\id TIT - Achi de Cubulco [acc] NT (Guatemala) -bd, 2009 
\ide UTF8 
\h TITO 
\toc1 I u wuj i San Páblo che i ma Tito 
\toc2 Tito 
\toc3 Tit 
\mt2 I U WUJ I SAN PÁBLO CHE I 
\mt1 MA TITO 
\c 1  
\p  
\v 1 Yin in a-Páblo chi quin tzʼibaj bi i wuj-i chawe yet a-Títo; in rajchac i Dios, xak in rapóstol i Jesucrísto. In u takom chique i je chatal rumal i Dios, man que in to chu cubaxic qui cʼux che i Kajwal, xak que in to chi retamaxic i sak laj tzij re i ka cojonic che i Dios.  
\v 2 We caka ta u be i sak laj tzij-le, cul ʼuri ka cʼux che chi cakil ni ka cʼaslemal chi n-ca qʼuis ta chic. Cakil na, man queje ile xu bij i Dios chu xebal ʼij sak, y ire lic re wi n-ca tʼoron taj.  
\v 3 I Dios, chi Tolke, are xu rik i ʼij chi ʼax u chʼicom wi, xu ʼalijinsaj u tzij chake, wach u chʼobom; are ʼuri xu ya chinkul quin ʼe chu bixquil i tzij-le.  
\v 4 I wuj-i, quin tzʼibaj bi chawe yet a-Títo, chi at wacʼal quin na yin, man yoj oj queb awuʼ ka cubam ka cʼux che i Kajwal Jesucrísto. Cha qʼuiji ni ʼutz pawi, xak i toʼbal a wach, xak i uxlambal a cʼux chi ca pe ruʼ i ka Kajaw Dios xak ruʼ i Kajwal Jesucrísto chi Tolke. 
\s1 I ma Títo xcuxtax u chac che rumal i ma Páblo 
\p  
\v 5 Yet, xat in canaj can chila pa Créta\f + \fr 1:5 \ft I Créta are jun ral jyub setel chuwi mar.\f* cuʼ i kachalal, man ca sucʼba na niʼpa i cʼa craj che i qui cʼaslemal. Xak xin bij can chawe chi que a cha ni nimak tak mamʼib man cacucʼaj u tzam i jutak tzobaj kachalal pa tak tinimit chila.  
\v 6 Jun aj patan pacha ile, ʼo u chac ʼutz cha ʼolok, man mi jun ca cojow u mac. ʼO u chac xa jun i rixokil, xak ʼo u chac chi i racʼal qui yom quib che i Kajwal, xak chom che ʼolok, xak ʼo u chac ne te kelkel.  
\v 7 Man jun, we ʼo u chac i Dios chukul, presis ʼuri chi ʼutz ʼolok. Mu ʼan che rib chi lic n-ta coc ruʼ cu na ire; xak n-ʼus taj we toʼ cʼan laj winak, we toʼ ʼabarel laj winak, we toʼ aj tzucul chʼoʼoj, we toʼ u chʼaquic u mer cu chʼobo.  
\v 8 Are i chu ʼana, chu ya qui posar i winak, chu ya u cʼux chu ʼonquil i ʼutz, chu chʼobo coqʼuilal wach i cu ʼano, chu ʼana pacha i usucʼ, chu ya rib chu ʼonquil u chac i Kajwal, chu jecʼa rib che i n-ca majaw taj.  
\v 9 Mu roʼtaj can i tzij chi lic katzij, i tzij chi xak jun ruʼ pacha i cʼut-tal che. Ruʼ i sak laj tzij-le, cu yabej u cowil qui cʼux i rachiʼil, xak cu yuʼuj qui xiquin ique chi je aj laʼol u wach. 
\p  
\v 10 Cha tzucuj jun aj cʼamol u tzam chique i kachalal lic ʼutz, man je qʼui chic qui ʼanom kelkel che quib, ʼe te le chic ʼuri niʼpa i quiqui coj u chʼojil i retal circuncision. Ique, toʼ tzij quiqui bij, y que tʼortaj i winak cumal.  
