\id ACT  - Aneme Wake NT [aby] -Papua New Guinea 1988 (DBL -2013) 
\h Afasoro 
\toc1 AFASORO OROUNU UKEKA 
\toc2 Afasoro 
\toc3 Afa 
\mt1 AFASORO OROUNU UKEKA  
\c 1  
\s1 I Diafarasibairo arie wei wake  
\p
\v 1-2 Nanu naiye Diafarasi, abairo Yesuma we ma iwoka ukekaini Yesu Danu ukeibike Danu we mune odirie afasoro oroubake Godinu Imumu Iraunu bunaro riba wake weibiro Godima Dawa we muniro urero amuke ani. Danu ukeibi ibai yaisina owaowa ueke abake make odaie.  
\v 3-4 Yesuma fearike nono uyarike Danu onaminu iboo naisa Danu orou emuabairo baua uiro eka. Emuama Dawa eka ibake Dawa fearikema nono uyare ibinua weisa. Dawa Danu we mune odirie oroubairo manabe kai demui odo deni (10) i odo yaisina fodi (40), emuaini demuiro ibaada Godinu yawokaku orofabake emuabairo weada eno wei, Derusaremu goiro ibeibiaweke imusu da aniawe wei. Eno weike emuabake nono wei, ewaro yawoawe weike Godinu we bou ui wake adinaro wero nauisa enaenari ufekua wei.  
\v 5 Dioni adinaro aduama babadaido ukeibi i ari enoe dubuena kai odo yafa me, me sifekuie ya yaisinabairo Godinu Imumu Irauma yabairo isare aafekuie Godi Danu Imumu Irauma ya yaisina babadaido ufekua Yesuma eno wei.   
\s1 Yesu urero amuke ani wake  
\p
\v 6 I ku siane ibisa orouma Yesubairo we nauke eraada eno weisa, Dai Waria Mi, awoena iya Isaraera orou iyanu imusu buna mamisiro nono iyanu imusu yawofeisiba me eno we nauke eka.  
\v 7-8 Eno we nauke ekaro Dawama eno wei, Godi Danu mane ewekaini dumuini i wai yaisina odiba i buna mafiaku odo ya dawa iwoka meroma nono Godinu Imumu Irauma yabairo isafekuba buna ufoisake Nanu fo weeka orou sifoisake Derusaremu goini Diudiaini Samariaini nono i orofa akaka yaisinabairo Nanu wake we eneiareifoisaya eno wei.  
\v 9 Eno weiro nauisake ereibisabaie Yesu urero amuke ani. Amuke aniro ouma Yesu dadau uiro Dawa ere dauisa.  
\v 10-11 Yesuma amuke aneibiro i orou enare ibaada ereibisabaie inanakeo wau ruki miyai me ari uke baua ukike i orou emenu ibooro enare ibaada eno weisi, ya Gareri orou, anemebake enare ibaada urero eraisa weisike weisi, mediawe, Yesu yeka amuke anakuro eraisa enaenari nono dubuenaro owefekuke ureroma fafekuro efoisaya aneru una raarama eno weisi.   
\s1 Diudiasinu waiya ukeibi orofa moi mi we mune oisa wake  
\p
\v 12-14 I Derusaremu goiye Oriwa oraara udiro nono i daabae yafa me, funaku. Nono i Oriwa oraararoma Derusaremu goiro aare fakake emenu uwara ubarenaro amuisa. Amuisake Fidaini Dionini Deimisini Enuduruini Firifuini Domasini Badoromiaini Madiuini Arofiesinu amara Deimisini Keinani orofa mi Saimonini Deimisinu amara Diudiasini moi awekaboini Yesunu amae Merini Danu naburakaini guriguri ukaada ibisa.   
\p
\v 15-16 I odoro Fidama uyarike i Godinu wake naukada ku siane ibisa eme keuwere wani aderedi duenidi (120) eme emuabake eno wei, adara, Godinu bukaroma Diudiasima Yesu aya mafine wei wake enaenari ui. I Godinu Imumu Irauma Diudiasinu orofa muneka wake Deiwidinu imukaro mairo Deiwidima eno wei. I ari i mima Yesu aya maike i orou Yesu mufisane waure fariero i orouma Yesu muka.  
\v 17-19 Enoba dawaini iyaini demuiro ibaada Yesunu waiya ukaada i Diudiasi danu aya makeka oima make doo munike iro anike danu imusu ubiri yanai. Ubiri yanaike boana dorobu yariro desini dura feko fariro Derusaremu goi orou yaisina i wake nauisake iwoka sika ibake i doo danu ibi Ekedama weisa. I wakenu ubiye iwa dooro isaria weisa.  
\v 20 Fidama eno weike nono wei, Godinu Samusi bukaro Diudiasibake i wake eno ibinu,  
\li1 Danu uwara moi mima da mufekuro me ibifekuke merama sifeku  
\m weia eno ibinu. Nono Godinu Samusi bukaro yewa wake eno ibinu, moi mima danu waiya ukeka ooru mufeku eno ibinua wei.  
\v 21-22 Yewa wakeye Samusi bukaro ibinua weike nono wei, enoba Dionima Yesu babadaido ui i furoma ane fare ukeebe urero amuke aneibi odoro ereibi mi we mufeisiro fafekuke Yesunu fearike uyarada ui wake fo weeka mi sifekua eno wei.  
\v 23-25 Fidama eno wei ibake eme una raarayai emenu ibi fefa kakayairo owaowa yanake mauwa ubarenaro oisa. Moi minu ibiye Diosefu danu moi ibiye Basabasi, nono danu moi ibiye Diasidasi i owaowa mukake mauwa ubarenaro oisake nono moi mi danu ibiye Madayasi danu fefa kakaro owaowa yanake mauaro oisake guriguri uisake eno weisa, O Dai Waria Mi, Ae eme yaisinanu imukeka yaisina iwoka ukaku ibake abo mima Diudiasinu medi orofa mufeku weisa?  
\v 26 Eno weisake ere dauisake moi ibi mukake ekabaie Madayasinu ibi muka. Eno uisa ibake Madayasima moi afasoro duweronu (12) orofa munike moi afasoro mi sini.   
\c 2  
\s1 Imumu Iraunu fari wake  
\p
\v 1 Yesu fearike nono uyarike urero amuke aniro odo fifidi (50) me siniro i Fenidikosi weaisa odo idua fari. Fariro i orou demui uwara ubarenaro yaure ibisa.  
\v 2-3 Yaure ibisaro ureroma oyau bibinu yama ari sabu isare aarike i uwara wake farike inaa giginamu ari ui. Eno uike emenu ofero yaure fare anisa.  
\v 4 Eno uiro Godinu Imumu Irauma isare aarike i orou yaisina emenu imuka ubarenaro isare wake faraada iwoka daiwere mariero wake imusu imusu weisa.   
\p
\v 5-6 I odoro Derusaremu goiro Godinu wake naukebisa Du orou keuwere yaure ibisa. Moi orofa akakaroma fakake yaure ibeebe i oyau bibinu yama ari nauisake i uwararo anisake emenu imusu imusu wakeroma weibisaro nauke karana uisake imuka foria daiwere uisa.  
\v 7 Eno uisake we imukada eno weisa, i wake imusu imusu weisa oroue Gareri oroua eno we imuisa.  
\v 8 Eno imuisake weisa, aneaneme iyanu ba wake weaisaro naukaisi weisa?   
\p
\v 9-11 I oroue orofa akaka imusu imusuroma Derusaremu goiro faka. I oroorofanu ibi ibiye ewado ibinisa Fadiaini Midini Iramaidini Mesofadeimaini Dudiaini Kafadosiaini Fonidusini Eisiaini Furigiaini Famufiriaini Idifini Ribia Sairinabaini Romanini iroma i ba Du orouini moiroma aare ibaada guriguri ukeibisa Du orouini Kuridini Areibia orofa orouini Derusaremu goiro fakake naukada Godinu buna ukeka iyanu ba wakeroma weaisaro naukaisia eno weisa.  
\v 12 Eno weisake imuka foria uisake we imukada moi orouma eno weisa, yewa anemedei ubu weisa?  
\v 13 Eno weisaro moi orouma moibai we irukake eno weisa, emua awoena waini adua isisake ibake eno gogore wake weaisaya eno weisa.   
\s1 Fidama wei wake  
\p
\v 14 I orouma eno weisa ibake Fidaini i Yesunu iwoka ukeka orou ireweni (11) uyakake Fidama daiwereroma eno wei, nanu Du orouini Derusaremu goiro yaure ibinisa eme yaisina nanu wake naukenewaa uawe wei.  
\v 15 Eno weike nono wei, Yewa orou awoena waini iseroma gogore ukeroma wake imusu imusu we meya wei. Eno weike wei, eweira yewa wai urinuke eweka amuke aare abanaro farinuro iya awoena waini ise meya wei.  
\v 16-17 I Godinu adinaro we bou ukeka mi Doerama eno wei, Godima eno weakua wei,  
\li1 dubuenaro Nanu Imumu Irau we odaimauro eme yaisinabairo isafeku ibake yanu aruarumaini yanu adarabaini emuama wake we bou ufeisaya wei. Eno ufeisaro yanu awoena amarananakuma kubekube efeisaro nono yanu akaemukuma kubekube ma ubifeisaya eno wei.  
\v 18 Kubekube efeisaro Nanu Imumu Irau we odaimauro Nanu waiya ukeka orou yaisinabairo isafeku wei. Isafekuro emuama Godinu wake we bou ufeisaya wei.  
\v 19-20 Eno ufeisaro urero buna ukeka umauke dooro buna ukeka umauke iwaini inaaini inaa iroini eno umauro eweka edoro mero dumu mane sifekua wei. Eno ufekuke manabe edoro iwa gi sifekuro nono i Dai Waria Minu fareka dai odo edorowere idua fafekua wei.  
\v 21 Aina ainama i Dai Waria Mibake iya ma wiroa wefeisaie ma wirofiakua,  
\m Godima eno weakua Doerama wei.   
\p
\v 22-23 Fidama i oroubake eno weike nono wei, ya Isaraera orou nanu wake nauawe wei. Eno weike wei, Yesu Nasaredi goi Mibake weakunea wei. I Mi Godima we mune odairo ya yaisina Danu kawama ukekaini Danu buna ukekaini Danu eme ma wirokeka bunaini yaisina ya ereibisaya eno wei. Godima Yesubairo buna makeibiro yabake i ukeka yaisina Yesuma ukeibibai ya eraada iwoka sikaya weike nono wei, Godima i buna makeibiro ibake eno ukeibia wei. Godima Yesu korosiro ikokoma ure odifisane ibake weike Dawa yabairo mariero yama Danu ukeibi sineibi ibaibake ararua ukaada wake goro weada Dawa korosiro ure odiawe eno areare weibisa ibake imusu merama orouma Yesu korosiro ikokoma ure dabame oisaro fearia eno wei.  
\v 24 Feariro Godima Dawa ma uyarike fearekanu buna mune imusu odiba i fearekama Dawa yabakibe daui ibake nono uyaria wei.  
\v 25-26 Deiwidima Yesunu wake eno we bou ukaada eno wei,  
\li1 Nama ereibakunero Godi nabairo ibene ibene ibeibakuke Nanu baena wana enaro ibeibaku ibake imuka ubarenaro ia da iyamauke nanu imukama rooro ueke nanu bebekuma rooro ukeka wake weimauke yewa dooro irauaiai ibeimauke i fearekabake ia da simaua,  
\m Deiwidima Yesunu wake eno wei.  
\v 27 Eno weike nono wei,  
\li1 Nanu imumu eme odeka ooru orofaro da medifekuro Anu iifa Amaranu ofe da yaufeku ibake yewa orofaro ibeimauie ia da simaua wei.  
\v 28 Ama i me ibene ibene ibeka munekanu daaba Nabairo ma boroo yarike ama Nabairo ibeibaku ibake rooro umaua,  
\m Deiwidima adinaro Yesunu wake eno weiro Fidama i wake eno wei.   
\p
\v 29 Fidama eno weike nono wei, nanu naiyemuku, i wakenu ubi ma boroo yamane weakunea wei. Iyanu adinaro dai mi, Deiwidi, feariro ooru uisaro danu ooru yewa dooro ibinua wei.  
\v 30 Deiwidiye Godinu we bou ukeka mi. Godima wake daiwereroma we bou ukaada Deiwidibake weiro Deiwidi dawa i wake nauike eno we imui, Godima Deiwidi danu moi sisia sirorari mi mufekuke dai yawokeka minu orofaro odifekuro yaufekua eno we imui.  
\v 31 Dawa ibai iwoka uike i Kerisonu uyareka odo imui ibake weike eno wei,  
\li1 Danu Imumu feareka orofaro mede dauiro Danu ofe yaure dauia,  
\m Deiwidima eno weia wei.  
\v 32 Fidama eno weike nono wei, Yesu feariro nono Godima Dawa ma uyariro iya yaisina Dawa eki.  
\v 33 Godi Danu bunama Yesu Danu ba ena wanaro odike Yesu ma dai ukaada eno wei, Imumu Irau abake mamauanea wei. Enaenari mairo muni ibake bunawere erekaini ukekaini yaisina Dawabairoma aarakuro ibai awoena eraisia eno wei.  
\v 34-35 Fidama eno weike nono wei, Deiwidima urero ane me i furo ibaada Yesubake wake eno wei,  
\li1 I Godima Nanu Dai Waria Mibake eno wei, Nanu ba ena wana enaro yauaro Aini wasai ukaisa orou buna umake mumiake Anu umu wowonaro odimia Godima weia,  
\m Deiwidima eno wei.   
\p
\v 36 Fidama eno weike nono wei, Isaraera orou, yewa yama korosiro ikokoma ure dabame oisa Mi, Godima Dawa i Dai Waria Mike i Keriso we mune odiba ibake imufone weakunea wei.  
\v 37 Eno weiro nauisake emenu imukaro imukenewaa uisake eno weisa, aneaneme ufeisi weisa?  
\v 38 Eno weisaro Fidama wei, yanu sara merama ukekaini imukeka imuke mediaweke Yesu Kerisonu ibiro babadaido uawero Yesu Kerisoma yanu merama merama ukeka yaisina mufike imuke medifike Godinu Imumu Irau we odaifekuro yabairo isare aafekuro mufoisaya wei.  
\v 39 Fidama eno weike nono wei, i we bou ukeka yaini yanu amarananakuini imusu orouini yanu Dai Waria Godima ya yaisinabake u wefeku ibake eno we bou uia Fidama eno wei.   
\p
\v 40 Eno areare weebe we iifa ukaada eno wei, yanu Du orounu merama ukeka mediaweke ma wiroawero Godima ya fanisi da mafia wei.  
\v 41 Fida danu wake nauisa i orou keuwere diri dausini (3000) babadaido uisake Godinu wake naukeka oroubairo ane dakaa uisa.  
\v 42 Eno uisake aine wai ure ku ukeibisake i afasoro orounu wake naukeibisake emenu awaawa demuiro ukeibisake uruna demuiro ma birabira yare isaada eno we imukeibisa, Godima Yesu iyabake we odairo isare aarike dooro fari ibake rooro ukaisia eno we imukeibisake guriguri ukeibisa.   
\s1 Godinu wake naukeka orounu ibeka wake  
\p
\v 43 Godima Danu afasoro orou buna mariero buna ukeibisaro moi orou ibai ereibisake i orou yaisina ia iyareibisa.  
\v 44-45 Godi imukeibisa orou daaba demui orou yaisina ma demuiro uisake i naukeka orou yaisina demuiro sikake emenu eraerabusa yaisina make oi mukake eraerabusa me oroubairo marieka.  
\v 46-47 Eno uisake emenu imukeka demui ibake dai sosi uwara ubarenaro amukeibisake guriguri ukeibisake uwara imusu imusuro uruna naka naka uke ma birabira yare iseibisake eme yaisinabairo irauaiai mane ukeibisaro i orou yaisina emenu wake eno weisa, i afasoro oroue irauaiaiya weisa. Godima i moi orou ma wirokada i afasoro oroubairo odeibiriero emuaini demuiro ibeibisa.   
\c 3  
\s1 Umu daba mami mi ma wiroisi wake  
\p
\v 1 Moi odoro dumudumu guriguri eweka muniro Fidaini Dionini emuama dai sosi uwararo anisi.  
\v 2 Aneebe moi mi danu amaema dawa dori arima danu umu daba mamiro moi orouma waure aneibisake dai sosi i irauaiai aisame udiro odeibisaro yaure ibaada eme fare dai sosi uwara ubarenaro iyareianeibisaro oi eenu weibi.  
\v 3-4 Eno weibiro Fidaini Dionini emuama dai sosi uwararo aneebe ekibaie i mi idua yaure ibaada eenu weibi ibake Fidama eno wei, Dionini uwa ea wei.  
\v 5-6 Fidama eno weiro i mi oi mafisine weaisia imuike wana sianada erenewaa uiro Fidama wei, na oi meba da mamauanea wei. Eno weike nono wei, anemerabu nabairo ibinu ima a mamauanea wei. Fidama eno weike i minu wanaro mamike ma uyarada eno wei, Yesu Keriso Nasaredi goi Minu ibiroma weakunea uyake ania wei.  
\v 7-8 Eno weiro i minu umu fafaini umuaini eno gienabu sinike uyare enariro Fidaini Dionini demuiro ane dai sosi uwara ubarenaro amuisake i mima bibi uraada Godibairo we ma irauaiai ui.  
\v 9-10 Eno ukeibiro i yaure ibisa orouma ekake i mi aisame udiro yaure ibaada oi eenu weaku miya weisake iwoka ukaada danu umu irau sini ibaibake imuka foria daiwere uisa.   
\s1 Fidama i dai sosiro Godinu wake weibi  
\p
\v 11 I mima Fidaini Dioninu wanaro mamiro i dai sosiwere moi ena barunae Soromoninu sebo ibi i ena barunaro anisaro i orou yaisina sabu emuabairo durame ane faka.  
\v 12 Ane fakaro Fidama eno wei, ya Isaraera orou anemebake imuka foria ukaada naisama erenewaa ukaisa wei? Eno weike nono wei, i minu umu uwanu bunaini irauaiai ukekaini ima ma giena ukisu eno we imukaisa wei?  
\v 13 Eno weike nono wei, Eibaramuini Aisikini Deikafuini emenu Godi, iyanu babaemukunu Godima Danu waiya ukeka Mi Yesu we ma daiwere ukaku ibake ma giena ukinua wei. I irau iifa Mi Faeradibairo waure ane oisake wayai weisaro Faeradima me we odaifine ui.  
\v 14-15 Eno uiro ya arara me Dawa me we odaiseka. Ibake moi ma feareka mi me we odaifine eenu weisake nono i me irauaiai ibaada eme ma wirokeka Mi ma feakaro Godima Dawa nono ma uyariro iya yaisina eki.  
\v 16 Eno weike nono wei, Yesunu iifa ibima yewa minu umu ma giena ukinua eno weike wei, i Danu ibiro imukisu ibake yewa mi irauaiai ukinuro i yewa mi eraada iwoka sinaisaya weike ba weakunea wei. Yesu Keriso imukisu ibake yewa mi irauaiai wirokinuro i buna eraisaya wei.   
\p
\v 17-18 Eno weike Fidama nono wei, na iwoka sinakunea wei. Yaini yanu dai orouini adinaro yanu ukeibisa ibai ya iwoka me ibake eno uisaro Godima Yesunu oferi waufeku ibai Danu we bou ukeibirie oroubairo wei enaenari uia wei.  
\v 19-20 Eno ui ibake yanu sara merama ukekaini merama imuka imukekaini imuke medifoisake Godibairo owefoisaie yanu merama ukekaini imukeka yaisina maisufekuro me sifekuro Godima yabairo ibaada yanu ko yareka odo keuwere yabairo odaiseifekuro fareifekua wei. I Keriso, Godinu we munike yabairo mai Mi, Yesu, yabairo we odaifekua wei.  
\v 21 Enoba awoenae Dawa urero ibinuba nono dubuenaro orofa akaka eraerabusaini eme ma wirokeka odo fafekuro nono isare aafekua wei. Adinaro Godima Danu we bou urie oroubairo i odobake weia Fidama eno wei.  
\v 22-23 Nono Fidama eno wei, Mosesima eno weia wei, Godima iyabairoma moi we bou ukeka Mi na ari mufekuro Danu wake aneaneme wefekuro naufoisaya Mosesima eno weia Fidama wei. Mosesima eno weia wei, aina mima Danu wake da naufekuie i wake da naufeku mi ma feafekua Mosesima eno weia wei.  
\v 24 Godinu we bou ukeka orou yaisina Samuerobairoma yewa wake enaenari weibisaya Fidama eno wei.  
\v 25-26 Ya yaisinae Godinu we bou ukeka orounu amaraku. Ibake yae Godinu we bou ukekaro naukeka orou. Godima Eibaramubairo we bou uiro yanu babaemuku naukeibisaro nono awoena iya yaisina naukaisia wei. Godima Eibaramubairo eno wei, anu amarananakubairoma Yesu fafekuba i orofa akaka eme yaisina we ma irauaiai umiau Godima eno weia Fidama wei. Godi Danu waiya ukeka Mi Yesu feariro nono Godima Dawa ma uyarike yabairoko we odaike yanu merama merama ukeibisabairoma ya yaisina ma owefike we ma irauaiai ufine ibake we odaia Fidama eno wei.   
\c 4  
\s1 Fidaini Dioni i kanisoro orounu ibooro enare ibisi wake  
\p
\v 1 Fidaini Dionini emuama i ku uke ibisa oroubake Yesu fearike uyari wake weibisiro i Du orounu ofereni ode sibore sianeka orouini dai sosi uwara furisi kafudenini Sadusi sisa orouini emuama anisake i miyaibairo ane faka.  
\v 2-3 I afasoro miyaima Yesu fearike uyari enaenari i eme yaisina feare nono uyareifeisaya eno we ma iwoka ukeibisi ibake i dai orouma dino uisake dumu ma girisi yareibiro Fidaini Dionibairo ane fakake emua yabaisake emenu wanayai mukake ane derena enaro naama uwane odiriekake ana ebaro waure ane odirieka.  
\v 4 Eme keuwere Yesunu uyareka wake nauisake Yesu imuisaro nono moi orouma imuisakema nono emenu imuka yaisina Yesubairo ode dauisa. Eno uisaro Yesunu wake nauisa orou mane Danu wake mune imukaro oisa. Eno uisake Godinu wake nauisake emenu imuka yaisina Godibairo oisa emeye yaisina fai dausini (5,000) keuwere eno uisa.   
\p
\v 5-6 Nono wai uriro i Du dai orouini goi yawokeka orouini Mosesinu darawadu we ma iwoka ukeibisa orouini emua yaisina Derusaremu goiro ane faka. Ane fakake i dai ofereni ode sibore sianeka mi Enasini danu dai orou Kaiyafasini Dionini Arekisanaini danu moi goi orouini emuabairo Derusaremu goiro ane faka.  
\v 7 Ane fakaro moi orouma i afasoro orouini i umu giena ui mini i ku uke ibisa orou emenu ku ubarenaro waure aare odirieka. Waure aare odiriekaro i kanisoro orouma eno weisa, iyanu ibooro enaewe weisake Fidaini Dioni emuabake nono weisa, yewa minu umu aneaneme ma giena ukisi eno weisa.  
\v 8-9 Ainanu bunaro o ainanu ibiro eno ukisi weisa? Eno weisaro Godinu Imumu Irauma Fidanu imuka ubarenaro wake fari ibake Fidama uyare eno wei, yewa orouini dai orouini goi yawokeka orouini ya nanu wake nauawe weike eno wei, i minu umu giena ui ibaibake we nauke eraisa wei?  
\v 10 I mi danu umu giena ui ena danu ubi wemauro ya kanisoro orouini Du orouini yaisina nauaweke iwoka siawe wei. Yesu Keriso Nasaredi Minu bunama i minu umu ma wirokinuro yanu ibooro irauaiai enare ibinuro eraisaya wei. I Yesu yama korosiro ikokoma ure dabame oisa. Korosiro ure dabame oisaro feariro Godima Dawa nono ma uyaria wei.  
\v 11 Godinu bukaroma Dawabake weaku wakeye eno,  
\li1 I uwara ma enareka orounu mune sianeka kukubu kai ie i bokai kukubu kai ari sinia,  
\m Godinu bukaroma eno weakua wei.  
\v 12 Dawama iya ma wiromisia wei. Yewa dooro orofa akaka emema iya da ma wiromisaisaya wei. Godi Dawa mane Yesu Danu ibi daiwere mami ibake Danu ibima iya ma wiromisia Fidama eno wei.   
\p
\v 13-15 Fidaini Dionini emua i oroubake ia sine dauisike emua adinaro sikuru uke dauisibairoma nono Godinu bunaro wake daiwere weisi. Eno weisiro i kanisoro orouma ibai imuisake emenu imuka foria daiwere ukaada we imuisake eno weisa, i miyai Yesuini demuiro eneiareibisi ibake i umu merama mi ma wirokisiro emuaini enare ibinua weisake ekake ibake moko wake we da uisakema nono weisa, ya una buuba ya i uwara udiro amuawe weisaro amuisa.  
\v 16 Eno weisaro amuisaro i kanisoro orou emenu mane eno weisa, i oroubake aneaneme ufeisi weisa? Eno weisake nono weisa, i Derusaremu orou emenu buna ukeka yaisina iwoka sinaisaya weisa.  
\v 17-18 Ibake i minu umu ma wiroke dakisa da wefeisia weisa. Eno weisake nono weisa, moi orouma i ukisa ibai naunao ufeisaba Yesunu ibiro da weforo wefeisike we iifa ufiakikia weisa. Eno weisake aarawe weisaro emuabairo ane fakaro eno weisa, Yesunu ibiro moi buna ukekaini weekaini eno da uforo weisa.   
\p
\v 19-20 Eno weisaro Fidaini Dionini emuama uyare eno weisi, Godinu wakema irauaiai o yanu wakema irauaiai ainanu wakema naufuku weawero naufu weisi. Eno weisike nono weisi, uwanu naukekaini erekama wefukua weisi.  
\v 21 Eno weisiro i kanisoro orouma i miyaibake bunawereroma we iifa urieka. Eno weisaro nono Derusaremu goi orou emua ibai ereibisa ibake Godibairo we ma irauaiai ukeibisa.  
\v 22 I umu giena ui miye awoena mi mero danu oyae fodi (40). Enoba i kanisoro orouma bunawereroma we iifa uriekake fanisi make dariekake me odairiekaro anisa.   
\s1 I Godinu wake naueka orou buna mufisane ibake guriguri uisa wake  
\p
\v 23 Fidaini Dionini emuama i kanisoro orou meisike emenu naiyemukubairo sabu anisike i dai kanisoro orouini goi yawokeka orouini emenu weisa wake yaisina ane weisi.  
\v 24 Ibai yaisina ane weisiro i orou yaisina naukada Godibairo guriguri uisake eno weisa, iyanu Babae Godi, Ama yewa orofa akakaini ureini dawaraini ana omaini idina madina urunaini erawa naukawa yaisina ubu ui.  
\v 25 Ama weiro Anu Imumu Irauma Anu waiya ukeka mi Deiwidi iyanu sisia sirorari mibairo wei ibake Deiwidima eno wei,  
\li1 i imusu orou anemebake imuka ka ukaisa wei? I Isaraera orou yaisina anemebake me sara imukaisa?  
\v 26 I kini orou yaisina emenu imusu uke bou ukeibisaro i yawokeka orou yaisina Godini Danu we mune odi Mini emuabairo urafisane enakaya,  
\m Deiwidima eno wei.  
\v 27 I orouma guriguri ukaada weisake eno weisa, Erodini Fonidiasi Faeradini imusu orouini Isaraera orouini emuama i Derusaremu goiro irau Yesu Keriso Anu we mune odi Mini urafisane faka.  
\v 28 I uisabai yaisina Ama adinaro eno ufisane wei ibake enaenari uisa.  
\v 29 I afasoro orouma eno weisake nono weisa, Babae Godi, awoenae i kanisoro orounu uraneka wake nauake iya Anu waiya ukeka orou unu koaro Anu wake bunawere wefene weaisia weisake guriguri uisa.  
\v 30 Eno weisake nono weisa, Anu buna wana siaake eme ma wiroake Anu merama merama uke dakaku Irau Mi Yesunu ibiro buna ukeka ua weisa.  
\v 31 Godibairo guriguri ukaada wake eno we me sikaro emenu yaure ibisa orofa amani amani uiro Godinu Imumu Irau emenu imuka ubarenaro isari ibake Godinu wake bunawere weada ia sine dauisa.   
\s1 I orou emenu eraerabusa ma demuiro uisa wake  
\p
\v 32 Godinu wake naukeka orou emuae demui imuka imukeka orou. Ibake i orou yaisina emenu waiyaini eraerabusa yaisina omi ukeroma iyanua weroma omi uke dakeibisake i eraerabusa yaisina ma fiake naka naka ukeibisa.  
\v 33 Enoba i afasoro orouma Yesunu fearike nono uyaribai i wake bunawere weibisaro Godima emua daiwere we ma irauaiai ukeibirie.  
\v 34-35 I furo moi mima desini ure daui. I afasoro orou yaisina irauaiai ibeibisa. Eno ukaada i waiyaini i dooro ibi uwara bobo orou emenu waiyaini uwaraini mariekake i oi mukake afasoro oroubairo mariekaro i afasoro orouma i oi mukake i oi me oroubairo naka naka uke marieka.   
\p
\v 36 Moi Riwai goi mi danu ibiye Diosefu danu orofae Saifurasi, i afasoro orouma i mibake Banabasi weibisa, i ibinu ubiye we ma nabi ukeka mi.  
\v 37 I mima enaenari danu waiyaini doo yaisina make oi munike i afasoro oroubairo marie.   
