\id 1PE - Achi’, Rabinal (new orthography) NT - 2009 (DBL 2013) 
\h 1 Pedro 
\toc1 Ri nabꞌe carta xutzꞌibꞌaj ri Pedro 
\toc2 1 Pedro 
\toc3 1 P 
\mt1 Ri nabꞌe carta xutzꞌibꞌaj ri Pedro  
\c 1  
\s1 Ri Pedro kuya pan rutzil kiwach ri echaꞌtal ruma ri Dios  
\p
\v 1 Riꞌin in Pedro, in taqoꞌn re ri Qanimajawal Jesucristo. Kintzꞌibꞌan pan che alaq, ri naj kꞌo wi alaq che ri qatinamit, ri jeqel alaq pa taq ri luwar re Ponto, re Galacia, re Capadocia, re Asia y re Bitinia.  
\v 2 Ralaq chaꞌtal lo alaq ruma ri Qaqaw Dios, ma jelaꞌ uchꞌobꞌom chi lo Rire ojertan. Ekꞌu woꞌora, ruma ri Ruxlabꞌixel ri Dios, yaꞌtal che alaq kakꞌojiꞌ alaq che jun santowilaj bꞌinik chaꞌ kakoj alaq utzij ri Dios y kachꞌajtaj ri mak alaq rukꞌ rukikꞌel ri Qanimajawal Jesucristo. E lik kꞌiyar na kꞌu pawiꞌ alaq ri unimal rutzil kꞌuꞌxaj y ri utzil chomal re ri Dios.   
\s1 Kubꞌul pan qakꞌuꞌx che ukꞌulik janipa ri kuya ri Dios chiqe  
\p
\v 3 Lik nim uqꞌij ri Dios, Ruqaw ri Qanimajawal Jesucristo, ma ruma ri unimal rutzil ukꞌuꞌx xuya jun kꞌakꞌ qabꞌinik qasilabꞌik. Yey ruma rukꞌastajibꞌal lo ri Qanimajawal Jesucristo chikixoꞌl ri ekaminaq, lik kubꞌul pan qakꞌuꞌx che ukꞌulik ri kꞌaslemal ubꞌiꞌtisim chiqe.  
\v 4 Yey wa qoyeꞌem na kasach ta uwach, na kachꞌulax ta uwach rukꞌ ri mak y na kachup tane kꞌana ruchomal. Jikibꞌam kꞌu uwach riꞌ kayaꞌtaj waꞌ che alaq chilaꞌ chikaj.  
\v 5 Ruma kꞌu ri kubꞌulibꞌal kꞌuꞌx alaq rukꞌ ri Dios, Rire kuchajij alaq rukꞌ ruchuqꞌabꞌ chaꞌ jelaꞌ kakꞌul alaq ri kolobꞌetajik bꞌiꞌtisim chi che alaq yey waꞌ kaqꞌalajin na chupa taq ri kꞌisbꞌal qꞌij.   
\p
\v 6 Ruma kꞌu riꞌ, kakiꞌkot alaq woꞌora, tobꞌ kopon jujun qꞌij chirajawaxik kikꞌow na alaq pa taq ukꞌiyal kꞌaxkꞌolil  
\v 7 chaꞌ kakꞌam pa alaq puwi ri kubꞌulibꞌal kꞌuꞌx alaq rukꞌ ri Dios jelaꞌ pachaꞌ kaꞌan che ri oro echiriꞌ kikꞌowisax pa aqꞌ, ilibꞌal re we saqil oro. Yey ri kubꞌulibꞌal kꞌuꞌx ralaq rukꞌ ri Dios más kꞌo uwach chwa ri oro, ma ri oro xa kakꞌisik. We xchꞌij kꞌu alaq wa kꞌaxkꞌobꞌik kikꞌowibꞌej alaq, riꞌ re yakbꞌal qꞌij ralaq y re yakbꞌal uqꞌij ri Dios. Ma echiriꞌ ri Qanimajawal Jesucristo kuqꞌalajisaj uwach chiqawach apanoq, kutakꞌabꞌaꞌ qꞌij ralaq ruma ri kubꞌulibꞌal kꞌuꞌx alaq rukꞌ ri Dios.  
\v 8 Ralaq kꞌax kanaꞌ alaq ri Jesús tobꞌ na ilom ta alaq uwach Rire, yey kubꞌul kꞌuꞌx alaq rukꞌ tobꞌ na kil ta alaq uwach woꞌora. Y kakiꞌkot alaq rukꞌ unimal kiꞌkotemal, yey waꞌ na kariqitaj tane ubꞌiꞌxikil.  
\v 9 Kakiꞌkot kꞌu alaq, ma kakꞌul na alaq ri kolobꞌetajik oyeꞌem alaq rukꞌ kubꞌulibꞌal kꞌuꞌxaj.   
\p
\v 10 Ri qꞌalajisanelabꞌ re ojertan xeqꞌalajisan lo puwi ri unimal rutzil ukꞌuꞌx ri Dios, ri kayaꞌiꞌ che ralaq. Rike lik xkiya kinaꞌoj puwi wa kolobꞌetajik y lik xkitij uqꞌij umajik usukꞌ waꞌ.  
\v 11 Ma kꞌo ri xuqꞌalajisaj ri Ruxlabꞌixel ri Cristo chike puwi taq ri kꞌaxkꞌobꞌik kutij Ruchaꞌoꞌn lo ri Dios y ri yakbꞌal uqꞌij kaꞌanik echiriꞌ ikꞌowinaq chi chupa waꞌ. Ekꞌu rike xkichꞌobꞌ raqan china puwiꞌ xbꞌiꞌx waꞌ y jampalaꞌ kuꞌanaꞌ.  
