\id 1PE  - Amele NT and Genesis [aey] -Papua New Guinea 1997 (DBL 2014) 
\h 1 PITA 
\toc1 Pita Uqa Jaqec Je Osoldoc Anutna Dana Cajaca Jaqiaden 
\toc2 1 Pita 
\toc3 1 Pi 
\mt1 Pita Uqa Jaqec Je Osoldoc  
\mt2 Anutna Dana Cajaca Jaqiaden  
\imt1 Aqunec Je  
\ip Pita uqa Kristen dana cajaca age hatu filfil ilagna bilein eu jaqec je i jaqiaden. Kristen eu age culumen me qee gahidoin eunu Pita uqa agena wawaga meleec gagadic mudecnu jaqec je i jaqiaden. Uqa Kristen age Jisas Kraisnu me je haun cisdoqagan ec madena. Jisas uqa cal mimei ceseli cajen. Odimei uqa ija ceseli hugen ec maden. Pita uqa age Jisasna je hahun eunu cisdumeig uqa ceseli hocnu susumudi biluqagan ec madena.  
\ip Eu mele, Kristen age culumen gahidoin. Euqa ceteh me qee eu agena wawaga meleec temdocnu calen. Eunu age wawaga gagadic meleeen lili Krais ceseli hugian. Odocob saen euna age ameg me bahic oqagan. Pita eu odi madena.  
\is1 Je Dunuhnu Dado Mec  
\io1 1. Feele adec je (1.1-2)  
\io1 2. Anut uqa egenu waug ben qumei cahahagen eunu Anut binan suluqale (1.3-12)  
\io1 3. Ege gun biluqale (1.13-5.11)  
\io2 A. Anut uqa gun eunu ege gun bileqan (1.13-2.3)  
\io2 B. Ege wawige meleec dana cajaca egena bilec eu adi (2.4-12)  
\io3 1. Ege Anutna jo Anut uqa cehena (2.4-8)  
\io3 2. Anut uqa ege wawige meleec dana cajaca eu wele nesili cedigen (2.9-10)  
\io3 3. Ege cele dana jobon filnadec cinigwe odi ege jag maha ina biluquna (2.11-12)  
\io2 C. Ege dana agena iloilo cunug bisalu biluqale (2.13-3.7)  
\io3 1. Ege kingca, gabmanca bisalu bileqan (2.13-17)  
\io3 2. Ege egena cofgec dana bisalu bileqan (2.18-20)  
\io3 3. Krais uqa culumen dain doc sogoecca gahidon eunu egeha odi odeqan (2.21-25)  
\io3 4. Aidagail age gemugail bisalu biluqagan (3.1-6)  
\io3 5. Gemugail age aidagail me cofaadi gami me biluqagan (3.7)  
\io2 D. Age wawaga meleec cotogail cunugnu nalunuga meigale (3.8-17)  
\io2 E. Krais uqa dana caja silailca eunu cal men (3.18-4.6)  
\io2 F. Ceteteh cunug qee mec saen eu cemenug nijia eunu ege kobol me odoqale (4.7-11)  
\io2 G. Ege Krais dain sogoecca gahidonwe odi dain sogoecca gahidoqale (4.12-19)  
\io2 H. Tamanec cofadec age Anutna dana cajaca cofadi cuhadoigale (5.1-4)  
\io2 I. Dana haun age tamanec cofadec matu bisalu bileigale (5.5-11)  
\io1 4. Jaqec je i uqana gug (5.12)  
\io1 5. Cit qoc je (5.13-14)  
\c 1  
\p
\v 1 Ija Pita, ija Jisas Kraisna aposel. Ija jaqec je i Anutna dana cajaca jaqiadigina. Age agena gug jobon culimeig Pontasca, Galesiaca, Kapadosiaca, Esiaca, Bitiniaca hatu ilagna bilegina.  
\v 2 Wele bahic Anut ege Memige uqa agenu wele don. Odimei uqa uqana cisdocna age uqana dana cajaca biluqagannu nesili cedaden. Odimei age Jisas Krais jejeg toodu odoqagannu nesili ehaden. Odimei Jisas Krais uqa golac eu bilisadu aqeceb age Anut amegna soidoc tawoqagannu nesili ehaden. Eunu Anutna Kis uqa age qaguadeceb gun calein. Anut uqana eelgec uum igecca malol bilecca adeceb ageca am bec nijiale.   
\s1 Ege cebac bilec me bahic sao jobon bilia eu ocnu sumudi biluquna  
\p
\v 3 Anut uqa egena Tibud Jisas Krais Memeg. Eunu ege Anut binan suluqale. Uqa egenu waug ben qon. Odimei uqa Jisas Krais cal mecnadec tulidocob haun cajen. Uqa jic euna ege cebac bilec haun igen. Odocob cebac bilec haun eu ege gagadic migeceb ege cebac bilec catanec Anut hibna igigiannu sumudi biluquna.  
