\id HEB  - Amele NT and Genesis [aey] -Papua New Guinea 1997 (DBL 2014) 
\h HIBRU 
\toc1 Oso Jaqec Je i Hibru Dana Jaqiaden 
\toc2 Hibru 
\toc3 Hi 
\mt2 Oso Jaqec Je i  
\mt1 Hibru Dana Jaqiaden  
\imt1 Aqunec Je  
\ip Jaqec je i Pol uqana jaqec kobol qee toodona eunu me je doc dana age Pol eu qee jaqel ec cisdogina. Dana uqa jaqec i jaqen uqa Juda agena ihanec kobolnu du cuhadon. Doc dana age Banabasfa, Apolosfa eu jaqen ec cisdogina. In oso jaqec je i jaqen uqa Kristen Juda dana cajaca age Juda agena kobol haun ceseli ocnu cisdogina eu agena Jisas Kraisnu wawaga meleec gagadic mudecnu jaqiaden. Odimei Anut uqa Jisas Kraisna cabi ben on eunu jaqen. Eu Jisas Krais himec uqa Anutca uqana eelgec uum igecca camasac ihacgena eunu jaqen.  
\ip Jaqec je i ceteh ben cijednu madena eu odi. 1. Jisas uqa Anut Melah bahic. Jisas mahana cobon saenna uqa culumen dainca ben gahidon. Odocob odon eunu Anut uqa Jisas odudeceb uqa dana cunug wooladec calen. Eunu Anut uqa Jisas Kraisnu dana cajaca cunug cahahaadecnu ihoc (eu 2.10 feiga). Odimei Jisas uqa je hahun madec dana wele bilein eu cunugca, ensel cunugca, Mosesha eu cunug wooladen. 2. Anut uqadodoc madeceb Jisas uqa nawel tawec ihanec dana bileceb catanena. Odimei uqa Juda agena ihanec dana cunug wooladena. 3. Jisas uqa nawel tawec ihanec dana ilo, uqa sao jobon bilina. Eunu uqa dana cajaca cunug age uqanu wawaga meleena eu cahahaadecnu ihoc. Cuha fec kobol eunu Mosesna loo je madena, eu Jisasna cabi oc ben uqana galolo je himec.  
\ip Jaqec je i dana cajaca agena wawaga meleec gagadic mudecnu gale dona. Eunu eu Isrel dana cajaca wele bilein agena wawaga meleec gagadic eunu je mati madena (dac 11). Age celcel culumen gulucadecebfi cain jaen aqeiaun. Age agena wawaga meleec hewi daugdu lili cal moqagan. Age Jisas fefeig uqana kobol toodu odoqagan. Odimeig age agena sogoi coboc hawadoqagan.  
\is1 Je Dunuhnu Dado Mec  
\io1 1. Aqunec je: Ceteh haun Anut camasac muden eu ceteh weledec wooldoc (1.1-4)  
\io1 2. Krais uqa bal cehec je weledec uqana dana ben wooladec (1.5-7.28)  
\io2 A. Krais uqa ensel cunug wooladec (1.5-2.18)  
\io3 1. Anutna je eu Krais uqa ensel cunug wooladec bilia ec madena (1.5-14)  
\io3 2. Krais uqa Anutna cahahagec Anut igen eunu ege cain ahawadoqaun (2.1-4)  
\io3 3. Anutna je haun eu Krais uqa ensel cunug wooladec bilia ec madena (2.5-18)  
\io2 B. Krais uqa Moses wooldoc (3.1-4.13)  
\io3 1. Krais uqa adi Moses wooldoc bilia (3.1-6)  
\io3 2. Ege Anutna cahahagec euna limeb jaen mudeqannu gagadic moqale (3.7-4.13)  
\io2 C. Krais uqa Eron sihulna ihanec dana wooladec (4.14-7.28)  
\io3 1. Ege wawige meleec qasali madoqona eu hewi daugdoqale (4.14-16)  
\io3 2. Dana uqa adi nawel tawec ihanec dana ilo calena (5.1-10)  
\io3 3. Ege mel sim agena kobol eu culimeb Kristen dana ben caloqale (5.11-6.12)  
\io3 4. Anut wele mele je magen eunu wawige meleigian (6.13-20)  
\io3 5. Krais uqana nawel tawec ihanec dana sihul eu ihanec dana sihunugail filfil wooladec (dac 7)  
\io1 3. Kraisna ihanec cabi eu ihanec cabi weledec wooladec (dac 8-10)  
\io2 A. Kraisna bal cehec je haun eu Mosesna bal cehec je weledec wooladec (dac 8)  
\io2 B. Kraisna cuha jo gun hamol sao jobon bilia eu Mosesna talah jo gun weledec wooladec (9.1-12)  
\io2 C. Kraisna ihanec eu Mosesna ihanec weledec wooladec (9.13-10.18)  
\io2 D. Age gagadic taweigale (10.19-39)  
\io1 4. Age agena wawaga meleec euna gagadic tawoqagan (dac 11-12)  
\io2 A. Anutna dana cajaca weledec age agena wawaga meleecna gagadic tawein (dac 11)  
\io2 B. Anut uqa age melahulwe tutuc madenafi eu ceteh me bahic (12.1-11)  
\io2 C. Age adi agena wawaga meleecna gagadic tawoqagan (12.12-17)  
\io2 D. Age Saion Aluhna wele calein eunu agena wawaga meleecna gagadic taweigale (12.18-29)  
\io1 5. Cit qoc je (dac 13)  
\io2 A. Kristen cobocnu dado madec (13.1-17)  
\io2 B. Inondoc je (13.18-19)  
\io2 C. Eeladec je (13.20-21)  
\io2 D. Dahiniga mec je (13.22-23)  
\io2 E. Feele adec je (13.24-25)  
\c 1  
\s1 Anut Melah uqa cona je magen  
\p
\v 1 Wele bahic Anut uqa saen geh bahic jic filfilna uqana je hahun madec dana conogana ege jajanigeil je maaden.  
\v 2 Euqa deel hib cit qoc ina uqa Melah cona je magen. Anut uqa Melahna himec sao mahaca ifanen. Anut uqa Melahnu madi, hina ija huqani, don. Hibna hina ceteteh cunug ogan, don.  
\v 3 Melah uqa Anut meca bahic ihacgena. Uqa Anutca ale caca, uqa Anut cinigwe. Odimei uqa je gagadic odocca madeceb ceteteh cunug gaid gagadic tawena. Odimei uqa dana cajaca cunug agena silail cacuadi hedumei uqa sao jobon ono King Meca Bahic uqa eben meulana isec bilen.   
\s1 Anut Melah uqa ensel cunug wooladec bilina  
\p
\v 4 Anut uqa Melah u mudeceb uqa ensel cunug wooladen. Eu odiwe Anut uqa Melah ijan oso uten eu ensel ijanaga wooladec.  
\v 5 Ge, Anut uqa uqana ensel oso odi qee madol:  
\q1 “Hina ija melami.  
\q2 Qila ija hina memen caliga,” qee dol. \rq (Buk Song 2.7)\rq*  
\m Anut uqana ensel osonuha odi qee madel:  
\q1 “Ija uqa memeg biligen.  
\q2 Odocob uqa ija melami odi biligian,” qee el. \rq (2 Samjuel 7.14; 1 Stori 17.13)\rq*   
\m
\v 6 Odocob saen Anut uqana mel matu maha ina suldocob nigiannu ninijen uqa odi maden:  
\q1 “Anutna ensel cunug age gob cehimeig uqanu cuha foqagan,” en. \rq (Loo 32.43)\rq*   
\m
\v 7 Anut uqana ensel agenu odi maden:  
\q1 “Anut uqa uqana ensel fufu fuludocwe mudadena.  
\q2 Odocob uqa uqana cewel utoc danaha ja belicancawe mudadena,” en. \rq (Buk Song 104.4)\rq*   
\m
\v 8 Euqa Anut uqa Melahnu maden:  
\q1 “O Anut, hinana king bilec cabal eu bileceb catanigian!  
\q1 Hina hinana king culna ititom biligina.   
\q1
\v 9 Hina ititom kobol gawem.  
\q2 Hina loo je tefacdoc kobol sagagdom.  
\q1 Eunu Anut, hinana Anut ehihimei ceelec dana binainca bahic odi mihen, eu hinana danah eundec wooladem,” en. \rq (Buk Song 46.6-7)\rq*   
\m
\v 10 Odocob Anut uqaha Melah odi madon:  
\q1 “Tibud, hina gug qocna maha ifanem.  
\q2 Odimeg hina ebengulna ceteteh cunug saona nijia eu mudem.   
\q1
\v 11 Eu cunug fadaloqagan qa hina odi gaid bilegan.  
\q1 Ceteteh cunug lotoc cinigwe hilah moqagan.   
\q1
\v 12 Hina duan lotoc cecelac cinigwe qahadi helegan.  
\q2 Odimeg hina lotoc hilahwe helimeg haun oso ogan.  
\q1 Euqa hina biligina, eu odi gaid bilecem catanigian,” don. \rq (Buk Song 102.25-27)\rq*   
\p
\v 13 Anut uqa uqana ensel oso odi qee madol:  
\q1 “Ene hina ebeni meulana isec biliga.  
\q2 Ene bibilem hinana cad cilehadimig age cabal jaim bisalu isec madigen,” qee dol. \rq (Buk Song 110.1)\rq*   
\m
\v 14 Ensel age eeta? Eu age cunug eu kis himec, eu Anutna cewel utoc dana. Anut uqa dana cajaca cahahaadigian eu Anutna mugumuga mec oqagan eu cesuladecnu suladeceb ageca belegina.   
\c 2  
\s1 Anut ege cahahagen, eu ceteh ben bahic  
\p
\v 1 Eunu ege mele je dah mom eu hewi cuhadoqale. Qeefi, ege mele je toodoc eu culuqaunnu.  
\v 2 Me je jaqec Anutna ensel jajanigeil adein eu mele bahic.\f + \fr 2.2 \ft But i loo je Anut uqa Moses uten eunu maden. Age Kisim Bek dac 19-20 eu feiga. Je Kisim Bekna nijia eu enselnu je oso qee nijel. Euqa Juda age Anut uqa ensel ebenegana Moses loo je uten eunu wawaga meleen. Age Aposel 7.38ca, 7.53ca, Galesia 3.19ca euha feiga.\f* Odocob oso uqa qee toodol, tefacdon uqa ameg wadacdoc me qee on.  
\v 3 Anut ege cahahagecnu waug nijia eu ceteh me bahic. Eunu ege cahahagec eu qee hehewi cisdufeb ameg wadacdoc me qee adi wooldocnu?  
\p Tibud uqadodoc casac cahahagec eunu maden. Odocob dana leih dah mudein eu age mele bahic ec magein.  
\v 4 Saen euna Anut uqaha cahahagec je eu mele bahic ihacgen. Uqa uqana gagadic odoc eu ageca suldocob nen. Odocob kobolkobol odoc filfil calen. Odocob Kis Gun uqana bagol igec eu Anutna gale doc odinana siwiaden. Euna uqa cahahagec je eu mele bahic ihacgen.   
\s1 Jisas himec ege cahahagena  
\p
\v 5 Anut uqa maha haun hibna caligian eunu madoqona eu uqana ensel king biluqagannu qee mudadel.  
\v 6 Eu odi jaqec je oso madena:  
\q1 “O Anut, dana ege adec hina egenu cisdogona?  
\q2 Ege dana melemigeil eetanu hina ege cofgagana?   
\q1
\v 7 Hina ege saen nag odi himec ensel bisalu migem.  
\q2 Hina ege binanigeca king bilecca migem.   
\q1
\v 8 Odimeg ceteh cunug uqa jaih bisalu mecem agena ilo bilen,” ena.\f + \fr 2.8 \ft Je i Buk Songna nijia eu dana caja cunugnu maden. Euqa dana uqa Hibru jaqec je jaqen eu Jisas uqa dana calimei uqa dana caja cunugna cudun on ec cisdon. Eunu je i Buk Songna nijia eu ceteh Jisasca calen eunu tutuc madena.\f* \rq (Buk Song 8.4-6)\rq*  
\m Anut dana muden eu ceteh cunug agena ilo ec odi maden, eu ceteh cunug bahic ec maden. Euqa qila ege ceteh cunug eu dana uqa agena ilo qee bilina eu foqona.  
