\id 2PE - Achi’, Rabinal (new orthography) NT - 2009 (DBL 2013) 
\h 2 Pedro 
\toc1 Rukaꞌm carta xutzꞌibꞌaj ri Pedro 
\toc2 2 Pedro 
\toc3 2 P 
\mt1 Rukaꞌm carta xutzꞌibꞌaj ri Pedro  
\c 1  
\s1 Ri Pedro kuya pan rutzil kiwach ri kikojom rubꞌiꞌ ri Cristo  
\p
\v 1 Riꞌin, Simón Pedro, in jun aj chak y taqoꞌn re ri Qanimajawal Jesucristo. Kantzꞌibꞌaj pan wa carta che alaq, janipa ri yaꞌtal che alaq kakubꞌiꞌ kꞌuꞌx alaq rukꞌ ri Cristo jelaꞌ pachaꞌ qaꞌanom riꞌoj. Waꞌ wa chomilaj kubꞌulibꞌal kꞌuꞌxaj xyaꞌ chiqe qonoje ruma ri qa Dios y Kolobꞌenel Jesucristo, ma Rire lik jusukꞌ ri kuꞌan qukꞌ.  
\v 2 E lik kꞌiyar na pawiꞌ alaq ri unimal rutzil kꞌuꞌxaj y ri utzil chomal re ri Dios, yey waꞌ kakꞌul alaq ruma etaꞌam alaq uwach ri Dios y ri Qanimajawal Jesucristo.   
\s1 Ri karaj ri Dios che ri qabꞌinik qasilabꞌik  
\p
\v 3 Ri Dios rukꞌ ri unimal uchuqꞌabꞌ, uyaꞌom chiqe ronoje taq ri kajawax che ri qakꞌaslemal y ri qabꞌinik qasilabꞌik chwach Rire. Yey kuꞌan waꞌ ruma ri xuya chiqe kaqetaꞌmaj uwach Rire, ri xojusikꞌij rukꞌ ri unimal uchomalil y ri unimal uwach uqꞌij.  
\v 4 Jekꞌuriꞌlaꞌ, ri Dios uyaꞌom nimaꞌq y chom taq bꞌiꞌtisinik chiqe chaꞌ ruma waꞌ kojuꞌana pachaꞌ Rire, ma elinaq lo alaq puqꞌabꞌ ri rayibꞌal na chom ta uwach, ri kakitaqej ri winaq re ruwachulew.   
\p
\v 5 Ruma kꞌu xkubꞌiꞌ kꞌuꞌx alaq rukꞌ ri Cristo, chirajawaxik kꞌu riꞌ kachuqꞌubꞌej ibꞌ alaq chaꞌ ri bꞌinik silabꞌik alaq kuꞌan lik jusukꞌ. Y na xew ta waꞌ, ma lik ne chirajawaxik ketaꞌmaj alaq saꞌ ri karaj ri Dios che alaq.  
\v 6 We etaꞌam chi kꞌu alaq saꞌ ri karaj ri Dios che alaq, e ꞌana alaq riꞌ. Yey chajij ibꞌ alaq chi utz chaꞌ na katzaq ta alaq pa mak, y jekꞌuriꞌlaꞌ kakꞌojiꞌ unimal kꞌuꞌx alaq. Yey rukꞌ kꞌu ri unimal kꞌuꞌx alaq, e kꞌutu alaq pa saqil wi yaꞌom ibꞌ alaq che jun saqil bꞌinik silabꞌik chwach ri Dios.  
\v 7 Y ruma kꞌu lik yaꞌom ibꞌ alaq che jun saqil bꞌinik silabꞌik chwach ri Dios, kꞌax naꞌa ibꞌ alaq chiwach alaq. Yey na xew ta waꞌ, ma lik yaꞌa ibꞌ alaq che ukꞌutik ri rutzil kꞌuꞌx alaq chike konoje.   
