\id 1CO  - Amele NT and Genesis [aey] -Papua New Guinea 1997 (DBL 2014) 
\h 1 KORIN 
\toc1 Pol Uqa Jaqec Je Osoldoc Korin Tamanec Jaqiaden 
\toc2 1 Korin 
\toc3 1 Kor 
\mt2 Pol Uqa Jaqec Je Osoldoc  
\mt1 Korin Tamanec Jaqiaden  
\imt1 Aqunec Je  
\ip Pol uqana saenna Korin eu taun ben oso eu Akaia hatuna nijen. Akaia eu Grik agena hatu naha oso. Pol uqa Korinna Jisasnu me je qasali madec dana ben, odocob uqa Krais tamanec oso ono sanan men. Euqa uqa tamanec eu culadi nuimei hatu osona cabi on saen euna culumen filfil Korin tamanec gemona calen. Odocob Pol uqa agena cisdoc dado mudecnuca, culumen eu tutuc mudecnuca jaqec je i jaqiaden.  
\ip Pol uqa Korin tamanec agena wawaga meleec an daneiaunnuca, agena me odoc me qee meiaunnuca jaen qon. Eunu uqa tamanec age qatanadec cain biluwain, age wal kobol cain odowain, ec jaqiaden. Odimei uqa dana cajaca ocobocobec eunuca, sab dana age kadan tibudnu ihanein eunuca, cuha fec kobol eunuca, Kis Gunna dumanaga adec eunuca, Kristen age cal mecnadec ceseli cajoqagan eunuca je jaqen.  
\ip Jaqec je i uqana naha oso Kristen age gale adena, eu dac 13. Dac 13na Pol uqa nalunuga mec kobolnu madena. Eu bagol me bahic Anut uqana dana cajaca adena. Eu Kis Gunna dumanaga adec cunug wooladena.  
\is1 Je Dunuhnu Dado Mec  
\io1 1. Aqunec je (1.1-9)  
\io1 2. Korin tamanec age qatanadec bilegina (1.10-4.21)  
\io2 A. Pol uqa Korin tamanec age qatanadec bilegina ec don (1.10-17)  
\io2 B. Tamanec qatanadec bilegina uqana gug (1.18-4.13)  
\io3 1. Korin tamanec age Kraisna me je qee du cuhadogina (1.18-3.4)  
\io3 2. Korin tamanec age Kraisna cabi oc qee du cuhadogina (3.5-4.5)  
\io3 3. Korin tamanec age Kristen coboc qee du cuhadogina (4.6-13)  
\io2 C. Pol uqa Korin tamanec age qatanadec cain biluwain ec jaqena (4.14-21)  
\io1 3. Wal kobolca, kobol tutuc qeeca eu Korin tamanec dunuh bilia (dac 5-6)  
\io2 A. Korin tamanec agena dana oso uqa wal kobol odona, euqa tamanec age cois egina (dac 5)  
\io2 B. Kristen dana uqa cotig gesilec jona muden (6.1-11)  
\io2 C. Kristen dana cajaca age wal kobol cain odowain (6.12-20)  
\io1 4. Dana cajaca ocobocobecnu dado madec je (dac 7)  
\io2 A. Gemugailca aidagailca eunu dado madec je (7.1-7)  
\io2 B. Dana cajaca ocobocobec bilegina agena culumen (7.8-24)  
\io2 C. Dana cajaca ocobocobec qee bilegina agena culumen (7.25-40)  
\io1 5. Kobol leih eu coisfo, qeefo eunu dado madena (8.1-11.1)  
\io2 A. Sab kadan tibudnu ihanein eunu dado madena (dac 8)  
\io2 B. Pol uqa uqana kobolnu madena (dac 9)  
\io2 C. Age Isrel wele odoin eu cain odowain (10.1-22)  
\io2 D. Ege cel ceteh odoqona eu ege Anut binan sulecnu odoqale (10.23-11.1)  
\io1 6. Cuha fec kobolnu dado madec (11.2-14.40)  
\io2 A. Pol uqa cuha fec ilomoga jahuldoc kobolnu madena (11.2-16)  
\io2 B. Tibudna bred wain gabinca jecnu dado madec (11.17-34)  
\io2 C. Kis Gunna dumanaga adec (dac 12-14)  
\io3 1. Age Kis Gunna dumanaga adec temadeiga (12.1-3)  
\io3 2. Ege cabi ocnu dumanige igec filfil nijia qa dumanige igec Kis eu uqa osol bilia (12.4-11)  
\io3 3. Krais tamanec eu osol qa dumanige igec eu filfil (12.12-31a)  
\io3 4. Ege dana cajaca cunug dumanige igecna nalunuga moqale (12.31b-13.13)  
\io3 5. Je hahun madecnu dumanige igec eu beilah fil osona je madecnu dumanige igec wooldona (14.1-25)  
\io3 6. Cuha fecnu cabi cunug eu tutuc caligian (14.26-40)  
\io1 7. Cal mecnadec ceseli cajecnu je dado madena (dac 15)  
\io2 A. Kristen dana cajaca age mele bahic cal mecnadec ceseli cajoqagan (15.1-34)  
\io2 B. Leih age dana cal mein adi tuliadeceb ceseli cajoqagan? egina eunu Pol jejenega hewi maadena (15.35-57)  
\io2 C. Age gagadic taweigale (15.58)  
\io1 8. Cit qoc je: Pol uqana cetehnu sisiladimei feele adena (dac 16)  
\c 1  
\p
\v 1 Ija Pol, Anut uqana cisdocna utateceb ija Krais Jisasna aposel calem. Ijaca ege wawige meleec cotige, Sostenisca  
\v 2 ele Anutna tamanec Korin bilegina eu age jaqiadowona. Anut uqa ageca dana cajaca age mahana cunug egena Tibud Jisas Krais inondudu ijannu cuha feginaca age Anutna dana cajaca qagu biluqagannu utaaden. Jisas Krais uqa agena Tibud, eu egena Tibudha. Krais Jisas age uqaca gabanadeceb age qagu bilegina.  
\v 3 Memige Anutca Jisas Krais Tibudca alena eelgec uum igecca malol bilecca adesiale.   
\s1 Pol uqa Anut hetaga don  
\p
\v 4-9 Age Kraisca gabandoc euna uqa je madec cunugca doc cunugca eunu osoben cehewanagaca maden. Uqa age ceteh cunugnu cehewanagaca maden. Odocob Kraisnu je eu age wawaga dunuh wele gagadic men bilia. Eunu qila age egena Tibud Jisas Krais camasac migiannu susumudi bilegina. Susumudi bibileig age Kis Gun uqana bagol adec eunu oso qee gohic melein. Jisas Krais uqa agena wawaga meleec gagadic mudeceb li qee mec gadacna age egena Tibud Jisas Kraisna deelna age cahuldocca qee tawoqagan. Anut uqa age Melah Jisas Krais egena Tibudca gabandu biluqagannu utaaden. Odocob Anut uqa ceteh odocnu maden uqa odi odigian. Eunu Anut uqa Krais Jisas umna uum aden eunu ija gaid agenu Anut hetaga dugina.   
\s1 Anutna tamanec qatanadec bilen  
\p
\v 10 Ija wawige meleec cotiel, ija egena Tibud Jisas Krais ijanna age gemona cel je madegina eu age wawaga osol migiannu niniadigina. Eunu age gemona qatani nahanaha doc cain biluwain. Age cisdoc osolca wawaga osolca gabandoigale.  
\v 11 Ge, ege caja cotige Klowi uqana tal leih age qatanadec bilec Korin tamanec gemona nijia ec matein.  
\v 12 Ija age qatanadec bilec age gemona nijia eunu maadigina uqana gug eu odi. Age oso madena, “Ija Pol toodugina,” ena. Odocob oso madena, “Ija Apolos toodugina,” ena. Odocob oso madena, “Ija Pita toodugina,” ena. Odocob oso madena, “Ija Krais toodugina,” ena.  
\v 13 Krais uqa nahanaha qatanadec bilia eginafo? Eu Pol uqa agenu na babalecna tuitu qocobil cal men eginafo? Age Pol ijanna wa joaden eginafo?  
\v 14-15 Dana oso age ija ijanina wa joc adem ec madeiaunnu, ija Krispas Gaiasca dih wa joalem. Euqa ija agenadec oso qee wa joudelem eunu ija Anut hetaga dugina. (  
\v 16 Eu mele, ija Stefanas uqana talca gamiha wa joadem qa ija in oso wa joudemfa eu ija cisdocwe qee.)  
\v 17 Ge, Krais ija wa joadecnu qee sultel, ija me je qasali maadecnu sulten. Odocob Kraisna na babalec uqana gagadic odoc qee mudigaunnu ija dana agena cisdoc sileccana me je qasali maadecnu qee sultel.   
\s1 Krais uqa Anutna gagadic odocca cisdoc silecca  
\p
\v 18-19 Anutna jaqec je odi madena:  
\q1 “Ija cisdoc dana agena cisdoc silecca qee mudigen.  
\q1 Odimig dana docnu gesis agena doc eu gesacna migen,” ena. \rq (Aisaia 29.14)\rq*  
\m Eunu dana age fadaladecnu dodoladena eu agenu na babalecnu je eu gad je ec cisdogina qa ege Anut cahahagecnu odona eu egenu na babalecnu je eu Anutna gagadic odoc bilia ec doqona.  
\v 20 Aria, dana age cisdoc silecca eu adi bilegina? Loo je iwaladec dana age Anutna jaqec je du cuhadogina eu adi bilegina? Dana age mahanadec jena cadegina eu adi bilegina? Anut uqa maha ina cisdoc silecca eu ceteh gad ec ihacaden.   
\p
\v 21-25 Anutna gad je eu dana agena cisdoc silecca wooldona. Odocob Anutna lasdoc eu dana agena gagadic wooldona. Anut uqana cisdoc sileccana dana cajaca odadeceb age uqanu docnu eu agena cisdoc sileccana agedodoc docnu ihoc qee. Eunu ege me je eu age gad je egina eu qasali maadoqona euna Anut uqa dana cajaca wawaga meleena eu cahahaadecnu cisdon. Juda age kobolkobol odoc fecnu gagadic megina. Odocob Grik age cisdoc silecca walegina. Euqa ege age Krais na babalecna tuitu qocobil cal men eunu je qasali maadoqona. Je eu Juda agenu eu meen cinigwe age jaimagana qeti aqeceb toni aqena. Odocob je eu Juda dana qee eundec agenu eu gad je. Euqa leih Anut utaaden, eu Juda Grikca osoben agenu, je eu Krais, uqa Anutna gagadic odoc, odocob uqa Anutna cisdoc silecca.   
\p
\v 26 Ija cotiel, Anut utaaden saen euna age adi bilein eunu qila cisdoiga. Age mati age dana mahanadec amagana docca qee biloloig. Age mati age dana mahanadec amagana gagadic odocca qee biloloig. Age mati age dana mahanadec amagana ijanagaca qee biloloig.  
\v 27 Euqa Anut uqa mahanadec dana cisdoc silecca eu majanaga hewadigiannu dana eu gad egina eu nesili cedaden. Odocob Anut uqa mahanadec dana gagadic odocca eu majanaga hewadigiannu dana eu lasdoc egina eu nesili ehaden.  
\v 28 Anut uqa dana maha ina ijanagaca qee nesili cedaden. Dana mahanadec age dana eundec eu dana gauc ec cisdogina. Dana mahanadec age dana eundec cewadegina. Anut uqa dana ijanagaca gagadic odocca eu qee moqagannu odi odon.  
\v 29 Anut uqa dana oso uqa binan eu Anut amegna qee suliaunnu odi odon.  
\v 30 Odocob Anut uqa age Krais Jisasca gabanadeceb bilegina. Odimei Anut uqa Krais Jisas eu egena cisdoc silecca muden. Odimei uqa Krais Jisas umna ceseli fajigen. Odimei uqa Krais Jisas umna ege dana cajaca ititom ec maden. Odimei uqa Krais Jisas umna ege dana cajaca qagu biluquna ec maden.  
\v 31 Eunu Anutna jaqec je odi madena:  
\q1 “Dana oso uqadodocnu culai madecnu gale dona eu uqa Tibudnu culai madeiale,” ena \rq (Jeremaia 9.24)\rq*  
\m eu odi ege odoqale.   
\c 2  
\s1 Pol uqa Korin agena wawaga meleec eunu maden  
\p
\v 1-2 Ija cotiel, ija ageca bibileb saen euna ija je cunugnu dahini celigiannu cisdom qa Jisas Kraisca uqa na babalecna tuitu qocobil cal menca eunu je dih cisdom. Eunu ija ageca hom saen euna ija Anutna je jahunec qaqasili mamadig ija doc ben dogina euna isec je qee maadelem.  
\v 3 Odimig ija ageca hom saen euna ija lehani culeceb cucuiem, odocob ija qeleli bilem.  
\v 4 Odimig ijana iwaladec jeca, ijana me je maadecca, eu dana doc ben doccana qee qasali maadelem. Ija dana agena cisdoc falicduadeceb age ijanu cisdoqagannu qee gale tel. Euqa ija Anutna Kis eu gagadic odocca eu ihacaadi qasali maadem.  
\v 5 Ija mahanadec dana agena doc eu agena wawaga meleec camas mudigiannu qee gale tena. Ija Anutna gagadic odoc eu agena wawaga meleec camas mudigiannu gale tena. Eunu ija odi je qasali maadem.   
\s1 Anutna Kis uqa doc meca cisdoc silecca igen  
\p
\v 6 Euqa ege age Anutna kobol doc gesis dana eu je cisdoc silecca maadocomun dogina. Euqa je cisdoc silecca age ogina eu mahanadec qee, odocob eu mahana iloilo bilegina eu agena qee. Mahana iloilo bilegina eu age qee moqagan.  
\v 7 Euqa je cisdoc silecca ege maadoqona eu Anutna je jahunec, eu dana cajaca amagana jahunec bilia. Anut uqa maha qee ifanec ninijen ege wawige meleec ege binanigeca uqaca bileqannu je jahunec eu maden.  