\v 9 Euqa ege Jisas foqona! Anutna eelgec uum igecna uqa dana cajaca mahanadec cunugnu cal migiannu Anut odudeceb saen nag odi himec uqa ensel bisalu bilen. Eunu Jisas uqa cal mec waug sogoecca egenu gahidonnu Anut king bilecca binanca muden. Eunu ege qila uqa king bilecca binanca ohis bilina eu foqona.   
\p
\v 10 Anut uqa ceteh cunug ifanena, uqa ceteh cunug hehdona. Uqa uqana dana cajaca cunug ehadi ehi leceb uqana fulacdoc ben bilec eu oqagannu waug ben tawen. Eunu uqa Jisas odudeceb cal mec waug sogoen gahidon euna dana cajaca age cahahaadecnu cali hedon. Odocob uqa dana cajaca cunug iwalaadi ehadi ehi li cahahaadena. Anut kobol odon eu tutuc bahic.  
\v 11 Jisas uqa dana cajaca agena silailnu qagu gun madena. Odocob uqaca dana cajaca qagu gun madena eu ageca Memega osol himec. Eunu uqa cotiel ec madena uqa eu odi maadecnu majag qee dona.  
\v 12 Odimei uqa Anut madona:  
\q1 “Hina eeta odom eunu ija cotiel qasali maadigen.  
\q1 Ija hina binain sulec due tamanec gemona siligen,” dona. \rq (Buk Song 22.22)\rq*   
\m
\v 13 Odimei uqa haun madena:  
\q1 “Ija Anutnu wawi mele bahic igian,” ena. \rq (Aisaia 8.17)\rq*  
\m Odimei haun ha madimei madena:  
\q1 “Ija ene biligina.  
\q2 Ija mel sim Anut iten eu ageha ijaca biluquna,” ena.\f + \fr 2.13 \ft Jisasnu je i Aisaia 8.17-18na nijia. Dana uqa Hibru jaqec je jaqen eu dana caja cunug bileginawe Jisas uqaha odi bilen eunu ihacadecnu gale don. Dana caja age Jisasnu wawaga meleen eu age Jisas waliagul. Dana cajaca age Anutnu wawaga meleena, odocob Jisas uqaha Anutnu waug meleen.\f* \rq (Aisaia 8.18)\rq*   
\s1 Jisas egena Cahahagec calen  
\p
\v 14 Mel sim eu age dana dewenega golanagaca coboginawe Jisas uqaha dana deweg golacca odi bahic umei coboloi. Uqa cal migiannu eu odi odon. Odocob uqa cal mec euna uqa dana cal mecnu gagadic odoc ebenna hewena eu fadaldocnu odi odon. Dana eu uqa Seten.  
\v 15 Dana cajaca age mahana coboc saenna cal mecnu cucuii coboloig. Odocob saen cunug maha ina biloloig cucuiec eu gihacadoloi. Eunu Jisas uqa gihacadec eunadec besiadigiannu cal men.   
\p
\v 16 Ge, eu mele bahic. Uqa ensel cesuladecnu cabi oso qee ol. Qee bahic! Uqa Ebrahamna sihul cesuladecnu cabi on.  
\v 17 Eunu uqa cotugulnu Anutna nawel tawec ihanec dana ilo eu waug qocna Anutna je toodudu Anut cewel utocnu cabi ugiannu ceteh cunug uqa cotugul cinigwe bahic calen eu nijen. Uqa Anutna gemag bec gondon. Eunu Anut uqa dana cajaca cunug agena silail cagasiadecnu ihoc.  
\v 18 Seten uqa Jisas temdocob uqa waug sogoen. Eunu uqa qila dana cajaca cunug Seten temadena eu cesuladecnu ihoc.   
\c 3  
\s1 Jisas ijan eu Moses ijan wooldoc  
\p
\v 1 O cotiel gun, Anut sao jobon bilina uqa ageha cahahaadec inu utaaden. Eunu age Jisasnu cisdu cuhadoigale. Uqanu wawige meleec ege qasali madoqona eu uqana nawel tawec ihanec dana iloca aposelca cabi ocnu Anut suldocob nen.  
\v 2 Anut uqa cabi inu ehuden. Odocob uqa Anut co toodu cuhadon. Eu odiwe Anut wele Moses uqa Anutna tamanecnu cabi ocnu ehuden. Odocob uqaha Anut co toodu cuhadon eu odi odon.  
\v 3 Anutna tamanec eu Anutna jo cinigwe. Dana jo cehena binan eu jo uqana binan wooldoc. Eu odiwe Anut uqa Jisas binan ben eu Moses binan ben eu wooldoc ec cisdon.  
\v 4 Jo cunug eu dana cehec himec. Odocob ceteh cunug muden eu Anut uqadodoc himec muden.  
\v 5 Moses uqa Anutna cewel utoc dana uqa Anutna jona cabi on. Uqa Anut co toodu cuhadon. Uqa Anut ceteh hibna madigiannu ninijen je casac qasali maden.  
\v 6 Euqa Krais uqa Anut Melah eunu uqa Anutna jo cofdoc cabi uqa melahnu Anut co toodu cuhadon. Ege ceteh wawige meleec susumudi gagadic hehewi culaug oqonafi egeha Anutna jo biluquna.   
\s1 Dana cajaca age Anutna je hibemdoin eu age malol qee biluwain  
\p
\v 7 Eunu ege Kis Gunna je dah moqale. Eu odi madena:  
\q1 “Qila age Anut jejeg dah mifeig  
\v 8 age wawaga gagadic bahic cain menowain.  
\q1 Wele bahic dana cajaca fileeeig Anut jejeg wooldumeig odoin odi cain odowain.  
\q1 Age hatu danaca qeena isec bibileig temtein.  
\q2 Saen euna agedodoc wawaga menein.   
\q1
\v 9 Hatu euna age jajanagail cabi gel 40 eu cunugna ceteteh cunug odom eu fein.  
\q1 Euqa eunu qee cisdoloin eu age temtecna mitein.   
\q1
\v 10 Eunu ija dana cajaca sihul eunu gemani geh ben odimig madem,  
\q1 ‘Saen cunugna wawaga jic bahic toodoc cuculi qolocdona.  
\q2 Age ijana jic coboc kobol eu qee toodogina,’ em.   
\q1
\v 11 Odocob ija gemani beceb cagoc je madem,  
\q2 ‘Eu age ijana jaen mudec cudun dunuh qee bahic qee lowain!’ em,” Kis Gun odi madena. \rq (Buk Song 95.7-11)\rq*   
\p
\v 12 O wawige meleec cotiel, agedodoc cofdu cuhadoiga. Qee fefeig cotoga age gemona oso uqa waugna cisdoc me qeeca culdecebil waug meleec eu felacucudi Cebac Bilec Anut eu hibemdoiaunnu.  
\v 13 Saen i eu Anut uqa qila ena uqa gaid bilia eunu deel cunugna age cotogail je meme himec maaadeig cisdoc fogo duadeiga. Qee fefebil silail kobol age gemonadec oso uhuldocob waug gagadic meneiaunnu.  
\v 14 Ege hahawan wawige meleen gagadic hewom. Eunu ege qila wawige meleec eu gagadic hehewi li egena cal mec gadac gulucdoqale. Ege eu odi odifeb ege Krais cotugul hijagul biluquna.   
\p
\v 15 Ege doqona, Anutna jaqec je madena:  
\q1 “Qila age uqa jejeg dah mifeig age wawaga gagadic bahic cain menowain.  
\q1 Wele bahic dana cajaca fileeeig Anut jejeg wooldumeig odoin odi cain odowain,” ena. \rq (Buk Song 95.7-8)\rq*   
\p
\v 16 Wele inni age Anut jejeg doin odimeig fileeeig uqa jejeg wooldoin? Eu dana cajaca cunug Moses ehadeceb Isip hatu cuculi belein eu age. Eu age himec kobol eu odi odoin.  
\v 17 Cabi gel 40 cunug eu Anut uqa innu gemag ben? Uqa dana cajaca silail moloig eu agenu gemag ben odocob cal mein eu age dewenega ganac hatu danaca qeena nijein. Anut uqa eu agenu himec gemag ben.  
\v 18 Anut uqa inni eu age cagoc je madi, uqana jaen mudec cudun dunuh qee bahic qee lowain, en? Eu dana cajaca uqa jejeg qee toodoloin eu age. Uqa eu agenu himec maden.  
\v 19 Eunu ege foqona, eu age wawaga qee meleelnu Anutna jaen mudec cudun dunuh qee lowain.   
\c 4  
\s1 Anutna dana cajaca age jaen mudec oqagan  
\p
\v 1 Anut uqa je hahun eu odi maden, “Age cois ijana jaen mudec cudun dunuh loqagan,” en eu qila bilia. Eunu ege cofdu cuhadoqale. Qee fefebil age gemonadec dana oso cahuldudu jaen mudec abusildoiaunnu.  
\v 2 Ge, ege me je dah mom wele Isrelha odi dah mein. Euqa eu age dah mein qa wawaga qee meleel. Eunu me je age dah mein eu qee cesuladel.   
\p
\v 3 Ge, ege dana cajaca wawige meleena, ege jaen mudec cudun\f + \fr 4.3 \ft Isrel age Isip hatu culdein saenna Anut uqa Moses Josuaca ale Isrel ehadi lecebil age Kenan hatuna beloqagannu gale don. Odocob maha eu agena jaen mudec cudun calecnu gale don. Euqa dana uqa Hibru jaqec je jaqen eu Anut uqana jaen mudec cudun oso nijia, eu sao jobon eunu ihacadecnu gale don. Eu uqana jaen mudec cudun gug bahic, odocob uqa wawaga meleec dana cajaca culadeceb age cudun eu dunuh loqagan.\f* eu dunuh loqona. Wele Anut uqa cudun eunu madimei maden:  
\q1 “Ija gemani beceb cagoc je odi madem,  
\q2 ‘Eu age ijana jaen mudec cudun eu dunuh qee bahic qee lowain!’ em,” en. \rq (Buk Song 95.11)\rq*  
\m Eu uqana jaen mudec cudunnu eu odi maden qa wele Anut uqa maha ifanen saen euna uqana jaen mudec cudun saciadu muden.  
\v 4 Odocob Anutna jaqec je oso deel sanijec 7-peladocnu odi madena:  
\q1 “Odocob Anut uqana cabi cunug odi hedon,  
\q2 odimei deel 7-pela euna jaen muden,” ena. \rq (Jenesis 2.2)\rq*   
\m
\v 5 Odocob Anutna jaqec je euna haun ha madena, “Eu age ijana jaen mudec cudun eu dunuh qee bahic qee lowain!” ena.  
\v 6 Odocob dana cajaca wele bahic je dah mein eu age jejeg qee toodoloinnu dunuh qee lelein. Eunu je eu qila bilia. Leih age uqana jaen mudec cudun eu dunuh loqagan.  
\v 7 Eunu Anut uqa haun deel oso men. Uqa deel eu “Qila” ec maden. Odocob hibna cabi gel mati hedocob Anut Dewid cona je qasali maden, je eu ege casac wele madoqa odi:  
\q1 “Qila age uqa jejeg dah mifeig age wawaga gagadic bahic cain menowain,” en. \rq (Buk Song 95.7-8)\rq*   
\p
\v 8 Ge, wele Josua uqa jaen mudecnu Anut maden eu adoubmi Anut haun jaen mudecnu deel osonu qee madoub.  
\v 9 Eunu ege doqona, jaen mudec cuha deel oso eu Anutna dana cajaca sumadec bilina.  
\v 10 Odocobha eu ege doqona, dana Anutna jaen mudec cudunna lena uqa uqana cabi qee mudina. Wele Anut uqadodoc uqana cabi qee mudimei jaen muden eu odiwe jaen mudina.  
\v 11 Eunu ege jaen mudec cudun euna leqannu gagadic moqale. Qee fifi dana oso age jejeg qee toodoc kobol eu wele odimeig fadalein eu odi fadaladeiaunnu.   
