\id 1JN - Achi’, Rabinal (new orthography) NT - 2009 (DBL 2013) 
\h 1 Juan 
\toc1 Ri nabꞌe carta xutzꞌibꞌaj ri Juan 
\toc2 1 Juan 
\toc3 1 Jn 
\mt1 Ri nabꞌe carta xutzꞌibꞌaj ri Juan  
\c 1  
\s1 Ri Tzij re kꞌaslemal  
\p
\v 1 Kaqatzꞌibꞌaj pan wa carta che alaq chwi ri Jun xex chi kꞌo lo wi echiriꞌ kꞌamajaꞌ ne kaꞌan ruwachulew, puwi saꞌ taq ri xubꞌiꞌij yey puwi ri qilom rukꞌ ri qawach. Ma paqatzij wi xqil uwach y xqachap ne rukꞌ ri qaqꞌabꞌ. Kojtzꞌibꞌan kꞌu riꞌ puwi ri Jun paqatzij wi e ri Tzij,\x * \xo 1:1 \xt Jn. 1:1\x* ri kuya kꞌaslemal.  
\v 2 Wa Jun kuya kꞌaslemal xkꞌun che ruwachulew yey riꞌoj xqil uwach. E uwariꞌche kaqabꞌiꞌij saꞌ ri qilom y kaqaqꞌalajisaj kꞌu che alaq puwi wa Jun na jinta utaqexik rukꞌaslemal. Rire xex chi kꞌo lo wi rukꞌ ri Qaqaw Dios yey xuqꞌalajisaj kꞌu ribꞌ chiqawach riꞌoj.  
\v 3 Janipa kꞌu ri qilom y ri qatom, e kaqaqꞌalajisaj pan che alaq; ma e kaqaj kuꞌan alaq xa jun qukꞌ riꞌoj jelaꞌ pachaꞌ riꞌoj paqatzij wi xa jun qaꞌanom rukꞌ ri Qaqaw Dios y rukꞌ Rukꞌajol, waꞌ e ri Qanimajawal Jesucristo.  
\v 4 Kaqatzꞌibꞌaj pan wa carta che alaq chaꞌ junam kakiꞌkot alaq qukꞌ.   
\s1 Ri lik chirajawaxik wi e kojbꞌin chupa ri Qꞌijsaq  
\p
\v 5 Ekꞌu wa tzij qatom che ri Qanimajawal Jesucristo e kaqaqꞌalajisaj che alaq: Ri Dios e Qꞌijsaq yey rukꞌ Rire na jinta kꞌana qꞌequꞌmalil.  
\v 6 We kaqabꞌiꞌij xa jun qaꞌanom rukꞌ ri Dios yey kojbꞌin chupa ri qꞌequꞌmalil, riꞌ kojelik xa oj aj raqꞌul y na kojbꞌin ta kꞌu chupa ri Qꞌijsaq.  
\v 7 Noꞌj we kojbꞌin chupa ri Qꞌijsaq jelaꞌ pachaꞌ ri Dios kꞌo pa ri Qꞌijsaq, riꞌ xa jun qaꞌanom chiqawach. Yey ronoje ri qamak kachꞌajtaj\f + \fr 1:7 \ft Echiriꞌ kubꞌiꞌij kachꞌajtaj ronoje ri qamak, waꞌ e keꞌelawi, ri Dios kukuy ri qamak y na kape ta chi kꞌu ruqꞌatbꞌal tzij paqawiꞌ.\f* kꞌu riꞌ ruma rukikꞌel ri Qanimajawal Jesucristo, Rukꞌajol ri Dios.  
\v 8 Pero we kaqabꞌiꞌij na jinta qamak, riꞌ xa e kaqasok qibꞌ chiqibꞌil qibꞌ y na qatzij ta ri kaqabꞌiꞌij.  
\v 9 Noꞌj we kaqaqꞌalajisaj ri qamak chwach ri Dios, Rire kukuy qamak y kojuchꞌaj che ronoje ri na utz taj kꞌo pa qanimaꞌ, ma Rire lik jusukꞌ y ujikibꞌam uwach kuꞌan waꞌ yey Rire na kuꞌan ta raqꞌubꞌal.  
\v 10 We kaqabꞌiꞌij na oj ta makuninaq, riꞌ e pachaꞌ kaqaꞌan aj raqꞌul che ri Dios, ma kaqabꞌiꞌij na qatzij ta ri ubꞌiꞌim kan Rire.\x * \xo 1:10 \xt Pr. 20:9; Ecl. 7:20\x*   
\c 2  
\s1 Ri Qanimajawal Jesucristo kachꞌaw paqawiꞌ chwach ri Dios  
\p
\v 1 Ralaq alaq walkꞌoꞌal chupa rubꞌiꞌ ri Dios, kantzꞌibꞌaj kꞌu pan waꞌ che alaq chaꞌ na kamakun ta alaq. Yey we kꞌo junoq che alaq kamakunik, chetaꞌmaj alaq kꞌo Jun kachꞌaw paqawiꞌ chwach ri Qaqaw, waꞌ e ri Qanimajawal Jesucristo, yey Rire lik jusukꞌ.  
