\id EPH  - Aneme Wake NT [aby] -Papua New Guinea 1988 (DBL -2013) 
\h Efesa 
\toc1 EFESA GOI OROUBAIRO OWAOWA 
\toc2 Efesa 
\toc3 Efe 
\mt1 EFESA GOI OROUBAIRO OWAOWA  
\c 1  
\p
\v 1 Godima Danu arararo uike na Foru, Yesu Kerisonu afasoro mi we mune odikara. Nama ya Yesu Keriso imukenewaa ukaisa Efesa goi oroubake yewa owaowa yanake odakune.   
\p
\v 2 Iyanu Babae Godini iyanu Dai Waria Mi Yesu Kerisoini emuama ya unu kofisike emenu irau ukeka yabairo mafisiro irauaiai mane ukaada ibifone ibake yewa wake eno weakune.   
\s1 Godima Yesu Kerisoini demuiro ibinisi orou iya we ma irauaiai ukakuni wake  
\p
\v 3 Yesu Keriso Danu Babae Godi Dawama iya we mune iyanu urero ibinu Dai Waria Mi Yesu Kerisobairo ma dakaa uke odiike i Imumu Iraunu me makeka eraerabusa yaisina iyabairo ma’iba ibake Danu ibi we ma daiwere ufene weakune.  
\v 4 Godima i doo ubu uke me i furo Yesu Keriso Dawama iya ma wiromine ibake iya we mune odii. Godi Danu ararae iya Danu ibooro enafeke irauaiai mane ufene ibake eno u’i.  
\v 5 Adinami nauwaro Godima Danu arara uike Yesu Kerisonu ma wirokeka waiyabake iya we mune Danu omukeka amaraku ari we odiiro Danu amaraku siki.  
\v 6 Godi Danu ararae iyama Danu irau unu koreka we ma daiwere ufene ibake Danu Amara ubi iyabairo ma’i.   
\p
\v 7 Yesu Keriso Danu irau unu korekae daiwere ibake Dawa feariro Danu iwa yewa dooro isariro Danu iwama iya ma wiro’ike iyanu merama merama ukeka mune imuke medi.  
\v 8 Danu ararae iya Danu imukeka yaisina idua iwoka sifene ibake Danu unu koreka iyabairo makenewaa u’i.  
\v 9 Godima Danu adinaro fema imukeka imuka ma boroo yafine ibake Danu arararo ukaada Yesu Keriso we odairo yewa dooro isare aari.  
\v 10 Godinu imukekae eno, i dubuena kai odoro Godima yaisina i urero eraerabusaini dooro eraerabusaini yaisina ma demuiro uke odifekuro Yesu Kerisoma i erawa naukawa eraerabusa yaisina idua yawokeifiaku.   
\p
\v 11-12 Godi Dawae ibai yaisina bunawere ukaada Danu arararo iyanu orofa Yesu Kerisobairo uke bou uiba ibake iyae Yesu Kerisobairo iyanu orofa muki. Godi Danu ararae iya Du orou iyako Yesu Keriso imukada iyanu Godi imukeka imuka Dawabairo oisiba ibake emema ibai efisake Danu ibi we ma daiwere ufisane ibake ibai yaisina eno ukeibi.   
\p
\v 13 Nono Yesu Kerisoma i wake weibi ibake ya imusu orouma i irau wirokeka wake naukeibisa. Ibake yae yanu imuka yaisina Dawabairo oisaro Godima we bou uiro fari Imumu Irauma yanu imuka ubarenaro isarike yae Godinu oroua eno weada widu uke odirie.  
\v 14 Godinu Imumu Irau Dawama iyabairo ibinuba ibake iyae Godibairo iyanu moko mufeisi ibai iya iwoka sine ibinisi. Nono Godima iya we mune Dawabairo odimisiro me ibene ibene ibaada Danu ibi we ma daiwere ukeifeisi.   
\s1 Foruma Efesa goi orou iwoka daiwere sifisane ibake Godibairo guriguri ukeibi wake  
\p
\v 15-16 Ibake ya oroue yanu imuka yaisina Yesubairo oisake Godinu wake naukaisa oroubake imukari ukaisaya eno weisaro i wake na naueke Godibairo yabake guriguri ukaadae we ma irauaiai ukeibakunia.  
\v 17 Nono nanu ararae iyanu Dai Waria Minu Godi, i arakekawere Babae Godi, Dawama ya unu kofiaro Danu Imumu Irauma Godinu imukeka yabairo we ma boroo yafiro Godinu imukeka yaisina iwoka ukenewaa ufone ibake Godibairo guriguri ukeibakune.  
\v 18 Nanu ararae yanu imuka ubarenaro edoro ufiro Godi Danu adinaro imukada fema we bou ukeibi ibai yaisina yama iwoka sifoke i urero eraerabusa yaisina i we ma irauaiai ukekaini i yabairo mafiaku ibaini yaisina yama iwoka sifone ibake nama yabake guriguri ukeibakune.  
