\id 2TH - Aneme Wake NT [aby] -Papua New Guinea 1988 (DBL -2013) \h 2 Desoronaika \toc1 DESORONAIKA GOI OROUBAIRO MOI OWAOWA \toc2 2 Desoronaika \toc3 2 Des \mt1 DESORONAIKA GOI OROUBAIRO MOI OWAOWA \c 1 \p \v 1 Na Foru, nama nono yewa moi wake ya Desoronaika goiro Godinu wake naukaisa oroubairo owaowa yanake odakune. Sairesini Dimodini emuama nabairo ibaada yae Babae Godini iyanu Dai Waria Mi Yesu Kerisonu orou yabairo arie wake weaisi. \p \v 2 Iyanu Babae Godini iyanu Dai Waria Mi Yesu Kerisoini emuama ya irauaiai unu kofisiro me irauaiai ibifone ibake weakune. \s1 Foruma Godibake we ma irauaiai ui wake \p \v 3 Naiyemuku, Godibairo yabake we ma irauaiai ukeibaisiie dawa irauaiai. Yanu Godi imukeka imuka daiwere ukaisake yanu yanu imukari uke makanaisa ibai daiwere ukaisaro ibake Godibairo yabake we ma irauaiai ukeibaisi. \v 4 Emema ya Desoronaika goi oroubake merama ukaisaro nono yama emuabairo moko merama uke dakaisake Godi mede dakaisake Godi imukenewaa ukeibaisa ibake Godinu naukeka orou yaisinabairo yanu ibi we ma daiwere ukeibaisi. \s1 Godima iyanu irau ukekaroma munakuke ku raara uke odaku wake \p \v 5 I ukaisa ibake Godima yabake we ma iwoka ukakune. Ie eno, emema yabake merama ukaisaie i merama ukaisa ima ya Godinu wake naukaisa orou yae Godinu yawokaku orofaro anifone ibake eno uke bou ukaku. Eno ukakuro Godinu moko makekaini fanisi makekaini ibai yaisina gienabu ukaku ie iya iwoka sinaisi. \v 6 Godima ibai yaisina gienabu ukakuke yabake merama ukaisa orou fanisi mafiane uke bou ukaku. \v 7-8 Nono ya merama uke yarakuneka oroubake wemaro ya nauawe. Iyanu Dai Waria Mi Yesu ureroma inaaini Dawaini Danu buna aneruini fafekuie Godima ya orou meramawere oroubairoma mune yaini iyabake imu siane ko yare ufene Godima buna mamisiro imu siane ko yare ufeisi. Iyanu Dai Waria Mi Yesuma fafekuke i Godi iwoka me orouini iyanu Dai Waria Minu irau wake nauke me orouini emua fanisi mafiaku. \v 9-10 I orouma i merama orofaro anifeisake me ibene ibene ibaada iyanu Dai Waria Minu iboo naisa da efeisa. Yesu fafekuro i orouma Danu irau arakeka bunawere da efeisaro Yesunu irau naukeka orou emua mane Dawa efeisa. I odoro Godinu wake naukeka orouma Yesu Kerisonu ibi we ma daiwere ufeisaro Danu wake naukeka orou yaisina emuama Dawabake we irau ukaada rooro wake daiwere wefeisaro emenu wake naufine fafekuro nono yama iyanu wake nauisaba wake yaini iini we irau ukaada rooro wake daiwere wefoisa. \s1 Foruma i Desoronaika goi orou buna mafiane Godibairo guriguri ukeibi wake \p \v 11 I ari eno ibake iyama ya imukadae Godibairo aine wai ure guriguri ukaada eno weibaisi, Godima ya we mune odirieba ibake Dawama yanu imuka ma daiwere ufiake ma irauaiai ufiaro yama Godi imukenewaa ukaada irauaiai uforo ya irau oroua wefine ibake eno weibaisi. \v 12 Godini Yesu Kerisoini Emuama ya irauaiai unu korakunekiba ibake ya eno uke irauaiai mane uforo eme moima ibai efisake yanu Dai Waria Mi Yesu Kerisonu ibi we ma daiwere ufisane ibake weakune. I odoro Yesuma ya Danu onamibairo we mune odifiakuke yanu ibi we ma daiwere