\v 2 E Rire ri xuya ribꞌ xkam paqakꞌaxel re tojbꞌal ri qamak. Y na xew ta re tojbꞌal ri qamak riꞌoj, ma re tojbꞌal ri kimak konoje ri e kꞌo che ruwachulew.   
\p
\v 3 We kaqaꞌan ri taqanik kuya ri Dios chiqe, kaqꞌalajin kꞌu riꞌ paqatzij wi qetaꞌam uwach Rire.  
\v 4 We kꞌo kabꞌiꞌn re: «Riꞌin wetaꞌam uwach ri Dios» yey na kuꞌan ta janipa ri taqanik kuya ri Dios che, riꞌ xa aj raqꞌul y na jinta ri Qꞌijsaq rukꞌ.  
\v 5 Noꞌj ri kutaqej ri kubꞌiꞌij ri Dios, riꞌ kaqꞌalajinik paqatzij wi lik kꞌax kunaꞌ ri Dios. We jekꞌulaꞌ kaqaꞌan riꞌoj, qꞌalaj kꞌu riꞌ paqatzij wi xa jun qaꞌanom rukꞌ Rire.  
\v 6 We kꞌo junoq kubꞌiꞌij xa jun uꞌanom rukꞌ ri Dios, chirajawaxik kꞌu riꞌ chuꞌana che rubꞌinik jelaꞌ pachaꞌ rubꞌinik ri Qanimajawal Jesucristo.   
\s1 Ri taqanik puwi ri saqil rutzil kꞌuꞌxaj  
\p
\v 7 Hermanos, na kantzꞌibꞌaj ta jun kꞌakꞌ tzijpixabꞌ\f + \fr 2:7 \ft Wa tzijpixabꞌ e ri kꞌax kaqanaꞌ qibꞌ chiqawach rukꞌ ri saqil rutzil kꞌuꞌxaj xukꞌut ri Jesús. Jn. 13:34\f* che alaq, ma e kantzꞌibꞌaj chwi ri xex chi kꞌo ukꞌ alaq chwi ri petinaq loq. Wa ojer tzijpixabꞌ e ri xex chi tom wi lo alaq.  
\v 8 Na rukꞌ ta kꞌu riꞌ, e pachaꞌ kꞌakꞌ wa kantzꞌibꞌaj che alaq, ma waꞌ lik xqꞌalajin che rubꞌinik ri Jesús yey kaqꞌalajin kꞌu che ri bꞌinik silabꞌik ralaq, ma ri qꞌequꞌmalil katajin upakatajik y ri saqil Qꞌijsaq kawon chik.   
\p
\v 9 We kꞌo junoq kubꞌiꞌij kꞌo chupa ri Qꞌijsaq yey tzel karil ri ratz-uchaqꞌ, riꞌ kꞌa kꞌo pa qꞌequꞌmalil.  
\v 10 Noꞌj we junoq kꞌax kunaꞌ ri ratz-uchaqꞌ, riꞌ kꞌo chupa ri Qꞌijsaq y na jinta kꞌo kaminow re pa mak.  
\v 11 Pero ri tzel karil ri ratz-uchaqꞌ, riꞌ kꞌa kꞌo pa qꞌequꞌmalil y kabꞌin kꞌu chupa waꞌ. Ruma laꞌ, na retaꞌam taj pachawi keꞌek wi, ma ruma kꞌo chupa ri qꞌequꞌmalil e junam rukꞌ pachaꞌ potzꞌ.   
\q1
\v 12 Kantzꞌibꞌaj pan waꞌ che alaq, ralaq walkꞌoꞌal chupa rubꞌiꞌ ri Dios,  
\q1 ma kuytajinaq chi mak alaq ruma ri xuꞌan ri Qanimajawal Jesucristo.   
\q1
\v 13 Kantzꞌibꞌaj pan waꞌ che alaq ri kꞌo alkꞌoꞌal alaq,  
\q1 ma xetaꞌmaj alaq uwach ri Qanimajawal,  
\q1 ri xex chi kꞌo lo wi echiriꞌ kꞌamajaꞌ ne kaꞌaniꞌ ruwachulew.  
\q1 Kantzꞌibꞌaj pan waꞌ chiwe ri ix alabꞌo-alito,  
\q1 ma ichꞌijom chi uchuqꞌabꞌ ritzel winaq.  
\q1 Kantzꞌibꞌaj pan waꞌ che alaq, ralaq walkꞌoꞌal chupa rubꞌiꞌ ri Dios;  
\q1 ma xetaꞌmaj alaq uwach ri Qaqaw.   
\q1
\v 14 Xintzꞌibꞌan kꞌu pan che alaq ri kꞌo alkꞌoꞌal alaq,  
\q1 ma etaꞌam chi alaq uwach ri Qanimajawal,  
\q1 ri xex chi kꞌo lo wi echiriꞌ kꞌamajaꞌ ne kaꞌaniꞌ ruwachulew.  
\q1 Xintzꞌibꞌan pan chiwe ri ix alabꞌo-alito,  
\q1 ma lik kꞌo ruchuqꞌabꞌ ri Dios iwukꞌ  
\q1 y Ruchꞌaꞌtem ri Dios lik tikil chupa ri iwanimaꞌ  
\q1 yey lik ichꞌijom chi uchuqꞌabꞌ ritzel winaq.   
