\id MAT - Amele NT and Genesis [aey] -Papua New Guinea 1997 (DBL 2014) 
\h MATJU 
\toc1 Me Je i Matju Jaqen 
\toc2 Matju 
\toc3 Mt 
\mt2 Me Je i  
\mt1 Matju Jaqen  
\imt1 Aqunec Je  
\ip Me je i cel dana bahic jaqen eu je oso qee nijel. Euqa Kristen tamanec cofadec dana age wele Jisas Krais mahana cobon saennadec li saen qila nijia eu Matju, uqa aposel 12-pela eundec oso, me je i jaqen ec madein. Matju i uqa takis cedec dana, uqa uqana cabi culimei Jisas toodon. (Matju 9.9-13 feiga.) Makna me jenaca, Lukna me jenaca ale Matju ijan fil qosin, eu Liwai.  
\ip Me je i Matju jaqen eu Jisas mahana bilen saenna ceteh calen eunu saadena. Eu Jisas Kraisnu me je 4-pela eundec oso. Oso eu Mak jaqen, oso eu Luk jaqen, oso eu Jon jaqen. Me je i Maria uqa Jisas basecdon saenna sanan mimei leceb age Jisas qocobil cal mimei ceseli cajimei uqana malogom culadimei sao jobon ten eunu saadena.  
\ip Matju uqa ceteh ben oso ihacdocnu gale don. Wele Anut uqa Isrel dana cajaca hahun je oso maaden. Uqa dana oso uqa Anutna dana cajaca cahahaadecnu suldugian ec maden. Dana i uqa ijan eu Hibru jena eu Mesaia, eu Grik jena eu Krais. Matju uqa Juda dana cajaca Jisas eu agena Krais eunu ihacadecnu gale ben dona. Me je ina je mati bahic odi odona, eu odi: 1.22-23, 4.14-16, 8.17, 12.17-21, 13.35, 27.9-10. Me je ina je mati ha nijia eu Jisas uqa uqana odocna Anut hahun je wele maden eu ihoc lena, eu odi: 2.4-6, 2.14-15, 2.23, 21.2-5, 21.16, 26.24, 26.31, 26.54.  
\ip Matju uqa ceteh oso ha ihacdocnu gale don, eu Jisas uqa Juda dana cajaca agena king. Wele bahic Isrel agena king ben oso bilen, uqa ijan eu Dewid. Eunu Matju uqa Jisas eu Dewid Melah ec je mati maden, eu odi: 1.1, 1.6, 1.17, 1.20, 9.27, 12.3, 12.23, 15.22, 20.30, 21.9, 21.15, 22.42-45.  
\ip Euqa Matju uqa Jisas eu Juda agena Kraisca, agena kingca himec ec qee madel. Jisas uqa dana cajaca cunug agena Kraisca, agena kingca echa maden. Galili eu Juda dana qee eundec agena hatu. Odimei Jisas uqa Galili hatuna uqana cabi sanan men, odimei uqa Galili hatuna uqana cabi cit qon. (Matju 9.1-2, 28.7 feiga.) Matju himec uqa Jisas eu je hahun madec dana Nasaretdec ec maden. (Matju 2.23 feiga.) Nasaret jobon eu Galili hatu ono nijen. Odimei Matju uqana me jena Jisas uqa Juda dana cajaca age Jisas hibemdocobilfi Anut uqa uqana cul eu Juda dana qee eundec adigian ec ulauladen, eu 21.43. Odimei Jisas uqa Anutna culnu me je i mahamaha cunug qasali maadecebil ihoc lili ninijeb dana cajaca cunug doqagan ec maden, eu 24.14. Odimei Jisas uqa uqana malogom age mahamaha cunug beladimeig dana cajaca ijana malogom madeiga ec maden, eu 28.19. Je i cunug eu Matju uqana me jena himec nijia.  
\ip Matjuna buk naha 5-pelana Jisas iwaladec je cecelac maden eu nijia. Je cecelac aqunec eu dac 5-7na nijia, je eu Jisas aluh osona maden. Je ina Jisas uqa dana cajaca age Anutna bilegina age adi cobocnu dado maden. Je cecelac lecisdoc eu dac 10na nijia. Je ina Jisas uqa uqana malogom 12-pela age dana cajaca uqanu me je qasali maadecnu suladeceb belein. Jisas uqa malogom qasali mamadeig adi odocnu, adi cobocnu ec maaden. Je cecelac cijeddoc eu dac 13na nijia. Je ina Jisas uqa galolo jena Anutna cul eu cel ceteh dana cajaca sildiaden. Je cecelac 4-peladoc eu dac 18na nijia. Je ina Jisas uqa dana cajaca age adi uqana malogom bilecnu maaden. Je cecelac 5-peladoc eu dac 24-25na nijia. Je ina Jisas uqa deel cit qocna cel ceteh caligiannu maaden.  
\is1 Je Dunuhnu Dado Mec  
\io1 1. Jisas uqa calimei mel men (dac 1-2)  
\io2 A. Jisas uqana sihul ijanaga (1.1-17)  
\io2 B. Maria uqa Jisas basen (1.18-2.12)  
\io2 C. Jisas uqa Isip hatuna bilen (2.13-23)  
\io1 2. Jisas uqa uqana cabi oc sanan men (3.1-4.11)  
\io2 A. Wa Joadec Jon uqa Jisas aqunidon (3.1-12)  
\io2 B. Jon uqa Jisas wa jouden (3.13-17)  
\io2 C. Seten uqa Jisas temdu fen (4.1-11)  
\io1 3. Jisas uqa Galili hatuna uqana cabi on (4.12-14-12)  
\io2 A. Uqana cabi Galili ono sanan men (4.12-25)  
\io2 B. Uqa aluh ohis dana cajaca me je maaden (dac 5-7)  
\io2 C. Uqa kobolkobol odoc filfil odon (dac 8-9)  
\io2 D. Uqa aposel 12-pela agena cabi oc aden (dac 10)  
\io2 E. Uqa Galili hatuna cocobi li cabi on (dac 11-12)  
\io2 F. Uqa sao cul jobonnu galolo je filfil maden (dac 13)  
\io2 G. Herod uqa Jisasnu uqa Wa Joadec Jon ec cisdon (14.1-12)  
\io1 4. Jisas uqa Galili hatu culdimei cudun filfil nuen (14.13-17.20)  
\io2 A. Uqa Galili wa gad cagoc leti uqa cudun ono isec nuen (14.13-15.20)  
\io2 B. Uqa Fonisia hatuna nuen (15.21-28)  
\io2 C. Uqa Dekapolis hatuna nuen (15.29-16.12)  
\io2 D. Uqa Sisaria Filipai taunna nuen (16.13-17.20)  
\io1 5. Jisas uqa Galili hatuna uqana cabi hedon (17.22-18.35)  
\io2 A. Jisas uqa cal mimei ceseli cajigian ec maden (17.22-23)  
\io2 B. Tempel cabinu takis helec (17.24-27)  
\io2 C. Sao cul jobonnu je (dac 18)  
\io1 6. Jisas uqa Judia hatunaca Peria hatunaca cabi on (dac 19-20)  
\io2 A. Jisas uqa ocobocobec kobol cagocnu iwaladen (19.1-12)  
\io2 B. Jisas uqa mel simnu iwaladen (19.13-15)  
\io2 C. Dana haun cehewanca uqa Jisasca hocob madesin (19.16-30)  
\io2 D. Wain cabi ocnu galolo je (20.1-16)  
\io2 E. Jisas uqa cal mimei ceseli cajigian ec haun maden (20.17-19)  
\io2 F. Jems Jonca anala uqa Jisas je madugiannu bilen (20.20-28)  
\io2 G. Jisas uqa Jeriko ono dana amala galuc mec lecis me malen (20.29-34)  
\io1 7. Deel 6-pela hedocob Pasowa Sab Jec Ben Deel caligiannu ninijen Jisas uqa age qocobil cal migiannu Jerusalem ono nuen (dac 21-27)  
\io2 A. Jisas uqa kingwe Jerusalem dunuh len (21.1-11)  
\io2 B. Jisas uqa tempel jo soidon (21.12-17)  
\io2 C. Jisas uqa Juda dana benben gami fee dadani hedoin (21.18-23.39)  
\io2 D. Jisas uqa Oliw Aluhna cit qoc saennu maden (dac 24-25)  
\io2 E. Juda dana benben age adi Jisas qocnu togodoin (26.1-6)  
\io2 F. Caja oso Jisas ilona mool dedeman me bahic joiden (26.6-13)  
\io2 G. Age Jisas hewudi gesildumeig na babalecna tuitu qocobil cal men (26.14-27.66)  
\io1 8. Jisas ceseli cajimei uqana malogom age cabi oqagannu maaden (dac 28)  
\c 1  
\s1 Jisas Krais uqana sihul ijanaga  
\r (Luk 3.23-38)  
\p
\v 1 Jaqec je i Jisas Krais uqana sihul ijanaganu je. Jisas uqa Dewid sihulnadec, odocob Dewid uqa Ebraham sihulnadec.   
\q1
\v 2 Ebraham uqa Aisak memeg.  
\q1 Odocob Aisak uqa Jekob memeg.  
\q1 Odocob Jekob uqa Juda waliagulca memega.\f + \fr 1.2 \ft Judaca waliagulca age Isrel sihunugail 12-pela jajanagail.\f*   
\q1
\v 3 Odocob Juda uqa Peres Seraca memela. Ale anala eu Tema.  
\q1 Odocob Peres uqa Hesron memeg.  
\q1 Odocob Hesron uqa Ram memeg.   
\q1
\v 4 Odocob Ram uqa Aminadab memeg.  
\q1 Odocob Aminadab uqa Nason memeg.  
\q1 Odocob Nason uqa Salmon memeg.   
\q1
\v 5 Odocob Salmon uqa Boas memeg. Uqa anag eu Rehab.  
\q1 Odocob Boas uqa Obed memeg. Uqa anag eu Rut.  
\q1 Odocob Obed uqa Jesi memeg.   
\q1
\v 6 Odocob Jesi uqa King Dewid memeg.  
\q2 Odocob Dewid uqa Solomon memeg. Solomon anag wele eu uqa Uria aideg.\f + \fr 1.6 \ft Caja i cunug age ijanagail lista ina nijen eu age Isrel sihuldec qee, age sihul celedec. Age Isrel dana oin. Tema Rehabca lecis i ale Kenan sihuldec, odocob Rut uqa Moab sihuldec. Batseba, uqa Solomon anag, uqa himec eu Isrel caja. Euqa hahawan uqa Uria aideg, odocob Uria uqa Hit dana. Lukna lista uqa caja celedec inu qee madel. Age Luk 3.23-38 feiga.\f*   
\q1
\v 7 Odocob Solomon uqa Riaboam memeg.  
\q1 Odocob Riaboam uqa Abaisa memeg.  
\q1 Odocob Abaisa uqa Esa memeg.   
\q1
\v 8 Odocob Esa uqa Jehosafat memeg.  
\q1 Odocob Jehosafat uqa Joram memeg.  
\q1 Odocob Joram uqa Usia memeg.   
\q1
\v 9 Odocob Usia uqa Jotam memeg.  
\q1 Odocob Jotam uqa Ehas memeg.  
\q1 Odocob Ehas uqa Hesekias memeg.   
\q1
\v 10 Odocob Hesekias uqa Manasa memeg.  
\q1 Odocob Manasa uqa Emos memeg.  
\q1 Odocob Emos uqa Josaia memeg.   
\q1
\v 11 Odocob Josaia uqa Jekonaia waliagulca memega. Saen euna Isrel dana cajaca age Babilon ono belimeig gihacdoc bilein.   
\q1
\v 12 Age Babilon ono gihacdoc bibileig  
\q1 Jekonaia uqa Sialtiel memeg.  
\q1 Odocob Sialtiel uqa Serababel memeg.   
\q1
\v 13 Odocob Serababel uqa Abiut memeg.  
\q1 Odocob Abiut uqa Elaiakim memeg.  
\q1 Odocob Elaiakim uqa Eso memeg.   
\q1
\v 14 Odocob Eso uqa Sedok memeg.  
\q1 Odocob Sedok uqa Ekim memeg.  
\q1 Odocob Ekim uqa Elaiat memeg.   
\q1
\v 15 Odocob Elaiat uqa Eleasa memeg.  
\q1 Odocob Eleasa uqa Matan memeg.  
\q1 Odocob Matan uqa Jekob memeg.   
\q1
\v 16 Odocob Jekob uqa Josef memeg.  
\q2 Odocob Josef uqa Maria gemug. Odocob Maria uqa Jisas basen, eu uqa Krais\f + \fr 1.16 \ft Krais eu dana Anut uqana dana caja cahahaadecnu wele nesili ehuden.\f* egina.   
\p
\v 17 Eunu sihul cunug eu Ebrahamnadec leceb Dewid calen eu sihul 14. Odocob sihul cunug eu Dewidnadec leceb Isrel dana cajaca age Babilon ono belimeig gihacdoc bilein saenna calen eu sihul 14. Odocob sihul cunug eu Isrel age Babilon ono gihacdoc bilein saennadec leceb Krais calen euha sihul 14.   
\s1 Maria uqa Jisas Krais basen  
\r (Luk 2.1-7)  
\p
\v 18 Jisas cali honnu je eu odi nijia. Jisas anag Maria uqa Josef col codoc bibili uqa qee ocna Kis Gun odocna waugca men.  
\v 19 Uqana dana, Josef, uqa Anut amegna tutuc coboloi. Odimei uqa Maria waugca ec dumei uqa culdigen ec cisdon. Euqa uqa Marianu cewudec je uqa dewegna cain hoiaunnu naha jahuni culdigen ec cisdon.  
\v 20 Odi cisdudu cocobon Tibudna ensel Josef witic us ninijen bebelecna camas mimei madon, “O Josef, hina Dewid sihulnadec, hina aiden Maria ocnu cain cucuiagaun. Faga, uqa melca eu Kis Gunnadec.  
\v 21 Uqa mel baseceb uqa uqana dana cajaca agena silailnu fadalowainnu cahahaadigian, eunu hina uqa ijan Jisas\f + \fr 1.21 \ft Hibru jena ijan Jisas eu hutan odi, “Jehowa sus.” Uqana gug eu “Tibud cahahaadena.” Ijan Jisas eu Grik jenadec. Eu Hibru jena age Josua ein.\f* qogan,” don.   
\p
\v 22 Eu Tibudna je uqa je hahun madec dana cona maden eu ihoc ligiannu ceteh eu calen. Je hahun madec dana uqa wele odi maden:   
\q1
\v 23 “Feiga, mel aid taula oso waugca mimei mel basigian.  
\q1 Odocob age mel eu ijan Emanjuel qoqagan,” en. \rq (Aisaia 7.14)\rq*  
\m Je eu Anutna jaqec je tawena. (Ijan Emanjuel eu uqana gug eu, “Anut egeca biluquna.”)   
\p
\v 24 Odocob Josef uqa us niji cajimei Tibudna ensel maden eu odi toodu uqana caja, Maria, ehuden.  
\v 25 Euqa Josef uqa Maria mel qee basec ninijen uqaca qee niji lesin. Mel baseceb uqa ijan Jisas qon.   
\c 2  
\s1 Haiden agena doc silecca dana age Jisas fecnu hoin  
\p
\v 1 Maria uqa Jisas Betlehem jobon ono Judia hatuna baseceb Herod uqa king bilen.\f + \fr 2.1 \ft King Herod i uqa Judia hatuca, hatu eu Judia hatu cemenug nijen euca cofaden. Herod uqa king euqa uqa Rom agena king ben, eu Sisa ein, bisalu bilen.\f* Saen euna haiden agena doc silecca dana age cam tobi becnadec Jerusalem jobon cali humeig  
\v 2 dana sisiladi maadein, “Mel sim haun uqa Juda agena king cali hon eu ana bilia? Ege uqana malaqa ono cam tobi becna isec camas meceb fimeb ege amegna gob cehimeb uqanu cuha feqannu hoqa,” adein.  
\v 3 Odocob King Herod je eu madecebil dah mimei geh cisdon, odocob Jerusalem dana cajaca cunugha eunu geh cisdoin.  
\v 4 Odocobil Herod uqa ihanec dana benbenca loo je iwaladec danaca utaadeceb cegulecebil uqa sisiladi maaden, “Krais i Anut uqa suldocob uqa Anutna dana cajaca cahahaadecnu hugian eu cel jobon cali hugian?” aden.  
\v 5 Odocob age madoin, “Uqa Betlehem jobon Judia hatuna cali hugian. Je hahun madec dana agena je odi jaqec wele nijia:   
\q1
\v 6 ‘O Betlehem, Judia hatuna,  
\q2 king uqa Isrel dana cajaca cofadigiannu eu Betlehem ono cali hugian.  
\q2 Eunu Juda jobon benben age hina qee woolhegina,’ jaqec je taweia,” doin. \rq (Maika 5.2)\rq*   
\p
\v 7 Odocobil Herod uqa doc silecca dana jahuni utaadeceb hocobil uqa malaqa cel saen cali hon eunu sisiladen.  
\v 8 Age silditocobil dumei Betlehem jobon belecnu dado madimei maaden, “Ijaha nui mel eunu cuha figennu age uqanu megi cuhadoigale. Odocob age eu gulucdu fimeig hu sateigale,” aden.   
\p
\v 9 Odocob age kingna je dumeig Betlehem jobon beloqagannu belein.\f + \fr 2.9 \ft Betlehem jobon eu Jerusalem cemenug nijen, eu odi kilomita 8-pela onoca nijen.\f* Odocob malaqa wele cam tobi becna isec fein eu aquniaadi, jo mel bilen eu ohis cehi qudu tawen.  
\v 10 Age malaqa fimeig age wawaga gehca ceelen.   
\p
\v 11 Odocob age jona limeig melca uqa anag Maria ha fecialimeig age mel amegna gob cehi jogoimeig uqanu cuha fein. Odimeig agena bokis qosocdumeig goldca, gilic ja manecebil dedeman meca, gilic dedeman meca umeig age toinanaga osoosoca Jisas utein.  
\v 12 Odocob Anut uqa age bebelecna maadi maaden, “Herod cemenug haun ceseli cain belowain,” aden. Maadeceb dumeig age jic osona agena hatuna ceseli belein.   
\s1 Josef Mariaca alena melca Isip hatuna busali belein  
\p
\v 13 Doc silecca dana age wele belecebil Tibudna ensel Josef us ninijen bebelecna camas mimei madon, “Faga, Herod uqa mel wawali li qocnu madena. Eunu hina caji mel anagca cedalimeg busali Isip hatuna nui biliga. Ija mahecemin haun ceseli ene hogan,” don.  
\v 14 Odocob Josef uqa witic cajimei mel anagca cedalimei Isip hatuna nui bilein.  
\v 15 Odimeig age Isip hatuna bibilegin li Herod uqa cal men. Saen euna Tibudna je hahun madec dana uqana je ihoc ligiannu ceteh eu calen. Je hahun madec dana uqa wele odi maden:  
\q1 “Ija melami Isip ono bibilen utadocomin Isipnadec cali hon,” en. \rq (Hosea 11.1)\rq*   
\s1 Herod maadeceb age Betlehem jobonna mel mati aqecebil cal mein  
\p
\v 16 Herod uqa doc silecca dana age ija uhultiti woolti belein imei gemag ben bahic ben. Odimei uqa han dana suladeceb age mel manahal age cabi gel lecis qee wooladec eundec cunug age Betlehem jobonca hatu cemenugca ono bilein eu aqi hedoin. Uqa doc silecca dana malaqa cel saen wasen sisiladeceb madocobil don eu toodu mel aqeceb cal mein.  
\v 17 Eu odocna je hahun madec dana Jeremaia uqana je ihoc len. Uqa wele odi jaqen:   
\q1
\v 18 “Rama jobonna qajec ben bahic dah mein.  
\q2 Qada qajec ben bahic onodec hon.  
\q1 Resel uqana melnu qada qajena.  
\q2 Mel cal mein eunu qada qajena.  
\q2 Age wahohog je madocobil dah mecnu culen,” en. \rq (Jeremaia 31.15)\rq*   
\s1 Josef Mariaca alena melca ceseli Isipdec hu Nasaret bilein  
\p
\v 19 Herod cal meceb Isip hatu ono Tibudna ensel bebelecna Josefca camas mimei  
\v 20 madon, “Dana age madi, mel qoqan, ein age wele cal mein. Eunu cajimeg mel anagca cedalecem ceseli Isrel hatuna beleiga,” don.  
\v 21 Odocob Josef cajimei mel anagca cedaleceb ceseli Isrel hatuna hoin.   
\p
\v 22 Humeig Herod melah Akeleas memeg hehuldi king bibilen eu madocobil dumei uqa Judia hatuna bilecnu cucuien.\f + \fr 2.22 \ft King Herod cal meceb Rom age uqana hatu qatani uqa melahul cijed cesawiadein. Akeleas uqa Sameria hatuca Judia hatuca alena king calen. Odimei uqa cabi gel 10-pela king bilen.\f* Anut uqa Josef bebelecna dado mudeceb Galili hatuna nuimeig  
\v 23 Nasaret jobon ono bilein. Je hahun madec dana age wele odi madein, “Age uqa Nasaretdec doqagan,” ein. Eunu je hahun madec dana agena je oso ihoc ligiannu age Nasaret jobon ono bilein.   
\c 3  
\s1 Wa Joadec Dana Jon me je maaden  
\r (Mak 1.2-8; Luk 3.1-18; Jon 1.19-28)  
\p
\v 1 Saen euna Jon, wa joadec dana, cajimei Judia hatuna wadau\f + \fr 3.1 \ft Hatu euna wadau eu naca qee, eu waca qee, eu meen esicca euna geh nijen.\f* ono cocobi me je qasali maaden.  
\v 2 Uqa maaden, “Sao cul jobon eu age cemenega hona.\f + \fr 3.2 \ft Je i Sao cul jobon o Anutna cul alena gug eu odi. Anut uqa king, odocob dana caja cunugca ceteteh cunugca age Anut bisalu bilegina.\f* Eunu agena silailnu tului falicdoigale,” aden.  
\v 3 Ge, Jon uqa dana eu Anut uqa je hahun madec dana, Aisaia, cona eunu maden. Uqa wele odi maden:  
\q1 “Dana jejeg oso uqa wadauna bibili utai maadena,  
\q2 ‘Tibudna jic saciadoiga.  
\q2 Uqana jic tutuc mudeiga,’ adena,” en. \rq (Aisaia 40.3)\rq*   
\p
\v 4 Jon uqa kamel bagicna lotoc mudec tacoloi, odimei uqa wailohna dool ganacna oologam mudec taqoloi, odimei uqa sisca mehud uqana waca joloi.\f + \fr 3.4 \ft Jonna lotocca sabca eunu je eu Jon uqa dana oso cinigwe dot quton, eu je hahun madec dana Ilaija. Age 2 King 1.8ca, Malakai 4.5ca, Matju 11.14, odocob 17.10-13ca eu feiga.\f*  
\v 5 Saen euna dana cajaca age Jerusalem bileginaca, dana cajaca age Judia hatu cunugna bileginaca, dana cajaca age jobonjobon Jodan Wa cemenug bileginaca age Jonca lein.  
\v 6 Limeig age agena silailnu je qasali madocobil Jon uqa Jodan Wana wa joaden.   
\p
\v 7 Odocob Jon uqa Farisi Sadjusica mati age uqa wa joadigiannu uqaca hohogin feciadimei maaden, “Age man sononec nag me qee! In madeianu age Anutna gemag bec jawe hugia odona euna busalecnu age ihoc, egina?  
\v 8 Agena silailnu mele bahic culimeig tului falicdumeig Anutna je qee tefacdoginanufi me odoc oso odoiga eu ihacteiga.  
\v 9 Euqa ija mele maadigina, Anut uqa meen ene nijegina eu cedimei Ebraham talacul euna madecnu ihoc. Eunu age cain cisdudu madowain, ‘Ebraham ege asige. Eunu Anutna gemag bec egeca qee hoiaun,’ owain.  
\v 10 Sapol na gug qetecnu wele taweia. Na cunug aig me qee qona uqa qetimei jana heligian,” aden.   
\p
\v 11 “Ija age agena silailnu wele tului falicdoinnu wana wa joadigina qa oso hib tooti hona, uqana gagadic odoc ijana gagadic odoc wooldona. Uqa dana meca bahic. Ijaqa dana meca qee. Ija uqana cabi dana me bahic ihoc qee, ija uqana jaih tacec hewecwe qee. Uqa age Kis Gunna janaca wa joadigian.  
\v 12 Uqa sawolca hona. Sawol euna wit aig cunug eeldocnuca, wit aig uqana jo bisna mecnuca hona. Odimei uqa witna tetec ja qee cafulina euna manigian,” aden.   
\s1 Jon uqa Jisas wa jouden  
\r (Mak 1.9-11; Luk 3.21-22)  
\p
\v 13 Saen euna Jisas Galilidec Jodan Wana len. Uqa Jon uqa wa joudigiannu Jonca limei  
\v 14 madon, “Ijaha wa joitigale,” don. Odocob Jon uqa cahacdudu madon, “Hina ija wa joitegan eu me bahic. Hina eetanu ija hina wa joihecnu matagana?” don.  
\v 15 Odocob Jisas Jon jejeg hewi madon, “Anut madena eu cunug toodu odocnu eu tutuc. Eunu qila culimeg gad wa joitigale,” don. Odi madocob Jon cois imei wa jouden.  
\v 16 Jisas wa joc umei uqa mahucwe wa ocna ti tatawen sao ohis jic cebec hudeceb uqa Anutna Kis cuhudid cinigwe ni uqaca bilen fen.  
\v 17 Odocob sao ohisdec ha jejeg oso camas mi maden, “Ija melami nelugca ihen. Ija uqanu wawi ben ceelena,” en.   
\c 4  
\s1 Seten uqa Jisas temdu fen  
\r (Mak 1.12-13; Luk 4.1-13)  
\p
\v 1 Saen euna Seten uqa Jisas temdu figiannu Kis Gun uqa Jisas iwaldocob wadauna\f + \fr 4.1 \ft Age je Matju 3.1na nijia eu feiga.\f* nuen.  
\v 2 Uqa deel 40 cahineg witicca sab qee jec bilen. Saen hedocob wen don.  
\v 3 Wen dodon temgec eu uqaca limei madon, “Hina Anut Melahfi meen i maadecem sab ibuldocob jaga,” don.  
\v 4 Euqa Jisas uqa Seten jejeg hewi madon, “Anutna jaqec je eu odi madena:  
\q1 ‘Sab jec himec dana cebac bilec qee adena qa  
\q1 je cunug Anut conadec cali hona eu  
\q2 dana cebac bilec adena,’ ena,” don. \rq (Loo 8.3)\rq*   
\p
\v 5 Odocob Seten uqa Jisas ehudimei jobon gunna ehi ti tempel qab tatacanna muden.  
\v 6 Mudimei madon, “Anutna jaqec je eu odi madena:  
\q1 ‘Anut uqana ensel maadeceb  
\q2 hina jaim meenna qee tudoiaunnu  
\q2 age hina ebenegana hewihi ehi ni mihuqagan,’ ena. \rq (Buk Song 91.11-12)\rq*  
\m Eunu hina Anut Melahfi busali tonoga,” don.   
\p
\v 7 Jisas Seten jejeg hewi madon, “Anutna jaqec je osoha madena:  
\q1 ‘Tibud, hinana Anut, eu cain temdu fagaun,’ ena,” don. \rq (Loo 6.16)\rq*   
\p
\v 8 Odocob Seten uqa haun Jisas ehudi aluh benna ehi ti muden. Mudimei mahamaha cul cunug agena tumutum cahulecca ihacdudu madon,  
\v 9 “Faga, hina amina gob cehi ijanu cuha fecemfi fagana eu cunug culihigen,” don.  
\v 10 Odocob Jisas Seten jejeg hewi madon, “Anutna jaqec je odi madena:  
\q1 ‘Tibud uqa hinana Anut uqanu cuha faga,  
\q2 uqa himec cewel utugale!’ ena, \rq (Loo 6.13)\rq*  
\m Eunu Seten, cuculti nuuga,” don.   
\p
\v 11 Odocob Seten uqa Jisas cuculdi nueceb ensel age hu Jisas cewel utoin.   
\s1 Jisas uqana cabi Galili hatu ono sanan men  
\r (Mak 1.14-15; Luk 4.14-15)  
\p
\v 12 Aria, Jisas uqa age Jon hewimeig gihacdoc jona mudein ec dumei uqa Galili hatu ono nuen.  
\v 13 Odimei uqa Nasaret culimei Kapaneam jobon nui bilen. Kapaneam jobon eu Galili wa gad cagocna isec nijina, eu Sebjulan sihulca Naftali sihulca agena hatu gadac nijina.\f + \fr 4.13 \ft Wele Isrel sihul lecis, eu Sebjulan sihulca Naftali sihulca, age Galili wa gad cagoc cemenug biloloig. Euqa Jisas uqana saenna agena hatu eu Galili hatu naha oso calen.\f*  
\v 14 Je hahun madec dana, Aisaia, je oso wele maden eu ihoc ligiannu odi odon. Uqa odi jaqen:   
\q1
\v 15 “Sebjulan sihulca, Naftali sihulca, alena hatu eu  
\q2 Galili wa gad cagocna isec nijia,  
\q2 Jodan Wa ono isec,  
\q2 Galili hatu Juda dana qee eundec agena,   
\q1
\v 16 hatu euna dana cajaca age tuna biloloig  
\q2 eu fulacdoc ben oso fein,  
\q1 dana cajaca age cal mec hatuna tuna biloloig,  
\q2 eu fulacdoc ben oso iletaden,” Aisaia odi jaqen. \rq (Aisaia 9.1-2)\rq*   
\s1 Jisas uqa dana 4-pela utaadeceb toodoin  
\r (Mak 1.16-20; Luk 5.1-11)  
\p
\v 17 Saen ina Jisas uqa dana cajaca je qasali maadi sanan mimei maaden, “Sao cul jobon eu age cemenega hona. Eunu agena silailnu tului falicdoigale,” aden.  
\v 18 Jisas uqa Galili wa gad cagocna cocobi dana oso waliagca fecialen, eu Saimon, age Pita egina, uqa waliag Andruca. Ale cimec ben wana hehelesin fen. Ge, age cul dool cedec dana.  
\v 19 Odocob Jisas maalen, “Hu tootecebil ija odalecemin ale dana cajaca cedadowasan,” alen.  
\v 20 Maaleceb mahuc bahic alena cimec ben cuculesi uqa toodu belesin.   
\p
\v 21 Uqa nag bahic onoca limei dana oso waliagca fil fecialen, eu Jems, uqa Sebedi melah, uqa waliag Jonca. Ale memela, Sebedica, agena wagna bibileig cimec ben tatalec eu haun wewegi bilein. Odocob Jisas utaalen.  
\v 22 Mahuc bahic ale wag memelaca cuculadi limesi Jisas toodu belesin.   
\s1 Jisas me je maaadei dana cajaca mati me maden  
\r (Luk 6.17-19)  
\p
\v 23 Jisas uqa Galili hatu cunug cocobi nuen. Uqa Juda agena cuha jonana limei dana cajaca iwaladen. Odimei uqa sao cul jobonnu me je qasali maaden. Odimei uqa dana cajaca agena hag filfilca age dewenega laleg mein eundec filfilca me maden.  
\v 24 Age uqa hutannu je saec eu Siria hatu cunugna ihoc len.\f + \fr 4.24 \ft Rom age Juda dana cajaca cofadein saenna Isrel hatu eu hatu ben Rom age Siria ein euna nijen.\f* Odocob age dana cajaca hag gug filfil me qee maden eundecca, dain ben aden eundecca, buga me qee hewadein eundecca, dana caja titi hudec hagca age gaid dewenega qeleceb toni mahulegina eundecca, dana tefulunuga laleg mi cal mein eundecca cedadi Jisasca ahocobil Jisas uqa me maden.  
\v 25 Dana cajaca am ben age Galili hatunadecca, Dekapolis\f + \fr 4.25 \ft Dekapolis uqana gug eu jobon 10-pela.\f* hatunadecca, Jerusalemdecca, Judia hatunadecca, Jodan Wa ono isec hatunadecca age toodu belein.   
\c 5  
\s1 Jisas uqa aluh ohis dana cajaca je maaden  
\p
\v 1 Jisas uqa dana cajaca mati bahic uqaca hohogin feciadimei uqa aluh osona ti bibilen uqana malogom uqaca hoin.\f + \fr 5.1 \ft Jisas uqa Juda agena kobol toodu odon. Agena kobol eu Anutna jenu doc dana uqa dana cajaca iwaladecnu gale docobfi uqa bilimei je iwaladoloi. Age Matju 13.2, 24.3ca Luk 4.20ca euha feiga.\f*   
\s1 Jisas uqa madi maden, dana cajaca cunug age eeladec ocnu ihoc, en  
\p
\v 2 Odocobil uqa uqana malogom iwalaadi maaden:\f + \fr 5.2 \ft Matju 4.23-25 (9.35ha eu Jisas uqa cabi lecis odon ec madena. Cabi oso uqa dana cajaca je iwaladen, odocob cabi oso uqa dana caja hag filfilca eu meaden. Eunu Matju dac 5-7na Jisas uqa dana cajaca Anutna culnu kobol iwaladen eunu je mati nijen ec foqona. Eu toodumei Matju dac 8-9na Jisas uqa dana caja hagca meaden eunu je mati nijen ec foqona. Matju bukna Jisas uqa je cecelac 5-pela maaden, eu dac 5-7ca, dac 10ca, dac 13ca, dac 18ca, dac 24-25ca. Je cecelac i dac 5-7na nijen, eu iwaladec je osoldoc. Jisas uqa je i aluh ohisna maaden.\f*   
\q1
\v 3 “Dana age Anutnu doc dumanaga ihoc qee eunu dogina eundec saona gun cul eu agena.  
