\id 1TI  - Amele NT and Genesis [aey] -Papua New Guinea 1997 (DBL 2014) 
\h 1 TIMOTI 
\toc1 Pol Uqa Jaqec Je Osoldoc Timoti Jaqiton 
\toc2 1 Timoti 
\toc3 1 Ti 
\mt2 Pol Uqa Jaqec Je Osoldoc  
\mt1 Timoti Jaqiton  
\imt1 Aqunec Je  
\ip Timoti uqa Kristen dana haun oso, uqa Listra taundec. Listra eu Galesia hatuna nijen. Uqa anag eu Juda, uqa memeg eu Juda qee, eu Grik. Pol uqa Timoti ehudeceb uqa Pol gami hatuhatu cocobosi me je qasali maadesin. (Age Aposel 16.1-3 feiga.) Pol uqa uqana cabi coboc 4-peladocna Masedonia hatuna nunuei uqa Timoti Efesas tamanec cofadigiannu madon. Hibna uqa mahuc Efesas ono qee ceseli nuiaun ec cisdumei uqa Timoti jaqec je i jaqiton.  
\ip Ceteh osonu Pol uqa Timoti jaqiton eu odi. Dana leih tamanecna bilegina agena cisdoc eu tutuc qee. Age ceteteh cunug maha ina bilegina eu me qee ec iwaladegina. Odimeig dana uqa cebac bilec catanec ocnu gale dona eu uqa sab leih cain jeiaun, uqa caja cain oiaun ec iwaladegina. Eunu dana eundec age tamanecna wawaga meleec me qee meiaundainnu Pol uqa dana eundecnu Timoti ulauldona.  
\ip Ceteh osonu ha Pol uqa jaqiton eu odi. Uqa tamanec age cuha fec tutuc odoqagannuca, tamanecna cabi me oqagannuca Timoti jaqiton. Odimei uqa cel dana tamanec cofadecfo, cesuladec cabi danafo caligiannu jaqiton.  
\ip Cit qoc jena Pol uqa Timoti Jisas Kraisna cabi dana me bahic biligiannuca, Timoti uqa tamanec dana cajaca cofadi cuhadugiannuca jaqiton.  
\is1 Je Dunuhnu Dado Mec  
\io1 1. Feele adec je (1.3-11)  
\io1 2. Pol uhulec iwaladec dananu ulauldona (1.3-11)  
\io2 A. Uqa uhulec iwaladec gug silditona (1.3-7)  
\io2 B. Mosesna loo je gug (1.8-11)  
\io1 3. Pol uqa Anut uqanu waug qon eunu hetaga dona (1.18-20)  
\io1 4. Timoti uqa me je hewimei Anutna cad gami han cadec me bahic cadigiannu je jaqitona (1.18-20)  
\io1 5. Tamanec cofadecnu je (dac 2-3)  
\io2 A. Tamanec agena cuha fec (dac 2)  
\io3 1. Age dana cajaca cunugnu Anut inondoqagan (2.1-8)  
\io3 2. Caja age tamanecna adi biluqagan (2.9-15)  
\io2 B. Tamanec cofadec age ititom kobol coboqagan (3.1-13)  
\io3 1. Tamanec cofadec matu agena coboc (3.1-7)  
\io3 2. Tamanec cesuldoc cabi dana agena coboc (3.8-13)  
\io2 C. Anutna kobolnu je gug (3.14-16)  
\io1 6. Uhulec je iwaladec (dac 4)  
\io2 A. Uhulec je iwaladec uqana gug (4.1-5)  
\io2 B. Timoti uqa uhulec je iwaladec adi cilehdugian (4.6-16)  
\io1 7. Timoti uqa tamanecna am filfil adi cofadigian (5.1-6.2)  
\io2 A. Dana toiaca dana haunca adi cofadigian (5.1-2)  
\io2 B. Caja wij adi cofadigian (5.3-16)  
\io2 C. Tamanec cofadec matu adi cofadigian (5.17-25)  
\io2 D. Cabi dana bega meh adi cofadigian (6.1-2)  
\io1 8. Ceteh filfil (6.3-19)  
\io2 A. Uhulec iwaladec dana (6.3-5)  
\io2 B. Meen qaig ocnu gawec kobol (6.6-10)  
\io2 C. Timoti uqa cebac bilec catanec gagadic hewigian (6.11-16)  
\io2 D. Dana cehewanagaca (6.17-19)  
\io1 9. Timoti uqa uqana cabinu cofdu cuhadugian (6.20-21)  
\c 1  
\p
\v 1 Ija Pol, ija Krais Jisasna aposel. Anut uqa egena Cahahagec. Ege Krais Jisas cahahagecnu sumuduquna. Ale madecebil ija aposel calem.   