\p
\v 8 Ma we kꞌo kꞌu taq waꞌ ukꞌ alaq y yaꞌom ibꞌ alaq che uꞌanik taq waꞌ, riꞌ na kok ta xepuyil ukꞌ alaq yey kaqꞌalajin kꞌu riꞌ lik kꞌo kutiqoj ri xetaꞌmaj alaq uwach ri Qanimajawal Jesucristo.  
\v 9 Noꞌj e junoq na jinta taq waꞌ rukꞌ, riꞌ e pachaꞌ xew karil ri kꞌo chwach; e junam rukꞌ pachaꞌ juna potzꞌ, ma xikꞌow ne chukꞌuꞌx e rojertan lik aj mak yey e ri Dios xkuyuw umak.  
\v 10 E uwariꞌche hermanos, kambꞌiꞌij waꞌ che alaq: E ri Dios xchaꞌw e alaq yey e Rire sikꞌiyom e alaq. Ruma kꞌu riꞌ, chuqꞌubꞌej ibꞌ alaq che ukꞌutik pa ri bꞌinik silabꞌik alaq, paqatzij wi sikꞌim alaq yey chaꞌtal alaq ruma ri Dios. We kaꞌan alaq waꞌ, riꞌ na katzaq ta chi alaq pa mak.  
\v 11 Jelaꞌ kꞌu riꞌ lik kakꞌul alaq chi utz pa ri taqanik na jinta utaqexik re ri Qanimajawal y Qakolobꞌenel Jesucristo.   
\p
\v 12 Ruma kꞌu riꞌ, na kanwoqꞌotaj ta ukuxtaxik waꞌ che alaq, tobꞌ ne etaꞌam chi alaq wa Qꞌijsaq y jikibꞌam chi kꞌuꞌx alaq che.  
\v 13 Ma chinuwach riꞌin, xaloqꞌ kꞌa in kꞌaslik, lik usukꞌ kankoj pa jolom alaq taq wa pixabꞌanik.  
\v 14 Ma wetaꞌam ri nukamik xa naqaj chi kꞌo lo wi, yey waꞌ e ri Qanimajawal Jesucristo uqꞌalajisam lo chwe.  
\v 15 E uwariꞌche lik inokinaq il che ukuxtaxik waꞌ che alaq, chaꞌ echiriꞌ na in jinta chi ukꞌ alaq, xaqi kakꞌun chikꞌuꞌx alaq ronoje waꞌ.   
\s1 Ri xebꞌilow runimal uwach uqꞌij ri Qanimajawal Jesucristo  
\p
\v 16 Ma ri kꞌutunik xqaꞌan chiwach alaq chwi ruchuqꞌabꞌ y rukꞌunibꞌal ri Qanimajawal Jesucristo, na e ta rukꞌ nukꞌum chꞌaꞌtem noꞌjital kuma tikawex; ma lik rukꞌ ri qawach xqil runimal uwach uqꞌij Rire.  
\v 17 Ma riꞌoj xqilo echiriꞌ xqꞌalajisax runimal uchomalil y lik xyak uqꞌij ruma ri Qaqaw Dios. Xqata ne ruqul ri Dios xchꞌaw chupa ri chomilaj qꞌijsaq kꞌo paqawiꞌ, jewaꞌ xubꞌiꞌij: «E Nukꞌajol waꞌ, ri lik kꞌax kannaꞌo y lik kinkiꞌkot che» xchaꞌ.  
\v 18 Xqata kꞌu wa qulaj petinaq chilaꞌ chikaj echiriꞌ oj kꞌo rukꞌ Rire chwa ri santowilaj juyubꞌ.\f + \fr 1:18 \ft Mt. 17:1-8; Mr. 9:7; Lc. 9:35\f*  
\v 19 Wa xqilo e kujikibꞌaꞌ uwach ri tzij tzꞌibꞌital kan kuma ri qꞌalajisanelabꞌ chupa Ruchꞌaꞌtem ri Dios. Y lik utz ri kaꞌan alaq we kok alaq il che waꞌ, ma e pachaꞌ juna aqꞌ kawon pa qꞌequꞌm kꞌa pa ri saqribꞌal echiriꞌ kel lo ri nimalaj chꞌumil re ri saqribꞌal.\x * \xo 1:19 \xt Ap. 22:16\x* Waꞌ e keꞌelawi rukꞌunibꞌal ri Cristo, ri kutzij upa ri animaꞌ alaq.  
