\id JAS - Aneme Wake NT [aby] -Papua New Guinea 1988 (DBL -2013) \h Deimisi \toc1 DEIMISINU OWAOWA \toc2 Deimisi \toc3 Deim \mt1 DEIMISINU OWAOWA \c 1 \p \v 1 Na Deimisi nae iyanu Babae Godini iyanu Dai Waria Mi Yesu Kerisoini Emenu waiya ukeka mi. Ibake ya Isaraera orouma yanu orofa meisake imusu oroorofaro ane ibinisaba ibake ya arie wake wemake ya yaisinabairo yewa owaowa odaimane ibake yewa owaowa yanake odakune. \s1 I uke erekama iya yaisina ma buna ukaku wake \p \v 2 Nanu naiyemuku, nanu wake wemaro ya nauawe. Inimuwere waurekaini awe waa ukekaini yabairo fafekuie ia da iyaweke ya yaisina rooro uawe. \v 3 I inimuwere waureka yabairo fafekuie yanu Babae Godi imukeka imukama imukenewaa uawero yanu imuka owere owere da ufiro yanu Godi imukeka imuka ma ara ufi. \v 4 I awe waa imusu imusu yabairo fafekuie imuka ma ara ukaada irauaiai imukenewaa ufoisaie yae Godinu naisaro irauaiai ibifoisa. I ari eno ufoisaie yanu irau Babae imukeka imuka ma ara ufeku ibake yama aneme aneme ukaadae idua irauaiai mane ukeifoisa. \s1 Ainama dawabairo iwoka daiwere meie Godibairo guriguri ufine wei wake \p \v 5 Moi iwoka daiwere me mi dawa Godibairo we nauke efiro Godima dawa iwoka daiwere mafi. Emema Godibairo anemerabubake we nauke efeisaie Godima dino ukeroma anemebake we nauke eraisa eno da wefekuke emuabake i we nauke efeisa eraerabusa yaisina mafiaku. \v 6 Enoba ainama Godibairo anemerabubake we nauke eraadae i mi dawa imukenewaa ukaadama we nauke efi. I we nauke eraadae Godima nabake mafaraku ba me ari eno da imufeku! I ari eno imufekuie danu imukekae dawara ufe ari. Dawara ufema rerei rerei ukeibaku i ari danu imukekae imusu imusuba ibake i mi danu imukekae imusuba Godima dawabake aneme aneme da mafeku. \v 7-8 I imukeka imusu imusu mi danu ukaku ibai yaisina gienabu me. Ibake i ari eno ufoisaie imukenewaa daufoisa ibake Godima yabake aneme aneme da mafiaku. \s1 I eraerabusa me mini eraerabusa keuwere mini emuabake wei wake \p \v 9 Godinu me sara ibaada naukeka mi erabusa dai menaku mufeku ibake da imufike Godima dawa ma daiwere ufeku ibaima imufike rooro daiwere ufine ibake weakune. \v 10 I oi daiwere bobo mi danu oi mane da imufike rooro da ufine ibake weakune. Godima dawa ma okoanaku ufekuke Danu waiya ukeka mi we mune odifeku ibake rooro ufine weakune. Ana runi foumukakuke nono sabunaku ure gamura urakuke dooro isaraku enaenari i oi daiwere bobo mima feafekuro danu oi yewa dooro me ibifeku. \v 11 Kowaa enarakuke koe runi yare boke urakuro runibai isaraisake emenu agae fare ibaisabai me sinaisa enaenari i oi daiwere bobo orouma oi imufeisake oi waiya mane ukenewaa ukaada idua feafeisa. \s1 Eraerabusabake wake weaisaie ima eme uke iruke erakune wake \p \v 12 Ainama i meramawere uke ereka ere medifekuke Godi imukenewaa ufekuie Godima dawa we ma irauaiai ufekuro rooro daiwere ufeku. Enoba aina ainama Godibake imukari ukaisa i orou emuae Godima i we bou ui enaenari emenu moko me makekae me ibene ibene ibeka i mibake enaenari mafeku. \v 13 Enoba i meramawere uke ereka yabairo fafekuie Godima iya uke iruke erakunia eno da weawe. I meramawere uke iruke erekae Godibairoma da aafekuro nono Godima emebake meramawere da uke yafiaku. \v 14-15 Nono ainama meramawere