\id 1PE  - Aneme Wake NT [aby] -Papua New Guinea 1988 (DBL -2013) 
\h 1 Fida 
\toc1 FIDANU BOKAI OWAOWA 
\toc2 1 Fida 
\toc3 1 Fid 
\mt1 FIDANU BOKAI OWAOWA  
\c 1  
\p
\v 1-2 Na Fida Yesu Kerisonu afasoro mi nama yewa owaowa yanake odakune. Ya Godinu we mune odirie orou yama yanu ba orofa meisake fiake imusu oroorofaro anisa orou yabake weakunea nauawe. Ya Fonidia orofa orouini Gareisia orofa orouini Kafadosia orofa orouini Eisia orofa orouini Bidinia orofa orouini yabake yewa owaowa yanake odakune. Godima Danu arara uike ya we mune odirie. Ibake Godinu Imumu Irauma ya orounu imuka ma gienabu ui ena ubiye Yesu Kerisonu wake naufone ibake eno ui. Enoba Godi Dawae Yesu Kerisonu iwama yanu meramawere ukeka imuka uroi. Ibake yae Godinu arara yaisina ufone imukaisa. Ibake nanu arara dawae Godima ya unu koreifiake Danu irau ukeka sineka makeifiaro yae irauaiai mane ibeifone ibake weakune.   
\s1 Irau wirokekae urero Godima yawokakua wei wake  
\p
\v 3 Iyanu Dai Waria Mi Yesu Kerisonu Babae Godinu ibi we ma daiwere ufene weakune. Godi Dawae iyabake imukari daiwere ukaada ibake Yesu Keriso feariroma nono ma uyari ibake iyae Kerisobairo awoena me ibeka ma’iro mukike i me ibene ibene ibeka imukada ie mufeisia we imukaisi.  
\v 4 Godima iyanu yaure daukeka moko munekae me ibene ibene ibeka urero yawokaku. Enoba i me ibene ibene ibekae ino mero amearubu. Ie urero ibinu Godima yawokakuba ibake da yaufeku.  
\v 5 Yae i dubuena kai odoro ma boroo yafeku i wirokeka mufone ibake koro ukaisaie yanu Godi imukekae irauaiai ibake Godima ya bunawere yawokakuneba ibake urero yanu moko muneka iro amuke mufoisa.   
\p
\v 6-7 Yae i me ibene ibene ibeka mufoisaya awoena rooro daiwere uawe. Awoena yewa awe waa ubu imusu imusu yabairo faraisaie Godima yanu Godi imukekabai uke eraada yanu Godi imukekae irauaiaiba meramawere ari ibake eno ukaku. Emema gorudi inaama yareibaisaro nono i gorudie me ibene ibene ibeka eraerabusa me. Emema gorudi mufisane inaama yareibaisaro ba gorudi farafa fareibakuro nono i oma me sineibaisaro irau gorudi mane ibeibaku. Nono i gorudie irauaiai meroma nono yae Godima irauaiaiya we imukakuneba ibake enaenari Godinu awe waa uyarekae yanu Godi imukaisabai uke erakuba ibake Godima yanu irau me ibene ibene Godi imukekabake Yesu Kerisonu fafeku odoro yabake Dawama we ma irauaiai ufiakuke ya ma arafiakuke yanu ibi we ma daiwere ufiaku.  
\v 8 Yama Dawa ere dakaisakema me ibaada Dawabake imukari ukaisa. Enoba yama Dawa awoena ere dakaadama Dawa imukaisake ureroma isare aaria eno we imukaisake rooro ukaada emebairo wakema weekabaie gienabu sine dakaku.  
\v 9 Yae Godi imukenewaa ukaisake Godibairo yanu imukanu wirokeka munaisa ibake rooro daiwere ukaisa.   
\p
\v 10 I Godinu adinaro we bou ukeibirie orouma Godinu irauaiai unu korekaini yanu wirokeka wake weibisakema nono i orouma i wakenu ubi yodia ukeebe ukeebe fou ure dauisa.  
\v 11 Ibake Godinu Imumu Irauma emenu imuka ubarenaro ibaada Yesu Kerisonu imukaro oferi waurekaini ukekaini uyare urero anekaini Godima Danu ibi we ma daiwere ukekaini i wake weiro i orouma naukada ainabake weaku ari eno we imukada abonodo i ari eno ufeku ari eno weada ma nuna ukeibisa.  