\v 20 Lik kꞌut chirajawaxik nabꞌe na kamaj alaq usukꞌ waꞌ: Ri tzꞌibꞌital kan chupa Ruchꞌaꞌtem ri Dios, na utz taj kaqꞌalajisaxik xa rukꞌ unaꞌoj juna achi.  
\v 21 Ma ri qꞌalajisam kan chupa Ruchꞌaꞌtem ri Dios, na petinaq ta ruma kinoꞌjibꞌal tikawex, e petinaq ruma ri Santowilaj Ruxlabꞌixel ri Dios. Ma taq ri santowilaj achijabꞌ re ri Dios xechꞌaꞌtik e chirij janipa ri xuqꞌalajisaj ri Ruxlabꞌixel ri Dios chike.   
\c 2  
\s1 E kꞌo aj kꞌutunel xa e sokosoꞌnel  
\r (Jud. 3-13)  
\p
\v 1 Chikixoꞌl ri tinamit e aj Israel xekꞌojiꞌ qꞌalajisanelabꞌ xa e sokosoꞌnel; jekꞌulaꞌ chixoꞌlibꞌal ralaq kekꞌojiꞌ e aj kꞌutunel xa e sokosoꞌnel. Waꞌ xa xeꞌlaqꞌay kakikoj pa kijolom ri hermanos kꞌutunik na usukꞌ taj, xa re yojobꞌal ri kibꞌinik kisilabꞌik. Yey e kuꞌana ne ri kakibꞌiꞌij na kakikoj ta chi rubꞌiꞌ ri Qanimajawal, ri xkam kuma rike re kebꞌukolobꞌej. Y ruma kꞌu wa na utz taj kakiꞌano, e kape tan ri qꞌatbꞌal tzij pakiwiꞌ.  
\v 2 Yey lik e kꞌi ri kakitaqej ri kibꞌinik wa aj kꞌutunel, ri kiyaꞌom kibꞌ che uꞌanik taq ri kirayibꞌal kꞌixbꞌal uwach. Ruma kꞌu riꞌ waꞌ, taq ri winaq kakijeq kechꞌaꞌt chirij ri bꞌe re ri Qꞌijsaq.  
\v 3 Wa aj kꞌutunel e keꞌek kikꞌuꞌx rukꞌ ri puaq; kakesaj kꞌu ukꞌiyal puaq che alaq rukꞌ sokosoꞌnik. Ruma kꞌu taq wa kakiꞌano, ri qꞌatbꞌal tzij xex chi katewun pakiwiꞌ, yey ri sachibꞌal kiwach xa naqaj chi kꞌo wuloq.   
\p
\v 4 Ri Dios na xukuy tane kimak ri ángeles xemakunik, ma xebꞌukꞌaq bꞌi pa xibꞌalbꞌaꞌ, xebꞌutzꞌapij pa utum qꞌequꞌm chaꞌ kekꞌojiꞌ na chilaꞌ kꞌa echiriꞌ kaꞌan ri qꞌatbꞌal tzij pakiwiꞌ.\f + \fr 2:4 \ft Jud. 6\f*  
\v 5 Yey na xukuy tane kimak ri winaq ojertan echiriꞌ xutaq lo runimal jabꞌ pakiwiꞌ. Xew xebꞌukolobꞌej wajxaqibꞌ tikawex; jun chike e ri Noé, ri xtzijon chwi ri jusukꞌ bꞌinik chwach ri Dios.\x * \xo 2:5 \xt Gn. 6:9-10; 7:7\x*  
\v 6 Jenelaꞌ xuqꞌat tzij pakiwi ri kebꞌ tinamit Sodoma y Gomorra echiriꞌ xusach kiwach rukꞌ aqꞌ, xuꞌan chaaj chike. Xuꞌan kꞌu waꞌ kꞌutubꞌal re saꞌ ri kakikꞌulumaj ri e aj makibꞌ.  
