\id COL - Achi’, Rabinal (new orthography) NT - 2009 (DBL 2013) 
\h Colosenses 
\toc1 Ri carta xutzꞌibꞌaj ri Pablo che riglesia kꞌo Colosas 
\toc2 Colosenses 
\toc3 Col 
\mt1 Ri carta xutzꞌibꞌaj ri Pablo che riglesia kꞌo Colosas  
\c 1  
\s1 Ri Pablo kuya pan rutzil kiwach ri hermanos e kꞌo Colosas  
\p
\v 1 Riꞌin in Pablo in taqoꞌn re ri Qanimajawal Jesucristo; e ri Dios intaqayom re ma e xraj riꞌ chwe. Junam rukꞌ ri hermano Timoteo,  
\v 2 kaqataq bꞌi wa carta che alaq ri kꞌo alaq pa ri tinamit Colosas, ri kꞌo alaq puqꞌabꞌ ri Cristo y tikil alaq chi utz chupa rubꞌiꞌ. Kꞌulu kꞌu alaq ri unimal rutzil kꞌuꞌxaj y ri utzil chomal re ri Qaqaw Dios y re ri Qanimajawal Jesucristo.   
\s1 Ri Pablo kuꞌan orar pakiwi ri hermanos e kꞌo Colosas  
\p
\v 3 Echiriꞌ kaqaꞌan orar pawiꞌ alaq, xaqi kojtioxin kꞌu chwach ri Dios, Ruqaw ri Qanimajawal Jesucristo.  
\v 4 Ma riꞌoj qatom puwi ri kubꞌulibꞌal kꞌuꞌx alaq rukꞌ ri Qanimajawal Jesucristo y puwi ri rutzil kꞌuꞌx alaq kukꞌ konoje ri kikojom rubꞌiꞌ.  
\v 5 Jekꞌulaꞌ ꞌanom alaq ma ralaq e kubꞌam pan kꞌuꞌx alaq che ukꞌulik ri ukꞌolom ri Dios che alaq chilaꞌ chikaj; yey waꞌ etaꞌam alaq ruma ri saqil Utzilaj Tzij tom chi alaq.  
\v 6 Ekꞌu waꞌ wa Utzilaj Tzij xtzijox che alaq, e katajin utzijoxik che ronoje ruwachulew. Yey kꞌiyarinaq kiwach ri kekojow re y lik kꞌo kutiqoj che ri kibꞌinik kisilabꞌik taq ri tikawex. Y jelaꞌ uꞌanom chixoꞌlibꞌal ralaq chwi lo echiriꞌ xta alaq puwi ri unimal rutzil ukꞌuꞌx ri Dios y xkꞌul alaq waꞌ paqatzij wi.  
\v 7 Jelaꞌ rutzijoxik xuꞌan ri Epafras che alaq. Rire e jun qachbꞌiꞌil na loqꞌ ta kꞌax kanaꞌw re yey e jun utzilaj aj chak re ri Cristo kꞌo chiwach alaq.  
\v 8 Rire utzijom chiqe puwi ri rutzil kꞌuꞌx alaq, ri uyaꞌom ri Ruxlabꞌixel ri Dios pa animaꞌ alaq.   
\p
\v 9 Ekꞌu uwariꞌche, chwi lo echiriꞌ xqata waꞌ, e laꞌ na oj uxlaninaq ta che kaqaꞌan orar pawiꞌ alaq chaꞌ ri Dios kuqꞌalajisaj che alaq janipa ri karaj Rire kaꞌan alaq y chaꞌ kamaj alaq usukꞌ ronoje taq ri saqil naꞌoj petinaq rukꞌ ri Ruxlabꞌixel.  
\v 10 Y jekꞌulaꞌ kabꞌin alaq jusukꞌ pachaꞌ ri taqal chike ri e ralkꞌoꞌal ri Dios y kaꞌan kꞌu alaq janipa ri karaj ri Dios chaꞌ kꞌo kutiqoj ri utzilaj chak kaꞌan alaq y jelaꞌ kakꞌojiꞌ más naꞌoj alaq che retaꞌmaxik uwach ri Dios.  