\v 12 I we bou ukeka orouma eno weisaroma nono emenu weisa ibai emuabairo da fafekua Godima eno weike nono wei, ibai ya awoena ibinisa oroubairo fafekua eno wei. Ibake awoenae i Godinu irauaiai wake iya yaisinabairo we aaraisaro iyama naukaisi. Ibake i Imumu Irauma i Godinu wake weeka orou buna marie enaenari yewa orouini buna mariero Danu buna mai i wake we ma iwoka ukaisa. I wakeye irauaiaiba ibake i aneruini emuama i wakenu ubi iwoka sifisane ukeibaisa.   
\s1 Godima iya u we mune odike me irauaiai ibifene wei wake  
\p
\v 13 Ya waiya ukaadae yanu Godi imukeka imuka ma ara uaweke uke bou uawe. Yesu Keriso Dawa fafekuie Godima yae irauaiai unu kofiaku enoya erenewaa ukaada koro uawe.  
\v 14 Adinaro yae nauke medeka amaraku ari eno. Nono awoenae ya nauke mede dakaisaya yanu adinaro meramawere ukeka sineka mediawe. I adinaroe yabairo irau imukeka ibe dakeibiba ibake meramawere ukeibisaro nono awoenae Godima ya unu korakunea eno da uaweke Godinu wake nauawe.  
\v 15 Godi Danu imukae ino mero amearubuke nono Dawae merama ukeka uke dakakuke Dawa ibaada ya u we munakune enoya gienabu yaini iini enaenari irauaiai mane uawe.  
\v 16 Godinu bukaroma eno weaku, Nae iifawereke irauaiai ukeka mane ukakunea yaini iini enaenari ba me ukeka da uaweke irauaiai ukeka mane uawe eno weaku.   
\s1 Godi Danu daiwere me makekama iya make mu’i wake  
\p
\v 17 Yae Godibairo guriguri ukaadae Dawabake Babae weaisa. Enoba Godima kodo uraadae gienabu mane uraku ibake moi oroubairo enareroma moi oroue meramawere ukisaya eno imuke dakaku. Enoba iya aneme aneme ukaisiie iyanu moko enaenari makakuniro ie iya iwoka sinaisi. Ibake ya yewa yanu doo farafa mero imusu dooro ibaadae Godi imukenewaa uaweke Dawabake iifa ukenewaa uawe.  
\v 18 Yae yanu sisia sirorari orounu meomao bisara ukaada meomao mane ukeibisa ibake i ukekama ya mame murieke yawokeibiriero nono Godima ya i ba me ukekabairoma we mune odifine ibake i mame muneka moko daiwere marie.  
\v 19 Ibake Dawae i meramawere eraerabusa gorudini oi kaibai mane make daurie. Dawae Yesu Kerisonu irau amearubu iwama ya make murie. Enoba Yesu Keriso Dawae amearubu awoena mamoe abu ari bou biobio meke ino mero aneme aneme yaisinae me irauaiai mane.  
\v 20 Ibake Godima i orofa akaka ubu daui i furo Yesu Keriso i waiya ufine ibake we mune odike nono awoena yewa dubuena kai odoro Dawae Yesu iyabake awoena arurowere ma boroo yari.  
\v 21 Ibake yae Godi imukenewaa ukaisa. Enoba Godi Dawa Yesu Keriso feariroma nono ma uyarike Danu ibi we ma daiwere ui. Dawa eno uiba ibake yanu imuka yaisina Yesu Kerisobairo odekaini Yanu Godi imukeka Godibairo idua ibinu ibake Godi koro ukeifone weakune.   
\s1 Iyanu naiyemukubake oa ufene wei wake  
\p
\v 22 Yae Yesu Kerisonu wake nauisake mune imukaro oisa ibake Dawama yanu imuka uroiba ibake irauaiai ibaada i Godi imukaisa orou yaisinabake imukari ukakuneka. Ibake yanu yanu irau imukaroma imukari uke makaewe.  
\v 23 Yae i awoena me ibeka muka ie yanu amaema ya dorie ari eno mero ie me ibene ibene ibeka ari eno. Enoba Godinu me ibene ibene ibeka wake ima ya awoena donao ari urie.  
\v 24-25 Godinu bukaroma eno weaku,  
\li1 eme yaisinae koe ari eno. Ibake emema yewa dooro ibekanu arakekae koe runi ari. Enoba koema sabunaku runibai roinakuke isarada me sinakuroma nono Godinu irau wakeye me ibene ibene ibeifekua,  
\m Godinu bukaroma eno weaku. Enoba i wakeye Godinu irau wake. Moi orouma yewa demui wake yabairo weibisaro naukeibisa.   