\v 11 ʼO u chac ca laʼpux qui chiʼ, man xa que tijin chi qui tunic i kachalal; lic quiqui jechʼabsaj qui nojbal i kachalal cuʼ conojel i quixokil calcʼwal, toʼ chʼacbal-re qui mer quiqui ʼano; ile lic qʼuixbalil. 
\p  
\v 12 ʼO jun achi chi cach aj tinimit i aj Créta, jun nim laj aj pixbanel que; ire xu bij: “I wach aj tinimit, xa je aj tʼoronel, xa je itzel chicop; toʼ waʼim cacaj, n-cacaj ta que chacunic.” Queje ile xu bij.  
\v 13 Y lic katzij i xu bij-le. Rumal-i, che a yaja jubiʼ i kachalal chila, sucʼbal que che i qui cojonic che i Dios.  
\v 14 Cha bij chique, chiqui mayij u tayic i toʼ qui tzij, toʼ qui nojbal i aj Israel winak; miqui coj retalil che i qui tzij qui pixab ique-le chi n-quiqui coj ti u ʼij i sak laj tzij. 
\p  
\v 15 Niʼpa i je chʼam pa canima, chique ique, ʼis chʼam ʼuri ronojel. Xui-ri, niʼpa i ne te chʼam pa canima, niʼpa i n-quiqui coj ti sak laj tzij re i Dios, chique ique, ronojel ʼuri ʼis n-chʼam taj. Queje ile queʼel chique man n-chʼam ti qui nojbal, xak n-quiqui na ta chic we n-ʼus ta quiqui ʼano.  
\v 16 Quiqui bij ique chi quetaʼam u wach i Dios, xui-ri, rumal wach i quiqui ʼano, ca ʼiltaj chique chi n-katzij taj. Je itzel laj tak winak, toʼ je kelkel, lic n-ta qui chac chu ʼonquil i ʼutz. 
\c 2  
\s1 Xbix che i ma Títo que u pixbaj i creyent chiqui ʼana pacha i cʼutunic re i Dios 
\p  
\v 1 Xui-ri, niʼpa i ca cʼut yet, ʼo u chac xak jun ruʼ i sak laj tzij re i Dios.  
\v 2 I achiab chi je nimak chic, cha bij chique miqui ʼan che quib pacha i acʼalab chi toʼ etzʼanem quiqui ʼano\f + \fr 2:2 \ft I tzij-le pent queʼelok: me ʼabaric.\f*, xak chiqui ʼana pacha i ca majawic man cocsax ni qui ʼij; chiqui chʼobo coqʼuilal wach i quiqui ʼano, xak che ʼolok je sucʼulic che i qui cojonic che i Dios; che ʼolok sakil u cʼaxnabal qui cʼux chique conojel, xak ma baʼcrij qui cʼux are ca pe i cʼax piquiwi che u be i Dios. Queje ile cha cʼutu chique.  
\v 3 Xak i ixokib chi je nimak chic, cha bij chique chi chiqui ʼana che quib je aj cojol u ʼij i Dios ruʼ ronojel wach tak i quiqui ʼano, xak miqui tzucuj tzij chiquij i winak, xak me ʼabaric. Chiqui ʼana che quib je aj cʼutunel re i ʼutz i chom ruʼ niʼpa i quiqui ʼano.  
\v 4 Chiqui cʼutu chique i altom chi je cʼulinak chic chi ʼo u chac cʼax chiqui na i cachijil, xak cʼax chiqui na i cacʼal.  
\v 5 Xak chiqui cʼutu chique chi ʼo u chac chiqui chʼobo coqʼuilal wach i quiqui ʼano, xak che ʼolok je jic laj tak ixokib, xak chiqui ya quib chu ʼonquil i copis ruʼ ja, xak chiqui ʼana che quib je ʼutz laj tak winak, xak lic chiqui cojo qui ʼij i cachijil. We queje quiqui ʼan i ixokib ile, n-ta jun ʼuri cʼax ca chʼaw chirij u tzij i Dios. 
