\id HEB  - Aneme Wake NT [aby] -Papua New Guinea 1988 (DBL -2013) 
\h Iburu 
\toc1 IBURU OROUBAIRO OWAOWA 
\toc2 Iburu 
\toc3 Ibu 
\mt1 IBURU OROUBAIRO OWAOWA  
\c 1  
\s1 Godinu Amarama irau wake iyabairo marie  
\p
\v 1 Adinami nauwaro Godima Danu we bou urie oroubairo buna imusu imusu mariero emuama iyanu akaemukubairo waiya imusu imusu ukeibisake emuama Godinu wake weibisa.  
\v 2 Nono awoenae i dubuena kai me sifeku odobake Danu Amarabairo buna makaada Danu Amarama iyabairo Godinu imukeka ma boroo yaraku. Adinami nauwaro Godima weiro Danu Amarama ureini dooini manabeini muinaini i yaisina ubu ui. Enoba Godinu Amara Yesuma i eraerabusa yaisina yawofine ibake Dawa we mune odi.  
\v 3 Godinu arakekaini Danu Amaranu arakekaini emuae demui. Godini Dawaini emuae demui. Enoba Yesuma Danu buna wake weakuro yewa orofa akakaro eraerabusaini ewekaini manabeini muinaini i yaisinae irauaiai ibinisa. Enoba Dawama i orou yaisina emenu meramawere ukeka munike emua ma amearubu ufiane ibake korosiro fearike nono uyarike urero i buna daiwere Godinu baena wana enaro ane yaure ibinu.   
\s1 Godinu Amarama i aneru yaisina ma bererie wake  
\p
\v 4 Yesuma eno ui ibake Godima danu Amarae daiwereya eno weada we mune odike nono i aneru yaisina emuae okoanakua eno weada we mune odirie. Enaenari Danu ibiye daiwere mamike nono i aneru emenu ibi ibiye okoanaku mamirie.  
\v 5 Godima i aneru emuabake eno we dauike Danu Amara mane i ari eno wei,  
\li1 Ae Nanu Amararo nono Nae Anu Babaeya  
\m eno wei. Enoba moi anerubairo Dawama i ari eno we daui,  
\li1 Nae anu babae simaro ae Nanu amara sifakua, moi anerubairo  
\m eno we daurie.  
\v 6 Godima Danu amara ubi yewa dooro we odaifine ukaada i ari eno wei,  
\li1 Godinu aneru yaisina Dawabairo guriguri ufeisaya,  
\m eno wei.  
\v 7 Godinu bukaroma i aneru yaisinabake eno weaku,  
\li1 Godi Danu anerue oyau ari uke odakuneke Danu waiya ukeka anerue inaa domea ari uke odakunea,  
\m eno weaku.  
\v 8 Nono Godima Danu Amarabake emebairo eno wei,  
\li1 Ae Godi, Ama yawokada enaenari eno mane yawokeifiaku. Ae anu orou demuiro gienabu yawokakune.  
\v 9 Enoba Anu ararae irauaiai mane ukeka. A arara me meramawere ukeka. Ibake Anu Godima A Anu adarabairoma we mune imusu odiyaike Ae dai Kini Mi we odiyairo Ae rooro uia,  
\m eno wei.  
\v 10 Eno weike nono moi wake eno wei,  
\li1 Dai Waria Mi, Ama adinami nauwaro yewa orofa akaka doo yaisina ubu uike Anu wanama i ure ubu ui.  
\v 11-12 Enoba i ureini doo yaisina me sifekuro Ae me ibene ibene idua ibeifaku. I ureini doo yaisina bauwaka ufisisiro emua wau ari eno iufiaku. Wau eru sinaku enaenari ureini doo iboo imusu sifisisiro Anu mane iboo imusu da sifakuke eno mane ibeifaku. Enoba Ae bauwaka da ufakuke me ibene ibene ibeifakua,  
\m eno wei.  
\v 13 Nono Godima i anerubake eno we daui,  
\li1 aaraweke Nanu ba ena wana enaro yauawero yaini wasai ukaisa orou ma bereniake eu wowonaro odimiaro yanu umu emenu duboro siaawe,  
\m emuabake eno we da uike Danu Amara mane i ari eno wei.  
\v 14 Enoroma i anerude anemerabu ari eno? Emuae Godinu waiya ukeka imumu mane. Godima emua we odaisakunero anaisake Godinu wirokeka mufeisa orou emua mane unu koreibakuneka.   
\c 2  
\s1 Godima iya ma owere mu’iba ibake iyae imukeka daiwere imukaisi wei wake  
\p
\v 1 Yesu Keriso Dawae daiwere ibake iyama Danu daaba mede imusu imusu da anifeke iyanu nauisi i ba wake mane enaenari ukenewaa ufeisi.  
\v 2 I aneruma i darawadu Mosesibairo maisa. Enoba nono i darawadue ba. I darawadu wake nauke medeibisake enaenari uke dakeibisa oroue Godima emua fanisi makeibirie.  
\v 3 Eno ukeibisaro iyama Godinu wirokeka wake da naufeisike medifeiside aneaneme me ibifeisi? I ari eno me. I ari eno ufeisiie Godima iya fanisi daiwere mamiisi. Enoba iyanu Dai Waria Mi Dawako i wirokeka wake weibiro naukeibisa. I wake naukeibisa orouma ie ba wakeya eno weisaro iya nauisi.  
\v 4 Emuama i wakeye baya eno weibisabaie nono Godima iini i wakeye baya weada ibake bunawere ukekaini kawama erekaini ukaada nono Danu arararo uike Danu Imumu Iraunu buna imusu imusu emebairo makeibirie.   
\s1 Yesue iya ma owere muneka orounu bokai kai  
\p
\v 5 Imuke eawe! Godima i ureini dooini irauaiai ibifiro aneruma yawofisane ibake ode eno we daui. Yewa doo awoena sifiro awoena yawokekabake weakune.  
\v 6 Enoba Godinu bukaroma eno weaku,  
\li1 O Godi, i emeini i Ba Eme Sini Mini emuae anemerabu ari eno ibake emua imukakunia? Ama i eraerabusa yaisina ubu ukaada emua ba eme mane ubu uriebairo anemebake Ama dawa aine wai ure unu koreibakune?  
\v 7-9 Ama aneru emuae daiwere odirieke nono eme emuae okoanaku odirieba ibake eme emuae odo funaku mane i ari eno uke ibeibisa. Nono dubuenaro emua ma buna urieke emenu ibi we ma daiwere urieke emuama i eraerabusa yaisina yawofisane ibake i eraerabusa yaisina Nama ma okoanaku uia,  
\m eno weaku. Enoba i wakenu ubiye eno, Godi Danu ararae emema i eraerabusa yaisina yawofisane ibake emua we mune odirie. Eawe, nono awoenae emema i eraerabusa yaisina yawoke dakaisaro ibai iya eraisikema nono iyanu Dai Waria Mi Yesu eraisi. Adinami nauwaro i aneru emua daiwerero nono Dawae okoanaku i ari eno odo funaku ibeibi. Godima iyabake imukari ukaada iya unu ko’ike Yesuma eme yaisinabake isare aafike feafine ibake eno we mune odi enaenari Yesu Kerisoma okoanaku sinike isare aare yewa dooro feari. Ibake Godima Dawa nono ma uyarike nono Danu ibi we ma daiwere uiba ibake Dawama Godinu arakekawere orofaro yaure ibinu ibai iya eraada iwoka sinaisi.  
\v 10 Enoba Godi Dawama i yaisina ubu ui ibake Dawama weiro Yesuma Danu orou keuwere Danu onami ari ma irauaiai ufiake Godinu ibooro ma enafiane ibake oferi daiwere waurada Danu onamie iyanu irauaiai ma wirokeka Mi sini. Ie Godinu irau imukeka wake.   
\p
\v 11 I eme ma irauaiai ukeka Mini i irauaiai orouini emenu Babaeye una demui. Enoba Yesuma i orou emuabake maru uke dakaada yae Nanu naburakaini aruarumaya eno weaku.  
\v 12 Yesuma eno wei,  
\li1 Babae Godi, anu ibi Nanu naburakabairo wemauke emuabairo ibaada Abake yaura kairoma we ma irauaiai umauanea,  
\m eno wei.  
\v 13 Yesuma eno weike nono wei, Nanu imuka yaisina Godibairo odenewaa umaua eno wei. Eno weike nono wei, Nae yewado Naini Godi Danu Nabairo makara amarakuini iyama yewado ibinisia eno wei.   
\s1 Yesu Dawae iya unu komine ibake Ba Eme Sini wake  
\p
\v 14-15 I Nanu amarakua weaku orou emuae ofeini imukaini iwa bobo. Ibake Yesu Keriso Dawae ba emua ari eno sini. Seidani dawaini iini dawae i fearekanu ubi miba ibake Yesu Danu ararae seidani ma merama ufike i fearekabake ia iyarada i fearekanu waiya unao ukaisa orou ma worome mufiane ibake Ba Eme Sinike nono feari.  
\v 16 Enoba Yesu Keriso Dawae aneru ari sine dauiba ibake emua unu kore dakakuneke Dawae ba Eibaramunu sisia mi siniba ibake eme unu korakune ibai iya iwoka sinaisi.  
\v 17 I wakenu ubiye i ari eno, iyabake Dawama Godinu waiya ukenewaa ukaada Godinu irau unu koreka ofereni ode sibore sianeka Mi sifike eme yaisinanu meramawere ukeka mufike imuke medifine ibake Danu adara ari eno sini.  
\v 18 Danu adara ari eno siniba ibake awoenae anemerabubake meramawere ufene imukaisi orou iya unu korakuni. Seidanima Yesubairo meramawere imuka mairo Yesu Dawa arara me iini nono oferi daiwere wauri ibake awoenae seidanima emebairo meramawere ukakuroma nono Yesu Dawa iwoka i meramawere ukekabai ibake Dawama iya unu korakuni.   
\c 3  
\s1 Yesunu ibima Mosesinu ibi ma berei wake  
\p
\v 1 Naiyemuku, Godi danu ararae iyama Danu irau orou sifeke Dawaini urero ibifene ibake iya ubu u’ia nanu wake wemaro ya nauawe. Iyanu imuka yaisina Yesubairo oisiro Godima Yesue iyanu Godibairo wake weeka Mike iyanu Godi imukeka imukanu dai ofereni ode sibore sianeka Mi we odia Dawa mane imukenewaa uawe.  
\v 2 Mosesi dawae Godinu oroubairo ibaada Godinu weibi wake nauke mede dakaada irauaiai ukenewaa ukeibi. Enaenari Godi Danu ararae Yesuma i waiya ufine weike Dawabake i waiya mairo nauke mede dauike i waiya irauaiai mane ukeibi.  
\v 3 I uwara ma enareka mi dawa danu imukekae daiwereba ibake dawae daiwerero nono i uwarae daiwere me. Enaenari Yesu Dawae daiwere. Dawae Godinu Amararo nono Mosesi dawae Godinu waiya ukeka miba ibake dawae okoanaku.  
\v 4 Enoya i uwara yaisina emema ma enaraisa enaenari Godi Dawama i eraerabusa yaisina ubu ui ibai iya iwoka sinaisi.  
