\id MRK  - Amele NT and Genesis [aey] -Papua New Guinea 1997 (DBL 2014) 
\h MAK 
\toc1 Me Je i Mak Jaqen 
\toc2 Mak 
\toc3 Mk 
\mt2 Me Je i  
\mt1 Mak Jaqen  
\imt1 Aqunec Je  
\ip Me je i cel dana bahic jaqen eu je oso qee nijel. Euqa Kristen tamanec cofadec dana age wele Jisas Krais mahana cobon saennadec li saen qila nijia eu Jon Mak, Pitana danah, uqa me je i jaqen ec madein. Me je ina je mati eu Pita uqana me je madec euqa Mak jaqen. Jon Mak uqa Jisasna malogom oso. Uqa anagna jona Jerusalem ono wawaga meleec dana cajaca age ceguloig. (Aposel 12.12 feiga.) Pol Banabasca ale Jerusalemdec Antiok taunna ceseli belesin saenna Jon Mak aleca belein. (Aposel 12.25 feiga.) Mak uqa age Jisas hewudein eu fen. Dana haun i lotoc nag himec taqen uqa age hewudoqaga bili odoinqa uqa bical bubusali bilei lotoc eu culen eu uqa Jon Mak. (Mak 14.51-52 feiga.)  
\ip Makna me je sanan mec eu je i Jisas Kraisnu me je, uqa Anut Melah ec madena. Me je ina Mak uqa Jisas eu Kraisca, eu Anut Melahca eunu ihacena. Jisas uqa dana Anut uqa uqana gagadic odoc utimei gagadic odoc euca cabi on eunu ihacena. Uqa dana cajaca je iwaladen euca, uqa buga me qee dana cajaca deweneganadec ititacaden euca, uqa dana cajaca agena silail cagasiaden euca, uqana odoc eu cunug Jisas uqa dana Anut gagadic odocca bilen ec ihacena. Jisas uqadodocnu ija Dana Melah, ijana cebac bilec eu dana cajaca mati besiadec fajadecnu culigen imei eunu toni nem ec maden. (Mak 10.45 feiga.)  
\ip Mak uqa Jisas odi odonnu je mati jaqen. Uqa gaid Jisas odi odimei mahuc odi odon ec jaqen. Mak uqa Jisas dana cajaca je iwaladen eunu je mati qee jaqel. Euqa Mak uqa Jisas eu iwaladec dana je mati jaqen. Mak uqa casac Wa Joadec Jonnu jaqen. Odimei Jon uqa Jisas wa joudeceb Kis uqa Jisas u suldocob wadauna nueceb Seten temdon eunu jaqen. Odimei eu hedocob Jisas uqa dana cajaca me madecnu cabica, me je iwaladecnu cabica odon eunu jaqen. Casac Jisasna malogom age Jisas uqa in tutuc qee doloin, euqa cebitcebit uqanu dodoig li Pita uqa Jisas eu Anutna Krais ec maden. (Mak 8.29 feiga.) Euqa Juda dana benben age Jisasna cad mimeig age hibna uqanu gemanaga ben beceb uqa qocobil cal mecnu togodoin ec feigale. Makna me je cit qoc age Jisas na babalecna tuitu qocobil cal mimei ceseli cajennu saena.  
\ip Makna me je cit qoc lecis nijia eu [ ]na gadac men. Cit qoc je i docca dana age Mak eu qee jaqel, euqa dana fil oso jaqen, ec cisdoin.  
\is1 Je Dunuhnu Dado Mec  
\io1 1. Jisas uqa uqana cabi oc sanan men (1.1-13)  
\io2 A. Wa Joadec Dana Jon uqa Jisas aqunidon (1.1-8)  
\io2 B. Jon uqa Jisas wa jouden (1.9-11)  
\io2 C. Seten uqa Jisas temdu fen (1.12-13)  
\io1 2. Jisas uqa Galili hatuna uqana cabi on (1.14-6.29)  
\io2 A. Uqana cabi Galili hatuna sanan men (1.14-3.12)  
\io3 1. Uqana malogom aquniadec utaadeceb toodoin (1.14-20)  
\io3 2. Uqa kobolkobol odoc Kapaneam jobonna odon (1.21-34)  
\io3 3. Uqa Galili hatuna cocobi nuen (1.35-45)  
\io3 4. Uqa Kapaneam jobonna cabi on (2.1-11)  
\io3 5. Jisas Juda agena cuha deelna cabi qee oc eunu maden (2.23-3.12)  
\io2 B. Uqa Galili hatuna uqana cabi haun on (3.13-6.29)  
\io3 1. Jisas aposel 12-pela nesili ehaden (3.13-19)  
\io3 2. Uqa Kapaneam dana cajaca iwaladen (3.20-35)  
\io3 3. Uqa Anutna culnu galolo je maden (4.1-34)  
\io3 4. Uqa Galili wa gad cagoc leti nuen (4.35-5.20)  
\io3 5. Uqa Galili ono kobolkobol odoc haun odon (5.21-43)  
\io3 6. Nasaretdec dana cajaca age Jisas hibemdoin (6.1-6)  
\io3 7. Jisas uqana malogom 12-pela lecislecis suladeceb belein (6.7-13)  
\io3 8. Herod uqa Jisasnu Wa Joadec Jon ec cisdon (6.14-29)  
\io1 3. Jisas uqa Galili hatu culdimei cudun filfil nuen (6.30-9.32)  
\io2 A. Uqa Galili wa gad cagoc leti uqa cudun ono isec nuen (6.30-52)  
\io2 B. Uqa Galili wa gad cagoc ceseli leti uqa Genesaret hatuna nuen (6.53-7.23)  
\io2 C. Uqa Fonisia hatuna nuen (7.24-30)  
\io2 D. Uqa Dekapolis hatuna nuen (7.31-8.10)  
\io2 E. Uqa Sisaria Filipai ono isec nuen (8.11-9.32)  
\io1 4. Jisas uqa Galili hatuna uqana cabi hedon (9.33-50)  
\io1 5. Jisas uqa Judia hatunaca Peria hatunaca cabi on (dac 10)  
\io2 A. Jisas uqa ocobocobec kobol cagocnu iwaladen (10.1-12)  
\io2 B. Jisas uqa mel simnu iwaladen (10.13-16)  
\io2 C. Dana haun cehewanca uqa Jisasca hocob madesin (10.17-31)  
\io2 D. Jisas uqa cal mimei ceseli cajigian ec maden (10.32-34)  
\io2 E. Jems Jonca ale Jisas je madowasannu bilesin (10.35-45)  
\io2 F. Jisas dana oso, ijan Batimias, uqa ameg galuc mec me muden (10.46-52)  
\io1 6. Deel 6-pela hedocob Pasowa Sab Jec Ben Deel caligiannu ninijen Jisas uqa age qocobil cal migiannu Jerusalem ono nuen (dac 11-15)  
\io2 A. Jisas uqa kingwe Jerusalem dunuh len (11.1-11)  
\io2 B. Jisas uqa tempel jo soidon (11.12-19)  
\io2 C. Jisas uqa Juda dana benben gami fee dadani hedoin (11.20-12.44)  
\io2 D. Jisas uqa Oliw Aluhna cit qoc saennu maden (dac 13)  
\io2 E. Juda dana benben age Jisas qocnu jic walein (14.1-2)  
\io2 F. Caja oso Jisas ilona mool dedeman me bahic joiden (14.3-11)  
\io2 G. Age Jisas hewudi gesildumeig na babalecna tuitu qocobil cal men (14.12-15.47)  
\io1 7. Jisas ceseli cajimei leih age uqa fein (dac 16)  
\c 1  
\s1 Wa Joadec Jon Tibudna jic saciadon  
\r (Matju 3.1-12; Luk 3.1-9, 15-17; Jon 1.19-28)  
\p
\v 1 I Jisas Krais uqana me je\f + \fr 1.1 \ft Jisas uqa calenna uqa dana cajaca Anutna me je qasali maaden. Anut uqa Jisas uqana cebac bilecca, uqana cal mecca, uqana ceseli cajecca euna dana cajaca cahahaadecnu ihoc eu Anutna me je.\f* sanan mec, uqa Anut Melah.   
\p
\v 2 Anutna je hahun madec dana, Aisaia uqa je jaqen eu odi calen:  
\q1 “Feiga, ija ijana sos suldocomin aqunihi nuigian.  
\q1 Uqa hinana jic saciadugian. \rq (Malakai 3.1)\rq*   
\q1
\v 3 Dana jejeg oso wadauna\f + \fr 1.3 \ft Age je Matju 3.1na nijia eu feiga.\f* bibili utai maadena,  
\q1 ‘Tibudna jic saciadoiga.  
\q2 Uqana jic tutuc mudeiga,’ adena,” en. \rq (Aisaia 40.3)\rq*   
\p
\v 4 Odocob Wa Joadec Jon uqa wadauna camasac men. Uqa dana cajaca je qasali maaden, “Agena silailnu tului falicdumeig wa joadec oiga. Odi odocobilfi Anut uqa agena silail cagasiadigian,” aden.  
\v 5 Dana cajaca Judia hatuna bileginaca, dana cajaca Jerusalem bileginaca age cunug Jonca lein. Limeig age agena silailnu je qasali madocobil Jon uqa Jodan Wana wa joaden.   
\p
\v 6 Jon uqa kamel bagicna lotoc mudec tacoloi, odimei uqa wailohna dool ganacna oologam mudec taqoloi, odimei uqa sisca mehud uqana waca joloi.\f + \fr 1.6 \ft Age je Matju 3.4na nijia eu feiga.\f*  
\v 7 Uqa dana cajaca je qasali maaden, “Dana oso uqa hib tooti hugian, uqana gagadic odoc ijana gagadic odoc wooldona. Uqa dana meca bahic. Ijaqa dana meca qee. Ija uqana cabi dana me bahic ihoc qee, ija jogoimig uqana jaih tacec halu cufalitocwe qee.  
\v 8 Ija age wana wa joadigina qa uqa age Kis Gunna wa joadigian,” aden.   
\s1 Jon uqa Jisas wa jouden  
\r (Matju 3.13-17; Luk 3.21-22)  
\p
\v 9 Saen euna Jisas Nasaretdec Galili hatuna hocob Jon Jodan Wana wa jouden.  
\v 10 Odocob Jisas wanadec cali beceb mahucwe sao ohis jic cebec hudeceb Kis cuhudid cinigwe uqaca nenen tebandu fen.  
\v 11 Odocob jejeg oso sao ohisdec camas mi madon, “Hina ija melami nalunin migina. Ija hinanu wawi ben ceelena,” don.   
\s1 Seten uqa Jisas temdon  
\r (Matju 4.1-11; Luk 4.1-13)  
\p
\v 12 Saen euna bahic Kis uqa Jisas u suldocob wadauna nuen.  
\v 13 Uqa wadauna deel 40 cunug Seten temdodon bilen. Uqaha dool cusca ono bilen. Uqa odi bibilen ensel age cewel utoin.   
\s1 Jisas uqana cabi oc Galili hatuna sanan men  
\r (Matju 4.12-17; Luk 4.14-15)  
\p
\v 14 Aria, age Jon hu hewimeig gihacdoc jona mudi hedocobil Jisas Galili hatuna limei cocobi Anutna me je qasali mamadi maaden.  
\v 15 Uqa maaden, “Saen Anutna cul cali hoia nijia. Anutna cul eu age cemenega hona. Agena silailnu tului falicdumeig me jenu wawaga meleeiale,” aden.   
\s1 Jisas cul dool cedec dana 4-pela utaadeceb toodoin  
\r (Matju 4.18-22; Luk 5.1-11)  
\p
\v 16 Saen Jisas Galili wa gad cagocna cocobi dana oso waliagca fecialen, eu Saimon uqa waliag Andruca. Ale cimec ben wana hehelesin fen. Ge, ale cul dool cedec dana.  
\v 17 Odocob Jisas maalen, “Hu tootecebil ija odalecemin ale dana cajaca cedadec dana calowasan,” alen.  
\v 18 Odocob mahuc bahic ale cimec ben cuculesi uqa toodu belesin.   
\p
\v 19 Uqa nag bahic onoca limei dana oso waliagca haun fecialen, eu Jems uqa Sebedi melah, uqa waliag Jonca. Ale alena wagna bibilesi cimec ben tatalec eu haun wewegi bilesin.  
\v 20 Jisas mahucwe utaalen. Odocob ale memela Sebedi uqana cabi danaca wagna bibilegin cuculadi limesi Jisas toodu belesin.   
\s1 Jisas uqa dana osona buga me qee ititacdon  
\r (Luk 4.31-37)  
\p
\v 21 Age Kapaneam jobon hoin. Odocobil mahucwe Juda agena cuha deelna Jisas uqa Juda agena cuha jo dunuh limei je maadi iwaladen.  
\v 22 Uqa agena loo je iwaladec dana oso cunug maadeinwe odi qee maadel qa uqa dana oso, Anutna gagadic odocca madenawe, odi iwalaadi maaden. Eunu uqa je eu maadi mamaden dana cajaca age wawaga cacaden bilein, uqana iwaladec je eu wawaga qon.   
\p
\v 23 Ono deel euna bahic dana oso uqa buga me qeeca bilen, buga eu gegehinca uqana jo ibuldon.  
\v 24 Uqa utai Jisas madon, “O Jisas Nasaretdec, hina eetanu odigigana? Hina fadalgecnu hogafo? Ija hina cel dananu dugina. Hina dana gun eu Anut suldocob nen,” don.  
\v 25 Euqa Jisas buga me qee eu cahacdudu madon, “Je culuga. Dana cuculdi qisacdoga,” don.  
\v 26 Odocob buga me qee gegehinca eu dana odudeceb uqa titi hudeceb qelelen. Odocob geh bahic euimei dana eu cuculdi qisacdon.  
\v 27 Odocob dana cajaca cunug tumatumaimeig agedodoc madocobmadocobi sisilein, “Eu eeta? Dana i je haun iwalgena! Uqa Anutna gagadic odocca buga me qee gegehinca eundec dih maadeceb age co toodu odogina,” ein.  
\v 28 Odocob Jisas hutan hatuhatu mahucwe ihoc len, Galili hatuna alildu bilein euha cunug doin.   
\s1 Jisas Pita momoig me muden  
\r (Matju 8.14-15; Luk 4.38-39)  
\p
\v 29 Jisas mahucwe Juda agena cuha jo eu culdimei cocobi Saimon Andruca alena jona len. Uqa gami Saimon Andruca, Jems Jonca age jo dunuh lein.  
\v 30 Ono Saimon momoig uqa hag deweg daincaca hulen cabalna nijen. Odocob Jisas ono li caleceb mahucwe uqa caja hag nijennu madoin.  
\v 31 Odocobil Jisas caja cemenug limei eben hewi cesuldocob cajen. Odocob hag deweg dainca hulen eu culdeceb caji sab saciadumei cewel uaden.   
\s1 Jisas dana caja matica me maden  
\r (Matju 8.16-17; Luk 4.40-41)  
\p
\v 32 Odocob wesu men cam toneceb age hag aqecca buga me qee hewadecca eundec cedadi Jisasca ahoin.  
\v 33 Odocob dana cajaca age jobon ben euna bilein age cunug Jisas bilen jo eu amegna cegulimeig bilein.  
\v 34 Jisas uqa hag gug filfil nijein mati bahic me maden. Uqa buga me qee dana deweneganadec hewadein mati bahic ititacadeceb dana cuculadi belein. Buga me qee age Jisasna gug doin eunu uqa eundec cahacadeceb je qee madelein.\f + \fr 1.34 \ft Jisas uqa Anut Melah, odocob uqa dana Anut uqana dana caja cahahaadecnu wele nesili ehuden. Grik jena age dana eu Krais ein, odocob Hibru jena age dana eu Mesaia ein. Age Mak 1.1 feiga. Juda dana age Anut uqa dana eu suldocob hugian eunu doin. Euqa age dana eu kingwe calimei uqa Rom dana Juda agena hatunadec ititacadeceb Isrel age besiadec haun biluqagan ec cisdoin. Euqa Jisas uqa cabi oc i odi odocnu qee hol. Eunu uqa buga me qee age uqana gugnu madecebil dana cajaca age docnu qee gale dol.\f*   
\s1 Jisas Galili hatuna cocobi nuen  
\r (Luk 4.42-44)  
\p
\v 35 Qasil bahic walag qee danec tu ninijen Jisas caji jo culimei cudun tiliec bahicna, dana oso qee bilec, euna nuimei ono uqa Anut inondudu bilen.  
\v 36 Odocob Saimon uqaca bilein eundecca Jisas wawali toodoin.  
\v 37 Uqa gulucdumeig madoin, “Dana cunug wawalhi cobogina,” doin.  
\v 38 Odocobil Jisas maaden, “Ija me je qasali maadigennu caji lem. Eunu ija jobon cunug alilgi bilegina eundec dana cajaca me je qasali maadigennu ege jobonjobon coboqale,” aden.  
\v 39 Odimei Jisas uqa Galili hatuna jobonjobon cocobi Juda agena cuha jonana me je qasali mamadi maadimei buga me qee eundec uqa dana deweneganadec ititacadeceb dana cuculadi belein.   
\s1 Jisas dana oso uqa lepra hagca me muden  
\r (Matju 8.1-4; Luk 5.12-16)  
\p
\v 40 Saen euna dana oso deweg lepra hagca Jisasca humei uqa amegna gob cecehi Jisasnu cuha fefei ninidudu madon, “Hina ija me mitiga hecebfi ija me mitecem ijana hag culteceb ija Anut amegna cataniec bilecnu ihoc,” don.\f + \fr 1.40 \ft Age je Matju 8.2na nijia eu feiga.\f*  
\v 41 Odocob Jisas dana eunu walol docob eben huleldumei deweg qududodoi madon, “Ija me mihiga tena. Me maga!” don.  
\v 42 Saen eunadih lepra hag eu uqa dewegna culdeceb deweg hul hon.  
\v 43-44 Odocob Jisas uqa dana eu gagadic madon, “Dah maga, ceteh inu oso cain bahic sadudu cobogaun. Euqa li dewen nawel tawec ihanec dana eu hina dewen ihacdocom maleldugian. Odimeg Moses loo je wele maden eu toodumeg hina qila Anut amegna cataniec biliga dana cajaca cunug ihacadecnu Anut ihandogale,” don. Madu hedumei mahuc suldocob nuen.  
\v 45 Dana euqa uqa nunui feei je eu cunug saadi cobon, hatuhatu cunug je eu doin. Odonnu Jisas uqa camasac jobon osona lecwe qee. Uqa jobon hahagum maha danaca qee euna biloloi. Euqa dana cajaca age hatu nahanaha cunugdec uqa cemenug hoin.   
\c 2  
\s1 Jisas dana oso eben jaih laleg mecca me muden  
\r (Matju 9.1-8; Luk 5.17-26)  
\p
\v 1 Deel leih hedocob Jisas ceseli Kapaneam jobon hu jona bibilen\f + \fr 2.1 \ft Jo eu inna jo ege qee doqona. Euqa Jisas uqa Kapaneam ono cali bilen saenna uqa jo euna bilen eu odi fena. Dana leih age jo eu Pita Andruca alena ec cisdogina. (Age Mak 1.29 feiga.\f* uqa hutan camas meceb dumeig  
\v 2 dana cajaca mati bahic hu cegulein. Jo cunug ihoc leceb cudun oso bilecnu ihoc qee. Jo cebecna ha ihoc len bibilegin Jisas me je qasali maaden.  
\v 3 Odi bibilegin dana 4-pela age dana laleg hagca oso gabagabna ninijen hehewi ehudi ahoin.  
\v 4 Dana cajaca age gitim bahic bibilegin age Jisas amegna ehi li mudecnu jicca qeenu age jo ohis tobein.\f + \fr 2.4 \ft Juda age agena jo eu bokiswe ceholoig. Jo ohis eu tutuc, eu dana cobocnu ihoc. Jo eu lan qeihna tawein, eu dana ohis tobecnu ihoc.\f* Tobimeig Jisas tawenna jo qab iwesdumeig gabagab dana nijen eu halu bagimeig Jisas tawen uqa amegna gulucuhdogin nen.  