uke ereka dawabairo fafekuro dawama enaenari ufekuie dawa i meramawere ukekanu imuka imukeifekuba ibake i meramawere ukeifeku. Enoba i mima danu imukanu meramawere arara mane ufekuie dawa meramawere ufeku. Dawa i ari eno uke meramawere ukeifeku ibake dawae sara feafekuro danu imumu i irau me ibene ibene ibeka orofaro da anifeku. \p \v 16-17 Naiyemuku, me sarawere da uawe. Iyanu urero ibinu Babae Godi Dawa i urero edoro eraerabusa ubu ui. Ibake Danu imusu mane yewa orofaro irauaiai eraerabusa odakuke iyabairo irauaiai aneme aneme yaisina makakuni. Enoba Godi Danu imukeka ma owere owere da ufeku. I moi ramefama yarenewaa da ukeibaku i ari eno Danu imukeka ma owere owere daukakuke irauaiai mane ukeibaku. \v 18 Godima Danu ba wake iyabairo mamine we imuike ibake Danu ba irau wake yabairo ma’iro iyama i wake nauisike Danu dawako we mune odeka orou siki. Nono dubuenaroe moi orouma Danu ba irau wake naufeisake enaenari Danu orou sifeisa. \s1 Iya Godinu wake naufeisiie enaenari ufene wei wake \p \v 19 Naiyemuku, yewa wake naukenewaa uawe. Moi orounu wake naukenewaa uaweke wake keuwere da weaweke sabu dino da uawe. \v 20 Ainama dino ukakuie Godinu irauaiai ukeka uke dakaku. \v 21 Iduaya i meramawere ukekaini meramawere imukekaini i yaisina mediawe. Godima Danu irau imukeka wake yanu imuka ubarenaro odia naukenewaa uawero ima yanu imukaro merama imukeka ma wirofiro me ibene ibene ibifone ibake weakune. \p \v 22 Godinu wake naukada nono irauaiai uke dakaisaie ba me ukaisa ibake yanu onarou uke irukaisa. Enoya ibai da uaweke Godinu wake naukenewaa uaweke irauaiai mane uawe. \v 23-24 Ainama Godinu wake naukakuke irauaiai uke dakakuie dawa akuro eraku mi ari eno. Enoba i mima akuro danu iboo naisa irauaiai erakuke nono medakuke anaada danu iboo naisa inoba amearubu ari eno imuke dakaku. \v 25 Enoba ainama Godinu irau darawadu wake naukenewaa ukakuie i wakema i mi i meramawere ukeibaku iroma ma woromakuro i mima i wake naukakuke nono irauaiai mane ukakuie Godima dawa we ma irauaiai ukaku. \p \v 26 Ainama na Godi imukakunea eno weakukema nono danu bebeku yawokenewaa uke dakakuke emebairo merama wake weakuie i mi dawae meo bobo mi. Ibake Dawae danu mane danu onami we irukaku enoba danu Godi imukekae ba me. \v 27 Enoba Godinu wake irauaiai naukaisa orouma i wabu awekaboini amae babae feaka oni amarananakuini emua unu koraisake Godi imukenewaa ukaisake yewa doonu meramawere ukeka sineka enaenari uke dakaisa. Eno ukaisaie Godima emenu imukekae irauaiaiya eno weaku. \c 2 \s1 I imukari ukaadae eme yaisinabake demuiro imukari ufene wei wake \p \v 1 Naiyemuku, iyanu Dai Waria Mi Yesu Keriso i urero Dai Mi imukaisaya eno wefoisake nono moi eraerabusa keuwere mibairo irauaiai ufoisake nono moi eraerabusa keuwere me mibairo korokowere ufoisaie meramawereya eno da uawe. \v 2-4 Nono moi miyaima yanu sosi ubarenaro amufisisike nono i moi miye irauaiai kokoi wau barufekuke amufekuro nono i moi miye dawa wau erunaku rufekuke amufeku. Eno uke amufisisie yama i irauaiai wau rufeku mibake eno wefoisa, yewa yaureka duboro aare yaua eno wefoisake nono i wau erunaku rufeku mibake ekararo euro iro eake yaua eno wefoisaie yae ba me wefoisa. Eno wefoisaie yanu imukeka irau meba ibake