\v 5 I ari eno Mosesima Godinu oroubairo ibaada Godinu weibi wake nauke mede dauike dawae Godinu waiya ukeka mi ibake Godinu dubuenaro ufeku ibai emebairo ane weibi.  
\v 6 Yesu Keriso Dawae Godinu Amara ibake Dawama Godinu uwara yawokaku. Enoya ibai imuke eawe. Iya buna ukaisike Godi imukaisike Danu we bou ukaku eraerabusa yaisina mufene imukaisiie i dawa Danu uwararo ibinisi orouba ibake iya yaisina Dawama yawokakuni.   
\s1 Godinu wake nauke dakaisa oroue ko da yafeisaya wei wake  
\p
\v 7 I Godinu Imumu Irauma eno weaku,  
\li1 yama Danu wake awoena naufoisaie da nauke mediawe.  
\v 8 I wakeye eno, adinaro yanu akaemukuma i yao nauwaro enaadae Godinu weibi wake nauke medaada Dawa meisake Godi uke iruke eka. Nono awoenae eno da uawe,  
\m Godinu Imumu Irauma eno weaku.   
\li1
\v 9 Iro yanu akaemukuma Na uke iruke ereibisa. Enoba Nama emuabake oya fodi (40) unu koraada emuabairo irauaiai ukeibisararo ibai eraadama nono emuama Na arara uke yare dakada Na uke iruke ereibisa.  
\v 10-11 Emuama eno ukeibisaro ibake emuabairo dino ueke eno we, i orou emenu imukaisa ibaie meramawere mane imukaisake Nanu imukakunebai emua iwoka meya eno we. Eno weke dino ukaada we imue, emuae Nabairo da fafeisake ko da yafeisaya eno we imuea,  
\m Godima eno wei. Godinu Imumu Irauma i wake yaisina awoena iyabairo eno weaku.   
\s1 I Isaraera orounu ukeka ari da ufeke Godinu wake da nauke medifene wei wake  
\p
\v 12 Naiyemuku, erenewaa uawe! Yama imuka meramawere sine ibaada Godi imuke danao ufoisake i me ibinu Godi medinao ufoisaya ya yaisina imukenewaa uawe.  
\v 13 Enoba i meramawere imukekama irunao ufiakuro moi mima meramawere ufine wefekuke nauke medinao ufekua awoena yanu yanu unu kore makaewe. Godima eno wei, Nanu weakune wakeye yewa awoena ibinisa odobake weakunea eno wei. Enoya Godinu wake yaisina naukenewaa ukeibiawe.  
\v 14 Yae yanu imuka yaisina Yesu Kerisobairo oisake Dawa imukenewaa uisa enaenari awoena eno uke imukenewaa ukaisaie yaini Dawaini demuiro yaure ibaada Danu imukekaini Danu aneme aneme yaisina munaisa.   
\p
\v 15 Godinu Imumu Irauma eno weaku,  
\li1 awoena yama Danu wake naufoisaie da nauke mediawe. Yanu akaemukuma Godinu wake nauke dakaada nauke medeibisa i ari eno da uawe,  
\m eno weaku.  
\v 16 Aina ainama Godinu wake nauisake nauke meisa? I Idifiroma Mosesinu umuro aneibisa orou emua yaisina Godinu wake naukeibisake imuke medeibisa.  
\v 17 Godi Dawa abo oroubairo anemebake oya fodi (40) dino ukeibi? Godi Dawae i yao nauwaro meramawere ukaada meninoke feareibisa oroubake dino ukeibi.  
\v 18 Ibake Godima eno wei, Nabairo fareroma ko da yafeisaya wei. Dawa eno weide abo oroubake weadama eno wei? Dawa eno weiie i nauke medaada meramawere ukeibisa orou emuabake weadama ibake eno wei.  
\v 19 Enoya ibai imuke eawe. Emuae Godi imuke dakeibisaba ibake Godibairo ko yareka orofaro ane dakeibisa.   
\c 4  
\s1 Godi Danu orounu ko yarekabake wei wake  
\p
\v 1 Godinu we bou ukaada wei wake enaenari awoenae i ari eno we bou ukaada eno weaku, enoya Nabairo aaraweke ko yaawe eno weaku. Godima yae meramawereya wenao ufekuro Dawabairo da aninao ufoisake ko da yanao ufoisaya ia sinaada irauaiai mane ufone ibake weakune.  
\v 2 Emuama Godinu irau wake nauisa enaenari iyaini nauisi. I orouma Godinu wake nauisaro i wakema emua unu kore darie. Anemebake emua unu kore darie? Emuae i wake naukadama emenu imuka yaisina Godibairo ode dakeibisa ibake i irau wakema emua unu kore darie.  
\v 3 I wake naukaisi orou iyae Godibairo ane ko yaraisi. Godima eno wei,  
\li1 Nae dino ukaada ibake emuabairo eno we, emuama Nabairo da fare ko yafeisaya eno weya,  
\m Godima eno wei. Godima ureini dooini ubu ukaada i furo Danu waiya uke me sinike i orou Dawabairo fare ko yafisane ibake yawokeibirie.  
\v 4 Godinu bukaro i odo seweninu (7) wake eno ibinu, Godima demui furaro waiya uke aarebe odo seweni (7) odoro medike ko yaria i wake Godinu bukaro eno ibinu.  
\v 5 Enoba Godinu bukaroma i wakebake nono i ari eno weaku, emuae Nabairo fareroma Naini demuiro da ko yafeisaya eno weaku.  
\v 6 Godinu irau wake i dawako naukeibisa orouma emenu imuka yaisina Godibairo ode dauisa ibake Godibairo ane ko yare dauisaba nono awoenae aina ainama Godibairo ane ko yafisane ufeisaie anifeisake ko yafeisa.  
\v 7 Ibai imuke eawe. Godima moi odo odike nono moi odoini nono awoena enaenari uke odaku. Deiwidi dawama Godinu wake eno wei,  
\li1 enoba awoenae yabairo eenu weakune. Danu wake naufoisaie da nauke mediawe,  
\m eno wei. I wakeye Deiwidima adinaro owaowa yanake odi.   
\p
\v 8 Moi Isaraera mi danu ibiye Diosua dawama i adinaro ibeibisa orou unu kofiaro i orouma Godibairo ko yafisane ibake moi odo we bou uke odiba i orouma Godibairo ane ko yafisaronae Godima nono moi ko yareka odo da we odifine.  
\v 9 Enoba i wakenu ubiye eno, Godima i eraerabusa yaisina ubu uke me sinikema idua ko yari, enaenari iyama Dawabairo ane ko yafene ufeisiie idua Dawabairo ane ko yafeisi.  
\v 10 Ainama Godibairo ko yarakuie Godima ko yafine ukaada Danu ukeibi waiya medi enaenari i mima danu arara waiya medaku.  
\v 11 Ibake iya yaisina bunama imusu ari ufeke Godibairo ane ko yafene ibake weakune. Emuama nauke medaada Godibairo ane dakeibisa i ari eno da aninao ufeisi ibake i ari eno da ufene weakune.   
\p
\v 12 Godi Dawae me ibaada bunawere ukaku enaenari Danu wakeini enaenari bunawere ukaku. Godinu wakeye waama imusu ari eka ena ewa ena nio bobo ba bau ari. I baue waaroma nono Godinu wakeye waa daiwere. Moi mima waa bauma abu birakakuro i abunu imukaini kaibaini yaisina aruro sinakuro eraisi i ari eno Godinu wake kakuraisi i wakeye i waa bau ariba ibake iyanu imukaro imukekaini arara ukekaini aneaneme yaisina ma boroo yarakuke aruro sinakuro ibai yaisina eraada iwoka sinaisi.  
\v 13 Iyae Godibairoma aneme aneme ma fe yafene ukaisiroma nono Dawama i yaisina erakunike iwoka sinakuni. Dawae yewa dooro ibinisa eraerabusa yaisina erakune. Iya yaisina Dawabairo iyanu aneme aneme ukeka sineka ibai yaisina iya una demui demui wefeisiro naufeku.   
\s1 Yesu Dawae iyanu dai ofereni ode sibore sianeka mi ari enoya wei wake  
\p
\v 14 Yesu Dawae iyanu dai ofereni ode sibore sianeka mi ari eno. Enoba iyanu Dai ofereni ode sibore sianeka Mi, Godinu Amara ubi Yesu, Dawae Godinu me irau ibeka orofaro amuke anaada yeku ure fare fisii yarike amuke aniba ibake iyanu Godi imukeka imuka ma ara ufeke enare ara ufene ibake weakune.  
\v 15 Iyanu dai ofereni ode sibore sianeka Mi Dawa iwoka yaini naini iyae buna meba ibake iya unu korakuni. Seidanima danu meramawere ukeka imuka iyabairo odaku enaenari iyanu dai ofereni ode sibore sianeka Mibairo danu meramawere imukeka yaisina mairoma nono Yesu Dawa i meramawere uke dauiba ibake Dawae seidaninu meramawere imukeka imuka Dawa iwoka sinaada ibake iya unu korakuni.  
\v 16 Enoba ia da sifeke iyanu Godi imukeka imuka ma ara ufeke Godinu irau yaure ibaada iya unu koraada yawokakuni orofaro anifeisi. Iro anifeisiie Godima iyabake imukari ukaada unu komisiba ibake meramawere da ufeisike me irauaiai mane ibifeisi.   
\c 5  
\s1 Iyanu dawako ofereni ode sibore sianeka mi Yesu Dawae bunawere ibake Dawama iya ma owere mu’i wake  
\p
\v 1 I ofereni ode sibore sianaisa orouma emebairoma we mune imusu odakuro emuama Godibairo waiya ukaisa. I ofereni ode sibore sianeka orouma i orounu Godibairo me makeka munaisake i orounu meramawere ukekabake Godibairo ofereni odaisa.  
\v 2 I ofereni ode sibore sianeka orou emuaini buna meba ibake emuama i meramawere ukaisa orounu ukeka sineka iwoka sinaisake emua owainanaku unu korakuneka.  
\v 3 I ofereni ode sibore sianeka orou emuaini buna me ibake meramawere ukaisa ibake emuaini ofereni odaisa. I orounu meramawere ukaisa ibaibake ofereni odaisa enaenari emenu onarou emenu meramawere ukaisa ibaibake Godibairo ofereni odaisa.  
\v 4 Moi mima i ofereni ode sibore sianeka waiya danu mane me sara da ufeku. Enoba Godima moi mi Eroni i waiya ufine we mune odi enaenari Dawa i ofereni ode sibore sianeka orou we mune odakune.   
\p
\v 5 I ari enoe Yesu Keriso Dawa mane i ofereni ode sibore sianeka waiya mune dauike Danu ibi we ma daiwere daui. Ibake Dawae eno uke dauiroma nono Godima Dawabake eno wei,  
\li1 Ae Nanu Amara, awoenae Ama Nae Anu Babae, ibake Anu ibi we ma daiwere ukakunea,  
\m eno wei.  
\v 6 Godinu owaowa buka moi ena barunaroma eno wei,  
\li1 Ae ofereni ode sibore sianeka Mi. Enoba Ama Anu waiya aine wai ure ukeifaku. Mekisideki dawako ofereni ode sibore sianeibi i ari enoe Anu mane enaenari ukeifakua,  
\m eno wei.   