\v 19-20 Nanu ararae yama Godinu buna eraada iwoka sifone ibake weakune. I bunae Yesu Keriso feairoma nono ma uyarike mune urero Danu baena wana enaro ma yaure odi. I bunae iya Godinu wake naukaisi orounu. Ibai ya iwoka sifone ibake nama Godibairo guriguri ukeibakune.  
\v 21 Godima Yesu urero waure amuke ane odike i dai eme yawokeka orouini dawako orouini urero dai orouini i awoena ibinisa orouini emua yaisina ma bererieke bokairo ma yaure odi.  
\v 22 Dawama i orouini i eraerabusa yaisina yawofine ibake eno uke odike nono Dawae i Godinu wake naukaisa orou yaisinanu bokai mi we odi.  
\v 23 I Godinu wake naukaisa oroue Yesu Danu ofe. Ibake i bokaini ofe ubuini yaisinae demui sinakuro nono Dawae i orofa akaka yaisinanu ubi mi sini.   
\c 2  
\s1 Godima Yesuini iyaini demuiro ma uya’iro wiroisike awoena me ibinisi wake  
\p
\v 1 Adinami nauwaro yae imusu orouma Godibake koroko ukaada meramawere ukeibisa ibake feareka orou ari eno sine ibeibisa.  
\v 2 Adinaro yae yewa orofa akakanu merama daabaro eneiareibisa. I meramawere yawokeka dai mi dawae seidani, dawama i feareibisa orouini i Godibake koroko ukeibisa orouini yawokeibirie enaenari dawama adinaro ya yawokeibiriero ibeibisa.  
\v 3 I ari enoe iya yaisina emenu ukeka sineka enaenari ukeibisike iyanu merama imukanu arara mane ukeibisi. Enoba iyanu ofenu araraini iyanu awaranu imukeka araraini i mane ukeibisi. Iyae eno ukeibisi ibake Godima iyaini dino ukaada fanisi mamine imukeibi.   
\p
\v 4-5 Godi Dawa arara me eme fanisi makeka. Danu ararae emebake imukari ukeka. Ibake iyama merama imukanu arara ukaada Godibake koroko uisike feareka orou ari sine ibisiro Dawama iyabake dino uke yare dauike imukari daiwere ukaada feare ibeka ari eno iroma Yesuini iyaini yaisina ma uya’iro awoenae irauaiai me ibinisi. Godi Danu mane iya unu koraada ma wiro’i.  
\v 6 Iyae Yesu Kerisobairo dakaa uke ibinisiba ibake Godima iyaini Yesu Kerisoini yaisina ma uya’ike Dawaini iyaini i ure orofaro ibifene odiiba ibake awoenae Yesuini iyaini iro demuiro ibinisi.  
\v 7 Godima iyabake imukari daiwere u’i ibake Yesu Keriso we odairo yewa dooro isare aarike iya ma wiro’i. Godi Danu ararae i feareifeisa orou yaisina Danu imukari ukeka efisake iwoka ufisane ibake i ari eno ui.  
\v 8 Godi Danu mane iya unu koraada me ma wirokakuniro iyanu imuka yaisina Godibairo odaisi. Iyae iyanu imusu ma wiroke mero iyanu wirokekae Godinu me makeka makakuni.  
\v 9 Enoba i wirokekae iyanu waiya meba ibake iyanu ibi we ma daiwere da ufeisi.  
\v 10 Godima iya ubu u’ike iyama irauaiai mane ukefene ibake Yesu Kerisobairo ma dakaa u’i. Dawama adinaro i irau ukeka odike i mane ukeifene ibake Yesu Kerisobairo ma dakaa u’i.   
\s1 Yesuma imusu orou we mune demuiro odiriero demui orou ari eno sine ibinisa  
\p
\v 11-12 Ya imuke eawe! Yanu amae babaeye imusu orou ibake yae imusu orou. I Du orouma eno weaisa, iya Du oroue ofe kuureka orouro nono ya imusu oroue ofe kuure dakaisa oroua eno weaisa. Emenu ofe kuurekae wanama kuureka. Yanu adinaro ibeibisabai imuawe. Adinaro yae Yesu Kerisobairo ibe dakeibisake yanu imusu mane ibeibisa. Yae i Godinu we murie oroubairo nono emuaini ibe dakeibisake yae imusu orou ari sine ibeibisa. Godi Danu arararo uke makaneka Isaraera oroubairo we bou ukeibi ibake i we bou ukekae yanu me. Enoba yae Godi imuke dakaada me sara meramawere sine ibeibisa.  
\v 13 Nono awoena yae Yesu Kerisobairo ibinisa. Ya adinaroe ekararowere bi mame ibeibisakema nono awoenae Yesu Keriso yabake feariro Danu iwa yewa dooro isari ibake yae Godibairo ubiubinaku ibinisa.  
\v 14 Yesu Keriso Dawa Danu irau ukeka iya yaisinabairo ma’ike Dawae iyanu irau ibeka ari sini ibake irauaiai ibinisi. Dawae iya yaisinabake fearike i Du orouini imusu orouini iyae demui orou uke odii. Ibake adinaro i Du orouini imusu orouini emuabake wasai ukeibisa ibai Yesuma mune eka imusu odiro nono awoenae iya irauaiai ibaada iyanu iyanu naiyemuku we makanaisi.  
