\id REV  - Aneme Wake NT [aby] -Papua New Guinea 1988 (DBL -2013) 
\h Dionibai 
\toc1 DIONIBAIRO WE MA BOROO YARI WAKE 
\toc2 Dionibai 
\toc3 Dionib 
\mt1 DIONIBAIRO WE MA BOROO YARI WAKE  
\c 1  
\p
\v 1 Yesu Kerisoma yewa bukaro owaowa wakenu ubi we ma boroo yareibi. Enoba Godi Danu ararae yewa wake Danu waiya ukeka oroubairo we ma boroo yafine ibake yewa wakeye Yesubairo wei. Godi Danu ararae i dubuenaro sabu fafeisa eraerabusa aneaneme uke fafeisa ibai emua iwoka sifisane ibake yewa wake Yesubairo wei. Enoba Dawama Yesu Kerisobairo eno weiro nono Yesu Kerisoma Danu aneru we odairo i aneruma Yesu Kerisonu waiya ukeibi mi Dionibairo anike yewa wake yaisina dawabairo wei.  
\v 2 Na Dioni, nama i ukeibi ibai yaisina ere me sineke Godinu wake yaisina we ma boroo yareke Yesu Kerisonu we ma boroo yari ena ba wakeye i ari enoya we.  
\v 3 Enoba aina mima yewa buka kakurenewaa ufekuie Godima dawa we ma irauaiai ufeku. Nono aina ainama Godinu faraada ufeku ibai naufeisake yewa bukaro owaowama weaku wake enaenari ufeisaie Godima emua we ma irauaiai ufiaku. Enoya yewa wake naukenewaa uawe! I dubuena kai odo fafine fu sifekuie i eraerabusa yaisina idua sabu fafeisa.   
\s1 Dionima sosi uwara sewenibairo (7) owaowa yanake odi wake  
\p
\v 4 Na Dioni, nama nanu wake ya Eisia orofaro sosi uwara seweniro (7) ibinisa oroubake owaowa yanake odakune.   
\p
\v 5 Nanu ararae Godi Dawae adinaroma ibeebe awoenaini idua ibinuba nono dubuenaro owere fafeku ibake Dawaini i Danu dai yaure ibeka udiro enare ibinisa imumu sewenini (7) Yesu Kerisoini Emuama yabake irauaiai unu kofiakake Emenu irauaiai ukeka yabairo mafiakane ibake weakune. Danu Amara Yesu Keriso Dawae i bokai sini ubi Mi. Nono Dawae Godinu wake wenewaa uike fearike iroma uyariroma nono i dai yawokeka orou yaisina Dawama yawokakune.  
\p Yesu Keriso Dawae iya yaisinabake imukari ukaada iyabake feariro nono Danu iwa yewa dooro isariba ibake Dawama iya yaisina iyanu meramawere ukeibisi iroma imusu mune odii.  
\v 6 Enoba Dawama iyaini eme yaisinaini iya yaisinae danu Babae Godinu ofereni ode sibore sianeka orou we mune odiiba ibake Dawabairo buna daiwereini arakeka daiwereini idua me ibene ibene ibeifisane weakune, nanu wake idua.   
\p
\v 7 Erenewaa uawe. Dawae i urero ou ubarenaroma fafekua. Nono Dawae iroma eno uke fafekuro eme yaisinaini nono Dawa ure yanake ukeibisa orou emuaini iini Dawa efeisa. Enoba Yewa orofa akakaro orou yaisina emuama Dawabairo meramawere uke yareibisaba ibai emuama imufeisake emenu mane emenu imukaro uraada ii wefeisa. Nono Dawae i ari eno uburoma fafeku. Nanu wake idua.   
\p
\v 8 I Dai Godima eno wei, Na mane Nae i bokairoma dubuenaroma i fafeisa eraerabusa i yaisinanu ubiya eno wei. I buna daiwere Godima nono eno wei, Na mane adinami nauwaroma ibeebe awoenaini idua ibineba dubuenaro Nama buna daiwere uke famaua eno wei.   
\s1 Dionima i Ba Eme Sini Mi eri wake  
\p
\v 9 Na Dioni, nae ya eme yaisinanu naiye. Yaini naini Yesubairo daba mame ibinisi, ibake Yesu Kerisoma iya yawokakuniro yewa orofaro ibaadae yaini demuiro Danu waiya ukaisi. Eno ukaisi ibake emema iyabairo awe waa faraisaro oferi daiwere wauraisikema nono iya yaisina enare ara ukaisi. Ibake Godima Yesu Kerisobake we ma boroo yari wake nama weba ibake nae mune eka ena ewa ena dawararo nono naisaroe Fadamosi weaisa orofaro odiyakaro ibine.  
\v 10 Enoba nae iyanu Dai Waria Minu moi dai fura odoro me ibisararo Godinu Imumu Irauma nanu imuka ubarenaro isarike na yawokenewaa ukararo moi mima wake daiwere kawia yama ari nanu yaure ibisara derena enaroma weiro naue.  
\v 11 I wakeye i ari eno wei, awoena aneme aneme eraku ibai enaenari bukaro owaowa yanake odiake odaiyaro i sosi yaisina seweniro (7) ibinisa oroubairo anifi wei. I Efesaini Simanini Fegamamuini Daidairaini Sadasini Firedefiaini Reiodisiaini i orofa imusu imusuro ibinisa sosiro Godinu wake naukaisa oroubairo anifi wei.   
\p
\v 12 Nama i wake naueke nono nanu ararae ure owemake emane ure owereke erebaie gorudima ubu uisa ena esiwa sewenima (7) domea ukeibisaro ere.  
\v 13 I esiwa yareibisa edororo erebaie i Ba Eme Sini Mi ari Mima enare ibiro ere. Danu yafa wauma baruiro Danu umu yaisina dadau ui. Dawae i moi gorudima ubu ukaisa gabagana amayai arabanaro waiarike enare ibiro ere.  
\v 14 Danu fouma idiye inanakeo ou inana ari eno. Nono Danu naisae inaa domea ari eno ukeibiro ere.  
\v 15 Danu umue edoro daiwerero ie burasi weaisa ayani ari eno. Dai inaawerero oukeibaisaro ino yaisina eu diriiro ibakuro irauaiai burasi mane amukeibakuro eme emuama ma isuasu ukeibaisaro edoro daiwere uekibaku, Danu umue i ari eno. Danu wakeye adua sisifuma aweoro isare yanake mamaada weibaku i ari eno.  
\v 16 Dawae i muina seweni (7) Danu baena wanama mame ibi. Nono moi awe eka ena ewa ena fokakai bobo bainedi Danu bebekuro ibiro eno bobo aweawero amui. Danu iboo naisae eweka amuke okoro farakuke ukaku enaenari ui.  
\v 17-18 Enoba Nama Dawa ereke Danu umu udiro birueke fearaisari ue. Nae eno uero Dawama Danu baena wanama na uri burisada eno wei, ia da sia wei. Nae i bokairoma dubuenaroma i eraerabusa yaisinanu ubiya eno weike nono wei, Nae i me ibine ibine ibeka Mi. Enoba Nae feareke wiroeroma nono awoenaini me ibineba nono dubuenaroe me ibene ibene ibimau Mi. Enoba Nae i feare aneka orofaini i fearaisa orou yaisina yawokakuniaya wei.  
\v 19 Dawama nono nabairo eno wei, i ari enoya i eraku eraerabusa yaisina owaowa yanake odia wei. Awoena eraku eraerabusaini nono i dubuenaro fafeisa eraerabusaini i yaisina owaowa yanake odia wei.  
\v 20 Nono i muina seweni (7) Nanu baena wana enaro ibinisaro erinuke nono i gorudima ubu uisa esiwa erinuke, ibaie dubo waure weaisa wake ari eno. I wakenu ubiye i ari eno, i muina sewenie i sosi seweninu aneruro nono i esiwa seweninu ubiye i ari eno, i esiwa sewenie i sosi uwara seweniya Dawama eno weiro na naue.   
\c 2  
\s1 Yesuma Efesa sosibake weaku wake  
\p
\v 1 Dawama nono nabairo eno wei, i Efesa sosi uwararo ibinu anerubairo moi wake i ari eno owaowa yanake odia wei. I wakeye i ari eno, yewa owaowaro wakeye Nanu. Enoba Nama i muina seweni (7) Nanu baena wana enaro mameke i esiwa seweni yaraada edoro ukaisaro Nae i ubarenaro enakune ibake yewa wake abairo weakune.  
\v 2 Na iwoka anu ukeka sinekae budu daiwere ukaadama nono i ukeibaku ibai yaisinae ure nudaroma ukeibaku. Enoba Na iwoka, ae arara me i meramawere ukaisa orounu ukaisa sinaisa ari eno ukeka. Enoba ae i emenu imusu afasoro weaisa orounu weaisa wakenu ubi yodia ukeebe fou urinuba emuae ba afasoro orou me. Emuae meo mane weeka orou enoba ae ba emua iwoka sinakune.  
\v 3 Ae yaisina ure nudaroma ukaku. Ibake eme keuwere a erakunekaie Nanu ibi mamenewaa uke ibinuro eraisake ibake meramawere abairo ukaisaroma nono ae ia sine dakakuke enare ara ukakuke inimu daiwere wauraku. Na iwoka, ae i budu daiwere ukeibakuke koroko sine dakaku.  
\v 4-5 Nono Nanu moi wake abairo wemaro a naua. Ae i ari eno, adinaroe anu imuka yaisina Nabairo makenewaa uikema nono awoenae anu adinaro ibeibi i ari eno me. Adinaro anu ukekae irauaiai ukeebe nono awoenae ibai medinu. Enoya imukenewaa uake anu meramawere ukeka mediake anu adinaro irauaiai ukeibi enaenari mane ua. Nono i ari eno irauaiai da ufakuie abairo famauke i edoro ukaku esiwa i ibinu orofaroma mumauke imusu odimau.  
\v 6 Nono anu moi ukekae irauaiai. Ae arara me i Nikorai weaisa orounu meramawere ukaisa ari eno ukeka ibake ie irauaiai. Naini Na arara me ama i ari eno meramawere ukeka.   
\p
\v 7 I ari enoya aina mi ae ome bobobaie Godinu Imumu Irauma sosi uwararo ibinisa oroubairo weaku wake naukenewaa ua.  
\p Aina ainama i meramawere ukeka ma berekeifeisaie emuabairo irauaiai umauke i Godinu waiyaro iseroma wirokekake me ibene ibene ibeka ana kai mumauke emuabairo mamiauro ifeisake me ibene ibene ibeifeisaya weakune wei.   
\s1 Yesuma i Simana weaisa sosibake weaku wake  
\p
\v 8 Dawama nono nabairo eno wei, i Simana weaisa sosi uwararo ibinu anerubairo moi wake eno owaowaro yanake odia. I wakeye i ari eno, yewa owaowa wakeye Nanu. Nae i bokairoma dubuenaroma i eraerabusa yaisinanu ubi. Nae fearekema nono me ibine.  
\v 9 Enoba Nae iwoka, abairo awe waa daiwere farakuba ibake anu ibekae ara daiwere sinaku. Na iwoka, abairoe eraerabusa me. Nono anu ba eraerabusa keuwereye ure orofaro ibinu. I moi orouma eno weibaisa, iyae ba Du oroua eno weibaisaroma nono emuae ba Du orou farafa mero emuae seidaninu orou. Ibai Na iwoka, i orouma abairo wake meramawere weibaisa.  
\v 10 I oferi waufoisa ibaibake ia da siaweke Nanu wake nauawe. Seidanima ya orou keuwere moibai ya uke iruke efiane ibake ya ana ebaro mune odifiaku. Eno ufiakuro odo deni (10) mane oferi waure imuka merama daiwere yanake eno mane ufoisa. Enoba yanu Godi imukeka imukama da mediaweke buna ukaada feafoisaie Nama yabake wirokeroma me ibene ibene ibeka mamiauro me ibeifoisa.   
\p
\v 11 Enoya aina mi ae ome bobobaie Godinu Imumu Irauma i sosiro fare ku siane ibaisa oroubairo weaku wake naukenewaa ua. Aina ainama ibaada i meramawere ukeka ma berefeisaie i dubuena kai fearekama emua da mufiakua weakune wei.   
\s1 Yesuma i Fegamamu weaisa sosibake weaku wake  
\p
\v 12 Dawama nono nabairo eno wei, i Fegamamu weaisa sosi uwararo ibinu anerubairo moi wake i ari eno owaowa yanake odia. I wakeye i ari eno, yewa wakeye Nanu. Nae i eka ena ewa ena waama imusu ari yafawere bau mame ibine ibake yewa wake Nama abairo weakune.  
\v 13 Nae iwoka, yanu ibeka orofa. Yanu ibeka orofae seidaninu yawokaku orofa ubarenaro ibinuro nono yama Na mede dayaka ibai Na iwoka sinekune. Enoba i adinaro Nanu irau wake weibi mi, Edifasi, dawae seidaninu yawokaku orofaro ibeibiro moi orouma dawa ukaro feari. I furo yama Nanu ibi ma fe yare dakeibisa.  
\v 14 Enoroma nono Na arara me yanu moi ukekabai. Yabairoe moi orouma yaini ibaada Beiramunu we ma iwoka ukeka wake naukaisake enaenari ukaisa. Enoba adinaroe Beiramuma Beirakibairo we ma iwoka ukeibiro Beirakima Isaraera oroubairo anike eno wei, i ba me godibairo ofereni odifoisa abuma iaweke moi orounu aruma aweka enare odiawe, Beirakima eno weiroma nono Nama awoena nono eno weakune, i ari enoe irauaiai meya weakune.  
\v 15 Nono yabairo moi orouma ibaada i Nikorai weaisa orounu we ma iwoka ukaisa meo wake naukaisake enaenari ukaisa.  
\v 16 Enoya yanu meramawere ukeka imuke mediawe. I ari eno da ufoisaie yabairo sabu aamauke Nanu bebekuroma amukaku waama imusu ari bauma i orouini uramau.   
\p
\v 17 Aina mi dawae ome bobobaie Godinu Imumu Irauma i sosi uwararo fare ku siane ibaisa oroubairo weaku wake naukenewaa ufi. Nono aina ainama ibaada i meramawere ukekabai ma berefeisaie emuabake i fema ibinu mana weaisa uruna mamiauro emua ifeisa. Nono Nama emuabake moi inanakeowere oma demui demui mamiau. I omaroe emenu awoena ibi owaowa yanake odimau, nono i ibiye moi orou emua iwoka da sifeisaro i ibi mufeisa orou mane iwoka sifeisa weakunea Dawama nabairo eno wei.   
\s1 Yesuma i Daiadaira weaisa sosibake weaku wake  
\p
\v 18 Dawama nono nabairo eno wei, i Daiadaira weaisa sosi uwararo ibinu anerubairo moi wake eno owaowa yanake odia. I wakeye i ari eno, i wakeye Nanu. Nae Godinu Amara. Nanu naisae inaa domeanu edoro ari eno. Nono Nanu umue burasi weaisa ayani ari eno. Yewa wakeye Nama abairo weakune.  
\v 19 Enoba ae Nabake imukari ukaada anu imuka yaisina Nabairo odenewaa ukaku. Ae irauaiai ukaada ibai yaisina ure nudaroma ukaku. Enoba ae adinaro irauaiai ukeebe nono awoenae anu adinaro irau ukeibi ibai ma berekada ba irauaiai ukenewaa ukaku, enoba ibai Na iwoka sinakunara.  
\v 20 Nono Nanu moi wake wemaro a naua. Na arara me ama moi merama dai menaku ukeka. I aweka, Desabero, dawae yabairo ibinuro nono ama dawa mede dakaku. I awekama yabairo eno weaku, nae Godinu wake weakunea eno weaku. Ibake Nanu waiya ukaisa orouma moi orounu aruma aweka enare odifisake i meo godibairo ofereni odaisa abu ifisane weada we ma iwoka ukeibakune. I aweka dawama Nanu oroubairo eno ukaada we irukakune.  
\v 21 Nanu ararae dawama danu imuka yaisina Nabairo odifine ibake dawa medero danu imusu i me ibeibibairoma nono danu imuka yaisina Nabairo ode daui. Dawae arara me danu imuka yaisina Nabairo oderoma moi orounu aruma aweka enare odekabai imuke medeka.  