\p
\v 7 Enoba Yesu dawa yewa dooro ibaadae Dawa iwoka Godima Dawa feafekuroma nono ma wirofeku ibai Dawa iwoka sineibi. Ibake Dawae ibai imukada arua we ii we ukaada Godibairo guriguri ukeibike Godibake iifa ukaada imukeibiro Godima Danu ii weibibai naukeibi.  
\v 8 Ibake Yesu Dawae Godinu Amarabairoma nono Dawae oferi wauradama nono Danu ararae Danu waiya irauaiai ufine ibake nauke mede dauike uke iwoka ui.  
\v 9 Dawae ba irauaiai miba ibake Danu wake naukaisa orou emenu ma wirokeka mi siniba ibake emua ma wirokakunero me ibene ibene ibinisa.  
\v 10 Nono Godima eno wei, i moi mi Mekisideki dawae Nabairo ofereni ode sibore sianeibiba ibake Ae danu ofereni ode sibore sianeibi i ari eno meroma ba daiwere danu ukeibi enaenari ukeifakua eno wei.   
\s1 Iya okoa amarananaku ari da sine ibifene wei wake  
\p
\v 11 Danu ofereni ode sibore sianeka orounu wakenu ubiye keuwere ibinuroma i wakenu ubiye arawerero nono yanu awarae buna meba ibake i wakenu ubi we ma iwoka uke da uni.  
\v 12 Enoba yae Godinu wake keuwere naukaisaba ibake nanu ararae yama moi sisa orou sifone weakune. Nono yae Godinu arawere wake naukenewaa uke daukaisaba ibake emua da we ma iwoka ufiakaisaro imusu moi sisa orouma yabake Godinu nudawere wake wefeisaro naufoisa. Enoba yae ama iseibaisa amaraku ariba ibake yae ba ara uruna ise daukaisake ama mane iseibaisa.  
\v 13 Aina mi dawa ama isakuie dawa amaranaku ari. Enoba dawae i ba irau ukekaini meo ukekaini ibaie dawa iwoka meba ibake ibai ma nuna ukaada i dei umaba ba i deima umaya eno we dakeibaku.  
\v 14 Nono i ba dai orou emuae i ba irau ukekaini meo ukekaini ibai abo deima irau ibai emua iwoka sinaisake ibake abanaro ma fiakaisake i ba uruna mane inao ie i ba irau ukeka mane ukeibaisa.   
\c 6  
\s1 Iya buna ufeke iyanu Godi imukeka imuka ma buna ufene wei wake  
\p
\v 1 Enoba Yesu Kerisonu Dawako ara me wakenu ubi we ma iwoka ukeka wake mane aine wai ure da wefeke Danu moi arawere we ma iwoka ukeka wake naufeke dai orou ari sifene ibake weakune.  
\v 2-3 I dawako wakenu ubi yaisinae i ari eno, i meramawere ukeka sinekaini iyanu imuka yaisina Godibairo odekaini babadaido ukekaini wanama iiri duboro odekaini feareroma nono ma uyarekaini Godinu me ibene ibene ibeka fanisi makekaini i wake mane aine wai ure da wefeke Godinu moi ara we ma iwoka ukeka wake naukada ibai iwoka sifene ibake weakune. Godi Danu ararae iyama eno ufene ufekuie enaenari ufeke Yesu Keriso da medifene ibake weakune.   
\p
\v 4-6 Godinu wakema moi orounu imuka ma edoro ufiaku. Eno ufiakuro emua yeku urenu wirokeka mufeisaro Godinu Imumu Irauma emuabairo ibifeku. Emuabairo ibifekuro emuama Godinu irau wake uruna inao ufeisake i dubuenaro fafeku buna ukeka emua iwoka sifeisake nono medifeisake meramawere ufeisaie aneaneme emua ma owefiakuro emenu meramawere ufeisa ibai imuke medifeisa? I ari eno meramawere ufeisaie emuae Godinu Amarabairo wake meramawere emenu naisa kekero wefeisake Dawa korosiro nono ure odinao ufeisake Dawa derena manao ufeisaba ibake Dawama emua medifiakuro emenu meramawere ukeka idua emuabairo ibeifeku.   
\p
\v 7 Godinu arawere wake naukaisa orouini i wake nauke dakaisa orouini emuae yewa dubo waure weakune wake ari eno. Obima aine wai ure makaada i doo make nuda ukakuro uruna imusu imusu i dooro wawaisaro irauaiai warakakuro i waiya ubi orouma isaisa. Enoba Godima i doo ma irauaiai ukaku.  
\v 8 Nono i dooro ouwere warakakuie irauaiai me. I danu ubiye i ari eno, Godima i doo we ma merama ufekuro inaama yafeku.   
\p
\v 9 Naiyemuku, nanu wake nauawe. Nama eno weakuneke we imukakune, yae i ouwere faraku doo ari eno mero yae Godinu ma wirokeka wake naukada irauaiai ukaisaba ibake Godinu ibooro enare ara ufoisaya eno we imukakune.  
\v 10 Godi Dawae meramawere mero Dawae irauaiai mane. Enoba yama Danu waiya ukaada i Godinu wake naukeibisa orou unu koreibirieka enaenari yama eno ukaisaba ibake yae Godibairo imukari ukaisaro Dawama yanu irauaiai ukaisa ibai imukenewaa ukaada moko irauaiai ukeifeku.  
\v 11 Nanu ararae ya yaisina bunawere ukeiforo i dubuena kai odo fafiro Godinu we bou ui eraerabusa koro ukaisa enaenari i yaisina mufone ibake weakune.  
\v 12 Ofe koroko da uawe. Moi orouma emenu imuka yaisina Godibairo odaada ure nudaroma koro ukenewaa ukaisake Godinu we bou ukaku eraerabusa yaisina munaisa. Enoba i orounu ukeka sineka ibai eaweke enaenari uawe.   
\s1 Godinu we bou ukeka wake naukenewaa ufene wei wake  
\p
\v 13 Godima Eibaramubairo we bou ukaadae moi dai mi iro meba ibake Danu ibiro Danu onami we bou ui.  
\v 14 Godima Eibaramubairo eno wei, Nanu ibiro Nanu mane weakune. Nama a we ma irauaiai umauaneke abairo sisia sirorari orou keuwere mamauanea eno wei.  
\v 15 Godima eno wei ibake Eibaramuma owainanaku koro ukeibiba ibake dawae Godinu we bou ui enaenari ibai yaisina muni.  
\v 16 Moi mima we bou ukeka wake wefine ufekuie dawa moi mi dawa ari eno mero moi dai minu ibiro bunawere wefeku. Enoba dawae moi dai minu ibiro bunawere wefekuie emenu bebekuma wake we makanekabai idua me sifeku.  
\v 17 Godi Danu ararae Danu we bou ukekabai mufisake emema iwoka sifisaro Dawae Danu imukeka nono da ma owere mufine ibake Danu ibiro wei.  
\v 18 Ibake Danu we bou ukekaini Danu ibiro bunawere weekaini i ari eno ukekabaima ure owere ma owere da ufekuro Godi Dawae meo da wefeku. Enoba iya Godibairo ane me irauaiai ibinisi orou iyama iyanu imukeka ma buna ufeke Godinu imukaisi i eraerabusa we bou ui ibai yaisina imukenewaa ufene ibake Godima iyabake eno u’i.  
\v 19 Anikama i you adua ubarenaro ma ara ukaku i arie Godinu ma wirokeka imukaisi ima iyanu imuka ma ara ukakuni. Yesu Keriso iyanu ma wirokeka Mi Dawama iyabake i urero wauma dadau uke ibaaku iifawere ooruro Godibairo ani.  
\v 20 Enoba Yesu Dawako iya unu komine iro amuke anike ibaada awoenae i dawako ofereni ode sibore sianeka waiya ukaku enaenari Dawama eno ukeifeku. Mekisideki dawama ofereni ode sibore sianeibiba nono awoenae Yesu Danu mane enaenari ukeibaku.   
\c 7  
\s1 Mekisideki dawae dai ofereni odi sibore sianeka miya wei wake  
\p
\v 1 Mekisideki dawae Seiramu orofa kini mibake dawama i Seiramu orofa orou yawokeibirie. Yawokeibirieke nono dawae i Godinu dai ofereni ode sibore sianeka mi. Enoba i furo Eibaramu dawae moi kini foini (4) uranebe dawama emua urane ma bererieke owere fari. Owere fareibibaie Mekisidekima ane Eibaramu fou urike we ma irauaiai ui.  
\v 2 Eno uiro Eibaramuma danu eraerabusa yaisina ma fiake imusu imusu odi. Eno uke odike i moi deni (10) ku uke odi iroma i daisi weaisa moi ku uke odi i ku munike Mekisidekibairo mai. Mekisidekinu bokai ibinu ubiye gienabu yawokeka kini. Dawae Seiramu orofanu Kiniba ibake danu moi ibinu ubiye danu oroubairo irauaiai mane ukaada ibeibi Kini.  
\v 3 Moi mima Mekisidekinu ibeibi ibai owaowa uke ode daui. Ibake Mekisideki danu amae babaeye iya iwoka meke nono danu sisia sirorarie iya iwoka meke nono danu amaema dawa dori odoe iya iwoka meke Danu feari odoe iya iwoka me. Danu i ofereni ode sibore sianeibi i waiyae eno mane ibene ibene ibeifeku ibake dawaini iini ibene ibene ibifeku ariya wei.   
\p
\v 4 Mekisideki dawae dai miwereya imuke eawe! I dawako mi Eibaramu dawae Mekisidekibairo danu uranebe urane ma bererieke muni eraerabusa deniroma (10) i daisi weaisa ku demui munike Mekisidekibairo mai.  
\v 5 Enoba Riwainu sisiae i ofereni ode sibore sianeibisa orou emuae i daisi weaisa eraerabusa muneibisa. Godinu darawaduma weibi ibake emuae emenu goi oroubairo daisi weaisa eraerabusa muneibisa. Emua yaisina Eibaramunu sisia orouroma nono emenu goi oroubairo daisi weaisa eraerabusa muneibisa.  
\v 6 Enoba i mi Mekisideki dawae Riwainu sisia mi mero nono i furo dawama Eibaramubairo daisi weaisa eraerabusa muni ibake dawama Eibaramu Godinu we bou ui erabusa muni mibake we ma irauaiai ui.  
\v 7 Enoya imuke eawe! I emebairo we ma irauaiai ukaku mi dawae daiwerero nono i we ma irauaiai ukeka munaku mi dawae okoanaku.  
\v 8 I ofereni ode sibore sianeibisa orouma i daisi weaisa eraerabusa muneibisakema nono ofe iri uraada bauwaka ureibisake feareibisa. Mekisideki dawama i daisi weaisa eraerabusa munaada me ibinua Godinu bukaroma eno weaku.  
\v 9 Nanu wake wemaro ya nauawe. Eibaramuma i daisi weaisa eraerabusa Mekisidekibairo mai ibake danu dubuenaro fafeku sisia mi Riwai, dawae moi daisi weaisa eraerabusa muneka dai mi, dawaini iini daisi weaisa eraerabusa danu adinaro sisia mi Eibaramubairo i dai mi Mekisidekibake mai.  
\v 10 Enoba i furo Riwai dawae danu amaema dawa dore meroma nono Riwai dawae danu sisia mi Eibaramunu iwaro ibiro Mekisidekima Eibaramu fou uriro Eibaramuma dawabairo daisi weaisa eraerabusa mai ibake Riwai dawaini i mibairo daisi weaisa eraerabusa mai.   
