\id COL  - Amele NT and Genesis [aey] -Papua New Guinea 1997 (DBL 2014) 
\h KOLOSI 
\toc1 Pol Uqa Jaqec Je Oso Kolosi Tamanec Jaqiaden 
\toc2 Kolosi 
\toc3 Ko 
\mt2 Pol Uqa Jaqec Je Oso  
\mt1 Kolosi Tamanec Jaqiaden  
\imt1 Aqunec Je  
\ip Kolosi eu taun oso Esia hatuna nijen. Eu Efesas taun cemenug nijen. Pol uqadodoc Krais tamanec Kolosi ono qee sanan mel. Euqa Pol uqa Efesas bilen saenna uqa dana oso, ijan Epafras, me je maadecnu suldocob Kolosi ono nuen. (Eu 1.7-8, Aposel 19.10 feiga.)  
\ip Pol uqa jaqec je i jaqen saenna uqa Rom ono uqana jona gihacdoc bilen. (Eu Aposel 28.16-31 feiga.) Uqa Rom ono bibilei Kolosi tamanecnu je eu don. Uqa dana leih age tamanec uhuli iwaladegina ec don. Dana eu age tamanec sab leih cain jowain ec maadegina, age deel leih eu gun bahic, odocob jagel haun eu gun bahic, odocob Juda agena cuha deel eu gun bahic ec maadegina. Age ceteteh leih cain hewowain, cain ji fowain, cain qududowain ec madegina. Age enselnu cuha fegina. Age Krais uqa ohis bahic qee ec madegina. Age dana uqa jahunec je dona eu uqa dana docca ec madegina. Age dana agena cisdoc toodogina. Uhulec iwaladec eu Filipai tamanec agena wawaga meleec me qee odona eunu Pol uqa tamanecna wawaga meleec tutuc mudecnu jaqec je i jaqiaden.  
\ip Pol uqa uhulec iwaladec eu mele qee ec madena. Eetanu eu mele qee? Krais uqa Anut. Ege Krais foqona eu odi ege Anut foqonawe (1.15). Krais uqa ceteteh cunug Anut ifanen eu agena matu bilia (1.15). Uqa ceteteh cunug qee calec ninijen uqa aquniadi bilen (1.17). Krais uqa uqana tamanecnaca, uqa ceteteh cunugca agena ilo bilina (1.18). Eu Krais himec uqana tamanec ceseli fajadi besaden (1.13). Jic oso cesulgecnu qee nijel. Krais uqa cal mecnadec ceseli cajec matu (1.18). Anut uqana cebac bilecca, uqana kobol cunugca eu Krais dewegna am bec bilina (1.19, 2.9). Krais uqa ceteteh cunug saona mahanaca bilegina eu Anutca tanawadena (1.20). Eunu dana cajaca age Kraisca gabandoc bilegina euna himec Anut uqa cahahaadecnu ihoc (1.21-22). Odimei Pol uqa dac 2 leceb 4na Krais uqana gug inu Kristen dana cajaca age adi biluqagannu maadena.  
\ip Pol uqa jaqec je i jaqimei dana lecis alen. Odocob dana lecis ale ehi li Kolosi tamanec aden. Dana i ale oso eu Tikikas. Oso eu Onisimas. Pol uqa Onisimasnu je mati jaqimei jaqec je i Failimon suldon.  