\v 12 Yey ri Dios xuqꞌalajisaj chike waꞌ wa qꞌalajisanelabꞌ na kakil ta waꞌ chupa taq ri qꞌij e kꞌo wi rike, ma waꞌ e kuꞌana chupa taq wa qꞌij oj kꞌo wi riꞌoj. Yey waꞌ e ri xyaꞌ che alaq kuma ri kitzijom ri Utzilaj Tzij rukꞌ ruchuqꞌabꞌ ri Santowilaj Ruxlabꞌixel ri Dios, ri xtaq lo chilaꞌ chikaj. Yey ri ángeles lik kakaj ne kakimaj usukꞌ taq waꞌ.   
\s1 Ri Dios kojusikꞌij che jun santowilaj bꞌinik  
\p
\v 13 E uwariꞌche sukꞌupij alaq ri naꞌoj alaq, lik chꞌobꞌo na alaq raqan saꞌ taq ri kaꞌan alaq. E choyeꞌej alaq ri unimal rutzil ukꞌuꞌx ri Dios, ri kayaꞌ na che alaq echiriꞌ kaqꞌalajisax uwach ri Qanimajawal Jesucristo.  
\v 14 Ralaq alaq chi ralkꞌoꞌal ri Dios, ruma kꞌu riꞌ kojo alaq utzij Rire. Maya kꞌu ibꞌ alaq che ri rayinik kꞌo wi alaq ojertan echiriꞌ kꞌamajaꞌ ketaꞌmaj alaq uwach ri Dios.  
\v 15 Ma jelaꞌ pachaꞌ ri Jun sikꞌiyom e alaq lik na jinta kꞌana mak rukꞌ, jekꞌulaꞌ ꞌana alaq che ri bꞌinik silabꞌik ralaq.  
\v 16 Ma jewaꞌ tzꞌibꞌital kan pa Ruchꞌaꞌtem ri Dios:  
\q1 Chiꞌana jusukꞌ che ri ibꞌinik isilabꞌik,  
\q1 ma Riꞌin na jinta kꞌana mak wukꞌ. \rq Lv. 19:2 \rq*   
\p
\v 17 Yey we kabꞌiꞌij alaq «Qaqaw» che ri Jun na kachaꞌw ta chikixoꞌl ri tikawex echiriꞌ kuꞌan qꞌatbꞌal tzij pakiwi konoje ruma taq ri kiꞌanom, riꞌ lik chirajawaxik che alaq kabꞌin alaq rukꞌ xiꞌin ibꞌ chwach Rire ronoje qꞌij che ri kꞌaslemal alaq.  
\v 18 Ma lik etaꞌam alaq, ri Dios xresaj lo alaq che ri bꞌinik silabꞌik alaq na chom taj, ri xkꞌut kan che alaq kuma ri chuꞌqaw alaq ojertan. Yey rutojik xuꞌan ri Dios re karesaj lo alaq puqꞌabꞌ ri mak, na e ta rukꞌ oro o rukꞌ plata, ma waꞌ xa kasach uwach;  
\v 19 rutojik xuꞌano e rukꞌ ri loqꞌlaj ukikꞌel ri Cristo, ri xyaꞌiꞌ pa kamik pachaꞌ juna qꞌapoj bꞌexex lik chom y na yewaꞌ ta uwach kayaꞌiꞌ chwach ri Dios.  
\v 20 Yey ri Cristo chaꞌom chi lo ojertan chwi lo echiriꞌ kꞌamajaꞌ ne kaꞌan ruwachulew; pero kꞌa ekꞌu woꞌora chupa wa kꞌisbꞌal qꞌij oj kꞌo wi, ri Dios xukꞌutubꞌej uwach ruma ri rutzil ukꞌuꞌx che alaq.  
\v 21 Ruma kꞌu ri Qanimajawal Jesucristo, xkubꞌiꞌ kꞌuꞌx alaq rukꞌ ri Dios, ma e Rire ri xukꞌastajisaj lo ri Cristo chikixoꞌl ri ekaminaq y lik xuyak uqꞌij. Ruma kꞌu riꞌ, kubꞌul kꞌuꞌx alaq rukꞌ ri Dios y oyeꞌem alaq che Rire janipa ri ubꞌiꞌtisim che alaq.   
\p
\v 22 Ruma xkoj alaq ri Qꞌijsaq, woꞌora xuꞌan chom ri kꞌaslemal alaq chaꞌ paqatzij wi kꞌax kanaꞌ ibꞌ alaq ri chaqꞌ ibꞌ alaq chupa rubꞌiꞌ ri Cristo. E uwariꞌche lik kꞌax naꞌa ibꞌ alaq chiwach alaq rukꞌ ronoje chuqꞌabꞌ alaq y rukꞌ ronoje kꞌuꞌx alaq.  
\v 23 Ma ralaq alaq alaxinaq tanchik y waꞌ na e ta kuma ri chuꞌqaw alaq ri xa e tikawex, ma e ruma Ruchꞌaꞌtem ri Dios, ri lik kꞌaslik y na kasach ta kꞌana uwach.  
\v 24 Ma jewaꞌ tzꞌibꞌital kan pa Ruchꞌaꞌtem ri Dios:  
\q1 Konoje ri tikawex e jelaꞌ pachaꞌ raqꞌes  
\q1 yey ri yakbꞌal kiqꞌij e pachaꞌ rukotzꞌiꞌjal raqꞌes;  
\q1 ma raqꞌes xa kachup uwach  
\q1 y rukotzꞌiꞌjal xa kachaqijik y kapuqik.  
\q1 Jekꞌulaꞌ riꞌ ri tikawex xa kekamik  
\q1 y ri yakbꞌal kiqꞌij xa kasach uwach,   
\q1
\v 25 noꞌj Ruchꞌaꞌtem ri Dios na kasach ta kꞌana uwach \rq Is. 40:6-8 \rq*  
\m kachaꞌ. Yey wa chꞌaꞌtem e ri Utzilaj Tzij tzijotal chi lo che alaq.   