\v 22 Enoba Nama danu ainaku seboroma mune siamauro aina ainama dawaini aineifeisa orou emua emenu i ba me ukekabai da medifeisake Nanu umuro da aafeisaie emuaini iini oferi daiwere emuabairo mamiau.  
\v 23 I ari eno Nama eno umauke danu amaraku yaisina ma feamiaubai i sosiro Godinu wake naukaisa orou emua ibai yaisina iwoka sifeisa. Enoba Nae eme yaisina emenu imukekaini arararo ukekaini i yaisina Na iwoka sinakunebai emuae iwoka sifeisa. I ari enoe ya yaisina yanu aneme aneme ukeibaisa ibaibake yanu moko demui demui yabake mamiau.   
\p
\v 24 Nono ya moi Daiadaira goiro ibinisa orou, yae i meramawere we ma iwoka ukaisa wake nauke dakaisake seidaninu fewere imukeka iwoka sine dakaisaba ibake yabairo inimuwere da mamiau.  
\v 25 Nono awoenaroma Nanu famau odoroma iiniro yanu irau ukaisa enaenari yaisina ukenewaa ukeibiawe.  
\v 26-28 Aina ainama i meramawere ukeka ma berefeisaie Nanu Babaema Na buna makara enaenari Nama emuabairo mamiauro emuama i orofa akaka orou yaisina arawere yawofiakaisa. I emema arawere yawokada Naini wasai ukaisa orou ma berefiakaisa. I emema ayanima ubu ukaisa usi ari eno i rabu ima dooma ubu ukaisa okea ure birabira yaraisa i ari enoe emuama arawere yawofiakaisake Naini wasai ukaisa orou ma berefiakaisa. Enoba i wai awanakuro amukeibaku waisumanu kai ari rabu emuabake mamiau.   
\p
\v 29 Enoya ya ome bobobaie Godinu Imumu Irauma i sosi uwararo fare ku siane ibaisa oroubairo weaku wake naukenewaa uawe weakunea Dawama nabairo eno wei.   
\c 3  
\s1 Yesuma i Sadasi weaisa sosibake weaku wake  
\p
\v 1 Dawama nono nabairo eno wei, i Sadasi weaisa sosi uwararo ibinu anerubairo moi wake eno owaowa yanake odia. I wakeye i ari eno, Nae i Godinu Imumu sewenini Nae i muina sewenini eno mame ibaada yewa wake abairo weakune. Anu ukeka sineka yaisina Na iwoka. Eme moima eno weibaisa, i Sadasi weaisa sosiro Godinu wake naukaisa orouma me irauaiai ibinisaya eno weibaisa, i ari enoroma nono emuae ba i ari eno mero i fearaisa orou ari eno.  
\v 2 Enoya ya uyaeweke yanu adinaro fearaisa orou ari sine ibaada Godi imukaisa ibai ba adaadake ma giena uaweke ma buna uawe. Na iwoka, yanu ukeka sinekae Godinu ibooro irauaiai me.  
\v 3 I adinaroe i irau wake we ma iwoka uisaro ya nauisa. Ibake yae i wake naukenewaa ukeibiaweke enaenari ukenewaa ukeibiaweke yanu meramawere ukeka yaisina imuke medeibiawe. I ari eno uke ibifoisa iroma da uyafoisaie Na i waira ukeka mima faraku i ari eno uke fema famau. Ie ya iwoka me Nanu yabairo famau odo.  
\v 4 Nono ya Sadasi weaisa goiro ibaada Godinu wake naukaisa moibai ya mane meramawere uke dakaisaro nono yanu ukeka sinekae amearubu wau ari eno. Enoba yae irauaiaiba inanakeo wau barufoisaro Naini demuiro eneifeisi.  
\v 5 Aina ainama emenu meramawere ukeka ma berefeisaie idua Nama emuabake inanakeo wauma emua rune odimiauke emenu ibi i wirokeka bukaro da ma isumau. Nae Nanu Babaenu ibooroini i anerunu ibooroini enare ibaada emuae Nanu oroua eno wemau.   
\p
\v 6 Enoba Aina mi dawa ome bobobaie Godinu Imumu Irauma i sosiro fare ku siane ibaisa oroubairo weaku wake naukenewaa ufine weakunea eno wei.   
\s1 Yesu Kerisoma i Firedefia weaisa sosibake weaku wake  
\p
\v 7 Dawama nono nabairo eno wei, i Firedefia weaisa sosi uwararo ibinu anerubairo moi wake eno owaowa yanake odia wei. I wakeye i ari eno, Nae iifawereini ba ukekanu ubiya wei. Enoba Nae Deiwidinu ki mame ibine. I wakenu ubiye i ari eno, Godima Deiwidi dawa buna maiba ibake dawama i adina Derusaremu goi yawokeibi. I ari enoe Godima Nabake buna makaraba ibake i awoena fafeku Derusaremu goi Nama yawokenewaa umau. Enoba Nae i aisame ma ro yamauro moi mima ko da ufeku. Enoba Nama nono ko umauro moi mima nono da ma ro yafeku. I ari enoe Nama yewa wake abairo weakune.  
\v 8 Na iwoka, yanu ukeka sineka yaisina. Na iwoka, yanu bunae dai menaku ibinuroma nono Nanu we ma iwoka ukeka wake naukada enaenari ukaisake Nanu ibi ma fe yare dakaisake Nanu ibiye yama emenu ibooro we ma boroo yaraisa. Enoba Nae yanu ibooro moi aisame ma ro yare odero ibinuba ibake yama i aisamero fare anifoisake Nanu wake wefoisaro nono moi mima i aisame ko da ufeku.  
\v 9 Enoya Nanu wake nauawe! I seidaninu orou emuae eno weaisa, iyae Du oroua eno weaisaroma nono emuae ba Du orou mero emuae meomao weeka orou mane. Enoba Nama i orou waure aamiauke yanu umu udiro odimiauro yanu ibooro iboo yanakaisari eno ufeisake emuama Nae yabake imukari ukakuniaya ibai idua iwoka sifeisa.  
\v 10 Yae Nanu we riba wake nauisaba ibake i meramawere uke erekabai yewa dooro fafeisaie yae yawokenewaa umiauro i meramawere uke ereka eme yaisinabairo fafekukema nono yabairo da fafeku.  
\v 11 Nae sabu famaua koro ukeebe i me ibene ibene ibekanu mokoe moi mima munao ufekuba ibake yanu imuka yaisina Nabairo odenewaa ufone weakune.  
\v 12 Aina mima danu meramawere ukeka ma berefekuie Nama dawa we mumauke Nanu Godinu dai sosi uwararo ma ara ukaku kukubu kai ari ma enare odimauro dawae me ibene ibene ibifekuke iroma nono owere da anifeku. Nama Godinu ibi danu ofero owaowa yanake odimau. Eno umauke nono Godinu awoena goinu ibi, i awoena Derusaremu goi urero Godibairoma fafeku goinu ibini Nanu awoena ibini danu ofero owaowa yanake odimau.   
\p
\v 13 Aina mi dawa ome bobobaie Godinu Imumu Irauma i sosiro fare ku siane ibaisa oroubairo weaku wake naukenewaa ufine weakunea eno wei.   
\s1 Yesuma i Reodisia weaisa sosibake weaku wake  
\p
\v 14 Dawama nono nabairo eno wei, i Reodisia weaisa sosi uwararo ibinu anerubairo moi wake eno owaowa yanake odia wei. I wakeye i ari eno, Na iwoka Godima aneme aneme wefekuie Dawama enaenari ufeku. Enoba Nae aine wai ure Godinu wakeye baya eno weibakune. Nae Godinu ubu ui i eraerabusanu ubi Mi ibake yewa wake Nama abairo weakune.  
\v 15-16 Na iwoka, yanu ukeka sineka yaisina. Na iwoka, yae Na mede dakakunekake nono yanu imuka yaisina Nabairo ode dakaisake yae i abanaro me sara ibaisa orou ari eno. Enoba Nanu ararae yama Na medifoisaba ba yanu imuka yaisina Nabairo odifoisa ari. Enoba nono yanu Godi imukekae iuwere meke wadadawere mero yae inu abanaro me sara ibinisa ibake yae Nama ena wisiomu uke sianaisari ebo umiau.  
\v 17 Yae eno weibaisa, iyae eraerabusa keuwere bobo orouba moi eraerabusa munekabaie iya arara meya eno weaisa. Yama eno weaisaie yanu meramawere ibaisa ibai ma nuna ukaisa. Enoba yanu imuka yaisina Nabairo ode dakaisa ibake yanu ibekae i ari eno, i eraerabusa mero wau meba ibake ofe mane naisa kikori bobo orou ari eno sine ibeibaisa.  
\v 18 Ibake yewa imukekae yabairo makakuniaya. Nabairo aaraweke i gorudi inaama yareibakuro irauaiai fareibaku i ari eno oima make muaweke eraerabusa keuwere bobo orou siawe. I wakenu ubiye Nabairo aaraweke i ba imukekaini naukeka muawe weadama weakune. Nono Nabairo inanakeo wauini oima make muaweke baruaweke ofe mane da eneibiawe. I wakenu ubiye yama Nae baya eno imukada maru da ufone ibake weakune. Nono Nabairo i naisa iraaini oima make muaweke yanu naisaro odiawero irauaiai ufiro eawe. I wakenu ubiye i ba ukekaini inu nono i merama ukekaini abanaro ma biraeweke ba ukekabai iwoka siawe.  
\v 19 Nama moi oroubake imukari ukaadae emuabake riba wake weakuneke emua ure ma giena ukakunia enoya imukenewaa uaweke yanu meramawere ukeka sineka yaisina imuke mediawe.  
\v 20 Nanu moi wake wemaro ya nauawe! Nae emenu imuka ubarenaro isamane arie wake weibakune. Enoba aina mima i wake naufekuke ewaro aara wefekuie danu imuka ubarenaro isamauke dawae Nanu naiye ubu umau.  
\v 21 Nae adinaro yewa orofa akakanu meramawere ukeka ma bereke Nanu Babaenu yaure ibaada yawokaku iro Dawaini demuiro yauraisu i ari enoe aina ainama meramawere ukeka ma berefeisaie Nama emuabairo irauaiai umiauro Naini Nanu yaure ibaada yawokeimau iro emuaini demuiro yaufeisi.   
\p
\v 22 Aina mi dawa ome bobobaie Godinu Imumu Irauma i sosiro fare ku siane ibaisa oroubairo weaku wake naukenewaa ufine weakunea eno wei.   
\c 4  
\s1 I urero ba Godibairo guriguri ukaisa wake  
\p
\v 1 I ukeibibai yaisina me siniro na Dioni nama kubekuberoma erebaie yeku ure aisame ro yare ibiro ere. Adinaro i kawia yama ari eno weiro naue enaenari nono i ari eno wei, Nabairo amuke aararo abake i dubuenaro fafeisa eraerabusa we sibomaro ea weadama wei.  
\v 2 Eno weiro idua sabunaku Godinu Imumu Iraunu buna nabairo idua fariro erebaie urero i yaure ibaada yawokeka orofaro moi Mi i yaure ibaada yawokeka orofaro yaure ibiro ere.  
\v 3 I yaure ibiro ere i Mi Danu iboo naisae edoro daiwere uiro ere. Nono Danu iboo naisae i irau dasifaini kaneria weaisa omanu edoro ari eno uiro ere. Nono i wariebadidima i yaure ibaada yowekeka orofa ode kara uiro erebaie i wariebadidie i emara weaisa omanu edoro ari edoro uiro ere.  
\v 4 Nama nono erebaie i moi yaure ibaada yawokeka orofa duenidi foma (24) i dai yaure ibaada yawokeka orofa ode kara uisaro nono i dai orou yaisina duenidi foma (24) i yaureka oroorofaro yaure ibe fare anisaro ere. I orou yaisina emenu waue inanakeo wau mane baruisake emenu mogoisoe gorudima ubu uisaba ima baruisake yaure ibisa.  
\v 5 I dai yaure ibaada yawokeka orofaroma bida mamike ure daiwere uri. I dai yaure ibaada yawokeka orofanu ibooro esiwa seweni yareibisa. Nono i esiwae Godinu Imumu seweni.  
\v 6 Enoba i dai yaure ibaada yawokeka orofanu ibooro moi erabu iro ibiro ere. Ie i dawara aduama diroroko ukeibaku i ari eno ukeibiro ere. Ie amearubu kurisa weaisa oma ari eno.  
\p Moi me ibene ibene ibeka erabu foma (4) i dai yaure ibaada yawokeka orofa ode waiyakake enare kara uisa. I me ibene ibene ibeka erabusa emuabairoe naisa keuwere ibisaro ere. I o enaroma derena enaroma naisa keuwere ibisaro ere.  
\v 7 I kawama me ibene ibene ibeka erabu dawae raioni weaisa abu ari enoroma nono i moi me ibene ibene ibeka erabu dawae awoena yawera boromakau ari eno. Nono i moi me ibene ibene ibeka erabunu iboo naisae ba emenu iboo naisa ari eno. Nono i dubuena me ibene ibene ibeka erabu dawae i ana daa daaro wawane eneibaku dai udu weaisa ada ari eno.  
\v 8 I fo (4) me ibene ibene ibeka eraerabusa emua yaisina una demui demui emenu baba yaisinae sikisi (6) boboro nono naisa keuwere emuabairo ibisa. Emenu oferoini emenu baba wowonaroini naisa keuwere ibisa. Nono emuae dumuroini ewekaroini wake eno weibaisa,  
\li1 Dai Waria buna daiwere Godi. A mane irauaiaiba ibake Ae iifa ukaisi. A mane irauaiaiba ibake Ae iifa ukaisi. Ae adinaroma ibeebe awoenaini idua ibinuba dubuenaro nono owere fafaku.  
\m I wake imuini ko yareroma weeka mero idua aine wai ure weada ibeibisa.  
\v 9-11 I fo (4) me ibene ibene ibeka eraerabusama i dai yaure ibaada yawokeka orofaro yaure ibinu Mibairo Danu ibi we ma daiwere ukeibisake Dawabake we ma irauaiai ukeibisabaie i dai orou yaisina duenidi foma (24) i dai yaure ibaada yawokeka orofaro yaure ibinu me ibene ibene ibeka Godinu ibooro iboo yanakaisari eno ukaada Dawabairo guriguri ukeibisa. Emuae emenu gorudima mogoiso ma kukune Danu ibooro odaisake yaura kairoma eno weaisa,  
\li1 Ae iyanu Dai Waria Godi. Ibake eme yaisina Abairo Anu ibi we ma daiwere ukaisake Ae we ma irauaiai ukakuneka. I buna yaisinae Anu. Enoba Ama i eraerabusa yaisina ubu ui. Ibake Ama Anu arara uike i eraerabusa yaisina ubu uiro awoena idua ibinisaya,  
\m eno weaisa.   
\c 5  
\s1 Na Dionima moi buka dadau uisaro ere wake  
\p
\v 1 Na Dioni, nama kubekuberoma erebaie i dai yaure ibaada yawokeka orofaro yaure ibi Mima baena wanama moi buka mame ibiro ere. I bukanu o enaroini derena enaroe owaowa yanake odiro ere. Nono uwane kariseka naa yaisina sewenima (7) i buka uwane karisaro ere.  
\v 2 Nama nono erebaie moi buna daiwere aneruma u daiwere we mamike eno wei, aina mi dawa irauaiai ie i uwane karise oisa naa ma fururu yare mune siafekuke i buka ma ro yafekuke efekua eno wei.  
\v 3 Eno weiro i buka ma ro yafiro ubarena efine i mi yodia ukeebe yodia ukeebe ureroma dooroma eu doo wowona enaroma fou ure dauisa.  
\v 4 I buka ma ro yafiro efine mi fou ure dauisaba ibake nae ii daiwere weibisara.  
\v 5 Ibake nama eno uero moi dai mima nabairo eno wei, ii da weake ea wei. I Diuda weaisa oroubairoma fari raioni weaisa abu ari Mi, i Mi Dawae Deiwidinu dai sisia sirorari mi. Dawae yewa orofa akakanu meramawere ukekabai ma bereiba ibake i uwane karise oisa naa seweni (7) ma fururu yare mune siafekuke i buka ma ro yafekua eno wei.   