\p
\v 12 Anutna je eu cebac bilecca cabi gagadic u bilina. Eu aigca bahic uqana aig eu han sigin aig lecisca euha wooldoc tawena. Eu dana qohodumei dunuh bahic lena. Li dolonigeca kiscana ono lena, odimei qatanalena. Odimei gob tefulinigeca mihinogca limei qatanalena. Odimei ege wawigena gale gec cisdocca cunug nenesili fena.  
\v 13 Anut ceteh cunug muden eu oso uqa olana jahunecwe qee. Qee bahic! Ceteteh cunug eu Anut amegna camasac bahic tawegina. Odocob uqa amegna himec ege kobol cunug odoqona eunu madoqan.   
\s1 Jisas uqa egena nawel tawec ihanec dana ilo  
\p
\v 14 Jisas Anut Melah, uqa egena nawel tawec ihanec dana ilo, uqa sao jobon dunuh bahic len. Eunu ege wawige meleec qasali madoqona eu hewi daugdoqale.  
\v 15 Ge, egedodoc egena gagadic odocna silail cilehdocwe qee. Euqa egena nawel tawec ihanec dana ilo uqa egenu waug qocca qee odi qee bilina. Temgec egeca calena euha cunug temdoc uqaca calen. Euqa uqa silail qee mel.  
\v 16 Eunu ege Anutna king cabal bilecna lecnu qee cucuiuqaun. Anut uqa waug qocca, uqa eelgec uum igina. Ege uqaca lifeb uqa waug qocca eelgec uum igecca eu oqan. Odocob ege culumencafi uqa cesulgigian.   
\c 5  
\s1 Nawel tawec ihanec dana ilo Jisas uqa cahahagecnu ihoc  
\p
\v 1 Nawel tawec ihanec dana ilo mugumuga mec kobol eu odi. Anut uqa dana eu dana gemonadec ehudeceb uqa Anut cewel utona. Odimei uqa dana cajaca agena silail cagasecnu uqa Anut bagol utina, uqa Anutnu nawel tawec ihanec filfil cabi ona.  
\v 2 Uqa dana waug gagadicca qee. Eunu uqa dana cisdocca qee age Anutna jic culegina eundec cehnana iwaladena.  
\v 3 Odocob uqa dana cajaca agena silailnu Anut cagasiadecnu ihandona. Euqa uqa waug gagadicca qeenu uqadodoc uqana silail cagasitocnu Anut ihandona.   
\p
\v 4 Nawel tawec ihanec dana ilona cabi eu binan benca. Odocob dana oso uqadodoc cabi eu qee hewena. Qee bahic! Anut uqadodoc cabi eu hewigiannu ehudina, wele Eron ehudenwe.   
\p
\v 5 Krais uqaha eu odi odon. Uqa uqadodoc binan susuli nawel tawec ihanec dana ilo qee calel. Qee bahic! Anut uqadodoc nawel tawec ihanec dana ilo cabi eu gahidugiannu ehuden. Anut uqa madon:  
\q1 “Hina ija melami.  
\q2 Qila ija hina memen caliga,” don. \rq (Buk Song 2.7)\rq*   
\m
\v 6 Odocob uqa jaqec je osona ha odi maden:  
\q1 “Hina nawel tawec ihanec dana gaid bilecem catanigian, nawel tawec ihanec dana Melkisedekwe odi bilegan,” en. \rq (Buk Song 110.4)\rq*   
\p
\v 7 Wele Jisas uqa dana mahana bilen saen euna uqa Anut inondudu bilen. Anut uqa cal mecnadec cahahadocnu ihoc eunu uqa qajec benca amulig nenen utai inondon. Uqa uqadodocnu jogoi Anut bisalu himec biloloi eunu Anut uqana inondoc eu dah moloi.\f + \fr 5.7 \ft Jisas Getsemani cabina bilen saenna uqa Anut uqa culumen ben eu uqaca caligia oodon besitocnu inondon. Age Matju 26.36-46ca, Mak 14.32-42ca, Luk 22.39-46ca eu feiga. Odocob but i odi maden. Anut uqa Jisasna inondoc dah men. Anut culdocob Jisas cal men eu mele. Euqa Anut culeceb cal mec eu Jisas gaid qee hewudel. Deel cijed hedocob Anut uqa tulidocob cal mecnadec ceseli cajen. Odimei uqa ijan ben utimei uqa uqana nawel tawec ihanec dana ilo muden. Age Aposel 2.24ca, Hibru 2.9ca, Filipai 2.6-11ca euha feiga.\f*  
\v 8 Jisas uqa Anut Melah qa uqa waug sogoen culumen gahidon. Odocob uqa waug sogoen culumen gahidon euna Anut jejeg toodoc kobolnu du cuhadon.  
\v 9 Euna uqa je toodoc dana bahic calen. Eunu uqa dana age Jisas jejeg toodogina eundec agena cahahaadec gug calen. Cahahaadec eu gaid bileceb catanigian.  
\v 10 Odocob Anut uqa ehudimei madon, “Hina nawel tawec ihanec dana ilo bilegan eu nawel tawec ihanec dana Melkisedekwe odi bilegan,” don.   
\s1 Ege mel simwe gaid bilecnu cois qee  
\p
\v 11 Krais uqa nawel tawec ihanec dana Melkisedek cinwe eunu je geh bahic nijia\f + \fr 5.11 \ft Age Hibru dac 7 feiga.\f* ege je eu maadecnu qa qila agena cisdoc eu qee fogo dol. Eunu ege je eu age sildiadecnu cacanigca.  
\v 12 Ge, age wawaga meleec dana saen cecelac bilein eunu qila age iwaladec dana biloub, eu saen ihoc. Euqa age iwaladec dana qee. Agena cisdoc eu gohic, odocob dana oso haun Anutna je gug bahic eunu iwaladigiannu nijia. Age sab gagadic ocnu ihocca qee. Age su ocnu ihoc himec. Eu odi nijia.  
\v 13 Ege doqona, dana su himec jegina eu age mel sim cinigwe. Odocob age kobol ititomnu batut qee dogina.  
\v 14 Sab gagadic eu dana wele ben mein agena. Dana eundec agena cisdoc saen gehca iwaldocobilfi age kobol me qee kobol meca eu nesili docnu ihoc.   
\c 6  
\s1 Ege wawige meleec gagadic hewecnu  
\p
\v 1-2 Eunu ege Kraisna je gug sanan mec age hahawan iwalgein saen euna ege wawige meleec mel sim cinigwe. Ege je gug sanan mec eundec himec madoqonafi ege mel simwe gaid bileqan. Je gug sanan mec iwalgec eu odi, ege kobol cebac bilecca qee eunu tului falicdumeb Anutnu wawige meleecca bilecnu, odocob wa joc filfilnuca,\f + \fr 6.1-2 \ft Je i “wa joc filfil” uqana gug eu camasac qee. Dana leih age wa joc eu Kristen agena kobol qee, euqa eu Juda agena kobol ec cisdogina. Juda age Anut amegna soidoc bilecnu wa joc eu odi odoin.\f* ebenige dana ilona mecnuca, cal mecnadec cunug ceseli cajoqagannuca, silail dana eundec Anut gel hib madeceb je eu bileceb catanigiannuca. Ege je gug eundec himec madoqonafi ege jo nah gehgeh cehoqona qa jo qee cehi hedoqonawe. Cois, ege mel sim agena kobol eu culimeb wawige meleec je caunca dana ben mein eundec je madeginawe madoqale.  
\v 3 Anut uqa eunu waug nijecebfi eu mele ege odi himec odocnu.   
\p
\v 4-6 Dana leih age wele Anutnu fogo doc eu oin. Age bagol adec sao jobon ohisdec ageca nena eu wele jein. Odocob Kis Gun ageca wele nen. Eu age wele Anutna je temdumeig doin eu me bahic. Age Anutna kobolkobol odocca gesiladec gagadic odoc eu deel hib cit qocna ha eu odi caligian ecca wele doin. Dana eundec age wawaga meleec culecebilfi adi haun tului falicdocobil wawaga meleigian? Kobol eu odina eu agedodoc Anut Melah haun na babalecna tuitu qocobil cal mena. Odimeig age dana amagana uqa qesaldoqaga bili odi odogina. Eunu dana eundec age haun ceseli humeig wawaga falicdocnu jicca qee.   
\p
\v 7 Saen geh bahic wa hocob maha uqa wa eu ona. Odocob dana cajaca age maha euna sab cehi jecnu cesuladena kobol euna Anut uqa maha i eeldoc me suldocob nena.  
\v 8 Euqa euna halu dudca filfil gisinafi maha eu me qee. Saen nag odi Anutnu madi, maha eu me qee bahic, igian. Hibna ja ciji hedugian.   
\p
\v 9 Egena danah bahic, qila ege je culumenca i maadoqona. Euqa ege doqona, eu age odi qee me qee madeiaun. Qeeo. Anut eelaadi cahahaadigian.  
\v 10 Ge, Anut uqa dana me qee qee, eunu uqa age cabi cunug oin eunu qee dahig celeiaun. Qee bahic. Eu odiha age dana cajaca qagoc cesuladein euna age Anutnu nalug megina eu ihacadein. Odocob age qila odi odogina.  
\v 11 Age cunug gagadic himec mimi cabi oqagannu gale gena. Age wawaga meleec eu gagadic heheweig lecebil age qee mec gadacna caloqagannu gale gena. Eunu cetehnu wawaga meleec sumudegina eu gulucdoqagan.  
\v 12 Age cain alal adeiaun. Age dana wawaga meleec agena kobol toodoiga, mahuc qee alal adena. Dana eundec age wawaga meleecca sumudegina age Anut ceteteh uqana mel adigian en eu mugumuga oqagan.   
\s1 Anut wele mele je magen eunu wawige meleigian  
\p
\v 13 Wele Anut uqa Ebraham mele je madon. Odocob dana oso uqa ben bahic Anut wooldoc oso qee bilel, eunu Anut uqa ijanna mele ohis ecnu qee nijel. Eunu Anut uqadodoc ijanna mele ohis ec maden.  
\v 14 Uqa odi madon:  
\q1 “Ija mele je mahigina, hina eelhec ben ihecemin hinana sihul eu fulusdudu maha cunug ihoc ligian,” don. \rq (Jenesis 22.17)\rq*   
\m
\v 15 Eunu Ebraham uqa qee alal dol uqa Anut sumudi bilen oodi li hibna Anut ceteteh utigia mele je madon eu cunug on.   
\p
\v 16 Je cagoc madecnu kobol eu odi. Dana age oso ijanca uqa ijanna je cagoc madegina. Dana ijanca uqa dana age je cagoc madegina eu wooladec. Dana oso uqa je cagoc ena uqa uqana je gagadic mudecnu madena, uqa haun qee madeiaun. Odocob leih uqana je cilehdoqaga odocobil conoga afa qocnu age ihoc qee, uqana je cagoc taweia.  
\v 17 Dana cajaca age mele je Anut uqa wele maden eu age hibna mugumuga oqagan, Anut uqa uqana je haun falicdocwe qeenu age camasac bahic ihacadigia bili eunu uqa je cagoc oso uqana mele jeca gabandon.  
\v 18 Eunu ceteh lecis nijesia. Oso eu Anut uqa Ebraham mele je madon, oso eu Anut uqa uqadodoc ijanna cagoc je maden. Eu ceteh lecis euna uqana cisdoc haun falicdocwe qee, odocob uqa uhulec je madecweha qee. Eunu ege leih busali limeb uqaca bilec me om eu ceteh ege sumudi biluquna Anut uqa olanigena men taweia eu gagadic hewecnu dahinige hewena.  
\v 19 Ceteh eu ege sumudi biluquna eu ege cobocnu cahacgec tawena. Ceteh eu gagadic tawena, eu mele bahic. Eu cuha jo ben dunuh jic cebec lotoc eu cuculdi hamol bahic lena.  