\p  
\v 6 Xak queje i alabom, che a pixbaj chi quiqui chʼob coqʼuilal wach i quiqui ʼano;  
\v 7 xak queje yet, ronojel niʼpa i ca ʼano, cha ʼana cʼutbal-re i ʼutz i chom chiquiwach. Are cat tijin chi qui pixbaxic, are i sucʼul laj tak tzij cha bij chique; ma ʼano chi xa ʼetzʼanem laj tak tzij ca bij.  
\v 8 Niʼpa i tzij ca bij chique, xui i sak laj tzij cha bij, man mi jun cu bij na ʼuri chi i a tzij n-katzij taj. We queje ca ʼan ile, we ʼo jun craj cu tzucuj tzij chiwij, xa u qʼuix ʼuri cu tzucuj. Queʼel che ire, n-cu rik ta chic wach i mac cu tzucuj chiwij. 
\p  
\v 9 Xak i je mocom, che a pixbaj man que cojon che qui patron ronojel wach i quiqui ʼano, xak chiqui ʼana pen che quib chom che ʼolok; miqui ʼan che quib je aj laʼol u wach.  
\v 10 Miqui ʼan i elaʼ chique i qui patron, xui-ri, chiqui ʼana lic pacha i ca majawic, man ca ʼalijin na ʼuri chi lic ʼutz lic chom i cʼutunic re i Dios chi Tolke. 
\p  
\v 11 Queje chiqui ʼana ile man i Dios u ʼalijinsam chake wach i nim laj rutzil u cʼux; rumal ile, ʼo i kelbal chi sak konojel.  
\v 12 I rutzil u cʼux i Dios-le, cu cʼut chake chi caka canaj can ronojel i n-ʼus taj, xak caka canaj can i ka rayijbal chi toʼ re u wach i jyub taʼaj. Xak cu cʼut chake, chi tzʼakat oj ʼo chi chuwach i jyub taʼaj, caka jecʼ na kib che i n-ʼus taj, xak caka ʼan i ʼutz sucʼulic; lic caka ya kib chu ʼonquil ronojel wach craj i Dios chake.  
\v 13 Queje chaka ʼana ile, tzʼakat cakoyʼej i chom laj ʼij are ca cʼun tan chic i Jesucrísto chi ka nim laj Dios chi xak Tolke. Are ca cʼunic ca ʼiltaj ni nim laj u ʼij u chomal.  
\v 14 Ire xu ya rib puʼab i camic kumal yoj, ʼelsabal-ke che ronojel i mac atzalal, xak ʼanbal-re chake chi oj chʼam laj tak winak, lic oj re ire. Queje xoʼon ire ile, ʼanbal-re chake chi oj sicʼaj chu ʼonquil i ʼutz. 
\p  
\v 15 Ile, are i cha cʼutu chique. Cha ya u cowil qui cʼux chu ʼonquil, xak cha ʼalijinsaj chique we n-ʼus ta quiqui ʼano; lic ʼo paʼab chu bixquil ile. Queje cha ʼana ile man ʼutz mi jun chique cu bij chi n-ta a ʼij. 
\c 3  
\s1 Niʼpa i cul qui cʼux che i Dios, chiqui ya quib chu ʼonquil i ʼutz 
\p  
\v 1 Cha cuxtaj chique, chiqui ya quib puʼab i ʼatbal tzij, xak piquiʼab i rakan u ʼab; che cojon chique; xak ʼo u chac je sicʼaj chu ʼonquil niʼpa tak i ʼutz.  
\v 2 Miqui chʼachʼa jun chic, xak miqui tzucuj chʼoʼoj; xui-ri, chiqui ʼana che quib chi ʼutz qui cʼux chique i winak, xak chiqui ʼana i chom chique conojel. 
\p  
\v 3 ʼO u chac ca cʼut chique, man xak yoj ujer, oj queje te ile; n-ta ka nojbal, xa oj kelkel che i Dios, xak xa oj sachnak. Oʼonom lok oj pacha u mocom niʼpa i ka rayijbal chi n-ʼus taj, lic ka yom kib chu ʼonquil ronojel wach cakaj u ʼanic. Oʼonom lok, toʼ oj mal laj tak winak pa ka wach wi, xak toʼ xka rayij ubitak-que i ka loʼcʼanij. Toʼ tzel xe kil i winak, xak ique tzel xoj quilo.  