\s1 Dionima i awoena Mamoe eri wake wei  
\p
\v 6 Nama moi awoena Mamoe abu erebaie uraisaro fearakuke ibaku, i ari eno ukaro fearikema nono uyarike Danu ure yanake uisa ena i biobao bobo i Danu Dai yawokeka Minu ibooro enare ibiro i me ibene ibene ibeka erabusa fonu ibooroini i dai orou yaisina Dawa ode kara uke ibisaro ere. I Mamoe abu danu yawera yaisinae seweni. Nono Danu naisa yaisina seweni. I naisa yaisina sewenie Godinu Imumu seweni. Enoba Godima i Imumu seweni emua yaisina we odairiero i orofa akaka imusu imusuro anisa.  
\v 7 I awoena Mamoe abuma anike i buka i dai yaure ibaada yawokeka orofaro yaure ibi Minu wanaroma muneibiro ere.  
\v 8 Ane muniro me siniie idua i me ibene ibene ibeka erabusa foini (4) i dai orou duenidi foini (24) emua yaisina i awoena Mamoe abunu ibooro iboo yanakaisari eno uisa. Emua yaisina gida fu danu ibiye afu weaisa erabuini koruu gorudi naberoini muka. I koruu naberoro fauda ari eno urumuwere erabuma i koruu nabero yaisina wake fare ibisa. I faudae Godi Danu orounu guriguri ukaisa fauda.  
\v 9 I fo (4) me ibeka eraerabusaini i duenidi fo (24) i dai yaureka duboro yaure ibaada dai orouini emua yaisina i awoena Mamoebake awoena yaura kairoma eno weibisa,  
\li1 Emema Ae uyakaro fearikema Anu iwama i imusu orouini i wake imusu imusu weaisa orouini i orofa akaka moi nauwa nauwaro ibinisa orouini emua yaisina oima make munao uike emua waure amuke Godibairo odirie.  
\v 10 Ae i orou yaisina Godinu waiya ufisane ibake emuae dai yawokeka orouini ofereni ode sibore sianeka orou we mune odirieba ibake emuama i orofa akaka orou yaisina yawofiakaisa. Ae eno uiba ibake Abairo giena siniba i buka mufakuke i uwane karise oisa naa ma fururu yare mune siafakua,  
\m eno weisa.   
\s1 I awoena Mamoenu ibi we ma daiwere uisa wake  
\p
\v 11 Nama nono ereebe nauebaie aneru keuwerema wake goro weibisaro naue.  
\v 12 Emuae i dai yaure yawokekanu orofaini i me ibene ibene ibeka eraerabusa foini (4) i dai orou duenidi foini (24) ode kara uriekake yaura kairoma daiwere eno weibisa,  
\li1 i ukaro feari awoena Mamoe abu Dawae irauaiairo bunawereba ibake Dawae i yawokekaini eraerabusa keuwereini iwoka ukekaini buna daiwereini ibai yaisina mufeku. Emema Dawabairo Danu ibi we ma daiwere ufeisake we ma irauaiai ufeisaro Godima Danu arakeka Dawabairo mafekua,  
\m eno weibisa.  
\v 13 Enoba Nama nono nauebaie Godima ubu uiro ibinisa eraerabusa yaisina, i dooro ibinisabaini i urero ibinisabaini i doo wowonaro ibinisabaini i dawara ubarenaro ibinisabaini emua yaisina yaura kairoma weisaro na naue. Emuae yaura kairoma eno weisa,  
\li1 i dai yaure ibaada yawokekaro yaure ibinu Godi Dawaini i awoena Mamoe abuini emua una raarabairo we ma irauaiai ukeifeisake emenu ibi we ma daiwere ukeifeisaro arakeka daiwereini buna daiwereini emuabairo me ibene ibene ibeifekua,  
\m eno weibisaro naue.  
\v 14 Eno weibisaro i me ibene ibene ibeka erabusa foma (4) eno weisa, ie idua iraua eno weisaro i dai orou duenidi foma (24) iboo yanakaisari eno ukaada guriguri ukeibisaro ere.   
\c 6  
\s1 I awoena Mamoema i buka uwane karise oisa widu kai yaisina sikisi (6) ma woromi wake  
\p
\v 1 Nama kubekuberoma nono erebaie i awoena Mamoe abuma i moi uwane karise oisa naa yaisina seweniroma nono i bokai naa widu kai kuuriro ere. Nama ibai eraada nauebaie moi me ibene ibene ibeka erabu danu wakeye ure ure weibaku i ari eno weibiro naue. Dawama nabairo daiwere eno wei, aarake i weaku ibai ea weiro naue.  
\v 2-3 Nama ibai naueke erebaie inanakeo osi abu unama enare ibiro ere. Moi mima i osi abu duboro yaure ibaada fewa mame ibiro ere. Moi mima dawabake moi yawokaisa orounu bokai barukeka mogoiso munike mairo munike eme moini urafisake emua ma berefiane ani. Dawa aniro Nama nono erebaie i awoena Mamoe abuma i buka uwane karise oisa naa moi widu kai umane kuuriro ere. Nama ibai eraada nauebaie i moi me ibene ibene ibeka erabuma nabairo eno wei, aarake ibai ea weiro naue.  
\v 4 Nama ibai naueke erebaie moi kokoiwere osi abu idua fariro ere. Ereke ibisarabaie moi mima i osi abu duboro yaure ibi mi buna mai. I buna mai inu ubiye emenu emenu uranada urebauke makaneifisake feareifisane ibake bunaini yafa bauwere dawabairo mai.   
\p
\v 5 Nama nono erebaie i awoena Mamoe abuma i bukaro moi uwane karise oisa naa widu kai umane kuuriro ere. Nama ibai eraada nauebaie moi me ibene ibene ibeka erabuma nabairo eno wei, aarake ibai ea weiro naue. Naueke nono ibaada erebaie moi mima i osi duboro yaure ibaada eraerabusa inimu abeari efisane ode eraisa i rabu yabake ibiro ere.  
\v 6 Nama ibaada nono nauebaie i fo (4) me ibene ibene ibeka eraerabusa emenu ibisa kuroma wake moi naunao uero i wakeye eno wei, odo demuiro waiya uke muneka oima farauwa fanigini demui oima make muneibaisake nono i demui odoro waiya ukaada munaisa oima ibudi urini fanigini buuba oima make muneibaisaya eno wei. Eno weike nono wei, nono i oriwa weaisa oeraini waini aduaini ma merama da ua eno weiro naue.   
\p
\v 7 Nama nono erebaie i awoena Mamoe abuma i bukaro uwane karise oisa moi widu kai umane kuuriro ere. Nama ibai eraada nauebaie i dubuena kai me ibene ibene ibeka erabuma nabairo eno wei, ibai ea weiro naue.  
\v 8 Nama ibai naueke erebaie moi borawere osi abuma enare ibiro ere. Moi mi danu ibiye feareka dawama i osi duboro yaure ibaada aneibiro i feareka orounu ibaisa orofa danu ibiye Eidisi iroma danu umuro aneibisaro ere. Emuabairo buna daiwere mariero mukake i orofa akaka yaisinaro eme yaisina mero nono eme keuwere bauini osini oferi waurekaini waa abuini ima ma feafiakane aneibisaro ere.   
\p
\v 9 Nama nono erebaie i awoena Mamoe abuma i bukaro uwane karise oisa widu moi kai umane kuuriro ere. Nama erebaie i moi fearaisa orounu imumu ofereni odaisa orofaroma eu wowonaro ibisaro ere. Adinaro i orouma Godinu irau wake mamenewaa ukeibisake weibisaro emuaini wasai ukeibisa orouma emua ma feareibireka.  
\v 10 Enoba i orou emenu imumuma eno daiwere weibisa, O Godi, Abairo buna yaisina ibinu. Ae iifawere. Ae i ba ukeka sinekanu ubiba ibake odo abeari me sifekuro yewa dooro ibinisa orou kodo ure yafiakuro emuama iya ma fearakunisaba moko emuabake fanisi mafiakua eno weisaro naue.  
\v 11 Eno weisaro naueke erebaie idua emuabairo inanakeo wauwerewere emua una deidemu marieke eno wei, ko yaewero i wasai ukaisa orouma yanu naiyemukuini yanu waiya demuiro ukaisa orouini emua ma feafisaro ibai me sifeku dubuenaro Godima ya feaka ibaibake moko emua fanisi mafiakua eno weiro naue.   
\p
\v 12 Nama nono erebaie i awoena Mamoe abuma i bukaro uwane karise oisa moi widu kai umane kuuriro ere. I ereibisarabaie dooro dumu daiwere sinike doo amani amani uiro ewekae dubawere wau ari eno siniro nono manabeye iwa ari kokoifi siniro ere.  
\v 13 Oyauma boruba anaro mameibakuro kaibaiye yowedabairoma kaibai yaisina dooro buruburu yare isareibaisa i ari eno ureroma muina buruburu yakake dooro isakaro ere.  
\v 14 Wea wau iureibaisa i ari eno i ure eno uke iurikema nono iroma me ari eno uiro i oraara yaisinaini i eka ena ewa ena dawararo ubarero i orofa yaisinaini emenu ibisa oroorofaroma mune imusu odiro ere.  
\v 15-17 Ibake i yawokeka dai orouini nono i ba yawokeka orouini ame dai orouini eraerabusa keuwere orouini waiya ukeka orouini me eneibeka orouini emua yaisina i oma eraboroini oraara omawere wowonaro fe yakake i oraaraini omawerebake eno weisa, iyanu duboro isaaweke iya dadau uawero i dai yaure yawokekanu orofaro yaure ibinu Godima iya enao umisiro i awoena Mamoe abuma iyabake dino unao umisia eno weisa. Emenu dino ukeroma fanisi makeka odo idua farinuba ibake eme yaisina da enare ara ufeisiie da wirofeisia emuama eno weisaro na naue.   
\c 7  
\s1 Wani aderedi fodi fou dausini (144,000) Isaraera orouma Godinu widu uke odibai muka wake  
\p
\v 1 Ibai yaisina me siniro nama nono erebaie aneru yaisina foma (4) yewa doonu sougo foro (4) enare ibisaro ere. Emuama enare ibaada oyaunu fareka buna ma karise ibisaro anaroma dawararoma dooroma oyau mame daui.  
\v 2-3 Nama kubekuberoma nono erebaie moi aneruma eweka amukaku enaroma fariro ere. Dawae i me ibene ibene ibeka Godinu widu uke odi bobo amuke fariro ere. Dawama dooini dawaraini anaini sabu da ma merama ufisane ibake i buna muka aneru fobairo (4) eno wei, i dooini dawaraini anaini sabu da ma merama uaweke Godinu oroubairo Danu widu emenu awararo odiferoma ai dubuenaro ma merama uawe weiro na naue.  
\v 4-8 Dawama eno weike nono nabairo eno wei, i widu muka oroue keuwere. I Isaraera orounu akaemuku yaisinabairoma eme keuwere wani aderedi fodi fo dausini (144,000) mune Godibairo odia eno weiro naue. Emenu kakuka ibaie eno, i Diuda oroubairoma eme duero dausini (12,000) mune emenu awararo Danu widu uke odirieke i Rubeni oroubairoma duero dausini (12,000) eme mune emenu awararo Danu widu uke odirieke i Gedi oroubairoma duero dausini (12,000) eme mune emenu awararo enaenari widu uke odirieke i Asura oroubairoma duero dausini (12,000) eme mune emenu awararo uke enaenari widu uke odirieke i Nafadarai oroubairoma duero dausini (12,000) eme mune emenu awararo enaenari widu uke odirieke i Manasa oroubairoma duero dausini (12,000) eme mune emenu awararo enaenari widu uke odirieke i Simioni oroubairoma duero dausini (12,000) eme mune emenu awararo enaenari widu uke odirieke i Riwai oroubairoma duero dausini (12,000) eme mune emenu awararo enaenari widu uke odirieke i Isakara oroubairoma duero dausini (12,000) eme mune emenu awararo enaenari widu uke odirieke i Sebiudoni oroubairoma duero dausini (12,000) eme mune emenu awararo enaenari widu uke odirieke i Diosefu oroubairoma duero dauseni (12,000) eme mune emenu awararo enaenari widu uke odirieke i Bedimani oroubairoma duero dausini (12,000) eme mune emenu awararo enaenari widu uke odirie. Danu widu emenu awararo eno mane widu uke ode fare ane me sini.   
\s1 Eme keuwere Godibairo guriguri uisa wake  
\p
\v 9-10 Eno mane widu ukeebe me siniro ere. Nanu kubekuberoma erebaie eme keuwere ku siane ibe anisaro ere. Emuae keuwereba ibake moi mima emua da kakufiaku. Emuae orofa imusu imusuroma nono emenu akaemuku imusu imusuke emenu wake imusu imusuke emenu ofe imusu imusuroma i orou yaisina i dai yaure ibaada yawokeka orofanu ibooroma i awoena Mamoe abunu ibooro enare ibisaro ere. Emuae yafawerero inanakeo wauwerewere baruisake farai kakabai wanama kari mamisake enare ibaada daiwere eno weibisa, iyanu dai yaurekaro yaure ibaada yawokaku Godini i awoena Mamoe abuini emuama iya unu koreibisike iya ma wiroisia eno weibisaro na naue.  
\v 11-12 I aneru yaisinama i dai orouini i me ibene ibene ibeka erabusa foini (4) i dai yaure ibaada yawokeka orofaini enare kara uisake emenu ibooro iboo yanakaisari eno ukaada guriguri ukeibisake eno weibisa, ie idua irauaiaiya Godibairo rooro ufero arakeka Dawabairo ibifiro iwoka ukeka yaisina ibifiro we ma irauaiai ufeke Danu ibi we ma daiwere ufero i buna ukeka yaisina Dawabairo idua ibifi. I ukeka yaisinae Danuba ibake Dawabairo me ibene ibene ibeifekua eno weibisaro naue.   
\s1 I orou emenu oferi waureka idua me sini wake  
\p
\v 13-14 Moi dai mima nabairo eno wei, i inanakeo wauwerewere barukaisa orou emuade aboroma farisa wei. Eno weiro nama ma owereke eno we, dai mi, nae iwoka meya anu mane iwoka sinakua eno wero dawama wei, i orou emuabairo awe waa daiwere fareibiro inimu daiwereini oferi waureibisa orou. I orou emenu waue i awoena Mamoe abunu iwama uroisaro amearubu ibinu. Ibake emuae i dai yaure ibaada yawokaku orofaro yaure ibinu Godinu ibooro enare ibinisaya eno wei.  
\v 15 Eno weike nono wei, emua dumuini ewekaini Godinu dai sosi uwararo Dawabairo Danu waiya ukeibisaba ibake Godima Danu dai yaure ibaada yawokaku orofaro yaufekuke emuabairo ibaada yawokeifiakuba ibake emuae irauaiai ibeifeisa.  
\v 16 Nono emua iro ibaadae desini da ufiakuke nono iro ibaadae adua isa da ufiakuke nono iro eweka waa da ufeku.  
\v 17 Enoba emuae aneanemebake eno ufeisa? Emuae i dai yaure ibaada yawokaku orofa udiro enare ibinu awoena Mamoe abuma yawokeifiakuke Dawama emua waure ane i me ibene ibene ibeifeku adua oru udiro odeifiakuro iseifeisa. Enoba nono Godima emenu ii du ma isufiakuro nono dubuenaro ii da wefeisaya eno wei.   
\c 8  
\s1 I awoena Mamoema i fisiaro widu kai idua kuuri wake  
\p
\v 1 I awoena Mamoe abuma i bukaro uwane karise oisa naa widu kai idua umane kuuriro urero wake moi eraerabusama wake we me umuni amani uke me korabi sine ibiro enaenari dai menaku dedi minidi (30) me sini.  
\v 2 Nama kubekuberoma nono erebaie aneru una sewenima (7) Godibairo enare ibisaro Dawama emuabairo kawia seweni mariero muka.  
\v 3 Nono moi aneruma gorudima ubu uisa nabero waurike i ofereni ode sibore sianaisa orofa udiro enare ibiro ere. I irauaiai urumuma imusu ari fauda dawabairo mairo munike i faudaini Godinu orounu guriguri ukekaini ofereni odifine waure ani. Dawae iro anike i dai yaure ibaada yawokekanu orofa ibooro gorudima ubu uisa nabero i gorudima ubu uisa ofereni ode sibore sianeibisa orofaro ane odi.  
\v 4 Dawae iro ane odiro i faudanu iroini i orounu guriguri ukekaini danu wanaroma medike iduama amuke aneebe Godinu ibooro amuke ane fari.  