\p
\v 2 Timoti, hina wawi meleec melami bahic, ijana jaqec je i jaqihigina. Anut ege Memigeca egena Tibud Jisas Kraisca ale eelhec uum ihecca, waug qocca, malol bilecca ihesiale.   
\s1 Ele uhulec je cunug cilehdowale  
\p
\v 3 Ija wele Masedonia ono nuige bili cuculihi cesushihi mahem, hina Efesas ene biliga hem, eu odi haun cesushihi mahigina. Ija mahem, “Hina Efesas ono dana leih age me je cuculdi faninadec je filfil dana cajaca iwaladegina eu gagadic maadaga, ‘Age faninadec je filfil cain iwaladowain, age me je bahic iwaladeiga.  
\v 4 Ageha dodo gauc saadecca, agena sihul sanijecca, age asagail ijanagana je eu mamadi fee dadanec cali hona eu cunug culeiga,’ adaga,” odi mahem. Eetanu? Je euna dih fee dadaneginanu. Iwaladec eu age adi Anutna ititom coboc odocnu qee iwalgegina. Ege ititom coboc eu wawaga meleecna himec odoqona.  
\v 5 Euqa ititom coboc Anut magen uqana sis qoc eu nalug mec. Ege wawige silailca qeefi, ege wawige catanieccafi, ege Jisas Kraisnu wawige mele bahic enafi, ege wawige meleec cotigeilnu nalunuga moqona.  
\v 6 Dana leih age kobol i culein. Odocob age je gauc dihnu mamadi ilag gad fahalegina.  
\v 7 Age Mosesna loo jenu iwaladec dana caloqagannu odogina qa je inu age madeginaca, uqana gug egena je i mele bahic eginaca eu agedodoc qee fogo adena.   
\p
\v 8 Ege doqona, oso uqa loo jena jic tutuc cobonafi loo je eu me.  
\v 9 Euqa egeha doqona, loo je gug eu odi. Loo je eu dana tutuc coboginanu je oso qee madena. Euqa dana age loo je wooldudu bisalu qee bilegina eundecca, dana age Anut hibemdudu silail kobol odogina eundecca, dana age Anutna kobolnu odi fena imeig mahanadec kobol toodogina eundecca, dana uqa anag memegca qagaalena eundecca, dana uqa oso qagadona eundecca,  
\v 10 dana age cajaca wal kobol odogina eundecca, dana age danaca Sodom agena kobol odogina eundecca, dana age dana cajaca heje cedegina eundecca, uhulec danaca, dana age uhulimeig mele ohis ec madegina eundecca, dana cunug age ititom cobocnu mele je iwalgena eu tefacdogina eundecca, dana eundec cunugnu loo je niniji je maadena.  
\v 11 Mele je i eu me je Anut uqa ija maadecnu iten euna bilia. Me je i uqana gug eu binan benca, eu Anut ege binan suluqale uqana me je.   
\s1 Anut Polnu waug qon eunu hetaga don  
\p
\v 12 Jisas Krais egena Tibud uqa cabi i ocnu gagadic iten. Uqa ija uqana cabi ihoc ugian imei cabi euna miten. Eunu ija hetaga dugina.  
\v 13 Mele, wele ija gaid uqa ijannu je me qee madolig, odocob ija uqa jabudi tootoodolig, odocob uqa deweg tudolig. Euqa ija uqana gug qee du cuhadolom, ija wawi qee meleecebnu eu odi oodi bilem eunu uqa ijanu waug qona.  
\v 14 Odocob egena Tibud uqana eelgec uum igec ben eu basecdumei wawi meleecca uqanu nalug mecnuca iten eu egena Krais Jisasca gabangec.   
\p
\v 15 Krais Jisas ege silail dana cajaca cahahagecnu maha ina toni nen ec madec eu mele bahic. Je madec eu dana cajaca cunug dumeig wawaga meleigiannu ihoc nijia. Ijaha silail dana, ija silail dana cunug wooladec.  