moi miye irauaiairo nono moi miye meramawereya eno weada ibake i ari eno wefoisa. Enoba Godi Dawa i ari eno ukekabai arara me. \p \v 5 Naiyemuku, nanu wake wemaro ya nauawe. Godima i me sara ubu merama uke ibaisa orou emenu naukeka Dawabairo odifisane ibake emua we mune odakuneke Danu yawokeibaku orofa Dawabake imukari ukaisa oroubake makakune. \v 6 Godima eno ukakuro nono yama i me sara ubu merama uke ibaisa orounu ibi we ma merama ukaisa. Enoba i oi daiwere bobo orouma yabake meramawere ukaada i kodo ureka oroubairo ya ma youre ane odakuneka. \v 7 Enoba i oi daiwere bobo orouma iyanu Dai ibi Waria Mi Yesu Kerisonu ibi we ma merama ukaisa. \p \v 8 I Godinu irau darawadu wake Danu bukaro eno ibinu, anu onamibake imukari ukaku enaenari anu naiyebake imukari ua i wake i ari eno ibinu. Eno ufoisaie yanu ukeka sineka irauaiai ufoisa. \v 9 Yae moi mibake irauaiai ukaisake nono moi mibake meramawere ukaisaie ba me ukaisa. I ba me ukaisaro Godima eno weaku, yae Nanu darawadu daaba ma merama ukaisaba ibake yae meramawere oroua eno weaku. \v 10 Enoba ainama Godinu darawadu wake yaisinanu weaku enaenari ukeebe i darawadu moi dai menaku uke dakakuie dawama i darawadu yaisina ma merama ukaku. \v 11 Adinaro Godi Danu imusu mane eno wei, moi minu aweka aruma da enare odiaweke eme da ma feawe wei. Enoba moi minu aweka aruma da enare odifoisake nono moi mi ma feafoisaie ya Godinu darawadu wake yaisina ma merama ufoisa. \v 12 Enoya imukenewaa uawe! Ya yaisina iwoka, Godima ya yaisina i eme ma woromeka darawadu wakeroma kodo ufekua irauaiai mane ukeibiawe. \v 13 Godima yanu ukaisa sinaisa ibai yaisina erakuba yama eme moibake imukari ufoisaie nono Godima ya enaenari imukari uke yafiaku. Enoya eme yaisinabake imukari uawero nono Godima ya fanisi da mafia. \s1 I Godi imukekabairo irauaiai ukeka meie i imukekae ba meya wei wake \p \v 14 Naiyemuku, nanu wake wemaro ya nauawe. Ainama na Godi imukenewaa ukakunea eno wefekuke nono moi orou unu da kofiakuie irauaiai me. Enoba danu naukekae irau meba ibake Godima dawa da ma wirofeku. \v 15-17 Moi naukeka aweka o amaranaku emuabairo uruna meke irau wau meke emenu wau gagane bude badewerero nono emuama yabairo fafeisaro yama Godi yabairo ibinua eno wefoisake inaa mawaeweke uruna iawe i ari eno wefoisakema nono emuabake inaaini uruna da mafiakaisaie dawa irauaiaiba me? Ie ba me meramawere ufoisa. Enoba i Godi imukenewaa ufoisake nono moi orou unu kore dafoisaie yanu naukekae feareka arike irauaiai me. \p \v 18 Ainama nabake nae Godi imukakunea eno wefekuro nono nama nae irauaiai waiya ukakune miya eno wemauke nono anu imukeka na ere dakakune enoya we ma iwoka uinaro anu imukeka ema wemau. Ae irauaiai uke dakakude aneme aneme anu imukeka emau? Nae irauaiai ukakuneba ibake yama nanu irau ukeka sineka efoisaie nanu imukeka ba iwoka sifoisaya eno wemau. \v 19 Enoba yama Godi Dawae demuiya i ari eno imukaisaie irauaiai. Ie irauaiairo nono seidaninu merama imumuma enaenari imukaisake ia yaraada iura mamaisaro Godima emua ma wiroke dakakune. \v 20 Ya gogore orou. Ya Godi imukada irauaiai uke dakaisaie irauaiai meba ibake yanu imukeka enaenari sine dakakuba ibai yabairo we ma iwoka umiau. \v 21-22 Iyanu babae Eibaramuma Godinu