\q2 Eunu age eeladecca bilegina.   
\q1
\v 4 Dana age qada qajegina eundec Anut age wahohogadigian.  
\q2 Eunu age eeladecca bilegina.   
\q1
\v 5 Dana age gemanaga jocosaigca eundec mahamaha cunug eu age mugumuga oqagan.  
\q2 Eunu age eeladecca bilegina.   
\q1
\v 6 Dana age tutuc odoc ihoc ligiannuca, agedodoc agena odoc tutuc migiannuca odogina eu odi sab wen adenaweca, wa gab adenaweca eundec Anut uqa cesuladeceb age ihoc oqagan.  
\q2 Eunu age eeladecca bilegina.   
\q1
\v 7 Dana age cotogail walocca bibilegin feciadimeig wawaga qocob me madegina eundec age saen osona walocca bibilebil Anut feciadimei waug qocob me madigian.  
\q2 Eunu age eeladecca bilegina.   
\q1
\v 8 Dana age wawaga cataniec eundec age Anut ola foqagan.  
\q2 Eunu age eeladecca bilegina.   
\q1
\v 9 Dana age maul qetegina eundec age ijanaga Anut melahul oqagan.  
\q2 Eunu age eeladecca bilegina.   
\q1
\v 10 Dana age tutuc odoginanu aaqati tootooadec gahidogina eundec saona gun cul eu agena.  
\q2 Eunu age eeladecca bilegina,” aden.   
\p
\v 11 “Dana mahanadec eundec age, age ijana bilegina eunu cewadimeig aaqati tootooadimeig age agenu je me qee uhulaadi madegina saen euna age eeladecca bilegina.  
\v 12 Odi bahic ha dana age je hahun madec dana wele biloloig eu aaqati tootooadoloig. Age sao jobonna ameg me bahic oqagan. Eunu age wawaga me meceb ceeli bileigale,” aden.   
\s1 Age odi macas fulacdocca cinigwe  
\r (Mak 9.50; Luk 14.34-35)  
\p
\v 13 Jisas je haun maaden, “Age odi mahamahanu macas bilegina. Euqa macas uqana mug qah becebfi adi haun mugca migian? Macas qah bec eu ceteh osonu qee ihoc lena. Age dana lahacluhucdoqagannu helegina,” aden.   
\p
\v 14 “Age odi mahamahanu fulacdoc bilegina. Jobon ben aluhna cehein nijia eu jahunec nijecnu qee nijel.  
\v 15 Dana age gowoc oso madacdumeig hal dunuh qee tacena qa age gowoc ohisna caqusegina. Odocobil jona bilegina eundec cunug fulacadena.  
\v 16 Dana age agena me odoc eu fimeig age Memega sao jobon bilia uqa binan suluqagannu age eu odiwe agena gowoc madacdocobil eu dana fulacadeiale,” aden.   
\s1 Jisas uqa Anutna loo jenu maden  
\p
\v 17-18 Jisas je haun maaden, “Ija mele maadigina, sao mahaca qee mudigian deel qee cali hoc ninijeb loo je jaqec naha nag osolha qee fadaleiaun. Loo je ninijeb li ceteh cunug ihoc ligian. Eunu age ijanu uqa Mosesna loo jeca je hahun madec dana agena iwaladec jeca bebesi qee mudigiannu hon odi cain cisdowain. Qeeo, ija loo jeca agena iwaladec jeca qee mudigennu qee holom qa ija loo jeca agena iwaladec jeca toodu bahic ihoc ligiannu hom.  
\v 19-20 Ija maadigina, agena tutuc odoc eu Farisica loo je iwaladecca agena tutuc odoc qee wooldocobfi ageha saona gun culna qee lowain. Eunu dana oso loo je nag odi besimei dana odi ha toodu odocnu iwaladena eu uqanu saona gun culna age uqa caunca qee oqagan. Osoqa loo je toodu odimei dana ha odi odocnu iwaladena eu saona gun culna ijan meca ugian,” aden.   
\s1 Jisas uqa je tutuc mudec kobolnu maden  
\r (Luk 12.57-59)  
\p
\v 21 Jisas je haun maaden, “Loo je age jajanagail wele oin eu age dogina eu odi madena:  
\q1 ‘Hina oso cain qocom cal meiaun.  
\q2 Oso qocob cal meceb eu uqa gesilec jona ligian,’ ena ec je nijia. \rq (Kisim Bek 20.13)\rq*   
\m
\v 22 Ijaqa maadigina, oso uqa cotignu gemag bena eu gesilec jona ligian. Odocob oso uqa cotig cewudec je me qee madona eu Juda dana matu agena cegulec age dana eu gesildocnu ihoc. Odocob oso uqa cotig madona, ‘Hina dana gad,’ dona eu oloqanih jana lecnu ihoc,” aden.   
\p
\v 23 “Eunu hina ihanec cabalna tatawi hinana ceteh ihandoga bibili hina cotin hina dewennu je hewihewi cobona eunu dahin fogo docobfi  
\v 24 hina casac hinana ceteteh ihanec cabalna ninijeb cuculi cotinca li je tutuc mudesiale. Odimeg hu hinana ceteteh ihandogale,” aden.   
\p
\v 25 “Dana oso hina dewennu um qocobfi hinana cad gesilec dana ben uqa ebenna mihiaunnu, odocob gesilec dana ben uqa gesilec jona cofadec dana ebenna miheceb uqa gihacdoc jona tacihiaunnu eunu hina hinana cadca gesilec jona bebelesi jicna uqaca tanawecnu wawin nijiale.  
\v 26 Ija mele mahigina, hina meen qaig ihoc lec qee helecemfi qee bahic besihuwain,” aden.   
\s1 Jisas uqa dana wal kobol odona eunu maden  
\p
\v 27 Jisas je haun maaden, “Age jajanagail wele loo je oso oin eu ageha dogina je eu odi madena:  
\q1 ‘Hina dana cajaca alena sisi jelalec cain wagalagaun,’ ena ec je nijia. \rq (Kisim Bek 20.14)\rq*   
\m
\v 28 Ijaqa maadigina, oso dana osona caja fimei nenehegdudu hewoum ena eu uqa wele waug dunuhna cajaca wal kobol odosin,” aden.   
\p
\v 29 “Hina amen meula isec eu silail mecnu faninhigia odocobfi selimeg helagale. Hina dewen cunug oloqanih jana helowaindainnu hina dewen naha culimeg silail qee moum eu me.  
\v 30 Hina eben meula isec eu silail mecnu faninhigia odocobfi qeti helagale. Hina dewen cunug oloqanih jana helowaindainnu hina dewen naha culimeg silail qee moum eu me,” aden.   
\s1 Jisas uqa dana aideg culdina eunu maden  
\r (Matju 19.9; Mak 10.11-12; Luk 16.18)  
\p
\v 31 Jisas je haun maaden, “Wele age odi madoloig:  
\q1 ‘Oso uqa aideg culdina eu uqa sisi jelec cufalec jaqec je utigian,’ oloig ec je nijia. \rq (Loo 24.1)\rq*   
\m
\v 32 Ijaqa maadigina, dana oso uqa aideg dana osoca qee leceb nijelesin euqa gauc dana caja sisi jelec cagumei caja culdina eu uqa aideg odudeceb aideg wal kobol odona. Eetanu? Uqa aideg dana oso ocob ale wal kobol odosina. Odocob dana oso uqa caja gemug culden eu ona uqaha dana caja sisi jelec cufalimei wal kobol odona,” aden.   
\s1 Jisas uqa age hahun je Anut amegna madegina ec eunu maden  
\p
\v 33 Jisas je haun maaden, “Ageha age jajanagail je oso oin eu mamadegin odi doin, ‘Hina Tibud amegna ceteh oso odigen ec je cagoc oso madecemfi hina je cagoc eu cain dahin celeiaun. Hina Tibud amegna je madem eu cisdudu toodu odogale,’ madegina ec je nijia.  
\v 34 Ijaqa maadigina, Tibudca ceteh osoca amegna madigina odi cain bahic owain. Odocob sao eu Anutna bilec bahim. Eunu sao amegna madigina cain owain.  
\v 35 Odocob maha eu bahim Anut uqa jaih tatacan mudina. Eunu maha amegna madigina cain owain. Odocob Jerusalem eu King Ben uqana jobon. Eunu Jerusalem amegna madigina cain owain.  
\v 36 Hinaha hina gosin osol cas lec eu senenec ibuldocwe qee, odocob hina gosin osol senenec eu cas lec ibuldocwe qee. Eunu hina ija ilomina je tutuc madigina cain agaun.  
\v 37 Age sisiladecebil eu melefi age ‘Ese’ ec dih madeigale. Qeefi, age ‘Qee’ ec dih madeigale. Age je eu je oso tubdufeig Setenna je ec madoqagan,” aden.   
\s1 Age ameg me qee wadac cain adowain  
\r (Luk 6.29-30)  
\p
\v 38 Jisas je haun maaden, “Age je oso odi madoloig ec doin:  
\q1 ‘Oso uqa cotigna ameg me qee mudecebfi  
\q2 ageha uqa ameg me qee mudeigale.  
\q1 Oso uqa cotigna maih me qee mudecebfi  
\q2 ageha uqa maih me qee mudeigale,’ oloig ec je odi doin. \rq (Kisim Bek 21.24; Wok Pris 24.20; Loo 19.21)\rq*   
\m
\v 39 Ijaqa maadigina, qisol mec dana age, age dewenega me qee mudegina eundec age ameg me qee wadac cain adowain. Oso hina sihom oso naha qahecebfi hina naha ha ihacdogale.  
\v 40 Oso hinaca cetehnu tutuac cacadesi hinana siot cawalihecebfi hinana lotoc meca ha culitogale.  
\v 41 Oso uqaca nuecnu kilomita osol ihoc lecnu ninichecebfi hina kilomita leciscadoc belesiale.  
\v 42 Oso ninihecebfi eu ceteh utugale. Oso cesultagale hecebfi cain hibemdogaun, cesuldogale,” aden.   
\s1 Jisas uqa age agena cad nalunuga mecnu kobol eunu maden  
\r (Luk 6.27-28, 32-36)  
\p
\v 43 Jisas je haun maaden, “Age je oso odi madoloig ec doin, ‘Hina hina utuqain bilec eundecnu nalunuga magale. Hinana cad sagagadagale,’ oloig ec je odi doin.\f + \fr 5.43 \ft Je i “Hina hina utuqain bilec eundecnu nalunuga magale,” oloig eu Wok Pris 19.18na nijia. Euqa je i “Hinana cad sagagadagale,” oloig eu anadec bahic hon doc dana age qee dogina. Euqa age Loo 7.2, 20.16ca, Song 139.21-22ca eu feiga.\f*  
\v 44-47 Ijaqa maadigina, age, dana age agenu nalunuga megina eundec himec nalunuga meginafi Anut cel ameg me adigian? Takis cedec dana eu ageha odi odogina. Odocob age agena danah eundec himec feele ec maadeginafi age in wooldu odogina. Haiden ageha odi odogina. Euqa Memega Anut uqa me odoc eundecca me qee odoc eundecca cam sulduadena. Uqa tutuc coboginaca tutuc qee coboginaca osobennu waha sulduadena. Eunu age Memega sao jobon bilia eu age uqa melahul bilegina eu camas moqagannu age agena cadnu nalunuga meigale. Aaqati tootooadegina eundecnu Anut waug qugiannu inondoigale.  
\v 48 Age Memega sao jobon bilia eu uqa odoc me ihoc lec bilina. Eunu ageha agena odoc me ihoc lec bileigale,” aden.   
\c 6  
\s1 Jisas uqa dana leih cesuladec kobolnu maden  
\p
\v 1 Jisas je haun maaden, “Batut feigale. Age dana egena Anut cewel utoc foqagan imeig odocobilfi age Memega sao jobon bilia eu ameg me uqa qee adeiaun. Eunu age Anut cewel utoc eu ege odocomun dana age meciguqagan cain owain,” aden.   
\p
\v 2 “Me hihili coboc dana age Juda agena cuha jonaca jicnaca ege binanige suluqagan imeig sawen dana loo siwiadoqa bili aquniaadi taul fuldogina. Eunu hina me hihili coboc dana eundec odi odogina cain odogaun. Ija mele maadigina, dana eundec age agena ameg oc eu wele oin.  
\v 3-4 Euqa hina wawin qocca loo siwiadec eu jahunec biligiannu hina sawen dana eundec loo siwiadecem eben meulana isec odona eu eben ansena isec cain doiaun. Odocob Memen uqa ceteh jahunecna bilia eu fena uqa ameg me ihigian,” aden.   
\s1 Jisas uqa Anut inondoc kobolnu maden  
\r (Luk 11.2-4)  
\p
\v 5 Jisas je haun maaden, “Me hihili coboc dana age dana ege Anut inondocomun meciguqagan imeig Juda age cuha jonaca jicnaca tatawi Anut inondogina eunu gale ben adena. Eunu hina me hihili coboc dana Anut inondoginawe odi cain inondogaun. Ija mele maadigina, dana eundec age agena ameg oc wele oin.  
\v 6 Euqa hina Memen inondoga bili hina jo hamol limeg jic cebec menimeg Memen uqa jahunecna bilia eu inondoga. Odocob Memen uqa ceteh jahunecna bilia eu fena uqa ameg me ihigian,” aden.   
\p
\v 7 “Haiden age madegina, ‘Ege egena tibud je mati bahic madocomunfi jejenige toodu odigian,’ egina. Eunu age inondudu je gauc madegina eu odi haiden odoginawe cain madowain.  
\v 8 Age Memega qee madoc ninijeb uqa agena wawaga hoolecca agena togo nijigiannu madegina eu wele dona. Eunu age haiden odogina odiwe cain odowain,” aden.   
\p
\v 9 “Eunu age odi inondoigale:  
\q1 ‘O ege Memige, hina sao jobon biligina,  
\q2 hina ijain gun biliale.   
\q1
\v 10 Hinana cul egeca hoiale.  
\q1 Hina con toodu odoc sao jobon ihoc lenawe  
\q2 odi mahana ha ihoc leiale.   
\q1
\v 11 Sab jecnu ba i ihoc igigale.   
\q1
\v 12 Dana age ege me qee odigeinnu ege dahinige celenwe  
\q2 hinaha egena me qee odadec eunu dahin celeiale,   
\q1
\v 13 Hina ege temgecna cain ehi li migigaun.  
\q2 Euqa qisol mec kobol eu cagasigagale,’\f + \fr 6.13 \ft Grik je doc dana leih age je i “qisol mec kobol” eu odi “dana uqa qisol mec kobol odona” eu Seten ec cisdogina. Odocob Grik jaqec je hilah leihna age je oso tubdu jaqein eu odi: Me culca, gagadic odocca, kobolkobolca eu hinana himec bileceb catanigian. Mele.\f* doigale,” aden.   
\p
\v 14 “Ge, age dana age me qee odadein eu agena silail dahiniga celecebfi Memega sao jobon bilia uqaha agena silail dahig celigian.  
\v 15 Euqa age dana age me qee odadegina eu agena silail qee dahiniga celecebfi Memega uqa agena silailha dahig qee celeiaun,” aden.   
\s1 Jisas uqa sabnu qagu bilecnu eunu maden  
\p
\v 16 Jisas je haun maaden, “Me hihili coboc dana eu age ege sabnu qagu biluquna eu meciguqagan imeig olanaga jugu qocca cobogina. Euqa age sabnu qagu bilecnu bibileig olanaga jugu qoc me hihili coboc dana eu odi odoginawe cain cobowain. Ija mele maadigina, dana eundec age agena ameg oc eu wele oin.  
\v 17-18 Euqa dana hina sabnu qagu biligina eu cain fecihuwainnuqa Memen jahunecna bilia eu mecihigiannu hina sabnu qagu bilecnu bibili gosin cilihdumeg olain wasacudagale. Odocob Memen uqa ceteh jahunecna bilia eu fena uqa ameg me ihigian,” aden.   
\s1 Jisas uqa maha cehewannu maden  
\r (Luk 12.33-34)  
\p
\v 19-21 Jisas je haun maaden, “Hina toinain haudoc nijina eunu hina wawin cisdocha nijina. Mahana cehewan eu cumucumca tontonca hewi me qee mudina, odocob heje dana ceteh euha heje ocna cawaladoqagan. Eunu age mahana cehewan meca agedodocnu haudocnu cain cabi owain. Euqa sao jobonna cehewan eu tontonca qee hewena, eu susul me qee mudecwe qee, odocob heje oc dana euha heje ocna cawaladecwe qee. Eunu age sao jobonnu age cehewanaga meca haudocnu cabi oigale,” aden.   
\s1 Dewegna fulacdoc eu ameg  
\r (Luk 11.34-36)  
\p
\v 22 Jisas je haun maaden, “Dewenna fulacdoc eu hina amen. Eunu hina amen me nijinafi hina dewen cunug fulacdocca nijina.  
\v 23 Euqa hina amen galuc mecebfi dewen cunug tu migian. Eunu fulacdoc eu wawinna bilia eu cafulecebfi wawin eu gagatucna bahic bilina!” aden.   
\s1 Cabi dana oso uqa dana ben lecis alena cabi ocwe qee  
\r (Luk 16.13)  
\p
\v 24 Jisas je haun maaden, “Cabi dana oso uqa dana ben lecis alena cabi ocwe qee. Ge, uqa oso sagagduduqa osonu nalug migian. Qeefi, uqa osonu waug nijigian qa oso cewudigian. Odiwe ha age Anutca maha cehewanagaca agena tibud mumudi osoben cabi u calecnu qee nijel,” aden.   
\s1 Jaen qoc waug madecca kobolnu  
\r (Luk 12.22-31)  
\p
\v 25 Jisas je haun maaden, “Eunu ija age maadigina, age mahana cebac bilecnu cain jaen aqeiaun. Eeta sab jeqan, eeta gab jeqan, cain owain. Age deweneganu ha cain jaen aqeiaun. Eeta taceqan cain owain. Agena cebac bilec eu sab jec wooldona. Dewenega eu lotoc wooldona.  
\v 26 Man fululec sao bisilag cobogina eu meciadeigale. Age ceteteh qee cehegina. Ageha wal meceb ceteteh jo bisna qee tacegina. Euqa age Memega sao jobon bilia uqa moot madena. Age agena fajec eu man fululec agena fajec wooldoc bahic bilegina!  
\v 27 Age info uqa uqana cebac bilecnu jaen qonana uqa uqana maha bilec saen nag cecelacca mudecnu ihoc?” aden.   
\p
\v 28 “Age eetanu lotoc tacecnu jaen ben aqena? Age ceteh sal qoc wasena eu feiga. Age cabi qee ogina, agena lotocha qee mudegina.  
\v 29 Euqa ija odi maadigina, Solomon uqa lotoc tumutumca bahic taci tawen eu sal qoc bahunadec tawena i oso qee wooldol.  
\v 30 Euqa Anut uqa ceteh gigisac gami tacec balaca adena, ceteh eu qila tawena uqadec jana helecebil cijina. O age wawaga meleec meca qee, age dogina, Anut uqa age gigisac wooldudu tacecnu adigian.  
\v 31-32 Haiden age ceteh eu cunugnu jaen aqena. Odocob age Memega sao jobon bilia uqa age ceteh euca qeefi age maha ina bilecwe qee eu uqa dona. Eunu age jaen aqeceb eeta sab jeqan, eeta gab jeqan, cel cetehna dewenige taceqan eu cain madowain.  
\v 33 Euqa age casac age Anut mudecebil uqa agena king biliale, odocob age uqana tutuc coboc umeig toodoigale. Oodobil ceteh mahanadec eu toodu ageca hugian.  
\v 34 Deel uqadec uqadodoc jaen qocca cisdugian. Eunu age deel uqadec uqana gihacadec eunu cain jaen aqeiaun. Deel abesabes gihacadec gahidocnu ihoc gulucdoigale,” aden.   
\c 7  
\s1 Age cotoga cain gesildowain  
\r (Luk 6.37-38, 41-42)  
\p
\v 1-5 Jisas je haun maaden, “Eetanu hina cotin amegna hilican nag eu fagana qa hinadodoc amenna fan ben nijina eu qee fagana? Qeefi, hina adi cotin madogana, ‘Coti, cultecem hilican nag amenna nijia eu u helihigen,’ dogana qa hina amenna fan ben nijina? Hina me hihili coboc dana! Casac fan ben eu hina amenna fagdoc nijia eu cagati helagale. Odocob hilican nag cotin amegna nijia eu u helecnu ihoc fegan. Gesilec age osonu je madegina gesilec euna Anut uqa age gesiladigian. Age ihoc mec dana ihoc miadegina ihoc mec euna ha Anut u hewi age ihoc miadigian. Eunu Anut age gesiladimei camasac mimi cewadeiaunnu age dana osona kobol gesildumeig cain camasac mimi cewudec je madowain,” aden.   
\p
\v 6 “Qa age falicdu age tataladowainnu age ceteh Anutnu gun bahic nijia eu qa cain culiadowain. Ho age gilolo eu lahacluhucdowainnu agena gilolo me eu ho amagana cain helowain,” aden.   
\s1 Anut uqa dana age uqanu inondogina eundec ceteh me bahic adigian  
\r (Luk 11.9-13)  
\p
\v 7-8 Jisas je haun maaden, “Cunug age cetehnu Anut sisildogina eu ceteh ogina. Odocobil oso ceteh walena eu ceteh gulucdona. Odocob oso jic cebec gohugohudona eu Anut huditugian. Eunu Age Anut cetetehnu inondocobil ceteh eu adigian, odocobil age wawali cobimeig ceteh walegina eu gulucdoqagan, jic cebec gohugohudocobil Anut hudiadigian.  
\v 9 Qeefi, age gemona dana oso uqana mel uqa memeg sab itiga jiga docobfi memeg uqa sab qee utina qa meen utinafo?  
\v 10 Qeefi, age gemona dana oso uqana mel uqa memeg cul dool itiga jiga docobfi memeg uqa cul dool qee utina qa man sononec utinafo?  
\v 11 Feiga, age dana gug me qee qa age agena mel ceteh me adecnu dogina. Eunu age mele dogina, Memega sao jobon bilia eu uqa age sisildogina eundec ceteh me bahic adigian!  
\v 12 Eunu dana filfil age agenu odadecebil gale adenawe eu odi age dana filfilnu ha odadeigale. Ge, Mosesna loo jeca je hahun madec dana agena iwaladec jeha madein agena je eu uqana caun ihen,” aden.   
\s1 Age jic cebec sosog bahicna loqagan  
\r (Luk 13.24)  
\p
\v 13-14 Jisas je haun maaden, “Fadalecna calecnu jic cebec eu bagalan, jic euha bagalan. Toodocnu eu hetec. Odocob jic cebec euna mati bahic limeig jic euna cobogina. Euqa cebac bilec catanec euna calecnu jic cebec eu sosog, odocob jic euha cacanigca. Odocob dana cajaca mati bahic jic eu gulucdumeig qee toodogina. Eunu age cebac bilec catanec euna loqaga bili jic cebec sosogna leigale,” aden.   
\s1 Age uhulec je hahun madec dana eunu batut feigale  
\r (Luk 6.43-44; 13.25-27)  
\p
\v 15 Jisas je haun maaden, “Age uhulec je hahun madec dana age sipsip ganac tacimeig eu age qee waadecnu odi ageca hogina. Euqa wawaga dunuhna age qa cus olohonogaca odi nijia, age me qee bahic odadoqagan. Eunu ageca hu qauadowainnu batut feigale.  
\v 16 Age agena odoc aig qocnana cisadi feigale. Qam aig gagalit na mogi jecnu nijiafo? Dan aig momos na mogi jecnu nijiafo?  
\v 17 Eu odi cehelo gug me eu aig me qona, odocob na gug me qee uqa aig me qee qona.  
\v 18 Cehelo gug me uqa aig me qee qocwe qee, odocob na gug me qee eu uqa cehelo aig me qocwe qee.  
\v 19 Na uqa aig me qee qona eu codocobil toneceb cedimeig jana manegina.  
\v 20 Eu odiwe age uhulec je hahun madec dana agena odoc aig qocna cisadi feigale,” aden.   
\p
\v 21 “Dana cajaca age ija ‘Tibud, Tibud,’ tegina eu cunug sao cul jobon dunuh qee lowain. Euqa Mei sao jobon bilia eu madena eu toodu odogina age himec loqagan.  
\v 22 Deel cit qoc euna mati odi matoqagan, ‘Tibud, Tibud, ege hina ijainna je hahun madeginawe odi qee madolomfo? Ege hina ijain hewi buga me qee eundec qee ititacadolomfo? Ege hina ijainna kobolkobol qee odolomfo?’ toqagan.  
\v 23 Odi matecebil ija maadigen, ‘Ija age, age ijana eu qee feciadelem. Age qisol mec kobol odogina cuculti beleiga,’ adigen,” aden.   
\s1 Jo cehecnu kobol lecis nijia  
\r (Luk 6.47-49)  
\p
\v 24 Jisas je haun maaden, “Eunu oso, ijana je dah mimei eu toodu odona, eu dana cisdoc silecca cinigwe. Dana eu uqa uqana jo maha gagadic meencana cehen.  
\v 25 Odocob wa ben neceb wa cue ha humei jona leceb gugula ha hu jo eu heweceb qa jo eu uqana nah maha gagadicna cehen tawennu jo qee cabatel.  
\v 26 Osoqa uqa ijana je dah mimei eu toodu qee odona eu uqa dana gad oso odi, uqa uqana jo wa gon esicna cehen.  
\v 27 Odocob wa ben neceb wa cue humei jona leceb gugula ha hu jo heweceb jo eu cabaten. Odimei jo cabati nui me qee bahic muden,” aden.  
\v 28-29 Jisas uqa Juda agena loo je iwaladec dana oso cunug maadeinwe odi qee maadel qa uqa je Tibud gagadic odocca iwalaadi maaden. Eunu uqa je eu maadi mamaden dana cajaca age wawaga cacaden bilein, uqana iwaladec je eu wawaga qon.   
\c 8  
\s1 Jisas dana oso lepraca me muden  
\r (Mak 1.40-44; Luk 5.12-14)  
\p
\v 1 Jisas uqa aluh culimei toni nuen. Toni nunuen dana cajaca am ben bahic toodu belein.\f + \fr 8.1 \ft Age je eu Matju 5.2na nijia eu feiga.\f*  
\v 2 Jisas nunuen hag dana oso deweg lepraca uqa Jisas fimei uqa limei Jisas olana gob cecehi Jisasnu cuha fefei cesusdu madon, “O Tibud, hina ija me mitiga hecebfi hina me mitecem ijana hag culteceb ija Anut amegna cataniec bilecnu ihoc,” don.\f + \fr 8.2 \ft Juda agena loo je oso nijen eu odi. Dana osofo, caja osofo uqa lepra hagcafo, hag eundec osocafo bilecebfi uqa Anut amegna gegehinca bilen ec maden. Odocob eu uqa uqana hag qee men ec cisdon saen euna uqa ihanec dana fecidocnu nuen. Odocob ihanec dana uqa danafo, cajafo hagca qee eu fecebfi uqa danafo, cajafo eu qila uqa Anut amegna cataniec bilina ec maden. Age Wok Pris dac 13-14 feiga.\f*  
\v 3 Odocob Jisas eben huleldumei deweg qududodoi madon, “Ija me mihiga tena. Me maga!” don. Saen eunadih lepra hag eu uqa dewegna culdeceb deweg hul hon.\f + \fr 8.3 \ft Juda agena loo je osoha nijen eu odi, hina ebenna dana lepra hagca deweg qududufeg hinaha Anut amegna gegehinca biligian ec maden. Euqa Jisas uqa dana eu deweg qududon saenna uqa gegehinca qee calel. Uqa dana eu medocob uqana hag qee men. Odimei uqa cataniec calen.\f*  
\v 4 Odocob Jisas cahacdu madon, “Dah maga, ceteh inu oso cain sadudu cobogaun. Euqa li nawel tawec ihanec dana eu hina dewen ihacdocom maleldugian. Odimeg Moses loo je wele maden eu toodumeg hina qila me biliga dana cajaca cunug ihacadecnu Anut ihandogale,” don.   
\s1 Jisas uqa Rom agena han ilo dana 100 cofadec oso uqana cabi dana me muden  
\r (Luk 7.1-10)  
\p
\v 5 Jisas uqa Kapaneam jobon dunuh lelen Rom agena han ilo dana 100 cofadec oso ono uqaca hu ninidudu madon,  
\v 6 “O Tibud, ijana cabi dana ijana jona hag nijia. Uqa laleg men deweg geh dain dona,” don.  
\v 7 Odocob Jisas uqa jejeg hewi madon, “Ija hinaca belimeu me mudihigen,” don.\f + \fr 8.7 \ft Juda dana age Juda dana qee eundec osona jona lifeig age Anut amegna gegehinca caloqagan ec cisdoin. Eunu age agena jona lecnu qee gale adena. Age Aposel 10.28 feiga. Euqa Jisas uqa eunu qee cisdol. Uqa Rom dana uqana jona ligian ec maden.\f*  
\v 8-9 Euqa Rom agena han ilo dana 100 cofadec uqa madon, “O Tibud, hina ijana jo dunuh lecnu eu ija dana me bahic ihoc qee. Faga, ijaha ijadodoc han dana ilo oso bisalu biligina. Odocob ijaha han dana leih ija bisalu bilegina. Ija oso nuuga ecemin nuina. Ija oso hoga ecemin hona. Odocob ija ijana cabi bega meh dana odi odoga ecemin uqa coni toodu odona. Eunu hina je osol madecem ijana cabi dana hag medugian,” don.  
\v 10 Jisas uqa Rom agena han ilo dana 100 cofadec je eu madeceb dah mimei tumatumai toodoin eundec maaden, “Ija mele maadigina, ija waug meleec uqana bilina cinigwe Isrel gemona oso qee gulucdolom!” aden.   
\p
\v 11 “Ija age maadigina, cam tobi becnadecca cam toni nocnadec ha mati hoqagan. Age Ebrahamca, Aisakca, Jekobca gami sao cul jobon ono sab jecnu biluqagan.  
\v 12 Age odi bibilegin Isrel dana cajaca Anut uqa age sao cul jobon bilecnu nesili ehaden eundecqa Anut ititacadeceb jobon hahagum limeig tu gagatuccana biluqagan. Ono dana age qada qaqaji maimaga kicodudu biluqagan,” aden.   
\p
\v 13 Odimei uqa Rom agena han ilo dana 100 cofadec madon, “Wawin meleec eu toodu odihiale. Hina gad nuuga,” don. Madodon euna bahic Rom agena han ilo dana 100 cofadec uqana cabi dana hag medon.   
\s1 Jisas uqa Pita momoig me muden  
\r (Mak 1.29-31; Luk 4.38-39)  
\p
\v 14 Odocob Jisas uqa Pitana jona limei uqa Pita momoig hag deweg daincaca hulec ninijen fen.  
\v 15 Odimei uqa hagca caja eu eben qududocob uqana hag culden. Odocob uqa cajimei sab jec saciadumei Jisas cewel uten.   
\s1 Jisas uqa dana cajaca mati bahic me maden  
\r (Mak 1.32-34; Luk 4.40-41)  
\p
\v 16 Odocob wesu meceb dana age cotogail mati dewenega buga me qee hewadein eundec cedadecebil Jisasca ahoin. Odocob Jisas uqa buga me qee je maadeceb dana deweneganadec cali hu belein. Odimei dana cajaca cunug age hagca me maden.  
\v 17 Uqa je hahun madec dana, Aisaia, uqana jaqec je ihoc ligiannu odi odon. Jaqec je eu wele odi maden,  
\q1 “Uqa egena hag filfil cedi gahidu nuen,” en. \rq (Aisaia 53.4)\rq*   
\s1 Jisas uqa uqa toodocnu kobol eunu maden  
\r (Luk 9.57-60)  
\p
\v 18 Odocob Jisas uqa dana cajaca am ben bahic talildu tatawegin fimei uqana malogom maaden, “Ege wa gad cagoc cool ono isec beleqan,” aden.  
\v 19 Odocob loo je iwaladec dana oso Jisasca humei madon, “Iwalgec, hina anaana nunuem ija toohigen,” don.  
\v 20 Odocob Jisas jejeg hewi madon, “Qa cus agena helona nijegina, odocob man fululec agena teicna nijegina. Euqa Dana Melah uqa us nijec cudunca qee,” don.\f + \fr 8.20 \ft Jisas uqadodocnu uqa Dana Melah en. Dana Melah eu Mesaia ijan oso. Eunu Jisas uqa dana Anut uqana dana caja cahahaadecnu wele nesili ehuden eu ija ec maden.\f*  
\v 21 Odocob malogom oso uqa Jisas madon, “O Tibud, cultecem ija casac ceseli nuimig mei heel cisigen,” don.  
