundec age Juda agena dolonoga eeldoc ceteteh wele cedein. Eunu Juda dana qee eundec age Juda dananu ceteteh ceseli adecnu ameg eu oso nijia.   
\p
\v 28 Eunu ija qaig cunug age cedein eu Jerusalem dana cajaca adigen, ija cabi i casac qee mudi hedumig saen euna ija ageca nui calimig Spen hatuna nuigen.  
\v 29 Odocob ija ageca lelemin Kraisna eeldoc eu ijaca ihoc lec ageca caligen ec dugina.   
\p
\v 30 O wawaga meleec cotiel, ija niniadigina. Age egena Tibud Jisas Kraisnuca Kis Gunna nalug mecnuca age ijaca gabandocobil ege Anut ija cesultigiannu gagadic inondoqan eunu sisiladigina.  
\v 31 Age Anut uqa Judia dana age wawaga mele qee ec ebeneganadec cagasitigiannu inondoiga. Odimeig ijana cabi Jerusalem ono odigen eu dana cajaca qagoc ono bilegina eu age cabi eunu gale adigian eunuha inondoiga.  
\v 32 Eunu Anutna cisdocna ija wawi ceelecca li ageca caligen. Odocob ageca ono nag odi jaen mudigen.   
\p
\v 33 Anut uqa egena malol bilec uqa ageca cunug biliale. Mele.   
\c 16  
\s1 Pol dana cajaca feele ec maaden  
\p
\v 1 Age Fibi, ege cebinamige, lalafan oqagannu wawi nijia. Uqa Senkria tamanec cesuladec cabi caja.  
\v 2 Age Anutna dana cajaca qagoc Tibud ijannu cisdodoig Fibi ehudecebil age gemo biligiannu wawi taweia. Ege Anutna dana cajaca kobol odi odoum eu me. Odocob uqa dana cajaca geh cesuladen, odimei ijaha cesulten. Eunu uqa ceteh osonu culumencafi age cesuldoiga.   
\q1
\v 3 Priska Akwilaca ale Krais Jisasna cabi hijiel eunu age ijana feele ec aleiga.  
\v 4 Eu ale cal mec dodolaalen cesultesin. Eunu ija himec hetesin qee alelem qa Juda dana qee agena tamanec cunugha hegein alesina.   
\q1
\v 5 Odocob ijana feele ec tamanec eu alena jona cegulegina eu ageha adeiga.  
\q1 Age ijana feele ec Epinitas uteiga, ijana danah bahic. Uqa Asia hatu gadac nagnadec dana eu casac Kraisnu waug meleecca calen.   
\q1
\v 6 Age ijana feele ec Maria uteiga. Uqa age cesuladecnu cabi gagadic on.   
\q1
\v 7 Age ijana feele ec Andronaikas Juniasca aleiga, eu ale ijana sihulnadec, eu ale ijaca gihacdoc jona bilom. Ale aposel gemona ijanalaca, odocob ija Kraisca qee lec eu ale Kraisca casac lesin.   
\q1
\v 8 Age ijana feele ec Amplietas uteiga, uqa Tibudna kobolna eu ijana danah bahic bilia.   
\q1
\v 9 Age ijana feele ec Eben uteiga, uqa Kraisna cabinu cabi hi. Odimeig Stekisha ijana feele ec uteiga, uqa ijana danah bahic bilia.   
\q1
\v 10 Age ijana feele ec Apelis uteiga, uqa Krais toodocnu ijanca.  
\q1 Age ijana feele ec Aristobjulas uqana jo osol eu age adeiga.   
\q1
\v 11 Age ijana feele ec Herodion uteiga, uqa ijana sihulnadec.  
\q1 Age ijana feele ec Nasisasna jo osol eu age adeiga, eu age Tibudna bilegina.   
\q1
\v 12 Age ijana feele ec Traifina Traifosaca aleiga, eu ale Tibudna cabinu cabi gagadic esina.  
\q1 Age ijana feele ec Pesis uteiga, uqa ijana caja danah bahic. Uqa Tibudnu cabi gagadic bahic on.   
\q1
\v 13 Age ijana feele ec Rufas uteiga, uqa Tibud toodocnu dana me bahic. Odocob uqa anag euha feele ec uteiga, uqa ija au odi bilina.   
\q1
\v 14 Age ijana feele ec Asinkritasca Fligonca Hemisca Patrobasca Hemasca, odocob cotiel eu ageca bilegina eu age cunugca odi adeiga.   
\q1
\v 15 Age ijana feele ec Filologas Juliaca aleiga, odocob Nerias cebinagca Olimpiasca Anutna dana cajaca qagoc eu age gami bilegina eu cunugca feele ec adeiga.   
\q1
\v 16 Anutna dana cajaca egena kobol age osolosol cunug cotogail cotec gunna cotdocobdocobeigale.  
\q1 Kraisna tamanec cunug age feele ec adegina.   
\s1 Dana leih age tamanec qatanegina  
\p
\v 17 O wawaga meleec cotiel, ija cesusadigina. Dana leih age tamanec qatanegina. Age wawaga meleec dana cajaca je iwaladein eu hibemdocnu sigaladein. Age agena wawaga meleec wagalegina. Eunu age dana eundec hibemadeiga.  
\v 18 Dana eundec egena Tibud Krais qee cewel utogina. Age agedodoc agena gale adec dewenega eu himec toodogina. Odimeig je tincana dana diadec jenaca dana wawaga meleec eu gagadicca qee eundec wawaga meleec temdocwe megina.  
\v 19 Rom tamanec, age Anutna me je toodu odogina ec eu dana cunug wele dah mein. Eunu ija agenu ceeligina. Euqa age kobol me bahic eu doqagannu wawi taweia, odocob kobol me qeenu qee cisdowain.  
\v 20 Odocob Anut uqa malol bilec eu saen nag odi Seten lahacdocob jaimaga bisalu nugian.  
\p Egena Tibud Jisas Krais uqana eelgec uum igec eu ageca biliale.   
\s1 Dana leih age Rom dana cajaca feele ec maadecnu suladein  
\p
\v 21 Ija cabi hi Timoti uqa uqana feele ec ageca suldona. Odocob Lusiasca Jesonca Sasipataca eu age ijana sihulnadec ageha agena feele ec ageca suldogina.   
\p
\v 22 Ija Tetias, ija Pol cogulna je uganu je i jaqigina, ija Tibud ijanna feele ec ageca suldugina.   
\p
\v 23-24 Gaias uqa feele ec ageca suldona. Uqa uqana jona me bahic coftena, odimei uqa tamanec cunugha odi cofadena.  
\p Erastas uqa taun ben ene uqana kuskus uqaca ege cotige Kwotasca eu ale feele ec ageca suldosina. [Krais Jisas uqana eelgec uum igec ageca biliale. Mele.]   
\s1 Ege Anut binan sulec bahic suleqan  
\p
\v 25 Me je ija qasali madigina eu Jisas Kraisnu me je. Me je eu wele bahic jahunec bilen eu qilaqa Anut uqa camasac muden. Anut uqa me je euna agena wawaga meleec gagadic tawigiannu ihoc odona.  
\v 26 Qilaqa Anut odocob je hahun madec dana agena jaqec jena me je eu camasac caligian. Anut uqa bileceb catanena uqa madeceb dana cajaca mahana cunug bilegina eu age me je eu dah mein. Eunu dana cajaca cunug age wawaga meleeceb me je eu toodoin.  
\v 27 Anut eu uqa osol himec uqa docca bahic. Uqa ceteh cunug Jisas Krais umna odon eunu ege binan sulocomun cataneiale! Mele!