\v 11 Kaqatzꞌonoj kꞌu che ri Dios chuyaꞌa chuqꞌabꞌ alaq e chirij runimal uchuqꞌabꞌ Rire chaꞌ kachꞌij alaq uchuqꞌabꞌ ri kikꞌowibꞌej alaq rukꞌ unimal kꞌuꞌxaj y chaꞌ rukꞌ unimal kiꞌkotemal  
\v 12 katioxin kꞌu alaq chwach ri Qaqaw, ma e Rire xꞌanaw chiqe riꞌoj utz kaqakꞌul janipa rubꞌiꞌtisim chike rutinamit e kꞌo pa ri Qꞌijsaq.  
\v 13 Ri Dios xojresaj chupa ruchuqꞌabꞌ ri qꞌequꞌmalil y xojuqꞌatisaj chupa rutaqanik Rukꞌajol, ri lik kꞌax kunaꞌo.  
\v 14 Rukꞌ kꞌu riꞌ ri Cristo kꞌo qakolobꞌetajik y kꞌo kuybꞌal qamak ruma rukikꞌel xturuwik.   
\s1 Ruma ri Cristo kojkꞌojiꞌ chi utzil chomal chwach ri Dios  
\p
\v 15 Tobꞌ na jinta junoq iliyom uwach ri Dios, pero ri Cristo e kakꞌutubꞌen uwach. Yey ri Cristo xex chi kꞌo wi echiriꞌ xwinaqir ronoje ri kꞌo che ruwachulew.  
\v 16 Ruma kꞌu ri Cristo, ri Dios xuꞌan ronoje taq ri kꞌolik: taq ri e kꞌo chilaꞌ chikaj y ri e kꞌo che ruwachulew, taq ri kilitaj uwach y ri na kilitaj ta uwach; ri e taqanelabꞌ y ri e aj qꞌatal tzij, tobꞌ ne ri ángeles, ri kꞌo kiwach y ri kꞌo kichuqꞌabꞌ. Ronoje taq kꞌu riꞌ ri kꞌolik, xꞌan ruma ri Cristo yey e re yakbꞌal uqꞌij Rire.   
\p
\v 17 Ri Cristo xex chi kꞌo wi chwa ronoje taq ri kꞌolik y Rire e chapayom re ronoje taq waꞌ.  
\v 18 Ri Cristo e ujolom riglesia. E Rire ri nabꞌe che ronoje taq ri kꞌolik y ri nabꞌe xkꞌastaj lo chikixoꞌl ri ekaminaq, chaꞌ e Rire ri lik kꞌo uwach chwa taq ronoje ri kꞌolik.  
\v 19 Ma lik e xukꞌul ukꞌuꞌx riꞌ ri Dios ri kakꞌojiꞌ ronoje rukꞌuꞌxibꞌal Rire rukꞌ ri Cristo.  
\v 20 Ruma kꞌu ri Cristo, ri Dios xuꞌano chaꞌ ronoje taq ri kꞌolik kakꞌojiꞌ tanchi puqꞌabꞌ Rire, waꞌ e taq ri kꞌo che ruwachulew y taq ri kꞌo chilaꞌ chikaj, y jekꞌulaꞌ konoje kekꞌojiꞌ chi utzil chomal chwach Rire ruma rukikꞌel ri Cristo xturuw chwa ri cruz.   
\p
\v 21 Ekꞌu ralaq rojertan na alaq ta utinamit ri Dios y alaq ne aj retzelal kꞌuꞌx chirij ri Dios ruma na chom ta ri naꞌoj alaq y ruma taq ri na utz taj xꞌan alaq. Noꞌj woꞌora ri Dios uyaꞌom alaq chi utzil chomal chwach Rire.  
\v 22 Xuꞌan kꞌu waꞌ ruma rukamik ri Cristo chaꞌ jelaꞌ kuꞌana alaq jusukꞌ, na jinta kꞌana mak alaq y na jinta katzꞌaqaw chiꞌ alaq chwach Rire.  
\v 23 Ruma waꞌ lik chirajawaxik wi kachuqꞌubꞌej ibꞌ alaq y katikiꞌ alaq chi utz chupa ri kubꞌulibꞌal kꞌuꞌx alaq rukꞌ ri Dios. Yey moqꞌotaj kꞌu alaq royꞌexik ri kubꞌam pan kꞌuꞌx alaq che, waꞌ e janipa ri bꞌiꞌtisim chupa ri Utzilaj Tzij tom chi alaq. Waꞌ wa Utzilaj Tzij e ri katajin utzijoxik pa taq ronoje luwar che ruwachulew. Yey riꞌin Pablo, yaꞌtal chwe kantzijoj waꞌ.   