\v 22 Odocob Jisas jejeg hewi madon, “Cal mec dana culadecem cal mec eundec agena heel ciseigale. Hinaqa ija tootaga,” don.   
\s1 Jisas uqa gugula macasca maaleceb manin tilien  
\r (Mak 4.36-41; Luk 8.22-25)  
\p
\v 23 Jisas uqa wag osona tobocob uqana malogom toodu toboin.  
\v 24 Age nunuegin ququlubadecwe gugula ben neceb macas\f + \fr 8.24 \ft Macas eu Galili wa gad cagoc.\f* me qee meceb caji qahi wag dunuh qelen. Euqa Jisas uqa us nijen.  
\v 25 Odocob malogom age li Jisas tulidudu madoin, “Tibud, ege fadalecnu odoqona. Cahahagagale!” doin.  
\v 26 Odocobil uqa maaden, “Oe age wawaga meleec meca qee. Eetanu cucuiegina?” aden. Odimei uqa caji gugula macasca cahacaali maaleceb manin tilien.  
\v 27 Dana age eu oodon fimeig tumatumai madein, “Uqa cel dana fufuca macas qahecca uqa co toodu odosina?” ein.   
\s1 Jisas uqa dana lecis alena buga me qee ititacaden  
\r (Mak 5.1-17; Luk 8.26-37)  
\p
\v 28 Odocob age nui Gadara agena hatuna calein, eu Galili wa oc naha isec. Odocob dana lecis buga me qee hewalein eu ale qalqal hatinnadec cajimesi Jisas gulucdosin. Ale cus bahic. Eunu dana age jic euna nuecwe qee.  
\v 29 Odocob ale jejenela suli u madosin, “O Anut Melah, hina ege eeta odigegan? Saen qee calel hina ege me qee odigecnu hogafo?” dosin.  
\v 30 Aria, ho am ben oso ono isec sab jiji coboin.  
\v 31 Odocob buga me qee age Jisas ninidudu madoin, “Hina ititacgifeg ho am euna sulgecem age dewenegana leqan,” doin.   
\p
\v 32 Odocobil Jisas maaden, “Beleiga,” aden. Odocob age dana lecis cuculaleig ho dewenegana lein. Odocobil ho cunugca aluh qeihqeih guguli nu Galili wa gad cagoc dunuh gotoimeig cunugca odi wa jimeig cal mein.   
\p
\v 33 Odocobil dana ho cofadoloig eu age fimeig busali belein. Age taun ben limeig ceteh cunug calennu dana cajaca maadein. Age ceteh dana lecis buga me qee hewalein aleca calen eunu saadein.  
\v 34 Odocob dana cajaca cunug age taun euna bilein eu age limeig Jisas gulucdoin. Odimeig age Jisas fimeig dana Gadara agena hatunadec cunug Jisas cuculadi nuigiannu ninidoin.   
\c 9  
\s1 Jisas uqa dana laleg mec oso me muden  
\r (Mak 2.1-12; Luk 5.17-26)  
\p
\v 1 Jisas uqa wagna tobimei wa gad cagoc leti hagen naha isec nuen. Odimei uqa uqana jobon calen.\f + \fr 9.1 \ft Saen euna Jisas uqana cudun eu Kapaneam. Age Matju 4.13 feiga.\f*  
\v 2 Odocob dana leih age dana laleg hagca oso gabagabna ninijen Jisasca hehewi ehudi ahoin. Saen Jisas agena wawaga meleec eu ben bahic fimei dana laleg eu madon, “Melami, hinana silail cagasihiga qee meia eunu wawin toogdoiale,” don.   
\p
\v 3 Odocob loo je iwaladec dana leih age togodudu madein, “Dana eu uqa Anut cewudec je madeia,” ein.   
\p
\v 4 Euqa Jisas uqa agena cisdoc dumei maaden, “Age wawagana cisdoc qisol je eetanu madegina?  
\v 5 Cel je madec cacanigca qee ija madigen? Ija madigen, ‘Hinana silail cagasihiga qee meia,’ ecfo, qee ‘Cajimeg coboga,’ ec madigenfo?  
\v 6 Euqa Dana Melah mahana silail cagasiadecnu gagadic odoc ebenna nijia eu doqagannu ihacadigen,” aden. Odimei uqa dana laleg hagca madon, “Cajimeg hinana gabagab eu qahimeg hewi hinana jobon nuuga,” don.  
\v 7 Odocob dana eu cajimei uqana jobon nuen.  
\v 8 Odocob dana ono cegulein age odi oodon fimeig cucuiein. Odimeig Anut uqa gagadic odoc eundec dana aden eu binan sulein.   
\s1 Jisas uqa Matju utadocob toodon  
\r (Mak 2.13-17; Luk 5.27-32)  
\p
\v 9 Jisas uqa jobon eu culimei uqa cali li dana oso, ijan Matju, uqa takis cedec jona bibilen fen. Fimei madon, “Tootaga,” don. Odocob uqa cajimei Jisas toodu nuen.   
\p
\v 10 Odocob hibna Jisas uqa jo euna sab jejei bilen.\f + \fr 9.10 \ft Dana mati age jo eu Matjuna jo ec cisdogina, euqa leih age jo eu Jisasna jo ec cisdogina.\f* Bibilen takis cedec danaca, silail danaca mati hocobil age Jisas uqana malogomca gami sab jein.  
\v 11 Odocob Farisi age Jisas odi oodon fimeig Jisasna malogom maadein, “Eetanu agena iwaladec uqa takis cedecca silail danaca eundec gami sab jegina?” adein.\f + \fr 9.11 \ft Farisi age agena loo je mati toodu odoin. Eunu age cel dana uqa loo je eu qee toodu odona dana eu uqa silail mena, odimeig uqa Anut amegna gegehinca bilina ec cisdoin. Odocob Juda dana qee eundec age dana eu gami bilecebilfi euha dana eu gegehin mudina ec cisdoin. Takis cedec dana age gaid Rom dana gami bilein. Rom age Juda dana qee eundec, age haiden dana. Eunu Farisi age Juda dana age Rom agena takis cedein eu dana gegehinca bahic Anut amegna bilein ec cisdoin.\f*   
\p
\v 12 Euqa Jisas uqa je eu dumei maaden, “Hagca qee age hag me madec danaca qee legina. Qeeo. Hagca himec age hag me madec danaca legina.  
\v 13 Ija ititom dana cajaca ‘Age agena silailnu wawaga tului falicdoigale,’ ec utai maadecnu qee holom. Euqa ija silail dana cajaca ‘Age agena silailnu wawaga tului falicdoigale,’ ec utai maadecnu hom. Eunu age je i Anutna jaqec je nijia eu uqana gugnu doc eu li oiga. Je eu odi madena:  
\q1 ‘Ija age gauc ihantecnu qee gale tena.  
\q1 Ija age dananu wawaga qocca biluqagannu gale tena,’ ena,” aden. \rq (Hosea 6.6)\rq*   
\s1 Jisas uqa sabnu qagu bilec kobol eunu maden  
\r (Mak 2.18-22; Luk 5.33-39)  
\p
\v 14 Saen euna Jonna malogom age Jisasca humeig sisildoin, “Eetanu egeca Farisica ege gaid esuesu sabnu qagu biluquna qa hinana malogom eu qee sabnu qagu bilegina?” doin.   
\p
\v 15 Odocobil Jisas maaden, “Age dana caja ocobocobecna cegulein bilegina eunu age caja oc dana eu gami bibileig adi qada qajec biluqagan? Euqa saen oso hibna dana leih hu caja oc dana cawaladecebil deel euna age sabnu qagu biluqagan,” aden.   
\p
\v 16 “Odocob oso uqana lotoc hilah giloccanu eu eeldugia bili, uqa lotoc fan haun qee cusec tatacan qee faldona. Eu odi odoubmiqa age lotoc cusecebil fan haun eu nag meceb eu gesacna haun ceseli balahadu bendoub. Wele balahadon eu wooldu qatanoub.  
\v 17 Odiha wain haun jool mecmec ganacna mudec hilahna qee o danegina. Jool mecmec ganacna mudec hilah eu wele galalec eunu odoubmiqa wain eu jool ganacna mudec qatanoub, wain basecdu cusdoub, odocob jool ganacna mudecha qatani cusdoub. Qeeo, age wain haun jool ganacna mudec haunna o danecebil euna lecisca odi me nijuwasan,” aden.\f + \fr 9.17 \ft Juda age mecmec qumeig bilacdumeig ganacna gisimeig jool mudoloig. Age jool ganacna mudec euna wain o danoloig. Age wain haun jool mecmec ganacna mudec haun o danecebil saen cecelac nijimei wain tinca me bahic caloloi. Saen euna wain eu jool ganacna mudec didon. Odocob jool ganacna mudec eu wele galalenfi eu qatani qee men. Aria, je i galolo je. Lotoc hilahca jool mecmec ganacna mudecca eu loo je iwaladec Farisica agena iwaladec je. Wain haun eu Jisas uqana iwaladec je.\f*   
\s1 Juda agena ilo dana uqa Jisas cesuldocnu madon  
\r (Mak 5.22-24; Luk 8.41-42)  
\p
\v 18 Jisas uqa odi maaaden Juda agena ilo dana oso uqa humei Jisas amegna gob cecehi uqanu cuha fimei madon, “Ija ateni qila cal meia. Euqa humeg eben dewegna mudecem uqa cebac biligian,” don.  
\v 19 Odocob Jisas cajeceb uqa uqana malogomca age ilo dana eu toodu belein.   
\s1 Hagca caja oso Jisasna lotoc heweceb me muden  
\r (Mak 5.25-34; Luk 8.43-48)  
\p
\v 20-21 Jisas cocobi lelen caja oso ono cabi gel 12-pela golac nenen odi hewi coboloi eu uqa dana cajaca cegulec gemo limei Jisas hibilohu isec ben. Uqadodoc maden, “Ija uqana lotoc dih qududocominfi ija hag metigian,” en. Odimei Jisasna lotoc bibig qududon.  
\v 22 Odocob Jisas waldumei caja eu fimei madon, “Ateni, hinana wawin meleec eu me mihia eunu wawin toogdoiale,” don. Mahuc bahic caja eu hag medon.   
\s1 Jisas uqa Juda agena ilo dana ateg tulidocob ceseli cajen  
\r (Mak 5.35-43; Luk 8.49-56)  
\p
\v 23 Odocob Jisas uqa Juda agena ilo dana uqana jona calimei uqa dana cololo fuldodogin dana cajaca age dahoc fafalegin eu fimei  
\v 24 maaden, “Mel aid i qee cal mel. Uqa us himec nijina! Isa qoiga!” aden. Odocob age asaldoin.  
\v 25 Euqa age dana cajaca ititacadecebil maha gemo lecebil Jisas uqa jo dunuh len. Odimei uqa mel aid eben u heweceb caji bilen.  
\v 26 Odocob Jisas odonnu je hatu naha isec eu cunug ihoc leceb dana cajaca doin.   
\s1 Jisas uqa dana lecis amala galuc mec me malen  
\p
\v 27 Jisas uqa cudun eu culimei nunuen dana lecis amala galuc mec ale Jisas toodu utadudu madosin, “O Dewid Melah, elenu walol heiale,” dosin.\f + \fr 9.27 \ft Juda dana cajaca age dana Anut uqana dana caja cahahaadecnu wele nesili ehuden eu uqa Dewidna sihuldec caligian ec doin. Dana lecis amala galuc mec i ale Jisas uqa dana i Isrel age sumudeinnu wawala meleen, eunu ale madosin, “O Dewid Melah,” dosin.\f*  
\v 28 Jisas uqa jona leceb dana lecis amala galuc mec ale uqaca lecebil sisilali maalen, “Ale ija odi odalecnu ihoc wawala meleenafo?” alen. Odocob madosin, “Ese Tibud, ele eunu wawile meleena,” dosin.  
\v 29 Odocobil Jisas ebenna amala qududumei maalen, “Wawala meleecna odaleia,” alen.  
\v 30 Odi maaleceb ale amala fogo docob ceteh fesin. Odocob Jisas uqa cahacali maalen, “Batut fesiale, dana oso ija odaliga eu cain sadocobil doiaun,” alen.  
\v 31 Euqa dana lecis ale hatuhatu cunug cocobi Jisas odalen je eu dana cunug saadecebil doin.   
\s1 Jisas uqa dana oso co cufa qoc me muden  
\p
\v 32 Dana lecis nunuesin age dana oso ehudi Jisasca hoin. Dana eu buga me qee hewen uqa co cufa qon.  
\v 33 Jisas uqa buga me qee eu ititacdocob dana eu cuculdi nueceb dana eu je maden. Dana cajaca age eu fimeig tumatumaimeig madein, “Uqa odona odoc odiwe dana wele Isrel gemona oso qee odocob folom,” ein.  
\v 34 Euqa Farisi age madein, “Uqa buga me qee agena ben uqana gagadic odocna buga me qee ititacadena,” ein.   
\s1 Jisas uqa dana cajacanu waug qon  
\p
\v 35 Jisas uqa jobon nagnag benbenca cocobi Juda agena cuha jona limei dana cajaca iwaladen. Uqa sao cul jobonnu me je qasali maadimei agena hag filfil aqecca dewenega laleg mein eundecca eu me maden.  
\v 36 Uqa dana cajaca meciaden. Age jaen aqecca eu oso cesuladecca qee bilein. Age sipsip cofadecca qee cobogina odiwe bilein. Eunu agenu waug qon.  
\v 37 Odimei uqana malogom maaden, “Cabina ceteh mati bahic cedi haudocnu wal men nijia, euqa cabi dana mati ceteteh cedi jo bisna mecnuca qee bilegina.  
\v 38 Eunu sab cedi haudocnu gug uqa cabi dana suladeceb sab haudocnu inondoigale,” aden.   
\c 10  
\s1 Jisas uqana aposel 12-pela age ijanaga  
\r (Mak 3.13-19; Luk 6.12-16)  
\p
\v 1 Odimei Jisas uqa uqana malogom 12-pela utaadeceb uqaca hocobil uqa buga me qee dana deweneganadec ititacadecnuca, dana hag filfil aqecca dewenega laleg mein eundecca cunug me madecnuca cabi eu ebenegana men.   
\p
\v 2 Uqana aposel\f + \fr 10.2 \ft Aposel uqana gug eu “oso suldon.” Jisas uqa uqana malogom 12-pela ijanaga aposel qumei cabi oso ebenegana men. Cabi eu uqa dana cajaca Jisasnu me je qasali maadecnu suladen. Malogom 12-pela i age aposel bilein. Euqa dana leihha age aposel ein, eu odi Pol Banabasca. Age Aposel 14.14 feiga.\f* 12-pela age ijanaga eu odi. Casac eu Saimon, ageha Pita egina, odocob uqa waliag eu Andru. Oso eu Jems, uqa Sebedi melah, odocob uqa waliag eu Jon.  
\v 3 Odocob Filipca, Batolomjuca, Tomasca. Odocob Matju, uqa takis cedec dana. Odocob Jems, uqa Alfias melah, odocob Tadias.  
\v 4 Odocob Saimon, uqa Selot agena am oso, age Juda dana eu Rom dana Judia hatunadec ititacadecnu egina. Odocob Judas Iskariot, uqa hibna Jisasnu balijimei uqana cad ebenegana muden.   
\s1 Jisas uqa aposel 12-pela agena cabi aden  
\r (Mak 6.7-13; Luk 9.1-5)  
\p
\v 5 Jisas uqa dana 12-pela eu suladi maaden,\f + \fr 10.5 \ft Je i je cecelac 5-pela Jisas maaden buk Matjuna nijen eundec lecisdoc. Je cecelac i 10.5-42na nijen. Eu Jisasna malogom age dana cajaca Anutna me je maadoqagan saen euna ceteh eu ageca caligian eunu madena.\f* “Juda dana qee eundec agena hatuna cain lowain. Sameria agena jobon oso cain lowain.  
\v 6 Qee. Age Isrel sihuldec sipsipwe dad mi cobogina eundecca leigale.  
\v 7 Age eu cocobi me je qasali maadeiga, ‘Sao cul jobon cemenega hona,’ adeiga.  
\v 8 Hag nijegina eu me madeiga. Cal mein eundec tuliadeiga. Lepra hewadec eu eeladeiga. Buga me qee dana deweneganadec ititacadeiga. Age eu odocnu gagadic odoc i qee fajelein, age gauc loo adem. Eunu ageha gauc loo adeigale,” aden.   
\p
\v 9 “Age gold qaigca, silwa qaigca, kopa qaigca agena oologamna u tacecnu cain walowain.  
\v 10 Dana cabi ona eu uqana cabinu sab jec wadac gulucdocnu ihoc bilina. Eunu jic cobocnu ceteh oso cain hewowain. Age badom cain hewi cobowain. Lotoc lecisca cain hewi belowain, osol himec taceiga. Jaimaga tacec eu cain tacowain. Jic coboc kom ha cain hewi cobowain,” aden.   
\p
\v 11 “Age jobon osoosona limeig age dana oso hutan meca bilinafo eunu sisiladi feigale. Odocob oso hutan me bilecebfi age uqana jona bibileig li jobon eu culimeig beleiga.  
\v 12 Age jo euna leleig dana cajaca age jo euna bilec eu maadoqagan, ‘Anut eeladeiale,’ adoqagan.  
\v 13 Aria, jo euna bilec eundec dana mefi eu agena eeladec je dewenega fagdugian. Euqa jo euna bilec eundec eeladec je eu ocnu ihoc qeefi agena eeladec eu ceseli ageca hugian.  
\v 14 Odocob dana oso age oiadecnu agena je ha dah mecnu culecebilfi age jo eufo, jobon eufo cuculadi beloqaga bili comis jaimagana fagdon eu qoidu heleiga.\f + \fr 10.14 \ft Malogom age dana cajaca jobon euna bilein age Anut geladigiannu ulauladecnu odi odoin. Age Mak 6.11ca, Aposel 13.51ca euha feiga.\f*  
\v 15 Ija mele maadigina, Gesiladec Deel Benna jobon eu ameg me qee bahic ugian. Dana cajaca Sodom Gomora bilein eu ageha Gesiladec Deel Benna ameg me qee oqagan. Euqa jobon eu agena je hibemdogina jobon eu agena ameg me qee eu Sodom Gomora agena ameg me qee wooldugian,” aden.   
\s1 Culumen ben filfil malogomca caligian  
\r (Mak 13.9-13; Luk 21.12-17)  
\p
\v 16 Jisas je haun maaden, “Feiga, ija age suladigina odi sipsip age qa cus gemo leginawe suladigina. Eunu age man sononec doc silecca odi cisdudu coboginawe coboigale. Euqa age cuhudid qauecca qee odi coboigale,” aden.   
\p
\v 17 “Age dananu dah qut coboigale. Age gesiladecnu cegulec amegna ehi li madimeig agena cuha jona ha qisaadoqagan.  
\v 18 Ageha ija cilehtecnu cisdumeig gabman ilo kingca amagana ehi li madecebil tawoqagan. Odimeig age ijana me je gabman ilo kingca Juda dana qee eundecca maadoqagan. Saen euna age dana amagana wawaga meleec age eu doqagan eunu qasali madoqagan.  
\v 19 Age age gesiladecnu cegulec amegna madecebil saen euna Anut je adeceb je eu tutuc madoqagan. Eunu age casac cel je cel je madigen eu cain saciadowain.  
\v 20 Ge, agedodoc je qee madowain. Memegana Kis eu age uqa co tawecebil je madigian,” aden.   
\p
\v 21 “Saen euna dana waliagwaliagnu balijimeig age walinigail aqecebil cal moqagannu gesilec jona madoqagan. Memegail ageha agena melnu balijuqagan. Mel age memegail anagailnu cajimeig age aqoqagannu gesilec jona madoqagan.  
\v 22 Odocob ija ijani hewegina eunu dana cajaca cunug age agenu gemanaga beceb sagagadoqagan. Euqa dana cajaca cunug age ceteh eu cunug wooldudu cit qoc gadacna calegina eu Anut uqa age cahahaadigian.  
\v 23 Ija mele maadigina, age jobon oso cuculi busali osona li bilec odi oodi Isrel agena jobon cunug qee li hedoc ninijeb Dana Melah ceseli hugian. Eunu dana age jobon oso aqati tootooadecebil busali jobon osona beli bileiga,” aden.   
\p
\v 24 “Malogom uqana iwaldoc wooldoc qee nijel. Odocob cabi danaha uqana dana ben qee wooldona.  
\v 25 Malogom uqa uqana iwaldoc cinigwe bilina eu ihoc. Cabi danaha uqa uqana dana ben cinigwe bilina eu ihoc. Age jo gug jajabi Bielsebul doin\f + \fr 10.25 \ft Bielsebul eu Seten ijan oso. Age Matju 12.22-28 feiga.\f* eunu ege doqona, uqana jo eundec ha odi jajabadi je me qee bahic maadoqagan,” aden.   
\s1 Dana age Anutnu dih cucuiuqagan  
\r (Luk 12.2-7)  
\p
\v 26 Jisas je haun maaden, “Ceteh cunug jahuldoc nijina eu isi camasac migian. Odocob ceteh cunug jahunec nijina eu isi cunug doqagan. Eunu age dananu cain cucuiuwain.  
\v 27 Ija tuna jahuni je maadigina eu cahinegna dana amagana madeigale. Ija age jahna maadecemin dah megina eu jo ohisna tatawi dana cajaca cunug qasali maadeigale.  
\v 28 Dana age dewenega cal mecnu qoc fegina qa dolonoga cal mecnu qoc eu qee fegina eundecnu cain cucuiuwain. Qeeo. Age Anutnu dih cucuiuqagan. Uqa dewenega dolonogaca eu oloqanih jana fadaligiannu ihoc nijina,” aden.   
\p
\v 29 “Feiga, man fululec nag eundec lecis toea osolna idadogina. Man fululec eu age oso age Memega qee madec mahana qee tonena.  
\v 30 Age gosiniga ilomogana nijia euqa cunug Anut wele sanijen bilia.  
\v 31 Eunu cain cucuiuwain. Agena fajec eu man fululec nag mati agena fajec wooldoc nijia,” aden.   
\s1 Ege Jisasna malogom ec madecnu cain majanaga adeiaun  
\r (Luk 12.8-9)  
\p
\v 32 Jisas je haun maaden, “Eunu oso uqa dana amagana tatawi ijanu madi madena, ‘Ija Jisas uqana malogom,’ ena eu uqanu ijaha Mei sao jobon bilia amegna madigen, ‘Eu ijana,’ igen.  
\v 33 Osoqa uqa dana amagana tatawi ijanu qee sasac qu madena, ‘Ija Jisas uqana malogom qee,’ ena eu uqanu ijaha Mei sao jobon bilina amegna madigen, ‘Dana i ijana qee,’ igen!” aden.   
\s1 Jisasna malogom age Jisas nalug moqagan  
\r (Luk 12.51-53; 14.26-27)  
\p
\v 34 Jisas je haun maaden, “Age wawagana cain madowain, Jisas uqa mahana malol bilec igecnu hon owain. Ija malol bilec mahana ahu mecnu qee holom. Ija han cadec ehi nem.  
\v 35 Ge, ija dana cajaca qatanadecemin  
\q1 ‘mel oso memegna cad ibuldugian,  
\q1 odocob mel aid uqa anagna cad ibuldugian,  
\q1 odocob huhighuhigca ale cad biluwasan’  
\m eunu hom.   
\q1
\v 36 ‘Odocob dana uqana jona bilegina eundec  
\q2 age wawaga filfilca uqana cadca biluqagan,’” aden. \rq (Maika 7.6)\rq*   
\p
\v 37 “Oso uqa memeg anagcanu ija wooltiti nalunula menafi eu ijana bilecnu ihocca qee. Oso uqa melahnuca ategnuca ija wooltiti nalug menafi eu ijana bilecnu ihocca qee.  
\v 38 Oso uqana na babalec gahidu ija tooti cobocnu culinafi eu uqa ijana bilecnu ihocca qee.\f + \fr 10.38 \ft Saen euna Rom age kobol me qee oso odoloig. Age agena cad qocnu gale adecebfi age na babalecna tuitu qumeig caqusecebil caculimeig cal moloig. Age agena bega meh cabi dana age cabi me qee odoinca, dana age dana oso qocobil cal menca, heje oc danaca, dana eundecca ageha na babalecna tuitu qoin. Odimeig age dana oso qocnu gale aden eu odudecebil uqa uqana na babalec gahidudu cocobi li cudun age uqana na babalec cehein euna calen. Aria, Jisas uqa dana cajaca age uqana malogom bahic biluqagannu gale adena eu age cal mecnu saciadoin biluqagan. Uqa ceteh i iwaladecnu galolo je i maden.\f*  
\v 39 Oso uqa uqana cebac bilec hewigia odona eu uqa uqana cebac bilec felacudigian. Oso uqa ijana bilina eunu uqana cebac bilec felacudecebfi eu uqana cebac bilec ugian,” aden.   
\s1 Dana age Kraisna sihul cesuladegina eundec age ameg me oqagan  
\r (Mak 9.41)  
\p
\v 40 Jisas je haun maaden, “Dana oso uqa age ehadi uqaca bilecnu cudun culiadena eu uqa bilec cudun ija culitena. Oso uqa ija bilec cudun culitena eu Anut sulten eu bilec cudun culitona.  
\v 41 Oso uqa je hahun madec dana oso uqa je hahun madec dana bilina eunu bilec cudun culitocobfi eu uqa je hahun madec dana ameg me oc eu ugian. Oso uqa dana ititom oso uqa dana ititom bilina eunu bilec cudun culitocobfi eu uqa dana ititom ameg me oc ha ugian.  
\v 42 Oso uqa mel sim eundec oso uqa ijana malogom bilina eunu wa daec oso dih wetidocob jecebfi ija mele maadigina, uqa ameg me oc eu culecwe qee,” aden.   
\c 11  
\s1 Wa Joadec Jon uqa uqana malogom Jisasca suladen  
\r (Luk 7.18-35)  
\p
\v 1 Jisas uqa malogom 12-pela je eu cunug maadi hedumei uqa caji nunui uqa jobonjobon dana cajaca iwalaadi Anutna me je maaden.   
\p
\v 2 Wa Joadec Jon uqa gihacdoc jona bilen. Odimei uqa Krais odonnu je dah mimei uqana malogom suladeceb Jisasca lein. Uqa uqana malogom maaden,  
\v 3 “Age Jisasca limeig sisildoiga, ‘Hina i himec hocnu Anut sulhenfo, qee ege osonu amige meqanfo?’ doiga,” aden. Odimei suladeceb lein.   
\p
\v 4 Lecebil Jisas uqa Jonna sos jejenega hewi maaden, “Ceseli belimeig ceteh feginaca je dah meginaca Jon madoiga.  
\v 5 Dana amaga galuc mec haun feciegina. Dana laleg mec haun cobogina. Dana lepraca dewenega cataniecca calena. Dana dahiniga cufa qoc haun je dah megina. Dana cal mec haun cebac megina. Oso uqa sawen dana me je qasali maadeceb age dah megina.\f + \fr 11.5 \ft Wele je hahun madec dana, Aisaia, uqa Anut uqa Isrel dana cajaca cesuladigian saenna ceteh i edec caligian ec maden.\f*  
\v 6 In oso uqa ijanu waug meleec qee felacudel eu Anut uqa eeldugian,” aden.   
\p
\v 7 Odocob Jon uqana malogom age ceseli belecebil Jisas uqa dana cegulec ben eu Jonnu maaden, “Age Jon wadauna\f + \fr 11.7 \ft Age je Matju 3.1na nijia eu feiga.\f* uqaca belein saen euna eeta foqagannu belein? Age balac fufu heweceb gulaeeb foqagannu beleinfo?  
\v 8 Age eetanu belein? Dana lotoc me bahicca taqen foqagannu beleinfo? Feiga, dana age lotoc me bahic tacegina age kingna jona bilegina.  
\v 9 Mateiga, age eetanu belein? Age Anutna je hahun madec dana oso foqagannu beleinfo? Ija mele maadigina, uqa je hahun madec dana qa uqa je hahun madec dana cunug wooladena.  
\v 10 Jon uqanu Anutna jaqec je oso odi madena:  
\q1 ‘Anut madena, “Feiga, ijana sos suldocomin aqunihi nuigian.  
\q1 Uqa hinana jic saciadugian,” ena,’  
\q2 Anutna jaqec je odi madena. \rq (Malakai 3.1)\rq*   
\m
\v 11 Ija mele maadigina, Wa Joadec Jon uqa dana mahana cunug wooladena. Euqa dana oso uqa nag bahic sao cul jobon bilina eu uqa Jon wooldona,” aden.   
\p
\v 12 “Wa Joadec Jon me je qasali madec saennadec leceb qila dana hihibanagaca age sao cul jobon ocnu gagadic megina.\f + \fr 11.12 \ft Grik je i uqana gug eu camasac bahic qee. Falicdoc je fil osoha nijia eu odi: Wa Joadec Jon me je qasali madec saennadec leceb qila sao cul jobon eu hihibanca hona. \f* Odimeig dana hihibanagaca age euna sundocobdocob limeig gagadic megina.  
\v 13 Ge, Mosesna loo jeca je hahun madec dana agena jeca bibili hu Jon uqana saenna Anutna je himec mamadi bilen.  
\v 14 Age je eu ocnu gale adecebfi dah meiga. Anutna jaqec je madi, je hahun madec dana Ilaija uqa hugian, ena. Je eu Jonnu maden.  
\v 15 Oso uqa dahigca je eu dah meiale,” aden.   
\p
\v 16 “Euqa dana cajaca qila bilegina eu age adec? Age eetanu ihocihoc madigen? Age i ediwe. Age mel simsim maha gemona ududu bibileig cotogail utai maadegina:   
\q1
\v 17 ‘Ege agenu cololo fuldoqonaqa  
\q2 age qee due dueelein.  
\q1 Ege cal mec due siluqunaqa  
\q2 age qada qee qajelein,’ adegina.   
\m
\v 18 Ge, Jon uqa sabca wainca qee jejen hol qa age madein, ‘Uqa buga me qee hewen bilia!’ ein.  
\v 19 Odocob Dana Melah uqa sabca wainca jejen hon qa age madein, ‘Dana i feiga! Uqa sab muhna jec dana. Uqa wain jeceb dalul qoc dana. Uqa takis cedec danaca silail danaca agena danah bilegina,’ age odi madein. Euqa dana age Anutna doc silecca toodu odogina eu age tutuc odogina eunu dana cajaca cunug age fimeig madein, ‘Anutna doc silecca eu ititom,’ ein,” aden.   
\s1 Dana cajaca age tului qee falicdoloin eu walocca  
\r (Luk 10.13-15)  
\p
\v 20 Jobon leih euna Jisas uqa kobolkobol odoc mati odon qa dana cajaca age wawaga tului qee falicdol. Eunu saen euna Jisas uqa dana cajaca eu galac madimei ulauladec je maaden.  
\v 21 Uqa maaden, “O Korasin, O Betsaida, odoc kobolkobolca agena calen eu odi Taia Saidonca caloubmi wele bahic dana ono age lotoc me qee tacimeig comisna bibili agedodoc dewenegana weti heheli biloub. Age agena silail hibemdogina ihacadecnu eu odi odoub! Eunu Korasin, age walocca! Betsaida ha, age walocca!  
\v 22 Ijaqa maadigina, Gesiladec Deel Benna Anut uqa Korasin Betsaidaca ameg me qee wadacadigian eu Taia Saidonca ameg me qee wadacadigian eu wooldoc hugian.  
\v 23 Odocob Kapaneam agenu! Age Anut uqa sao jobon ohis ehadi tigian ec cisdoginafo? Qeeo, odoc kobolkobolca ija Kapaneam ono odom eu oso uqa Sodom ono odoubmiqa Sodom qila deel ina biloub. Eunu Anut uqa heladeceb oloqanihna noqagan!  
\v 24 Euqa ija maadigina, Gesiladec Deel Benna Anut uqa Kapaneam ameg me qee wadacadigian eu Sodom ameg me qee wadacadigian eu wooldoc hugian,” aden.   
\s1 Age ijaca humeig jaen mudeiga  
\r (Luk 10.21-22)  
\p
\v 25 Saen euna Jisas je odi maden, “Mei, saoca mahaca alena Tibud, hina ceteh eu dana cisdoc silecca docca eundecnu jahunem. Dana cajaca age mel sim bileginawe bilegina eundec amagana je eu camas mem. Eunu ija hina hetaga higina.  
\v 26 Mele, Mei, hina hinana gale hec me bahic toodu odi odom.  
\v 27 Mei uqa ceteteh cunug ija ebenina men. Dana oso uqa Anut Melah qee du cuhadona. Euqa Memige Anut himec Anut Melahnu du cuhadona. Dana osoha Memige Anut qee du cuhadona. Anut Melah uqa himec Memige Anutnu du cuhadona. Odocob Anut Melah eu uqana gale docna dana oso Memige Anutna gug ihacdona euha Memige Anut du cuhadugian,” en.   
\p
\v 28 “Age cunug cabi gisi cagocca culumen ben gahidu cobocca age ijaca hoigale, age jaen mudec oqagan.  