\v 4 Cebac bilec catanec ocnu sumudi biluquna eu Anut uqa mugumige mec eu wele saciadon agenu cofdona, eu sao jobon bilia. Eu qee fadaleiaun, eu Anut amegna cataniec bahic bilia, eu qee qee meiaun.  
\v 5 Age Kraisnu wawaga meleena, eunu Anut uqa uqana gagadic odocna uqa age cahahaadigiannu cofadi cuhadona. Odocob agena cahahaadec eu saciadon bilia eu deel cit qocna camasac mudigian.   
\p
\v 6 Age ceteh i cunug Anut odon eunu cisdumeig ceeleigale. Euqa qila age saen nag odi dih Anut gale docobfi temadec filfil ageca caleceb sogooqagan.  
\v 7 Temadec ina Anut uqa agena wawaga meleec eu melefo, qeefo temdona. Age dogina, gold eu ceteh fajecnu qaig ben bahic, euqa age gold eu melefo, qeefo temdocnu jana manegina. Gold eu ceteh fadaligian. Eunu agena wawaga meleec eu gold wooldona. Odocob temadec filfil ageca caligian saen euna agena wawaga meleec eu gagadicfo, qee, mele qeefo eu odi dugian. Odocob hibna Jisas Krais camasac cali hugian deel euna uqa agenu ceelimei age binanaga fulacdoc benca adigian.  
\v 8-9 Age Jisas Krais qee felein qa age uqanu nalug megina. Age uqa qila qee fegina qa uqanu wawaga meleena. Agena wawaga meleec eu aig qona. Aig eu Anut uqa age dolonoga cahahadona. Odocob age uqanu celebo bahic egina. Agena celeboec eu ben bahic, eu celeboec cunug maha inadec wooldona, eu odi ege conigena qasali madecnu ihoc qee.   
\p
\v 10 Je hahun madec dana wele bilein age Anut uqa age qila bilegina cahahaadigian eunu je hahun madein. Odimeig age je i Anut uqa eeladec me bahic uum adigian ec eu gug doqagannu cabi gagadic oloig.  
\v 11 Kraisna Kis uqa je hahun madec dana eu age dunuh bilen. Kis eu uqa conogana Krais culumen dain doc sogoecca filfil gahidumei hibna binan ben fulacdocca ugian ec saaden. Kis saaden saen euna je hahun madec dana age wawali sisilec cabi oin, “Cel dana uqa ege cahahagigian?” ein, odocob “Aadeb dana eu cahahagigiannu hugian?” ein.  
\v 12 Euqa Anut uqa je hahun madec dana eu age je hahun inu agenel cesuladecnu qee nijel ec maadeceb doin. Je hahun i agena saenna qee camasac meiaun ec maadeceb doin. Euqa agena je hahun eu Anut uqa age qila hatu ilag bilegina eundec cahahaadigiannu maden. Anut uqa Kis Gun sao jobondec suldocob nen. Odocob dana sos age Kis Gunna gagadic odocna Jisas Kraisnu me je qasali maadecebil doin. Ensel ageha Anut uqa adi uqana dana cajaca cahahaadigian ec foqagannu gale adena.   
\s1 Anut uqa ege gun bilecnu utagen  
\p
\v 13 Eunu age agena cisdoc tutuc mudimeig dumanaga cofdu cuhadu bileigale. Age agena cisdoc cunug gabandumeig Jisas Krais camasac cali hugiannu sumudeigale. Odocob age Anut uqa eeladec me bahic saen euna uum adigiannu gaid cisdoigale.  
\v 14 Age mel sim je toodu odoginawe odi odoigale. Wele age docca qee, odocob age wawaga cajecna kobol toodu odoloig. Qila age kobol eundec haun toodu odocnu cain cisdowain.  
\v 15-16 Anut age wele utaaden uqa gun, uqana kobol cunug eu tutuc bahic. Anutna jaqec je odi madena:  
\q1 “Ija gun biligina eunu ageha gun bileiga,” ena. \rq (Wok Pris 11.44-45; 19.2; 20.7)\rq*  
\m Eunu age Anut himec toodoiga, age Anutwe agena coboc cunugna gun bileiga.   
\s1 Anut uqa fajec ameg ben bahicna ege ceseli fajigen  
\p
\v 17 Age Anut utadudu madogina, “Memige,” dogina. Memige eu uqa ege ijanigecafo, ijanigeca qeefo ec qee cisdona. Uqa ege dana osolosol cunug egena odoc himec ihocihoc gesiligina. Eunu age saen maha ina bilegina euna age gaid Anutnu cumunii coboigale. Age dogina, maha i agena jobon gug qee.  