\s1 Ruchak ri Pablo pa taq ri tinamit che ruwachulew  
\p
\v 24 Ekꞌu riꞌin woꞌora lik kinkiꞌkot che taq ri kꞌaxkꞌobꞌik kantijo we rukꞌ waꞌ kantoꞌ alaq. Jekꞌulaꞌ e kantzꞌaqatisaj chwi ri nucuerpo janipa ri kꞌaxkꞌolil yaꞌtal chwe ruma in re ri Cristo, yey wa kankꞌulumaj e toꞌbꞌal che riglesia, rucuerpo Rire.  
\v 25 Xinuꞌan jun aj chak re Rire chaꞌ kantoꞌ riglesia, ma e ri Dios uyaꞌom chwe kantzijoj pa tzꞌaqat wi ri Utzilaj Tzij chiwach ralaq ri na alaq ta aj judiꞌabꞌ.  
\v 26 Lik ojertan lo riꞌ na qꞌalajisam ta waꞌ chikiwach ri tikawex, noꞌj kꞌu woꞌora ri Dios e xuqꞌalajisaj waꞌ chike ri e re Rire.  
\v 27 Chike kꞌu rike, ri Dios lik xraj kuqꞌalajisaj ri unimal chomalil uchꞌobꞌom loq kuya chike taq ri tinamit na e ta aj judiꞌabꞌ; waꞌ e ri kajeqiꞌ ri Cristo pa animaꞌ ralaq, y ruma kꞌu riꞌ lik kubꞌam kꞌuꞌx alaq che ukꞌulik ri chomilaj kꞌaslemal chilaꞌ chikaj.   
\p
\v 28 Ekꞌu riꞌoj e kaqatzijoj rubꞌiꞌ ri Cristo pa taq kojꞌek wi. Kebꞌeqapixabꞌaj konoje ri tikawex y kojkꞌutun chikiwach rukꞌ saqil naꞌoj, chaꞌ kebꞌeqaya ri e re ri Cristo chwach ri Dios rukꞌ jun jusukꞌ kibꞌinik kisilabꞌik.  
\v 29 Lik kꞌu kantij uqꞌij che uꞌanik waꞌ rukꞌ ronoje nukꞌuꞌx, yey ronoje ri kanꞌano e ruma runimal uchuqꞌabꞌ ri Cristo kꞌo wukꞌ.   
\c 2  
\p
\v 1 Kuaj kꞌut ketaꞌmaj alaq, e riꞌin lik kanya wibꞌ che toꞌik alaq, junam kukꞌ ri e kꞌo Laodicea y ri jujun chik kꞌamajaꞌ kaketaꞌmaj nuwach riꞌin,  
\v 2 chaꞌ kanimarisax kikꞌuꞌx konoje ri kikojom rubꞌiꞌ ri Cristo, kuꞌana xa jun ri rutzil kikꞌuꞌx chikiwach y keꞌkimaja usukꞌ chi utz ronoje ri saqil naꞌoj qꞌalajisam chi lo ruma ri Qaqaw Dios y ruma ri Cristo.  
\v 3 Ma rukꞌ ri Cristo kꞌo wi ronoje rukꞌuꞌxibꞌal ri naꞌoj y ri kajawax umajik.   
\p
\v 4 Kambꞌiꞌij kꞌu waꞌ che alaq chaꞌ na jinta junoq kachꞌakachꞌoꞌn e alaq rukꞌ chꞌaꞌtem lik chakojoꞌ katatajik yey na qatzij taj.  
\v 5 Ma tobꞌ riꞌin na in jinta ukꞌ alaq chiwachil, pero pa wanimaꞌ e kannaꞌ riꞌin pachaꞌ in kꞌo ukꞌ alaq. Lik kinkiꞌkotik ma kanwilo junam kachakun alaq yey lik tikil alaq chi utz che ri kubꞌulibꞌal kꞌuꞌx alaq rukꞌ ri Cristo.   
\p
\v 6 Ralaq xkoj alaq rubꞌiꞌ ri Qanimajawal Jesucristo y xya ibꞌ alaq puqꞌabꞌ; ekꞌu uwariꞌche bꞌina alaq jelaꞌ pachaꞌ ri taqal che junoq ukojom rubꞌiꞌ Rire.  