\v 16 Euqa Jisas Krais uqa silail dana cajacanu waug qona eu cunug du cuhadocnu waug nijia. Odocob uqa ijanu waug qon, ija silail dana cunug wooladec. Ija wa dodwe, odocob dana cajaca cunug Jisas Krais uqa adi ija oditen eu fimeig age uqanu wawaga meleeceb age cebac bilec catanec eu oqagan.  
\v 17 King saensaen cunug cal mecwe qee, eu uqa fecwe qee, uqadih Anut bilia eu binan sulocomun cataneiale, uqa kobolkobolca bileceb cataneiale! Mele.   
\s1 Timoti uqa ceteh me qee cilehdugiannu gagadic meiale  
\p
\v 18 Ija melami Timoti, hina eeta odocnu je i mahigina. Je i eu je hahun madec dana age wele hinanu madein eu toodoga. Hina je i hewimeg Anutna cad gami han cadec me bahic cadagale.  
\v 19 Hinana cadec eu odi. Hina wawin meleec gagadic hewagale. Hinana cisdoc silec eu hina silail magana ec qee madeiale. Dana leih age agena cisdoc silec qee dah mimeig age wawaga meleec wagalein.  
\v 20 Dana eundec gemonadec oso Haimeniasca Aleksandaca. Dana eu ale ulaulaleceb ale Anutnu je me qee madesina eu culuwasannu ija Seten ulaulaligiannu ebenna culalitom.   
\c 2  
\s1 Ege Anut dana cajaca cunug cesuladigiannu inondoqale  
\p
\v 1 Ija casac ulichigina. Ija ninihigina, hina tamanec dana cajaca odi maadaga, age dana cajaca cunugnu Anut cesuladigiannu inondoigale, ec adaga. Age binan sulecca hegaga docca Anut inondoigale.  
\v 2 Age kingca gabman danaca eundecnu ha age odocobil ege malol bilecna ititomca binanaga meca ege gemona cobocnu nijigiannu inondoigale.  
\v 3 Inondoc i edi eu Anut amegna me bahic. Egena Cahahagec odi uqa gale ben dona.  
\v 4 Uqa dana cajaca cunug cahahaadigiannu odona. Odocob age mele je uqana gug doqagannu gale dona.  
\v 5 Ge, Anut osol himec bilia, Anut danaca tanawi tawecnu osol himec eu dana eu Jisas Krais tawena.  
\v 6 Uqadodoc deweg ihandon, eu odocna dana cajaca cunug besiadigiannu ceseli fajen. Jisas Krais uqadodoc deweg ihandon saen euna dih Anut uqa dana cajaca cunug cahahaadigiannu odona eu camasac men.  
\v 7 Gug inu Anut uqa ija ulicadecca aposelca cobigennu nesili ehiten. Ija je qee uhuligina, ija je mele madigina. Anut ija Juda dana qee eundec Jisas Kraisnu wawaga meleecca mele jeca ulicadecnu miten.   
\p
\v 8 Ija maadigina, dana cunug age tamanec jonana inondoigale. Dana eu age Anut ijan saolal mumudi ebenega suli u inondoigale. Age inondodoig gemanaga becca fee dadanecca qa cain bahic odowain.   
\s1 Kobol me odoc eu caja agena bala me bahic  
\p
\v 9 Eu odi ija cajaha maadigina, age lotoc ceteteh me eu dewenega jaunecnu ihoc dih taceigale. Age deboecna gosiniga cubusecca, dewenega gigiloca, gol balaca lotoc meen qaig ben bahicna fajimeig dewenega cain bala faldowain.  
\v 10 Age caja Anut cumundoqona ec madegina eundec age me odoc odoginawe odi cunug odoigale.  
\v 11 Caja age conoga culeceb jogoecca je dah mimi biluqagan.  
\v 12 Ija caja oso culdecemin dana iwaladec qee biliaun, dana agena iloha qee biliaun. Caja age conoga culeceb je dih dah moqagan.  
\v 13 Ge, Anut Adam casac ifani muden, odocob hibna Iw ifani muden.  
\v 14 Odocob Adam uqa qauec jenu waug qee meleel qa caja uqa qauec jenu waug meleen. Odimei Anutna sisi mec je wooldon.  