\s1 Awoena ofereni ode sibore sianeka mima i adinaro ofereni ode sibore sianeibisa orounu orofa muni wake  
\p
\v 11 Godima eno we imui, Nama i ofereni ode sibore sianeka orou nono we mune odimiaro i Riwai weaisa orouma i waiya gienabu ufeisaya eno we imuike ibake i darawadu owaowa yanaike i Isaraera oroubairo marie. Enoya nanu wake nauawe, i ofereni ode sibore sianeka orouma eme ma gienabu ufiakaronae Godima moi imusu ofereni ode sibore sianeka mi Eroni ari mero Dawae Mekisideki ari we mune odifine. Ie eno mebake Godima moi imusu ofereni ode sibore sianeka mi we mune odairo ane fari.   
\p
\v 12 I moi imusu ofereni ode sibore sianeka mi siniro i ofereni ode sibore sianeka waiyaini iini imusu siniba ibake Godima i awoena darawaduini iini imusu we odi.  
\v 13 Na weakune wakeye Yesu Kerisobake weakune. Dawae Eroninu sisia mi me. Danu sisia oroue imusu ibake emuae i ofereni ode sibore sianeka waiya uke dakeibisa.  
\v 14 Enoba iyanu Dai Waria Mi Danu sisia sirorari miye dawae Diuda. Enoba Mosesima Diudanu sisia orou moi ofereni ode sibore sianeka orou we mune ode darie ibai iya iwoka sinaisi.   
\s1 Yesu Danu aine wai ure ofereni ode sibore sianeka waiyae Mekisidekinu ukeibi waiya ari enoya wei wake  
\p
\v 15 Imuke eawe. I ukeibisa i ari enoe moi mima uyarike i ofereni ode sibore sianeka waiya ukeibi ibake Dawae Mekisideki ari eno.  
\v 16 Yewa Mi Dawae Danu sisia sirorariroma fareroma emema Dawae i ofereni ode sibore sianeka mi ode dauisaroma nono Dawae bunawere ibake Dawa da feafekuke me ibene ibene ibeifeku ibake Dawae i ofereni ode sibore sianeka mi sini.  
\v 17 I Godinu bukaroma Dawabake eno weaku, Mekisidekima ofereni ode sibore sianeibi i ari enoe Anu mane eno ukaada ibeifakua eno weaku.  
\v 18 I adina darawadue buna me ibake irauaiai uke dauiba ibake Godima ie mune eka imusu odi.  
\v 19 Mosesinu darawaduma eme ma gienabu uke dauiroma nono i ma wirokeka Mi imukaisaba ibake Dawama i ma gienabu umine Godibairo iya waure ane odii.   
\p
\v 20 Godima Yesu Kerisoe i ofereni ode sibore sianeka Mi we bou uke odaada Danu onaminu ibiro weike we mune odi. I adinaro ofereni ode sibore sianeibisa orou emuae Danu ibiroma we mune ode darie.  
\v 21 Godima Danu ibiro bunawere weada Yesu Keriso we mune odiba ibake Dawae i dai ofereni ode sibore sianeka Mi sini. Godima Yesubake eno wei,  
\li1 Godima Danu ibiro A we mune odiaiba ibake Danu imuka nono da ma owefekuro Ae i ofereni ode sibore sianeka waiya idua me ibene ibene ibaada ukeifakua,  
\m Godima eno wei.  
\v 22 Dawama eno wei inu ubiye Yesu Dawa Godinu awoena irau arararo uke makaneka ibai yawokeka Dai Mi sini, i dawae iya iwoka sinaisi.   
\p
\v 23 Nono yewa moi wake wemaro ya nauawe. I adinaro ofereni ode sibore sianeibisa orouma fearada emenu waiya idua medeibisaba ibake eme keuwere emenu orofa munaada i waiya ukeibisa.  
\v 24 Nono Yesu Dawae me ibene ibene ibeifekuba ibake Danu waiya ukeifeku orofa moi mima da mufeku.  
\v 25 Enoba emema Yesubairo ane faraadama iroma Godibairo anaisaro Yesu Dawae idua me ibene ibene ibaada emeini Godini emenu abanaro enare ibaada Godibairo emebake eenu weada eme yaisina ma wirokakune.   
\s1 I ofereni odeka mi Yesuma iya unu korakuni wake  
\p
\v 26 I wakeye irauaiai ibake Yesu Keriso Dawae iyanu irau ofereni ode sibore sianeka Mi sinike Dawama iya unu koreibakuni ibake iyama eno we imukaisi, Dawae iyanu Dai ofereni ode sibore sianeka miya eno we imukaisi. Dawae ba irauaiai Mike Dawae moi meramawere uke daui. Godima Dawae i meramawere ukeka oroubairoma munike i ure dubo enaro waure amuke ane odiro ibinu.  
\v 27 Yesu Dawae i moi ofereni ode sibore sianeka orou ari eno me. Dawae meramawere uke dauiba ibake Dawae aine wai ure Danu meramawere ukekaini i orounu meramawere ukekaini Godibairo ofereni ode dakeibaku. Enoba Dawae Danu ofe ubuma ofereni odinao emenu meramawere ukeka ibake Godibairo dei demui mane odi.  
\v 28 Mosesinu darawadu ibi i furo eme emuae gienabu mebairoma nono moi orouma emua muriekake i ofereni ode sibore sianeka orou we mune odirieka. Emuama emuako eno uisaroma nono Godima Danu ibiroma bunawere weada Danu Amara Dawae me ibene ibene ibeka irauaiai gienabu Mi Dawama i bokai ofereni ode sibore sianeka Mi we mune odiba ibake idua Dawama i waiya ukaada me ibene ibene ibeifeku.   
\c 8  
\s1 Yesue iyanu dai ofereni ode sibore sianeka miya wei wake  
\p
\v 1 Nanu wakeye eno, iyanu dai ofereni ode sibore sianeka mi i ari eno ibinu. Dawae i urero dai yawokeka Godinu baena wana enaro yaure ibinu.  
\v 2 Dawae i iifawere ooruro Godibairo ofereni ode sibore sianeka waiya ukaku. Ibake i iifawere uwarae emema ubu uke dauisaro Godima Danu mane ubu uiba ibake ie ba guriguri ukeka uwara.   
\p
\v 3 Emema i ofereni ode sibore sianeka orou we mune odiriekake emenu me makekaini nono i ofereni odekaini ibai yaisina Godibairo odifisane ibake we mune odirieka. Enoba iyanu dai ofereni ode sibore sianeka Mima enaenari Godibairo me makeka aine wai ure makeifeku.  
\v 4 Dawa yewa dooro ibifironae i ofereni ode sibore sianeka waiya da ufine. Yewa dooro ofereni ode sibore sianeka orouma ibaada i darawadunu weakuro me makaisa enaenari i ofereni odaisaba ibake Dawae i ofereni ode sibore sianeka waiya da ufine.  
\v 5 I urero ofereni ode sibore sianeka waiyae baro nono yewa dooro ukaisa orouma i urero ba waiya ukaku ibai uke kowokowo ukaisa. Nono i Mosesinu ukeibi waiyae i ari eno. Godima Mosesibake eno wei, faraima sosi uwara ma enafane ufakuie nama i oraararo abairo we ma iwoka uero a eri enaenari ma enaa wei.  
\v 6 Nono awoenae Godima Yesu Kerisobairo mai waiyae daiwerero nono i adinaro ofereni ode sibore sianeibisa orounu waiyae okoanaku. Enaenari Mosesinu adina darawadue okoanakuro nono Godinu awoena we bou ukekae irauaiaiba ibake Danu awoena arararo uke makanekae i dawa daiwere.   
\s1 Awoena arararo uke makanekama i adina arararo uke makaneka ma berei wake  
\p
\v 7 I dawako arararo uke makanekabai irauaiai ibifironae Godima i awoena arararo uke makanekabai da odifine.  
\v 8 Nono i dawa i ari eno me. Godi Danu orounu ukeka sineka gienabu me ibake Dawa arara meba ibake eno wei,  
\li1 Nama eno we imukakune, moi odo fafekuro Isaraera orouini Diuda orouini emuabairo awoena arararo uke makaneka mamiaua eno we imue.  
\v 9 Enoba yanu sisia orou Idifi orofaroma waure ane odiake arararo uke makaneka emuabairo ode i ari eno meroma nono awoena odimiaua eno we imue. Enoba Emuaini Naini iyanu arararo uke makanaisikema nono emuae enaenari uke dakaisaba ibake emua medimiau.  
\v 10 I Isaraera oroubairo odimiau awoena arararo uke makenekae i ari eno, i awe waa odo odo me sifekuro Nama Nanu darawadu emenu awararo odimauke emenu imukaro owaowa yanake odimiau. Enoba nae emenu Godi simauro nono emuae Nanu orou sifeisa.  
\v 11 Enoba emuae emenu goi orou da we ma iwoka ufiakaisa. I orou emua yaisina Na iwoka ufokoisa ibake emuama emenu goi oroubake Godi iwoka siawe eno da wefeisa. I dai orouini i okoa orouini emua yaisina Na iwoka sifokoisa.  
\v 12 Enoba nae emenu meramawere ukekabake dino da umauke emenu nauke medekabai imuke medimaua,  
\m Godima eno wei.  
\v 13 Godima i awoena arararo uke makanekabake weiba ibake iya iwoka ie adina arararo uke makanekae gamura ureka ariba ibake i gamura uri rabue awoena me sifine ukaku.   
\c 9  
\s1 Adinaro ofereni ode sibore sianeibisa orouma abu iwama ofereni odeibisa wake  
\p
\v 1 I kawama arararo uke makanekabake Godi Danu ararae emema guriguri gienabu ukenewaa ufisane ibake we iifa ukeka wake weiro ibake guriguri ukeka uwara yewa dooro ma enaka.  
\v 2 Emuama faraima uwara uke oisaro ibi. I faraima guriguri ukeka uwara ma enakake i bokai fisiaro oorue iifawere orofaya eno weisa. Nono i ooru ubarenaroe ramefaini kaiyoini i Godibairo makeibisa ereka buredini i yaisina iro ibisa.  
\v 3-4 Nono i ooru wauma enare kuuka iduama ekara enaro oorue iifama imusu ari ooru i enaro ibi. I iifama imusu ari ooruro i gorudima ubu uisa ofereni odeibisa kaiyo ibeibiro iroe irauaiai urumuma imusu ari ofereni inaama yareibisaro nono i inaanu urumue irauaiai. I awoena arararo uke makanekanu gorudi bogesie iro ibiro i ubarenaroe i mana weaisa urunaini i gorudi odeibisa kawaburo ibiro Eroninu kua fari ena usini iro ibiro i adina darawadu wake weeka oma kaiyaini eno i ubarenaro ibisa.  
\v 5 Nono i bogesi duboroe aneru unayai ari serubimu weaisa erabuyaima ibeibisiro ibake iroe Godinu arakeka ibeibi. Emuama i bogesi duboro ibaada emenu babama Godi Dawa i meramawere ukeka mune imuke medeibi i orofa ma riu ubu ukeibisi. Nono awoenae i yaisina we ma iwoka ukenewaa ukeka eweka meba da we ma iwoka umiau.   