\v 7 Tikibꞌaꞌ kꞌu ibꞌ alaq chi utz rukꞌ ri Cristo y jikibꞌaꞌ ri kubꞌulibꞌal kꞌuꞌx alaq rukꞌ Rire chaꞌ jelaꞌ kꞌo kꞌiyibꞌal alaq chwach Rire; e ꞌana alaq jelaꞌ pachaꞌ ri xkꞌut che alaq yey xaqi tioxin alaq chwach ri Dios.   
\s1 Ri kꞌakꞌ bꞌinik taqal chike ri e re ri Cristo  
\p
\v 8 Lik chajij kꞌu ibꞌ alaq chaꞌ na kasokotaj ta alaq rukꞌ taq naꞌoj na jinta uchak, ri xa noꞌjibꞌal ke ri tikawex re ruwachulew y na e ta kꞌu chirij runaꞌoj ri Cristo.  
\v 9 Ma ronoje rukꞌuꞌxibꞌal ri Dios kꞌo rukꞌ ri Cristo, y waꞌ lik xqꞌalajin che rubꞌinik usilabꞌik echiriꞌ xuꞌan tikawex che ruwachulew.  
\v 10 Ruma kꞌu waꞌ, yaꞌtal che alaq ronoje ri kajawax che ri bꞌinik silabꞌik alaq ma kꞌo alaq puqꞌabꞌ ri Cristo, ri kataqan pakiwi konoje ri kꞌo kiwach y ri kꞌo kichuqꞌabꞌ.  
\v 11 Ruma kꞌu kꞌo alaq puqꞌabꞌ ri Cristo, kꞌo chi ri retalil re circuncisión che ri animaꞌ alaq, tobꞌ waꞌ wa circuncisión na e ta ri kakoj xa ruma juna achi; ma ri keꞌelawi e ri Cristo xresaj alaq puqꞌabꞌ taq ri rayibꞌal re ri tiꞌjil alaq.  
\v 12 Ekꞌuchiriꞌ xkꞌul alaq ri bautismo, e pachaꞌ xmuq alaq junam rukꞌ ri Qanimajawal Jesucristo yey xkꞌastaj lo alaq junam rukꞌ Rire; ma xkoj alaq ri Dios rukꞌ ruchuqꞌabꞌ xukꞌastajisaj lo ri Cristo chikixoꞌl ri ekaminaq.  
\v 13 Ma ralaq rojertan kaminaq alaq pa mak yey na kojotal tane ri retalil re circuncisión che alaq.\f + \fr 2:13 \ft Ri e kꞌo Colosas na kojotal ta ri retalil re circuncisión chike ruma na e ta aj judiꞌabꞌ.\f* Noꞌj kꞌu woꞌora ri Dios xuya kꞌakꞌ kꞌaslemal alaq junam rukꞌ ri Cristo y xukuy ronoje ri mak alaq;  
\v 14 xresaj kꞌu ri qꞌatbꞌal tzij uqꞌatom chi paqawiꞌ ruma ri qamak\f + \fr 2:14 \ft Pa ri chꞌaꞌtem griego kubꞌiꞌij: “Ri Dios xusach uwach ri wuj pa tzꞌibꞌital wi saꞌ taq ri qamak”.\f* y xusach uwach waꞌ ruma rukamik ri Cristo chwa ri cruz.  
\v 15 Ruma kꞌu rukamik ri Cristo, ri Dios xuchꞌij kichuqꞌabꞌ taq ri itzel uxlabꞌixel lik kꞌo kiwach y kꞌo kichuqꞌabꞌ, xukꞌaq bꞌi kiqꞌij y xuqꞌalajisaj kꞌut Rire e más kꞌo uchuqꞌabꞌ chikiwa rike.   
\s1 Qatzukuj taq ri kꞌo chilaꞌ chikaj  
\p
\v 16 E uwariꞌche makꞌo machꞌaꞌtibꞌen e alaq xa ruma ri katij alaq o ri kaqum alaq, o ruma ri kaꞌan alaq chupa taq nimaqꞌij, chupa ri jeqebꞌal re taq ri ikꞌ o taq ri qꞌij re uxlanibꞌal.  