\v 5 Odocobil Jisas age wawaga meleen fimei dana jaih ebenca laleg mec madon, “Melami, hinana silail cagasihiga qee meia,” don.   
\p
\v 6 Ono Juda agena loo je iwaladec eundec osooso dana gemona bilein. Age Jisasna je uqa dana laleg mec eu madodon dumeig filiciti wawagana madein,  
\v 7 “Dana i adi je odi madena? Uqa Anut cewudec je madena! In silail cagasiadecnu ihoc? Eu Anut himec uqa ihoc,” ein.  
\v 8 Age odi wawagana mamadegin Jisas mahucwe agena cisdoc eu waugna dumei maaden, “Age wawagana eetanu je i madegina?  
\v 9 Cel je madecnu cacanigca qee? Ija dana laleg hagca i madugen, ‘Hinana silail cagasihiga qee meia,’ dugenfo, qee ‘Cajimeg hinana gabagab u hewimeg jic coboga,’ dugenfo?  
\v 10 Euqa Dana Melah mahana silail cagasiadecnu gagadic odoc ebenna nijia eu doqagannu ihacadigen,” aden. Odimei uqa dana laleg hagca madon,  
\v 11 “Ija hina mahigina, cajimeg hinana gabagab umeg gahidu jobon nuuga,” don.  
\v 12 Odocob uqa cajimei mahucwe age amagana uqana gabagab u hewi nuen. Dana cajaca ono age odi oodon fimeig age cunug tumatumaimeig Anut binan susuli madein, “Ege wele oso odi qee oodon folom,” ein.   
\s1 Jisas Liwai utadocob toodon  
\r (Matju 9.9-13; Luk 5.27-32)  
\p
\v 13 Jisas haun ceseli Galili wa cagoc lanna nu bibilen dana cajaca mati bahic uqaca hocobil je maadi iwaladen.  
\v 14 Odimei uqa jic cobi nunui uqa Alfias melah, Liwai, takis cedec jona bibilen fen. Fimei madon, “Tootaga,” don. Odocob Liwai uqa cajimei Jisas toodu nuen.   
\p
\v 15 Odocob hibna Jisas uqa Liwaina jona sab jejei bilen. Bibilen takis cedec danaca, silail danaca, mati ageha Jisas uqana malogomca gami sab jejegin bilein. Ge, dana mati bahic Jisas toodoin.  
\v 16 Odocob loo je iwaladec age Farisi sihul eundec age Jisas uqa silail danaca takis cedecca gami sab jejegin fimeig age uqana malogom maadein, “Uqa eetanu takis cedecca silail danaca eundec gami sab jegina?” adein.  
\v 17 Odocobil Jisas je eu dumei maaden, “Hagca qee age hag me madec danaca qee legina. Qeeo. Hagca himec age hag me madec danaca legina. Ija ititom dana cajaca ‘Age agena silailnu wawaga tului falicdoigale,’ ec utai maadecnu qee holom. Euqa ija silail dana cajaca ‘Age agena silailnu wawaga tului falicdoigale,’ ec utai maadecnu hom,” aden.   
\s1 Jisas sabnu qagu bilec eunu maden  
\r (Matju 9.14-17; Luk 5.33-39)  
\p
\v 18 Saen oso hibna Wa Joadec Jon uqana malogomca Farisi agena eundecca age Juda agena kobol toodu sabnu qagu bilein. Odocobil dana leih humeig Jisas sisildoin, “Eetanu Wa Joadec Jonna malogomca Farisi agena malogomca gaid esuesu sabnu qagu bilegina qa hinana malogom eu qee sabnu qagu bilegina?” doin.  
\v 19 Odocobil Jisas jejenega hewi maaden, “Age dana caja ocobocobecna cegulein bilegina eunu age caja oc dana eu gami bibileig adi sabnu qagu biluqagan? Qeeo, caja oc dana eu age gami bibileig cain sabnu qagu biluwain.  
\v 20 Euqa saen oso hibna dana leih hu caja oc dana cawaladecebil deel euna age sabnu qagu biluqagan,” aden.   
\p
\v 21 “Oso uqana lotoc hilah giloccanu eu eeldugia bili, uqa lotoc fan haun qee cusec tatacan qee gisena. Eu odi odoubmiqa age lotoc cusecebil fan haun eu nag meceb eu gesacna haun ceseli balahadu bendoub. Wele balahadon eu wooldu qatanoub.  
\v 22 Odiha oso uqa wain haun jool mecmec ganacna mudec hilahna qee o danena. Jool mecmec ganacna mudec eu galalec eunu odoubmiqa wain haun eu jool ganacna mudec hilah qatanoub, wain basecdu cusdoub, odocob jool ganacna mudecha qatani cusdoub. Qeeo, age wain haun jool mecmec ganacna mudec haunna o danegina,” aden.\f + \fr 2.22 \ft Age je Matju 9.16-17na nijia eu feiga.\f*   
\s1 Jisas Juda agena cuha deelna cabi qee oc eunu maden  
\r (Matju 12.1-8; Luk 6.1-5)  
\p
\v 23 Juda agena cuha deel osona Jisas uqana malogom gami cocobi wit cabi osoosona gemogemo li beli coboin. Bebeli cocobi uqana malogom age wit aig wal mec tawen qu u ehi lein.  
\v 24 Oodogin Farisi leih age Jisas madoin, “Faga, hinana malogom eetanu ceteh oso egena cuha deelna loo je cahacgena eu odogina?” doin.\f + \fr 2.24 \ft Age je Matju 12.2na nijia eu feiga.\f*   
\p
\v 25 Odocobil Jisas jejenega hewi maaden, “Age Dewid odonnu je oso qee sanijeleinfo? Uqaca uqana eundec age gami coboinca age wele sabca qee bilimeig wen adeceb  
\v 26 uqa Abaiata ihanec dana ilo bibilen saen euna Anutna jona limei Anutnu ihanec bred oso u jen. Bred eu dana gauc jecnu Mosesna loo je cahacaden. Nawel tawec ihanec dana age himec jecnu cois ena. Dewidha dana age uqaca coboin bred eu adeceb osoben jein,” aden.   
\p
\v 27 Jisas odi maadimei maaden, “Anut uqa cuha deel saolal mudigia bili dana eunu qee ifani madel qa Anut uqa dana me biluqagannu cuha deel muden.  
\v 28 Eunu Dana Melah uqa Tibud, uqaha cuha deel uqana ilo bilina,” aden.   
\c 3  
\s1 Jisas Juda agena cuha deelna dana oso eben cogogec me muden  
\r (Matju 12.9-14; Luk 6.6-11)  
\p
\v 1 Jisas haun Juda agena cuha jo dunuh len. Ono dana oso uqa eben gatoc men bilen.  
\v 2 Dana leih ono bilein eu age Jisas uqa cuha deelna dana eben gatoc men me mudigianfo eunu cofdudu mecidoin. Uqa odi odocobfi ege dewegnu je um qoqan ec cisdoin.  
\v 3 Odocobil Jisas dana eben gatoc men eu madon, “Ene hogale,” don.  
\v 4 Odimei dana sisiladi maaden, “Cuha deelna ege dana me odadecnu loo je cois ec madenafo, qee ege dana waadecnu cois ec madenafo? Cuha deelna ege dana cahahaadecnu loo je cois ec madenafo, qee ege dana aqocomun cal mecnu cois ec madenafo?” aden. Uqa odi maadeceb age conoga culec bilein.  
\v 5 Odimei Jisas uqa talilaadi meciadimei gemag ben. Age wawaga tool ibuldon eunu waug me qee men. Odimei dana eu madon, “Hina eben heli huleldoga,” don. Odocob uqa eben heli huleldocob me men.  
\v 6 Odocob Farisi age cuculdi nuimeig Herodna dana eundecca mahuc cegulecebil age Jisas qoqagannu jic wawali je togodoin.\f + \fr 3.6 \ft Age je Matju 12.14na nijia eu feiga.\f*   
\s1 Dana cajaca mati bahic age Galili wa gad cagocna cegulein  
\r (Luk 6.17-19)  
\p
\v 7 Jisas uqana malogom gami Galili wa gad cagocna ceseli belein. Dana cajaca am ben bahic Galili hatunadec tooadi belein. Leihha age Judia hatunadec,  
\v 8 leih Jerusalemdec, leih Idumia hatunadec, leih Jodan Wa ono isecdecca, leih Taia Saidonca alildu bilein eunadecca, dana cajaca mati bahic age Jisas uqa odi odona ec dumeignu uqaca hoin.  
\v 9 Dana cajaca mati bahicnu age Jisas gihacguhucdowainnu uqa uqana malogom maadeceb uqa wag osona tobigiannu gaid saciadu mudecebil tawen.  
\v 10 Ge, uqa mati bahic me maden. Eunu dana caja hagca eundec age Jisas deweg hewi feqan imeig uqa cemenug bahic lecnu gihacdodi gagadic bahic mein.  
\v 11 Buga me qee age dana cajaca deweneganadec cali hu bebeli Jisas fecebil dana cajaca age amegna toni mahulimeig utai madein, “Hina Anut Melah!” ein.  
\v 12 Euqa Jisas uqa buga me qee age uqana gug camas mowainnu cahacaden.   
\s1 Jisas aposel 12-pela nesili ehaden  
\r (Matju 10.1-4; Luk 6.12-16)  
\p
\v 13 Odocob Jisas aluh guhidocna ti bilen. Odimei dana age uqaca biluqagannu gale don eundec utaadeceb uqa cemenug hoin.  
\v 14 Uqa dana 12-pela age uqaca biluqagannuca age suladeceb Anutna me je qasali maadecnuca nesili ehaden. Dana eu uqa aposel\f + \fr 3.14 \ft Age je eu Matju 10.2na nijia eu feiga.\f* ijan qon.  
\v 15 Uqa age buga me qee dana deweneganadec ititacadecnu cabi eu ebenegana men.  
\v 16 Aposel 12-pela ijanaga eu odi. Eu Saimon, Jisas uqa ijan oso Pita ijan qon.  
\v 17 Eu Jems Sebedi melah waliag Jonca, Jisas uqa ijanala oso Boanesis\f + \fr 3.17 \ft Boanesis eu Aram je.\f* ijanala qon. Ijanala gug eu qeli qocna mel.  
\v 18 Eu Andruca, Filipca, Batolomjuca, Matjuca, Tomasca, Jems uqa Alfias melahca, Tadiasca, Saimon uqa Selot\f + \fr 3.18 \ft Selot agena am age Juda dana eu Rom dana Judiadec ititacadecnu egina.\f* agena amdecca,  
\v 19 Judas Iskariotca. Judas Iskariot uqa hibna Jisasnu balijimei uqana cad ebenegana muden.   
\s1 Age Jisas Bielsebulca cabi osina ec madein  
\r (Matju 12.24-32; Luk 11.14-23; 12.10)  
\p
\v 20 Odocob Jisas jobon nuen. Dana cajaca mati bahic age haun cegulecebil Jisas uqana malogomca sab jecnu saenca qee.  
\v 21 Odocob Jisas uqana eundec age uqa sab qee jec cabi onanu dah mimeig madein, “Uqa gad qoia,” ein. Eunu age uqa ehudoqagannu belein.   
\p
\v 22 Odocobil loo je iwaladec dana age Jerusalemdec nein eu age Jisasnu madein, “Bielsebul, buga me qee agena ben, uqa dana eu hewudena. Uqa Bielsebul uqana gagadic odocna buga me qee dana deweneganadec ititacadena,” ein.\f + \fr 3.22 \ft Bielsebul eu Seten ijan oso.\f*  
\v 23 Odocobil Jisas dana eu utaadeceb uqaca hocobil galolo je maaden, “Seten uqana eundec adi ititacdugian?  
\v 24 Hatu osona mam cadecebilfi cul eu gagadic tawecnu ihoc qee.  
\v 25 Sihul osona mam cadecebilfi sihul eu gagadic tawecnu ihoc qee.  
\v 26 Odocob Seten uqana eundec age mam cadecebil qatanec bilecebfi uqa gagadic tawecnu ihoc qee. Euqa uqa toni qocob qee migian,” aden.   
\p
\v 27 “Oso uqa dana gagadicca uqana jona li uqana ud cawaldocwe qee, uqaqa casac li dana eu eben jaihca libimei uqana ud cawaldecnu ihoc,” aden.\f + \fr 3.27 \ft Dana gagadicca eu Seten. Dana uqa Setenna ceteteh cawaldena eu Jisas.\f*   
\p
\v 28 “Ija mele maadigina, silail oso cunug dana megina eu Anut uqa dana agena silail cagasiadigian. Dana age Anutnu lelan madegina euha Anut uqa dana agena silail cagasiadigian.  
\v 29 Euqa Kis Gunnu lelan madec eu dana silail cagasitocnu qee nijel. Oso Kis Gunnu je me qee madenafi silail eu saen qila inaca leceb saen bilec catanecnaca silail cagasec qee gulucdoiaun. Euqa uqana silail deweg fagdocob catanigian,” aden.\f + \fr 3.29 \ft Jisas uqa Kis Gunna gagadic odocna dana cajaca me maden. Euqa loo je iwaladec dana age uqa Setenna gagadic odocna me maden ec cisdoin. Eunu age cahulec bahic bilein. Age Kis Gun eu Seten ec cisdoin. Eunu Anut uqa agena silail cagasiadecnu ihoc qee nijel. Age je Matju 12.31-32na nijia euha feiga.\f*  
\v 30 Ge, age Jisasnu madein, “Uqa buga me qeeca,” ein. Eunu uqa odi maden.   
\s1 Jisas anag waliagulca eu in?  
\r (Matju 12.46-50; Luk 8.19-21)  
\p
\v 31 Jisas uqa dana cajaca je maadi bibilen uqa anagca waliagulca gami calein. Age jo maha gumu tataweig je suldocobil dunuh len. Uqa ageca hugiannu utadoin.  
\v 32 Dana cajaca amemeg Jisas taldoin bibilegin madoin, “Faga, hina anin walinelca gami maha gumu taweiga. Age hina ageca legannu madegina,” doin.  
\v 33 Odocobil Jisas jejenega hewi maaden, “Ija au in? Ija waliel an?” aden.  
\v 34 Odimei uqa dana cajaca age alildu bilegina eu uqa talilaadi meciadimei maaden, “Feiga! Ija au walielca ihen!  
\v 35 Oso uqa Anut co toodu odona eu uqa ija walica, ija cebinamica, ija auca,” aden.   
\c 4  
\s1 Jisas dana oso wit aig cabina helennu galolo je maden  
\r (Matju 13.1-9; Luk 8.4-8)  
\p
\v 1 Jisas haun Galili wa gad cagocna dana cajaca je iwaladi maaden. Dana cajaca age mati bahic uqaca humeig talildu cegulein. Eunu uqa wag oso tobi wag macas tatacan ninijen uqa euna bilen. Bibilen dana cajaca cunug age wa cagoc lanna tawein.  
\v 2 Tatawegin uqa je mati galolo jena iwaladi maaden.  
\p Uqa iwaladec je oso maaden,  
\v 3 “Dah meiga! Dana oso uqana cabina wit aig helecnu nuen.  
\v 4 Uqa aig hehelen aig osooso jic cobocna tonen. Odocob man fululec age humeig cedi ji hedoin.  
\v 5 Aig osooso maha eu meen baibaca maha meca qee euna tonen. Maha eu dunuh qee nol eunu aig eu mahuc qala qahimei nag wasen.  
\v 6 Odocob cam gagadic taweceb eu cijaden. Odocob bebeig dunuh qee nol eunu qala jajawalen.  
\v 7 Aig osooso dud geuna tonen. Dud eu mahuc caji ben mimei ceteh cilehdocobil mahulimei aig qee qol.  
\v 8 Aig osooso eu mulu mahana tonen. Odocob qala qahimei ben mi aig qon. Aig oso qoc 30 ihoc len, osooso 60 ihoc len, osooso 100 ihoc len,”  
\v 9 odi maadimei maaden, “Oso dah mecnu dahigca je eu dah meiale,” aden.   
\s1 Jisas uqa eetanu galolo jena madena eu malogom sildiaden  
\r (Matju 13.10-17; Luk 8.9-10)  
\p
\v 10 Odocob dana cajaca mati bahic age buudu beladi hedocobil Jisas uqa cuhanuc bilen saen euna dana age Jisas gami coboinca uqana malogomca age uqana galolo je sildiadecnu sisildoin.  
\v 11 Odocobil uqa maaden, “Anut culadeceb age Anutna culnu ceteteh jahunec docnu nijia. Euqa dana cajaca age Anutna cul dunuh qee bilec age hahagum bilegina eu age galolo jena je cunug dah megina.  
\v 12 Eunu  
\q1 ‘age tului falicdocobil Anut agena silail cagasiadeiaunnu age amagana mele feginaqa  
\q2 qee fogo adena,  
\q1 odimeig age dahinigana mele dah meginaqa  
\q2 qee dogina,’ en,” aden. \rq (Aisaia 6.9-10)\rq*   
\s1 Jisas wit aignu galolo je gug sildiaden  
\r (Matju 13.18-23; Luk 8.11-15)  
\p
\v 13 Odimei Jisas maaden, “Age galolo je ina gugnu qee fogo adenafo? Qeefi, age galolo je osooso cunug adi fogo adigian?  
\v 14 Aig helecnu dana eu uqa Anutna je aig helena.  
\v 15 Aig eu jicna tonena eu odiwe dana age Anutna je dah mecebil Seten mahuc humei je dana waugna tonen eu cedadi len.  
\v 16 Aig eu maha meen baibacana tonena eu odiwe dana age Anutna je dah mimeig wawaga ceelecca je eu mahuc ogina.  
\v 17 Euqa agedodoc bebeigca qee. Age saen nag himec culumen gahidogina. Odocob Anutna jenu aqati tootooadecca temadecca ageca hocob mahuc wawaga meleec tonena.  
\v 18 Aig eu dud geuna tonena eu odiwe dana age Anutna je dah mecebil  
\v 19 euqa maha bilecnu jaen aqecca, maha cehewan ocnuca, ceteh filfil ocnuca waug madec eu wawagana humei Anutna je cilehdocob aig qee qogina.  
\v 20 Euqa aig mulu mahana tonena eu odiwe dana age Anutna je dah mimeig u hewi daugdu aig qogina. Eundec leih age aig qoc 30 ihoc legina, leih age aig qoc 60 ihoc legina, leih age aig qoc 100 ihoc legina,” aden.   
\s1 Dana age gowoc halna qee jahunegina  
\r (Luk 8.16-18)  
\p
\v 21-22 Jisas je tubdu uqana malogom maaden, “Cel ceteh jahunecna nijia eu hibna camasac moqagan. Odocob cel ceteh dana age jahuldoin nijia eu hibna dana cunug foqagan. Eunu oso gowoc umei jo dunuh limei hal dunuh qee tacena, odimei uqa cabal bisalu qee jahunina. Euqa uqa gowoc ohisna caqusena.  
\v 23 Dana oso dah mecnu dahigcafi je i dah meiale!” aden.   
\p
\v 24-25 Uqa je haun maaden, “Oso uqa docca nijia eu Anut uqa haun utigian. Euqa oso uqa docca qee eu Anut uqa uqana doc nag nijia eu cawaldugian. Eunu cel je dah megina eunu batut cisdoigale! Age dana cajaca gesili ganic dogina, gesiladec eu odi himec Anut ameg age wadacadigian. Odocob Anut uqa ceteh haun adigian,” aden.   
\s1 Qala qahi cajenanu galolo je  
\p
\v 26 Jisas je haun maaden, “Anutna cul eu odiwe dana oso aig uqana cabina helena.  
\v 27 Uqa witic us nijina. Cahineg eu cajimei cabi ona. Odocob saen cunug qala qahi bibi bili cajena. Euqa uqa adi qala qahi cajena eu qee dona.  
\v 28 Maha uqadodoc qala qahi bibi bili suldocob ben mi wasena. Casac bagac wasena, odocob bobog qona. Odocob bobog eu li aig ibuldona. Odocob euna aig qona.  
\v 29 Aig wal meceb aig cedi haudocnu saen wele calennu dana eu uqa mahuc qetena,” aden.   
\s1 Mastet aignu galolo je  
\r (Matju 13.31-32; Luk 13.18-19)  
\p
\v 30 Jisas je haun maaden, “Ege Anutna cul eu cel ceteh cinigwe eqan? Cel galolo jena uqana gugnu sildeqan?  