ufiaku. \c 2 \s1 Darawadu ma merama ukaisa orounu wake \p \v 1-2 Naiyemuku, iyanu Dai Waria Mi Yesu Keriso fafekuro Danu ibooro enafeisi. I wake wemaro ya nauawe. Iyanu Dai Waria Minu odo idua farinua eno weifeisaie i wake naukeroma nono imukari da uaweke ia da siawe. Moi orouma Dai Waria Minu fafeku odobake iya afasoro orouma we bou ukaada Danu fareka odo fu sininua weaisia wefeisake yabake yewa owaowa Foruma odaisinu ibake kakuraisia wefeisaie i dawa ba me wakeya da nauawe. \p \v 3 Moi orouma ya we irufiakaisaie emenu wake da nauawe. I odoe me sara da fafekua. I odo fafine ufekuie eme keuwere emua ararua uyafeisake Godi medifeisake meramawere ufeisaro ibake i merama ukeka ubi mi dawae i merama orofaro anifeku mi dawako idua fafeku. \v 4 Dawa fafekuke i eme yaisina eno we irukada wefeku, i ba me godi yaisina emenu sibore sianekae okoanakuro nono nae daiwereya eno wefekuke Godinu dai sosi uwara ubarenaro amuke yaufekuke na godiya eno wefeku. \v 5-6 Adinaro yabairo ibaada i wake yaisina webai imukaisaba me? Ie ya iwoka, Dawa i merama ukeka ubi minu fareka daaba dadau ukaku ibake awoenae fare me. Godima i odo we odiba ibake i merama ukeka ubi mi dawako i odoro idua fafeku. \v 7 I fema ba me meramawere ukekabai awoena ukakuroma nono iya ma nuna ukaisi. Nono i mi dawa da fafiro danu daaba dadau ukaku Mi Dawa medifekuke anifekuie i ba me merama ukeka mi idua fafeku. \v 8 Dawa fafekuro nono dubuenaro iyanu Dai Waria Mi Yesuma fafekuke Danu bebeku muama i mi ma feafeku. \v 9 I ba me merama ukeka mi dawae seidaninu mi. Dawako seidaninu bunama waiya ufekuke eme yaisina uke irufiane ibake ereka daiwere ufekuke emuabairo buna ukeka daiwere ufeku. \v 10-11 Eno ufeku ibake i ba me merama ukeka mima i merama orofaro anifeisa orou emua idua we irufiaku. Nono i orouma Godinu ba wake nauke me, Godinu wake arara me, Godinu ma wirokeka mune meba ibake Godima emenu imukeka ma owere dafeku ibake i ba me merama ukeka minu meo wake naukenewaa ufeisa. \v 12 I orouma meo wake naufeisake Godinu ba wake da naufeisake emenu arara merama ukenewaa ufeisa ibake Godima emua kodo ufiakuke fanisi mafiaku. \s1 Godima ya ma owere mufiane ibake weike widu uke odi wake \p \v 13 Naiyemuku, iyanu Dai Waria Mi Dawama ya imukari ukakune. Godima ya ma wirofiane ibake i ubi ui odoroma we mune odirieke Danu Imumu Irau yabake mariero Danu wake nauisa. Danu ba irau wake naukenewaa uisa ibake Godima Danu wakeini Imumu Irauma yanu imuka ma gienabu ukaada ma nega negabu urie. Enoba Godi we ma irauaiai ufene ukeibaisi. \v 14 Godima naini nanu orounu bebekuma Danu irau wake wefene wei. Weiro iyae Godinu irau wake yabairo weisiro Godima ya u weiro nauisa. Godima ya we mune odiriero yabairo iyanu Dai Waria Mi Yesu Kerisonu arakeka mufone ibake wayo kofiakine yabairo aaki. \p \v 15 Naiyemuku, imuka ara uaweke iyanu owaowaro ba wakeini iyanu bebekuma ba weekaini i wake naukada enaenari uawe. \v 16-17 Iyanu Babae Godi Dawa ya imukari ukaada yabake me ibene ibene ibeka me marie. Dawaini iyanu Dai Waria Mi Yesuini emuama ya orounu imuka ma buna ufisike ya