\p
\v 15 Meꞌek kꞌuꞌx alaq rukꞌ ri kꞌo che ruwachulew rukꞌ taq ri xa re ruwachulew. Ma we kꞌo junoq e keꞌek ukꞌuꞌx rukꞌ taq waꞌ, riꞌ na kꞌax ta kunaꞌ ri Qaqaw.  
\v 16 Ma e ronoje ri na utz taj kꞌo che ruwachulew, na rukꞌ ta ri Dios petinaq wi, xa e re ruwachulew. Yey waꞌ e taq ri rayinik re ri qatiꞌjil, ri rayinik re kaqaꞌan qeꞌoj che janipa ri kaqilo y ri rayinik re yakbꞌal qaqꞌij.  
\v 17 Ekꞌu ruwachulew xa kakꞌisik junam rukꞌ ronoje ri rayinik na utz taj kꞌo chwach; noꞌj kꞌu ri kaꞌanaw janipa ri karaj ri Dios, riꞌ na jinta utaqexik rukꞌaslemal.   
\s1 Qachajij qibꞌ chikiwach ri e aj sokosoꞌnel  
\p
\v 18 Alaq walkꞌoꞌal chupa rubꞌiꞌ ri Dios, oj kꞌo chi che rukꞌisbꞌal qꞌij. Qetaꞌam chi waꞌ, ma tom chi alaq e kakꞌun lo ri jun kayaktaj chirij ri Cristo, ri kabꞌiꞌx “anticristo”\x * \xo 2:18 \xt 2 Ts. 2:3-4\x* che. Yey woꞌora lik e kꞌi chi ri eyaktajinaq chirij ri Cristo.  
\v 19 Rike tobꞌ xkimol kibꞌ junam qukꞌ riꞌoj, na junam ta kikꞌuꞌx qukꞌ riꞌoj. Ma we ta e riꞌ, xekanaj ta kan qukꞌ. Pero xebꞌel kꞌu bꞌi chiqaxoꞌl riꞌoj, y rukꞌ waꞌ kaqꞌalajinik na jinta junoq chike rike e qukꞌil riꞌoj.   
\p
\v 20 Ekꞌu ralaq na alaq ta jelaꞌ pachaꞌ rike, ma yaꞌtal che ralaq ri Ruxlabꞌixel ri Jun lik nim uqꞌij Santo y ruma kꞌu waꞌ onoje alaq etaꞌam alaq ri Qꞌijsaq.  
\v 21 Kantzꞌibꞌaj pan waꞌ che alaq, na e ta ruma na etaꞌam ta alaq ri Qꞌijsaq re ri Dios, ma e ruma ne ri etaꞌam alaq waꞌ yey etaꞌam chi kꞌu alaq na jinta juna raqꞌubꞌal noꞌjital lo che ri Qꞌijsaq.   
\p
\v 22 ¿China taq ri lik e aj raqꞌul? E taq ri kakibꞌiꞌij: «Ri Jesús na e ta Ruchaꞌoꞌn lo ri Dios.» Ekꞌu taq ri kakibꞌiꞌij waꞌ, na xew ta eyaktajinaq chirij Rukꞌajol ri Dios, ma jenelaꞌ eyaktajinaq chirij ri Qaqaw Dios.  
\v 23 E junoq kubꞌiꞌij: «Ri Jesús na e ta Ukꞌajol ri Dios,» riꞌ na jinta ri Qaqaw Dios rukꞌ. Noꞌj ri kuqꞌalajisaj: «Ri Jesús e Ukꞌajol ri Dios,» riꞌ kꞌo ri Qaqaw Dios rukꞌ.   
\p
\v 24 Ekꞌu ri xex chi tom wi lo alaq puwi ri Cristo, e tikila riꞌ chupa ri animaꞌ alaq. Yey we e uꞌanom riꞌ, kꞌo chi alaq puqꞌabꞌ ri Qaqaw Dios y puqꞌabꞌ Rukꞌajol.  
\v 25 Ekꞌu bꞌiꞌtisinik waꞌ uꞌanom kan ri Qanimajawal Jesucristo: E ri kuya ri kꞌaslemal na jinta utaqexik chiqe.   
\p
\v 26 Kantzꞌibꞌaj kꞌu pan waꞌ che alaq, ma e kꞌo ri kakaj kakisok alaq.  
\v 27 Noꞌj ralaq kꞌo chi pa animaꞌ alaq ri Uxlabꞌixel yaꞌtal che alaq ruma ri Qanimajawal Jesucristo. E uwariꞌche na kajawax taj kakꞌun lo junoq rukꞌ kꞌutunik lik junwi chwa ri qꞌalajisam chi che alaq, ma ri Ruxlabꞌixel ri Dios e kakꞌutuw che alaq ronoje ri Qꞌijsaq re ri Dios. Y janipa ri kukꞌut Rire, lik qatzij, na raqꞌubꞌal taj. Ruma kꞌu riꞌ, tikila alaq chi utz chupa ri majom alaq che ri Ruxlabꞌixel ri Dios.  