\c 5  
\s1 Ananaiasini danu aweka Safairaini emenu wake  
\p
\v 1-2 Moi minu ibiye Ananaiasi nono danu awekanu ibiye Safaira, i mima danu doo make oi munike moi oi danu uwararo fe odike moi oi i afasoro oroubairo waure ane marie. I minu aweka danu emenu ui ibai yaisina dawa iwoka sini.  
\v 3 Ananaiasima moi oi danu uwararo fe odike moibai mane waure fariro Fidama eno wei, Ananaiasi, seidaninu abairo mai imuka anemebake muninuke Godinu Imumu Irau we irukaku wei? Eno weike nono wei, anu doo marieke muni oi moibai fe odinuke moibai mane makaku ibake Godinu ibooro Danu Imumu Irau we irukakua wei.  
\v 4 Eno weike Fidama nono wei, adinaro i dooe anua wei. Nono awoena oi muninuke i oi yaisina anua wei. Nono anemebake merama imukeka imukama imukaku wei? Eno weike nono wei, emebairo iruke meya ae Godibairo we irukakua wei.  
\v 5 Fidama eno weiro Ananaiasima ibai nauike iduama biruke isarada idua feariro ibai ekake Godinu wake naukeka orou ia daiwere sika.   
\p
\v 6 Ananaiasi eno uke feariro moi awoena orouma aare fakake Ananaiasinu ofe bou mukake wauma oba uisake waure anisake ooru uisa.  
\v 7 Ananaiasi eno uike feariro eweka amuke abanaro fariro nono danu aweka Safaira dawae danu eme uibai nauke da uike aare Fidabairo fari.  
\v 8-9 Aare fariro Fidama eno wei, yewa oiye anu doo marieke muni oi yaisina iduaya wei? Eno weike nono wei, moibai mero yewa mane wei? Wearo nauma wei. Eno weiro Safairama ma owerike eno wei, euwa weike, yewa maneya wei. Weiro Fidama nono wei, anemebake Godinu Imumu Irau we iruke efane weaku wei? Eno weike nono wei, anu eme ooru uke oisa orou idua aisamero faraisaba a waufeisaya wei.  
\v 10 Eno weiro i aweka iduama biruke ane isarike feari. Nono Ananaiasi ooru uke oisa orou owere farada ekabaie Ananaiasinu aweka idua feari ibake nono danu ofe bou mune waukake danu eme ooru uke oisa iro waure ane ooru uke oisa.  
\v 11 Eno uisaro Godinu wake naukeka orouini me orouini i uisabai ere nauke uisake ia daiwere sirie.   
\s1 I afasoro orou emenu bunawere ukeka imusu imusu uisa wake  
\p
\v 12 I afasoro orouma eme keuwerebairo Godinu buna ukekaini kawama ukeka ukeibisa. Eno ukeibisaro Godinu wake naukeka orou yaisina moi dai sosi uwara seboro danu ibiye Soromoninu sebo, iro fare ku ukeibisa.  
\v 13 Moi imusu orou i afasoro oroubairo Godinu irau oroua eno we imukeibisake ia sineibisa ibake emuabairo fare yaure dakeibisa.  
\v 14 Emua eno ukeibisaro nono moi Godinu wake naukada imukeibisa emeakaini awekaboini i Godinu wake naukeka oroubairo ane boboro dakaa ukeibisa.  
\v 15 I afasoro orou aine wai ure eno mane ukeibisa ibake i orou emenu arama uke ibeibisa orou weama yaweke odeibiriekaro daaba udiro yaure ibeibisa. Eno uke waure ane odeibiriekaro Fidama i daaba daabaro eneiareibiro danu ewekaro eraisa imumuma emua riu sianeifiro wirofisane ibake emenu arama uke ibeibisa orou waure ane daaba udiro odeibirieka.  
\v 16 I Derusaremu goi udi udiro eme emenu arama uke ibeibisa orouini waure fariekaro seidaninu merama imumu bobo orouini arama uke ibeibisa orouini emua yaisina wirokeibisa.   
\s1 I afasoro oroubake merama uke yareibirieka wake  
\p
\v 17-18 I dai ofereni ode sibore sianeka mini danu naiyemukuini i Sadusi sisa orouini emuama i afasoro oroubake imuka ka ukaada emuabake aya odeka wake weisake i afasoro orou yabariekake waure ane ana ebaro odirieka.  
\v 19 Waure ane ana ebaro odiriekaro dumuro Godinu aneruma anike emua ibisa ana ebaro aisame ma eba uike i afasoro orou aweawero waure fare odirie.  
\v 20 Waure fare odirieke eno wei, dai sosi uwara ubarenaro enafoke Yesunu fearike nono uyarike awoena me ibinu wake weforo wei.  
\v 21 I aneruma eno weiro i afasoro orou naukenewaa uisa. Eno uisake ibisaro wai uriro anisake i dai sosi uwara ubarenaro amuisake Yesunu fearike uyari wake we ma iwoka ukeibirieka. I odoro i dai ofereni ode sibore sianeka mini danu naiyemukuini emuama i kanisoro orouini Isaraera orounu goi yawokeka orouini dai midini ufisane wake we odaisa. Wake we odaisake moi orou i ana ebaro afasoro orou mufiakane we odairiekaro emuabairo anisa.  
\v 22-23 Aneebe ane fakake ekabaie emua iro me. Emua iro meba ibake owekake aare fakake eno weisa, i ana ebaro aisame yaisina koure ibinuro yawokeka orouma yawokenewaa ukaisaro farisike ubarenaro amukisike erisibaie emua iro meya eno weisa.  
\v 24-25 Eno weisaro nauisake aboro anisa arie eno we imukeibisabaie moi mima farike i emuabake wake wefine ukaada eno wei, i ana ebaro odirieka oroue i dai sosi uwara ubarenaro enare ibaada we ma iwoka ukaisaya eno wei.  
\v 26-27 Eno wei ibake furisi kafudenini moi furisimani orouini anisake Isaraera orouma emua omama umanao ufiakaisaba ibake ia sikake i afasoro orou muriekake owainanaku wauriekake ane fare i kanisoro orounu ibooro enaewe weisaro enaka.  
\v 28-30 I kanisoro orounu ibooro enakaro i dai ofereni ode sibore sianeka mima eno wei, Yesu Kerisonu ibiro da wefone we iifa uisi ibai ya nauisaba me wei. Yanu ukeka eawe wei. Derusaremu goi orou yaisina yanu wake naukaisaya wei. Eno weike nono wei, yama eno weisa, iyama Yesu ma feakiaya weisa weiro i afasoro orou nauisake emuama eno weisa, Godinu imukeka mane mufeisia weisa. Eno weisake nono weisa, emenu imukeka da mufeisia weisa. Eno weisake nono weisa, yama Yesu korosiro ikokoma ukaro fearia eno weisa.  
\v 31 Nono iyanu Babaemukunu Godima Dawa feariro nono ma uyarike Danu ba ena wana enaro odike Yesu iyanu Dai Mike ma wirokeka Miya we odia weisa. Eno weisake nono weisa, i Isaraera orou emenu merama merama ukeka yaisina imuke medifeisaie emenu merama merama ukeka yaisina mufekuke imuke medifeku ibake Godima eno we odi.  
\v 32 I ukeka yaisina iya eraisi. Nono Godima Danu Imumu Irau Danu wake naukeka oroubairo mariea weisa. Eno weisake nono weisa, Godinu Imumu Irauini iyaini i ukeka yaisina eraisia eno weisa.   
\p
\v 33 I kanisoro orouma i wake nauisake ararua siriero i afasoro orou ufeisia weisa.  
\v 34-35 Eno weisaro moi kanisoro mi danu ibiye Gameiria, dawae Du orounu dai darawadu yawokeka sisa mi. Nono i orou yaisina dawa irau miya eno we imukeibisa. I mima uyarike i afasoro orou i uwara udiro anifisane weiro anisaro dawama eno wei, ya Isaraera orou, i oroubake aneme aneme ufone ukaada erenewaa uforo wei.  
\v 36 Gameiriama eno weike nono wei, adinaro moi mi danu ibiye Deudasi dawama enarike na dai mi weiro eme keuwere fo aderedi (400) dawabairo ane dakaa uisaya eno wei. Enoro Deudasi ma feaka ibake danu umuro eneiareibisa orou yaisina daaba imusu imusu anisaya wei.  
\v 37 Eno weike wei, nono dubuenaro moi Gareri mi danu ibiye Diudiasi, i ibi ibi fefaro muneibisa furo moi dai mi enariro moi orouma dawabairo dakaa uisa. Eno uisaro dawa feariro nono danu umuro eneiareibisa orou yaisina daaba imusu imusu anisaya wei.  
\v 38 Ibake yewa afasoro orou medifone weakunea wei. Eno weike nono wei, emenu ukekae emenu ukeka ari eno mane ufeisaie emenu ukeka isafekua wei.  
\v 39-40 Eno weike wei, nono emenu ukekae Godinu ukeka ibake da mune siafoisaya wei. Nono emua meo weaisaya wefoisake mune siafoisaie Godini uranao ukeifoisa ibake weakunea eno wei. Eno wei ibake i kanisoro orouma danu wei wake nauisake i afasoro orou u weisaro emuabairo ane fakaro usima uriekake nono Yesu Kerisonu ibiro da we ma iwoka uforo we iifa ukaada odairiekaro i afasoro orou owere anisa.  
\v 41 Eno uisaro i dai midini idua meisake owere anisa. I afasoro oroue Yesu Kerisonu orou ibake moi orouma emua meramawere uke yareibirieka. Eno ukeibisaro Godima wake we dauike i afasoro oroubake irauaiaiya we imui ibake i afasoro orouma maru uke dauisake rooro uisa.  
\v 42 Aine wai ure i afasoro orou i dai sosi uwara ubarenaro o moi orounu uwara ubarenaro Yesu Kerisonu irauaiai wake we eneiareibisa.   
\c 6  
\s1 I afasoro orou unu koreka orou seweni (7) we mune odirieka wake  
\p
\v 1 Dubuenaro i iwoka ukeka orou keuwere uyareibisake i Guriki wake weibisa Du orouini ba Du farafa orouini wake we makaneibisa. Eno ukeebe i Guriki wake weibisa Du orouma eno weisa, iyanu wabu awekabobake urunaini oini daiwere make dakakunekaya eno weisa ibake wake we makaneibisa.  
\v 2-3 Eno uisaro ibake i duwero (12) afasoro orouma i Godinu wake naukeka orou yaisina weisaro faka. Fakaro i afasoro orouma eno weisa, Godinu wake da wefeisike urunaini oini i mane naka ufeisiie irauaiai meba i Godinu Imumu Irau bobo awara bunawere orou seweni (7) we muyakawero i naka naka ukeka waiya mafiaki eno weisa.  
\v 4 Eno weisake weisa, nono iyae iyanu mane guriguri ukeifeisike Godinu wake mane weifeisia eno weisa.  
\v 5 Eno weisaro emenu wake nauisake Godinu wake naukeka Imumu Irau bobo mi Sidiwinini moi orou Firifuini Fokorasini Naikeini Daimonini Famunesini nono Nikarosini danu orofa Anidiyoka, i Mi dawa Du mi ari sini, i orounu wake weisaro nauisake waure ane afasoro oroubairo odirieka.  
\v 6 Ane odiriekaro i afasoro orouma guriguri ukaada emenu wana emenu iiri duboro oisa.  
\v 7 Eno uisake Godinu wake we eneiareibisaro moi orou keuwere i wake naukeibisake Godinu wake naukeka orou sineibisa. Emua mane mero nono i Du orounu sosiro ofereni ode sibore sianeka orou keuwere Godinu wake naukeka orou sineibisa.   
\s1 Sidiwini yabaisake uka wake  
\p
\v 8 Godima Sidiwini we ma irauaiai uike buna daiwere mai ibake Sidiwinima buna ukekaini kawama ukekaini keuwere ukeibiro eme keuwere ibai ereibisa.  
\v 9 Moi du orounu sosiro guriguri ukeibisa orouma iyae iyanu onarou yawokeka oroua eno weisa. I orouini moi Sairina orouini moi Arekisania orouini moi Sirisia orouini moi Eisia orouini i oroorofa orou yaisina uyakake Sidiwinini wake we maka.  
\v 10 Eno uisaro danu iwoka daiwereke nono dawae Godinu Imumunu bunaroma wei ibake meisa.  
\v 11 Meisake anisake moi meomao weeka orou we muriekaro i meomao weeka orouma eno weisa, Sidiwinima Mosesini Godini emuabake wake merama weakua eno weisa.  
\v 12 Eno weisa ibake i ku siane ibisa orouma nauisake Sidiwinibake ararua daiwere uyaka. Eno uisake i dai Du orouma Sidiwini yabaisake wanayai mune ane derena enaro naama uwakake i kanisoro oroubairo waure ane oisa.  
\v 13 Waure ane oisaro i meomao weeka orouma eno weisa, yeka mima eno weia eno meo weisa, dawama i dai sosini Mosesinu darawadubake merama wake weakua eno weisa.  
\v 14 Eno weisake nono weisa, yeka mima eno weia weisa, Yesu Keriso Nasaredi Mima i dai sosi ma merama ufike Mosesinu darawadu mune siafekua eno weiro nauisia weisa.  
\v 15 Eno weisaro i kanisoro orou yaisina Sidiwininu iboo naisa ekabaie edoro daiwere uiro eka. I ekaie anerunu iboo naisa ari eno uiro eka.   
\c 7  
\s1 Sidiwinima wei wake  
\p
\v 1 I dai ofereni ode sibore sianeka mima eno wei, emenu weaisa wayai wake meoba ba weaisa wei?  
\v 2 Eno weiro Sidiwinima moko wake ma owerike eno wei, babaemukuini naburaka, nanu wake nauawe wei, iyanu sisia sirorari mi, Eibaramu, danu ibeibi orofa Mesofadeimia orofaro ibeibike iroma Erani goiro ane daui. Iro me ibeibiro iyanu Babae Godi, Dawae iyanu dai Godi ibake Dawama Eibaramubairo aare fari.  
\v 3 Aare farike eno wei, anu goi orouini yewa orofaini mediake moi orofaro ania wei. I awoena orofa abake ma iwoka umane ukakunea iro ania wei.  
\v 4 Eno weiba ibake i Karidia orofa medike i orofaro idua ani. Medike ane Erani goiro fari. Iro ane farike iro ibeebe danu babae i Erani goiro feari. Danu babae feariro Godima Eibaramu yewa Isaraera orofa iyanu ibinisi orofaro waure fare odi.  
\v 5 Yewa orofa doo ma iwoka uike eno wei, yewa orofa akaka yaisina aini anu amara aruma mamauane eno we bou uikema nono i odoro i doo Eibaramubairo make daui. Make dauiro i we bou ui odoro Eibaramu dawa amara aruma me.  
\v 6 Ibake Godima moi wake Eibaramubake eno wei, anu amara aruma yewa orofa medifeisake moi orofaro anifeisaya wei. Iro oya keuwere fo aderedi (400) ibeifeisaro imusu emema emua arawere yawokeifiakaisaya eno wei.  
\v 7 I imusu orounu yawokekae ba me ibake emua wemauro emenu ibeka merama sifekua wei. Godima eno weike nono wei, eno wemauro anu orou owefeisake yewa orofaro fare ibaada Nabake aine wai ure guriguri ukeifeisaya Godima eno wei.  
\v 8 Godima danu we bou ukeka Eibaramubairo mai. I we bou ukekanu ubue ofe kuureka. Eibaramuma Aisiki dore muniro i amaranaku odo keuwere me eida (8) me siniro danu ofe kuuri. Aisiki dai sinike danu aweka Rebeka munike nono Deikafu dori. Deikafu dai sinike danu awekayai Riaini Reisoro murieke iyanu sisia orou yaisina duwero (12) dorie.   
\p
\v 9 Deikafuma i sisia orou duwero (12) dore odiriero iyanu sisia sirorari orouma Diosefuini dino uisake Idifi oroubairo maisake oi mukaro Diosefu Idifi orofaro waure anisaro waiya ukeka mi sini.  
\v 10 Diosefu Idifiro waure anisaro Godima Diosefu yawokeibiro ani. Anike Idifi orofaro fariro Godima Diosefu unu kori ibake merama uke daui. Eno uike Godima Diosefu buna mairo Kini Fero, dawa dai Idifi orofa yawokeka mi dawama Diosefu dawa irau mi eno we imuike we mune danu uwara yawokeka mi we mune odi.  
\v 11 Eno uke ibeebe moi furo Keinani orofa orou arumu daiwere yaukake iyanu babaemuku desini daiwere urie.  
\v 12 Uruna me siniro arumu yaukake ibeebe uruna Idifi orofaro ibinua weisaro Deikafu i wake nauike danu amaraku iro we odairiero uruna ane mukake nono owere aaka.  
\v 13 Nono ena uruna me siniro nono we odairiero anisa. Ane fakaro Diosefuma danu kakamuku we ma iwoka urieke nae yanu nabueya weiro danu kakamukuini nabueini emuama Fero fou uka.  
\v 14 Diosefu fou ukaro Diosefuma weiro danu babaeini danu goi orou yaisina Idifi orofaro erakure farieka. Eme keuwere yaisina sewenidi fai (75) erakure farieka.  
\v 15 Erakure fariekaro Deikafu Idifi orofaro anike iro ibeebe feari. Dawaini iyanu akaemukuini emua yaisina feare me sika.  
\v 16 Feare me sikaro waure ane Sikamu orofa oma eraboro ooru urieka. I ooru ukeka orofae Eibaramuma Eimo weibisa mi danu amarakubairo oima makaada i oma erabo muni.   
\p
\v 17 Godima Eibaramubairo Isaraera orofa mamauanea eno we bou ui. Godinu we bou ui odo idua fafine ukinuro iyanu sisia sirorari orouma amarananaku keuwere doreibiereka ibake eme keuwere Idifi orofaro ibeibisaya eno wei.  
\v 18 Nono dubuenaro moi kini mima uyarike Diosefu feariro danu ibi dawa iwoka me ibake iyanu oroubake meramawere ukeibi.  
\v 19 Eno ukeibike emenu awoena doreibisa amarananaku yaisina ma feafiane weibi ibake emenu awoena doreibiereka amarananaku yaisina nauwaro sianeibisaro iro feareibisa.  
\v 20 I amarananaku nauwaro sianeibisa i furo Mosesi danu amaema Mosesi doriro Godima eribaie irauaiai amaranaku eri. Ibake Mosesinu amae babaema manabe kai buuba dawa yawokebe nono iro meisi.  
\v 21 Iro meisiro Feronu arumama i amaranaku munike omuiro danu amara ari sini.  
\v 22 Eno uiro Mosesi daisinike Idifi orounu sikururo sikuru ukeebe iwoka daiwere muni ibake danu weekaini ukeka daiwere ui.   
\p
\v 23 Mosesima Feronu uwararo ibeebe oya fodi (40) me siniro nono moi odoro dawa iduama uyarike danu Isaraera adara efiane ani.  
\v 24 Aneebe daabaro eribaie moi Idifi orofa mima moi Isaraera mi usima ureibi. Ureibiro ibake Mosesima i Idifi mi uriro feari.  
\v 25 Eno uike Mosesima eno we imui, nanu orou na iwoka sinaisa Godima na we odaisinuro nanu Idifi orofaroma nanu orou waure animiane fare eno we imuiroma nono danu orou i we imui ibai emua iwoka uke dauisa ibake Mosesi danu onami we irui.  
\v 26 We iruike ainike wai uriro danu goi oroubairo nono ani. Aneebe eribaie moi Isaraera miyai emenu emenu uraneibisi. Uraneibisiro Mosesima eneebe erike eno wei, mediawa. Ya demui orofa miyai ya anemebake uranaisi wei?  
\v 27-28 Eno weiro moi uraneibi mima eno wei, a ainadei? Aina mima a dai mi we odiai wei? Eno weike nono wei, ariena ama i Idifi mi uriro feari wei. Eno weike wei, na awoena enaenari ufarine weaku wei?  
\v 29 Eno weiro Mosesi iduama ia sinike Idifi orofa medike moi orofaro sabu ani. Ane Midiani orofaro ane fari. Ane farike iro ibeebe aweka munike danu amarayai dorie.   
\p
\v 30-32 Mosesima iro ibeebe oya fodi (40) me siniro moi odoro Sainai weaisa oraara udiro amuke ani. Aneebe eribaie moi ananakuro inaa yareibi. inaa yareibiro i inaa yareibi ubarenaro eribaie aneruma enare ibiro erike eno we imui, yewa anemerabu we imuike durame anike faribaie Godima dawabake eno wei, Nae anu sisia sirorari orounu Godi weike nono wei, Eibaramuini Aisikini Deikafuini emenu Godiye Na ewadoya ea wei. Eno weiro Mosesi ia daiwere sinike iro ere daui.  
\v 33 Eno uiro Godima wei, anu umu fogowo ma kukua wei, eno weike nono wei, yewa dooe iifawere ibake weakunea wei.  
\v 34 Godima eno weike ba nono wei, i Idifi orounu yawokekae arawere ibake Nanu orounu ibekae meramawereya eno wei. Godima eno weike nono wei, i Isaraera orou emenu ibekaini ii weekaini naue ibake iroma waure animiaua wei. Ibake Idifiro a we odaimauro anifakuke emua waure anifiakua Godima Mosesibairo eno weia Sidiwinima yewa wake eno wei.   
\p
\v 35 Naiyemuku, adinaro iyanu akaemukuma Mosesi arara dauisake emuama eno weisa, ainama a dai mi we odiai eno weisa? Godima Mosesi we odairo ani. Aniro i inaa ubarenaro enare ibi aneruma dawa unu kori ibake Mosesi dawae emenu waure aarie mi nono dawae emenu dai mi sini.  
\v 36 Mosesima i danu eneiareibi oroorofaro i buna ukeka keuwere ukeibike danu Isaraera orou Idifiroma kokoi dawara ubarenaro waure fare anirie. I eme ibe me orofaro ane fakake iro eneiareibisa. Eno ukeebe oya fodi (40) eno areare ukeibisa.  
\v 37 Mosesima danu oroubake eno wei, Godima na we odi i ari moi we bou ukeka mi Godima iyabairo we mufekuke odifekua wei.  
\v 38 Mosesini danu orou emua eme ibe me orofaro ane ibeibisa. Iro ibaada Mosesima wake weeka waiya ukeibi. Moi odoro Mosesima Sainai oraararo amuke aniro aneru unama dawabairo wake wei. Wake weiro i Sainai oraararo i me ibene ibene ibeka wake munike iyanu akaemukubairo isare aare weiro nauisake iroma ewa ewa we aaraisaro naukaisia Sidiwinima eno wei.   
\p
\v 39 Sidiwinima danu Du oroubake nono eno wei, iyanu akaemukuma Mosesinu wake nauke dauisake i mi we ma berakake emenu mane eno we imuisa, iyanu Idifiro aineibisi irauaiaibairo nono yewa orofa meramawereya eno we imuisa.  
\v 40 Eno weisake nono uyakake Eronibake eno weisa, iyanu godi imusu ubu uaro i godima iya waure animisi weisa. Eno weisake nono weisa, iya waure aari mi Mosesi aboro ainu weisa?  
\v 41 Eno weisake gorudima moi boromakaunaku ubu uisake i boromakaubake ofereni maisa. Eno uisake emenu ubu uisa meo godibake rooro daiwere uisa.  
\v 42 Eno uisa ibake Godima i orou yawoke darieke mediriero i orouma muinaini kudibake guriguri ukeibisa. Emua eno ukeibisa ibake Godima we bou urie orounu bukaro Godima eno wei,  
\li1 ya eme ibe me orofaro oya fodi, (40) ibeibisa furo ofereni Nabairo odeibisaba me?  
\v 43 Nabairo ofereni ode meya wei, i ba me godibake imukeibisa weike nono wei, i ba me godi danu ibiye Moroki danu ibeka farai uwaranakuini moi meo godi danu ibiye Refani danu muinaini waureibisake yanu wanama ubu ukeka eraerabusabake imukeibisake guriguri ukeibisaya wei. Eno ukeibisa ibake Godima eno wei, ya yaisina Babaronia orofaro yafawere we odaimiauro anifoisaya eno wei.  
\m I we bou urie orounu bukaro Godima eno weia Sidiwinima wei.  
\v 44 Sidiwinima eno weike iyanu akaemukunu faraima uisa dai sosi Godibairo guriguri ukeibisa uwara eme ibe me orofaro waure eneiareibisaya eno wei. Eno weike nono wei, Godima Mosesibairo weiro i faraima dai sosi uwara enaenari ma enaka.  
\v 45 Godima weiro enaenari ma enakake dubuenaro emenu Keinani orofaro aareka furo Godima eme keuwere Keinani oroorofaro yoweriero ibake fiake iroma ia iyare anisaro iyanu akaemukuma i orofa muka. I furo Diosuaini iyanu akaemukuini emuama i faraima uisa dai sosi uwara waure anisa. Waure anisake Diosua idua feariro i faraima ma enaka dai sosi uwara oya keuwere ibeibiro nono Deiwidi danu odo ido faria Sidiwinima yewa wake eno wei.  
\v 46 Deiwidinu odo idua fariro Godima Deiwidi erike irau miya we imui ibake Deiwidi danu ararae iyanu akae Deikafu danu Godinu dai ba sosi uwara ma enafine wei.  
\v 47 Deiwidima eno weibaie Godima ama da ma enafakua eno wei. Ibake Soromonima i dai sosi uwara ma enari.  
\v 48 I urero ibinu Godi emenu ma enareka uwararo ibe dakakuie adinaro we bou ukeka mima Godinu wake eno wei,   
\li1
\v 49-50 I ureye Nanu yaureka orofaro nono i dooe Nanu umu amukeka orofaya eno wei. Eno ibake anemedei uwara Nabake ma enafoisa? Nanu wanama i yaisina ubu ue ibake anemedei irauaiai uwara ma enafoisaro iro ko yamau Godima eno weakua,  
\m I we bou ukeka mima eno wei.   
\p
\v 51 Sidiwinima eno weike nono wei, ya ome boboba ba me orouro nauke nauke dakaisake Godi imuke dakaisake yae i imusu orou ari ibake Godinu Imumu Iraunu daaba dadau ukaisaya eno wei. Sidiwinima eno weike ba nono wei, yanu babaemukuma eno ukeibisa ibake ena furo enaenari ukaisaya wei.  
\v 52 Eno weike nono wei, ya yanu babaemukuma Godinu we bou ukeibi orou yaisinaini urane rarane ukeibisake i Yesu Kerisonu owere fafekua weibisa orou uriekaro feakaya eno wei. Eno weike nono wei, i fafekua weisa Mi Godinu Irau Mi, yama eno uke wayai weisake ukaro fearia wei.  
\v 53 Sidiwinima eno weike wei, i aneruma Mosesibake i darawadu mairo muni. Muniro i darawadu dawabairoma yabairo aarebe aarebe awoena aare fari. I darawadue Godinu darawadua wei. Eno weike nono wei, i darawadu nono yama ma merama ukeibaisaya Sidiwinima yewa wake eno wei.   
\s1 Sidiwini omama uka wake  
\p
\v 54 Sidiwinima eno weiro i Isaraera orou yawokeibisa dai orouma dino daiwere uisake araruama ii saisa sirie.  
\v 55-56 Eno uisaro Godinu Imumu Irau we odairo Sidiwininu imuka ubarenaro isari ibake Sidiwinima urero eribaie ure eba siniro Yesu Godinu baena wana enaro ibiro erike eno wei, yeku ure eba ukinuro Yesu Godinu baena wana enaro enare ibinuro erakunea wei.  
\v 57-58 Sidiwinima eno weiro i orou emenu ome ma yaakake daiwere beo we mamisake Sidiwini goi naisaroma ma youre me nauwaro mune siakake omama uka. Sidiwini ufisane ukaada emenu dubo barukeka wau kukune moi awoena mi danu ibiye Soro dawama yawokeifine maisake Sidiwini omama idua uka.  
\v 59-60 Eno ukeibisabaie Sidiwini Godibairo guriguri ui. Sidiwinima guriguri ukaada eno wei, Babae Godi, nanu imumu mua weike ifoma kodudu yanaike nono wei, Babae Godi, emenu i ukaisa meramawere emenu onaroubairo da odiake mune imuke media wei. Eno weike idua feari.   
\c 8  
\s1 Soroma Yesunu wake naukeibisa orou ure yanake ukeibirie wake  
\p
\v 1-2 Soro danu ararae Sidiwini ureka. Ibake i orouma Sidiwini ukaro moi Isaraera Godinu wake naukeka orou aare fakake ii weada Sidiwininu ofe bou mune ane ooru uisa. Sidiwini danu feari odoroma moi orouma Derusaremu goiro Godinu wake naukeibisa orou ba me merama uke yareibirieka. Eno ukeibirieka ibake i Godinu wake naukeibisa orou fiake imusu imusu anisa. Diudiaini Samaria orofayairo anisa. Anisaro i afasoro orou mane Derusaremu goiro ibeibisa.  
\v 3 Soroma Godinu wake naukeibisa orounu goi goiro anike Godinu wake naukeibisa orou emenu wana mune ane derena enaro naama uwane anike emeini awekaboini yaisina eno urieke waure ane ana eboro odirie.   
\s1 Godinu wake i Samaria goiro anisake weisa  
\p
\v 4 I fiake imusu imusu anisa orouma moi goi goiro Godinu wake we eneiareibisa.  
\v 5-6 Firifuma moi Samaria orofa goiro isare ani. Isare anike Yesu Kerisonu wake i oroubairo weada Yesunu ibiro buna daiwere uiro i orou yaisina danu wake naukenewaa uisa.  