\v 29-30 Feiga, ijana sol eu jocosaigca, ijana sol mec eu hetec. Ija gemani jocosaigca, ija wawi lal qocca bahic. Eunu age ijana cisdoc umeig ijana je bisalu bileigale. Age ijaca gami sol hewi gahidumeb ija ihiconi oigale. Odi oodoig age wawagana jaen mudec gulucdoqagan,” en.   
\c 12  
\s1 Jisas uqa Juda agena cuha deelna cabi ocnu gun mudec kobol eunu maden  
\r (Mak 2.23-28; Luk 6.1-5)  
\p
\v 1 Juda agena cuha deel osona Jisas uqana malogom gami cobimeig wit cabi osoosona gemogemo li beli coboin. Malogom age wen adeceb wit aig wal mec tawen qu u ehi li aig jein.  
\v 2 Oodogin Farisi leih age eu fimeig Jisas madoin, “Faga, hinana malogom age ceteh oso egena cuha deelna egena loo je cahacgena eu odogina,” doin.\f + \fr 12.2 \ft Juda agena loo je eu agena cuha deelna cain cabi owain ec maden. Cabi ocnu loo je osoha nijen eu odi maden, “Ageha sab wal meceb cuha deelna cain cabi owain,” en (Kisim Bek 34.21. Eunu Farisi age malogom age loo je tefacdogina ec madein.\f*  
\v 3 Odocobil Jisas jejenega hewi maaden, “Age Dewid odonnu je oso qee sanijeleinfo? Saen uqaca uqana eundec age gami coboinca age wen ben adeceb  
\v 4 uqa Anutna jo dunuh limei Anutnu ihanec bred oso u jimei uqana dana adeceb jein. Eu odonqa uqaca age uqaca coboin age ihanec bred jecnu Mosesna loo je eu cahacaden. Mosesna loo je madi, bred eu nawel tawec ihanec dana himec eu jecnu cois, ena.  
\v 5 Qeefi, age je osoha Mosesna loo jena nijia eu qee sanijeleinfo? Nawel tawec ihanec dana age tempelna cabi ogina eu age cuha deelna cabi oqagan ec je nijia. Age cuha deelnu loo je tefacdogina qa age Anut amegna qee cahuldogina.  
\v 6 Ija maadigina, ceteh eu tempel wooldona eu ene bilia.  
\v 7 Euqa age je i Anutna jaqec jena nijia:  
\q1 ‘Ija age gauc ihantecnu qee gale tena.  
\q1 Ija age dananu wawaga qocca biluqagannu gale tena,’ ec je nijia \rq (Hosea 6.6)\rq*  
\m eu uqana gug du cuhadoubmi age dana qee cahuldogina eu age silail dana ec qee madoub.  
\v 8 Ge, Dana Melah uqa Tibud, uqa cuha deel uqana ilo bilina,” aden.   
\s1 Juda agena cuha deel osona Jisas dana eben laleg mec me muden  
\r (Mak 3.1-6; Luk 6.6-11)  
\p
\v 9 Jisas uqa cudun eu culimei jobon osona nuimei Juda agena cuha jona len.  
\v 10 Odocob dana oso uqa eben gatoc men eu ono bilen. Dana leih age Jisas dewegna je um qudecnu gale aden eunu age sisildoin, “Egena cuha deelna dana hagca me madecnu loo je eu cois ec madenafo?” doin.  
\v 11 Odocob uqa jejenega hewi maaden, “Age dana oso uqana sipsip maha qahec helona dunuh toneceb cuha deel i edina sipsip eu helonadec didocobil qee cali beiaunfo?  
\v 12 Euqa dana uqana fajec eu sipsip uqana fajec wooldoc bilia. Eunu ege cuha deelna me mudecnu eu cois,” aden.  
\v 13 Odimei uqa dana eben gatoc men eu madon, “Hina eben heli huleldoga,” don. Odocob dana eben heli huleldocob me men. Eu uqa eben oso cinigwe calen.  
\v 14 Euqa Farisi age cuculdi nuimeig Jisas qoqagannu jic wawali je togodoin.\f + \fr 12.14 \ft Farisi age hag meadecnu kobol euha cabi oc ec cisdoin. Odocob agena loo je eu agena cuha deelna cain cabi owain ec maden. Euqa Jisas uqa cuha deelna dana hagca medon. Eunu Farisi age Jisasnu gemanaga beceb uqa qoqagannu jic walein. Age Luk 13.14ca, Jon 5.16-18ca euha feiga.\f*   
\s1 Jisas uqa Anutna cabi dana bahic  
\p
\v 15 Jisas uqa Farisi eeta odudecnu gale aden ec dumei cudun eu cuculi nuen. Dana cajaca mati toodocobil uqa cunug me maden.  
\v 16 Odimei uqa dana cajaca age uqana gug camas mowainnu cahacaden.  
\v 17 Uqa je hahun madec dana, Aisaia, uqana je ihoc ligiannu odi odon. Uqana je wele odi maden:   
\q1
\v 18 “Dana i ijana cabi dana.  
\q2 Ija uqa nesili ehudem.  
\q1 Ija nalug migina.  
\q2 Ija wawi uqanu gale ben dona.  
\q1 Ija ijana Kis uqa mitugen.  
\q2 Uqa Juda dana caja qee eundec ititom kobolnu je qasali maadigian.   
\q1
\v 19 Fee dadanec je qee madeiaun,  
\q2 utai biah anag qee meiaun.  
\q1 Uqa jic cunugna co suli u mamadeb dana cajaca age dah qee mowain.   
\q1
\v 20 Dana cajaca age balac gagadicca qee uqa qahigiannu cinigwe eu uqa cunug qee qaheiaun.  
\q1 Dana cajaca age gowoc qee ileti cuhadona cinigwe uqa qee cafuladeceb qee meiaun.  
\q1 Uqa odocob ititom kobol mele bahic wooladi biligiannu uqa cabi u biligian.   
\q1
\v 21 Juda dana caja qee eundec age uqa ijannu wawaga meleeceb uqa cahahaadigiannu sumudi biluqagan,” en. \rq (Aisaia 42.1-4)\rq*   
\s1 Age Jisas Bielsebulca cabi osina ein  
\r (Mak 3.20-30; Luk 11.14-23; 12.10)  
\p
\v 22 Age dana oso buga me qee hewen eu Jisasca ehudi ahoin. Dana eu ameg galuc men, co ha cufa qon. Jisas uqa dana eu me mudeceb je madecnuca ceteteh fecnuca ihoc len.  
\v 23 Odocob dana cajaca cunug filiciti madein, “Dana i Dewid Melah qeefo?” ein.\f + \fr 12.23 \ft Age je Matju 9.27na nijia eu feiga.\f*  
\v 24 Euqa Farisi age dana odi mamadegin dumeig age Jisasnu madein, “Dana eu uqa Bielsebul, buga me qee agena ben, uqana gagadic odocna dih buga me qee dana deweneganadec ititacadena,” ein.\f + \fr 12.24 \ft Bielsebul eu Seten ijan oso.\f*   
\p
\v 25 Jisas uqa age wawagana mamadegina dumei maaden, “Hatu osolna mam cadecebil qatanec bilecebfi age gaus danoqagan. Jobon oso mam cadecebilfi bilecwe qee. Sihul oso mam cadecebilfi euha age bilecwe qee.  
\v 26 Odocob Seten uqana eundec ititacadoubmi uqana am qatanec biloub, eunu uqana cul adi biloub?  
\v 27 Age ijanu madi, uqa buga me qee Bielsebulna gagadic odocna dana deweneganadec ititacadena, egina, eu melefi agena malogom euha inna gagadic odocna buga me qee dana deweneganadec ititacadegina? Eunu agena malogom agena odoc eu Farisi agena je cahuldoc eunu ihacadigian.  
\v 28 Ijaqa Anutna Kis cesulteceb ija Anutna gagadic odocna buga me qee dana deweneganadec ititacadiginafi Anutna cul ageca wele hoia,” aden.   
\p
\v 29 “Qeefi, in oso dana gagadicca uqana jona li uqana ud cawaldecnu donafo? Oso uqa casac li dana eu eben jaihca libimei uqana ud cawaldecnu dona,” aden.\f + \fr 12.29 \ft Dana gagadicca eu Seten. Dana uqa Setenna ceteteh cawaldena eu Jisas.\f*   
\p
\v 30 “Oso ijana danah qee eu ija cad mitina. Oso ija cesultimei dana cajaca Tibud cemenug qee hauadena eu dana cajaca bilisaadena,” aden.   
\p
\v 31 “Eunu ija maadigina, silail oso cunug Anut lelandoc oso cunugca Anut uqa dana eu agena silail cagasiadigian. Euqa Kis Gun lelandoc eu dana uqana silail cagasitocnu qee nijel.  
\v 32 Odocob dana oso Dana Melahnu je me qee oso madecebfi Anut uqa dana eu uqana silail cagasitugian. Euqa oso Kis Gunnu je me qee madenafi Anut uqa silail eu saen qilaca saen bilec catanecca qee cagasitoiaun,” aden.\f + \fr 12.32 \ft Jisas uqa Kis Gunna gagadic odocna dana me muden. Euqa Farisi age uqa Setenna gagadic odocna dana me muden ec cisdoin. Eunu age cahulec bahic bilein. Age Kis Gun eu Seten ec cisdoin. Eunu Anut uqa agena silail cagasiadecnu ihoc qee nijel. Age Mak 3.28-29 feiga.\f*   
\s1 Ege je madoqona eu cel ceteh ege wawigena bilina eu camas mena  
\r (Luk 6.43-45)  
\p
\v 33 Jisas je haun maaden, “Na eu gug mefi eu aig me qona. Euqa na eu gug me qeefi eu aig me qee qona. Dana age casac aig fimeig na gug eu mefo, me qeefo ec doqagan.  
\v 34 Age man sononec uqana nag! Age me qee sihuldec! Age adi je me madoqagan? Ceteh waugna am bec nijia eu cona cali hu camas mena.  
\v 35 Dana me uqa waug dunuh cisdoc me am bec nijinanu eunadec cisdoc me camas mena. Dana me qee uqa waug dunuh cisdoc me qee am bec nijinanu eunadec cisdoc me qee camas mena,” aden.   
\p
\v 36-37 “Ijaqa odi maadigina, hinana je madec mefi Anut uqa hinana je menu hina ititom dana ec madigian. Euqa hinana je madec me qeefi hinana je me qeenu Anut uqa hina dana me qee ec madigian. Eunu Anut uqa Gesiladec Deel Benna dana cajaca age je me qee madegina eundec age eetanu je ilag madein? ec sisiladigian. Odocob age je me qeenu ameg me qee oqagan,” aden.   
\s1 Dana leih age Jisas kobolkobol oso odoga foqa doin  
\r (Mak 8.11-12; Luk 11.29-32)  
\p
\v 38 Saen euna loo je iwaladecca Farisica leih age Jisas madoin, “Iwalgec, ege hina Anutna cabi ogonana gaga eunu kobolkobol oso oodom faga gena,” doin.   
\p
\v 39-40 Odocobil Jisas jejenega hewi maaden, “Anut hibemdoc sihul i qisol megina age gaga oso fecnu walegina. Je hahun madec dana, Jona, uqa cahineg cijedca witic cijedca dool ben macasnadec waugna nijenwe Dana Melah cahineg cijedca witic cijedca maha dunuh noc biligian.\f + \fr 12.39-40 \ft Age Jona 1.17 feiga. Je hahun madec dana Jona uqana buk euha Jona uqa dana cajaca age Niniwa ono bilein eu Anutna je qasali maadennu je saen. Odocob age je eu dumeig agena silailnu tului falicdoin. Age Jona 3.5 feiga.\f* Eunu age gaga abes oso qee fowain. Age Jona uqana gaga eu himec foqagan  
\v 41 Weleca Niniwa dana age Jona me je qasali maadeceb agena silailnu tului falicdoin. Ijaqa maadigina, oso eu Jona wooldoc ene bilia! Eunu Niniwa dana age isi Gesiladec Benna dana sihul qila i ene bilegina eundec gami cajimeig age dana i bilegina deweneganu geladec je madoqagan.  
\v 42 Weleca Kwin sautdec uqa Solomonna cisdoc silecca je dugen imei hatu onoca bahic cocobi niniji hu je dah men. Ijaqa maadigina, oso eu Solomon wooldoc ene bilia! Eunu Kwin sautdec uqa Gesiladec Benna dana qila i ene bilegina eundec gami cajimeig uqa dana i bilegina deweneganu geladec je madigian,” aden.   
\s1 Buga me qee haun ceseli hon  
\r (Luk 11.24-26)  
\p
\v 43 Jisas je haun maaden, “Saen buga me qee dana dewegnadec cali hona uqa jaen mudec cudun wawali hatu galalecna cobona. Euqa uqa cudun oso qee gulucdol.  
\v 44 Uqa madena, ‘Ijana jo cuculi hom euna ceseli nuigen,’ ena. Uqa ceseli humei jo eu oso qee bilec, gegehinca qee, cunug eeldoc ninijen fena.  
\v 45 Odimei uqa haun ceseli nuimei buga me qee 7-pela cedi ahocob uqa gami bilegina. Buga me qee 7-pela eu agena odoc me qee uqana odoc me qee eu wooldoc. Eunu dana eu uqana bilec qila euna me qee bahic mena. Uqana bilec weledec wooldona. Dana cajaca me qee qila bilegina eu ageha odi caloqagan,” aden.   
\s1 Jisas anag waliagulca eu in?  
\r (Mak 3.31-35; Luk 8.19-21)  
\p
\v 46-47 Jisas uqa dana cajaca je maadi bibilen uqa anag waliagulca maha gumu tatawi ege Jisas je madoqan ein. [Odocobil dana oso Jisas madon, “Hina anin walinelca ono taweiga age ege Jisas je madoqan egina,” don.]\f + \fr 12.46-47 \ft Grik jaqec je hilah leihna age but i [ ] gemo nijia eu qee nijel. Grik je doc dana age Matju je i qee jaqel, euqa dana fil oso uqa hibna Matjuna je eu Mak 3.2ca, Luk 8.20ca eu caca calecnu je i tubdu jaqen ec cisdogina.\f*  
\v 48 Odocob Jisas dana eu jejeg hewi madon, “Ija au in? Ija waliel an?” don.  
\v 49-50 Uqa odi madumei ebenna uqa malogom ihohadimei maaden, “Feiga, oso uqa Mei sao jobon bilia, uqa co toodu odona eu uqa ija walica, ija cebinamica, ija auca. Eunu ija au walielca ihen!” aden.   
\c 13  
\s1 Jisas uqa dana cabina wit aig qelennu galolo je maaden  
\r (Mak 4.1-9; Luk 8.4-8)  
\p
\v 1 Deel euna dih Jisas uqana jonadec li Galili wa cagocna numei lanna bilen.  
\v 2 Ono bibilen dana cajaca mati bahic uqaca hu talildu cegulein. Eunu uqa wag oso tobi bibilen dana cajaca cunug age lanna tawein.  
\v 3 Tatawegin uqa je filfil galolo jena maadi maaden,\f + \fr 13.3 \ft Je i je cecelac 5-pela Jisas maaden buk Matjuna nijen eundec cijeddoc. Je cecelac i 13.3-52na nijen. Euna sao cul jobonna kobolnu galolo je mati nijia.\f* “Dana oso uqana cabina wit aig helecnu nuen,” aden.   
\p
\v 4 “Uqa aig hehelen aig osooso jic cobocna tonen. Odocob man fululec eu age humeig cedi ji hedoin.  
\v 5 Aig osooso maha eu meen baibaca maha meca qee euna tonen. Maha eu dunuh qee nol eunu aig eu mahuc qala qahimei nag wasen.  
\v 6 Odocob cam gagadic tatawen eu cijaden. Odocob bebeig dunuh qee nol eunu qala jajawalen.  
\v 7 Aig osooso dud geuna tonen. Dud eu mahuc caji ben mimeig ceteh cilehdocobil mahulimei qee men.  
\v 8 Aig osooso eu mulu mahana tonen. Odocob qala qahimei ben mi aig qon. Aig oso qoc 100 ihoc len, osooso 60 ihoc len, osooso 30 ihoc len.  
\v 9 Oso dahigca je eu dah meiale,” aden.   
\s1 Jisas uqa eetanu galolo jena madena eu malogom sildiaden  
\r (Mak 4.10-12; Luk 8.9-10)  
\p
\v 10 Odocob malogom age Jisasca limeig sisildu madoin, “Hina eetanu galolo jena je maadagana?” doin.  
\v 11-12 Odocob uqa malogom maaden, “Oso uqa docca nijia eu Anut haun uteceb uqana doc meca migian. Euqa oso uqa docca qee eu Anut uqa uqana doc nag nijia eu cawaldugian. Eunu Anut culadeceb age sao cul jobonnu ceteteh jahunec docnu nijia. Euqa dana i age eu docnu qee nijel.   
\q1
\v 13 Dana cajaca amagana feginaqa qee fegina,  
\q1 odimeig age dahinigana dah meginaqa qee dah megina,  
\q1 odimeig age qee fogo adena  
\m eunu ija galolo jena je maadigina.  
\v 14-15 Agena odocna Aisaia je hahun maden eu ihoc lena. Uqana je eu wele odi maden:  
\q1 ‘Dana cajaca i age ilohonoga cisdocnu eu cal mec bahic.  
\q2 Age dahiniga cufa qoin.  
\q2 Odocob age amaga amusein.  
\q1 Eunu age dah moqagan qa qee dowain.  
\q2 Age foqagan qa wawaga qee fogo doiaun.  
\q1 Qeefami age amagana fimeig fogo adoub,  
\q2 age dahinigana dah mimeig doub,  
\q2 age wawaga fogo doub.  
\q1 Odocob age ijaca falicdocobil me madoum,’ en,” aden. \rq (Aisaia 6.9-10)\rq*   
\p
\v 16 “Euqa age amaga Anutna ceteh fegina, age dahiniga Anutna je dah megina. Eunu age eeladecca bilegina.  
\v 17 Ija mele maadigina, je hahun madec danaca tutuc coboc eundecca wele bilein mati age, age qila fegina eu fecnu wawaga ben hoolen euqa age ceteh eu qee felein. Dana eundec age, age qila dah megina eu dah mecnu wawaga hoolen euqa age je eu qee dah melein,” aden.   
\s1 Wit aignu galolo je gug  
\r (Mak 14.13-20; Luk 8.11-15)  
\p
\v 18 Jisas je haun maaden, “Ija age wit aig helec dananu galolo je saadecemin dah meigale.  
\v 19 Oso uqa sao cul jobonnu je dah meceb dahig qee fogo dona dana eu uqa wit aig jicna tonenwe. Seten eu qisol mec dana bahic, uqa humei je dana waugna tonen eu cawaldona.  
\v 20 Aig maha meen baibacana tonennu madiga eu odiwe dana oso uqa me je dah mimei waug ceelecca je eu mahuc ona,  
\v 21 euqa uqadodoc bebeigca qee. Uqa saen nag himec culumen gahidona. Anutna jenu aqati tootoodocca temdocca uqaca hocob mahuc waug meleec tonena.  
\v 22 Aig dud geuna tonennu madiga eu odiwe dana oso uqa me je dona, euqa mahana bilecnu jaen qocca, maha cehewan ocnu waug madec eu toodu odocca eu Anutna je cilehdocob aig qee qona.  
\v 23 Aig mulu mahana tonennu madiga eu odiwe dana oso uqa Anutna je dumei waug fogo dona. Uqa mele bahic ben mi aig qona. Dana eundec leih age aig 100 ihoc legina, odocob leih age aig 60 ihoc legina, odocob leih age aig 30 ihoc legina eu camas mena,” aden.   
\s1 Wit gemona huhel me qee wasennu galolo je  
\p
\v 24 Jisas uqa galolo je haun oso maaden, “Sao cul jobon eu odi. Dana oso uqana cabina wit aig me dih helen.  
\v 25 Euqa dana us ninijegin uqana cad limei cabi euna wit gemo huhel me qee aig qelimei nuen.  
\v 26 Wit wasi hanocob huhel me qeeha camas men.  
\v 27 Odocob cabi dana age li cabi gug eu madoin, ‘O Ben, hina hinana cabina aig qee nesilec qelemfo? Huhel me qee eu anadec?’ doin,” aden.   
\p
\v 28 “Odocobil maaden, ‘Eu cad uqa odon,’ aden. Odocob madoin, ‘Hina madecemfi ege nui huhel me qee casili sagoqa?’ doin.  
\v 29 Odocobil maaden, ‘Qeeo! Huhel witca eu fecnu ihocihoc eunu age huhel cacasili li witha casiluwainnu cain odowain!  
\v 30 Culecebil osoben niniji wal meia. Wal mi hedoc saen euna qetegina eundec maadigen, “Age casac huhel me qee qeti sagoiga eu manoqagannu, odimeig wit qeti sagumeig ijana jo bisna ehi ti haudoiga,” adigen,’ aden,” Jisas je odi maaden.   
\s1 Mastet aignu galolo je  
\r (Mak 4.30-32; Luk 13.18-19)  
\p
\v 31 Jisas uqa galolo je haun oso maaden, “Sao cul jobon eu mastet aig cinigwe eu dana oso umei uqana cabina cehen.  
\v 32 Mastet aig eu nag bahic. Eu aig cunug wooladec. Euqa uqa wasi ben meceb uqa cabi ceteh wooladec gulgulec caji tawena. Man fululec age humeig uqana batacnana agena teic megina!” aden.   
\s1 Jisnu galolo je  
\r (Luk 13.20-21)  
\p
\v 33 Jisas uqa galolo je haun oso maaden, “Sao cul jobon eu jis cinigwe caja oso umei plaua dram benna euca gabandumei ibuldocob uqadodoc iben,” aden.   
\s1 Jisas uqa galolo jena himec je maaden  
\r (Mak 4.33-34)  
\p
\v 34 Jisas uqa je cunug eu galolo jena dih dana cajaca maaden. Uqa je oso galolo jeca qee euna qee maadel.  
\v 35 Uqa je hahun madec dana oso uqana jaqec je ihoc ligiannu odi odon. Jaqec je eu wele odi maden:  
\q1 “Ija galolo je conina maadigen.  
\q1 Ija ceteh gug qoc saennadec jahuni leceb qila nijia eunu je saadigen,” en. \rq (Buk Song 78.2)\rq*   
\s1 Huhel me qeenu galolo jena silig  
\p
\v 36 Jisas uqa dana cajaca cuculadi jona len. Odocob uqana malogom age Jisasca humeig madoin, “Hina huhel me qee cabina wasennu galolo je eu silignu sildigaga,” doin.   
\p
\v 37 Odocobil Jisas jejenega hewi maaden, “Dana aig me helena eu Dana Melah.  
\v 38 Cabi eu mahamaha. Aig me eu dana cajaca age sao cul jobon bilegina. Huhel me qee eu Setenna dana cajaca.  
\v 39 Cad uqa huhel aig qelen eu Seten. Wal mi hedoc saen eu mahamaha bili cit qoc saen. Dana qeti sagogina eu ensel.  
\v 40 Age huhel meel u casili haudu jana maneginawe mahamaha bili cit qoc saenna odi bahic nijigian.  
\v 41 Dana Melah uqa uqana ensel suladeceb ni uqana culna cunug age dana cajaca odadecebil age silail mimi coboginaca, dana cajaca cunug age qisol meginaca cedi ehi li  
\v 42 ja amegna heladecebil noqagan. Euna age qada qaqaji maimaga kicodudu biluqagan.  
\v 43 Odocobil dana cajaca Anut uqa dana cajaca ititom ec madena eu age Memegana culna cam odi fulacdoc biluqagan. Oso dahigca je eu dah meiale!” aden.   
\s1 Gold meen maha osona jahunen nijianu galolo je  
\p
\v 44 Jisas uqa galolo je haun oso maaden, “Sao cul jobon eu odi. Cabi osona dana oso cobimei euna maha dunuh gold meen jahuldoc oso ninijen gulucdon. Uqa eu mahana jahuldumei ceelimei li uqana ceteteh cunug cedimei meen qaignu idadumei li cabi eu faji on,” aden.   
\s1 Gilolo meen qaig benna fajec eunu galolo je  
\p
\v 45 Jisas uqa galolo je haun oso maaden, “Sao cul jobon eu odi. Idadoc dana oso uqa gilolo meen qaig benna fajecnu gale docob eundec wawali cobon.  
\v 46 Uqa gilolo oso meen qaig ben bahic wooldoc gulucdumei uqa uqana ceteteh cunug idadumei meen qaig eu umei li gilolo me bahic eu faji on,” aden.   
\s1 Cimec bennu galolo je  
\p
\v 47 Jisas uqa galolo je haun oso maaden, “Sao cul jobon eu cimec ben cinigwe age eu cul dool dewenega filfil cedoqagannu macasna helegina.  
\v 48 Cimec ben eu dool ihoc lecebil dana cecelimeig lanna megina. Odimeig age bibili dool me galelna tacegina qa me qee eundec helegina.  
\v 49 Odiwe mahamaha bili cit qoc saenna odi odoqagan. Anutna ensel age belimeig dana cajaca qisol mec eu dana cajaca ititom gemonadec cedimeig  
\v 50 li ja amegna heladecebil noqagan. Euna age qada qaqaji maimaga kicodudu biluqagan,” aden.   
\p
\v 51 Jisas je i cunug maadi hedumei sisiladi maaden, “Age je i dah meiga eu cunug dahiniga fogo doiafo?” aden. Odocob madoin, “Ese, ege dahinige fogo doia,” doin.  
\v 52 Odocobil Jisas maaden, “Jo gug uqa jo bisnadec ceteh weledecca haunca cedi ahumei camas menawe eu odi loo jenu iwaladec oso uqa sao cul jobonnu iwaldocobil don,” aden.   
\s1 Nasaret age Jisas hibemdoin  
\r (Mak 6.1-6; Luk 4.16-30)  
\p
\v 53 Jisas uqa galolo je eu maadi hedumei cudun eu culimei nuen.  
\v 54 Nuimei uqana jobon gug calen. Odimei uqa agena cuha jona limei dana je iwaladeceb je eu wawaga qon. Age tumatumai madein, “Uqa cisdoc silecca eu in iwaldocob don? Kobolkobol odona eu anadec on?  
\v 55 Ege doqona, uqa jo cehecnu memei uqana mel. Uqa anag ijan eu Maria. Jemsca, Josefca, Saimonca, Judasca age uqa waliagul.  
\v 56 Uqa cebinagul age ene ege gemona bilegina. Dana i uqa ceteh eu cunug anadec on?” ein.  
\v 57 Age uqanu wawaga me qee meceb cecewudi bilein. Euqa Jisas uqa maaden, “Je hahun madec dana oso uqana gug jobon qee euna age uqana je dumeig uqa saolal mudecnu nijia. Euqa uqana hatuna, uqana eundec age uqa cewudegina,” aden.  
\v 58 Ono Nasaret age wawaga meleecca qeenu ono kobolkobol meca mati qee odol. Uqa nag himec odon.   
\c 14  
\s1 Herod uqa Jisasnu uqa Wa Joadec Jon ec cisdon  
\r (Mak 6.14-29; Luk 3.19-20; 9.7-9)  
\p
\v 1 Saen euna gabman dana ben Herod\f + \fr 14.1 \ft Herod i uqa ijan fil osoca, eu Antipas. Uqa Galili hatu cofdon. Uqa King Herod uqa Maria Jisas basecdon saenna king bilen eu uqa melah. Age Matju 2 feiga.\f* Galili hatu cunug cofdoc uqa Jisasna odocnu hutan don.  
\v 2 Dumei uqana cabi dana eundec maaden, “Dana i uqa Wa Joadec Jon. Uqa cal mecnadec ceseli cajen eunu kobolkobol odocnu gagadic odocca odona,” aden.   
\p
\v 3-4 Ge, wele Herod uqa waliag Filip aideg, Herodias, on. Odocob Jon uqa li Herod madon, “Hina walien aideg om eu tutuc qee,” don. Eunu Herod uqana han dana suladeceb age li Jon hewi libimeig gihacdoc jona mudein.  
\v 5 Herod uqa Jon qocob cal mecnu waug nijen euqa dana cajaca age Jonnu madi, uqa je hahun madec dana, einnu uqa dana cajacanu cucuien.   
\p
\v 6 Herod uqa anag basen deelnu dana mati bahic cegulein. Age ceeli bibili sab jejegin Herodias ateg, eu dana osonadec, uqa hu dana amagana due duen. Oodon eu Herod gale docob  
\v 7 uqa je cagoc madon, “Anut amegna mahigina, cel cetehnu matecemfi ihigen,” don.  
\v 8 Odocob anag uqa ateg madocob toodu uqa Herod madon, “Hina qila bahic Wa Joadec Jon ilo bohna mimeg ahutaga!” don.   
\p
\v 9 Mel aid odi madocob Herod uqa waloc don. Euqa Anut amegna je cagoc madigina cetehnu matecem ihigen don eunuca, dana hoin bibili dah mein eunuca cisdumei  
\v 10 uqa han dana suladeceb age gihacdoc jona limeig Jon be cagoin.  
\v 11 Cagumeig ahu bohna mi mel aid utecebil mel aid uqa anag ehi liton.  
\v 12 Odocob Jonna malogom age humeig Jon deweg loton ehi li heel cisein. Odimeig age li je cunug Jisas sadoin.   
\s1 Jisas uqa dana 5,000 sab aden  
\r (Mak 6.31-44; Luk 9.10-17; Jon 6.1-13)  
\p
\v 13 Jisas uqa je eu dumei jobon eu culimei wagna tobimei wa gad cagoc leti uqa cuhanuc cudun ono isec nuen. Euqa dana cajaca jobonjobon bilegina eu age Jisas wa gad cagoc leti nuia ec dumeig age toodu jaimagana belein.  
\v 14 Odimei uqa lanna tonimei dana cajaca am ben tatawegin feciaden. Uqa agenu waug qocob agena hagca me maden.   
\p
\v 15 Witicna uqana malogom uqaca humeig madoin, “Aben i filec cagocna bahic, cam wele noia tu mena. Eunu dana cajaca am i age jobonnana belimeig agedodoc sab jecnu fajoqagannu suladaga,” doin.  
\v 16 Euqa Jisas malogom maaden, “Eetanu age beloqagan? Age dana cajaca sab adeiga,” aden.  
\v 17 Odocob age jejeg hewi madoin, “Ege bred 5-pela cul dool lecisca himec hewoqa,” doin.\f + \fr 14.17 \ft Bred eu Juda mudoloig eu ben qee, eu foloec. Bred 5-pela eu dana lecis himec jecnu ihoc.\f*  
\v 18 Odocobil Jisas maaden, “Bred cul doolca cedimeig ahuteiga,” aden.   
\p
\v 19 Odimei Jisas uqa dana cajaca maadeceb age gigina bilein. Odimei Jisas bred 5-pela cul dool lecisca cedi hewimei sao jobon tatiimei Anut hetaga doc je madon. Odimei bred fenifeni uqana malogom adeceb dana cajaca siwiadecebil jein.  
\v 20 Age cunug jecebil ihoc leceb malogom age sab jecefanaga eundec galel 12-pela tacecebil am ben.  
\v 21 Dana sab jein eu 5,000, cajaca melca qee sanijelein.   
\s1 Jisas Galili wa tatacan cobon  
\r (Mak 6.45-52; Jon 6.16-21)  
\p
\v 22 Odocob Jisas uqana malogom cesusadeceb age wagna tobimeig age aqunitu Galili wa gad cagoc naha isec beloqagannu belein. Bebelegin uqa dana caja amam qaqacitegin cofaden.  
\v 23 Uqa dana cajaca qaciti hedocobil uqa cuhanuc Anut inondudu bilecnu aluh guhidocna ten. Witic memen uqa ono cuhanuc bilen.  
\v 24 Euqa saen euna malogom age wagna bebeleig age lan onoca bahic basai coboin. Odocob fufu ben olanagana isec honnu macas ben bahic caji qahen.  
\v 25 Odocob walag danigia oodon Jisas uqa wa tatacan cocobi ageca len.  
\v 26 Euqa malogom age uqa macasna cocobon fimeig qeleli filiciti madein, “Dol oso cobona,” imeig cucuii euein.  
\v 27 Odi odocobil Jisas mahuc maaden, “Ija ihen. Age cain cucuiuwain! Age wawaga toogdoiale!” aden.   
\p
\v 28 Pita je eu dumei uqa Jisas jejeg hewi madon, “Tibud, hinafi matecem ija toni wa tatacan hinaca ligen,” don.  
\v 29 Odocob Jisas madon, “Cois hogale,” don. Odocob Pita uqa wagnadec tonimei wa tatacan cocobi Jisasca ligian odon.  
\v 30 Uqaqa fufu ben wawasen fimei cucuiimei gotoigia odon. Odi oodi eui Jisas madon, “Tibud, cahahatagale,” don.   
\p
\v 31 Odocob Jisas uqa mahuc eben heli Pita hewimei madon, “Hina dana waug meleec nagca. Eetanu wawin lecisca meia?” don.  
\v 32 Ale lecis wagna tobi tecebil bibilegin fufu tilien.  
\v 33 Dana age wagna bibileig Jisas olana gob cecehi uqanu cuha fimeig madoin, “Hina mele Anut Melah,” doin.   
\s1 Jisas dana cajaca geh bahic Genesaret hatuna me maden  
\r (Mak 6.53-56)  
\p
\v 34 Age wa gad cagoc leti hu Genesaret hatuna hoin.  
