\id 2TH - Achi de Cubulco [acc] NT (Guatemala) -bd, 2009 
\ide UTF8 
\h 2 TESALONICENSES 
\toc1 I ucab wuj re i San Páblo chique i cristian aj Tesalónica 
\toc2 2 Tesalonicenses 
\toc3 2 Ts 
\mt2 I UCAB WUJ RE I SAN PÁBLO CHIQUE I CRISTIAN 
\mt1 AJ TESALÓNICA 
\c 1  
\p  
\v 1 Yin in a-Páblo, junam cuʼ i ma Silváno xak i a-Timotéo, caka tak bi i wuj-i chiwe yix ix jutzobaj re i ka Kajaw Dios xak i Kajwal Jesucrísto chila pa tinimit Tesalónica.  
\v 2 I ka Kajaw Dios, xak i Kajwal Jesucrísto, chiqui ya utzil chomal chiwe, xak i uxlambal i cʼux. 
\s1 I Dios cu ʼat ni tzij piquiwi ajmaquib are ca cʼun chal i Crísto 
\p  
\v 3 Ix kachalal, ʼo u chac nic are wi caka tioxij che i Dios iwumal yix. Lic ca majaw ile, man i u cubibal i cʼux yix che i Kajwal mas ca tijin u qʼuiyic, xak i cʼaxnabal i cʼux chiwach xak ca tijin u nimaric.  
\v 4 Rumal ile chi quix tijin chu ʼanic, lic coj tijin chu cojic i ʼij yix are oj ʼo cuʼ i kachalal pa tak tzobajil re i Dios. Caka bij chique chi yix lic ʼo u nimal i cʼux chupam tak uyej chi quiqui ʼan i winak chiwe, xak lic ʼo u cubibal i cʼux che i Kajwal chupam tak i cʼax.  
\v 5 Niʼpa ile cu ʼalijinsaj chi Dios lic ʼutz u noʼoj, lic sucʼul i cu ʼano, man niʼpa i uyej quix tijin chu chʼijic, xa ʼanbal ʼutz chiwe, man ʼo na iwe che u ʼatbal tzij i Dios. 
\p  
\v 6 I Dios, lic sucʼul niʼpa i cu ʼano, rumal-i cu petsaj ni uyej piquiwi ique chi qui petsam uyej piwi yix.  
\v 7 Woʼor ix ʼo chupam uyej, xui-ri, quix u ya na pa uxlanem; xak queje coʼon na chake yoj. Queje coʼon ire ile are cu rik i ʼij chi ca cʼun chal i Kajwal Jesus chupam pacha u rep ʼaʼ. Ire ca winakir na chicaj cuʼ u ángel, nim qui choʼab.  
\v 8 Teʼuri cu ya ni tojbal mac chique i n-xcaj ta xquetamaj u wach i Dios, xak chique ique chi nxqui coj ta retalil che i ʼutz laj tzij re i Kajwal Jesucrísto.  
\v 9 I tojbal mac chi ca pe piquiwi are iri: lic je sachnak na queʼe ʼij sak chiquij, xak que yaʼ na naj che i Kajwal. N-quiquil ta chic u wach i Kajwal, xak mi ne u chomal, xak mi ne u choʼab.  
\v 10 Queje ile ca ʼani na, are cu rik i ʼij chi ca cʼun i Kajwal. Chupam i ʼij-le, cocsax ni u ʼij cumal i je re ire, lic quiqui coj ni u ʼij conojel i je cojonnak che. Xak yix ix ʼo na cuʼ ique chu cojic u ʼij, man i cojom ni tzij chi ka bim chiwe. 
\p  
\v 11 Rumal-i, nic are wi caka tzʼonoj che i Dios piwi yix. Caka tzʼonoj che chi lic ix ʼutz na pacha ca majaw chiwe chi ix sicʼtal rumal ire. Man yix quiwaj u ʼanic i ʼutz; rumal-i caka tzʼonoj che i Dios chi ruʼ u choʼab ire, cu ya na chiwe pacha i quiwaj u ʼanic yix-le, xak chi quix u to na chu ʼanic niʼpa i chac chi quix tijin chu ʼonquil rumal u cubibal i cʼux che i Kajwal.  
\v 12 Queje ile, cocsax ni u ʼij i Kajwal Jesucrísto rumal wach i qui ʼan yix, xak cocsax ni i ʼij yix man ix re ire. Queje ile queʼelok rumal i rutzil u cʼux i ka Dios xak i Kajwal Jesucrísto. 