\v 8 Mahana iloilo bilegina oso cisdoc silecca inu qee dol. Age inu doubmi age Tibud gagadic odoc fulacdocca umeig na babalecna tuitu qocobil qee cal moub.  
\v 9 Euqa eu Anutna jaqec je madena eu odi nijina:  
\q1 “Anut uqa dana cajaca age Anutnu nalug megina agenu  
\q2 ceteh me bahic mati saciadon bilia.  
\q1 Ceteh me bahic eu dana amagana qee felein.  
\q2 Odocob eu dana dahinigana qee dah melein.  
\q1 Odocob eu dana agena cisdocna ha qee calel,” ena. \rq (Aisaia 64.4)\rq*   
\m
\v 10-11 Euqa dana uqa dana osona cisdoc qee dona. Dana uqadodoc dolog eu uqana cisdoc cunug du cuhadona. Eu odiha Anutna Kis uqa dih Anutna cisdoc du cuhadona. Odocob Anutna Kis eu ceteh cunug wali fena. Odocob uqa Anutna cisdoc jahuni nijia euha wali fena. Eunu Anut uqa uqana Kisna uqana je jahunec ihacgeceb eu egenu camasac men.  
\v 12 Odocob ege mahanadec kis qee olom, ege Anutna Kis om. Ege bagol igec Anut igen eu doqannu uqa Kis igen.  
\v 13 Odocob ege dana cajaca age Kisca bilegina eu Kisna mele je sildiadoqona. Ege odi oodob ege je dana cisdoc silecca age iwalgein euna qee sildiadoqona qa ege je Kis iwalgen euna sildiadocomun dogina.   
\p
\v 14 Odocob bagol igec Anutna Kis ege igina eu dana uqa Kisca bilina eu himec fogo docnu ihoc. Dana uqa Kisca qee bilina eu Kisna bagol igec eunu fogo docnu ihoc qee. Bagol igec eu age uqanu ceteh gad ena. Eunu dana oso uqa Anutna Kisca qee bilina eu uqa bagol Anutna Kis ege igina eu qee ona.  
\v 15-16 Anutna jaqec je madena eu odi nijina:  
\q1 “In uqa Tibudna cisdoc dona?  
\q1 In uqa Tibud iwaldocnu ihoc?” ena. \rq (Aisaia 40.13)\rq*  
\m Eunu dana oso uqa Kisca bilina eu uqa ceteh cunug eu mefo, me qeefo gesiladecnu ihoc qa oso uqa dana Kisca eu gesildocnu ihoc qee nijel. Euqa ege Kraisna cisdocca biluquna.   
\c 3  
\s1 Tamanecna cabi dana eu Anutna cabi dana  
\p
\v 1 Ija cotiel, wele age mel simwe Kraisca gabandoc biloloig. Eunu saen euna ija dana Kisca eundec Anutna je maadolig eu ija age Korin maadecwe qee. Euqa ija dana age dewenega hilahna kobol toodogina eundec maadigina eu odiwe ija wele maadolig.  
\v 2 Age sab gagadicca ocnu saciadu qee bilelein. Eunu ija age su adolig, sab gagadicca qee adolig. Odocob qilaha age sab gagadicca ocnu saciadu qee bilegina.  
\v 3 Ge, age fee dadanii cotoganu macumac megina eunu age qila gaid dewenega hilahna kobol toodogina. Age odi oodoig age dewenega hilahna kobol toodogina eu odi mahanadec dana odoginawe odogina.  
\v 4 Ge, saen agenadec oso madena, “Ija Polna,” ena, odocob oso, “Ija Apolosna,” ena, kobol ina eu age dana mahanadec cinigwe bilegina.   
\p
\v 5 Age eunu cisdu cuhadoiga. Apolos uqa eeta? Ija Pol, ija eeta? Ele Anutna cabi dana dih. Tibud uqa ele cabi filfil ilen, odocob elena cabi euna age Anutnu wawaga meleen.  
\v 6 Ija sab aig cehem. Apolos uqa wa bilisadon. Euqa Anut uqa odocob sab wasen.  
\v 7 Eunu dana sab aig cehenca, dana wa bilisadonca eu ale ijanalaca qee. Euqa Anut uqa odocob sab wasena eunu uqa dih ijanca.  
\v 8-9 Ele dana Anutna cabi hihijag, ele Anutnu osobenca cabi owona. Odocob Anutna cabi eu age. Eunu dana sab aig cehenaca, dana wa bilisadonaca eu ale ihocihoc. Odocob ale filfil cabi osin eu odi ameg owasan.  
\s1 Tamanecnu cabi dana eu uqa jo cehec dana  
\p Odocob Anutna jo eu ageha.  
\v 10-11 Anut uqa uqana jo cehecnu duman uum iten. Eunu ija jo cehecnu memei danawe jo big gug mem. Odocob dana oso uqa eu tatacanna cehegina. Euqa Anut uqa big gug osol men nijia eu Jisas Krais. Eunu oso uqa big gug fil mecnu qee nijel. Eunu dana cunug leih age adi jo cehec cabi eu tatacan cehi cuhadoigale.  
\v 12 Aria, dana age big gug eu tatacanna cehoqagan saen euna leih age goldna cehoqagan, odocob leih age silwana cehoqagan, odocob leih age meen ameg ben fajec euna cehoqagan, odocob leih age na culutna cehoqagan, odocob leih age gigina cehoqagan, odocob leih age cinimna cehoqagan.  
\v 13 Odocob Anut uqa dana cajaca cunug agena cabi temdugiannu deel euna agena cabi eu jana gesiladigian. Ja eu agena cabi temadigian. Eunu dana cunug agena cabi eu hibna camasac migian. Odocob dana cajaca cunug agena cabi eu mefo, me qeefo ec foqagan.  
\v 14 Dana oso uqa big gug eu tatacanna jo cehen eu uqana cabi tawecebfi dana eu uqa ameg ugian.  
\v 15 Euqa oso uqa jo fil cehen eu jana cijecebfi uqa ameg qee oiaun. Anut uqa dana eu cahahadugian, euqa dana uqa ceteh janadec sigali onawe Anut uqa dana eu janadec sigali u cahahadugian.   
\s1 Anutna cuha jo gun eu age  
\p
\v 16 Anutna cuha jo eu age, odocob Anutna Kis age wawagana bilia ec qee doginafo?  
\v 17 Anutna cuha jo eu gun. Odocob Anutna cuha jo gun eu age. Eunu dana oso Anutna cuha jo fadaldocobfi Anut uqa dana eu fadaldugian.   
\s1 Ege dana binanaga cain suluqaun  
\p
\v 18-20 Anutna jaqec je eu odi madena:  
\q1 “Anut uqa dana cisdoc silecca agena cisdoc sileccana cedadena eu odi dool bolobna cedadenawe,” ena. \rq (Job 5.13)\rq*  
\m Odocob Anutna jaqec je oso madena:  
\q1 “Tibud uqa dona, dana cisdoc silecca agena cisdoc eu ceteh gauc dih,” ena. \rq (Buk Song 94.11)\rq*  
\m Eunu mahanadec cisdoc silecca eu Anut amegna eu kobol gad. Odocob Anut uqa dana cajaca age uqana cisdoc silecca oqagannu gale dona. Eunu dana oso uqadodoc cain uhuldoiaun. Age gemonadec oso uqa mahanadec kobolna ija cisdoc silecca ec cisdonafi uqa mahanadec dana amagana dana gad ibuldoiale.   
\p
\v 21-23 Ceteh cunug eu Korin agena. Eu Polfo, Apolosfo, Pitafo, maha ifo, cebac bilecfo, cal mecfo, ceteh qila biliafo, ceteh hibna cali hugianfo ceteh cunug eu agena. Odocob age Krais uqana, odocob Krais uqa Anut uqana. Eunu oso uqa dana oso ijan cain suliaun.\f + \fr 3.21-23 \ft 1 Korin 1.12naca, 3.4naca Pol uqa Korin tamanec age qatanadec bibileig oso madena, “Ija Pol toodugina,” ena, odocob oso madena, “Ija Apolos toodugina,” ena. Euqa je eundec eu dana mahana bilegina eu agena cisdoc toodona. Korin age Anutna cisdoc eu camasac fogo adecebfi age Anut uqa Polca, Apolosca, ceteh leihca eu Korin cesuladecebil age Krais agena bahic caloqagannu maden eu doqagan. Eunu age madoqagan, “Pol eu egena,” ecebil madoqagan, “Apolos eu egena,” oqagan. Age 1 Korin 3.1-9 eu feiga.\f*   
\c 4  
\s1 Tibud uqadodoc uqana cabi dana gesildona  
\p
\v 1 Age egenu eu Kraisna cabi dana, ege Anutna ceteteh jahunec cofdoqona ec cisdoigale.  
\v 2 Ceteh osoha egenu nijia. Cabi dana uqa uqana dana bennu cabi ona eu uqa uqana benna cabi cofdu cuhadugian.  
\v 3 Ijaqa age ijana kobol gesiluqaganfi, odocob dana oso ijana kobol gesiligiannufi eu ija ceteh eu gauc ec cisdugina. Ija ijadodoc ijana kobol qee gesiligina.  
\v 4 Ija ijana cahuldoc osoca ec qee dugina qa ijadodoc eunu qee madigaun, “Ija dana tutuc,” igaun. Tibud uqa dih gesiltina, uqa ija dana tutucfo, qeefo ec madena.  
\v 5 Eunu deel Tibud qee ceseli hoc ninijeb age dana oso cain gesiliduwain. Tibud uqa ceseli humei uqa ceteh cunug qila jahunec tucana nijina eu cedadimei fulacdocna madigian. Odimei uqa dana agena cisdoc qila jahuni nijina eu camasac mudigian. Odocob saen euna dana cajaca cunug Anut uqa agena cabi eu mefo, me qeefo ec eu uqa maadigian.   
\s1 Korin agedodoc ijanaga sulein  
\p
\v 6 Ija cotiel, ija age deboimeig dana oso ijan sulimeig dana oso ijan cain cewudowainnu gale tena. Eunu agena cisdoc cesuladecnu ija je i ija Apoloscanu maadem. Odocob age elenu cisdumeig tutuc bilecnu kobol eu Anutna jaqec jena nijia eu toodoqagannu je i maadem.  
\v 7 In uqa hina dana ben mihen? Hina cel ceteh eu hina Anutnadec qee olom? Eu mele, hina Anutnadec dih omfi eetanu hinadodoc eu ceteh i gugwe odi hinadodoc ina binain suluguna?   
\p
\v 8 Age wele ceteh me bahic am bec bilegina! Age wele ceteh cehewanagaca bilegina! Ege king qee calolom qa age king calein! Euqa ija agenu lelanec je madigina. Age mele king bileginanu gale tena. Age odi biloubmi ege age gami osoben king biloum!  
\v 9 Age ege ensel dana cunugca osoben amagana qigecebil cal moqona, eu odiwe ege dana age cal mecnu ec je madein. Eunu ija Anut uqa ege Kraisna aposel dana cunug eu hib bahic migen ec cisdugina.  
\v 10 Ege Krais ijannu dana gad biluquna qa age Kraisca gabandoc eu age dana cisdoc silecca bilegina! Ege lehanige culec biluquna qa age hihibanagaca bilegina! Age binanagaca bilegina qa ege binanigeca qee biluquna!  
\v 11 Weleca oodi huhu qila saen ina ege wenca wa gabca gegen biluquna. Ege lotoc ihoc qee biluquna. Age ebenega qahimeig qigegina. Ege aben osonadec li osona cocobi beloqona.  
\v 12 Egedodoc ebenigena cabi gagadic oqona. Age egenu je me qee mamadegin ege eeladigiannu Anut inondoqona. Age jabigi tootoogegegin ege culumen eu gahidoqona.  
\v 13 Age egenu um qoc je mamadegin ege je me himec wadacduadoqona. Ege odi bibili hu saen ina maha cunugna tetec bahic cinigwe calom. Ege eu dana cunug agena gegehenega cinigwe biluquna.   
\s1 Pol uqa Korin age uqa cicilon ocnu niniaden  
\p
\v 14-15 Jisas Kraisna kobol eu ija dih ija agena memega biligina. Age ija me je qasali maademna ijana mel ibuldoin. Odocob age Kraisna kobol toodocnu age dado madecnu dana mati bahiccafi, eu cois ihoc qa age memega gehca qee. Eunu ija age majanaga hewadecnu je i qee jaqiadigina qa ija ulauladecnu ijana mel sim ija nalunuga miginawe odi jaqiadigina.  
\v 16 Eunu age ija ciciloni ocnu niniadigina.  
\v 17 Gug inu ija Timoti suldocomin ageca len. Timoti uqa ija melami cinigwe, ija uqanu nalug migina. Uqa Tibudna kobol gaid toodu odona. Uqa agena cisdoc tulidocob age ija Kraisna kobol tamanec cunugna anaana iwaladigina eunu haun cisdoqagannu sulduadem.   
\p
\v 18 Age ija li ono qee meciadigaun ec cisdoin. Eunu age leih age deboegina.  
\v 19-20 Euqa Tibud gale docobfi ija ageca mahuc odi ligen. Odocob Anutna cul eu je madecnu ceteh himec qee, eu gagadic odocnu ceteh. Eunu ija dana je deboi madegina eundec age je himec madeginafo, qee age gagadic odoccafo ec figen.  
\v 21 Age ija cel kobol odigennu gale adena? Ija kom hewimig ageca cali tutuc madecnu gale adenafo, qee ija wawi eu nalunuga mecca gemani susumulca euna ageca ligennu gale adenafo?   
\c 5  
\s1 Wal kobol eu Korin tamanec dunuh bilia  
\p
\v 1 Ija je oso agenu dah mem eu odi. Wal kobol oso Korin tamanec dunuh bilia ec matein. Odocob eu wal kobol fil, eu haiden qee odogina. Eu dana oso uqa memegna caja on ec matein.  
\v 2 Euqa age dana cunug wooladoqona ec cisdogina. Age eetanu agedodoc ijanaga sulegina? Age deboec eu culimeig qajeiga, eu me bahic. Odimeig dana uqa wal kobol i odona eu ititacdocobil uqa age gami tamanecna cain biliaun.   