\v 15 Yesu Keriso Dawa yewa dooro isare aare farike iyabake fearike Mosesinu darawadu yaisina mune imusu odike idua me sininua eno wei. Danu ararae i Du orouini imusu orouini we mune Dawabairo demui orou uke odifiaro irauaiai mane ibifisane ibake eno ui.  
\v 16 Yesu Danu ararae i wasai uke makaneibisa ibai medifisane ibake korosiro feari. Dawama korosiro feari ibake i orou yaisina emua mune demui orou ari eno uke odirieke i orou ma owerieke Godibairo ubiubinaku odirie.  
\v 17 Yesu Keriso Dawa farike Godinu irauaiai ukeka sineka wake eme yaisina emuama naufisane ibake i wakenu ubi mi sinike iyaini Godibairo ubiubinaku ibeibisi Du oroubake wefiro moi orouma yae Godibairo ubiubinaku ibe mero ekararowere bi mame imusu ibeibisa oroubake enaenari weibi.  
\v 18 Iya yaisina Du orouini imusu orouini Yesuma iya yaisina ma wiro’i ibake Godinu Imumu Irau iyanu imuka ubarenaro ibinuro Godinu ibooro ubiubinaku aare ibaada guriguri ukaisi.   
\s1 Iya Godinu wake naukaisi orou iyae Godinu ibeka uwaraya wei wake  
\p
\v 19 Ibake awoenae ya imusu oroue imusu orou ari me. Yaini Godinu orouini yae demui ibake yae Godinu ba orou.  
\v 20 Iya yaisinae Godinu uwara ari. I afasoro orouini Godinu we bou urie orouini iya yaisinae i uwaranu fosi ari eno. Nono Yesu Keriso Dawae i kukubu kai ari eno. Iya yaisinae bouka duboro ma karisaisa bururu ari odii.  
\v 21 I kukubu kaima i uwara yaisina ma dakaa ukaku i ariye Yesu Kerisoma iya yaisina ma dakaa ukakuba ibake iyae Godinu iifa sosi uwara ari sinaisi.  
\v 22 Yesu Keriso Dawae iyaini imusu orouini we mune Dawabairo ma dakaa ukaada iyae Godinu uwara ma enarakuni. I uwarae iyanu ofero ibinu imuka i dawae Godini Danu Imumu Irauini Emenu ibeka orofa.   
\c 3  
\s1 Forunu waiyae imusu oroubairo Godinu irau wake weibi  
\p
\v 1 Na Foru, nama Yesu Kerisonu irau wake yabairo weibisara ibake weisake na ana ebaro waure ane odiyaka. Nae Yesu Kerisobake ana ebaro iyare mi nama Godibairo yabake guriguri ukakune.  
\v 2 Nae eno imukakune, ya iwoka, Godima na imukarake Danu waiya nabairo makara. Godi Danu ararae nama ya unu komiane ibake nanu waiya eno makara.  
\v 3-4 Godi Danu fema imukeka nabairo ma boroo yaraada we ma iwoka ukara. Nae adinaro i wakenaku owaowa eno yanake odeba ibake yama i wake kakufoisaie Yesu Kerisonu fema imukekanu ubi iwoka sine enaenari yaini iwoka sifoisa.  
\v 5 Adinaro Godima Danu fema imukeka eme moibairo we ma boroo yare daui. Nono awoenae Godi Danu Imumu Iraubairoma Danu iifa afasoro orouini we bou ukeka oroubairo we ma boroo yarie.  
\v 6 I fema imukekanu ubiye eno, i imusu orouma Godinu irau wake naukaisa ibake Godima emuaini Du orouini emua yaisina we ma irauaiai ukakune. I imusu orouini Du orouini emua yaisina Yesu Keriso imukada ibake ofe demui orou sika. Demui orou sikaba ibake Godima Yesu Kerisobairo we bou ui ibai yaisina demuiro munaisa.   
\p
\v 7 Godima na unu koraada Danu irau wake wemane ibake Danu bunaroma na we mune odikararo nae Danu irau wakenu waiya ukeka mi sine.  
\v 8-9 Godinu wake naukeka oroubairo nae daiwere mero emua deima ba daiwere. Nono Godima ibai imuke dakaada Danu irau weeka waiya mane nabairo makaraba ibake i imusu oroubake Yesu Kerisonu irau ukeka sineka imukeka idua weakune. Godi Danu fema imukeka aneaneme ufeku ibai weakuro eme yaisinabairo weakune i Godi Dawama i eraerabusa yaisina ubu uike nono Danu fema imukeka imuka adinaroma ma boroo yare dakeibike nono awoenae ibai yaisina eme yaisinabairo we ma boroo yarakuni.  