\v 31 Anutna cul eu mastet aig cinigwe. Aig eu dana mahana cehena saen euna eu nag bahic, eu mahana aig cunug wooladena.  
\v 32 Euqa dana ceheceb aig eu wasi ben mimei eu gulgulec caji tawena, eu cehelo cunug wooladena. Eu batac meca helena. Eunu man fululec limeig agena teic salafu euna mudegina,” aden.   
\s1 Jisas galolo jena himec maaden  
\r (Matju 13.34-35)  
\p
\v 33 Jisas uqa dana cajaca Anutna je maaden saen euna uqa galolo jena mati maaden. Dana cajaca age dah mimeig ocnu ihoc eundec doin.  
\v 34 Uqa galolo jena himec maaden. Euqa uqa uqana malogom gami cuhanuc bilec saenna uqa je cunug sildiaden.   
\s1 Jisas madeceb fufu ben tilien  
\r (Matju 8.23-27; Luk 8.22-25)  
\p
\v 35 Deel euna dih wesu meceb Jisas uqana malogom maaden, “Gec, hoiga. Wa gad cagoc leti naha isec loqale,” aden.  
\v 36 Odocob age dana cajaca am eu culadein. Odimeig Jisasna malogom wag tobein. Jisas uqa wele dunuh bibilen age odidih ehudi belein. Wag leihha age gami belein.  
\v 37 Odocob gugula ben caleceb fufu gagadic bahic fulududu macas qahi wag dunuh nuaden. Wag eu wa cali bigia odon.  
\v 38 Jisasqa uqa wag bigna ilo hetahet men us ninijen uqana malogom tulidumeig madoin, “Iwalgec, hina ege nag odi fadalecnu ec qee cisdolomfo?” doin.  
\v 39 Jisas cajimei fufu cahacdu madon. Odimei macas madon, “Malol biliga! Tiliaga!” don. Odocob fufu qee meceb macas tiliec bahic nijen.  
\v 40 Odocob Jisas uqana malogom maaden, “Age eetanu cucuiegina? Age wawaga meleecca qeefo?” aden.  
\v 41 Odocob age cumun bahic ein. Odimeig age madocobmadocobeeig madein, “I cel dana? Uqa fufuca macas qahecca uqa co toodu odosina!” ein.   
\c 5  
\s1 Jisas dana oso uqa buga me qeeca me muden  
\r (Matju 8.28-34; Luk 8.26-39)  
\p
\v 1 Age Galili wa gad cagoc leti ono isec belimeig Gerasa agena hatuna calein.  
\v 2 Jisas uqa wagnadec toni limei nunuen dana oso qalqal hatinnadec cali humei Jisas gulucdon. Dana eu uqa buga me qeeca.  
\v 3-4 Dana eu uqa qalqal hatinna biloloi. Dana age saen mati hankapnaca sennaca qagoloig, euqa uqa sen didu cagumei hankap fuhudoloi. Uqa gagadic bahic, dana oso uqa cahacdocwe qee. Eunu oso uqa dana eu hewi qagecwe qee. Senna ha qagecwe qee.  
\v 5 Uqa saensaen cahineg witicca qalqal hatinna bibili aluhha cocobi eui uqadodoc deweg meenna ququoloi.   
\p
\v 6 Uqa Jisas onoca hohon fimei guguli humei Jisas jaihna gob cehimei uqanu cuha fen.  
\v 7-8 Odocob Jisas uqa buga me qee madon, “Buga me qee, hina dana eu culdimeg qisacdoga!” don. Eunu dana eu uqa co suli u eui Jisas madon, “Jisas Anut Ohis Bahic Melah, hina ija eeta oditegan? Ija Anut amegna mahigina, cain me qee mitigaun!” don.  
\v 9 Odimei Jisas sisildon, “Hina ijain in?” don. Odocob dana eu jejeg hewi madon, “Ija ijani ‘Mati.’ Ge, ege mati bahic biluquna,” don.  
\v 10 Odocob dana eu uqa Jisas ege hatu enedec cain ititacgagaun ec ninidudu madon.   
\p
\v 11 Aria, aluh qeihna onoca qee ho am ben oso sab jiji coboin.  
\v 12 Odocob buga me qee age Jisas ninidudu madoin, “Ho eu ageca sulgecem ege ho dewenega dunuh leqan,” doin.  
\v 13 Odocobil Jisas uqa cois odoiga aden. Maadeceb age dana culdimeig ho dewenegana lein. Odocobil ho eu 2,000 sanijec odi age cunug gad aqeceb age busali aluh qeihqeih guguli nu Galili wa gad cagoc dunuh gotoimeig cunugca odi wa cedi ji cal mein.   
\p
\v 14 Odocobil dana ho cofadoloig age eu fimeig busali limeig taunca, jobonca, cabinaca cunug saaadi coboin. Odocobil dana cajaca cunug je eu dah mimeig age eu feqan imeig belein.  
\v 15 Age Jisasca humeig dana wele buga me qee mati agena jo bilen eu uqa qila lotoc tacecca dana cisdoc meca bibilen fimeig cucuiein.  
\v 16 Dana leih age Jisas dana buga me qeeca odudenha, ho odadenha amagana fein eundec je cunug saadein.  
\v 17 Saaadegin dana cajaca eu age Jisas hina egena hatu i cuculi nuuga ec ninidudu madoin.   
\p
\v 18 Jisas uqa wagna totobon dana wele buga me qeeca eu uqa Jisas ninidudu madon, “Cultecem hinaca belowa!” don.  
\v 19 Odocob Jisas uqa cahacdudu madon, “Odi cain. Hina hinana gunna nuimeg hinana eundec Tibud odihen, uqa hinanu waug qocob me mihen eu saadaga,” don.  
\v 20 Odocob dana eu uqa hatu eu jobon 10-pela bilein euna cunug cocobi Jisas kobolkobol ben bahic uqa oduden eu cunug saadi cobon. Odocob dana cajaca age je eu dumeig tumatumaein.   
\s1 Jairas uqa Jisas cesuldocnu madon  
\r (Matju 9.18-19; Luk 8.41-42)  
\p
\v 21 Jisas uqa ceseli Galili wa gad cagoc haun leti wa naha isec cali hocobil dana cajaca mati bahic uqa lan qee culec bibilen uqa cemenug limeig talildoin.  
\v 22 Age bibilegin Juda agena cuha jo ilo oso, ijan Jairas, humei uqa Jisas fimei uqa jaihna toni mahulimei  
\v 23 ninidudu madon, “Ija ateni hag ben on, cal migia nijia. Uqa medumei cebac biligiannu hina ijaca belimeu eben dewegna magale,” don.  
\v 24 Madocob Jisas uqaca belesin.  
\s1 Hagca caja oso Jisasna lotoc heweceb me muden  
\r (Matju 9.20-22; Luk 8.43-48)  
\p Belecebil dana cajaca mati bahic caji Jisas toodu belein. Age Jisas alildudu gesacgesac belein.  
\v 25 Odi bebelegin caja oso uqa hag golac necca bibilen cabi gel 12-pela ihoc len.  
\v 26 Uqa gaid dana age uqana hag me mudituqaga bili ageca loloi, age cabi oin eu ihoc qee lel. Caja eu uqana meen qaig cunug hagnu ameg adecna cusdon. Euqa dana eu age qee me mudelein. Uqa hag gaid odi nijen, cehnana deweg me qee bahic men.  
\v 27 Uqa Jisasnu je dah mennu uqa dana cajaca mati gemo cocobi Jisas hibilohuna isec humei uqana lotoc hewi fen.  
\v 28 Ge, uqadodoc maden, “Ija uqana lotoc dih qududocominfi ija hag metigian,” en.  
\v 29 Uqa odi lotoc hewi feceb mahuc golac noloi gatidocob hag medon eu dewegna tebandon.  
\v 30 Odocob Jisas uqa gagadic odoc oso deweg cuculdi nueceb tebandumei mahuc falicdumei dana cajaca sisilaadi maaden, “In ijana lotoc qududoia?” aden.  
\v 31 Odocob uqana malogom age Jisas madoin, “Dana cajaca kitim bahic hina talilheiga taweiga hina cemeincemein legina ec fagana. Hinaqa in qudutia? ec sisilgagana,” doin.  
\v 32 Odocobil Jisas uqa in odi odeia eunu ameg cijawi cobocob fen.  
\v 33 Ameg cijawen cocobon caja eu uqa deweg me men eu dumei uqa deweg qelelen cucuii hon. Odimei uqa Jisas jaihna toni mahulimei je cunug mele ija odiga ec sadon.  
\v 34 Odocob Jisas uqa caja madon, “Ateni, hina wawin meleec eu me mihia. Hina malol bilecca nuuga. Dewen mehec cobogale,” don.   
\s1 Jisas Jairas ateg cal men eu madocob calen  
\r (Matju 9.23-26; Luk 8.49-56)  
\p
\v 35 Jisas uqa caja je i madodon Juda agena cuha jo ilona gundec leih humeig madoin, “Hina aten cal meia. Hina eetanu iwalgec eu mulug cabi haun utugina?” doin.  
\v 36 Odocob Jisas uqa age je odi madodogin qee dah mecwe memei Juda agena cuha jo ilo madon, “Cain cucuiagaun. Hina dih wawin meleeiale,” don.  
\v 37 Odimei Jisas uqa dana cajaca uqa toodocnu cahacadimei Pitaca, Jemsca, Jems waliag Jonca, eudih cedadeceb uqaca belein.  
\v 38 Age cuha jo ilo uqana jona calimeig ono dana cajaca mati cegulein age dahoc fafali qada ben qaqajegin feciaden.  
\v 39 Odimei uqa hamol limei maaden, “Eetanu dahoc fafali qada ben qajegina? Mel aid uqa qee cal mel. Uqa us nijia!” aden.  
\v 40 Odi maadeceb age asaldoin. Odocob Jisas uqa dana cajaca cunug ititacadeceb cali hocobil uqa mel aid memeg anagca malogom cijed uqaca hoin euca dih cedadeceb hamol mel aid nijen euna lein.  
\v 41 Odocobil Jisas uqa mel aid eben hewi madon, “Talita kumi,”\f + \fr 5.41 \ft Je madec i Aram je, eu Jisas uqana je madec gug bahic.\f* don. Je euna gug eu odi, “Mel aid, ija mahigina, cajaga,” don.  
\v 42 Madocob mel aid uqa mahuc cajimei cobon. Ge, mel aid eu uqa cabi gel 12-pela odi coboc ihoc len. Odocob age cunug tumatumaimeig hahabanaga culeceb bilein.  
\v 43 Jisas uqa cahacaden, uqa odonnu je eu cain saadi cobowainnu je gagadic maadimei maaden, “Mel aid sab uteiga jeia,” aden.   
\c 6  
\s1 Nasaretdec dana cajaca age Jisas hibemdoin  
\r (Matju 13.53-58; Luk 4.16-30)  
\p
\v 1 Jisas cudun eu culimei uqana jobon gug nuen. Uqana malogom toodu belein.  
\v 2 Juda agena cuha deelna uqa Juda agena cuha jona limei iwaladen. Dana cajaca mati uqana je dah mimeig tumatumai madein, “Dana i uqana je cunug i anadec on? Uqana doc silecca in uten? Uqa ebenna adi kobolkobol ben odona?  
\v 3 Ege doqona, uqa jo cehec memei mec. Uqa Maria melah. Jemsca, Josefca, Saimonca, Judasca age uqa waliagul. Uqa cebinagul age ene age gemona bilegina,” ein. Age uqanu wawaga me qee meceb cecewudi bilein.  
\v 4 Odocobil Jisas uqa maaden, “Je hahun madec dana oso uqana gug jobon qee euna age uqana je dumeig uqa saolal mudecnu nijia. Euqa uqana hatunaca, uqana gug jobonnaca uqana eundec age uqa cewudegina,” aden.  
\v 5 Ono Nasaret jobon uqa kobolkobol meca qee odol. Euqa uqa eben leih hagca dewenega hewadeceb meaden.  
\v 6 Odimei uqa age wawaga meleecca qeenu tumatumaen.  
\s1 Jisas uqana malogom 12-pela suladeceb belein  
\r (Matju 10.5-15; Luk 9.1-6)  
\p Jisas jobonnana nunui dana cajaca iwalaadi cobon.  
\v 7 Odimei Jisas uqana malogom 12-pela utaadeceb hocobil uqa buga me qee dana deweneganadec ititacadecnu cabi eu ebenegana men. Odimei uqa lecislecis suladeceb belein.  
\v 8 Odimei je gagadic maaden, “Age jic cobocnu ceteh oso cain hewowain. Euqa agena jic coboc komca himec coboiga. Sabca qee, badomca qee, oologamna meen qaigca qee eu odi jic coboiga.  
\v 9 Age jaimaga tacimeig qa lotoc lecis cain tacowain. Osol himec taceiga,” aden.  
\v 10 Uqa maaadi maaden, “Age jo casac dunuh loqagan jo osol euna himec bibileig li jobon eu culimeig beleiga.  
\v 11 Odocob jobon oso age oiadecnu agena je ha dah mecnu culecebilfi age cuculadi beloqaga bili comis jaimagana fagdon eu qoidu heleiga. Age eu fimeig age Anut amegna me qee odoin eu doqagannu odi odoiga,” aden.  
\v 12 Eunu age belimeig dana cajaca agena silailnu tului falicdoqagannu je qasali maadein.  
\v 13 Odimeig age buga me qee mati dana deweneganadec ititacadimeig mool dana caja hagca mati joiadecebil me madein.   
\s1 Herod uqa Jisasnu Wa Joadec Jon ec cisdon  
\r (Matju 14.1-12; Luk 3.19-20; 9.7-9)  
\p
\v 14 Saen euna Jisas uqana odocnu je eu hatu cunugna ihoc len. Eunu King Herod uqa Jisasna odocnu hutan don. Leih age madein, “Wa Joadec Jon uqa cal mecnadec ceseli cajen! Eunu gagadic odoc i uqa dunuh cabi ona,” ein.  
\v 15 Euqa leih age madein, “Uqa Ilaija,” ein. Leih madein, “Uqa Anutna je hahun madec dana eu odiwe je hahun madec dana weledec,” ein.  
\v 16 Euqa Herod je eu dah mimei maden, “Jon ija be cagom qa uqa haun ceseli cajen!” en.   
\p
\v 17-18 Ge, wele Herod uqa waliag Filip aideg, Herodias, on. Odocob Jon uqa li Herod madon, “Hina walin aideg om eu tutuc qee,” don. Eunu Herod uqana han dana suladeceb age li Jon hewi libimeig gihacdoc jona mudein.  
\v 19 Odocob Herodias uqa Jon ameg me qeena wadacdugiannu cisdon. Qocob cal migiannu en qa uqa ihoc qee.  
\v 20 Ge, Herod uqa Jon dana me bahic, uqa dana ititom eunu don. Eunu Herod uqa Jonnu cucuien. Odimei uqa Jon me cofdon. Herod uqa Jon je madeceb dah men saen euna uqa geh cisdumei waug culumen doloi qa uqa Jonna je dah mudecnu gaid gale doloi.   
\p
\v 21 Hibna Herodias Jon qocob cal mecnu jic gulucdon. Herod uqa anag basen deel cali hon. Odocob Herod uqana cabi dana benbenca, uqana han dana agena iloiloca, Galili agena aqunec danaca agenu ja qon.  
\v 22 Odocob Herodias ateg dunuh limei due duen. Odocob Herod uqa uqana danahca mel aid eunu gale aden. Eunu Herod uqa mel aid eu madon, “Hina cel ocnu gale hena eunu sisiltaga, odocob ija ihigen,” don.  
\v 23 Odimei je hahun utimei madon, “Hina cel ceteh sisiltecemfi eu ihigen. Ijana cul naha ihoc lec euna gadac odi ihigen!” don.   
\p
\v 24 Odocob mel aid eu cali li anag sisildon, “Ija cel ceteh ocnu sisildugen?” don. Anag jejeg hewi madon, “Wa Joadec Jon ilo u itiga ec madoga,” don.  
\v 25 Odocob mel aid eu mahucwe ceseli kingca limei madon, “Ija hina qila bahic Wa Joadec Jon ilo bohna mimeg ahutaga tena!” don.  
\v 26 Mel aid odi madocob king uqa geh bahic waloc don qa uqana je cagocnuca, uqana danah amagana odonnuca uqa je mel aid madon eu hawadocnu qee gale dol.  
\v 27 Odimei uqa mahuc uqana cofdoc han dana oso madu suldocob Wa Joadec Jon ilo uu ahugiannu nuen. Odocob uqana cofdoc nui gihacdoc jona Wa Joadec Jon be cagon.  
\v 28 Odimei uqa bohna mimei ehi limei mel aid uten. Odocob mel aid uqa ehi li anag uten.   
\p
\v 29 Odocob Jonna malogom age je eu dah mimeig age hu Jon deweg loton u ehi li meen hatin qalqal osona mudein.   
\s1 Jisas dana 5,000 sab aden  
\r (Matju 14.13-21; Luk 9.10-17; Jon 6.1-13)  
\p
\v 30 Odocob aposel ceseli Jisasca humeig ceteteh cunug odoinnuca iwaladeinnuca sadoin.  
\v 31 Euqa dana cajaca mati bahic lili huhueegin Jisas uqana malogomca sab jecnu saenca qee. Eunu Jisas malogom maaden, “Hoiga, ege cuhanuc belimeb cudun leihna age nag odi jaen muduqagan,” aden.  
\v 32 Odocob age cuhanuc wag umeig cudun tiliecna belein.   
\p
\v 33 Aria, dana cajaca mati bahic bebelegin meciadimeig age ail eu wele doin i age guguli taun cunug wooldodoig age casac maha toodu cocobi cudun euna Jisas uqana malogomca medemega cagu calein.  
\v 34 Odocobil Jisas lanna tonimei dana cajaca am ben tatawegin fen. Odocob uqa age sipsip cofadecca qee cobogina odiwe bilein eunu agenu waug qon. Odimei uqa ceteteh mati bahic iwaladecnu sanan men.  
\v 35 Saen wele hedodon uqana malogom uqaca humeig madoin, “Cudun i filec cagocna bahic, odocob saen wele hedoia.  
\v 36 Dana cajaca i age hatu alildoc belimeig jobon osonana agena sab jecnu fajoqagannu suladaga,” doin.  
\v 37 Euqa Jisas malogom maaden, “Age sab jec adeiga,” aden. Odocob age jejeg hewi madoin, “Hina ege nui kina 200na bred fajimeb adocomun joqagannu madaganafo?” doin.  
\v 38 Odocobil Jisas maaden, “Age bred ganicca? Li feiga,” aden. Odocob age li fimeig madoin, “Bred 5-pela, cul dool lecisca himec bilia,” doin.   
\p
\v 39 Odocobil Jisas uqa dana cajaca age am qatanimeig gigisac mena bileiga ec maaden.  
\v 40 Odocob dana cajaca am qatanimeig bilein. Age am sanijec 100ca 50ca odi bilein.  
\v 41 Odocob Jisas bred 5-pela cul dool lecisca u hewimei sao jobon tatiimei Anut hetaga doc je madumei bred fenifeni malogom adeceb age dana cajaca siwiadein. Odimei uqa cul dool lecisha feni calcaldumei dana cajaca siwiadeceb cunug ihoc len.  
\v 42 Odocob age cunug jecebil li ihoc len.  
\v 43 Odocobil malogom age bred cul doolca jecefanaga eundec galel 12-pela tacecebil am ben.  
\v 44 Bred jein eundec age cunug eu dana 5,000.   
\s1 Jisas Galili wa tatacan cobon  
\r (Matju 14.22-23; Jon 6.16-21)  
\p
\v 45 Mahuc bahic Jisas uqana malogom cesusadeceb age wagna tobimeig age aqunitu Galili wa gad cagoc naha isecnu Betsaida jobon belein. Bebelegin uqa dana cajaca qaqacitegin cofaden.  
\v 46 Uqa dana cajaca culadi hedocob uqa Anut inondudu bilecnu aluh guhidocna ten.  