\v 18 Age dogina, wele age kobol caunca qee age jajanagailnadec oin eu toodoloig. Euqa Anut uqa age ceseli fajadimei kobol eunadec cagasaden. Odocob Anut uqa mahanadec ceteh qee mena eu silwa goldca cinigwe euna qee ceseli fajadel.  
\v 19 Uqa Krais golacna ceseli fajaden. Golac eu ihanec meca bahic, meen qaigna fajecnu ihoc qee. Krais uqa sipsip haun oso uqa hulufan osoca qee cinigwe age Anutnu ihanegina.\f + \fr 1.19 \ft Isrel age sipsipfo, dool osofo Anutnu ihanecnu ehadi leinna agena loo je maden, “Age sipsip me bahic hulufan osoca qee eu himec ihanecnu ehi leiga,” en. Age Wok Pris 22.17-25 feiga. Pita uqa loo je eunu cisdumei maden, “Krais uqa sipsip haun oso uqa hulufan osoca qee cinigwe age Anutnu ihanegina,” en.\f*  
\v 20 Anut maha qee ifanec ninijen uqa Krais cabi i ugiannu nesili ehuden. Odocob qila cit qoc saen ina Anut uqa odudeceb Krais uqa age cesuladigiannu camasac men.  
\v 21 Anut uqa Krais cal mecnadec tulidocob cajen. Odimei binan fulacdocca uten. Krais uqa age cesuladeceb age Anutnu wawaga meleen. Eunu age Anutnu wawaga meleena, odocob age Anut cahahaadigiannu sumudi bilegina.   
\s1 Age wawaga meleec cotogailnu nalunuga meigale  
\p
\v 22 Age mele je i toodu odogina, odocob age kobol euna agedodoc wawaga wasacudecebil Anut amegna cataniec bilegina. Odocob age wawaga meleec cotogailnu nalunuga megina. Age cotogail osonu nalug mecebmecebecnu gagadic odoigale.  
\v 23 Ge, age haun wasein, eu odiwe sab cabina haun wasadena. Euqa sab aig qee mena eu age eunadec qee waselein. Sab aig gaid bilina eunadec dih age wasein. Sab aig eu Anutna je. Eu uqa cebac bilecca, eu gaid bilina.  
\v 24 Ge, Anutna jaqec je eu odi madena:  
\q1 “Gigi eu galalimei qee mena, uqana bobog eu cagasi tonena.  
\q1 Dana cajaca cunug age gigi cinigwe mahuc qee megina.  
\q1 Age binanaga eu bobog cinigwe cagasi tonena.   
\q1
\v 25 Euqa Tibudna je eu bileceb catanena,” ena. \rq (Aisaia 40.6-8)\rq*  
\m Tibudna je eu me je dana age qasali maadein.   
\c 2  
\s1 Tibud uqa meen me cinigwe cebac bilecca  
\p
\v 1 Age haun wasein, eunu age kobol me qeeca qauadec kobolca cunug culeiga. Age me hihi leeig me qee odocnu cain odowain. Age osona ceteh ocnu cain cisdowain. Age oso hibilemega je me qee cain madowain.  
\v 2 Ege doqona, mel momodo age su sugudocnu gale adena. Eu odiwe ageha mel momodowe age su cataniec Anutnadec sugudocnu gale adeiale. Su eu Anutna je, eu age dolonoga cesuldocob ben mimei cebac bilec haun Anut aden euna duuec tawigian. Odimei age Anutca me bilecebil cahahaadigian.  
\v 3 Ge, Anutna jaqec je odi madena, “Age ege Tibud kobol mena odigen eu wele tebandoin, odocob age Tibud uqa me ec fein,” ena.   
\p
\v 4 Tibud uqa meen oso cebac bilecca cinigwe. Dana age uqa fimeig eu me qee ec cisdumeig uqa hibemdoin. Euqa Anut uqa wele nesili ehudimei uqa me ec cisdon. Eunu age Tibudca hoigale.  
\v 5 Ageha age meen cebac bilecca cinigwe. Odocob Anutna Kis uqa age meenwe umei Anutna jo cehigiannu gale dona. Eunu age Anutna Kis culdecebil uqa Anutna jo age cebac bilec meenwe mudec euna cehimei uqa jo euna biligian. Odocob age Anutna jo euna age Anutna nawel tawec ihanec dana gun bilimeig age ihanec Anutna Kis gale dona eu Anut utuqagan. Age odi odocobil Anut uqa Jisas Krais umna cisdumei ihanec eu ocnu gale bahic dugian.   
\p
\v 6 Ge, Anutna jaqec je odi madena:  
\q1 “Feiga, ija meen oso eu noh gug cudunna cehigennu nesili ehudem.  