\v 10 Dawama eno ui ibake awoenae i urero ibinisa dai aneruma i sosi uwararo Godinu wake naukaisa orounu ukeka sineka efisake Godi Danu iwoka daiwere yaisina emuama iwoka sifisane ibake eno we ma iwoka urie.  
\v 11 Godima eno ufekubai adinaro yewa dooini ure ubu uke me i furoma imukada nono i eraerabusa yaisina ubu uike iyanu Dai Waria Mi Yesu Keriso imukada ibake enaenari ui.  
\v 12 Ibake iyae iyanu imuka yaisina Yesu Kerisobairo oisiba Godibake ia sine dakaada Danu ibooro enare ibaada guriguri idua ukaisi.  
\v 13 Nama yabairo Godinu wake yaya ibake emema na ana ebaro oisaro ibine. Na ana ebaro oisaro ibine ibake weroma imuka merama da imuawe. Yae Godinu wake nauisake yanu imuka yaisina Dawabairo oisaya nabake imuka merama da imuawe.   
\s1 I Efesa goi orou Yesu Kerisonu imukari ukeka emua iwoka ufisane wei wake  
\p
\v 14 I Godi Danu uke bou ukeibi ibai imukada nae Babae Godinu ibooro ifoma kodudu yanakada guriguri ukakune.  
\v 15 I urero ibinisa orouini yewa dooro Godinu wake naukaisi orouini iya yaisina iyanu Babaeye Godi Dawama iyanu ba ibi mamakuni.  
\v 16 Nanu ararae i buna daiwere Godi Dawama ya unu koraada Danu Imumu Irauma yanu imuka ubarenaro ibaada ma buna ufiaro bunawere ufone ibake Godibairo guriguri ukakune.  
\v 17-18 Nanu ararae yanu imuka yaisina Yesubairo ibifiro Yesuma yanu imukaro ibifiro eme yaisinabake imukari ukenewaa ukeifone ibake guriguri ukakune. Yaini Godinu wake naukaisa orouini ya yaisina Yesu Kerisonu imukari ukeka daiwere iwoka sifone ibake guriguri ukakune. I eweka amukaku enaroma eweka isaraku enaroma eka ena ewa enaroma i orou yaisina Danu imukari emuabairo ibinu.  
\v 19 Danu imukari ukekae daiwereba ibake ibai yaisina da iwoka sifeisi. Nono nanu ararae yama Danu imukari ukeka iwoka sifone ibake weakune. Eno ufoisaie Godima yanu imuka ubarenaro ibenewaa ufeku.   
\p
\v 20-21 Godi Danu bunawere Imumu Irau iyanu imuka ubarenaro ibinuba ibake iyama anemerabubake imukaisike Dawabairo we nauke eraisi iini nono moibaini i keuwere we nauke eraisiro enaenari Dawama unu koreibaku. Ibake i sosiro Godinu wake naukaisi orou iyama Yesu Kerisoini Godini Emenu ibi aine wai ure we ma daiwere ukeifene weakune. Nanu wake idua.   
\c 4  
\s1 Iya Godinu wake naukaisi orou iyae Yesunu ofe ari enoya wei wake  
\p
\v 1 Nae Yesu Kerisonu waiya ukakuneba ibake nae ana ebaro ibeka mi. Nama bunawere wakeroma wemaro ya nauawe. Godi Dawae ya we mune odiriea Dawama yabairo wei wake enaenari uawe.  
\v 2 Yanu ukeka sinekae i ari eno uawe, yanu onarounu ibi da we ma daiwere uaweke yaisina owainanaku uaweke i waiya yaisina ure nudaroma owainanaku uawe. Yanu yanu imukari uke makaeweke yanu ukeka sinekae i ari eno uawe.  
\v 3 Godinu Imumu Irauma ya unu korakunea daaba imusu imusu imuka da imuaweke demui orou siaweke Danu irauaiai ibaku enaenari eno ibiawe.  
\v 4 Godinu Imumu Irau Dawae demui i ari enoe nono i Godinu wake naukaisa orou emuae ofe demui orou ari eno. Nono Godi Danu ma wirokekae demui. Godima eno imukada iya yaisina we mune odiiba ibake i demui urero ibinu daabaro amuke anifene imukaisi.  
\v 5-6 Iyanu Dai Waria Mi Dawae demui. Iyanu Godi imukeka imukae imusu imusu mero ie demui imuka mane. I babadaido ukekae imusu mero ie demui mane. Godi Dawae una demui. Dawae iya eme yaisina iyanu Babae. Enoba Dawama iya yaisina yawokakunike iyanu imuka ubarenaro ibaada iyabairoma Danu waiya ukaku.   
\p
\v 7 Yesu Keriso Dawama iya buna imusu imusu ma’iba ibake iyanu waiyae imusu imusu.  
\v 8 Godinu bukaroma eno weaku,  
\li1 Dawae ana ebaro ibeka orou ari eme keuwere bokai mamike urero waure amuke anirieke nono i dooro ibeka oroubairo buna imusu imusu mariea,  
\m Godinu bukaroma eno weaku.  