wake nauike danu amara Aisiki i ofereni odeka orofaro ma feafine odiro Godima Eibaramu eraada eno wei, ae irauaiai miya wei. Eibaramuma danu imuka yaisina Godibairo odi ibake danu amara ubi Aisiki ofereni odeka orofaro odiro Godima ibai eraada Eibaramunu imukekae irauaiaiya eno we imui ide ya ibai imukaisaba me? \v 23 Godinu bukaroma wei wake enaenari Eibaramuma i ari eno ui. I Godinu bukaroma eno weaku, Eibaramuma Godi imukenewaa uiro Godima ibai erike Eibaramue irauaiai miya eno weike Dawama Eibaramubake nono eno wei, ae Nanu naiyeya wei, Godinu bukaroma eno weaku. \v 24 Ibai imuke eawe! Nono moi mima irauaiai ukakuie Godima dawae irauaiai miya eno weaku. Enoba moi mima Godi imukenewaa ukakuke nono moi oroubairo irauaiai uke dakakuie danu naukekae irauaiai me. \p \v 25 Yewa moi wake wemaro ya nauawe. Eme moibake uke eneiareibi aweka Reiabu dawae enaenari irauaiai ui. Reiabu dawa eno ui, Diosuama eme aareifisabai efisane emuako we odairie miyai we mune uwara ubarenaro fe odirieke uruna mariero isiro nono moi daabaro we siboike we odairiero anisi. Eno ui ibake Godima ibai eraada dawae irauaiaiya eno we imuike weiro Diosuanu orouma Reiabu ma feare da uisa. \v 26 Enoba moi minu imumuma anakuro i mi dawae fearaku. I ari enoe Godi imukenewaa ukaisike nono irauaiai uke dakaisiie iyanu naukekae feareka ari eno. \c 3 \s1 Iyanu mane iyanu meana yawokenewaa ufene wei wake \p \v 1 Naiyemuku, ya yaisinawere sisa orou sifone wake da weawe. Godima iya sisa orounu ukeka sineka erenewaa ufekuro iyama ba wenewaa da ufeisiie iyabake wake arawere wefekuke nono i sisa me oroubake wake arawere da wefeku. \v 2 Enoba iya yaisina meramawere ukaisi. Ainama danu bebeku yawokenewaa ukaada merama wake we dakakuie dawa irauaiai mi. Dawa eno ukakuie danu ofe ubu yawokenewaa ukaku. \v 3 Ibake iyama osi abu ma owefene ayanima danu bebeku ubarenaro odaada iyanu arara daabaro anifine ma youraisiro owerada iyanu arara daabaro idua anaku. \v 4 Enoba i dai boudiwere imuke eawe. I boudinu ma boboareka rabunakue okoabainaku. Okoabainakuroma nono dai oyauwere fareifekuroma i boudi ubi mima iro maifekuro ena boudi nabana i minu arara daabaro idua anifeku. \v 5 Nono inaa dai menakuma koe daiwere yaraku i ari enoe iyanu meana okoanakuro nono wake keuwere weibaku. \v 6 Iyanu meanae inaa dai mebainakuma koe daiwere yaraku i ari eno. Ie iyanu ofe ubunu moi ofe erabusa. Ie i dooro yaisina meramawere ukeka ari enoro seidanima iyanu meana yawokeibakuba ibake ima wake keuwere weebe weebe iyanu ofe ubu inaama yanao ukakuke iyanu irau ukeka sineka yaisina ma merama ukaku. Iyae okoanakuroma nono iyanu meanama eno ukeibaku ibake iyaini eno ukeibaisi. \v 7-8 Enoba emema abuini gasiraini waruini adua abuini emua yaisina ma kanama ukakunekake nono i meana ma kanama uke dakakuneka. Emenu meanae buya ari eno. \v 9 Ibake iyanu meanama Babae Godibake we ma irauaiai ukaisike nono iyanu i demui meanama eme emua yaisinae Godi ariroma nono emuabake wake merama weaisiie Godibairo merama wake weaisi. \v 10 I meana demuima we ma irauaiai ukeka wakeini merama wake weekaini weaku. Naiyemuku, imuke eawe. I ari enoe ba me! \v 11 Adua oruroma irauaiai aduaini merama aduaini demuiro fare dakaisa. \v 12 Nono boruba