\v 20 Ege ijanigenu Jisas uqa aqunigec wele hamol eu dunuh len. Odimei nawel tawec ihanec dana ilo gaid bileceb catanigiannu calen, uqa nawel tawec ihanec dana Melkisedekwe odi bilina.\f + \fr 6.20 \ft Cabi gel cunugna deel osolna Isrel agena nawel tawec ihanec dana ilo uqa cabi ben oso oloi. Uqa Isrel agena silail cagasiadecnu dool ihanec golanaga umei ehi li Anutna jona hamol gun bahic dunuh loloi. Hamol gun bahic euna Anut biloloi. Age Wok Pris 16ca, Hibru 9.1-7ca feiga. Aria, qila Jisas uqa egena nawel tawec ihanec dana ilo bahic calen. Odimei uqa Anutna jona hamol gun bahic eu sao jobonna tawena ono dana cajaca agena silail cagasiadecnu cabi ona. Age Hibru 2.17ca, 4.14ca, 8.2ca eu feiga.\f*   
\c 7  
\s1 Melkisedek uqa dana ijanca  
\p
\v 1 Melkisedek eu uqa Salem agena king,\f + \fr 7.1 \ft Hibna age Salem eu Jerusalem ein.\f* odocob uqa Anut Ohis Bahic uqana nawel tawec ihanec dana. Saen Ebraham uqa king 4-pela han benna wooladennu ceceselen Melkisedek jic cuhul ceguldumei eeldon.  
\v 2 Odocob Ebraham uqa han benna ceteteh ceden eu cunug ila meceb li am 10-pela calen. Odocob 10-pela eundec osol eu Melkisedek uten. (Melkisedek ijan eu uqana gug casac bahic eu “Ititomna King.” Odocob saen euna eu uqa Salem agena king bilennu uqa ijan eu uqana gug euha “Malol Bilecna King.”)  
\v 3 Melkisedek uqa memeg anagca odocob wele uqana sihul adi hon euha oso qee doloin. Uqana basec deelfo, cal mec deelfo adi cal men euha oso qee doloin. Uqa Anut Melah cinigwe, uqa nawel tawec ihanec dana gaid bilina.\f + \fr 7.3 \ft Je i Melkisedek uqa memeg anagca qee en uqana gug eu odi. Buk Baibelna je oso eu Melkisedek uqa memeg anagca eunu maden eu qee nijel, odimei je oso eu uqana basec deelfo, cal mec deelfo adi cal men eunu maden euha qee nijel. Eunu dana uqa Hibru jaqec je jaqen eu Melkisedek uqa Jisas nawel tawec ihanec dana gaid bilina eunu galolo oso eu odi maden.\f*   
\p
\v 4 Age feiga, Melkisedek uqa binanca ben bahic! Ege jajanige Ebraham uqa han benna ceteteh ceden eu leih cesawiton.  
\v 5 Odocob Liwaina sihul age nawel tawec ihanec dana age loo je gatiti maadeceb age Isrel dana agena ceteteh cedegina. Isrel dana age agena ceteteh cunug ila meceb li am 10-pela caleceb 10-pela eundec osol eu Liwaina sihul adegina. Eu odiwe Ebraham uqa Melkisedek ceteteh uten. Liwaina sihul age Isrel dana agena ceteteh cedegina euqa age cunug hatu osolna bilegina, age sihul osolnadec eu Ebrahamna sihul himec.  
\v 6 Melkisedek uqa Liwaina sihulnadec qee qa uqa Ebrahamna ceteteh 10-pela eundec osol cedimei uqa Ebraham Anutna mele je on eu eeldon.  
\v 7 Oso uqa eeladena uqa dana eeladec ogina wooladena eu mele bahic.   
\p
\v 8 Qila nawel tawec ihanec dana eu age dana cal megina, age ceteteh 10-pela eundec osol cedegina. Melkisedek uqaha nawel tawec ihanec dana, uqa ceteteh 10-pela eundec osol cedoloi qa uqa cebac bilina. Anutna je eu odi madena.  
\v 9 Eu je oso madecnu ihoc eu odi, Ebraham ceteteh 10-pela eundec osol Melkisedek uten saen euna Liwai, uqana sihul hib caloqagan age ceteteh 10-pela eundec osol cedoqagan, uqaha Melkisedek uten.  
\v 10 Eu adinu? Mele, Liwai uqa qee calecna Ebraham uqa Melkisedek gulucdon qa saen euna Liwai uqa jajanig Ebraham dewegna bilen.   
\s1 Nawel tawec ihanec dana ilo haun uqa nawel tawec ihanec dana weledec wooladen  
\p
\v 11 Eu nawel tawec ihanec dana Liwai sihul agena cabi oc gadac eu uqana gugna Anut uqa Isrel dana loo je aden. Eunu nawel tawec ihanec dana Liwai sihul agena cabi oc eu ihoc himecmi nawel tawec ihanec dana gug fil oso qee caloub, uqa Eronwe qee qa uqa Melkisedekwe.  
\v 12 Eunu saen nawel tawec ihanec cabi dana oso falicdocob caleceb loo je euha falicdocob calen.  
\v 13-14 Odocob egena Tibud uqanu ceteteh cunugnu maden eu uqa sihul filnadec, odocob wele uqana sihulnadec nawel tawec ihanec dana cabi oso qee hewel. Eu cunug dogina, eu uqa Juda sihulnadec calen. Odocob Moses uqa saen nawel tawec ihanec dananu maden eu uqa sihul eu oso qee ijan ol.   
\s1 Jisas uqa nawel tawec ihanec dana fil, eu Melkisedekwe  
\p
\v 15 Euqa nawel tawec ihanec dana oso uqa Melkisedek cinigwe wele calen eunu loo je eu falicdocob haun calen eu camasac bahic nijia.  
\v 16 Uqa nawel tawec ihanec dana calen. Odocob uqa dana mahanadec agena loo je gadacna qee calel qa uqana cebac bilec catanec eu gagadic odocca eunu uqa nawel tawec ihanec dana calen.  
\v 17 Eu eetanu? Anutna jaqec je eu odi madena:  
\q1 “Hina nawel tawec ihanec dana gaid bilecem catanigian, nawel tawec ihanec dana Melkisedekwe odi bilegan,” ena. \rq (Buk Song 110.4)\rq*   
\m
\v 18 Odocob loo je gadac hilah eu gagadic qee, odocob eu ceteh gauc himec cinigwe eunu gesac mein.  
\v 19 Eu eetanu? Mosesna loo je eu ceteh tutuc bahic mudecnu ihoc qee. Odocob qila ceteh me bahic ege tutuc mudecnu ihoc eu Anut igen eu bilina. Odocob ceteh me bahic eu ceteh hilah wooldona euna ege Anut cemenug loqona.   
\p
\v 20 Eu odi osoha tubdoc eu Anutna cagoc je. Nawel tawec ihanec dana calein saen euna Anutna je cagoc odi oso qee calel.  
\v 21 Euqa Jisas uqa Anutna je cagocna nawel tawec ihanec dana cacalen Anut odi madon:  
\q1 “Tibud uqa cagoc je maden eu cisdoc qee falicdoiaun.  
\q2 Hina nawel tawec ihanec dana gaid bilecem catanigian!” don. \rq (Buk Song 110.4)\rq*   
\m
\v 22 Anut uqa Jisasnu cagoc je madeceb Jisas cebac bileceb catanena. Eunu ege doqona, bal cehec je me bahic caligian, eu Anutna bal cehec je hilah wooldugian.   
\p
\v 23 Ceteh fil osoha nijia. Nawel tawec ihanec dana wele bilein eu age cal mimeig cabi eu culein. Eunu age geh bahic.  
\v 24 Euqa Jisas uqa gaid bileceb catanena eunu uqana nawel tawec ihanec dana cabi eu gaid ona.  
\v 25 Odocob uqa qilaca, odocob gaid saen cunugna ha dana cajaca age Anutca uqa ijanna legina eu uqa agenu Anut inondudu gaid bileceb catanena. Eunu uqa dana cajaca eu cahahaadecnu ihoc bilina.   
\p
\v 26 Eunu Jisas uqa nawel tawec ihanec dana ilo, uqa ihoc cesulgena. Uqa gun bahic. Uqa cahuldoc oso uqaca qee bilina, uqa silailca qee. Anut uqa qagu mudeceb silail dana cajaca gami qee bilegina. Anut uqa suldocob ohis ti sao jobon wooldoc ohis bahic bilina.  
\v 27 Nawel tawec ihanec dana ilo weledec age deel cunugna ihanecnu cabi mugumugaca biloloig. Casac age agedodoc agena silail cagasiadecnu ihanoloig. Hibna age dana cajaca agena silail cagasecnu ihanoloig. Euqa Jisas uqa cabi odica qee. Qee bahic! Uqa ihani osoldon eu saen cunug ihoc. Uqa uqadodoc uqana cebac bilec Anut uten.  
\v 28 Loo je eu uqa dana gagadic odocca qee eundec nesili ehadeceb nawel tawec ihanec dana ilo cabi hewegina. Euqa je cagoc eu hibna calen eu Dana Melah nesili ehuden. Anut uqa cabi ocnu ihoc bahic muden, uqa saen gaid odi bileceb catanena.   
\c 8  
\s1 Jisas uqa nawel tawec ihanec dana ilo sao jobon bilina  
\p
\v 1 Aria, je ilo ina ege madoqona eu odi. Egena nawel tawec ihanec dana ilo eundec uqa Anut King Ben uqana bilec cabal meulana isec sao jobon bilina.  
\v 2 Uqa nawel tawec ihanec dana ilona cabi tempelna hamol gun bahicna ono cabi eu ona. Talah jo eu sao jobon bilia, eu mele bahic. Dana oso uqa talah jo eu qee cehel. Eu Tibud uqadodoc cehen.   
\p
\v 3 Anut uqa nawel tawec ihanec dana ilo cunug age Anut loo uuteig ihanec gug filfil mecnu nesili ehadena. Eunu egena nawel tawec ihanec dana ilo uqaha ihanecnu ceteh osoca bilia.  
\v 4 Euqa nawel tawec ihanec cabi dana wele mahana cabi ogina, odimeig Mosesna loo je toododoig loo gug filfilna Anut ihandogina. Eunu egena nawel tawec ihanec dana uqa mahana bilecebfi uqa nawel tawec ihanec dana qee bilina.  
\v 5 Age cuha jo gun euna nawel tawec ihanec cabi ogina eu sao jobon uqana cuha jo gun bahic eu uqana ihicon qoc. Ge, saen Moses uqa cuha talah jo cehigia oodon Anut uqa Moses odi madon:  
\q1 “Hina cofdu cuhadoga.  
\q1 Hina ceteteh cunug gaga aluhna ihachem eu odi bahic mudegan,” don. \rq (Kisim Bek 25.40)\rq*   
\m
\v 6 Qilaqa Anut uqa Krais nawel tawec ihanec cabi uten. Odimei Anut uqa bal cehec je i mele je madeceb dana cajaca age ceteteh me bahic cedoqagan. Eunu Kraisna cabi eu nawel tawec ihanec dana cunug wooladec. Eu odiwe bal cehec je uqa Anutca uqana dana cajaca gemo muden eu bal cehec je weledec wooldona.   
\s1 Bal cehec je haun eu bal cehec je weledec wooldon  
\p
\v 7 Bal cehec je weledec eu cahuldocca qeemi Anut uqa bal cehec je haun qee madoub.  
\v 8 Euqa Anut uqa dana cajaca agena cahuldoc eu camasac mudimei maden:  
\q1 “Tibud maden, ‘Hibna deel oso dodoldona saen euna ija bal cehec je haun ijaca Isrel Juda dana cajaca ageca gemo mudigen.   
\q1
\v 9 Bal cehec je haun eu ija wele ijaca jajanagailca gemo mudem eu odi qee, saen wele ija age ebenega hewimig Isip hatu culdi ehadi nuem euna.  
\q1 Euqa age ijana bal cehec je qee hewelein, odimeig qee toodoloin.  
\q1 Eunu ija hibemadem,’ Tibud odi maden.   
\q1
\v 10 Odocob Tibud tubdu maden, ‘Saen i hedocob ija bal cehec je haun ijaca Isrel sihul ageca gemo eu odi mudigen.  
\q1 Ijana loo je eu cunug agena cisdocna miadigen.  
\q1 Odocob wawaganaha loo je jaqiadigen.  
\q1 Odimig ija agena Anut biligen, odocob age ijana dana cajaca odi biluqagan.   
\q1
\v 11 Odocob dana osolosol cunug ageca jobon osol cotogailca odi iwaladecnu cabica qee.  
\q1 Age cotogail oso qee madowain, “Hina Tibudnu doga,” qee dowain.  