unu kofisiro aneme aneme irauaiai ufoke wefone ibake yewa wake yabairo weakune. \c 3 \s1 Yama Godibairo iyabake guriguri uawero Godima iya unu kofi wei wake \p \v 1 Naiyemuku, nanu dubuena kai wake ya nauawe. Godibairo iyabake guriguri uawero iyanu Dai Waria Minu wake iyama wefero eme keuwere naufisake irauaiai mane ufisa. Yae i wake nauisake irauaiai uisa enaenari emuama i wake naufisake irauaiai ufisane ibake weakune. \v 2 Moi orouma Godi imuke dakaisa. I ari eno i merama ukaisa orouma naini nanu orou unao umisaisa ibake yama iyabake Godibairo guriguri uawe. \v 3 Iyanu Dai Waria Mi Dawa deima ba. Ya mede dafiakuke ya ma buna ufiakuke ya unu kofiakuba ibake seidanima ya merama da uke yafiaku. \v 4 Iyama yabake weaisi i buna wake enaenari ukaisa ibake dubuenaro yama nono enaenari ukeifoisa. Iyanu Dai Waria Mi imukaisi ibake yaini enaenari eno imukaisa ibai iya iwoka sinaisi. \v 5 Yanu Dai Waria Mima Godinu imukari ukekaini Yesu Kerisonu enare ara ukekaini we ma iwoka ufiaro iwoka sifone ibake weakune. \s1 Iya yaisina boana waiya ufene wei wake \p \v 6 Naiyemuku, yewa wake iyanu Dai Waria Mi Yesu Kerisonu ibiro we iifa ukaisi. Godinu moi naukeka mima boana waiya uke meke wake nauke mero ofe koroko ukaada waiya uke mero me sara ibifeku mibairo awaawa da uawe. \v 7 Adinaro yabairo ibaada i furo iya me ibe dakeibisike waiya ukeibisi. Iyanu buna waiya ukeibisi ibai ya iwoka sinaisaya enaenari uawe. \v 8 Yabairo ibaada i furo uruna me mune ise dakeibisike oima make mune isaada ya seidanima merama uke yanao ufiaku ibake dumuini ewekaini Godinu waiyaini iyanu boana waiyaini ukeibisi. \v 9 Iyae Godinu waiya ukeka orouba iyanu uruna me mune ifene wefeisiie me mune ifeisi. Nono iyanu ararae iyanu ukaisi enaenari yama eno ufone ibake Godinu waiya dumuini ewekaini ukaada moi enama iyanu boana waiyaini ukeibisi. \v 10 Yabairo ibaada i furoe eno weisi, moi mima waiya uke dafekuie dawa uruna da maewero me ibifi weisi. \v 11 Yabairo moi orouma waiya uke dafeisake moi orounu fe ukeka sineka me sara ere weibaisaya eno weisaro nauisi. \v 12 I oroubake iyanu Dai Waria Minu ibiro we ma iifa ukaada buna wakeroma eno weaisi, me wake mane weekabai mediaweke yanu boana waiya uaweke yanu urunaini yanu eraerabusaini oima make muawe eno weaisi. \p \v 13 Naiyemuku, irauaiai mane ukeibiaweke koroko da uawe. \v 14 Yabairo moi mima yewa owaowaro wake da naufekuie dawa eaweke dawabairo awaawa da uawero dawa maru ufi. \p \v 15 Dawae yanu wasai mi meya dawabake merama da uke yaewe. Dawae yanu naiyeya we iifa ukeka wake mane weawe. \s1 I dubuena kai wake \p \v 16 Iyanu Dai Waria Mima yabake irauaiai wirokeka yabairo mafiaro aneaneme yabairo fareifiie me irauaiai ibeifone ibake weakune. Iyanu Dai Waria Mima yanu imuka ubarenaro ibifine ibake weakune. \p \v 17 Na Foru nama yewa arie wake nanu wanama owaowa uke odakune. Nanu owaowa yaisina eno ukeibakuneie nanu wana bio idua. \p \v 18 Iyanu Dai Waria Mi Yesu Kerisonu irauaiai unu koreka yabairo mafiaro demuiro ibifone ibake yewa wake weakune. Nanu dubuena kai wake idua me sininu.