anaro iro oriwa ana kai uwane dakeibakuro nono gureifi naa didiro boruba ana kai uwane dakeibaku. I ari enoe i dawara ubarenaro ba irau adua ibe dakaku. Nono iyanu demui meanama irauaiai wakeini meramawere wakeini demuiro weaisi. \s1 Irau iwoka ukeka Godibairoma faraku wake \p \v 13 Ainama iwoka daiwereie i mima danu ukeka sineka irauaiai mane na iwoka daiwerea na ekowe da wefekuie dawa iwoka daiwere mi. Yama madudu imuka imukaisake yanu onarou ma daiwere ufone ibake eno ukaisake na awara buna miya na ekowe weaisaie irau meya eno da uawe. \v 14 Eno imukaisake iyae iwoka daiwerea eno weaisa i dawae Godinu iwoka mero ie emenu iwoka ukeka. I ari eno imukaisaie Godinu imukeka imuke dakaisake seidaninu imukeka imukaisa. \v 15 Enoba yama eme moibake madudu imuka imufoisake wake wefoisake eme moi ma okoanaku ufiakaisake nono yanu onarou ma daiwere ufone ufoisaie yabairo merama daiwere fafekuro meramawere ufoisa. \v 16-17 I urero imukekae irauaiaiya weada yama urero Godinu imukeka imukaisake irauaiai ukenewaa ukaada urane rarane dakaisake eme moibairo irauaiai ukaisake emenu wake naukaisake eme moibake imukari ukaisake unu korakunekaba nono yanu imukeka ure owere ma owere uke dakaisake yanu wake weadae wake ba mane weaisa. \v 18 Enoba aina ainama urane raraneka wake medaisake irauaiai wake mane weaisaie i orou emenu merama ukeka sineka medifeisake irauaiai mane ibifeisa. \c 4 \s1 Aina mima yewa doonu arara mane ukakuie dawa Godini wasai ukakua wei wake \p \v 1 Ya moi orouini anemebake urane rarane ukaisa? Yanu arara mane ukeifone ibake urane rarane ukaisa. \v 2 Eno ukaisake moi minu eraerabusa mufone ibake i mi ma fearaisa. Eno ukaisake moi minu eraerabusa mufone ibake naisa gibagibama eraisaro make dakakune ibake urane rarane ukaisa. Ya eno ukaisaie Godibairo we nauke ere dakaisa ibake yanu arara eraerabusa mune dakaisa. \v 3 Yae Godibairo we nauke eraisaro make dakakune. Anemebake make dakakune? Yae me sara we nauke eraisa ibake make dakakune. Enoba yae yanu arara imukeka mane imukaisake Godibairo adaadake we nauke ere dakaisa ibake make dakakune. \v 4 Ya Godi adaadake imuke dakaisa meomao orou! Yae yewa orofa akakanu eraerabusa mufone ibake imukenewaa ukaisaie Godi idua imuke medaisa. Ainama danu ararae yewa orofa akakanu eraerabusa mane mufine ukakuie dawa Godini wasai ukaku. \v 5 Enoba Godinu bukaroma eno weaku, Dawae Danu Imumu Irauma iyanu imuka ubarenaro we oda’ike Danu Imumu Irauma iya Godi da medifeke Godibake imukari ufene ibake iya yawokenewaa ukakunia Godinu bukaroma eno weakuro nono yama ie me sara weakua eno we imukaisa? I ari eno me! I wakeye ba weaku. \v 6 Godima yanu meramawere ukeka medifone ibake ya unu koreibakune. Nono Godinu bukaroma eno weaku, Godima i imukama fukeru ukaisa orou medakuneke nono i imukama fukeru uke dakaisake irauaiai ukaisa orou unu korakunea eno weaku. \v 7 Godinu wake nauaweke mune imukaro odiaweke imukekama seidanini uranao uaweke danu wake mediawero seidani dawa ya medifiake anifi. \v 8 Godinu wake naufone ufoisaie Dawabairo aniaweke Danu wake nauawero Godima yabairo ibaada unu kofia. Ya meramawere ukaisa orou i ba me ukeka mediawe. Ya imukeka owere owere imukaisa orou imukama merama imukeka mediaweke irauaiai