\q1 Saen euna dana cajaca cunug age ijanu doqagan,  
\q2 dana cajaca mecaca sim calcalca cunug ijanu du cuhadoqagan.   
\q1
\v 12 Ija agenu wawi lal qocca eunu agena cahuldoc eu cagasiadigen.  
\q1 Odocob agena silailha eunu ija haun qee cisdugaun,’ Tibud eu odi maden,” en. \rq (Jeremaia 31.31-34)\rq*   
\p
\v 13 Anut uqa bal cehec je haunnu madeceb uqa bal cehec je weledec eu hilah ibuldon. Ceteh hilah ibuldona eu uqa cabi ocnu qee mena, saen nag odi himec gieceb qee migian.   
\c 9  
\s1 Nawel tawec ihanec dana ilo weledec uqa dool golanagana ihanoloi  
\p
\v 1 Bal cehec je hahawan calen eu cuha fecnu dana cajaca age loo gadac toodoloig. Odocob cuha fecnu ha jo gun oso dana age cehein maha ina tawoloi.  
\v 2 Talah jo oso cehein. Jo eu hamol cudun oso age Cudun Gun ec madoloig. Euna cejalca cabal ceteteh mec euca ihanec bred Anut amegna biloloi euca tawoloig.  
\v 3 Lotoc ben lecis talah jo eu qagoloig. Lotoc oso eu hamol gun aqunec cebecna fele cehein. Odocob lotoc oso hamol gun eu hibilohu isec cebecna fele cehein, cudun eu Cudun Gun Bahic ec madoloig.  
\v 4 Ihanec cabal goldna mudein euna casuc dedeman tinca mudoloig eu tawoloi. Odocob bal cehec je alildoc cudaugha tawoloi. Eu goldna mudi jahuldoc. Alildoc cudaug eu dunuh eu gabin cecelac goldna mudec manna\f + \fr 9.4 \ft Manna eu sab sao jobonnadec Anut uqa Isrel age wadau waca qeena coboin saen euna aden. Age Kisim Bek 16ca, Song 78.24ca eu feiga.\f* euna nijoloi eu tawoloi. Odocob Eronna na kom wele citac qon euca meen lecis wele Anut loo je gatiti 10-pela jaqen euca alildoc cudaug eu dunuh nijolosi.  
\v 5 Anutna ceteh cebac lecis hojonca, eu Anutna fulacdoc ben ihacadesin, eu ale alildoc cudaug eu ohis Anut jobon euna bilia ec ihicon qosin. Eu ale bisalu Anutna gemag bec gondocob dana cajaca silail cagasecnu cabal bilec eu hojonola huleldu kulodu tawolosi. Euqa qila ege ceteteh eu cunug uqana gug camasac mudecwe qee.   
\p
\v 6 Eu age ceteteh eu odi mudein, odocob deel cunugna nawel tawec ihanec dana talah cuha jo hamol cudun aqunecna ono limeig agena cabi oloig.  
\v 7 Odocob nawel tawec ihanec dana ilo uqa jo eu hamol hibilohu isec euna uqa himec loloi. Uqa cabi gel cunugna li osoldoloi. Eu uqa gauc qee loloi. Uqa dool golac umei dunuh loloi. Golac euna uqadodoc uqana silail cagasigiaca dana cajaca qee docdoc silail moloig euca cagasiadigiaca loloi.  
\v 8 Kobol euna Kis Gun uqa odi ihacgena. Talah jo eu hamol cudun aqunecna ono eu tawenafi eu gaid cabica, odocob jo gun bahic hibilohu isec euna lecnu jic eu qee camasac mel.  
\v 9 Talah cuha jo eu saen qila inu ihicon qoc. Talah cuha jo euna age loo gug filfil Anut utoloig. Odocob eu age euna Anutnu ihanec gug filfil madoloig. Euqa ceteteh cunug odoloig eu dana cuha foloig eundec agena cisdoc silec tutuc mudecwe qee, odimei age ija silail dana qee ec cisdocnu ihoc qee.  
\v 10 Ihanec eundec eu sab jecca wa gab jecca wa joc gug filfil eunu. Eu dewenige ganacna gadac himec. Anut uqa gadac eu ifanen eu toodu li uqa ceteteh cunug tutuc mudigian saenna gadac caligian.   
\s1 Krais uqa uqadodoc golacna Anut ihandon  
\p
\v 11 Euqa qila Krais uqa wele hon. Odocob uqa eu ceteteh meme calen uqana nawel tawec ihanec dana ilo. Uqa talah cuha jo me bahic weledec euha wooldoc euna wele len. Talah jo gun eu dana ebenegana qee mudelein. Odocob ha eu maha ina ceteh qee.  
\v 12 Odocob Krais uqa talah jo gun euna li osoldon. Euqa uqa sipsip golac bulmakau nag golacca umei talah jo gunna qee lel. Uqa uqadodoc golac u limei Anut ihandon. Odimei uqa golacna ege fajigimei saen gaid cunugnu ceseli oigen.  
\v 13 Dana cajaca dewenega Anut amegna gegehinca nawel tawec ihanec dana age sipsip golac bulmakau manahal golacca umeig bulmakau nag manecebil comis ibuldoloi euca dana cajaca eu age ilomogana bilisadu aqoloig. Eu odi odocobil age dewenega eu Anut amegna soidoc caloloi.  
\v 14 Euqa Krais golac ceteh eu wooldoc. Krais uqa cahuldoc osoca qee. Kis gaid bileceb catanena uqana gagadic odocna Krais uqana cebac bilec euna Anut ihandon. Eunu uqa golac eu egena cisdoc silec soidocob ege kobol filfil cebac bilecca qee eundec qee odoqaun. Eunu ege Anut cebac bilina uqa cewel utuqan.   
\s1 Krais golac bal cehec je haun gagadic muden  
\p
\v 15 Eunu dana cajaca Anutna utaec eu dodoig jejeg toodogina eundec age cebac bilec catanec wele Anut uqana mel oqagan ec maden eu mugumuga oqagannu Krais uqa bal cehec je haun mudec dana. Uqa bal cehec je hahawan calen euna dana cajaca cunug cahuldoin eu cagasiadecnu cal men.   
\p
\v 16 Ge, dana oso uqa cal meceb oso uqana ceteteh cedigiannu dana eu qee cal memen uqa jaqec je bagacna jaqena eu bal cehec je cinigwe. Odocob uqa melah uqana bal cehec je eu toodu memegna ceteteh cedigianfi uqa memeg cal meceb dana age casac du cuhadoqagan.  
\v 17 Dana cal meceb bal cehec je maden eu gagadic odocca. Euqa dana qee cal mena, uqa cebac bilina saenna, bal cehec je eu gauc bilina.  
\v 18 Eunu age weledec bal cehec je hahawan sanan mein eu gagadic mudecnu dool qagadumeig golac basecdoin.  
\v 19 Casac Moses uqa loo je gadacnu je cunug dana cajaca sildiadeceb doin. Odimei hibna uqa sipsip bulmakau nagca golanala umei waca ibuldon. Odimei hisop batac age sipsip bagic golca wele jelein eu umei dool golacna men. Odimei golac eu loo je jaqec bagacna bilisadu qumei dana cajaca cunug ilomogana ha bilisadu aqen.  
\v 20 Bilisadu aqi hedumei maden:  
\q1 “Ceteh i golac eu bal cehec je toodoqagannu Anut maaden eu gagadic mudina,” en. \rq (Kisim Bek 24.8)\rq*   
\m
\v 21 Eu odi himec Moses uqa dool golac eu talah jo gunnaca cuha fecnu ceteteh cunugnaca bilisadu aqen.  
\v 22 Eu mele, loo je madi, golacna himec ceteteh cunug soidoc ibuldona, ena. Golac qee tonecebfi eu Anut dana cajaca agena silail qee cagasiadena.   
\s1 Krais uqadodoc silail cagasigigiannu ihandon  
\p
\v 23 Age ceteteh mahana nijina eu odi soidocnu odi ihanegina eu ceteteh sao jobon nijina eu ihicon qoc bilia. Euqa ceteteh sao jobon nijina eu soidocnu ceteteh wooldoc ihoc nijia.  
\v 24 Ge, ege doqona, Krais uqa jo gun dana ebenegana mudein euna oso qee lel, eu jo gun sao jobon bilia eu ihicon qoc himec. Uqa tutuc sao jobon len. Odocob qila uqa Anut amegna camasac men, uqa ege cesulgec cabi ona.   
\p
\v 25 Cabi gel cunugna Juda agena nawel tawec ihanec dana ilo uqa dool golac umei Anut ihandugiannu talah jo gun eu cudun gunna loloi. Odocob golac eu uqadodoc golac qee. Euqa Jisas uqa odi qee odol. Uqa uqadodoc golac umei euna Anut ihandon. Uqa eu odi oodi haunhaun qee odol.  
\v 26 Uqa haunhaun eu odi odoubmi waug sogoec euha haunhaun dain tebandoub, Anut maha ifanen saenna sanan mimei hu deel ina calen. Euqa qila i saen cit qocna uqa mahana ni osoldon. Odocob uqa silail cagasigiannu uqadodoc cebac bilec Anut ihandon.  
\v 27 Dana cajaca cunug age cal mi osoldogina. Odimeig hibna age Anut amegna tawecebil uqa gesiladigian.  
\v 28 Eu odi himec Krais uqa ihandumei dana cajaca cunug agena silail cagasiadigiannu cal mi osoldon. Odocob hibna uqa ni lecisdugian qa eu uqa silail cagasecnu qee neiaun. Uqa dana cajaca uqa cahahaadigiannu mele bahic sumudi bilegina eunu ni lecisdugian.   
\c 10  
\s1 Ihanec weledec silail cagasecnu ihoc qee  
\p
\v 1 Mosesna loo je eu ceteteh hibna caligian eu mele bahic qee, eu ihicon qoc himec foqona. Loo je eu age ihanec eu odi himec cabi gel cunugna ihani oqagan ec madena. Eunu loo je eu dana cajaca age Anut cuha fecnu cemenug legina ihanec euna tutuc madecwe qee. Eu agena silail cagasiadecnu ihoc qee.  
\v 2 Loo je eu ihoc odadeceb tutuc bahic caloubmi eu age haunhaun qee ihanoub. Dana cajaca cuhana houb eu ihanec osol himecna wele haun ibuldoub eu age wawagana silailca qee ec tebandoub.  
\v 3-4 Euqa bulmakau manahal sipsip golanagaca eu agena silail cagasiadecnu ihoc qee bahic. Eunu cabi gel cunugna ihanec euna age haun agena silailnu cisdoloig.   
\p
\v 5 Eunu saen Krais uqa mahana nimei uqa Anut odi madon:  
\q1 “Age dool qumeig ihanhecnu hina culuguna.  
\q2 Euqa hina deweg ganac oso itegannu saciadom bilia.   
\q1
\v 6 Hina age dool manecna silail cagasec ocnu ihanhec eu hina qee gale hena.   
\q1
\v 7 Eunu qila ija odi madigina,  
\q2 ‘O Anut, ija wele niga.  
\q1 Wele ijanu jaqec je bagacna jaqein odi qila ija hinana cisdoc toodugennu niga,’ igina,” don. \rq (Buk Song 40.6-8)\rq*   
\m
\v 8 Uqa casac loo je kobolna ihanoloig eunu madimei maden, “Age dool qumeig ihanhecnu hina culuguna. Odocob hina age dool manecna silail cagasec ocnu ihanec eu hina qee gale hena,” en.  
\v 9 Odimei tubdu maden, “O Anut, ija hinana cisdoc toodugennu wele niga,” en. Eu odinu Anut uqa ihanec kobol weledec eu qee meceb uqa Kraisna ihanec kobol haun eu uqana cudunna cehen.  
\v 10 Jisas Krais uqa Anutna gale doc toodon. Odimei uqa uqadodoc deweg ganac euna Anut ihandu osoldon. Eu odina uqa ege qagu migeceb silailca qee ibuldom.   
\s1 Krais uqana ihanec eu silail cagasecnu ihoc  
\p
\v 11 Juda agena nawel tawec ihanec dana cunugca odi tawimeig deel cunugna agena cabi oloig. Age haunhaun ihanec kobol eundecna himec ihanoloig. Euqa ihanec eu odi eu silail cagasigecwe qee.  