\v 7-8 Firifuma eno weiro seidaninu moi merama imumu emenu imuka ubarenaroma amukada arua daiwere weada ia sine fare imusu anisa. Firifuma eno uike moi umu wana beobeo bobo orouini moi enare fare me orouini emua ma wirokeibiriero ibake i goi orou ibaibake rooro daiwere uisa.   
\p
\v 9 Nono moi mi danu ibiye Saimoni dawae diwari ureka mi. Enoba dawae i Samaria orofa goiro ibeibi. I goiro ibaada dawama eno wei, nae dai miya eno weibi.  
\v 10-11 Eno weibi ibake i orou yaisina emenu imukekae ba dawa dai miya eno we imukeibisa. Saimonima diwari ureibike danu buna ukeka ukeibi ibake dawa dai miya eno weibisa.  
\v 12 Saimoni dawae dai miya weisake ekabaie Firifuma Godinu yawokekaini Yesu Kerisonu ibiro wake bunawereroma weibi. Eno weibiro i goi orouma nauisake Yesu imukake Firifubairo emeini awekaboini emua babadaido urieka.  
\v 13 Eno uriekaro Saimonima nauike Firifubairo ane fariro Firifuma dawa babadaido ui. Firifuma Saimoni babadaido uiro demuiro enarada Saimonima Firifunu buna ukeibi ibai yaisina ereibi ibake imuka foria daiwere ui.   
\p
\v 14-16 I Samaria orou Godinu wake naukaisaya moi orouma eno weisaro i Derusaremu goiro ibisa afasoro orouma nauisa. Nauisake ibake Fidaini Dionini emua we odairiekaro Samaria orofaro isare anisi. Isare ane fakike i oroubake Godibairo guriguri ukaada eno weisi, Babae Godi, Anu Imumu Irau we odaiaro yewa oroubairo isafi weisi.  
\v 17 Eno weisike Fidaini Dionini emenu wanama i Samaria orou emenu iiri duboro odaada Godibairo guriguri uisiro Godima Danu Imumu Irau we odairo emenu imuka ubarenaro isari.   
\p
\v 18-19 Saimonima eribaie i afasoro orouma emenu wana i Samaria orounu iiri duboro odeibisaro Godinu Imumu Irau emuabairo isariro ukeibisa ibai Saimonima erike Fidaini Dionibake eno wei, oi mamiaro yanu buna ukeka na makuakiro nanu wanama emenu iiri duboro odimaro Godinu Imumu Irau emuabairo isafi wei.  
\v 20-21 Eno weiro Fidama ma owerike eno wei, a aneaneme imukaku wei? Eno weike nono wei, Godinu me makeka oima make mufaku wei? A eno imukakuba aini anu oini merama sifuwaisia wei. Fidama eno weike nono wei, anu imukekae meramawereba iyabairo Godinu waiya da ufakua wei. Eno weike ba nono wei, anu imukama Godibake imuke dakakuba iyabairo Godinu waiya da ufakua eno wei.  
\v 22 Fidama eno weike nono Saimonibake eno wei, anu imukekae meramawereya Godibairo guriguri uaro anu merama merama ukeka yaisina Godima mufike imuke medifi wei.  
\v 23 Eno weike nono wei, anu ararae meramawereba merama mane ukeifakua wei.  
\v 24 Fidama eno weiro Saimonima ma owerike eno wei, na arara me nanu merama ukeka wei. Eno weike nono wei, i merama ukekabake yama nabake Godibairo guriguri uawaro na ma wirofari wei.   
\p
\v 25 Fidaini Dionini emuama Yesu imukeibisi wakeini Yesunu wakeini eno we me sikike owekike Samaria orofa udi goi goiro anisi. Anisike Godinu wake we eneebe iroma Derusaremu goiro owere ane faki.   
\s1 Firifuini moi Idiofia orofa dai mini emenu wake  
\p
\v 26 Godinu aneruma Firifubairo isare aarike eno wei, isare aniake yeka Derusaremu goiroma Geisa daabaro isare ania wei. Eno weike nono wei, yeka daabae obi isare me daaba, eno weiro nauike i daabaro ani.  
\v 27 Ane faribaie moi dai Idiofia orofa goi mi, kuini Kadasinu oi yawokeibi mi idua fari. Dawae Derusaremu dai sosiro anike guriguri uike nono owerike idua fari.  
\v 28 Danu osi abuma ma youreka seboro yaure ibaada Godinu buka ibiye Isaiya kakure aare idua fari.  
\v 29 Idua faribaie Godinu Imumu Irauma Firifubake eno wei, i mibairo ania wei.  
\v 30 Eno weiro Firifu durame ani. Ane fariro i mima Godinu buka ibiye Isaiya kakuriro nauike Firifuma eno wei, anu kakuraku i wake danu ubi imukakuba me wei?  
\v 31 Eno weiro i mima ma owerike eno wei, nanu mane kakumau ide aneaneme i wakenu ubi imumauke iwoka simau weike nono wei, moi mima na we ma iwoka ufarakuie i wakenu ubi iwoka simaua wei. Eno weike Firifubake nono wei, nabairo osi abuma ma youreka seboro amuake yaua weiro amuke yauri.  
\v 32 I mima kakuri wakenu ubiye eno,  
\li1 Emema mamoe abu ma feafisane mune anifeisaie mamoe abu arua we dakaku. O mamoenakunu idi kuuraisaie arua we dakaku enaenari emema Dawa ma feafisane mune anisaie i ari enoba Dawaini arua we daui.  
\v 33 Dawa arua we daui ibake moi mima Dawa medaia we daui. Dawa fearike urero amuke anike iro ibinu. Ibake abo mima yewa orounu merama ukeka we ma boroo yafeku,  
\m i mima i wake eno kakuri.   
\p
\v 34 Eno kakurike i Idiofia mima Firifubake eno wei, i Godinu we bou ukeka mima ainabake weaku? Danu onamibakeba moi mibake weaku?  
\v 35 Eno weibaie Firifuma i wakeroma Yesubake irau wake yaisina we ma iwoka ukeibi.  
\v 36 Eno we ma iwoka uke aneebe moi adua fou uki. Fou ukike i Idiofia orofa goi mima eno wei, na ama babadaido ufarine weakune wei. Eno weike nono wei, na babadaido ufarakuba me wei?  
\v 37 (Eno weiro Firifuma ma owerike dawabake eno wei, anu naukeka irauaiae babadaido umauanea weike nono wei, anu naukeka meramae babadaido da umauanea wei. Firifuma eno weibaie i Idiofia orofa goi mima wei, na Yesu Keriso Godinu Amara imukakunea wei.)  
\v 38 Eno weike sebo ma youreka osi abubake wake we kuuriro enariro i seboroma aduaro isaki. Isakike Firifuma Idiofia orofa goi mi babadaido ui.  
\v 39 Babadaido uiro aduaroma udiro amukeibisibaie Godinu Imumu Irauma Firifu munike sabu waure ani. Sabu waure aniro Idiofia orofa goi mi Firifu nono ere daui. Ere dauike Firifuma i mi babadaido ui ibake rooro daiwere ui.  
\v 40 Godinu Imumu Irauma Firifu waure anike Asodu goiro fare odiro Firifuma iro Godinu wake weike i Asodu goi udi udiro Godinu wake we eneebe iroma Sesaria goiro ane fari.   
\c 9  
\s1 Soro danu imuka yaisina Yesubairo mai wake  
\p
\v 1-2 Soro dino ukeibike Yesunu wake naukeibisa oroubake meramawere uke yareibirie. Eno uke yareibirieke moi odo anike i dawako dai ofereni ode sibore sianeka mibairo anike eno wei, owaowa yanake mainaro i Damasikasi goiro Du orounu sosi yawokaisa oroubairo ane mamiaro efisake emuama na unu kofokoro i Yesunu wake naukaisa orou emeini awekaboini yaisina emenu wana mune ane derena enaro naama uwamiake mune Derusaremu goiro waure famia wei. Eno weiro owaowa yanake mairo ani.   
\p
\v 3-4 Anike Damasikasi orofaro aneibibaie edoro daiwere ureroma isare aarike Soronu ofe ubu edorowere mane uiro Soro dooro isare uri. Isare uriro ureroma wake isare aarike eno wei. Soro, anemebake Na meramawere uke yarakunara wei?  
\v 5 Eno weibaie Soroma ma owerike a ainadeiro wei? Eno weibaie Nae Yesua wei. Eno weike nono wei, aine wai ure Nabake meramawere uke yarakunara wei.  
\v 6 Yesuma eno weike nono wei, awoena uyaake Damasikasi goiro aniaro anu ufaku waiya abake moi mima mamekuro ufakua wei.  
\v 7 Eno weiro Soro dawaini eneibisa danu naiyemuku i wake nauisake ba eme ere karana uke dauisake wake we dauisa.  
\v 8 Eno uisaro Soro uyarike naisa foraike efine eribaie ere karana uke dauiba ibake danu naiyemuku emuama danu wanaro mamisake Damasikasi goiro waure ane faka.  
\v 9 Iro waure ane fakake Soro odo buuba danu naisa ere karana uke mero me ibaada aduaini urunaini ise dauike me ibeiari.   
\p
\v 10 Godinu moi naukeka mi Ananaiasima Damasikasi goiro ibeibi. Iro ibeebe kubekuberoma eribaie Yesuma eno wei, Ananaiyasi, weibaie Ananaiyasima ma owerike na ewado wei.  
\v 11 Eno weiro Yesuma wei, aniake gienabu weaisa daabaro isare aniake Diudiasinu uwara ubarenaro amua wei. I Darasu goi mi Soro aboro ibinu ariya we nauke ea wei. Eno weike Soroma guriguri ukeifekuro efakua wei.  
\v 12 Yesuma eno weike nono wei, anu fareka odoe Soro dawa iwoka uke ibinua wei. Anu fareka odoe Dawaini kubekuberoma erinuba ibake dawa iwoka uke ibinuba ama fafakuke anu wanama danu iiri duboro odifakuie danu naisa idua ere karana ufekua wei.  
\v 13 Yesuma eno weiro Ananaiyasima ma owerike eno wei, Dai Waria Mi, Soro dawa na iwokaya eno wei. Eno weike wei, i miye anu Derusaremu goi orounu ibeka ma meramawere uke yareibakunea eno wei.  
\v 14 Eno weike nono wei, i dai ofereni ode sibore sianeka orouma dawa owaowa yanake maisaro munike aaria wei. Dawa yewa goiro faria wei. Eno weike nono wei, dawa owaowa bobo eme mufiake waure anifiane faria wei.  
\v 15 Eno weiro Yesuma wei, ania weike nono wei, i miye awoena Nanu waiya ukeka mi we mune odineba anifekuke imusu orou eme keuwere emenu dai yawokeka orouini Isaraera oroubairo Nanu wake we enereifeku wei.  
\v 16 Yesuma eno weike wei, dawae Nanu amara ibake emema dawabake meramawere uke yafeisaya wei. Ibai dawabairo we ma iwoka umauro naufekua wei, Yesuma eno weiro, Ananaiyasima nauike idua ani.  
\v 17 Anike i Diudiasinu uwara ubarenaro amuike danu wana Soronu iiri duboro odaada eno wei, kaka Soro, i Dai Mi Yesu, ama aareibiro daabaro fou uri Mima na we odaisinuro fanea wei. Eno weike nono wei, anu naisa ere dakeka me sifekuba Godinu Imumu Irau anu imuka ubarenaro isafine fanea wei.  
\v 18-19 Eno weiro adua abunu kekei ari i rabuma Soronu naisa dadau uke ibi ifuru idua isariro ere karana ui. Ere karana uiro dawa babadaido uisaro uruna ike buna muni.   
\s1 Soroma Damasikasi goiro Godinu wake wei  
\p
\v 20 Soroma Damasikasi goiro Godinu wake naukeibisa oroubairo ibaada Godinu wake i Du orounu sosi sosiro anike eno wei, Yesu, Dawae Godinu amaraya wei.  
\v 21 Eno weiro i wake nauisake eno weisa, yewa miye i Derusaremu goiro Godinu wake naukaisa orou emenu wana mune ane derena enaro naama uwafiake waure ane i dai ofereni ode sibore sianeka oroubairo mafiane farinua weisa.  
\v 22 Eno weisaro Soro dawa iwoka daiwere ui ibake eno wei, Yesu Dawae Keriso. I Danu ubiye Godima iya ma wiromine we mune odi Miya wei. Soroma eno wei ibake i Du orouma wake moi we dauisa.   
\p
\v 23 Soro eno uke Godinu wake we eneiareibiro odo keuwere me siniro moi Du orouma Soro ma feafisane daaba yodia uisa.  
\v 24 Eno ukeibisaro Soro dawa emenu imukeibisabai dawa iwoka ui. I Du dai orouma i uwaraini i dai oro aisameini daabaini Soro ma feafisane yawokenewaa uisake dawa koro ukeibisa.  
\v 25 Eno uisaro i Godinu wake naukeka orouma Soro dumuro mukake fokearo oisake naama uwakake dai oro duboroma ma bebekake odaisaro isarike ani.   
\s1 Soro Derusaremu goiro ani wake  
\p
\v 26 Soro iroma isarike Derusaremu goiro i Godinu wake naukeka oroubairo ibifine iro ani. Iro aniro Yesunu iwoka ukeka orouma Soro dawae Godinu wake naukeka mi meya eno weisake ia sirie.  
\v 27 Eno uisaro moi mi danu ibiye Banabasi i mima Soro munike i Godinu wake naukeka oroubairo waure anike ma iwoka ukaada eno wei, Yesuma yewa mibake Damasikasi goiro Yesunu wake bunawere weia wei.  
\v 28 Eno weike nono wei, Yesuma eno weiro Soroma i oroubairo ibaada Derusaremu goi orounu uwara uwararo amuke isare ukaada Godinu wake weibia eno wei.  
\v 29 Eno weike Soroini i Guriki wake weibisa Du orouini wake wake we makaka. We makakake Soronu iwoka ukeka daiwere ibake i Guriki orouma dawa ma feafisane daaba yodia ukeibisa.  
\v 30 I Godinu wake naukeka orouma i Guriki orounu imukeka iwoka uisake Soro mukake Sesaria goiro waure anisa. Iro waure anisake iroma Darasu goiro we odaisaro ania Banabasima eno wei.   
\p
\v 31 I furo Diudiaini Garerini Samariaini orofa buubaro ibeibisa Godinu wake naukebisa orou emua irauaiai ibeibisa. I furo eno uke irauaiai ibeibisaro emenu naukeka daiwere sini. I Godinu wake naukeka orouma Godi we ma irauaiai uisaro Godinu Imumu Irauma emua unu koreibi ibake eme keuwere Godinu wake kawama naukeibisa ibake i Godinu wake adinaroma naukeibisa oroubairo ane dakaa ukeibisa.   
\s1 Fidama Ridaini Dafa goiyairo ani wake  
\p
\v 32 Moi furo Fidama i oroorofa yaisina iro eneiareibi. Iro eneiareibike Rida goiro ibeibisa Godinu wake naukeibisa oroubairo awaawa ufiane isare aari.  
\v 33 Isare aare farike moi ani enare fare me mi eri. I miye oya eida (8) enare fare mero wearo mane aine ibeibi.  
\v 34 Fidama i mi erike eno wei, Enasi, Yesu Kerisoma a ma wiroyainua uyaake anu wea mua wei. Eno weiro idua uyari.  
\v 35 Fidama eno weiro i Ridaini Seroni mado goiro ibeibisa orouma i wiroi mi ekake emenu imuka yaisina Godibairo oisa.  
\v 36 I furo moi Godinu wake naukeibi wabu aweka danu ibiye Dabida (danu Guriki ibiye Dokasi) dawa Dafa goiro ibeibike irauaiai ukeibi. Irauaiai ukeibike i eraerabusa me oroubairo uruna naka naka ukeibi.  
\v 37 Eno ukeebe arama uike feari. Feariro i orou emenu bisara uisake danu ofe bou mukake aduama uroisake uwara dubo dei ooruro oisa. Eno uke oisake moi naukeka orouma Fidae Rida goiro ibinua weisaro nauisake eme una raarayai we odairiekaro anisi.  
\v 38 Iro aneibisa daabae yafa me funaku. Ibake Dafa goiroma Rida goiro ane fakike Fidabairo eno weisi, iyanu goiro sabu aara weisi.  
\v 39 Eno weisiro Fidaini nono kowede owekake aaka. Ane fakake moi orouini Fidaini emuama i aweka oisaro ibi ooruro amuisa. Amuisake Fidama eribaie i wabu awekaboma enare ibaada ii weada Dabidanu wau yanake yaiseka eraerabusa Fida ma iwoka uisa.  
\v 40 Fidama i orou yaisina weiro aweawero isaka. Isakaro Fidama ifoma kodudu yanaike guriguri ukaada eno wei, Dabida, uyaa wei. Uyaa weiro naisa foraike Fida erike uyare yauri.  
\v 41 Uyare yauriro Fidama nono danu wanaro mamike ma uyare enariro i Godinu wake naukeka orouini i wabu awekaboini u weike ma enariro i wabu aweka me irauaiai uyare enare ibiro eka.  
\v 42 I Dafa goi orou i uibai nauisake emenu imuka yaisina Yesubairo oisa.  
\v 43 Fidama Saimoni moi abu ofe faureka minu uwararo ibeibi. Fidama eno uike Dafa goiro odo keuwere iro ibeibi.   
\c 10  
\s1 Fidaini Koniriasini emenu wake  
\p
\v 1 Koniriasi dawae Sesaria goiro ibeibiroma nono dawae Du mi me, dawae imusu Romani goi mi. Enoba i goiro ame kafudenie dawa. Danu meremere oroue Idari weibisa orou.  
\v 2 Enoroma nono Koniriasi dawae irau mi. Dawaini danu koaini emua yaisina Godibake iifa ukaada Godibairo guriguri ukeibisa. Aine wai ure i erabusa mero me ibeibisa Du oroubake urunaini wea wau makeibiriekake Godibairo guriguri ukeibisa.   
\p
\v 3-4 Eno ukeebe moi odoro dumudumu siniro Koniriasi danu uwararo nauka aine ibe mero yaure ibaada kubekube eri. Kubekube eribaie aneruma dawabairo farike eno wei, Koniriasi. Eno weiro ia daiwere sinaada iroma eno wei, a ainadeiro wei. Eno weike nono wei, anemebake farinu wei? Koniriasima eno weiro, i aneruma ma owerike eno wei, Godima anu guriguri ukekaini irau ukeka yaisina erinuke dawa irau miya wenuke na we odainararo fanea wei.  
\v 5 Eno weike nono wei, eweira moi orou we odaiaro Dafa goiro Saimonibairo anifisa weike ba nono wei, i mi danu moi ibiye Fida, dawabairo anifisake dawa we erakure aafisa wei.  
\v 6 Fida dawae i uwara ubi mi Saimoni, abu ofe fauraku mi danu uwararo ibinua wei, i uwarae dawara udiroya weike i anerue idua ani.  
\v 7-8 Anerue idua Koniriasi medike ani. Aniro Koniriasi uyarike danu waiya ukeka miyaini danu ame moi una dawa Godinu wake naukeibi mini emua weiro fakaro i aneruma wei wake yariero nauisaro nono Dafa goiro we odairiero anisa.   
\p
\v 9 Aneebe daabaro aisa. Aisake wai uriro uyakake anisa. Aneebe eweka okoro muniro Fidama moi uwara fafada fou duboro guriguri ufine amuke ani.  
\v 10 Amuke anike guriguri ukeebe desini uriro uruna ifine wei. Desini uriro weiro uruna oukeibisabaie aine ibaada kubekuberoma eno eri.  
\v 11 Eribaie ure eba ui. Ure eba uiro eribaie wauini abanaro ooru ubu uke odiro isare aari. Isare aariro Fidama abu imusu imusu i ooruro eri.  
\v 12-13 Boroini waraini uuyeini karirini gasiraini waruini yaisina i ooruro eriro Godima eno wei, Fida, uyake i abu uyanake ia wei.  
\v 14 Eno weiro Fidama ma owerike eno wei, Babae Godi, i abue Du orounu ise dakaisa abu. I abue inoba ibake da imaua wei.  
\v 15 Eno weiro Godima wei, i abu yaisina we ma irauaiai unede nono anemebake i abue inowereya weaku weike nono weiro i ooru amuke ani.  
\v 16 I abu ibisa i wau bobo nono weiro isare aarike nono amuke ani. Dei buuba eno isare aare amuke ane eno ukeibi.   
\p
\v 17-18 Eno ukeibiro Fidama ma nuna ukaada idua yaure ibi. Yaure ibibaie i eme una buuba idua fakake eno weisa, Saimoni Fida ewado yaure ibinuba me eno weisa?  
\v 19-20 Eno weisaro Fida danu i ui ibai erike imukeibibaie Godinu Imumu Irauma dawabake eno wei, Na we odaie eme una buuba idua farisaya uyaake isare ane faaro emuaini demuiro aniawe wei.  
\v 21 Godinu Imumu Irauma eno weiro Fida idua uyarike isare ane farike eno wei, yanu yodia ukaisa mi na ewadoya anemebake farisa wei?  
\v 22 Fidama eno weiro, emuama ma owerike eno weisa, iyanu ame kafudeni Koniriasima a we waure ane fafero anu wefa wake naufine wenu ibake farisia weisa. Eno weisake nono weisa, Godinu aneruma Koniriasibairo wei ibake we odainiro abairo farisia weisa. Eno weisake nono weisa, iyanu ame kafudeni mi dawae irau miya weisake weisa, dawae aine wai ure Godibairo guriguri ukeibakua eno weisa.   
\p
\v 23 I Du moi orouma Koniriasi dawae irau miya eno we imukeibaisaya weisaro i wake Fidama nauike weiro i faka eme una buuba idua aisa. Aisake wai uriro nono owekake Koniriasibairo Fidaini demuiro owere anisa. I eme una buubaini Fidaini i Dafa goi moi orou emuaini demuiro anisa.  
\v 24 Aneebe daaba abanaro aisa. Aisake wai uriro nono uyakake anisa. Emua daabaro aneibisaro Koniriasima emua koro ukaada danu koaini danu naiyemukuini emua weiro danu uwararo faka. Emua danu uwararo fare siane ibisaro Fidaini danu we odairie orouini Dafa goi moi orou emuaini Sesaria goiro idua faka.  
\v 25 Idua fakaro Koniriasima Fidanu ibooro ibo yanaike Fidanu umu udiro ifoma kodudu yanaike bokai ukafu ui.  
\v 26 Bokai ukafu uibaie Fidama Koniriasinu wanaro mamike ma uyarada eno wei, na Godi meya eno da uake uyaa wei.  
\v 27 Eno weiro sabu uwara ubarenaro waure ane amuiro eribaie eme keuwere yaure ibisa.  
\v 28 Eme keuwere yaure ibisaro erieke Fidama eno wei, Du orouini imusu orouini demuiro awaawa ukekabaie iifa daiwere ibake eno uke dakaisia Fidama eno wei. Eno weike ba nono wei, enobairoma nono Godima ariena nabairo eno wei, awoenae iifa meya wei. Eme yaisina emua demuiya weiro naue ibake fanea wei.  
\v 29 Eno weike Fidama nono wei, anu we odairie orouma fakake nabairo weisaro naueke aanea wei. Anemebake weiro na waure aaneka wei?  
\v 30-32 Fidama eno weiro Koniriasima ma owerike eno wei, moi odo dumudumunaku nama guriguri uero aneruma isare aarike eno wei, Koniriasi, Godima anu guriguri ukekaini anu emebairo irau ukaku ibai yaisina imukaku ibake moi orou we odaiaro Saimoni Fidabairo anifisake dawa we waure abairo aafisa weia wei. Eno weike nono wei, Fidae Saimoni abu ofe faureka minu dawara udi uwararo ibinua aneruma eno weia wei.  
\v 33 Eno wei ibake nama wero a waure aanekaya eno wei. Koniriasima eno weike nono wei, awoena Godima iya erakuniro yaure ibinisi iro Godima abairo weaku wake wearo naufe Koniriasima eno wei.   
\s1 Fidama Koniriasibairo ma owereka wake eno wei  
\p
\v 34 Fidama eno wei, Godima eme yaisina iya demuiya weaku ibake na iwoka sinakunea wei. Eno weike nono wei, Godima i Du orouini imusu orouini imusu imusua eno imuke dakakuke iya yaisina demui oroua eno imukakua wei.  
\v 35 Eno weike nono wei, aina mima Godi ia sinaada Godinu ukeka ukakuie Godima i mi irau miya imukakua wei.  
\v 36 Eno weike nono wei, Godinu ararae Yesu Keriso Danu irau wake Isaraera oroubairo wefiro naufisake emenu imuka irauaiai ufiane ibake Yesu Keriso we odairo faria wei. Eno weike wei, Yesu Kerisoe eme yaisinanu Dai Waria Miya wei.  
\v 37 Eno weike ba nono Fidama eno wei, ya iwoka sinaisa Diudia ororofaro Yesunu wake iro we eneiareibi wei. Weike eno wei, Dioni babadaido mi dawa danu wake dawako enaada we eneiareibiro nono Yesue Gareri goiroma Diuda orofaro dubenaro enaada we eneiareibia wei.  
\v 38 Eno weike wei, ya iwoka wei, Godima i Nasaredi Mi Yesubairo Danu Imumu Irau mai ibake Yesu Dawa irau ukekaini weekaini ukeibike seidaninu merama imumu we berakeibiro aneibisaya eno wei. I danu ubiye Godima Dawabairo ibeibi ibake eno ukeibia wei.  
\v 39 Danu Diudia orofa goi goiro ukekaini Danu Derusaremu goiro ukeibi ibai iyanu naisama yaisina ereibisia wei. Eno weike wei, i yaisina ekiro Du orouma korosiro ikokoma ukaro fearia wei.  
\v 40 Feariro odo buuba me siniro Godima Dawa nono ma uyaria wei. Ma uyariro Yesu fearike nono uyarike moi oroubairo fari.  
\v 41 Eme yaisinabairo fare dauia wei, Godinu wake naukeibisake mune awararo odeibisi oroubairo mane fariro ekia wei. Ekike Dawaini uruna demuiro isia wei.  
\v 42-43 Eno weike nono wei, Yesuma iyabake eno wei, aniaweke eme yaisinabairo eno weawe weia wei, i fearaisa orouini feare me orouini emua yaisina Nabairo kodo ufeisa eno weawe weia wei. Nae Godinu we mune odi mi ibake i eme yaisina nama kodo umiau eno weia wei. I we bou urieka orou yaisina Yesubake eno weisa Yesu Kerisoma eme yaisinabake korosiro feariba aina ainama Yesu imukenewaa ufeisaie Godima emenu merama ukeka mufekuke imuke medifekua i we bou uisa orouma eno weisaya Fidama eno wei.   
\s1 I Du me imusu orouma Godinu Imumu Irau muka wake  
\p
\v 44 Fidama eno weibibaie Godinu Imumu Irauma i wake naukeibisa orounu imuka ubarenaro isari.  
\v 45 Isariro Fidaini i Godinu wake naukeibisa Du orouini emuama ibai ekake emenu imuka foria daiwere uisa. Godinu Imumu Irauma i Du me imusu orounu imuka ubarenaro isari ibake emenu imuka foria uisa.  
\v 46 Godinu Imumu Irauma emuabairo isari ibake emenu wake imusu imusu weisake Godi we ma irauaiai ukeibisa.  
\v 47 Eno uisaro Fidama erike eno wei, Godinu Imumu Irauma iyabairo isare aari enaenari emuabairo isarinuba emua babadaido ufene weakunea wei.  
\v 48 Eno weike weiro i orou we muriekake Yesunu ibiro babadaido urieka. Babadaido uriekaro Koniriasima we kuuriro Fidaini danu orouini emuabairo moi odo odo iro emuaini demuiro ibeibisa.   
\c 11  
\s1 Fidama danu wake Derusaremu goiro wei  
\p
\v 1 I imusu orouma Godinu wake naukaisaya weisaro i afasoro orouini Diudia orofaro Godinu wake naukeibisa orouini emuama i wake nauisa.  
\v 2-3 Fidama Derusaremu goiro owere aare fari. Aare fariro moi Du Godinu wake naukeibisa orouma dawabake dino wakeroma eno weisa, i ofe kuure me orouini anemebake awaawa ukaku weisa?  
\v 4-5 Eno weisaro Fidama ma owerike eno wei, adinaro Dafa goiro ui ibai yaisina emuabairo yaakai eno wei, adinaro Dafa goiro guriguri ueke yaure ibaada kubekuberoma erebaie wau daiwere ureroma nabairo isare aaria wei.  
\v 6-7 Isare aariro i wau ooruro boroini waraini uuyeini karirini gasiraini waruini i abu yaisina i wau ooruro ereibisarabaie ureroma wake isare aarike eno wei, Fida, uyaake i abu uake ia wei.  
\v 8-9 Eno weiro nama eno weya wei, Babae Godi, ie Du orounu ise dakaisa eraerabusaba da imaua wero ureroma wake isare aari nono weia wei, i wake eno weia wei, Na Godima i eraerabusa ma irauaiai unea i eraerabusae meramawere eno da wea weia wei.  
\v 10 Eno weiro i abu ibisa wauwere dei buuba nono nono isare amuke ane eno uia wei.  
\v 11 Eno ukeibiro eraada ibisarabaie eme una buuba Sesaria goiroma Dafa goiro na we erakufokone fakaya wei.  
\v 12 Fakaro Godinu Imumu Irauma nabake eno weia wei, i imusu oroubake da imuake i farisa orouini ania weia wei. Eno weiro yewa orou sikisini (6) naini demuiro anisia wei. Anisike i minu uwararo amuisia wei.  
\v 13 Amuisiro i mima eno weia wei, aneruma nabairo farike eno weia wei, anu moi orou wearo anifisake Dafa goiro ibinu mi Saimoni danu moi ibiye Fida we erakufisake aafisa eno weia wei.  