\v 28 Ekꞌu woꞌora, ri alaq walkꞌoꞌal chupa rubꞌiꞌ ri Dios, mesaj ibꞌ alaq puqꞌabꞌ ri Qanimajawal Jesucristo, chaꞌ rukꞌ kubꞌulibꞌal qakꞌuꞌx kaqoyꞌej Rire y na kojkꞌix ta chwach Rire echiriꞌ kaqꞌalajin uwach pa rukꞌunibꞌal.  
\v 29 Ralaq etaꞌam chi alaq waꞌ: Rire lik jusukꞌ. Chetaꞌmaj kꞌu alaq riꞌ: E janipa ri kakiꞌan ri lik jusukꞌ, ebꞌalaxinaq chi chupa rubꞌiꞌ Rire.   
\c 3  
\s1 Oj ralkꞌoꞌal ri Dios  
\p
\v 1 Chꞌobꞌo pe alaq puwi ri saqil rutzil ukꞌuꞌx ri Qaqaw Dios, ma lik kꞌax kojunaꞌo y uyaꞌom ri kabꞌiꞌx chiqe oj ralkꞌoꞌal Rire. E uwariꞌche ri winaq e kꞌo che ruwachulew, ri kꞌamajaꞌ kakikoj rubꞌiꞌ ri Jesús, na ketaꞌam taj oj china riꞌoj chwach ri Dios, ma rike na ketaꞌam ta uwach Rire.  
\v 2 Hermanos, woꞌora oj chi ralkꞌoꞌal ri Dios, tobꞌ kꞌamajaꞌ kaqꞌalajinik saꞌ ri kojuꞌana chiqawach apanoq. Pero qetaꞌam kꞌut echiriꞌ kaqꞌalajin uwach ri Qanimajawal Jesucristo, kojuꞌana jelaꞌ pachaꞌ Rire, ma kaqilo y kaqetaꞌmaj kꞌu uwach chi utz.  
\v 3 Janipa ri kubꞌul pan kikꞌuꞌx che waꞌ, kakichomaj ri kibꞌinik kisilabꞌik chikibꞌil kibꞌ chaꞌ kuꞌana jelaꞌ pachaꞌ ruchomal rubꞌinik ri Qanimajawal.   
\p
\v 4 Janipa kꞌu ri kemakunik e kakipalajij Rutzij Upixabꞌ ri Dios, ma ri mak e rupalajixik Rutzij Upixabꞌ ri Dios.  
\v 5 Etaꞌam chi kꞌu alaq, ri Qanimajawal Jesucristo xkꞌunik re kojresaj puqꞌabꞌ ri mak yey Rire na jinta kꞌana umak.  
\v 6 Janipa kꞌu ri kiꞌanom xa jun rukꞌ ri Qanimajawal Jesucristo, riꞌ na kakiya ta chi kibꞌ che uꞌanik ri mak. Yey janipa ri kiyaꞌom kibꞌ che uꞌanik ri mak, riꞌ na kakimaj ta usukꞌ china ri Cristo y na ketaꞌam tane uwach.  
\v 7 Alaq walkꞌoꞌal chupa rubꞌiꞌ ri Dios, makꞌo masokow e alaq. Ma e junoq katajin che uꞌanik ri utz, riꞌ jusukꞌ rubꞌinik usilabꞌik jelaꞌ pachaꞌ rubꞌinik ri Qanimajawal Jesucristo lik jusukꞌ.  
\v 8 E junoq kꞌa kꞌo pa mak, riꞌ re ritzel winaq, ma ritzel winaq lik rewi aj mak chwi xjeqiꞌ lo ruwachulew. Ruma ne kꞌu waꞌ xkꞌun Rukꞌajol ri Dios chaꞌ koluꞌsacha uwach janipa ri uꞌanom ritzel winaq.   
\p
\v 9 Yey ri uꞌanom chi ralkꞌoꞌal ri Dios, na kuya ta ribꞌ che uꞌanik ri mak, ma ri Dios uyaꞌom chi jun kꞌakꞌ kꞌaslemal che. Ruma kꞌu riꞌ, na utz taj kꞌa kakꞌojiꞌ pa ri mak, ma uꞌanom chi ralkꞌoꞌal ri Dios.  
\v 10 Rukꞌ kꞌu riꞌ waꞌ, kaqꞌalajinik china taq ri e ralkꞌoꞌal ri Dios yey kaqꞌalajinik e china taq ri e ralkꞌoꞌal ritzel winaq. Ma e junoq na kuꞌan ta ri jusukꞌ yey na kꞌax tane kunaꞌ ri ratz-uchaqꞌ, riꞌ na ralkꞌoꞌal ta ri Dios.   
\s1 Kꞌax qanaꞌa qibꞌ chinima qonoje  
\p
\v 11 E tzij waꞌ xex chi tom wi lo alaq: Kꞌax qanaꞌa qibꞌ chinima qonoje.\x * \xo 3:11 \xt Lv. 19:18; Jn. 13:34\x*  
\v 12 Maqaꞌan qeꞌoj pachaꞌ ri xuꞌan ri Caín, ma rire e re ritzel winaq y ruma riꞌ xukamisaj ruchaqꞌ. ¿Suꞌbꞌe xukamisaj? Ma e taq ri xuꞌan ri Abel lik jusukꞌ chwach ri Dios; noꞌj e taq ri xuꞌan rire na chom ta uwach.   