\q1 Meen eu me bahic, eu qaigna fajecnu ameg ben bahic.  
\q1 Ija meen eu Saion Aluhna mudigen.  
\q1 Dana oso uqa uqanu waug meleigia eu uqa majag qee doiaun,” ena. \rq (Aisaia 28.16)\rq*   
\m
\v 7 Age dana cajaca wawaga meleena eunu Krais uqa meen me bahic. Euqa dana cajaca age wawaga qee meleena eunu Anutna jaqec je odi madena:  
\q1 “Meen oso meen gel cehec memei dana culein eu qila meen jo big gug jo hehdocnu tawena,” ena. \rq (Buk Song 118.22)\rq*   
\m
\v 8 Odocob  
\q1 “Meen eu dana cajaca agena jicna caleceb age qeti aqeceb toni aqigian,” ec Anutna jaqec je oso madena. \rq (Aisaia 8.14)\rq*  
\m Age Anutna je tefacdogina eunu meen eu age jaimaga qeti qocob age toni aqena. Age eu odi odoqagan ec Anut uqana cisdoc wele toodumei je maden.   
\p
\v 9-10 Euqa age Anutna dana cajaca hatu ilagna bilegina eu wele age Anutna waug qoc qee oloin. Odimei age dana cajaca gauc bilein. Qilaqa age Anutna waug qoc eu oin, age Anutna dana cajaca bahic bilegina. Age Anut kobol me cunug uqa age odadennu qasali madoqagannu wele nesili cedaden. Qila age Anutna dana cajaca sihul bilegina. Age kingna nawel tawec ihanec dana bilegina. Age dana cajaca gun bilegina. Uqa age utaadeceb age tuca wele bilein eu culecebil uqa age ehadeceb age uqana fulacdoc me bahicna dunuh hoin.   
\s1 Ege Anutna cabi danawe bileqan  
\p
\v 11 O wawige meleec cotiel ija nalunuga migina, age cele dana jobon filnadec cinigwe odi age jag maha ina bilegina. Eunu ija niniadi maadigina, age wawaga hilahna gale adec me qee age dolonoga gami cadegina eu cunug hibemdoiga.  
\v 12 Gadgad haiden age agenu age dana cajaca me qee ec madowainnu. Age agena me odoc fifeig age Anut uqa dana cajaca cunug gesiladecnu deel hocob Anut binan suluqagan. Eunu age haiden dana cajaca gemona tutuc coboigale.   
\p
\v 13 Age Tibudnu cisdudu bibileig dana agena gabman cunug agena loo je toodu odoiga. Age Rom agena king uqa dana cajaca maha cunugna bilegina agena ilo eu uqana je toodu odoiga.  
\v 14 Uqa uqana cofadec cabi dana suladeceb maha cunugna limeig age dana cahuldoc kobol odogina eundec ameg me qee wadacadegina, odocob age dana kobol tutuc odogina eundec binanaga sulegina. Eunu age uqana cofadec cabi dana age maha nahanaha cofadegina euha agena je toodu odoiga.  
\v 15 Ge, age kobol tutuc dih odogina eu Anutna gale doc. Age odi odocobilfi age dana docca qee agenu je me qee madegina eu conoga cufa quadoqagan.  
\v 16 Age besiadec danawe odi coboigale. Euqa age ege besiadec dana eunu ege qisol mec kobol odeqan ec cain cisdowain. Age Anutna cabi danawe odi coboigale.  
\v 17 Age dana cunug ijanaga saolal mudeigale. Age wawaga meleec cotogail nalunuga meigale. Age Anutnu cumuneigale. Age Rom agena king binan suleigale.   
\s1 Ege Krais toodumeb culumen dain gec sogoecca gahidoqan  
\p
\v 18 Begabeg meh cabi dana age agena cofadecnu jogoi jejenega toodoigale. Age cofadec me wawaga jocosaigca himec jejenega cain toodowain qa age cofadec age cilehadegina euha jejenega toodoigale.  
\v 19 Ge, age Anutnu cisdudu cocobobil uqa agena cisdoc dado mudigian. Odocob cofadec me qee odadegina age dain adec gahidocobilfi Anut uqa kobol eu gale dugian.  
\v 20 Ge, age kobol me qee odocobil age qisaaadebil age dain adec gahidocobilfi kobol eunu adi cesuladigian? Euqa age kobol tutuc odocobil age qisaaadegin age dain adec gahidocobilfi eu Anut amegna kobol me bahic odogina.   
\p
\v 21 Ge, age Krais jaih ceen toodoqagannu uqa agenu sogoen. Uqa eu odi odonnu uqana kobol eu age ihacaden. Eunu Anut uqa age kobol i toodoqagannu wele utaaden.  
\v 22 Anutna jaqec je oso Kraisnu odi madena:  
\q1 “Uqa silail oso qee mel.  