\v 15 Euqa caja age Jisas Kraisnu wawaga meleecca, wawaga meleec dana cajaca nalunuga mecca, cataniec bilecca, ititom cobocca, eu cunug hewi cobocobilfi Anut uqa caja mel basadecnu cahahaadigian.\f + \fr 2.15 \ft But ina Grik je uqana gug eu camasac qee.\f*   
\c 3  
\s1 Tamanec cofadec matu age ititom kobol coboigale  
\p
\v 1 Je i eu je mele, dana oso uqa tamanec cofadec matu bilec cabi eu ugen ec gale donafi eu uqa cabi binanca bahic gale dona.  
\v 2 Tamanec cofadec matu mudec eu dana odi biliale. Oso uqa cahuldocca qee, uqa hutan me qee eu cain muduwain. Uqa caja osol gemug. Uqadodoc duman cofdu cuhadugian. Uqa gesili fecca, uqa loo cahulecca, uqa iwaldocnu hutan meca, uqa kobol me tutuc himec toodugian.  
\v 3 Uqa ceu jeceb dalul cain qoiaun, uqa hihiban cain teiaun qa waug susumulca, malolca biligian. Uqa meen qaig ocnu himec cain cisdoiaun.  
\v 4 Uqadodoc uqana aideg talaculca gami kobol mena tutuc cofadi maadigian. Odimei uqana mel mel aidca odadeceb uqanu jogoi bileig uqa jejeg toodu odoqagan.  
\v 5 Ge, dana oso uqana aideg talaculca kobol mena iwaladecnu qee donafi Anutna tamanec adi me cofdu cuhadugian?  
\v 6 Gadgad uqa waug cisdoc toodu deboeceb Anut uqa Seten geuldenwe eu odi geuldeiannu cofadec matu eu uqa wawaga meleec haun cain biliaun.  
\v 7 Dana wawaga qee meleena ageha cofadec matu uqana cobocnu madi, uqa me, oqagan. Qeefi, uqanu hutan me qee madowainnu, odocob uqa Setenna aisaisna toni qugian.   
\s1 Tamanec cesuldoc cabi dana cunug age tutuc coboigale  
\p
\v 8 Eu odiwe tamanec cesuldoc cabi dana eu dana agenu hutanaga me himec coboigale. Age dana conoga lecisca cain biluwain. Age ceu jecebil dalul cain aqeiaun. Age dana agena meen qaig celcel qauadecna ocnu cain cisdowain.  
\v 9 Age wawaga meleec uqana caun eu jahunec nijia eu agena cisdoc madi, eu mele, ena odi hehewi biluqagan.  
\v 10 Dana eundec age casac temadi feigale. Age me ihoc lec eu camasac meceb fifeig tamanec cesuldoc cabi dewenegana meiga.  
\v 11 Eu odiwe age aidagailha agenu hutanaga me himec coboigale. Age osonu hibiloh je me qee cain madowain. Age agedodoc dumanaga cofdu cuhadoigale. Age ceteh cunugnu mele je himec madoqagan.  
\v 12 Tamanec cesuldoc cabi dana uqa caja osol uqana dana himec biligian. Odimei uqana aideg talaculca gami kobol mena tutuc cofadi maadigian.  
\v 13 Ge, tamanec cesuldoc cabi dana age agena cabi me ogina eu age ijanaga me oqagan. Odimeig age Jisas Kraisnu wawaga meleenanu dana cajaca je gagadicca maadecnu ihoc.   
\s1 Anutna kobolnu je gug  
\p
\v 14-15 Ija mahucwe humig hina fecihecnu cisdugina qa ceteh oso cahactecebfi jaqec je ina dado mihimei hina Anut talaculna adi me bilegannu qila ija je i jaqihigina. Talacul eu Anut cebac bilina uqana tamanec, eu mele je cofdudu hehdona.  
\v 16 Ege mele doqona, Anutna kobolnu je gug eu me bahic me, oso eunu qee sasac qocwe qee. Je gug eu ege odi qasali madoqona:  
\q1 “Uqa dana deweg ocna camas men.  
\q1 Kis Gun uqana gug eu tutuc bahic ege ihacgen.  
\q2 Ensel age fecidoin.  
\q1 Agena malogom age uqana je dana hatuhatu bilegina age gemo maadecebil dah mein.  