\p
\v 3-4 Ge eu mele, ija deweni eu agenu onoca bahic biligina qa ija doloni eu ageca bilia eu odiwe ija ageca biluquna. Ija dana wal kobol me qee i odon eu uqana je wele Jisas Tibud ijanna gesildom. Eunu age odi odoqagan. Age osoben ceguluqaganna ija doloni ageca bibileb age egena Tibud Jisas uqana gagadic odocna  
\v 5 age dana i Tibudna ceseli hoc deelna uqa dolog eu Anut cahahadugiannu Seten ebenna mecebil uqa deweg me qee mudigian.   
\s1 Korin tamanec age dana age kobol me qee odogina eu ititacadoqagan  
\p
\v 6 Age agedodoc ijanaganu deboegina eu cois qee! Age jis nag bahic eu odocob bred cunug diena ec qee doginafo?  
\v 7 Anut uqa age bred haun jisca qee cinigwe caloqagannu gale dona. Eunu age silailna jis weledec eu u qeleiga. Odocob age cunug cataniec caloqagan. Krais, uqa egena Pasowa ja qoc sipsip nag, dana age wele ihandoin. Eunu eu mele age qila cataniec bilegina ec ija dugina.  
\v 8 Eunu ege egena Pasowa sab jec foqale. Euqa ege jis weledec, eu silailna kobol qisol mecca, toodu egena Pasowa sab jec cain foqaun qa ege bred jisca qee, eu cataniec kobol meleca, toodu egena Pasowa sab jec foqale.\f + \fr 5.8 \ft But 6-8 Pol uqa Bred Jisca Qee Jec Deel eunu cisdona. Sab jec eu Pasowa Sab Jec Ben Deel toodona. Pol uqa galolo je madena. Jis eu kobol me qee, eunu Kristen dana cajaca age kobol i cain toodu odowain. Ageha je Mak 14.1na nijia eu feiga.\f*   
\p
\v 9 Ija wele ijana jaqec jena age wal dana eundecca cain ihol mi cobowain ec jaqiadem.  
\v 10 Euqa age dana cunug maha inadec age wal kobolca, osona ceteh ocnu amaga qoc kobolca, heje oc kobolca, kadan tibudnu cuha fec kobolca odogina eu age gami cain ihol mi cobowain eunu qee jaqiadelem. Age odi odoubmiqa age maha i cunug culoub.  
\v 11 Euqa je ija jaqiadem uqana gug eu odi. Dana oso ija wawige meleec cotige ena eu uqa wal kobol odonafi, uqa osona ceteh ocnu ameg qonafi, uqa kadan tibudnu cuha fenafi, uqa dana agenu je um aqenafi, uqa ceu jeceb dalul qonafi, uqa heje onafi, age dana eundec gami cain ihol mi cobowain. Age dana eundec gami sabha cain jowain.  
\v 12-13 Anutna jaqec je odi madena:  
\q1 “Age dana me qee age gemona bilegina eu ititacadeiga,” ena. \rq (Loo 17.7; 19.19; 21.21; 22.21, 24; 24.7)\rq*  
\m Euqa dana age tamanec dunuh qee bilegina eu Anut gesiladigian. Eunu dana age tamanec dunuh qee bilegina eu gesiladecnu cabi eu ija ebenina qee nijel. Euqa dana age Korin agena tamanec dunuh bilegina eu gesiladecnu cabi eu Korin tamanec agena bahic.   
\c 6  
\s1 Kristen dana uqa cotig gesilec jona cain mudiaun  
\p
\v 1 Dana oso age gemona uqa Kristen cotignu jecafi adi uqa Anutna dana cajaca qagoc tutuc mudecnu ninijeb wooladimei gesilec jona dana mahanadec ititomca qee eu age gesildocnu mudigian?  
\v 2 Anutna dana cajaca qagu bilec age dana cajaca cunug mahanadec eu gesiladoqagan ec qee doginafo? Eunu age dana cajaca maha inadec gesiladoqagannufi adinu age je nag i edec eu gesilecwe qee?  
\v 3 Ege ensel ha gesiladeqan ec qee doginafo? Ege odi odocomunfi ege maha inadec cetehnu je gesiladecnu ihoc biluquna.  
\v 4 Eunu age maha inadec ceteh osonu jecafi adinu age dana tamanecna ijanca qee eu gesiligiannu cabi utegina?  
\v 5 Ija age majanaga adigiannu je i madigina. Age gemona dana cisdoc silecca uqa dana cotigca ale gemona je eu gesilecnu ihoc qee bilina eu melefo? Qee, dana oso ihoc bilina.  
\v 6 Euqa age gemona dana oso uqa cotig gesiladec jona mudina, odocob dana Kraisnu wawaga qee meleena eu amagana gesildogina.   
\p
\v 7 Eu mele, age tamanecna dana cajaca gesiladec jona ehadi legina. Age kobol euna age Kraisna kobol toodocnu toni aqen euna fegina. Eetanu age qee culadecebil age me qee madegina? Eetanu age qee culadecebil agena ceteh didu cawaladegina?  
\v 8 Euqa age kobol me i qee odogina. Age agedodoc dana waadegina, odocob age agedodoc danana ceteh didu cawaladegina. Age kobol i himec age wawaga meleec cotogail bahic eu odadegina.   
\p
\v 9 Dana qisol megina eu age Anutna cul qee mugumuga owain ec qee doginafo? Age agedodoc wawaga cain uhuldowain. Dana age cajaca wal kobol odoginaca, dana age kadan tibudnu cuha feginaca, dana age osona cajaca nijeginaca, dana age dana osoca kobol me qee majanagaca odoginaca,  
\v 10 dana age heje oginaca, dana age dana osona ceteh amaga gugca feginaca, dana age ceu jecebil dalul aqenaca, dana age dana leihnu je um aqeginaca, dana age dana agena ceteh didu cawaladeginaca, dana eundec cunug age Anutna cul qee mugumuga owain.  
\v 11 Age Korin tamanec leih age dana eundecwe odi biloloig. Euqa Anut uqa agena silailnu soiaden, odimei uqa age qagu maden, odimei uqa Krais Jisas Tibud ijannaca Anutna Kisnaca age dana cajaca ititom maden.   
\s1 Ege dewenige eu Kis Gunna cuha jo  
\p
\v 12 Age oso madena, “Ija eeta oso odigen eu cois himec,” ena. Eu mele, qa ceteh cunug eu hinana cesulhec qee. Ijaha madigina, “Ija eeta oso odigen eu cois himec,” igina qa ija eeta oso culdecemin ija uqana cabi dana qee caligaun.  
\v 13 Age oso madena, “Sab eu ija wawinu, odocob wawi eu sabnu,” ena. Eu mele, qa Anut ale lecis odi qee maligian. Age dewenega eu cajaca wal kobol odocnu qee ifanel, age dewenega eu Tibud binan sulecnu ifanen, odocob Tibud uqa dewenegana ilo bilia.  
\v 14 Anut uqa Tibud cal mecnadec tulidocob cajen. Odimei uqa egeha uqana gagadic odocna cal mecnadec tuligeceb cajeqan.   
\p
\v 15 Age dewenega eu Krais deweg amihilon ec qee doginafo? Eunu ija Krais deweg amihilon umig wal caja deweg amihilon migenfo? Qee bahic!  
\v 16 Anutna jaqec je madena eu odi calena:  
\q1 “Dana caja lecis ale dewenela osol caligian,” ena. \rq (Jenesis 2.24)\rq*  
\m Eunu dana uqa deweg wal cajaca fagdona eu uqa caja euca dewenela osol calesina ec age qee doginafo?  
\v 17 Euqa dana oso uqa Tibudca fagdona eu uqa Tibudca alena Kis osol calowasan.  
\v 18 Silail leih cunug dana odogina eu dewenega maha gumu nijia. Euqa dana wal kobol odona eu uqadodoc dewegna silail mena. Eunu age wal kobol eu culdimeig busaleiga.  
\v 19-20 Age dewenega eu Kis Gunna cuha jo gun ec age qee doginafo? Anut uqa age wele Kis Gun aden eu uqa age dunuh bilia. Ge, Anut uqa age ameg benna bahic fajadi ceden. Age dewenega eu agena bahic qee. Eunu age dewenegana Anut binan suleigale.   
\c 7  
\s1 Pol uqa dana cajaca ocobocob ecnu maden  
\p
\v 1 Qila ija je age jaqitein eunu wadacdu jaqiadigen. Dana uqa caja qee ocobfi eu me bahic.  
\v 2 Euqa cajaca wal kobol filfil odoc nijina eunu dana cunug age aidagailca osolosol bilecebilfi eu me. Odocob caja cunugha age gemugailca osolosol bilecebilfi euha me.  
\v 3-4 Dana uqa uqadodoc dewegnu ilo qee bilel qa uqa aideg eu dana dewegnu ilo bilina. Odocob dana uqa deweg eu aidegna eunu gemug cain cahacdoiaun. Eu odiha caja uqa uqadodoc dewegnu ilo qee bilel qa uqa gemug eu caja dewegnu ilo bilina. Odocob caja uqa deweg eu gemugna eunu aideg cain cahacdoiaun.  
\v 5 Ale ocobocobesin oso uqa oso hibemdumei deweg cain sosogon oiaun. Eu meleqa ale wawala osol meceb ale dewenela saen gohicna inondoc cabinu sosogon owasanfi eu cois. Euqa isi ale dewenela gabandowasan, gadgad aledodoc dewenela qee cofdu cuhadocobil Seten ale silail mecnu temaleiaunnu.  
\v 6 Ija je i maadigina eu je gatiti qee maadigina, euqa ija je i cesuladecnu maadigina.  
\v 7 Ija age cunug ija biligina cinigwe biluqagannu gale tena. Euqa Anut uqa dana cunug filfil age dumanaga aden. Dana oso uqa duman oso i uten. Dana oso uqa duman oso eu uten.   
\p
\v 8 Dana cajaca ocobocob qee eleinca caja gemunuga wele cal meinca eunu ija maadegina, “Age cuhanuc ija biliginawe biluqagannu eu me,” adigina.  
\v 9 Euqa age wawaga ilag wasecdainnu age ocobocobeginafi eu me bahic. Eunu agedodoc wawaga dewenegaca cofdocnu ihoc qeefi age ocobocoboqagan.   
\p
\v 10 Ija dana cajaca ocobocobein eundec je gatiti oso maadigen. Euqa ija bahic je gatiti qee maadigaun, eu Tibud uqa je gatiti maadigian. Je eu odi. Dana aideg uqa gemug cain culdeiaun.  
\v 11 Euqa caja uqa gemug culdifei uqa cuhanuc biligian. Qeefi, uqa haun ceseli limei gemugca tanawecebil wawala osol biluwasan. Odocob eu odiha gemug uqa aideg cain cagasudiaun.   
\p
\v 12 Ija dana cajaca leihha je oso maadigen. Euqa Tibud qee maadeiaun, eu ijadodoc je i maadigen. Wawaga meleec dana oso cajacafi, odocob caja eu waug qee meleena, caja uqa danaca bilecnu waug nijecebfi dana eu caja cain cagasudiaun.  
\v 13 Odocob wawaga meleec caja oso danacafi, odocob dana eu waug qee meleena, dana uqa cajaca bilecnu waug nijecebfi caja eu dana cain cagasudiaun.  
\v 14 Ge, age dogina, dana waug qee meleena uqa waug meleec aideg ufei uqa euna Anut amegna qagu bilina. Odocob caja waug qee meleena uqa waug meleec gemug ufei uqa euna Anut amegna qagu bilina. Qeefi, agena mel eu qee qagu bilegina. Euqa qila age qagu biluwain.  
\v 15 Euqa ege malol bileqannu Anut utagen. Eunu oso waug qee meleena uqa hijag waug meleena eundec culdifei eu cois culdigian. Kobol eu odi calecebfi danafo, cajafo waug meleena eu uqa fagdoc qee bilina.  
\v 16 Dana, hina ihoc aiden cesuldocom uqa waug meleecca caligianfo, qeefo ec qee dogona. Caja, hina ihoc gemun cesuldocom uqa waug meleecca caligianfo, qeefo ec qee dogona.   
\s1 Ege cobocnu Anut utagen euna coboqale  
\p
\v 17 Euqa coboc Tibud uqa ege filfil siwigen eu ege osolosol cunug coboc euna coboqale. Odocob Anut uqa ege filfil cobocnu utagen eu ege osolosol cunug coboc euna coboqale. Cobocnu loo je i ija tamanec cunugna iwaladigina.  
\v 18-19 Dewenega cagu qocnu kobol eu ceteh gauc himec. Odocob dana deweg cagu qee qona kobol euha ceteh gauc himec. Euqa Anutna loo je toodu odocnu kobol eu ceteh bahic. Eunu dana uqa deweg cagu quteinnu ninijen Anut uqa utadonfi uqa deweg tutuc mudimei eu cain jahuniaun. Dana uqa deweg cagu qee qutec ninijen Anut uqa utadonfi age uqa deweg cagu cain qutuwain.  
\v 20 Dana uqa bilec osona tatawen Anut uqa utadon eu uqa bilec euna himec biligian.  
\v 21-23 Dana uqa osona bega meh cabi dana bibilen Tibud uqa utadon eu uqa qila Anut amegna Tibudna besitoc dana bilina. Eu odiwe dana uqa osona bega meh cabi dana qee bibilen Tibud uqa utadon eu uqa qila Anut amegna Kraisna bega meh cabi dana bilina. Anut uqa age ameg benna bahic fajadi ceden. Eunu age dana agena bega meh cabi dana cain calowain. Eunu hina bega meh cabi dana bibilegen Anut hina utahenfo? Cois, cain cisdogaun qa hina bega meh cabi culecnu jic calecebfi hina jic eu toodoga.  
\v 24 Ija cotiel, dana filfil uqana bilecna bibilen Anut utadon eu uqa bilec euna dih Anutca biliale.   