\v 47 Wele tu hohon wag eu wa gad cagocna len. Jisas uqa cuhanuc mahana bilen.  
\v 48 Odimei fufu ben malogom olanagana isec fuludonnu uqa age wag culum hewecnu abuldodogin meciaden. Odimei walag danigia oodon Jisas uqa wa tatacan cocobi ageca len. Uqa age wooladigia odon.  
\v 49 Euqa age uqa macasna cocobon fimeig dol oso cobona imeig euein.  
\v 50 Ge, age cunug fecidumeig age qeleli filicitein. Euqa Jisas mahuc maaden, “Cain cucuiuwain! Ija ihen. Age wawaga toogdoiale!” aden.  
\v 51 Odimei uqa wagna ageca tobi ten. Odocob fufu tilien. Uqana malogom tumatumaein.  
\v 52 Ge, age Jisas uqa dana cajaca bred siwiaden uqana gug qee fogo adel. Euqa age wawaga tool ibuldon.\f + \fr 6.52 \ft Malogom age Jisas uqa dana cajaca bred siwiaden eu fein, euqa age Jisas uqa Anutna Krais eunu qee wawaga meleecna bilein. Eunu age wawaga tool ibuldocob age Jisas uqa macasna cocobon fimeig qeleli filicitein.\f*   
\s1 Jisas dana cajaca geh bahic Genesaret hatuna me maden  
\r (Matju 14.34-36)  
\p
\v 53 Age wa gad cagoc leti hu Genesaret hatuna hoin. Ono age wag lanna qagein.  
\v 54 Age wag tobocobil dana cajaca age Jisas wele fein ec mahuc doin.  
\v 55 Odimeig age hatu cunugna guguli belimeig dana caja hagca agena gabagabna ninijegin hewadi li Jisas ana bilia ec doin euna uqaca ahoin.  
\v 56 Jisas anaana cocobon, eu jobon nagfo, jobon benfo, cudun gaucfo, age idadec cudunna dana caja hagca cedi hewi madecebil nijoloig. Odimeig agena hag me madigiannu ninidoloig. Age uqana lotoc himec qududocnu ninidoloig. Odocob cunug age uqana lotoc qududoin eu me moloig.   
\c 7  
\s1 Anutna loo je Farisi agena loo je wooldon  
\r (Matju 15.1-9)  
\p
\v 1 Saen euna Farisica loo je iwaladec leihca Jerusalemdec humeig Jisasca cegulein.  
\v 2-4 Farisica Juda dana cunugca age jajanagail agena kobol toodu ebenega casac cusimeig sab jeginanu. Age ebenega qee cusec sab qee jeginanu. Odimeig age idadec cudunna limeig ceseli hu saen euna age ebenega qee cusifeig qee jegina. Juda age kobol geh bahic ha toodu odoginanu. Eu odi age gabin cusegina, hal cusegina, boh bronsna mudec cusegina.\f + \fr 7.2-4 \ft Grik jaqec je hilah leihna age je oso tubdu jaqein eu odi: Cabal cusegina.\f* Odocob Farisica loo je iwaladecca age Jisas uqana malogom leih age ebenega gegehin wa qee cusec sab jejegin fein.\f + \fr 7.2-4 \ft Age je Matju 15.2na nijia eu feiga.\f*  
\v 5 Odimeig age Jisas sisildoin, “Eetanu hinana malogom kobol ege jajanigeil iwalgein eu qee toodu odogina qa ebenega gegehinca sab jegina?” doin.  
\v 6 Odocob Jisas jejenega hewi maaden, “Je hahun madec dana, Aisaia, uqa age me hihili coboc dananu mele bahic madi maden. Uqana je odi jaqen:  
\q1 ‘Dana cajaca i age conogana binani sulegina  
\q2 age wawagaqa eu qisactec bilina.   
\q1
\v 7 Eu age dana agena loo je iwaladegina eu Anutna loo je, egina.  
\q2 Eunu age ijanu gauc cuha fegina,’ en. \rq (Aisaia 29.13)\rq*   
\m
\v 8 Anut uqa age odi odoiga ec gagadic maaden eu qisacdu bilimeig dana iwaladec gagadic hewegina,” aden.   
\p
\v 9-13 Jisas je haun maaden, “Moses maden:  
\q1 ‘Hina anin memenca lalan malagale,’ en \rq (Kisim Bek 20.12; Loo 5.16)\rq*  
\m Odocob Mosesha maden:  
\q1 ‘Oso memegfo, anagfo geuldecnu je madecebfi uqa cal migian,’ en. \rq (Kisim Bek 21.17; Wok Pris 20.9)\rq*  
\m Ageqa madegina, ‘Dana oso uqa anag memegca cesulalecnu cetehcafi euqa uqa maalena, “Ceteh i ija alecnu ihoc eu, ‘Koban,’\f + \fr 7.9-13 \ft Koban eu Aram je. Uqana gug eu “ija Anut utigen.”\f* ija Anut utigennu wele qagu abes mem,” alena dana eu uqa anag memegca nag oso cesulalecnu cain odoiaun,’ egina. Eunu age kobol jajanagail oin eu odi toodu odoginana Anutna je cilehdogina. Agena kobolha dana leih haun iwaladegina. Age odoc eundec matiha odi odogina. Odimeig age dana agena iwaladec eu toodu odoqagannu age Anut je gagadic maaden eu culegina eu me bahic ec cisdogina!” aden.   
\s1 Jisas uqa ceteteh dana gegehinca mudina eunu maden  
\r (Matju 15.10-20)  
\p
\v 14 Odimei Jisas uqa dana cajaca utaadeceb hocobil maaden, “Ija dah miteiga. Cunugca du cuhadoigale.  
\v 15-16 Ceteh oso dana hibilohu bilina eu dana dunuh limei gegehin qee mudina. Euqa ceteteh dana waug dunuhnadec cali hona eu dana gegehin mudina. [Dana oso dahigcafi je i dah meiale!]” aden.   
\p
\v 17 Odimei uqa dana cajaca culadi jo hamol leceb uqana malogom age uqana galolo jenu sisildoin.  
\v 18-19 Odocobil Jisas maaden, “Ageha wawaga qee fogo donafo? Ceteh cunug dana hibilohudec dana dunuh limei eu uqa cul dunuh qee lena qa uqa waug big anag dunuh limei dana bahu nuecna cali hona. Eunu ceteh eu dana gegehin qee mudina eu qee feginafo?” aden. Eunu je euna Jisas uqa Anut amegna sab cunug jecnu soidoc nijia ec maden.  
\v 20 Odimei je haun maaden, “Ceteh dana dunuhdec cali hona eu dana gegehin mudina.  
\v 21 Ge, dana waug dunuhnadec ceteh gegehinca cali hona eu odi, cisdoc me qeeca, wal kobol odocca, heje occa, dana qocca, dana osona caja occa,  
\v 22 ameg qocob ceteh occa, qisol mecca, uhulec jeca, wal kobol majagca qee odocca, um qoc madecca, deboi cobocca, osona ceteh feceb gale docca, gad odocca eu cali hona.  
\v 23 Odoc me qee eu cunug dana wawaga dunuhdec cali hona, odocob age dana gegehin mudadegina,” aden.   
\s1 Caja Finisiadec uqa Jisasnu waug meleen  
\r (Matju 15.21-28)  
\p
\v 24 Odocob Jisas cali humei hatu eu culimei Taia Saidonca alena hatuna nui bilen. Odimei uqa jo oso dunuh hamol li bilen. Dana uqa ono bilia eu cain dowainnu gale don qa uqa jahuni bilecwe qee.  
\v 25 Euqa mahuc caja oso uqa ateg buga me qeeca uqa Jisas bilennu dumei uqa Jisasca humei jaihna toni mahulen.  
\v 26 Caja eu Juda qee, uqa anag Finisia hatu ono basen. Siria age Finisia cofdoin. Odimei uqa Jisas buga me qee ateg deweg bilen eu ititacdocnu ninidon.  
\v 27 Odocob Jisas madon, “Mel agena sab cedi qa heliadec eu kobol me qee. Eunu ege mel casac sab adoqona,” don.\f + \fr 7.27 \ft Juda sihul eu mel. Juda dana qee eundec age qa. Age je Matju 15.26na nijia eu feiga.\f*  
\v 28 Odocob caja jejeg hewi madon, “Mele Tibud, euqa mel sab jejegin jecefanaga golodocob qa age cabal bisalu bilegina eu hu cedicedi jegina eu odi qeefo?” don.  
\v 29 Odocob Jisas caja madon, “Hina je me bahic wadacdutaga. Eunu gad ceseli nuugale. Buga me qee hina aten culdi qisacdoia eu fegan!” don.  
\v 30 Odocob caja jobon ceselimei uqa ateg cabalna us ninijen fen, buga me qee wele cuculdi qisacdon.   
\s1 Jisas dana oso uqa dahig coca cufa qoc me muden  
\p
\v 31 Jisas uqa Taia agena hatu culimei uqa Saidon taun isec hu jobon 10-pela agena hatuha gemona cocobi Galili wa gad cagocna ceseli hon.  
\v 32 Ono hon bibilen age dana oso ehudi uqaca hoin. Dana eu uqa dahig coca cufa qoc, je madecwe qee. Age Jisasca humeig ninidudu madoin, “Hina eben uqa dewegna magale,” doin.  
\v 33 Odocob Jisas uqa dana eu ehudi filecna ehi li muden. Jisas dana euca dih bibilesi uqa eben gic dana dahigna mimei ebenha sahalic qumei dana beilah qududon.  
\v 34 Odimei uqa tatiimei hooli maden, “Effata,”\f + \fr 7.34 \ft Je madec i Aram je, eu Jisas uqana je madec gug bahic.\f* en. Je eu uqana gug eu “Fogo heia,” en.  
\v 35 Jisas odi madeceb dana eu dahig fogo don. Uqa beilah qagecwe bilen eu filihicdocob uqa je tutuc maden.  
\v 36 Jisas uqa oduden eu dana oso sadowainnu cahacaden. Jisas je eu saadecnu gagadic bahic cahacaden, euqa age feei dana cunug doqagannu saadi coboin.  
\v 37 Odocobil dana cajaca age je eu dah mimeig ben bahic tumatumai madein, “Uqa ceteteh cunug me odoin. Ge, dahiniga cufa qoc coboin eu uqa odocob dah megina! Conoga cufa qoc eu uqa odocob je madegina!” ein.   
\c 8  
\s1 Jisas uqa dana 4,000 sab aden  
\r (Matju 15.32-39)  
\p
\v 1 Saen euna dana cajaca mati bahic haun hu cegulein. Age sab jecca qeenu Jisas uqana malogom utaadeceb uqaca hocobil maaden,  
\v 2 “Dana cajaca i age qila deel cijed ija gami biluquna age sab jecnuca qee. Eunu ija agenu walol tena.  
\v 3 Ija age sab qee adec gauc agena jobon suladecemin belifeig jicna wennu lehanaga culigian. Ge, leih age jic cecelac bahic hoigan,” aden.  
\v 4 Odocob uqana malogom jejeg hewi sisildoin, “Wadau edi ene oso dana i age sab adi adeceb joqagan?” doin.  
\v 5 Odocobil Jisas sisiladi maaden, “Age bred ganic heweiga?” aden. Odocob madoin, “Bred 7-pela nijeiga,” doin.   
\p
\v 6 Odocob uqa dana cajaca am maadeceb mahana bilein. Odimei bred 7-pela cedimei Anut hetaga dumei fenifeni malogom dana cajaca siwiadecnu aden. Odocob malogom age ehi li dana cajaca siwiadein.  
\v 7 Age cul dool nag leihha hewein. Jisas Anut hetaga dumei uqana malogom maadeceb euha dana cajaca siwiadein.  
\v 8 Dana cajaca cunug jecebil biniga hon. Odimeig malogom age jecefanaga golodon eu mahanadec cedimeig galel 7-pela tacecebil am ben.  
\v 9 Dana cajaca cunug sab jein eu sanijec 4,000 odi.   
\p
\v 10 Odocobil Jisas uqa dana cajaca maadeceb qacitein. Odocobil uqa uqana malogom gami mahuc wagna tobimeig nui Dalmanuta agena hatuna li bilein.   
\s1 Farisi age Jisas kobolkobol oso odocob foqagannu madoin  
\r (Matju 16.1-4)  
\p
\v 11 Saen euna Farisi leih age Jisasca hocobil uqaca fee dadanein. Age Jisasna cabi eu Anutnadecfo, qeefo feqan imeig temdocnu age uqa kobolkobol oso odocob gaga eu feqan ec madoin.  
\v 12 Odocobil Jisas deweg dologca cisdoc cunug culumen dodon hooli maden, “Eetanu dana sihul qila bilegina age gaga oso fecnu walegina? Ija mele maadigina, dana cajaca i qila bilegina age gaga oso qee fowain!” aden.  
\v 13 Odi maadimei cuculadi wagna tobi ten. Odimei haun wagna ceseli wa gad cagoc naha isec li bilen.   
\s1 Farisica Herodca agena jisnu galolo je  
\r (Matju 16.5-12)  
\p
\v 14 Malogom age beloqaga bili bred tacecnu dahiniga celen. Odimeig bred osol himec hewein eu wagna nijen.  
\v 15 Jisas doqagannu je maaden, “Dah meiga, age Farisica Herodca agena bred gug qoc ibuldocnu jisnu ageca hoiaunnu batut feigale,” aden.  
\v 16 Odi maadeceb malogom age togodudu madein, “Ege bredca qeenu mageia,” ein.  
\v 17 Jisas uqa age eunu togododogin dumei maaden, “Age eetanu bred qee hewelein eunu togodudu madegina? Age qila qee doginafo? Age wawaga qee fogo dolfo? Age wawaga tool ibuldonfo?  
\v 18 Age amagacaqa qee feginafo? Age dahinigacaqa qee dah meginafo? Odocob age qee cisdoloinfo?  
\v 19 Ija bred 5-pela fenimig dana 5,000 siwiadem saen euna age jecefanaga eundec galel ganic tacecebil am ben?” aden. Odocob jejeg hewi madoin, “Ege 12-pela tacom,” doin.  
\v 20 Odocobil Jisas haun sisiladen, “Ija bred 7-pela fenimig dana 4,000 siwiadem saen euna age jecefanaga eundec galel ganic tacecebil am ben?” aden. Odocob jejeg hewi madoin, “Ege 7-pela tacom,” doin.  
\v 21 Odocobil maaden, “Age qila qee fogo adelfo?” aden.   
\s1 Jisas dana oso uqa Betsaidadec, uqa ameg galuc mec me muden  
\p
\v 22 Age Betsaida jobon ono calein. Odocobil dana cajaca leih age dana oso ameg galuc mec eu ehudi Jisasca humeig eu eben hewi figiannu ninidoin.  
\v 23 Odocobil Jisas dana eu eben hewi ehudi jobon hacna limesi sahalic u amegna mimei uqa eben ilona mimei sisildu madon, “Hina ceteh oso faganafo?” don.  
\v 24 Odocob dana eu camalimei madon, “Ija dana cocobogin feciadigina qa age na cinigwe feciaadigin cobogina,” don.  
\v 25 Odocob Jisas uqa dana eu haun ceseli eben amegna men. Odocob dana eu gagadic bahic mecieen ameg me fogo don. Ceteh cunug eu uqa cataniec fen.  
\v 26 Odocob Jisas uqa dana eu uqana gun nuigiannu suldudu madon, “Hina jobon ina cain lagaun,” don.   
\s1 Pita uqa Jisasnu Krais ec qasali maden  
\r (Matju 16.13-20; Luk 9.18-21)  
\p
\v 27 Jisas uqana malogomca cocobi li Sisaria Filipai ono jobon osona belein. Jic cocoboig uqa malogom sisiladen, “Mateiga, dana age ijanu in egina?” aden.  
\v 28 Odocob age jejeg hewi madoin, “Leih age Wa Joadec Jon eu hina ec madegina. Leih age Ilaija eu hina ec madegina. Leih age je hahun madec dana oso eu hina ec madegina,” doin.  
\v 29 Uqa haun sisiladi maaden, “Ageqa, ijanu in egina?” aden. Odocob Pita jejeg hewi madon, “Krais eu hina,” don.\f + \fr 8.29 \ft Casac jejeg oso sao ohisdecca (eu Mak 1.11 feiga), buga me qee leihca (eu Mak 1.24ca, 3.11ca, 5.7ca feiga eu age Jisas uqa in bahic ec ein. Euqa malogomca, dana cajaca age Jisas uqa cel dana eu qee doloin. Qilaqa malogom osol uqa Jisas eu Krais ec camas maden. Uqa dana Anut uqana dana caja cahahaadecnu wele nesili ehuden.\f*  
\v 30 Odocob Jisas uqana malogom cahacaadi maaden, “Age ijanu leih cain maadi cobowain,” aden.   
\s1 Jisas uqa cal mimei ceseli cajigian ec maden  
\r (Matju 16.21-28; Luk 9.22-27)  
\p
\v 31 Saen euna Jisas uqa uqana cal mecnu uqana malogom maadecnu sanan mimei maaden, “Dana Melah uqa deweg sogoec ben gahidugian. Juda agena matuca, ihanec dana benbenca, loo je iwaladecca age Dana Melah hibemdumeig uqa qocobil cal migian. Odimei uqa deel cijed hedocob haun ceseli cajigian,” maaden.  
\v 32 Jisas uqa je eu camas maadeceb Pita uqa Jisas ehudeceb gesacna limesi uqa Jisas cahacdudu madocnu sanan men.  
\v 33 Euqa Jisas falicdu uqana malogom feciadimei Pita cahacdudu madon, “Se, Seten, hina Anut madena eu odi qee madelem. Hina dana mahanadec cisdoc toodu matagana. Eunu cuculti nuuga!” don.   
\p
\v 34-38 Odimei uqa dana cajaca uqana malogomca utaadeceb uqaca hocobil maaden, “Dana oso uqa ijanu ijana jenuca silail dana cajaca qila bilegina eu age Anut hibemdoin eu amagana majag docobfi saen Dana Melah uqa Memegna kobolkobolnaca ensel gunca humei uqa dana eunu majag dugian. Odocob dana oso mahamaha cehewan cunug oialumiqa uqana cebac bilec qee moubmi cehewan on eunu me biloubfo? Dana uqa uqana cebac bilec eu culecebfi cel cetehna uqana cebac bilec ceseli besi ocnu fajudigian? Eunu oso uqa uqana cebac bilec cahahadugia odona eu uqa uqana cebac bilec felacudigian. Odocob oso uqa ijana bilina eunuca me je qasali maadena eunuca uqana cebac bilec felacudecebfi eu uqa uqana cebac bilec cahahadugian. Eunu oso uqa ijanu madi, ija uqa jaih ceen lahacdudu toodugen, ena eu uqadodoc deweni me biligian ec cain madeiaun qa uqa uqana na babalec hewi gahidumei tooteiale,” aden.   
\c 9  
\p
\v 1 Odocob Jisas maaden, “Ija mele maadigina, leih age ene tawegina eu age qee cal mec ninijeb Anutna cul gagadic odocca hohob mecidoqagan,” aden.   
\s1 Jisas deweg fil ibuldon  
\r (Matju 17.1-13; Luk 9.28-36)  
\p
\v 2 Deel 6-pela hedocob Jisas uqa Pitaca, Jemsca, Jonca cedadimei ehadi aluh ohis osona dana oso qee bilec euna ti cuhanuc bilein. Ono bibilegin Jisas uqa age amagana ibuldon.  
\v 3 Uqana lotoc senenec bahic faleen, uqana senenec eu dana mahanadec age lotoc cuseginawe qee.  
\v 4 Odocob uqana malogom age Moses Ilaijaca ale hocobil Jisasca je togododogin feciadein.  
\v 5 Odi bibileig Pita uqa fimei Jisas madon, “O Meca, ege ene odi bilecnu eu me bahic. Ege ene talah jo cijed ceheqan, oso hinana, oso Mosesna, odocob oso Ilaijana,” don.  
\v 6 Ge, uqa malogomca age geh bahic cucuiein eunu uqa cel je madena eu qee dol.  
\v 7 Uqa je eu madudu bibilen taen oso ni jahuladen. Odocob taennadec jejeg oso camas mimei maden, “Ija melami nelugca ihen. Age uqa jejeg toodu odoiga,” en.  