\v 14 Fidama aafekuke Godinu wake wefekuro naufoisake wirofoisaya weia wei.  
\v 15 I mima eno wei ibake anisike wake wemane ukeibisarabaie Godinu Imumu Irauma emuabairo isaria wei. Adinaro iyabairo isari enaenari dubuenaro emuabairo isaria wei.  
\v 16 Eno uiro Yesunu wei wake enaenari imuea wei, Yesuma adinaro eno weia wei, Dionima ba aduama babadaido ui. Nono dubuenaro iyanu Imumu Irauma babadaido ufeku eno wei ibai imuea wei.  
\v 17 Danu Imumu Irau iyabairo mai. Enaenari i imusu orouma Yesu imuisaro ibake Danu me makeka mariea wei. Eno weike nono wei, na daiwere meba Godinu me makeka daaba dadau da umaua wei.  
\v 18 Fidama eno weiro nauisake Godi we ma irauaiai ukaada eno weisa, i imusu orouma Godibairo fakaro Godima emua ma wiromirieke me ibene ibene ibeka mariea weisa. Enoba i imusu orou emenu arara Godibairo fafisane wefeisaie fafeisaya i afasoro orouma eno weisa.   
\s1 I Anidiyoka goiro Godinu wake naukeibisa orounu wake  
\p
\v 19 Sidiwini feari i furoma moi orouma uyakake i Godinu wake naukeibisa orou meramawere uke yareibirieka. Eno uke yareibirieka ibake Godinu wake naukeibisa orouma uyakake imusu oroorofaro anisa. Moi orou Fonisia orofaro anisa. Nono moi orou Saifurasi orofaro anisa. Nono moi orou Anidiyoka goiro anisa. I anisa iroe i Du orou emuabairo mane Godinu Irau wakeini Yesunu wakeini eno weibisa.  
\v 20 Eno uisaro nono moi Godinu wake naukeka orou Saifurasini Sairina weaisa orofayairoma Godinu wake i imusu oroubairo wefisaro naufisane ibake Anidiyoka goiro anisa.  
\v 21 Anidiyoka goiro anisaro Yesu Danu buna mariero Godinu irau wake weisaro eme keuwere nauisake Yesunu umuro anisa.   
\p
\v 22 I wake Derusaremu goiro ibeibisa afasoro orouini Godinu wake naukeibisa orouini emuama nauisake Banabasi we odaisaro Anidiyoka goiro ani.  
\v 23 Anike ane Anidiyoka goiro ane farike Godinu wake naukada irau ukeibisa ibai erike rooro daiwere ukaada i Du me imusu orouma Godinu wake naukeibisa i oroubake eno wei, yanu imukeka yaisina Yesubairo maeweke Yesunu umuro eneiareibiawe wei.  
\v 24 Banabasi dawae irauaiai miba Godinu Imumu Irau dawabairo ibenewaa ukeibi ibake danu naukekae daiwere. Enoba dawama weiro eme keuwere nauisake Yesunu umuro anisa.   
\p
\v 25 Banabasima Anidiyoka goi medike Darasu goiro Soro yodia ani.  
\v 26 Ane farike Soro we erakurike owere Anidiyoka goiro we waure fari. Anidiyoka goiro Godinu wake naukeibisa oroubairo oya demui ibaada eme keuwere Godinu wake we ma iwoka ukeibirieka. I furo Anidiyoka goi orou emuako i Godinu wake naukeibisa oroubake kurisidini oroua weisa.   
\p
\v 27 Enoba i furo moi Godinu we bou urie orouma Derusaremu goiroma Anidiyoka goiro anisa.  
\v 28 Anisake moi Godinu we bou ukeka mi, danu ibiye Agabasi, dawa Godinu Imumu Irau dawabairo ibenewaa ukeibiba ibake uyarike eno wei, yewa orofa akaka orou yaisina arumu daiwere yaufoisaya eno wei. (Danu wei wake i dai mi Korodiasinu yawokeibi furo arumu daiwere enaenari yauka.)  
\v 29 I wake Agabasima eno weiro i Godinu wake naukeibisa orou yaisinama eno weisa, iya yaisina oi demuiro odifeisike iyanu Diudia orofa ibaada Godinu wake naukaisa oroubairo mafiakikia weisa.  
\v 30 Eno weisake i oi Banabasini Sorobairo mariekaro emuama mukike i Diudia orofaro ibaada Godinu wake naukeibisa orounu dai yawokeka oroubairo ane marieki.   
\c 12  
\s1 Erodima meramawere yawokeibirie wake  
\p
\v 1-3 I furo i dai yawokeka mi Erodima moi Godinu wake naukeka orou meramawere uke yawokeibirie. Eno uike Dioninu kakae Deimisi warima yanairo feari. Eno uiro i Du orouma ibai ekake rooro daiwere uisa. Emua rooro daiwere uisa ibake Erodima Fida ana ebaro odifine ibake we yodia ui. (I furo i Du orou emenu Godima emua Idifiroma waure ani banau urunama iseibisa.) Ibake i odoro Erodima Fida ana ebaro odifine we yodia uke wei.  
\v 4 Erodima weiro anisake Fidanu wanayai mune ane derena enaro uwane oisake mune ane ana ebaro oisa. Oisaro Erodima weiro danu meremere orou keuwere sikisidini (16) emuama Fida yawokeibisa. Fida ana ebaro ibiro Erodima eno we imui, Godima i Isaraera orounu Idifiroma waure aareka banau uruna ise me sifeisaro Fida i Du orounu ibooro waure ane odimauke ma feamaua eno we imui. Erodima eno we imukada ibiro Fida ana ebaro ibi.  
\v 5 Fida ana ebaro ibi ibake Godinu wake naukeibisa orouma moi uwara ubarenaro fare ku siane ibaada Fidabake Godibairo guriguri ukeibisa.   
\s1 Fidama ana ebaroma fare me nauwaro ani wake  
\p
\v 6 Erodima Fida wairo ana ebaroma mune ma feamaua eno we imui. I odo dumuro Fida senima umu wana uwane karisaro Fidama meremere miyai eka ena ewa ena emenu ubarero aine ibi.  
\v 7 Nono moi meremere miyai emua aisame udiro enare ibaada yawokeibisi. Eno uke oisaro aine ibiro Godinu aneruma i ana eba uwara ubarenaro faribaie edoro daiwere ui. Aneruma farike Fidanu manamaro fare urike wanaro munike ma uyarada uyaa wei. Eno weiro seni danu me woromike isari.  
\v 8 Isariro aneruma eno wei, anu umu ofe odiake anu wau yua wei. Eno weiro enaenari uiro aneruma nono wei, anu dubo barukeka wau baruake nanu umuro aara wei.  
\v 9 Eno weike aniro Fida dawa anerunu wei enaenari danu umuro ani. Anaada Fidama dawa aneruma ukeibi ibai dawa iwoka me ibake ie ba o me ariya eno we imui. Danu imukeibie kube erakunea eno we imui.  
\v 10 Aisame udiro yawokeibisi miyai enare ibisiro moi mi ma bereisike nono moi mi ma bereisi. Eno uisike aisame udiro fakibaie i ayanima uisa aisame danu me ninoke ro yari. Ro yariro aweawero anisi. Aweawero anisike daaba demuiro aneebe abanaroma aneru iduama me ari ui.   
\p
\v 11 Aneruma Fida medike aniro Fida idua imuke giena ui, i aneruma uibai yaisina eno uke iwoka uike eno wei, Godima Danu aneru we odaisinuro isare aarinuke Erodini Du orounu merama imukekaroma na mune aweawero odainaraya eno wei.  
\v 12-13 Eno weike Merinu uwararo ani. Meri dawae Dioni Makinu amae. I uwararo eme keuwere ku siane ibaada Fidabake guriguri ukeibisaie Fida idua farike aisamero goigoi ukaada yaure ibinisa weiro moi aruma danu ibiye Roda dawama aisame ko woromifine fari.  
\v 14 Farike Fidanu wake nauke karana uike rooro ukaada i aisame ko worome dauike owerike i ku siane ibisa oroubairo durame ane fari. Iro ane farike eno wei, Fida farinuke uwara aisamero enare ibinua wei.  
\v 15-16 Eno weibaie a gogore boboba meo weakua eno weisa. Eno weisaro Rodama nono bebeku ara uike wei, na meo me, ba weakunea wei. Eno weiro emuama weisa, ie danu anerua weisa. Eno weibisabaie Fida dawa aisame udiro enare ibaada goigoi ukaada enare ibi. Eno ukeibi ibake ane aisame woromisake ekabaie Fida dawama enare ibaada ukeibi ibake i orou emenu imuka foria daiwere ukaada wake wake we makaneibisa.  
\v 17 Wake gorowere weibisa ibake Fidama wana ei mamike wake gorowere mediawe weiro meisa. Meisaro Fidama danu ana ebaro ibiro aneruma iro waure ane aweawero odi wake wei. Weike emuabake nono wei, Deimisini i Godinu wake naukaisa oroubairo yewa wake weawero naufisa weike emua idua medirieke moi orofaro ani.   
\p
\v 18 Aniro wai uriro meremere orouma Fida me uyare ekake ibake Fida yodia ukaada wake gorowere weibisa.  
\v 19 Enoba Erodima weiro danu orou Fida yodia ukeebe yodia ukeebe Fida fou ure dauisaro ana ebaro Fida yawokeibisa meremere orou kodo urie. Kodo urieke wei, i meremere orou yaisina uyakawero feafisa wei. Erodima eno weike Diudia orofa medike Sesaria goiro anike iro ibeibi.   
\s1 Erodi feari wake  
\p
\v 20 Erodima i Dairaini Saidoni goiyairo ibeibisa oroubake dino daiwere ui. Eno ui ibake i Dairaini Saidoni goiyai orouma eno we imuisa, Erodinu orofaro uruna muneibaisia we imuisa. Ibake Erodinu uwara yawokeka mi Barasusibairo fakake eno weisa, iyanu ararae Erodini wake we ma giena ufene farisia eno weisa. Eno weisaro Barasusima Erodibairo i weisa wake ane wei. Erodima i fafeisa odo namai we odiro i odoro dawabairo aare faka.  
\v 21 I odoro dawabairo aare fakaro Erodima danu kininu weree weree uike danu dai yaureka duboro yaure ibaada wake yafawere weibi.  
\v 22 Eno weibiro nauisake daiwere eno weisa, danu wakeye emenu wake karana mero Godinu wake karana weakua weisa.  
\v 23 Eno weibisaro na Godi meya mediawe we da uike emenu moko wefisa wake naufine ui ibake Godinu aneruma fanisi mairo okoa dudenanakuma Erodinu desini dura ise me sikaro Erodi idua feari.   
\p
\v 24 Godinu wake daiwere we eneiareibisa ibake eme keuwere naukeibisake ibai imukeibisa.   
\p
\v 25 Banabasini Soro emua Godinu waiya uke me sikike Derusaremu goi meisike owere Anidiyoka goiro anisi. Anisike Dioni Maki we waure emuaini demuiro anisi.   
\c 13  
\s1 Banabasini Soro we muriekake odairieka wake  
\p
\v 1 Anidiyoka goiro moi Godinu wake naukeka orou iro ibeibisa. Ibeibisaro emuabairo Godinu we bou ukeka orouini sisa orou emuaini ibeibisa. Emenu ibiye Banabasini Simioni danu moi ibiye Naiga dawaini, Rusiasi dawae Sairina goi mi, dawaini Manaeni dawae Erodinu nabue, dawaini Soroini i orouma Anidiyoka goi orouini emuabairo ibeibisa.  
\v 2 Ibake moi furo iro ibaada guriguri mane ukaada uruna ise dakeibisake kau uisaro Godinu Imumu Irauma emuabairo eno wei, Banabasini Soroini emua we mune odaiawero Nanu waiya ufisi wei.  
\v 3 Eno weiro uruna ise mero guriguri mane ukaada emenu wana Soroini Banabasini emenu iiri duboro oisake emua we odairiekaro anisi.   
\s1 Soroini Banabasini emuama Saifurasi goiro anisi wake  
\p
\v 4 Banabasini Soroma iro anisiro Godinu Imumu Irauma emenu aneibisi daaba we seboiro anisi. Ane fakike boudiro amuisike moi ekara ena ewa ena dawara nono naisaroe Saifurasi weaisa dai orofaro anisi.  
\v 5 Anisike i Saifurasi orofa Saramisa goiroko ane faki. Ane fakike i Du orounu sosiro Dioni Makini demuiro amuisa. Amuisake Godinu wake i oroubairo weibisa.   
\p
\v 6-7 Nono dubuenaro Saramisa goi meisake Saifurasi goi goiro yaisina Godinu wake we eneiareibisa. We eneebe Feifasu goiro ane faka. I goiro moi Du mi dawae wada barau bobo mi i goiro ibeibi. Dawae meo we ma ubireka mi. I minu ibiye Barayesu, dawae i goiro ibiro Soroini danu orou fakake i mi eka. I miye i Saifurasi weaisa orofa yawokeibi minu naiye. I yawokeibi mi danu ibiye Suragasi Forusi. I yawokeibi mima Soroini Banabasini emua Godinu wake wefisiro naufine emua weiro danu uwara ubarenaro amuisi.  
\v 8 Godinu wake wefisine amuisiro nono i wada barau bobo mi, danu Guriki ibiye Iramasi, emenu wefisi wake daaba dadau ufine i orofa yawokeibi mibake dawama eno wei, emenu wefisisi wake da naua wei.  
\v 9-10 Eno weiro Godinu Imumu Irauma Soroini ibenewaa ui ibake Soro danu moi ibiye Foru, dawama i wada barau bobo mi ereebe ere bauke faisa uike eno wei, ae seidaninu amaraya wei. Ae irau ukekabake wasai mi. Eno weike nono wei, anu imukekae irauaiai meya weike wei, anu imukekae we irukeka manea wei. Eno weike nono wei, Godinu Irau wake weeka daaba anemebake ma merama ufake dadau ufane ukaku wei? Eno weike wei, ibai media wei.  
\v 11 Eno weike Foruma i wada barau bobo mibake nono wei, nanu wake naua weike wei, Godima a awoena fanisi mamekuba moi odoro anu naisa kikori simekuro eweka edoro da efakua wei. Foruma eno weiro danu naisa dadau uiro moi mima danu wanaro mufike waure anifine yodia uke ani.  
\v 12 I orofa yawokeibi mima i mi uibai erike Godinu buna weekaini ukeka ibake imuka foria daiwere uike Godinu wake nauke imuke ui.   
\s1 Fisidia orofa Anidiyoka goiro ibeibisa wake  
\p
\v 13 Foruini danu orouini emuama Feifasu goi meisake boudiro amuisake Famufiria orofaro anisa. Ane Fega goiro faka. Fakaro Dioni Makima i orou medirieke owerike Derusaremu goiro ani.  
\v 14 Banabasini Foruini emua Fisidia orofa Anidiyoka goiro anisi. Ane fakike i furoe sabadi odo ibake i Du orounu sosiro emuaini amuisa.  
\v 15 Amuisake yaukaro moi mima Mosesinu darawadu bukaini Godinu we bou ukeka bukaroma kakuri. Kakure me siniro i sosi yawokeibisa orouma, Foruini danu oroubake eno weisa, naiyemuku, yama yanu arararo unu koreka wake wefoisaie naufeisia weisa.  
\v 16 Eno weisaro Foruma wana ei mamike eno wei, ya Isaraera orouini nono ya Godibake ia sinaisa imusu orouini nanu wake nauawe wei.  
\v 17 I Isaraera orounu Godima yanu sisia sirorari orou emua Idifi orofaro we mune odiriero ibeibisa ibake emuae bunama imusu ari orou sine ibeibisa. Sine ibeibisaro nono iroma Godi Danu buna wanama emua waure aniriea wei.  
\v 18-19 Waure anirieke eme ibe me orofaro odirieke oya fodi (40) emua yawokeibirie. Iro ibeebe nono Godima i Isaraera orou unu koreibiriero moi Keinani orofa goi goiro orouini uraneibisa. Eno ukeebe i orofa goi seweni (7) ure me siriekaro Keinani orofa yanu sisia sirorari oroubairo mariea eno wei. Mariero oya keuwere fo aderedini fifidi (450) Keinani orofaro ibeibisa.  
\v 20 Iro ibeibisaro Godima emuabairo kodo ureibeka orou odairiero ibeibisaro nono Samueronu odo idua fariro emenu we bou ukeka miye dawa emuabairo odirie.  
\v 21 Godima we mune odiriero yanu sisia sirorari orouma Godibake eno weisa, iyanu ararae Kini mi iyabairo we mune odia weisa. Eno weibisa ibake Godima Kisanu amara Soro dawae Bedimaninu sisia sirorari mi, emuabairo marie. Emuabairo mariero Soroma oya fodi (40) emua yawokeibirie.  
\v 22 Yawokeibiriero oya fodi (40) me siniro Godima dawa medike Deiwidi we munike emenu kini mi we odi. We odike eno wei, yewa mi Desinu amarae Nanu arara miya wei. Dawae Nanu wemau wake yaisina naufekua Godima eno weia wei.  
\v 23 Foruma eno weike nono wei, Godima we bou uike Deiwidinu sisia mi Yesu, we munike Isaraera orounu ma wirokeka mi we odia Foruma eno wei.  
\v 24 Foruma eno weike nono wei, Dioni dawako fari. Farike Isaraera oroubake eno wei, yanu merama merama ukeka imuke mediaweke babadaido uawe Dionima eno weia Fidama wei.  
\v 25 Fidama eno weike ba nono wei, Dioni dawa eno weiro danu ibaada ukeibi waiya i furo me sifine uiro Dionima nono wei, na aina imukaisa wei? Eno weike wei, yanu yawokaisa miye na meya eno weia wei. Moi mima nanu umuro aafekua wei. Dawae Dai miwere. Nono nae dai mi meba Danu iboo da enare kuumaua Dionima eno weia Foruma i wake emuabairo eno wei.   
\p
\v 26 Foruma wei, nanu kaka nabue, ya Eibaramunu sisia sirorari orouini ya Godibake imukaisa imusu orouini nanu wake nauawe wei, Godima yewa ya ma wirokeka wake we odaisinuro aarinua wei.  
\v 27 Foruma eno wei, i Derusaremu goiro ibeibisa orouini emenu dai orouini emuama Yesu ukaro ba fearia wei. Foruma eno weike nono wei, i orou emua Dawa iwoka me enoba Dawa ukaro fearia wei. Godinu we bou ukeka orounu wake sabadi odoro aine wai ure kakureibisaro naukeibisake nono imuke dakeibisa. Eno ukeibisa ibake i we bou ukeibisa orounu wake ba sini.  
\v 28 Foruma eno weike nono wei, i Derusaremu goi moi orouma Yesunu ukeka sineka moinaku merama fou ure da uisakema Faeradibairo anisake weisaro ibake Dawa ukaro fearia wei.  
\v 29 Feariro i orouma i we bou ukeka orounu Yesu feafine wake weisa enaenari eno uisa. Enaenari uisaro Yesu feariro korosiroma Danu ofe bou mukake oma erabo eme odeka orofaro oisa.  
\v 30-31 Eno uisaro nono Godima Dawa ma uyariro awoena ibinua wei. Foruma eno weike nono wei, Yesu fearike nono uyarike eneiareibiro Danu Gareri goiroma Derusaremu goiro Danu umuro eneiareibisa orou emuama Dawa ereibisaya wei. Ereibisa ibake nono awoena i ere dauisa oroubairo Danu ukeibi sineibi ibai yaisina weaisaro naukaisaya wei.  
\v 32-33 Foruma nono eno wei, Godima yanu sisia sirorari oroubairo Danu irau we bou ukeka orou mariero nono awoenae uwama yabairo i irau wake weaisua wei. Eno weike nono wei, Godima Yesu ma uyarike nono awoena Danu we bou ukeibi enaenari yabairo idua ukinua wei. Eno weike wei, i Samusi bukaro yewa wake eno ibinua wei,  
\li1 Ae Nanu Amara, Anu Babaeye Naya,  
\m i wake eno ibinua wei.  
\v 34 Foruma eno weike nono wei, Godima Yesu ma uyarike eno wei, Danu ofe da yaufekua weia wei. Foruma eno weike nono wei, i Samusi bukaro i wake eno ibinua wei,  
\li1 Abake we ma irauaiai umauanea Deiwidibairo eno we bou ueba ibake Abairo enaenari umaua Godima eno wei.   
\m
\v 35 I Samusi bukaro yewa moi wake eno ibinu,  
\li1 Ama wei ibake Anu iifa Amaranu ofe da yaufekua,  
\m I wake i Samusi bukaro eno ibinua Foruma eno wei.   
\p
\v 36 Foruma eno weike nono wei, yewa wakeye Deiwidinu wake me, yewa wei wakeye Yesunu wei wake. Ibake Deiwidima Godinu waiya danu oroubairo uike fearia wei. Feariro danu sisia sirorari oroubairo ane ooru uisaro danu ofe yauria wei.  
\v 37 Eno weike nono wei, adinaro Godima ma uyari Minu ofeye yaure da uia wei.  
\v 38-39 Nanu wake nauawe, i Mi mane yanu merama merama ukeka ma isufekua wei. Ibake aina ainama Dawa imukaisaie Dawa mane emenu merama merama ukaisa ibai ma isurakuro Godima emuae irau oroua eno weakua wei. Eno weike nono wei, Mosesinu darawaduma merama ma isure dakakua wei.  
\v 40-41 Eno weike wei, eforo, i Godinu wake we bou ukeibisa orounu wake yabairo fafekuba me ari? Emenu weisa wakeye eno weisa,  
\li1 Ya Godibairo merama wake weaisa orou eno imufoisake feafoisa. Nanu unu koreka waiya yabairo ukakuneroma nono moi mima Nanu ukakune i waiya we ma boroo yafiakuroma nono ya iwoka da ufoisa,  
\m i we bou ukeka orouma eno weisaya wei.  
\v 42 Foruma danu wake eno weiro dawaini Banabasini emuama aweawero anisi. Anisiro i orouma eno weisa, yeka moi sabadi odoro nono yanu wake weawaro iya naufe weisa.  
\v 43 I orou yaisina fiake anisaro moi Du orouini moi Godibake imukeibisa imusu orouini emuama Foruini Banabasini emenu umuro anisa. Anisaro Foruini Banabasima eno weisi, Godima ya we ma irauaiai ukinuke unu koneba Danu daabaro enarenewaa uforo weisi.   
\p
\v 44 Moi sabadi odoro i Anidiyoka goi orouma Godinu wake naufisane anisa. Anisaro eme keu menaku ane mero goiro ibisa.  
\v 45 Nono eme keuwere anisaro moi Du orouma eme keuwere eriekake emua arara me ibake dino wake weisake Forunu we ma iwoka ukekaini weekaini meoya eno weisake i miyai emua merama miyaiya eno weisa.  
\v 46 Eno weisaro Foruini Banabasima ia sine dauisike eno weisi, Godima Danu arara i wake yabairoko wefune wenuro ibake yabairo aarisua weisi. Eno weisike nono weisi, awoenae Godinu wake yama mune sianaisake yanu imusu kodo uraisaie Godinu me ibene ibene ibeka da mufoisaya eno weisi. Eno weisike nono weisi, ya eno ukaisaba Godinu irau wake i Du me imusu oroubairo ane wefukua weisi.  
\v 47 Godima Danu bukaro yabake eno wei,  
\li1 Du me imusu orounu edoroe ya. Ibake i orofa akaka imusu orou yaisinabairo anifoke weforo naufeisake emuama i me ibene ibene ibeka mufeisa,  
\m eno weia wei.  
\v 48 Foruma eno weiro i Du me imusu orou i weibai nauisake rooro daiwere ukaada Godi we ma irauaiai uisa. Eno uisake Godima we mune odirie eme keuwere Godi imuisa.  
\v 49 Imuisake Godinu wake aboro aboro enaada we eneiareibisa.   
\p
\v 50 I Du orou emua arara me ibake koroko wake weisaro moi adina ba ofe sirie awekaboini emeakaini emuama i Du orounu koroko wake weisa ibai nauisake emuaini moi goi orouma Foruini Banabasi yoweriekaro anisi.  
\v 51 Anaada emenu umuro doo ma isukiro i Du orouma eno weisa, i miyaima iya meisike anaisia weisa. Eno weisaro Foruini Banabasi Anidiyoka goi meisiki Aikoniamu goiro anisi.  
\v 52 Godinu Imumu Irauma i Anidiyoka goiro ibisa Danu iwoka ukeka oroubairo ibenewaa uiro emua rooro daiwere uisa.   
\c 14  
\s1 Foruini Banabasini emuama Aikoniamu goiro anisi wake  
\p
\v 1 Foruini Banabasini emuama Aikoniamu goiro ane fakike Du orounu sosiro amuisike Godinu wake bunawereroma weisi. Bunawereroma weisiro moi Du orouini Du me imusu orouini emuama i wake nauisake emenu imuka yaisina Godibairo oisa.  
\v 2 Eno uisaro Godinu wake nauke me Du orouma emuaini dino wake weisaro i imusu orouma ibai nauisake i Godinu wake naukeibisa orou ufiakane ararua uyaka.  
\v 3 Eno uisaro Foruini Banabasini emuama iro odo keuwere ibaada Yesunu irau unu koreka wake weibisi. Weibisiro Yesuma emua erieke emuabairo buna ukekaini ereka marie enaenari uisi.  
\v 4 I Aikoniamu goi orou emua emenu imuka demui daabaro ode dauisa. Ibake moi orou emuama i Du orounu wake nauisa. Nono moi orouma i afasoro orounu wake nauisa.  
\v 5 I imusu orouini Du orouini emua yawokeibisa orouini emuama i afasoro orou omama ufiakane weisaro Foruini Banabasini emuama ibai nauisi.  
\v 6-7 Nauisike i goi sabu meisike Raikonia orofa Risidaini Debe goiyairo emua iro anisi. Iro anisike i goiyaini i orofa goi goi iro anisike Yesunu wake weada eneiareibisi.   
\s1 Foruini Banabasini emuama Risidaini Debe goiyairo anisi wake  
\p
\v 8 Moi Risida goi mi danu umu daba mamiro enare fare me. Dawa danu amaema dori arima enare fare mero uwararo mane ibeibi.  
\v 9-10 Foruini Banabasini emua fakiro i mima Forunu wake nauiro Foruma i mi erenewaa ukaada i mi dawa wirofine imukakua eno we imuike daiwereroma eno wei, anu umuma uyare enaa wei. Eno weibaie i mi idua sabu uyarike enari.  
\v 11 Eno uiro i ku siane ibisa orouma ibai ekake emenu Raikonia wakeroma eno weisa, moi godi ba eme ari iyabairo farisaya eawe weisa.  
\v 12 Eno weisake emenu godi danu ibiye Dufada, danu ibiye Banabasinu moi ibi mamisa. Nono Foru dawae wake weeka mi ibake danu moi ibiye Makari mamisa.  
\v 13 I godi Dufada danu uwara i goi barunaro enare ibi. I Dufadanu uwararo ofereni odeka miye segina segina uike boromakau unama ofereni odifine uwara aisamero waure fari.  
\v 14-15 Waure fariro Foruini Banabasini emuama i wake nauisike imukada emenu wau ma gagane budebade uisike i oroubairo ane fakike eno weisi, anemebake eno ukaisa weisi? Eno weisike eno weisi, uwae godi mero uwae ba eme, ya ari enoya weisi. Irau wake wefune yabairo farisua weisi. I irau wakeye eno, i ba me godie mediaweke oweaweke i me ibene ibene ibeka Godibairo yanu imuka yaisina iro odiawe weisi. Eno weisike nono weisi, i ba Godima ureini dooini dawaraini eraerabusa yaisina ubu uia dawa mane imuawe weisi.  
\v 16 Adinami nauwaroma emema emenu arara aneme aneme ukeibisa weisi. Eno ukeibisaro Godima emenu sara merama ukeibisabai eraada me yawokeibiriea weisi.  
\v 17 Eraada yawokebe Dawa dino uke dauike emuabairo obi ureroma we odaiseibiro isareibia weisi. Obi isareibiro emenu uruna daiwere warakeibisaro rooro uekibisaya weisi. Eno weisike nono weisi, Godima eno ukeibike awoena enaenari ukaku ibake Danu mane eno uke ma boroo yarakuba Dawae ba Godi iwoka sinaisia weisi.  
\v 18 Eno weebe weebe meisiro i orouma emuabake ofereni odifisane ukeibisabai idua meisa.   
\p
\v 19 Eno ukeibisiro moi Du orouma Anidiyokaini Aikoniamu goiyairoma Risida goi oroubairo fakake Foruini Banabasibake meo wayai wake emuabairo weisa. Eno weisake meomao wayai wake weibisaro Risida goi orouma i miyaibairo ararua sirieke oma mukake Foru siane uka. Siane ukaro dooro biruike ane isari. Biruike ane isariro wanaro ma youre ane goi barunaro oisa. Eno uisake dawa fearinua we imuisake ibake meisake anisa.  
\v 20 Meisake anisaro Yesunu umuro eneiareibisa orouma Foru enare kara uisaro Foru uyarike goiro owere ani. Owere ane ainike wai uriro uyarike iroma Banabasini Debe goiro ane faki.   
\s1 Siria orofa Anidiyoka goiro oweka wake  
\p
\v 21-22 Foruini Banabasini emuama i Debe goi oroubairo Godinu irau wake weisiro eme keuwere nauisake emenu imuka yaisina Godibairo oisa. Nono dubuenaro Debe goi meisike owekike Risida goini Aikoniamu goini Anidiyoka goiro Godinu wake naukeibisa oroubairo anisike Godinu wake eno weisi, Godibairo ibenewaa uawe weisi. Merama odo odo keuwere yabairo fafekuro enare ara ufoisaie dubuenaro Godinu yawokaku orofaro anifoisaya weisi. Eno weibisiro i Godinu wake naukeibisa orouma i wake nauisake buna daiwere uisa.  