\p
\v 6 I faraima sosi uwara i ari eno ma enarada i ofereni ode sibore sianeibisa orouma aine wai ure i bokai fisia ooruro aneifisane emenu waiya i ooruro ane ukeibisa.  
\v 7 Emuae eno ukeibisaro nono i dai ofereni ode sibore sianeka mi dawa mane oya deidemuro odo deidemu i iifama imusu ari ooruro aneibike danu waiyae i ari eno ukeibi, dawae abunu iwama munaada imuke mero dawaini i orounu imusu imusu ukeibisa i meramawere ibaibake Godibairo ofereni odeibi.  
\v 8 Ibaibake Godinu Imumu Irauma i wakenu ubi eno we ma boroo yaraku, i bokai fisiaro iifa ooru ibifekuie i iifama imusu ari oorunu daaba dadau ufekuro emema iro da anifeisaya eno we ma boroo yaraku.  
\v 9 Ie dubo waure weaisa wake ari eno. I wakeye i ari eno, adinaroe emema Godinu ibooro ane dakeibisa. I Godibairo me makanekaini ofereni odekaini ima i guriguri ukaisa orounu imuka ma gienabu uke daui ibake emema meramawere ukeibisa.  
\v 10 I urunaini aduaini iifa urokeka eraerabusae emema Godibairo guriguri ufisane ukaada i ari eno ukeibisa. Ie i faraima ma enaka sosiro sibore sianeka daaba. Ima emenu imuka ma gienabu uke da uisaroma nono i darawaduma eno uawe weiba ibake eno ukeibisa. Eno ukeibisaro nono Godi Danu arararo uike ibake i guriguri ukeka daaba yaisina imusu uiro i adina daaba idua me sini.   
\s1 Yesu Keriso Danu mane Danu iwama ofereni odi wake  
\p
\v 11 Yewa wake imuke eawe. Yesu Keriso Dawama idua fearike i irauaiai guriguri ukekanu dai ofereni ode sibore sianeka Mi sinike awoena idua ibinu. Danu waiya ukaku i faraima sosi uwarae daiwerero irauaiai. Nono i adinaro ma enaka farai uwarae daiwere meke nono irauaiai me. Danu faraima sosi uwarae emema ma enare dauisaba ibake ie yewa dooro farai uwara ari me.  
\v 12 Enoba Yesu Keriso Dawae i bokai fisia ooruro fare anike i urero iifama imusu ari ooruro idua ane isari. Dawae goudini boromakaunakunu iwama ofereni odifine mune dauike Dawama iyabake feariro Danu iwama isariba ibake iyae idua me ibene ibene ibeifeisi.  
\v 13 I goudini boromakau yawera unanu iwaini i awoena boromakau kowia una inaaro yareibisa i ukaini i iifawere darawadu wake nauke dakeibisa orou emenu ukekae gienabu meba ibake emenu ofero mame odeibisake emenu inowere ukeka uroke me sineibisa ari ibake emua gienabu ari eno ibeibisa.  
\v 14 Yewabaie baroma nono Yesu Kerisonu iwama ibai daiwere ma berekaku. Godinu me ibene ibene ibeka Imumu Irauma Dawabairo ibeibiro Yesuma Danu mane awoena irauaiai gienabu ofereni odinao Godibairo odi. Ibake Danu iwama iyanu fearekawere imukeka urokakuke iyae me ibene ibene ibaada Godinu waiya ufene iyanu imuka ma irauaiai ukakuni.   
\s1 Yesu Kerisonu iwama i awoena arararo uke makaneka ma ara ui wake  
\p
\v 15 Ibake Yesu Keriso Dawama i awoena arararo uke makaneka ibai yawokakuke Godinu wayo korie orouma Godinu me ibene ibene ibekaini aneme aneme we bou ui eraerabusa yaisina mufisane ibake eno ukeibaku. Enoba i emema i dawako arararo uke makaneka odoro meramawere ukeibisaro Yesu Kerisoma fearike emuae i meramawere ukekabairoma mareke mune imusu odiriero irauaiai ibeibisa.  
\v 16 Moi mima feafine ukaada danu feafiro ufisane ibai we enaenari ufekuke nono dawae ba feafekuie danu wefeku enaenari ufeisa.  
\v 17 Enoba dawa eno wefekukema nono da feafekuke me ibifekuie danu wefeku wake enaenari da ufeisa.  
\v 18 Enobake emema guriguri ukaadae abu ureibisaro fearada iwama dooro isareibi. I abunu fearekaini iwaini ima i dawako arararo uke makaneka ibai ma ara ukeibi.  
\v 19 Mosesima i darawadunu riba wake yaisina i oroubairo we me sinike boromakaunu iwaini aduaini mune ma demuiro uike mamoe abunu idi munike usiro uwane karike iwaini adua kouro ma iyari. Ma iyarike i kokoiwere mamoe abunu idi ma fisi fisi uiro iwama i darawadu bukaini eme duboro isari.  
\v 20 Dawama eno ukaada wei, Godi Danu ararae ya orou i arararo uke makanekanu wake enaenari ufone weakunea wei. Enoba yewa iwama i arararo uke makaneka ma ara ukakua eno wei.  
\v 21 I enaenari Mosesima i iwaini adua kouro ma iyarike ma fisi uiro iwama i faraima ma enaka sosi uwaraini sibore sianada oukeka okeaini naberoini i eraerabusa yaisina duboro isari.  
\v 22 Enoya imuke eawe! I darawaduro iwama i yaisina urokeibi. Iwa isare dakakuie emenu ba me merama ukeka mune imuke mede dakaku. Nono i iwa isarakuie idua emenu ba me merama ukeka mune imuke medaku.   
\s1 Iyanu sara merama ukeka mune medifine ibake Yesu Danu mane ofereni odinao ui wake  
\p
\v 23 I eraerabusa yaisina ie i ba urero eraerabusa ubu ari eno. Ibake i iwama emua uroiro me amearubu mane ibinisa. Nono i urero eraerabusa me amearubu ibifisane ibake imusu irauaiai ofereni odaku.  
\v 24 Enoya nanu wake wemaro ya nauawe, Yesu Keriso Dawa emema ubu uisa iifa ooruro ane dauike Dawae urero amuke ani. Enoba i emema ubu uisa oorue i urero oorunu ubu ari eno. Dawae urero Godibairo iyanu wake yoya uke wefine ibake amuke ani.  
\v 25 Enoba i Du orounu dai ofereni ode sibore sianeka mima oya deidemu danu iwa mune dakaadae abunu iwama muneibike i iifama imusu ari ooruro ane odeibi. Ane odeibiro nono Yesu Keriso Danu mane Danu iwae ofereni keuwere ode dauike idua demuinaku mane odi.  
\v 26 Danu mane Danu iwama ofereni eno uke keuwere odeifironae i ureini doo ubu ui odoroma awoenaini iini oferi keuwere waureifine. I ari eno uke daui ibake Dawae yewa me sifine ukaku odoroma emenu meramawere ukeka mune imusu odifine ibake Dawama i demui mane idua feari.  
\v 27 Godima eno weiba ibake iya yaisina demui mane feafeisiro nono Godima iya kodo umiisi.  
\v 28 I ari enoe Yesu Keriso Dawama eme keuwerenu meramawere ukeka mune imusu odifine Godibairo Danu onami demui mane ofereni odike feari. Enoba Dawae dubuenaro nono fafeku. Emenu meramawere ukeka ibake nono feafine da fafekuke Dawae i Dawa koro ukaisa orou ma wirofiane ibake wefekuke owere fafeku.   
\c 10  
\s1 I adinaro ofereni odekama iyanu sara merama ukeka mune siane daui wake  
\p
\v 1 I Du orounu darawadue Yesunu ba ufeku sifeku i ari eno mero ie i uke iwoka ukeka ubu ari eno. Enoba i orouma Godibairo oya keuwere aine wai ure ofereni odeibisabairoma nono i ofereni odekama i Godi yodia ukeibisa orou ma wiroke darie.  
\v 2 I ofereni odekama i orou ma gienabu ufiaro i orouma irauaiai sifisake emenu ba me ukekabake imuka merama da sifisaronae nono i ofereni ode sibore sianeka orouma i ofereni aine wai ure da odeifisane.  
\v 3 I ari eno daui ibake i orouma ofereni aine wai ure ofereni odeifisane imukeibisaie emenu meramawere ukeka oya aine wai ure ibai idua imukeibisa.  
\v 4 I boromakauini goudi abunu iwama emenu meramawere ukeka mune imusu siane dakeibi.   
\p
\v 5-7 Ibake Yesu Keriso Dawae yewa orofaro isare aafine ukaada Godibairo eno wei,  
\li1 Ae arara me abuma ofereni odeka ibake Ae Nanu ofema ofereni odifarine uke bou ui. Ibake emuae abuma ofereni odeibisa orofaro mune odeibisake inaama yareibisaro Ae ibaibake rooro uke daui. Enoba Ae ibaibake rooro uke dauiro nono Nama eno we, Godi, Nae yewado ibaada Godinu bukaroma weaku wake enaenari Anu arara umau eno weya,  
\m Yesuma eno wei.  
\v 8 Yesu Dawama kawama eno wei, Ae i abuma ofereni odekabai arara meba ibake rooro uke dakaku. Enoba emuama emenu meramawere ukeka mune imusu odifisane ibake abuma ofereni odaisake inaama yaraisaro Ae ibai eraada rooro uke dakakua eno wei. Ibake i orouma i ofereni odekae Godinu darawaduroma ukeibisade nono Yesuma ibaibake eno wei.  
\v 9 Dawama eno weike nono wei, Nae yewado faraada Anu arararo umane fanea wei. Ibake Godima i adinaro abuma ofereni odeka ibai mune sianike nono Yesu Keriso i ba ofereni odekabai Danu mane awoena i ofereni odi ima i adina ofereni odekanu orofa muni.  
\v 10 Enoba Yesu Keriso Dawae Godinu arararo eno uike Danu ofema demui mane ofereni idua odiba ibake iyae iyanu meramawere ukeibisi iroma meisike awoenae amearubu sine ibaada imuka irauaiai mane imukaisi.   
\s1 Yesunu ofereni odekama iya ma wiro’i wake  
\p
\v 11 I Du orounu ofereni ode sibore sianeibisa orouma aine wai ure enare ibaada emenu waiya ukeibisake i ofereni aine wai ure Godibairo odeibisa. Emuae eno ukeibisaroma nono i ofereni odekama emenu meramawere ukeka mune imusu ode dakeibi.  
\v 12 Nono Yesude! Dawa ofereni demui mane odiroma nono i oferenie idua ba irauaiai mane ibene ibene ibeifeku. Enoba Dawae Godibairo amuke anike Godinu baena wana enaro yaure ibinu.  
\v 13 Iro yaure ibinuba ibake Godima Dawaini wasai ukaisa orouini urafekuke emua ma berefiake Danu umu wowonaro odifiane ibake yawokaku.  
\v 14 Yesu Keriso Dawae Danu ofe demui mane ofereni odike Danu orou emenu meramawere ukeibisa iroma mune imusu odiriero emuae Godibairo imuka irauaiai mane imukada ibinisa.   