\c 2  
\p
\v 1 E uwariꞌche yaꞌa kan alaq ronoje ri na utz taj: ri sokosoꞌnik, ri xa kebꞌ palaj alaq chiwach alaq, ri kuꞌan kꞌax kꞌuꞌx alaq chikij jujun chik y ri kanukꞌ alaq chꞌaꞌtem chikij jujun chik.  
\v 2 Jelaꞌ pachaꞌ juna neꞌ kꞌakꞌ alaxinaq lik e karaj rutzꞌum ruchu; jekꞌuriꞌlaꞌ ralaq, e lik rayij alaq ri saqil Uchꞌaꞌtem ri Dios, chaꞌ ruma waꞌ, ri Dios kuya ri kꞌiyibꞌal alaq y kukolobꞌej kꞌu alaq chwach ronoje ri na utz taj.  
\v 3 E ꞌana kꞌu alaq waꞌ ma naꞌom chi alaq ri rutzil ukꞌuꞌx ri Qanimajawal pa animaꞌ alaq.   
\s1 Ri jun abꞌaj kꞌaslik  
\p
\v 4 Qibꞌ kꞌu alaq riꞌ rukꞌ ri Qanimajawal Jesucristo. Rire e pachaꞌ jun abꞌaj kꞌaqital kan kuma ri winaq, ma chikiwach rike na jinta uchak; noꞌj chwach ri Dios e jun chomilaj abꞌaj kꞌaslik\f + \fr 2:4 \ft “Abꞌaj kꞌaslik”: Ri Cristo kꞌaslik y kuya kꞌaslemal chiqe.\f* y chaꞌtalik, pa katikiꞌ wi lo ri ja kayakik. Yey juna abꞌaj na jinta ukꞌaslemal, noꞌj Rire kꞌaslik.  
\v 5 Jekꞌuriꞌlaꞌ ralaq alaq pachaꞌ abꞌaj kꞌaslik tzꞌaqom bꞌi che ri ja katajin ri Dios che uyakik re kajeqiꞌ chupa. Rojertan raj chakunel xeniman pa Rocho Dios, ekꞌu woꞌora ri Dios uyaꞌom che ralaq kaniman alaq chwach Rire y ruma kꞌu ri Qanimajawal Jesucristo kaꞌan alaq ri kukꞌul ukꞌuꞌx Rire.  
\v 6 E uwariꞌche jewaꞌ tzꞌibꞌital kan pa Ruchꞌaꞌtem ri Dios:  
\q1 Kankoj kꞌu chilaꞌ Sion  
\q2 ri jun chomilaj abꞌaj chaꞌtalik,  
\q2 chaꞌ puwi waꞌ katikiꞌ ri ja kanyako. \rq Is. 28:16 \rq*  
\q1 China kꞌu ri kakubꞌiꞌ ukꞌuꞌx rukꞌ,  
\q2 riꞌ na kakꞌixbꞌesax taj  
\q2 ma kukꞌul na ri royeꞌem che Rire \rq Is. 49:23 \rq*  
\m kachaꞌ.  
\v 7 Che ralaq ri kojom alaq rubꞌiꞌ, Rire lik kꞌo uwach; noꞌj chike ri na kekojow ta re, e kuꞌana pachaꞌ ri tzꞌibꞌital kan pa Ruchꞌaꞌtem ri Dios:  
\q1 E rabꞌaj kꞌaqital kan kuma raj yakal ja,  
\q1 e abꞌaj riꞌ waꞌ xajawaxik chaꞌ katikiꞌ lo ri ja.\x * \xo 2:7 \xt Is. 28:16\x* \rq Sal. 118:22 \rq*   
\p
\v 8 Yey kubꞌiꞌij:  
\q1 Rire e ri jun abꞌaj kojotal chikiwach ri tikawex,  
\q1 yey lik e kꞌo ri kakichiq kibꞌ che,  
\q1 y lik ekꞌo ri ketzaq puwiꞌ \rq Is. 8:14 \rq*  
\m kachaꞌ. Jekꞌulaꞌ xkikꞌulumaj rike, ma e pachaꞌ “kakichiq kibꞌ” chwi Ruchꞌaꞌtem ri Dios echiriꞌ na kakikoj taj.   
\p
\v 9 Noꞌj ekꞌu ralaq alaq chaꞌtal lo ruma ri Dios, alaq aj chakunel chwach ri Nimalaj Taqanel Dios, alaq jun tinamit yaꞌom ibꞌ alaq che uloqꞌnimaxik ri Dios\x * \xo 2:9 \xt Éx. 19:6\x* y loqꞌotal alaq ruma ri Dios re kuꞌana alaq utinamit\x * \xo 2:9 \xt Dt. 7:6; Is. 43:21\x* chaꞌ katzijoj alaq chike ri tikawex janipa taq ri uꞌanom ri Dios, ri xresaj lo alaq chupa ri qꞌequꞌm y xuya alaq chupa ri chomilaj Qꞌijsaq.  
\v 10 Ralaq ojertan na alaq ta utinamit ri Dios, noꞌj woꞌora alaq chi utinamit Rire. Ma ojertan na xetaꞌmaj ta alaq puwi ri relej ukꞌuꞌx ri Dios; noꞌj woꞌora ri Dios ukꞌutum chi waꞌ che ralaq.   
\s1 Ri jusukꞌ bꞌinik silabꞌik chwach ri Dios y chikiwach ri winaq  
\p
\v 11 Hermanos ri lik kꞌax kannaꞌ alaq, kꞌuna chikꞌuꞌx alaq, ralaq na alaq ta re ruwachulew, ma alaq xa ikꞌowel. E uwariꞌche kampixabꞌaj alaq, maya ibꞌ alaq che taq ri rayibꞌal re ri tiꞌjil alaq ma waꞌ kachꞌoꞌjin pa animaꞌ alaq chaꞌ kuyoj ri kꞌaslemal alaq.  