\v 35 Age wag tobocobil dana onodec age Jisas wele fein eunu doin. Odimeig age hatu cunugna je suldocobil age dana caja hagca cunug ehadimeig Jisasca ahoin.  
\v 36 Odimeig agena hag me madigiannu ninidoin. Age uqana lotoc bibig himec qududocnu ninidoin. Odocob cunug age uqana lotoc qududoin eu me mein.   
\c 15  
\s1 Anutna loo je eu Juda jajanagail agena loo je wooldona  
\r (Mak 7.1-13)  
\p
\v 1 Saen euna Farisica loo je iwaladec leihca Jerusalemdec Jisasca humeig sisildu madoin,  
\v 2 “Hinana malogom age ebenega qee wasacudec sab jegina. Eunu eetanu ege jajanigeil loo je igein eu tefacdogina?” doin.\f + \fr 15.2 \ft Malogom age ebenega eu gegehin bahic qee age sab jein. Juda age ceteh oso eu Anut amegna gegehin nijen eu hewimeig ageha Anut amegna gegehinca calowainnu cucuiein. Eunu Farisica Juda dana cunugca age jajanagail agena kobol toodu ebenega casac cusimeig sab joloig. Age ebenega qee cusec sab qee joloig.\f*   
\p
\v 3 Odocobil Jisas jejenega hewi maaden, “Age eetanu jajanagail agena loo je saolal mumudi Anutna loo je gagadicca eu tefacdogina?  
\v 4 Ge, Anut je gatiti maden:  
\q1 ‘Hina memen aninca lalan malagale,’ en. \rq (Kisim Bek 20.12; Loo 5.16)\rq*  
\q1 ‘Oso memegfo, anagfo geuldecnu je madecebfi uqa cal migian,’ en. \rq (Kisim Bek 21.17; Wok Pris 20.9)\rq*   
\m
\v 5 Ageqa madegina, ‘Oso uqa memegfo, anagfo cesuldocnu meen qaig nijecebfi uqa maalena, “Ija cesulalecnu ceteh nijen eu Anut utigennu abes mem,” alena,’ egina.  
\v 6 Odocob dana eu uqa memeg lalan mudecnu qee nijel. Age eu odi madecna agena loo je saolal mumudi Anutna loo je cilehdudu tefacdogina,” aden.   
\p
\v 7 “Me hihili coboc age! Je hahun madec dana, Aisaia, uqa agenu je tutuc bahic wele madi maden:   
\q1
\v 8 ‘Dana cajaca i age conogana binani sulegina  
\q2 age wawagaqa eu qisactec bilina.   
\q1
\v 9 Eu age dana agena loo je iwalaadegina eu Anutna loo je, egina.  
\q2 Eunu age ijanu gauc cuha fegina,’ en,” aden. \rq (Aisaia 29.13)\rq*   
\s1 Jisas uqa ceteh dana gegehin mudina eunu maden  
\r (Mak 7.14-23)  
\p
\v 10 Odimei Jisas uqa dana cajaca utaadeceb hocobil maaden, “Je i dah mimeig du cuhadoigale.  
\v 11 Ceteh cona lena eu dana gegehin qee mudina. Ceteh conadec cali hona eu dana gegehin mudina,” aden.   
\p
\v 12 Odocob malogom age Jisasca li madoin, “Hina Farisi je maadecem dumeig age hinana jenu gemanaga ben eu dogonafo?” doin.   
\p
\v 13 Odi madocobil Jisas jejenega hewi maaden, “Na cunug ija Mei sao jobon bilia uqa qee cehel eu age caji loqagan.  
\v 14 Age dana eundec culadeigale. Farisi age amaga galuc mec, age cotogail ha amaga galuc mec iwaladi ehadi cobogina. Dana ameg galuc mec eu cotig ameg galuc mec iwaldu ehudi cobocobfi ale lecis odi helona toni aqaligian,” aden.   
\p
\v 15 Euqa Pita Jisas madudu madon, “Galolo je maadem eu sildigagale,” don.  
\v 16-20 Odocob Jisas maaden, “Ageha wawaga qee fogo dol eu adi? Dana waugnadec cisdoc qisol mec cali hona. Dana qocca, dana osona caja occa, wal kobol odocca, heje occa, um qoc madecca, lelanadecca eu dana waugnadec cali hona. Ceteh eu dana gegehin mudina. Euqa ebenega qee wasacudec sab jec euna dana qee gegehin mudina. Eunu ceteh cunug cona lena eu bigna nocob big ititacdocob bahu helegina eu qee feginafo? Euqa conadec cali hona eu waugnadec cali beceb eu dana gegehin mudina,” aden.   
\s1 Kenandec caja uqa Jisasnu waug meleen  
\r (Mak 7.24-30)  
\p
\v 21 Jisas uqa cudun eu culimei li Taia Saidonca alena hatuna nui bilen.  
\v 22 Ono Kenan caja oso hatu eunadec hu Jisas utadu madon, “O Tibud, Dewid Melah, hina ijanu walol heiale. Buga me qee eu ija ateni hewen me qee odudina,” don.  
\v 23 Odonqa Jisas uqa jejeg qee hewel. Uqa je oso qee madol. Odocob malogom age Jisasca li ninidudu madoin, “Caja uqa ege tootoogigi utaena. Eunu madocom cuculgi nuiale,” doin.   
\p
\v 24 Odi madocobil Jisas maaden, “Isrel sihul sipsip fadalec cobogina cesuladecnu eunu himec Anut cabi itimei sulteceb hom,” aden.  
\v 25 Euqa caja uqa hu Jisas amegna gob cehi uqanu cuha fimei ninidudu madon, “O Tibud, cesultagale!” don.  
\v 26 Odocob Jisas uqa caja jejeg hewi madon, “Mel agena sab cawaladi qa joqagannu helec eu cois qee,” don.\f + \fr 15.26 \ft Jisas uqa caja i hibemdocnu qee gale dol. Euqa Isrel age Anutna dana cajaca, eunu Jisas uqa Anutna me je eu casac Isrelca leceb cunug docobil hibna dana caja fil age doqagannu gale don. Eunu Jisas uqa galolo je i maden. Isrel sihul eu mel, odocob dana caja fil age qa. Euqa Jisas uqa caja i uqana waug meleec fimei cesuldon.\f*  
\v 27 Odocob caja madon, “Mele Tibud, euqa qa asagul sab jejen jecefan uqana cabalnadec golodocob qa age bisalu hu cedi jegina eu odi qeefo?” don.  
\v 28 Caja odi madocob Jisas madon, “O caja, hina wawin meleec eu caunca bahic! Hina madagana eu odihia,” don. Odocob caja uqa ateg saen euna bahic hag medon.   
\s1 Jisas uqa dana caja hagca mati me maden  
\p
\v 29 Jisas onodec Galili wa gad cagocna isec humei uqa aluh osona timei ono bilen.  
\v 30 Bibilen dana cajaca mati bahic uqaca hoin. Ageha dana hagca mati bahic cedadi ahoin. Age dewenega laleg mecca, tefulunuga cogogecca, amaga galuc mecca, conoga cufa qocca, dana hag filfilca eu ehi li Jisas jaihna madecebil uqa cunug me maden.  
\v 31 Dana age conoga cufa qoc bilein eu je mamadegin, tefulunuga cogogec coboin eu me madeceb bibilegin, laleg mec nijein age caji cocobogin, amaga galuc mec bilein age mecieegin feciadein. Dana cajaca age ceteh eu fimeig tumatumaein. Odimeig age Isrel agena Anut binan sulein.   
\s1 Jisas uqa dana 4,000 sab aden  
\r (Mak 8.1-10)  
\p
\v 32 Jisas uqana malogom utaadeceb uqaca hocobil maaden, “Dana cajaca i age qila deel cijed ija gami biluquna age sab jecnuca qee. Eunu ija agenu walol tena. Ija age sab qee adec gauc ceseli beleiga adecnu culumen tena, age jicna wenene aqeceb toni aqeiaundainnu madigina,” aden.  
\v 33 Odocob malogom age Jisas jejeg hewi madoin, “Ege ene wadauna biluqa, dana cajaca mati bahic sab adecnu bred anadec oqan?” doin.  
\v 34 Odocobil Jisas sisiladi maaden, “Age bred ganic nijia?” aden. Odocob madoin, “Bred 7-pela, cul dool nagnag euha osooso nijeiga,” doin.   
\p
\v 35 Odocobil uqa dana cajaca maadeceb age mahana bilein.  
\v 36 Bibilegin uqa bred 7-pela cedimei cul doolha cedimei Anut hetaga dumei fenifeni malogom aden. Odocob malogom age ehi li dana cajaca siwiadecebil jein.  
\v 37 Dana cajaca cunug jecebil biniga hon. Odocob age sab jecefanaga golodoin eu mahanadec cedimeig galel 7-pela tacecebil ihoc len.  
\v 38 Dana sab jein eu 4,000, cajaca melca qee sanijelein.  
\v 39 Odocobil Jisas uqa dana cajaca maadeceb qacitein. Uqadodoc wagna tobimei nui Magadan agena hatuna li bilen.   
\c 16  
\s1 Farisi Sadjusica age Jisasnu madi, gaga oso sao jobonnadec ihacgecem foqa, doin  
\r (Mak 8.11-13; Luk 12.54-56)  
\p
\v 1 Saen euna Farisi Sadjusica age Jisasca humeig ege uqa temdu feqan imeig cesusdudu madoin, “Ege hina Anutna cabi ogonana gaga eunu kobolkobol oso oodom ihacgecem foqale,” doin.  
\v 2 Odocobil Jisas jejenega hewi maaden, “[Wesuna age sao mecidudu madegina, ‘Sao galawac cijina, eunu uqadec cam me tawigian,’ egina.  
\v 3 Qasilna sao mecidudu madegina, ‘Sao gol teia waha guhudona, eunu jugu qocob qila wa hugian,’ egina. Sao madena eu age dogina. Euqa saen odocnu madena eunu gaga age qee dogina.]  
\v 4 Anut hibemdoc sihul i qisol megina age gaga oso fecnu walegina. Euqa age gaga abes oso qee fowain. Age gaga osol dih foqagan, eu je hahun madec dana, Jona, uqana gaga eu himec foqagan,” aden. Odi maadimei cuculadi nuen.   
\s1 Farisi Sadjusica agena jisnu galolo je  
\r (Mak 8.14-21)  
\p
\v 5 Jisas uqa malogom gami Galili wa gad cagoc ono isec li bilein. Deel euna malogom age beloqaga bili bred tacecnu dahiniga celen.  
\v 6 Ono bibilegin Jisas uqa malogom galolo je madi maaden, “Dah meiga, age Farisi Sadjusica agena bred gug qoc ibuldocnu jis eu ageca hoiaunnu batut feigale,” aden.  
\v 7 Odi maadeceb malogom age togodudu madein, “Ege bred qee cedi aholom eunu je magena,” ein.  
\v 8 Jisas uqa, age eunu togododogin dumei maaden, “O dana wawaga meleec nag, age eetanu bred qee cedi aholoin eunu togodudu madegina?  
\v 9 Age qila wawaga qee fogo dolfo? Wele bred 5-pela ninijen dana 5,000 jein age deel euna jecefanaga galelna tacecebil ganic ihoc len eu qee cisdoginafo?  
\v 10 Qeefi, age bred 7-pela ninijen eu dana 4,000 ihoc jecebil jecefanaga galelna tacecebil ganic ihoc len euha qee cisdoginafo?  
\v 11 Ija brednu qee maadelem. Eu adi wawaga qee fogo dol? Age Farisi Sadjusica agena bred gug qoc ibuldocnu jis eu ageca hoiaunnu batut feigale,” aden.   
\p
\v 12 Odi maadeceb malogom age Jisas uqa age bred gug qoc ibuldocnu jis eu batut feigale ec qee madel euqa age Farisi Sadjusica agena iwaladec je eu batut feigale ec madeia eunu doin.   
\s1 Pita uqa Jisasnu Krais ec qasali maden  
\r (Mak 8.27-30; Luk 9.18-21)  
\p
\v 13 Jisas uqa malogom gami Sisaria Filipai agena hatuna cobimeig Jisas uqana malogom sisiladi maaden, “Mateiga, dana age Dana Melahnu in egina?” aden.  
\v 14 Odocob jejeg hewi madoin, “Dana oso age madegina, uqa wa joadec dana Jon, egina. Leih madegina, uqa Ilaija, egina. Leih madegina, uqa Jeremaiafo, uqa je hahun madec dana osofo, egina,” doin.  
\v 15 Uqa haun sisiladi maaden, “Ageqa, ijanu in egina?” aden.   
\p
\v 16 Odocob Saimon Pita Jisas jejeg hewi madon, “Krais eu hina. Cebac bilec Anut uqa melah eu hina,” don.   
\p
\v 17 Odi madocob Jisas madon, “O Saimon, Jon melah, hina eelhec biliga. Mahanadec dana oso je eu qee camas mihel. Eu Mei sao jobon bilia eu uqa je i camas mihia.  
\v 18 Eunu ija je oso mahigina eu odi. Hina Pita,\f + \fr 16.18 \ft Grik jena ijan Pita uqa hutan eu “meen” cinigwe.\f* ija meen big gug i tatacan ija ijana tamanec cehigen. Odocob oloqanih uqana cebec gagadicca eu ijana tamanec qee wooldoiaun.  
\v 19 Ija sao cul jobon ki ihigen. Ceteh cunug hina mahana jelaga qa sao jobonna ha jelec biligian. Ceteh cunug hina mahana cufalaga qa eu sao jobonna ha cufalec biligian,” don.  
\v 20 Odimei Jisas uqana malogom cahacaadi maaden, “Ija Krais je eu leih cain maadi cobowain,” aden.   
\s1 Jisas uqa cal mimei ceseli cajigiannu je maden  
\r (Mak 8.31–9.1; Luk 9.22-27)  
\p
\v 21 Saen euna Jisas uqa uqana cal mecnu uqana malogom maadecnu sanan mimei maaden, “Dana Melah uqa Jerusalem ono teceb Juda agena matuca, ihanec dana benbenca, loo je iwaladecca, age madecebil deweg sogoec ben gahidugian. Age uqa qocobil cal migian. Uqa deel cijeddocna Anut uqa tulidocob ceseli cajigian,” aden.   
\p
\v 22 Uqa eunu maadeceb Pita uqa Jisas ehudeceb filecna limesi Pita uqa Jisas cahacdudu madon, “O Tibud, Anut uqa ceteh eu dewenna hoiaundainnu cahacduhiale!” don.  
\v 23 Pita odi madocob Jisas falicdu madon, “Seten, hina Anut madena eu qee madelem. Hina dana mahanadec cisdoc toodu matagana. Hina jic cufa qutagana. Se, cuculti nuuga!” don.   
\p
\v 24-27 Odocob Jisas uqana malogom maaden, “Feiga, Dana Melah uqa Memegna kobolkobolca uqana ensel gami hoqagan. Deel euna uqa dana abesabes age odoinnu ameg wadacadigian. Eunu dana oso mahamaha cehewan cunug oialumiqa uqana cebac bilec qee moubmi cehewan on eunu me biloubfo? Qeefi, dana uqa cebac bilec eu culecebfi cel cetehna uqana cebac bilec ceseli besi ocnu fajudigian? Oso uqa uqana cebac bilec cahahadugia odona eu uqa uqana cebac bilec felacudigian. Odocob oso uqa ijana bilina eunu uqana cebac bilec felacudecebfi eu uqana cebac bilec ugian. Eunu oso uqa ijanu madi, ija uqa jaih ceen lahacdudu toodugen, ena eu uqadodoc deweni me biligian ec cain madeiaun qa uqa uqana na babalec hewi gahidumei tooteiale.  
\v 28 Ija mele maadigina, leih age ene tawegina eu age qee cal mec ninijeb Dana Melah uqa uqana king culna hohob mecidoqagan,” aden.   
\c 17  
\s1 Jisas deweg fil ibuldon  
\r (Mak 9.2-13; Luk 9.28-36)  
\p
\v 1 Deel 6-pela hedocob Jisas uqa Pitaca, Jemsca uqa waliag Jonca cedadimei ehadi aluh ohis osona dana oso qee bilec euna ti cuhanuc bilein.  
\v 2 Ono bibilegin Jisas uqa age amagana ibuldon. Uqa ola cam odi camalen, uqana lotoc senenec bahic fulacdon.  
\v 3 Odocob uqana malogom age Moses Ilaijaca ale hocobil Jisasca togododogin feciadein.  
\v 4 Odi bibileig Pita uqa fimei Jisas madon, “O Tibud, ege ene odi bilecnu eu me bahic. Hina madecemfi ija ene talah jo cijed cehigen, oso hinana, oso Mosesna, odocob oso Ilaijana,” don.   
\p
\v 5 Uqa je eu madudu bibilen taen oso fulacdoc bahic ni jahuladen. Taennadec jejeg oso camas mimei maden, “Ija melami nelugca, ija uqanu gale ben tena eu ihen. Age uqa jejeg toodu odoiga,” en.   
\p
\v 6 Odocob malogom eu dah mimeig ni mahulein. Age ben bahic cucuiein.  
\v 7 Euqa Jisas ageca limei hewadi maaden, “Age cain cucuiuwain. Cajeiga,” aden.  
\v 8 Age caji meciimeig dana oso qee felein, Jisas himec fein.   
\p
\v 9 Age aluhnadec totoni Jisas malogom cijed je gatiti maaden, “Qila feiga eu oso cain saadowain. Dana Melah cal mecnadec qee cajec ninijeb je i oso cain doiaun,” aden.   
\p
\v 10 Odocob malogom age Jisas sisildu madoin, “Eunu eetanu loo je iwaladec age Ilaija uqa aquni hugian egina?” doin.\f + \fr 17.10 \ft Loo je iwaladec dana age cit qoc saennu je oso iwaladegina. Je uqana gug eu Malakai 4.5-6. Age Ilaija uqa Krais aqunitu cali hugian ec madegina.\f*   
\p
\v 11 Odocobil Jisas maaden, “Ilaija uqa mele hugian, humei ceteh cogogen eu cunug tutuc mudigian.  
\v 12 Euqa ija maadigina, Ilaija uqa wele hon. Hocob dana age uqanu qee doloin. Agedodoc wawaga maden eu age uqa odudein. Eu odiwe ageha Dana Melah odudecebil deweg sogoec ben gahidugian,” aden.  
\v 13 Jisas odi saadeceb malogom age Jisas uqa wa joadec dana Jonnu mageia imeig wawaga fogo don.   
\s1 Jisas uqa mel oso buga me qee hewen eu me muden  
\r (Mak 9.14-29; Luk 9.37-42)  
\p
\v 14 Jisas malogom cijedca age dana cajaca mati cemenega lecebil dana oso hu Jisas jaihna isec gob cehimei madon,  
\v 15 “O Tibud, ija melami uqa titi hudec hag qona eu me qee bahic odudina. Saen matica janaca wanaca toni mahuli cosolena. Eunu hina uqanu walol heiale.  
\v 16 Ija ijana mel hina malogom cemenega mudecemin ageqa me mudecnu ihoc qee,” don.   
\p
\v 17 Odocob Jisas uqa jejeg hewi madon, “O dana cajaca qila bilegina, age wawaga meleecca qee, age cisdoc cogogecca! Saen ganic ija ageca haun biligen? Saen ganic ija camuhulaadi cobigen? Mel eu cemeni ehudi ahoigale,” don.  
\v 18 Odi odocobil Jisas uqa buga me qee eu cahacdudu madocob uqa mel eu cuculdi nueceb mel qila i medocob bilen.   
\p
\v 19 Odocob malogom age Jisasca jahuni humeig sisildu madoin, “Ege eetanu buga me qee eu ititacdocnu ihoc qee lel?” doin.   
\p
\v 20-21 Odocobil maaden, “Agena wawaga meleec eu nag eunu ihoc qee lel. Ge, ija mele maadigina, age wawaga meleec eu nag bahic, eu mastet aig cinigwe tawecebfi age aluh i madoubmiqa, ‘Hina cajimeg onoca nuuga,’ doubmiqa odocob uqa conoga toodu odoub. Ceteh odoc oso odocwe qee eu qee nijiaun. Odoc cunug ihoc ligian,” aden.\f + \fr 17.20-21 \ft Grik jaqec je hilah leihna age je oso tubdu jaqein eu odi: “Euqa Setenna eundec i cinigwe age gauc ititacadecnu qee nijel. Eu sabnu qagu bilimeig inondumeig ha odocnu nijigian,” aden.\f*   
\s1 Jisas uqa cal mimei ceseli cajigian ec madi lecisdon  
\r (Mak 9.30-32; Luk 9.43-45)  
\p
\v 22 Age odi ono Galili hatuna bilimeig Jisas maaden, “Dana Melah eu dana ebenegana mudecebil  
\v 23 age uqa qocobil cal migian. Odocob deel cijeddocna Anut uqa tulidocob ceseli cajigian,” aden. Uqa odi maadeceb wawaga me qee men.   
\s1 Jisas uqa tempel cabinu takis helen  
\p
\v 24 Age haun ceselimeig Kapaneam jobon hoin. Bibilegin tempel cabinu takis helecebil cedein dana eundec osooso Pitaca limeig sisildu madoin, “Agena iwaladec uqa tempel cabinu takis qee helenafo?” doin.  
\v 25 Pita uqa maaden, “Ese, uqaha takis helena,” aden.  
\p Hibna Pita uqana jona bibilen Jisas uqa Pita sisildu madon, “Saimon, hina eeta madagana? King mahanadec age in takis helecebil ogina? Age agena mel helecebil oginafo, qee dana maha fildec helecebil oginafo?” don.  
\v 26 Odocob Pita madon, “King mahanadec age dana maha fildec takis helecebil ogina, igina,” don. Odocob Jisas madon, “Odi mele, eunu kingna mel age takis helecnu je qee nijel.  
\v 27 Ageqa elenu gemanaga beiaunnu hina Galili wa cagoc lanna limeg cawil wana helagale. Hina odi odocom dool oso cawilna umeg didu ogale. Umeg uqa biahna meen qaig oso eu ninijeb cacawi umeg meen qaig eu tempel cabinu hinanuca ijannuca helagale,” don.   
\c 18  
\s1 Sao cul jobon ono in oso cunug wooladi ben biligian?  
\r (Mak 9.33-37; Luk 9.46-48)  
\p
\v 1 Saen euna malogom age Jisasca limeig sisildu madoin, “Sao cul jobon euna in oso cunug wooladi ben bilina?” doin.\f + \fr 18.1 \ft Je i je cecelac 5-pela Jisas maaden buk Matjuna nijen eundec 4-peladoc. Je cecelac i 18.3-35na nijen. Eu dana cajaca age Jisas toodoin eu age cel kobol agena gemona odoqagan eunu madena.\f*   
\p
\v 2 Odocobil Jisas uqa mel sim oso utadocob uqaca hocob uqa ehudi malogom gemona mudimei  
\v 3 maaden, “Ija mele maadigina, age tului qee falicdu mel i cinigwe ha qee ibuldufeig age sao cul jobon ono qee lowain.  
\v 4 Oso uqadodoc jogoimei ija cotiel agena ben ec qee madigiaqa mel eu cinigwe eu cotugul cunug wooladi sao cul jobonna ben bilina,” aden.   
\p
\v 5 “Oso uqa mel sim eundec oso ija ijanina ehudimei eu eeldona eu uqa ija oitimei eeltena,” aden.   
\s1 Silail mec kobol eu cain hewowain  
\r (Mak 9.42-48; Luk 17.1-2)  
\p
\v 6 Jisas odi maadi maaden, “Euqa oso uqa mel sim i eundec oso uqa ijanu waug meleena eu odudeceb silail migiaqa eu meen culumenca bena qagi macas ameg nijia euna age helecebil wa jimei cal moubmi eu me odoub,” aden.   
\p
\v 7 “Faninadec mahana nijina, odocob faninadec eu gaid dana cajaca ageca hona, eu cunug qee mudecnu qee nijel. Euqa dana cajaca age maha ina bilegina age leih faninadecebil silail megina eu age walocca!  
\v 8 Odocob hina eben lecisca jaim lecisca ja cijeceb catanecna helihecebil euna bilecnu eu me qee bahic. Euqa hina ebenca qee jaimca qee cebac bilec catanec ogaqa eu me. Eunu hina ebenfo, jaimfo silail mecnu mana tawecebfi hina qeti helagale.  
\v 9 Odocob hina amen lecisca oloqanih jana helihecebil euna bilecnu eu me qee bahic. Euqa hina amenca qee euqa cebac bilec catanec ogaqa eu me. Eunu hina amen faninheceb silail mifeg amen seli helagale,” aden.   
\p
\v 10-11 “Ija maadigina, sim agena ensel age gaid Mei sao jobon bilia uqa ola mecidogina. Eunu batut feigale, age mel sim i age oso cain cewudowain,” aden.\f + \fr 18.10-11 \ft Je i, “mel sim i age,” but inaca, but 6naca, but 14naca nijia eu je Matju 10.42 cinigwe, eu odi “mel sim eundec oso uqa ijana malogom bilina.” Jisas uqa mel sim dihnu qee madelwe fena. Uqa uqana malogomnuha maden. Odocob Grik jaqec je hilah leihna age je oso tubdu jaqein eu odi: “Ge, Dana Melah uqa fadaloqagannu odogina eundec cahahaadecnu mahana toni nen,” aden.\f*   
\s1 Sipsip fadalecnu odona eunu galolo je  
\r (Luk 15.3-7)  
\p
\v 12 Jisas je haun maaden, “Age je i maadigennu adi cisdogina? Dana oso uqana sipsip 100 cobogina eundec osol jahunen. Odocob dana eu dumei uqa 99 eu aluhna cuculadi jahunen eu wawali qee cobonafo?  
\v 13 Uqa eu gulucdufei, ija mele maadigina, uqa 99 aluhna me bilegina eu cunug woolaadi osol cahahadu on eunu waug ceelena.  
\v 14 Eu odi Mei\f + \fr 18.14 \ft Grik jaqec je hilah leihna age je fil oso jaqein eu odi: Memega.\f* sao jobon bilia uqaha mel sim oso fadaleiaunnu qee gale dona,” aden.   
\s1 Tutuc mudec kobolna cotin silail mihen eu tutuc mudoga  
\p
\v 15 Jisas je haun maaden, “Hina cotin [dewenna] silail mecebfi hina uqaca limeg hina uqaca himec mecidodecna madogale. Madogona eu cotin dah mecebfi hina cotin haun ceseli ogona.  
\v 16 Euqa uqa hinana je dah mecnu culecebfi  
\q1 ‘je eu tutuc mudec dana lecisfo, cijedfo amagana cabi ocnu’ \rq (Loo 19.15)\rq*  
\m hina dana osolfo, lecisfo cedalecem age osoben li cotin madoigale.  
\v 17 Hina cotin dana eu agena je dah mecnu culecebfi hina je eu tamanec amegna camasac magale. Cotin uqa tamanecna je toodu odoc culecebfi hina uqa Juda dana qee eundecfo, takis cedec eundecfo hibemadeginawe hibemdogale,” aden.   
\p
\v 18 “Ija mele maadigina, age ceteh mahana jelegina eu sao jobon jelec biligian. Ceteh age mahana cufalegina eu sao jobonha cufalec biligian,” aden.   
\p
\v 19-20 “Je osoha maadigina, lecisfo cijedfo ija ijaninu ceguli bilegina euna ija age gemona biligen. Eunu age eundec lecis mahana ceteh osonu Mei madocnu wawala osol meceb inondocobilfi ceteh eu Mei sao jobon bilina eu adigian,” aden.   
\s1 Cabi dana uqa cabi hijagna cub qee cagasitol eunu galolo je  
\p
\v 21 Pita uqa Jisas cemenug limei sisildu madon, “O Tibud, coti uqa ija silail mecna culini gaid tudocob cagasitoc sanijec ganic ihoc leceb cagasitugen? Cagasitoc 7-pela ihoc lec eu ihocfo?” don.   
\p
\v 22 Jisas uqa Pita jejeg hewi madon, “Ija mahigina, 7-pela ihoc lec eu ihoc qee, euqa hina cotin 70doc sanijec 7-pela ihoc leceb cagasitoga,” don.   
\p
\v 23 Odi madumei maaden, “Sao cul jobon eu odi king oso uqa uqana cabi dana agena cub oc tutuc mudecnu utaaden.  
\v 24 Eu age hocobil age gemona cabi dana oso camas men eu uqa kingna 10 milion kina wele on. Uqana cub oc eu ben bahic.  
\v 25 King uqa ameg itiga don qeenu king maaden, ‘Age uqaca uqa aidegca uqana melca uqana ceteteh cunugca idadumeig meen qaig iteiga,’ aden.  
\v 26 Odocob cabi dana eu uqa je eu king madeceb dumei uqa king amegna gob cecehi kingnu cuha fimei ninidudu madon, ‘O ijana Ben, hina susumitem ija isi meen qaig ameg cunug ihigen,’ don.  
\v 27 Odi odocob king uqa dana inu walol docob besitumei uqana cub oc cunug cagasiton,” aden.   
\p
\v 28 “Euqa cabi dana eu nuimei uqa cabi hijag oso gulucdon. Eu uqa wele 100 kina uten. Uqa eu gulucdumei be doodool hewimei madon, ‘Meen qaig ihem eu qila ameg itiga,’ don,” aden.   
\p
\v 29 “Odi odudeceb cabi hijag eu uqa amegna gob cehimei ninidudu madon, ‘Sumitigale. Ija meen qaig ameg cunug isi ihigen,’ don.  
\v 30 Odocob uqa eu cuculi gihacdoc jona tacen meen qaig ameg itecem besihigen don,” aden.   
\p
\v 31 “Uqa odi odocob uqa cabi hijagul je eu cunug dumeig wawaga me qee meceb age li king je eu cunug sadoin.  
\v 32 King je eu dumei uqa dana i utadocob hocob madon, ‘Hina cabi dana me qee bahic. Hinana cub oc ben bahic ninijen ninitecemnu cagasihem.  
\v 33 Hina cabi cotin niniheceb hina eetanu uqanu qee walol hel ija hinanu walol ten odi?’ don.  
\v 34 Odimei gemag madudu deweg tudocnu gihacdoc jo cofdoc culiaden, meen qaig ameg cunug iteceb besitoiga,” aden.   
\p
\v 35 “Eunu age cotogail agena cahuldoc qee cagasi bahic adecebilfi Mei sao jobon bilia eu uqaha king uqa cabi dana me qee odudenwe odadigian,” aden.   
\c 19  
\s1 Jisas uqa ocobocobec kobol cagocnu maden  
\r (Mak 10.1-12; Luk 16.18)  
\p
\v 1 Jisas uqa je eu madi hedumei Galili hatu culimei Judia hatu Jodan Wa ono isec nui bilen.  
\v 2 Dana cajaca mati bahic toodu cobocobil uqa ono agena hagnu me maden.   
\p
\v 3 Odocob Farisi age ege Jisas temdu feqan imeig uqa sisildu madoin, “Magaga, dana oso uqa aideg deweg je oso nijeceb uqa culdecnu egena loo je cois ec madenafo?” doin.   
\p
\v 4 Odocobil Jisas maaden, “Ifanec gug eu  
\q1 ‘Anut uqa dana cajaca ifani malimei maden’ \rq (Jenesis 1.27)\rq*  
\m eunu Anutna jaqec jena qee sanijeleinfo?  
\v 5 Anut uqa odi maden:  
\q1 ‘Gug inu dana uqa memeg anagca culalimei aidegca gabanalecebil biluwasan.  
\q1 Odocob lecis ale deweg osol biluwasan,’ en. \rq (Jenesis 2.24)\rq*   
\m
\v 6 Eunu ale lecis qee biluwasinqa ale deweg osol bilesina. Eunu Anut gabandon eu dana oso cain cagoiaun,” aden.   
\p
\v 7 Odocob age Jisas jejeg hewi madoin, “Moses uqa eetanu loo je odi igen, agena caja cagoc je jaqec utimeig culdecebil nuigian, gen?” doin.   
\p
\v 8 Odi madocobil maaden, “Age wawaga tool ibuldon eunu Moses uqa caja culdecnu jic besiaden. Gug qocna odoc odi qee nijel.  
\v 9 Ija maadigina, dana oso uqa aideg dana osoca qee leceb nijelesin euqa gauc dana caja sisi jelec wagalimei aideg culdi caja haun oso ona eu wal kobol odona,” aden.\f + \fr 19.9 \ft Grik jaqec je hilah leihna age je oso tubdu jaqein eu odi: “Dana oso uqa caja gemug culden ona eu wal kobol odona,” aden.\f*   
\p
\v 10 Jisas odi maadeceb malogom age Jisas madoin, “Dana cajaca bilecnu je odi tawecebfi eu caja ocnu cois qee,” doin.   
\p
\v 11-12 Odocobil Jisas maaden, “Dana osooso age caja ocnu duman utec qee nijel age odi anagail basadein. Leih dana baminiga seladecebil age caja ocnu qee nijel. Leih age sao cul jobonnu cabi ocnu himec cisdumeig agedodoc dewenega cilehdumeig caja qee ogina. Oso uqa je eu ocnu ihocfi ugian. Eunu je eu dana cunug ocwe qee. Oso je eu ocnu duman utec nijia eunu dahig fogo dugian,” aden.   