\v 8 Odocob mahuc age talildu meciimeig oso ageca tatawen qee felein, euqa Jisas himec age cemenega tatawen fein.   
\p
\v 9 Age aluhnadec totoni Jisas malogom cijed je gatiti maaden, “Dana Melah cal mecnadec qee cajec ninijeb je i oso cain doiaunnu qila feiga eu oso cain saadowain,” aden.  
\v 10 Age uqa co toodoin qa age gemona agedodoc ceteh eunu togodudu madein, “Cal mecnadec ceseli cajec eu eeta?” ein.   
\p
\v 11 Odimeig age Jisas sisildoin, “Eetanu loo je iwaladec age Ilaija uqa aquni hugian egina?” doin.\f + \fr 9.11 \ft Loo je iwaladec dana age cit qoc saennu je oso iwaladein. Je uqana gug eu Malakai 4.5-6. Age Ilaija uqa Krais aqunitu cali hugian ec madein.\f*  
\v 12 Odocobil Jisas jejenega hewi maaden, “Ilaija uqa mele aquni hugian, humei ceteh cogogen eu cunug tutuc mudigian. Euqa eetanu Anutna je age Dana Melahnu jaqein, uqa deweg sogoec mati bahic gahidocob dana cajaca cunug age cewudoqagan ec odi jaqein?  
\v 13 Euqa ija maadigina, Ilaija uqa wele hon. Hocob dana agedodoc wawaga maden eu age uqa odudein. Eu oduduqagan ec wele uqanu jaqeinwe odi odudein,” aden.   
\s1 Jisas mel oso buga me qeeca me muden  
\r (Matju 17.14-21; Luk 9.37-43)  
\p
\v 14 Jisas malogom cijedca age malogom leih gami gabandumeig age dana cajaca mati bahic ceguli talilaadegin fein. Ono loo je iwaladec age malogom gami jena file dadaneegin fein.  
\v 15 Odocobil dana cajaca age Jisas caleceb fimeig age geh bahic filicitein. Odimeig mahuc age uqaca guguli limeig feele dudu madoin.   
\p
\v 16 Odocobil Jisas uqa sisiladen, “Age, age gami eeta togodoiga?” aden.   
\p
\v 17 Odocob dana oso dana cajaca amnadec Jisas madon, “Iwalgec, ija melami uqa buga me qeeca, uqa je madecwe qee. Eunu ija ehudi hinaca ahuga.  
\v 18 Buga me qee hu hewena saen euna qu ihu qocob mahana tonimei sahalic magmagdodoi maig kicodudu deweg kieceb gagadic mena. Ija hinana malogom ititacdoqagannu maadigaqa age ititacdocnu odoiga ihoc qee,” don.   
\p
\v 19 Odocob Jisas uqa je eu dah mimei maaden, “O dana cajaca qila bilegina, age wawaga meleecca qee! Saen ganic ija ageca haun biligen? Saen ganic ija camuhulaadi cobigen? Mel eu cemeni ehudi ahoigale,” aden.   
\p
\v 20 Odocob age mel eu Jisas amegna ehudi ahoin. Odocobil buga me qee eu Jisas fimei mahuc mel eu qu ihu qocob mahana tonimei coliwcoliwi niniji sahalic magmagdon.   
\p
\v 21 Odocob Jisas mel memeg sisildon, “Cel saen bahic hag eu mel dewegna sanan men?” don.  
\p Odocob memeg madon, “Mel nagna bahic saen euna sanan muden.  
\v 22 Saen mati mel eu deweg tudugiannu odudeceb jana lena, odimei wana nuina. Euqa hina ceteh oso odocnu ihocfi hina egenu wawin qocob cesulgagale,” don.   
\p
\v 23 Odocob Jisas madon, “Eetanu hina mataga, ‘Hina odocnu ihocfi,’ taga? Oso waug meleeccafi eeta cunug uqa odocnu ihoc,” don.   
\p
\v 24 Odocob mahuc memeg utai bilei madon, “Ija wawi meleenaqa ijana wawi meleec eu gohic. Eunu ijana wawi meleec cesuldogale,” don.   
\p
\v 25 Odocob Jisas uqa dana cajaca mati bahic hu gabandu alilaadegin fimei uqa buga gegehinca cahacdudu madon, “Hina buga con dahinca cufa qoc, ija je gagadic mahigina, hina melnadec cali hu nuuga. Hina mel deweg dunuh eu haun cain lagaun,” don.   
\p
\v 26 Odocob buga me qee qajimei mel eu hewi qu me qee mudi ihu qocob tonimei mahana ninijen cali hu nuen. Mel eu cal mec cinigwe nijen. Odocob dana cajaca cunug madein, “Mel cal meia,” ein.  
\v 27 Euqa Jisas mel eu eben umei cesuldocob caji tawen.   
\p
\v 28 Odocob Jisas uqana malogomca age jo oso dunuh limeig uqana malogom jahuni sisildoin, “Eetanu ege buga me qee eu ititacdocwe qee?” doin.   
\p
\v 29 Odocobil Jisas jejenega hewi maaden, “Inondocna\f + \fr 9.29 \ft Grik jaqec je hilah leihna age je oso tubdu jaqein eu odi: “sabnu qagu bilecnaca”\f* himec buga me qee eundec ititacdocob cali hu nuina, ceteh osona ihoc qee,” aden.   
\s1 Jisas uqa cal mimei ceseli cajigian ec madi lecisdon  
\r (Matju 17.22-23; Luk 9.43-45)  
\p
\v 30-31 Odocob Jisas uqana malogom gami jobon eu culdi Galili hatu gemogemo coboin. Uqa uqana malogom iwalaadi bilei maaden, “Dana Melah eu dana ebenegana mudecebil age uqa qocobil cal migian. Cal mimei uqa deel cijed hedocob haun ceseli cajigian,” aden. Eunu uqa dana age ono bilina ec docnu culen.  
\v 32 Euqa age je eu uqana gugnu wawaga qee fogo dol. Odimeig age je gugnu sildiadecnu sisildocnu cucuiein.   
\s1 In oso cunug wooladi ben biligian?  
\r (Matju 18.1-5; Luk 9.46-48)  
\p
\v 33 Age Kapaneam jobon ono calimeig jo oso dunuh li bibileig Jisas uqa uqana malogom sisiladen, “Age cel je jicna togododogin duga?” aden.  
\v 34 Euqa age jicna agedodoc gemona in oso cunug wooladi ben bilinanu togodoin. Eunu age je madecnu culein.  
\v 35 Odocobil Jisas uqa bilimei uqana malogom 12-pela utaadimei maaden, “Oso uqa matu bilecnu waug nijinafi uqadodoc hib bahic mudigian. Odimei uqa cunugnu cewel dana migian,” aden.  
\v 36 Odimei uqa mel sim oso u uqa age gemona mudeceb tatawen uqa eben u colowandumei maaden,  
\v 37 “Oso uqa mel sim eundec oso ija ijanina ehudimei eu eeldona eu uqa ija oitimei eeltena. Odocob oso uqa oitimei eeltena eu uqa ija dih qee oitinaqa ija sulten euha ehudimei eeldona,” aden.   
\s1 Oso egena cad qee bilina eu uqa egena danah bilina  
\r (Luk 9.49-50)  
\p
\v 38 Odocob Jon uqa Jisas madon, “Iwalgec, ege dana oso hina ijainna buga me qee eundec dana deweneganadec ititacaaden fom. Uqa egena amnadec qee bilel. Eunu ege uqa cahacdom,” don.  
\v 39-41 Euqa Jisas maaden, “Oso uqa ijanina kobolkobol odimei uqa saen nag gieceb ijanu je me qee madecnu ihoc qee. Oso uqa ege qee me qee migina eu egenu tawena. Ija mele maadigina, oso age Kraisna eundecnu cesuladimei wa gab oso adena eu uqa hibna ameg me bahic ugian. Eunu age cain cahacdowain,” aden.   
\s1 Kobol me qee dana uqana waug meleec odocob qee migian  
\r (Matju 18.6-9; Luk 17.1-2)  
\p
\v 42 Jisas odi maadi maaden, “Oso uqa mel sim i eundec oso uqa ijanu waug meleena eu odudeceb silail migiaqa eu meen ben culumenca bena qagi macas ameg nijia euna age heloubmi eu me odoub.  
\v 43-44 Odocob hina eben lecisca oloqanih jana ja cijeceb catanena euna helihecebil bilecnu eu me qee bahic.\f + \fr 9.43-44 \ft Grik jaqec je hilah leihna age je oso tubdu jaqein eu odi: “Cudun euna gumac dewenega gaid qu jegina, odocob ja dewenega gaid cijina,” aden.\f* Euqa hina eben osolca qee cebac bilec catanec ogaqa eu me. Eunu hina eben silail mecnu mana tawecebfi hina eben qeti helagale.  
\v 45-46 Odocob hina jaim lecisca oloqanih jana helihecebil bilecnu eu me qee bahic.\f + \fr 9.45-46 \ft Grik jaqec je hilah leihna age je oso tubdu jaqein eu odi: “Cudun euna gumac dewenega gaid qu jegina, odocob ja dewenega gaid cijina,” aden.\f* Euqa hina jaim osolca qee cebac bilec catanec ogaqa eu me. Eunu hina jaim silail mecnu mana tawecebfi hina jaim qeti helagale.  
\v 47 Odocob hina amen lecisca oloqanih jana helihecebil bilecnu eu me qee bahic. Euqa hina amen osolca himec Anutna cul lagaqa eu me. Eunu hina amen faninheceb silail mifeg amen seli helagale.  
\v 48 Cudun euna  
\q1 ‘gumac dewenega gaid qu jegina,  
\q2 odocob ja dewenega gaid cijina,’ en,” aden. \rq (Aisaia 66.24)\rq*   
\p
\v 49 “Ge, [age ceteh Anutnu ihanegina euna macas mecebil Anut amegna cataniec nijina eu odiwe] ja euha Anut uqa dana dewenega cunugna migian,” aden.\f + \fr 9.49 \ft Grik je i uqana gug bahic eu camasac qee. Age Wok Pris 2.13 feiga.\f*   
\p
\v 50 “Macas eu me bahic qa uqana tin tebandoc eu qee mecebfi age adi uqana tin tebandoc weledec eu haun muduqagan? Age dool cuhunugana macas mecebil gaid me bilina eu odiwe age agedodoc wawagana macas mecebil cotogailca malol bileigale,” aden.   
\c 10  
\s1 Jisas uqa dana caja ocobocobec cagoc kobolnu iwaladen  
\r (Matju 19.1-12; Luk 16.18)  
\p
\v 1 Jisas uqa cudun eu culdimei Judia hatuna nuen. Odimei Jodan Wa letimei len. Ono dana cajaca mati bahic uqaca haun hoin. Odocob uqa gaid odonwe odi iwaladen.   
\p
\v 2 Odocob Farisi leih age ege Jisas temdu feqan imeig uqa sisildu madoin, “Magaga, dana oso uqa aideg culdecnu egena loo je cois ec madenafo?” doin.  
\v 3 Odocobil Jisas jejenega hewi maaden, “Cel loo je Moses uqa age gagadic maaden?” aden.  
\v 4 Odocob age odi madoin, “Moses uqa dana oso ocobocobec cagocnu je oso jaqimei aideg utimei suldocob nuigian eu cois ec magen,” doin.  
\v 5 Euqa Jisas maaden, “Age wawaga tool ibuldon eunu Moses uqa agenu loo je i jaqimei aden.  
\v 6 Euqa ifanec gug qocna Anutna je odi madena:  
\q1 ‘Anut uqa dana cajaca ifani malimei maden,’ ena. \rq (Jenesis 1.27)\rq*   
\m
\v 7 Anutna je euha madena:  
\q1 ‘Gug inu dana uqa memeg anagca culalimei aidegca gabanalecebil biluwasan.   
\q1
\v 8 Odocob lecis ale deweg osol biluwasan,’ ena. \rq (Jenesis 2.24)\rq*  
\m Eunu ale lecis qee biluwasinqa ale deweg osol bilesina.  
\v 9 Eunu Anut gabandon eu dana oso cain cagoiaun,” aden.   
\p
\v 10 Odocob age jona ceselimeig uqana malogom age dana caja ocobocobec cagocnu je eunu haun sisildoin.  
\v 11 Odocobil Jisas maaden, “Dana oso uqa aideg culdi caja haun oso ona eu dana caja sisi jelec wagalimei uqa aideg wal kobol odudina.  
\v 12 Odocob caja eu uqa dana culdimei li dana haun oso ocobfi uqaha dana caja sisi jelec wagalimei wal kobol odona,” aden.   
\s1 Jisas uqa mel sim culadecebil uqaca hoqagannu maaden  
\r (Matju 19.13-15; Luk 18.15-17)  
\p
\v 13 Dana cajaca leih age mel sim Jisas eben age ilomogana migiannu uqaca ehadi ahoin. Ahocobil malogom age ehadi ahoin eunu gagalaadi cahacadein.  
\v 14 Euqa Jisas uqa eu fimei uqana malogom galac maden, “Mel sim eundecnu Anutna cul muden nijiado. Eunu cain cahacadowain. Culadecebil mel sim age ijaca hoigale.  
\v 15 Ija mele maadigina, oso uqa mel sim Anutna cul ona eu odiwe qee ona eu Anutna culna qee leiaun,” aden.  
\v 16 Odimei uqa mel sim calawanadimei eben ilomogana mimei eeladen.   
\s1 Dana haun cehewanca uqa Jisasca hocob je madesin  
\r (Matju 19.16-30; Luk 18.18-30)  
\p
\v 17 Odocob Jisas uqana jic nuigia oodon dana oso uqaca guguli hu jaihna gob cehimei sisildon, “O Iwalgec Me, ija eeta odimig cebac bilec catanec eu mugumi ugen?” don.  
\v 18 Odocob Jisas madon, “Eetanu ija me taga? Dana cunug me qee. Anut himec uqa me bilina.  
\v 19 Hina Mosesna loo jena eu dogona:  
\q1 ‘Oso cain qagadogaun.  
\q1 Dana cajaca dewenela osol mec cain cagualegaun.  
\q1 Oso uqana ceteteh cain heje cedagaun.  
\q1 Oso uqanu uhulec je cain madagaun.  
\q1 Oso uqana ceteteh cain qaudu cedagaun.  
\q1 Hina anin memenca lalan malagale,’ ena,” don. \rq (Kisim Bek 20.12-16; Loo 5.16-20)\rq*   
\m
\v 20 Odocob dana eu uqa Jisas madon, “Iwalgec, ija simnadec cocobi Mosesna loo je eu cunug toodu odom,” don.  
\v 21 Odocob Jisas uqa mecidumei uqanu nalug meceb madon, “Hinana odoc ihoc ligiannu odoc oso qee odolom eu odogale. Hina nuimeg hina cehewain cunug idadumeg meen qaig eunadec umeg dana sawen eundec siwiadagale. Odi odimeg hina sao jobon ono cehewainca bilegan. Odimeg hu ija tootagale,” don.  
\v 22 Odocob dana eu uqana ceteh cehewanca mati bahic nijen eunu je eu dumei uqa waug me qee meceb waug culumen dodon Jisas cuculdi nuen.   
\p
\v 23 Odocob Jisas uqa qaalimei uqana malogom meciadimei maaden, “Dana cehewanagaca eundec age Anutna cul dunuh loqagannu eu cacanigca bahic!” aden.  
\v 24 Odocob uqana malogom je eu dumeig filicitein. Euqa Jisas uqa je haun maaden, “Ijana mel, Anutna cul dunuh lecnu eu cacanigca bahic!  
\v 25 Kamel lotoc gisec cese gigilona isec li nuecnu eu cacanigca, euqa dana cehewanca eu Anutna cul dunuh lecnu cacanigca eu wooldoc bahic,” aden.  
\v 26 Odocob uqana malogom age geh bahic filicitein. Odimeig madoin, “Mele odi nijecebfi oso cahahadocnu eu adi?” doin.  
\v 27 Odocobil Jisas uqana malogom meciadimei maaden, “Dana age odi odocnu qee nijel euqa Anut uqa ceteh cunug odocnu ihoc. Eunu Anut ihoc odigian,” aden.   
\p
\v 28 Odocob Pita eunu mamadi Jisas madon, “Faga, ege ceteteh cunug culimeb hina toohi coboqona,” don.  
\v 29 Odocob Jisas maaden, “Ija mele maadigina, oso ijanuca me jenuca uqa jobonfo, waliagulfo, cebinagulfo, anag memegcafo, talaculfo, mahamahafo culina  
\v 30 eu uqa maha ina bibili wooldoc ameg ben bahic ugian. Uqa maha ina jobonjobonca, waliagulca, cebinagulca, anagulca, talaculca, mahamahaca haun cedadigian. Odocob uqa maha ina jabi tootoodocha gulucdugian. Odocob uqa saen hibna hugian euna cebac bileceb catanec ugian.  
\v 31 Euqa mati qila hib bahic taweiga eundec age isi aquni tawoqagan. Odocob mati qila aquni taweiga eundec age isi hib bahic tawoqagan,” aden.   
\s1 Jisas uqa cal mimei ceseli cajigian ec madi cijeddon  
\r (Matju 20.17-19; Luk 18.31-34)  
\p
\v 32 Age Jerusalem jicna tetegin Jisas aquniadi cobon. Cocoboig uqana malogom age filicitein. Dana hib tooadein eu age cucuiein. Odocobil Jisas uqa haun malogom 12-pela ehadi gesacna limeig eeta uqaca caligian eunu maaden,  
\v 33 “Feiga, ege Jerusalem toqona. Ono age Dana Melah ihanec dana benbenca loo je iwaladecca ebenegana muduqagan. Age uqa cal migiannu geldumeig Juda dana qee eundec ebenegana muduqagan.  
\v 34 Odocobil age uqa lelandumeig cin qudimeig qisadoqagan. Odimeig age uqa qocobil cal migian. Odocob deel cijed hedocob haun ceseli cajigian,” aden.   
\s1 Jems Jonca ale Jisas odaleceb ben biluwasannu madosin  
\r (Matju 20.20-28)  
\p
\v 35 Odocob Jems Jonca, Sebedi melahul lecis, ale Jisasca humesi madosin, “Iwalgec, ele ceteh osonu sisilhecnu gale lena. Odocob hina ceteh eu odilecnu gale lena,” dosin.  
\v 36 Odocobil Jisas sisilali maalen, “Ija eeta odalecnu madesina?” alen.  
\v 37 Odocob jejeg hewi madosin, “Hina kobolkobolca bilegan saen euna ele oso eben meulana isec, oso eben ansena isec bilec ilegannu je hahun iligale,” dosin.   
\p
\v 38 Euqa Jisas maalen, “Ale ceteh eunu ninitesina eu caun qee dosina. Wa gab ija jigen eu aleha jecnu ihocfo? Wa joitec ija ugen eu aleha ocnu ihocfo?” alen.  
\v 39 Odocob ale madosin, “Ese, ele jecnu ihoc,” dosin.  
\p Odocobil Jisas maalen, “Wa gab ija jigen eu aleha jowasan. Wa joitec ija ugen eu aleha owasan.  
\v 40 Euqa bilec cudun ebeni meulana isecca ebeni ansena isecca adecnu eu ijana cabi qee. Eu Anut uqa bilec eu ocnu wele maden eu ale bahic owasan,” alen.   
\p
\v 41 Odocob malogom 10-pela age je eu dumeig Jems Joncanu wawaga me qee men.  
\v 42 Odocobil Jisas uqa utaadeceb uqaca hocobil maaden, “Juda dana qee eundec agena ilo egina eu age agena dana gagadic madegina, odocob mahana dana ben age dana cilehadegina eunu age dogina.  
\v 43 Euqa age gemona odi cain nijiaun. Age gemona oso ija ben biligen ifei uqa cotugul cunug cewel uadeiale.  
\v 44 Odocob age gemona oso uqa ija matu biligen ifei eu uqa cunug agena begabeg meh cabi dana ibuldoiale.  
\v 45 Ge, Dana Melah ha dana age ija cewel utuqagan imei qee toni nel. Qeeo. Dana Melah uqa dana cajaca cewel uadecnu toni nen. Uqa ijana cebac bilec eu dana cajaca mati besiadec fajadecnu culigen imei eunu toni nen,” aden.   