\v 5 I aneruma i gorudima ubu uisa nabero nono munike i ofereni odaada yareibisa inaa korike sianiro yewa dooro isari. Dawae eno uiro bida mamaada ure ureibiro doo amani amani ukeibi.   
\s1 Aneru fo (4) emenu kawia ureibisa wake  
\p
\v 6 Eno uke me siniro i aneru una sewenima emenu kawia ufisane ukaadama koro uisa.  
\v 7 Nono i bokai aneru unama kawia uribaie aisi omaini inaaini iwaini ma dinua uike yewa dooro isarikema nono i doo yaisinaro isare me, moi ena barunaro mane isariba ibake i doo fekaro ana oma inaama yaisina yare me sini.   
\p
\v 8-9 Inaama eno uke yare me siniro nono moi aneru danu kawia uribaie oraarawere ari inaa domea siakaro dawararo isarikema nono I dawara yaisinaro isare me, moi ena barunaro mane isariba ibake i dawara adua kouro ibisa abuini i adua kouro ibisa eraerabusa yaisina feare me sikaro i ena adua kouro eneibisa boudi yaisina birabira yare me sika.   
\p
\v 10 Eno uke me siniro nono moi aneru danu kawia uriro moi dai muinawere ureroma esiwa ari domea uke uke yewa dooro isarikema nono i moi ena adua kouroini adua oru yaisinaro isari.  
\v 11 I muinanu ibiye kimuriwere ana ari eno. I doo fekaro adua yaisina kimuriwere mane uiro emema isaada feareibisa.   
\p
\v 12 Nono moi abanaro aneru danu kawia uribaie i ewekaini manabeini muinaini emenu moi ena baruna baruna ma merama uiro emenu moi ena edoro ukeibi ibai idua me siniba ibake i dumuini ewekaini moi ena baruna mane emenu dai menaku edoro ukeibi.   
\p
\v 13 Nama nanu kubekuberoma nono erebaie moi udu weaisa gasirawerema wawane enaada daiwereroma eno weibi, ae, ae, ae, i aneru una buuba emenu kawia ufeisaie i dooro ibinisa orouma oferi daiwere waufeisaya eno weibiro naue.   
\c 9  
\s1 I moi fai (5) aneru una demuima danu kawia uri wake  
\p
\v 1 Eno mane uke me sikaro i dubuena udiro aneruma danu kawia uriro nanu kubekuberoma erebaie adinaro i ureroma dooro isari ena muina ere. I muinabairo i dai doo eba ma ro yareka ki mairo i muinama mame ibiro ere.  
\v 2 I muina Dawa i ki i dai doo eba ma ro yariro iroma inaa iro daiwere fare amui. Ie dai ouwa koewere yareibaisaro fare amukeibaku i ari eno inaa irowere fare amuike ouini ewekaini yaisina inaa iroma dadau uiro dumu daiwere sini.  
\v 3-5 Eno uiro boe keuwerema i inaa iroroma fare isakake i nauwaro ibaisa begara ari eraerabusanu buna i boebairo maike eno wei, ana omaini warakaisa eraerabusaini aneme aneme yaisina da ma merama uaweke i Godinu widu emenu awararo mune ode dauisa orou emua mane ma merama uyanaro oferi waufisa i aneruma eno wei.  
\v 6 Manabe kai fai (5) eno uke yayakawero i begarama akakunekaro karakaisa oferi ari eno waufisa wei. Eno weike nono wei, i odoro emema feafisane daaba yodia ufeisakema nono da feafeisa. Emenu ararae feafisane wefeisaro i feareka emuabairoma imusu anifekuro emuae da feafeisa.   
\p
\v 7 Nama i boe erebaie osi abu duboroma urafisane uke bou ukeibaisa i ari eno i boe emenu mogoisoe gorudima ubu uisa mogoisoma baruisa. Nono emenu iboo naisae ba emenu iboo naisa ari eno.  
\v 8 Emenu bokai idiye moi awekabonu yafawere bokai idi ari eno. Emenu nioe waa abu raioninu nio ari eno.  
\v 9 Nono emenu oro dadau ukeka rabue ayani ari rabuma baruisake emenu babama yama daiwere uke wawane aneibisa. I uraneka erabu uwiri bobo erabunu yama ari eno yama weibiro naue.  
\v 10 Emenu koromae begaranu koroma ari eno kefi i bobo. Emuae manabe fai (5) eme akaada emenu koromama emua oferi makeibirieka.  
\v 11 Nono emenu yawokeka dai miye i dai doo ebaro ibinu aneru. I Iburu wakeroma i anerue Abadoni weaisa. Nono i Guriki wakeroma i anerunu ibiye Aforoni weaisa. I anerunu ibinu ubiye eraerabusa yaisina ma merama ukeka mi weadama weaisa.   
\p
\v 12 I bokai meramawere ukekae idua me siniroma nono moi meramawere ukeka dei raarayai ibinisiba ai dubuenaro fafisisia eno weiro naue.   
\s1 I moi sikisi (6) aneru una demuima danu kawia uri wake  
\p
\v 13-14 I moi dubuena kai udiro aneru kawia idua uriro nauebaie moi wake Godinu ibooro gorudima ubu uisa ena ofereni odeka orofaro ibinu sougo foromu (4) farike eno wei, i dai Ufereidi weaisa adua udiro uwane karise oisaro ibinisa aneru fo (4) ma woromiyanaro anifisa weiro naue.  
\v 15 Eno weiro idua ena aneru una fo (4) idua ma woromirie. Yewado awoenanaku i moi ena doo barunaro ibinisa orou yaisina idua ma feare me sifiakane ibake i aneru eno uke bou uriero ibisa. Emuae eno uke ibeebe nono awoena emuama eme ma feare me sifiakane anisa.  
\v 16 I urafisane ibake osi duboro yaure ibe anisa orou yaisinae du aderedi mirioni (2000000), emua kakurieke weiro naue.  
\v 17 Enoba Nama nanu kubekuberoma erebaie i osi keuwere emenu duboro yaureibisa orou emuae emenu oro barukekae kokoi dididi bora dididi gabagaunama baruisaro ere. I erabuma emenu oro baruisaro ere. I osi emenu bokaie waa abu raioninu bokai ari eno. Nono inaa domeaini iroini safiri ari yareibaku omaini i osinu bebekuroma fareibi.  
\v 18 I ari eno uke fareibike i meramawere ukeka dei buubae inaa domeaini iroini safiri ari eno yareibaku omaini ima i moi ena baruna doo fekaro ibisa eme yaisina ma feare me sika.  
\v 19 I osi yaisina emenu bunae emenu bebekuroini koromaro ibisa. Nono emenu koromae bokai bobo ie waru ari eno. Ima eme ma merama ukeibirieka.   
\p
\v 20 I meramawere uisabai ereibisakema nono i feare dauisa orouma emenu meramawere ukeka da imuke meisa. Enoba emenu wanama ubu uisa godi mede dauisa. Emuama i meramawere imumubairo guriguri uisake nono i gorudini siriwaini burasini omaini ima ubu uisa ere meke wake nauke meke enare fare me i meo godi mede dauisake emuabairo ofereni odaada sibore sianeibisa.  
\v 21 Enoba emuae eme ma fearekaini wada barau ukekaini moi orounu aruma aweka enare odaekaini waira ukekaini i meramawere ukeka yaisina da imuke medeibisake ibai yaisina idua eno mane ukeibisa.   
\c 10  
\s1 Aneruma Dionibairo buka mairo ise odai wake  
\p
\v 1 Nama erebaie moi buna aneru ureroma isare aariro ere. Danu waue ouma baruiro nono wariebadidiye danu bokairo mogoiso ari eno uke ibi. Danu iboo naisae eweka naisa ari eno sini. Nono danu umue inaa yareibaku daada bobo kukubu kaiyai ari.  
\v 2 Nono danu ma ro yare ibi bukanaku mame ibaada danu baena umue dawararo odike nono danu ewani ena umue duero odike enare ibiro ere.  
\v 3-4 Dawama eno uike raioninu wake ari eno daiwere we mami ibake ureroma ure gururu moko yaisina seweni (7) weibisa. Eno weibisaro emenu weibisa wake owaowa uke odimane uebaie nono moi wake ureroma eno wei, owaowa da yanake odiake i wake ma fe yare odia eno weiro naue.   
\p
\v 5-6 Nono i moi ena umu dawararoma moi ena umu duero amuke ibiro ere aneruma danu baena wana urero sianada i me ibene ibene ibeka, ureini dooini dawaraini ana omaini gasiraini boroini waraini mabaraini aneme aneme yaisina ubui ui Godinu ibiro eno wei, i eraerabusa yaisina idua sabu me sifekua eno wei.  
\v 7 Dawama eno weike nono wei, i dubuena kai aneruma danu kawia ufekuie Godima Danu fema imukeka yaisinae Danu waiya ukeibisaro we bou urie oroubairo adinaro wei enaenari uke me sifekua eno wei.   
\p
\v 8 I kawama naue i ari eno wake ureroma nono eno wei, aniake i moi ena umu dawararoma moi ena umu dueroma eno uke enare ibinu anerunu wanaro i buka mua wei.  
\v 9 Eno weiro idua i anerubairo ane fareke eno we, i bukanaku maina wero i aneruma nabairo eno wei, i buka muake ise odaia wei. I buka ifakuie anu bebekuroe ewerenu imuna ari eno ufekukema nono boana ubarenaro isafekuie ruruwere ufekua eno wei.  
\v 10 Eno we me siniro i bukanaku danu wana daaroma muneke iebaie bebekuro imuna ui. Nono ise odaiero boana ubarenaro isare anike ruruwere ui.   
\p
\v 11 I wake nono nabairo eno wei, eme keuwereini orofa akaka imusu imusuro ibaisa orouini i wake imusu imusu weaisa orouini i yawokeka dai orouini i orou yaisinabairo Godinu wake nono ane wefakua eno wei.   
\c 11  
\s1 Eme una raarama wake weibisi  
\p
\v 1 Nono i aneruma nabairo i kowo kai makarake eno wei, uyake i kowo kai i Godinu dai sosi uwaraini i ofereni ode sibore sianeka orofaini ode kowoake nono i dai sosi uwararo Godibairo guriguri ukaisa orou kakuyana eno wei.  
\v 2 Eno weike nono wei, i dai sosiroma ekara derena enaro ibinu oroorofa i orofa kowo da mamifao wei. I orofae i imusu orounu orofaya wei. I orouma fafeisake i iifawere Derusaremu goi yaisina ma merama ukaada amune adire eneifeisaro oya buubaini manabe kai sikisi (6) mufekua eno wei.  
\v 3 Nono nama nanu wake weeka miyaibairo buna mamiauro kofe fuse ari eruwere wauma barufisisike Nanu wake we eneifisisiro oya buubaini manabe kai sikisi (6) mufekuke fosii yafekua eno wei.   
\p
\v 4 I orofa akaka yaisina yawokaku Godinu ibooro ibinisi oriwa ana rarayaini i esiwa odeka ana fuyaie i wake weeka miyai ari eno.  
\v 5 I miyai emenu waiya ukeka orofaro enafisisiro nono moi orouma emenu arara ukaada emuabairo meramawere ufisane ufeisaie i miyainu bebekuroma inaa domea fafekuke i wasai ukeifeisa orou yaisina yare me sifiaku. Aina mima emuabairo merama ufine ufekuie dawa i ari eno uke feafeku.  
\v 6 Enoba Godima i miyaibairo buna mafiaku ibake i miyaima ure we kuufisisiro obi da isafeku. Emuama adua yaisinabairo wefisisiro adua yaisina iwa mane sifeku. Emuama emenu arara awe waawere yewa dooro fafine wefisisiie enaenari fafeku.   
\p
\v 7 Emuama Godinu wake we me sifisisiie i buna abu ari mi idua i dai doo ebaroma amufekuke i miyaini urafeisake dawama i miyai ufiakuke ma feafiaku.  
\v 8 I miyai emuae feafisisiro emenu ofeye i dai goiwere akaka naisaro ibifisisi. Emenu Dai Waria Mi Yesue i goiro ikokoma korosiro ure oisaro feari. I goibake dubo waure weadae Sodomuini Idifi weaisa.  
\v 9 I miyai emenu feafisisi ofe bou daabaro aine ibifisisiro wefeisaro emenu ofe bou da mune ooru uke odifeisa. Ibake eweka odo buubaini moi odo abanaroini i daabaro aine ibifisisiro ubu ofe imusu imusu orouini wake imusu imusu weaisa orouini emua yaisina fafeisake i feafisisi miyainu ofe bou efiakaisake emua ooru da uyakawe eno wefeisa.  
\v 10 I miyaima i orofa akaka orou yaisinabairo arawere ukeka emuabairo ukeebe feafisisi ibake yewa dooro ibifeisa orou emuae rooro daiwere ufeisake banau ufeisake yaura uraada moi eraerabusae moko moko uke makanada rooro daiwere ufeisa.  
\v 11 Eno ukeifeisaro odo buubaini moi odo abanaroini eno me sifekuie idua Godima i miyaibairo wirokeroma imu sianeka emuabairo mafiakuro nono idua uyare enafisisiro i orouma nono i miyai efiakaisake ia daiwere sifeisa.  
\v 12 Nama erebaie i we bou urie miyaima naukeibisibaie ureroma moi wake isare aarike eno wei, ewaro amuke aarawa wei. Eno weiro idua ouma i miyai mune urero waure amuke aniriero i emuaini wasai ukeibisa orouma i miyai erieka.  
\v 13 Ibai yaisina eno uiro doo yaisina amani amani uiro i dai goiwere moi ena baruna uwara keuwere ma doroo yariro eme keuwere seweni dausini (7000) feare me sikaro ere. Enoba ibai ereibisa orouma ia sinaraada i urero ibinu Godinu ibi we ma daiwere ukeibisa.   
\p
\v 14 I meramawere ukeka dei raarayai idua me sini. Nono i dubuenaro meramawere ukeka idua sabu fafekua eno wei.   
\s1 Moi aneru seweni unama (7) danu kawia uri wake  
\p
\v 15 Nono i dubuena kai aneruma danu kawia uribaie wake keuwere ureroma isare aakake eno weisa, iyanu Dai Waria Godini nono i fafekuke ma wirofiaku Mini emua i doo yaisina yawofisine ibake i buna Godi Dawama me ibene ibene ibaada i yaisina yawokeifiakua weisa.  
\v 16-17 Eno weisaro i dai orou duenidi foma (24) emenu yawokeibisa orofaro Godinu ibooro yaure ibaada emua yaisina ubiri afoa umane ibaada Godibairo guriguri uisake eno weisa,  
\li1 iyanu Godi, Ae buna daiwere. Ae adinaroma ibeebe awoenaini idua ibinu. Ama buna daiwere munike awoena Ama i eraerabusa yaisina yawokakuba ibake iya yaisinae A we ma irauaiai ukaisi.  
\v 18 I orofa akaka orou yaisinama wake meramawere weisaro Ae dino ui. I kodo ureka odo idua farinuba i fearaisa orou yaisina ama kodo ure yafiaku. Emuae Anu waiya ufisane we mune odaada we bou urie oroubairo emenu irauaiai me makeka moko mafiaku. Enaenari ibi waria orouini ibi okoanaku orouini aina ainama Anu ibi we ma daiwere ufeisaie enaenari emenu irauaiai me makeka moko mafiaku. Enoba aina ainama yewa doo ma merama ufeisaie emenu moko emua ma merama ufiakua,  
\m eno weisa.  
\v 19 I wake we me sikaro Godinu urero dai sosi uwara aisame ro yariro erebaie i awoena arararo uke makaneka i mauwa aruro ibiro ere. Nama nono erebaie bida mameibiro yama daiwere weibiro ure uraada gururu weibiro doo amani amani ukeibiro aisi oma daiwere ureroma bobone isare ibisaro ere.   
\c 12  
\s1 I awekaini dai uwaya ari eno erabuini emuabake wei wake  
\p
\v 1-2 Nono moi dei ubuwere urero ere. Ie i ari eno, moi aweka una ibiro ere. I aweka danu barukekae eweka barukada nono danu mogoisoe muina kaibai dueroma (12) odike manabe duboro enare ibaada danu amara sabu dofine ukaada oferi daiwere waurada ii weibi.  