\p
\v 13 Alaq nu hermanos, makam animaꞌ alaq che we ri na ketaꞌam ta uwach ri Dios tzel kakil alaq.  
\v 14 Riꞌoj qetaꞌam ojelinaq chi lo chupa ri bꞌe re ri kamik yey woꞌora oj kꞌo chi chupa ri bꞌe re ri kꞌaslemal, ma kꞌax keqanaꞌ ri qa hermanos. Noꞌj e junoq na kꞌax ta kunaꞌ ru hermano, riꞌ kꞌa kꞌo chupa ri bꞌe re ri kamik.  
\v 15 Ekꞌu junoq tzel karil ru hermano, riꞌ kamisanel chwach ri Dios; yey etaꞌam alaq, e juna kamisanel na taqal ta che kayaꞌiꞌ ukꞌaslemal na jinta utaqexik.  
\v 16 Riꞌoj qamajom usukꞌ saꞌ ri saqil rutzil kꞌuꞌxaj, ma ri Jesús xukꞌut waꞌ chiqe echiriꞌ xuya ribꞌ pa kamik quma riꞌoj. Jekꞌuriꞌlaꞌ, riꞌoj chirajawaxik wi kaqaya qanimaꞌ che kitoꞌik ri qa hermanos tobꞌ ne ruma waꞌ kojkamisaxik.  
\v 17 Yey we kꞌo junoq lik kꞌo ubꞌitaq re y karilo kꞌo kajawax che ri ratz-uchaqꞌ, pero na kajuchꞌ kaꞌn ta pa ranimaꞌ, ¿kꞌo nebꞌa rutzil ukꞌuꞌx ri Dios riꞌ pa ranimaꞌ? Na jintaj.  
\v 18 Alaq walkꞌoꞌal chupa rubꞌiꞌ ri Dios, na xa ta kaqabꞌiꞌij rukꞌ uwa qeꞌ kꞌax kaqanaꞌ qibꞌ, ma ri lik chirajawaxik wi e kaqꞌalajin ri rutzil qakꞌuꞌx rukꞌ taq ri utz kaqaꞌano.   
\p
\v 19 We ekꞌu kaqaꞌan waꞌ, kaqꞌalajinik oj re ri Qꞌijsaq yey kaqanaꞌ kꞌu riꞌ lik utz qaꞌanom chwach ri Dios.  
\v 20 Tobꞌ kꞌu kaqanaꞌ chiqakꞌuꞌx kꞌo ri na utz taj qaꞌanom, na rukꞌ ta kꞌu riꞌ, ri kubꞌiꞌij ri Dios e más kꞌo uwach chwa ri kubꞌiꞌij ri qanimaꞌ, ma ri Dios lik retaꞌam ronoje.  
\v 21 Hermanos, we kaqanaꞌ chiqakꞌuꞌx na oj jinta pa mak, kꞌo ukowil qakꞌuꞌx riꞌ chwach ri Dios.  
\v 22 Yey we kꞌo kaqatzꞌonoj che, Rire kuya na chiqe, ma e kojtajin che uꞌanikil ri kubꞌiꞌij Rutzij Upixabꞌ y e kaqaꞌan ri kukꞌul ukꞌuꞌx Rire.  
\v 23 Ekꞌu utaqanik waꞌ chiqe: Qakojo rubꞌiꞌ ri Jesucristo, Rukꞌajol ri Dios, yey kꞌax qanaꞌa qibꞌ chiqawach jelaꞌ pachaꞌ ri xojutaq Rire che uꞌanik.  
\v 24 E junoq katajin che uꞌanik ri kubꞌiꞌij Rutzij Upixabꞌ ri Dios, riꞌ puqꞌabꞌ ri Dios kꞌowi y ri Dios jeqel pa ranimaꞌ. Ruma kꞌu ri Ruxlabꞌixel uyaꞌom ri Dios chiqe, lik qetaꞌam Rire jeqel pa qanimaꞌ.   
\c 4  
\s1 Ruꞌanik kaqetaꞌmaj we juna kꞌutunik petinaq rukꞌ ri Dios  
\p
\v 1 Hermanos, lik e kꞌi ri qꞌalajisanelabꞌ xa e sokosoꞌnel ebꞌenaq pa taq ri tinamit che ruwachulew re kakiꞌan kꞌutunik. E uwariꞌche makoj alaq ruchꞌaꞌtem junoq xew ruma kubꞌiꞌij kꞌo uqꞌalajisam lo ri Ruxlabꞌixel ri Dios che. Ri ꞌana alaq e lik chꞌobꞌo alaq we wa kubꞌiꞌij paqatzij wi re ri Dios.  
\v 2 ¿Suꞌanik kaqetaꞌmaj we rukꞌutunik junoq petinaq rukꞌ ri Ruxlabꞌixel ri Dios? Petinaq rukꞌ ri Dios we e kujikibꞌaꞌ waꞌ: «Ri Jesucristo e Ruchaꞌoꞌn lo ri Dios yey xuꞌan achi echiriꞌ xkꞌun che ruwachulew.»  