\v 4 Péro i Dios chi Tolke xu ʼalijinsaj i rutzil u cʼux chake, xak xu cʼut i cʼaxnabal u cʼux chique conojel i winak.  
\v 5 Ruʼ ile, xoj resaj chi sak. N-are ta rumal jun ʼutz xka ʼan chuwach, xa rumal xril toʼbal ka wach, rumal-i xu ʼano. Are i kelbal chi sak chi xoʼon chake, are u chʼajic rij i kanima ʼelsabal re i ka mac. Ruʼ u chʼajic i kanima-le, i u Tewal i Dios coʼon chake chi coj alax ucamul, xak cu ya jun ka cʼaslemal cʼacʼ.  
\v 6 I Dios, rumal i Jesucrísto chi Tolke, u yom u Tewal chake, y lic nim i u choʼab ʼo kuʼ;  
\v 7 queje ile coj u yijba oj ʼutz chuwach ire. Xa rumal i rutzil u cʼux queje xoʼon ile chake, man caka rik ni ka cʼaslemal chi koyʼem, chi n-tu qʼuisic. 
\p  
\v 8 Niʼpa i xin bij-le ʼis katzij. Lic cha bij ronojel ile chique i kachalal chila, man niʼpa i cul qui cʼux che i Dios chiqui ya quib chu ʼonquil i ʼutz. Niʼpa tak i ʼanic-le, ʼis ʼutz, xak coʼon ʼutz chique conojel.  
\v 9 Xui-ri, cha jecʼa awib che, we ʼo i quiqui chap tak quib chi tzij chi n-ta rokxic; xak ma coj retalil che tak ujer tzij chi toʼ xqui chʼob i catit qui mam; xak niʼpa i toʼ quiqui rayij chʼoʼoj, cha jecʼa awib cuʼ. Xak ma coj retalil chique i toʼ quiqui tzucuj chʼoʼoj chirij usucʼ i ʼatbal tzij tzʼibtal can rumal i mam Moises. Ma min awib cuʼ niʼpa i quiqui ʼan queje ile, man n-tu chac tak ile, xak n-ta jun ʼutz coʼon chiwe. 
\p  
\v 10 Xui-ri, we ʼo jun chi toʼ aj yacol chʼoʼoj chiquixol i kachalal, cha pixbaj jumul o camul chi cu mayij u ʼonquil. We n-cu coj taj, teʼuri chawesaj bic.  
\v 11 Queje cha ʼana ile che, man rumal i wach ca tijin chu ʼonquil, awetaʼam ʼuri chi yojtajnak chic u nojbal. Are i mísmo u mac-le cu ʼalijinsaj che chi ʼo u chac ca ʼelsax bic. 
\s1 I qʼuisbal pixbanic che i ma Títo 
\p  
\v 12 Yin in chʼobom chi quin tak bi i ma Artémas awuʼ, o pent are i ma Tíquico. Are cuponic, yet cha ʼana pen cat cʼun wuʼ chila pa tinimit Nicópolis, man in chʼobom chi in ʼo chila pa ʼalaj.  
\v 13 I licenciádo ma Zénas, xak i ma Apólos, che a to ruʼ i qui viáje wach i rajwaxic chique; che a to che, niʼpa i cat tiqui che, man ʼutz n-ta coʼon palt chique.  
\v 14 I katz ka chaʼ chila, cwaj yin que naw chu yaʼic quib chu ʼonquil i ʼutz, xak chiqui toʼic pachin ʼo rajwaxic chique. We xe naw che, queʼel ʼuri je ʼutz che u chac i Kajwal. 
\s1 I ma Páblo cu tzʼonoj i ʼutz re i Dios piquiwi 
\p  
\v 15 Niʼpa i je ʼo wuʼ yin waral quiqui ya pan rutzil a wach. Xak cha ya rutzil qui wach niʼpa i cʼax que ka na chila chi xak jun u cubibal ka cʼux cuʼ che i Kajwal. Quin tzʼonoj che i Dios, chu ya ni rutzil u cʼux piwi yix iwonojel. Amen (queje ile cwaj).