\v 9 I urero amuke ani i wakenu ubiye aneme ari? I wakenu ubiye i ari eno, Dawae adinaro yewa dooro isare aarike nono owere urero amuke ani.  
\v 10 I dooro isare aarike nono urero amuke ani mi Dawae demui Mi. Ibake Dawama dooroini ureroini aboro aboro iro ibaada i eraerabusa yaisina yawokeibaku.  
\v 11 Danu oroubairo imusu imusu buna marie i dawa i ari eno, moi oroubake afasoro ukeka waiya marie. Nono moi oroubake we bou ukeka waiya marie. Nono moi oroubake Godinu wake weeka waiya marie. Nono moi oroubake sosi yawokada eme we ma iwoka ukeka waiya marie.  
\v 12 Danu ararae i oroubairo uke bou ufiaro emuama Godinu waiya ufisake i Godinu wake naukeka orounu Godi imukeka imuka ma buna ufiakane ibake buna imusu imusu marie.  
\v 13 Emuae eno ukaisaba ibake iya eme yaisinae demui orou ari sinaisi. Iyanu Godi imukeka imukae demuiba ibake iya yaisinae Godinu Amara Yesu imukada enaenari iwoka sinaisi. Enoba iyae amarananaku ari eno da sine ibifeke dai orou ari eno sifeke Yesu Kerisonu imukeka yaisina imukenewaa ukaada enaenari ufeke Dawa ari eno sifene weakune.  
\v 14 Eno ufeisiie iya amarananaku ari mero dai orou ariba ibake i we gagao orounu imusu imusu imukekae dawara ufeini oyau ari enoro ima iya waure ane aare ma owere owere eno mane da ufeku. Emenu ararae moi orounu imukeka ma merama ufiakane ibake eno ukaisa.  
\v 15 Enoba nono iyae eno da ufeke emebake imukari ukaada ba wake mane weifene weakune. Enoroma iyama, Yesu Kerisoe iyanu bokai ibake Dawabairo ma dakaa ukenewaa ufeisi.  
\v 16 Dawama Danu ofe ubu yawokakuba ibake i ofero ibinisa eraerabusa yaisina emenu orofa imusu imusuro idua ibinisa. Ibadidima ofe kai ma dakaa ukaku enaenari Yesuma iya Danu ofero ma dakaa ukakuniro iyanu waiya imusu imusu ukaisi. I ofero ibinisa eraerabusa imusu imusu emenu emenu imukari uke makanada emenu waiya imusu imusu ukaisaro i ofe bunawere ukaku.   
\s1 Iya Godinu wake naukeka orounu eneibeka daabae awoena daaba ari enoya wei wake  
\p
\v 17-18 Nanu moi wake Yesu Kerisonu ibiro bunawere wemaro ya yaisina nauawe. I Godinu wake nauke dakaisa orounu ukeka sineka ari eno enaenari da uawe. I ari eno ukaisa orou emenu imukekae meramawereke emenu imukae inowere. I orou emuae arara me Godinu weeka wake naukeka. Emuae Godibake koroko ukaada Godibairo ibe mero emenu imusu ibinisa.  
\v 19 Enoba emuae maru uke me ibake i emeaka emenu emenu dodoo ukaisaro nono awekabo emenu emenu dodoo ukaada moi orounu aruma aweka enare odaada nono emenu ararae i ari eno aine wai ure meramawere ukeifisane ibake meramawere aine wai ure ukeibaisa.   
\p
\v 20 Yesu Kerisonu imukekae i ari eno me. Yae Kerisonu wake eno uke nauke dakaisa.  
\v 21 Na iwoka, moi orouma Yesu Kerisonu wake yabairo weibisaro naukeibisa ibake Danu ba imukeka iwoka sinaisa.  
\v 22 Ibake yanu merama imuka imukeka yaisina imuke mediawe. I merama imukeka ima ya adinaro uke irukeibi ibake yama i ari eno meramawere ukeibisa, i meramawere imukekae yaurada urumu weibaku i ari enoya mediawe.  
\v 23 Iduaya awoena imukeka mane muaweke awoena imuka imuawe.  
\v 24 Eno uawero yanu ukeka sinekae Godinu ukeka sineka ari sifi. Eno ufoisaie ya irauaiai mane ufoisaro yanu ukeka sinekae irauaiai sifeku.   
\p
\v 25 Enoya meo da weawe. Iya yaisinae Yesu Kerisonu ofero ibinu eraerabusaba ibake iyanu iyanu ba wake mane we makafene weakune.  
\v 26 Yama dino ufoisaie meramawere unao ufoisaya yanu dino ukeka sabu mediaweke wiroke makaewe. Dino uke makafoisaie sabunaku we wiroke makaeweke i eweka yafa dino bobo da ibiawe.  
\v 27 Eno ufoisaie seidanima danu merama imuka yabairo manao ufiakuba ibake yanu dino ufoisa ibai sabu medifone weakune.  
\v 28 Ya i adinaro waira ukeibisa orou nono awoena waira da uaweke waiya ukenewaa uaweke oima yanu uruna make muaweke uruna me imusu orou mayakawero ifisa.  