\v 7 Pero xukolobꞌej ri Lot, jun achi lik jusukꞌ rubꞌinik usilabꞌik, ri lik okinaq chukꞌuꞌx ri itzel kibꞌinik kisilabꞌik taq ri winaq pa jeqel wi.\x * \xo 2:7 \xt Gn. 19:29\x*  
\v 8 Yey ruma kꞌu jusukꞌ rubꞌinik rire, ronoje qꞌij lik kubꞌisoj ukꞌuꞌx ri na ubꞌe taj kuto y karil chike waꞌ wa winaq.   
\p
\v 9 Rukꞌ taq waꞌ, kaqilo ri Dios lik retaꞌam suꞌanik kebꞌukolobꞌej janipa ri kiyaꞌom kibꞌ puqꞌabꞌ echiriꞌ kakꞌam kipa; yey ekꞌu janipa ri na e ta jusukꞌ, riꞌ e kꞌo chi chuxeꞌ ri qꞌatbꞌal tzij re ri Dios, y waꞌ kape na pakiwiꞌ echiriꞌ kopon ruqꞌijol.  
\v 10 Yey wa qꞌatbꞌal tzij e lik taqal chike ri kitaqem taq ri rayibꞌal re ri kitiꞌjil, ri bꞌenaq kikꞌuꞌx che uꞌanik ri chꞌulilaj mak, ri na kakiya ta kibꞌ kataqan junoq pakiwiꞌ, ri na kekꞌix ta che uꞌanik janipa ri kakaj rike, ri e titzꞌitaq, ri na kakixiꞌij tane kibꞌ kechꞌaꞌt rukꞌ itzel chꞌaꞌtem chikij taq ri kꞌo kiwach y kꞌo kichuqꞌabꞌ pakiwiꞌ.  
\v 11 Yey ne ri ángeles, tobꞌ lik kꞌo kichuqꞌabꞌ y lik kꞌo kiwach yaꞌtalik, na kakikꞌaq tane bꞌi kiqꞌij ri jujun chik kꞌo kiwach echiriꞌ kakikoj kimak chwach ri Qanimajawal.  
\v 12 Noꞌj waꞌ wa aj kꞌutunel e sokosoꞌnel, e kakichꞌaꞌtibꞌej ri na kakimaj tane usukꞌ. Ruma kꞌu riꞌ, kaꞌan chike pachaꞌ kaꞌan chike ri awaj na jinta kinaꞌoj, ri kebꞌalaxik xa re kechapik y re kekamisaxik.  
\v 13 Kaꞌan kꞌu kꞌax chike, ukꞌaxel ri kꞌax kiꞌanom rike chike jujun chik. Rike lik bꞌenaq kikꞌuꞌx che uꞌanik ri kirayibꞌal lik kꞌixbꞌal uwach yey kakiꞌan ne waꞌ tobꞌ paqꞌij. Echiriꞌ rike kakimol kibꞌ ukꞌ alaq re kewaꞌ ukꞌ alaq, e jelaꞌ pachaꞌ ri chꞌul kuchꞌulaj juna kꞌul, ma lik kꞌixbꞌal uwach ri kakiꞌan chixoꞌl alaq.   