\is1 Je Dunuhnu Dado Mec  
\io1 1. Aqunec je (1.1-14)  
\io2 A. Feele adec je (1.1-2)  
\io2 B. Hetaga ec je (1.3-8)  
\io2 C. Inondoc je (1.9-14)  
\io1 2. Krais uqa ceteteh cunug agena ilo bilina (1.15-23)  
\io1 3. Pol uqa Kraisna tamanecnu cabi ona (1.24-2.7)  
\io2 A. Uqa Kolosi tamanec cesuladen (1.24-29)  
\io2 B. Uqa Kolosi tamanec agena wawaga meleec eunu cisdona (2.1-7)  
\io1 4. Ege Kraisca gabandoc cebac biluquna eunu ege dana agena uhulec je toodocnu qee nijel (2.8-15)  
\io2 A. Age uhulec iwaladec dananu mecii cuhadoigale (2.8-15)  
\io2 B. Uhulec iwaladec dana cain toodowain (2.16-19)  
\io2 C. Pol uqa uhulec je uqana gug eu fena (2.20-23)  
\io1 5. Tutuc cobocnu loo je (3.1-4.6)  
\io2 A. Cebac bilec haun hilahca (3.1-17)  
\io2 B. Kristen talnu loo je (3.18-4.1)  
\io2 C. Ege gagadicca inondudu jic tutuc coboqale (4.2-6)  
\io1 6. Feele adec cit qoc je (4.7-18)  
\c 1  
\p
\v 1 Ija Pol, ija Krais Jisasna aposel. Ija Anut uqana cisdocna aposel calem. Ija ege wawige meleec cotige Timotica,  
\v 2 ele Anutna dana cajaca qagoc age Kolosi ono bilegina eu ele wawile meleec cotileil age Kraisca gabanadec bilegina eu jaqiadowona. Memige Anut uqana eelgec uum igec malol bilecca ageca biliale.   
\s1 Kolosi tamanec age Jisasnu wawaga mele bahic meleena  
\p
\v 3 Ele agenu Anut inondowona saenna ele Anut uqa egena Tibud Jisas Krais Memeg gaid helaga dowonanu.  
\v 4 Ge, ele age Krais Jisasnu wawaga meleena ec doh. Odocob age Anutna dana cajaca qagoc cunugnu nalunuga megina ec ha doh.  
\v 5 Mele je eu me je ageca hahawan hocob age Krais Jisasnu wawaga meleeceb age ceteh me Anut uqa agenu saona gun hewi cofdona eunu dah mein. Ceteh me eu age ocnu sumudi bilegina. Eunu agena wawaga meleecca agena nalunuga mecca alena gug eu ceteh me age ocnu sumudi bilegina.  
\v 6 Me je eu ageca hon. Dana cajaca ageha mahamaha cunug me je maadec cabi ogina. Odocob dana cajaca mati bahic age me je dah mimeig wawaga meleen. Me je eu dana cajaca mati bahic age gemona li hunawi ihoc lena. Kolosi ageha hahawannadec Anutna eelgec uum igec eu mele bahic ec dah mimeig me je eu age gemona li hunawi ihoc lenwe.  
\v 7 Age Anutna uum igec eu mele bahic eunu Epafras wele iwaladeceb oin, uqa ele cabi hijile bahic, uqa Kraisna cabi dana me, uqa ele cesullimei Kraisna cabi me cofdona.  
\v 8 Odocob uqa agena nalunuga mec kobol eu Kis Gun uqa aden ec malen.   
\p
\v 9 Gug inu ele deel hahawannadec agena kobol menu dah moh eu gaid li Anut agenu inondocnu qee culoloh. Ele Anut agenu odi inondowona, Anut uqa uqana cisdoc age wawagana meceb du cuhadoqagannuca, Anut uqana Kis uqaha Anutna cisdoc silec fogo adecca eu cunug adecnuca ec inondowona.  
\v 10 Odocob age Tibud gale dona eu odi cobocnu ihoc. Odocob ceteh uqa waug me nijigian eu gaid odoqagan. Agena cebac bilec eu cabi me hanoqagan. Odocob age Anutnu doc silecca eu ben dugian.  
\v 11 Anut uqana gagadic odoc fulacdoccanadec gagadic cunug eu odadeceb age gagadic meigale. Eunu age ceteh cunugna gagadicca tawimeig culumen gahidoqagan. Odocob age ceelecca  
\v 12 Memige Anut hegaga doqagan, uqa cesuladeceb Anutna mugumuga mec Anutna dana cajaca qagoc eu age cul fulacdocca euna bilegina eu oqagan age oqagannu eu ihoc odon.  
\v 13 Uqa tuna gagadic odocnadec besigi ehigimei uqa Melah uqa nalug mena eu uqana culna migen.  
\v 14 Ege Anut Melahca gabandu biluqunanu Anut Melah uqa ege fajigi besigen, odimei egena silail cagasigen.   