\v 29 Merama wake da weawe. Aboro aboro yaure ibaadae irau wake mane weawero emema yanu wake naufisake emenu imukeka ara sifisake wakeye irauaiaiya eno wefisa.  
\v 30 Godinu Imumu Irauma imuka inimu unao ufekua meramawere da uawe. Yae Godinu oroubake Godi Danu Imumu Irau yanu imuka ubarenaro odike yae nanu oroua eno weada widu uke odinao uiba dubuenaro yae we mune Danu orofaro odifiakuba ibake weakune.  
\v 31 Enoya imuka merama ukekaini imuka uyarekaini dino ukekaini daiwere weekaini meo weekaini emebairo meramawere ukekaini i meramawere ukeka yaisina imuke mediawe.  
\v 32 Yanu yanu imukari uke makanada unu kore makaewe. Godi Danu Amara Yesu Kerisoma iyanu meramawere ukeka munike imuke medi enaenari yama yanu meramawere ukeka yanu yanu imuke mede makaewe.   
\c 5  
\s1 Yaini naini yaisina edororo eneifene wei wake  
\p
\v 1 Godima yabake imukari ukakuneba ibake yae Godi Danu amarakua Danu ukeka sineka enaenari uawe.  
\v 2 Eme yaisina emuabake imukari ukenewaa uyakawe. Yesu Keriso Dawae iyabake imukari u’ike feari. Enoba ie Danu irauaiai urumuma imusu ari erabusa Godibairo ofereni odinao ui. Eno uiro Godima ibai eraada rooro daiwere ui. Enoya yama Yesu Kerisonu imukari ui enaenari yaini imukari uawe.   
\p
\v 3 Yabairo moi minu aruma aweka enare odekaini emeaka emenu emenu dodoo uke makanekaini awekabo emenu emenu dodoo uke makanekaini i yaisina mediawe. I me sara eraerabusa yaisina imuke mediawe. Yae Godinu wake naukaisa oroua i merama wake yanu yanu da we makaewe.  
\v 4 I meramawere wakeini me sara wakeini inowere wakeini i wake yaisinae irauaiai meya da weaweke nono Godibairo we ma irauaiai ukeibiawe.  
\v 5 Yewa wake imuke eawe! I moi orounu aruma aweka enare odaisa orouini emeaka emenu emenu o awekabo emenu emenu dodoo uke makanaisa orouini emenu arara erabusa keuwere muneifisane ukaisa orouini emuae eno ukaada ibake emua Godi imuke dakaisake emuae i eraerabusa imuka mane imukeibaisa. Emuae eno ukaisa ibake emenu ukekae emenu wanama ubu uisa godibairo ofereni odinao ukaisa. I orou yaisina emuae Godini Danu amara Yesu Kerisoini Emenu irauaiai yawokaisi orofaro demuiro da ane ibifisa.   
\p
\v 6 Emenu meramawere we irukeka wake da nauawe. Enoba Godima Dawabairo koroko ukaisa orou emuabairo dino ufekuke fanisi mafiaku.  
\v 7-8 Yanu adinaro ibeibisaie dumuro ibinao uke ibeibisaroma. Nono awoenae ya Yesu Kerisonu edororo ibinisa. Enoya i edororo ibinisa orounu ukeka sineka ari mane uawe.  
\v 9 I edororo enare ibaisa anama kaibai irauaiai uwanaisa i ari enoe i edororo ibaisa orouma ba wake mane weaisake irauaiai ukaisake emenu ukeka sineka gienabu mane ukaisa.  
\v 10 Iyanu Dai Waria Minu imukeka ari mane imuaweke enaenari uawero Dawa rooro ufi.  
\v 11 I dumuro ibinisa orounu meramawere ukeka enaenari da uaweke emenu meramawere ukeka yama edororo ma boroo yaewe.  
\v 12 I orou fema meramawere ukaisa. Emenu meramawere ukekabake da wayai weawe. Eno uke ere wayai wefoisaie maru daiwere sifoisa.  
\v 13 I meramawere ukeka yaisina Yesunu edororo odifoisaie i edoroma i ukeka yaisina emenu ubi ma boroo yafekuro efeisake emenu meramawere ukeka medifeisake i edoronu amaraku ari sifeisaba me ariya i ari eno uke eawe.  
\v 14 Ibake Godinu bukaroma i wake i ari eno weaku,  
\li1 nauka aine ibinu mi a uyaa. I feaka oroubairoma uyaaro Yesu Kerisoma a edoro mami,  
\m i ari eno owaowa yanake odi.   
\p
\v 15 Irauaiai mane uawe. I awara me orounu ukeka sineka ari da uaweke i awara irau orounu ukeka sineka ari eno mane uawe.  
\v 16 Yewa furo emema meramawere ukeibaisa enoya yae enaenari da uaweke yanu ibeifoisa i orofa aboro aboro ibaadae irauaiai mane uawe.  