\p
\v 14 Waꞌ waꞌchijabꞌ echiriꞌ kakil juna ixoq, xew kakichꞌobꞌ ri kemakun rukꞌ, na kikꞌow ta kikꞌuꞌx che kemakunik, kekimin pa mak ri na jinta kikowil chwach ri Dios y kiyaꞌom kikꞌuꞌx che urayixik ronoje ri kakilo. Ekꞌu ri Dios uqꞌatom chi tzij pakiwi rike  
\v 15 ma xkiya kan ri saqil bꞌe y xkimaj bꞌi jun bꞌe lik na e taj. Kiꞌanom kꞌu ke pachaꞌ ri xuꞌan ri Balaam,\x * \xo 2:15 \xt Nm. 22:5\x* rukꞌajol ri Beor. Waꞌ e lik xcha ranimaꞌ che uchꞌakik puaq ruma ri na jusukꞌ taj xuꞌano.  
\v 16 Ruma kꞌu ri mak katajin che uꞌanik, xchꞌaꞌbꞌex upa, yey ri xchꞌaꞌbꞌen upa ¡e jun awaj aj eqaꞌn! Tobꞌ rawaj na kechꞌaw taj, wa jun buru rukꞌ uchꞌawibꞌal achi xchꞌaw che y jelaꞌ xuqꞌatej ruchꞌuꞌjilal ri jun aj qꞌij.\x * \xo 2:16 \xt Nm. 22:28-30\x*   
\p
\v 17 Waꞌ wa aj kꞌutunel pachaꞌ e akꞌal na jinta chi yaꞌ chupa, pachaꞌ e sutzꞌ xa kekꞌam bꞌi ruma runimal tew. Chike kꞌu konoje riꞌ waꞌ, yijbꞌital chi ri lik qꞌequꞌmalil aqꞌabꞌ chaꞌ na jinta utaqexik kebꞌeꞌkꞌola chupa.  
\v 18 Rukꞌ ri kichꞌaꞌtem lik kakiꞌan nim che kibꞌ tobꞌ na jinta ne keꞌelawi ri kakibꞌiꞌij. Yey rike kakibꞌiꞌij utz we e kakiꞌan saꞌ ri kurayij ri kitiꞌjil y kakiya kꞌu kibꞌ che uꞌanik waꞌ. Jekꞌulaꞌ e kekimin tanchi pa mak ri kꞌakꞌ ne ebꞌelinaq lo chikixoꞌl taq ri kakiꞌan ri na utz taj.  
\v 19 Kakibꞌiꞌij e puqꞌabꞌ jun kꞌo wi kuꞌan saꞌ ri karaj kuꞌano; yey rike puqꞌabꞌ ne ri mak e kꞌo wi. Ma echiriꞌ junoq na kuchꞌij ta uchuqꞌabꞌ jun chik, riꞌ e kakꞌojiꞌ puqꞌabꞌ ri kasokow re; jekꞌulaꞌ kukꞌulumaj ri jun na kuchꞌij ta uchuqꞌabꞌ ri mak.  
\v 20 Ekꞌu ri ebꞌelinaq chi lo chupa ri chꞌulilaj mak re ruwachulew ruma xketaꞌmaj uwach ri Qanimajawal y Qakolobꞌenel Jesucristo, we ketzelej tanchi chupa wa mak y kesokotaj ruma, riꞌ más kꞌax ri kakikꞌisbꞌej wi chwa echiriꞌ kꞌamajaꞌ kaketaꞌmaj uwach ri Qanimajawal.  
\v 21 Más utz kꞌu riꞌ chike tamaji xketaꞌmaj ri bꞌe re ri jusukꞌ bꞌinik chwa ri kakesaj kibꞌ che ri Santowilaj Tzij Pixabꞌ re ri Dios, ri xyaꞌtaj chike.  
\v 22 Ekꞌu ri kiꞌanom rike, paqatzij wi e pachaꞌ ri jun tzij jewaꞌ kubꞌiꞌij:  
\q1 Ri tzꞌiꞌ katzelej tanchi  
\q2 che utijik ri uxabꞌem chi uloq;\x * \xo 2:22 \xt Pr. 26:11\x*  
\q1 yey ri aq atinisam chik,  
\q2 kubꞌalkatilaꞌ tanchi ribꞌ chupa ri xoqꞌoꞌl  
\m kachaꞌ.   