\v 12 Ri ꞌana alaq e kꞌutu alaq jun bꞌinik silabꞌik lik jusukꞌ chikiwach ri winaq na ketaꞌam ta uwach ri Dios. Jekꞌulaꞌ echiriꞌ kakꞌun tanchi ri Qanimajawal, rike kakiyak uqꞌij ri Dios ruma kilom ri chomilaj chak ꞌanom alaq, tobꞌ woꞌora kechꞌaꞌt chiꞌij alaq.  
\v 13 Ruma kꞌu ri Qanimajawal, lik kojo alaq kitzij konoje ri yaꞌtal pakiqꞌabꞌ ketaqan che ruwachulew, e pachaꞌ ri nimalaj taqanel kꞌo pakiwi ukꞌiyal tinamit  
\v 14 y taq ri e aj wach ekojotal ruma ri nimalaj taqanel re kekiya pa kꞌax ri kakiꞌan ri na utz taj y re kakiyak kiqꞌij ri kakiꞌan ri utz.  
\v 15 Ma ri lik karaj ri Dios che alaq e kaꞌan alaq ri utz chaꞌ e kaqꞌatej alaq taq ri chꞌaꞌtibꞌenik kaꞌan chiꞌij alaq kuma ri tikawex na jinta kinaꞌoj.  
\v 16 Paqꞌabꞌ alaq kꞌo wi saꞌ ri kaꞌan alaq; yey waꞌ na e ta re kaꞌan alaq ri na utz taj, ma e re kuꞌana alaq aj chakibꞌ re ri Dios y jekꞌulaꞌ e kaꞌan alaq ri karaj Rire.  
\v 17 ꞌAna alaq chike konoje ri tikawex janipa ri taqal chike; makꞌaq bꞌi alaq uqꞌij junoq. Kꞌax chenaꞌa alaq ri hermanos. Kꞌola xiꞌin ibꞌ pa animaꞌ alaq chwach ri Dios. Loqꞌnimaj alaq ri rey.   
\p
\v 18 Ralaq alaq aj chakibꞌ, kojo alaq kitzij ri patrón alaq y yaꞌa ibꞌ alaq chitaqik kuma rike. Waꞌ na xew ta kaꞌan alaq kukꞌ ri lik utz kikꞌuꞌx ma jenelaꞌ ꞌana alaq kukꞌ ri lik na jinta kakuyuw ke.  
\v 19 Ma e lik utz riꞌ we junoq ruma kunaꞌ chukꞌuꞌx e kuꞌan ri karaj ri Dios che, kuya ranimaꞌ kuchꞌij taq ri kꞌaxkꞌobꞌik kape puwiꞌ tobꞌ waꞌ na taqal ta che. ¡Yey ri Dios kuyak uqꞌij ri kaꞌanaw waꞌ!  
\v 20 Noꞌj we e laꞌ lik chirij mak alaq xchꞌay kan alaq yey lik xkuy alaq waꞌ, ¿saꞌ kꞌu riꞌ ri yakbꞌal qꞌij alaq? ¡Na jintaj! Noꞌj we kakuy kꞌu alaq ri kꞌax kaꞌan che alaq ruma ri utz katajin alaq che uꞌanik, riꞌ lik kꞌo yakbꞌal qꞌij alaq chwach ri Dios.  
\v 21 E ne ruma waꞌ xusikꞌij alaq ri Dios, ma ri Cristo xutij kꞌax quma riꞌoj; yey taq ri xuꞌano e kꞌutubꞌal chiqe riꞌoj chaꞌ kojbꞌin jelaꞌ pachaꞌ xbꞌin Rire.  
\v 22 Ma jewaꞌ tzꞌibꞌital kan puwi ri Cristo pa Ruchꞌaꞌtem ri Dios:  
\q1 Rire na xmakun taj,  
\q1 y na jinta ne kꞌana sokosoꞌnik xel puchiꞌ \rq Is. 53:9 \rq*  
\m kachaꞌ.  
\v 23 Echiriꞌ ri winaq lik xkikꞌaq bꞌi uqꞌij rukꞌ itzelilaj chꞌaꞌtem, Rire na xukꞌul ta uwach rukꞌ itzelilaj chꞌaꞌtem. Yey echiriꞌ kiyaꞌom pa kꞌaxkꞌolil, Rire na xubꞌiꞌij taj kuꞌan ukꞌaxel chike ri kakiꞌan kꞌax che; ri xuꞌano, e xuya ronoje puqꞌabꞌ ri Dios, ri kuꞌan qꞌatbꞌal tzij chi jusukꞌ.  
\v 24 Ekꞌu ri Cristo xukꞌam bꞌi ri qamak che rucuerpo echiriꞌ xkam chwa ri cruz. Xuꞌan kꞌu waꞌ chaꞌ jelaꞌ kaqaya kan ri mak y e kaqaya qibꞌ che ri jusukꞌ bꞌinik silabꞌik.\f + \fr 2:24 \ft Pa ri chꞌaꞌtem griego kubꞌiꞌij “chaꞌ oj kaminaq chi chwa ri mak yey oj kꞌas che ri jusukꞌ bꞌinik silabꞌik”.\f* Ma jewaꞌ tzꞌibꞌital kan pa Ruchꞌaꞌtem ri Dios:  
\q1 Ruma kꞌu ri kꞌax xutij Rire,  
\q1 xixkunutaj riꞌix \rq Is. 53:5 \rq*  
\m kachaꞌ.  
\v 25 Rojertan, alaq pachaꞌ bꞌexex e sachinaq; noꞌj woꞌora xtzelej lo alaq rukꞌ ri Cristo, ri Aj Kꞌamal Qawach y ri Chajinel re ri qakꞌaslemal chwach ri Dios.   