\q2 Dana oso uqa conadec uhulec je oso qee dah melein,” ena. \rq (Aisaia 53.9)\rq*   
\m
\v 23 Age uqa cewudec je madoin saen euna uqa cewudec jena qee wadacduadel. Uqa culumen dain doc sogoecca gahidon saen euna uqa dana me qee wadacadigian ec je oso qee madel. Euqa uqa uqadodoc cebac bilec cunug Anut ebenna men, Anut uqa Tutuc Gesilec.  
\v 24 Krais uqa ege silail cunugnu hibemdumeb ititom kobol himec toodumeb cebac bilecnu eunu gale don. Eunu uqa uqadodoc egena silail dewegna gahidumei na babalecna cal men. Age uqa deweg tudoin, odocob uqana culumen dain doc sogoeccana uqa ege haun me migen.   
\p
\v 25 Age wele sipsipwe agena jic culein. Qilaqa age sipsip ceseli agena cofadecca hoginawe age dana uqa age cofadena. Uqa age dolonoga cofdona, age uqaca ceseli hoin.   
\c 3  
\s1 Aidagail gemugailcanu je  
\p
\v 1-2 Eu odiwe aidagail age gemugail leih age Anutna je qee toodogina eu age aidagail agena jejenega toodu odocca agena coboc cataniecca eu fimeig aidagail age je oso qee madecna gemugail age agena silailnu tului falicdumeig wawaga meleigiannu age gemugailnu jogoi jejenega toodu odoigale.  
\v 3 Euqa age dewenega ganac dih bala cain faldowain. Caja leih age gosiniga galeca bahic luc cubusegina, leih age gold balaca faldogina, leih age lotoc me bahic taqegina. Age odi cain.  
\v 4 Euqa age wawaga dunuh bala faldocobilfi eu me bahic. Bala faldoc eu calua mecwe qee, eu wawaga susumulca, eu wawaga malolca bilec. Kobol eu Anut amegna me bahic.  
\v 5-6 Ge, caja gun age wele bilein eu Sera cinigwe age agena cebac bilec Anut ebenna mudimeig age ceteh me bahic Anut adigian ec maden eu ocnu sumudi bilein. Caja gun eundec age kobol me bahic eu bala faloloig, odocob age gemugail jejenega toodoloig. Sera uqa Ebraham jejeg toodoloi, odimei Ebraham madoloi, “Ijana meca,” doloi. Age qila ceteh osonu qee cucuiifeig, kobol tutuc odifeig, age Sera ategul bilegina.   
\p
\v 7 Eu odiwe age gemugailha agena inondoc cahacdoiaunnu age cisdoc me umeig age aidagail gami me bileigale. Ge, cajaha Anut uqa eeladec uum adeceb cebac bilec catanec oqagan ec age dogina. Cajaha age Anut huqanehul. Euqa caja dewenega eu gagadicca bahic qee, eu dana dewenega wooldoc qee. Eunu age aidagailnu kobol mena odadeiga.   
\s1 Ege dana cajaca cunug kobol mena odadeqan  
\p
\v 8 Qila ija je i edi qee mudigen odigina. Age cunug cisdoc osolca wawaga osolca bileigale. Age osona culumen sol meigale. Age wawaga meleec cotogail cunugnu nalunuga meigale. Age osonu wawaga qoiale. Age cotogailnu jogoi coboigale.  
\v 9 Anut uqa age uqana eeldoc oqagannu gale don. Eunu uqa age kobol cunug eu odoqagannu utaaden. Eunu dana age kobol me qeena odadecebilfi age ameg me qeena cain wadacduadowain. Odocob dana age je me qee maadecebilfi age je me qee cain wadacduadowain. Eu odi qee, age Anutna eeladec mugumuga oqagannu age Anut uqa dana eu eeladigiannu inondoigale.   
\p
\v 10-12 Ge, Anutna jaqec je odi madena:  
\q1 “Tibud uqa ameg eu dana cajaca ititom eundec feciadena.  
\q2 Odimei uqa gaid age inondoginanu dahig cehena.  
\q1 Euqa Tibud uqa dana qisol mec kobol odogina eunu cagucag tawena.  
\q1 Eunu dana oso uqa uqana bilec me bahic caligiannu waug nijecebfi,  
\q2 uqa saen me bahic figiannu cisdufei,  
\q2 uqa je me qee cain madeiaun,  
\q2 uqa uhulec je madecha hibemdoia.  
\q1 Uqa qisol mec kobol cunug hibemdumei kobol tutuc odeiale.  