\s1 Jisas uqa mel sim culadecebil uqaca hoqagannu maaden  
\r (Mak 10.13-16; Luk 18.15-17)  
\p
\v 13 Dana cajaca leih age Jisas uqa agena mel sim ebenna hewadi agenu inondugiannu mel sim Jisasca ehadi ahoin. Ahocobil malogom age ehadi ahoin eundec gagalaadi cahacadein.  
\v 14 Odocobil Jisas eu fimei maaden, “Mel simwe eundecnu sao cul jobon muden nijiado. Eunu cain cahacadowain. Culadecebil mel sim age ijaca hoigale,” aden.  
\v 15 Uqa odi maadimei eben mel ilomogana mimei eeladimei cuculadi nuen.   
\s1 Dana haun cehewanca uqa Jisasca hocob madesin  
\r (Mak 10.17-31; Luk 18.18-30)  
\p
\v 16 Dana haun oso uqa Jisasca hu sisildu madon, “O Iwalgec, cebac bilec catanec eu ocnu eeta me odoc oso odigen?” don.   
\p
\v 17 Odocob Jisas jejeg hewi madon, “Hina me odocnu eetanu sisiltagana? Anut uqa himec me. Hina cebac bilecna lecnu madifeg Anutna loo je toodu odogale,” don.   
\p
\v 18 Odocob dana haun madon, “Cel loo jenu cisdudu matagana?” don. Odocob Jisas madon:  
\q1 “Hina oso cain qagadogaun.  
\q1 Hina dana cajaca dewenela osol mec cain cagualegaun.  
\q1 Hina oso uqana ceteteh cain heje cedagaun.  
\q1 Hina oso uqanu uhulec je cain madagaun.  
\q1 Hina oso cain um qudugaun.   
\q1
\v 19 Hina memen aninca lalan malagale. \rq (Kisim Bek 20.12-16; Loo 5.16-20)\rq*  
\q1 Odocob hina hinanel nalunin maganawe  
\q2 odi hina utuqain bilec\f + \fr 19.19 \ft Utuqain bilec uqana gug eu odi. Agena loofo, agena kobolfo eu dana osonu nalug magale ec qee madel, cois hina dana eunu nalug magale.\f* eundecnu nalug magale,” don. \rq (Wok Pris 19.18)\rq*   
\p
\v 20 Odocob dana haun eu uqa Jisas madon, “Loo je eu cunug ija toodu odi hedom. Ceteh odocnu ija qee odolom eu oso nijiafo?” don.   
\p
\v 21 Odocob Jisas uqa jejeg hewi madon, “Hina dana tutuc bahic calegannu gale hecemfi hina nuimeg hina cehewain cunug idadumeg meen qaig eunadec umeg dana sawen eundec siwiadagale. Odi odimeg hina sao jobon ono cehewainca bilegan. Odimeg hu ija tootagale,” don.  
\v 22 Odocob dana haun eu uqana ceteh cehewan mati bahic nijen eunu Jisasna je eu dumei uqa waug culumen dodon Jisas cuculdi nuen.   
\p
\v 23 Odocob Jisas uqa malogom maaden, “Ija mele maadigina, dana cehewanagaca age sao cul jobon dunuh loqagannu eu cacanigca bahic!  
\v 24 Ija haun maadigina, kamel uqa lotoc gisec cese gigilona isec li nuecnu cacanigca, euqa dana cehewanca eu Anutna cul dunuh lecnu cacanigca eu wooldoc bahic,” aden.   
\p
\v 25 Malogom age je eu dumeig age tumatumai madein, “Mele odi nijecebfi innini Anut uqa cahahaadigian?” ein.   
\p
\v 26 Odi madecebil Jisas meciaadi maaden, “Dana age odi odocnu qee nijel. Euqa Anut ceteh cunug odocnu dona,” aden.   
\p
\v 27 Odocob Pita uqa Jisas jejeg hewi madon, “Faga, ege ceteteh cunug culimeb hina toohi coboqona. Ege isi eeta oso oqan?” don.   
\p
\v 28 Odocob Jisas maaden, “Ija mele maadigina, maha haun ibuldocna Dana Melah uqana king bilec bahim kobolkobolcana bibileb ageha king bilec bahim 12-pelana bibili Isrel sihul 12-pela gesiladoqagan.  
\v 29 Age abesabes oso uqa jofo, waliagulfo, cebinagulfo, memegfo, anagfo, uqana melfo, cabifo ija ijaninu culiadecebfi uqa ceteh culden eu 100doc wooldoc ameg ben bahic ugian. Odocob uqa cebac bileceb catanec muguh ugian.  
\v 30 Euqa mati qila hib bahic taweiga eundec age isi aquni tawoqagan. Odocob mati qila aquni taweiga eundec age isi hib bahic tawoqagan,” aden.   
\c 20  
\s1 Wain cabi oc dananu galolo je  
\p
\v 1 Jisas je haun maaden, “Sao cul jobon odiwe bilia. Jo gug uqa deel osona qasil cabi dana age uqana wain cabina cabi ocnu fajadigiannu waladi nuen.  
\v 2 Uqa dana gulucadimei kina osolnu qila cabi ocnu sisiladeceb cois ecebil uqa uqana wain cabina cabi oqagannu suladen.  
\v 3 Uqa 9 kilokna haun ceseli cobimei dana gauc idadec cudunna tatawegin feciadimei  
\v 4 maaden, ‘Ageha ijana wain cabina belimeig cabi oigale, ija agena cabi oc ameg ihoc adigen,’ aden. Odocob age cabi ocnu belimeig cabi oin.  
\v 5 Uqa cam gemo cehi tatawen haun cocobi li cabi dana haun ceden. Odimei cam waldocob 3 kiloknaca cocobi li odi ha odon,” aden.   
\p
\v 6 “Odimei uqa 5 kilokna cocobi li dana leihha gulucadimei maaden, ‘Age eetanu cahineg cunug ene gauc taweiga cabi oso qee oloin?’ aden.  
\v 7 Odocob age madoin, ‘Oso cabi ocnu qee hu magel,’ doin. Odocobil uqa maaden, ‘Ageha ijana wain cabina belimeig cabi oigale,’ aden,” aden.   
\p
\v 8 “Wesu meceb wain cabi gug eu uqa uqana cabi cofdoc dana madon, ‘Hina cabi dana utaadecem hocobil cabi oc ameg adagale. Hib hoiga euna sanan mimeg aadi aadi li qasil hoiga euna ihoc lec adagale,’ don.  
\v 9 Uqa utaadeceb hocobil cam waldoc 5 kilokna cabina lein eundec kina osol aden.  
\v 10 Odocob qasil cabina casac lein eundec age wawagana madein, ‘Uqa ege meca igigian,’ ein. Euqa ageha kina osol aden. Cabi cofdoc uqa kina osol adeceb  
\v 11 age wain cabi gugnu gonagona mimi madoin,  
\v 12 ‘Dana hib hoiga eu aua osol himec cabi oiga. Ege qasil sanan mimeb cam qiqigen cabi oqa. Hina hib hoigaca egeca ihocihoc igiga eu cois qee,’ doin,” aden.   
\p
\v 13 “Euqa wain cabi gug uqa dana eundec oso madon, ‘Ijana danah, ija hina qee wahelem. Faga, ija hina qasil kina osolnu cabi oganfo, ec sisilhecemin cois qee telemfo?  
\v 14 Hinana meen qaig oga eu gad hewi nuuga. Ijadodoc ijana gale tecnu ija hib hoiga eundec hina ihiga odi ihocihoc adiga.  
\v 15 Ija ijana ceteteh wawi madec toodu siwecnu qee nijelfo? Ija nelinica odigina hina eunu gumunitagana eu coisfo?’ don,” aden.   
\p
\v 16 “Eu odi milum hib hoin eundec matu ibuldoqagan, matu aquni hoin eundec milum ibuldoqagan,” aden.   
\s1 Jisas uqa cal mimei ceseli cajigian ec madi cijeddon  
\r (Mak 10.32-34; Luk 18.31-33)  
\p
\v 17 Jisas uqa Jerusalem ono ti cocoboi uqa uqana malogom abes utaadeceb hocobil maaden,  
\v 18 “Feiga, ege Jerusalem toqona. Ono age Dana Melah ihanec dana benben ebeneganaca loo je iwaladec ebeneganaha muduqagan. Age uqa cal migiannu geldumeig  
\v 19 Juda dana qee eundec ebenegana muduqagan. Odocobil age uqa lelandumeig qisadu na babalecna tuitu qumeig caqusecebil caculimei cal migian. Odocob deel cijeddocna Anut uqa tulidocob ceseli cajigian,” aden.   
\s1 In sao cul jobon ben biligian?  
\r (Mak 10.35-45)  
\p
\v 20 Saen euna Sebedi melahul lecis ale anala uqa Jisasca humei uqa amegna gob cehi uqanu cuha fimei je madugiannu bilen.  
\v 21 Odocob Jisas uqa sisildu madon, “Eetanu matecnu odogona?” don. Odocob caja madon, “Hinana cul camas meceb ija melamiel lecis oso hina eben meulana isec, oso eben ansena isec bilec meca eu alegannu je hahun itigale,” don.   
\p
\v 22 Odocob Jisas caja jejeg hewi maalen, “Ale cetehnu ninitesina eu uqana caun qee dosina! Wa gab ija jigen eu aleha jecnu ihocfo?” alen. Odocob madosin, “Ese, ele jecnu ihoc,” dosin.  
\v 23 Odocobil Jisas maalen, “Mele, wa gab ija jigen eu aleha jowasan. Euqa bilec cudun ebeni meulana isecca ebeni ansena isecca alecnu eu ijana cabi qee. Eu Mei uqa bilec eu ocnu wele maden eu ale bahic owasan,” alen.   
\p
\v 24 Malogom 10-pela age je eu dumeig age dana lecis eu alenu wawaga me qee men.  
\v 25 Odocob Jisas uqa malogom utaadeceb hocobil maaden, “Juda dana qee eundec agena king age agena dana gagadic madegina, odocob mahana dana ben age dana cilehadegina eunu age dogina.  
\v 26 Euqa age gemona odi cain nijiaun. Age gemona oso ija ben biligen ifei uqa cotugul cunug cewel uadeiale.  
\v 27 Odocob oso uqa ija matu biligen ifei eu agena begabeg meh cabi dana ibuldoiale.  
\v 28 Ge, Dana Melah ha dana age ija cewel utuqagan imei qee toni nel. Qeeo. Dana Melah uqa dana cajaca cewel uadecnu toni nen. Uqa ijana cebac bilec eu dana cajaca mati besiadec fajadecnu culigen imei eunu toni nen,” aden.   
\s1 Jisas uqa dana amala galuc mec lecis me malen  
\r (Mak 10.46-52; Luk 18.35-43)  
\p
\v 29 Jisas uqana malogomca age Jeriko taun cuculeig dana cajaca mati bahic tooadecebil coboin.  
\v 30 Cocobogin dana amala galuc mec lecis ale jic gesacna bilesin. Dana lecis eu ale Jisas hona ec mamadegin dah mimesi ale utai madesin, “O Dewid Melah, elenu walol heiale!” esin.  
\v 31 Dana cajaca age gagalaaali maalein, “Cain utaowasin. Culesiale,” alein. Euqa ale feeadi conola suli u utai madesin, “O Tibud, Dewid Melah, elenu walol heiale,” esin.   
\p
\v 32 Jisas tului tawimei dana utaali maalen, “Ija ale eeta odaligennu matesina?” alen.  
\v 33 Odocob dana amala galuc mec ale Jisas madosin, “O Tibud, ele amile meciecnu odiligale,” dosin.  
\v 34 Odocobil Jisas alenu waug qocob amala qududocob mahuc amala fogo docob ale ceteh cunug fesin. Odimesi ale Jisas toodocobil belein.   
\c 21  
\s1 Jisas uqa kingwe Jerusalem dunuh len  
\r (Mak 11.1-11; Luk 19.28-40; Jon 12.12-19)  
\p
\v 1 Jisas uqana malogomca age Jerusalem dodoldodogin Betfasi jobon Oliw Aluhna isec calimeig uqa malogom lecis sulaali  
\v 2 maalen, “Jobon amigena nijia euna lesia. Ale dunuh lelesi cesel anag uqana goman manahalca qagalec tatawecebil eu gulucdowasan. Ale eu cufalalimesi ehali ahutesiale.  
\v 3 Dana oso uqa ale eetanu cesel cufalalesina alecebfi ale madowasan, ‘Tibud cesel eu ocnu eu cabi osoca madena,’ dowasan. Odocobil dana eu cesel culaligian,” alen.   
\p
\v 4 Je hahun madec dana uqana je oso ihoc ligiannu odi odon. Je hahun madec dana uqa wele odi maden:   
\q1
\v 5 “Age Saion dana cajaca odi maadeigale,  
\q2 ‘Feiga, agena king ageca hona.  
\q1 Uqa dana jogoi cobonawe cesel uqa guhadocob hona.  
\q2 Cesel uqana nag goman guhadocob hona,’ adeigale,” en. \rq (Sekaraia 9.9)\rq*   
\p
\v 6 Malogom ale limesi Jisas maalen odi odosin.  
\v 7 Ale cesel anag uqana gomanca ahocobil malogom agena lotoc cesel gogodohna duecebil cesel uqa Jisas guhadocob belein.  
\v 8 Dana cajaca mati age aquni belein eu agena lotoc jicna duein. Leih age celus qetimeig jicna duein.  
\v 9 Dana cajaca age aqunitutu hib toodudu age due sisili madein:  
\q1 “Hosana!\f + \fr 21.9 \ft Hibru jena uqana gug bahic eu “Anut cahahagagale!” euqa saen euna eu Anut binan sulecnu je oso.\f* Ege Dewid Melah binan suluquna!  
\q1 Tibud ijanna egeca hona eu uqa eeldoc biliale. \rq (Buk Song 118.26)\rq*  
\q1 Anut Ohis Bahic uqa binan wasi nuiale,” ein.   
\p
\v 10 Jisas uqa Jerusalem leceb dana cajaca age Jerusalem bilein eu age tumatumai madein, “Dana i uqa in?” ein.  
\v 11 Odocobil dana cajaca toodu coboin eu age madein, “Uqa Jisas, uqa je hahun madec dana Nasaret jobondec, Galili hatuna,” ein.   
\s1 Jisas uqa tempel jo soidon  
\r (Mak 11.15-19; Luk 19.45-48; Jon 2.13-22)  
\p
\v 12 Jisas uqa tempel dunuh limei uqa ono dana ceteh fajeinca ceteh suldoinca eundec feciadimei cunug ititacadeceb maha gemo calein. Odimei dana age meen qaig maha filfilca meen qaig tempelca wadacwuducdoin eundec agena cabal sunduadeceb agena meen qaig golodon.\f + \fr 21.12 \ft Dana age tempel dunuhna ceteh fajecnu gale aden eu age tempelna meen qaigna himec fajecnu nijen. Age Romfo, Grikfo agena meen qaigna fajecnu ihoc qee nijel. Cuhudidca ceteh filfilca dana fajadein age Anutnu ihanadoloig.\f* Uqa cuhudid fajec agena cabalha sundocob golodocob  
\v 13 maaden, “Anutna je jaqecna je oso nijia eu Anut odi madena:  
\q1 ‘Ijana jo eu Anut inondocnu jo oqagan,’ ena. \rq (Aisaia 56.7)\rq*  
\m Ageqa agena odocna  
\q1 age falicdocobil heje dana agena jahunec cudun ibuldon!” aden. \rq (Jeremaia 7.11)\rq*   
\p
\v 14 Odocob dana amaga galuc mecca laleg mecca tempelna Jisas cemenug hocobil uqa me maden.  
\v 15 Euqa ihanec dana benbenca loo je iwaladecca age Jisas kobolkobol oodon fimeig mel sim ha tempelna Jisas binan susuli Hosana!\f + \fr 21.15 \ft Hibru jena uqana gug bahic eu “Anut cahahagagale!” euqa saen euna eu Anut binan sulecnu je oso.\f* Ege Dewid Melah binan suluquna! ec due sisilegin dah mimeig gemanaga jawe beceb  
\v 16 Jisas madoin, “Mel sim madegina eu hina dah maganafo?” doin. Odocobil Jisas jejenega hewi maaden, “Mele, dah migina. Age jaqec je Anutna je i qee sanijeleinfo?  
\q1 ‘Hina mel sim momodoca iwaladi cuhadom.  
\q1 Age conoganadec binan sulec je hinanu wasena,’ en,” aden. \rq (Buk Song 8.2)\rq*   
\m
\v 17 Odi maadimei uqa age tatawegin culadimei uqaha Jerusalem cuculi Betani jobon ono nui nijaug nijen.   
\s1 Jisas uqa na dan geldocob galalimei cal men  
\r (Mak 11.12-14; 11.2-24)  
\p
\v 18 Jisas uqa qasil ceseli haun Jerusalem hugia hohon wen don.  
\v 19 Odocob uqa na dan oso filec tatawen fen. Odimei uqa ono gug cemenug limei me aigcafo fecnu len. Euqa na dan me aigca qee, eu bagac himec tatawen fen. Odimei uqa na dan madon, “Hinana aig oso haun qee qogaun!” don. Odocob na dan mahuc galalen.   
\p
\v 20 Malogom age eu fimeig age tumatumai madein, “Na dan eu adi mahucwe galaleia?” ein.   
\p
\v 21 Odocobil Jisas maaden, “Ija mele maadigina, age wawaga meleec nijialumi wawaga lecisca qeemi age na dan eu oodom feiga eu himec qee odoubqa age aluh i hina caji macasna noga doubmi eu conoga toodu odoub.  
\v 22 Age wawaga meleeccafi ceteh cunugnu inondufeig eu age oqagan,” aden.   
\s1 Age Jisas in cabi eu ocnu mahen odogona? ec sisildoin  
\r (Mak 11.27-33; Luk 20.1-8)  
\p
\v 23 Jisas uqa haun tempel dunuh limei dana iwaladi tatawen ihanec dana benbenca Juda agena matuca age Jisasca hu sisildu madoin, “In ijanna hina eu odogona? In cabi eu ocnu mahen odogona?” doin.  
\v 24 Odocobil Jisas jejenega hewi maaden, “Ija age casac je oso sisiladigen. Age eu jejeni hewi matecebilfi ija hibna ha in cabi iteceb ugina, in ijanna ceteh odigina eu camas mecemin doqagan.  
\v 25 Eu odi, Jonna wa joadec eu anadec? Eu sao jobondecfo, qee dananadecfo? Mateiga duga,” aden.  
\p Odocob age fee dadani togodudu madein, “Ege madoqaqa wa joadec eu sao jobondec doqaqa uqa ege eetanu uqanu wawaga mele qee el? gigian.  
\v 26 Ege madoqaqa wa joadec eu dananadec doqaqa eu dana age adi odiguqagannu cucuiuquna. Ge, dana cajaca cunug age Jonnu uqa je hahun madec dana egina,” ein.  
\v 27 Eu togodu hedumeig age Jisas madoin, “Jonna wa joadec eu anadec ege qee doqona,” doin. Odocobil Jisas maaden, “Eunu ija ageha in cabi iteceb ugina, in ijanna ceteh i odigina eu qee maadigaun,” aden.   
\s1 Jisas uqa dana oso melahul leciscanu galolo je maden  
\p
\v 28 Jisas uqa ihanec dana benbenca Juda agena matuca je haun maaden, “Age je inu eeta cisdogina? Dana oso uqana mel lecis bilesin. Memeg uqa mel matuca limei madon, ‘Melami, hina qila wain cabina limeg cabi ogale,’ don.  
\v 29 Odocob mel eu memeg madon, ‘Culadiga,’ don. Hibna uqa memeg feedonnu eu ija cois qee odolom imei waug me qee meceb uqa wain cabina limei cabi on.  
\v 30 Odocob dana eu uqa mel milumca limei uqa matu madonwe odi ha madon. Odocob mel eu memeg madon, ‘Ben, ija wain cabina nuigen,’ don. Odimei wain cabina qee nuel, cabi culen,” aden.  
\v 31-32 Jisas odi maadimei sisiladi maaden, “Mel lecis i in memeg maden eu toodu odon?” aden. Odocob madoin, “Mel matu,” doin.  
\p Odocobil Jisas maaden, “Jon uqa ageca hu age jic tutuc cobocnu ihacaden, odocob age uqana jenu wawaga mele qee el. Euqa takis cedec danaca caja silailca eundec age uqana jenu wawaga meleen. Age ceteh eu fein qa age hibna eunu tului qee falicdoloin, age Jonnu wawaga mele qee el. Eunu ija mele maadigina, takis cedec danaca caja silailnu ijanagaca eundec age aquniaadi Anutna culna legina,” aden.   
\s1 Wain cabi oc dananu galolo je  
\r (Mak 12.1-12; Luk 20.9-19)  
\p
\v 33 Jisas uqa ihanec dana benbenca Juda agena matuca je haun maaden, “Age galolo je oso dah meigale. Jo gug oso uqa wain cabi cehimei alildu meen gel tacimei wain aig afdocnu kunum cisimei wain cabi cofdoc biluqagannu bahim jo ben fala ohis tobi eit fec ihoc eu odi cehen. Odimei uqana wain cabi dana leih cabi oqagannu ebenegana mimei uqa hatu osona nuen.  
\v 34 Wain aig wal meceb cedec saen cali hocob wain cabi gug uqa cabi dana sulaadi maaden, ‘Age belimeig wain cabi oc eundec maadecebil age wain aig eu adecebil cedi ahuteigale,’ aden.  
\v 35 Odocob dana age wain cabi cofdoin eu age cabi dana hewadimeig oso deweg tudoin, oso qocobil cal men, oso meenna qoin.  
\v 36 Odocobil wain cabi gug uqa haun ceseli cabi dana matica suladen. Age wele odadeinwe odi odadein,” aden.   
\p
\v 37 “Cit qocna wain cabi gug uqa melah suldon. Ge, uqa maden, ‘Ija melaminu cumunuqagan,’ en.  
\v 38 Euqa wain cabi oc age wain gug uqa melah fimeig togodu madein, ‘I cabi gug huqaneh, uqa isi wain cabi ugian. Cois uqa muguh eu ege oqannu ege cajimeb qocomun cal mecnu!’ ein.  
\v 39 Odimeig age mel eu hewi sundudu cabi gel hibilohu heludimeig qocobil cal men.  
\v 40 Wain cabi gug humei uqa wain cabi cofdoc dana eeta odadigian?” aden.   
\p
\v 41 Odocob dana age Jisas jejeg hewi madoin, “Uqa dana me qee eu me qee bahic aqeceb cal mecebil uqana wain cabi dana filfil cofdocnu adigian. Age uqa wain aig wal meceb utuqagan,” doin.\f + \fr 21.41 \ft Wain cabinu je i Jisas uqa Aisaia 5.1-2dec on. Eu Anut uqa adi Isrel dana cajaca odadennu galolo je. Galolo jena gug eu odi. But 33: Dana uqa wain cabi cehen eu Anut. Wain cabi eu Anutna cul. Dana age wain cabi cofdoin eu Isrel dana cajaca, Isrel dana benbenca. But 34-36: Wain cabi gugna cabi dana eu je hahun madec dana age wele Isrel dana cajaca Anutna je maadein. Isrel age Anutna je hahun madec dana mati aqecebil cal mein. But 37-39: Wain cabi gug melah eu Jisas Krais. But 41: Dana filfil wain cabi gug uqa wain cabi aden eu Juda dana qee.\f*   
\p
\v 42 Odocobil Jisas maaden, “Jaqec je oso Anutna jaqec jena nijia eu qee sanijeleinfo? Je eu odi madena:  
\q1 ‘Meen oso meen gel cehec memei dana culein eu  
\q2 qila meen jo big gug jo hehdocnu calen.  
\q1 Eu Tibud uqadodoc odi odon.  
\q2 Ceteh eu foqona eu kobolkobolca,’ ena,” aden. \rq (Buk Song 118.22-23)\rq*   
\m
\v 43-44 Jisas odi maadimei maaden, “Eunu ija maadigina. Anut uqa uqana cul age cawaladimei dana sihul fil adigian. Age Anutna cul uqana aig qoc eu Anut utuqagan,” aden.\f + \fr 21.43-44 \ft Grik jaqec je hilah leihna age je oso tubdu jaqein eu odi: “Oso uqa meen euna toni qocob fadaligian. Meen eu dana oso dewegna toneceb eu tulohdugian,” aden. Age Luk 20.18 feiga.\f*   
\p
\v 45 Ihanec dana benbenca Farisica age Jisasna galolo je eu dah mimeig age uqa je i agenu madena eunu wawaga fogo don.  
\v 46 Odocob age uqa heweqan ein euqa dana cajaca age Jisasnu madi, uqa je hahun madec dana, ein eunu age dana cajacanu cucuiein.   
\c 22  
\s1 King melah caja ocnu sab jec galolo je  
\r (Luk 14.16-24)  
\p
\v 1 Jisas uqa haun ceseli galolo je oso maaden,  
\v 2 “Sao cul jobon eu odiwe nijia. King oso uqa melah caja ocobocobec deelnu uqana dana cunugnu ja qon.  
\v 3 Uqa dana wele ja qocna hoqagannu je sulduaden eu qila hoqagannu uqana cabi dana suladeceb li maadecebil ageqa hocnu culein.  
\v 4 Odocobil king uqa wele hoqagannu maaden eundecnu cabi dana leih haun suladeceb belimeig age li kingna je odi maadein, ‘Feiga, ijana sab ameg cilec eu wele ciluqa taweia. Ijana bulmakau dool laloca cunugha aqoqa nijeiga, ceteteh cunugha saciadoc nijia. Ija melami caja ocnu sab jecna hoigale,’ adein,” aden.   
\p
\v 5 “King uqana dana eundec age je eu qee docwe mimeig oso uqana cabina nuen, oso idadocnu nuen.  
\v 6 Leih age kingna cabi dana hewadimeig walocca madimeig aqecebil cal mein.  
\v 7 Age odi odocobil king uqa gemag beceb uqana han dana suladeceb age limeig dana ebenega golca eu cunug aqimeig agena jobon ben mani hedoin,” aden.   
\p
\v 8 “Odocobil king uqana cabi dana maaden, ‘Ijana sab eu cunug saciadoc nijiaqa dana ene hocnu maadem eu age hu jecnu culein. Agenel ceteh me ocnu ijana sab jec cewudein.  
\v 9 Eunu age belimeig jicjic cocobi dana gulucadimeig eu cunug hu ija melami caja oc deelnu sab jecnu maadeigale,’ aden.  
\v 10 Odocob cabi dana age beladimeig gulucadein eundec cunug dana meca me qeeha ehadi ahoin. Odi odoinnu melah caja ocnu jona bilec cudun eu cunug ihoc li hedon,” aden.   
\p
\v 11 “Odocobil king uqa dana hu bilein eu cunug meciadigiannu limei uqa dana oso fen. Dana eu uqa king melah caja ocnu cegulec lotoc qee tacec bilen.  
\v 12 King uqa eu fimei uqa dana eu madon, ‘Danah, hina adi ija melami caja ocnu cegulec lotoc qee tacec ene hu biligina?’ don. Odocob dana eu hawai bilen.  
\v 13 Odocob king uqa sab siwiadec dana maaden, ‘Dana eu jaih ebenca libimeig hewi jobon hahagum ehi li tu gagatuccana heleiga nuia. Ono age qada qaqaji maimaga kicodudu biluqagan,’ aden,” aden.   
\p
\v 14 “Dah meiga, Anut uqa mati utaadena euqa uqa matica qee uqana cul dunuh hoqagannu nesili cedena,” aden.   
\s1 Dana age Sisanu takis helecnu je  
\r (Mak 12.13-17; Luk 20.26)  
\p
\v 15 Farisi age ege Jisas conadec uqa hagaldocnu je oso oqan imeig togodoin.  
\v 16 Age agena malogomca Herodna sihulca je adecebil age li Jisas madoin, “Iwalgec, ege hinanu doqona, hina mele je madagana, hina Anutna jic mele iwaladagana, dana binanagaca eundecnu qee cucuiagana. Ge, hina dana saolal madec bilegina eundecnu qee jogoagana.  
\v 17 Eunu ege Sisanu takis helecnu eu tutucfo, qee tutuc qeefo? eu adi cisdogona, magaga doqa,” doin.   
\p
\v 18 Euqa Jisas uqa agena cisdoc me qee ec dumei maaden, “Age me hihili coboc, eetanu temtegina?  
\v 19 Takis helec meen qaig ihacteiga figa,” aden. Odocob age takis helec meen qaig oso ihacdoin.  
\v 20 Odocobil sisiladi maaden, “Meen qaig ina in hahun eu gaga qoc taweia? In ijanha jaqec taweia?” aden.  
\v 21 Odocob age madoin, “Eu Sisa uqana,” doin. Odocobil maaden, “Eunu age Sisana ceteteh eu Sisa uteiga. Anut toinan eu Anut uteiga,” aden.   
\p
\v 22 Age je eu maadeceb dumeig tumatumaein. Odimeig age Jisas cuculdi belein.   
\s1 Sadjusi age Jisas dana cal mein eundec ceseli cajec eunu sisildoin  
\r (Mak 12.18-27; Luk 20.27-40)  
\p
\v 23 Deel euna Sadjusi age Jisasca hoin. Sadjusi age cal mein eundec ceseli qee cajowain egina.  
\v 24 Age Jisas je oso sisildu madoin, “Iwalgec, Moses uqa loo je oso igen eu odi magen, ‘Dana oso caja umei mel qee basec cal mecebfi eu uqa waliag biah umei uqana sihul jahunecdainnu uqana mel basowasan,’ gen.  
\v 25 Aria, ege gemona waliagul 7-pela biloloig. Matu uqa caja on uqa ale melca qee cal meceb uqa biah waliag oso on.  
\v 26 Uqaha mel qee basec cal meceb uqa biah waliag oso on. Odi dih oodi waliagul 7-pela cunug ihoc lein. Dana 7-pela cal mi hedocobil  
\v 27 hibna caja euha cal men.  
\v 28 Eu fagale, cal mecnadec ceseli cajecebil caja eu dana 7-pela eundec inna caja biligian? Mahana bilen uqa 7-pela cunug biliaden,” doin.   
\p
\v 29 Odocobil Jisas jejenega hewi maaden, “Age Anutna jaqec je nijia eu qee dogina, age Anutna gagadic odocha qee dogina. Eunu age dadanecca bilegina!  
\v 30 Ge, cal mecnadec ceseli cajoqagan saen euna eu age dana caja ocobocob qee owain. Euqa age ensel sao jobon bileginawe odi biluqagan,” aden.   
\p
\v 31 “Eu cal mecnadec ceseli cajecnu je oso nijia. Age jaqec je Anut maadena eu qee sanijeleinfo? Je eu odi Anut maden:   
\q1
\v 32 ‘Ija Ebrahamna Anut,  
\q1 ija Aisakna Anut,  
\q1 ija Jekobna Anut,’ en. \rq (Kisim Bek 3.6)\rq*  
\m Anut uqa cal mein eundec agena Anut qee, uqa cebac bilegina agena Anut,” aden.  
\v 33 Dana cajaca age Jisasna je eu dah mimeig tumatumaein.   
\s1 Age Anutna loo je matunu Jisas sisildoin  
\r (Mak 12.28-31; Luk 10.25-28)  
\p
\v 34 Euqa Farisi age Jisas uqa Sadjusi conoga cufa quaden je eu dumeig age cegulein.  
\v 35 Age gemodec loo je iwaladec oso cajimei ija Jisas temdu figen imei sisildu madon,  
\v 36 “Iwalgec, loo je gagadic caunca bahic Mosesna loo je oso cunug wooladec eu cel loo je nijia?” don.   
\p
\v 37 Odocob Jisas madon, “Loo je madena:  
\q1 ‘Tibud, hinana Anutnu wawin cunugca, doloin cunugca, cisdoc cunugca euna nalug magale,’ ena. \rq (Loo 6.5)\rq*   
\m
\v 38 Eu loo je gagadic matu, eu caunca bahic.  
\v 39 Loo je gagadic oso nijia eu loo je matu uqana toodoc, eu odi madena:  
\q1 ‘Hina hinanel nalunin maganawe  
\q2 odi hina utuqain bilec\f + \fr 22.39 \ft Age Matju 19.19 feiga.\f* eundecnu nalug magale,’ ena. \rq (Wok Pris 19.18)\rq*   
\m
\v 40 Loo je gagadic lecis i ale loo je cunug agena caunca je hahun madec agena jeca eu agena gug nijia,” don.   
\s1 Jisas uqa Farisi Kraisnu sisiladen  
\r (Mak 12.35-37; Luk 20.41-44)  
\p
\v 41 Farisi age odi togodudu bibilegin Jisas uqa je oso sisiladi maaden,  
\v 42 “Age Anutna Krais eunu adi cisdogina? Uqa in melah?” aden. Odocob age madoin, “Eu Dewid Melah,” doin.   