\s1 Jisas dana oso, ijan Batimias, uqa ameg galuc mec me muden  
\r (Matju 20.29-34; Luk 18.35-43)  
\p
\v 46 Age Jeriko taun ono calein. Jisasca uqana malogomca gami dana cajaca mati bahic Jeriko taun cuculdi cocobogin ameg galuc mec dana oso uqa jic gesacna bilen. Uqa ijan Batimias uqa Timias melah, uqa gaid sabnu cesuldoqagannu niniadoloig.  
\v 47 Dana eu uqa Jisas Nasaretdec hona ec mamadegin dah mimei uqa utai maden, “O Jisas, Dewid Melah, ijanu walol heiale,” en.  
\v 48 Dana cajaca mati age gagaldudu madoin, “Cain utaagaun. Culugale,” doin. Euqa uqa feeaadi co suli u haun utai madon, “Jisas, Dewid Melah, ijanu walol heiale!” don.  
\v 49 Jisas tului tawimei dana cajaca maaden, “Utadocobil hoiale,” aden. Odocob age dana ameg galuc mec eu utadu madoin, “Uqa hina utahena. Hina wawin toogdoiale. Cajaga,” doin.  
\v 50 Odocobil dana eu uqana lotoc ben cagasi helimei busaci caji Jisasca len.  
\v 51 Odocob Jisas madon, “Ija hina eeta odihigennu matagana?” don. Odocob dana ameg galuc mec eu Jisas madon, “O Meca, ija ceteh fecnu madigina,” don.  
\v 52 Odocob Jisas madon, “Hina wawin meleec eu me mihia! Gad nuugale,” don. Odocob dana eu mahuc ameg fogo docob uqa ceteteh cunug fen. Odimei uqa Jisas toodocob belein.   
\c 11  
\s1 Jisas uqa kingwe Jerusalem dunuh len  
\r (Matju 21.1-11; Luk 19.28-40; Jon 12.12-19)  
\p
\v 1 Jisas uqana malogomca age Jerusalem dodoldodogin Betfasi Betanica jobon ale Oliw Aluhna isec calimei uqana malogom lecis sulaali  
\v 2 maalen, “Jobon amigena nijia euna lesia. Ale dunuh lelesi cesel goman manahal oso qagec tataweb eu mahuc gulucdowasan. Cesel eu dana oso tatacan qee bilel. Ale eu cufalimesi ehudi ahosiale.  
\v 3 Dana oso sisilalecebfi, ‘Eetanu odi odosina?’ alecebfi ale madowasan, ‘Tibud cesel eu ocnu eu cabi osoca madena. Uqa mahuc ene ceseli suldugian,’ dowasan,” alen.  
\v 4 Odocob uqa je odi maaleceb ale belimesi ono cesel goman manahal oso jicna jo cebecna qagec tatawen fesin. Cesel eu cucufalesin  
\v 5 dana leih ono gauc tawein eu age maalein, “Ale eeta odosina? Eetanu cesel goman manahal eu cufalesina?” alein.  
\v 6 Odocobil ale Jisas maalen odi maadesin. Odocob dana eu age culalecebil cesel eu hewi belesin.  
\v 7 Belimesi cesel eu Jisasca ahosin. Odimesi alena lotoc cesel eu gogodohna duitocobil Jisas uqa ohis tobi bilen.  
\v 8 Dana cajaca mati bahic age agena lotoc jicna duein. Leih age celus cabina qetimeig jicna duein.  
\v 9 Dana cajaca age aqunitutu ha toodudu cocobi age conoga suli u madein:  
\q1 “Hosana!\f + \fr 11.9 \ft Hibru jena uqana gug bahic eu “Anut cahahagagale!” euqa saen euna eu Anut binan sulecnu je oso.\f* Tibud ijanna hona eu uqa eeldoc biliale! \rq (Buk Song 118.25-26)\rq*   
\q1
\v 10 Ege memige Dewidna cul hona eu eeldoc biliale!  
\q1 Hosana!\f + \fr 11.10 \ft Hibru jena uqana gug bahic eu “Anut cahahagagale!” euqa saen euna eu Anut binan sulecnu je oso.\f* Anut ohis bilina uqa binan wasi nuiale!” ein.   
\p
\v 11 Jisas uqa Jerusalem dunuh len. Ono tempel dunuh len. Ono uqa ceteteh cunug talilaadi meciadi cobon qa uqa hib len. Eunu uqa haun ceseli Betani jobon ono uqana malogom 12-pela gami belein.   
\s1 Jisas na dan geuldeceb haun aig qee qol  
\r (Matju 21.18-19)  
\p
\v 12 Cojageceb age Betani jobondec ceceselegin Jisas uqa wen don.  
\v 13 Uqa na dan bagacca onoca tatawen fen. Odimei uqa ono gug cemenug limei aig oso mogi u jige en. Euqa na dan me aigca qee, eu bagac himec tatawen fen. Ge, eu uqana aig qoc saen qee.  
\v 14 Odimei uqa na dan madon, “Oso hinana aig haun qee jeiaun!” don. Odocob uqana malogom age je eu doin.   
\s1 Jisas uqa idadoc dana age tempelna bibilegin ititacaden  
\r (Matju 21.12-17; Luk 19.45-48; Jon 2.13-22)  
\p
\v 15 Age Jerusalem ono calimeig Jisas uqa tempel dunuh len. Ono uqa dana ceteh fajeinca ceteh suldoinca eundec ititacadeceb maha gemo calein. Odimei meen qaig hatu filfil agena wadacwuducein eundec agena cabal sundocob agena meen qaig golodon. Uqa cuhudid suldoc agena cabalha sundocob golodon.  
\v 16 Odimei agena ceteh cunug cedeceb tempel gemogemo hewi lecnu cahacaden.  
\v 17 Odimei uqa dana ono iwalaadi maaden, “Anutna jaqec je i qee sanijeleinfo?  
\q1 ‘Ijana jo eu dana cajaca age hatuhatu cunug bilegina eu agenu Anut inondocnu jo oqagan,’ ena. \rq (Aisaia 56.7)\rq*  
\m Ageqa agena odocna  
\q1 age falicdocobil heje dana agena jahunec cudun ibuldon!” aden. \rq (Jeremaia 7.11)\rq*   
\p
\v 18 Odocob ihanec dana benbenca loo je iwaladec age je eu dumeig uqa qagadoqagannu jic wali coboin. Ge, dana cajaca cunug uqana iwaladecnu filicitein eunu age cucuidoin.  
\v 19 Wesu memen Jisas uqana malogom gami age Jerusalem culi belein.   
\s1 Dana uqa waug mele bahic eceb inondumei ceteh ona  
\r (Matju 21.20-22)  
\p
\v 20 Malogom age qasil jicna bebeleig na dan eu bagacnadec nu gugna calen cunug galalen eu fein.  
\v 21 Odocob Pita uqa Jisas na dan madonnu cisdumei Jisas madon, “Meca, faga! Na dan hina geuldegan eu galaleian,” don.  
\v 22 Odocob Jisas uqa malogom maaden, “Age Anutnu wawaga meleeiale.  
\v 23 Ija mele maadigina, oso waug meleec nijialumi waug lecisca qeefi uqa aluh i hina caji macasna tonoga doubmi eu co toodu odoub. Oso uqa eeta madena eu caligian eunu waug meleecebfi eu co toodu caligian.  
\v 24 Eunu ija maadigina, age cetehnu inondufeig age ceteh eu oqagannu wawaga meleecebfi ceteh eu oqagan,” aden.   
\p
\v 25-26 “Odocob Memega sao jobon bilia uqa agena silail dahig celigiannu age inondudu tataweig saen euna dana oso uqa hina silail mihen eunu cisdufeig uqana silailnu eu dahiniga celeiale,” aden.\f + \fr 11.25-26 \ft Grik jaqec je hilah leihna age je oso tubdu jaqein eu odi: “Euqa age osona silail dahiniga qee celecebfi Memega sao jobon bilia uqaha agena silail dahig qee celeiaun,” aden.\f*   
\s1 Age Jisas in cabi eu ocnu maheceb odogona? ec sisildoin  
\r (Matju 21.23-27; Luk 20.1-8)  
\p
\v 27 Jisas uqana malogomca age Jerusalem ceseli lein. Odimeig Jisas uqa tempel dunuh cocobon ihanec dana benbenca, loo je iwaladecca, Juda agena matuca age uqaca humeig  
\v 28 sisildu madoin, “In ijanna hina ceteh eu odogona? In cabi eu ocnu maheceb odogona?” doin.   
\p
\v 29 Odocobil Jisas jejenega hewi maaden, “Ija casac je oso sisiladigen. Age eu jejeni hewi matecebil ija hibna ha in cabi i iteceb in ijanna ceteh i odigina eu camas mecemin doqagan.  
\v 30 Eu odi, Jonna wa joadec eu sao jobondecfo, qee dananadecfo? Mateiga duga,” aden.   
\p
\v 31 Odocob age fee dadani togodudu madein, “Ege madoqaqa wa joadec eu sao jobondec doqaqa uqa ege eetanu uqanu wawaga mele qee el? gigian.  
\v 32 Ege madoqaqa wa joadec eu dananadec doqaqa euha ihoc qee,” ein. Ge, dana cajaca cunug age Jonnu uqa je hahun madec dana mele bahic ein. Eunu age dana cajacanu cucuiein.  
\v 33 Eu togodu hedumeig age Jisas madoin, “Jonna wa joadec eu anadec ege qee doqona,” doin. Odocobil Jisas maaden, “Eunu ija ageha in cabi i iteceb ugina, in ijanna ceteh i odigina eu qee maadigaun,” aden.   
\c 12  
\s1 Cabi dana me qee age wain cabi cofdoinnu galolo je  
\r (Matju 21.33-46; Luk 20.9-19)  
\p
\v 1 Odimei Jisas uqa galolo jena sanan mimei maaden, “Dana oso uqa wain cabi cehimei alildu gel faldumei wain aig afdocnu kunum cisimei wain cabi cofdoc biluqagannu jo ben ohis tobi eit fec ihoc eu odi cehen. Odimei uqana wain cabi dana leih cabi oqagannu ebenegana mimei uqa hatu osona nuen.\f + \fr 12.1 \ft Age je Matju 21.33-41na nijia eu feiga.\f*  
\v 2 Wain aig wal meceb cedec saen cali hocob wain cabi gug uqa cabi dana oso suldudu madon, ‘Hina nuimeg wain cabi oc eundec maadecem age wain aig leih eu ihecebil cedi ahutagale,’ don.  
\v 3 Odocob dana age wain cabi cofdoin eu age cabi dana hewimeig deweg tudumeig wain aig ameg oso qee utec suldocobil ceselen.  
\v 4 Odocob wain cabi gug uqa haun uqana cabi dana oso suldocob nuen. Odocob wain cabi cofdoin eu ageha cabi dana eu ilo qumeig me qee mudein.  
\v 5 Odocobil wain cabi gug uqa cabi dana oso suldocob nuen. Odocob age uqa qocobil cal men. Odocobil wain cabi gug uqa haun ceseli cabi dana matica suladen. Euqa ageha cabi dana cunug odi odadein. Age leih dewenega tudoin, age leih aqecebil cal mein.  
\v 6 Wain cabi gug uqa dana suldocnu osol bilen, uqa melah nalug men. Cit qocna uqa melah sulduaden. Ge, uqa maden, ‘Ija melaminu cumundoqagan,’ en.  
\v 7 Euqa wain cabi cofdoc age togodu madein, ‘I cabi gug huqaneh, uqa isi wain cabi ugian. Cois uqa muguh eu ege oqannu ege cajimeb qocomun cal mecnu!’ ein.  
\v 8 Odimeig age mel eu hewi sundudu qocobil cal meceb wain cabi dunuhdec heludecebil maha gemo calen,” aden.   
\p
\v 9 “Wain cabi gug uqa wain cabi cofdoc dana eeta odadigian? Uqa humei wain cabi cofdoc fadaladeceb cal moqagan. Odimei wain cabi eu dana filfil adigian,” aden.   
\p
\v 10 “Jaqec je oso Anutna je jaqec tawena eu qee sanijeleinfo? Je eu odi madena:  
\q1 ‘Meen oso meen gel cehec memei dana age culein eu  
\q2 qila meen jo big gug jo hehdocnu calen.   
\q1
\v 11 Eu Tibud uqadodoc odi odon.  
\q2 Ceteh eu foqona eu kobolkobolca,’ ena,” aden. \rq (Buk Song 118.22-23)\rq*   
\p
\v 12 Odocob loo je iwaladecca, ihanec dana benbenca age Jisasna galolo je eu dah mimeig age uqa je eu agenu maden eunu wawaga fogo don. Eunu age uqa heweqan ein euqa age dana cajacanu cucuiein. Odimeig age Jisas cuculdi belein.   
\s1 Dana age Sisana takis helecnu je  
\r (Matju 22.15-22; Luk 20.20-26)  
\p
\v 13 Ihanec dana benbenca, loo je iwaladecca, Juda agena matuca age Farisi leihca Herodna sihul leihca Jisas suladitocobil lein. Age ege Jisas cona je oso cahuldu madeceb uqa dewegnu geuldec je oso oqan imeig lein.  
\v 14 Age uqaca humeig madoin, “Iwalgec, ege hinanu doqona, hina mele je madagana, hina dana binanagaca eundecnu qee cucuiagana. Ge, hina dana saolal madec bilegina eundecnu qee jogoagana qa hina Anutna jic tutuc iwaladagana. Ege Sisanu takis helecnu eu tutucfo, qee tutuc qeefo?  
\v 15 Ege Rom agena takis heleqanfo, qee eu qee heloqaunfo?” doin.  
\p Euqa Jisas uqa age me hihili qaudoin eu dumei maaden, “Age eetanu temtegina? Meen qaig oso ahutecebil ija figen,” aden.  
\v 16 Odocob age meen qaig oso ahu utein. Odocobil uqa sisiladi maaden, “Meen qaig ina in hahun eu gaga qoc taweia? In ijanha jaqec taweia?” aden. Odocob age madoin, “Eu Sisa uqana,” doin.  
\v 17 Odocobil Jisas maaden, “Age Sisana ceteteh eu Sisa uteiga. Anut toinan eu Anut uteiga,” aden. Odocob age je eu maadeceb dumeig tumatumaein.   
\s1 Sadjusi age Jisas dana cal mein eundec ceseli cajecnu sisildoin  
\r (Matju 22.23-33; Luk 20.27-40)  
\p
\v 18 Sadjusi age Jisasca hoin. Sadjusi age cal mein eundec ceseli qee cajowain egina. Age Jisas je oso sisildu madoin,  
\v 19 “Iwalgec, Moses uqa loo je jaqec oso igen eu odi madena, ‘Dana oso uqa waliag cal mimei aideg culdigian qa melca qeefi dana eu uqa waliag cal men euna mel basituwasannu aideg eu ugian,’ ena.  
\v 20 Saen osona waliagul 7-pela biloloig. Matu eu caja on. Odimei uqa aideg mel qee basec cal men.  
\v 21 Odocob waliag lecisdoc uqa caja eu on. Uqaha aideg mel qee basec cal men. Odocob waliag cijeddoc uqaha odi odon.  
\v 22 Waliagul 7-pela cunug odi odimeig caja eu mel qee basec cunug cal mein. Hibna caja euha cal men.  
\v 23 Aria, waliagul 7-pela cunug uqa age osolosol agena caja bilen. Eunu ceseli cajec saenna caja eu in aideg biligian?” doin.   
\p
\v 24 Odocobil Jisas maaden, “Age Anutna jaqec je nijia eu qee dogina, age Anutna gagadic odocha qee dogina. Eunu age dadanec bilegina.  
\v 25 Ge, age cal mecnadec ceseli cajoqagan saenna eu age dana caja ocobocob qee owain. Euqa age ensel sao jobon bileginawe odi biluqagan,” aden.   
\p
\v 26 “Cal mecnadec ceseli cajec eunu je oso nijia. Age Mosesna jaqec jena Moses uqa na nag ja cijennu jaqen eu qee sanijeleinfo? Jaqec je cudun euna Anut uqa Moses madon:  
\q1 ‘Ija Ebrahamna Anut, ija Aisakna Anut, ija Jekobna Anut,’ don. \rq (Kisim Bek 3.6)\rq*   
\m
\v 27 Anut uqa cal mein agena Anut qee. Euqa uqa cebac bilegina agena Anut. Age dadanec bahic,” aden.   
\s1 Age Anutna loo je matunu Jisas sisildoin  
\r (Matju 22.34-40; Luk 10.25-28)  
\p
\v 28 Loo je iwaladec dana oso uqa Sadjusi age Jisas je maaden eunu fee dadaneegin dah men. Odimei uqa Jisas wadacdoc je me bahic maaden eu fimei uqa limei Jisas sisildon, “Loo je meca bahic Mosesna loo je oso cunug wooldoc cel loo je nijia?” don.  
\v 29 Odocob Jisas jejeg hewi madon, “Loo je caunca bahic eu odi madena:  
\q1 ‘O Isrel dah meigale,  
\q1 Tibud uqa egena Anut,  
\q2 Tibud uqa osol bilina.   
\q1
\v 30 Odocob hina Tibud, hinana Anutnu wawin cunugca, doloin cunugca, hinana cisdoc cunugca, hinana gagadic cunugca euna nalug magale,’ ena. \rq (Loo 6.4-5)\rq*   
\m
\v 31 Uqana toodoc eu odi madena:  
\q1 ‘Hina hinanel nalunin maganawe  
\q2 odi hina utuqain bilec\f + \fr 12.31 \ft Utuqain bilec uqana gug eu odi. Agena loofo, agena kobolfo eu dana osonu nalug magale ec qee madel, cois hina dana eunu nalug magale.\f* eundecnu nalug magale,’ ena. \rq (Wok Pris 19.18)\rq*  
\m Loo je oso loo je lecis i woolalec qee nijel,” don.   
\p
\v 32 Odocob loo je iwaladec uqa Jisas madon, “Iwalgec, hinana je eu tutuc bahic! Hina mele madaga, ‘Tibud uqa osol bilina, Tibud oso qee bilina,’ aga.  
\v 33 Odocob ege Anutnu wawige cunugca, egena doc cunugca, egena gagadic cunugca euna nalug moqonafi eu me bahic. Ege egedodocnu nalunige moqonawe odi utuqanige bilegina agenu nalunuga moqonafi euha me bahic. Ege loo je lecis i toodu odocomunfi kobol eu ihanec cunug age jana maneginaca ihanec filfil cunugca wooladena,” don.   
\p
\v 34 Odocob Jisas uqa loo je iwaladec eu je cisdoc silecca maden eu fimei madon, “Hina Anutna cul cemenug biliga,” don.  
\p Odocob dana cunug ono bilein age Jisas je oso haun sisildocnu culein.   
\s1 Jisas uqa dana cajaca Kraisnu sisiladen  
\r (Matju 22.41-46; Luk 20.41-44)  
\p
\v 35 Jisas uqa tempel dunuh dana cajaca iwalaadi bilei je oso sisiladen, “Loo je iwaladec dana age adi madegina, ‘Krais eu Dewid Melah,’ egina?  
\v 36 Kis Gun uqa Dewid dado mudeceb uqadodoc maden:  
\q1 ‘Anut Tibud uqa ijana Tibud odi maden,  
\q2 “Ijaca hu ebeni meulana isec bibilem  
\q2 ija odocomin hinana cad cunug hu ninijebil  
\q2 hina jaimna lahacadegan,” en,’ Dewid odi maden. \rq (Buk Song 110.1)\rq*   
\m
\v 37 Dewid uqadodoc Kraisnu madi, uqa ijana Tibud, en, eunu adi uqa Dewid Melah bilina?” aden.  
\s1 Loo je iwaladec age kobol me qee odoin  
\r (Matju 23.1-36; Luk 11.37-54; 20.45-47)  
\p Dana cajaca mati bahic cegulein eu age Jisasna je docnu geh bahic gale aden.  
\v 38 Odocob Jisas uqa je iwalaadi bilei maaden, “Age loo je iwaladec dananu batut feigale. Loo je iwaladec age lotoc cecelac tacimeig cocobi nuecnu gale adena. Age ceteteh idadec cudunna age binanaga sulecnu gale adena.  