\v 12 Euqa Krais uqa silail cagasecnu ihani osoldon eu saen cunugnu ihoc. Uqa eu odiodi hedumei ti Anut eben meulana isec bilen.  
\v 13 Uqa eu odi bibili Anut uqana cad uqa jaih bisalu isec madigiannu saen susumudi bilina.  
\v 14 Eunu uqa ihanec osolna himec dana cajaca qagu madeceb agena silail cunug cagasiaden. Odocob age saen cunug silailca qee bilecebil catanigian.   
\p
\v 15 Odocob Kis Gunha odi qasali magimei uqa casac magen:   
\q1
\v 16 “Tibud madena, ‘Saen hibna odi leceb ija ageca bal cehec je oso eu odi mudigen.  
\q1 Ijana loo je eu cunug age wawagana miadigen.  
\q2 Odocob cisdocnaha jaqiadigen,’ ena,” gen. \rq (Jeremaia 31.33)\rq*   
\m
\v 17 Odocob uqa je eu tubdu maden:  
\q1 “Ija agena silailca kobol me qee odocca eunu haun qee cisdugaun,” en. \rq (Jeremaia 31.34)\rq*   
\m
\v 18 Anut dana cajaca agena silail cagasiadeceb eunu nawel tawec ihanec dana age silail cagasecnu ihandoc eu qee nijiaun.   
\s1 Ege wawige mele bahic eceb Anut cemenug lecnu  
\p
\v 19 O wawige meleec cotiel, Jisas golacna ege silailca qee biluquna. Eunu ege ihoc Anutna jo gunna lecnu, odocob eunu cain cucuiuqaun.  
\v 20 Jisas uqa jo gun bahic euna lecnu jic haun huden. Eu lotoc ben oso cebecna fele cehec tawen eu cebac bilec jic euna gemona isec len. Jic haun eu cebac bilecca, eu Jisas uqadodoc deweg.\f + \fr 10.20 \ft Jo gun bahic eu hamol gun bahic Anutna jo dunuh nijia. Ono Anut bilen. Wele nawel tawec ihanec dana ilo himec uqa hamol eu dunuh limei Anut cemenug bahic tawecnu ihoc. Dana oso ihoc qee. Odocob age Jisas deweg baladocobil na babalecna cal men saen euna lotoc ben tempel hamol gunna caqusec tawoloi eu ohisdec baladu ni mahana cali lecisdon. Age Mak 15.38 feiga.\f*  
\v 21 Egena nawel tawec ihanec dana ilo uqa Anutna cuha jo cofdona uqa dana meca bahic.  
\v 22 Uqa ege wawige soidudu odoc me qee ege wawigena tebandolob eu ititacdugiannu uqa golac ege wawige dunuh bilisadu qigen. Odimei dewenige wa cataniecna wa joigen. Eunu ege wawigena uhulec eu cunug ititacdumeb Anutnu himec wawige mele bahic eceb uqa cemenug leqan.  
\v 23 Ege ceteh me sumudi biluquna eunu qasali madoqona eu ege gagadic hewecnu, cain felacuduqaun. Ege doqona, ceteteh cunug eu Anut mudigiannu wele maden eu mele bahic mudigian.  
\v 24 Ege wawige meleec cotigeil nalunuga mecebmecebecnu odocob kobol me odudocobdocoboqagannu tuliadecnu cisdoqale.  
\v 25 Ege wawige meleec cotigeil gami ceguli bilec kobol eu cain culuqaun, eu odi dana leih odogina. Tibudna deel eu dodoldona eu dogina. Eunu ege wawige meleec cotigeil gagadic madec cabi gagadic ocnu.   
\s1 Ege Anut Melah cain hibemdoqaun  
\p
\v 26 Ege mele jenu dodob hibna egedodoc egena gale gecna silail kobol toodu odifeb silail eu cagasecnu ihanec osoca qee.  
\v 27 Euqa ege geh cucuii gesiligec deel susumudi bileqan eu himec qa nijia. Odocob ja dain cahulec Anutna cad eundec cijadigiannu odi ciciji nijina.  
\v 28 Ege doqona, dana oso uqa Mosesna loo je wooldodob dana lecisfo, cijedfo odi fimeig uqana cahuldoc eunu qasali madeginafi dana eunu qee waloc adena. Odocob age dana eu qocobil cal mena.  
\v 29 Eunu dana Anut Melah hibemdonanu age adi cisdogina? Anut uqa Krais golacna egeca bal je haun cehen. Dana eu uqa Kraisna ihanec golac eu dana qagoc muden eu cewudina. Euqa dana eu ihanec golac eu ceteh gauc ena. Odimei uqa Kis eelgec uum igina eunu kobol me qee bahic odona. Uqa ameg me qee wadacdoc ben ugian.  
\v 30 Ge, Anut uqa odi maden uqanu ege doqona:  
\q1 “Cahuldoc kobol wadacdoc eu ijana cabi.  
\q1 Ijadodoc ameg me qee wadacdugen,” en. \rq (Loo 32.35)\rq*  
\m Odimei haun tubdu maden:  
\q1 “Tibud uqadodoc uqana dana cajaca gesilec deelna gesiladigian,” en. \rq (Loo 32.36; Buk Song 135.14)\rq*   
\m
\v 31 Cebac Bilec Anut uqa dana oso ameg me qeena wadacdugiannu gagadic hewecebfi eu ceteh me qee, mumusacca bahic dana eu gulucdugian.   
\s1 Ege wawige meleecna gagadic tawecnu  
\p
\v 32 Euqa age saen wele bileinnu cisdoiga, Anutna fulacdoc oin saen euna. Saen euna age cabi gagadic adein, odimeig age dewenega geh tudoin. Euqa age gagadic mein.  
\v 33 Saen leih age dana cajaca cunug amagana madecebil tawoloig, odimeig amagana je me qee maadoloig, odimeig eu age me qee odadecebil culumen gahiduadoloig. Odocob saen leih age danaca culumen odi gahidoloig eu age gami ihol mimeig cesuladoloig.  
\v 34 Ge, age agena ceteteh bahic eu qee cedelein eu gaid ageca biligian ec wele doin. Eunu age dana cajaca age wawaga meleenanu gihacdoc jona bileinnu waloc aden. Odocob saen leihna dana agena ceteteh cediadein qa age ceelecca hawaadein.   
\p
\v 35-38 Eunu age kobol me wele odoin eu cisdoiga. Age wawaga gagadic meleecebfi age ameg me bahic oqagan. Age gagadic tawifeig Anutna je ihoc toodoqagan. Odocob ceteh me eunadec wele Anut adigia maden eu oqagan. Uqa maden:  
\q1 “Eu saen cecelac qee.  
\q2 Saen nag bahic odi himec dana hocnu madena uqa hugian.  
\q1 Uqa qee daleeiaun.  
\q1 Euqa ijana dana cajaca ititom age wawaga meleeceb cebac biluqagan.  
\q1 Euqa oso uqa waug meleec eu culifei ija wawi uqanu me qee meiaun,” en. \rq (Habakuk 2.3-4)\rq*  
\m Eunu agena wawaga meleec gagadic eu cain culuwain.   
\p
\v 39 Euqa ege dana cajaca wawaga meleec felacudimeig fadalegina odi qee. Ege Anutnu wawige meleeceb uqa cahahagigian eu odi.   
\c 11  
\s1 Wawaga meleec kobolnu gug  
\p
\v 1 Wawige meleec kobol eu odi. Ege wawige eu Anut wele ege ceteteh igigiannu maden eu gagadic hehewi susumudi biluquna. Odocob ceteteh ege amige qee fec eu ege wawige eunu fogo docca biluquna.  
\v 2 Dana wele bahic biloloig wawaga meleecca eunu Anut maden, “Eu agena kobol eu me bahic,” en.  
\v 3 Ege wawige meleecnu Anut uqa je madenna himec sao mahaca ifanen ec doqona. Eunu ceteteh cunug foqona eu Anut uqa ceteh ege amigena fecwe qee euna muden.   
\s1 Ebelca, Inokca, Noaca age Anutnu wawaga meleen  
\p
\v 4 Ebel uqa Anutnu waug meleennu ihandon. Odocob uqana ihanec eu me bahic, eu Keinna ihanec wooldon. Mele, Ebel uqa Anutnu waug meleen eunu Anut uqa uqanu dana ititom ec maden. Anut uqa Ebel loo utoloi eunu gale doloi. Ebel uqa wele cal men qa uqana waug meleec eu uqa je magigi bilinawe odi.   
\p
\v 5 Inok uqa Anutnu waug meleennu Anut uqa ehudi sao ohis ehi ten. Uqa qee cal mel. Dana age uqa walec cabi oin qa age uqa qee felein. Anut uqa wele ehuden. Anut uqa Inok qee ehudecna age Inok uqa Anutna gale doc toodon ein.  
\v 6 Dana oso uqa Anut cemenug ligiafi uqa Anut bilina, odocob uqa dana Anut walegina eundec Anut uqa ameg me bahic adena ec ha waug meleena. Eunu dana uqa Anutnu waug meleecca qee uqa Anutna gale doc toodocwe qee.   
\p
\v 7 Noa uqa Anutnu waug meleen. Odocob Anut uqa dahig hewec je madon ceteh hibna caligian eunu Noa uqa ceteh qee fel qa Anutna jenu waug meleeceb wag ben jelen. Eunu Noa aideg melahulca melahul aidagailca age odi wag ben eu dunuh limeig me himec bilein. Waug meleec euna Noa uqa dana cajaca mahanadec cunug gesiladecwe men. Odocob Noana waug meleec eunu Anut uqa Noanu dana ititom ec maden, eu Anut uqa dana cajaca cunug uqanu wawaga meleena eundecnu odi odona. Eunu uqa Anutna dana ititom huqanehul oso calen.   
\s1 Ebraham Seraca ale Anutnu wawala meleen  
\p
\v 8 Ebraham uqa Anutnu waug meleen. Anut uqa Ebraham utadocob uqa Anut jejeg toodon. Uqa uqana jobon cuculi Anut maha oso eu Anutna muguh mec uqa uteceb uqana bahic gaid biligiannu maden ono nuen. Odocob Ebraham uqa ana isec nuen eu docca qee. Euqa uqa waug meleecca nuen.  
\v 9 Odocob uqa waug meleecca nuimei Anut hatu utigian maden ono bilen. Odocob uqa ono hatu euna bilen eu sihul leih agena hatuna bilecwe men. Uqa ono talah jona bilen eu odiwe Aisak Jekobca talah jona bilesin. Dana eu ale uqaca hatu eu oin wele bahic Anutha odi maden. Aleca Ebrahamca age Anut huqanehul.  
\v 10 Saen cunugna Ebraham uqa taun ben oso eu uqana noh gug gagadicca gaid biligian foubnu waug nijoloi.\f + \fr 11.10 \ft Taun ben eu Jerusalem eu sao jobonna nijia. Age Hibru 12.22 feiga.\f* Ebraham uqa uqana saen cudun oso euna ligiannu sumuden. Anut uqadodoc cudun oso odi mudigiannu cisdumei muden.   
\p
\v 11 Sera uqaha Anutnu waug meleen. Uqana mel basec saen hedon qa uqa waug meleen eunu uqa melca mecnu gagadic odoc ihoc on. Sera uqa odi cisdon, “Ija melca migennu Anut uqa mele je wele maden. Anut uqa mele je himec madena,” don.  
\v 12 Eunu dana osol eu toia bahic cal mecnu dodoldon uqa mel mati bahic memega calen. Geh bahic fulusdon, eu malaqa saona nijinawe, esic lanna nijinawe odi fulusdoin. Sanijadecwe ha qee.   
\p
\v 13 Ebraham, Aisak, Jekobca age cunug wawaga meleecca wele cal mein. Mahana bilein saenna eu age ceteh me Anut adigia ec maden eu qee oloin. Age onoca tatawi fimeig ceelein. Odimeig odi qasali madein, “Ege maha ina biluqa ege dana jobon filecdec cinigwe. Ege maha ina saen nag odi himec bileqan,” ein.  
\v 14 Ge, dana je eu odi madegina eu ege doqona, eu agena mahana bahic biloubnu walegina.  