\s1 Krais dumanca uqana cabica  
\p
\v 15 Ege Anut fecwe qee euqa Anut Melah ege fecnu ihoc qa uqa Anut. Uqa ceteteh cunug Anut ifanen eu agena matu bilia.  
\v 16 Ge, Anut uqa ceteteh cunug Melah ebenna ifanen. Uqa ceteh saona nijiaca, ceteh mahana nijiaca, ceteh foqonaca, ceteh qee foqonaca, kisna gagadic odocca, tibud eundecca, king bilecca, gabman cofadecca, eu cunug Melah ebenna ifanen. Anut uqa ceteteh cunug Melahnuha ifanen.  
\v 17 Anut Melah uqa ceteteh cunug qee calec ninijen uqa aquniadi bilen. Odimei uqa ceteteh cunug heweceb bilegina. Uqa ceteteh cunug agena gug bahic, age uqanu agena cudun bahic oin.  
\v 18 Uqa tamanecna ilo, tamanec eu uqa deweg. Uqa gug qoc, uqa cal mecnadec ceseli cajec matu. Eunu Anut uqa ceteteh cunug agena aquniadec biligiannu muden.  
\v 19 Eetanu? Anut uqa uqana cebac bilecca, uqana kobol cunugca eu Melah am bigiannu gale don. Eunu uqa mitocob bilen.  
\v 20 Odocob Anut uqa Melahna uqa ceteteh cunug saona mahanaca bilegina eu Anut uqadodocca tanawoqagannu cisdon. Odocob uqa Krais golac na babalecna basecdon euna malol mudeceb ceteteh cunug saona mahanaca bilegina eu uqaca tanawaden.   
\p
\v 21 Ageha age saen osona Anut cemenug qee bilelein. Age qisol mimi age cisdoc me qee cisdoloig eunu age uqana cad onoca bahic bilein.  
\v 22 Euqa qila uqa Melah deweg na babalecna cal men euna Anut uqa tanawadeceb uqaca osoben wawaga osol men. Melah uqa age ehadeceb Anutca loqagannu, odocob age gunca, tutuc odocca, cataniecca uqa amegna biluqagannu uqa eu odi odon.  
\v 23 Euqa age wawaga meleec gagadic hewimeig duuec taweiga. Odocob ceteh oso age diadeiaunnu age ceteh me ocnu sumudi bilegina eunu me je wele doin eu dahiniga cain celeiaun. Ija Pol, ija me je uqana cabi dana calem. Odocob me je eu, age dana cajaca cunug mahamaha bilegina eu qasali maadein.   
\s1 Pol uqa Kolosi tamanec cesuladen  
\p
\v 24 Qila ija agenu culumen gahidugina eunu ceeligina. Ija dewenina culumen gahidugina euna Kraisna culumen gahidoc leih nijia eu ihoc ligiannu odigina. Ija tamanec cesuldocnu odigina, tamanec eu Krais deweg.  
\v 25 Odocob Anut uqa ija tamanecna cabi dana miten. Uqa ija cesuladigennu cabi i iten. Cabi i ija Anutna je cunug dana cajaca maadecemin doqagannu iten.  
\v 26 Anutna je eu wele saen cunugna jahuni bilen, eu dana cajaca cunug qee doloin. Euqa qila Anut uqa je jahunec eu uqana dana cajaca qagoc eu ageca camasac meceb doin.  
\v 27 Anutna cisdoc eu odi, uqa uqana je jahunec eu odocob uqana dana cajaca doqagan. Je jahunec eu cehewanca, eu gagadic odoc fulacdocca eu dana cajaca mahamaha cunug bilegina agenu bilia. O Kolosi, je jahunec uqana gug eu odi, Krais uqa age wawagana bilina. Odocob age uqana gagadic odoc fulacdocca adigiannu sumudi bilegina.  
\v 28 Eunu ege Kraisna me je dana cajaca cunug qasali maadoqona. Ege cisdoc silecca cunug dana cajaca ulaulaadi iwaladoqona, ege dana cunug osolosol ehadocomun age wawaga meleec dana bahic Kraisca gabanadec bilegina eu odi bahic Anut cemenug caloqagannu.  