\s1 Pol uqa dana cajaca ocobocob qee elein eunu maaden  
\p
\v 25 Qila ija dana cajaca ocobocob qee elein eunu je maadigen. Ija Tibudna loo je osoca qee euqa ija Tibud uqa ijanu waug qocob ija Tibudna mele je gaid madigina eunu ija ijana cisdoc maadigen.  
\v 26 Culumen ben bahic calena eunu dana age bilegina odi dih biluqagan eu me ec cisdugina.  
\v 27 Hina cajacafo? Odifi hina culdecnu cain cisdogaun. Hina cajaca qeefo? Odifi hina cajanu cain mecii cobogaun.  
\v 28 Euqa hina caja oganfi hina silail qee magaun. Odocob caja uqa dana ugianfi uqa silail qee meiaun. Euqa dana cajaca ocobocobein eu age deel gaid culumen maha ina oqagan. Odocob ija ceteh i ageca caligiannu qee gale tena.   
\p
\v 29-31 Ija cotiel, cel gugnu odi madiga, maha i falicdocob fil bahic caligian. Odocob saen geh bahic qee leiaun, eu saen nag qila ina himec bilina. Dana age aidagailca eu age aidagailca qee cinigwe bileigale. Odocob dana age qada qajegina eu age qada qajecca qee cinigwe bileigale. Odocob dana age ceelegina eu age ceelecca qee cinigwe bileigale. Odocob dana age ceteh idadecnu cabi ogina eu age cetehca qee cinigwe bileigale. Odocob dana age maha cetehna cabi ogina eu age agena maha cabi culein cinigwe bileigale.   
\p
\v 32 Age mahanadec culumen eunu jaen aqigiannu qee gale tena. Dana cajaca qee eu uqa Tibudna cabinu geh cisdona. Uqa Tibudna gale doc toodu odona.  
\v 33 Euqa dana cajaca bilia eu uqa maha inadec cetehnu geh cisdona. Uqa aideg gale dugiannu cabi ona.  
\v 34 Odocob eunu uqana cisdoc qatanec bilia. Odocob caja haunfo, caja gemugca qeefo eu uqa Tibudna cabinu geh cisdona. Uqa dewegnaca dolognaca gun biligiannu geh cisdona. Euqa caja danaca bilia eu uqa maha inadec cetehnu geh cisdona. Uqa gemug gale dugiannu cabi ona.  
\v 35 Ija age Tibud toodocnu wawaga lecis qee biliaunnu gale tena. Eunu ija cesuladecnu je i maadigina. Odimig ija age cahacadecnu qee maadigina qa age tutuc biluqagannuca, age gaid Tibudna cabi oqagannuca je i maadigina.   
\p
\v 36-38 Dana oso uqa ateg dana qee ona eunu kobol tutuc qee odona ec cisdonafi, odocob uqa dana ugiannu saen wooldonafi, uqa jic osoca qee eu fenafi, eu uqa cois uqana cisdoc toodugiannufi, uqa culaleceb ale cois ocobocobesiale. Eu ale silail qee mowasin. Euqa dana oso uqa waugna gagadic mecebfi, odocob ceteh oso uqa mahuc odigiannu qee nijecebfi, uqana gale doc cofdocnu ihocfi, uqa wele waugna madi, eu uqa ateg dana qee oiaun ec madecebfi, uqa me bahic odigian. Eunu dana uqa ateg culdeceb dana ona eu uqa kobol me odona. Odocob dana uqa ateg culdeceb dana qee ona eu uqa kobol me bahic odona.\f + \fr 7.36-38 \ft Grik je i uqana gug eu camasac bahic qee. Falicdoc je fil osoha nijia eu odi: Dana oso uqa uqana caja haun uqa ugiannu madein eunu kobol tutuc qee odona ec cisdonafi, odocob uqa caja ugiannu saen wooldonafi, uqa jic osoca qee eu fenafi, eu uqa cois uqana cisdoc toodugiannufi, ale cois ocobocobesiale. Eu ale silail qee mowasin. Euqa dana oso uqa waugna gagadic mecebfi, odocob ceteh oso uqa mahuc odigiannu qee nijecebfi, uqana gawec cofdocnu ihocfi, uqa wele waugna madi, eu uqa caja uqa ugiannu madein eu uqa gauc biligiannu gale don ec madecebfi, uqa me bahic odigian. Eunu dana uqa caja haun ugiannu madein eu ona uqa kobol me odona. Odocob dana caja qee ona eu uqa kobol me bahic odona.\f*   
\p
\v 39 Caja uqa gemug gaid cebac bibileb caja eu uqa gemugca gabandoc biluwasan. Euqa uqa gemug cal mecebfi caja uqaca haun qee gabandowasin. Uqa dana oso haun ugiannu gale dufei eu uqa cois ugian. Euqa uqa dana Tibudnu waug meleena eundec ugian.  
\v 40 Euqa ijana cisdocna caja eu uqa gauc bilifei uqa geh bahic ceeligian ec cisdugina. Odocob ijaha Anutna Kis ijaca bilia ec cisdugina. Eunu ija je i maadigina.   
\c 8  
\s1 Pol uqa age sab kadan tibudnu ihaneinnu maden  
\p
\v 1 Qila ija sab dana age kadan tibudnu ihaneinnu maadigen.\f + \fr 8.1 \ft Saen euna haiden age dool ehadi agena kadan tibudna cuha jona limeig dool aqimeig kadan tibud eunu dool ihanadoloig. Odimeig hibna age dool cuhunuga umeig idadec cudunna belimeig cuhunuga eu suldoloig. Kristen age eunu jaen aqen eu odi fena. Odocob age Pol ege dool cuhunuga eundec jeqan eu coisfo, qeefo? ec sisildoin.\f* Dana leih age madegina, “Ege cunug docca,” egina. Je eu meleqa dana agena doc eu deboec kobolnu tuliadena. Euqa ege wawige meleec dana nalug mecebmecebecebil ege wawige osol gagadicca tawoqona.  
\v 2 Dana oso uqa ija ceteh osonu wele duga ec cisdonafi dana euna doc eu ihoc bahic qee.  
\v 3 Euqa dana Anutnu nalug menafi Anut uqa dana eunu du cuhadona.   
\p
\v 4 Eunu sab dana age kadan tibudnu ihaneinnu ija je oso maadigen. Ege doqona, kadan tibud eu ceteh mele bahic qee, eu ceteh gauc himec. Egeha doqona, anut mati bahic qee bilegina, Anut osol dih bilina.  
\v 5 Eu mele, ceteh mati bahic saona bilegina eu age anut egina, odocob mati bahic mahana bilegina eu age tibud egina. Euqa ceteh i ohisnaca mahanaca bilegina eu age anut egina eu agenu melefi  
\v 6 egenu Anut osol bilina, ege Memige. Uqa ceteh cunug ifanec gug, odocob uqanu ege biluquna. Tibud osol dih bilina, uqa Jisas Krais. Uqa ceteh cunug ifanen, odocob ege uqanadec cebac bilec oqona.   
\p
\v 7 Euqa dana cajaca cunug age doc eu qee dogina. Dana leih age wele kadan tibudna kobol toodoloig, agena cisdoc eu gagadicca qee. Odocob age sab eu kadan tibudnu ihanec jegina saen euna age sab eu kadan tibudnu ihanein ec cisdogina. Odocob age sab jegina eu age kobol gegehinca odoqona ec tebandogina.  
\v 8 Euqa ege sab eu qee jifeb kobol eu odigeceb ege Anut amegna me bahic qee tawoqaun. Odocob ege sab eu jifeb kobol eu odigeceb ege Anut amegna me qee qee tawoqaun. Sab uqa ege Anut cemenug qee ehigi leiaun.  
\v 9 Euqa age batut feigale. Kobol eu agedodoc odocnu ihoc eu dana cajaca leih age wawaga meleec nag eu cain odadecebil silailna toni aqeiaun.   
\p
\v 10 Gadgad hina dana uqa kadan tibud eu tibud mele qee ec dona, hina kadan tibudnu cuha jona lifeg sab jiji bibilem dana uqana cisdoc gagadicca qee uqa fecihecebfi hinana kobol eu uqa waug tulidocob uqa sab kadan tibudnu ihanein jecnu waug gagadic migianfa?  
\v 11 Eunu hinana doc eu hinana kobolna dana uqa cisdoc gagadicca qee eu fadaldugian. Dana eu uqa cotin, uqanu Krais cal men.  
\v 12 Doiga, wawige meleec cotigeil leih agena cisdoc eu gagadicca qee. Eunu age kobol i odoginafi age wawaga meleec cotogail agena cisdoc silec wadogina, odocob ageha Krais silail mudegina.   
\p
\v 13 Eunu ija sab eu jecemin wawige meleec coti oso toni qu silail mecebfi ija coti odudecemin silailna toni qoiaunnu ija sab eu haun qee jigaun.   
\c 9  
\s1 Pol uqa aposelna cabi ameg qee ol eunu ceelen  
\p
\v 1 Ija besitec dana. Ija cel cabi ugennu cisdugina eu ihoc odigen. Ija aposelfo, qeefo? Ija Jisas egena Tibud wele fem. Eu mele, eunu ija aposel. Ija Tibudna cabi ocomin age ijana cabi aig caleinfo, qeefo? Eu mele, age ijana cabi aig.  
\v 2 Age wele Jisasnu wawaga meleen sisi mec eu ija Tibudna aposel ec ihacen. Eunu Korin tamanec agenu eu mele, ija Jisasna aposel ec dogina! Dana leih age ija Jisasna aposel ec qee cisteginafi eu odi feia.   
\p
\v 3 Dana leih age ijana kobol gesilegina eu ija je i edi wadacduadigina.  
\v 4 Ija aposel ijana cabinu amegwe sab waca ocnu eu cois qeefo?  
\v 5 Aposel leihca, Tibud waliagulca, Pitaca age osolosol waug meleec caja oin. Age aidagail age gami jic cobocna belegina. Ija ijana jic cobocna waug meleec caja oso ocomin nuecnu eu odi aposel eundec odoginawe eu cois qeefo?  
\v 6 Ija Banabasca eledih elena cebac bilecnu cabi owan, odocob aposel leih age agena cebac bilecnu cabi qee owainfo?  
\v 7 Cel dana uqa han cadec cabi umei uqadodoc uqana sab walena? Cel dana uqa wain cabina na wain cehena eu uqadodoc uqana cabinadec wain aig qee jena? Cel dana uqa sipsip cofadena eu uqadodoc agena su qee jena?   
\p
\v 8 Age ija dana agena cisdoc himec toodumig je i edi madigina ec cain cisdowain. Qeeo! Mosesna loo jeha eu odi madena.  
\v 9 Moses uqa je oso uqana loo jena odi jaqen:  
\q1 “Age bulmakau uqa wit ceteteh lahacdocnu cabi ona eu uqa biah cain cufa qowain,” en. \rq (Loo 25.4)\rq*  
\m Anut uqa bulmakaunu cisdonafo? Qeeo.  
\v 10 Anut uqa egenu bahic cisdudu bili eu maden. Dana cabina maha qatanenaca, dana wit ganac cagasenaca ale aledodoc alena sab naha ocnu cabi osina eunu uqa egenu je eu jaqen.  
\v 11 Ege me je qasali maadom saen euna ege Kisna aigwe age gemona cehom. Eunu age ege ceteh dewenige cesuldocnu igifeig eu odiwe ege ceteh cehom eunadec sab oqona eu ceteh tutuc qeefo? Qeeo, eu tutuc.  
\v 12 Age dana leih Korin agenadec ceteh i oqagannu cois ifeig egeha ceteh i oqannu cois bahic ec madoqagan.  
\p Euqa ceteh i ege agenadec oqannu cois ec nijia eu ege qee olom. Odocob ege culumen fil gahidoqona. Ege Kraisna me jena jic cufa qoqaunnu odi odoqona.  
\v 13 Nawel tawec ihanec dana age tempelna cabi ogina eu agena sab tempelnadec ogina, odocob dana age dool ihanecnu cabalna cabi ogina eu agena dool ihanecnu cabalnadec naha ogina ec qee doginafo?  
\v 14 Eu odiwe Tibud uqa maden, leih age me je qasali maadegina eu agena cebac bilec me jenadec oqagan ec maden.   
\p
\v 15 Euqa ceteh i ija agenadec ugennu cois ec nijia eu ija oso qee olom. Odocob qilaha ija ceteh i ugennu je i qee jaqigina. Ija casac cal mimig ceteh oso agenadec ugen! Dana oso ija binani sulecnu gug cagasitecnu qee gale tena.  
\v 16 Ija me je qee qasali maadifig ija me qee bahic biligen! Ija odocnu himec odigen. Ija jic osoca qee. Eunu ija me je qasali maadiginafi ija binani sulecnu gug eu qee nijel.  
\v 17 Ge, ija ijana cisdocna cabi i ufig ija ameg oso ocnu cois igen. Euqa ija ijana cisdocna cabi i qee ugina. Anut uqa cabi i ebenina men eunu ija cabi i ugina.  
\v 18 Odocob cel ameg eu ija ugen? Ijana ameg eu odi. Ceteh ija ocnu ihoc eu me jena cabinu ija qee olom. Ija me je qasali maadigina eu ija dana gauc adigina. Eu ijana ameg.   
\s1 Pol uqa dana cajaca cunug agena bega meh cabi dana bilia  
\p
\v 19 Ge, ija besitec biligina. Odocob ija dana osona bega meh cabi dana qee biligina. Ija ijana gale tecna ija dana cajaca cunug agena bega meh cabi dana mem. Ija dana cajaca mati bahic haun Kraisnu wawaga meleigiannu odi odem.  
\v 20 Eunu ija Juda age Kraisnu wawaga meleigiannu Juda gami cabi u bibileb ija Juda bileginawe bilem. Ija Mosesna loo je bisalu qee biligina, euqa ija dana cajaca age loo je bisalu bilegina age Kraisnu wawaga meleigiannu ija age gami cabi u bibileb ija age amagana dana uqa loo je bisalu bilinawe bilem.  
\v 21 Odocob ija dana cajaca age Mosesna loo je bisalu qee bilegina age Kraisnu wawaga meleigiannu ija age gami cabi u bibileb ija age amagana dana uqa loo je bisalu qee bilinawe bilem. Euqa ija Anutna loo je qee culelem, ija Kraisna loo je bisalu bilem.  