\c 3  
\s1 Pixabꞌanik chike ri e kꞌulanik  
\p
\v 1 Ekꞌu rilal ixoq, e taqej la ri achijil la. ꞌAna kꞌu la waꞌ ma we rire na ukojom ta Ruchꞌaꞌtem ri Dios, tobꞌ na jinta kabꞌiꞌij la che chwi waꞌ, kꞌo pa saq kukojo ruma ri bꞌinik silabꞌik rilal  
\v 2 ma karilo lik ubꞌe ri kaꞌan la y lik lal nimay tzij.  
\v 3 Ruchomalil juna ixoq na e ta ruma ri wiqital che rucuerpo; e uwariꞌche na utz ta kꞌu riꞌ we kikꞌow uwiꞌ che uyijbꞌaxik ruwiꞌ, o kikꞌow uwiꞌ rukꞌ ri uwaaj y usansilo re oro o ri kꞌul lik kꞌi rajil kukojo.  
\v 4 Ma ruchomalil rixoq e ri kꞌo chupa ri ranimaꞌ; waꞌ e ri lik utz ukꞌuꞌx y na aj ta tzukul chꞌaꞌoj. Yey waꞌ wa uchomalil na kasach ta kꞌana uwach y lik kꞌo uqꞌij chwach ri Dios.  
\v 5 Rojertan jelaꞌ xkiꞌan rixoqibꞌ e jusukꞌ, ri lik xkubꞌiꞌ kikꞌuꞌx rukꞌ ri Dios. Ma ri kichomalil rike xilitaj che ri kibꞌinik kisilabꞌik ruma xekitaqej ri kachijil.  
\v 6 Jelaꞌ xuꞌan ri Sara, e lik xukoj utzij ri Abraham y ruchꞌaꞌbꞌexik xuꞌano e “lal wajawal”. Ekꞌu ralaq kuꞌana alaq ralkꞌoꞌal ri Sara we kaꞌan alaq ri utz y na jinta kꞌo kuxiꞌij ribꞌ kꞌuꞌx alaq che.   
\p
\v 7 Ekꞌu rilal achi, jeqela la rukꞌ ri ixoqil la rukꞌ saqil naꞌoj. ꞌAna la che janipa ri taqal che rire. Kꞌuna kꞌu chikꞌuꞌx la e rire lik na jinta ko ukowil yey junam uwach ukꞌ la, ma junam kakꞌul alaq ri unimal rutzil ukꞌuꞌx ri Dios che ri kꞌaslemal alaq. We kaꞌan kꞌu la waꞌ, echiriꞌ kaꞌan la orar, na jinta kalatzꞌan re ri chꞌaꞌtem la chwach ri Dios.   
\s1 Pixabꞌanik puwi ri qabꞌinik qasilabꞌik  
\p
\v 8 Kꞌisbꞌal kꞌu re waꞌ, e chuꞌana xa jun kꞌuꞌx alaq, kꞌola kꞌaxnaꞌbꞌal kꞌuꞌxaj ukꞌ alaq, lik kꞌax naꞌa ibꞌ alaq chiwach alaq ma chaqꞌ ibꞌ alaq chwach ri Qaqaw, kꞌutu kꞌu alaq ri rutzil kꞌuꞌx alaq y ꞌana alaq chꞌutiꞌn che ibꞌ alaq.  
\v 9 Matzelej alaq uwach ri na utz taj kaꞌan che alaq. We kꞌo junoq kubꞌiꞌij itzelilaj chꞌaꞌtem che alaq, matzelej alaq uwach rukꞌ itzelilaj chꞌaꞌtem; ri ꞌana alaq e tzꞌonoj alaq ri utz puwi ri kaꞌanaw re waꞌ. Yey we kaꞌan alaq waꞌ, ri Dios kuya na ri utz pawiꞌ alaq, ma ruma waꞌ xusikꞌij alaq.  
\v 10 Ma jewaꞌ tzꞌibꞌital kan pa Ruchꞌaꞌtem ri Dios:  
\q1 China ri kꞌax kunaꞌ rukꞌaslem  
\q2 y karaj karikꞌowibꞌej ri jujun qꞌij rukꞌ kiꞌkotem,  
\q1 e chuqꞌatej kꞌu riꞌ ri raqꞌ che ubꞌiꞌxikil ri na chom taj  
\q2 y muꞌan chi ri kel lo raqꞌubꞌal puchiꞌ.   
\q1
\v 11 Resaj kꞌu ribꞌ riꞌ che uꞌanik ri na utz taj,  
\q2 yey e chuꞌana ri utz.  
\q1 Chutzukuj kakꞌojiꞌ chi utzil chomal kukꞌ konoje y  
\q2 e chuyaꞌa ribꞌ che uꞌanik waꞌ.   
\q1
\v 12 Ma ri Qanimajawal kꞌo ruwach pakiwi  
\q2 ri jusukꞌ kibꞌinik kisilabꞌik re kebꞌuchajij,  
\q1 yey lik kuya uxikin chike  
\q2 echiriꞌ kechꞌaꞌt rukꞌ pa oración.  
\q1 Noꞌj na chom ta keril  
\q2 janipa ri kakiꞌan ri na utz taj \rq Sal. 34:12-16 \rq*  
\m kachaꞌ.   
\p
\v 13 ¿China kꞌu ri kaꞌanaw ri na utz taj che alaq we e lik yaꞌom ibꞌ alaq che uꞌanik ri utz?\x * \xo 3:13 \xt Ro. 8:31\x*  
\v 14 Pero we katij alaq kꞌax ruma kaꞌan alaq ri lik jusukꞌ, riꞌ lik nim qꞌij alaxik alaq. E uwariꞌche, maxiꞌij ibꞌ alaq che ri xibꞌibꞌal pa alaq kaꞌanik yey masach kꞌuꞌx alaq che waꞌ.  