\q1 Uqa malol bilec walimei eu toodoiale,” ena. \rq (Buk Song 34.12-16)\rq*   
\s1 Ege kobol me odoqonanu dain gec gahidoqan  
\p
\v 13-17 Age tutuc odocnu megameg mifeig in uqa age me qee odadigian? Euqa Anut gale donafi age tutuc odoc eunu culumen gahidoqagan eu me. Eunu age kobol tutuc odimeig eunu culumen gahidufeig age ceeleiga! Euqa age cahulec odoc eunu culumen gahidoqagan eu me qee. Anut uqa dana age, age Kraisna kobol me toodogina eunu je me qee maaadi bulamadifeig age je me qee maadec eunu majanaga adigiannu gale dona. Eunu  
\q1 “age dananu cain cucuiadowain, age cain jaen aqeiaun,” en. \rq (Aisaia 8.12)\rq*  
\m Euqa age Anut amegna wawaga tutuc biliale. Odocob age wawagana Krais cuhanuc agena Tibud mudecebil bilia. Dana age ceteh me i age ocnu susumudi bileginanu, gug doqagannu sisiladecebilfi age saen gaid je wadacduadoqagannu saciadoiga. Odocob age wawaga jocosaigca dana agenu lal qu bibileig je wadacdu maadeiga.   
\s1 Krais uqa egena silail cagasigecnu cal mimei haun cajen  
\p
\v 18 Age Kraisnu cisdoiga, uqa dana ititom. Euqa uqa dana cajaca ititom qee cunug agena cudun umei hehuladen. Odocob uqa dana cajaca agena silailnu cagasiadimei ehadimei Anutca lecnu cal men. Krais uqa mahana cocobi dana bilen. Odocob dana age deweg tudocobil cal men. Uqa saen osolna dih cal men, uqa haun qee cal meiaun. Euqa Anut uqa tulidocob haun cajen. Qila uqa sao jobon kis deweg on bilia.  
\v 19 Odimei uqa kis deweg bibilei nuimei kis\f + \fr 3.19 \ft Grik je doc dana leih age kis eu dana cajaca age Noana saenna cal mein eu age dolonoga ec cisdogina. Euqa cisdoc i culumen osoca. Anutna jaqec je cunugna “kis” je eu dana cajacanu qee madel, eu buga me qeenu himec madena. Odimeig doc dana leih age kis eu ensel me qee age Anutna je hibemdoin ec cisdogina. Juda age Anut uqa Noana saenna kis me qee eu gihacaden eunu wawaga meleen. Euqa cisdoc i melefi Noana saenna ensel age danawe caja ocobil ageca nijein. Odocob ha Jisas uqa saen osona ensel me je qee qasali maadel.\f* age gihacdoc jona bilegina eu me je qasali maaden.  
\v 20 Kis eu age wele Noa uqana saen euna Anutna je tefacdoin. Noa uqana saen euna qisol mec kobol ben wasecnu odon qa Anut uqa dana cajaca ameg mahuc qee wadacadel. Uqa susumudi lili Noa uqa uqana wag ben mudi hedon. Odocob sihul nag oso, eu dana cajaca 8-pela himec, wag ben tobimeig dunuh lein. Odocob wa sil ben cajimei wag eu u suldocob basai cobon. Odocob Anut uqa dana cajaca 8-pela eu wana cahahaaden.  
\v 21 Anut uqa qila wa joadecna cahahaadena eu odiwe uqa dana cajaca 8-pela eu wana cahahaaden. Eunu wa eu wa joadec qila cahahaadena eu hahunwe. Wa joadec eu age dewenega gegehin cusi qelecnu qee nijel. Wa joadec eu age Anut amegna cataniec biluqagan ec qeel qeti madein. Anut uqa Jisas Krais tulidocob cajen eunu uqa wa joadecna cahahaadecnu ihoc.  
\v 22 Jisas Krais uqa sao jobon ten, Anut eben meulana isec bilina. Odocob ensel cunugca, kis gagadic odoc cunugca, ceteh cunug gagadic odocca eu age Jisas Krais bisalu bilegina.   
\c 4  
\s1 Ege wawige hilahna kobol culeqan  
\p
\v 1 Krais uqa dewegna dain sogoecca gahidon. Odocob oso uqa dewegna dain sogoecca gahidon eu uqa silailna kobol eu wele culen. Eunu ageha jic euna dih uqa cisdonwe age cisdoc eundec gagadicca heweiga.  
\v 2 Ge, gug eunu qila saen ina maha ina bilecnu age dewenegana bibileig age dana agena gale adec me qee dana odogina eundecna cain biluwain. Age Anut gale docna bileigale.  
\v 3 Ge, wele age haiden dana kobol me qee odocnu gale ben adoloi euna ihoc bilein. Agena bilec eu wal kobol majanagaca qeeca, eu gale adec me qeeca, eu ceu jecebil dalul aqecca, eu ja qoqoig dana age cajaca nijegina euca, eu kadan tibud cuha fecca.  