\v 3 Noꞌj we junwi ri kubꞌiꞌij, qꞌalaj kꞌu riꞌ rukꞌutunik na rukꞌ ta ri Dios petinaq wi, ma e petinaq rukꞌ ri jun kabꞌiꞌx “anticristo” che; waꞌ e ri tom chi alaq kakꞌunik yey woꞌora kachakun chi ne che ruwachulew.   
\p
\v 4 Alaq walkꞌoꞌal chupa rubꞌiꞌ ri Dios, ralaq alaq re ri Dios y chꞌijom chi alaq kichuqꞌabꞌ waꞌ wa qꞌalajisanelabꞌ xa e sokosoꞌnel; ma ri Uxlabꞌixel kꞌo ukꞌ ralaq más kꞌo uchuqꞌabꞌ chwa ri jun kꞌo che ruwachulew.  
\v 5 Ma rike xa e re ruwachulew, e uwariꞌche xa re ruwachulew ri kakikꞌutu; yey taq kꞌu ri winaq re ruwachulew e lik kakitaqej ri kikꞌutunik rike.  
\v 6 Pero riꞌoj oj re ri Dios, yey ri ketaꞌam uwach ri Dios e kakitaqej ri qakꞌutunik riꞌoj, noꞌj taq ri na e ta re ri Dios na kakitaqej ta ri qakꞌutunik riꞌoj. Jelaꞌ kꞌu riꞌ kaqetaꞌmaj we juna kꞌutunik petinaq rukꞌ ri Uxlabꞌixel re ri Qꞌijsaq o petinaq rukꞌ ri jun xa sokosoꞌnel.   
\s1 Ri Dios e aj rutzil kꞌuꞌxaj  
\p
\v 7 Hermanos, lik chirajawaxik wi kꞌax qanaꞌa qibꞌ chiqawach, ma ri rutzil kꞌuꞌxaj rukꞌ ri Dios kape wi. E junoq kꞌo rutzil kꞌuꞌxaj rukꞌ, riꞌ alaxinaq pa rubꞌiꞌ ri Dios yey retaꞌam uwach ri Dios;  
\v 8 noꞌj e junoq na jinta rutzil kꞌuꞌxaj rukꞌ, riꞌ na retaꞌam ta uwach ri Dios, ma ri Dios e aj rutzil kꞌuꞌxaj.  
\v 9 Ri rutzil ukꞌuꞌx ri Dios xqꞌalajinik echiriꞌ xutaq lo che ruwachulew ri lik xew Ukꞌajol riꞌ, chaꞌ ruma Rire kakꞌojiꞌ qakꞌaslemal.  
\v 10 Ri saqil rutzil kꞌuꞌxaj kaqꞌalajinik na ruma ta e riꞌoj ri kꞌax xojnaꞌw re ri Dios, ma e Rire ri kꞌax xnaꞌw qe riꞌoj nabꞌe y xutaq lo Rukꞌajol chaꞌ koluꞌyaꞌa ribꞌ paqakꞌaxel re tojbꞌal ri qamak.   
\p
\v 11 Hermanos, ri Dios xuꞌan waꞌ, kꞌutubꞌal re ri rutzil ukꞌuꞌx chiqe; ruma kꞌu riꞌ chirajawaxik riꞌoj kꞌax qanaꞌa qibꞌ chiqawach.  
\v 12 Na jinta junoq iliyom uwach ri Dios; pero we kꞌax kaqanaꞌ qibꞌ chiqawach, riꞌ kaqꞌalajinik jeqel ri Dios pa qanimaꞌ y pa saqil wi kꞌo ri rutzil ukꞌuꞌx Rire pa qanimaꞌ.  
\v 13 Kaqetaꞌmaj kꞌu riꞌ, oj kꞌo puqꞌabꞌ ri Dios yey Rire jeqel pa qanimaꞌ, ma Rire uyaꞌom ri Ruxlabꞌixel chiqe.   
\p
\v 14 Yey riꞌoj\f + \fr 4:14 \ft “Riꞌoj”: Waꞌ e ri Juan kukꞌ ri jujun chik xketaꞌmaj uwach ri Jesús echiriꞌ Rire xkꞌojiꞌ wara che ruwachulew.\f* qilom y kaqaqꞌalajisaj ri xuꞌan ri Qaqaw: Rire xutaq lo Rukꞌajol re kebꞌukolobꞌej konoje ri tikawex.  
\v 15 E junoq kuqꞌalajisaj: «Ri Jesús e Ukꞌajol ri Dios», riꞌ jeqel ri Dios pa ranimaꞌ yey rire kꞌo puqꞌabꞌ ri Dios.  
\v 16 Riꞌoj qetaꞌam y qakojom ri Dios lik kꞌax kojunaꞌo. Ri Dios e aj rutzil kꞌuꞌxaj; ekꞌu junoq kꞌo ri rutzil kꞌuꞌxaj pa ranimaꞌ, riꞌ kꞌo puqꞌabꞌ ri Dios yey ri Dios jeqel pa ranimaꞌ rire.  