\v 29 Eunu ija cabi i odocnu gisi cagugina. Gagadic odoc Krais itina eu ija wawina cabi ona euna cabi ugina.   
\c 2  
\s1 Ege wawige meleeceb duueceb uhulec je bitidocnu  
\p
\v 1 Ija agenuca dana cajaca Leodisia bileginanuca, dana cajaca cunug ija olani qee feleinnuca cabi gagadic om eu adi cultecebil maadiga.  
\v 2 Age hulunuga cehecnuca, age gabandumeig dana cajaca ititom cunug wawaga osolna nalunuga moqagannuca ija cabi geh om. Eunu age cisdoc me umeig me je eu mele bahic ec fogo adigian. Eu odina age Anutna je jahunec gug eu Krais ec doqagan.  
\v 3 Anutna cisdoc silecca docca me bahic cunug eu Kraisna jahuni bilina.   
\p
\v 4 Age Kolosi, dana oso uhulec jena qauadeiaunnu ija eunu odi maadigina. Euqa uhulec je eu docnu me bahicfi cain dah mowain.  
\v 5 Ge, ija dewenina ageca qee biluquna qa ija gaid dolonina ageca biluquna. Odocob age cabi eb li tutuc u bibileig Kraisnu wawaga meleec gagadic mena echa feciadigina eunu ceeligina.   
\s1 Ege Krais fagdumeb cebac bilec bahic ocnu  
\p
\v 6 Age Krais Jisas Tibud wele oin eunu age uqaca gabandoc coboigale.  
\v 7 Agena bebeig uqa dunuh bahic ceheiga, agena cebac bilec uqa lalan ceheiga. Odocob agena wawaga meleecna odi age iwaladeinwe gagadic bahic meiga. Odocob age gaid Anut hegaga doigale.   
\p
\v 8 Gadgad dana oso uqa danana je docca uhulec je gaucca euna qauadeceb age uqana je toodu odowainnu age mecii cuhadoigale. Je doc eu dana wele bahic bilein eu agena, eu mahanadec tibud age dana eu iwaladein, odocob je doc eu ege qila biluquna egeca hoin. Euqa je doc eu Krais uqana je qee bahic.   
\p
\v 9 Ge, Anutna cebac bilec cunug eu Krais dewegna am bec bilina.  
\v 10 Odocob age uqaca gabandocna agena cebac bilec ha am bec bahic men. Krais uqana gagadic odoc eu tibud meca me qeeca cunug agena gagadic odoc wooladena. Krais uqa cunug agena ilo bilina.  
\v 11 Age uqaca gabandocna age dewenega cagu qoin, eu dana dewenega cagu qogina eundec qee qa Krais uqadodoc uqana dewenega cagu qoc euna dewenega cagu aqen. Krais uqa dewenega cagu aqeceb age dewenega hilah eu culein.  
\v 12 Odocob age wa joc oin saen euna age Kraisca heel cisadein. Odocob age wa jocna ha age Kraisca ceseli cajein, eu Anut uqa Krais tulidocob cal mecnadec ceseli cajen eu uqana gagadic odiodiecnu wawaga meleecna age ceseli cajein.  
\v 13 Wele age agena silail mecca, age Juda dana qee eundec dewenega cagu qee qocca eunu cal mec biloloig. Euqa qila Anut uqa age Kraisca gabanadeceb cebac bilec euna bilegina. Anut uqa egena silail cunug cagasigen.  
\v 14 Loo je uqana gagadic odoc eu cilehgen. Loo je eu ege gelgimei egena silail cahuldocca cunug eu cain odowain ec magen. Odocob Anut uqa loo je uqana magecca, uqana gagadic odocca eu Krais uqana na babalecna tuitu qumei cunug eu qee mudi hedon.  
\v 15 Odocob Krais uqa na babalecna tibud me qee agena iloiloca tibud me qee gagadic odocca agena gagadic odoc cagasi qee muden. Odimei uqa age wooladimei iwalaadi ehadeceb age dana cunug amagana ceteh gauc cinigwe toodu coboin.   