\v 23 Ibake Foruini Banabasini emuama i sosi sosi yawokeka orou emuabairo we mune odiriekike guriguri ukaada eno weisi, Yesu, emua yawokenewaa uyana weisi. Eno weisike anisi.   
\p
\v 24 Anisike Fisidia orofa ma bereisike Famufiria orofaro ane faki.  
\v 25 Ane fafike i Fega goiro fakike Godinu wake weisike nono meisike iroma anisi. Ane Adaria goiro isare anisi.  
\v 26 Anisike iro boudiro amuisike iroma i Siria orofa Anidiyoka goiro anisi. I Anidiyoka goiro adinaro Godima weiro i orouma Foruini Banabasini emua we mune oisake Godibairo emuabake guriguri uisaro anisike nono owere aare Anidiyoka goiro faki.  
\v 27 Fakike weisiro i Godinu wake naukeibisa orou yaisina i miyai emuabairo ane faka. Ane fakaro emuama eno weisi, Godima i imusu orounu imuka ma owere muneba i imusu orouma emenu naukeka Godibairo odaisaya weisike Godima emuabairo ukeibi ibai yaisina weisi.  
\v 28 Foruini Banabasini emuama Anidiyoka goiro i Godinu wake naukeibisa oroubairo odo keuwere emuaini ibeibisa.   
\c 15  
\s1 Derusaremu goiro fare fou ure makaka wake  
\p
\v 1 Foruini Banabasini emuama Anidiyoka goiro ibisiro moi Diudia orofa Du orouma i naukeka oroubairo fakake we ma iwoka ukaada eno weisa, i Du orounu ofe kuureka da ufoisaie nono Godima ya da ma wirofiakua eno weisa.  
\v 2 Eno weisaro Foruini Banabasini emuama i wake nauisike bunawereroma eno weisi, i wakeye ba me meramawereya weisi. Eno weisibaie i Anidiyoka goiro Godinu wake naukeibisa orouma Foruini Banabasini moi orouini emua i wake Derusaremu goiro ibisa orouini sosi yawokeibisa Anidiyoka goiro Godinu wake naukeibisa orouini emuabairo i wake wefisane we odairieka. I goi arawekoroma we odairiekaro anisa.   
\p
\v 3 Anisake Fonisia orofa goi goini Samaria orofa goi goiro Godinu wake ane eno weisa, Godima i imusu orou awoena ma wirokakunea weisa.  
\v 4 Weisake aneebe Derusaremu goiro ane fakake i Godibairo guriguri ufisane fare ku siaka orouini afasoro orouini sosi yawokeibisa orouini emuabairo arie daiwere weisa. Eno weisake i orou yaisina sosiro fare ku siaka. Fare ku siakaro Foruini Banabasini nono emuaini eneibisa orouini Godima emuabairo ukeibi ibai yaisina weisaro emua nauisa.  
\v 5 Eno weisaro moi Godinu wake naukeibisa Ferosi weaisa orouma uyakake eno weisa, I imusu orounu ofe kuufeisike Mosesinu darawadu yaisina uforo wefeisia eno weisa.   
\p
\v 6 I afasoro orouini sosi yawokeibisa orouma i wake naufisake imufisane fare ku siaka. Fare ku siakake wake keuwere we makaka.  
\v 7 We makaneibisaro Fidama uyarike eno wei, naiyemuku, nanu wake nauawe wei. I adina furo Godima yabairoma na we mune odikara. Na we mune odikarake Godima eno weia wei. I imusu oroubairo Danu wake wemaro naufisake Dawa imufisane ibake na we mune odikaraya wei.  
\v 8 Eno weike nono wei, Godi Dawae i imusu orounu imukeka Dawa iwoka ui ibake Danu Imumu Irau we odairo emuabairo isariba ibake emuaini iyaini iyama Godinu wake naukeka orou sikia wei. Iya Godinu Imumu Irau muki i ari eno emuae enaenari mukaya wei.  
\v 9 Eno weike nono wei, Godima emuaini iyaini demuiro imuia wei. Eno weike wei, i orouma Godinu wake nauisake Godi imuisaro emenu merama merama ukeka mune imuke media eno wei.  
\v 10 Godima eno uibairo nono anemebake ofe kuureka wake weaisa wei? Eno weike nono wei, ya eno weaisaie Godi we iruke eraada weaisaya wei. Eno weike wei, ya eno ukaisaie Godinu wake naukaisa orounu owairo inimu eraerabusa abiare odinao ukaisaya wei. Fidama eno weike nono wei, adinaro akaemukuini iyaini iyanu owairo inimu eraerabusa waure dakeibiside nono anemebake i oroubairo eno weaisa wei?  
\v 11 Fidama eno weike wei, emenu wirokekaini iyanu wirokekaini imusu imusu mero demuiya wei. Eno weike nono wei, emuaini iyaini Godinu wake naufeisiie iyanu Dai Waria Mi Yesu Kerisoma irauaiai unu korakuniba ibake Godima iya ma wiromisia wei.   
\p
\v 12 Fidama eno weiro i yaure ibisa orouma Fidanu wei wake nauisake wake moi we dauisa. Wake moi we dauisaro Godima Foruini Banabasibairo buna mariero emuama i imusu oroubairo buna ukeibisi wake weisiro nauisa.  
\v 13 Emenu wake weisiro me siniro Deimisima uyarike eno wei, kaka nabue, nanu wake nauawe wei.  
\v 14 Fidama eno wenua wei, Godima i imusu orou munakuneke ma wirokakunero nono Danu wake naukeka orou sinaisa wenuro naukisia Deimisima eno wei.  
\v 15-16 I wakeini i Godinu we bou urie orounu wakeini emuae demuiya wei. Weike wei, yewa dubo waure weeka wake Godima Danu bukaro eno wei,  
\li1 moi doroo yari uwara ma irauaiai ufekuro uyafeku i ari Deiwidinu doroo yari uwara nono ma enamauro uyafekuro danu ibini nono ma daiwere umaua wei. Eno uke uyafekuro Dai yawokeka Mi nono odimaua wei.  
\v 17 Enoba eme yaisinaini Nanu we munakune imusu orouini yodia ufisake i Dai Minu umuro anifisane ibake eno umaua wei.  
\v 18 Adinami nauwaro Godima i wake eno weia,  
\m I Godima we bou urie orouma eno weisaya Deimisima eno wei.   
\p
\v 19 Deimisima eno weike nono wei, nanu imukekae i ari enoya wei, i Yesunu umuro aneka imusu orounu irau ibeka ma ara da ufeisia wei.  
\v 20 Eno weike nono wei, emuabake owaowama ufeisia wei. Ufeisike eno wefeisia wei, i ba me godinu ofereni odeka uruna da iforo, moi minu aruma aweka da enare odiforo, mimi ufoisaro iwa isare dafeku abu da iforo, iwa da iforo, eno owaowama ufeisike emuabairo odaifeisia wei.  
\v 21 Eno weike nono wei, adina furoma moi orouma Mosesinu darawadu moi goi goiro Du orounu sosi sosiro yaisina sabadi odoro aine wai ure ie kakureibisaro naukeibisa i ari enoe awoena enaenari kakuraisaro naukaisaya Deimisima i wake eno wei.   
\s1 I Du me imusu Godinu wake naukeibisa oroubairo marieka owaowabake wei wake  
\p
\v 22-23 Deimisima eno weiro i afasoro orouini i dai yawokeka orouini Godinu wake naukeibisa orouini emua yaisina i wake nauisake i wakeye iraua weisa. Eno weisake eme una raarayai Diudiasi Basabasi weaisa mini Sairesini emua we murieka. I miyaie sosi yawokeibisi miyai. I miyaini Foruini Banabasini emua we odaifiakane eno we imuisake emenu imukama i owaowa yanake oisa. Emenu owaowae i ari eno, iya Godinu wake naukaisi orou yaisina, afasoro orouini dai yawokeka orouini iyama ya Anidiyokaini Siriaini Sirisia goi orouini ya imusu Godinu wake naukaisa oroubake arie wake weaisia weisa. Iyanu wake nauawe.  
\v 24 Eno weisake nono weisa, moi orouma ewadoma yabairo aakake eno weisa, Mosesinu ofe kuureka darawadu wake weisaro ya yaisina nauisake iwoka uisaro nono iya nauisi. Eno weisake nono weisa, i oroue iyama we odaise dauisiro emenu me aare weisaya weisa.  
\v 25 Eno weisake weisa, awoena iyanu imukekae eno, eme una raarayai munisiba emuaini Banabasini Foru weaisa mini we odaifiakikiro yabairo aafeisaya weisa.  
\v 26 Banabasini Foruini emuama Yesunu waiya ukeibisi ibake moi orouma emua ma feafiakane uisaro emua fearekabake ia sine dauisi.  
\v 27 Diudiasini Sairesini emua we odaisaisiba fafisisiie emenu bebekuma i owaowa wake yaisina wefisisia weisa.  
\v 28 Eno weisake nono weisa, Godinu Imumu Irauini iyanu imukekae eno, ya imusu orounu ibeka irau ma ara uke dakaisi. Moi wake mero yewa wake mane weaisi.  
\v 29 Enoba i ba me godinu ofereni odeka abu da iawe, nono iwa da iawe, mimi ureibaisaro iwa dooro isare dakeibaku abu da iawe, moi minu aruma aweka da enare odiawe. I weaisi wake enaenari ufoisaie irauaiai ibifoisa. Iyanu wake idua me sininua eno weisa.   
\p
\v 30 I owaowa yanake me sikake i miyai we odairiekaro anisi. Ane Anidiyoka goiro isare ane faki. Isare ane fakike weisiro i Godinu wake naukeibisa orou fare ku siaka. Fare ku siakaro i owaowa emuabairo maisiro kakuka.  
\v 31-32 Kakure me sikake i wake irauaiaiya weisake rooro uisa. I we bou urieka miyai Diudiasini Sairesini emuama wake keuwere i oroubairo weisiro i orou emua nauisake emenu imuka irauaiai sika.  
\v 33 Diudiasini Sairesini emuama eno uisike moi odo odo iro ibeibisiro i Godinu wake naukeibisa orouma Diudiasi we odaisaro owerike Derusaremu goiro Godinu wake naukeibisa oroubairo arie we odaisa wake waure ane fari.  
\v 34 Eno uiro Sairesi danu mane iro ibeibi. Iro ibeebe dawa arara me owere Derusaremu goiro aneka.  
\v 35 Ibake dawa iro ibiro Foruini Banabasini emuama Anidiyoka goiro ibaada emuaini moi Godinu wake naukeibisa orouma Godinu wake weada i orou we ma iwoka ukeibirieka.   
\s1 Foruini Banabasini emua odaise makaki wake  
\p
\v 36-38 Moi furo Foruma Banabasibake eno wei, uwanu adinaro enaada Godinu wake we eneiareibisu iro nono owere anifuke emua efiaku wei. Emua irauaiaiba merama ibinisaria anifuke efiaku weiro Banabasi i wake nauike eno wei, Dioni Makini demuiro anifeisi wei. Eno weiro Foru dawa arara me Dioni Makini aneka. Adinaro Dioni Makima emua Famufiria orofaro medirieke owere ani ibake Foru dawa arara me Dioni Makini demuiro aneka.  
\v 39 Danu ubiye emenu imukeka imusu imusu sini ibake Banabasima Dioni Maki we muniro emenu imusu anisi. Ane boudiro amuisike ekara ena ewa ena dawara nono naisaroe i Saifurasi weaisa dai orofa iro anisi.  
\v 40 Iro anisiro nono Foruini Sairesi emuae eno anisi. I Godinu wake naukeibisa orouma Foruini Sairesibake guriguri uisake odairiekaro anisi.  
\v 41 Anisike ane Siriaini Sirisia orofa goi goiro Godinu wake we eneiareibisiro i Godinu wake naukeibisa orouma i wake nauisake emenu imuka irauaiai uisake rooro daiwere uisa.   
\c 16  
\s1 Dimodini Foruini Sairesini eno anisa wake  
\p
\v 1 Foruini Sairesini emuama Debe goiroko ane fakike nono meisike iroma ane Risida goiro ane faki. I goiro moi mi danu ibiye Dimodi dawa iro fou uki. Dimodi danu amaeye Godinu wake naukeibi Du aweka, nono danu babaeye imusu Guriki orofa mi.  
\v 2 I Risidaini Aikoniamu goiyairo Godinu wake naukeibisa orouma Dimodi dawae irau miya eno we imuisa.  
\v 3 Eno we imuisa ibake Foruma Dimodibake eno wei, aini Godinu wake weneibaisi daabaro demuiro anifeisia wei. I Du orounu darawadu ibake Foruma Dimodi we munike danu ofe kuuri. Nono Dimodi danu babaeye imusu Guriki mi ibake dawae Dimodi danu ofe kuure dauiro ibai i Du orou yaisina emua iwoka sika ibake Foruma Dimodinu ofe kuuri.  
\v 4 Kuuriro nono dubuenaro Foruini danu orouini emuama moi goi goiro anisake iroma aboro aboro i imusu orouma Godinu wakeini afasoro orou emenu wakeini naufisane Derusaremu goiro afasoro orouini dai yawokeibisa orouini emenu ukeibisabai i imusu Godinu wake naukeibisa orou naufisake enaenari ufisane ibake i wake eno weisa.  
\v 5 Eno ukeibisa ibake Godinu wake naukeibisa orounu imukekae daiwere imuisake eme keuwere Godi imuisa ibake i sosiro aareibisa orou keuwere emenu imuka yaisina Godibairo odeibisa.   
\s1 Doroasi goiro Forunu kubekube eri wake  
\p
\v 6 I goiyai meisake iroma Eisia orofaro anifisane uisaro Godinu Imumu Irauma emenu daaba dadau ui. Dadau ui ibake Firigiaini Gareisia orofayai iro aboro aboro eneiareibisa.  
\v 7-8 Ane Misia orofa udiro fakake Bidinia orofaro anifisane uisaro Yesunu Imumu Irauma emuabake mediaweke iro da aniawe wei. Eno weiro ibake Misia orofa gagade ukake Doroasi goiro isare ane fakake aisa.   
\p
\v 9 I aine ibisa dumuro Foruma kubekuberoma eno eri. Kubekuberoma moi Masadonia orofa mi enare ibaada eenu weike eno wei, Masadonia orofaro aarake iya unu koa wei.  
\v 10 Foruma i kube erike iyabairo weiro Godi Danu ararae Danu wake i oroubairo wefene ibake i daaba ukinua eno we imuisike ibake i daaba yodia ufene uisia Rukima eno wei.   
\s1 Firifai goiro Ridiama danu imuka yaisina Yesubairo mai wake  
\p
\v 11 Rukima eno wei, iyama boudiro amuisike Doroasi goiroma i ekara ena ewa ena dawararo naisaroe Samodureisi weaisa orofaro isare anisi. Anisike iro aisike wai uriro Samodureisiroma Niaforusi goiro anisi.  
\v 12 Anisike iroma nono umuma ane Firifai goiro faki. Firifaie i Masadonia orofanu dai goi. I goiye i Romani orounu goi. Iro ane fakike iro odo keuwere ibeibisi. Ibeebe Sabadi odoro moi orou adua udiro ku sianaisake guriguri ukaisaya eno weisaro i wake nauisike iro anisi. Goi arawekoro anisike adua udiro ane fakike moi ku siane ibisa awekabo emuabairo Godinu wake weisi.  
\v 13-14 Iyanu weisi wake naui moi aweka danu ibiye Ridia. Danu goiye Daiadaira. I awekae Godibairo guriguri ukeibi. Nono danu waiyae kokoi wau make oi muneibi. Dawama Forunu wake naukenewaa uiro Godima danu imuka yaisina ma oweri ibake Forunu wake naukenewaa ui.  
\v 15 Dawaini danu uwararo aineibisa koa yaisina iyama babadaido uriekiro Ridiama eno wei, yama na Godi imukenewaa ukakune imukaisaya nanu uwararo aare ibiawe wei. Eno wei ibake danu uwararo anisia Rukima eno wei.   
\s1 Firifai goi orounu eme odeibisa ana eba uwaranu wake  
\p
\v 16 Moi odoro i guriguri ukeibisa orofaro aneebe moi wada barau ukeibi aruma fou ukia eno wei. I arumae seidaninu merama imumu bobo aruma. Ibake Dawama wada barau ukaada oi daiwere muneibike dawa yawokeibisa oroubairo makeibirie.  
\v 17 I arumama iyanu umuro anike kori daiwere urike eno wei, yewa oroue Godinu waiya ukaisa oroua wei. Eno weike nono wei, Godima ya ma wirofiane farisaya eawe wei.  
\v 18 Aine wai ure eno areare weibiro Foruma ibai nauke awakebe dawama eno wei, danu imuka ubarenaro ibi seidaninu merama imumubake bunawereroma eno wei, i aruma danu imuka ubarenaroma amuake ania wei. Eno weiro ena seidnanu merama imumu sabu isare ani.  
\v 19 Isare aniro i aruma yawokeibisa orouma dawa ekake eno weisa, iyanu oi daiwere munaisi ibai idua me sininua eno weisa. Eno weisake Foruini Sairesi muriekake i uwara seboro yaure ibaada kodo ureibisa oroubairo waure ane odirieka.  
\v 20 Eno uisake meo weisake eno weisa, yewa Du miyaima merama wake weisiro yewa goi orou i miyainu merama wake naukada ibake emenu imuka merama imukaisaya weisa.  
\v 21 Eno weisake nono weisa, i Romani orounu darawadu da nauawe weisia eno meo weisa.  
\v 22 Eno meo weisa ibake eme keuwere ku sianada dino uisa ibake kodo ureka orouma Foruini Sairesini emenu wau ma girise mune siakake weisaro i Furisi orouma i miyai usima urieka.  
\v 23 Usima ureebe ureebe oisaro iwa fareibi. Eno uisake ana eba uwara ubarena naisaro ane odiriekake i ana eba yawokeibi mibairo eno weisa, yewa miyai yawokenewaa ufiao weisa.  
\v 24 Eno weisa ibake ana fuyai wowonaro ode duboro ode eno uike emenu umuyai mune ana feraoro odike senima uwane karise odiriero yaure ibisi.   
\p
\v 25 Yaure ibeebe dumu abanaro Foruini Sairesini emuama Godibairo guriguri ukaada yaura kairoma weibisiro i ana ebaro yaure ibisa orouma i yaura kai weibisibai nauisa.  
\v 26 Foruini Sairesini emuama yaura kairoma weibisibaie doo amani amani daiwere uiro i uwara amani amani uiro i ana eba uwara aisame yaisina ko woromisaro i ana ebaro ibisa orou uwane odirieka seni yaisina me kukune isaka.  
\v 27 Eno uiro i ana eba uwara yawokeibi mi dawa nauka aine ibiro eno ukeibiba danu naisa foraike uyarada aisame ko worome ibibai erike eno we imui, yewa uwara ibinisa orou yaisina anisaya eno we imuike danu bau munike danu onami nodo kuufine ukeibi.  
\v 28 Eno ukeibiro Foruma daiwere weike eno wei, eno da ua wei, iya yaisina yewado ibinisia wei.  
\v 29 Eno weiro nauike ia daiwere sinaada moi mibake daiwereroma eno wei, esiwa maina wei. Esiwa mairo munike i ana eba uwara ubarenaro sabu isarike ia daiwere sinaada iura mamike Foruini Sairesini emenu umu udiro iboo yanai.  
\v 30 Eno uike uyarike Foruini Sairesi emua waure ane aweawero odirieke eno wei, ya, na i wirokeroma me ibene ibene ibeka aneme aneme umauke mumau wei?  
\v 31 Eno weibaie emuama eno weisi, i Dai Waria Mi Yesu Keriso imukenewaa ua weisi. Eno weisike nono weisi, eno ufakuie aini anu uwararo ibinisa koaini yaisina Dawabairo wirofoisaya weisi.  
\v 32 I ana eba yawokeibi minu uwararo amuisaro Foruini Sairesini emuama i mini danu uwararo ibisa oroubairo Godinu wake emuabairo weisi.  
\v 33 Eno weisiro i mima Foruini Sairesi we murieke emua usima urieka biobao aduama uroiro dawaini danu koa yaisina emuabairo babadaido uisa.  
\v 34 Babadaido uisaro i mima uruna nabero munike emuabairo mariero isi. Eno uisake dawaini danu koaini emuama emenu naukeka Godibairo oisake rooro daiwere uisa.  
\v 35 Wai uribaie i kodo ureka orouma furisi orou we odaisaro anisa. Foruini Sairesi ma woromifisane anisa. Ane fakake eno weisa, i miyai ma woromiaro anifisi weisa.  
\v 36 Eno weisaro i ana eba uwara yawokeibi mima Forubake i wake eno wei, i kodo ureka orouma ya ma woromimane we odaisisaro faraisaya aweawero amuawake irauaiai aniawa wei.  
\v 37 Eno weibaie Foruma ma owerike eno wei, emuama uwa emenu naisaro usima ureibisaro ekaya wei. Eno weike nono wei, uwama moi merama uke dauisua wei. Eno weike wei, uwae Romani miyaia wei. Eno weike nono wei, emenu ararae uwa fema anekaro nono uwa eno da ufukua wei. Eno weike ba nono wei, emenu onarouma fafeisake uwa mune aweawero odaimukaisaya wei.  
\v 38 Eno weiro i furisi orou anisake i kodo ureka oroubairo Forunu wei wake emuabairo ane weisa. Ane weisaro Foruini Sairesini emuae i Romani oroua weisaro nauisake ia sirie.  
\v 39 Ia sirie ibake Foruini Sairesibairo anisake emenu imukaro imuisake arie weisake eenu weada eno weisa, iyanu goi mediawake aniawa weisa. Eno weisaro ana eba uwara ubarenaroma amuisike anisi.  
\v 40 Anisike i aweka danu ibiye Ridia danu uwararo anisike i Godinu wake naukeibisa oroubairo Godinu irau wake weisike emenu imukeka ma irauaiai uriekike nono i goi meisike anisi.   
\c 17  
\s1 Foruini Sairesima Desoronaika goiro anisi wake  
\p
\v 1-3 Foruini Sairesini emuama Amofiforisi goi gagade ukike nono Aforonia goiro fakike idua anisi. I goiyai fare ma bereisike ane Desoronaika goiro faki. I goiro Du orounu moi sosi ibi ibake Foruma amuike Godinu wake wei. Foru danu ukeibi enaenari sabadi odoro deibuuba amukeibike i Godinu bukaro wakeye eno wei, iyanu fafine yawokaisi Mesaia weaisa Mi oferi daiwere mufeku odo odo fafekuro oferi daiwere waufekuke feafekuke nono uyafeku i wake Godinu bukaro eno ibinua wei. Yewae Yesu Keriso Dawabake weakunea wei.  
\v 4 Eno uke bunawere weiro moi orou nauisake ie ba Yesu Keriso eno we imuisake ibake Foruini Sairesini emuabairo aare dakaa uisa. Eno uisaro Nono moi orou Godinu wake naukeibisa Guriki dai orou, emuaini moi ba ofe sirie awekaboini emenu imuka yaisina Yesubairo oisake emuabairo dakaa uisa.   
\p
\v 5 Eno uisaro nono moi Du orou nauke da uisa ibake dino wake weisa. Eno weisake merama eme keuwere mukake Foruini Sairesini emua ufiakane imuisaro eme keuwere fare ku siakake wake goro daiwere weisa. Eno weisake Deisoninu uwararo anisake fare Foruini Sairesi emua i kanisoro oroubairo waure ane odifiakaro fafisake fanisi mafiakane ibake anisa.  
\v 6 Anisake Deisoni danu uwararo fare usima i uwara ure uyakake Foruini Sairesi emua yodia uke anisake mune dariekake ibake ane Deisonini danu moi orouini emua muriekake ane i kanisoro oroubairo waure ane odirieka. Waure ane odiriekake eno weisa, Foruini Sairesi i miyaima goi aboro aboro eme yaisinanu imukeka irau ma merama uisike nono awoena idua farisia eno weisa.  
\v 7 Awoena idua farisike Deisoninu uwararo aine ibinisia eno weisa. Eno weisake nono weisa, i miyaima dai yawokaku mi Sisanu darawadu nauke dakaisia weisa. Eno weisake emuama eno weisia weisa, moi kini mi, Danu ibiye Yesu, Dawa ibinua weaisia weisa.  
\v 8-9 Eno weisaro i goi orouini kanisoro orouini emuama i wake nauisake emua arara dariero Deisonibake eno weisa, ama we mune ode ibinero ibake emuama eno ukaisia eno weisa. Eno weisake emuabake eno weisa, iyabairo oi maa weisa. Eno weisake weisa, i miyai irauaiai me ibifisisiie yanu oi ma owere mafeisi weisa. Eno weisaro Deisonini danu orouini emuama i kanisoro oroubairo emenu oi mariekaro kanisoro orouma emua we odairiekaro anisa.   
\s1 Foruini Sairesini emuama Beria goiro anisi wake  
\p
\v 10 Deisonini danu orouini emuama Foruini Sairesi emuabairo ane fakake dumuro we odairiekaro anisi. Ane Beria goiro faki. Beria goiro ane fakike sosi ubarenaro amuisike Godinu irau wake wefisine amuisi.  
\v 11 I Beria Du oroue irauaiai orou. I Desoronaika goi orou ari me. Ibake i Beria goi orouma Godinu wake naukenewaa uisake Godinu buka aine wai ure kakureibisa. Eno ukeibisaro Foruini Sairesi emenu wake baba meo ari eno we imuisake ibake Godinu buka kakurenewaa ukeibisa.  
\v 12 Eno ukeibisa ibake Du orou keuwereini Guriki emeakaini awekaboini emenu imuka yaisina Yesubairo oisa.  
\v 13 Foruma Godinu wake Beria goiro weibibaie moi Desoronaika goi orouma i wake nauisake Beria goiro ane fakake dino uisake koroko wake weibisa ibake eme keuwere Foru arara dauisa.  
\v 14 Eno uisa ibake i Godinu wake naukeibisa orouma Foru we odaisaro ane boudi munike moi orouini ani. Aniro Sairesini Dimodini emuama i Beria goiro ibeibisi.  
\v 15 Foruini danu orouini emuama Adena goiro ane fakaro Foruma danu orou emuabairo eno wei, aniaweke Sairesini Dimodini emua nabairo we odaiawero sabu aafisi wei.   
\s1 Adena goiro ibi wake  
\p
\v 16 Foruma Adena goiro i miyai koro ukaada ibibaie Adena goi orounu wanama ubu uisa godi fefera erike imuka merama sineibi.  
\v 17 Eno ukeibi ibake i Du orounu sosi ubarenaroini moi goiro ku siane ibisa orofaro i Du orouini i Godibairo guriguri ukeka imusu orouini emuabake Godinu wake bunawere weibi.   
\p
\v 18 Moi Efikuriani weaisa orouini moi Sidoiki weaisa orouini emua fou urieke emuabairo Godinu wake wei. Weiro nauisake moi orouma eno weisa, yewa wake goro weeka mima aneme weaku weisa? Eno weisaro nono moi orouma eno weisa, dawa i imusu godibake sibore sianeka wake weakua eno weisa. Foruma Yesu Danu fearike uyari wake weibi ibake eno weisa.  
\v 19 Eno weisake nono Forunu wanaro mukake emenu ku siane ibisa oraaranakuro waure ane oisa. I oraaranu ibiye Areafagu. Iro waure ane oisake eno weisa, anu awoena sibore sianeka wake wearo naufe weisa.  
\v 20 Eno weisake nono weisa, i wake adinaro nauke dakaisike awoena kawama naukaisia weisa. I wakenu ubi iya iwoka sifene ibake weaisia weisa.  
\v 21 (I Adena goi orounu ukeibisa ubue eno, aine wai ure kawama wake weekaini kawama ukekaini emenu ararae ere nauke uke iwoka sifisane ibake naukenewaa ukaada ibeibisa. Ibake i imusu orounu wake naukada i naukeibisa wake aine wai ure weada ibeibisa.)   
\p
\v 22 Eno ukeibisa ibake Foruma i Areafagu orofaro ku siane ibisa ubarenaro uyarike eno wei, Adena goi orou nanu wake nauawe wei, yanu sibore sianeka ukenewaa ukeibaisaro na erakunea wei. Yanu sibore sianeka eraerabusae keuwerero na aaneke enea wei.  
\v 23 Eno weike nono wei, na owere anaadae moi ofereni odeka oisake danu owaowa uke oisaro ibinubai enea wei. I owaowa eno uke oisaro enea wei, yewa ofereni odaisiie iya iwoka me godinua eno owaowa uke oisaro enea wei. Eno weike nono wei, yewa Godibake yabairo weakunea wei.  
\v 24 Yewa Godiye ureini dooini eraerabusa yaisina ubu uia wei. Yewa Godi Dawae ureini dooini yaisina yawokakuba ibake Dawa emema ma enareka uwara ubarenaro ibe dakakua wei.  
\v 25 Eno weike nono wei, emenu wanama Dawabake aneme aneme make dakaisia wei. Danu mane iyanu imu sianekaini me irauaiai ibekaini aneme aneme makakuniba ibake iyanu moko Dawa mune dakakua wei.  
\v 26 Foruma eno weike nono wei, Godima amara una demuinaku munike orofa akaka eme yaisina dawabairoma ubu urieke emenu orofa imusu imusuro odirieke emenu oya abea ibeifeisa ibaini wei ibake eno uke me ibeibaisia wei.  
\v 27 Godima eno uike eme yaisina Dawa yodia ufisake imufisane ibake eno uia wei. Eno weike nono wei, iyabairoma Dawabairo daaba yafa me ubiubinakua wei.  