\v 39 Age cuha jona cabal me cudunna bilecnu gale adena. Odimeig age sab ben jec saenna bilec binanca euna bilecnu gale adena.  
\v 40 Age caja wij agena jo heje cedegina. Odimeig age dana me bahic meciadecnu saen cecelac bahic inondogina. Dana eundec age agena cahuldocnu ameg me qee bahic oqagan,” aden.   
\s1 Caja wij sawen uqa Anutnu meen qaig nag lecis uten  
\r (Luk 21.1-4)  
\p
\v 41 Jisas uqa meen qaig helecnu tempel bokis cemenug bilen. Odimei uqa dana cajaca humeig meen qaig bokisna hehelegin fen. Dana caja cehewanagaca mati age meen qaig ben helein.  
\v 42 Odocob caja wij sawen oso humei uqa meen qaig nag lecis helen eu toea osol ihoc.  
\v 43 Odocob Jisas uqana malogom utaadeceb cemenug cegulecebil maaden, “Ija mele maadigina, caja wij sawen i uqa meen qaig nag heleia eu dana cajaca age tempel bokisna meen qaig ben bahic heleiga cunug wooladena.  
\v 44 Ge, dana cajaca eundec age cehewanaga bennadec meen qaig heleiga qa caja wij i uqa sawen bahic, uqa uqana meen qaig cunug heleia. Uqa uqana ceteh cebac bilecnu oso qee culel,” aden.   
\c 13  
\s1 Jisas uqa tempel wagaloqagannu maden  
\r (Matju 24.1-2; Luk 21.5-6)  
\p
\v 1 Odocob Jisas uqa tempelnadec cali hohon uqana malogom oso madon, “Iwalgec, faga! Meen joca me bahic taweiga!” don.  
\v 2 Odocob Jisas madon, “Hina jo ben i faganafo? Meen gel ulugedocob meen oso meen oso tatacanna cilehdoc qee biliaun. Cunug wagalecebil mahana tonoqagan,” don.   
\s1 Jisas uqa culumen adec mati caligiannu maden  
\r (Matju 24.3-14; Luk 21.7-19)  
\p
\v 3 Jisas uqa Oliw Aluh ohis bibilei tempel onoca fen. Bibilen Pitaca, Jemsca, Jonca, Andruca cuhanuc uqaca limeig jahuni sisildoin,  
\v 4 “Aadeb eu odi odigian ec magaga doqa. Cel gaga odocob fimeb ceteh i camasac caligiannu saen doqan?” doin.   
\p
\v 5 Odocob Jisas jejenega hewi maaden, “Oso hu faninadi dado madeceb agena jic ceja qocna lowainnu batut feigale.  
\v 6 Matica age ija ijanina mamadi hoqagan, ‘Ija uqa,’ oqagan. Eu age dana cajaca mati faninadi jic ceja qocna loqagannu dado madoqagan,” aden.   
\p
\v 7 “Age han cadegina ec eunuca han hugian ec eunuca je hutan doqagan saen euna cain filicituwain. Ceteh eu cunug odigian. Euqa qee migian ec madecnu qee nijel. Eu cit qoc qee.  
\v 8 Ge, dana hatuhatu age cajimeig cilehdocobcilehdocoboqagan. Odocobil dana sihulsihul age cajimeig cilehdocobcilehdocoboqagan. Mim maha filfilna nigian, sabnu cahel bilec saenha hugian. Eu caligianqa caja mel basecnu dain donawe eu odi himec sanan migian,” aden.   
\p
\v 9 “Euqa dana age ehadi limeig agena cegulec amegna madoqagan. Eunu age agedodocnu cofdoigale. Age Juda agena cuha jona dewenega tudoqagan. Age ija ijaninu ijana me je qasali maadecnu hatu cofdocca kingca ehadi li amagana madoqagan.  
\v 10 Odocob Anutna me je eu casac hatuhatu cunug qasali maadecebil dana cajaca cunug doqagan.  
\v 11 Dana age ehadimeig gesiladecnu cegulec amegna madoqagan saen euna age cel je cel je madigen eu casac cain jaen aqeiaun. Euqa age saen euna Kis Gun je adeceb je eu tutuc madoqagan. Ge, agedodoc je qee madowain, Kis Gun eu age uqa co tawecebil je madigian.  
\v 12 Saen euna dana age walinigailnu balijecebil aqecebil cal moqagan. Dana agena melnu balijecebil aqecebil cal moqagan. Mel age memegail anagailcanu cajimeig aqoqagannu gesilec jona madoqagan.  
\v 13 Odocob age ija ijani hewegina eunu dana cajaca cunug age agenu gemanaga beceb sagagadoqagan. Euqa oso uqa waug gagadic mumudi hib cit qoc gadacna caligian eundec Anut uqa cahahaadigian,” aden.   
\s1 Ihulahal mec ceteh bebesacca caligian  
\r (Matju 24.15-28; Luk 21.20-24)  
\p
\v 14 Jisas je haun maaden, “Age  
\q1 ‘ihulahal mec ceteh bebesacca’ \rq (Daniel 9.27; 11.31; 12.11)\rq*  
\m uqana cudun qee euna mudecebil tataweb eu camas meceb euna batut feigale,” aden. Dana uqa je i sanijina eu uqa je uqana gug doiale. “Saen euna dana cajaca age Judia hatuna bilegina age busali aluhnana toboqagan.  
\v 15 Oso jo ohis qab tatacan bilina cain toneiaun. Uqa uqana ud cedi nuecnu jona cain leiaun.  
\v 16 Oso cabina bilina eu uqa uqana lotoc ben cedecnu jobon ceseli cain hoiaun.  
\v 17 Saen euna caja waugca coboc, caja mel sim su adegina eundec walocca bahic biluqagan!  
\v 18 Busalec deel eu duan saenna cali hoiaunnu Anut inondoigale.  
\v 19 Ge, saen euna culumen ben bahic caligian. Saen maha haun ifanennadec hocob qila wele culumen eu odi oso qee calel. Hibna culumen eu odi oso haun qee caleiaun.  
\v 20 Tibud saen i gohic qee mudoubmi dana oso cahahadoc qee gulucdoub. Euqa dana cajaca Tibud nesili ceden bilegina agenu saen eu gohic mudigian,” aden.   
\p
\v 21 “Saen euna oso maadecebfi, ‘Feiga, Anutna Krais eu ihen!’ qee, ‘Feiga, Anutna Krais ono bilia!’ adecebfi je eunu wawaga cain meleeiaun.  
\v 22 Uhulec Kraisca uhulec je hahun madec danaca mati cali humeig age dana cajaca Anut nesili cedaden bilegina euha faninadoqagan imeig kobolkobol odoc filfilca gaga ben matica odoqagan.  
\v 23 Euqa age batut feigale! Ceteh qee hoc ninijen ija ceteh eu hugiannu wele maadem,” aden.   
\s1 Cit qocna Dana Melah hugian  
\r (Matju 24.29-31; Luk 21.25-28)  
\p
\v 24 Jisas je haun maaden, “Feiga, saen euna culumen ben eu hedocob  
\q1 ‘cam tu meceb jagel qee fulacdoiaun.   
\q1
\v 25 Odocob malaqa age saonadec casili tonoqagan,  
\q1 odocob gagadic odoc age saona bilegina caji leceb hocob qeleloqagan,’ en. \rq (Aisaia 13.10; 34.4)\rq*   
\m
\v 26 Odocob Dana Melah uqana camas mec gaga saona camas migian. Age Dana Melah gagadic odoc gehca kobolkobolca taenna neneb foqagan.  
\v 27 Uqa ensel suladeceb age belimeig uqana nesili cedadec bilegina eu mahamaha cunugnadec cedoqagan. Age maha cunugnadec cedadi ehadi li sao jobon cunugnadec ha ehadi ahu gabanadoqagan,” aden.   
\s1 Age na dannu doc oqagan  
\r (Matju 24.32-35; Luk 21.29-33)  
\p
\v 28 Jisas je haun maaden, “Age na dan uqana odocnu cisdoigale. Uqa haun majocob age qila wa hugian odona egina.  
\v 29 Odiwe ha age ceteh eu oodob fimeig Dana Melah ceseli hocnu deel cemenug nijia ec doqagan, uqa taun gel jic cebecna taweia doqagan.  
\v 30 Ija mele maadigina, sihul i qila bilegina ceteh qee cali hoc ninijeb qee qee meiaun.  
\v 31 Saoca mahaca qee migian euqa ijana je qee qee meiaun,” aden.   
\s1 Dana oso ceteh eu cali hugiannu saen doc oso qee bilel  
\r (Matju 24.36-44)  
\p
\v 32 Jisas je haun maaden, “Ceteh eu cali hugiannu deelca auaca oso qee dona. Ensel sao jobon bilegina ha qee dogina. Dana Melahha qee dona. Memige Anut uqa himec dona,” aden.   
\p
\v 33 “Dana Melah ceseli hocnu deel age qee dogina. Eunu batut feiga, age mecii cuhadoigale.  
\v 34 Dana Melah ceseli hoc deel eu odiwe nijia. Dana cehewanca oso uqa hatu oso nuigia bili uqana cabi dana utaadeceb hocobil uqana ceteteh age ebenegana men. Uqa cabi dana dumanaga nesili fimei age dumanaga nijen eu odi toodu uqana ceteteh siwiaden. Odimei uqa jic cebec cofdoc dana madon, ‘Hina ija hugennu gaid meciagale,’ don.  
\v 35 Eunu amaga cebac bileigale! Ge, age jo gug aadeb hugian eu age qee dogina. Uqa wesufo, tu gemofo, qasil bahicfo, cahinegfo hugian eu age qee dogina.  
\v 36 Age ququlubadi hufei us ninijebil cain gulucadeiaun.  
\v 37 Ija je i age maadigina eu ija dana cajaca cunugnu maadigina, age gaid mecieigale,” aden.   
\c 14  
\s1 Juda agena dana ben Jisas qocobil cal migian ec je cagoin  
\r (Matju 26.1-5; Luk 22.1-2; Jon 11.45-53)  
\p
\v 1 Pasowa Sab Jec Benca, Bred Jisca Qee Sab Jecca deel lecis hedocob caligia ninijen ihanec dana benbenca loo je iwaladecca age Jisas jahuni hewi qocnu jic oso wali feqan i togodoin.\f + \fr 14.1 \ft Wele Isrel dana cajaca age Isip agena cabi dana bega meh Isip hatuna biloloig. Saen euna Anutna ensel humei Isip agena matu cunug aqeceb cal mein. Euqa ensel eu Isrel agena jojo tefacadimei agena matu qee aqel. Pasowa uqana gug eu “tefacdoc.” Eunu Juda dana cajaca age Pasowa Sab Jec Ben Deelna Anut uqa agena matu tefacaden eunu cisdoin. Age Kisim Bek 12.13, 23, 27 feiga. Bred Jisca Qee Sab Jec saen eu Pasowa Sab Jec Ben Deel toodon, eu deel 7-pela nijen Age Kisim Bek 12.15-20 feiga.\f*  
\v 2 Euqa age madein, “Dana cajaca caji uqanu mimi ege cilehgowainnu Pasowa sab jecna cain odoqaun,” ein.   
\s1 Caja oso Jisas ilona mool dedeman me bahic joiden  
\r (Matju 26.6-13; Jon 12.1-8)  
\p
\v 3 Jisas uqa Betani jobon ono Saimonna jona bilen. Saimon eu uqa wele deweg lepra heweceb coboloi. Jisas uqa ono sab jiji bibilen caja oso meen gum eu mool dedeman me bahic fajecnu qaig ben bahic nijen eu ahumei meen gum fuhudumei mool eu Jisas ilona basecdon.  
\v 4 Euqa dana leih ono tawein eu qee gale adeceb togodudu madein, “Uqa eetanu mool dedeman me bahic eu cusdoia?  
\v 5 Ge, mool eu meen qaig silwana mudec 300nu idadoubmi meen qaig eu dana sawen bahic eundec siwiadoubmi eu me,” ein. Odimeig age caja galac mudein.  
\v 6 Euqa Jisas maaden, “Age culdeiga! Age eetanu caja eu culumen doc utegina? Uqa ceteh me bahic oditia.  
\v 7 Ge, age gemona dana sawen bilec eundec gaid biluqagan. Odocob age cel saen gale adecna cesuladoqagan. Ijaqa gaid age gami qee biluqaun.  
\v 8 Ceteh i uqa odocnu nijecebnu odeia. Uqa mool ilomina basecdoia euna ija qee cal mec deweni heelna mudecnu joidia.  
\v 9 Ija mele maadigina, me je anaana maha cunug qasali maadi cobimeig age caja eu oditia eu uqanu cisdoqagannu saadoqagan,” aden.   
\s1 Judas uqa Jisasna cad ebenegana mudigiannu je cagoin  
\r (Matju 26.14-16; Luk 22.3-6)  
\p
\v 10 Saen euna Judas Iskariot, uqa Jisasna malogom oso, uqa ihanec dana benben cemenegana limei Jisas age ebenegana mudigiannu maaden.  
\v 11 Age je eu dumeig wawaga ceeleceb age meen qaig utuqagannu je hahun madoin. Odocobil Judas uqa Jisas dewegnu ob mimei age ebenegana mudigiannu jic walen.   
\s1 Jisas uqana malogom gami sab jein  
\r (Matju 26.17-25; Luk 22.7-14, 21-23; Jon 13.21-30)  
\p
\v 12 Odocob Pasowa sab jec bred jisca qee jecnu uqana deel gun cali hon. Deel euna Juda dana age sipsip nag Pasowana ihandoloig. Uqana malogom Jisas madoin, “Ege ana limeb hina Pasowa sab jegannu saciadocnu gale hena?” doin.  
\v 13 Odocobil uqana malogom lecis sulali maalen, “Ale taun benna lecebil dana oso uqa halon waca gahidu humei gulucaligian. Ale uqa toodu lesi  
\v 14 uqa cel jona leceb toodosia. Odimesi jo gug eu madosia, ‘Iwalgec maheia, “Jo hamol ija ijana malogom gami Pasowa ja qoc sab jecnu eu ai?” heia,’ dosia.  
\v 15 Odocob uqa hamol ben ohis eu sab jec cabalca bilec cabal ceteh cunugca ihacaligian. Ale ege Pasowa ja qoc sab jecnu euna saciadosia,” alen.  
\v 16 Odocob malogom lecis ale leih culadimesi taun benna belesin. Odimesi ono ale Jisas maalen odi bahic gulucdosin. Euna ale Pasowa ja qoc sab jecnu saciadosin.   
\p
\v 17 Odocobil witic meceb Jisas uqana malogom 12-pela gami hoin.  
\v 18 Sab jiji cabalna bibileig Jisas maaden, “Ija mele maadigina, age oso uqa ija gami sab joqona eu ijana cad ebenegana mitigian,” aden.  
\v 19 Odocob age je eu dumeig uqana malogom waloc adeceb abesabes sisildudu madoin, “Hina ija ec madaganafo?” doin.  
\v 20 Odocobil Jisas maaden, “Eu ijana malogom 12-pela oso uqa ijaca gami bred bohna wehuc tanoqona eu odigian.  
\v 21 Ge, Dana Melah uqa wele Anut je jaqen odi toodugian eunu jic eu toodugian qa dana uqa ijana cad ebenegana mitigian eu walocca biliale! Dana eu anag qee basoubmi eu me bahic nijoub,” aden.   
\s1 Jisas uqa bred wainca malogom siwiadeceb jein  
\r (Matju 26.26-30; Luk 22.15-20; 1 Korin 11.23-25)  
\p
\v 22 Age sab jejeig Jisas bred oso umei Anut hetaga dumei feni malogom siwiadimei maaden, “Eu ija deweni. Oiga,” aden.  
\v 23 Odimei uqa wain gabin umei Anut hetaga dumei malogom adeceb age cunug gabin euna gab jein.  
\v 24 Odocobil Jisas maaden, “Wain gabin i ija golani eu Anutna bal cehec je haun. Ija dana cajaca mati cesuladigennu golani basecdugina.  
\v 25 Ija mele maadigina, ija wain aig qee jec li hibna ija age gami Anutna culna haun jeqan,” aden.   
\p
\v 26 Odocob age binan sulec due silimeig age taun ben cuculi Oliw Aluhna belein.   
\s1 Jisas uqa Pita uqanu qee sasac qugian ec maden  
\r (Matju 26.31-35; Luk 22.31-34; Jon 13.36-38)  
\p
\v 27 Odocob Jisas uqa malogom maaden, “Age cunug ijanu wawaga meleec tonigian. Ge, Anutna jaqec je oso nijia eu ihen:  
\q1 ‘Ija sipsip cofadec dana qocomin  
\q2 sipsip cunug bilisadu beloqagan,’ ec nijia. \rq (Sekaraia 13.7)\rq*   
\m
\v 28 Euqa hibna Anut uqa tuliteceb ija ceseli cajimig aquniadi Galili ono nuigen,” aden.  
\v 29 Odocob Pita madon, “Leih cunug age wawaga meleec tonigianfa, ijaqa qee bahic qee wawi meleec toneiaun!” don.  
\v 30 Odocob Jisas uqa Pita jejeg hewi madon, “Ija mele mahigina, witic ina mala manahal qee qu lecisdoc ninijeb hina madegan, ‘Uqanu qee dugina,’ i cijeddogan,” don.  
\v 31 Odocob Pita je gagadic madon, “Ija hinaca cal mewannu nijecebfi ija hinanu qee bahic qee sasac qugaun,” don. Odocob malogom cunugha je odi madein.   
\s1 Jisas uqa Getsemani cabina Anut inondon  
\r (Matju 26.36-46; Luk 22.39-46)  
\p
\v 32 Age cocobi li cudun oso, Getsemani egina, euna calimeig Jisas uqana malogom maaden, “Age ene bibilebil Anut inondudu biligen,” aden.  
\v 33 Odimei uqa Pitaca, Jemsca, Jonca ehadeceb limeig Jisas waug me qee meceb duman culeceb  
\v 34 maaden, “Dumani culia, cal mecnu odi oditina. Age ene cebac bibili mecieigale,” aden.  
\v 35 Odi maadimei uqa nag odi qisacadi nu mahulimei inondon. Uqa jic osocafi temdoc ben uqaca hona eu wooldocnu gale don.  
\v 36 Uqa Anut inondon, “Aba\f + \fr 14.36 \ft Je madec i Aram je, eu Jisas uqana je madec gug bahic. “Aba” uqana gug eu “Mei.”\f* Mei, hina ceteh cunug odocnu ihoc. Gabin i ija cagasitagale. Euqa ija gale tecna cain odogaun, hina gale hecna toodu odoga,” don.   
\p
\v 37 Odimei uqa malogomca limei age us ninijegin feciadimei Pita madon, “Saimon, hina us nijigafo? Hina aua osol cebac bibili meciecnu uein qee nijelfo?  
\v 38 Age temadecna lowainnu cebac bibili inondoigale. Wawaga odigen ena eu mele euqa dewenega gagadic odocca qee,” don.   
\p
\v 39 Odi madumei ceseli li Memeg inondon. Uqa je wele maden eu haun inondon.  
\v 40 Odimei caji haun ceseli malogom cemenega limei age us ninijegin feciaden. Ge, age amaga mumugcanu eu mecii bilecwe qee. Age cel je madocnu qee cisdoloin.   
\p
\v 41 Uqa saen cijedna ceseli humei maaden, “Age gaid jaen mumudi bibileig us nijeigafo? Eu ihoc, saen wele hoia! Feiga, age qila Dana Melah silail dana ebenegana moqagan.  
\v 42 Cajecebil beloqa. Feiga, dana ija deweninu balijigian eu wele hona,” aden.   
\s1 Judas uqa Jisas cad age ebenegana muden  
\r (Matju 26.47-56; Luk 22.47-53; Jon 18.3-12)  
\p
\v 43 Uqana malogom maaaden Judas, malogom 12-pela eundec oso, uqa hon. Uqa gami dana mati bahic age han siginca han galabca hewi hoin. Ihanec dana benbenca Juda agena matuca age suladecebil hoin.  