\p
\v 43 Odocobil Jisas maaden, “Dewid uqa Kis Gun dado mudeceb uqa Kraisnu madi, ijana Tibud, en eu adinu? Ge, uqa maden:   
\q1
\v 44 ‘Anut Tibud uqa ijana Tibud odi madon,  
\q1 “Ijaca hu ebeni meulana isec bibilem  
\q2 ija odocomin hinana cad cunug hu ninijebil  
\q2 hina jaimna lahacadegan,” don,’ en. \rq (Buk Song 110.1)\rq*   
\m
\v 45 Eu feiga, Dewid uqa Kraisnu madi, uqa ijana Tibud, en, eunu adi uqa Dewid Melah bilina?” aden.   
\p
\v 46 Farisi gemona oso Jisas jejeg hewi madecnu ihoc qee nijel. Ageha deel euna dih sanan mimeig haun cetehnu sisildocnu hihibanaga qee tel.   
\c 23  
\s1 Jisas uqa Farisinu je maden  
\r (Mak 12.38-39; Luk 11.43, 46; 20.45-46)  
\p
\v 1 Odocob Jisas uqa dana cajaca uqana malogomca Farisinu je odi maaden,  
\v 2 “Loo je iwaladecca Farisica age Mosesna cabi cudun wele oin. Eunu Moses loo je iwaladenwe age odi loo je iwaladegina.  
\v 3 Eunu age odocnu je maadegina eu cunug toodu odoigale. Euqa agena odoc toodu cain odowain. Ge, age dana cajaca je maadegina euqa age madeginawe agedodoc qee toodu odogina.  
\v 4 Age ceteh culumen bahic sogimeig dana gahidoqagannu qatomogana megina. Euqa sogec eu agedodoc nag bahic hewi fecnu culegina.  
\v 5 Age ceteh odogina eu cunug egena odoc eu dana foqagan imeig odogina. Ge, agena sai euna Anutna je jaqein age ilomoga domonnaca ebeneganaca taqegina eu bagalan mudegina. Agena lotoc sucunna gos cecelacca mudegina.\f + \fr 23.5 \ft Eu Juda agena inondocnu kobol. Age Anutna jaqec je leih pepana jaqimeig pepa eu bokis nagna mimeig ilomoga domonnaca ebeneganaca taqoloig. Anutna jaqec je jaqaloig eu 4-pela eu odi: Kisim Bek 13.1-10; 13.11-16; Loo 6.4-9; 11.13-21. Juda ageha Anutna jaqec je eu Namba 15.37-41 euna nijia eu toodoloig. Age halu gohic cadibca agena lotoc sucunna jeloloig. Halu gohic eu Anutna loo je cunug toodoc bahic toodocnu cisdocnu cesuladena.\f*  
\v 6 Age sab ben jecnu age dana ijanagaca agena bilecna bilecnu gawegina. Agena cuha jona cuha cegulecnu cofadec agena bilecna bilecnu gawegina.  
\v 7 Dana age fajec cegulec cudunna age lalan mamadi tabacunadecebil gale adena. Dana age Farisi maadi madegina, ‘Meca,’ adecebil gale adena,” aden.   
\p
\v 8 “Ageqa dana ege ‘Meca,’ goqagan ec cain owain. Agena Iwaladec osol bilina, ageha cotigcotig bilegina.  
\v 9 Age Memega osol bilina, eu uqa sao jobon bilina. Eunu age dana oso mahana bilina ‘Memige,’ cain dowain.  
\v 10 Agena Ben osol bilina, eu Anutna Krais. Eunu dana age, age ‘Ben,’ geiga ec euha cain owain.  
\v 11 Oso age gemona ben bilina eu uqa age cunug cewel uadec biligian.  
\v 12 Oso uqa culai ijanel lalan mumudi bilina euqa Anut uqa dana eu cilehdugian. Oso uqadodoc jogoi waug lal qocca bilina eu Anut uqa dana eu culaug u lalan mumudeb biligian,” aden.   
\s1 Jisas uqa loo je iwaladecca Farisica age kobol me qee odogina eunu maden  
\r (Mak 12.40; Luk 11.39-52; 20.47)  
\p
\v 13-14 Jisas je haun maaden, “O loo je iwaladecca Farisica, age dana cajaca sao cul jobon lecnu jic cebec meniadegina. Euqa agedodoc lecnu culegina, odimeig leih sao cul jobon lecnu wawaga nijia euqa age cahacadegina. Eunu age me hihili coboc dana! Age walocca!” aden.\f + \fr 23.13-14 \ft Grik jaqec je hilah leihna age je oso tubdu jaqein eu odi: “O loo je iwaladec Farisica, age caja wij faninaadi agena jo heje cedegina. Age odi oodoig age dana amagana qauaadi inondoc cecelacca madegina. Eunu age me hihili coboc dana! Age Anut dana geladec saenna age ameg me qee bahic oqagan. Eunu age batut feigale!” aden. Age Mak 12.40 feiga.\f*   
\p
\v 15 “O loo je iwaladecca Farisica, age dana osol Juda kobolnu falicdugia iwaldocnu mahana jic cecelacca cobogina wagna ha cobogina. Dana eu Juda kobol ocob age uqa oloqanih jana bilec dana bahic mudegina. Uqa oloqanih jana bilecnu age wooladena. Eunu age me hihili coboc dana! Age walocca!” aden.   
\p
\v 16 “Age dado madec qa amaga galuc mecca, age walocca! Age odi madegina, ‘Dana oso uqa tempelna mele ohis ena eu ceteh gauc. Euqa dana oso uqa tempelna gold bibilenna madena eu uqa mele ohis ena, cois uqa maden odi odigian,’ egina.  
\v 17 Age gad amaga galuc mec, cel ceteh eu Anut amegna matu? Age madegina, gold eu matufo, qee tempel eu matufo? Age dogina, gold eu tempelna bilina eunu tempel eu gold odudeceb gold eu Anutnu qagu bilina. Eunu tempel eu gold wooldona.  
\v 18 Odocob age je madegina, ‘Dana oso uqa ihanec cabal ijanna mele ohis ena eu ceteh gauc. Euqa uqa ihanec ceteh cabalna bibilen euna mele ohis ena, cois uqa maden odi odigian,’ egina.  
\v 19 Age amaga galuc mec, cel ceteh eu Anut amegna matu? Age madegina, ihanec ceteh cabalna bilina eu matufo, qee ihanec cabal eu matufo? Age dogina, ihanec ceteh eu ihanec cabalna bilina eunu ihanec cabal eu ihanec ceteh odudeceb ihanec ceteh eu Anutnu qagu bilina. Eunu ihanec cabal eu ihanec ceteh wooldona.  
\v 20 Eunu dana uqa ihanec cabalna mele ohis ena eu uqa ihanec cabalnaca ihanec ceteh cunug cabalna bilina eunaca mele ohis ena.  
\v 21 Odocob dana uqa tempelna mele ohis ena eu uqa tempelnaca Anut uqa tempelna bilina eunaca mele ohis ena.  
\v 22 Odocob dana uqa sao jobonna mele ohis ena eu uqa Anutna cabal bilecnaca Anut uqa uqana cabal bilecna bilina eunaca mele ohis ena,” aden.   
\p
\v 23-24 “O loo je iwaladec Farisica, age agena ceelum filfil cabinadec am 10-pela qatanadimeig am osol eu Anut utegina. Age Anutna loo je ceteh nagnu geh cisdogina euqa Anutna loo je ceteh caunca eunu qee cisdogina. Age dana gesiladecnu kobol tutucca, waug qocca, wawaga meleecca eunu qee cisdogina. Age ceteh caunca ceteh nagca osoben odoubqa age qee odoloin. Age dado madec qa amaga galuc mecca! Age agena sabna galalec nag cedi helegina euqa kamel belucdocobil nona. Eunu age me hihili coboc dana! Age walocca!” aden.   
\p
\v 25 “O loo je iwaladec Farisica, age agena gabinca bohca hibo eu gaid wasacudegina euqa age wawaga dunuhna heje oc kobolca ija didih ecca nijia. Eunu age me hihili coboc dana! Age walocca!  
\v 26 Hina Farisi, amen galuc mecca. Casac hina gabinca bohca waug dunuh wasacudagale. Odocom hibo nijia euha soidoc migian,” aden.   
\p
\v 27-28 “O loo je iwaladec Farisica, age odi qalqalna meen hatin uqana gelgel age camasac waia senenecna baial joidein cinigwe. Qalqal meen hatin eu gelgel camasac fecnu galeca qa dunuhna cal mec dana tob tefulunuga ceteh gegehinca nijia. Eu odiwe ageha dana amagana meciadec eu tutuc odoc fegina qa wawaga dunuhna eu qauecca loo je tefacdocca nijia. Eunu age me hihili coboc dana! Age walocca!” aden.   
\p
\v 29-31 “O loo je iwaladec Farisica, age je hahun madec dana agena qalqal meen hatin cehegina, age dana cajaca ititom agena amegu bala me bahic megina. Age odi oodoig madegina, ‘Jajanigeil bilein saen euna ege biloummiqa ege jajanigeil odoin eu ege qee odoum, ege je hahun madec dana aqocomun qee cal moub,’ egina. Eu madecnana age ege dana ebenega je hahun madec dana agena golanagaca eundec agena mel biluquna ec eu camasac megina. Eunu age me hihili coboc dana! Age walocca!  
\v 32 Eunu jajanagail age silail gumna o danecebil gemona tawen eu age o danecebil am bena.  
\v 33 Age man sononec me qee, age man sononec nag! Anut gesiladeceb eu adi oloqanih jana nuecnu cagasoqagan?” aden.   
\p
\v 34-35 “Eunu feiga. Dana cajaca ititom cunug mahana bilein eu age golanaga basecdocob age dewenegana hugian. Age wele dana cajaca ititom aqecebil cal mein eu Ebelna golac basecdoc sanijec euna sanan mimei ehi lili Sekaraiana golac basecdoc ihoc len. Sekaraia, uqa Berekaia melah, age tempel hamol gunna ihanec cabalca gemona qocobil cal men. Wadacdoc eu cunug ititom sihul i dewenegana hugiannu ija je hahun madec danaca, Anutnu doc silecca danaca, Anutna je iwaladecca suladecemin ageca loqagan. Eundec age leih aqecebil cal moqagan. Leih na babalecna tuitu aqimeig caqusadecebil caculimeig cal moqagan. Leih age agena cuha jonana qisaadimeig aqati tootooadoqagan. Jobon osona bibilebil ititacadecebil busali jobon osona li bibilebil tooadi li ititacadoqagan.  
\v 36 Ija mele maadigina, aqecebil cal mein eu uqana ameg me qee oc cunug dana caja qila bilegina i dewenegana hugian,” aden.   
\s1 Jisas uqa Jerusalemnu waloc don  
\r (Luk 13.34-35; 19.41-44)  
\p
\v 37 Jisas je haun maden, “O Jerusalem, Jerusalem, Anut uqa uqana je hahun madec dana ageca suladeceb lein. Euqa age meenna aqecebil cal mein. Ija saen mati bahic mala anag uqana nag hojonna jahuladigen imei utaadenawe agena dana cajaca gabanadimig ahutecnu gale tena, euqa age ijaca hocnu culein.  
\v 38-39 Ija maadigina, age ija qila haun qee mecituwain leceb age madoqagan:  
\q1 ‘Dana eu uqa Tibud ijanna hona Anut uqa eeldoiale,’ \rq (Buk Song 118.26)\rq*  
\m odi madimeig mecituqagan,” en. Eunu Anut uqa agena jobon culdina, odocob agena jo moti heleceb tawigian, dana euna qee biluwain.\f + \fr 23.38-39 \ft Grik jaqec je hilah leihna age je i qee nijel eu odi: “Anut uqa agena jobon culdina,” en.\f*   
\c 24  
\s1 Jisas uqa age tempel wagaloqagannu maden  
\r (Mak 13.1-2; Luk 21.5-6)  
\p
\v 1 Jisas uqa tempel culimei nunuen uqana malogom uqaca humeig age tempel uqa galeca kobolkobolca cehein taweia eu ihacdocnu odoin.  
\v 2 Euqa uqa maaden, “Qila age eu cunug fegina. Ija mele maadigina, meen gel ulugedocob meen oso meen oso tatacanna cilehdoc qee biliaun. Cunug wagalecebil mahana tonoqagan,” aden.\f + \fr 24.2 \ft Je i je cecelac 5-pela Jisas maaden buk Matjuna nijen eundec 5-peladoc. Je cecelac i 24.2-25.46na nijen. Eu ceteteh eu cit qoc deelna caloqagan eunu madena.\f*   
\s1 Jisas uqa culumen mati caligiannu maden  
\r (Mak 13.3-13; Luk 21.7-19)  
\p
\v 3 Jisas uqa hibna Oliw Aluhna bibilen uqana malogom cuhanuc uqaca limeig sisildu madoin, “Aadeb eu odi odigian? ec magaga doqa. Cel gaga odocob fimeb hinana ceseli hoc saen cali hona doqan? Adi odocob fimeb mahamaha bilec saen hedugia odona ec doqan?” doin.   
\p
\v 4-5 Odocob Jisas jejenega hewi maaden, “Matica age ija ijanina mamadi hoqagan, ‘Ija Krais, ija dana Anut uqana dana caja cahahaadecnu wele nesili ehuden,’ oqagan. Eu age dana cajaca mati faninadi jic ceja qocna loqagannu dado madoqagan. Eunu oso hu faninadi dado madeceb agena jic ceja qocna lowainnu batut feigale.  
\v 6 Age han cadegina ec eunuca han hugian ec eunuca je hutan doqagan. Batut feigale. Ceteh eu cunug odigian. Eunu cain filicituwain. Euqa qee migian ec madecnu qee nijel. Eu cit qoc qee.  
\v 7 Ge, dana hatuhatu age cajimeig cilehdocobcilehdocoboqagan. Odocobil dana sihulsihul age cajimeig cilehdocobcilehdocoboqagan. Sabnu cahel bilec saen ha hugian, mim ha maha filfilna nigian.  
\v 8 Eu odoc cunugqa caja mel basecnu dain donawe odi himec sanan migian,” aden.   
\p
\v 9 “Odi odocob age dewenega tudocnu dana ebenegana madecebil eu age aqecebil cal moqagan. Mahamaha cunug agenu age ija ijani hewegina eunu age agenu gemanaga beceb sagagadoqagan.  
\v 10 Odi odocobil mati age ijanu wawaga meleec eundec wawaga lecisca meceb age ob meceb ob meceb i cobimeig sagagdocobsagagdocobi biluqagan.  
\v 11 Uhulec je hahun madec dana matica ha camas mimeig age dana cajaca mati faninadi jic ceja qocna loqagannu dado madoqagan.  
\v 12 Saen euna Anutna loo je toodu tutuc madec tonigian. Dana age loo je cilehdudu casisic odadec fulusdocob nalug mec eu dana mati wawagana daigian.  
\v 13 Euqa oso uqa waug gagadic mumudi hib cit qoc gadacna caligian eundec Anut cahahaadigian.  
\v 14 Anutna culnu me je eu mahamaha cunug qasali maadecebil ihoc lili ninijeb dana cajaca cunug dodobil hib cit qoc deel cali hugian,” aden.   
\s1 Ihulahal mec ceteh bebesacca caligian  
\r (Mak 13.14-23; Luk 21.20-24)  
\p
\v 15 Jisas je haun maaden, “Age  
\q1 ‘ihulahal mec ceteh bebesacca’ \rq (Daniel 9.27; 11.31; 12.11)\rq*  
\m tempel gunna tataweb foqagan, je hahun madec dana, Daniel, eunu je wele maden eu camas meceb eunu batut feigale,” aden. Dana uqa je i sanijina eu uqa je uqana gug doiale.  
\v 16 “Saen euna age ceteh eu fimeig dana cajaca age Judia hatuna bilegina age busali aluhnana toboqagan.  
\v 17 Oso jo ohis tatacan bilecnu cudunna bilina uqa tonimei uqana edud cedi jo dunuh lecnu cain cisdoiaun.  
\v 18 Oso cabina bilina eu uqa uqana lotoc cecelac cedecnu jobon cain hoiaun.  
\v 19 Saen euna caja waugca coboc, caja mel sim su adegina eundec walocca bahic biluqagan!  
\v 20 Busalec deel eu duan saenca cuha deelca cali hoiaunnu Anut inondoigale.  
\v 21 Ge, saen euna culumen ben bahic hugian. Gug qoc saen maha ifanennadec hocob qila wele culumen eu odi oso qee calel. Hibna ha culumen eu odi oso haun qee caleiaun.  
\v 22 Anut saen i gohic qee mudoubmi dana cajaca cunug age fadaloub. Euqa dana cajaca Anut nesili ceden bilegina agenu saen eu gohic migian,” aden.   
\p
\v 23-24 “Saen euna uhulec Kraisca uhulec je hahun madec danaca mati cali humeig age ihocfi dana cajaca Anut nesili ceden bilegina euha faninadi jic ceja qocna lecnu dado madoqagan imeig gaga filfilca kobolkobol benbenca odoqagan. Eunu oso maadecebfi, ‘Feiga, Krais ihen!’ qee, ‘Krais ono bilia!’ adecebfi wawaga cain meleeiaun.  
\v 25 Feiga, ceteh qee hoc ninijen ija ceteh eu hugiannu wele maadiga.  
\v 26-27 Amel faleec cam tobi becna sao ohis camas mimei iletec cam toni nocna ihoc lenawe Dana Melah uqa cali hocnu saen odi camas migian. Eunu age maadecebilfi, ‘Krais wadauna\f + \fr 24.26-27 \ft Age je Matju 3.1na nijia eu feiga.\f* bilia,’ adecebilfi age ono cain nui fowain, odocob ‘Krais hamol bilia,’ adecebilfi age wawaga cain meleeiaun,” aden.   
\p
\v 28 “Dana cal mec deweg ganac huluec oso ninijen man fululec benben cababac cinigwe age euna ceguluqagan,” aden.   
\s1 Cit qocna Dana Melah hugian  
\r (Mak 13.24-27; Luk 21.25-28)  
\p
\v 29 Jisas je haun maaden, “Feiga, saen euna culumen ben eu hedocob  
\q1 ‘cam tu meceb jagel qee fulacdoiaun.  
\q1 Odocob malaqa age saonadec casili tonoqagan,  
\q1 odocob saona gagadic odoc eu caji leceb hocob qeleloqagan,’” aden. \rq (Aisaia 13.10; 34.4)\rq*   
\p
\v 30 “Odocob Dana Melah uqana camas mec gaga saona camas migian. Odocob dana sihunugail cunug mahana bilegina age qada qaqaji biluqagan. Age Dana Melah gagadic odocca kobolkobol benca sao taenna neneb foqagan.  
\v 31 Uqa uqana ensel taul ben fuldocca suladeceb age belimeig uqana nesili cedec bilegina eu cunug cedoqagan. Age cam tobi becnadec cedadi ehadi li cam toni nocnadec ha ehadi ahu gabandoqagan,” aden.   
\s1 Age na dannu doc oqagan  
\r (Mak 13.28-31; Luk 21.29-33)  
\p
\v 32 Jisas je haun maaden, “Age na dan uqana odocnu cisdoigale. Uqa haun majocob age wa hoc saen qila sanan mena egina.  
\v 33 Odiwe ha age ceteh eu cunug oodob fimeig Dana Melah hugiannu taun gel jic cebecna taweia eigale.  
\v 34 Ija mele maadigina, sihul i qila bilegina ceteh qee cali hoc ninijeb qee qee meiaun.  
\v 35 Saoca mahaca qee migian euqa ijana je qee qee meiaun,” aden.   
\s1 Dana oso ceteh eu cali hugiannu saen doc oso qee bilel  
\r (Mak 13.32-37; Luk 17.26-30, 34-36)  
\p
\v 36 Jisas je haun maaden, “Ceteh eu cali hugiannu deelca auaca oso qee dona. Ensel sao jobon ono ha qee dogina. Dana Melahha qee dona. Memige Anut himec dona.  
\v 37 Noa bilen saenna dana cajaca bileinwe Dana Melahna hoc saenna odi ha biluqagan.  
\v 38 Wa sil ben qee cajec age sab ji wain ji bibilegin dana caja ocobocobi bibilegin leceb Noa wag benna tobec deelna odi odoin, ageqa qee doloin.  
\v 39 Odocob wa sil ben cajimei dana cajaca cunug fadaladen. Eu odiwe dana cajaca ageha odi oodobil Dana Melah uqana deelna hugian.  
\v 40 Odocob saen euna dana lecis cabina biluwasan. Oso ehudi beloqagan, oso eu tacewudoqagan.  
\v 41 Caja lecis ale wit meenna ibuldudu biluwasan. Oso ehudi beloqagan, oso tacewudoqagan.  
\v 42 Age agena Tibud aadeb hugian eu age qee dogina. Eunu amaga cebac bileigale!  
\v 43 Euqa ceteh i doiga. Dana jo gug uqa heje dana aadeb hu ijana ceteteh heje ugian eu doialumi uqa us qee nijoub, cebac bibili cagucagdoub. Odimei uqa heje dana culdocob uqana jo qeih qatanimei dunuh qee loub.  
\v 44 Age Dana Melah uqa qila hugian qee ec saen euna mele hugian. Eunu age saciadoc susumudi bileigale,” aden.   
\s1 Cabi dana meca cabi dana me qeecanu galolo je  
\r (Luk 12.42-46)  
\p
\v 45 Jisas je haun maaden, “Cel cabi dana uqa doc meca uqana cabi cofdu cuhadona? Eu oso uqa uqana meca uqana jo cofdoc muden. Uqa cabi dana cunug cofadigian. Agena sab saennana adigian.  
\v 46 Cabi dana eu saen uqana meca jobon ceseli humei odi oodob fecidumei uqa ben bahic ceeligian!  
\v 47 Ija mele maadigina, uqana meca uqana ceteh cunug cofdugiannu ebenna migian.  
\v 48 Euqa cabi dana me qee eu uqadodoc madimei, ‘Ijana meca uqana hocnu deel cecelac nijia,’ imei  
\v 49 cabi dana hijagul eu uqa aqecnu sanan mimei dana eu cedeceb osoben sab jiji wain jiji dalul aqeceb cocobil  
\v 50 meca eu hibna deel osona hugian. Eu saen cabi dana uqa hugiannu qee cisdoc saen euna hugian ec qee doc ninijeb hugian.  
\v 51 Uqana meca eu odi fimei qeti susul faligiannu ihoc bahic. Odimei cudun dana Anutnu wawaga qee meleec bileginana cabi dana me qee euna mudigian. Ono age qada qaqaji maimaga kicodudu biluqagan,” aden.   
\c 25  
\s1 Mel aid taula 10-pelanu galolo je  
\p
\v 1 Jisas je haun maaden, “Saen euna sao cul jobon eu odiwe mel aid taula 10-pela bilein agena dodo. Dana oso caja haun ocobocobec uqa hugiannu bilen. Mel aid taula eu age agena gowoc cedi li age jicna gulucdumeig ehudi ahoqagannu lein.  
\v 2 Mel aid taula 5-pela age dalawan mec, 5-pela age docca.  
\v 3 Mel aid taula dalawan mec eu age agena gowoc cedi ahoin qa age mool leih cedimeig qee holoin.  
\v 4 Euqa mel aid taula docca age mool agena gumna o danimeig gowocca hewadi ahoin.  
\v 5 Dana eu caja haun ocobocobec eu uqa mahuc qee hol. Odocob mel aid taula eu age amaga culumen teceb us nijein,” aden.   
\p
\v 6 “Odocob tu gemo dana oso odi utaeceb doin, ‘Dana eu uqa caja haun ocobocobec eu hona. Age hoiga, ege beli jicna gulucdumeb ehudi ahoqagan,’ en.  
\v 7 Mel aid taula eu age cunug cajimeig agena gowoc saciadoin.  
\v 8 Mel aid taula dalawan mec eu age mel aid docca eu odi maadein, ‘Egena gowoc cafuligia odona. Agena mool naha cesawigeiga,’ adein.  
\v 9 Odocob mel aid taula docca eu jejenega hewi odi maadein, ‘Qeeo, ege mool eu egenuca agenuca ihoc qee. Eunu age cois stuana belimeig agedodoc agena fajeiga,’ adein.  
\v 10 Odocob mel aid taula dalawan mec 5-pela age mool fajecnu wele bebelegin dana caja haun ocobocobec eu hon. Odocob mel aid taula leih saciadu bilein age uqaca jo dunuh ocobocobec sab ben lecebil dana age jic cebec menein,” aden.   
\p
\v 11 “Hibna mel aid taula leih age humeig madoin, ‘Tibud, Tibud, hu ege jic cebec hudigaga,’ doin.  
\v 12 Euqa uqa jejenega hewi maaden, ‘Ija mele maadigina, ija agenu qee dugina,’ aden,” aden.   
\p
\v 13 Odimei Jisas je oso tubdu maaden, “Age qee dodobil cel deelna cel auana agena Tibud uqa hugian. Eunu amaga cebac bileigale!” aden.   
\s1 Cabi dana age meen qaig cofdoinnu galolo je  
\r (Luk 19.11-27)  
\p
\v 14 Jisas je haun maaden, “Sao cul jobon eu odiwe nijia. Dana cehewanca oso uqa hatu oso nuigia bili uqana cabi dana utaadeceb hocobil uqana meen qaig age ebenegana men.  
\v 15 Uqa cabi dana dumanaganu cisdumei age dumanaga nijen eu odi toodu uqana meen qaig siwiaden. Oso uqa kina 5,000 uten, odimei oso uqa kina 2,000 uten, odimei oso uqa kina 1,000 uten. Uqa odi odimei nuen.  
\v 16 Nueceb dana uqa kina 5,000 on eu mahuc limei idadoc cabi megameg meceb kina 5,000 haun oso umei Ben uqana meen qaig euca gabandon.  
\v 17 Eu odiha dana kina 2,000 on eu uqa cabi ocna kina 2,000 haun ocob kina 4,000 men.  
\v 18 Euqa dana kina 1,000 on eu uqa nuimei maha heel hunimei uqana Benna meen qaig jahunen,” aden.   
\p
\v 19 “Saen meca gieceb dana ben uqa humei uqana cabi dana meen qaig aden eu agena cabi oc eunu togodoin.  
\v 20 Odi odimeig dana kina 5,000 on eu uqa humei dana ben madon, ‘Ben fagale, hina kina 5,000 item. Ija cabi ocna kina 5,000 haun oso om ihen,’ don.  
\v 21 Odocob uqana Ben madon, ‘Cois, hina cabi dana megameg mec me bahic! Ija nag ebenna mem eu hina cofdu cuhadumeg cabi megameg mem. Ija mati bahic ebenna mihigen. Ceeli bilec hinana Ben uqa saciadon eu ocnu ijana jona lagale,’ don,” aden.   
\p
\v 22 “Odocob dana kina 2,000 on euha humei uqana Ben madon, ‘Ben fagale, hina kina 2,000 item. Ija cabi ocna kina 2,000 haun oso om ihen,’ don.  
\v 23 Odocob uqana Ben madon, ‘Cois, hina cabi dana megameg mec me bahic. Ija nag ebenna mem eu hina cofdu cuhadumeg cabi megameg mem. Ija mati bahic ebenna mihigen. Ceeli bilec hinana Ben uqa saciadon eu ocnu ijana jona lagale,’ don,” aden.   
\p
\v 24 “Odocob dana kina 1,000 on eu uqa humei uqana Ben madon, ‘Ben, ija hinanu hina dana gagadic, hina cehelo qee cehec euna limeg aig comogona, cabina hina sab qee cehelem euna li cedi cili jagana eu ija dom.  
\v 25 Ija hina cucuihimig li hinana meen qaig mahana jahunem. Faga, hinana meen qaig ihen. Haun ogale,’ don,” aden.   
\p
\v 26 “Odocob uqana Ben madon, ‘Hina cabi dana me qee, hina cabi ol! Ija cehelo qee cehelem euna limig aig comigina, ija cabi qee cehelem euna limig casili cili jigina eu hina dom.  
\v 27 Eu melefi eunu hina ijana meen qaig eu qaig mec jona moum eu nag odi meca moubmi qila humig ijanaca nag haun sabijecca oum,’ don.  
\v 28 Uqa maaden, ‘Uqana kina 1,000 cawaldumeig uqana kina 10,000 nijen uteigale,’ aden.  
\v 29 Uqa maden, ‘Ge, oso uqana ceteteh nijia eu utecebil mati bahic uqana biligian. Euqa oso uqa cetehca qee bilina eu Anut uqa uqana nag nijia eu cawaldugian.  
\v 30 Cabi dana caunca qee eu helecebil jobon hahagum nui tu gagatuccana biligian. Ono age qada qaqaji maimaga kicodudu biluqagan,’ en,” aden.   
\s1 Dana Melah uqa dana cajaca cunug ege isi gesilgimei ameg wadacgigian  
\p
\v 31 Jisas je haun maaden, “Dana Melah uqa isi kobolkobolca uqana ensel cunugca gami toni nimeig uqa uqana king bilec cabal kobolkobolca euna biligian.  
\v 32 Dana cajaca mahamahadec age cunug hu ceguli uqa amegna tawoqagan. Sipsip cofadec uqa sipsip mecmec amnadec qagu madenawe uqaha cunug odi qagu madigian.  
\v 33 Odimei uqa sipsip eundec eben meulana isec madigian. Euqa uqa mecmec eundec eben ansena isec madigian.  
\v 34-36 King uqa odi odadimei dana cajaca ititom age eben meulana isec tawegina eundec maadigian, ‘Age ija wen teten bibiligin sab itein. Ija wa gab teten bibiligin wa itein. Ija jag bibiligin ehiti bilec cudun itein. Ija bical bibiligin age lotoc taqitein. Ija hagca bibiligin age hu soatein. Ija gihacdoc jona bibiligin age hu mecitein. Eunu Mei eeladen age hoiga, Anut uqa maha gug men saen euna uqana cul agenu saciadon eu mugumuga men qila nijia eu oiga,’ adigian,” aden.   
\p
\v 37 “Uqa odi maadeceb dana cajaca ititom age madoqagan, ‘O Tibud, ganih wen hehen mecihimeb sab ihom? Ganih wa gab hehen mecihimeb wa ihom?  
\v 38 Ganih jag bibilegen mecihimeb ehihom? Ganih bical bibilegen mecihimeb lotoc taqihom?  
\v 39 Ganih hagca bibilegenca gihacdoc jona bibilegenca li mecihom?’ doqagan,” aden.   
\p
\v 40 “Odi madocobil king jejenega hewi maadigian, ‘Ija mele maadigina, age ija cotiel i age ijanagaca qee odadein eu odi age ijaha oditein,’ adigian,” aden.   
\p
\v 41-43 “Odi maadimei dana cajaca age eben ansena isec tawegina eundec odi maadigian, ‘Age ija wen teten bibiligin sab qee itelein. Ija wa gab teten bibiligin wa qee itelein. Ija jag bibiligin qee ehitelein. Ija bical bibiligin lotoc qee taqitelein. Ija hagca bibiliginca gihacdoc jona bibiliginca qee hu mecitelein. Eunu Anut geladen age cuculti ja cijeceb catanena euna nui bileiga. Eu Setennuca uqana enselnuca saciadon nijia,’ adigian,” aden.   
\p
\v 44 “Odi maadeceb madoqagan, ‘O Tibud, ganih wenca, wa gabca, jag bibilegenca, bical bibilegenca, hagca bibilegenca, gihacdoc jona bibilegenca mecihimeb qee cewel uholom?’ doqagan,” aden.   
\p
\v 45 “Odi madocobil jejenega hewi maadigian, ‘Ija mele maadigina, age cotiel i age ijanagaca qee eundec qee odadelein eu odi ijaha qee oditelein,’ adigian.  
\v 46 Odi maadeceb dana cajaca eundec age dain adeceb catanec euna nui gaid biluqagan. Euqa dana cajaca ititom eu age cebac bilec catanec euna li gaid biluqagan,” aden.   
\c 26  
\s1 Juda dana ben age Jisas qocnu togodoin  
\r (Mak 14.1-2; Luk 22.1-2; Jon 11.45-53)  
\p
\v 1 Jisas uqa je eu cunug maadi hedumei uqana malogom maaden,  
\v 2 “Eledec Pasowa Sab Jec Ben Deel hugian eu age dogina.\f + \fr 26.2 \ft Age je Mak 14.1na nijia eu feiga.\f* Deel euna age Dana Melah Juda dana qee eundec ebenegana mudecebil age uqa na babalecna tuitu qumeig caqusecebil caculimei cal migian,” aden.   
\p
\v 3 Saen euna ihanec dana benbenca Juda agena matuca age ihanec dana agena ilo, ijan Kaiafas, uqana jona cegulimeig  
\v 4 age Jisasnu qaqahani jahuni hewi qocnu jic oso wali feqan imeig togodoin.  
\v 5 Euqa age madein, “Dana caji uqanu mimi ege cilehgowainnu Pasowa Sab Jec Ben cegulecna cain odoqaun,” ein.   
\s1 Caja oso Jisas ilona mool dedeman me bahic joiden  
\r (Mak 14.3-9; Jon 12.1-8)  
\p
\v 6 Jisas uqa Betani jobon ono Saimonna jona bilen. Saimon eu uqa wele deweg lepra hag heweceb coboloi.  
\v 7 Age ono sab jiji bibilegin caja oso meen gum eu mool dedeman me bahic fajecnu qaig ben bahic nijen eu ahumei mool eu Jisas ilona basecdon.  