\v 28 Foruma emuabake nono eno wei, awoenae Dawa Godi ibake iya enaada me irauaiai ibinisia wei. Yanu orounu moi owaowa odeka orouma eno weisaya wei, iyae anu sisia orou weisaya wei.  
\v 29-30 Eno owaowaro eno uke oisaya wei, iyae Danu sisia orou ibake Godi Dawae oi kaibai, o gorudi, o oma, o emenu imukeka eraerabusae i ari me, i ari enoya da imufeisia wei. Eno weike wei, adina orouma Godi iwoka me ibake Godima emua dino uke yare dariea wei. Nono awoena Dawama iya eme yaisinabake eno buna wake weakua wei, yanu merama merama ukeka imuke mediawe eno weakua wei.  
\v 31 Godima, Danu odi odoro yewa orofa akaka eme yaisina moi Mibairo gienabu kodo ufekua wei. I Mima feariro nono ma uyari ibake iya yaisina Dawa iwoka ufene ibake eno uia wei.  
\v 32 Foruma i feareroma uyareka wake weiro nauisake moi orouma dawae meo weakua weisa. Eno weisaro nono moi orouma iyanu arara wake nono wefakuro naufeisia weisa.  
\v 33 Eno weisaro Foruma i wake we me sinike i orou medirieke aweawero isare ani.  
\v 34 Aweawero isare aniro moi orou dawabairo anisake emenu imuka yaisina Godibairo oisa. Daionisia weaisa mi dawa i Areafagu kodo ureka dai mi dawaini moi aweka danu ibiye Damarasi dawaini nono moi orouini emuama Forubairo anisake emenu imuka yaisina Godibairo oisa.   
\c 18  
\s1 Foruma Korinida goiro ani wake  
\p
\v 1-2 Foruma Adena goi medike Korinida goiro ane fari. I goiro moi Du mi danu ibiye Akuira dawaini danu awekaini iro ibeibisi. Akuira dawa doka orofae Fonidia. Akuira danu awekanu ibiye Fasira, enoba emuama Idari orofaroma awoena Korinida goiro faki. Moi mi danu ibiye Korodiasi Sisa, dawae i Romani orofa yawokeibi dai mi. Dawama Du orou yaisina emua Romani goiro ibeka dawa arara daui ibake weiro ia sika. Ia sikaba i Romani goi meisike Korinida goiro faki. Fakiro Foruma emua efiane ane emenu uwararo ani.  
\v 3 Foruini Akuiraini emenu ukeibisi waiya demui. Emenu waiyae farai uwara wau yanake kariseka waiya ukeibisi enoba Foruma emuaini demuiro ibiro i waiya ukeibisa.  
\v 4 Moi sabadi odo odoro aine wai ure Du orounu sosi uwara ubarenaro amukeibike Du orouini Guriki orouini wake wake we makanada nono moi Du orouini Guriki orouini emuama Forunu weibi wake naukeibisa.   
\p
\v 5 Dubuenaro Sairesini Dimodini emuama Masadonia orofaroma idua faki. Fakiro Foruma moi Du oroubairo eno wei. Yesue ya Du orounu ma wirokeka miya wei.  
\v 6 Eno weiro i Du orouma Forunu wake nauke da uisake wasai imuka imuisake Yesubake merama wake weisa. Eno weisaro Foruma uyarike i orou emua medifiane ukaada ibake danu wau ure bu yaraada eno wei, yae Godi arara dakaisaba ie yanu merama, nanu merama meya wei. Eno weike nono wei, eweirae Du orou medimiauke i Du me imusu oroubairo animauke Godinu irau wake weimaua wei.  
\v 7 Eno weike Foruma i Du orounu sosi medike Daidasi Dasidasinu uwarae i sosi udiro ibiba danu uwara ubarenaro ane amui. Daidasi Dasidasie Godinu wake naukeibi mi.  
\v 8 Nono Kurisifasi, dawae i Du orounu sosi yawokeibi mi ibake danu uwararo ibeibisa orou yaisinaini moi Korinida goi orouini emenu imuka yaisina Yesubairo oisake emuabairo babadaido uisa.  
\v 9 Moi odo dumuro Foruma nauka aine ibeebe kube eribaie Yesuma eno wei, ia da siake wake da muu ua wei.  
\v 10 Eno weike wei, abairo ibineba emema da umekaisaya wei. Eno weike wei, Na imukaisa orou keuwere yewa goiro ibinisa wei.  
\v 11 Foruma i kube eri ibake Korinida goiro moi oyaini moi oya abanaro ibaada aine wai ure i oroubairo Godinu irau wake weibi.   
\p
\v 12 Moi mi danu ibiye Gario dawama Akeiya orofa yawokeibibaie i Du eme keuwerema Foru ufisane uyakake Foru mukake i kodo ureibisa oroubairo waure ane oisa.  
\v 13 Emuabairo waure ane oisake dawabake eno weisa, yewa mima eno weakua weisa, Godi mane imukeibiawe weakuke iyanu darawadu ma merama ukakua weisa.  
\v 14 Eno weisaro Foru danu ararae nono wefine uiro i kodo yawokeibi mi Garioma Forunu wake weeka daaba enare kuurike i Du oroubake ma owerike eno wei, dawa aneme merama ukinu wei? Eno weike nono wei, dawa waira uke dakinuke eme ure dakinuba kodo da ure yamaua wei.  
\v 15-16 Eno weike nono wei, ya Du orounu darawadu wake ma merama uiba yanu baubauwaka oroubairo merama wake weifibai nauke daueroma anemebake kodoro odifone aare weaisa wei. Eno weike danu kodo ureibi uwara ubarenaroma emua yoweriero anisa.  
\v 17 Anisake awoena Du orounu sosi yawokeibi mi danu ibiye Sosidinisi dawa mukake usima ureibisaro Garioma i ureibisabai erike we kuure daurie.   
\s1 Foru Anidiyoka goiro nono owere ani wake  
\p
\v 18 Foruma odo keuwere Korinida goiro ibeebe nono i goi medike boudiro amuike Fasiraini Akuira we murieke Siria orofaro anifine ui. Aneebe Sinikuria goiro farike Foruma Godibairo adinaro we bou ui ibake danu fouma idi yaisina garuru ui. Ie i Du orounu bisaraba ibake eno ui.  
\v 19 Eno uiro nono iroma Efesa goiro ane faka. Fakaro Foruma Fasiraini Akuira emua iro medirieke i Du orounu sosiro amuiro dawaini i Du orouini wake wake bunawere we makaneibisa.  
\v 20-21 I Du orouma we kuukabaie Foruma meya weike wei, Godima na nono owemane wefekuie idua owemauke yabairo nono famaua wei. Eno weike ane boudiro amuike Efesa goiroma ani.  
\v 22 Anike aneebe Sesaria goiro farike i goiro Godinu wake naukeibisa oroubairo amuke anike emuaini demuiro yaure ibisa. Farike emuaini yaure ibeebe i orou medirieke Anidiyoka goiro isare ani.  
\v 23 Anidiyoka goiro isare ane farike Anidiyoka goiro ibeebe nono i goi medike Gareisiaini Firigia orofayai goi goiro enaada Godinu irau wake weibike i Godinu wake naukeibisa orounu imukeka ma buna urie.   
\s1 Aforasima Korinidaini Efesa goiyairo ani wake  
\p
\v 24 Nono dubuenaro moi Du mi danu ibiye Aforasi. Nono danu goiye Arekisania. Dawa i goiroma Efesa goiro ane fari. Dawae irau wake weibike Godinu buka kakurada iwoka daiwere sineibi mi.  
\v 25 Adinaro moi orouma dawa Yesunu imukeka we ma iwoka ukeibisaro naukeibi. Naukeibike dawae Dioninu babadaido ukeka mane iwoka uike ibake Yesunu imukeka yaisina dawa iwoka da sini.  
\v 26 I mima i Efesa goiroma farike danu imuka yaisina irauaiai ui ibake i Du orounu sosiro amuike Godinu wake bunawere we ma iwoka urie. Eno we ma iwoka ukeibiriero Fasiraini Akuiraini emuama danu we ma iwoka ukeibi wake nauisike i mi we mukike Godinu imukeka yaisina dawabake we ma iwoka ukenewaa uisi.   
\p
\v 27 Nono dubuenaro Aforasima danu arara Akeiya orofaro anifine ibake i Godinu wake naukeibisa orouma owaowa uisake i Akeiya orofaro Godinu wake naukeibisa oroubairo make odaisada eno weisa, yewa minu ukeka sineka irauaiaiba dawa we muawe. Owaowaro eno owaowa yanake oisake make odaisa. Eno uisaro Aforasima iroma farike Godinu wake naukeibisa orounu imukeka ma irauaiai urie.  
\v 28 Dawae Godinu buka munaada iroma Yesue i Du orounu ma wirokeka Miya eno bunawereroma we ma iwoka ukeibirie ibake i Du orouma dawabairo wake moi we dauisa.   
\c 19  
\s1 Foruma Efesa goiro ani wake  
\p
\v 1-2 Aforasima Korinida goiro ibeibiro nono Foruma oraara nauwaro eneebe Efesa goiro isare ane fari. Isare ane farike moi Godinu wake naukeibisa orou fou urieke emuabairo eno wei, ya Godi imukeibisa odoro Godinu Imumu Irau yanu imuka ubarenaro isariba me wei? Eno weibaie aneme weaku weisake nono weisa, Godinu Imumu Iraude anemerabu weisa?  
\v 3 Eno weisaro Foruma ma owerike eno wei, ainanu imukeka mukake babadaido uisa weibaie emuama Dioninua weisa.  
\v 4-6 Eno weisaro Foruma wei, Dionima eno weia wei, yanu merama merama ukeka yaisina imuke mediaweke nanu umuro aafeku Mi Dawa mane imuawe Dionima eno weia Foruma wei. I Miye Yesu Keriso Foruma eno weiro i orou nauisake emuabairo Yesunu ibiro babadaido uisaro Foruma wana emenu iiri duboro odi. Foruma eno uiro Godinu Imumu Irauma emenu imuka ubarenaro isariro wake imusu imusu weisake Godinu wake we bou uisa.  
\v 7 Eme yaisina duwero (12) emuama ibai eno uisa.   
\p
\v 8-10 Foruma sabadi odo odoro aine wai ure i Du orounu sosi uwara ubarenaro amukeibike Godima iya irauaiai yawokakunia weibi. Manabe kai buuba eno ukeibiro moi orouma emenu imukeka ara ukaada imuke dauisake i ku siane ibisa orou yaisinabake eno weisa, yewa Yesunu daabae meramawereya weisaro ibake Foruma Godinu wake naukeibisa orou we murieke waure anirie. Waure anirieke i moi mi Diranasi danu sikuru uwara ubarenaro ku uke ibaada aine wai ure guriguri ukaada Godinu wake weada we ma iwoka ukeibirie. Oya raarayai eno ukeibiro i Eisia orou yaisinaini Du orouini Guriki orouini emua yaisinae Yesunu wake Foruini danu orouini emuama weisaro nauisake moi orou Godinu wake nauisake naukeka orou ari sikaro nono moi orou Godinu wake nauisakema nono emua arara me Godinu wake naukeka ibake emuae nauke dakeka orou ari sika.   
\s1 Sikiwa danu amarakunu wake  
\p
\v 11 Godima Foru buna daiwere mairo Foruma buna ukeka daiwere ukeibi.  
\v 12 Eno ukeibi ibake danu muko o wauma mukake arama uke ibisa orounu ofero oisaro sabu irau sikaro seidaninu merama imumu emenu imuka ubarenaroma amuisake anisa.  
\v 13 Eno uisaro moi Du me imusu wada barau ukeibisa orouma Yesunu ibiro weisake seidaninu merama imumu we yowekake eno weisa, Forunu weaku Mi Yesunu ibiro weaisia amuaweke aniawe weisa.  
\v 14-15 Moi Du orounu ofereni odeka mi danu ibiye Sikiwa danu amaraku yaisina sewenima (7) eno uisabaie i seidaninu merama imumuma eno wei, Yesu Dawae na iwokaya weike nono wei, Foruini na iwokaro nono yade abo orouro wei?  
\v 16 Eno weibaie i seidaninu merama imumu bobo mi iroma bibi urike amuike i amaraku yaisina seweni (7) urieke emenu runeka wau mune sianike ure yanake urie. Eno urie ibake i orouma uwara ubarenaroma ofe mane aweawero sabu anisa.  
\v 17 I Efesa goi orou yaisina, Du orouini Guriki orouini emuama ibai nauisake ia daiwere sikake Yesunu ibi we ma irauaiai uisa.  
\v 18 Awoena Godinu wake naukeibisa orou keuwere Foruini danu oroubairo fakake emenu diwari urekaini merama merama ukeka sineka yaisina we ma boroo yaka.  
\v 19 Eno uisake moi wada barau ukeibisa orouma emenu wada barau eraerabusaini bukaini waukake demui orofaro ku siane oisake inaama yakaro yare me sini. I emenu wada barau ukeibisa bukae keuwere. I bukanu make oi munekae daiwere deni dausini kina (K1000).  
\v 20 Eno uisake Godinu wake daiwere weisaro nauisake eme keuwere emenu imuka yaisina Godibairo oisa.   
\s1 Efesa goi orouma wake gorowere weibisa wake  
\p
\v 21 Nono dubuenaro Godinu Imumu Irauma Danu irau imukeka Forubairo mairo Foruma imukama we imuike eno wei, Masadoniaini Akeiya orofayairo fare animauke Derusaremu goiro animaua eno we imuike wei, nono dubuenaro iroma Romani goiro animaua wei.  
\v 22 Foruma eno weiro danu unu koreka miyai Dimodini Erasidasini emua Masadonia orofaro we odairiero anisiro Foru dawa Eisia orofaro moi odoyai iro ibeiari.  
\v 23 Dawa iro ibeiari odoyairo eme keuwerema Godinu wake naukeibisa orouini urafisane ukeibisa.  
\v 24 Moi mi danu ibiye Dimidirisi dawama eno weibi ibake emuaini urafisane ukeibisa. I Mi Dimidirisi danu waiyae i ba me godi, Daiena danu okoa uwarananaku oi ubu ukaisa i siriwama ubu ukeibi. Ie danu oi waiya. Moi orouma i waiya ukeibisake oi daiwere muneibisa.  
\v 25-26 Ibake eno ukeebe Dimidirisima i danu waiya ukeibisa orou weiro fare ku uisaro emuabake eno wei, ya yewa waiya ukaisike oi daiwere munaisia weike nono wei, Foruma eno weakua wei, wanama ubu ukeka godiye ba me godiya weaku ibake yewa Efesa orouini i Eisia orofa goi goiro ibinisa orou keuwere danu weaku wake naukaisake i wanama ubu ukaisa godi medaisaya wei.  
\v 27-29 Eno weike nono wei, dawama eno weakuba iyanu oi muneka waiya isafekua wei. Eno weike wei, i Eisia orofa orouini yewa orofa akaka orou yaisina i yanu ubu uisi aruma godi Daienanu dai sosi uwara da imufeisake dawabake sibore da siafeisaro danu ibi isafekua wei. Dimidirisima eno weiro danu goi orou nauisake dino daiwere ukaada daiwereroma eno weisa, Efesa goinu godi Daiena dawae daiwereya weisa ibake Efesa goi orou yaisina emenu imukeka imusu imusu imuisake i dai ku ukeibisa orofaro sabu anaada Masadonia miyai Geiasini Aridikasi emua yabariekake ma youre anaada i ku siane ibisa oroubairo waure anirieka. I miyaie Foruini demuiro anisa ibake eno uke yarieka.   
\p
\v 30-31 Foru danu arara i ku uke ibisa orofaro anifine uiro nono moi Godinu wake naukeibisa orouma danu daaba dadau uisaro moi dai Eisia orofa yawokeibisa orou emuae Forunu naiyemuku ibake Forubairo wake we odaisake eno weisa, iro da ania weisa ibake Foru iro ane daui.   
\p
\v 32 Moi orouma emenu sara wake gorowere weibisaro nono moi orouma emenu imusu imukeka wake gorowere weibisa. Eno areare weibisa ibake i me sara faka orou emua aneme aneme weifeisa wakenu ubi emua iwoka me ibake eno we imuisa, iya anemebake farisi eno we imuisa.   
\p
\v 33-34 Moi Du orouma i mi Arekisana ma youkabaie i orou emenu ibooro ane enare ibaada i oroubairo Arekisanama moko wake wefine wana ei mamiro i orouma dawa Du mi ere karana uisake wake goro daiwereroma eno weisa, Efesa goinu godi Daiena dawae daiwerea eno weisa. Ibake i wake sia we naukada ibisaro eweka naisa me sini.   
\p
\v 35 Eweka naisa me siniro i goiro owaowa odeka mima wana ei mameibi ibake i orouma wake goro meisaro i mima eno wei, iya Efesa goi orouma Daienanu sosi uwara yawokaisike i ureroma dooro isari eno iifa oma yawokeibaisiro i orofa akaka eme yaisina emua iwoka sinaisaya eno wei.  
\v 36 Emua ibai iwoka sinaisaya wake goro mediaweke merama ukekama da uawe wei.  
\v 37 Eno weike nono wei, Foruini danu orouini emua iyanu godinu eraerabusa waira uke dakisake iyanu godibake merama wake we dakisaya wei.  
\v 38 Eno weike nono wei, Dimidirisini danu orouini emuama meo wayai wake wefisane ufeisaie i kodo ureka oroubairo anifeisake emenu wayai wake iro wefeisaya eno wei.  
\v 39 Nono yama wayai wake wefoisaie i kodo ureka oroubairo wefoisaya wei.  
\v 40 Eno weike nono wei i Romani orofa yawokeibisa orouma iyanu urane rarane ukeka wake naufeisake fanisi mamisaisa wei. Ibake eno weike wei, iyanu urane rarane ukekae ba meya wei.  
\v 41 Eno weike i orou yaisina we odairiero fiake anisa.   
\c 20  
\s1 Foruma Masadoniaini Gurisi orofayairo ani wake  
\p
\v 1 I ku siane ibeebe nono dubenaro i wake gorowere weibisabai me siniro Foruma weiro Godinu wake naukeibisa orou dawabairo ane fare ku uisaro Godinu wake yarieke emua idua medirieke Masadonia orofaro ani.  
\v 2 Masadonia orofaro anike iroma i goi goiro Godinu wake naukeibisa orounu imukeka ma irauaiai ukeibirieke nono emua medirie.  
\v 3 I Masadonia orofa medike Gurisi orofaro ani. Ane farike manabe kai buuba iro ibeebe iroma Siria orofaro anifike boudiro amufike anifine ui. Eno uibaie moi orouma dawa ma feafisane daaba yodia ukeibisaro nono moi orouma ibai weisaro nauike anifine ukeibi ibai medike eno wei, Masadonia orofaro owemauke duero umuma animaua wei.   
\p
\v 4 Foruini moi orouini anisa. Moi mi Safadu, Beria goi mi dawae Firusunu amara dawaini anisa. Aridikasini Sekunadaini emuae Desoronaika goi miyai emuaini demuiro anisa. Geiasi dawae Debe goi mi dawaini anisa. Dimodi emuaini anisa. Emua demuiro anisaro nono moi Eisia orofa miyai Disikasini Dorofimasini emuae i orouini demuiro anisa. Foruini i orouini emuama Gurisi orofa meisake Firifai goiro ane faka. Ane fakaro na Rukima Firifai goiro emua yawokeibisararo idua faka.  
\v 5 Iro ane fakake Foruini kowede anisa orouma Firifai goiroma Doroasi goiro isare anisake iya yawokeibisa.  
\v 6 I Godima Isaraera orounu Idifiroma waure aneka banau uruna odo me siniro iyama boudiro amuisike Firifai goiroma Doroasi goiro isare anisi. Iro aneebe aneebe daabaro odo fo (4) me siniro Doroasi goiro idua ane faki. Iro ane fakike i goiro odo seweni (7) i emuako isare ane ibisa orou iro emuaini kowede ibeiyaki.   
\s1 Forunu dubuena kai awaawa Doroasi goiro ani wake  
\p
\v 7 I dai fura badoaro Babaenu iwaini ofe ifene fakike ku uisiro Foruma Godinu wake wei. Foru dawa wairo anifeku ibake i wake fefera weibiro manabe farike fare amuke aare okoro fari.  
\v 8 I uwaranu eku dubodei ooru buubaro yaure ibisiro ramefananaku biake oisaro edoro ukeibisa.  
\v 9 Moi awoena mi, danu ibiye Yudikasi dawama uwara funefune aareka ebaro yaure ibaada nauka kunawere aine ibeebe biruike eu dooro isare urike feari.  
\v 10-11 Eno uiba ibake Foruma sabu isare anike i mi yabakada eno wei, wake goro mediawe wei, awoena dawa imu sianada wirokakua wei. Eno weiro uwara dubodei ooruro nono amuisiro Foruma Babaenu iwaini ofe naka naka uiro isi. Ise me sikiro Foruma Godinu wake i dumu yafa weibiro wai uriro idua medi.  
\v 12 Idua mediro i ku uke ibisa orouma i awoena mi mukake imuka irauaiai uke emenu uwara uwararo anisaro nono iyama emua meisike idua anisi.   
\s1 Foruma Doroasiroma Mairidasiro ani wake  
\p
\v 13 Iya ane boudi ubarenaro amuisike anisi. Anisiro nono Foru dawae udiro umuma ani. Iyama boudiroma Foru Eisosa goiro fou ufene anisi.  
\v 14 Eisosa goiro ane fakike koro ukeibisiro Foru farike boudi ubarenaro amuiro Midarina goiro anisi.  
\v 15 Iroma anisike Kiosa orofa ma bereisike ane abanaro aisike nono wai uriro uyakike Samosa goiro ane faki. Ane Samosa goiro fakike aneebe aneebe daabaro dumu siniro aisi. Aisike wai uriro uyakike ane Mairidasi goiro faki.   
\s1 Foruma Efesa goiro Godinu wake naukeibisa orouini bisara oroubake arie wei wake  
\p
\v 16-17 Foru dawa arara me i Eisia orofaro ibeka. Ibake danu ararae moi Du orounu banau odoe Fenidikosi weaisa, ibake i odoro danu ararae i Derusaremu goiro ibifine ibake Efesa goi ma berefine ukaada i Efesa goiro sosi yawokeibisa oroubairo wake fo we odairo dawabairo aare faka.  
\v 18-19 Aare fakaro Foruma eno wei, nanu wake nauawe wei, na yaini ibisararo yama nanu ukeka sinekabai iwoka sikaya wei, ibake nanu fare odoroma Godinu waiya nanu imuka yaisina iro odeke ukeibisara ibake ii weada rooro uke dakeibisarake Godinu waiya irauaiai ukeibisaraya wei. Eno ukeibisara ibake i Du orouma na ma feafokonebake ukeibisa merama ure yanake odo odo fareibiie Godinu waiya ukenewaa ukeibisaraya wei.  
\v 20-21 Foruma eno weike nono wei, yaini ibaada Godinu irau wake yanu sosiroma yanu uwara uwararo weibisarake i demui wake i Du orouini i Guriki orouini emuabairo enaenari weibisarake yanu merama merama ukeka imuke mediaweke yanu imuka yaisina iyanu Dai Waria Mi Yesu Keriso Dawabairo odiawe eno weibisaraya wei.  
\v 22 Eno weike nono wei, Godinu Imumu Irauma nabairo weakuba ibake awoena owemauke Derusaremu goiro animaua wei. Iro aneme aneme nabairo ufeisaie na iwoka meya wei.  
\v 23 Eno weike wei, Godinu Imumu Irauma nabairo eno weakua wei, moi goi goiro anifakuie a ana ebaro odifeisake meramawere uke yamekaisaya eno weakua wei. Eno uke yamekaisaie Na da medimauanea Foruma eno weike nono wei, nanu ibeka irau da imumaubaro wei.  
\v 24 I Dai Waria Mi Yesunu makara waiya gienabu uke masoamane animaua wei. Moi oroubairo Godinu irau wakeini Danu irau unu korekaini wemane animaua wei.   
\p
\v 25 Foruma eno wei, adinaro yabairo ibaada Godima ya yawokakuneba Danu sisia sirorari orou sinaisa wero nauisaya wei. Foruma eno weike nono wei, awoena moi wake da wemauro yama nanu iboo naisa nono da efokaisaya wei.  
\v 26-27 Eno weike wei, moi dai me wakenaku mane wemaua wei. Godinu irau wake yabairo wenewaa ukeibisaraba ibake aina ainama ibeebe yanu imuka yaisina Godibairo da odifoisake feafoisaie i dawa nanu merama meya wei.  
\v 28 Godima ya yawokeka orou we mune odirieba ibake yanu onarou erenewaa ufoke iyanu Godinu wake naukaisa orou yawokenewaa ufiakau wei. Godima Danu wake naukaisa orou Yesunu iwama make mune odirie ibake Godinu wake emuabairo weawero naufisa wei.  
\v 29 Foruma eno weike nono wei, na animauro moi merama orouma yaini urafeisaya wei. (Waa boroma gasira ifine anakuro fiake ia iyare anaisa i ari) moi merama orouma uyafeisake Godinu wake naukaisa oroubairo fafeisake we ma berafiakaisaya wei.  
\v 30-31 Moi meomao orouma uyafeisake meo wake wefeisake we irufiakaisaro moi orouma emenu umuro aninao ufeisaba emua yawokenewaa ufiakau wei. Nama yabake imukari ukaada ii weada aine wai ure Godinu wake wenewaa ukeibisaraya wei. Nono awoenae ya Godibairo odimiauro Godima ya yawofiakua wei.  
\v 32 Godinu wake naukenewaa uforo yanu imukeka ma irauaiai ufiake Danu we mune odirie orou yaisinabairo yanu ibeka orofa ma giena uke odifiakua wei.   
\p
\v 33-34 Nama moi minu oini wau ereroma rooro uke naisa ure owere ma owere uke da ueke nanu wanama waiya ukaada naini nanu orounu urunaini wauini oima make muneibisaraya wei.  
\v 35 Ibake nanu ukeibisara i ari eno ufoke i buna me orou unu kofiakane weakunea wei. Eno weike nono wei, Yesunu wake imuke eawe wei, Yesuma eno wei, i erabusa makeka minu rooroe daiwere nono i muneka minu rooroe okoanakua Yesuma eno weia ibai imuke eawe Foruma eno wei.  
\v 36 Foruma eno weiro emenu ifoma kududu yanaisake guriguri uisa.  
\v 37-38 Eno uisake nono uyakake ii weada Foru yabaisake oo ukaada dawa nono da efeisia eno we imuisake imukari daiwere ukaada Foru boudi ubarenaro waure ane oisaro ani.   
\c 21  
\s1 Foruma Derusaremu goiro ani wake  
\p
\v 1 Efesa goiro sosi yawokeibisa orou iro mediriekike boudi mukike Kosi goiro anisi. Iro ane aisike wai uriro uyaki. Uyakike ane Rouda goiro ane faki.  
\v 2 Ane fakike nono iroma Fadara goiro ane fakike iyanu boudi idua meisi. Meisike moi Fonisia orofaro aneibi boudiro amuisike iro anisi.  
\v 3-4 Aneebe ekara ena ewa ena dawararo naisaro Saifurasi weaisa dai orofa eraada ma bereisike Siria orofaro anisi. Aneebe i Daira weaisa goiro faki. I boudiro erabusa mune uwaforo odifisane ibake idua ane enaka. Ane enaka ibake isare anisike i goiro Godinu wake naukeibisa orou yodia ukeebe emuabairo fura demui emuaini idua ibisi. Godinu Imumu Irauma Danu wake naukeibisa oroubairo weiro i orouma Forubake eno we iifa ukaada eno weisa, Derusaremu goiro da ania weisa.  
\v 5-6 Eno weisaro emuaini ibeibisiro i fura me siniro Godinu wake naukeibisa orou, emuaini awekaboini amarananakuini yaisina emuama iya waure ane dawara udiro odaisaro gibudiro ifoma kodudu yanakada guriguri uisike arie weisike iya boudi ubarenaro amuisiro emua nono owere goiro anisa.   
\p
\v 7-8 Daira goi meisike Dorimai goiro ane faki. Ane fakike i goiro Godinu wake naukeibisa oroubairo awaawa emuaini demuiro uisike iro aisike wai uriro uyakike Sesaria goiro anisi. Ane fakike boudi meisike Firifunu uwara ubarenaro ane amuisi. Firifu dawae Godinu wake weibeka aroro sisa mi. Firifu dawae erabusa naka naka ufisane we mune odirieka emeaka seweni (7) i afasoro orou unu kofiakanebake dawae i moi mi. I mi danu uwara ubarenaro yaure ibisi.  
\v 9 Firifu danu karu aruaruma fo (4). I aruarumae eme mune me karu ibaada Godinu wake fo we odaiseibisa.   
\p
\v 10 I uwararo ibisibaie Godinu moi we bou ui mi danu ibiye Agabasi dawa Diudia orofaroma iyabairo fari.  
\v 11 Iyabairo farike Forunu gabagana wau fifini ari gabagana feka munike danu onaminu umu wanaro uwane karisada eno wei, Godinu Imumu Irauma eno weakua wei, i Derusaremu goiro ibinisa Du orouma yewa wau feka bobo mi mufeisake i imusu orounu wanaro mame odifeisaya eno weakua wei.  
\v 12 Eno weiro iyama nauisike i goi orouini iyaini iyama Forubake eno weisi, iro da ane ibia weada ii weisi.  
\v 13 Eno uisiro Foruma wei, anemebake ii weaisa wei? Eno ukaisa ibake na imukari daiwere ukakunaraya wei. Eno weike nono wei, nanu imuka yaisina i Derusaremu goiro animane imukakuneba ibake animaua wei. Animauro na ana ebaro odifokaisaie iraua wei, nae Yesunu ibibake ma feafokaisaie iraua wei. Iduaroma nanu imuka yaisina aneka imuke ibinea wei. Eno weiro iya nauisi.  