\q2 Mahanadec age uqanu wawaga meleena.  
\q1 Anut uqa ehudi sao jobon teceb uqa binan ben on,” oqona.   
\c 4  
\s1 Uhulec je iwaladec  
\p
\v 1 Kis Gun uqa camasac odi madena, saen hibna hugian saen euna dana leih age kis uhulecca, buga me qeeca, agena je dah mimeig toodumeig wawaga meleec eu qisacdoqagan.  
\v 2 Uhulec dana eundec age uhulec kobol odimeig uhulec je i dana cajaca iwaladegina. Dana eundec agena cisdoc silec dalul aqeceb agena silailnu qee tebandogina.  
\v 3 Dana i edec age dana cajaca cain ocobocobowain ec iwaladegina, odocob age sab leih cain jowain echa iwaladegina. Euqa Anut uqa sab i jecnu ifanen, age wawaga meleeceb mele je doin eu age Anut sab eu cunug jeqannu hegaga ec inondu hedumeig jegina.  
\v 4 Ge, ceteteh cunug Anut ifanen eu me. Eeta oso culecnu qee nijel qa cunug eu Anut hegaga ec inondumeb jeqan.  
\v 5 Ege odi odoqonafi Anutna je inondocca ale eu sab eu Anutnu qagoc calena.   
\s1 Timoti uqa Krais Jisasna cabi dana me caligian  
\p
\v 6 Hina je i wawige meleec cotigeil iwaladifeg hina Krais Jisasna cabi dana me calegan. Odocob hina wawin meleecnu iwaldoc jeca iwaldoc je eu hina toodu cobogonanu euha saniji docomfi hinana kis gagadic tawigian.  
\v 7 Euqa mahanadec dodo caunca qee, eu Anutnu je me qee madegina, eu hibemdogale. Hinadodoc Anutna kobolnu iwaldu cuhadoga.  
\v 8 Hina dogona, dewenige cabinu iwalgoqona, odocob dewenige gagadic mena, eu nagnag cesulgigiannu ihoc. Euqa Anutna kobol toodocnu iwaldoqonafi eu ege geh bahic cesulgigiannu ihoc. Eetanu? Eu ege cebac bilec qila ina biluquna cesulgecnu ihoc, odocob hibna cebac bilecnu hugian euna ha cesulgecnu ihoc.  
\v 9 Je i mele bahic,\f + \fr 4.9 \ft Cel je mele bahic eu camasac qee. Eu je but 8na nijiafo, qee eu je but 10na nijiafo Pol uqa cisdon eu ege qee doqona.\f* odocob dana cunug je i dumeig wawaga meleigiannu ihoc nijia.  
\v 10 Ege Anut cebac bilec uqa cahahagecnu sumuduquna. Uqa dana cajaca cunug agena cahahaadec. Uqa dana cajaca age uqanu wawaga meleena eu mele bahic cahahaadena. Eunu ege cabi doot oqona, ege cabi gagadic bahic oqona.   
\p
\v 11 Hina je i dana cajaca ulauladi maadagale. Odimeg je i toodoqagannu iwaladagale.  
\v 12 Age hina mel haun fecihuqagan qa age hina dana gauc ec cain cisdowain. Euqa hina dumain cobocna wawaga meleec dana cajaca dado madagale. Hina connaca, hina nalunuga mecnaca, hina wawin meleecnaca, odoc cataniecnaca age adi cobocnu ihacadagale.  
\v 13 Hina Anutna je tamanec sanijiadecnuca, me je sildiadecnuca, iwaladecnuca cabi eu uu bibilem ija ono caligen.  
\v 14 Cabi ocnu duman oso Kis Gun ihen eu cain alal heiaun. Je hahun madec dana age madecebil tamanec uqana matu age ebenega ilomna mecebil hina duman oso eu om.  
\v 15 Odoc eu ihoc ligiannu cisdudu cobogale. Hinadodoc cabi i me calecnu gaid odogale. Odocob dana cajaca cunug age hinana cabi eu me bahic caleceb foqagan.  
\v 16 Hinadodocnuca hinana iwaladecnuca mecii cuhadogale. Ceteteh i gaid hewi daugdudu hewi tawagale. Hina odi odifeg hinadodoc cahahadogan, odocob dana cajaca hina dah mihegina euha cahahaadegan.   