\v 8-9 Euqa Jisasna malogom age eu fimeig qee gale adel, eunu gemanaga beceb madein, “Mool eu meen qaig ben bahicna idadoubmi meen qaig eu dana sawen bilec eundec siwiadoub eu me. Eunu eu meen qaig cusdoc eetanu odona?” ein.   
\p
\v 10 Jisas uqa malogom agena je dumei maaden, “Uqa me bahic oditia. Age eetanu caja eunu je madegina?  
\v 11 Ge, age gemona dana sawen bilec eundec gaid biluqagan. Ijaqa gaid age gami qee biluqaun.  
\v 12 Mool ilomina basecdoia euna uqa ija deweni heelna cisecnu saciadoia.  
\v 13 Ija mele maadigina, dana age me je maha cunug anaana qasali maadi cobimeig age caja eu oditia eu uqanu cisdoqagannu saadoqagan,” aden.   
\s1 Judas uqa Jisas ihanec dana benben ebenegana mudigiannu uh men  
\r (Mak 14.10-11; Luk 22.3-6)  
\p
\v 14 Odocob malogom 12-pela eu gemodec oso, uqa ijan Judas Iskariot, uqa ihanec dana benben cemenegana limei maaden,  
\v 15 “Ija Jisas age ebenegana mudecemin eeta oso ituqagan?” aden. Odocob age uqa meen qaig silwana mudec 30 utein.\f + \fr 26.15 \ft Meen qaig i silwana mudec ege qila qee foqona. Eu ceteh ben fajecnu ihoc. Cabi dana uqa jagel 5-pelafo, 6-pelafo cabi ufei uqa meen qaig i ugian. Age Matju 27.9-10 feiga.\f*  
\v 16 Odocobil saen euna bahic Judas uqa Jisas dewegnu ob mimei age ebenegana mudigiannu jic oso walen.   
\s1 Jisas uqana malogomca gami sab jein  
\r (Mak 14.12-21; Luk 22.7-14, 21-23; Jon 13.21-30)  
\p
\v 17 Odocob Pasowa ja qoc bred jisca qee jecnu uqana deel gun cali hon. Jisas uqana malogom uqaca humeig sisildudu madoin, “Ege ana hinaca Pasowa sab jeqannu saciadocnu gale hena?” doin.  
\v 18 Odocob uqa jejenega hewi maaden, “Age taun benna limeig dana eu je madoiga, ‘Iwalgec maheia, “Ijana saen cali hoia. Ija ijana malogom gami Pasowa ja qoc hinana jona jeqan,” heia,’ doiga,” aden.  
\v 19 Odocob malogom belimeig Jisas jejeg toodu odoin. Age Pasowa ja qoc saciadoin.   
\p
\v 20 Odocobil witic meceb Jisas uqana malogom 12-pela gami sab jec cabalna bilein.  
\v 21 Sab jiji bibileig Jisas maaden, “Ija mele maadigina, age oso ija cad ebenegana mitigian,” aden.  
\v 22 Odocob age je eu dumeig waloc adeceb abesabes sisildudu madoin, “Tibud, hina ija ec madaganafo?” doin.  
\v 23 Odocobil jejenega hewi maaden, “Oso uqa eben ija gami sab wehuc bohna tanoqa eu uqa ija cad ebenegana mitigian.  
\v 24 Dana Melah uqa wele Anutna jaqec je jaqen odi toodugian eunu je eu toodugian qa dana uqa ija cad ebenegana mitigian eu walocca biliale! Dana eu anag qee basoubmi eu me bahic nijoub,” aden.  
\v 25 Odocob Judas, uqa Jisas cad ebenegana muden, eu Jisas madon, “Meca, hina ija ec madaganafo?” don. Odocob Jisas madon, “Hina madaga odi,” don.   
\s1 Jisas uqa bred wainca malogom siwiadeceb jein  
\r (Mak 14.22-26; Luk 22.15-20; 1 Korin 11.23-25)  
\p
\v 26 Age sab jejeig Jisas bred oso umei Anut hetaga dumei feni malogom siwiadimei maaden, “Eu ija deweni. U jeiga,” aden.  
\v 27-28 Odimei uqa wain gabin umei Anut hetaga dumei malogom adimei maaden, “Wain gabin i ija golani eu Anutna bal cehec je haun. Ija Anut uqa dana cajaca mati agena silail cagasiadigiannu golani basecdugen. Age cunug wain eu jeiga.  
\v 29 Ija mele maadigina, ija wain qee jec li hibna ija age gami Meina culna haun jeqan,” aden.  
\v 30 Odocob age binan sulec due silimeig age taun ben cuculi Oliw Aluhna belein.   
\s1 Jisas uqa Pita uqanu qee sasac qugian ec maden  
\r (Mak 14.27-31; Luk 22.31-34; Jon 13.36-38)  
\p
\v 31 Odocob Jisas uqa malogom maaden, “Anutna jaqec je oso nijia eu ihen:  
\q1 ‘Ija sipsip cofadec dana qocomin  
\q1 sipsip cunug bilisadu beloqagan’ ec nijia. \rq (Sekaraia 13.7)\rq*  
\m Eunu witic ina ceteh ijaca caleceb age cunug ijanu wawaga meleec tonigian.  
\v 32 Euqa hibna Anut uqa tuliteceb ija ceseli cajimig aquniadi Galili ono nuigen,” aden.  
\v 33 Odocob Pita madon, “Leih cunug age ceteh hinaca caleceb fimeig hinanu wawaga meleec tonigianfo ija qee dugina, ijaqa qee bahic qee hinanu wawi meleec toneiaun,” don.  
\v 34 Odocob Jisas uqa Pita jejeg hewi madon, “Ija mele mahigina, witic ina mala manahal qee qoc ninijeb hina madegan, ‘Uqanu qee dugina,’ i cijeddogan,” don.  
\v 35 Odocob Pita madon, “Ija hinaca cal mewan eu nijecebfi ija hinanu qee qee sasac qugaun,” don. Odocob malogom cunugha je odi madein.   
\s1 Jisas uqa Getsemani cabina Anut inondon  
\r (Mak 14.32-42; Luk 22.39-46)  
\p
\v 36 Jisas uqana malogomca cocobi li cudun oso, Getsemani egina, euna calimeig maaden, “Age ene bibilebil ija eu usec limig Anut inondudu biligen,” aden.  
\v 37 Odimei uqa Pitaca Sebedi melahul lecisca ehadeceb limeig Jisas waug me qee meceb duman culeceb  
\v 38 malogom maaden, “Dumani culia, cal mecnu odi oditina. Age ene cebac bibili ija gami mecioqale,” aden.  
\v 39 Odi maadimei uqa nag odi qisacadi nuimei uqa ni mahuli ola maha mecidu nijimei Memeg inondon, “Mei, gabin i ija wooltecnu jic nijecebfi odocom woolti nuiale. Ija madigina eu qee odigaunqa hina madagana eu toodu odigen,” don.   
\p
\v 40 Odimei uqa malogomca limei age us ninijegin feciadimei Pita madon, “Age eundec oso ijaca aua osol cebac bilecnu uen qee nijelfo?  
\v 41 Cebac bibili inondoigale, age temadecna lowainnu. Wawaga odigen ena euqa dewenega gagadic odocca qee,” don.   
\p
\v 42 Odi madumei uqa lecisdu ceseli li Memeg inondon, “Mei, gabin i woolti nuecnu jic qee nijecebfi ija jigen, eu hina madagana eu ihoc ligian,” don.  
\v 43 Odimei caji haun ceseli malogom cemenega limei age us ninijegin feciaden. Ge, age amaga mumugcanu eu mecii bilecwe qee.  
\v 44 Uqa cuculadi haun ceseli li Memeg wele madon odi cijeddu inondon.   
\p
\v 45 Uqa malogomca ceseli humei maaden, “Age gaid jaen mumudi bileig us nijeigafo? Feiga, saen wele hoia! Age qila Dana Melah silail dana ebenegana muduqagan.  
\v 46 Cajecebil beloqa. Feiga, dana ija deweninu balijigian eu wele hona,” aden.   
\s1 Judas uqa Jisas uqana cad ebenegana muden  
\r (Mak 14.43-50; Luk 22.47-53; Jon 18.3-12)  
\p
\v 47 Uqana malogom maaaden Judas, malogom 12-pela eundec oso, uqa hon. Uqa gami dana mati bahic age han siginca han galabca hewi hoin. Ihanec dana benbenca Juda agena matuca age suladecebil hoin.  
\v 48 Aria, dana uqa Jisas uqana cad ebenegana mudigiannu maden eu uqa wele han dananu gaga oso mecnu maaden, “Dana ija cotdugen eu uqa heweiga,” aden.  
\v 49 Odocob Judas uqa mahuc Jisasca limei madon, “O Meca, feele!” don.\f + \fr 26.49 \ft Grik jaqec je hilah leihna age je fil oso jaqein eu odi: “O Iwalgec, feele!” don.\f* Odimei uqa Jisas cotdon.  
\v 50 Odocob Jisas madon, “Ijana danah, hina eeta odocnu hoga eu mahuc odoga,” don.\f + \fr 26.50 \ft Grik jaqec je hilah leihna age je fil oso jaqein eu odi: “Ijana danah, hina eetanu ene hoga?” don.\f* Odocob han dana age humeig Jisas eben gagadic hewein.   
\p
\v 51 Odocobil dana oso Jisasca gami tawein eu eben nocob han sigin umei ihanec dana ilona cabi dana qelimei dahig cagon.  
\v 52 Odocob Jisas uqa madon, “Hinana han sigin uqana cudunna haun tacaga. Ge, cunug age han siginna cadegina eundec han siginna aqecebil cal moqagan.  
\v 53 Ija ija Mei ninidocomin uqa mahuc ensel han am 12-pela wooldoc suladeceb humeig cesultecnu ihoc nijia eu qee dogonafo?  
\v 54 Euqa ija odi odocominfi jaqec je eu Anutna jaqec jena nijia eu ceteh i ihoc ligiannu ec maden eu adi ihoc ligian?” don.   
\p
\v 55 Saen euna Jisas dana am ben maaden, “Eetanu age han siginca han galabca heje oc dana cinigwe ija hewituqagannu hoiga? Ija deel cunugnana tempelna dana cajaca iwalaadi bilolig. Odocob age ija hewitecnu oso qee odoloin.  
\v 56 Euqa Anutna je hahun madec dana agena jaqec je ihoc ligiannu ceteh i cunug calen,” aden.  
\p Odi maadeceb uqana malogom cunug qisacdu busali belein.   
\s1 Age Jisas gesildoin  
\r (Mak 14.53-65; Luk 22.54-55, 63-71; Jon 18.13-14, 19-24)  
\p
\v 57 Odocob dana age Jisas hewein eu age ehudi ihanec dana agena ilo, Kaiafasna gunna mudein. Ono Juda agena loo je iwaladecca matuca cegulein.  
\v 58 Euqa Pita Jisas tabag hehewi toodu ihanec dana ilo uqana jo gel dunuh len. Uqa gel dunuh limei tempel cofdoc dana gami bilein. Uqa Jisas cel ceteh odudecebil figiannu cisdon.   
\p
\v 59 Aria, ihanec dana benbenca, Juda dana ben cunug age ceguleinca age Jisas dewegnu ob mec je amagana fec dahinigana doc eundec je walein. Oso camas meceb eu toodu geldocomun cal migian ein.  
\v 60 Odocobil dana mati bahic dewegnu ob mecnu cajimeig odi oodon fom, odi mamaden dom, uhulii madein. Euqa age ob mec je oso qee gulucdoloin. Age odi odocobil dana lecis cajimesi  
\v 61 madesin, “Dana eu maden, ‘Ija Anutna tempel wagalimig deel cijedna haun cehecnu ihoc,’ en,” esin.   
\p
\v 62 Odocobil ihanec dana agena ilo tawimei Jisas madon, “Dana lecis i hina dewennu cel je balijesina? Hina jejenela je oso qee hewi madaganafo?” don.  
\v 63 Euqa Jisas uqa jejeg qee hewel. Odocob ihanec dana ilo uqa Jisas sisildu madon, “Ija Anut cebac bilecca ijanna mahigina, hina Anutna Kraisfo? Hina Anut Melahfo? ec Anut amegna madaga doqa,” don.   
\p
\v 64 Odocob Jisas madon, “Hina madagana odi himec. Ijaqa maadigina, hibna age Dana Melah uqa Anut gagadic odocca eben meulana isec bibileb sao taenna hohob foqagan,” don.  
\v 65 Odocob ihanec dana ilo uqana lotoc hewi balahadumei maaden, “Uqa Anut lelandoia. Ege eetanu dewegnu je oso waleqan? Uqa Anut lelandoia eu age cunug dah meiga.  
\v 66 Age eeta madegina?” aden. Odocob age madein, “Uqa cal migiannu deweg je nijia,” ein.   
\p
\v 67 Age odi madecebil leih age Jisas ola cin qumeig deweg tudoin. Leih siho qaqahi  
\v 68 madoin, “Hina Anutna Krais. Eunu je hahun magaga! In dewen tudoia magaga doqa?” doin.   
\s1 Pita Jisasna malogom bilec qee sasac qon  
\r (Mak 14.66-72; Luk 22.56-62; Jon 18.15-18, 25-27)  
\p
\v 69 Age Jisas geldodogin Pita uqa maha gumu bilen. Bibilen cabi mel aid oso cemenug humei madon, “Hinaha Jisas Galilidecca bilein,” don.  
\v 70 Odocob Pita cunug amagana qee sasac qu mel aid madon, “Hina madagana eu ija dadanigina,” don.  
\v 71 Uqa gesacna jo gel jic cebecna isec leceb cabi mel aid oso ono mecidumei uqa ono tawein eundec maaden, “Dana i uqaha Jisas Nasaretdecca bilein,” aden.  
\v 72 Pitaqa haun je cagocna qee sasac qu madon, “Anut amegna madigina ija dana eu qee dugina,” don.  
\v 73 Saen nag gieceb ono tawein eundec age hu Pita madoin, “Mele bahic hinaha eundec oso. Hinana jejen eu hina Galilidec camas mihina,” doin.  
\v 74 Odocob agena kobolna uqa mele bahic mamadi maaden, “Ija dana eu qee dugina,” aden. Madeceb mala manahal qon.  
\v 75 Odocob Pita Jisas wele madon, “Mala manahal qee qoc ninijeb hina ijana biligina eu qee sasac qu cijeddogan,” don eunu dahig fogo docob jo eu cuculi nui ben bahic qajen.   
\c 27  
\s1 Age Jisas ehudi li Pailat amegna mudein  
\r (Mak 15.1; Luk 23.1-2; Jon 18.28-32)  
\p
\v 1 Walag daneceb ihanec dana benbenca Juda agena matuca cunug gabandumeig age Jisas qocobil cal migiannu je togodoin.  
\v 2 Togodu hedumeig age Jisas eben libimeig ehudi limeig Rom gabman dana matu, Pailat, ebenna mudein.\f + \fr 27.2 \ft Pailat uqa Rom dana. Rom age uqa Juda agena cofadec dana ben mudein. Juda age Jisas qocobil cal mecnu ihoc qee nijel. Eu Rom himec age dana oso qocobil cal migiannu eu madecnu ihoc. Eunu Juda age Jisas ehudi limeig Pailat ebenna mudein.\f*   
\s1 Judas fadalen  
\r (Aposel 1.18-19)  
\p
\v 3 Judas uqa Jisas dewegnu ob men eu uqa age Jisas qoqagannu geldocobil dumei uqa Jisasnu ob mennu deweg cijeceb waug tucien. Uqa meen qaig silwana mudec 30 ahu ihanec dana benbenca Juda agena matuca eundec ceseli adimei  
\v 4 maaden, “Ija silail migan. Ija dana deweg jeca qee uqanu ob migan,” aden. Odocob age uqa jejeg hewi madoin, “Eu egena je qee. Eu hinana,” doin.  
\v 5 Odocobil Judas uqa tempelna meen qaig silwana mudec 30 eu heleceb nocob tempel cuculi nuimei uqa be qagi caculimei cal men.   
\p
\v 6 Euqa ihanec dana benben age meen qaig silwana mudec 30 eu cedimeig togodudu madein, “Meen qaig silwana mudec 30 eu golacca, eu dana qonnu fajec eunu ege tempel cabinu meen qaig gabandocnu eu cois qee,” ein.  
\v 7 Age togodu wawaga osol meceb nuimeig meen qaig silwana mudec 30 euna hal qagec dana uqana maha fajein. Maha eu dana ono jag bibili cal mein age heel cisadecnu qalqal biligiannu eu fajein.  
\v 8 Eunu maha eu ijan Golac Maha qoin. Eu qila ageha odi madegina.\f + \fr 27.8 \ft Je i “qila” eu ege qila buk i sanijuquna eunu qee madena. Eu Matju uqana buk jaqen saen eunu madena.\f*  
\v 9 Eu odocna, je hahun madec dana Jeremaia, je maden eu ihoc len. Jaqec je eu wele odi madena:  
\q1 “Age meen qaig silwana mudec 30 oin.  
\q1 Eu Isrel dana caja age dana eu fajudecnu ameg odi gadac mein.   
\q1
\v 10 Meen qaig euna age hal qagec dana uqana maha oso fajein.  
\q1 Tibud maten odi odoin,” ena. \rq (Sekaraia 11.12-13; Jeremaia 19.1-13; 32.6-9)\rq*   
\s1 “Hina Juda agena kingfo?”  
\r (Mak 15.2-5; Luk 23.3-5; Jon 18.33-38)  
\p
\v 11 Jisas uqa gabman dana matu amegna tatawen gabman dana matu sisildu madon, “Juda agena king eu hinafo?” don. Odocob Jisas jejeg hewi madon, “Hina madagana eu odi himec,” don.  
\v 12 Euqa ihanec dana benbenca Juda agena matuca age dewegnu je um qu mamadegin jejenega qee hewel.  
\v 13 Odocob Pailat uqa Jisas madon, “Age dewennu je mati madegina eu qee dah melemfo?” don.  
\v 14 Euqa Jisas jejeg qee hewel. Uqa dewegnu je madec osol dihnu ha je qee wadacdu madel. Eunu gabman dana matu eu geh cisdon.   
\s1 Pailat uqa age Jisas na babalecna tuitu qoqagannu maaden  
\r (Mak 15.6-15; Luk 23.13-25; Jon 18.39–19.16)  
\p
\v 15 Pailat uqa Juda agena Pasowa Sab Jec Benna gaid gihacdoc dana oso Juda dana age ceguli togodudu ijan madecebil uqa besituadoloi.  
\v 16 Saen euna dana oso gihacdoc jona bilen eu uqa me qee odocnu binanca eu ijan Barabas.  
\v 17-18 Pailat uqa Juda dana ben age Jisasnu macumac mimi uqa ebenna mudein eu don. Eunu Juda dana age ceguli bibilegin Pailat sisiladi maaden, “Qila in besituadigennu madegina, Barabasfo, qee Jisasfo age uqanu Krais egina?” aden.  
\v 19 Pailat uqa odi gesiladec cabalna bibilen uqa aideg je odi suldocob hu madoin, “Ija witic i bebelecna uqa ola codigannu culumen ben tena. Eunu hina dana ititom i ceteh oso cain odudugaun,” doin.   
\p
\v 20 Ihanec dana benbenca Juda agena matuca age Juda dana cajaca wawaga hunecebil age Pailat Barabas besitugagale, Jisas na babalecna qogale doqagannu jajahiladi hedoin.  
\v 21 Odocobil gabman dana matu haun hu maaden, “Dana lecis bilesina eu in besituadigen?” aden. Odocob age madoin, “Barabas,” doin.  
\v 22 Pailat sisiladen, “Ija Jisas age uqanu Krais egina eu eeta odudigen?” aden. Odocob age madoin, “Na babalecna tuitu qoga!” doin.  
\v 23 Odocobil uqa maaden, “Eetanu? Uqa cel qisol mec odon?” aden. Euqa age haun utai madoin, “Na babalecna tuitu qoga!” doin.   
\p
\v 24 Pailat uqa ija cilehadecwe qee age hihibanaga teceb figina imei uqa boh oso umei wa o danimei uqa age amagana eben cucusi maaden, “Ija dana i deweg jeca qee eu uqa golac ebenina qee fagdoiaun. Eu agena himec,” aden.  
\v 25 Odocob dana cajaca cunug age jejeg hewi madoin, “Uqa golac ege dewenigena ege begawigeil dewenegana ha gad hoiale,” doin.  
\v 26 Odocob Pailat uqa Barabas besiaden. Odimei uqa han dana maadeceb age Jisas ehudimeig qisadoin. Qisadu hedocobil uqa Jisas na babalecna tuitu qumeig caqusecebil caculimei cal mecnu han dana ebenegana muden.   
\s1 Han dana age Jisas lelandoin  
\r (Mak 15.16-20; Jon 19.2-3)  
\p
\v 27 Gabman dana matu uqana han dana age Jisas ehudimeig jo gabman dana ben bilia euna lein. Age gabman dana ben uqana cudunna mudein. Odimeig age han dana am cunug utaadecebil humeig osoben cegulein.  
\v 28 Age lotoc hulitumeig lotoc golca oso eu king agena bala cinigwe tacitoin.  
\v 29 Odimeig age halu dud lalic qumeig king katakat mudimeig gulodutoin. Odimeig age sih oso ebenna mimeig amegna gob cehimeig lelandudu madoin, “O Juda agena king, feele!” doin.\f + \fr 27.29 \ft Han dana age Jisas lelandocnu gale aden, eunu age kingwe tacudein. Saen euna king age lotoc golca, king katakatca bala hewoloig. Odimeig age king cabalna bibileig age kom hewoloig.\f*  
\v 30 Odimeig age cin qudimeig sih u ilo qisadoin.  
\v 31 Age lelandu hedumeig lotoc golca hulitumeig uqana lotoc haun tacitoin. Odimeig age ehudi li na babalecna tuitu qocnu belein.   
\s1 Age Jisas na babalecna tuitu qoin  
\r (Mak 15.21-32; Luk 23.26-43; Jon 19.17-27)  
\p
\v 32 Age cali hohoig han dana age Sairinidec dana oso fein, uqa ijan Saimon. Age madocobil Jisasna na babalec gahidon.  
\v 33 Belimeig age cudun, ijan “Golgota,”\f + \fr 27.33 \ft “Golgota” eu Aram je.\f* ono calein. Golgota ijan gug eu “Ilo gatic cudun.”  
\v 34 Age wain ceteh gulihinca gabandoc eu jecnu Jisas utein. Euqa uqa ji fimei eu culen.  
\v 35 Age Jisas na babalecna tuitu qumeig caqusecebil caculeceb uqana lotoc agedodoc satu udodoig siwi cedein.\f + \fr 27.35 \ft Grik jaqec je hilah leihna je oso fil nijia, eu odi: Age Jisas na babalecna tuitu qumeig caqusecebil caculen. Odocob je hahun madec dana maden “Age ijana lotoc agedodoc satu udodoig siwi cedein,” en (Buk Song 22.18 eu ihoc ligiannu uqana lotoc agedodoc satu udodoig siwi cedein.\f*  
\v 36 Odimeig age bilimeig ono mecidudu cofdoin.  
\v 37 Age dewegnu je ob mein uqa ilo ohisna jaqi qoin, “Dana i Jisas, uqa Juda agena King,” ec jaqein.   
\p
\v 38 Age Jisas cemenug heje oc dana lecis na babalecna tuitu aqalimeig caqusalecebil caculesin. Oso eben meulana isec caculen, oso eben ansena isec caculen.  
\v 39 Odocob dana cajaca age hu li i bileig age lelandudu ilomoga culidudu  
\v 40 madein, “Hina tempel wagalimig deel cijed hedocob haun cehigen em, hinadodoc cahahadoga! Hina Anut Melahfi na babalecnadec toni naga,” ein.  
\v 41 Ihanec dana benbenca, loo je iwaladecca, Juda agena matuca ageha lelandudu madein,  
\v 42 “Uqa leih cahahaaden euqa uqadodoc cahahadocnu ihoc qee. Uqa Isrel agena King. Eunu uqa qila na babalecnadec toni neiale. Uqa odi odocobfi ege uqanu wawige meleigian.  
\v 43 Uqa Anutnu waug meleena. Uqa maden, ‘Ija Anut Melah,’ en. Eunu Anut uqanu gale docobfi Anut qila besitoiale,” ein.  
\v 44 Odocob heje dana ale uqa gami na babalecna tuitu aqalein eu aleha odi lelandosin.   
\s1 Jisas cal men  
\r (Mak 15.33-41; Luk 23.44-49; Jon 19.28-30)  
\p
\v 45 Odocob cam gemo ceheceb cam tu qocob hatu cunug gagatuc menen, ninijen li 3 kilok wesu.  
\v 46 Odocob 3 kilok odi Jisas co suli u utai maden, “Eli, Eli, lama sabaktani?”\f + \fr 27.46 \ft Je madec i Aram je, age Galili hatuna madoloig, eu Jisas uqana je madec gug bahic. Grik jaqec je hilah leihna age nag fil jaqein eu odi: “Eloi, Eloi, lama sabaktani?” en.\f* en. Je uqana gug eu odi:  
\q1 “Ijana Anut, ijana Anut, eetanu qisactaga?” en. \rq (Buk Song 22.1)\rq*   
\m
\v 47 Dana leih age ono talildu tawein je eu dah mimeig madein, “Dana eu uqa Ilaija\f + \fr 27.47 \ft “Eli, Eli” uqana hutan Aram jena eu “Ilaija” cinigwe.\f* utadona,” ein.  
\v 48 Age oso mahuc guguli gege oso umei wain gulihinca tanumei balac oso euna gihacdumei suladu ehi li jecnu cona men.  
\v 49 Euqa leih madein, “Sumuduga. Culecem ege uqa Ilaija humei cahahadugianfo, qeefo ec feqan,” ein.\f + \fr 27.49 \ft Grik jaqec je hilah leihna age je oso tubdu jaqein eu odi: Oso uqa sawal umei Jisas qeihna qon. Odocob golac waca cali hu busalen.\f*  
\v 50 Odocobil Jisas haun co suli u utaimei kis umei cal men.   
\p
\v 51 Odocob lotoc ben tempel hamol gunna caqusec tawoloi eu ohisdec baladu ni mahana cali lecisdon. Odocob mim neceb meen ulugedon.  
\v 52 Qalqal meen hatin eu hudeceb Anutna dana cajaca mati bahic wele cal mein qila i age cajein.  
\v 53 Age qalqal culimeig hibna Jisas ceseli cajeceb age Anutna jobon gun dunuh lein. Dana mati bahic age meciadein.  
\v 54 Odocob Rom agena han ilo dana 100 cofadecca age uqaca tatawi Jisas cofdoin eu age mim neceb ceteh caleceb eu fimeig cumuni madein, “Mele bahic, dana i uqa Anut Melah!” ein.   
\p
\v 55 Caja matiha onoca tatawi fein. Age Jisas cesuldudu Galilidec toodu cocobi hoin.  
\v 56 Age gemodec eu Maria Makdaladecca, Maria uqa Jems Josefca analaca, Sebedi melahul lecis analaca.   
\s1 Age Jisas deweg ganac hatin aluh qeihna hunein euna mudein  
\r (Mak 15.42-47; Luk 23.50-55; Jon 19.38-42)  
\p
\v 57 Cam toni nonon dana cehewanca oso, ijan Josef, uqa Juda agena jobon nag Arimatiadec, uqa hon. Uqa Jisasna malogom oso.  
\v 58 Uqa Pailat amegna limei Jisas deweg ganac ugiannu sisildon. Odocob uqa maadeceb age Jisas deweg utein.  
\v 59 Odocob Josef uqa Jisas deweg ganac umei lotoc senenec soidoc jeulden.  
\v 60 Odimei uqa uqana meen hatin aluh qeih hunein euna mudein. Heel eu dana oso qee mudec Jisas casac mudein. Uqa meen koldoc ben oso olocdocob eu hatin jic cebec cufa qon. Odimei nuen.  
\v 61 Maria Makdaladecca Maria osoca ale hatin amegna onoca bilesin.   
\s1 Han dana age qalqal hatin cofdoin  
\p
\v 62 Deel ceteh saciadoc hedocob deel osona ihanec dana benbenca Farisica age li Pailat fein.\f + \fr 27.62 \ft Deel osona eu Juda agena cuha deel, eu egena cuha deel nag.\f*  
\v 63 Age odi madoin, “Dana Ben, ege je oso odi cisdoqona, uhulec dana i saen uqa cebac bilec je oso maden. Uqa odi maden, ‘Hibna deel cijed hedocob ceseli cajigen,’ en.  
\v 64 Eunu hina gad madecem age cois limeig deel cijed ihoc ligiannu qalqal hatin eu cufa qu cuhadoqagan. Qee dodomun uqana malogom age humeig deweg ganac heje u belimeig age dana cajaca uhulec je odi maadowain, ‘Uqa cal mecnadec ceseli cajeian,’ adowain. Eu agena uhulec je haun eu, eu uhulec je wele maden eu wooldocdain,” doin.  
\v 65 Odocobil Pailat odi maaden, “Age han dana cedi hewi belimeig maadecebil qalqal hatin eu cofdu tawoqagan. Age belimeig ceteh cunug age odocnu madegina eu qalqal hatin eu gagadic cufa qoiga,” aden.  
\v 66 Odocob age beli qalqal hatin cufa qu cuhadoin. Age gun mudecnu sisi mec oso meen heel cufa qocna tawen eu tatacan mein. Odimeig age han dana qalqal hatin cofdocnu madein.   
\c 28  
\s1 Jisas ceseli cajen  
\r (Mak 16.1-10; Luk 24.1-10; Jon 20.1-18)  
\p
\v 1 Juda agena cuha deel hedocob cuhana deel osoldocna walag danigia oodon Maria Makdaladecca Maria osoca ale qalqal hatin fecnu belesin.  
\v 2 Odocob mim ben nen. Ge, Tibudna ensel oso sao jobondec nimei hu meen ben hatin jic cebec cufa qon eu olocdumei meen tatacan bilen.  
\v 3 Uqa ola eu amel faleecnu cinigwe. Uqana lotoc eu senenec bahic.  
\v 4 Odocob han dana age qalqal hatin cofdoin eu age uqanu cucuii qeqeli dana cal mec cinigwe ibuldoin.   
\p
\v 5 Euqa ensel uqa caja maalen, “Jisas age na babalecna tuitu qocobil cal men eu walesina eu dugina. Eunu cain cucuiuwasin.  
\v 6 Uqa madenwe uqa odi ceseli cajeia. Uqa ene qee bilel. Humesi cudun nijen eu fowasan.  
\v 7 Fimesi mahuc ceseli limesi ale uqana malogom Jisas cal mecnadec ceseli cajeia ec maadesia. Uqa aquniadi nui Galili hatuna caligian. Ono age fecidoqagan. Fesia, eu ija maaliga,” alen.   
\p
\v 8 Eunu ale cucuii ben bahic ceeli qalqal hatin mahuc cuculesi uqana malogom saadowasannu guguli belesin.  
\v 9 Odocobil Jisas uqa jicna gulucalimei maalen, “Feele,” alen. Ale uqa cemenug hu uqa jaih hewimesi gob cehi uqanu cuha fesin.  
\v 10 Odocobil Jisas maalen, “Cain cucuiuwasin. Ija cotiel age Galili hatuna beleiga ec maadesia. Age ono fecituqagan,” alen.   
\s1 Juda agena uhulec je  
\p
\v 11 Caja ale ensel maalenwe bebelesin Jisasna qalqal hatin cofdu bilein han dana eundec leih age Jerusalem humeig ihanec dana benben je cunug saadein.  
\v 12 Age Juda agena matu cunug utaadecebil age cegulimeig je eunu togodoin. Age wawaga osol meceb age han dana meen qaig mati adimeig maadein,  
\v 13 “Age dana cajaca cocobi maadeiga, ‘Ege us ninijuqun uqana malogom age humeig Jisas deweg ganac heje umeig ehi belein,’ je eu maadeiga.  
\v 14 Je eu gabman dana matu dufei uqa age me qee odadeiaunnu co cufa qoqan,” adein.  
\v 15 Odocobil han dana age meen qaig umeig ihanec dana benben age maadein odi maadi coboin. Je eu Juda dana ha gaid mamadi li qilaha mamadi cobogina.   
\s1 Jisas uqana malogom age cabi oqagannu maaden  
\r (Mak 16.14-18; Luk 24.36-49; Jon 20.19-23)  
\p
\v 16 Malogom 11-pela age cocobi Galili belein. Age aluh Jisas age wele euna loqagannu maaden euna lein.  
\v 17 Odocob euna Jisas fein. Age amegna gob cehimeig uqanu cuha fein. Euqa leih age cisdoc lecisca.  
\v 18 Jisas uqa cemenega humei odi maaden, “Anut uqa ceteh cunug agena ilo miten. Uqa ceteteh cunug mahanaca sao jobonnaca cofadecnu gagadic odocha iten.  
\v 19 Eunu age mahamaha cunug beladimeig dana cajaca ijana malogom madeiga. Age Memige Anut ijanna, uqa Melah ijanna, Kis Gun ijanna wa joadeiga.  
\v 20 Age je ija maadolig eu cunug age adem cunug iwaladecebil toodu odoqagannu maadeiga. Dogina, ija dudu age gami deel cunugna biluquna qila ina leceb mahamaha bilec saen deel euna qee migian,” aden.