\v 14 Foru danu imuka ara ui ibake meisike eno weisi, Yesu, Anu arararo uaro iya efe weisi.   
\p
\v 15-16 Iyanu Sesaria goiro ibeka odo me siniro iyanu eraerabusa fira kana uisike Derusaremu goiro amuke aneebe iro ane faki. Moi Sesaria goiro Godinu wake naukeibisa orouma iya Sesaria goiroma Derusaremu goiro waure amuke ane faki. Iro ane fakike Neisonanu uwararo we waure ane odiisa. Neisona dawae ekara ena ewa ena dawararo naisaro Saifurasi weaisa dai orofa mi. Dawae adinaroma Yesunu umuro eneiareibi mi. Ibake Neisonabairo ibifene waure aare odiisa.   
\s1 Foruma Deimisi efine ani wake  
\p
\v 17 Derusaremu goiro fakiro i Derusaremu goiro Godinu wake naukeibisa orouma iyabake arie wake daiwere weisa.  
\v 18 Yeka moi odoro Deimisini i Godinu wake naukada yawokeibisa orou yaure ibisaro emuabairo faki.  
\v 19 Foruini iyaini emuabairo fakiro Foruma emua yaisina arie wake weike Godinu wake i imusu oroubairo weibisia eno yarie, Godima Danu imukekaini danu buna makara ibake i Du me imusu oroubairo Godinu wake yaisina we eneibisararo i imusu orouma nanu wake naukada emenu imuka yaisina Godibairo odeibisaya eno wei.  
\v 20 Foruma eno weiro nauisake Godi we ma irauaiai uisa. Eno uisake Forubake eno weisa, kaka, iyanu wake naua. I Du orou keuwere dausini iyanu wake nauisake emenu imuka yaisina Godibairo oisaya weisa. Eno weisake nono weisa, i orou yaisina Mosesinu darawadu wake imukenewaa ukaisaya weisa.  
\v 21 Moi orouma emuabake eno weisa, Foru dawa arara me Mosesinu darawadu emenu meo wake eno weisa. Foru dawa arara me iyanu Du orounu bisaraya eno weisa. Eno weisake weisa, Foruma eno weakua weisa. Yanu amarananakunu ofe da kuuawe weakua weisaro yewa Du orouma i wake nauisa, moi Du Godinu wake naukeibisa orouma eno weisaya weisa.  
\v 22-23 Eno weisake ibake aneme ufeisi weisa? Anu aarekae naufeisa enoya iyanu iifa wake naua weisa. Iyabairo eme una fo (4) Godibairo we bou uisaba awoena me yaure ibinisaya weisa.  
\v 24 I orou we muyanake emenu ofereni odeka oima make muaro emenu bokai idi garuru ufeisa orou emenu i waiya ufeisa moko oi mayana weisa. Emuaini dai sosiro aniake Mosesinu iifa urokeka aduama eno uke emua uroyana weisa. Eno ufakuie i orouma efeisake Foru dawa Mosesinu darawadu erenewaa ufeku imufeisaie iraua wefeisaya eno weisa.  
\v 25 Nono Godinu wake naukaisa imusu orou iyanu imukeka owaowa yanake oisike emuabairo odaisi. Iyanu imukekae eno imukaisi, i meo wanama ubu ukaisa godibake ofereni odeka uruna da iawe, iwa da iawe, i mimi ufoisaro iwa fare dafeku abu da iawe, aruma aweka da enare odiawe. Iyanu imukekae eno oisike Godinu wake naukeibisa imusu oroubairo odaisia weisa.  
\v 26 Eno weisaro Foruma emenu wake naui. Ibake yeka moi odoro Foruini i eme una foini (4) emuama i dai sosi uwararo demuiro anisake iifawere urokeka aduama uroisake dubuenaroma i dai sosi uwara ubarenaro i ofereni ode sibore sianeka oroubairo amuisa. I ofereni ode sibore sianeka orouma emenu iifa odo idua ubiroma odo seweni (7) me sifiro Foruini danu orouini emuama ofereni odeka abu odifisaro efisane ibake emuabairo amuke ane faka.   
\s1 Foru dai sosiro yabaisake umu wana senima uwaka wake  
\p
\v 27-28 I iifa odo seweni (7) me sifine ukeibiro moi Eisia orofa Du orouma Foru dai sosi uwara ubarenaro ekake eme keuwerebairo Forubake meo wayai wake weisa. I orouma Foru yabaisake eno weisa, Isaraera orou ya iya unu koawe weisa. Yewa mima iyaini Mosesinu darawadu wakeini dai sosi uwarabake merama wake weakuro eme keuwere danu wake naukaisaya eno weisa. Dawama Guriki orou dai sosi uwara ubarenaro waure fare odirieba ibake iyanu iifa uwara ma merama uia eno weisa.  
\v 29 Adinaro Foruini moi Efesa goi mi danu ibiye Dorofimasi emuama Derusaremu goiro eneibisiro ekake ibake Foruma i Guriki mi iyanu dai sosi uwara ubarenaro waure amuia eno ma nuna ukaada we imuisa ibake eno weisaro i Derusaremu goi orou yaisina i wake nauisake ararua sirie.  
\v 30 Ararua daiwere sirieke Forubairo ane fakake danu wanaro munaada dai sosi uwara ubarenaroma aweawero ma youre anisa. Aweawero ma yaure anisaro i dai sosi uwara aisame sabu ko uka.  
\v 31-32 I orouma Foru ma feafisane ureibisabaie dai ame yawokeka mibairo fare weisaro nauike weiro dawaini kafudeni orouini ame orouini eno emuama sabu anisa. Ane fakabaie i Du orouma dai yawokeibisa orou eriekake Foru ureibisabai idua meisa.   
\p
\v 33 I ame yawokeibirie dai mima farike Forunu umu wana senima uwanike weiro senima Forunu wana uwane karisa. Ame yawokeibirie dai mima eno wei, yewa mi aneme ukinu weike dawa abo mi wei?  
\v 34 Eno weiro moi orouma moi meo wayai wake weisaro nono moi orouma imusu wayai wake weisa. Emenu wake goro daiwere weibisa ibake i ame yawokeibirie dai mima eno we imui, ide aneme wake weaisa we imuike weiro i ame orouma Foru waure emenu uwararo anisa.  
\v 35-36 Waure ane emenu uwara adiforo fakaro i Derusaremu goi orou ararua daiwere siriero eno weisa, i mi ma feaa weisa ibake i ame orouma Foru emenu owairo oisake uwara ubarenaro waure amufisane ukeibisa.   
\s1 Foruma danu waiya ukeibi ubi danu onami we ma boroo yari wake  
\p
\v 37 I ame orouma Foru mukake owairo oisake uwara ubarenaro waure amufisane uisaro Foruma i ame yawokeibirie dai mibairo eno wei, moi wake abairo wemauba me wei? Foruma eno weiro i ame yawokeibirie dai mima imuka foria ukaada eno wei, a Guriki wake iwoka sinaku wei?   
\p
\v 38 Ae yeka Idifi miba imusu mi wei? Yeka miye uraneka orou fo dausini (4,000) murieke emuaini gaemani orouini urakake eme ibe me orofaro waure anirie mi iduaya wei.  
\v 39 Eno weiro Foruma wei, nae yeka mi meya wei. Nae Du miya wei. Nae Sirisia orofaro Darasu goi miya wei. I Darasu goiye dai goiwereya wei. Yewa oroubairo nanu wake wemaua wei.  
\v 40 Eno weibaie i ame yawokeibirie dai mima nono wei, anu wake wearo emua naufisa wei. Eno weiro Foruma adifo duboro enare ibike wana ei mamaada eno weiro i wake gorowere weibisabai idua meisa.   
\c 22  
\p
\v 1 I orouma wake goro weibisabai meisaro Foruma Du orounu wakeroma eno wei, babaemuku kakamuku naburaka, nanu moko wake wemaro nauawe wei.  
\v 2 Eno weiro emenu ba wakeroma weibiro nauisake wake goro meisa.  
\v 3 Meisaro Foruma eno wei, nae Du mi. Nanu amaema na Sirisia orofa Darasu goiro dokararo ibeibisaraya wei. I dai mi Gameria dawae na iyanu akaemukunu darawadu wake we ma iwoka ukeibikaraba ibake Godinu darawadu imukenewaa ukeibisara. Yama awoena Godinu darawadu imukenewaa ukaisa i ari nae eno uke imukenewaa ukeibisaraya wei.  
\v 4 Adinami nauwaro Godinu wake naukeibisa orou emua ma merama uiake emenu feareka daaba yodia ueke emeini awekaboini yaisina ana ebaro mune ane odiaya eno wei.  
\v 5 Eno ue ibake i dai ofereni ode sibore sianeka mini danu kanisoro orou yaisina ibai iwoka sinaisaya eno wei. I kanisoro orouma emenu imukeka wake owaowa uke oisake iyanu ba Du orou mumiane nabairo i owaowa mayakaya wei. Mayakaro Damasikasi goiro i Godinu wake naukeibisa orou senima wanayai mune ane derena enaro uwamiake Derusaremu goiro waure aamiaro fanisi mafiakane ibake anea Foruma eno wei.   
\s1 Foruma danu imuka yaisina Yesubairo odi wake  
\p
\v 6-7 Foruma nono eno wei, na daabaro aneke Damasikasi goiro famane aneibisarabaie edoro daiwere ureroma isare aariro nanu ubu ofe edorowere mane uiro dooro isare ukara. Ukararo ureroma wake isare aarike eno wei, Soro, anemebake Na ba me uke yarakunara wei?  
\v 8 Weibaie nama A ainadeiro wero Dawama eno wei, Nae Yesu Nasaredi goi Miya wei. Nabake ba me merama uke yarakunaraya wei.  
\v 9 Foruma wei, naini nanu orou ekiro nanu oroue i edoro eraada i wake kaibai nauke dauisa.  
\v 10 Dawama nabairo weiro nama eno we, Dai Waria Mi aneme umau wero Dawama eno wei, uyake Damasikasi goiro aniaro moi mima abake mamauane i waiya dawama wefekuro naufakua wei.  
\v 11 Eno weiro uyarero i edoroma nanu naisa kuuriba ibake nanu naiyemukuma nanu wanaro muyakake Damasikasi goiro waure aniakaya Foruma eno wei.   
\p
\v 12-13 Iro farero moi darawadu ukenewaa ukeibi mi, danu ibiye Ananaiasi dawama nabairo fari. I Du orou yaisinae Ananaiasi dawae irauaiai miya eno weibisa. Ibake i mima nabairo farike eno wei, kaka Soro, anu naisa ea wei. Eno weiro nanu naisa idua irau sikararo i mi erea wei.  
\v 14-16 Erero Ananaiasima nabake eno wei, iyanu akaemukunu Godima a we mune odiai. Godinu imukeka iwoka sifake Danu gienabu Amara una efake Danu Amaranu wake Danu bebekuroma naufane ibake we mune odiaia weike nono wei, eme yaisinabairo anifakuke Godinu wake wefakua wei. Anu naukekaini ereka yaisina emuabairo wefakua weike nono wei, anemebake yaure ibinu? Uyaro a babadaido umaro anu merama merama ukeka Yesubairo we ma boroo yaaro ma isufi wei. Ananaiasima nabake eno weia Foruma eno wei.   
\s1 Godima Foru Du me imusu oroubairo Danu wake ane wefine we mune odai wake  
\p
\v 17-18 Foruma eno wei, nono dubuenaro owereke Derusaremu goiro fareke dai sosi uwara ubarenaro amueke guriguri ukaada kubekube erero Yesu Kerisoma kubekuberoma nabairo eno wei, yewa oroue emuabairo nanu wake da naufeisaya sabu Derusaremu goi mediake ania wei.  
\v 19 Eno weiro nama we, Dai Waria Mi, eme yaisinae nanu Du orounu sosi ubarenaro amukekaini Godinu wake naukaisa orou ana ebaro odekaini uraneka wakeini iwoka sinaisaya we.  
\v 20 Enoba Sidiwini Anu wake weeka mi dawa ukaro danu iwa dooro isariro nanu naisama erea wei. Ibake nanu ararae emuaini kowede ureka. I Sidiwini ureibisa orounu dubo barukeka wau yawokeibisaraya eno wei.  
\v 21 Eno weike nono wei, i dai Waria Mima nabairo eno wei, daaba yafawere i Du me imusu oroubairo we odaimanero ania weia wei.   
\p
\v 22-23 Foruma i Du me imusu oroubairo eno weibi ibaibake i ku siane ibisa orouma i wake nauisake eno weisa, dawama iyabairo ibekae meramawereya uaro feafi weisake emenu wau ure bu yaraada bubudo mukake urero siaka.  
\v 24 Eno uisa ibake i ame orou yawokeibirie dai mima weiro ame orounu uwara ubarenaro Foru waure amuke ane oisa. Waure amuke ane oisaro i ame orou yawokeibirie mima i orounu weibisa wake goro iwoka sifine eno wei, usi muaweke dawa uawero ba wake weifiro nauma wei.  
\v 25 Eno weiro Forunu umu wana naama uwane karisaro Foruma i ame kafudenibake eno wei, nae Romani miro yama na kodo ure mero anu orouma na urakuneka ibai irauaiaiba meramawere. Romani orounu darawadu ibake Foruma eno wei.  
\v 26 Foruma eno weiro ame kafudeni medike ame orou yawokeibirie dai mibairo anike eno wei, a aneme ukaku wei? Yeka miye Romani miya wei.  
\v 27-28 Eno weiro ame orou yawokeibirie dai mima uyarike Forubairo anike dawabake eno wei, ae Romani miba me weibaie Foruma euwa weiro ame orou yawokeibirie dai mima eno wei, nanu ba doo medeke Romani orofa dai oiwerema make muneke Romani mi sineke awoena ewado ibinea wei. Eno weiro Foruma ma owerike eno wei, nanu babae Romani mi ibake naini Romani miya wei.  
\v 29 Eno wei ibake i naama uwane karisa orou i ukeibisa ibai meisa. I ame dai mima adinaro weiro i ame orouma Forunu umu wana uwane karisaro Foru dawama na Romani miya wei ibake i ame dai mi dawaini ia sini.   
\s1 Foruma kanisoro orounu ibooro enare ibi wake  
\p
\v 30 Yeka moi furo i dai yawokeibi mima i orounu wayai weisa wakenu ubi iwoka sifine ibake weiro Foru naama uwane oisabai ma woromisa. Ame orou yawokeibirie dai mima i ofereni ode sibore sianeka orouini i kanisoro orou yaisina u weiro dawabairo ane fakaro Foru naa ma woromisake waure ane i oroubairo oisaro emenu ibooro enare ibi.   
\c 23  
\p
\v 1 Foruma i kanisoro orounu ibooro enare ibaada emua erenewaa ukaada eno wei, kakamuku naburaka, nanu wake wemaro nauawe wei. Adinami nauwaroma aare nono awoenaini nanu ukeka sinekae irauaiaiya eno wei, ibake Godima erakunararo nae ia iyare dakakunea wei. Ibake nanu ukeka sinekae irauaiaiya wei.  
\v 2 Eno weiro i dai ofereni ode sibore sianeka mi Ananaiasima i Forunu udiro enare ibisa oroubake eno wei, danu bebekuro uawe wei.  
\v 3 Eno weiro Foru ukaro Foruma Ananaiasibake eno wei, Godima aini umekua wei. Foruma eno weike nono wei, ae emeaka yare waineka mi ari enoya wei. Ibake anu imuka duboroe irauaiairo nono anu imuka ubarenaroe igawerea wei. Mosesinu darawadubake na kodo uraada ama wenuro na unekaba ibake ae Mosesinu darawadu ma merama ukinua wei.  
\v 4 Foruma eno weiro i enare ibisa orouma eno weisa, anemebake Godinu dai ofereni ode sibore sianeka mibairo merama wake weaku weisa?  
\v 5 Eno weisaro Foruma wei, arie! Kaka nabue, dawae Godinu ofereni ode sibore sianeka miro nono dawa na iwoka me ibake eno wenea wei. Eno weike nono wei, Godinu bukaroma eno weaku, yanu orounu yawokeka dai mibake merama wake da weawe weakua Foruma eno wei.   
\p
\v 6 Foruma i kanisoro orou eraada eno we imui, moi oroue Sadusi weaisa orouro nono moi oroue Ferosi weaisa oroua eno we imuike ibake eno wei, kaka nabue, nanu wake wemaro nauawe wei, nae Ferosi miya wei. Nanu akaemukue Ferosi oroua wei. Enoba nama feareroma uyareka wake imukakune ibake yama na kodo urakunekaya wei.  
\v 7 I Sadusi orouini Ferosi orou emenu imukekae demui mero emenu imukekae imusu imusu.  
\v 8 (I Sadusi weaisa orounu imukekae eno, feareroma nono uyare meya weekaini aneru meya weekaini imumu meya weekaini i ari eno we imukeibisa. Nono i Ferosi orouma i Sadusi orounu meya weibisa eraerabusa yaisina baya mane we imukeibisa).  
\v 9 I ari enobake uyare emenu emenu urane raraneibisa. I Ferosi owaowa odeka orouma uyakake eno weisa, yewa miye irauaiai miya weisa, dawa merama mi meya weisa. Aneruma ba dawabairo weiba me ari, iya iwoka meya weisa.  
\v 10 Eno weisaro daiwere we urane raranebe Forunu eka ena ewa enaro enakake danu wanaro mune ma youreibisa. Eno ukeibisa ibake ame orou yawokeibirie dai mima uyarike eno we imui, i mi abanaro ma gagafeisaya eno we imuike weiro ame orouma sabu fakake i we urane raraneibisa i orou ma beraisake Foru mukake emenu ame orounu uwararo waure anisa.   
\p
\v 11 Waure anisaro aine ibi. Aine ibiro dumu siniro Yesuma Forubairo farike eno wei, ia da iyaake buna ua wei. Adinaro Derusaremu goi oroubairo Nanu wake ama imusu oroubairo weibi enaenari i Romani oroubairo Nanu wake wefakua Yesuma eno wei.   
\s1 Du orouma Foru ufisane fare we kuuka wake  
\p
\v 12 Wai uriro moi Du orouma we bou uisake eno weisa, urunaini aduaini da ifeisike Foru ufeisiro dawa feafekuro ai dubuenaro idua ifeisia weisa.  
\v 13-14 Eme fodi (40) emuama bunawereroma eno we bou uisake i ofereni ode sibore sianeka orouini emenu adina dai orouini emuabairo anisake eno weisa, uruna da ifeisike Foru ufeisiro feafekuro aima ifene we bou ukisia weisa.  
\v 15 Eno ukisia yama weawero i ame orou yawokakune dai mima Foru yabairo waure aafiro Forubairo wake moi wefene weaisia eno we iruawero Foru waure aareifisaro ufe weisa.   
\p
\v 16 Eno weisaro Foru danu kewaruro amarama i Du orounu we bou uisa wake nauike ame orounu uwararo Forubairo sabu anike i wake wei.  
\v 17 Weiro Foruma nauike moi ame kafudeni mibake eno wei, yewa mima i ame orou yawokakune dai mibairo wake wefekua i dai mibairo waure ania wei.  
\v 18 Eno weiro i mi we munike i ame orou yawokeibirie dai mibairo waure ane odike eno wei, yewa mima abairo wake wefine wenuro aarisu wei. I ana ebaro ibinu mi Foruma nabairo wenu, yewa mima ame orou yawokakune dai mibairo wake wefekua waure ania wenuro ibake waure fanea wei.  
\v 19 Eno weiro i ame orou yawokeibirie dai mima i minu wanaro mune imusu odike eno wei, aneme wake wefaku wei?  
\v 20 Eno weiro i mima ma owerike eno wei, moi Du orouma imuka demui daabaro odaisaya wei. Weike eno wei, wairo abairo eno wefisane weisaya wei, Foru kanisiro oroubairo we odaiaro aafiro moi wake wefe eno we irufeisaya wei.  
\v 21 I mima eno weike nono wei, emenu wakeye meo wakeya da naua wei, eme fodi (40) fe yare ibifisaro Foru waure aareifisaro ufisane ibake weisaya wei. Anu wake naufisane awoena uke bou ukaisaya wei.  
\v 22 I mima eno weiro i ame orou yawokeibirie dai mima i wake nauike eno wei, yewa wake moi oroubairo da wea weike we odairo i mi idua owere ani.   
\s1 Foru i dai gaemani mi firikibairo we odaisa wake  
\p
\v 23-24 I ame orou yawokeibirie ame dai mima ame kafudeni miyai weiro dawabairo ane faki. Dawabairo ane fakiro eno wei, umuma aneka ame orou du aderedi (200) we mune odiawake nono osi abunu duboro yaure aneka ame orou sewenidi (70) we mune odiawake nono auri bobo aneka ame orou du aderedi (200) we mune ode bou uawake dumu abanaro Foru we muawake Sesaria goiro Firiki, i gaemani dai yawokaku mibairo waure aniawa wei. Foru dawae osi abu maewaro iro yaufike anifi wei.  
\v 25 Eno weike owaowa eno yanai, na Korodiasi Risiama a irauaiai yawokaku mi Firikibake arie wake weakune.  
\v 26 Nanu dai me wakenaku ea.  
\v 27 Yewa we odaisakune mi, I Du orouma dawa yabaisake umu wana naama uwakake ma feafisane uisaro nama fareke i mi emenu wanaroma mareke muneke dawae Romani miya weisaro naue.  
\v 28 Nanu ararae anemebake wayai wake weisa ibai naumane ibake Du orounu kanisoro oroubairo i mi waure ane ode.  
\v 29 Waure ane odero i Du orouma emenu sosi uwara darawadubake wayai wake weisa. Iyanu darawadubake wayai wake we dauisa ibake ana ebaro anemebake ibifeku o feafeku, i ari eno dawa ba me.  
\v 30 Ibake i Du orouma yewa mi ma feafeisia weisaro na naune ibake dawa abairo sabu we odaisakune. I wayai weeka orou dubuenaro fafeisake abairo dawabake wayai wake wefeisa. Nanu wake idua me sininu.  
\v 31 I ame orou yawokeibirie dai mima eno owaowa yanaike danu ame kafudeni oroubairo i owaowa mariero muka. Mukake dumu abanaro Foru we mukake anisa. Anisake ane Adifadasi goiro fakake idua aisa.  
\v 32-33 Aisaro wai uriro i umuma anisa ame orouma owekake emenu goiro anisaro nono i osi duboro yaukake anisa orouma Foru we waure anisa. Ane Sesaria goiro fakake i dai gaemani yawokeibi mibairo i owaowaini Foruini maisa.  
\v 34-35 I orofa yawokeibi dai mima i owaowa kakurike Forubake eno wei, anu orofa aboro wei? Eno weiro Foruma wei, nanu orofae Sirisia weiro nauike i mi dawama eno wei, idua i wayai weeka orouma fafeisaie anu wake naumaua wei. Danu oroubairo weiro Foru mukake Erodinu dai gaemani oroubake uisa dai uwarawere ubarenaro waure ane oisake aisame ko ure oisake iro yawokeibisa.   
\c 24  
\s1 Du orouma Forunu ukeka sineka wayai weisa wake  
\p
\v 1 Moi odo fai (5) me siniro i dai ofereni ode sibore sianeka mi, Ananaiasini adina dai orouini moi kodo ureka mi Dedarasini emuama Foru kodo ufisane weisake i gaemani yawokeibirie dai mibairo ane fake.  
\v 2 Ane fakaro i gaemani yawokeibirie dai mima weiro Dedarasima danu wayai wake wefine ukaada uyarike eno wei, Firiki, ae irauaiai mi. Anu yawokakuie irauaiai ibake iyanu aneme aneme ukeka sinekae irauaiaiya wei. Ae irau darawadu iyabairo odi ibake awoenae iya irauaiai ibinisia eno wei.  
\v 3 Anu yawokekae irauaiai ibake iyama a we irauaiai daiwere ukaisia wei.  
\v 4 A ofe koroko sinao umekuba iyanu yafa me wakenaku wemaro naua wei.  
\v 5 Yewa mi Forue dawa irau mi meya wei. Dawae i orofa akaka Du orounu imukeka ma merama ukaku miya wei. Eno weike nono wei, dawae i Nasaredi weaisa orounu moi dai miya wei.  
\v 6-8 Dawama iyanu dai sosi uwara ma merama ufine ani ibake i minu wanayai mune ane derena enaro naama uwakia wei. Eno weike nono wei, iyanu wayai wakeye baya wei. Iyanu ararae dawa iyanu darawaduma kodo ufene uisibaie i ame orou yawokeibirie dai mi, Risia, dawama farike i mi bunawere iyabairoma nono ma faeke munike ani. Eno uike nono Risiama eno wei, dawabake wayai weeka orou abairo aniawe weiro ibake fakia wei. I mi we nauke earo aneme wefibai wefiro a nauake iyanu wayai wakeye baya we iwoka sifakua wei.  
\v 9 Eno weibaie i Du orou emuaini yaisina enaenari weisa.   
\s1 Foru danu moko wake Firikibairo wei wake  
\p
\v 10 I gaemani orou yawokeibirie dai mima Forunu wake naufine wana ei mamiro Foruma uyarike eno wei, ae yewa orofa orou oya keuwere yawokeibiba ibake nanu imuka irauaiai sifarakuro nanu imukeka wake moi moko abairo wemaua Foruma eno wei.  
\v 11 Na ewaro fareie awoenama odo duwero (12) me sininu. I kawama odoro nama i dai sosi uwararo aneke guriguri uea wei. Ibake i odoe a iwoka ukakua wei.  
\v 12-13 I odoro Du orounu dai sosi uwararoma Du orounu sosi sosiroma goi orounu uwararo na urane rarane daue. Daueke emenu imukeka ma merama uke dauebairo anemebake na kodo urakuneka wei? Eno weike nono wei, emuama abairo nabake weaisa wayai wakeye ba me weaisaya wei.  
\v 14 Foruma eno weike nono wei, nanu moi wake enoya wei, yeka minu moi wenu wakeye ba. Eno weike wei, i orou weaisa meo wakeye na imukakunea wei. Ibake nae iyanu babaemukunu Godibairo guriguri ukakunea wei. I darawadunu wake yaisina na imukakunea wei. I we bou ukeka orounu wake yaisina na imukakunea wei.  
\v 15 Eno weike wei, Godima eme yaisina irau orouini merama orouini emua yaisina feafeisaro nono ma uyafiakua wei. I enare ibinisa orouini naini iyama i feareroma uyareka ibai yawokenewaa ukaisia wei.  
\v 16 Foruma eno weike nono wei, Godinu oroubairo na merama uke yare dakakuniaba ibake nanu imuka irauaiai imuke ibinea wei.   
\p
\v 17 Oya moiro moi orofaro ibaada iro nanu oroubairo ofereni odimane Derusaremu goiro farea wei.  
\v 18 Fareke Mosesinu iifa ukeka ueke dai sosi uwara ubarenaro amuea wei. Amuero nabairo eme mero wake goro we urane rarane meya wei.  
\v 19 Eno ukeibisarabaie moi Eisia orofa Du orouma na eyakaya wei. I orouma na eyakake we muyakabairo anemebake i orouma awoena fareroma emuama abairo nabake wake we dakisa wei.  
\v 20 Foruma eno weike nono wei, adinaro kanisoro orounu ibooro enarero nanu merama uebai yewa orouma aneme eka wei?  
\v 21 Foruma eno weike nono wei, nanu wake demuinaku eno weya wei, feareroma nono uyareka na imukakune ibake awoena kodo urakuneka eno weya Foruma eno wei.   
\p
\v 22-23 I dai mi, Firiki, dawa i Godinu wake naukeibisa orounu imukeka iwoka sini ibake i Du oroubairo eno wei, awoena i kodo mediawe wei. Eno weike nono Forubake eno wei, ame orou yawokakune dai mi Risia fafekuie abake aneme umauke aneme wake wemau weike danu ame kafudenibairo eno wei, Foru i dai uwarawerero we waure ane odiaro danu naiyemukuma fafisake uruna o anemerabu mafisane wefeisaie mafeisaya Firikima eno wei.   
\s1 Foruma Firikini Durisiranu ibooro enare ibi wake  
\p
\v 24-25 Dubuenaro Firikima weiro Foruma Firikini danu Du awekaini danu ibiye Durisira emuabairo fari. Farike emuabairo wake bunawereroma eno wei, Yesu Keriso imuaweke emebairo irauaiai uaweke yanu arara mane da uawero Godima dubuenaro fafike eme yaisina kodo ufia wei. Eno weiro Firikima ia sinaada eno wei, aniaro nanu odimau odoro wemaro owere aara wei.  
\v 26 Firiki danu imukekae eno, Foruma fafekuke Firikibairo oi mafekua eno we imukada ibake Foru u weibiro Foruma dawabairo fareibiro wake wake nono we makaneibisi. Firikini Foruma eno ukeibisi.  
\v 27 Eno ukeebe oya raarayai me siniro moi mi danu ibiye Foisa Fesa dawama Firikinu orofa muni. Firikima i Du orou we gagau uike eno wei, Forue ana eba uwararo ibeifekua wei.   
\c 25  
\s1 Foruma Sisabairo anifine wei wake  
\p
\v 1 I dai mi Fesa fariro odo buuba me siniro Fesama Sesaria goiroma Derusaremu goiro amuke ani.  
\v 2-3 Iro amuke ane fariro i dai ofereni ode sibore sianeka orouini Du dai orouini dawabairo aare fakake Forubake wayai wake weisake eenu weada eno weisa, Foru we odaiaro Derusaremu goiro aafi weisa. Emenu ararae fe yare ibeebe Foru fafiro ufisane ibake eno weisa.  