\v 4 Qila age haiden dana agena kobol me qee cunug odogina eundec qee gabanadecebil odoginanu haiden filicitadegina, eunu age deweneganu je me qee maadegina.  
\v 5 Euqa Gesiladec Ben uqa dana cajaca cebac bileginaca dana cajaca cal mein eundecca gesiladigiannu saciadon bilia. Eunu haiden dana age Gesiladec Ben eu uqa amegna tawimeig age ege eetanu kobol me qee odom ec madoqagan.  
\v 6 Ge, gug inu Krais uqa dana cajaca cal mein euha me je qasali maaden.\f + \fr 4.6 \ft Grik je i gug lecisca nijia. Falicdoc je oso eu odi, “Krais uqa dana cajaca cal mein euha qee cal mec saenna me je qasali maaden.” Falicdoc je oso eu 3.19 toodona eu odi, “Krais uqa dana cajaca cal mein euha cal mec cudunna me je qasali maaden.”\f* Anut uqa dewenegana gesiladeceb age danawe cal mein euqa age kisna Anutwe cebac biluqagannu me je qasali maaden.   
\s1 Ege bagol igec Anut igen euna me odeqan  
\p
\v 7 Ceteteh cunug qee migiannu gadac saen eu wele cemenug nijia. Eunu age dumanaganu cisdu cuhadumeig fogo adeiale. Odimeig gaidgaid inondoiga.  
\v 8 Age wawaga meleec cotogailnu nalunuga mifeig age agena silail matinu dahiniga celigian. Odocob age cotogailnu nalunuga mecnu kobol eu kobol leih cunug wooladec. Eunu nalunuga mec eu gagadicca heweigale.  
\v 9 Age cotogail agena loo jona hocobil bilegina eu age loo adegina eunu cain wawaga me qee meiaun. Age loo adimeig cofadi cuhaadeigale.  
\v 10 Age cunug cabi ocnu dumanaga adec filfil Anut adeceb oin. Eunu dumanaga adec euna age cotogail cesuladecnu cabi oiga. Kobol euna age Anutna dumanaga adec filfil ila mecnu cabi dana me biluqagan.  
\v 11 Oso uqa Anutna je madecnu duman uteceb on uqa Anutna je tutuc madigian. Oso uqa cesuladecnu duman uteceb on uqa dana cajaca cesuladecnu cabi eu uqa Anut gagadic odoc uten euna cabi ugian. Eunu dana age ege ceteteh cunug odoqona ec fimeig age Jisas Krais umna Anut binan suluqagannu kobol eu odoigale. Uqa binan fulacdocca, uqa gagadic odocca gaidgaid biliale. Mele.   
\s1 Ege Krais dain sogoecca gahidonwe odi dain sogoecca gahidoqona eunu ceeloqale  
\p
\v 12 O wawige meleec cotiel ija nalunuga migina, age temadec jaca ageca hocob eunu cain filicituwain. Temadec eundec ageca hocob eu ceteh fil oso bahic ec cain cisdowain.  
\v 13 Temadec euna age Krais uqa dain sogoecca gahidonwe ageha Kraisca osoben dain sogoecca gahidogina, eunu age ceeleigale. Odocob hibna Krais uqa gagadic odoc fulacdocca camasac migian saen euna age wawaga me bahic bileceb gehca ceeloqagan.  
\v 14 Kis gagadic odoc fulacdocca eu Anutna Kis eu ageca bilina. Odocob age Krais ijan hewegina. Eunu dana age eunu je me qee maadecebilfi age cois ceeloqagan.  
\v 15 Euqa gadgad age gemona dana oso uqa dana qagadocob cal menafo, oso heje onafo, oso cahuldonafo, oso dana leih agena cetehnu gugca mecieei cobonafo eunu ameg umei sogoeiaunnu.  
\v 16 Euqa age eundec oso uqa Kristen, eunu sogoifei uqa cain majag doiaun qa Kristen ijan euna uqa Anut binan suliale.   
\p
\v 17 Ge, gesilgec sanan mecnu saen wele dodoldona. Odocob Anut uqana dana cajaca eu age casac gesiladigian. Anutna gesiladec eu egeca sanan mecebfi dana cajaca age Anutna me je eunu wawaga qee meleena eunu adi odigian?  
\v 18 Odocob Anutna jaqec je odi madena:  
\q1 “Dana ititom eundec cahahaadecnu cabi bahicfi,  
\q2 dana age Anut hibemdumeig silail kobol odogina eu agenu qa adi tawoqagan?” ena. \rq (Sindaun 11.31)\rq*   
\p
\v 19 Eunu dana age Anutna gale docna sogoegina eundec age agena cebac bilec Anut ebenna mimeig tutuc dih coboigale. Ge, Anut uqa ege ifani migen, odocob uqa gaid ege me bahic cofgena.   