\v 3 Nono moi dei ubuwere urero ere. Ie i ari eno, moi dai uwaya ari rabuma ibiro ere. Danu ofeye kokoiwere. Nono danu bokai yaisinae seweni (7). Danu yawera yaisinae deni (10). I dai yawokeka orounu mogoiso yaisina sewenima danu bokai seweniro baruke odiro ibisa.  
\v 4 I uwaya ari rabunu koromama i urero muina moibai garuru ure mune sianiro yewa dooro isaka. Eno uiro nono i amara dofine ukeibi awekanu ibooro enare ibifiro i aweka amara dofiro dawama ifine ibake enare ibi.  
\v 5 I awekama amaranaku dori. I amaranakuma danu dubuena eme yawokada mamifeku ayani usima eme yaisina dawama arawere yawofiaku. I awekama amaranaku doribaie i amaranaku sabunaku mukake yeku urero Godini Danu dai yaure ibaada yawokeka orofaro waure amuke anisa.  
\v 6 Nono i awekae ia iyarike eme ibe me orofaro ani. Enoba Godima i orofae dawabake me furo uke bou uke odiba ibake iro ibeifiro odo duero aderedi sikisidi (1260) i awekabairo Dawama uruna makaada yawokeifine uke bou ui.   
\p
\v 7-8 Nama nono erebaie i urero uraneka odo idua fariro ere. Maikeroini danu aneru yaisina idua uyakake i dai uwaya ari rabuini danu aneru yaisinaini urakake Maikeroini danu aneruma buna uisake emua ma bereriekaba ibake i uwaya ari rabuini danu aneru yaisina emuae urero ibe dauisake dooro isaka.  
\v 9 Ibake i dai uwaya ari rabu dawae i adinaro we irukeibi waru ari danu moi ibiye deworo o seidani, dawae i dooro ibaisa orou yaisina we irukakune. Maikeroini danu aneruma seidanini danu aneru yaisina mune eu dooro siariekaro isaka.   
\p
\v 10 Nono ureroma wake daiwere eno wei, awoenae Godima ya ma wironea wei. Danu buna yaisina arurowere ukinuke Dawae yanu Dai Kini Mi sininu. Danu fafekuro wirofeisa Mi, Keriso Dawama Danu buna yaisina enaenari arurowere ukinuro bunawere sininu. I Godinu ibooro enare ibaada Godinu oroubake wayai weeka mi muninuke dooro sianinuro isarinu.  
\v 11 Iyanu naiyemuku emuama i awoena Mamoe abu Dawae emuabake feariro nono Danu iwa yewa dooro isariba ibake emuae emenu imuka yaisina Dawabairo oisa, Danu buna ui ena wake weibisa ibake i meomao weibi mi ma berekeibisa. I orou emuae i fearekabake ia iyare dakeibisa. Enoba emenu imuka yaisina Godibairo oisa ibake eme emenu ararae i orou ma feafiakane ukeibisaro nono emua emenu ararae feareka ia sine dakeibisa. Emenu imuka yaisina Godibairo oisa ibake eme emenu ararae i orou ma feafiakane ukeibisa.  
\v 12 Enoya ureini i urero ibinisa orouini yaisina rooro ukeibiawe. Nono ya dooro ibinisa orou yaisina erenewaa uawe. Seidani dawae yabairo ureroma dooro isare aarinuba ibake dawae iwoka danu ibekae yafawere mero danu ibekae funaku ibake dino ukaada inimu daiwere yabairo odifine ukakua imukenewaa ukaada erenewaa uawe wei.   
\p
\v 13-14 I dai uwaya ari rabu dawa mune siakaro dooro isarike dawa i amaranakunu amae yoweriroma nono Godima i awekabake imukari uike i udu adanu babayai mairo ima wawane anike eme ibe me orofaro anike i dai uwayabairomae yafawere ibeibi. Iro oya buubaini moi oya abanaroini eno ibeibiro Godima dawa yawokenewaa ukaada uruna makeibiro iseibi.  
\v 15 Ibake i dai uwaya ari rabuma danu bebekuroma obi orobiro isarike dai aduama oku fareibaku enaenari ui. Danu ararae i aweka i adua okuma waufine ibake eno ui.  
\v 16 Dawama eno uiro nono i dooma i aweka unu korike i seidanima obi orobiro isarike oku fari adua danu bebekuma ise raraine me sini.  
\v 17-18 I dai uwaya ari rabuma i awekabake dino daiwere uike i awekanu amarakuini urafisane emuabairo ani. Aniro i Godinu wake naukenewaa ukeibisake Yesu Kerisonu umuro anenewaa ukeibisa orouini urafine ani. I dai uwaya ari rabuma dawara udiro enare ibiro nama dawa ere.   
\c 13  
\s1 Waa abu una raarayai faki wake  
\p
\v 1 Nama nono erebaie i buna abu ari rabu dawararoma udiro amuiro ere. Dawae i ari eno, danu yawera yaisinae deni (10) nono danu bokai yaisinae seweni (7). Danu yaweraroe i dai yawokeka kini orounu barukeibaisa mogoiso yaisina deni (10) barukeibi. I bokai kai yaisina duboroe moi ibi ibi ibe fare ani. I ibi ibinu ubiye Godibairo i ibi ibi yaisinama wake meramawere weeka ibi ibi.  
\v 2 I buna abu ari rabu erebaie refodi weaisa abu ari eno ere. Nono danu umue bea weaisa abunu umu ari eno ere. Nono danu bebekue raioni weaisa abunu bebeku ari eno ere. I dai uwaya ari rabuma danu bunaini danu yaure ibaada yawokeibi orofaini danu yawokeibi buna yaisina i buna abu ari rabubairo mai.  
\v 3 I buna abu ari rabunu moi bokai kai ure yanake uisaro fearikema nono i bou biobao me siniro wiroi. Ibake i dooro ibisa orou yaisina foria uisake i buna abu ari rabunu umuro anisa.  
\v 4 Enoba i dai uwaya ari rabuma danu arararo ukeka buna yaisina i buna abu ari rabubairo guriguri uisake i buna abu ari rabuini guriguri ukaada eno weisa, aina mi dawae yewa abu ari enobaie anifike dawaini urafisi eno weisa.   
\p
\v 5 Godima i buna abu ari rabubairo we kuure dauiba ibake i buna abu ari rabuma wake meramawere weibike dawama oya buubaini manabe sikisi (6) i eraerabusa yaisina yawokeibi.  
\v 6 I buna abu ari rabuma Godibairo wake meramawere weibike Godinu ibi we ma merama ukeibike Godinu ibeibi orofaini i urero ibeibisa orouini emua yaisina we ma meramawere ukeibirie.  
\v 7 Dawama Godinu orouini uraneibisake dawama Godinu orou ma berekeibirie. Ibake dawama buna moi munike i orofa akaka imusu imusu orouini wake imusu imusu weibisa orouini ofe ubu imusu imusu orouini emua yaisina dawama arawere yawokeibirie.  
\v 8 Enoba yewa dooro ibifeisa orou yaisina i buna abu ari rabubairo guriguri ufeisa. Nono i awoena Mamoe abuma moi orou, Godima i eraerabusa yaisina ubu uke me i furo, emenu ibi ibi i feareibi awoena Mamoe abunu me ibene ibene ibeka orounu bukaro owaowa yanake odiba ibake i orou mane dubuenaroe i buna abu ari rabubairo guriguri da ufeisa.   
\p
\v 9-10 Aina mi dawae ome bobobaie yewa wake naukenewaa ufi. Ie i ari eno, aina mima danu arara moi Godinu wake naukeka mi ana ebaro odifine imufekuie odifeku. Nono aina mima moi Godinu wake naukeka mi bauma umafiro feafine imufekuie umafiro feafi. Enoya i ari eno ukeka daiwere fafekuie Godinu orou ya yanu Godi imukaisa ibai iroma ane imukenewaa uaweke enare ara uawe.   
\p
\v 11 Nama nono kubekuberoma erebaie moi buna abu ari rabu doo ubarenaroma uyarike duboro amuiro ere. Danu yawera kaiyaie moi awoena mamoe abunu yawera kaiyai ari eno. Nono danu wake weibi ibaie moi awoena i dai uwaya ari rabuma weibi wake ari eno weibi.  
\v 12 I dubuena buna abu ari rabuma i bokai buna abu ari rabunu buna yaisina munike danu bunawere ukekabai i bokai buna abu ari rabunu ibooro uke ma iwoka ui. Enoba dawama nae buna daiwereya weiba ibake i orofa akaka orou yaisina danu arararo mane uisake i bokai buna ukeka abu ari rabubairo guriguri ukeibisa.  
\v 13 I dubuenaro fari ena abu ari rabuma eme ku ubarenaro danu ukeka sineka imusu imusu uke ma iwoka ukekabai daiwere uke ma iwoka ukeibi. I ma iwoka ukeibi moi deie i ari eno, dawama daiwere weiro ureroma inaa yareibi bobo yewa dooro isare aariro eme keuwere ibai eka.  
\v 14 Enoba Godima danu ukeibi ibai ere mediro dawama i ukeka ubu imusu imusu daiwere i bokai buna daiwere abu ari rabunu ibooro ibai ukaada eme yaisina uke irukeibiriie. Enoba dawama i orofa akaka orou yaisinabairo eno wei, yama ana muaweke i bokai buna abu ari rabu i danu onami ari i anama koiaweke i anama ubu ukeka rabubairo guriguri ukaada danu ibi we ma daiwere uawe eno wei. I buna abu ari rabue dawa adinaro bauma yanakaro fearike nono wiroike ibinua eawe wei.  
\v 15 Godima danu ukeibi ibai ere mediro i dubuenaro fari buna abu ari rabuma i anama koisake i buna abu ari rabunu imumu uke oisa iboo ebaro imu sianeka mairo me ibaada wake weike i dawabairo guriguri uke dakeibisa orou yaisina ma fearie.  
\v 16 Enoba i dubuenaro fari ena buna abu ari rabuma nae buna daiwerea weiba ibake eme yaisina, ibi bobo orouini me daabaro eneibeka orouini emua yaisina emenu baena wanaroma emenu awararoma danu bio muneibisa.  
\v 17 Enoba aina ainabairo i buna abu ari rabunu bionu ibi emenu awararo ibe me orou emuae oima make uruna mune ise dakeibisa.   
\p
\v 18 Enoya ya eme yaisina ibai imukenewaa uawe. Aina mi dawae iwoka daiwerebaie i buna abu ari rabunu kakurekanu ubi iwoka sifi. Ie i ari eno, i kakurekae moi minu ibi. I bio yaisina sikisi aderedi sikisidi sikisi (666).   
\c 14  
\s1 Wani aderedi fodi fo dausini (144,000) orouma awoena yaura kai weisa wake  
\p
\v 1 Nono nama nanu kubekuberoma ereebe erebaie i awoena Mamoe abuma Saioni oraararo enare ibiro ere. Dawae iro enare ibiro eme keuwere wani aderedi fodi fo dausini (144,000) emuaini Dawaini demuiro enare ibisaro eya. I orou yaisina emenu awararoe Danu ibini Danu Babaenu ibini eno owaowa yanake odiba ibake emuaini demuiro enare ibisaro eya.  
\v 2 Nama nauebaie moi wake ureroma isare aariro naue. I wakenu ubiye i ari eno, adua sisifunu yama arini nono ure ureibaku i ari eno. Nono i wakeye emema gida ari rabu afu weaisa i rabuma dodoo ukeibaisaro yama irauaiai weibaku i ari eno weibi.  
\v 3 Enoba i orouma i dai yaure ibaada yawokeka dubonu iboo enaroini nono i me ibene ibene ibeka erabusa fonu (4) ibooroini i dai orou duenidi fonu (24) ibooro enare ibaada moi awoena yaura kai weibisa. Nono moi orou emuae i awoena yaura kai emua iwoka me. Ibake Godima i eme wani aderedi fodi fo dausini (144,000) i dooro ibisa orou yaisina emenu duuroma mune oima make munao uike ma bereke ekudeku odirieba ibake emua mane i awoena yaura kai weibisa.  
\v 4 I emema dooro ibaadae aruarumaini awekaboini ure burise mero me irauaiai ibaada aweka mune dakeibisa. Enoba i Awoena Mamoe abu anifine ukakuie emua yaisina Danu umuro anaisa. Godima eme yaisinanu duuro oima make munao urieke eme yaisinabairoma ma bereke ekudeku odirieke emuae bokairo Godini i Awoena Mamoe abubairo ofereni odinao uke odirie.  
\v 5 Enoba emuabairoe wake meo we dakaisake nono emuae moi erabunakuro merama uke mero emenu ukeka sinekae gienabu mane ukaisa.   
\s1 Aneru una buubama wake weibisa  
\p
\v 6 Nama nono erebaie moi aneruma yeku ure aweawero wawane fare aneibiro ere. Dawae i me ibene ibene ibeka wake waurike i dooro oroubairo wefiro emua yaisina naufisane i orofa akaka imusu imusu orouini wake imusu imusu orouini ofe ubu imusu imusu orouini i orou yaisinabairo wefiro naufisane urero wawane fare aneibiro ere.  
\v 7 Anaada dawama daiwere eno wei, Godima kodo uraada eme ma berefiaku odo idua farinua Dawabake ia sifiaro Danu buna ukeka mane we ma daiwere uawe. Godima ureini dooini dawaraini aduaini i eraerabusa yaisina Dawama ubu uiya Dawabairo iboo yanakaisari uaweke guriguri uawe eno wei.   
\p
\v 8 Nono moi aneruma i dawako fare ani ena anerunu umuro anaada eno wei, o i dai Babaronia goi idua doroo yarinua eno wei. Nauawe, i goiye doroo yarinua. I Babaronia dai goinu ukeka sinekae meramawere ara adua ari eno. Ibake i goiye i orofa akaka eme yaisinabairo danu meramawere ukeka i aruarumaini awekabobairo iboo odekae ara adua ari emuabairo mariero isake awara merama sinaada danu meramawere ukeibi enaenari ukeibisa.   
\p
\v 9-10 Nono moi aneruma i bokairo anisi aneruyainu umuro anaada daiwere eno wei, aina ainama i buna abu ari rabunu anama koiseka imumubairo guriguri ufeisaro i buna abu ari rabuma danu bio emenu awararoma wanaroma iro odifekuie emua Godinu waini adua ifeisa. I waini aduanu ubiye i ari eno, ie Godinu dino daiwere ukeka. Enoba Godima Danu dino ukekae faniginiro odifekuke mafiakuro ifeisa. Emua yaisina ifeisaie emua i feare dakaku wadadawere inaaro meramawere uke ibifeisaro i iifama imusu ari aneruini i awoena Mamoe abuini emuama i orou ereifiakaisa.  
\v 11 I emua ma merama ukeifiaku inaa iroe aine wai ure amukeifeku. Enoba aina ainama i buna abu ari rabunu anama koiseka imumubairo guriguri ukake danu bio muka oroue iro me ibene ibene meramawere uburo ibeifeisake dumuini ewekaini ko da yareifeisaya eno wei.   
\p
\v 12 I ari eno ukekawere fafekua Godinu orou, ya Godinu we iifa wake yaisina naukenewaa uaweke yanu imuka yaisina Yesubairo odenewaa uawero i meramawere fafiro enare ara uawe wei.   
\p
\v 13 Nono moi wake ureroma isare aariro naukeibisararo eno wei, i wake owaowa eno yanake odia weike nono wei, aina ainama emenu imuka yaisina i yanu Dai Waria Mi Yesu Kerisobairo odaisake fearaisaie emua dubuenaro rooro daiwere ufeisaya eno wei. Eno weiro Godinu Imumu Irauma eno wei, ba weakua wei, emenu budu ukaisa ibai nono medifeisake emenu irauaiai ukekaini iini waure anifeisake ko yafeisaya eno wei.   
\s1 Dooro uruna muneka odo idua farinua wei wake  
\p
\v 14 Nama nono erebaie moi inanawere ou duboro moi ba eme una ari rabuma yaure ibiro ere. Danu bokairoe i gorudima ubu uisa mogoisoe danu bokairo ibiro Dawae awewere bau kari mame ibiro ere.  
\v 15 Nono moi aneruma i dai sosi uwara ubarenaroma fare amuike aweawero i ou duboro yaure ibi mibairo daiwere weada dubo waure wake weada eno wei, i waiya oya idua farinua i ba sinisa uruna yaisina ma diwaa wei.  
\v 16 Eno weiro i ou duboro yaure ibi mima bau munike koe kuuraisari eno i ayo ure ibisa uruna yaisina umane kuuri.   