\c 5  
\s1 Timoti uqa wawaga meleec dana cajaca adi cofadigian  
\p
\v 1 Dana toia oso je gagadic cain madogaun, hina memenwe dahig hewagale. Dana haun age walinelwe odadagale.  
\v 2 Caja toia aninelwe je maadagale, caja haun cebinaminelwe je maadagale, kobol cataniecca odadagale.   
\s1 Cel dana uqa caja wij cofadigian?  
\p
\v 3 Caja wij eu mele bahic wij cuhanuc bilegina eundec lalan madeigale.  
\v 4 Euqa caja wij oso uqa uqana melcafi asagulcafi, age mel eu age anaga soadoqagannu maadaga. Mel age eu odocna anagail wele me madein eu ameg adoqagan. Ge, kobol eu Anut gale dona.   
\p
\v 5 Caja oso uqa wij bahic oso uqa cofdocnu qee bilina eu uqa Anutnu himec deweg mudeceb ninijen Anut cesuldugiannu witic cahinegca inondudu bilina.  
\v 6 Euqa caja oso uqana dana wele cal men odi caja eu uqa dewegna dih gale doc toodona eu uqa wele cal men cinigwe.  
\v 7 Hina age tutuc bilecebil age dewenegana je oso qee caleiaunnu caja je i toodoqagannu maadaga.  
\v 8 Euqa dana oso uqana eundec, uqa talacul, agena togo nijigiannu qee mede qona eu uqa wawige meleec cewudina. Mele bahic, uqa wawige qee meleec dana wooladec bilina, uqa dana me qee bahic.   
\p
\v 9 Caja wij agena cabi gel 60 ihoc lec eundec himec ijanaga wij agena bukna jaqeigale. Caja wij oso uqa dana osol biliton.\f + \fr 5.9 \ft Efesas tamanec age caja wij leih ijanaga bukna jaqoloig eu odi fena. Caja wij age tamanecnu cabi ocnu cois ecebilfi tamanec age caja wij eu sabca, bilecnu cetehca adoloig.\f*  
\v 10 Odocob uqa cabi caunca me odocnu ijanca. Uqa uqana mel me cobocnu iwaladen, uqa dana cus hoc eundec loo aden, dana cajaca qagoc eundec jaimaga wasacudiaden,\f + \fr 5.10 \ft Age Jon 13.1-17 feiga. Saen euna cunug age kobol oso odoloig. Leih age agena jona lecebilfi cois, age jic coboc comis age jaimaga gegehin muden eundec jaimaga wasacudiadoloig. Cabi eu cabi bega meh dana cajaca age odoloig, euqa Jisas uqa malogom age cotogail cunug cewel uadeigale ec maaden. Age Matju 20.25-28ha feiga.\f* dana cajaca age culumenca eundec cesuladen, cabi me ocnu deweg qee sosogon ol, caja wij eundec dih ijanaga buk euna jaqeigale.   
\p
\v 11 Euqa hina caja haunhaun gemunugail cal mein eu age golanaga me qeenu silileceb age Krais qee fagdowain, age dana haun oso ocnu odoqagan. Eunu caja wij eundec ijanaga cain jaqagaun.  
\v 12 Odocob age cagoc je casac madein, “Ege dana haun oso qee oqaun,” ein je eu lahacdogina. Eunu age eu odocna dewenega jeca mudegina.  
\v 13 Eu himec qee. Age agena saenha cusdumeig jo tobi u loldudu cobogina. Age cabi ol himec qee, age dana cajaca age odocnu dah mimeig hibilemega je mamadi cobogina. Odocob age je ilag filfil ege madecwe qee eu age mamadi cobogina.  
\v 14-15 Eunu caja wij haun leih age wele jic tutuc siho qumeig Setenna jic toodoinnu ija caja wij haun maadigina, age dana umeig mel basimeig agena joca cetetehca cofdoigale. Age eu odi odocobilfi egena cad oso egenu je me qee qee madowain.  
\v 16 Euqa caja waug meleec eundec oso uqana sihulna osooso age caja wij bilecebilfi caja waug meleec eu uqadodoc caja wij eundec cofadeiale. Tamanec uqa odi cain odeiaun. Euqa tamanec age uqana eundec cesuladecnu culumenca qee odi biligian. Age caja wij cuhanuc bahic bilegina eu cesuladecnu ihoc odi biligian.   