\p
\v 16 Eunu dana oso culdecebil age sab waca qagu jeginanuca, deel gunnuca, jagel haunnuca, Juda agena cuha deelnuca loo je oso cain mowain.  
\v 17 Ceteh i cunug eu ceteh hibna caligian hahun qoc qa ceteh bahic eu Krais.  
\v 18 Dana oso uqa ceteh oso codocna fenaca, uqa enselnu cuha fenaca, uqa uqadodoc ijan mahana uhuli mudinaca age dana eundec oso culdecebil age deweneganu je cain um aqimei agena ameg me oiaun. Dana eundec uqa deweg hilahna cisdoc toodona, odocob uqanel cisdoc eu tutuc bahic ec cisdona.  
\v 19 Dana eundec uqa Krais, ege tamanec egena ilo, hewec culen. Krais uqa ilowe deweg cunug cofdudu sab waca utina. Odocob deweg cunug uqana gomahin hilimanagana fagdu libec bilia eu ben mena, odiwe Anut uqa eu ben mecnu gale dona.   
\p
\v 20 Age Kraisca wele cal mein, odocob uqa mahanadec tibud me qee agena gagadic odocnadec besiaden. Eunu age eetanu qila maha inadec dana cinigwe cobogina? Age eetanu mahanadec loo je toodogina?  
\v 21 Loo je eu odi, ceteh eu cain hewowain, odocob ceteh eu cain ji fowain, odocob ceteh eu cain qududowain.  
\v 22 Loo je eu ceteh cunug ege euna cabi oqona eu me qee menanu madena. Eu dana age dih loo je eu ifanimeig ege iwalgegina.  
\v 23 Eu mele, loo je agena gug eu cisdoc silecca fec cinigwe. Loo je eu ensel cuha fecnu gagadic madena, odocob uhuli jogoi cobocnu madena, odocob dewenega qocnu madena eunu cisdoc silecca fec cinigwe. Euqa uqa ege cesulgeceb dewenige hilahna kobol cilehdocnu ihoc qee.   
\c 3  
\s1 Ege Kraisca osoben cal mecnadec ceseli cajom  
\p
\v 1 Age Kraisca osoben cal mecnadec ceseli cajein. Eunu age ceteh sao ohisna isec nijia eu ocnu ebebaceigale. Ono Krais kingna cabalna bilina, uqa Anut eben meulana isec bilina.  
\v 2 Mele, ceteh mahana nijia eu ocnu cain cisdowain. Ceteh sao ohisna nijia eu ocnu cisdoigale.  
\v 3 Ge, age cal mein, odocob agena cebac bilec eu Kraisca gami Anut dunuhna jahunec nijia.  
\v 4 Krais uqa egena cebac bilec gug, uqa isi camasac migian. Saen euna age uqa gami kobolkobolca camas moqagan.   
\s1 Cebac bilec haun hilahca  
\p
\v 5 Eunu age kobol me qee mahanadec wawagana cabi ogina eu qocobil cal meia. Wal kobolca, kobol gegehin odocca, belicanaga me qeeca, gale adec me qeeca, odocob ceteteh mati bahic ocnu amaga qona. Ge, ceteteh mati bahic ocnu kobol eu odi kadan tibudnu cuha fec kobol cinigwe.  
\v 6 Dana age kobol i odoginanu Anut uqa dana age uqa feedogina eu ameg me qee wadacadigian.  
\v 7 Wele age kobol i toodu odoloig saenna ageha kobol ina coboloig.   
\p
\v 8 Euqa qila age kobol i edec cunug u qeleiga. Age gemanaga becca, olohonoga becca, sagagadecca u qeleiga. Age conogana um qoc jeca socaec jeca cain madowain.  
\v 9-10 Age wawaga hilah eu uqana kobolca wele culein, odocob age wawaga haun taqein. Anut uqa wawaga haun eu ifanen, odimei uqa gaid waticdodoi Anut uqadodoc wicanwe ibuldona. Uqa age Anutnu du cuhadocnu odi odona. Eunu age oso uhuldocobdocob cain owain.  