\c 2  
\s1 I itzel laj achi nabe ca cʼun chuwach i Crísto 
\p  
\v 1 Woʼor wachalal, cwaj quin lap chiwe wach u cʼunic i Kajwal Jesucrísto, xak wach i ka molic coʼon chake. Lic quin tzʼonoj pawor chiwe,  
\v 2 chi ʼana cwent, mi ʼano chi toʼ qui sach la i nojbal, xak mix cʼachir che we ʼo i quiqui bij chi ya xu rik i ʼij re u cʼunic i Kajwal Jesucrísto. Mi coj ile, tupu ʼo jun ca binic chi lic are u Tewal i Dios u bim ile che; xak mi cojo we ʼo jun tzij ca bix na chiwe, we xi ʼo jun wuj pacha tak kuʼ yoj ʼelnak wi.  
\v 3 Mi xa ta jubiʼ qui ya iwib chique chi quix qui tʼoro. Chi cʼunsaj iri chi cʼux: are cʼa maja cu rik i ʼij re u cʼunic i Kajwal, nabe cu rik i ʼij chi laj conojel i winak quiqui xutuj ni Dios, are ca winakir i jun chi itzel laj achi, chi xa pa ʼaʼ ca ʼe wi.  
\v 4 Ire lic are i aj chʼoʼoj chirij i Dios, xak chiquij conojel i qui dios i winak, xak chirij ronojel i ʼo u ʼij cumal ique. Ire cu ʼan na che rib chi nim u ʼij chuwach ronojel niʼpa i ʼolic, y n-xui ta la ile, xak ca cubi na pa rachoch i Dios y cu ʼan pacha Dios che rib. 
\p  
\v 5 ¿N-ca cʼun ta bawa chi cʼux, chi are in ʼo wi iwuʼ, ʼis xin bij iri chiwe?  
\v 6 Woʼor ʼo i ca ʼatiw u petic i n-ʼus taj-le; iwetaʼam chic yix wach i ca ʼatiwic. Rumal-i, i itzel laj achi n-ca cʼun ta tan cʼa cu rik ni ʼij chi u chʼicom i Dios.  
\v 7 Niʼpa tak i n-ʼus taj-le, ya u jekom chic u ʼonquil aliʼal, xui-ri, n-mer ta ca tiqui chu ʼonquil cʼa quelsax ni Jun chi woʼor ʼatiwnak.  
\v 8 Cʼa teʼuri ca ʼalijinsax i itzel laj achi. Teʼuri, ca cʼun i Kajwal Jesus ruʼ i nim laj u ʼij u chomal, y cu sach u wach; cu xutʼij ruʼ i ruxlab y ca camic.  
\v 9 I u cʼunic i itzel laj achi-le, xa rumal i Satanas, xak i nim laj u choʼab ruʼ i Satanas ca pe wi. Coʼon ni u qʼuial milágro, u qʼuial séña chi n-katzij taj.  
\v 10 ʼIs coʼon ronojel tak i n-ʼus taj, cu tʼorbej que i winak. Xui-ri, niʼpa i que u tʼoro, xa je are ique chi n-xcaj ti sak laj tzij; we ta xqui cojo, que totaj neri rumal; ique-le ca sachsax ni qui wach.  
\v 11 Lic n-cacaj ti sak laj tzij, rumal-i, i Dios cu ya chique chi toʼ que sach na rumal i tʼoronic; coʼon chique chi quiqui coj ni n-sak laj tzij taj.  
\v 12 Queʼel ʼuri chique chi que ʼe na pa ʼaʼ man n-xcaj ti u cojic i sak laj tzij, xa are kus xquil u ʼanic i mac atzalal. 
\s1 I Dios ix u chom yix, ʼelsabal iwe chi sak 
\p  
\v 13 Ix wachalal, ʼo u chac lic are wi caka tioxij che i Dios iwumal yix chi cʼax quix u na i Kajwal. Caka tioxij che, man i Dios ix u chom li yix cʼa chu xebal ʼij sak; ix u chom na, ʼelsabal iwe chi sak. Queje u ʼanom ile chiwe rumal u Tewal chi cu ʼan chʼam chiwe pi cʼux; xak u ʼanom ile chiwe rumal u cubibal i cʼux che i sak laj tzij.  
\v 14 I Dios xix u siqʼuij chu rikic iwelbal chi sak rumal i ʼutz laj tzij chi xka bij yoj chiwe. Xix u siqʼuij chu rikic i chomal re i Kajwal Jesucrísto chi ʼo iwe che. 
\p  
\v 15 Rumal-i, ix wachalal, chi jicba iwib; mi sach pi cʼux wach i cʼutunic ka bim can chiwe, chi xak ka tzʼibam chiwe chuwach wuj.  
\v 16-17 I Kajwal Jesucrísto mísmo chu ya ni u cowil i cʼux, xak chix u jicba mas, man qui bij ni ʼutz, xak qui ʼan na ronojel tak i ʼutz. Xak queje quin tzʼonoj che i ka Kajaw Dios chi cʼax oj u naʼom rumal i rutzil u cʼux, xak u yom u cowil ka cʼux, xak u yom u cubibal ka cʼux che i ʼutz chi cu ya na chake. 