\v 22 Odocob ija dana cajaca agena wawaga meleec eu gagadicca qee eundec age Kraisnu wawaga meleigiannu ija age gami cabi u bibileb ija age amagana dana uqa waug meleec gagadicca qee eu bilinawe bilem. Ija dana leih cahahaadecnu jic cunug temdom. Eunu ija dana cunug agena kobol om.  
\v 23 Ceteh me bahic Anut uqa dana cajaca cunug age me jenu wawaga meleena eu adigian ijaha ijana naha ugennu gale tena. Eunu ija dana cajaca cunug me je qasali maadem.   
\s1 Ege ameg me ocnu tutuc guguli gadacna caloqale  
\p
\v 24 Dana age dana leih wooladecnu guguli gadacna belegina euna dana osol dih ameg me bahic ona ec qee doginafo? Eunu age ameg me bahic ocnu tutuc guguli qee mec gadacna beleigale.  
\v 25 Odocob dana cunug age gugulecna wooladoqagannu gale adena eu age agedodoc deweneganadec gale adec eu cilehdogina. Dana eundec age bala me bahic oqagannu odoqona, euqa bala eu me qee migian. Euqa ege bala me bahic qee me qee meiaun eu oqannu odoqona.  
\v 26 Eunu ija gauc qee guguligina qa ija tutuc guguli qee mec gadacna nuigina. Ija ebeni ilag qelimig fufu gauc qee qugina. Eunu ija boksen dana me cinigwe odigina.  
\v 27 Euqa ija deweni ijana gale tec eu toodugiannu deweni ququ cilehdugina. Gadgad ija dana leih me je qasali maadimig hibna ija ameg me bahic qee ugaun.   
\c 10  
\s1 Gadgad ege temgecna toni qigiaun  
\p
\v 1 Ija wawige meleec cotiel, egena sihul weledec eu age Moses toodoin eu eeta ageca calennu du cuhadoqagannu gale tena. Age cunug taen agena jic dado madecnu Anut muden eu cofaaden bisalu bilein. Odocob age Macas Golcana cocobi hu age cunug leti li belein.  
\v 2 Odocob age cunug taenna macasnaca wa joc cinigwe oin. Odocob wa joc eu odadeceb age Mosesna sihul calein.  
\v 3 Odocob age cunug sab Anutna Kis adeceb jein.\f + \fr 10.3 \ft Wele Isrel dana cajaca age saonadec sab oin, sab ijan eu “manna.” Age Kisim Bek 16.2-36 eu feiga.\f*  
\v 4 Odocob age Kisna meen tooadeceb age gami belein euna wa gab jein.\f + \fr 10.4 \ft Mosesna buk 5-pela euna Isrel dana cajaca age meennadec wa oinnu dodo lecis nijia. Oso eu Kisim Bek 17.1-7 euna nijia, oso eu Namba 20.1-13 euna nijia. Juda dana leih age je lecis i meen osol himec eunu madena ec cisdogina. Odocob Isrel dana cajaca cocobogin meen i tooadena ec cisdogina.\f* Meen eu Krais uqa dih. Eunu age cunug wa Anutna Kis adeceb jein.  
\v 5 Euqa Anut uqa dana cajaca eu mati bahic agena kobol qee gale dol. Eunu age cal mecebil dewenega ganac wadauna ilag miadi fadalein.   
\p
\v 6 Ege silail mec kobol cain gale geiaun eu odiwe age gale aden. Eunu ceteh i cunug ulaulgecnu calen.  
\v 7 Age kadan tibudnu cain cuha fowain eu odiwe dana cajaca age wadauna bilein eu age leih kadan tibudnu cuha fein. Eu odi Anutna jaqec je madena:  
\q1 “Dana cajaca age bilimeig sab waca jein.  
\q1 Odimeig age cajimeig dana age cajaca wal kobol odoin,” ena.\f + \fr 10.7 \ft Wele Isrel dana cajaca age bulmakau nag goldna mudimeig age eunu cuha fein. Age kadan tibud eunu ceteh ihanimeig sab wainca jejeig wal kobol odoin. Age Kisim Bek 32.1-6 eu feiga.\f* \rq (Kisim Bek 32.6)\rq*   
\m
\v 8 Ege wal kobolha cain odoqaun eu odiwe age leih odoin. Eu deel osol dunuhna 23,000 agenadec toni cal mein.\f + \fr 10.8 \ft Wele Isrel dana cajaca age kadan tibud, ijan Baal, eunu cuha fein. Eunu Anut uqa dana cajaca 23,000 aqeceb cal mein. Age Namba 25.1-9 eu feiga.\f*  
\v 9 Ege egena Tibudha cain temdoqaun eu odiwe age leih odoin. Eu age man sononec aqi jecebil cal mein.  
\v 10 Ege gonagona cain moqaun eu odiwe age leih odoin. Ensel dana qagaadena eu qagaadeceb fadalein.   
\p
\v 11 Aria, ceteh i cunug dana cajaca ulauladecnu ageca calen. Euqa age dado migecnu jaqein. Eunu ege dana qila biluquna eu saen wele qee migian odonanu cisdoc igina.  
\v 12 Eunu dana oso uqadodocnu madi, ija gagadic tawigina, ena eu uqa toni qoiaunnu batut feiale.  
\v 13 Temadec Korin ageca hon eu temadec dana cajaca cunug ageca hon cinigwe, eu temadec fil bahic qee. Euqa Anut uqa uqana je hahun madec toodu odona. Eunu uqa culeceb temadec oso ageca hocob eu gahidocnu culumen wooldoc oso qee nijel. Euqa uqa age temadecna ehi li madimei uqa age temadecna hatawowainnu jic me ihacadeceb temadec eu gahidumeig wooldoqagan.   
\s1 Ege Anutnu kadan tibudnuca osoben cuha fecnu ihoc qee  
\p
\v 14 Eunu, ijana danah bahic, age kadan tibudnu cuha fec kobol hibemdumeig busaleiga.  
\v 15 Age cisdoc silec dana eunu ija maadigina. Agedodoc ijana je gesileiga.  
\v 16 Gabin Anut eeldona ege eunu Anut hegaga doqona. Ege gabin euna joqona saen euna ege Krais golac ila moqona. Bred ege fenimeb eu ege joqona saen euna ege Krais deweg ila moqona.  
\v 17 Bred ege fenoqona eu osol eunu ege dana cajaca mati, ege cunug bred osol eu ila mi joqona. Eunu ege dewenige osol biluquna.  
\v 18 Age Isrel agena kobolnu cisdoiga. Age dool ihanec cabal tatacan manegina eu jegina saen euna Isrel dana cajaca age Anutnu ihanegina eunu ceguli cuha fegina.   
\p
\v 19 Age ija sab age kadan tibudnu ihaneginaca kadan tibud euha eu ceteh mele ec madigina eu odi cain cisdowain.  
\v 20 Qee bahic! Ija je odi qee madigina! Haiden dana age Anutnu qee ihanegina agena ihanec eu buga me qeenu ihanec ec ija madigina. Korin age buga me qee gami gabandocnu qee gale tena.  
\v 21 Age Tibudna gabinnadec wa jiji cuculi li buga me qee agena gabinnadecha wa jijiecnu qee nijel. Age Tibudna cabalnadec sab jiji cuculi li buga me qee agena cabalnadecha sab jijiecnu qee nijel.  
\v 22 Ege Tibud olohon wasigiannu gogoludeqanfo? Egena gagadic odoc eu Tibudna gagadic odoc wooldocfo?   
\s1 Ege Anut binan gaid suluqale  
\p
\v 23 Leih madegina, “Ege eeta oso odeqan eu cois himec,” egina. Eu mele, qa ceteh cunug eu agena cesuladec qee. Leih madegina, “Ege eeta oso odeqan eu cois himec,” egina. Eu mele, qa ceteh cunug eu ege wawige osol gagadicca tawecnu qee cesulgena.  
\v 24 Dana oso uqadodoc me biligiannu jic cain waleiaun qa uqa cotig me biligiannu jic waleiale.   
\p
\v 25-26 Anutna jaqec je odi madena:  
\q1 “Mahaca ceteh cunug mahana bileginaca eu Tibud uqana himec,” ena. \rq (Buk Song 24.1)\rq*  
\m Eunu age ceteh oso deel fajec cudunna suldogina eu age cuhun age kadan tibudnu ihanein ec geh cain cisdodoig ilag sisiluwain. Age cuhun fajimeig jeiga. Age jecnu ihoc ec cisdoiga.\f + \fr 10.25-26 \ft Age je 1 Korin 8.1na nijia eu feiga. Pol uqa age dool cuhunuga eu idadec cudunna fajegina eunu cain cisdowain ec madena. Age cuhunuga eu jifeig age cahuldoc qee odogina ec madena.\f*   
\p
\v 27 Odocobha dana oso waug qee meleena uqa age utaadeceb li uqaca osoben sab jecnu madenafi, odocob age nuecnu cois ec cisdufeig age joqagannu ceteh saciadoia eu jeiga. Age geh cain cisdodoig ilag sisiluwain.  
\v 28-29 Euqa dana oso odi maadecebfi, “Sab i age kadan tibudnu ihanein,” adecebfi age dana eunu cisdumeig gadgad cahuldowainnu sab eu cain jowain. Ija age agedodoc amagana cahuldoqagan ec qee madigina. Euqa dana eu uqa je maadigian uqa amegna age cahuldoqagan ec madigina.  
\p Euqa dana oso madigian, “Eu mele, qa eetanu dana oso ijadodoc jecnu ihoc ec sisiltena? Eetanu dana oso ijana kobol uqadodoc uqana cisdocna gesiltina?  
\v 30 Ijana sabnu Anut hetaga dufig eetanu dana oso ija sabnu Anut hetaga duga eunu je me qee matena?” igian.   
\p
\v 31 Eunu age sab jeginafo, age wa gab jeginafo, age ceteh fil odoginafo, cel ceteh odogina eu age Anut binan sulecnu odoigale.  
\v 32 Age Judanuca, Griknuca, Anutna tamanecnuca cisdoiga. Odimeig age kobol osonu age jaimaga qeti qocob silailna toni aqeiaunnu cain odowain.  
\v 33 Anut uqa dana cajaca cunug cahahaadigiannu gale tena. Eunu ijaha dana cunug ija kobol cunug odigina eunu gale adigiannu odigina. Ijadodoc me mitecnu cabi qee ugina. Ija dana mati age me madecnu cabi ugina.   
\c 11  
\p
\v 1 Age ija ciciloni oiga eu odi ija Krais cicilon uginawe.   
\s1 Pol uqa cuha fec ilomoga jahuldoc kobolnu maden  
\p
\v 2 Age gaid ijanu cisdogina, odocob iwaladec je ija age ebenegana mem eu age toodu odogina. Eunu ija age binanaga suligina.  
\v 3 Euqa age je inu cisdu cuhadoqagannu gale tena. Dana cunug agena ilo eu Krais. Odocob cajana ilo eu uqa gemug. Odocob Kraisna ilo eu Anut.  
\v 4-7 Eunu dana oso uqa ilo jahuldoc tatawi inondonafo, je hahun madenafo uqa Krais majag hewena. Krais uqa ilo. Odocob caja oso uqa ilo qee jahuldoc tatawi inondonafo, je hahun madenafo uqa gemug majag hewena. Gemug uqa ilo. Caja eu odiwe caja age ilo gosic cocdocobil majag dona. Ge, caja uqa ilo qee jahuldoc bilinafi uqa gosic cagocob gohicdugian. Euqa caja uqa gosic cagu gohicdoc bilinafo, ilo cocdoc bilinafo, eu majag docobfi uqa ilo jahuldugian. Dana uqa Anut ihicon qon, uqa Anutna gagadic odoc fulacdocca. Eunu dana uqa ilo jahuldoc qee biliaun. Euqa caja uqaha gemugna gagadic odoc fulacdocca.\f + \fr 11.4-7 \ft Grik je i uqana gug eu camasac bahic qee. Falicdoc je fil osoha nijia eu odi: Eunu dana oso uqa gosic cecelacca tatawi inondonafo, je hahun madenafo uqa Krais majag hewena. Krais uqa ilo. Odocob caja oso uqa ilo gosic qee jahuldoc tatawi inondonafo, je hahun madenafo uqa gemug majag hewena. Gemug uqa ilo. Caja eu odiwe caja age ilo gosic cocdocobil majag dona. Ge, caja uqa gosic ilo qee jahuldoc bilinafi uqa qila gosic gohic biligian. Euqa caja uqa gosic cagu gohicdoc bilinafo, ilo cocdoc bilinafo, eu majag docobfi uqa gosic haun wasigian. Dana uqa Anut ihicon qon, uqa Anutna gagadic odoc fulacdocca. Eunu dana uqa gosic cecelacca qee biliaun. Euqa caja uqaha gemugna gagadic odoc fulacdocca.\f*   
\p
\v 8 Ge, Anut uqa dana cajanadec qee ifanel qa uqa caja dananadec ifanen.  
\v 9 Odocob Anut uqa dana eu caja cesuldugiannu qee ifanel. Euqa uqa caja eu dana cesuldugiannu ifanen.  
\v 10 Dana uqa cajana ilo bilina eunu caja uqa ilo jahuldoc biligian, odocob ensel eu foqagannu.   
\p
\v 11 Ege Tibudca gabandoc biluquna eu caja uqa cuhanuc qee bilina, odocob dana uqa cuhanuc qee bilina. Euqa caja uqa danana cesuldoc bilina, odocob dana uqa cajana cesuldoc bilina.  
\v 12 Ge, qila dana uqa cajanadec cali hona eu odiwe Anut uqa caja dananadec muden. Odocob ceteteh cunug eu Anutnadec cali hogina.   
\p
\v 13 Agedodoc je i gesileiga. Caja uqa ilo qee jahuldoc tatawi Anut inondona eu coisfo?  
\v 14 Dana cajaca egena kobol eu dana gosic cecelac eu fecnu galeca qee eu ihacgena.  