\p
\v 15-16 Godinu Imumu Irauma Godinu wake iyabairo eno we ma boroo yaraada eno weia Godima weaku,  
\li1 awe waa odo me sifiro emuaini Naini iyanu arararo uke makafeisike nono Nama Nanu darawadu emenu imuka ubarenaroini emenu awararo owaowa uke odimiau weakua,  
\m eno wei.  
\v 17 Godima nono eno wei, Nae emenu meramawere ukekaini Nanu wake nauke medaisa ibaibake da we imumaua eno wei.  
\v 18 Godima i meramawere ukeka mune imuke medakuba ibake iyama moi ofereni ode sibore da siafeisi.   
\s1 Naukenewaa ufeke Godibairo anifene wei wake  
\p
\v 19 Naiyemuku, Yesu Keriso Dawae iyabake feariro Danu iwa yewa dooro isariba ibake iyae i urero iifama imusu ari oorubake ia da sifero Godima iyanu meramawere ukeka mune imuke medifiro iro gienabu anifene ibake weakune.  
\v 20 Yesu Dawae fearike Danu yanaisa ofema i awoena urero ibinu Godibairo me ibene ibene ibeka daaba wabui. Enoba Dawae iyabake feari ibake iyama Godibairo guriguri ufene ukaadae gienabu ufeisi.  
\v 21-22 Iyanu dai ofereni ode sibore sianeka Mima Godinu uwara yawokakuba ibake Godibairo anifene weakune. Iyanu imukekae gienabu imukada iyanu imuka yaisina Godibairo idua oisi. Enoba Yesu Kerisonu iwama iyanu merama imuka uroike iyanu merama imuka ma irau uiro imuka merama imuke dakaisi. Ibake Dawama iyanu ofe amearubu aduama uroiro ibake Dawa imukenewaa ukaisi. Dawama eno uiba iyama Godibake ia da sifeke Dawabairo gienabu anifene ibake weakune.  
\v 23 Iyama Yesu Keriso imukenewaa ufene weakune. Godi Danu wakeye ba. Danu imukeka ure owere ma owere da ufekuke Dawa aneme wefekuie enaenari ufeku ibake Yesu Keriso imukenewaa ufene weakune.  
\v 24 Iyanu iyanu imuke makafeke unu kore makafeke imukari uke makafeke irauaiai mane ukeifene weakune.  
\v 25 Moi orouma guriguri ufisanebake fare ku siane dakaisa enaenari da ufeke iyanu fare ku sianekabai da medifene weakune. Yesu Kerisonu fafeku odo idua fafine ukakuba ibake iyanu imukeka ma buna uke makafene weakune.   
\s1 Godinu amarabairo derena da mafene wei wake  
\p
\v 26 Nanu wake wemaro ya nauawe. Iyae Godinu ba wake naukadama nono iyanu arara ukaisike meramawere ukaisiie i meramawere ukekabake moi ofereni odeka ibe me.  
\v 27 Moi ofereni odekabai ibe me ibake i bunawere kodo urekabake ia iyafene weakune. Aina ainama Godini wasai ufeisaie Godima dino daiwere ufekuro inaama emua yare ma merama ufiaku.  
\v 28 Aina mima Mosesinu darawadu wake nauke medeibiie ere forakeka orou una raara o una buubama ereibisake we forakada wayai weibisaro i mi ma feareibisa.  
\v 29 Nono moi mima Godinu Amara medifekuke i awoena arararo uke makaneka ma ara ukeka iwa ie i danu urero amuke aneka iwa, i wirokeka daaba ma merama ufekuke Godinu irau unu koreka Imumu Iraubake wake meramawere wefekuie i mibake fanisi daiwere mafeku.  
\v 30 Godima adinaro eno wei, Nanu mane i orou kodo uraada Nama emua moko mamiaua eno wei. Dawama eno weike nono wei, i Dai Waria Mi Dawama Danu orou yaisina kodo ufiakua eno wei. Eno weiro ibaie iya iwoka sinaisi.  
\v 31 Enoba i me ibinu Godima aina mi fanisi mafine wefeku ibai imufike i mima ia daiwere iyafike i ari eno da ufine ibake weakune.   
\s1 Iyanu Godi imukeka ma ara ufene wei wake  
\p
\v 32 Yanu adinaro ukeka sineka imuke eawe. Godinu edoroma yanu imuka ubarenaro edoro uiro yabairo awe waa imusu imusu fariroma nono yae yanu naukeka mede dauisake gienabu enare ara uisa.  
\v 33 Eme moima moi oroubairo yabake wake meramawere weibisake yabairo meramawere ukeibisake nono moi oroubairo enaenari ukeibisaie ya i meramawere muneibisa orou unu kofiakake emuabai enaro ane enafene we imukada enaenari ukeibisa.  
\v 34 Yae i ana ebaro ibeibisa oroubake imukada emua unu koreibirieka. Enoba moi orouma yanu eraerabusa muneibisaro yae yanu me ibene ibene ibeka eraerabusa ibinua eno weroma dino uke dakeibisake rooro ukeibisa enaenari awoenaini eno ukeibiawe.  
\v 35 Ia da siaweke enare ara uawe. Ia da sifoisake enare ara ukaada buna ufoisaie Godinu irau me makeka moko mafiakuro mufoisa.  
\v 36 Yama owainanaku ufoisaie Godinu arara mane ufoisake Danu we bou ui eraerabusa yaisina mufoisa.  
\v 37 Godinu bukaroma owaowa wake eno weaku,  
\li1 odo keuwere mero i fafeku Mi Dawae koro da ufekuke sabu fafeku.  
\v 38 Nono Nanu irau oroudeie emua Na imukada me ibene ibene ibeifeisa. Nono moi orou emuae Na imukekabai emua arara mebake owere anifeisaie emuabake dino umiaua,  
\m eno weaku.  
\v 39 Iyae i owere i meramawere orofaro anaisa orou ari eno me ibake iyae emua ari eno me. Iyanu imuka yaisina Godibairo oisiro Godima iya ma wiro’i.   
\c 11  
\s1 I Godi imukekanu wake ubi  
\p
\v 1 I Godi imukekabaide aneme ari eno? I ere mero imukama imukada i eraerabusae mufeisia weaisiie idua ba munaisi. Nono i moi eraerabusa ere daukadama i moi eraerabusa idua ibinua eno we imukaisiie Godi imukekae idua.  
\v 2 Enoba i adinaro bunawere ukeibisa orouma Godibairo emenu imuka yaisina odeibisaba ibake Godima emuae irauaiai oroua eno weibi.   
\p
\v 3 Iyae iyanu imuka yaisina Godibairo ibinuba ibake yewa eraerabusae i ere dakaisi eraerabusabairoma faka.   
\s1 Eiboroini Inokini Noaini emenu wake  
\p
\v 4 Eiboro dawae danu imuka yaisina Godibairo ibi ibake danu irauaiai ofereni Godibairo odiro nono Keini danu odi oferenie irauaiai me. Enoba Eiboro dawae danu imuka yaisina Godibairo ibeibi ibake Godima danu ofereni odibai eraada dawabake irauaiai miya eno wei. Eiboro dawae fearikema nono danu Godi imukeibi ibaima dawae iyabairo enaenari uawe wenao ukaku.   
\p
\v 5 Inoki dawae danu imuka yaisina Godibairo ibeibi ibake dawae feare meroma nono Godima dawa mune amuke ane Danu onamibairo odiro emema i mi Inoki dawa ere dakeibisa. Godinu bukaroma eno weaku, Godima Inoki waure amuke ane me i furo Inokima irauaiai uiro Godima Inoki dawabakeye irauaiai mi weia eno weaku.  
\v 6 Enoba aina mi dawa danu imuka yaisina Godibairo ibe dafekuie Godima dawa irau miya eno da wefeku. Nono aina mi dawa Godibairo anifine imukakuie Godi Dawa ibaada Dawabake yodia ukenewaa ukaisa oroubake moko makakunea eno we imukadae Godibairo idua anaku.   
\p
\v 7 Noa danu imuka yaisina Godibairo ibeibi ibake Godima i dubuenaro dawabairo fafeisa eraerabusa we forakada weiro naui. Enoba dawae Godinu wei wake nauike boudi ubu uiro danu awekaini danu amarakuini emenu awekaboini i boudiro amuisake imu ise dauisa. Enoba Noama eno uike i meramawere ukeibisa orounu ukeka sineka yaisina ma boroo yarike danu imuka yaisina Godibairo odi ima Godinu irau uekabai muneka mi ari eno siniba ibake Godinu ibooro gienabu eneiareibi.   
\s1 Eibaramubake wei wake  
\p
\v 8 Eibaramu dawae danu imuka yaisina Godibairo ibeibi ibake Eibaramuma Godinu wake nauike danu ibeibi orofa medike i awoena orofae dawa adinaro iwoka mebairoma nono mede dauike idua ani.  
\v 9 Danu imuka yaisina Godibairo ibeibi ibake dawae i orofaro imusu orou ari eno sine ibaada faraima ma enari uwararo ibeibi. Nono Godima Aisikini Deikafuini emuabake enaenari we bou uiba ibake emuaini faraima uisi uwararo ibeibisi.  
\v 10 Eibaramu danu ararae Godinu ubu ukeka goiro ibifine ibake yewa dooro i farai uwararo ibeibi. Irau me ibene ibene ibeifeku i kukubu bobo uwara mufine koro ukaada ibake ba uwara ma enare dauike faraima uisa uwararo ibeibi.   
\p
\v 11-12 Eibaramu dawae danu imuka yaisina Godibairo ibeibi ibake dawama Aisiki dore mami. Dawae ofe iri bauwakaro nono danu aweka ewainakue amara ara sini aweka ewainaku. Nono Godima dawabairo we bou ukaada weiba ibake Godima enaenari ufekua eno we imukeibi ibake Aisiki dore mami. Enoba Eibaramu dawae feareka bauwakaroma nono i dore mami amara una demuiroma danu sisia oroue keuwere doreibirie ibake i orou muina arike emuae i dawara udiro gibudi ari eno keuwere sineibisa.   
\p
\v 13 I orou yaisina emuama emenu imuka yaisina Godibairo oisake feaka. Yewa dooro ibisa i furo Godinu we bou ui eraerabusa yaisina mune dauisake ekararowereroma ekake eno weisa, iyae yewa dooro imusu eme ari eno sine ibinisia eno weisa. Iyae i me daabaro enaisa orou ari enoya weisa.  
\v 14 I ari eno weisaba ibake i orouma emenu moi ure orofa yodia ukaisa ibaie iya iwoka sinaisi.  
\v 15 Enoba emuae emenu meisa orofabake imuke dakeibisa. Emenu ararae i adina ibisa orofaro owere anifisane wefisaronae anifisane. Nono emua owere anekabai emua arara me ibake ane dauisa.  
\v 16 Emuae eno uke dauisake i irauaiai ure orofa mufisane imukenewaa uisa. Enoba Godima emuabake ba goi ubu uiba ibake emuae Dawa iyanu Godiya eno weibisaba ibake Godima emuabairo maru sine daurie.   
\p
\v 17 Eibaramu dawae danu imuka yaisina Godibairo odiro Godima Eibaramubake wei wake naui ibake Godibairo danu amara ofereni ode faisa ui. Aisiki dawae Eibaramunu amara una demui.  