\v 17 Ma ronoje ne waꞌ xa e ilibꞌal pan re ri katajin loq; noꞌj ri Jun kukꞌutubꞌej uwach pa saqil wi, e ri Cristo.\f + \fr 2:17 \ft Ri Tzij Pixabꞌ xuya ri Dios chike rutinamit echiriꞌ kꞌamajaꞌ kalax ri Cristo, e kukꞌutubꞌej pan rukꞌunik Rire.\f*  
\v 18 Chajij ibꞌ alaq ma kꞌaxtaj ruma junoq na kakꞌul ta alaq ri karaj kuya ri Dios che alaq chilaꞌ chikaj. Maꞌan kꞌu e alaq kukꞌ ri kakiloqꞌnimaj kiqꞌij taq ri ángeles. Ma ri kebꞌanaw waꞌ e lik keꞌek kinaꞌoj puwi ri na kakimaj ta usukꞌ. Lik chakojoꞌ kiꞌanom chꞌutiꞌn che kibꞌ, pero kakiꞌan kꞌu nim che kibꞌ ruma noꞌjibꞌal xa e rike enoꞌjiyom re.  
\v 19 Rike na kakaj ta kꞌu kakitaqej ri Cristo. Rire e ujolom riglesia y riglesia e ucuerpo. Ri Cristo e ꞌanayom xa jun chike konoje ri e kꞌo puqꞌabꞌ jelaꞌ pachaꞌ taq ri ubꞌaqil juna cuerpo uchapom ribꞌ rukꞌ taq rigonsiyil y ribꞌochꞌil. Yey e ri Cristo ri kuya che ru iglesia ronoje ri kajawax che chaꞌ utz kakꞌiy rukꞌ ri kꞌiyibꞌal kuya ri Dios.   
\p
\v 20 Ma we ralaq xkam alaq rukꞌ ri Cristo,\x * \xo 2:20 \xt Col. 2:12; Ro. 6:6-11; Gl. 2:19\x* waꞌ keꞌelawi na jinta chi alaq chuxeꞌ ri taqanik xa noꞌjital che ruwachulew. Kantzꞌonoj kꞌu che alaq: ¿Chaꞌtaj kꞌa kabꞌin alaq pachaꞌ kebꞌin ri e re ruwachulew y kaya kꞌu ibꞌ alaq puqꞌabꞌ ri taqanik jewaꞌ kubꞌiꞌij:  
\v 21 «Machapabꞌej ne waꞌ, matij nenareꞌ y machap ne kꞌenoq»?  
\v 22 Ronoje waꞌ wa taqanik xa kinoꞌjibꞌal achijabꞌ y e puwi taq ri na kakowin taj, ri xa kakꞌisik.  
\v 23 Waꞌ wa kꞌutunik lik chakojoꞌ e saqil naꞌoj. Yey ri kakitaqej taq wa kꞌutunik e pachaꞌ lik kakiloqꞌnimaj uqꞌij ri Dios rukꞌ waꞌ, pero ri kakiꞌano xa kukꞌ rike kanoꞌjitaj wi. Kakiꞌan pachaꞌ chꞌutiꞌn che kibꞌ ma kakiya pa kꞌaxkꞌobꞌik ri kicuerpos; pero ronoje taq waꞌ na jinta kutiqoj re kuqꞌatej taq ri rayibꞌal re ri kitiꞌjil ri tikawex.   
\c 3  
\p
\v 1 We kꞌastajinaq chi alaq junam rukꞌ ri Cristo, e tzukuj alaq janipa ri kape chilaꞌ chikaj pa tzꞌul wi ri Cristo puwikiqꞌabꞌ ri Dios.  
\v 2 E lik taqej alaq janipa ri re chilaꞌ chikaj y mataqej kꞌu alaq taq ri xa re ruwachulew.  
\v 3 Ma e ralaq kaminaq chi alaq chwa taq ri xa re ruwachulew; ekꞌu woꞌora ri kꞌaslemal alaq puqꞌabꞌ ri Cristo kꞌo wi yey Rire rukꞌ ri Dios kꞌo wi.  
\v 4 E ri Cristo ri uyaꞌom kꞌaslemal alaq. Yey echiriꞌ Rire kakꞌun tanchik, junam rukꞌ Rire kaqꞌalajisax wach alaq pa ri unimal uchomalil.   