\v 15 Euqa Anut uqa caja gosic cecelac eu uqa lotoc ilo jahuldocwe uten. Eunu caja uqa gosic cecelac eu uqana bala me.  
\v 16 Euqa oso uqa eunu jena fee dadanecnu odonafi ija je osol madigen. Egeca Anutna tamanec cunugca ege cuha fecnu kobol fil oso qee odoqona, qa ege cuha fecnu kobol i himec odoqona.   
\s1 Korin age Tibudna bred wain gabinca jecnu qee tutuc odoloin  
\p
\v 17 Euqa age ceguli cuha fegina euna kobol me oso qee calena. Kobol me qee eu calena. Eunu ija qila je maadigenna ija age binanaga qee suligaun.  
\v 18 Ija je oso casac madigen. Ija je odi dah migina. Age cuha fecnu cegulegina saen euna age ilag qatanegina ec dah migina. Odocob ija je eu nag odi wawi meleena.  
\v 19 Anut uqa dana cajaca leih age gemo bilegina, age uqa amegna tutuc odogina, eu age camasac moqagannu gale dona. Eunu agena cegulecna qatanec bilegina eu mele bahic ec cisdugina.  
\v 20-21 Age osoben cegulegina saen euna age jejeig age cunug filfil agedodoc agena sab cedimeig jegina. Odocob oso wen dona, oso ceu jeceb dalul qona. Eunu age Tibudna bred wain gabinca jecnu sab eu tutuc qee jegina.  
\v 22 Eu adinu! Age agena jona sab waca euna jecnuca qeefo? Qeefi, age Anutna tamanec eu ceteh gauc ec cisdoginafo? Odimeig age cotogail sabca qeenu majanaga hewadegina. Eunu ija age adi maadigen? Ija kobol eunu age binanaga suligenfo? Qeeo, ija age binanaga qee suligaun.   
\s1 Jisas Tibud uqa bred wain gabinca uqana malogom adeceb jein  
\r (Matju 26.26-29; Mak 14.22-25; Luk 22.14-20)  
\p
\v 23 Ge, je i ija age adem eu ija Tibudnadec om. Eu odi Jisas Tibud Judas dewegnu balijen witic euna uqa bred umei  
\v 24 Anut hetaga dumei feni siwiaadi maaden, “I ija deweni eu agenu Anut ihandon nijia. Cedi jeiga. Age odi oodoig ijanu dahiniga cisdoigale,” aden.  
\v 25 Uqaha Pasowa Sab Jec Ben hedocob wain gabin oso umei Anut hetaga dumei eu aadi maaden, “Wain gabin i bal cehec je haun. Eu ija golani uqana gaga nijia. U jeiga. Age odi jejeig ijanu dahiniga cisdudu odi odoigale,” aden.  
\v 26 Ge, age bred inadec wain gabin inadecca jiji bileig age Tibudna cal mec eunu mamadi bilegina. Eu odi dih oodi bibilebil uqa ceseli hugian.   
\s1 Ege egena wawige cisdocca gesili cuhadumeb Tibudna bred wain gabinca jeqan  
\p
\v 27 Eunu oso uqa bred eunu qee cisdoc gadgad jifei, uqaha wain gabin eunu qee cisdoc gadgad jifei, eu Tibud deweg golacca cewudina. Odimei uqadodoc cahuldonanu ameg me qee ugian.  
\v 28 Euqa dana uqadodoc gug temdoiale. Odimei uqa bredca wain gabinca jeiale.  
\v 29 Ge, oso eu Tibud deweg uqana gug bahic eunu batut qee cisdudu jifei eu uqa uqadodoc geuldecnu jigian.  
\v 30 Gug eunu agena eundec mati age hagca, mati age gelelanagaca qee, cobogina. Odocob leih age wele cal mein.  
\v 31 Euqa egedodoc gug casac temdudu cisdoummi Anut ege qee gesilgeialu.  
\v 32 Euqa ege mahanadec eundecca osoben gesilgec oqaunnu Tibud uqa gesilgena euna uqa ulaulgena.   
\p
\v 33-34 Eunu, ija cotiel, age cegulecebil Anut gesiladoiaunnu oso wen docobfi uqa uqana jona jeiale. Odocob age Tibudna bred wain gabinca jecnu cegulegina saen euna age oso sumudecebsumudecebeigale.  
\p Je naha ninijeb eu ija ageca humig tutuc mudigen.   
\c 12  
\s1 Pol uqa Kis Gunna dumanaga adec filfilnu maden  
\p
\v 1 Aria, qila ija Kis Gunna dumanaga adec eunu maadigen. O cotiel, age Kis Gunna dumanaga adec eunu du cuhadoqagannu ija gale tena.  
\v 2 Age dogina, age haiden bilein saen euna ceteh oso diadecebfi age kadan tibud conogaca qee ageca lein. Euqa age eeta diadeceb age tooadecnu himec lein.  
\v 3 Eunu age ceteh i doqagannu gale tena. Dana oso uqa Anutna Kis cesusdocob uqa Jisasnu madi, geuldec je madecwe qee. Odocob dana oso uqa Kis Gunca qee eu uqa je madena, “Jisas uqa Tibud,” je madecwe qee.   
\p
\v 4 Ege cabi ocnu dumanige igec filfil nijia qa dumanige igec Kis eu uqa osol bilia.  
\v 5 Odocob cewel uadec filfil nijia qa ege cunug Tibud osolnu cewel utuquna.  
\v 6 Odocob cabi oc filfil nijia qa Anut eu osol, uqa odigeceb ege cunug cabi ocnu ihoc lena.  
\v 7 Kis Gun uqa ege cunug tamanec cesuldocnu osolosol dumanige igeceb camasac mena.  
\v 8 Kis uqa dana oso je cisdoc silecca maadecnu duman utina. Odocob Kis uqa dana oso doc meca maadecnu duman utina.  
\v 9 Odocob Kis eu dih uqa dana oso uqa waug meleecnu duman utina. Odocob Kis osol eu uqa hag me madecnu duman utina.  
\v 10 Odocob Kis uqa dana oso kobolkobol odocnu duman utina. Odocob uqa oso je hahun madecnu duman utina. Odocob uqa oso kis eu melefo, qeefo docnu duman utina. Odocob uqa oso beilah filfil madecnu duman utina. Odocob uqa oso beilah filfil falicdu sildi madecnu duman utina.  
\v 11 Euqa dumanige igec filfil cunug eu Kis osol dih odigeceb odoqona. Kis eu uqa uqana cisdocna dumanige igec filfil ege osolosol siwi igena.   
\s1 Deweg eu osol qa uqana nahanaha eu mati  
\p
\v 12 Dana deweg eu osol, odocob uqa cabi ocnu nahanaha mati nijadegina. Euqa deweg nahanaha eu mati, odocob cunug age deweg osol. Eu odiwe Krais uqana eundec egeha deweg osol.  
\v 13 Ge, ege Judaca, Juda qee eundecca, cabi bega mehca, cabi bega meh qee eundecca, ege Kis osolna wa joc om, ege cunug deweg osol biluquna. Egeha Anut uqa Kis osol eu wa jecnu igen.   
\p
\v 14 Ge, deweg eu cabi ocnu naha osol qee, uqa cabi ocnu nahanaha mati nijadegina.  
\v 15 Hina jaim mahoubmi, “Ija eben qee, eunu ija dewenna naha qee,” houbmi uqa madec toodu dewenna naha qee biloubfo? Qeeo, jaim eu dewenna naha biloub.  
\v 16 Odocob hina dahin mahoubmi, “Ija amen qee, eunu ija dewenna naha qee,” houbmi uqa madec toodu dewenna naha qee biloubfo? Qeeo, dahin euha dewenna naha biloub.  
\v 17 Hina dewen cunug eu amen himec tawoubmi hina adi je dah moum? Hina dewen cunug eu dahin himec tawoubmi hina adi cahug moum?  
\v 18 Euqa deweg uqa eu odi qee. Anut uqadodoc cisdocna dewegna nahanaha cabi ocnu bilec cudun maden.  
\v 19 Deweg cunug eu naha osol himec tawoubmi eu adi deweg tawoub?  
\v 20 Qilaqa eu cabi ocnu dewegna nahanaha mati eu deweg osol gabandu bilegina.   
\p
\v 21 Ameg uqa eben madona, “Hina qee bilecemfi ija cuhanuc ihoc biligen,” eu odi madocwe qee. Odocob ilo uqa jaih madona, “Hina qee bilecemfi ija cuhanuc ihoc biligen,” eu odi madocwe qee.  
\v 22 Qeeo! Dewenige naha osooso gagadicca qee ec cisdoqona eundec deweg me bilecnu cesuldogina.  
\v 23 Odocob dewenige naha osooso galeca qee ec cisdoqona eundec ege bala hewadoqona. Odocob dewenige naha osooso majagca eundec ege jahuldoqona.  
\v 24-25 Eu odi dewenige nahanaha galeca eundec jahuldocnu silig qee nijel. Euqa Anut uqa dana deweg uqa cisdu cuhadumei nahanaha cunug tubdu madeceb osol bilina. Uqa dewegna nahanaha cain fee dadanowainnu, cesuldocobdocob biluqagannu odi muden. Uqa deweg naha osooso ege ijanagaca qee ec cisdoqona eu uqa saolal maden.  
\v 26 Dewegna naha oso dainnu sogoecebfi dewegna nahanaha cunug dainnu sogoegina. Dewegna naha oso hu saolal mudecebfi dewegna nahanaha cunug osoben ceelegina.   
\p
\v 27 Age osoben Krais deweg bilegina, age abesabes deweg euna agena bilec cudugna bilegina.  
\v 28 Odocob Anut uqa uqana tamanecnu cabi dana nesili ehaden. Uqa casac aposel nesili ehaden, odocob uqa je hahun madec dana nesili ehaden, odocob uqa me je iwaladec dana nesili ehaden, odocob uqa kobolkobol odoc dana nesili ehaden, odocob uqa hagnu me madec dana nesili ehaden, odocob uqa cesuladecnu cabi dana nesili ehaden, odocob uqa cofadecnu cabi dana nesili ehaden, odocob uqa beilah filfil madecnu dana nesili ehaden.  
\v 29 Age cunug aposelfo? Age cunug je hahun madec danafo? Age cunug me je iwaladec danafo? Age cunug kobolkobol odoc danafo?  
\v 30 Age cunug hagnu me madeginafo? Age cunug beilamaga filfilna madeginafo? Age cunug beilamaga filfil je falicdu sildi madeginafo?  
\v 31 Euqa age dumanaga adec meca ocnu megameg meigale.  
\s1 Ege dana cajaca cunug nalunuga moqale  
\p Ija age jic me bahic oso ocnu ihacadigen.   
\c 13  
\p
\v 1 Ija dana agena je madecnuca, ensel agena je madecnuca duginafi, euqa nalug mec eu ijana qee nijinafi, ija belo ain qetec mahulec cinigwe, ija gilim gauc cadum cagoc cinigwe.  
\v 2 Ija je hahun madecnu duginafi, odocob ija Anutna cisdoc cunug jahunec nijia eunu duginafi, odocob ija doc silecca cunug duginafi, odocob ija wawi meleec cunugca ija aluh maadecemin ono isec lecnu ihocfi, euqa nalug mec eu ijana qee nijinafi, ija tetec gauc himec.  
\v 3 Ija ijana ceteteh qaigca cunug dana agena coocooh ihoc qee eundec loo adiginafi, [ija deweniha ja cijigiannu ihanduginafi,]\f + \fr 13.3 \ft Grik jaqec je hilah leihna age but i [ ] gemo nijia eu je fil nijia, eu odi: ija culaigennu deweniha culigenfi\f* euqa nalug mec eu ijana qee nijinafi, ija ijana odoc eu cunugnu ameg me ocnu qee nijel.   
\p
\v 4 Dana nalug mena uqa mahuc gemag qee bena, uqa lalafadena, uqa qee gumunadena, uqa uqadodocnu qee culaena.  
\v 5 Dana nalug mena uqa qee deboena, uqa osonu je me qee qee madena, uqa ija didih ec qee madena, uqa dana sibeni qaheceb gemani qee bena, uqa deweg tudocobil hewihewi qee cobona.  
\v 6 Dana nalug mena uqa age silail mecebil waug qee ceelena. Euqa age mele je toodocobil waug ceelena.  
\v 7 Dana nalug mena uqa ceteh culdeceb qee cilehdona, uqa ceteh cunugnu waug meleena, uqa osona odoc me ibuldugiannu ameg mimi bilina, uqa ceteh culumen doc ben gahidona.   
\p
\v 8 Nalug mec uqana saen qee qee meiaun. Euqa je hahun madec eu jausigian. Beilamaga filfil madec eu qee migian. Doc silecca eu jausigian.  
\v 9 Ge, egena doc silecca eu naha himec, odocob egena je hahun madec eu naha himec.  
\v 10 Euqa saen oso hugian, saen euna ceteh cunug ihoc li hedugian. Odocob naha himec doc eu qee migian.  
\v 11 Ija mel sim bilec saen euna ija mel sim je madeginawe je madem. Saen euna ija mel sim cisdoginawe cisdom. Saen euna ija mel sim gesili feginawe gesili fem. Odocob ija dana ibuldumig ija mel bibili odoc eu culem.  
\v 12 Ge, ege qila Anutna ceteh camasac bahic qee foqona, eu odi ege wa dodna tuca foqonawe odi foqona. Euqa hibna ege Anut ola bahic feqan. Qila ija naha dih dugina. Odocob hibna ija Anutnu du cuhadugen eu odiwe uqa ijanu du cuhadon.  
\v 13 Qilaqa ceteh cijed nijia. Eu wawige meleecca, ceteh ege ocnu sumudi biluqunaca, nalug mecca. Euqa nalug mec eu meca bahic, eu ceteh cunug wooladena.   
\c 14  
\s1 Kis dumanige igec matu eu je hahun madecnu dumanige igec  
\p
\v 1 Age nalunuga mecnu kobol ocnu cabi oiga. Ageha Kis dumanaga adec cunug ocnu wawaga waseia. Euqa age Kis dumanaga adec matu age gisi cagu ocnu wawaga waseia, eu Anutna je hahun madecnu duman.  