\v 17 I awara me orounu ukeka ari eno da uawe. Iyanu Dai Waria Minu imukeka mane uke iwoka uaweke i ari eno mane ukeibiawe.   
\p
\v 18 Awara owefekuro meramawere unao ufoisaya ara adua da iawe. Eno da uaweke Godinu Imumu Irau munenewaa uaweke irauaiai uawe.  
\v 19-20 I Samusi bukaro wakeini i Godi we ma irauaiai ukaada weaisa yaura kai i dawae Godinu Imumu Iraunu yaura kaia i yaura kairoma iifa wake yanu yanu we makaeweke Godibairo i eraerabusa yaisinabake Yesu Kerisonu ibiroma we ma irauaiai ukeibiawe.   
\s1 Eme munekaini aweka munekabake wei wake  
\p
\v 21 Yae Yesu Keriso imukenewaa ukaisa ibake weroma yanu ibi we ma daiwere da uaweke yanu yanu wake we makaeweke adaadanaku ibenewaa uawe.   
\p
\v 22 Awekabo yae Yesu Kerisonu wake naukaisa enaenari yanu emeakanu wake naukenewaa uawe.  
\v 23 Yesu Keriso Dawama i sosiro Danu wake naukaisa orou yawokakune enaenari emeakama awekabo yawokaisa. I sosiro Godinu wake naukaisa orou emuae Yesu Kerisonu ofe ari ibake Dawae emenu ma wirokeka mi.  
\v 24 I sosiro Godinu wake naukeibaisa orouma Yesu Kerisonu wake yaisina naukaisa. Ibake ya awekabo yama yanu emeakanu wake naukenewaa ukeibiawe.   
\p
\v 25 Yesu Kerisoma i sosiro Godinu wake naukeibisa oroubake imukari urieke emuabake korosiro feari enaenari ya emeaka yama yanu onaroubake imukari ukaisa i ari yanu awekabobake imukari uyakawe.  
\v 26 Yesu Keriso Danu ararae Danu wake naukaisa orou Godibairo we mune odifiaro irauaiai gienabu ibifisane ibake fearike Danu wakeini aduama babadaido ukekaini emuabairo marieba i wake nauisa iini i babadaido uisa ima emenu merama ukeka uroi.  
\v 27 Enoba Danu ararae Danu wake naukeka orou yaisina irauaiai mufisane Dawa arara me inowere bou biobio bobo fakoa umane ibeka. Inu ubiye meramawere ukeka. Danu ararae Danu wake naukaisa orou yaisina Dawabairo irauaiai ibifisane ibake Danu wake emuabairo marieke emua babadaido urie.  
\v 28 Enoba emeakama emenu ofe imukenewaa ukaisa enaenari emenu awekabobake imukari ufiakane weakune. Ainama danu aweka imukenewaa ufekuie danu onami enaenari imukari ufeku.  
\v 29 Emema emenu ofe koko ake dafeisa. I ari eno me. Emuae emenu ofe yawokenewaa ukaada uruna isaisaro ima emenu ofe omukakune i ari enoe Yesu Kerisoma Danu wake naukaisa orou yawokakune enaenari emua emenu ofe mane yawokaisa.  
\v 30 Iyae Danu ofero eraerabusa ari enoba Dawama iya yawokakuni.  
\v 31 Godinu bukaroma eno weaku, enoba moi mima danu amae babae medifekuke danu awekabairo ane dabamifekuie awekaini emeini emuae demui ari sifisisia Godinu bukaroma eno weaku.  
\v 32 I wakeye meo me baro nono nae danu ubi eno imukakune, Yesu Kerisoini Danu orouini emuae demui orou ariya eno imukakune.  
\v 33 Nono moi wake wemaro ya nauawe, ya emeaka yama yanu onarou imukaisa enaenari yanu awekabobake imukari uawero ya awekaboini iini yanu emeakanu wake yaisina naukenewaa ukeibiawe.   
\c 6  
\s1 Amae babaeini amarakunu wake  
\p
\v 1 Amarakuini aruarumaini yanu amae babaenu wake yaisina naukenewaa uawe. Yae Yesu Keriso imukaisaya eno mane irauaiai uawe.  
\v 2-3 Yanu amae babae iifa uyakawe, Godinu bukaroma eno weaku. Ie Godinu dawako we bou ukeka darawadu. Godima i we bou ukekabakeye eno weaku, yama eno uke yanu amae babaenu wake naukenewaa ufoisaie yewa dooro oya keuwere me ibeifoisaya Godima eno weaku.   
\p
\v 4 Nono ya babaemuku yama yanu amara aruma imunao naunao ukeroma dino ukeka ubu da uke yayakaweke nono Godinu wake nauke imuke ukaisa orounu ukeka sinekama we ma iwoka uyakawe.   
\s1 Waiya ukeka orouini eme ereka oroubake wei wake  
\p
\v 5 Ya waiya ukeka orou, yae Yesu Kerisonu wake naukaisa enaenari yanu eme ereka oroubake ia sinaada emenu wake yaisina nauaweke enaenari uawe.  