\v 15 Eu age wawaga eu jobon wele bilimeig cuculi hoin eunu nijecebfi jobon euna haun ceseloqagannu jicca nijoub.  
\v 16 Euqa eu age odi qee odoloin. Eu age wawaga eu wele maha osona len, eu me bahic maha iha wooldoc. Eu sao jobon himec. Eunu Anut uqa age egena Anut ec madegina eu agenu qee majag dona. Uqa dana cajaca wawaga meleecca jobon me bahic euna biluqagannu wele saciadon.   
\p
\v 17-18 Wele Anut uqa Ebraham temdon. Odocob Ebraham uqa Anutnu waug meleeceb Aisak ihanec cinigwe Anut uten. Uqa Anutna mele je ocob Anut uqa Ebraham Aisaknu madon:  
\q1 “Hina sihulel toohi caloqagan age Aisak sihulna himec caloqagan,” don. \rq (Jenesis 21.12)\rq*  
\m Euqa Ebraham uqa melah osol eu qagadumei Anut ihandugia odon.  
\v 19 Uqa odi cisdon, “Aisak cal mecebfi Anut haun tulidocob cajecnu ihoc,” don. Eunu mele bahic galolo je eunu ihoc edi madecnu maden, “Ebraham melah cal mecnadec ceseli on,” en.   
\s1 Aisakca Jekobca Josefca age Anutnu wawaga meleen  
\p
\v 20 Aisak uqa Anutnu waug meleeceb Jekob Isoca eeldoc alen. Eeldoc euna uqa ceteh eu aleca hibna caligian eunu maden.   
\p
\v 21 Jekob uqa Anutnu waug meleen. Odocob saen uqa cal migiannu saen dodoldodon uqa Josef melahul lecis eeldoc alen. Odimei uqa uqana kom amegna jogoimei Anutnu cuha fen.   
\p
\v 22 Josef uqa Anutnu waug meleen. Odocob saen uqa cal migia bili hibna Isrel age Isip hatu culimeig beloqagannu maden. Odimei uqa teful adi heel cisuqagannu maaden.   
\s1 Moses uqa Anutnu waug meleen  
\p
\v 23 Moses memeg anagca ale Anutnu wawala meleen. Moses anag uqa Moses baseceb ale eu uqa mel me bahic fesin. Eunu eu ale jagel cijed Moses jahundecebil bilen. Ale kingna loo jenu qee cucuielesin.   
\p
\v 24 Moses uqa Anutnu waug meleen. Hibna uqa meca mimei Isip agena king ateg melah ec madec culen.  
\v 25 Uqadodoc ha Anutna dana cajaca gami culumen osoben gahidoqagannu waug nijen. Uqa ceelec ocnu silail kobol toodudu odon uqana saen gohic himecna biliga qee dol.  
\v 26 Uqa Krais ijannu majag hewifeig eu Isip agena qaig bala cetetehca cunug wooldoc ec cisdon. Uqa ameg me bahic Anut utigian eunu cisdon.\f + \fr 11.26 \ft Ijan i “Krais” uqana gug eu dana Anut uqana cabi ocnu wele nesili ehuden. Dana uqa Hibru jaqec je jaqen uqa je inu cisdoc lecisca eu odi fena. Cisdoc osoldoc eu odi. Anut uqa Isrel dana caja cunug eu uqana nesili ehaden. Odocob Moses uqa Isrel dana cajaca cesuladecnu gale don. Eunu uqa majag hewigiannu qee cisdodoi cesuladen. Anut uqa Isrel dana caja eu uqana nesili ehaden, eunu age uqana Krais. Cisdoc lecisdoc eu odi. Mosesna saenna Jisas Krais qee calel eu mele, qa cabi oc i Moses odon eu odiwe uqa Krais ijannu majag hewen.\f*   
\p
\v 27 Moses uqa Anutnu waug meleecebnu uqa Isip hatu culen. Uqa king eu gemag becnu qee cucuiel. Dana oso uqa Anut amegna fecwe qee qa Moses uqa Anut fecnu uqa gagadic men.  
\v 28 Ensel Isip agena mel matucaca eundec qagaaadi uqa sipsip golanaga fimei Isrel agena mel matu cain qagaadoiaunnu Moses uqa Anutnu waug meleen. Odocobnu uqa Pasowa Cuha Deel Gunnu sipsip qagadon.\f + \fr 11.28 \ft Age je Mak 14.1na nijia eu feiga.\f* Odimei uqa sipsip golanaga jic cebecna bilisadudu nuen.   
\s1 Isrel dana cajaca leihha age Anutnu wawaga meleen  
\p
\v 29 Isrel eu age wawaga meleeceb Macas Wa Golca maha galalenawe galaleceb letein. Odocob Isip eu ageha odi odoqaga odoin qa wa jimeig cal mein.   
\p
\v 30 Isrel eu age Anutnu wawaga meleeceb Jeriko meen gel deel 7-pelana cunugca taldudu coboin. Odocob meen gel eu gauc fuhudu golodon.   
\p
\v 31 Wal caja Rehab uqa Anutnu waug meleen. Odocob uqa dana lecis jobon heje fowasa hosin eu ale cesulalen. Eunu uqa dana cajaca leih wawaga meleecca qee eundec gami qee fadalelein.   
\p
\v 32 Euqa qila ija cel je oso tubdu madigen? Gidionca, Barakca, Samsonca, Jeptaca, Dewidca, Samjuelca Anutna je hahun madec dana ageca eu cunug agena je saecnu saen ihoc qee.  
\v 33 Dana eu age wawaga meleecca eunu age han wooldodoig king mati agena han dana fadaladein. Eu age kobol ititom himec odoin. Eu age ceteh Anut adigia maden eu oin. Laion biamaga afa quadein.  
\v 34 Eu age ja ben cicijen cabusein. Eu age busalecebil han siginna qee aqelein. Eu age bodoec bibileig hibna gagadic odoc oin. Eu age han dana gagadic odocca bahic calein. Eu age hatu fil agena han dana mati jabadein.  
\v 35 Caja agena dana cal mein eundec ceseli cajecebil age haun cedein.  
\p Dana leih gihacdoc jona madein dewenega geh bahic tudoin eu cal mecnu ha ihoc. Anut hibemdocobilfi culadecebil beloqagan ec maadein. Euqa eu age cad agena je qee toodoloin. Eu age cal mecnadec ceseli cajimeig cebac bilec me bahic eu oqagannu cisdoin.  
\v 36 Leih age agena cad qesalaadiein, gehca qisaadi senna qaqagadeig gihacdoc jona madein, culumen eu gahidoin.  
\v 37 Cad eundec meen heli aaqiein. Temadec me qeena temaadiein. So umeig dewenega qeti lecisduduein. Han siginna qu wogoladecebil cal mimiein. Dana wawaga meleecca leih meme sipsipca ganac lotoc cinigwe taqimeig jic cocobi belein. Eu age ceteteh dewenegana eundecnu sawen bahic bilein. Odocob dana eu age culumen aadeig kobol me qee bahic odadein.  
\v 38 Eunu age belimeig maha danaca qeena ono jahuni bilein, aluhnaca meen hatinnaca maha helonaca odi jahuni bilein. Eu age dana cajaca me bahic, agena kobol eu dana cajaca mahanadec age gemona bilein eu agena kobol wooldoc.   
\p
\v 39 Dana cajaca eu age cunug eu Anutnu wawaga meleen, odocob age ijanaga me bahic Anut amegna oin. Eu age ceteh me Anut adigia maden eu qee oloin.  
\v 40 Eu eetanu? Anut uqa egena ceteh me bahic eu wele saciadon bilina. Eunu dana wawaga meleecca wele bahic age age casaccasac ege cuculgi me bahic qee calowain. Ege eu ageca osoben me bahic caleqan eu Anutna cisdoc.   
\c 12  
\s1 Ege Jisas fimeb uqanu wawige meleigian  
\p
\v 1 Eunu ege adi? Dana cajaca wele bahic eu age tawimeig taen ben cinigwe talilgec bilegina. Odimeig wawige meleec kobol iwalgegina. Eunu ege ceteh culumenca eundecca silail mec ege faggena eu culecnu. Odimeb ege wawige gagadic mumudi jic ege nuecnu Anut ihacgen eu gagadic guguluqale.  
\v 2 Ege amige eu meciocomun Jisasca nuigian. Uqa egena wawige meleec gug odocob hibna uqa egena wawige meleec odocob ihoc ligian. Wele Jisas uqa ceelec hibna ugiannu waug ninijen gagadic bilen. Odimei culumen gahidumei na babalecna cal men. Uqa na babalecna ono majag hewudein eu ceteh gauc bahic ec cisdon. Qila uqa Anutna bilec cabal meulana isec bilina.   
\s1 Ege tutuc mecnu Anut culumen igina  
\p
\v 3 Age cain alal adeiaunnu, odocob age wawaga cain guleleiaunnu age Jisasnu cisdu cuhadoigale. Silail dana wele age Jisasca cad me qee bahic bilein. Euqa uqa gagadic bahic bilen.  
\v 4 Age silail cilehdocnu han cadein qa han eunu age golanaga qee basecdoloin.  
\v 5 Acahna age wawaga gagadic mudecnu Tibud maaden eu wele dahiniga celen? Eu age uqana mel ec madimei maden:  
\q1 “Ijana mel, Tibud uqa hina tutuc mihec kobol oso odifei eu gauc himec ec cain cisdogaun.  
\q1 Uqa tutuc mihec culumen ihifei eu hina wawin cain me qee meiaun.   
\q1
\v 6 Ge hina dogona, Tibud uqa dana oso nalug menafi eu uqa uqana kobol tutuc mudina.  
\q1 Odimei uqa dana oso ehudimei uqa melah ec madifei eu uqaha qisadona,” en. \rq (Sindaun 3.11-12)\rq*   
\p
\v 7 Age gagadic tatawi Anut culdecebil tutuc madeia. Anut uqa melahul kobol odadena eu odiha age odadena. Cel mel oso uqa memeg qee eeldona? Oso qee bilel.  
\v 8 Mel memega cunug age agena mel eeladegina. Memega qee eeladenafi eu age uqana mel bahic qee. Age eu odi eu mel memegca qee cinigwe.  
\v 9 Age eunu cisdogina. Memige mahanadec eu age eelgein. Odocob binanaga suluquna. Eunu me bahic ege kis agena Memeg bisalu bibili cebac bilec eu ocnu.  
\v 10 Ege memige mahanadec eu age egena kobol saen nag odi himec tutuc migein, agena gale adecna. Euqa Anut uqa ege cesulgigiannu bahic tutuc migina, odocob ege uqana kobol gun eu oqannu.  
\v 11 Memige uqa ege tutuc migec culumen igina qila saen euna ege ceelecca qee biluquna. Ege wawige eu culumen dona. Euqa tutuc migimei ege ititom kobol himec odocomunfi wawige malol biligian.   
\s1 Ege hihibanige teceb gagadic tawoqale  
\p
\v 12 Eunu age ebenega gagadicca qee gauc caculi tawecebfi gagadic mi suli umeig cabi oiga. Odocob age jaimaga gobca laleg mecebfi age gagadic taweiga.  
\v 13 Odocob jaimaga oso eu me qeefi gob ameg eu cunug qee casali hoiaunnu  
\q1 “age jaimagana bahic jic tutuc coboiga,” en. \rq (Sindaun 4.26)\rq*  
\m Qee bahic! Eu haun me migian.   
\p
\v 14 Age dana cunugca ege gami wawige malol bilecnu cabi gagadic oiga. Odimeig kobol gun euna bilecnu cabi gagadic oiga. Dana oso uqa kobol gun qee toodona uqa Tibud qee feiaun.  
\v 15 Age cofdu cuhadoiga. Qee fifi dana cotoga oso culdecebil toni qocob Anutna eelgec uum igec eu culiaunnu. Qee fifi dana cotoga oso culdecebil age gemona aig gulihinca gisinawe caleiaunnu, odimei gulihin aadi Anut amegna gegehinca madeiaunnu.  
\v 16 Qee fifi dana oso wal kobol toodoiaunnu. Qee fifi dana oso Anut hibemdoiaun eu odiwe wele Iso odon. Uqa sab fajecna saen osol himec euna matu bilec eeldoc cunug helen.  