\v 2 Ge, dana uqa beilah fil osona je madena eu dana oso uqana jenu waug qee fogo dol. Eunu uqa dana je qee maadena qa uqa Anut je madona. Uqa Kisna gagadic odocna ceteteh jahunec eunu madena.  
\v 3 Euqa dana uqa Anutna je hahun madena eu dana agena wawaga meleec gagadic mudecnuca, age kobol me odoqagannu tuliadecnuca, wawaga wahohogduadecnuca je maadena.  
\v 4 Dana uqa beilah fil osona je madena eu uqadodoc waug meleec gagadic mudecnu odona. Euqa dana uqa Anutna je hahun madena eu tamanec agena wawaga meleec gagadic mudecnu odona.  
\v 5 Ija age cunug beilamaga filfilna je madoqagannu gale tena qa age Anutna je hahun maadoqagannu gale ben tena. Dana oso uqa dana beilah filna je madena eundec falicdu sildi maadecnu bilecebfi, eunu tamanec dana cajaca age dumeig wawaga meleec gagadic mecnu, eu cois. Euqa beilah filna je falicdu sildi maadecnu dana qee bilecebfi dana uqa Anutna je hahun maadena eu uqa dana beilah filna je madena eu wooldona.  
\v 6 O cotiel, ija ageca limig beilami filna je maadifig ija adi cesuladigen? Ija cesuladecnu ifig ija je jahunec osofo, doc silecca osofo, je hahun madec osofo, je iwaladec osofo, eu Anut ihacten eundec ageca ehi limig je maadigen.   
\p
\v 7 Ceteh cebac qee bilina eu odi cololofo, gitafo eundec age cecewaug filfil camasac qee mudecebilfi dana age due silec adi doqagan?  
\v 8 Odocob taul qee eui cuhadocobfi in uqa han cadec saciadugian?  
\v 9 Ageha eu odi, age beilamaga filfilna je mamadebil agena je dana eunu qee docobilfi age je eu uqana gug adi fogo adigian? Agena je eu gauc fadaligian.  
\v 10 Eu mele, maha ina beilamaga filfil mati bahic agena je nijadena. Je oso gauc qee nijina. Je cunug agena gugca dih.  
\v 11 Euqa dana oso uqana je madeceb ija je uqana gug qee docominfi dana eu uqa ijanu cele dana ec cisdugian. Odocob ija uqanu cele dana ec cisdugen.  
\v 12 Ageha eu odi dih. Age Kis dumanaga adec ocnu gale ben adena. Eunu age dumanaga adec eu tamanec agena wawaga meleec gagadic mudecnu cabi gisi cacagu u cuhadoigale.   
\s1 Pol uqa beilamagana filfil je madec dumanaga adec eunu maden  
\p
\v 13 Eunu dana uqa je beilah filna madena eu uqa je falicdu sildi madecnu duman ocnu inondugian.  
\v 14 Ge, ija je beilami filna inondufig ija doloni inondona qa ijana cisdoc eu dana leih qee cesuladena.  
\v 15 Eunu ija adi odigen? Ija doloninaca ijana cisdocnaha inondugen. Ija doloninaca ijana cisdocnaha due siligen.  
\v 16 Qeefi, hina doloinna dih Anut hetaga dufeg, dana docca qee oso uqa cegulecna bilina eu uqa hina je madagana ec qee donafi, uqa adi hina hetaga docom mele igian?  
\v 17 Eu mele, hina Anut hetaga doc eu me bahic qa hinana je eu dana oso i uqana waug meleec gagadic muditocnu cesuldocca qee.  
\v 18 Ija beilami filfilna je madecnu kobol eu age cunug wooladigina eunu ija Anut hetaga dugina.  
\v 19 Euqa dana cajaca age cuha jona cuha fecnu cegulegina euna ija ijana cisdocna ija beilami filna je but 10,000 maadigen eu cesuladecwe qee eu qee gale tena. Odocob ija je but 5-pela madecemin dana cajaca age fogo adeceb iwaladigennu eu me bahic gale tena.   
\p
\v 20 Ija cotiel, age mel sim cinigwe agena cisdocna cain biluwain. Age qisol mec kobol euna age mel sim cinigwe bileigale. Euqa age agena cisdocna age dana ben cinigwe bileigale.  
\v 21 Age Anutna loo je eu odi jaqein:  
\q1 “Tibud maden, ‘Ija dana beilamaga filna age je madegina euna ijana dana cajaca je maadigen.  
\q1 Odocob ija cele dana fildec age conogana ijana dana cajaca je maadigen qa ijana dana cajaca ija qee dah mituwain,’ en,” ein. \rq (Aisaia 28.11-12)\rq*   
\p
\v 22 Eunu ege doqona, beilamaga filna je madecnu kobol eu dana Anutnu wawaga meleena agenu gaga qee nijel. Kobol eu dana age Anutnu wawaga qee meleena agenu gaga nijia. Euqa je hahun madecnu kobol eu dana age Anutnu wawaga qee meleena agenu qee nijel. Kobol eu dana Anutnu wawaga meleena agenu nijia.   
\p
\v 23 Eunu tamanec dana cajaca cunug osobenca cegulimeig age cunug beilamaga filfilna je madifeig, odocob dana docca qee leihfo, dana leih wawaga qee meleenafo age dunuh hufeig, eu mele ec age madoqagan, “Dana cajaca cunug eu age gad!” oqagan.  
\v 24 Euqa tamanec dana cajaca cunug age je hahun madifeig, odocob dana docca qee osofo, dana oso waug qee meleenafo uqa dunuh hufei, uqa agena je eu waugna leceb uqana silailnu dugian.  
\v 25 Uqana cisdoc jahunecna bilina eu camasac migian. Odimei uqa olana jogoimei Anutnu cuha figian. Odimei odi madigian, “Mele bahic, Anut uqa ene age gemona bilina!” igian.   
\s1 Cuha fecnu cabi cunug eu tutuc caligian  
\p
\v 26 Ija cotiel, ijana je uqana gug eu odi. Age cuha fecnu cegulegina saen euna oso uqa due silecca hona, oso uqa iwaladecnu jeca hona, oso Anut uqa je jahunec camasac muditon euca hona, oso uqa beilah filna madecnu jeca hona, oso uqa je falicdu sildiadecnu jeca hona. Ceteh cunug odoqagan eu Anutna dana cajaca agena wawaga meleec gagadic mecnu odoigale.  
\v 27 Leih age beilamaga filfilna je madecnufi lecisfo, cijedfo dih odi madoqagan. Euqa cijed cain wooladowain. Odocob age je osobenca cain madowain. Oso casac madeceb oso madigian. Odocob dana oso uqa je falicdu sildi maadigian.  
\v 28 Euqa dana oso uqa je falicdu sildiadecnuca qeefi dana beilah filna je madigian eu uqa cegulecna co cufa qugian. Odimei uqadodocnuca Anutnuca je madigian.  
\v 29-33 Anut uqa ege kobol ilagna bilecnu qee gale dona. Uqa kobol ilag ihulahaldoc dana qee. Uqa malol bilecnu gug. Eunu Anutna je hahun madec dana eu lecisfo, cijedfo odi je maadoqagan. Odocob dana cajaca leih age adi madegina eunu gesili foqagan. Odocob dana cegulecna bilina uqa Anut je oso madecnu camasac ihacdufei dana uqa casac je madeia eu uqa co cufa qugian. Ge, kobol ina age cunug Anutna je hahun osolosol maadoqagan. Eunu dana cunug age je eu doqagan. Odimeig cunug wawaga gagadic mudoqagan. Odocob dana Anutna je hahun madegina eu agedodoc conoga cofdoqagan. Odocob age agena saennana je madoqagan.  
\p Caja age Anutna qagu coboc dana cajaca agena cuha jona cunug tilii bilegina.  
\v 34 Eunu agena cegulecna caja age tilii biluqagan eu odiwe cuha jona cunug caja age tilii bilegina. Ge, age je madecnu ihoc qee, age dana bisalu biluqagan eu odiwe Mosesna loo je madena.  
\v 35 Eunu caja cuha jona je madena eu majanigeca. Age je osonu gug doqagannufi age agena jona gemugail sisiladoqagan.  
\v 36 Eu adi? Anutna jena gug eu Korin agenadecfo? Qeefi, Anutna je eu ageca dih len, odocob dana cajaca leih ageca qee lelfo?   
\p
\v 37 Dana oso uqa uqadodocnu uqa Anutna je hahun madec dana ec cisdonafi, odocob uqa uqadodocnu uqa Kisna cisdocca ec cisdonafi, uqa je i ija jaqiadigina eu Tibud uqana loo je ec doub.  
\v 38 Euqa dana oso uqa je i ija jaqiadigina eu Tibud uqana loo je ec qee docobfi ageha dana eu uqa Anutna je hahun madec dana ec cain owain.  
\v 39 Eunu, ija cotiel, age beilamaga filfilna je madecnu kobol eu cain cahacadowain. Odimeig age Anutna je hahun madecnu cabi gagadic oigale.  
\v 40 Odimeig age cabi cunug iwaldu cuhadumeig odocobil tutuc meia.   
\c 15  
\s1 Krais uqa cal mimei ceseli cajen  
\p
\v 1 Ija cotiel, qila ija agena cisdoc tulidocomin age me je ija wele qasali maadem eunu haun cisdoqagannu gale tena. Age me je eu oin euna tawegina.  
\v 2 Age me je ija qasali maadem eu gagadic hewifeig Anut uqa me je euna himec cahahaadigian, euqa age wawaga gauc mele qee elfi.   
\p
\v 3 Ge, me je ija wele om eu je mele bahic ija adem. Me je eu odi. Krais uqa egena silail cunug cagasigigiannu cal men, eu odiwe je eu Anutna jaqec jena nijia.  
\v 4 Odocob age heel cisecebil deel cijedna Anut tulidocob ceseli cajen, eu odiwe je eu Anutna jaqec jena nijia.  
\v 5 Odimei uqa Pita amegna camasac men. Odimei hibna uqana malogom 12-pela amagana camasac men.  
\v 6 Odimei hibna uqa wawige meleec cotigeil 500 wooldoc odi amagana osoben camasac men. Cotigeil leih age wele cal mein qa mati eu qila bilegina.  
\v 7 Odimei uqa Jems amegna camasac men. Odimei hibna uqa uqana aposel cunug amagana camasac men.   
\p
\v 8 Odimei cit qocna uqa ija mel sim au me qeewe basiten, ija aminaha camasac men.  
\v 9 Ija Anutna tamanec jabaadi tootooadem. Eunu ija Kraisna aposel gemona nag bahic. Dana age ija Kraisna aposel tecnu ihoc qee.  
\v 10 Euqa Anut uum itec iten. Odocob uqa uqana uum itecna oditeceb ija aposel calem eu odiwe qila biligina. Odocob uqana uum itec eu aig qon. Ija cabi gagadic bahic umig aposel cunug wooladem. Euqa eu ijadodoc qee cabi olom. Anut uum itec itimei ija cabi i ocnu gagadic odoc iten.  
\v 11 Euqa ija me je qasali maademfo, qee aposel leih age me je qasali maadeinfo eu odi fena. Ege cunug Kraisnu me je qasali madoqona. Ege qasali mamadoqon age wawaga meleen.   
\s1 Hibna dana cunug cal mein eu ceseli cajoqagan  
\p
\v 12 Aria, ege Krais cal meceb Anut tulidocob ceseli cajennu me je gaid qasali madoqona. Eunu adi age leih odi madegina, “Dana wele cal men eu uqa ceseli cajecwe qee,” egina?  
\v 13 Euqa dana age cal mein eu ceseli cajecwe qee eu melefi eunu ege madeqan, “Anut uqa Kraisha tulidocob ceseli qee cajel,” eqan.  
\v 14 Odocob Anut uqa Krais tulidocob ceseli qee cajel eu melefi eunu me je ege qasali madoqona eu ceteh gauc, odocob agena wawaga meleec euha ceteh gauc.  
\v 15 Euqa ege Anut uqa Krais tulidocob ceseli cajennu qasali madom. Odocob Anut uqa dana cal mein tuliadeceb ceseli qee cajegina eu melefi uqa Krais tulidocob ceseli qee cajel. Eunu ege Anut odonnu uhulec je madoqona.  
\v 16 Ge, Anut uqa dana cal mein eu tuliadeceb ceseli qee cajowain eu melefi eunu Anut uqa Krais tulidocob ceseli qee cajel.  
\v 17 Anut uqa Krais tulidocob ceseli qee cajel eu melefi agena wawaga meleec eu ceteh gauc, odocob agena silail gaid ageca fagaden bilia.  
\v 18 Odocob dana age wele Kraisnu wawaga meleeceb cal mein euha age wele fadalein.  
\v 19 Ege Kraisnu wawige meleeceb cebac bilec ocnu sumudi biluquna. Euqa ege cebac bilec qila maha ina bileqan ocnu himec sumudi biluqunafi ege am i walocca bahic. Odocob ege am walocca biluquna dana cunug mahana bilegina eu wooladoqona.   
\p
\v 20 Euqa Anut uqa mele bahic Krais tulidocob cal mecnadec ceseli cajen. Uqa dana cal mein eundec agena matu ibuldon, eu odi aqunec sab cajena cinigwe.  
\v 21 Ge, cal mec eu dana osol odocna cali hon, eunu eu odiwe cal mecnadec ceseli cajec euha dana osol odocna cali hon.  
\v 22 Ge, dana cajaca cunug age Adamca gabandoc bilegina euna cal megina. Eunu eu odiwe dana cajaca cunug age Kraisca gabandoc bilegina euna cebac bilec oqagan.  
\v 23 Euqa dana cunug osolosol agena saennana ceseli cajoqagan. Krais uqa casac matu ceseli cajen. Odocob uqa ceseli hugian saen euna Krais uqana eundec ceseli cajimeig cebac bilec oqagan.   
\p
\v 24 Odocob cit qoc deel hugian. Saen euna Krais uqa gabman cabi cunugca, ensel cunug age ilo bileginaca, ensel cunug age gagadic odocca, eu cunug qee madigian. Eu hedocob uqa Anutna cul eu Memige Anut ebenna migian.  