\s1 Ri bꞌinik re ojer y ri kꞌakꞌ bꞌinik  
\p
\v 5 E uwariꞌche, e chesaj bꞌi chupa ri animaꞌ alaq ri na utz ta uwach re ruwachulew: metzꞌabꞌej uwa qꞌij alaq kukꞌ jujun chik na kꞌulel ta alaq, maꞌan alaq taq chꞌulilaj mak, maya ibꞌ alaq che rayibꞌal na chom ta uwach, marayij ne alaq kaꞌan alaq ri na utz taj. Kiꞌkota alaq rukꞌ ronoje ri kꞌo ukꞌ alaq y marayij ne alaq más; ma we kꞌo ri más kꞌax kanaꞌ alaq chwa ri Dios, e pachaꞌ kaꞌan alaq dios che waꞌ.  
\v 6 Ma ri Dios kutaq lo kꞌaxkꞌobꞌik pakiwi ri kakiꞌan taq waꞌ ruma na kakikoj ta utzij.  
\v 7 Yey jenelaꞌ xꞌan ralaq ojertan echiriꞌ kꞌa kꞌo alaq pa mak.  
\v 8 Ekꞌu woꞌora hermanos e yaꞌa kan alaq ronoje taq waꞌ: ri kaꞌan alaq oyowal, ri alaq kꞌaꞌn, ri kaꞌan alaq ri na utz taj che jun chik, ri kachꞌaꞌt alaq chirij junoq, ri kabꞌiꞌij alaq chꞌaꞌtem na chom ta uwach.  
\v 9 Maꞌan alaq raqꞌubꞌal chiwach alaq, ma esam chi ibꞌ alaq che ri ojer bꞌinik silabꞌik alaq y che ronoje ri na utz taj reqelem taq waꞌ.  
\v 10 E jalkꞌatajinaq chi kꞌu alaq che jun kꞌakꞌ bꞌinik silabꞌik, ma jalan katajin jalkꞌatixik alaq chaꞌ jelaꞌ kuꞌana alaq pachaꞌ ri Jun ri xuya kꞌakꞌ kꞌaslemal alaq. Jekꞌuriꞌlaꞌ ketaꞌmaj alaq uwach ri Dios pa saqil wi.  
\v 11 Che wa jun kꞌakꞌ bꞌinik silabꞌik na il ta chi uwach we junoq e kukꞌil raj judiꞌabꞌ o e kukꞌil ri na e ta aj judiꞌabꞌ, we ukojom ri retalil re circuncisión o na ukojom taj, we aj naj o na jinta kꞌana retaꞌam, we kꞌo puqꞌabꞌ juna rajaw\f + \fr 3:11 \ft “Kꞌo puqꞌabꞌ juna rajaw”: Kil “esclavo” pa vocabulario.\f* o na jinta rajaw; ma xew ri Cristo kuꞌan xa jun chiqe qonoje y puqꞌabꞌ Rire oj kꞌo wi qonoje.   
\p
\v 12 Ralaq alaq chaꞌtal chi ruma ri Dios y alaq chi re Rire, yey lik kꞌax kanaꞌ alaq ruma Rire. Rukꞌ kꞌu ri bꞌinik silabꞌik alaq, lik kꞌutu alaq waꞌ: Kꞌola kꞌaxnaꞌbꞌal kꞌuꞌxaj ukꞌ alaq che kitoꞌik jujun chik, kꞌutu alaq ri relej kꞌuꞌx alaq, maꞌan nim chibꞌil ibꞌ alaq, chuꞌana ri lik utz kꞌuꞌx alaq chiwach alaq y kꞌola unimal kꞌuꞌx alaq.  
\v 13 Lik kuyu ibꞌ alaq chiwach alaq. We kꞌo junoq xuꞌan ri na utz taj che alaq, kuyu alaq umak. Jelaꞌ pachaꞌ xuꞌan ri Cristo echiriꞌ xukuy mak ralaq, jekꞌulaꞌ riꞌ ꞌana ralaq.  
\v 14 Yey chwi kꞌu ronoje taq waꞌ, ri más chirajawaxik e lik kꞌax kanaꞌ ibꞌ alaq chiwach alaq, ma e waꞌ ri kuꞌan xa jun che alaq pa saqil wi.  
\v 15 Ekꞌu ri utzil chomal re ri Dios taqana pa animaꞌ alaq, ma ruma waꞌ xusikꞌij alaq ri Dios chaꞌ kuꞌan alaq xa jun. Yey lik tioxin alaq chwach ri Dios.   