\v 18 Enoba Godima Eibaramubairo eno wei, anu amara Aisikibairoma anu sisia sirorari keuwere ufeisaya weiro nauikema nono danu amara Godibairo ofereni odifine ui.  
\v 19 Eibaramu dawae eno we imui, Godima nanu amara feafeku iroma nono ma uyafekua eno we imuike enaenari danu amara feareka iroma munao ui.   
\s1 Aisikini Deikafuini Diosefuini emuabake wei wake  
\p
\v 20 Aisikinu imuka yaisinae Godibairo ibeibiba ibake dawama danu amarayai Deikafuini Isobairo i dubuenaro fafeku i irauaiai ukekabake we ma irauaiai urie.   
\p
\v 21 Deikafunu imuka yaisinae Godibairo ibeibiba ibake Deikafuma feafine ukaada Diosefunu amarayai we ma irauaiai urieke danu uri furo mame ara ukaada Godibairo guriguri ui.   
\p
\v 22 Diosefunu imuka yaisinae Godibairo ibeibiba ibake dawa feafine ukaadae i Isaraera orou emua Idifiroma anifeisa wake idua weike dawa feafiro odifisane orofa i oroubairo we enaenari urie.   
\s1 Mosesibake wei wake  
\p
\v 23 Mosesinu amae babae emenu imuka yaisina Godibairo oisi ibake Mosesinu amaema dawa doriro danu amae babae emuama dawa manabe kai buuba uwararo fe oisiro ibeibi. Dawae irauaiai amaranaku ekike ibake i Kininu wei wake nauke dauisi.   
\p
\v 24-25 Mosesinu imuka yaisina Godibairo ibeibiba ibake dawa dai sinadae dawa arara me dawae Feronu arumanu amaraya weeka. Dawa arara me i okoanaku rooro ukaada iroma meramawere ukeka. Danu ararae danu orouini ibaada emuabairo fareibi awe waa waureka.  
\v 26 Enoba Dawae i awoena fafiro mufene i moko eraada eno we imui, Isaraera orounu ma wirokeka Mibake meramawere nabairo fafekuro mumauie irauaiai nono yewa Idifi orofanu eraerabusae irauaiai meya eno we imui.   
\p
\v 27 Mosesi danu imuka yaisina Godibairo ibeibiba ibake dawae i Kininu dino ui ibaibake ia sine dauike Idifi orofa medike moi orofaro ani. Ibake dawa ere daukadama nono imukama imukada ukaisi ena Godi enao ui ibake ia sineroma owere dauike idua ani.  
\v 28 Mosesi danu imuka yaisinae Godibairo ibeibiba ibake dawae Godinu i ma feareka aneruma wei wake nauike danu wei enaenari ukenewaa ui. Dawae eno uike wei, mamoe abunu iwama yanu uwara aisame fosiro mame odiawe weiro nauisake enaenari uisaro i ma feareka aneruma i Isaraera orounu dorieka amaraku ma feare daurie.   
\s1 Isaraera orou keuwere Godinu wake naukenewaa uisa wake  
\p
\v 29 I Isaraera orou emenu imuka yaisina Godibairo ibeibiba ibake emuae i kokoiwere dawara ubarenaro ba doo damaro fare aninao uisa. Emuae eno uke fare anisaro nono i Idifi orofa moi orouma enaenari ufeisia eno weisake aneibisabaie aduama emua ma iyariero idua feare me sika.   
\p
\v 30 I Isaraera orou emenu imuka yaisina Godibairo ibeibi ibake emuae i Deriko goi enare kara uisake odo demuiro demui mane enare aiwowo yaka. Emuae eno uke odo sikisi enanari odo deidemu mane enare aiwowo yareibisaba ibake i Deriko goinu omama uisa ena dai maraowere idua doroo yari.  
\v 31 I adinaro moi emeakabake ukeibi aweka Reiabu dawae danu imuka yaisina Godibairo ai odaada dawama i orofa ere bou uisa eme una buuba ma fe yare odiriero i Isaraera orouma fakake i Godinu wake nauke me orou ma feariekakema nono i aweka ma feare dauisaro me ibi.   
\p
\v 32 Nama nono moi wake wemau ba me? Nabairo odo yafawere meba ibake Gidionini Barakini Samusonini Deiwidini Samueroini i we bou ukeibisa orouini emua yaisina emenu sirorari wake da wemau.  
\v 33-34 Enoba emuae emenu imuka yaisina Godibairo ibeibi ibake emuae moi imusu orofa orouini uraneibisake emuama i orofa orou ma berekeibiriekake emua yaisina yawokenewaa ukeibirieka. Emuae eno ukaada Godinu we bou ukeibi eraerabusa yaisina muneibisa. Nono moibai emuae i desini urakuke waa daiwere ukaku abu danu ibiye raioni danu bebeku ma yaareibisaro emema dai inaaro emua yareibiro emua feare me. Ibake nono eme moima emuae bauma umafisane ukaadama umane dakeibirieka. Emuae buna meroma nono Godima emua ma buna ukeibiriero ibake emuae i imusu orouini uranadae emuama i imusu orou ma berekeibirieka.  
\v 35-37 Moi awekabo emenu imuka yaisinae Godibairo ibeibiba ibake emua Godinu wake nauisaro Godima emenu feareibisa orou nono ma uyareibiriero emuama emenu feareibisa orou nono ma owere muneibirieka. Enoba moi orou emenu ararae i irau me ibene ibene ibeka mufisane uisakema nono i ana ebaro ibekabai mede dauisaro eme moima emuabake meramawere ukaada usima ureibiriekake moi orou soma abanaro kuureibirieka, nono moi oroue dai bauma umane ma feareibirieka. I adinaro Godi imukeibisa orouma mamoe abuini goudi abuini emenu ofema barukada ubu meramaro ibeibisaro eme moima emuabake awe waa ukaada meramawere uke yareibirieka.  
\v 38 Emuae irauaiairo nono i orofa akakaro Godinu wake nauke daukeibisa oroue irauaiai me. Emuae i me sara daabaro enaisa orou ari yao orofaroma oraararoma iro aboro aboro enaada oma eraboroma doo ebaroma iro iro aineibisaie emua uwara me ibake eno ukeibisa.   
\p
\v 39 Godima i Dawa imukeibisa orou yaisinae irauaiai erieke ibake Danu oroubake irauaiai ukeka we bou uiroma nono emuae i we bou ui eraerabusa yaisina mune dauisa.  
\v 40 Enoba i wakenu ubiye eno, Godima imukada iyabake we ma gienabu umine ui. Enoba Dawa arara me emenu imusu ma gienabu ukeka. Ibake Danu ararae emuaini iyaini iya yaisina idua ma gienabu umine ibake eno ui.   
\c 12  
\s1 Yesu eraada nauke imuke ufene wei wake  
\p
\v 1 Nanu wake wemaro ya nauawe. Eme keuwere Godinu wake naukeibaisa orou emuama iyanu ukaisi sinaisi ibaie duramaisa iro aina mima dawako fafeku i ari eno ubi ure eraisa. Ibake i inimu eraerabusa yaisina iyanu oferoma mune siafeke iyanu arararoma meramawere ukeka medifeke deidemu mane ufero Godima iyabairo ma’i i duramekaro aina mima dawako fafeku ari ibaima ukenewaa ufene ibake weakune.  
\v 2 Enoba iyanu Godi imukaisi ibaie Yesu Kerisobairoma faraku Dawae iyanu Godi imukekabai ma ubirekaini ma isoareka Miba ibake iyae iyanu naisama Dawabairo erenewaa ufene ibake weakune. Enoba Dawae i Godibairo aneroma rooro ukekabai imukada Danu korosi waureka ibaibake ia sine dauike nono awoenae Dawa Godi Danu yaure ibaada yawokaku orofaro Danu baena wana enaro yaure ibinu.   
\s1 Godi Danu ararae iya ma gienabu umine ibake iya uraada ma gienabu ukeibakuni wake  
\p
\v 3 Yama imuka merama unao ufoisake Godi medinao ufoisaba emema meramawere Yesubairo uke yaraada imuka ka ukaada meramawere uke yareibisabaie nono Dawama emuabairo moko dino uke yare darieke me ibeibi ibai imukenewaa uawe.  
\v 4 Yama i meramawere ukekaini uraneroma yanu iwa isare dakakuba aima dubuenaro isafeku ba me ari?  
\v 5 Enoba Godima eme ma buna ukeka wake Danu amarakubairo weibakuba ibake yae Danu amarakubairo nono anemebake ibai imuke daukaisa? I wakeye i ari eno,  
\li1 Nanu amara, anu Dai Waria Mima a ure ma giena ukaada fanisi makakuyainua ibake dino da uake ibai imukenewaa ua. Dawae abake buna riba wake weaku ibaibake imuka merama da ua.  
\v 6 I Dai Waria Mima aina mibake imukari ukakuke dawa uraada ma giena ukakuke fanisi makaku. Enoba Dawama aina mibake Nanu amaraya eno we odakuke Dawae i mima danu merama ukeka medifine ibake uraada fanisi makakua,  
\m Godinu bukaroma eno weaku.  
\v 7 Nono Godima ya ure ma giena ukakuneie ibaibake dino da uaweke owainanaku uawe. Yae Godi Danu amaraku ibake Dawama eno ukaku. I amae babae yaisina emuama emenu amaraku ure ma giena ukaada fanisi makakuneka enaenari.  
\v 8 Enoba Godima Danu amaraku ure ma giena ufiakukema nono ya ure ma giena da ufiakuie yae Danu amaraku me. Ibake yae Babae mero daabaro sara eneebe dorakuneka amaraku ari eno.  
\v 9 Iyanu babaemukuma iya ure ma giena ukeibisa ibaibake dino uke dakeibisike emenu ibi we ma daiwere ukeibisi. Ibake iyanu imumunu Babaebake koroko da ufeke me irauaiai mane ibenewaa ufe.  
\v 10 Iyanu babaemukuma ibaie irauaiaiya eno we imukada odo keu me iya usima ureibisa. Nono Godi Danu ararae iya ma irauaiai umiro Danu gienabu ukeka sineka enaenari ufene ibake iya uraada ma giena ukakuni.  
\v 11 Godima iya ure ma giena ukakuniro nono iyama imuka merama ukaada eno we imukaisi, i ari enoe irauaiai meroma oferi mamanakunea eno we imukaisi. Godima abo oroubake fanisi makada ma gienabu ukakuneie i orouma dubuenaroe irauaiai sifisake irauaiai ibifisane ibake i ari eno ukaku.   
\s1 Iya buna ufeke enare ara ufene wei wake  
\p
\v 12-13 Yae korokowere ari enoya yanu buna me wanaini umuini ma buna uaweke awoena daaba wabuawero yanu buna me umu idua meramawere da sifike gienabu ufi. I wakeye i ari eno, Yanu Godi imukeka imuka buna meba ibake yanu Godi imukeka imuka ma ara uaweke Godinu daabaro irauaiai aneibiaweke da mediawe.   
\m
\v 14 Eme yaisinabairo irauaiai mane ukaada ibeibiaweke irauaiai mane uke iwoka uawe. I ari eno da uke iwoka ufoisaie Godi da efoisa.  
\v 15 Enoya imukenewaa uaweke Godinu irau unu koreka da mediawe. I ka ukaku erabusa ari eno sinao ufoisake emenu ukeka sineka ma merama unao ufoisaya yanu ukeka sineka mane imukenewaa uawe.  