mane uawe. \v 9 Yanu merama ukekabake maru ukaada ii weawe. Awoenae yanu merama ukekabake yo weaisaya ibai mediaweke yanu merama ukekabake imuaweke ii weawe. Imukama fukeru ukekabai mediaweke i merama ukeka ukaisabai imuaweke maru uawe. \v 10 Godibairo aniaweke yanu onarou ma okoanaku uawero nono Godima yanu ibi ma daiwere ufia. \s1 Yanu naiyemukubake kamena weada merama wake da weawe wei wake \p \v 11 Naiyemuku, moi oroubake kamena da weaweke merama wake da weawe. Ainama danu naiyebake merama wake wefekuke a merama miya wefekuie dawa Godinu wake naukekabai arara me mi ari eno. Enoba ainama eno ufekuie dawa Godinu wake da naufeku. Godinu darawadu wakema eno weaku, yanu yanu imukari uke makaewe eno weakubairoma nono yama Godinu darawadu wake naukekabai arara dakaada ibake ie irauaiai meya eno wefoisaie ya Godinu darawadu wake naukeka orou mero yae Godinu darawadu wake wayai weeka orou ari eno. \v 12 Enoba Godi Danu mane i darawadu wake iyabairo ma’i ibake Dawama i eme yaisina wayai wefekuke nono Dawama eme ma wirofiakuke nono moibai ma feafiaku. Dawa eno ufekuroma nono yade aneme orouro yama yanu naiyemukubake wayai weaisa? I ari eno da weawe. \s1 Iya Godibairo meramawere da ufene wei wake \p \v 13-14 Moi orouma Godi imuke dakaisa ibake eno weaisa, moi dai goiro anifeke iro oya demui mane ibaada oi waiya ufeke oi daiwere mufe eno weaisa. Nono yabake ba wake wemaro nauawe. Wairo aneme ufeku ibai yaini naini iya iwoka me. Enoba iyanu yewa dooro ibekae wai awanakuro ou gigiki ukeibaku i ari eno. I wai awanakuro ouma mameibakuro eweka amuke yanake boroo yarakuro sabu me sinaku. I ari enoe iya yewa dooro ibe yafawere dakaisi. \v 15 Enoya i dai goiro aneroma oi waiya ukeka wake mediaweke eno da weawe. Godima aneme aneme nabairo wefeku enaenari ukaada ibimaua eno mane weawe. \v 16 Awoenae yanu imukeka ma daiwere ukaada ibake aneme aneme dubuenaro ufoisa ibai yanu mane eno weaisa. Eno weaisaie meramawere weaisa. \v 17 Enoya ainama irau ukekabai iwoka ukaadama nono enaenari uke dakakuie dawa meramawere ukaku. \c 5 \s1 I eraerabusa keuwere bobo oroubake wei wake \p \v 1 Ya oi daiwere bobo orou, nanu wake nauawe. Yanu oi mane imukaisa ibake yabairo awe waa daiwere fafekuro merama daiwere mufoisa ibai imukada ii daiwere weawe. \v 2-3 Yanu eraerabusa keuwere yaurinuro yanu irauaiai wau rane makinuro yanu gorudini siriwama ubu ukaisa oi kaibai iwa dorinu. Eme moima yanu iwa doreka oi eraisake yae omi oroua eno weaisa. Yanu imuka yaisina yanu oibairo ibinuba ibake i dubuena kai odoro yanu oima ya wayai wenao ufekuke inaa ari yanu ofero yanao ufeku. Enoba yewabai me sifine ukakuroma nono yanu ararae i eraerabusa mane imukaisaie ba me. \v 4 Eme moima yanu waiya uisaro i moko ba adaadake make dariekake me make gagao uriekaba ibake Godima i moko mariekabai eraada yanu meramawere ukeka iwoka sinaku. Yama eno ukaisaro i waiya ukaisa orouma ibai imukaisake ii weaisaie iyanu Dai Godima emenu ii weaisa ibai naukaku. \v 5 Yae yewa orofaro ibaadae eraerabusa keuwere munaisake yanu arara mane ukaada uruna keuwere isaisa. I boroma kewea urakuro uraisa enaenari yae yanu arara mane ukaisaro yanu imuka kewea ari urakuba ibake feafoisake i feare dakaku inaaro anifoisa. \v 