\p
\v 16 Ruchꞌaꞌtem ri Cristo chunojisaj ronoje ri kꞌaslemal alaq. Kꞌutu kꞌu alaq waꞌ wa chꞌaꞌtem chibꞌil ibꞌ alaq y pixabꞌaj ibꞌ alaq rukꞌ saqil naꞌoj. Rukꞌ ronoje kꞌuꞌx alaq tioxin alaq chwach ri Dios y bꞌixoj alaq rubꞌiꞌ rukꞌ salmos, rukꞌ taq bꞌix tzꞌibꞌital kanoq y rukꞌ bꞌixobꞌal yaꞌom che alaq ruma ri Ruxlabꞌixel.  
\v 17 Yey ronoje ri kaꞌan alaq y ronoje ri kabꞌiꞌij alaq, ꞌana alaq chupa rubꞌiꞌ ri Qanimajawal Jesucristo y tioxin alaq chwach ri Qaqaw Dios ruma Rire.   
\s1 Ri qabꞌinik qasilabꞌik chikiwach ri tikawex  
\p
\v 18 E rilal ixoq, ri kꞌulan la, lik nimaj la ri achijil la, ma e taqal riꞌ chike ri kikojom rubꞌiꞌ ri Qaqaw.   
\p
\v 19 Yey rilal achi, ri kꞌulan la, lik kꞌax naꞌa la ri ixoqil la. Makꞌachkꞌat la chwa ujolom.   
\p
\v 20 Ekꞌu riꞌix ix alkꞌoꞌal, lik chikojo kitzij richu-iqaw che ronoje, ma waꞌ e kukꞌul ukꞌuꞌx ri Qanimajawal Jesucristo.   
\p
\v 21 Yey ralaq ri kꞌo alkꞌoꞌal alaq, mapetisaj alaq koyowal ri alkꞌoꞌal alaq, chaꞌ jelaꞌ na kapax ta kikꞌuꞌx.   
\p
\v 22 Ekꞌu rilal lal mokom, lik kojo la utzij ri patrón la che ronoje. Chakuna la rukꞌ xiꞌin ibꞌ chwach ri Dios y rukꞌ ronoje kꞌuꞌx la, na xew ta echiriꞌ katzutzuꞌx la ruma ri patrón pachaꞌ ri kakiꞌan ri xa kakitzukuj ri yakbꞌal kiqꞌij.  
\v 23 Ronoje kꞌu ri kaꞌan la, ꞌana la rukꞌ ronoje kꞌuꞌx la, ma e ri Qanimajawal ri kanimaj la y na e ta ri tikawex.  
\v 24 Ma etaꞌam chi la kꞌo rajil ukꞌaxel kuya ri Dios cheꞌla e chirij ri ꞌanom la, ma ri kanimaj la e ri Cristo ri Qajawal.  
\v 25 Noꞌj kꞌu ri kaꞌanaw ri na utz taj, riꞌ e kukꞌul ri tojbꞌal re ri na utz taj uꞌanom, ma ri Dios kuya chikijujunal saꞌ ri taqal chike e chirij ri kiꞌanom.   
\c 4  
\p
\v 1 Yey ralaq ri alaq patrón, ꞌana alaq ri lik ubꞌe y ri lik usukꞌ chike ri e mokom alaq; mikꞌow chikꞌuꞌx alaq, ralaq kꞌo jun “Patrón” alaq chilaꞌ chikaj, waꞌ e ri Dios.   
\p
\v 2 Onoje kꞌu alaq lik makos alaq che uꞌanik orar rukꞌ tioxinik chwach ri Dios.  
\v 3 ꞌAna alaq orar paqawi riꞌoj chaꞌ ri Qajawal kuya na chiqe kaqatzijoj ri Utzilaj Tzij y kaqaqꞌalajisaj kꞌu ri na qꞌalajisam ta lo ojertan chwi ri Cristo, ma ruma ne laꞌ in kꞌo pa cárcel.  
\v 4 Lik ꞌana alaq orar panuwiꞌ riꞌin chaꞌ lik kꞌo nunaꞌoj che uqꞌalajisaxik Ruchꞌaꞌtem ri Cristo.   
\p
\v 5 Bꞌina alaq rukꞌ saqil naꞌoj chikiwach ri na e ta ralkꞌoꞌal ri Dios, xaqi matzꞌilaꞌ kꞌu alaq ri jujun qꞌij kikꞌowik.  
\v 6 Echiriꞌ kachꞌaꞌt alaq rukꞌ junoq chik, ꞌana alaq waꞌ rukꞌ chomilaj chꞌaꞌtem y saqil naꞌoj. Yey chirajawaxik kꞌut ketaꞌmaj alaq suꞌanik kakꞌul alaq uwach chike ri kakiꞌan tzꞌonobꞌal che alaq.   