\v 15 Ri ꞌana alaq e loqꞌoj alaq uqꞌij ri Cristo chupa ri animaꞌ alaq, ma Rire e Qajawal. Xaqi yijbꞌaꞌ ibꞌ alaq che ukꞌulik uwach taq ri tzꞌonobꞌal kaꞌan che alaq puwi ri kubꞌul pan kꞌuꞌx alaq che; yey ꞌana alaq waꞌ rukꞌ uchꞌutiꞌnal kꞌuꞌx alaq y xiꞌin ibꞌ alaq chwach ri Dios.  
\v 16 Bꞌina alaq chi jusukꞌ chaꞌ jelaꞌ kunaꞌ kꞌuꞌx alaq na jinta mak ꞌanom alaq. ꞌAna kꞌu alaq waꞌ chaꞌ e janipa ri kechꞌaꞌt chirij ri chomilaj bꞌinik alaq rukꞌ ri Cristo, kayaꞌtaj kikꞌix ruma ri raqꞌubꞌal kakiꞌan chiꞌij alaq.  
\v 17 Ma we e karaj riꞌ ri Dios katij alaq kꞌax ruma kaꞌan alaq ri utz, waꞌ e más utz chwa ri katij alaq kꞌax ruma kaꞌan alaq ri na utz taj.  
\v 18 Kꞌuna chikꞌuꞌx alaq, ri Cristo lik xutij kꞌax echiriꞌ xa jumul xkam ruma ri qamak. Tobꞌ Rire na jinta umak, xkam quma riꞌoj oj aj makibꞌ chaꞌ jelaꞌ kojukꞌam bꞌi rukꞌ ri Dios. Echiriꞌ ri Cristo xkamisax kuma ri winaq, paqatzij wi xkam rucuerpo; pero Rire xkꞌastajik, ma na xkam ta ri ranimaꞌ.  
\v 19 Jekꞌulaꞌ xeꞌek pa ekꞌowi ri ekaminaq, waꞌ e ri tzꞌapim kichiꞌ, y xuꞌtzijoj chike janipa ri xuꞌano.  
\v 20 Yey xtataj waꞌ kuma ri na xkikoj ta utzij ri Dios ojertan chupa ruqꞌijol ri Noé. Ma ri Dios rukꞌ unimal ukꞌuꞌx xeroyꞌej kakitzelej kitzij chupa taq laꞌ la qꞌij echiriꞌ ri Noé katajin che uꞌanik ri nimalaj barco. Yey chupa kꞌu ri barco xa e ajilam ri xebꞌok bꞌi, ma e wajxaqibꞌ ri xekolobꞌetaj che runimal jabꞌ.  
\v 21 Y waꞌ e pachaꞌ ri bautismo kaqakꞌul riꞌoj waqꞌij ora re kolobꞌetajik. Wa bautismo na re ta karesaj ri chꞌul kꞌo che ri qacuerpo, ma e re karesaj ri mak kꞌo pa qanimaꞌ y ruma kꞌu waꞌ kaqajikibꞌaꞌ chwach ri Dios kojkꞌojiꞌ chi jusukꞌ. Yey qetaꞌam lik jikibꞌam uwach ri qakolobꞌetajik ruma rukꞌastajibꞌal ri Qanimajawal Jesucristo,  
\v 22 ri xeꞌek chilaꞌ chikaj y tzꞌul puwikiqꞌabꞌ ri Dios. Konoje kꞌu ri ángeles, kukꞌ taq ri kꞌo kiwach y ri kꞌo kichuqꞌabꞌ e kꞌo chuxeꞌ rutaqanik Rire.   
\c 4  
\s1 Chojchakuna chi utz rukꞌ taq ri uyaꞌom ri Dios paqaqꞌabꞌ  
\p
\v 1 Ri Cristo lik xuya ranimaꞌ kutij kꞌax quma riꞌoj. Jekꞌulaꞌ riꞌ, lik chirajawaxik che alaq kaya animaꞌ alaq katij alaq kꞌax ruma Rire. Ma e janipa ri kakiya kanimaꞌ kakiꞌan ri utz tobꞌ kape kꞌax pakiwiꞌ, qꞌalaj kꞌu riꞌ na e jinta chi puqꞌabꞌ ri mak.  
\v 2 Ruma kꞌu laꞌ, janipa chi qꞌij e kꞌo che ruwachulew, na kakiꞌan ta chi janipa ri rayibꞌal ke ri winaq, ma e kakiꞌan janipa ri karaj ri Dios.  
\v 3 Ri uꞌanom loq e xꞌan lo alaq pachaꞌ ri kakiꞌan ri winaq na ketaꞌam ta uwach ri Dios. Ma xya ibꞌ alaq che uꞌanik taq ri rayibꞌal re ri tiꞌjil alaq, yey xya ibꞌ alaq pa qꞌabꞌarik y xmol ibꞌ alaq che uꞌanik chꞌulilaj mak; xya ibꞌ alaq che ri lik na chom ta uwach yey lik itzel taq uwach ri xꞌan alaq echiriꞌ xloqꞌnimaj alaq taq ri tiox.\f + \fr 4:3 \ft Rojertan e kꞌo winaq kakikamisaj ri kalkꞌoꞌal re qasaꞌn chwach taq ri kitiox.\f*  
\v 4 E taq kꞌu ri xkachbꞌilaj alaq che uꞌanik waꞌ wuꞌkꞌiyal uwach mak, xkam kanimaꞌ che echiriꞌ xesaj ibꞌ alaq che taq waꞌ; yey ruma riꞌ lik kꞌax kechꞌaꞌt chiꞌij alaq.  
\v 5 Pero kopon kꞌu ri qꞌij echiriꞌ konoje rike kakiya na kibꞌ chupa ri kimak chwach ri Jun kuqꞌat tzij pakiwi ri e kꞌaslik y ri ekaminaq.  