\c 3  
\s1 Chi tzʼonoj che i Dios pakawi 
\p  
\v 1 Pa qʼuisbal-re, wachalal, chi tzʼonoj che i Dios pakawi yoj, man weʼ ca pax ni ʼutz laj tzij re i Kajwal; xak cakaj yoj ʼutz u cʼulaxic quiqui ʼan i que tawic, pacha i xi ʼan yix.  
\v 2 Xak chi tzʼonoj che i Dios chi coj u to na chiquiwach i mal laj tak winak chi lic n-ta ʼutz cacaj. Queje chi ʼana ile, man n-conojel taj ʼo u cubibal qui cʼux che i Kajwal.  
\v 3 Xui-ri, i Kajwal lic cu ʼano pacha u bim, rumal-i quix u jicba ni yix xak quix u to na chuwach i n-ʼus taj.  
\v 4 I yoj, cul ka cʼux che i Kajwal chi yix quix tijin chu ʼonquil pacha i ka bim chiwe, xak n-qui mayij tu ʼonquil.  
\v 5 Caka tzʼonoj che i Kajwal chi quix u to chu nimarsaxic i cʼaxnabal i cʼux yix pacha u cʼaxnabal i Dios chiwe, xak quix u to chu chʼijic wach tak ca pe piwi, pacha xoʼon i Crísto. 
\s1 ʼO u chac coj chacunic, chʼacbal re i ka wa 
\p  
\v 6 Wachalal, craj i Kajwal caka bij i tzij-i chiwe: chix el cuʼ i kachalal chi n-cacaj ta que chacunic, xak n-quiqui ʼan ta pacha i cʼutunic chi ka bim can chiwe.  
\v 7 Lic iwetaʼam wach i qui ʼan na we quix terej chirij wach i xka ʼan yoj; lic xoj chacunic, n-toʼ ta xka cʼayo are oj ʼo wi iwuʼ.  
\v 8 ʼIs xka tojo ronojel wach i xka tijo. Are i xka ʼano, lic xoj chacun chi paʼij chi chaʼab; lic xka tij ka ʼij che, man n-xkaj ta xka ya jun ekan chikul yix.  
\v 9 Tupu ʼo ke che chi caka tzʼonoj ni ka wa chiwe, n-xka tzʼonoj taj. Are i xka ʼano, lic xoj chacunic, cʼutal-re chiwe wach i ʼutz qui ʼan ni yix.  
\v 10 Man are oj ʼo wi iwuʼ, xka bij i tzij-i chiwe: Are i n-craj ta ca chacunic, n-ta wa ʼuri cu tijo. Queje ile xka bij chiwe.  
\v 11 Xui-ri, woʼor ka tom rason chi ʼo jujun chiwe toʼ je cʼaslic, n-cacaj ta que chacunic; toʼ que ʼe qui mina quib che i n-ta que che.  
\v 12 Que ka pixbaj ʼut, y caka ya chiquikul chi che chacunok. ʼO pakaʼab caka bij ile chique rumal i Kajwal Jesucrísto. Che ʼoj ique-le pa chac, chʼacbal re qui wa; y jic che ʼolok. 
\p  
\v 13 Yix chi ix wachalal, ma baʼcrij i cʼux chu ʼanic i ʼutz.  
\v 14 We ʼo jun n-coʼon ta cas che wach i ka tzʼibam bi chuwach i wuj-i, chi cojo retalil pachinok; ile, chi jecʼa iwib ruʼ, yabal-re u qʼuix ire.  
\v 15 Xui-ri, mi ʼan aj chʼoʼoj che iwib ruʼ ire; are i chi ʼana, chi pixbaj, pacha jun kachalal. 
\s1 I qʼuisbal tzij xu bij 
\p  
\v 16 Quin tzʼonoj che i Kajwal cu ya ni uxlambal cʼuxij chiwe queʼe ʼij sak chiwij, n-ta coʼono wach i qui cʼulmaj. Lic che ire quin tzʼonoj wi ile, ire chi u xebal i uxlambal cʼuxij. Xak quin tzʼonoj che chi ca canaj iwuʼ yix iwonojel.  
\v 17 Woʼor, yin chi in a-Páblo, ruʼ in ʼab yin, quin tzʼibaj i tzij-i, yabal pan rutzil i wach. Queje quin ʼan ile che tak in wuj, niʼpa i quin tak bic; queje u tzʼibaxic ile quin ʼano.  
\v 18 I Kajwal Jesucrísto chu ya ni ʼutz piwi yix iwonojel. Amen (queje ile cwaj).