\p
\v 17 Nama nono erebaie moi aneruma i dai sosi uwara ubarenaroma aweawero amuike dawaini iini moi awe bau kari mame ibiro ere.   
\p
\v 18 Nono moi aneru dawae i ofereni odeibisa orofaro inaa yareibibai yawoke ibiro ere. Dawama i ofereni ode sibore sianeibisa orofaroma farike i awema imusu ari bau mame ibi anerubairo eno wei, i dooro ibinisa orou yaisinae ayo naa didi kai ariya eno wei.  
\v 19 Eno weiro emenu i naadidi kai bauma umane kuureibisake amune adiadi yareka ooruro sianeibisake amune adiadi yareibisa i ari enoe i aneruma danu awe bau munike dooro koe kuuraisari emeye naadidi kai kuunao uke murieke Godinu amune adiadi yareka ooru ari goi udiro siani.  
\v 20 Eno uike sianiro Godima emuae arawere amune adiadi yanao ukaada fanisi daiwere makeibirieba ibake emenu iwama i amune adiadi yareibisa orofaroma isare aneibiie adua oku ari eno fare isare aneibi. Nono i fare isare aneibi okunu sikorunu yafae emenu owai arabanaroma anaada diri aderedi fifidi kiromidasi (350) yafawere ari eno fare isare aneibi.   
\c 15  
\s1 Aneru sewenima meramawere eraerabusa seweni mame ibisa wake  
\p
\v 1 Nama urero moi ubu daiwere i ari eno ere. I erebaie i ari eno daiwere, aneru sewenima (7) awe waawere ukeka eraerabusa waukaro ere. I awe waawere ukekae i dubuena kai awe waawere ukekabai. Enoba Godima dino ufekuke i ari eno ufekuro Danu dino ukeka idua me sifeku.  
\v 2 Nama nono erebaie dawarama aku ari rabuini inaaini demuiro diroroko ukaada ibisiro ere. Nono erebaie i moi orouma i buna abu ari rabuini danu anama koise ubu uisa imumuini i ibi kakuka bio bobo rabuini urakake ma bereriekaro i oroue nama emua eya. Enoba emua yaisinae i aku ari diroroko ukeibi dawara udiro enare ibaada Godima emuabairo marie gida ari eno rabu afu weaisa eraerabusa mame ibisaro eya.  
\v 3 Emuama i Godinu waiya ukeka mi Mosesini i awoena Mamoe abunu yaura kai i ari eno weibisa,  
\li1 iyanu buna Waria Godi, Ae buna daiwere ukeka ukaku. Enoba Ae i orofa akaka imusu imusuro ibinisa orounu dai yawokeka Kini Mi. Enoya Anu ukeka sinekae yaisina gienabuini ba mane ukaku.  
\v 4 Iyanu Dai Waria Godi eme yaisina Abake iifa ukaada Anu ibi mane we ma daiwere ukaisa. Enoba A mane irauaiai ibinu. I orofa akaka orou yaisina Anu gienabuini ba ukeka ari ukaada guriguri ufeisaya,  
\m eno weada yaura kairoma weibisa.   
\p
\v 5 Eno we me sikaro nama nono erebaie i urero dai sosi uwara aisame ro yariro Godinu ibaku iifawere ooru ibiro ere.  
\v 6 I aneru sewenima ino me inanakeo wauma baruisake gorudima ubu uisa gabagauna emenu oro waiyakake i dubuena kai awe waawere ukeka yaisina seweni (7) mukake i dai sosi uwara ubarenaroma aweawero waure anisa.  
\v 7 Iro waure amuisaro moi me ibene ibene ibeka rabuma i aneru sewenibairo gorudima ubu uisa nabero seweni emuabairo marie. I me ibene ibene ibeka Godima Danu dino ukeka i nabero seweniro odiro i rabuma i aneru yaisinabairo marie.  
\v 8 Nono Godinu bunaini arakekaba ibake inaa iro daiwere urero dai sosi uwara ubarenaro wake farike i uwara ubarena ma yaari. Eno uiba ibake moi mima i uwara ubarenaro ane guriguri ufine ufekuie i ubarenaro da ane ibifekuro i aneru sewenini emenu awe waawere ukekabai me sifekuroma ai dubuenaro ane guriguri ufeku.   
\c 16  
\s1 Godinu dino ukeka yaisina nabero seweniro ibinua wei wake  
\p
\v 1 Nama nauebaie moi wake i urero dai sosi uwara ubarenaroma i aneru sewenibairo (7) eno wei, aniaweke Godinu dino ukeka i nabero seweniro ibinisa i dino ukeka rabu ureroma dooro ma oiyawero isafi eno weiro naue.   
\p
\v 2 Dawama eno weiro i bokai aneru unama ibai nauike ane danu nabero munike ma oiniro i awe waawere yewa dooro isari. Isarike ima i buna abu ari rabunu bio muka orouini i buna abu ari rabunu anama koise ubu uisa imumubairo guriguri ukeibisa oroue bou biobao keuwere marieke oferi daiwere imusu imusu marie.   
\p
\v 3 Nono i moi aneruma anike danu nabero munike ma oiniro i awe waawere dawararo isari. Isariba ibake i aduae i fearaisa orounu iwa ari eno uiro i dawara ubarenaro ibisa eraerabusa yaisina feaka.   
\p
\v 4 Nono moi aneruma anike danu nabero munike ma oiniro i awe waawere i ba aduaroma nono i oru faraku aduaroma i adua yaisinaro isariro i adua yaisina iwa mane sini.  
\v 5 Nama nono nauebaie i adua yawokeibi aneruma eno wei, O Godi, A mane irauaiai. Ae adinaroma ibeebe awoenaini ibinu. Ama awoena eme i ari eno uke gienabu kodo urakuneke emua fanisi makakunea wei.  
\v 6 I orouma Godinu orouini we bou ukeibirieka orouini ureibiriekaro emenu iwa isareibisaba ibake ibainu mokoe i meramawere oroubairo iwa aido makakunero isaisaya eno weiro naue.  
\v 7 Nama nono nauebaie wake moi i ofereni odeibisa orofaroma eno wei, O buna Waria Godi, Anu kodo urekaini eme fanisi makekaini ie ba ibake gienabu ukakua eno weiro na naue.   
\p
\v 8 Nono moi aneruma danu nabero munike ma oiniro i awe waawere ewekanu duboro isariro nono Godima ibai ere medi ibake ewekama inaa wadada ari uike eme yaisina yarie.  
\v 9 Emua i ari eno uke yariero nono emuama Godi Dawae i awe waawere ukeka yawokeibiba ibake Danu ibi we ma merama uisake nono emenu meramawere ukekabai mede dauisake Godinu ibi we ma daiwere uke dauisa.   
\p
\v 10-11 Nono moi aneruma anike danu nabero munike ma oiniro i awe waawere i buna abu ari rabunu yaure ibaada yawokeka orofa duboro isari. Isariro i buna abu ari rabunu yawokeibi orofa akakaro ibisa orou emenu meana ake adiadi yakake emenu ofero bou biobaobake Godinu ibi we ma merama uisake emenu meramawere ukekabai mede dauisa.   
\p
\v 12 Nono i dubuena udiro aneruma anike danu nabero munike ma oiniro i awe waawere i dai Ufereidi weaisa aduaro isariro i dai aduawere raraine me sini. I eweka amukaku enaro dai orou amuke aafisane daaba i aduama rarainike daaba uke odiro emua i daaba bouro amuke aafisane ibake i adua raraine me sini.  
\v 13 Nama nono erebaie i merama imumu una buubae bawada ari emuama i dai uwaya ari rabubairomaini nono i buna abu ari rabubairomaini i meo we bou urieka mibairomaini i yaisina emenu bebekuroma amukeibisaro ere.  
\v 14 Enoba i merama imumu una buubae seidaninu buna ukeibisa imumu una buuba. Enoba i merama imumu una buuba i dai yawokeka orou yaisinabairo anifisake emenu ararae demui orofaro ku siafisake Godinu dai odoro i buna daiwere Godini urafisane ibake weisake anisa.   
\p
\v 15 Emema merama da ufisane ibake Yesuma yewa wake dubo waure weike eno wei, Nanu wake nauawe wei. Nanu owere faraada umau ibaie waira ukeka minu fareka ubu ari eno uke famaua wei. Aina mima nauka kunawere da aifekuke danu wau irauaiai yawokenewaa ufekuie emenu naisa kekero ofe mane maru bobo da enafekuke dawae rooro daiwere uke anifekua eno wei.   
\p
\v 16 I merama imumuma i dai yawokeka orou yaisina demui orofaro waure fare ku siarieka. I Iburu orounu wakeromae i orofanu ibiye Amagedani weaisa.   
\p
\v 17 Nono i dubuena kai aneruma anike danu nabero munike ma oiniro i awe waawere aweawero oyauma ure wawane isariro wake moi urero dai sosi uwara ubarenaro ibi i dai yaure yawokeka orofaroma daiwere eno wei, idua me sininua eno wei.  
\v 18 Eno weiro bida mameibiro yama daiwere weibiro ure uraada gururu weibiro doo amani amani daiwere ui. Adinaroe doo amani amani i ari eno uke dakeibi. Nono i odoe i doo yaisinawere amani amani ui.  
\v 19 Eno uiro i dai goi abanaro yaisina feka buuba yanake birai. Eno uiro i orofa akakaro goi goi yaisina merama mane sika. Ibake Godima i Babaronia dai goi imuike dino daiwere i faniginiro odike mairo Babaroniama Godinu dino ukeka waini adua ari dawama iseibi.  
\v 20 I eka ena ewa ena dawararo uware orofa yaisina me mo ari uisaro nono i oraara yaisinaini me mo ari uisa.  
\v 21 Aisi oma daiwere, fifidi (50) kiro ari, ie dai ibudi urimi fuse ari ureroma emenu dubo duboro isaka ibake emema i aisi omanu inimubake Godinu ibi we ma merama ukeibisa. I awe waawereye ibake i ari eno ukeibisa.   
\c 17  
\s1 Moi awekabonu emeakabake ukeibi aweka danu meramawere ukeibi moko muni wake  
\p
\v 1 Nono moi nabero seweni bobo aneruma nabairo farike eno wei, aararo abake i moi awekabonu emeakabake ukeibi aweka we sibomaro danu merama ukekanu moko muneifiro ea wei. I awekae i dai goi adua keuwere udiro ibinua wei.  
\v 2 I orofa akaka imusu imusu yawokaisa dai kini orouma i moi awekabonu emeakabake ukeibi awekabairo fare enare odeibisaro i orofa akaka imusu imusu orouma i awekanu meramawere ukeibi ibai waini adua ari isaada awara merama ukeibiro gogore ukaada merama ukeibisaya eno weiro na naue.   
\p
\v 3 Dawama eno we me siniro Godinu Imumu Irauma na ma buna ukararo i aneruma na waure ane eme ibe me orofaro odikararo ibisara. Nama iro ibaada kubekuberoma erebaie i meramawere ukeibi awekama i kokoiwere buna abu ari rabunu duboro yaure ibiro ere. I buna abu ari rabunu bokai yaisinae seweni (7) nono danu yawerae deni (10). Danu meramawere ukeibi i ibi ibi keuwere danu ofero ibiro ere.  
\v 4 I awekama dubawereini kokoiwere wau baruike gorudima ubu uisa eraerabusaini irauaiai omaini irauaiai fera weaisa omaini ima weree weree uke ibiro ere. Dawa i gorudima ubu uisa fanigini mame ibiro i fanigini ubarenaroe danu meramawere ukeka inowere eraerabusa i ubarenaro ibiro ere.  
\v 5 Nono danu awararo moi ibi owaowa yanake odiro ibi. Nono i ibinu ubiye fe ibekanu ubi. Inu ubiye i ari eno, Babaronia goiye dawama i moi orounu awekabobake ukeibaisa awekabonu amae.  
\v 6 Nama nono erebaie i awekama Godinu orouini Yesubairo enare ara ukeibisa orounu iwa ike awara arama uiro ereke imuka foria daiwere ue.  
\v 7 Ibake i aneruma nabairo eno wei, anemebake imuka foria ukinu wei. Nama abairo i awekaini danu wauraku bokai yaisina sewenini (7) yawera deni (10) bobo buna abu ari rabunu fe yare ibaku ubi we ma boroo yamaro a naua wei.  
\v 8 I erinu buna abu ari rabu dawae adinaro ibeebe nono awoenae idua ibe dakaku. Dawama i doo eba yafawereroma sabu amuke anifekuro Godima dawa ma merama uke me sifekua eno wei. I moi dooro ibifeisa orou, i orou emenu ibi ibi i me ibene ibene ibeka orounu bukaro owaowa yanake ode dauisa, i ooruma i buna abu ari rabu dawae adinaro ibeebe nono awoenae ibe dakakuba nono dubuenaroe nono fafeku enoba i oroue dawa eraada imuka foria ufeisaya wei.   
\p
\v 9 I ari enoya imukenewaa uawe. I wakenu ubi dawa eno, i bokai yaisina sewenie (7) oraarananaku yaisina seweni. I awekama i oraarananaku yaisina seweninu duboro yauraku. Nono i oraarananaku yaisina sewenie (7) moi dai Kini orou seweni.  
\v 10 Enoba emuabairo moi dai Kini orou fai (5) emuae emenu waiya ukekabai isare me sika. Nono moi dai Kini mima awoenae eme yaisina yawokakune. Nono i dubuenaro dai Kini mi dawama fafekuke odo yafawere meroma odo funaku mane yawofekua wei.  
\v 11 Nono i adinaro ibeebe nono awoena ibe dakaku buna abu ari rabuma i Kini seweni oroubairo dawae Kini moi mi. Enoba Dawae emuabairoma anifekuke Kini moi mi sifekuro Godima dawa ma merama ufekuro feafeku.   
\p
\v 12 I erinu yawera deniye (10) moi dai Kini orou deni. Emuae awoena fare meba ai dubuenaro fafeisake buna mufeisake emuaini i buna abu ari rabuini emuama odo yafa mero funaku yawokeifeisa.  
\v 13 Enoba i dai Kini orou deni (10) emenu imuka demui imuka mane imufeisake emenu bunaini yawokeifeisa ibai yaisina i buna abu ari rabubairo mafeisaro dawaini eme ereka mi sifeku.  
\v 14 Enoba emua yaisinae i awoena Mamoe abuini urafeisa. Nono i awoena Mamoe abuini Danu we mune odiriero Danu umuro anenewaa ukeibisa orouini emuaini i yawokeifeisa dai orou ma berefiakaisa. I awoena mamoe abu Dawae i dai orou emenu Dai Mi. Dawae i dai Kini orounu Dai Kini Miba ibake i orou yaisina ma berefiakua eno wei.   
\p
\v 15 I aneruma nabairo nono eno wei, i aweka una udiro fare isare anakuro erinu aduae ie i orofa akaka orouini ofe ubu imusu imusu orouini wake imusu imusu weaisa orou ari eno.  
\v 16 I yawera denini (10) nono i buna abu ari rabuini emuae i moi awekabonu emeakabake ukeibi awekabairo ararua daiwere sifeisake danu eraerabusa yaisina mufeisaro ofe mane ibifekuro nono emuama danu ofe dama ifeisake inaama dawa yafeisaro yare me sifeku.  
\v 17 Godima Danu arara emuama Danu arara ukeka ufisane ibake Danu imukeka emenu imukaro odirie ibake emuama emenu bunaini yawokeibisa ibai yaisina i buna abu ari rabubairo maisaba ibake dawama emua yawofiakuro Godinu we bou ukeibi wake yaisina enaenari ufekuro idua me sifekua wei.   
\p
\v 18 I aneruma nono nabairo eno wei, i erinu awekae i dai Babaronia goi ari eno. I goiye i orofa akaka imusu imusu yawokaisa dai Kini orou yaisina yawokakua weiro naue.   
\c 18  
\s1 Babaronia goi merama sini wake  
\p
\v 1 Nama nono erebaie moi aneru ureroma isare aareibiro ere. Godima dawabairo buna daiwere mairo danu edoroma yewa doo yaisina edoro ui.  
\v 2 Dawama daiwere eno wei, i dai goi dawae isaria wei. I dai Babaronia goiye doroo yaria wei. Eno uiro seidaninu merama imumu keuwereini i inowere imumuini emuama awoenae i doroo yari goiro ibinisaro nono i meramawere ino gasira yaisina iro ibinisa.  