\v 6 Ruma ne kꞌu laꞌ, xtzijox ri Utzilaj Tzij chike ri ekaminaq chupa ri kimak chaꞌ kakꞌojiꞌ kikꞌaslemal na jinta utaqexik chwach ri Dios, tobꞌ chikiwach taq ri winaq, na utz ta ri xkiꞌan rike ruma xkikoj rubꞌiꞌ ri Cristo.   
\p
\v 7 Lik xa naqaj chi kꞌo wi lo ruqꞌijol echiriꞌ kakꞌis ri na utz ta uwach y kajalkꞌatisax kꞌu ronoje ri kꞌolik. Ruma kꞌu riꞌ, lik kꞌola naꞌoj alaq puwiꞌ saꞌ taq ri kaꞌan alaq y xaqi e yaꞌa ibꞌ alaq pa oración chwach ri Dios.  
\v 8 Yey ri más chirajawaxik wi e rukꞌ ronoje kꞌuꞌx alaq kꞌax kanaꞌ ibꞌ alaq chiwach alaq, ma we lik kꞌo rutzil kꞌuꞌxaj ukꞌ alaq, riꞌ kakuy alaq taq rukꞌiyal mak ke ri nikꞌaj chik.  
\v 9 Chekꞌulu alaq chi utz ri kebꞌopon chi ocho alaq y mawunwut ne alaq che uꞌanik waꞌ.  
\v 10 Ekꞌu chirij ri uyaꞌom ri Dios paqꞌabꞌ alaq, chetoꞌo alaq ri jujun chik, chaꞌ jelaꞌ kuꞌan alaq saqil aj chakibꞌ re ri Dios y kachakun alaq chi utz rukꞌ rukꞌiyal uwach toꞌbꞌal uyaꞌom ri Dios che alaq.  
\v 11 We kꞌo junoq kakꞌutun chikiwach ri hermanos, e chukꞌutu puwi ri kubꞌiꞌij Ruchꞌaꞌtem ri Dios y na xa ta pa re kachꞌaꞌtik. We kꞌo junoq karaj kebꞌutoꞌ ri tikawex, chuꞌana waꞌ rukꞌ ri chuqꞌabꞌ yaꞌtal che ruma ri Dios. Ronoje kꞌu ri kaꞌan alaq, ꞌana alaq re yakbꞌal uqꞌij ri Dios ruma ri Qanimajawal Jesucristo, ri lik taqal che kꞌo yakbꞌal uqꞌij y kataqan kꞌu pakiwi konoje waqꞌij ora y chiqawach apanoq na jinta utaqexik. Amén.   
\s1 Chojkiꞌkotoq we kaqatij kꞌax ruma oj re ri Cristo  
\p
\v 12 Hermanos, makam animaꞌ alaq che taq runimal kꞌaxkꞌobꞌik kape pawiꞌ alaq re kukꞌam pa alaq, ma qonoje kojikꞌow chupa waꞌ.  
\v 13 Ri ꞌana alaq e kiꞌkota alaq, ma alaq bꞌare jun che taq ri kꞌaxkꞌobꞌik xikꞌow wi ri Cristo, chaꞌ echiriꞌ kuqꞌalajisaj runimal uchomalil, ralaq lik kakiꞌkot alaq che.  
\v 14 We e kꞌo tzel kechꞌaꞌt chiꞌij alaq ruma kojom alaq rubꞌiꞌ ri Cristo, riꞌ lik nim qꞌij alaxik alaq ma ri chomilaj Ruxlabꞌixel ri Dios kꞌo ukꞌ alaq. Qatzij wi, e kꞌo ri tzel kechꞌaꞌt chirij Rire, noꞌj ralaq lik kayak alaq uqꞌij Rire.  
\v 15 We kꞌo junoq che alaq kutij kꞌax, lik kꞌixbꞌal uwach we waꞌ e ruma kamisanel o eleqꞌom o ruma uꞌanom ri na utz taj che junoq o ruma uminom ribꞌ chupa ri na jinta re che.  
\v 16 Noꞌj we kꞌo junoq kutij kꞌax ruma ukojom rubꞌiꞌ ri Cristo, makꞌix kꞌu riꞌ che; ri chuꞌanaꞌ e chuyaka uqꞌij ri Dios ruma waꞌ.  
\v 17 Ma e qꞌij waꞌ kajeqer bꞌi ri qꞌatbꞌal tzij pakiwi ri e ralkꞌoꞌal ri Dios. Yey we nabꞌe kꞌut kajeqer qukꞌ riꞌoj, ¿saꞌ nawi keꞌkikꞌisa wi riꞌ ri na kikojom ta ri Utzilaj Tzij re ri Dios?  
\v 18 Ma jewaꞌ kubꞌiꞌij pa Ruchꞌaꞌtem ri Dios:  
\q1 We ri e jusukꞌ chwach ri Dios rukꞌ ne ukꞌayewal kekolobꞌetajik,  
\q1 ¿saꞌ kꞌu kakikꞌulumaj riꞌ ri e aj mak, ri kakiꞌan kititzꞌitikil che ri Dios?\x * \xo 4:18 \xt Pr. 11:31\x*   
\m
\v 19 E uwariꞌche, e taq ri e kꞌo pa kꞌax ruma kakiꞌan janipa ri karaj ri Dios, e kiꞌana riꞌ ri lik usukꞌ y kiyaꞌa kꞌu ri kikꞌaslemal puqꞌabꞌ ri Dios, ri xꞌanaw re ronoje y lik e kuꞌan janipa rubꞌiꞌtisim.   
\c 5  
\s1 Pixabꞌanik chike ri e aj wach re riglesia  
\p
\v 1 Woꞌora kuaj kebꞌenupixabꞌaj ri e aj wach re riglesia. Riꞌin in jun kukꞌil rike, yey in jun xinwil ri kꞌaxkꞌolil xikꞌow wi ri Qanimajawal Jesucristo. Yey in bꞌare jun kꞌo we che ri chomilaj yakbꞌal uqꞌij ri Cristo, ri kaqꞌalajisax na uwach chiqawach apanoq.  