\v 17 We ri rutzil ukꞌuꞌx ri Dios pa saqil wi kꞌo pa qanimaꞌ, riꞌ lik kubꞌul qakꞌuꞌx y na kaqaxiꞌij ta qibꞌ chwa ruqꞌijol ri qꞌatbꞌal tzij, ma jelaꞌ pachaꞌ rubꞌinik ri Jesús, jekꞌulaꞌ kojbꞌin riꞌoj wara che ruwachulew.  
\v 18 We ri rutzil ukꞌuꞌx ri Dios kꞌo pa qanimaꞌ, na jinta kaqaxiꞌij qibꞌ che, ma ri saqil rutzil ukꞌuꞌx ri Dios karesaj ri xiꞌin ibꞌ chiqe. Pero we junoq kuxiꞌij ribꞌ, e ruma kunaꞌo kape qꞌatbꞌal tzij puwiꞌ. E uwariꞌche we junoq kꞌa kuxiꞌij ribꞌ, riꞌ kꞌamajaꞌ kumaj usukꞌ pa saqil wi ri rutzil ukꞌuꞌx ri Dios.   
\p
\v 19 Riꞌoj kꞌax kaqanaꞌ ri Dios ma e Rire kꞌax xnaꞌw qe riꞌoj nabꞌe.  
\v 20 We kꞌo junoq kubꞌiꞌij: «Riꞌin kꞌax kannaꞌ ri Dios,» yey tzel karil ri ratz-uchaqꞌ, riꞌ xa aj raqꞌul. Ma e junoq na kꞌax ta kunaꞌ ri ratz-uchaqꞌ ri karil uwach, ¿suꞌanik kꞌu riꞌ kꞌax kunaꞌ ri Dios ri na rilom ta uwach?  
\v 21 E ri Dios yaꞌyom waꞌ wa taqanik chiqe: «E junoq kꞌax kunaꞌ ri Dios, lik chirajawaxik kꞌax chebꞌunaꞌa ri ratz-uchaqꞌ.»\x * \xo 4:21 \xt Mt. 22:37-39; Mr. 12:29-31\x*   
\c 5  
\s1 Kaqachꞌij uchuqꞌabꞌ ri na utz taj ruma ri kubꞌulibꞌal qakꞌuꞌx rukꞌ ri Jesús  
\p
\v 1 E junoq kukojo ri Jesús e Uchaꞌoꞌn lo ri Dios, riꞌ alaxinaq chi chupa rubꞌiꞌ ri Dios. Yey we kꞌax kaqanaꞌ ri Dios, riꞌ kꞌax keqanaꞌ ri e ralkꞌoꞌal Rire.  
\v 2 Chwi kꞌu riꞌ waꞌ kaqetaꞌmaj kꞌax keqanaꞌ ri e ralkꞌoꞌal ri Dios, we kꞌax kaqanaꞌ ri Dios y kojtajin che uꞌanik ri kubꞌiꞌij Rutzij Upixabꞌ.  
\v 3 Ma ri kꞌutubꞌal re ri rutzil qakꞌuꞌx che ri Dios, e ri kaqaꞌan janipa ri kubꞌiꞌij Rutzij Upixabꞌ yey waꞌ na kꞌayew taj kaꞌanik.  
\v 4 Ma qonoje ri oj alaxinaq chi chupa rubꞌiꞌ ri Dios, kaqachꞌij uchuqꞌabꞌ ri na utz taj kꞌo che ruwachulew, yey kaqaꞌan waꞌ ruma ri kubꞌulibꞌal qakꞌuꞌx rukꞌ Rire.  
\v 5 ¿China kꞌu ri kachꞌijow uchuqꞌabꞌ ri na utz taj kꞌo che ruwachulew? E junoq kukojo ri Jesús e Ukꞌajol ri Dios.   
\s1 Ri uqꞌalajisam ri Dios puwi Rukꞌajol  
\p
\v 6 Ri Qanimajawal Jesucristo xkꞌun che ruwachulew y xqꞌalajin kꞌut china Rire echiriꞌ xukꞌul ri yaꞌ re bautismo\x * \xo 5:6 \xt Mt. 3:16\x* y echiriꞌ xturuw rukikꞌel; na xew ta kꞌu ruma ri bautismo rukꞌ yaꞌ ma rukꞌ ne rukikꞌel xturuwik. Ekꞌu ri Ruxlabꞌixel ri Dios xqꞌalajisan re waꞌ; yey ronoje ri kubꞌiꞌij Rire, lik qatzij.  
\v 7 E oxibꞌ kꞌu ri keqꞌalajisan puwi ri lik qatzij:\f + \fr 5:7 \ft Pa ri versículo 7 y jeqebꞌal re ri versículo 8, kꞌo jujun manuscritos kakibꞌiꞌij: «E oxibꞌ kꞌu ri e kꞌo chilaꞌ chikaj keqꞌalajisan puwi ri lik qatzij: Ri Qaqaw Dios, ri Tzij y ri Ruxlabꞌixel ri Dios. Koxchal kꞌu riꞌ waꞌ xa jun kiꞌanom. Yey e oxibꞌ ri keqꞌalajisan puwi ri lik qatzij wara che ruwachulew.»\f*  
\v 8 ri Ruxlabꞌixel ri Dios, ri bautismo re ri Jesús rukꞌ yaꞌ y rukikꞌel ri Jesús xturuw chwa ri cruz; yey uroxchal waꞌ junam ri kakiqꞌalajisaj.   