\s1 Ege tamanec cofadec cabi me ogina eundec lalan madec  
\p
\v 17-18 Anutna jaqec je oso edi madena:  
\q1 “Age bulmakau uqa wit ceteteh lahacdocnu cabi ona eu uqa biah cain cufa qowain,” ena. \rq (Loo 25.4)\rq*  
\m Odocob Anutna jaqec je osoha madena:  
\q1 “Cabi dana oso uqana cabi ameg ocnu ihoc ugian,” ena. \rq (Luk 10.7)\rq*  
\m Eunu tamanec cofadec matu age cabinu megameg mi cuhadogina eundec age lalan mamadi cabi ameg me adeigale. Me je madi fec, iwaladi fec eundec bahic ijanaga ohis madeigale.  
\v 19 Tamanec cofadec matu eundec deweneganu um qoc je eu dana osol himec madeceb cain dah magaun. Dana lecisca cijedca age uqa cahuldodon fein age cofadecnu madecebil uqanu je togodoigale.  
\v 20 Cofadec leih age silail megina eundec cofadec matu cunug eu fimeig filiciti cucuii coboqagannu hina cofadec cunug amagana tutuc madec je maadagale.   
\s1 Timoti uqa uqadodocnu cofdu cuhadugian  
\p
\v 21 Ija hina Anutca Krais Jisasca ensel Anut nesili cedadenca amagana tutuc mahigina. Je jaqihem fagana eu toodu bahic odogale. Oso ijanca, oso ijanca qee eu filfil cain odadagaun, age ihocihoc odadagale.  
\v 22 Odocob hina dana oso mahuc ilona eben mimeg cofadec cain mudecem Anutna cabi dana biliaun. Qee dodom hina dana leih agena silail eu fagheiaunnu. Hinadodoc Anut amegna wawin cataniec biligiannu cofdogale.   
\p
\v 23 Hina gaid hag mahuc ogona eunu gaid wa himec cain jagaun. Wain nag odi jecem bin anag cesuldugian.   
\p
\v 24 Dana leih agena silail eu camasac nijia, odocob agena silail aquniadena, ege mahucwe gesiladoqona. Euqa leih agena silail eu jahunecna nijia, odocob hibna dih camasac moqagan.  
\v 25 Eu odiweha dana oso agena me odoc eu camasac nijia. Euqa leih agena me odoc qila qee camasac mel eu jahunecna nijecwe qee, hibnaha camasac migian.   
\c 6  
\s1 Cabi dana bega meh age kobol me himec odoqagan  
\p
\v 1 Kristen cunug age cabi dana bega meh bilegina eundec age Anut ijannuca, egena me je iwaladecnuca, dana oso cewudec je oso qee madeiaunnu agena ilo lalan mamadi toodu odoc bahic bileigale.   
\p
\v 2 Cabi dana bega meh oso agena ilo Kristen, mel eundec age, ege wawige meleec cotige ihocihoc biluqunanu, egena ilo lalan qee mudoqaun ec odi cain cisdowain. Euqa agena ilo eu wawige meleec dana, age uqanu nalug meginanu age uqanu nalug mimi cabi oqagan. Eunu age agena cabi oc utogina eu ceteh me bahic utogina.  
\s1 Meen qaig ocnu gawec eu kobol me qeenu gug  
\p Hina hinana tamanec je i toodu odocnu iwalaadi maadagale.  
\v 3 Egena Tibud Jisas Krais uqana je eu Anutna kobolnu iwalgi cuhadona. Dana oso uqa je i culimei dana je filna iwaladifei uqana je eu Jisasna jeca osol qee.  
\v 4 Ege doqona, dana i uqa deboecca, uqa docca qee. Uqa gale doc me qeeca, uqa je osona gugnu fee dadanecnuca jena cadecnuca gale ben dona. Je eundecna kobol i edi calena. Age dana osona ceteteh ocnu amaga qona, odocob age jena cadegina, je hibiloh madegina, odocob wawaga meleec cotoganu cisdu cahuldogina.  
\v 5 Odocob age gaid ilag galac megina. Dana eundec age mele je gagadic qee hewegina. Dana eu odi odogina eu agena cisdoc eu cogogec. Age Anutna kobol eu cehewanigeca bilecnu jic ec cisdogina.   