\c 5  
\s1 Tamanec cofadec age Anutna dana cajaca cofadi cuhadoigale  
\p
\v 1 Qila ija tamanec cofadec matu odi maadigennu odigina. Ijaha ageca osoben tamanec cofadec. Odocob ija amigulna Krais culumen dain doc sogoeceb fem. Odocob ijaha age gami osobenca gagadic odoc fulacdocca hibna camasac migian eu oqan. Eunu cofadec age cabi odi oqagannu tuliadigina.  
\v 2 Age Anutna dana cajaca cofadi cuhadoigale, age age ebenegana sipsipwe bilegina. Age meen qaig ocnu dih cabi i cain owain. Odocob age cabi i oqagannu dana leih agena gale adecna toodumeig cain odowain. Euqa age Anutna cisdoc toodu cabi i oqagannu gale adeiale. Age cabi i ocnu megameg mimeig cabi u cuhadoigale.  
\v 3 Age dana ben cinigwe bibili bileig Anutna dana cajaca Anut uqa age ebenegana men eu cain cilehadowain. Euqa age kobol me odadoqagan, odocob age dana cajaca jic ihacadecebil tooadoqagan.  
\v 4 Age odi odocobilfi sipsip cofadec meca uqa camasac caleceb saen euna age king katakat gagadic odoc fulacdocca dana cajaca ititom oqagan eu ageha oqagan. King katakat eu ameg me bahic, eu qee qee meiaun.   
\s1 Ege egedodoc Anut ebenna meqan  
\p
\v 5 Eu odiwe dana haun ha age tamanec cofadec matu bisalu bileigale. Ge, Anutna jaqec je odi madena:  
\q1 “Anut uqa dana ege binanige suli oqan egina eundec hewadeceb nag megina.  
\q2 Euqa dana wawaga lal qu jogoi cobogina eundec uqa eeladec uum adena,” ena. \rq (Sindaun 3.34)\rq*  
\m Eunu age cunug agedodoc jogoec kobol umeig cotogail bisalu bileigale.  
\v 6 Anut uqadodoc uqana saen mena age u suladeceb ohis toqagannu gale dona. Eunu agedodoc agena gale adec eu cilehdoigale. Odimeig Anut eben gagadic odocca bisalu bileigale.  
\v 7 Anut uqa agena culumen dain adec sogoecca cunug gahidogina ec dona. Odocob uqa me cofadena. Eunu age agena culumen dain adec sogoecca cunug eu uqa ebenna meigale.   
\p
\v 8 Agena cad, Seten, uqa laion osowe gehca euii taliladi cobona. Uqa dana leih aqi jigiannu waladena. Eunu age dumanaga cofdu cuhadoigale. Age mecii cuhadoigale.  
\v 9 Age wawaga meleecna duui tawimeig teidu wooldoiga. Ge, age dogina, age wawaga meleec cotogail mahamaha cunugna bilegina ageha culumen dain adec sogoecca eundec gahidogina eu odiwe age gahidogina.  
\v 10 Anut uqa eelgec uum igec cunug uqana gug. Uqa age Kraisca gabanadeceb age uqana gagadic odoc fulacdocca oqagannu utaaden. Gagadic odoc fulacdocca eu gaid biligian. Age culumen dain adec sogoecca saen gohicna dih gahidoqagan. Odocob hibna Anut uqadodoc age haun me madigian. Odimei uqa me madeceb tatawebil gagadicca biluqagannu hehadigian.  
\v 11 Anut uqa gagadic odoc euca gaidgaid biliale! Mele.   
\s1 Cit qoc feele adec  
\p
\v 12 Sailas ebenna ija je gohic i jaqiadigina. Uqa ege wawige meleec cotige bahic ec cisdugina. Jaqec je ina ija kobol i Anut uqa dana cajaca cunug odadena eu uqana uum igec bahic ec cesusaadi maadigina. Anutna eelgec uum igec i mele bahic ec maadigina, age euna gagadicca taweigale.   
\p
\v 13 Tamanec uqa Babilon\f + \fr 5.13 \ft Saen euna Rom age Anutna dana cajaca aqecebil cal mein eu odiwe Babilon age wele bahic odi odoin. Eunu Pita uqa Babilon ec maden, euqa uqa je hahun oso maden. Dana age je hahun uqana gug eu Rom ec cisdogina.\f* bilia euha Anut uqa wele nesili cedaden eu age feele adec sulduadegina. Odocob Mak, ija melami, uqaha feele adec sulduadena.  
\v 14 Age osolosol cunug wawaga meleec cotogail cotec nalug mecna cotdocobdocobeigale.  
\p Cunug age Kraisca gabanadec bilegina eu malol bilec ageca biliale.