\v 25 Ge, Krais uqa cofadec dana bibileb lili Anut uqa uqana cad cunug cilehaadi jaih bisalu madigian.  
\v 26 Uqa cad cunug fadaladi hedumei cit qocna cal mecha fadaldugian.  
\v 27 Anutna jaqec je eu odi madena:  
\q1 “Anut ceteh cunug uqa jaih bisalu meceb agena ilo bilen,” ena. \rq (Buk Song 8.6)\rq*  
\m Anut uqa ceteh cunug eu Krais bisalu men. Euqa ege doqona, “ceteh cunug” eu Anut uqadodoc eu age gami Krais bisalu qee mel.  
\v 28 Anut uqa casac ceteh cunug Melah bisalu men. Odocob hibna ceteh cunug Krais bisalu biluqagan saen euna Melah uqadodoc Anut bisalu biligian. Euqa Melah uqadodoc Anut bisalu biligian saen euna Anut uqa ceteh cunugnu ilo bahic biligian.   
\p
\v 29 Aria, eetanu dana leih age cal mec dana cesuladoqagannu wa joc ogina? Dana cal mein eu age ceseli qee cajecebilfi dana leih age adi cal mec dana cesuladoqagannu wa joc ogina?  
\v 30 Odocob ege aposelha adi? Dana mati bahic ege me je cabi oqonanu gemanaga bena. Odocob age gaidgaid qigecnu gale adena. Dana cal mein eu age ceseli qee cajecebilfi eetanu ege dana cajaca dana cal mein eu age ceseli cajoqagannu je mamadi coboqona?  
\v 31 Ija cotiel, ija deel cunug cal mec gulucdugina! Ija je mele maadigina, ege cunug Krais Jisas egena Tibudca gabangec biluquna eunu ija agenu culaigina.  
\v 32 Age ija dana himec ijana cisdoc toodumig cabi i om ec cisdoginafi eu cabi i adi cesultena? Ija Efesas ene dool cus gami cadomfi\f + \fr 15.32 \ft Dana leih age Pol uqa dool cus bahicnu maden ec cisdogina. Rom age dana oso uqa kobol me qee odon eunu doqagannu gale aden saen osona age dana eu odudecebil uqa dool cus eu laion odi gami cadesin. Euqa dana mati age Pol uqa dool cus bahicnu qee madel ec cisdogina. Age uqana cadnu galolo je maden ec cisdogina.\f* euna ija cel ceteh me oso om? Dana cal mein eu age ceseli qee cajowainfi eunu age madegina:  
\q1 “Uqadec ege cal meqan.  
\q2 Eunu ege sab jimeb ceu jocomun dalul qigeceb ceeloqale,” egina eu odi toodu odoqale eu me bahic. \rq (Aisaia 22.13)\rq*   
\p
\v 33 Dana age madegina, “Ege dana me qee gami osoben cobifeb age egena kobol me eu me qee mudiguqagan,” egina\f + \fr 15.33 \ft Je i Grik agena galolo je dana oso, ijan Menanda, uqa jaqen.\f* ec age dogina. Gadgad dana age qauadowain.  
\v 34 Age leih age Anutnu qee doc nijia. Ija je i age majanaga hewadecnu maadigina. Age haun silail cain mowain. Age gad kobol culimeig tutuc cisdoiga.   
\s1 Deweg ceseli cajec eu fil bahic  
\p
\v 35 Euqa dana oso madigian, “Dana cal mein eu adi tuliadeceb ceseli cajoqagan? Age cel dewenegaca ceseli cajoqagan?” igian.  
\v 36 Hina dana gad! Hina aig mahana cehagana eu qee cebac mena qa casac huluigian.  
\v 37 Odocob isi deweg haun migian eu qee cehagana. Hina wit aigfo, aig fil osofo cehaganafi hina cabina goman isi wasigian eu qee cehagana qa aig himec cehagana.  
\v 38 Euqa Anut uqadodoc cisdocna aig osolosol qala qahecca goman dewegca filfil adena.  
\v 39 Dewenegaha ihocihoc qee oloin. Dana deweg fil nijia, odocob dool cusca mananca deweg uqa fil oin cobogina, odocob man fululec deweg uqa fil oin cobogina, odocob dool wanadec deweg uqa fil oin cobogina.  
\v 40 Anut ifanimei mahana isec maden eu fil foqona. Uqa ceteteh fil ifanimei sao ohisna isec maden eu fil foqona. Ohis nijadegina eu dooadec fil, mahana nijadegina eu dooadec fil.  
\v 41 Cam eu iletec fil, jagel eu iletec fil, malaqa eu iletec fil. Odocob malaqa oso iletec eu malaqa oso iletec wooldona.   
\p
\v 42 Dana cal mecnadec ceseli cajoqagan saen euna euha odi camasac migian. Ceteh cehegina eu moligiannu nijia. Ceteh ceseli cajigian eu geg.  
\v 43 Deweg heel cisegina saen euna deweg eu fecnu galeca qee. Deweg ceseli cajigian saen euna eu kobolkobolca. Deweg heel cisegina saen euna eu lasdocca. Deweg ceseli cajigian saen euna eu gagadic odocca.  
\v 44 Deweg heel cisegina saen euna eu maha deweg. Deweg ceseli cajigian saen euna eu kis deweg.  
\p Ge, maha deweg nijia ec doqona, eunu kis deweg nijia echa doqona.  
\v 45 Anutna jaqec je eu odi madena:  
\q1 “Dana matu Adam uqa dolog umei cebac men,” ena. \rq (Jenesis 2.7)\rq*  
\m Adam cit qoc uqa kis, uqa cebac bilec igina.\f + \fr 15.45 \ft Adam cit qoc uqa Krais. Age 15.21-22ca Rom 5.14-19ca feiga.\f*  
\v 46 Euqa kis deweg eu matu qee. Maha deweg eu matu. Ege casac maha deweg umeb isi kis deweg oqan.  
\v 47 Dana matu eu Anut maha umei muden. Eunu uqa mahanadec. Dana lecisdoc eu uqana gug sao jobonnadec.  
\v 48 Dana mahanadec cunug age mahanadec eu odiwe dana matu uqa mahanadec. Dana sao jobonnadec cunug age sao jobonnadec eu odiwe dana lecisdoc uqa sao jobonnadec.  
\v 49 Ege dana mahanadec i ihicon qoc om coboqonawe, odiha ege dana sao jobonnadec i ihicon qoc umeb cobeqan.   
\p
\v 50 O cotiel, ija age mele maadigina, dana maha inadec uqa Anutna cul eu muguh ocwe qee. Odocob ceteh qee mena eu ceteh qee qee meiaun eu muguh ocwe qee.  
\v 51 Dah meiga! Ija je oso jahunec nijia eu qila maadigina. Ege cunug qee cal moqaun qa ege cunug ibuldoqan.  
\v 52 Eu mahuc bahic amesige qumeb mecioqonawe, taul eueceb ege ibuldoqan. Ge, taul jejeg cobigian, odocob mahucwe cal mein eundec age cebac bilec catanec oqagannu ceseli cajoqagan, odocob ege ibuldoqan.  
\v 53 Ge, dewenige calua i lotoc u tacoqonawe dewenige cebac bilec catanec u tacigian. Dewenige cal mec i dewenige qee cal mec eu u tacigian.  
\v 54 Eunu dewenige calua i dewenige cebac bilec catanec u tacigian saenna, dewenige cal mec i dewenige qee cal mec eu u tacigian saen euna Anutna jaqec jena je oso ihoc ligian. Je eu odi madena:  
\q1 “Krais uqa cal mec wooldoia.  
\q2 Cal mec eu fadaleia,” ena. \rq (Aisaia 25.8)\rq*   
\q1
\v 55 “O cal mec, hinana gagadic odoc dana cajaca cilehadecnu eu ai?  
\q1 O cal mec, hinana jal aig dana cajaca aqeceb fadalecnu eu ai?” ena. \rq (Hosea 13.14)\rq*   
\p
\v 56 Cal mec uqana jal aig eu silail. Odocob loo je eu silail gagadic odoc utina.  
\v 57 Euqa egena Tibud Jisas Krais cesulgeceb ege cal mec wooldoqona eu Anut igina. Eunu ege Anut hegaga doqona.   
\p
\v 58 Eunu ija cotiel, ija agenu nalunuga migina. Age gagadic mimi duuec taweigale. Age Tibudna cabi ocobil hunawigiannu. Ge, age dogina, Tibud ageca bibileb cabi ocna uenega gauc qee seildowain, cabi ihoc ligian.   
\c 16  
\s1 Dana cajaca age Jerusalem tamanec cesuladecnu meen qaig leih suldoqagannu gale aden eunu Pol maden  
\p
\v 1 Qila ija meen qaig age Anutna dana cajaca qagoc Jerusalem ono bilegina cesuladecnu gabandumeig suldoqagannu gale adena eunu maadigen. Ija tamanec Galesia hatuna bilegina eu age cabi i adi oqagannu maadem. Korin ageha eu odi odoiga.  
\v 2 Cuha deel cunugnana age cunug abesabes cuha osona qaig oin eunu cisdoiga. Odimeig qaig naha culimeig naha agedodoc agena jonana mi cuhadoiga. Eunu qaig eu hunawoqagan. Odocob ija isi calecemin age qaig walecnu cabi qee owain.  
\v 3 Hibna ija humig ija dana leih agedodoc nesiladein eu jaqec je adimig suladecemin agena bagol adec i Jerusalem ono hewi beloqagan.  
\v 4 Ija cisdu fimig eu ijaha nuigen ifig age ijaca osoben beleqan.   
\s1 Pol uqa cocobi Korin tamanec feciadigiannu cisdon  
\p
\v 5 Ija Masedonia gemogemo cobigen ec cisdugina. Eunu ija casac Masedonia gemogemo odi cocobi nui ageca caligen.  
\v 6 Ija acahna ageca nag odi bileqanfa, ija qee dugina. Acahna ija age gami bibilomun li duan saen qee migia. Odocob hibna ija jobon osona nuigen. Odocob age ija anaana nuecnu jicna ehi li mituqagan.  
\v 7 Tibud uqa odi madifei ija saen nag cecelacca age gami bileqan ec cisdugina. Eunu age dogina, qila ija mecii himec adimig mahuc odi nuecnu qee gale tel.  
\v 8-9 Odocob ijana cad matiha bilegina. Euqa jic cebec ijanu wele hudec taweia. Odocob ija cabi benca aig mati qugiannu ihoc. Eunu ija Efesas ene bibilemin li Pentikos saen caligian.\f + \fr 16.8-9 \ft Pentikos uqana gugnu age je Aposel 2.1 euna nijia eu feiga.\f*   
\p
\v 10 Timoti uqa Tibudnu cabi ona eu odi ija cabi uginawe. Eunu uqa agena jicna hufei age feele docobil age gemona biligiannu cisdoiga.  
\v 11 Odocob age uqa dana gauc dih imeig cain hibemdowain.\f + \fr 16.11 \ft Timoti uqa dana haun. Odocob gug eunu dana leih age uqa hibemdoin. Age 1 Timoti 4.12 feiga.\f* Ija uqa wawige meleec cotigeil leihca age ijaca ceseli hoqagannu sumadigina. Eunu age cesuldocobil uqa uqana jicna malolca nuigiannu odoigale. Odocob uqa ijaca mahucwe haun ceseli hugian.   
\p
\v 12 Ege wawige meleec cotige Apolosnu, ija uqa wawige meleec cotigeil leih gami ageca loqagannu geh tulidom qa qila uqa lecnu qee gale dol. Hibna uqadodoc lecnu saen me bahic tebandufei uqa ligian.   
\s1 Cit qoc je  
\p
\v 13 Age mecii cuhadumeig wawaga meleecnu gagadic taweigale. Age dana bahic taweiga. Odimeig duuec taweiga.  
\v 14 Age cabi cunug oso nalunuga mecca cabi oigale.   
\p
\v 15 Ija cotiel, age Stefanas uqana sihul age casac Kristen calein eu age dana cajaca Akaia hatunna bilegina eu cunug aquniadi Kristen calein ec dogina. Odocob Stefanasna sihul agena gale adecna Anutna qagoc dana cajaca cesuladecnu cabi oin. Ija Korin niniadigina,  
\v 16 age dana i edec bisalu bileigale. Odocob age dana cunug age Anutna dana cajaca cesuladeginaca, age cabi inu gagadic meginaca eundec bisalu bileigale.   
\p
\v 17 Age cunug ene humeig fecitecnu ihoc qee.\f + \fr 16.17 \ft Cudun ina Grik je uqana gug eu camasac bahic qee. Grik je bahic eu odi madena: Ceteh age qee itelein eu dana i age itein.\f* Eunu ija Stefanasca, Fotjunetasca, Akaikasca, age ijaca hoinnu ceeligina.  
\v 18 Age ija wawi walasa dutein eu odiwe age ageha wawaga walasa duadein. Age dana i edec eu age binanaga suleigale.   
\p
\v 19 Esia hatunanadec tamanec agena feele adec Korin sulduadegina. Akwila Priskaca, tamanec age gami alena jona ceguleginaca agena feele adec mati bahic Tibud ijanna sulduadegina.  
\v 20 Wawige meleec cotigeil ene cunug feele adec sulduadegina. Age Anutna dana cajaca osolosol cunug cotogail cotec gunna cotdocobdocobeigale.   
\p
\v 21 Ija Pol ijadodoc ebenina feele adec jaqigina.\f + \fr 16.21 \ft Pol uqadodoc uqana je qee jaqoloi. Uqa je mamaden dana oso jaqoloi. Euqa je but ina nijia Pol uqa ebengulna jaqen.\f*   
\p
\v 22 Dana oso Tibudnu nalug qee menafi Anut uqa dana eu geuldeiale! Egena Tibud hoiale!   
\p
\v 23 Jisas Tibud uqana eelgec uum igec ageca biliale.  
\v 24 Ija Jisas Kraisca gabandocna ijana nalunuga mec eu age cunugca biliale.