\v 3 Enoba i Babaronia goi dawae i awekabonu emeakabake ukeibi ibaie ara waini adua ari emebairo mariero isa. Enoba i orofa akaka yawokeibisa dai orouma i aweka enare odeibisabai i ari eno dawabairo fare dodoo ukeibisa. I oi waiya ukeibisa orouma i awekanu eraerabusa keuwerema emuae eraerabusa keuwere orou sineibisaya eno weiro naue.   
\p
\v 4 Nama nono nauebaie moi wake ureroma isare aarike eno wei,  
\li1 Nanu orou i goiroma mediaweke aweawero aniaweke danu meramawere ukeibaku i ari eno da uawe wei. Dawaini yaini kodo unao ufiakaisake danu meramawere ukeka moko munao ufoisaya dawabairoma imusu aniawe wei.  
\v 5-6 Danu ukeka meramama urero amuke ane farinuro Godima i ukeka sineka eraada ibaie irau meya weaku. Dawama yabairo meramawere ukeibia enaenari yama i meramawere moko dawabairo uaweke nono moibai dawabairo duboro uawe eno wei. Dawama okoanaku makeibiriero iseibisa enaenari yama faniginiro arawere adua ma demuiro uaweke maewero ifi wei.  
\v 7 Dawae eraerabusa keuwere bobo ibake irauaiai ibeibiba awoenae yama i ukeibi moko dawa fanisi maewe. Dawama eno weaku, nae dai yawokeka aweka enoba nanu yaure ibaada eme yawokakunia orofaro yaure ibine. Nae ii weibeka ena wabu aweka mero dawae i sorara ukekabake nabairo da fafekua eno weaku.  
\v 8 Dawae eno weakuba ibake odo demuiro i inimuwere ukeka dawabairo fafeisa. I inimuwere ukekae i ari eno, oferi imusu imusu waurekaini sorara ukekaini desini urekaini i yaisina dawabairo fafeisaro nono Godima dawa kodo ureifeku. Enoba Godi Dawae bunawereba i yaisina ma berekeibaku ibake i ukeka sineka yaisina fafekuro inaama i Babaronia goi yare me sifekua,  
\m eno weiro naue.   
\p
\v 9 I orofa akaka yawokeibisa dai Kini orouini i awekaini dodoo ukeibisake meramawere ukeibisaba ibai i orouma efeisaie inaama dawa yareifekuro iro amukeifekuro eraada ii wefeisa.  
\v 10 I yawokeibisa dai Kini orouma i aweka oferi karakada ukeifeku ibai efeisake ia daiwere iyafeisake ekararowere enare ibaada eno wefeisa, ae, ae, ie dai meramawereya! Yeka Babaronia dai goiwere anu meramawere ukeka nono idua abairo sabu farinua eno wefeisaya wei.   
\p
\v 11 I orofa akakaro oi waiya ukeibaisa moi orouma i eraerabusa dawabairo oima make da muneifeisa ibake enaenari imuka merama sinaada ii wefeisa.  
\v 12-13 Moi mima emenu okoa o dai eraerabusa keuwere oima makeroma mune dafeku. Enoba emenu eraerabusae eno, gorudini siriwaini make muneka daiwere omaini fera weaisa omaini inanakeo rinani weaisa wauini dubawere wauini kokoiwere wauini emenu imusu imusu irauaiai anaini aiwori weaisa i rabuma ubu ukaisa eraerabusaini emenu make munekae daiwere. Enoba ainama i ubu ukeka eraerabusaini burasi weaisa rabuma ubu ukaisa eraerabusaini ayanima ubu ukaisa eraerabusaini munaeini ofereni odaisa urumuwere faudaini mera weaisa urumu irauaiai aduaini furanikisenisa weaisa urumu irauaiai aduaini waini aduaini oeraini farauwaini uidi kaini boromakauini mamoe abuini osini osima ma youraku uwiri bobo seboini me waiya mane ukekaro oi da makeka orou emuaini iini i eraerabusa ari eno oima make mufiakaro emenu waiya ufisane waure fafiakaisaroma nono i eraerabusa yaisina oima make mune dafeisa.  
\v 14 I orouma i Babaronia goiro ibaadae oi waiya ukeibisa orouma i goibake eno weisa, anu arara i irauaiai aneme aneme eraerabusa muneibaku i eraerabusa yaisina me ari eno ukinua. Anu oini irauaiai wereeini ibai yaisinae idua me sininuba nono dubuenaro yodia ufakuie da fou ufakua eno weisa.  
\v 15-18 I orouma Babaronia goiro oi waiya ukaada eraerabusa keuwere muneibisa, enoba i orouma i goinu inimu daiwere waunao ufeisaba ibake ia iyafeisake ekararowere bi mame ibaada iroma eno wefeisa, ae, ae, ie dai meramawereya eno wefeisa. I Babaronia dai goibake imukari ukaisia. Dawa adinaroe rinani weaisa wauini dubawere wauini kokoiwere wauini baruike gorudini make muneka daiwere omaini fera weaisa omaini i wereeini rooro ukaada uwanibairo nono odo yafawere mero danu eraerabusa yaisina sabu me sininua eno wefeisaya wei.  
\p I boudi yawokeka kafudenini i boudiro aneibisa orouini i boudiro waiya ukeibisa orouini i dawararo ane fare ukaada oi waiya ukeibisa orouini emua yaisina ekara yafawereroma enare ibaada efeisabaie inaama yaraada iro amukeifekuro efeisake emuama eno wefeisa, yeka goiye irauaiairo moi goi goi i ari eno meya wefeisa.  
\v 19 Emuae doo bubudo mufeisake emenu iiriro kare fiafeisake eno wefeisa, ae ae, i dai goinu inimue daiwereya eno wefeisa. I dawararo eneiareibisa boudi yaisina iro fare aneibisaro i goiro ibisa orounu eraerabusa keuwere muneibisaya eno wefeisa. Nono odo yafa mero i eraerabusa yaisina sabu me sininua eno wefeisaya wei.   
\p
\v 20 I Babaronia goi merama sininuba ya urero ibinisa orouini Godinu orouini afasoro orouini we bou urieka orouini yae rooro uawe wei. Dawama yabairo meramawere uke yareibirieba ibake Godima dawa kodo uraada danu merama ukekanu moko fanisi makinua eno wei.   
\p
\v 21-22 Nono moi aneruma uidi kai ure adireka i oma ari dai rabuwere munike ei mamike dawararo sianiro isariro eno wei, i Babaronia dai goi dawae enaenari mufekuke daiwere sianao ufekuro emema i goi nono da efeisa. Enoba i buma ureibaisa orouini gida ureibaisa orouini kawia ureibaisa orouini i wirori ureibaisa orouini emua yaisina i goiro nono i ari eno da ufeisa. I goiro waiya nono da ufeisa. Emenu uidi kaima nono farauwa ubu da ufeisa.  
\v 23 I goiro moi ramefa edoro da ufeku. I awekabo emeaka muneka wake weroma enaenari da ufeisa. Anu oi waiya ukeibaisa oroue daiwerero i orofa akakaro oi waiya ukeibaisa orou emuae okoanaku. Enoba ae anu wada barauma i orofa akaka orou yaisina uke irukeibia eno wei.   
\p
\v 24 Godinu we bou urie orouini Danu orou emua ureibiriekaro feareibisaro emenu iwa i goiro isareibiba ibake Godima i Babaronia goi fanisi daiwere marie. I dooro feareibisa orou yaisina Godima erieke i Babaronia goi fanisi daiwere mariea wei.   
\c 19  
\s1 Eme keuwere i Babaronia goi merama sini ibaibake rooro daiwere uisa wake  
\p
\v 1 Nono dubuenaro nama nauebaie wake daiwere, eme keuwere urero wake gorowere we mamisake eno weisa, Godinu ibi we ma daiwere uawe eno weisaro naue. Enoba i eme ma wirokekaini arakekaini buna yaisinae Godinu.  
\v 2 Ibake Godima kodo urakuie gienabu uraada ba ukaku. Enoba Dawama i orofa akaka eme ma merama ukaada moi awekabonu emeakabake ukeibaku aweka ari enoba Godima dawa kodo urinuke ma merama ukinuro me sininua weisa. I dai goiro Godinu orou ma feareibiriekaba ibake Godima dawa fanisi daiwere maia eno weisa.  
\v 3 Eno weisake nono daiwere weisa, inaama i dai goi yarakuro iro aine wai ure amukeibakua yama Godinu ibi we ma daiwere uawe weisa.  
\v 4 Eno weisaro i dai orou duenidi foini (24) i me ibene ibene ibeka rabu foma (4) emua ifoma kodudu yanaisake i yaure ibaada yawokeka orofaro yaure ibinu Godibairo guriguri ukaada eno weisa, ba weaisaya, Godinu ibi we ma daiwere ukaisia weada areiruya weisa.  
\v 5 Eno weisaro i yaure ibaada yawokeka orofaroma moi wake farike eno wei, ya Godinu waiya ukaisa orou yaisina, dai ibi wariawere orouini ibi waria me orouini ya Godibairo ia iyareibaisa orouini ya yaisina Godinu ibi we ma daiwere uawe wei.   
\s1 I Awoena Mamoe danu aweka muniro banau uisa wake  
\p
\v 6 Nama nono nauebaie adua sisifu yama arini nono ure uraada gururu weibaku i ari eme keuwerema fare ku siane ibaada wake gorowere weibaisa i ari wake moi eno weisaro naue. Emuamae eno weibisa, iyanu Dai Waria buna daiwere Godi Dawama yewa eraerabusa yaisina yawokakuba ibake areiruya weada Danu ibi we ma daiwere ukaisia eno weisa.  
\v 7 I Awoena Mamoe abu Dawama Danu awoena aweka mufine ukakuro i Danu mufine ukaku arumama danu mane uke bou ukakuba ibake rooro ufeke imuka irauaiai ufeke Danu ibi we ma irauaiai ufene weaisia eno weisa.  
\v 8 Eno weisake nono weisa, Danu mufine ukaku arumabairo inanakeo rinani weaisa wauma barufine makinua weisa. I waue Godinu orounu irauaiai ukeka wau ari eno.   
\p
\v 9 Eno we me sikaro i aneruma nabairo eno wei, ama yewa wake eno owaowa yanake odia. Odiaro Godima i Awoena Mamoe abunu aweka muneka banauro eme wayo yourieba ibake rooro daiwere ufeisaya eno weike nono wei, ie Godinu ba wakeya wei.  
\v 10 Eno weiro nama dawabairo guriguri umane ukaada danu umu udiro ifoma kodudu yanaero dawama eno wei, aini naini uwae naiyeyai, enoba aina ainama Yesu Kerisonu ba wake weibaisa orou ya yaisinae iyanu waiya demuiro ukaisi ibake ae Godibairo mane guriguri ua wei. Yesu Dawae Danu ba imukeka we ma boroo yarakuba ibake Danu wake weeka orou yaisina iyae enaenari weaisia wei.   
\s1 Moi mi inanakeo osi abu duboro yaure ibi wake  
\p
\v 11 Nama nono erebaie ure eba uiro inanakeo osi abuwere iro ibiro ere. Nama ibai ereke nono erebaie moi Mi danu ibiye gienabuke ba. I Mima i osi duboro yaure ibaada Danu kodo urekaini uraneka gienabu ukeibi.  
\v 12 Nono Danu naisae inaa domea ariro Danu bokairoe kini orounu barukaisa mogoiso ari keuwere ibisa. Danu ibiye awararo ibi. Eme moi emuae i ibinu ubi emua iwoka mero Danu mane iwoka sine ibi.  
\v 13 Enoba Danu owairoma barukeka yafawere wauro iwama i wau kare fiake ibi. Danu ibiye Godinu wakeya eno weibisa.  
\v 14 Dawa iro anibaie i urero ame orouma ino me inanakeo rinani weaisa wauwere were baruisake inanakeo osi dubo duboro yaukake Danu umuro anisa.  
\v 15 Dawa anibaie awero yafawere bau Danu bebekuma kafu uke ibiro bebekuroma baruna fare ibi. Danu i bauma i orofa akaka orou yaisinaini urafisake emua ma berefiane ibake weike ani. Danu yawokeka ayani usima i orou yaisina arawere yawofiane emua i gureifi kai amune adiadi yaraisa orofaro ure adiadi yareibaisaro idudabai isareibaku i ari Dawama i orou Godinu dino daiwere ukekabairo odifiakuke emuabairo ukekae i gureifi kai amune adiadi yareka i ari eno ufiaku.  
\v 16 Enoba Danu barukeka yafawere wauini Danu mau arabanaro moi ibi eno owaowa yanake odiro ibi i kini orou emenu dai kini nono i dai ibi waria orou emenu Dai Waria Miya eno ibi.   
\p
\v 17-18 Nama nono erebaie moi aneruma eweka naisaro enare ibiro ere. Dawama iro enare ibaada i urero wawane eneibisa gasira yaisinabairo daiwere eno wei, ya yaisina, yewa Godinu dai banauro aare ku siawe wei. Aaraweke i Kini orouini i dai ame orouini i ame orouini i osini i osi duboro yaure ibisa orouini i waiya ukeka orouini i me eneibeka orouini i ibi waria orouini i ibi waria me orouini emua yaisina emenu ofe ubu dama dama yaisina ise me siawe eno weiro naue.   
\p
\v 19 Nama nono erebaie i buna abu ari rabuini i orofa akakaro dai Kini orouini emenu ame orouini emua yaisinaini i inanakeowere osi duboro yauri mini Danu ame orouini urafisane fare ku siakaro ere.  
\v 20 Dawama i buna abu ari rabuini i meo we bou uisa mini emua naama emenu umu wana uwarie. Adinaro i meo we bou uisa mima i buna abu ari rabunu ibooro buna daiwere ukeibi. Ibake Dawama eno ukaada i buna abu ari rabunu bio muka oroue i buna abu ari rabunu anama koise uisa imumubairo guriguri ukeibisa orou dawama buna daiwere ukaada emua uke irukeibiriie. Enoba i buna abu ari rabuini i meo we bou ukeka mini emuae i feare dakaku sofa weaisa oma safirima yareibaku i ari eno uke yaraada aine wai ure yareibaku inaaro awoena a’uro mune siariero isaki.  
\v 21 I inanakeo osi duboro yaure ibi Mi Dawama Danu bebekuma kafu uke ibiro bebekuroma baruna fare ibi bauma i buna abu ari rabuini i meo we bou ukeka minu ami orou yaisina ure ma feare me siriero i gasira yaisina fakake emenu ofero dama dama yaisina isaro boana uriero ibai ere.   
\c 20  
\s1 I seidanima oya wani dausini (1000) ana ebaro ibeifeku wake  
\p
\v 1 Nama nono erebaie moi aneru ureroma isare aarada i doo eba yafawerenu ki mamike nono inimuwere seni waurike isare aareibiro ere.  
\v 2 Dawama dooro isarike i dai uwaya ari rabu, i dai waruwere danu moi ibiye deworo o seidani weaisa dawa munike oya keuwere wani dausini (1000) ana ebaro ibifine ibake senima uwane karise odiro ere.  
\v 3 I aneruma seidani uwane karike i doo ebaro sianiro i doo eba ubarenaro isari. Isariro nono i aneruma i doo eba nono ko urike naama uwane kari. Ibake seidanima i orofa akakaro eme yaisina da we irukeifiakuke iro oya wani dausini (1000) ibeifeku. I oya wani dausini me sifekuro dawa nono ma woromifekuro dawa yewa dooro odo yafa menaku mane beneifekubai ere.   
\p
\v 4 Nama moi dei ubu eno ere, moi yaure ibaada yawokeka orofaro moi orouma iro yawokeibisaro ere. Godima emua buna mariero eme kodo urieka. Nama erebaie moi orouma Yesunu we ma boroo yari ba wakeini Godinu wake webisaba ibake eme moima emua ureibiriekaro feareibisaro nono emenu imumu Godibairo amuke anisaro emenu imumue na ere. Enoba i orouma i buna abu ari rabu danu imumubairo guriguri uke dauisa, emuae arara me ibake danu bio awararoma wanaroma eno odekabai ibake mune dauisa.  
\v 5 Emuae ibake feareibisa. Nono emenu feareibisa iroma uyafeisake Yesu Kerisoini emuama eme oya wani dausini (1000) yawofiakaisa.  