\p
\v 9 Riꞌoj kaqakꞌul ri kakiqꞌalajisaj ri tikawex, pero janipa ri kubꞌiꞌij ri Dios más kꞌo uwach chwa ri kakibꞌiꞌij ri tikawex; ruma kꞌu riꞌ lik chirajawaxik kaqakꞌul janipa ri kuqꞌalajisaj Rire puwi Rukꞌajol.  
\v 10 E junoq kubꞌul ukꞌuꞌx rukꞌ Rukꞌajol ri Dios, riꞌ ukojom janipa ri uqꞌalajisam ri Dios puwi Rukꞌajol. Noꞌj ri na kukoj ta ri kubꞌiꞌij ri Dios, e pachaꞌ kuꞌan aj raqꞌul che ri Dios, ma na kukoj ta ri uqꞌalajisam ri Dios puwi Rukꞌajol.  
\v 11 Y ri qꞌalajisam e waꞌ: Ri Dios uyaꞌom qakꞌaslemal na jinta utaqexik, yey waꞌ wa kꞌaslemal xew kariqitaj ruma Rukꞌajol.  
\v 12 E junoq ukꞌulum Rukꞌajol ri Dios pa ranimaꞌ, riꞌ yaꞌtal chi waꞌ wa kꞌaslemal che; noꞌj e junoq na ukꞌulum ta Rukꞌajol ri Dios pa ranimaꞌ, riꞌ na yaꞌtal ta waꞌ wa kꞌaslemal che.  
\v 13 Kantzꞌibꞌaj pan waꞌ che alaq ri kojom alaq rubꞌiꞌ Rukꞌajol ri Dios, chaꞌ ketaꞌmaj alaq kꞌo kꞌaslemal alaq na jinta utaqexik.   
\s1 Kꞌisbꞌal uchꞌaꞌtem ri Juan chike ri hermanos  
\p
\v 14 Kubꞌul qakꞌuꞌx rukꞌ ri Dios ma qetaꞌam we ri kaqatzꞌonoj che e chirij janipa ri karaj Rire, kojuta kꞌu riꞌ.  
\v 15 Yey we qetaꞌam Rire kojuto, qetaꞌam kꞌu riꞌ kuya chiqe saꞌ ri qatzꞌonom che.   
\p
\v 16 We kꞌo junoq karil juna hermano katzaq pa mak, yey we waꞌ wa mak na kukꞌam tubꞌi pa ri kamik chwach ri Dios,\x * \xo 5:16 \xt 1 Jn. 2:22; 4:3; Mt. 12:31-32; Heb. 6:4-6\x* chuꞌana kꞌu orar riꞌ chaꞌ wa hermano kutzelej utzij chwach ri Dios y jekꞌulaꞌ ri Dios kuya ukꞌaslemal. Waꞌ e we ri mak na kukꞌam tubꞌi pa ri kamik chwach ri Dios. Pero kꞌo mak kukꞌam bꞌi jun pa ri kamik chwach ri Dios;\f + \fr 5:16 \ft “Mak kukꞌam bꞌi jun pa ri kamik chwach ri Dios”: Waꞌ e keꞌelawi, ri mak más nim e we jun na karaj taj kukoj rubꞌiꞌ ri Cristo, ma ri kaꞌanaw re waꞌ na jinta ukꞌaslemal chwach ri Dios.\f* chwi kꞌu riꞌ waꞌ na kambꞌiꞌij taj we kꞌa kaꞌan orar puwi ri kaꞌanaw re.  
\v 17 Ronoje ri na jusukꞌ taj kaꞌanik e mak chwach ri Dios, pero kꞌo mak na kukꞌam tubꞌi jun pa ri kamik na jinta utaqexik.   
\p
\v 18 Qetaꞌam kꞌut, e janipa ri ebꞌalaxinaq chupa rubꞌiꞌ ri Dios, na kakitijoj ta chi kibꞌ che uꞌanik ri mak; ma Rukꞌajol ri Dios e kachajin ke chaꞌ na ketzaq ta puqꞌabꞌ ritzel winaq.  
\v 19 Lik kꞌu qetaꞌam oj re ri Dios, y qetaꞌam taq ri winaq re ruwachulew puqꞌabꞌ ritzel winaq e kꞌo wi.  
\v 20 Y qetaꞌam kꞌut, Rukꞌajol ri Dios xkꞌun che ruwachulew, yey uyaꞌom qanaꞌoj chaꞌ kaqetaꞌmaj uwach ri Jun paqatzij wi e Dios. Y oj kꞌo kꞌu puqꞌabꞌ ri paqatzij wi e Dios, ma oj kꞌo puqꞌabꞌ Rukꞌajol Jesucristo. Xew Rire paqatzij wi e Dios y e Rire ri kuya ri kꞌaslemal na jinta utaqexik.  
\v 21 Alaq walkꞌoꞌal chupa rubꞌiꞌ ri Dios, maloqꞌnimaj alaq taq ri tiox. Amén.