\s1 Ri Tíquico kukꞌam bꞌi urason ri Pablo  
\p
\v 7 Echiriꞌ ri hermano Tíquico ri na loqꞌ ta kꞌax kanaꞌw re kopon ukꞌ alaq, kubꞌiꞌij kꞌu che alaq saꞌ ri nuꞌanom riꞌin wara. Rire e jun utzilaj aj chak re ri Qaqaw y lik chakuninaq wukꞌ riꞌin.  
\v 8 Ruma kꞌu waꞌ kantaq bꞌi ukꞌ alaq chaꞌ kutzijoj che alaq saꞌ ri qaꞌanom riꞌoj wara y jelaꞌ kunimarisaj kꞌuꞌx alaq.  
\v 9 Ri karachbꞌilaj bꞌi ri Tíquico e ri Onésimo, jun utzilaj hermano na loqꞌ ta kꞌax kanaꞌw re, yey rire aj chilaꞌ pa ri tinamit alaq. Ekꞌu rike kakitzijoj che alaq ronoje saꞌ taq ri qikꞌowibꞌem wara.   
\s1 Kꞌisbꞌal uchꞌaꞌtem ri Pablo che riglesia kꞌo Colosas  
\p
\v 10 Ri Aristarco, wachbꞌiꞌil wara pa cárcel, kuya pan rutzil wach alaq; kuya pan rutzil wach alaq ri Marcos, ri rikaqꞌ ri Bernabé. Bꞌiꞌtal chi che alaq saꞌ ri taqal che ri Marcos we kikꞌow rire ukꞌ alaq; kꞌulu kꞌu alaq chi utz.  
\v 11 Kuya pan rutzil wach alaq ri Jesús, ri kabꞌiꞌx Justo che. Xew kꞌu wa oxibꞌ hermanos aj judiꞌabꞌ e chakuninaq wukꞌ woꞌora pa rutaqanik ri Dios y lik kibꞌochiꞌim nukꞌuꞌx.  
\v 12 Kuya pan rutzil wach alaq ri Epafras, rire aj chilaꞌ pa ri tinamit alaq y e jun aj chak re ri Cristo. Rire lik uyaꞌom ribꞌ che uꞌanik orar pawiꞌ alaq chaꞌ lik kachuqꞌubꞌej ibꞌ alaq rukꞌ ri jusukꞌ bꞌinik silabꞌik alaq y jekꞌulaꞌ kaya ibꞌ alaq che uꞌanik ronoje ri rajawal ukꞌuꞌx ri Dios.  
\v 13 Ma e riꞌin wilom ri Epafras lik kuꞌan orar pawiꞌ alaq y pakiwiꞌ ri e kꞌo pa ri tinamit Laodicea y ri e kꞌo Hierápolis.  
\v 14 Kuya pan rutzil wach alaq ri Lucas, ri jun doctor na loqꞌ ta kꞌax kanaꞌw re; jenelaꞌ ri Demas kuya pan rutzil wach alaq.   
\p
\v 15 Yaꞌa alaq rutzil kiwach konoje ri hermanos e kꞌo Laodicea. Yaꞌa alaq rutzil uwach ri Ninfas junam kukꞌ ri hermanos kakimol kibꞌ chirocho.  
\v 16 Echiriꞌ ajilam chi waꞌ wa carta chiwach ralaq, taqa bꞌi alaq waꞌ chike ri hermanos re ri iglesia kꞌo Laodicea chaꞌ kajilax chikiwach; y jekꞌulaꞌ ralaq kajilaj alaq ri carta nutaqom bꞌi Laodicea.  
\v 17 Jewaꞌ bꞌiꞌij alaq che ri Arquipo: «Lik chok la il che uꞌanik chi utz ruchak ri Dios yaꞌtal paqꞌabꞌ la.»   
\p
\v 18 Riꞌin Pablo, rukꞌ wa nuqꞌabꞌ xintzꞌibꞌaj wa rutzil wach alaq. Lik mikꞌow chikꞌuꞌx alaq kaꞌan alaq orar panuwiꞌ ma in kꞌo pa cárcel. Kꞌulu kꞌu alaq ri unimal rutzil ukꞌuꞌx ri Dios. Amén.