\p
\v 6 Mele, dana oso Anutna kobol toodufei uqa ceteh me mati bahic cedigian. Euqa ceteh Anut utona eu cois ihoc enafi uqa ceteh me mati bahic cedigian.  
\v 7 Ege doqona, anigeil basigein ege ceteh oso ebenigena qee hewi aholom. Odocob cal mecna ege ceteh osoha maha inadec qee hewi beloqaun.  
\v 8 Eunu egena sab jecnuca, dewenige lotoc taqecnuca ihoc nijecebfi ege ijana togo nijia oqale.  
\v 9-10 Euqa meen qaig ocnu gawec eu kobol me qeenu gug. Dana leih age wawaga meen qaig ocnu gawec kobol eu diadeceb age wawaga meleec culein. Odocob age culumen sogoec ben gahidogina. Eunu dana age mahana cehewanagaca bilecnu wawaga madena, eu age temadecna toni aqena. Eu aisaisna leginawe odi loqagan. Ageha gadwe odocca golanaga mahana ceteteh ocnu sililec euca fadalecna ehi li madena.   
\s1 Cebac bilec catanec eu gagadic hewagale  
\p
\v 11 Euqa hina, hina Anutna dana, hina ceteteh me qee i cunug oninadimeg qisacdu biligale. Hina ititom cobocca, Anutna kobol toodocca, wawin meleecca, nalug mecca, wawin duuec tawecca, gemain jocosaigca eu cunugnu gaunan mamani icocagale.  
\v 12 Dana Kraisnu waug meleena eu uqa gugulecna resis mecwe mimei uqadodoc cebac bilec catanec wooladi ona. Wele hina wawin meleec eu dana mati amagana qasalem saen euna Anut hina cebac bilec catanec ocnu utahen. Cebac bilec catanec eu hewagale.   
\p
\v 13 Ija hina, Anut uqa ceteh cunugnu cebac bilec adena uqa amegnaca, Krais Jisas uqadodoc uqana gug eu Pontias Pailat amegna je qasalen uqa amegnaca, ija je gagadic mahigina.  
\v 14 Je hina wele om eu toodu odogale. Hina je i cahuldoc osoca qee cofdodom oso je inu je me qee madecwe qee li egena Tibud Jisas Krais ceseli hugian.  
\v 15 Uqana ceseli hoc deel euna Anut uqa himec king bahic, uqa eeldocca, uqa King agena king, uqa Tibud agena tibud eu madeceb camasac cali hugian.  
\v 16 Uqa himec cal mecwe qee gaid bileceb catanena. Uqa fulacdoc bahicca bilina eu ege uqa cemenug lecwe qee. Anut eu dana oso qee fel, dana osoha fecwe qee. Ege uqa binan sulocomun cataneiale! Uqa gagadic odocca demico biliale! Mele!   
\s1 Dana age meen qaig matica age Anutnu wawaga meleeiale, odimeig age dana cajaca leih cesuladoqagan  
\p
\v 17 Dana age cehewanagaca maha ina bilegina eundec cain deboowainnu maadagale. Age cehewanaga cunug maha inadec eu mahuc odi me qee mena eunu cain wawaga meleeiaun. Euqa age Anutnu wawaga mele bahic igian. Uqadodoc ege ceteteh mati bahic wawige ceeli bilecnu igena. Eu odi maadagale.  
\v 18 Age odoc me odoqagan. Odocob odoc me euna cehewanagaca biluqagan. Age loo siwiadeigale, agena meen qaig naha dana me madecnu heleiga. Eu odi maadagale.  
\v 19 Eunu age odoc euna cehewan fil bahic agena biligiannu haudogina. Odocob hibna age cebac bilec catanec eu oqagan, cebac bilec catanec eu cebac bilec age qila bilegina wooldoc. Eu odi maadagale.   
\s1 Timoti uqa uqana cabinu cofdu cuhadugian  
\p
\v 20-21 O Timoti, hina cabi i Anut hina ebenna men eu cofdu cuhadogale. Dana leih age madein, “Ege doc silecca,” ein, odocob age wawige meleec eu culimeig jic ceja qu lec euna belein. Eunu je hetec gauc Anutna kobol qee toodona eu dana age doc silecca imeig cahuldudu madegina eu hibemdoga.  
\p Anutna eelgec uum igec eu ageca biliale.