\v 44 Aria, dana uqa Jisas uqana cad ebenegana mudigiannu maden eu uqa wele han dana foqagannu gaga oso mecnu odi maaden, “Dana ija cotdugen eu uqa hewimeig me cofdudu ehudi beleiga,” aden.   
\p
\v 45 Odocob dana eu humei uqa mahuc Jisasca limei madon, “O Meca!” don. Odimei uqa Jisas cotdon.  
\v 46 Odocob han dana age Jisas eben gagadic hewein.   
\p
\v 47 Euqa dana oso Jisasca gami tawein eu eben nocob han sigin umei ihanec dana ilona cabi dana qelimei dahig cagon.  
\v 48 Odocob Jisas maaden, “Eetanu age han siginca han galabca heje oc dana cinigwe ija hewituqagannu hoiga?  
\v 49 Ija deel cunugnana ageca tempelna bibileb iwaladolig. Odocob age ija hewitecnu oso qee odoloin. Euqa Anutna jaqec je ihoc ligiannu ceteh i cunug calen,” aden.  
\v 50 Odocob uqana eundec cunug qisacdumeig busalein.   
\s1 Dana haun oso busalen  
\p
\v 51 Dana haun oso lotoc nag himec taqen uqa Jisas toodon. Age uqa hewoqaga bili odoin.  
\v 52 Euqa uqa bical bubusali bilei lotoc eu culen.   
\s1 Age Jisas Juda cegulec amagana gesildoin  
\r (Matju 26.57-68; Luk 22.54-55, 63-71; Jon 18.13-14, 19-24)  
\p
\v 53 Odocob age Jisas ehudi ihanec dana agena ilo amegna mudein. Ono ihanec dana benbenca, Juda agena matuca, loo je iwaladecca age cunug cegulein.  
\v 54 Pita uqa tabag hehewi tooaden. Tooadimei uqa ihanec dana ilo uqana jona len. Uqa jo gel dunuh limei jo cofdoc dana gami deweg ja walac dodon bilen.   
\p
\v 55 Aria, ihanec dana benbenca, Juda dana ben cunug ceguleinca age Jisas dewegnu ob mec je amagana fec dahinigana doc eundec je walein. Oso camas meceb eu toodu geldocomun cal migian ein. Euqa age oso qee gulucdoloin.  
\v 56 Ge, dana mati bahic dewegnu ob mecnu cajimeig odi oodon fom, odi mamaden dom uhulii madein euqa agena je cunug ihocihoc qee camas mel.  
\v 57 Odocobil dana leih caji tawimeig Jisasnu ob mecnu je odi uhuli madein,  
\v 58 “Ege uqa, ‘Ija tempel i dana ebenegana cehein eu wagalimig deel cijedna tempel oso ebenegana qee cehec eu cehigen,’ eceb dom,” ein.  
\v 59 Age odi madeinqa ageha agena je ihocihoc qee camas mel.   
\p
\v 60 Odocobil ihanec dana ilo cegulec gemona tawimei Jisas sisildon, “Dana i age cel je hina dewennu madegina? Hina jejenega hewi je oso madecwe qeefo?” don.  
\v 61 Euqa Jisas uqa jejeg qee hewel, je oso qee madel.  
\p Odocob ihanec dana ilo uqa Jisas haun sisildudu madon, “Krais eu hinafo? Hina Anut Binanca eu uqa Melahfo?” don.  
\v 62 Odocob Jisas madon, “Eu ija bahic! Age Dana Melah Anut gagadic odocca eben meulana isec bibileb sao taenna ha hohob foqagan,” don.  
\v 63 Odocob ihanec dana ilo uqana lotoc ben hewi balahadumei maaden, “Ege eetanu dana age dana inu je madoqagannu oso waloqona?  
\v 64 Uqa Anutnu je me qee madeia. Eu age cunug dah meiga. Age eeta madegina?” aden. Odocob age cunug uqa cal migiannu deweg je nijia ec madein.   
\p
\v 65 Age odi madecebil leih age Jisas cin qoin. Leih age ameg jahuldumeig ola tududu madoin, “Je hahun magaga doqa!” doin. Odocobil ihanec dana ben uqana jona cofdoc dana age Jisas siho qaqahi ehudi lein.   
\s1 Pita Jisasna malogom bilec qee sasac qon  
\r (Matju 26.69-75; Luk 22.56-62; Jon 18.15-18, 25-27)  
\p
\v 66 Age Jisas geldodogin Pita uqa jo gel dunuh bilen. Bibilen ihanec dana ilona cabi mel aid oso cemenug humei  
\v 67 Pita uqa deweg ja walac dodon mecidumei madon, “Hinaha Jisas Nasaretdecca bilein,” don.  
\v 68 Euqa Pita uqa qee sasac qu mel aid madon, “Hina madagana eu ija dadanigina, hina eetanu madagana eu qee dugina,” don. Madumei gesacna jic cebecna isec len.  
\v 69 Odocob cabi mel aid ono mecidumei uqa haun mamadi ono tawein eundec maaden, “Dana i uqa age eundec oso,” aden.  
\v 70 Pitaqa haun qee sasac qon.  
\p Saen nag gieceb ono tawein eundec age hu Pita haun madoin, “Mele bahic hinaha eundec oso. Ge, hina Galilidec,” doin.  
\v 71 Odocob agena kobolna uqa mele bahic mamadi maaden, “Age dana inu madegina eu qee dugina,” aden.  
\v 72 Madeceb mala manahal saen lecisdocna qon. Odocob Pita Jisas wele madon, “Mala manahal qee qu lecisdoc ninijeb hina ijana biligina eu qee sasac qu cijeddogan,” don eunu dahig fogo docob waug cagocob qajen.   
\c 15  
\s1 Age Jisas ehudi Pailat amegna mudein  
\r (Matju 27.1-2, 11-14; Luk 23.1-5; Jon 18.28-38)  
\p
\v 1 Walag daneceb ihanec dana benbenca, Juda agena matuca, loo je iwaladecca age gabandumeig je togodoin. Togodu hedumeig age Jisas eben libimeig ehudi limeig Pailat, Rom gabman dana matu, ebenna mudein.\f + \fr 15.1 \ft Age je Matju 27.2na nijia eu feiga.\f*  
\v 2 Odocobil Pailat uqa Jisas sisildon, “Juda agena king eu hinafo?” don. Odocob Jisas jejeg hewi madon, “Hina madagana odi himec,” don.  
\v 3 Odocob ihanec dana benben age dewegnu je geh um qu madein.  
\v 4 Odocobil Pailat haun sisildon, “Faga, age dewennu je geh um qu madegina. Hina jejenega qee hewagaunfo?” don.  
\v 5 Euqa Jisas jejeg qee hewel. Eunu Pailat geh cisdon.   
\s1 Pailat age Jisas na babalecna tuitu qoqagannu maden  
\r (Matju 27.15-26; Luk 23.13-25; Jon 18.39–19.16)  
\p
\v 6 Pailat uqa Juda agena Sab Jec Deel Ben ina gaid gihacdoc dana oso Juda dana age agedodoc dana eu besitugaga ecebil eu besituadoloi.  
\v 7 Saen euna age dana Rom gabmanca cadein eu gihacdoc jona madecebil bilein. Dana eundec oso, ijan Barabas, gihacdoc jona bilen uqa Rom gabmanca cadein saen euna dana qocob cal men.  
\v 8 Juda dana cajaca age ceguli bibileig Pailat uqana kobol gaid Juda dana odadoloi eu toodu odigiannu sisildudu madoin.  
\v 9 Odocobil Pailat sisiladen, “Ija Juda agena king besi uadecnu wawaga nijiafo?” aden.  
\v 10 Ge, Pailat uqa ihanec dana benben age Jisasnu macumac mimi uqa ebenna mudein eu don.  
\v 11 Euqa ihanec dana benben age dana cajaca ceguli bilein eu sigaladecebil age Pailat Jisas besi uadecnu qee madein. Age Barabas besitugagale ec madein.  
\v 12 Odocobil Pailat haun sisiladi maaden, “Ija dana age Juda agena king egina eu eeta odudigen?” aden.  
\v 13 Odocob age haun utai madoin, “Na babalecna tuitu qoga!” doin.  
\v 14 Odocobil Pailat maaden, “Eetanu? Uqa cel qisol mec odon?” aden.  
\v 15 Eunu Pailat uqa dana cajaca wawaga me nijigia bili imei Barabas besiaden. Odimei uqa han dana maadeceb age Jisas ehudimeig qisadoin. Qisadu hedocobil uqa Jisas na babalecna tuitu qumeig caqusecebil caculimei cal mecnu han dana ebenegana muden.   
\s1 Han dana age Jisas lelandoin  
\r (Matju 27.27-31; Jon 19.2-3)  
\p
\v 16 Han dana age Jisas ehudimeig jo gabman dana ben bilia euna lein. Age Rom gabman dana ben uqana cudun mudein. Odimeig age han dana am cunug utaadecebil humeig osobenca cegulein.  
\v 17 Age lotoc golca oso tacitoin. Odimeig age halu dud lalic qumeig king katakat mudimeig gulodutoin.  
\v 18 Odimeig age binan susuli lelandudu madoin, “O Juda agena king, feele!” doin.\f + \fr 15.18 \ft Age je Matju 27.29na nijia eu feiga.\f*  
\v 19 Odimeig age sih u ilo qagimeig cin qumeig amegna gob cehi uqanu cuha fein.  
\v 20 Age lelandu hedumeig lotoc golca hulitumeig uqana lotoc haun tacitoin. Odimeig age ehudi li na babalecna tuitu qocnu cali li belein.   
\s1 Age Jisas na babalecna tuitu qoin  
\r (Matju 27.32-44; Luk 23.26-43; Jon 19.17-27)  
\p
\v 21 Age bebeleig han dana age Saimon Sairinidec uqa bahudec taun ben dunuh hohon madocobil Jisasna na babalec gahidon. Saimon Sairinidec uqa Aleksanda Rufasca memela.   
\p
\v 22 Belimeig age cudun Golgota\f + \fr 15.22 \ft Golgota eu Aram je.\f* ein euna Jisas ehudi ehi tein. Golgota ijan gug eu “Ilo gatic cudun.”  
\v 23 Age wain ceteh gulihinca gabandoc eu jecnu utein. Euqa uqa qee jel.  
\v 24 Age Jisas na babalecna tuitu qumeig caqusecebil caculeceb uqana lotoc agedodoc siwiadein. Age uqana lotoc inni siwi cedecnu satu udoin.   
\p
\v 25 Eu 9 kilok qasil age uqa na babalecna tuitu qoin.  
\v 26 Age dewegnu je madein eu jaqi qoin, “Uqa Juda agena King.”  
\v 27-28 Age Jisas cemenug heje oc dana lecis na babalecna tuitu aqalimeig caqusalecebil caculesin. Oso eben meulana isec tuitu qoin, oso eben ansena isec tuitu qoin.\f + \fr 15.27-28 \ft Grik jaqec je hilah leihna age je oso tubdu jaqein eu odi: Anutna jaqec je eu odi maden, “Age uqa loo je tefacdoc danaca osoben bibilegin meciadein,” en eu ihoc len. (Aisaia 53.12\f*   
\p
\v 29 Odocob dana cajaca age hu li i bileig age lelandudu ilomoga culidudu je ilag madoin, “Se, hina tempel wagalimig deel cijedna haun cehigen em,  
\v 30 hinadodoc cahahadumeg na babalecnadec toni naga!” doin.  
\v 31 Ihanec dana benbenca, loo je iwaladecca ageha lelandudu madein, “Uqa leih cahahaaden euqa uqadodoc cahahadocnu ihoc qee.  
\v 32 Uqa Kraisfi, uqa Isrel egena kingfi uqa qila na babalecnadec toni neiale. Euna ege fimeb wawige meleigian,” ein. Odocob dana ale uqaca gami na babalecna tuitu aqalein eu aleha lelandosin.   
\s1 Jisas cal men  
\r (Matju 27.45-56; Luk 23.44-49; Jon 19.28-30)  
\p
\v 33 Odocob cam gemo ceheceb cam tu qocob hatu cunug gagatuc menen, ninijen li 3 kilok wesu.  
\v 34 Odocob 3 kilok odi Jisas co suli u utai maden, “Eloi, Eloi, lama sabaktani?”\f + \fr 15.34 \ft Je madec i Aram je, eu Jisas uqana je madec gug bahic.\f* en. Je uqana gug eu odi:  
\q1 “Ijana Anut, ijana Anut, eetanu qisactaga?” en. \rq (Buk Song 22.1)\rq*   
\m
\v 35 Dana leih age ono talildu tawein je eu dah mimeig madein, “Feiga, dana eu uqa Ilaija utadona,” ein.\f + \fr 15.35 \ft Aram jena “Eloi, Eloi” uqana hutan eu “Ilaija, Ilaija” cinigwe.\f*  
\v 36 Age oso guguli gege oso umei wain gulihinca tanumei balac oso euna gihacdumei sulecebil li cona mimei maden, “Sumudeiga. Culgeceb ege Ilaija uqa humei na babalecnadec casili toni mudigianfo, qeefo ec feqan,” en.  
\v 37 Odocob Jisas gehca utai kis umei cal men.   
\p
\v 38 Odocob lotoc ben tempelna hamol gunna caqusec tawoloi eu ohisdec baladu ni mahana lecisdon.  
\v 39 Odocob Rom agena han dana 100 cofadec Jisas olana tawen uqa Jisas kis umei cal men eu odi fimei maden, “Mele bahic, dana i uqa Anut Melah!” en.   
\p
\v 40 Caja leihha onoca tatawi fein. Age gemodec eu Maria Makdaladecca, Maria uqa Jems jomog Josefca analaca, Salomica.  
\v 41 Age Jisas Galili hatuna cobon saenna cesuldudu toodu coboin. Caja mati age Jisas gami Jerusalem bein eu ageha ono tawein.   
\s1 Age Jisas deweg ganac qalqal hatinna mudein  
\r (Matju 27.57-61; Luk 23.50-55; Jon 19.38-42)  
\p
\v 42-43 Cam toni nonon Josef Arimatiadec hon. Uqa Juda agena cegulec eundec oso, uqana coboc hutan me. Uqaha uqadodoc Anutna culnu waliwali fen. Uqadec Juda agena cuha deel caligian. Odocob qila eu deel age ceteh sab jec bennu saciadoloig. Eunu uqa waug gagadic mudimei Pailat amegna limei Jisas deweg ganac ugiannu sisildon.  
\v 44 Odocob Pailat uqa Jisas wele cal meiafo, qeefo ec cisdon. Odimei uqa Rom agena han dana 100 cofadec utadocob hocob uqa Jisas cal meiafo, qeefo? ec sisildon.  
\v 45 Rom agena han dana 100 cofadec uqa Jisas cal meia ec Pailat madocob uqa age Josef Jisas deweg utecnu maaden.  
\v 46 Odocob Josef uqa deweg jeuldecnu lotoc senenec oso fajen. Odimei uqa Jisas deweg heweceb toneceb lotocna jeulden. Odimei uqa Jisas deweg qalqal hatin aluh qeihna hunein euna muden. Uqa meen koldoc oso olocdocob eu hatin biah cufa qon.  
\v 47 Maria Makdaladecca Maria Josef anagca ale Jisas deweg ana mudein eu fesin.   
\c 16  
\s1 Jisas ceseli cajen  
\r (Matju 28.1-8; Luk 24.1-12; Jon 20.1-10)  
\p
\v 1 Pasowa Sab Jec cuha deel hedocob Maria Makdaladecca, Maria Jems anagca, Salomica age Jisas dewegna mool dedeman meme joudoqaga bili belein.  
\v 2 Cuha deelna qasil wele bahic age walag dadanen qalqal hatinna belein.  
\v 3 Age jicna bebeli bileig madein, “In uqa meen hatin biah cufa qoc eu olocdugeceb gesacna ligian?” ein.  
\v 4 Ge, meen eu ben bahic. Odocob age amaga teceb meen wele olocdogin gesacna len fein.  
\v 5 Odimeig age qalqal hatin dunuh lein. Ono dana haun oso eben meulana isec lotoc senenec tacen bibilen fein. Odimeig age filiciti cucuiein.   
\p
\v 6 Uqa maaden, “Cain filiciti cucuiuwain. Age Jisas Nasaretdec na babalecna qocobil cal men eu walegina. Uqa ene qee bilel. Uqa wele ceseli cajeia! Feiga, cudun ina uqa mudecebil nijen.  
\v 7 Ageqa belimeig uqana malogom Pitaca maadeiga, ‘Jisas Galili ono aquniadi nuina. Uqa odi maadenwe age ono uqa foqagan,’ adeiga,” aden.   
\p
\v 8 Odocob age qeleeli dadaneinnu age qalqal hatinnadec cali humeig busali belein. Odimeig age cucuieinnu oso je qee madoloin.  
\mi [\it Grik jaqec je hilah leihna age but i 16.9-20 eu qee nijel.\it*]  
\s1 Maria Makdaladec casac Jisas fen  
\r (Matju 28.9-10; Jon 20.11-18)  
\p [  
\v 9 Cuha deelna qasil bahic Jisas ceseli cajimei uqa casac Maria Makdaladecca camas men. Jisas uqa wele buga me qee 7-pela Maria Makdalanadec ititacadeceb belein.  
\v 10 Maria uqa dana caja age Jisasca coboin eu ageca limei age qada qaqaji bibilegin je saaden.  
\v 11 Maria uqa ija Jisas figa uqa cebac bilia adeceb doin qa age uqana jenu wawaga qee meleel.   
\s1 Malogom lecis ale Jisas jicna fesin  
\r (Luk 24.13-35)  
\p
\v 12 Eu hedocob Jisasna malogom lecis ale jic bahu euna bebelesin uqa deweg fecnu fil odi aleca camas men.  
\v 13 Odocob ale ceselimesi malogom leih maadesin qa age alena jenu wawaga qee meleel.   
\s1 Jisas uqana malogom cabi aden  
\r (Matju 28.16-20; Luk 24.36-49; Jon 20.19-23)  
\p
\v 14 Eu cunug hedocob Jisas uqana malogom 11-pela age sab jejegin uqa ageca camas men. Odimei age dana cajaca uqa ceseli cajeceb fimeig maadecebil age agena jenu wawaga qee meleelnu uqa age wawaga qee meleeceb wawaga tool ibuldonnu galac maden.  
\v 15 Odimei uqa maaden, “Age mahamaha cunugna beladimeig dana cajaca cunug Anut ifanen eu me je qasali maadeiga.  
\v 16 Oso me je eunu waug meleeceb wa joudec ocobfi Anut cahahadugian. Euqa oso me je eunu waug qee meleecebfi Anut uqa geuldigian.  
\v 17 Dana cajaca wawaga meleigian saen euna kobolkobol odoc i edi caligian. Age ijanina buga me qee dana deweneganadec ititacadecebil beloqagan. Age beilamaga je haun filfil madoqagan.  
\v 18 Age man sononec me qee u hewoqagan. Age wa me qee oso jifeig age qee cal mowain. Age ebenega hag dana cajaca dewenegana mecebil age me moqagan,” aden.   
\s1 Anut uqa Jisas ehudeceb sao ohis ten  
\r (Luk 24.50-53; Aposel 1.9-11)  
\p
\v 19 Odocob Jisas Tibud uqana malogom gami je madi hedocobil Anut uqa Jisas ehudeceb sao ohis timei uqa Anut eben meulana isec bilen.  
\v 20 Odocob uqana malogom age beladi maha cunugnana me je qasali maadein. Age me je qasali maaadegin Tibud uqa ageca cabi ooig kobolkobol odoc eu agena me je madec gabalna calen euna agena je eu mele eunu ihacaden. Mele.]  
\mi [\it Grik jaqec je hilah leihna age but 16.9-20 eu qee nijel euqa je fil oso nijia eu odi:\it*]  
\p [ \it (9)\it* Caja eu age limeig Pitaca dana age uqaca bileinca je cunug maaden eu mahuc saadein. \it (10)\it* Eu hedocob Jisas uqadodoc malogom suladeceb age maha cam tobi becna isec, cam toni nocna isec belimeig me je qasali maadein. Me je eu gun, eu Anut uqana dana cajaca cahahaadecnu je, eu qee qee meiaun, eu gaid biligian.]