\v 16 Moi mi Iso dawama Godi imuke dakaada uruna naberoro ifine ukaada danu bokai amaranu orofa danu afafa dori dubuena amara Deikafuma mufike dawa urunama make mufine weike mai. Yaini iini Isonu ukeka ari yanu arara mane unao ufoisake nono moi minu aruma aweka enare odaada yanu Godibairo orofa mufisake oi mafiakane manao ufoisaya yanu ukeka sineka mane imukenewaa uawe.  
\v 17 Nono dubuenaroe Iso danu babaenu we ma irauaiai ukeka mufine weike ii weada imukebe imukebe danu adinaro meramawere ukeka ma giena uke daui ibake danu babaema dawa idua medi.   
\s1 Iya yaisinae i irau Sainai weaisa oraara udiro faki wake  
\p
\v 18-19 Yae Godinu wake naufone ukaadae i dooro Sainai weaisa oraara udiro fare dakaisa. I Isaraera orouma Godinu wake naufisane i Sainai weaisa oraara udiro fareibisabaie inaa yariro dumu daiwere idua siniro oyauini bida idua fariro dai kawiawere iroma ukaro ureroma wake isare aarike daiwere weiro ibai ere nauke ukeibisa orou emua arara me i wake moibai nono da naufisane ibake eenu weada ibai mediake moi wake da wea weisa.  
\v 20 I ureroma isare aarike wei ena wakenu ubiye eno, abuma o aina mima i oraara ure burifekuie yama dawa omama siane umane ma feawe eno wei.  
\v 21 Ibai ekabaie arawere ibake Mosesima eno wei, nae iura mamaada ia sinakunaraya eno wei.   
\p
\v 22 Yae iro fare dakaisake yae i Sioni weaisa oraararo i me ibeka Godinu ure Derusaremu goini i aneru keuwerebairo ane faraisa.  
\v 23-24 Enoba Godima moi orou ma gienabu urieke ma irauaiai urieba ibake i orouma Godinu ibooro kawama fare ku sianada Danu wake naukada rooro ukeibisa. Enoba i orou emenu ibiye urero owaowa yanake odiro ibinu. Yae i orounu imumubairoini nono i eme yaisina kodo urakune Godibairoini ane faraisa. Enoba Eiboro dawae feariro danu iwa yewa dooro isariie Godima ibai eraada Keinibake weada dino ui. Nono Yesu Kerisoma feariro Danu iwama yewa dooro isariro Godima eraada dino uke dauike ie irauaiaiya we imukada ya unu koreibakuneke Yesu Kerisobairo ya we mune odirie ibake yae Eiborobairo fare dauisake yae i awoena arararo uke makaneka ma ara ukaku Mi Yesu Kerisobairo ane faraisa.   
\s1 Iya yaisina erenewaa ufene wei wake  
\p
\v 25 Imuke eawe! Yesu Dawae yabake weakua Danu wake naukenewaa uawe. Adinaro Mosesima yewa dooro enaada wake weiro i danu wake nauke dauisaro Godima i wake nauke dauisa orou fanisi marie. Godima emua eno uke yarieba ibake nono iyama i urero ibinu Minu wake da naufeisiie Godima iyabake fanisi daiwere mamisi.  
\v 26 Adinaroe i oraararo Godima weiro doo amani amani ukeibi. Nono awoenae Godima we bou ukaada eno wei, Nae doo mane da ma amani amani umauke ureini dooini demuiro ma amani amani umaua wei.  
\v 27 Dawae nono i demui wakebake weada weiba ibake iya ibai iwoka sinaisi. I ubu ui eraerabusa yaisina amani amani ufeisake me sifeisaro nono i amani amani da ufeisa eraerabusa mane idua ibifeisa.   
\p
\v 28 Godima iya yawokeifekuro ibeifeisi orofae amani amani da ufekuba ibake Dawabairo we ma irauaiai ufene weakune. Enoba iyae rooro ukaada Godi Danu arara mane ufeke Dawabake iifa ukaada imukenewaa ufeke guriguri ukeifene ibake weakune.  
\v 29 Iyanu Godi Dawae i eraerabusa yare me sinaku inaa ari ibake i meramawere ukeka yaisina yare me sifeku.   
\c 13  
\s1 Iyanu naiyemukubake imukari ufene wei wake  
\p
\v 1 Ya Godinu wake naukaisa orou yanu kaka nabue ari imukari uke makanekabai da medifoke imukari uke makaneifone ibake weakune.  
\v 2 Moi imusu orouma yanu goiro fafeisaie we kuuyakawe. Adinaro moi orouma eno ukaadama emuae iwoka me abo oroubairo weibisa ariroma nono emuae anerubairo weibisa.  
\v 3 Enoba i Godi imukaisa orouma ana ebaro ibinisa orou imuyakaweke iyae emuaini demuiro ana ebaro ibinao uke ibinisia eno weada emua unu koyakawe. Enaenari yae oferi me ofema ibinisia i arama ukaisa orou imukada unu koyakawe.   
\p
\v 4 Aweka munekaini eme munekae irauaiaiya eno we imuawe. Nono awekabo yae yanu emeakaini demuiro ibaadama nono moi emeakabairo da aniawero nono emeaka yaini iini yanu awekaboini demuiro ibaadama nono moi awekabobairo da aniawe. Godima i ari eno meramawere ukeka imukada moi minu aruma aweka enare odeifeisa orou emuae kodo ure yafiaku.   
\p
\v 5 Yanu imuka yaisina oi munekabairo da odiaweke i yabairo ibinisa eraerabusananakue iduaya eno we imuawe. Godi Dawae iyabake eno wei, ya da medimiauke yabairo idua ibeimaua eno wei.  
\v 6 Ibake iyanu imuka ma ara ufeisike eno wefeisi,  
\li1 i Dai Waria Miye iya unu koreka Miba ibake emema iyabairo aneme anema ufeisa ibaibake ia da sifeisia,  
\m iyama eno wefeisi.   
\p
\v 7 Yanu dai orouma adinaro Godinu wake yabairo weibisaba ibake emenu ukeibisa sineibisa ibaini nono emenu feareibisabaini imuaweke emenu Godi imukeibisa enaenari imuawe.  
\v 8 Arienaini eweiraini i me ibene ibene ibaku yafaini iini Yesu Keriso Dawae imusu imusu mero Dawae demui.  
\v 9 Enoba yama Godi imukeka daaba imusu imusu imunao ufoisaya emenu imusu imusu we ma iwoka ukeka wake da nauawe. Godinu irau unu korekama yanu imuka ma ara ufiaku i deima idua enaenari sifeku. Nono i iifa urunabake darawadu wake da nauawe. Moi orouma i urunanu darawadu wake naukaisaie i darawaduma emua unu kore dakakunea emenu wake da nauawe.   
\p
\v 10 I ofereni ode sibore sianeka orouma yewa dooro faraima ma enaka uwararo emenu waiya iro ukeibisaba ibake i ofereni odeibisa abu iseibisakema nono iyabairo ibinu ofereni odeka orofae imusuro nono iro uruna meba ibake ise dakeibisa.  
\v 11 I dai ofereni ode sibore sianeka mima i abunu iwa muneibike emenu meramawere ukekabake i iifa daiwere ooruro ofereni odifine i abunu iwa waure aneibi. Nono emuama i ba abu bou ma youre aneibisake goi arawekoro inaama yare me sineibisa.  
\v 12 Ibake Yesu Danu ararae emenu meramawere ukekae Danu iwama urofiro iyae Godibairo gienabu amuke enafene ibake Dawae Derusaremu goi arawekoro feari.  
\v 13 Enoba iyanu arara mane ukeka medifeke i goi arawekoro Dawabairo anifeke i awe waawere yaisina Dawaini demuiro waufe.  
\v 14 Yewa dooro iyanu ibene ibene ibeka goiye meba ibake iyae i awoena fafeku goi yodia ukaada koro ukaisi.  
\v 15 Nanu wake nono wemaro nauawe. Yesuma iya unu kareibakuniba ibake Danu ibi we ma daiwere ufeke Godibairo we ma irauaiai ukeifene ibake weakune. Ie iyanu Godibairo ofereni odeka ari eno.  
\v 16 Yewa wake imuke eawe. Irauaiai mane ukeibiaweke yanu yanu unu kore makaneibiawe. I ari eno ufoisaie yanu irau ofereni odinao ufoisaba ibake Godima ibai efekuke rooro daiwere ufeku.   
\p
\v 17 Yanu dai orouma yanu Godi imukaisabai yawokaisaya emenu weifeisa wake da nauke mediaweke emenu riba wake nauawe. Dubuenaroe emuama Godibairo emenu waiya ukeifeisa ibai yaisina we ma boroo yafeisaba ibake awoenae ya irauaiai yawokakuneka. Emenu wefeisa wake da nauke medifoisaie emuama yabake rooro ukaada yae irauaiai yawofiakaisa. Enoba emenu wefeisa wake nauke medifoisaie emuama yabake imuka merama ukaada yawofiakaisaro ufeisaro nono yae irauaiai da ibifoisa.   
\s1 Guriguri ukekama iya unu komine wei wake  
\p
\v 18 Godibairo iyabake aine wai ure guriguri ukeibiawe. Iyanu imukaro imukekae irauaiaiba ibake imuka merama uke dakaisike iyanu ararae irauaiai mane ufene imukaisi.  
\v 19 Enoba nanu ararae yaini naini sabu fou ure makafeneba ibake Godibairo nabake bunawere guriguri ukeifone weakune.  
\v 20 Yesu Keriso Dawae iyabake isare aare fearike Danu iwama i awoena arararo uke makanekabai ma ara uiba ibake Godima Dawae i feari iroma nono ma uyarike i mamoe abu ari eno orounu yawokeka dai Mi we mune odiba ibake Dawama iya yawokakuni.  
\v 21 Enoba nanu ararae i irauaiai ukaku Godima yabake Danu irau imukeka mafiake Dawama yae uke bou ufiaro Danu arara yaisina mane ufone ibake weakune. Godima Yesu Kerisonu ibiroma yanu imuka ubarenaro Danu arara mane ufine weakune. Iya yaisinae Yesu Kerisonu ibi aine wai ure we ma daiwere ukeifene ibake weakune. Nanu wake idua.   
\s1 I dubuena kai wake  
\p
\v 22-23 Naiyemuku, nanu eenu wakenaku wemaro ya nauawe. Nanu owaowae yewado yafawere meba ibake nanu we iifa ukeka wakeini yanu Godi imukeka imuka ma ara ukeka wake mane erenewaa uawe. I ana ebaro ibisa orou yawokakuneka orouma Dimodi naa ma worome odaisaro me nauwaro fari. Enoba Nanu ararae yewa wake naukenewaa ufone ibake weakune. Dimodima nabairo sabu fafekuie dawaini naini uwama yabairo idua demuiro aafukuke ya efiaku.  
\v 24 Nanu arie wake yanu yawokakuneka dai orouini Godi imukaisa orouini emua yaisinabairo weawero naufisa. I Idari weaisa orofaro ibaada Godinu wake naukaisa orou yaisina emenu arie wake yabairo we odaisaisa.  
\v 25 Enoba Godima yae irauaiai unu kofiane ibake weakune. Nanu wake idua me sininu.