\v 11 Gug inu dana age qila sihul filfil qee bilegina. Age Juda danaca, Juda dana qee eundecca, dana dewenega cagu qocca, dana dewenega cagu qee qocca, dana je filfil madecca, dana jobon qee bilecca, dana bega mehca, dana besiadecca, eu cunug age Krais himec. Dana cajaca cunug age wawaga haun taqein agenu ceteteh cunug eu Krais himec, Krais uqa dana cajaca eundec dunuh bilina.   
\p
\v 12 Age Anutna dana cajaca qagoc, uqa nalunuga mimei age uqana bilituqagannu nesili cedaden. Eunu age wawaga qocca, me odadecca, jogoi cobocca, gemanaga jocosaigca euca, lalafanagaca, eu age taqeigale.  
\v 13 Age cotoga oso uqa me qee odadecebfi age ameg me qee cain wadacdowain. Age cotoga uqa oso kobol me qee odudennu jecafi uqa cotoga eu uqana me qee odoc eu dahig celeiale. Tibud uqa agena silailnu dahig celen eunu age agena silailnuha dahiniga celecebcelecebeigale.  
\v 14 Ceteteh i cunug oso eu wooladec bilia, eu nalunuga mec. Age nalunuga mec taqeigale, eu ceteteh cunug jeladeceb osol me bahic bilegina.  
\v 15 Krais malol bilec igina eu culdecebil age wawaga me cofdoiale. Ge, Anut uqa age malol bilec i umeig age deweg osol bilecnu utaaden. Odocob age Anut gaid hegaga doigale.  
\v 16 Kraisna je eu cehewanca bahic, eunu age culdecebil wawagana gagadic biliale. Age cisdoc silecca iwaldocobdocobii bileig, dahiniga hewecebhewecebeigale. Age samnaca, kalamnaca, due Kis Gun iwaladena eunaca Anut hegaga dudu bileig wawagana binan suleigale.  
\v 17 Ceteteh cunug age odoginaca je madeginaca eu Jisas Tibud ijanna odoigale. Age odi oodoig age Jisas umna Anut ege Memige hegaga doigale.   
\s1 Pol uqa Kristen talnu maden  
\p
\v 18 Aidagail, age Tibudna je toodu odoginawe eu odi age gemugailna je toodu odoigale.  
\v 19 Dana, age aidagailnu nalunuga meigale, odocob age cabi cajawe cain waadowain.   
\p
\v 20 Mel sim, age anagail memegailca jejenega cunug gaid toodu odoigale. Ge, age odi odogina eu Anut gale dona.  
\v 21 Memegail, age dumanaga culiaunnu agena mel mel aidca cain gagaladowain.   
\s1 Pol uqa cabi dana bega meh cofadeccanu maden  
\p
\v 22 Begabeg meh cabi dana, age agena cofadec mahana bilegina agena je cunug toodu odoigale. Age cofaadebil qauaadi age amagana cabi me ogina eu age cabi me ogina ec madecnu odi cain odowain. Euqa age Tibudnu cucuieeig age wawaga osolna jejenega toodu odoigale.  
\v 23 Age cel cabi ogina eu odocnu megameg meigale. Age dananu cabi oginawe cain odowain qa Tibudnu cabi oginawe odi odoiga.  
\v 24 Age dogina, Tibud uqa mugumuga mec uqana dana cajacanu hewena eu adigian. Age Krais Tibud cewel utogina.  
\v 25 Odocob dana cahuldoc odona eu Anut uqa uqana cahuldocnu ameg me qee wadacdugian. Ge, Anut uqa begabeg meh cabi danaca cofadec danaca gug osolna dih ihocihoc gesiladena.   
\c 4  
\p
\v 1 Cofadec, agena cofadec eu saona gun bilina ec dogina. Eunu age agena begabeg meh cabi dana kobol me tutucna odadeigale.   
\s1 Ege gagadicca inondudu jic tutuc coboqale  
\p
\v 2 Age inondocnu kobol gagadicca heweigale. Agena inondocna age cisdu cuhadumeig Anut hegaga doigale.  