\v 2 Kantzꞌonoj ko che alaq: Chechajij alaq chi utz rutinamit ri Dios, ri eyaꞌom chwi qꞌabꞌ alaq. Chechajij kꞌu alaq chi utz rukꞌ ronoje kꞌuꞌx alaq y na xa ta ruma kamin alaq chupa o xa ruma rayibꞌal puaq, ma ri karaj e lik kacha kꞌuꞌx alaq che uꞌanik waꞌ.  
\v 3 Maꞌan ne alaq ri xew kataqan alaq pakiwiꞌ; ri ꞌana alaq e kꞌutu alaq ri chomilaj bꞌinik silabꞌik alaq chikiwach rike.  
\v 4 We ekꞌu kaꞌan alaq waꞌ, echiriꞌ kakꞌun ri Qanimajawal Jesucristo, ri Chajinel kꞌo pakiwi konoje ri e aj chajal rutinamit ri Dios, Rire kuya chijujunal alaq jun corona na kasach ta kꞌana uwach, kꞌutubꞌal re runimal uwach Rire.   
\s1 Pixabꞌanik chike rutinamit ri Dios  
\p
\v 5 Ekꞌu riꞌix ix alabꞌo, chikojo kitzij ri e aj wach re riglesia. Yey chirajawaxik che onoje alaq kaꞌan alaq chꞌutiꞌn che ibꞌ alaq chiwach alaq, ma jewaꞌ tzꞌibꞌital kan chupa Ruchꞌaꞌtem ri Dios:  
\q1 Ri Dios uyakom ribꞌ chikij  
\q2 janipa ri kakitakꞌabꞌaꞌ kiqꞌij;  
\q1 noꞌj uyaꞌom ri unimal rutzil ukꞌuꞌx chike  
\q2 janipa ri kakiꞌan chꞌutiꞌn che kibꞌ \rq Pr. 3:34 \rq*  
\m kachaꞌ.  
\v 6 ꞌAna chꞌutiꞌn che ibꞌ alaq y yaꞌa kꞌu ibꞌ alaq puqꞌabꞌ ri Dios, ri kꞌo unimal uchuqꞌabꞌ; jekꞌulaꞌ Rire lik kuyak qꞌij ralaq echiriꞌ kopon na ruqꞌijol.  
\v 7 Ronoje rubꞌis kꞌuꞌx alaq yaꞌa alaq chwach ri Dios, ma Rire lik kok il che chajixik alaq.   
\p
\v 8 Lik kꞌola naꞌoj alaq puwi saꞌ taq ri kaꞌan alaq y mawar wach alaq. Ma ritzel winaq, ri aj retzelal kꞌuꞌx chiꞌij alaq, e kutzukuj suꞌanik katzaq alaq puqꞌabꞌ jelaꞌ pachaꞌ juna koj lik kusut kij ri tikawex re kutzukuj china ri kubꞌiqꞌ bꞌi.  
\v 9 Lik chꞌija alaq uchuqꞌabꞌ ritzel y lik chuqꞌubꞌej ibꞌ alaq che ri kubꞌulibꞌal kꞌuꞌx alaq rukꞌ ri Cristo. Yey mikꞌow chikꞌuꞌx alaq na xew ta ralaq kikꞌowibꞌej alaq kꞌaxkꞌobꞌik, ma jenelaꞌ ri qa hermanos e kꞌo che ronoje ruwachulew kakikꞌowibꞌej kꞌaxkꞌobꞌik.   
\p
\v 10 Ri Dios xojusikꞌij chaꞌ kojkꞌojiꞌ rukꞌ ri Qanimajawal Jesucristo chupa ri chomilaj utaqanik na jinta utaqexik. Ruma kꞌu waꞌ, echiriꞌ ikꞌowinaq chi alaq jujun qꞌij chupa wa kꞌax; ri Dios, ri lik kojutoꞌ che ronoje ruma ri unimal rutzil ukꞌuꞌx, e kuyak tanchi alaq, kukowirisaj alaq, kuya chuqꞌabꞌ alaq y kutikibꞌaꞌ alaq chi utz.  
\v 11 Che kꞌu ri Dios taqal wi kayak uqꞌij waqꞌij ora y chiqawach apanoq, ma ruchuqꞌabꞌ na jinta utaqexik. Amén.   
\s1 Kꞌisbꞌal chꞌaꞌtem re ri Pedro chike taq riglesias  
\p
\v 12 Xintzꞌibꞌan kꞌu pan che alaq; yey ri hermano Silvano, ri lik kubꞌul nukꞌuꞌx rukꞌ, e kakꞌamaw bꞌi waꞌ wa carta che alaq. Ximpixabꞌaj kꞌu alaq y xinqꞌalajisaj chiwach alaq ri saqil unimal rutzil ukꞌuꞌx ri Dios; tikila kꞌu alaq chi utz chupa waꞌ.   
\p
\v 13 Rutinamit ri Dios, ri e kꞌo pa ri tinamit re Babilonia, ri echaꞌtal ruma ri Dios junam ukꞌ ralaq, rike junam rukꞌ ri Marcos, ri pachaꞌ nukꞌajol chupa rubꞌiꞌ ri Cristo, kakiya pan rutzil wach alaq.  
\v 14 Yaꞌa alaq rutzil wach alaq chiwach alaq rukꞌ jun saqil tzꞌubꞌuj chiꞌaj,\f + \fr 5:14 \ft Ri Pedro jewaꞌ xubꞌiꞌij ma rike e kakiꞌan waꞌ chikiwach echiriꞌ kakiya rutzil kiwach.\f* kꞌutubꞌal re kꞌax kanaꞌ ibꞌ alaq. Kꞌola utzil chomal chixoꞌl alaq, ri kꞌo alaq puqꞌabꞌ ri Qanimajawal Jesucristo. Amén.