\v 6 Yanu dai eme ereka orouma ya yawoke ibaada ereibekaro emua efisane bunawere uke gagao da uaweke yanu waiya ufoisaie ukenewaa uawero yae Yesu Kerisonu waiya ukeka orouba ibake ie Godinu arara.  
\v 7 Yae moi orounu waiya ukaadae rooro bobo gienabu uawe. Yae yanu ukaisa i waiyae emebairo mane uke dakaisake iyanu Dai Waria Mibairo ukaisaya ibai imukada rooro bobo gienabu uawe.  
\v 8 Ibai imuke eawe. Iyanu Dai Waria Mi Dawae i waiya ukaisa orouini i me enaisa orouini emenu irau waiyabake emua yaisina emenu moko Dawama mafiaku.   
\p
\v 9 Nono ya eme ereka dai orou, yama yanu waiya ukeka oroubake enaenari irauaiai mane uke yayakawe. Emuabairo wake arawere da yayakawe. Imuke eawe, emenu eme ereka Dai Mini iyanu eme ereka Dai Mini emuae imusu mero demui Mi. Dawama ureroma yawokada eme yaisina demuiro emenu moko makakune.   
\s1 Godinu wake naukaisa oroue meremere orou ari enoya wei wake  
\p
\v 10 Nanu dubuena kai wake wemaro ya nauawe. Iyanu Dai Waria Mibairo ibeibiaweke Danu buna muaweke bunawere ukeibiawe.  
\v 11 Yama Seidaninu uke irukeka yaisinaini urafone ibake Godinu biraini kefadaini goreini i uraneka eraerabusa yaisina mufone ibake yewa wake yabairo weakune.  
\v 12 Iyae i erakuneki orouini urane dakaisi. Iyae i ere dakakuneki i meramawere yawokaku seidanini danu meramawere waiya ukaada dumuro ibaisa orouini merama wasai imumuini uranaisi.  
\v 13 Enoya Godinu uraneka eraerabusa awoena muawe. I meramawere wai ure aareiafekuie i Godini wasai ukaku mini urafoke dawa ma berefoke irauaiai gienabu enare ara ufone ibake weakune.   
\p
\v 14-16 Ibake yanu uraneka eraerabusa i ari eno me furo ere mune bou uawe. I ba imukeka ie yanu gabagauna ari yanu abagoro uwane odiawe. I irauaiai ukeka ie yanu oro odeka ari eno muaweke baruawe. Godinu irau wakeye yanu umu barukeka ari muaweke baruawe. Yanu Godinu wake naukeka ie yanu bira ari enoya yabaewe. I uraneka eraerabusa waufoisaie seidaninu meramawere inaaro barai yaraku wari ari sianaku ibai i birama dadau ufoisa.  
\v 17 Godinu wirokeka muaweke ie yanu buruduwere mogoiso ariya ima baruawe. Godinu Imumu Irau Dawama Godinu wake yabairo makakune. I wakeye yanu dai bau ariya muawe.  
\v 18 Eno ukaadae Godibairo guriguri ukeibiawe. Godibairo guriguri ufoisaie Godima ya unu kofiakua Godibairo aine wai ure guriguri ukeibiawe. Godinu Imumu Irauma Danu imukeka yabairo mafiaro Godibairo guriguri uawe. Guriguri da mediaweke uyaweke i Godinu wake naukaisa orou yaisinabake Godibairo guriguri uawe.  
\v 19 Nanu ararae Godima nabairo buna mafariro nama i merama ukekabake ia da iyamake Danu irau wake fe ibekanu ubi yaisina ma boroo yamane ibake weakune. Enoya nabake Godibairo guriguri uawe.  
\v 20 Godima na Danu afasoro mi we mune odikarake na we odaikararo aneke Danu irau wake weibisara ibake awoenae na ana ebaro odinekaro ibine. Na arara me ia iyareka. Nanu ararae Godinu irau wake weeka enoba nabake Godibairo guriguri ufone ibake yabairo weakune.   
\s1 Dubuena kai arie wei wake  
\p
\v 21 Yanu naiye, Disikasi, dawama iyanu Dai Waria Minu waiya ukenewaa ukeibaku. Dawae yabairo aafekuke nanu wake yaisina dawama wefekuro naufoisa.  
\v 22 Eno naufoisake nanu ukakune sinakune ibai yaisina iwoka ufoisa. Nanu ararae yama naini nanu orounu ukeka sineka iwoka uforo dawama yanu imuka ma buna ufiane ibake dawa we odaimauro yabairo aafeku.   
\p
\v 23 Iyanu Babae Godini iyanu Dai Waria Mi Yesu Kerisoini emuama ya unu kofisisiro irauaiai ibaada i Godinu wake naukaisa orou yaisinabake imukari ufiakake yanu imuka yaisina Godibairo odifone ibake weakune.  
\v 24 Aina ainama Yesu Kerisobake aine wai ure imukari ukenewaa ukeifeisaie nanu ararae Godima emua irauaiai unu kofiane ibake weakune. Nanu wake idua me sininu.