6 I irauaiai orouma yaini urane rarane dakaisaro nono yama emua we forakada ma fearakuneka. \s1 Iya yaisina enare ara ufeke iyanu Dai Waria Mi koro ufene wei wake \p \v 7 Nono ya, nanu naiyemuku, iyanu Dai Waria Mi fafekua irauaiai ibaada koro ukenewaa uawe. Emema emenu waiya wawaisake obi mafike irauaiai warafine koro ukeibaisa. \v 8 Enaenari yae irauaiaike koro uawe. Iyanu Dai Waria Mi sabu fafekua imuka ara uawe. \v 9 Yanu yanu kamena da we makaewe. Eno ufoisaie Godima ya kodo ufiaku. Enoya iyanu dai kodo ureka Godi Dawa iyanu uwara aisamero enare ibaada kodo umine ukakua eawe. \v 10 Nanu naiyemuku, Godinu we bou urie orou imuke eawe! I orouma Godinu wake weisaro eme moima emua meramawere uke yariekaro i we bou urie orouma uraneroma Godi mede dauisake nono Danu wake weibisa. I orou imuke eaweke emenu uisa enaenari uawe. \v 11 I orouma Godibairo imukenewaa ukaada Dawa mede dauisa ibake emua imukada i oroue irau oroua iyama eno weaisi. Adinami nauwaro Diouba dawa enaenari ui. Diouba danu uibai ya iwoka sinaisa. Dawae Godi imukenewaa ukeibi ibake Godima Dioubanu dubuena odoro dawabairo irauaiai ui ibai enaenari ukakuke iyabake imukari ukakuni ibaie ya iwoka sinaisa. \s1 I bunawere we bou ukekabake weaku wake \p \v 12 Naiyemuku, yanu buna wake weadae Godima ureini dooini eraerabusa yaisina ubu uiya ureini doonu ibiro aneme aneme ukeka wake da weibiawe. Baya wefone ukaadae baya mane weawe. Nono meya wefone ukaadae meya mane weawe. Eno ufoisaie Godima ya wayai da wefeku. Eno da wefoisaie Godima ya kodo ufiaku. \s1 I naukeka irauaiai orounu guriguri ukekae buna daiwerea wei wake \p \v 13-14 Ainama yabairo arama uke ibaada imukari ukeifekuie Godibairo guriguri ufi. Nono ainama rooro ukaadae Godinu ibiroma yaura kairo we ma daiwere ufi. Ainama arama uke ibaadae Godinu sosi yawokeka dai oroubairo wefiro i mibairo fafisake guriguri uke odaada iyanu Dai Waria Minu ibiro wefisake i arama uke ibifeku minu ofero oera dai menaku kare odifisa. \v 15 Eno ufoisaie yanu Godi imukeka imukae daiwere ibake i arama uke ibifeku mi wirofekuro Godima dawa ma buna ufeku. I mima merama merama ukeifekuie Godima danu merama merama ukeka mufekuke imuke medifeku. \v 16 Iduaya yanu merama merama ukeka yanu yanu we ma boroo yare makaeweke Godibairo yanu naiyemukunu merama merama ukekabake guriguri uawero Godima ya ma wirofia. I moi irau mima danu naukeka yaisina Godibairo odakuke guriguri ukakuie Godibairo naukakuke enaenari ukaku. \p \v 17-18 Eraida dawae ba eme, iya ari eno. Dawama Godibairo obi da mafine ibake guriguri bunawere ukeibiro oya dei buubaini moi oya abanaroma obi make dakeibi. Eno uike nono obi mafine guriguri uiro Godima nauike obi daiwere odairo isari ibake uruna irauaiai warakeibisa. \s1 Ainama irau daaba medifekuie dawa ma owere aafene wei wake \p \v 19-20 Naiyemuku, ainama Godinu daaba medifekuke moi daabaro aneifekuro nono moi mima i mi ma owefekuke Godinu daabaro nono odifekuie dawa irauaiai ufeku. Eno ufekuie i Godinu daaba medifeku mi me sara da feafekuro danu imumu i feare dakaku inaaro da anifeku. Moi mima moi mi eno uke unu kofekuie Godima i ba me merama ukeifeku minu ba me meramawere ukeifeku ibai yaisina mune imuke medifeku. Enoya ibai imuke eawe.