\v 17 Age dogina, hibna uqa eeldoc eu muguh ugia odon qa Anut qeeo ec maden. Iso uqa eeldoc oubnu geh bahic qajen qa uqa haun waug falicdocnu jicca qee.   
\s1 Ege wele Saion Aluh Me Bahicna calom  
\p
\v 18 Age qila ceteh oso amaga fecnu ihoc, ebenega tebandocnu ihoc cemenug qee li bilelein, odiwe Isrel dana cajaca age wele Sainai Aluhna calein. Sainai Aluh euna ja ben cijein, odocob tu gagatuc qam qu nijen, odocob fufu gagadicca,  
\v 19 taul eu ecca jejeg oso je madecca, dana cajaca jejeg je mamaden dah mein. Odimeig cucuii Moses madoin, “Ege haun dah maga qee geldoin,” doin.  
\v 20 Eetanu odi madoin? Eu age Anut je aden eunu cucui bahic ein. Uqa maden:  
\q1 “Dana oso uqa eben mimei aluh i heheweb fifeig meenna qoiga cal meia.  
\q1 Odocob bulmakau sipsipca ha odi himec,” en. \rq (Kisim Bek 19.12-13)\rq*   
\m
\v 21 Eu age ceteh fein eunu cucui bahic ein. Eunu Mosesha maden:  
\q1 “Ija cucuiimig qeleli cahuldom,” en. \rq (Loo 9.19)\rq*   
\p
\v 22 Age ceteh eundecna oso qee calelein. Age Saion Aluhna wele calein. Odocob Cebac Bilec Anut uqana taun benna calein. Eu Jerusalem sao jobon ono. Age ensel mati bahic amam ceguli ceeli bilecna wele calein.  
\v 23 Age Anut melahul matu agena cegulecna wele calein.\f + \fr 12.23 \ft Jisas uqa Anut melah matu bahic. (Age Hibru 1.6 feiga.) Euqa dana uqa Hibru jaqec je jaqen eu Anut uqa ceteteh me bahic uqa melahul ategulca adena eunu je geh madena. (Age 6.12ca, 9.15ca feiga.) Juda age agena kobolna mel matu himec uqa memegna ceteh cunug on. (Age 12.16 feiga. Uqa ceteh me bahic cunug Anut uqa uqana dana cajaca adecnu gale dona eunu cisdumei uqa age “Anut melahul matu” en eu odi fena.\f* Anut uqa ijanaga wele jaqen, jaqec je eu sao jobon ono bilina. Odocob gesiligec dana uqa bilia uqa dana cajaca cunug agena Anut eu age hu cemenug taweiga. Dana cajaca agena kis wele Anut uqa dana cajaca ititom ec maaden eu ageha ono bileiga.  
\v 24 Odocob Jisas uqa bal cehec je haunna nawel tawec dana uqaca calein. Uqa golac wele age bilisadu joaden, bal cehec je haun eu gagadic mudecnu. Odocob golac eu je oso maden eu wele Ebel golac odon eu caca qee. Uqa Ebel golac wooldumei je me bahic eu geh bahic maden.   
\s1 Ege cofdu cuhadoqale  
\p
\v 25 Age fi cuhadoiga. Dana madena eu jejeg filedocnu dahiniga cain afa qoiaun. Wele bahic Anut uqa maha ina dana cajaca je gagadic maaden qa eu age jejeg qee toodoloin. Eunu wele saen euna age busalimeig agena silail ameg me qee wadac ocnu qee wooldoloig. Odocob qila Anut uqa sao jobon bibili je gagadic magena. Ege uqa hibemdufeb busalimeb silail ameg ihoc wooldocnufo? Qee bahic!  
\v 26 Wele Anut jejeg caleceb maha mim nen. Euqa qila ege wele magen:  
\q1 “Maha i saen osol himec haun odocomin mim nigian.  
\q1 Maha himecha qee.  
\q1 Maha saoca osoben mim nigian,” gen. \rq (Hagai 2.6)\rq*   
\m
\v 27 Je i “Saen osol himec haun,” eu odi ihacgena. Ceteteh wele Anut mudaden odimei gesac maden eu fadaladeceb qee moqagan. Odocob ceteteh qee gesac madel eu qee fadalowain. Age gaid biluqagan.   
\p
\v 28 Anutna cul ege om i dana oso fadalecwe qee. Eunu ege eu odinu Anut hegaga docnu. Odimeb uqa binan susuli uqana cabi uqa gale dona odi cabi ocnu. Ege uqa binan susuli uqanu cucuiecnu.  
\v 29 Ge, mele bahic:  
\q1 “egena Anut eu ja ben ceteteh cunug cijinawe,” en. \rq (Loo 4.24)\rq*   
\c 13  
\s1 Age wawaga meleec cotogailnu nalunuga meigale  
\p
\v 1 Age wawaga meleec cotogailnu nalunuga megina, odocob age gaid odi agenu nalunuga meigale.  
\v 2 Dana cele agena jona hoqagan eu age cesuladecnu cain dahiniga celeiaun. Age dogina, wele dana leih odi odimeig ensel leih agena jona ehadi ehi limeig cofadein. Eu age eu ensel ec qee doloin. Eu age cisdoin eu dana bahic ein.   
\p
\v 3 Age cotogail age wawaga meleenanu gihacdoc jona bilegina eu agenu cisdoiga, ageha osoben gihacdoc jona biluqunawe ec cisdu cesuladeiga. Odocob dana dewenegana culumen gahidogina eundecnu ha cisdoiga, ageha osoben ege dewenigena culumen gahidoqonawe ec cisdoiga.   
\p
\v 4 Caja danaca ocobocobec eu me bahic. Age cunugnu ocobocobec kobol eu ceteh soidocca bahic Anut amegna nijigian. Qee fifi gegehin qowain. Age dogina, hibna Anut uqa dana cajaca wal kobolna ocobocobec wagalegina euca, dana uqa osona caja cajaca nijesina euca eu age ameg me qee adigian.   
\p
\v 5 Age meen qaignu amaga qoc kobol eu cain toodowain. Odocob Anut wele maden:  
\q1 “Ija hina qee culihigaun.  
\q2 Ija hina qee tacewihigaun,” en. \rq (Loo 31.6)\rq*  
\m Eunu ceteh age hewegina eunu odi cisdoiga, “Eu me bahic. Eu egenu ihoc,” odi doiga.  
\v 6 Eunu ege wawige ihoc gagadic mumudi edi madoqale:  
\q1 “Tibud ija cesultenanu. Ija qee cucuiigaun.  
\q2 Dana age ija cel oso oditecnu ihoc? Qeeo!” oqale. \rq (Buk Song 118.6-7)\rq*   
\s1 Ege Jisas toodocnu cain majanige geiaun  
\p
\v 7 Age agena cofadec age wele Anutna me je qasali maadoloignu cisdoiga. Age eu agena cobocnu cisdoiga. Odimeig eu agena wawaga meleec kobol toodoiga.   
\p
\v 8 Jisas Kraisna kobol eu cumca qilaca, odocob saen cunugna ha eu kobol osol himec bileceb catanena.  
\v 9 Je filfil wawaga dunuh limei wawaga falicdocob Anutna jic culuwainnu Anutna eelgec uum igec ege wawige gagadic mudinafi eu me bahic. Wawige eu ege sab jecnu loo je filfil toodoqona euna gagadic odoc qee ona. Dana cajaca kobol eu toodogina eundec oso qee cesuladena.   
\p
\v 10 Ege Anut ihandoc cabalca. Odocob Anutna nawel tawec ihanec dana talah cuha jona cabi oloig age cabal euna sab ocwe qee.  
\v 11 Nawel tawec ihanec dana ilo uqa bulmakauca sipsipca agena golanaga umei talah eu cudun gun hamol limei silail cagasecnu ihanoloi. Euqa dool dewenega eu age jana cudun eu jobon hahagum manoloig.  
\v 12 Eunu Jisas uqaha dana cajaca uqadodoc golacna qagu madigiannu gel cebec jobon hahagum deweg tudoc culumen gahidon.\f + \fr 13.12 \ft Juda agena loo je eu ihanec dana age dool cuhunuga dana cajaca age Anutnu ihanecnu ehadi hoin eu jeiga ec madena. Euqa cuhunuga age Anut Dana Cajaca Agena Silail Cagasiadecnu Deel Benna ihanadein eu age cain jowain, age jobon hahagum maneiga ec madena. Age Wok Pris 6.24-30ca, 16.27ca feiga. Odocob Jisasna ihanec eu Deel Ben ina ihanec uqana cudun on. Age Hibru 9.7-14 feiga.\f*  
\v 13 Eunu egeha cudun eu jobon hahagum uqaca lecnu. Odimeb uqa majag don odi egeha majanige gigian.\f + \fr 13.13 \ft Dana leih age Kristen age Juda agena loo je toodu odocnu madein eu odi fena. (Age but 9 feiga. Euqa dana uqa Hibru jaqec je jaqen eu Kristen age Juda agena jobon dunuhna cain biluwain ec madena. Ege loo je eu toodu odifeb ege Anut amegna cataniec bileqan eunu cain cisdowain ec madena. Age Kraisna cabi oc euna himec age Anut amegna cataniec bilegina. Eunu age Krais gami bileginaca, age uqa toodoginaca eunu cain majanaga adeiaun.\f*  
\v 14 Ege doqona, maha ina taun ben oso ege gaid bilecnu qee nijina. Euqa ege taun ben hibna caligian eu gulucdocnu odoqona.  
\v 15 Eunu ege Jisas ijanna Anut binan suluqale. Odocob binan sulec eu ihanec cinigwe uqa gaidgaid utuqale. Mele, ege conigena uqa ijan qasali mamadi uqa binan suluqale.  
\v 16 Odimeig age dana cajaca kobol mena meme madecnu cain dahiniga celeiaun. Odocob ceteh ageca bilina eu dana cetehca qee eundec cesuladeiga. Anut uqa ihanec eundec geh bahic gale dona.   
\p
\v 17 Agena cofadec eu age age cesuladec cabi hewegina. Odocob eu age gaid age dolonoga cofaadi bilegina. Odimeig hibna eu age cabi cunug odoginanu Anut qasali madoqagan. Eunu age eu agena je toodudu eu age bisalu bileiga. Age odi odifeig eu age ceelecca cabi oqagan, wawagaha qee culumen adeiaun. Eu age age cofadecnu wawaga culumen adeccafi eu age cesuladecnu ihocca qee.   
\s1 Age Anut cesulgecnu inondoiga  
\p
\v 18 Age Anut ege cesulgigiannu inondoiga. Ege wawige Anut amegna eu tutuc himec ec tebandoqona. Egena cisdoc silec eu camasac. Odocob ege gaid saen cunug tutuc himec cobocnu wawige nijia.  
\v 19 Age Anut ija cesultigiannu inondoiga ecnu niniadigina. Eunu ija ageca mahuc ceselecnu ihoc.   
\p
\v 20-21 Anut uqa egena Tibud Jisas tulidocob cal mecnadec ceseli cajen. Jisas uqa sipsip cofadec dana me bahic. Uqa ihanec cabi gug eu golacna bal cehec je bilec catanec eu hedon. Odocob Anut malol bilec gug uqa uqana gale doc toodoqagannu ceteteh meme ihocna himec age adeiale. Odocob ege cunug gemona kobol me uqadodoc gale dona, odi camasac mudecnu ihoc Jisas Krais umna. Saen cunugna Krais uqa ijan benca bileceb cataneiale. Mele.   
\s1 Cit qoc je  
\p
\v 22 O wawige meleec cotiel, ija je gagadic maadigina age wawaga gagadic mudec je i maadiginanu dahiniga meigale ec niniadigina. Je jaqiadigina i eu gohic cinigwe.  
\v 23 Age docnu ihoc, ege cabi cotige Timoti gihacdoc jonadec felacudein uqa haun gihacdoc jona qee bilel. Uqa mahuc bahic ijaca calecebfi eu ele osoben li age meciadewan.   
\p
\v 24 Age egena feele ec agena cofadec cunug adeigale. Odocob egena feele ec Anutna dana cajaca qagoc cunugha adeigale. Anutna dana cajaca ititom age Italidec feele adec suldoiga ec maadeigale.   
\p
\v 25 Anutna eelgec uum igec age cunugca biliale.