\v 6 I fearekaroma uyareka ie bokai fearekaroma uyareka. Nono moi orouma i feareka iroma da uyare ibifeisaro oya wani dausini me sifekuie idua nono uyafeisa. I bokai fearekaroma uyafeisa oroue rooro bobo gienabu ibifeisake i feare me inaa ibifeku orofaro da anifeisake nono emuae Godini Yesu Kerisonu ofereni ode sibore sianeka orou sifeisake Yesuini oya wani dausini eme yawokeifiakaisa ibai ere.   
\s1 I seidani ba merama sifeku wake  
\p
\v 7 I oya wani dausini me sifekuro Godima seidani ma woromifekuro seidani dawae i doo ebaroma amufeku.  
\v 8 Dawama i orofa akaka orou yaisina i doo sougo foro (4) ibifeisa orou yaisina uke irufiane ibake anifeku. Enoba dawae i Gogini Meigogi weaisa orou yaisina mufiake Godini urafisane ibake demui orofaro ku siane odifiaku. I danu orou emuae keuwere, emuae gibudi ari eno.  
\v 9 Enoba i orouma i doo kari ure kari iro anaada Godinu orou emenu ibeibisa orofa enare kara ukeibisake Godinu ararama imusu ari goi enare kara ukeibisaie inaa ureroma isare aarike emua yaisina yare me sirie.  
\v 10 Enoba i seidani dawae dooro eme keuwere uke irukada danu daabaro waure aneibiriero nono Godima dawa mune i feare dakaku sofa weiasa oma safirima yareibaku i ari aine wai ure yareibaku inaa ubarena kuna ari iro sianiro dawae i buna abu ari rabuini i meo we bou ukeka mibairo isari. Enoba emuae iro dumuini ewekaini me ibene ibene ibaada oferi daiwere waureifeisa. Enoba ibai nama i ari eno ere.   
\s1 I dai kodo ureka odo fafeku wake  
\p
\v 11 Nama nono erebaie moi Kininu dai inanakeo yaureka dubo ibiro nono moi mima i duboro yaure ibiro ere. Nono i dooini ureini emua Dawabake ia iyakike owekike durame ane me mo ari siki.  
\v 12 Nama nono erebaie i feareibisa orou yaisina, i ibi waria orouini ibi waria me orouini emua yaisina i Kininu yaureka dubo ibooro uyare enakaro nama emua eya. Buka imusu imusu ma ro yakaro nono moi bukae wirokeka buka ma ro yari. Godima i bukaro eraada i feareibisa orou yaisina emenu adinaro ukeibisa sineibisabai iroma eraada emuae enaenari kodo urie.  
\v 13 Eno uiro i dawara ubarenaro ibisake feaka orouma i dawara meisake Dawabairo amuke fakaro nono Godima emenu adinaro ukeibisa sineibisa ibai iwoka sinike emuae enaenari kodo ure yarie.  
\v 14 Emua enaenari kodo ure yarieke emuaini i fearekaini nono i feareka orofaini mune i feare dakaku kuna ari inaaro siariero iro isaka. I feare dakaku kuna ari inaae i dubuena kai feareka.  
\v 15 Aina ainanu ibi ibi i wirokeka bukaro ibe me orou emuae mune i feare dakaku kuna ari inaaro siariero isakaro nama ibai yaisina ere.   
\c 21  
\s1 I awoena ureini awoena doonu wake  
\p
\v 1 Nae kubekuberoma awoena ureini doo ere. I adina ureini adina dooe me sikaro i dawaraini iini me sini.  
\v 2 Nama nono erebaie i awoena iifawere goi i awoena irauaiai Derusaremu goi Godibairoma ure medike isare aareibiro ere. Moi karu arumama eme mufine irau wau barukeibaku i ari eno i awoena Derusaremu goima isare aareibiro nama ere.  
\v 3-4 Nama nono nauebaie wake daiwere i kininu yaureka duboroma farike eno wei, awoenae Godinu ibeka emebairo ibinu. Enoba Dawama emebairo ibeifekuro nono emuae Danu orou sifeisa. Godini emuaini demuiro ibaada Dawama emenu ii du emenu naisaroma ma isure siafekuro iroe ibaada feareka da fafekuro iroe sorara da ufeisake nono iroe ii da wefeisake nono iroe oferi da waufeisa. I adina eraerabusa yaisina me sikaya eno weiro naue.   
\p
\v 5 I dai yawokeka duboro yaure ibi Mima eno wei, Nae awoena i eraerabusa yaisina awoena ai ubu ukakunea eno weiro naue. Eno weike nono wei, nanu wakeye baba yama naufoisaya yewa wake owaowa yanake odia wei.  
\v 6 Dawama nono eno wei, ie idua me sininu. Nae i bokaini umu enoba Nae i bokaini dubuena. Aina mi dawa adua isa ufekuie Nama i wirokeka adua oruroma adua mune dawabairo me mamauro wirokeka adua ifekuke moko oi da mafarakua eno wei.  
\v 7 Aina mima enare ara ufekuke i meramawere ukeka ma berefekuie Na danu Godi simauro dawae Nanu amara sifeku. Nae i ari eno umau.  
\v 8 Nono i buna gobugobu orouini i naukenewaa uke dakaisa orouini imuka inowere imukaisa orouini eme ma fearakuneka orouini moi orounu aruma aweka enare odaisa orouini wada barau ukaisa orouini emenu onarou wanama ubu ukeka godibairo guriguri ukeka orouini i meomao weeka orouini emuae i feare dakaku sofa weaisa oma safirima yareibaku i ari eno uke aine wai ure yareibaku inaaro mune siafiakuro isafeisa. Ie i dubuena kai fearekae iduaya eno weiro naue.   
\s1 I awoena Derusaremu goibake wei wake  
\p
\v 9 Nono i aneru sewenima (7) emuae i gorudima ubu uisa nabero mame ibisaro i nabero ubarenaroe i dubuena kai awe waa ukeka iro wake fare ibisa. Nono i emuabairoma moi aneru una demuima nabairo farike eno wei, aararo i awoena Mamoe abunu awoena aweka we ma iwoka umaro ea wei.  
\v 10 Eno weiro Godinu Imumu Irauma na ma buna ukararo i aneruma na i dai yafawere oraararo waure amuke anikarake iro odikararo iroma i awoena Derusaremu goi i iifawere goima ure medike Godibairoma isare aareibiro we siboiro na ere.  
\v 11 I Godinu arakekawerema i goi biake ibi. Nono i goinu biake ibekae i doo ubarenaro daune munaisa irauaiai amearubu diroroko ukeibaku omanu arakeka ari eno. I omanu ibiye dasifa weaisa.  
\v 12 I goi udiro mamisa oroe ekuaroma euroma yafawere. I mamisa ororo aisame duero (12) ibisaro i aisame dueroe (12) aneru dueroma (12) yawokeibisa. I aisameroe Deikafunu amaraku duero (12) emenu ibi ibi i aisame deidemuro i amaraku emenu ibi deidemu owowa yanake ode fare anisaro ibisa.  
\v 13 Nono i eweka amukeka enaroe aisame buuba ibisa. Nono i eweka isareka enaroe aisame buuba ibisa. Nono moi ena manamaroe moi aisame buuba ibisa. Nono moi ena manamaroe moi aisame buuba ibisa.  
\v 14 I goinu oro danu fosie oma yaisina duero (12). I oma fosiro i awoena Mamoe abunu afasoro orou duero (12) emenu ibi ibi i fosi kai deidemuro i afasoro orounu ibi deidemu owaowa yanake ode fare anisabai ibisaro ere.   
\p
\v 15 I nabairo weibi anerunu wanaroe i goini i aisame yaisinaini nono i oroini kowo mufine gorudima ubu uisa kowo feka mame ibi.  
\v 16 I goinu sougo yaisinae fo (4). I eraerabusa emenu mama mamaroma nono emenu kowo demui. Enoba i aneruma i goi danu kowo fekama kowo muni. I goinu yafaini danu bodoini ekuaroma euroma i yafainie imusu imusu me, demui. I yaisinae du dausini fai aderedi (2500) kiromidasi yafa kowo muni.  
\v 17 I aneruma eno uke kowo munike i oro kowo muni iini nono i oro ekuaroma euroma kowo muniie sikisidi (60) midasi yafa eno kowo muni. Enoba i aneruma yewa dooro orounu owaowaroma kakureibi.  
\v 18 I dasifa weaisa omama oro mamisake nono i amearubu aku ari gorudima i goi ubu ui.  
\v 19-20 I oma fosi emenu oima make munekae daiwere oma imusu imusu ibinisa. I dawako oma fosie Dasifa weaisa oma. Danu umuro oisa oma fosie Ageda weaisa oma. Nono inu umuro oisa omae Emera weaisa oma. Nono inu umuro oisa omae Onika weaisa oma. Nono inu umuro oisa omae Kaneria weaisa oma. Nono inu umuro oisa omae Kodisi weaisa oma. Nono inu umuro oisa omae Bero weaisa oma. Nono inu umuro oisa omae Dofasi weaisa oma. Nono inu umuro oisa omae Kurisafasi weaisa oma. Nono inu umuro oisa omae Dukoisi weaisa oma. Nono inu umuro oisa omae Amedisidi weaisa oma.  
\v 21 I aisame yaisina dueroe (12) ie Fera weaisa omama ubu uisa. Moi aisame yaisinae i demui Ferama ubu uisaro ibisa. Nono i aisame yaisinaro eno mane uke ode anisa. I goinu daabae amearubu akuma diroroko ukeibaku i ari eno irauaiai gorudima uisaro ere.   
\p
\v 22 Nama iro erebaie iro moi dai sosi uwara ibe daui. Iyanu Dai waria bunawere Godi Dawaini i awoena Mamoe abuini emenu onamiyaie dai sosi uwara ari eno.  
\v 23 Enoba Godinu arakekama i goi biake ibiro i awoena Mamoe abu Dawaini emenu edoro mane ibai ibake i goiro ewekaini manabe iro edoro uke daui.  
\v 24 I dooro ibifeisa orouma i biake ibi edororo eneifeisaro i dai Kini orou yaisina emenu eraerabusa yaisina i goiro waure ane odifeisa.  
\v 25 I goinu aisame yaisinae ko da ufeisa. Nono iroe dumu meba ibake ma ro yare odifeisaro ibeifeisa.  
\v 26 I orofa akaka orou yaisina emuae emenu arakekaini emenu eraerabusa yaisina iro waure ane odifeisa.  
\v 27 Nono inowere eraerabusama i goiro da anifeisaro i meramawere ukeka orouini i meomao weeka orouini emuama iro da anifeisa. Aina aina emenu ibi ibi i awoena mamoe abunu wirokeka bukaro ibifeisaie i orou emenu mane iro anifeisa.   
\c 22  
\s1 Wirokeka aduaini wirokeka anabake wei wake  
\p
\v 1 I aneruma ma wirokeka amearubu adua aku ari diroroko ukaada Godini i awoena Mamoe abunu dai yaurekaroma fareibi wirokeka adua we siboiro ere.  
\v 2 I aduae iroma aweawero amuike i goinu daaba naisaro fare ani. Nono i adua ekabokenaroe moi wirokeka ana enare ibiro nono ewabokenaroe moi wirokeka ana enare ibiro ere. I anayai iro enare ibaadae kaibai iboo imusu imusu duero (12) manabe demui demuiro eno uwaneibisa. Nono emenu kakabaie i orofa akaka orou yaisinanu ma wirokeka.  
\v 3 Iroe ba me meramawere eraerabusa ibe me. Iroe Godini i awoena Mamoe abunu dai yaurekama ibifekuro Godinu waiya ukeka orouma Dawabairo guriguri ukeifeisa.  
\v 4 Nono i orouma Danu iboo naisa efeisaro Danu ibi i orounu awararo owaowa yanake odifeku.  
\v 5 Iroe dumu meba ramefaini ewekanu edoro iro da fafeku. I dai Waria Godi Dawae emenu edoro. I orouma Kini orou ari me ibene ibene ibaada yawokeifeisa ibai ere.   
\s1 I Yesu sabu fafeku wake  
\p
\v 6 I aneruma nabairo eno wei, yewae baya weroma nauke imuke ukenewaa ukeka wake. Yewa Godima Danu Imumu Irau i we bou ukeka oroubairo makeibakune ibake Dawama Danu aneru Danu waiya ukeka oroubairo i sabu fafeisa eraerabusa we sibofine ibake we odaisinuro farinua wei.   
\p
\v 7 Yesuma eno weaku, Nae sabu famaua erenewaa uawe. Aina ainama yewa we bou ukeka wake yewa bukaroma kakufeisake enaenari ufeisaie emua rooro daiwere ufeisaya eno weaku.   
\p
\v 8-9 Na Dioni, nama nanu kubekuberoma i eraerabusa yaisina ere. nae i eraerabusa yaisina ere nauke uke me sineke i eraerabusa we siboiro ere anerunu umu udiro iboo yanakaisari ueke dawabairo guriguri umane uebaie dawama nabake eno wei, i ari eno da ua wei. Naini aini uwae i demui waiya ukeka miyairo i we bou urieka yewa wake naukaisa orouini iya yaisinae demui. Enoya Godinu waiya demuiro ukaisia Godibairo mane guriguri ua wei.  
\v 10 Dawama nabairo nono eno wei, yewa bukanu we bou uisa wake da ma fe yare odia wei. I eraerabusa yaisina sabu fafeisaya wei.  
\v 11 Eno weike nono wei, i eraerabusa yaisina sabu fafeisaba ibake i meramawere ukaisa orouma idua enaenari ukeifeisa. Enoba i ino imuka imukaisa orouma enaenari inowere imukeifeisa. Nono i irauaiai ukaisa orouma enaenari idua irauaiai ukeifeisaro nono i Godinu ibooro gienabu ukaisa orouma idua Godinu ibooro gienabu ukeifeisaya eno wei.   
\p
\v 12 Yesuma eno weaku, erenewaa uawe. Nae sabu famaua weaku. Na famauie Nanu moko makeka waure famauke eme yaisinabairo emenu waiya aneaneme ukaisa iro eraada emuabake enaenari mamiau.  
\v 13 Nae i bokaini i umu, Nae i bokaini nono i dubuena, Nae i ubini nono i uke me sineka risiya weaku.   
\p
\v 14 Aina ainama emenu wau urokaisaro ino me sinaku, I orouma Godinu wake naukaisa ibake i wirokeka ana kai ifeisake i oro aisameroma fare i goi ubarenaro anifeisa.  
\v 15 Nono i goi oro dubuenaroe i kua ari orouini wada barau ukaisa orouini moi orounu aruma aweka enare odaisa orouini i eme ma fearakuneka orouini i me wanama ubu ukaisa meo godibairo guriguri ukaisa orouini i meomao weaisa orouini i meomao ukaisa orouini emua yaisinae i oro dubuenaro ibifeisa.   
\p
\v 16 Enoba Yesuma weaku, Na Yesu Nama i sosi uwararo fare ku sianaisa oroubairo yewa wake wefine Nanu aneru odaiero iro ani. Nae Deiwidinu sisia mi. Nae i edoro daiwere waisumanu ariya eno weaku.  
\v 17 I Imumu Irauini nono i awoena awekaini emuama aarawe weaisiba ibake nono aina ainama ibai naufeisaie emuaini iini moi oroubake aarawe wefeisa. Aina ainama adua isa ufiakuro i wirokeka adua ifone ufoisaie aaraweke iawe wefeisaya weiro naue.   
\p
\v 18 Na Dioni, nama yewa bukanu we bou ukeka wake naukaisa oroubake eno we iifa ukakune, aina ainama moi mi danu imukeka wake yewa wake duboro odifekuie Godima dawabairo yewa bukaro weaku inimuwere eraerabusa yaisina dawabairo odifeku.  
\v 19 Enoba aina ainama yewa bukanu we bou ukeka wakeroma wake moi mune siafeisaie Godima emuabake we kuufiakuro emuae yewa bukaroma weaku danu wirokeka ana kai da ifeisake danu iifa goiro da aneifeisa.   
\p
\v 20 Yewa wakenu ubi Mima eno weaku, nae sabu famaua eno weakubake ie baya weada Dai Waria Mi Yesu sabu faa eno weaisi.  
\v 21 Iyanu Dai Waria Mi Yesuma yabake imukari ukaada irauaiai unu kofiane weakune. Nanu wake idua me sininu.