\v 3 Saen euna dih age egenuha inondoiga, Anut uqa ege jic qahigeceb uqana je dana cajaca maadecnu. Eunu ege Kraisna je jahunec sildiadi madeqan. Ge, ija Anutna je qasali maadem eunu gihacdoc jona biligina.  
\v 4 Ija je jahunec eu sildiadi madecemin camasac migiannu inondoigale, odocob ija me je qasali maadigen eu odi Anut gale dona.   
\p
\v 5 Dana cajaca age wawaga qee meleec bilegina eu age gemona agena cobocnu cisdu cuhadoiga. Age saen cunugna Kraisna coboc ihacadecnu saciadu bileigale.  
\v 6 Agena je eu gaid me bahic tinca madeigale. Odocob age dana cajaca cunug agena sisilec tutuc wadacduadoqagannu ihoc biloub.   
\s1 Pol uqa Tikikas Onisimasca sulaleceb Kolosi ono belesin  
\p
\v 7 Tikikas ege wawige meleec cotige bahic, uqa Tibudna cabi dana me bahic, uqa ege cabi hijige, uqa ijana je cunug saadigian.  
\v 8 Ija gug eunu ege adi biluqunanu doqagannuca, odocob uqa age wawaga gagadic mudiadigiannuca, uqa sulduadigina.  
\v 9 Odocob ija Onisimas\f + \fr 4.9 \ft Onisimas uqa Failimonna bega meh cabi dana. Age Pol uqa Failimon je jaqiton eu feiga.\f* Tikikasca osoben sulaligina. Onisimas uqa agena wawaga meleec cotoga me bahic, uqa agena cotogail amdec. Ale ceteh cunug ene calen eunu maadowasan.   
\p
\v 10 Aristakas uqa ijaca gihacdoc jona biluwuna uqa feele adec sulduadena. Odocob Mak, uqa Banabas gainag, uqaha feele adec sulduadena. (Ija Maknu je wele sulduadem, uqa ageca calecebfi age ehudeiga ec maadem.)  
\v 11 Josua age Jastas egina uqaha feele adec sulduadena. Ijana Anutna cul cabi hijel gemonadec dana cijed i age feele adec sulduadegina age himec Judadec. Odocob age ija geh bahic cesultein.   
\p
\v 12 Epafras uqaha age cabi cotoga oso, uqa Krais Jisasna cabi dana, uqa feele adec sulduadena. Uqa gaid Anut age cesuladecnu uqana inondocna cabi gagadic ona. Uqa Anut cesuladeceb age wawaga meleec dana bahic tawoqagannu, odocob age Anutna gale doc cunug du cuhadoqagannu inondona.  
\v 13 Ija uqanu je i mele maadigina. Uqa ageca, wawaga meleec dana cajaca age Leodisia Hirapolisca ono bileginaca cesuladigiannu cabi gagadic bahic ona.  
\v 14 Luk\f + \fr 4.14 \ft Dana mati age Luk i uqa Lukna Me Jeca, Aposel Agena Cabi Occa jaqalen ec cisdogina.\f* egena dokta uqanu nalug moqona, uqa Dimasca ale alena feele adec sulduadesina.   
\p
\v 15 Age ijana feele adec cotigeil age Leodisia ono bilegina eu ageha adeigale. Odocob age Nimpaca tamanec uqana jona cegulegina euca ijana feele adec adeigale.  
\v 16 Odocob age jaqiadec i saniji hedumeig age suldocobil Leodisia tamanecna leia, age Kolosiha eu saniji doqagannu. Odocob jaqiadec ija Leodisia tamanec sulduadem eu ageha sanijuqagan.  
\v 17 Odocob age Akipas odi madoigale, “Cabi i hina Tibudnadec om eu odi me bahic odogale,” ec doigale.   
\p
\v 18 Ija Pol, ijadodoc ebenina feele adec i jaqiadigina.\f + \fr 4.18 \ft Age je 1 Korin 16.21na nijia eu feiga.\f* Age ija gihacdoc jona gaid biligina eunu ijanu cisdoigale. Anutna eelgec uum igec eu ageca biliale.