\c 3  
\s1 Rukꞌunibꞌal ri Qanimajawal Jesucristo  
\p
\v 1 Hermanos, e ukaꞌm carta waꞌ kantzꞌibꞌaj pana che alaq. Yey chupa ukabꞌichal carta lik e kankꞌosoj uwach ri saqil naꞌoj alaq rukꞌ pixabꞌanik, chaꞌ ri naꞌoj alaq kakꞌojiꞌ chi jusukꞌ.  
\v 2 Kꞌuna kꞌu chikꞌuꞌx alaq ri xkibꞌiꞌij lo rojertan ri qꞌalajisanelabꞌ re ri Dios, yey ri kubꞌiꞌij ri taqanik re ri Qanimajawal y Qakolobꞌenel, ri xkꞌut che alaq kuma taq rutaqoꞌn ri Dios.  
\v 3 Lik chirajawaxik nabꞌe na ketaꞌmaj alaq waꞌ: Chupa taq rukꞌisbꞌal qꞌij keyaktaj lo winaq e chꞌaminel, ri kakitaqej ri kirayibꞌal na chom ta uwach.  
\v 4 Kakibꞌiꞌij kꞌu che alaq: «¿Saꞌ xuꞌan riꞌ ri bꞌiꞌtisinik ꞌanom kan puwi rutzelejik lo ri Cristo? Ma ya ne xekam ri qachu-qaqaw, ri nabꞌe xekojow rubꞌiꞌ ri Cristo; y ronoje junam uꞌanom chwi lo rujeqebꞌal ruwachulew, na jinta kꞌo jalkꞌatajinaq che» kechaꞌ.  
\v 5 Jekꞌuwaꞌ kakibꞌiꞌij ma na kakaj taj kakimaj usukꞌ e rojertan e ri Dios rukꞌ Ruchꞌaꞌtem xuꞌan ruwa kaj y xuꞌan ruwachulew, yey waꞌ xuwinaqirisaj lo pa ri yaꞌ y xutikibꞌaꞌ chuxoꞌlibꞌal waꞌ.\x * \xo 3:5 \xt Gn. 1:6-9\x*  
\v 6 Yey ruma kꞌu ri yaꞌ re ri nimalaj jabꞌ xutaq lo ri Dios, xsach kiwach taq ri winaq re ojertan y xjalkꞌatix uwach ruwachulew.  
\v 7 Ekꞌu ruwa kaj y ruwachulew e kꞌo woꞌora, e chajital chi ruma ri tzij ubꞌiꞌim ri Dios kꞌa echiriꞌ keyaꞌ pa aqꞌ chupa ruqꞌijol ri qꞌatbꞌal tzij, echiriꞌ kasachisax kiwach ri tikawex lik e aj makibꞌ.   
\p
\v 8 Pero ralaq hermanos, masach chikꞌuꞌx alaq waꞌ: Chwach ri Qaqaw e ri jun qꞌij e junam rukꞌ pachaꞌ chi juna mil junabꞌ; yey e ri jun mil junabꞌ e junam rukꞌ pachaꞌ chi juna qꞌij.  
\v 9 Ri Qanimajawal na kamayin ta che uꞌanik janipa rubꞌiꞌtisim loq, jelaꞌ pachaꞌ ri kakibꞌiꞌij jujun. Ma Rire lik kꞌo unimal ukꞌuꞌx qukꞌ, y na karaj ta kꞌu kasach uwach junoq. Ri karaj Rire e konoje ri tikawex kakitzelej kitzij chwach.   