\v 4-5 Eno weisaro Fesama ma owerike eno wei, Foru dawae Sesaria goiro yaure ibinua wei. Eno weike nono wei, na iro isare animauro yanu dai orouini naini isare anifeisiro danu merama ukeka wake wayai wefeisaya eno wei.   
\p
\v 6 Fesama Derusaremu goiro ibeebe odo eida (8) me siniro medike Sesaria goiro isare ane aini. Ainike wai uriro Fesama danu kodo ureka ooruro anike danu yaureka duboro yaurike eno wei, aniaweke Foru we waure aarawe weiro anisake Foru we waure aare faka.  
\v 7 Foru fariro i Sesaria goiro isare aaka Du orouma Foru enare kara uisake wayai wake keuwere weisaroma nono emenu wake ba me ibake Fesa dawa emenu wake nauke daui.  
\v 8 I Du orouma emenu wake eno weisaro Foruma moko wake ma owerike eno wei, i Du orounu darawaduini dai sosi uwaraini gaemani orou yawokakune dai mi Sisaini emuabairo nama merama uke yare da ukeibisaraya wei.  
\v 9 Eno weiro Fesama i Du orou we gagau ufiane weike nono Forubake wei, Derusaremu goiro amuke anifakuba me wei. Eno weike nono wei, anifakuro i orouma emenu wayai wake nabairo iro nono wefeisaya wei. Eno ufakuba me wei? Eno weibaie Foruma meya weike wei, na awoena yewa Sisanu kodoro enare ibineie irauaiaiya wei. I Du oroubairo moi merama uke da uebai a iwoka sinakuyainua wei.  
\v 10-11 Foruma eno weike nono wei, na merama ukaada moi feareka merama umaronae adinaro feamane ibake ia iyare da ue weike nono wei, moi feareka merama uke daueba da feamaua wei. Eno weike wei, emenu wana duboro na da odina wei. Nanu arara i dai mi Sisabairo animau deima iduaya wei.  
\v 12 Fesaini danu kanisoro orouini emuama wake we makakake Fesama Forubake eno wei, Sisabairo anifane wenuba anifakua wei.   
\s1 Foruma Agirifaini Benisini emenu ibooro enare ibi wake  
\p
\v 13 Moi odo odo me siniro Kini Agirifaini danu aweka Benisini emuama Sesaria goiro fakike Fesabake arie wake weisi.  
\v 14 Sesaria goiro odo keuwere iro ibeibisi ibake Fesama Forunu ana ebaro ibeka wake eno wei, Firikima moi mi, Foru, ana ebaro odiro ibeebe ibeebe awoena ana eba uwararo me yaure ibinua wei.  
\v 15 Eno weike nono wei, na Derusaremu goiro ane farebaie, i Du orouma i mibake nabairo wayai weisake eno weisa, i mi uaro feafi weisa.  
\v 16 Eno weisaro nama eno weya wei, iyanu Romani orounu ubue eno, ana ebaro ibeka orouini wayai weeka orouini kodo uraada wake wake we makafeisa nono mebaie ana ebaro odeka mi wayai weeka orounu wanaro da mame odifeisia eno weya wei.   
\p
\v 17 Eno weike nono wei, i Du orouma i mi kodo ufisane nabairo faka. Fakaro idua aisiro wai uriro nama wero i orouini Foruini emua kodo ufisane nabairo faka. Fakake emenu wayai wake weisabaie Forunu merama ukeka wayai wake mero emenu imusu wake weisa.  
\v 18 Emenu dai sosi uwara sibore sianeka wayai wake weisa.  
\v 19 Eno weisa, Yesu Dawa feari weisaro Foruma ma owerike eno wei, Yesu Dawa feare mero Dawa me ibinua wei.  
\v 20 Eno weisa ibake na aneme umamu ibai na iwoka me ibake Forubairo eno we, Derusaremu goiro anifakuro iro wayai wake wefeisa weya wei. Eno weke eno ufakuba me weya wei?  
\v 21 Eno webaie Foruma meya iro da animaua weike nono wei, nanu ararae i dai mi Sisabairo animaua wei. Eno wei ibake nama wero nanu orou owekake i mi Foru ana eba uwararo we waure ane oisaro ibinu. Ibinuba nono dubuenaro Sisabairo we odaimauro anifekua wei.  
\v 22 Fesama eno weiro Agirifama nauike eno wei, i minu wake enaenari naumane weakunea wei. Eno weiro Fesama wei, i wake wairo naufakua wei.   
\p
\v 23 Wai uriro Agirifaini Benisini emuama emenu bokairo weree weree uke oisike emenu dai ame orouini i kodo ureka uwara ubarenaro amuisi. Amuisiro Fesama weiro danu orou anisake Foru we waure faka.  
\v 24 We waure fakaro Fesama uyarike eno wei, Kini Agirifaini ya eme yaisina yewa mi eawe wei. I Du orou yaisinaini Derusaremu goi orouini emuama yewa goi orouini yewa mibake wayai wake nabairo wayai weisake eno weisa, i mi uaro feafi weisa.  
\v 25 Eno weisaro nono dawabairo merama mebairo anemebake feafeku eno we? Dawae imusu Sisabairo anifine weiba ibake dawa we odaimau ariya wei.  
\v 26 We odaimauke aneme owaowa umauke nanu dai oroubairo odaimau wei? Na wayai wake mebaie wearo Foru naufike enaenari danu wake wefiro naufe wei. Kini Agirifama danu wefi wake nauake wearo enaenari owaowa yanake odima wei.  
\v 27 Eno weiro Fesama wei, wayai wake meba na arara me nanu dai mi Sisabairo ubi mero me sara wayai wake we odaiseka wei.   
\c 26  
\s1 Foruma danu moko wake Agirifabairo wei  
\p
\v 1-2 Agirifama Forubake eno wei, anu i dadaa wearo naufe wei. Eno weiro Foruma uyarike wana fisi fisi ukaada danu moko wake eno weibi, i Du orouma nabake wayai wake weibisaba ibake awoena abairo nanu moko wake wemane ukaada nanu imuka irauaiai unea wei.  
\v 3 Foruma eno weike nono wei, ae i Du orounu adina bisara ukekaini ukeka sineka yaisina iwoka ukenewaa ukakua nanu wake naukenewaa ua wei.   
\p
\v 4 Eno weike wei, nanu goini Derusaremu goiro ibeibisaraie i Du orouma nanu ukeka sineka okoanakuroma aare daiwere sine ibai emua iwoka sinaisaya wei.  
\v 5 I Ferosi orounu arawere imukeka na mune ukenewaa ukeibisaraya wei. Ibaie i orou emua iwoka ukaisaba eno ibai abake wefeisaba me wei?  
\v 6-7 Godima iyanu akaemukubairo eme feafeisake nono uyafeisa eno we bou uia wei. I we bou ukekaie na imukakunero i du orou yaisina aine wai ure guriguri ukaada imukenewaa ukaisaya wei. Eno ukaisake nono na ibake emuama kodoro odakunekaya wei.  
\v 8 Foruma eno weike nono wei, Godima feaka orou nono ma uyariero anemebake i arawereba Godima eno da ufekua weaisa wei?   
\p
\v 9 Foruma nono wei, adinaro nanu imukekae eno imukeibisara, Yesunu umuro aneibisa oroubake ba merama uke yamaiane ibake ie irauaiaiya eno we imukeibisaraya wei. Eno we imukeibisarake enaenari ukeibisaraya wei.  
\v 10-11 Enoba i ofereni ode sibore sianeka orouma eno weisaro nama Godinu wake naukeibisa orou Derusaremu goi ana eba uwararo odiaya wei. I orouma Godinu wake naukeibisa orou ma feafiakane weisaro nama euwa ma feayakawe eno weya wei. Nama ararua daiwere sikararo Godinu wake naukeibisa orou Godibairo merama wake wefisane ueke emuabake meramawere eno uke yayaya wei. I Derusaremu goiroma i imusu goi goiro iro aboro aboro eno ukeibisaraya wei.  
\v 12 Nama eno ukeibisara ibake i ofereni ode sibore sianeka orouma nabairo owaowa mayakake ane muyana weisaro nama Damasikasi goiro ane farea wei.   
\s1 Foruma danu imuka yaisina Yesubairo mai wake nono wei  
\p
\v 13 Foruma nono eno wei, na Damasikasi goiro aneibisarabaie eweka okoro edoro daiwere uiro ewekae danu edoro dai menaku uiro ereya wei. Foruma eno weike nono wei, Kini Agirifa, nanu wake naua, i edoro daiwere ureroma isare aarike naini nanu demuiro anisi orouini iyanu ofe ubu edorowere mane u’iro iya dooro biruisike ane isaki.  
\v 14 Eno u’i ibake iya yaisina dooro isare biruke isakibaie Du orounu wakeroma moi wake weiro naue. I wakeye eno wei, Soro, anemebake nabairo meramawere uke yarakunara weike nono wei, ae Godini uranakuba oferi daiwere waufakua wei.  
\v 15-16 Eno weibaie nama a ainadeiro eno wero Yesuma wei, Nae Yesua wei. Nabake ba me merama uke yarakunaraya weike nono wei, uyaaro a we odaimane wei. Abairo faneke a Nanu wake weeka mi we odinea wei. Nanu waiya ukeka mi we odineba we odaimauanero anifakuke i orofo akaka eme yaisinabairo anu awoena erinu iini dubuenaro efaku iini wefakuro naufeisaya wei.  
\v 17-18 Yesuma eno weike nono wei, a unu komauanero abairo meramawere ukeka Du orouini imusu orouini emuama da uke yamekaisa wei. I oroubairo anifake Nanu wake wefaro naufisake emenu naisama efisake dumu daaba medifisake edoro daabaro anifisa wei. Seidaninu daabae medifisake Godinu daabaro anifisa wei. Eno weike nono wei, eno ufisaro Godima emenu merama merama ukeka mufike imuke medifike emua Nanu wake naukeka oroubairo odaifiaka Yesuma nabairo eno weia Foruma eno wei.   
\s1 Foru danu waiya ukeka wake wei  
\p
\v 19-20 Foru danu waiya ukeibi wake eno wei, Kini Agirifa, i ureroma kubekube ari ereka ereke enaenari uea wei. I Damasikasi goi oroubairoko Godinu wake we. Nono i Derusaremu goi oroubairo weke nono dubuenaro i Diudia orofa orouini imusu oroubairo aneke eno we, yanu merama merama ukeka mediaweke Godibairo aniawe eno yayaya wei. Godibairo anifoisaya merama ukeka mediaweke irauaiai ukeka i mane uawe yayaya wei.  
\v 21 Eno we ibake i Du orouma na i dai sosi uwararo yabayakake wanayai mune ane derena enaro naama uwayakake na ma feafokone uyakaya wei.  
\v 22 Foruma eno weike nono wei, Godima na unu korafunara ibake na awoena ewa enaro ibaada yabairo dai orouini okoa oroubairo Godinu wake weakunea wei. Mosesini i we bou urieka orouma weisaro na enaenari weakunea wei.  
\v 23 I we bou uisa orouma eno weisa, i Mesaia oferi daiwere waufekuke Dawako feafekuke nono uyafekuke i Du orouini imusu oroubairo edoro daiwere wake wefekua wei.  
\v 24 Foruma danu moko wake eno weiro Fesama daiwere weike eno wei, Foru, ae gogore ukinua wei. Foru, a sikuru daiwere ukeibiba ibake gogore ukinua wei.  
\v 25 Fesama eno weiro Foruma wei, O irauaiai mi Fesa, nae gogore uke meya wei, Nae ba wake weakunea wei.  
\v 26 Nanu weakune wake Kini Agirifa a iwoka ukakuyainua wei. I ukeka sineka yaisina dumuro uke dauike edororo uiba ibai a iwoka sinakuyainua wei.  
\v 27 Kini Agirifa, ade i we bou ukeka orounu wake imukakuba me eno weike nono wei, na iwoka, ae ibai iwoka sinakua wei.  
\v 28 Eno weiro Agirifama ma owerike eno wei, anu ararae nama nanu imuka yaisina Yesubairo sabu odimau eno imuke ibinua wei.  
\v 29 Eno weiro Foruma wei, anu imuka yaisina Yesubairo sabu odifaku o owainanaku odifakuie iduaya wei. Nanu ararae aini yewa naukaisa orouini ya yanu imuka yaisina Yesubairo odifoisa wei. Na ari sifoisakema nono na arara me emema ya mune ana ebaro odeka, nono ba, yanu imuka yaisina Yesubairo odifoisaya wei.  
\v 30-31 Foruma eno weiro Kini Agirifaini Fesaini Benisini emenu eme yaisina uyakake aweawero anisake emenu imusu eno weisa, yeka mibairo merama meya weisa, feareka merama me, ana ebaro odeka merama meya weisa.  
\v 32 Eno weisaro Agirifama Fesabake eno wei, dawae Sisabairo animau weia wei. Eno da wefironae ana eba uwara medifike anifinea wei.   
\c 27  
\s1 Foru boudiroma Romani goiro ani wake  
\p
\v 1 Iyanu Idari orofaro aneka uke bou ukake Foruini moi ana ebaro ibeibisa orouini moi ame kafudenibairo iya maisaro yawokeibi. I ame kafudeninu ibiye Duriasi. Dawae moi Sisa Agasidasi weaisa ame mi.  
\v 2 I ame mini boudi ubarenaro amuisi. I boudi Adamidiuma goiroma fari. Fariro nono owefike Eisia orofa goi goiro anifine fari. I boudiro iyaini moi mini danu ibiye Aridikasi, dawa Masadonia orofo Desoronaika goi mi, dawaini i boudiro amuisike anisi.  
\v 3 Aneibisiro wai uriro aneebe Saidoni goiro faki. Duriasima danu imuka yaisina Forubairo odiro Foruma boudi ubarenaroma isarike Saidoni goiro ani. Danu naiyemukubairo yadai ani.  
\v 4 Ane farike iroma owere aare fariro nono boudiro anisi. Aneibisiro oyau daiwere fariba ekara ena ewa ena dawararo naisaroe Saifurasi weaisa dai orofa udinakuro fare anisi.  
\v 5 Aneebe aneebe dawara naisaro faki. Nono aneebe Sirisiaini Famufiria goiyai ma bereisike amuke anisike Risia orofa Maira goiro idua ane faki.  
\v 6 Ane fakiie i ame kafudenima moi Idaria orofaro aneka boudi yodia uke anike fou urike iya yaisina we waure anike i Arekisania goiroma fari i boudi ubarenaro ma amuke odii.   
\p
\v 7 Ma amuke odiiro Maira goi meisike anisi. Aneibisiro oyau daiwere fari ibake moi odo odoro owainanaku aneebe aneebe Sinadasi goi ma bereisi. Ma bereisike aneibisiro dai oyauwere farike iyanu aneka daaba dadau ui ibake ekara ena ewa ena dawararo naisaroe Kuridi iboo enaro anaada i Saramone goi udiro fare anisi.  
\v 8 Iyanu anekae arawere ibake owainanaku anisi. Owainanaku aneebe i irauaiai boudi ibeka orofaro faki. I Rasia goiye i orofa udiro ibi.   
\p
\v 9-10 Iyanu aneka eweka owainanaku aneebe sabu fare dauisi ibake iyanu moi aneka daabae irau me meramawere. I Godima Isaraera orou Idifiroma waure aneka banau uruna odo fosiiyari ibake boudiro aneka odo me. Eweka ma berei ibake Foruma danu imukekae eno wei, iya anifeisiie iyanu boudini iyanu eraerabusaini merama sifeisaro moi orou ofe arama ufiakuro nono moi orou iyae feanao sifeisiba iro da anifeisia wei.  
\v 11 Foruma eno weiro i ame kafudeni mima Forunu wake nauke dauike i boudi yowokeibisa orounu wake mane naui.  
\v 12 Awoena oyauini obeobe fareka furoba ibake farakua iyanu boudi ibeka orofa ba me meramaya weisaro nono moibaima eno weisa, ekara ena ewa ena dawararo naisaroe Kuridi weaisa orofaro moi irauaiai boudi ibeka orofa, Finiki goiro mufeke iro ibife weisa.   
\s1 Dawara naisaro oyauini obeobe fari wake  
\p
\v 13 Iyama Rasia goiro ibeibisiro dai me oyaunaku farike nono irauaiai uiro emuama eno we imuisa, iyanu aneka odo idua farinua we imuisake emenu boudi anika ma youkaro Kuridi dawara bawa udiro anisi.  
\v 14 Aneibisaro oyauini obeobe daiwere farike dawara naisaro boudi waure ani.  
\v 15 Boudi ma owefine uiba nono ma owefisane uisabaie enaenari uke daui ibake meisaro oyauini obeobema boudi ma berairo ani.  
\v 16 Aneebe aneebe ekara ena ewa ena dawararo naisaroe Kauda weaisa orofa derena enaro oisike ane iyanu ma youre eneibisi dinigi ma youkike boudi ubarenaro oisi.  
\v 17 Boudi abanaro gaganao ufekuba ibake imuisike ara naa mukike ima i boudi uwane ma ara uisi. Eno uisiro i boudi yawokeibisa orouma eno weisa, Afirika orofa dawara bawaro ma berenao ufekuro aninao ufeisia eno weisake ia sinaada i dubo farai siaka wau mune ma youre isare aaka. Eno uisaro oyauini obeobema boudi ma berairo anisi.   
\p
\v 18 Aneibisiro wai uribaie ufe daiwere uyari ibake i boudiro ibisa orouma emenu moi eraerabusa mune dawararo siakaro isaka.  
\v 19 Eno uisake aneebe nono moi odoro emenu eraerabusa yaisina mune siakaro dawararo isaka.  
\v 20 Eno uke oyauini obeobe idua odo keuwere fareibi ibake ewekaini manabeini muinaini ba me siniba ibake iyama eno we imuisi, iyae feafeisia eno we imuisi.   
\p
\v 21-22 Odo keuwere uruna ise meba ibake Foruma i oroubairo eno wei, ya anemebake nanu yekaadake we wake nauke dauisa? Anemebake Kuridi orofa meisakema yewa eraerabusa yaisina dawararo sianaisa weike nono wei, ia da siaweke imuka ara siawe wei. Iyae da feafeisi wei. Da feafeisiro i boudi mane merama sifekua wei.  
\v 23 Eweira dumuro Godinu aneruma nabairo farinuke eno wenua wei. Ibake Godi mane na imukenewaa ukakune wei.  
\v 24 Danu aneruma nabairo farinuke eno wenu, Foru, ia da sia wenu, Sisabairo anifakuke danu ibooro enafaku wenua wei. Yewa boudiro anaisa orou yaisina da feafoisa wenua wei.  
\v 25 Eno wenuba na imukakune enaenari ufeisia Foruma eno weike nono wei, ibake buna ufone weakunea wei.  
\v 26 Foruma eno weike nono wei, moi ekara ena ewa ena dawararo naisaroe orofaro iyanu boudi oyauma iro waure ane odifekua eno wei.   
\p
\v 27-28 Fura raarayai me siniro Eidiria weaisa dawararo oyauma boudi waure aniro me sara yaure ibisiro ani. Aneebe dumu abanaro i boudiro waiya ukeka orouma eno we imuisa, gibudi ubiubia we imuisake emenu kowo muneka naa siakaro dawara ubarenaro isari. Isariro ekabaie fodi (40) midasi eka. Nono aneebe boudi aneibiro nono i kowo muneka naa siakaro dawara ubarenaro isariro ekabaie dedi (30) midasi eka.  
\v 29 Eno ekake eno we imuisa, dai omawere duboro ane amufeisia eno we imuisake anika fo (4) mukake yeba enaroma dawararo siakaro isaka. Isakaro boudi idua ara sini. Eno uisake emenu arara wai sabu ufine ibake guriguri uisa.  
\v 30 Eno uisake i boudiro waiya ukeibisa moi orouma i boudi medifisane ibake dinigi naama doisake odaisaro dawararo isari. Isariro eno weisa, moi anika iboo enaro siafeisia eno meo weisa.  
\v 31 Eno weisaro Foruma emenu imuka ubarenaro erike i ame Kafudeni mini ame oroubairo eno wei, i orou eno uke meo wefeisake anifeisaie ya yaisina feafoisaya eno wei.  
\v 32 Foruma eno weiro danu wake nauisake i ame orouma naa bauma umane kuukaro i dinigi mane dawara ufema waure ani.   
\p
\v 33-34 Aniro wai uribaie Foruma eno wei, fura raarayai uruna ise dakisike me ibinisia uruna iawe weike nono wei, yanu umu wana ofe ubu merama da sifekua uruna iawe wei. Uruna iaweke buna uawe wei.  
\v 35 Foruma eno weike i oroubairo buredi munike Godibairo we ma irauaiai uike buredi ma biraike i.  
\v 36 Foruma eno uiro i orouwere ekake emuaini uruna isa.  
\v 37 I demui boudiro anisa orou yaisina du aderedi sewenidi sikisi (276) eme i Foru uibai ekake emuaini uruna isa.  
\v 38 Ise me sikake uidi kaibai boudiroma mukake dawararo siakaro boudi dawara duboro faufau yari.   
\s1 Dawara abanaro boudiwere abana kairo ure fomui wake  
\p
\v 39-40 Wai uriro dawara bawa ekake i orofa ma nuna uisa. Eno uisake i wanasi ukake irauaiai bawa eka. Ekake iro anifisane weisake anika siaka naa bauma umane kuukaro ibi. Eno uisake yeba enaro ma owereka ana yaisina naa woromisake ibooro wau doisaro oyauma ure waure aniro anaada gibudi ereere anisi.  
\v 41 Aneebe boudi ibooma dawara ubarenaro dai omawere duboro amuike boudi ara sini. Ara siniro ufe daiwere farike boudi yeba enaro ure fomui.  
\v 42 Eno uiro moi ame orouma emenu ame kafudenibairo eno weisa, ana ebaro ibeka orou me sara anifeisaie emua ufiakikia weisa.  
\v 43 Eno weisaro emenu ame kafudeni dawa arara me Foru feareka ibake eno da uawe weike wei, adua rarane iwoka orou ya isaaweke rarane aniawe wei.  
\v 44 Eno weike nono wei, nono ya adua rarane iwoka me orou ya i boudiro ibinisa eraerabusa o ana o aneme aneme ima sara muaweke dawararo siaweke iro aine aniawe wei. I ame kafudenima eno weiro i eme yaisina eno uisake ane udiro fare ure koisa.   
\c 28  
\s1 Ekara ena ewa ena dawararo naisaroe i Moda weaisa orofaro ibeibisa wake  
\p
\v 1-2 Dawara bawaro ane fakike i orofanu ibiye Moda weisaro nauisi. I Moda weaisa orofaro ibeibisa orouma iyabake irauaiai ukeibisa. Obi isarada iya iu mameibiba ibake emuama inaa mawaisake nono iyabake arie wake weisa.  
\v 3-6 Foruma inaa munike inaa mawakeibiro eme akakune waruma inaaroma farike Forunu wanaro aike gegebo uke ibiro Foruma wana fisi uiro kufaise isari. Eno uiro i Moda orofa orouma ibai ekake eno weisa, yewa miye ma feareka mi, dawararo imu ise dakinuba awoena feafekua eno weisa. Eno weisake nono weisa, danu wana wawafekuie dawa biruke isafekuke feafekua weisake koro ukeibisabaie Foru feare daui. Foru dawa feare mero me irauaiai ibi ibake eno weisa, dawae ma feareka mi meya weisa. Eno weisake nono weisa, dawae moi godiya weisa.   
\p
\v 7 I Moda orofa yawokeibi mi danu ibiye Fubiasi danu dooe ubiubinaku ibake dawama nabairo aarawe weiro dawabairo anisi. Anisike odo buuba dawaini ibeiyakiro uruna naka naka ukeibiro isaada dawaini ibeiyaki.  
\v 8 Ibeiyakiro Fubiasinu babae boanaini awara arama daiwere ui. Arama daiwere uike ofe ubu wadada fufufu ukeibiba ibake Foruma dawabairo anike guriguri ukaada danu wanama ofero ure buriro irau sini.  
\v 9 Foruma eno uiro ibai ekake i arama ukeibirie orou waure fakaro Foruma emua ma wiroimirie.  
\v 10 Foruma eno ui ibake i orouma iyanu dubuenaro aneibisi odoro iya ifene eraerabusaini me makeka eraerabusaini keuwere me sara waure ane boudiro oisaro anisi.   
\s1 Moda orofaroma Romani goiro anisi wake  
\p
\v 11 Idua ibeiyakiro manabe kai buuba me siniro nono anisi. Iyanu boudie Arekisania goiroma fari boudi. I boudie i oyauini obeobe odo odoro i Moda orofaro idua ibeebe aima anifine ui. I boudinu iboo enaroe i meo afafa godiyai emenu ibiyaiye Kasidoini Foraki emuama weisake ubu uke oisaro ibeibisi.  
\v 12 I boudiro iya ane Sirakiu goiro fakike odo buuba iro ane aisi. Iro ane aisike ibisiro odo buuba me siniro nono anisi.  
\v 13 Iyanu anisie ba me beobeowere ure owere ma owere ukeibiro ane Regiuma goiro fakike nono iroma anisi. Anaada aisike wai uriro irauaiai oyau fariro anisi. Anisike Fudiori goiro faki.  
\v 14 Fudiori goiro ane fakike Godinu wake naukeibisa orou yodia uke anisi. Anisike fou uriekiro wake weisake we kuukake eno weisa, fura demui iyaini ibifeisia weisaba emuaini odo seweni (7) ibeiyaki. Ibeiyakiro odo seweni me siniro Romani goiro aneibisa daabaro umuma anisi.  
\v 15 Aneibisibaie Godinu wake naukeibisa orou iya aneibisi wake nauisake iya fou umisane daabaro aare faka. Aare fakabaie moi orouma sidowa uwara kai buuba ibi orofaro iya koro ukeibisaro nono moi orouma aakake Afiasi weaisa orofae emenu fare demuiro ku siane ibeibisa orofaro aare faka. Fakaro Foruma emua erieke rooro uike Godi we ma irauaiai uike danu imuka ara sini.   
\s1 Romani goiro ibeibisa wake  
\p
\v 16 Romani goiro fakiro iya yawokeibi ame kafudenima Forubake eno wei, anu uwararo ibiaro moi ame mima a iro yawomi weiro eno ui.   
\p
\v 17 Eno uiro odo buuba me siniro Foruma weiro i Du orou yawokeibisa dai orou dawabairo ane faka. Ane fakaro emuabake eno wei, kaka nabue, nanu wake wemaro nauawe wei. Iyanu goi oroubairo merama uke yare dauiake iyanu babaemukunu adina bisara ukekabai ma merama uke dauero Derusaremu goi orouma na me sara muyakake i Romani orounu wanaro mame odinekaro ibake aanea eno wei.  
\v 18 I Romani orouma na kodo uyakake nabairo merama mero moi feareka merama mebake na medifokone weisa.  
\v 19 Eno weisaro moi Du orouma nabake dino wake weisaro naueke nama eno we, Sisabairo animane we. Sisabairo animake nanu Du oroubake wayai da wemau yayaya wei.  
\v 20 Foruma eno weike nono wei, yewa wake wemane wenero ya ibake yewado farisaya wei. Foruma eno weike wei, i Du orouma i Mesaia fafekua we imukaisaro nono nama i Mesaia adinaro faria eno we imukakune ibake nae ana ebaro ibeka miya wei.  
\v 21 Foruma eno weiro i orouma ma owekake eno weisa, Diudia orouma anu owaowa iya make dauisaro iyanu Du orouma iyabairo fakake anu wayai wake we dauisaya eno weisa.  
\v 22 Enoba i Godinu wake naukeibisa orounu wake wearo naufe weisa. Eme yaisina Godinu wake naukaisa oroubake wayai wake weisa ibai wearo naufe eno weisa.   
\p
\v 23 I faka orouma eno weisake owere aafisa odo namai we oisake anisa. Anisake ibeebe emenu namai we oisa odo fariro Forunu uwararo eme keuwere ane faka. Ane fakaro Foruma emuabake wai awanakuroma we ma iwoka ukeibiriero ane dumudumu sini. I we ma iwoka ukeibirie wakeye eno, Mosesinu bukaini i we bou ukeka orounu bukaini munike i bukaroma Godinu yawokaku orofaini Yesu Kerisoini we ma iwoka ukeibiriero naukeibisa.  
\v 24 I orou yaisina Yesu imufisake emenu imuka yaisina Dawabairo odifisane ibake eno uiro moibai emenu imuka yaisina Yesubairo oisaro nono moi orou imuke da uisa ibake wake we makaneibisa.  
\v 25-26 Wake we makanebe meisaro Foruma eno wei, Godinu Imumu Irauma weiba ibake i we bou ukeka mi Isaiyama enaenari eno wei,  
\li1 i Du oroubake ama eno wea, naufoisake efoisakema nono nuna ufoisa wea.  
\v 27 Yanu imuka arawere ibake yanu omema naukenewaa uke me, yanu naisama erenewaa uke daukaisa ibake yae da imufoisa. Erekaini naukekaini wirokekaini ya arara meba ibake Nabairo da aafoisaie ya da ma wiromiau eno yayana weiro  
\m Isaiyama eno wei.  
\v 28 Foruma eno weike nono wei, yewa wake naukenewaa uawe wei, Godima Danu wirokeka i Du me imusu oroubairo makakuneba mufeisaya wei.  
\v 29 Eno we me siniie i Du orou emenu emenu bebekuma bunawere wake we makakake anisa.   
\p
\v 30 Anisaro Foruma danu uwara oima make munike oya raarayai i uwararo ibeibi. Danu wake weeka daaba dadau uke dauisa ibake eme keuwere dawabairo fareibisa.  
\v 31 Fareibisaro Foruma emuabake Godinu yawokaku orofa wakeini Dai Waria Mi Yesu Kerisonu wakeini emuabairo wenewaa ukeibiro naukeibisa.