\p
\v 10 Ekꞌu ruqꞌijol rukꞌunibꞌal ri Qanimajawal kakꞌun loq pachaꞌ ri okibꞌal re juna eleqꞌom pa juna ja chaqꞌabꞌ, ma ri eleqꞌom na kubꞌiꞌij ta apanoq jampalaꞌ koponik. Chupa kꞌu waꞌ wa qꞌij kasach uwach ruwa kaj rukꞌ jun nimalaj chꞌawibꞌal kajininik y ronoje taq ri kꞌo chwach kasach kiwach ruma ri aqꞌ. Yey ruwachulew y ronoje taq ri e kꞌo chwach keporotajik.  
\v 11 We ronoje kꞌu riꞌ waꞌ jelaꞌ rusachik uwach kaꞌanik, ¿suꞌchak kꞌu riꞌ na kabꞌin ta alaq jusukꞌ rukꞌ jun saqil bꞌinik silabꞌik chwach ri Dios?  
\v 12 Rukꞌ kꞌu ronoje kꞌuꞌx alaq, lik chok alaq il che royꞌexik rukꞌunibꞌal ruqꞌijol ri Dios. Ma chupa waꞌ wa qꞌij ruwa kaj kumaj aqꞌ y kasach uwach, y ronoje taq kꞌu riꞌ ri kꞌo che ruwa kaj kakꞌatik y kajaqꞌur ruma rukꞌatibꞌal ri aqꞌ.  
\v 13 Noꞌj riꞌoj qoyeꞌem jun kꞌakꞌ uwa kaj y jun kꞌakꞌ uwachulew jelaꞌ pachaꞌ rubꞌiꞌtisim ri Dios. Yey chiriꞌ, konoje xew e kakiꞌan ri lik jusukꞌ.   
\p
\v 14 E uwariꞌche ralaq hermanos, ruma oyeꞌem alaq taq waꞌ, e chuꞌana ubꞌis kꞌuꞌx alaq ri kariqitaj alaq ruma ri Dios chi utzil chomal rukꞌ jun bꞌinik alaq lik jusukꞌ, chaꞌ na jinta mak alaq y na jinta junoq katzꞌaqaw mak chiꞌij alaq.  
\v 15 Lik maja kꞌu alaq usukꞌ waꞌ: Runimal ukꞌuꞌx ri Qanimajawal qukꞌ e re kojkolobꞌetajik jelaꞌ pachaꞌ rutzꞌibꞌam ri qa hermano Pablo che alaq, yey ri xutzꞌibꞌaj rire e chirij ri naꞌoj yaꞌtal che ruma ri Dios.  
\v 16 Ri Pablo lik xchꞌaꞌt chwi taq waꞌ. Chupa taq rucartas kꞌo ri lik kꞌayew umajik usukꞌ. Yey e taq kꞌu ri na jinta kimajom puwi waꞌ y na jinta ukowil ri kubꞌulibꞌal kikꞌuꞌx, na jusukꞌ ta chi ubꞌiꞌxikil kakiꞌan puwi taq rutzꞌibꞌam ri Pablo yey jenelaꞌ kakiꞌan rukꞌ ri nikꞌaj chik Utzij Upixabꞌ ri Dios; y rukꞌ waꞌ e kakitzukuj ri qꞌatbꞌal tzij re ri Dios pakiwiꞌ.   
\p
\v 17 E uwariꞌche ralaq hermanos, ruma etaꞌam chi alaq chi utz saꞌ ri katajin loq, lik chajij kꞌu ibꞌ alaq chaꞌ na kajekꞌetaj tubꞌi alaq ruma ri sokosoꞌnik ke ri lik na kebꞌin ta jusukꞌ y chaꞌ na kaya ta kan alaq ri Utzilaj Tzij kojom chi alaq.  
\v 18 Ri ꞌana alaq e kꞌiya alaq chupa ri unimal rutzil ukꞌuꞌx ri Dios y che ri retaꞌmaxik uwach chi utz ri Qanimajawal y Qakolobꞌenel Jesucristo. Che kꞌu Rire taqal wi ri yakbꞌal qꞌij na jinta utaqexik woꞌora y chiqawach apanoq. Amén.