\c 2  
\s1 Dai Waria Mi Dawae me ibeka dai omawere ari enoya wei wake  
\p
\v 1 Godinu wake naukaisaba ibake awoenae imuka ka ukekaini meo imuka imukekaini meo weekaini madudu ukekaini derena makeroma wake weekaini i ukeka yaisina mediawe.  
\v 2-3 I amaranakuma danu amaenu ama ifine ii weibaku i ari enoe yama Godinu irau wake mane kakurenewaa ukaada mune awararo odifone ibake weakune. Eno ufoisaie Godima ya ma ara ufiakuke ma wirofiaku. Enoba Iyanu Dai Waria Mima yabake imukari ukaada ma irauaiai ukakuro iwoka sinaisaba ibake aine wai ure eno ukeifone weakune.   
\p
\v 4 Yesu Keriso Dawae i me ibeka omawere ari enoroma nono eme moima Dawa meisaro Godima Dawae irauaiaiya we imuike we mune odi enoya Dawabairo aniawe.  
\v 5 Nono yaini iini i me ibeka omawere were ari eno. Enoroma nono yaini Dawaini ya demui sinaisaro Godima ya Danu orou we mune odakuneke yae i oma ari enoba Danu sosi uwarae ya we mune ma enarakune. Enoba yae Godinu iifa ofereni ode sibore sianeka orou ari eno. Ibake yae Dawabairo yanu imukaini yanu imukekaini yaisina Yesubairo ofereni odinao uawero Godima Yesu Keriso imufike yanu ofereni mufi.  
\v 6 I Godinu bukaroma Yesubake eno weaku,  
\li1 eawe, Nanu irau omawere dawa Nama muneke i uwara kukubu kai ari Saioni orofaro sianeba aina mima danu imuka yaisina Dawabairo odifekuie i mi dawa maru da ufekua,  
\m eno weaku.  
\v 7 Ya Yesu Keriso imukaisa orouma i omawere ari Mi Dawae irauaiai miya eno we imukaisa. Nono i Yesu Keriso imuke dakaisa orou emuama i omawere ari Mi Dawa imuke dakaisa. Enoba Godinu bukaroma emuabake eno weaku,  
\li1 i uwara ma enareka orounu mune siaka oma ie i uwara kukubu kai ari sinia,  
\m eno weaku.  
\v 8 I Godinu bukaroma nono eno weaku,  
\li1 i omae emenu ure bisubisu ukeka omake nono ie eme ma birukeka omaya,  
\m eno weaku. I orouma Godinu Amara Yesu Kerisobake wake nauke dakaisaba ibake ure bisubisu ukaisa. Ibake Godima eno weaku, ainama Godinu Amara Yesu Kerisobake wake nauke dafekuie dawa ure bisubisu ufekua eno weaku.   
\s1 Iya yaisinae Godinu oroua eno wei wake  
\p
\v 9 Nono yae i ure bisubisu ukeka orou ari me. Enoba Godima ya we mune odirieke Danu iifama imusu ariro dai orou we mune odirieke ofereni ode sibore sianeke orou we mune odirie. Ibake Dawama ya dumuroma mareke murieke Danu irauaiai edororo odirieie Godinu irauaiai ukeka sineka wake emebairo wefone ibake ya we mune odirie.  
\v 10 I adinaro yae ba orou meroma nono awoenae yae ba Godinu orou sika. I adinaro yae Godinu imukari ukeka ma nuna ukeibisaroma nono awoenae Godima yabake imukari ukakune ibai yae iwoka sinaisa.   
\s1 Iya yaisinae Godinu waiya ukeka orou  
\p
\v 11 Naiyemuku, nanu moi wake wemaro ya nauawe. Yae yewa orofa akakaro ibinisa orou ari eno mero yae imusu moi orofa orou ari eno. Enoya yanu ofenu meramawere ukekanu arara yaisina mediawe. I ofenu arara ima yanu imumuini uranaku.  
\v 12 Enoya ya Godi imukaisa orouma i imusu Godi imuke dakaisa oroubairo ibaadae irauaiai mane uawe. I imusu orouma yae meramawere ukaisaya eno meo wayai wefisane imufeisakema nono yanu irau ukeka ereifeisaba ibake emenu meo wayai wake da wefeisake nono Godinu fafeku odoro Godinu ibi we ma irauaiai ufeisa.   
\p
\v 13-14 Yae iyanu Dai Waria Minu oroua yanu gaemani orou yawokakuneka dai orounu darawadu yaisina ukenewaa uawe. I gaemani orou yawokakune dai minu darawaduini nono dawama weiro faka orounu darawaduini yaisina ukenewaa uawe. Dawama weiro faka orouma i meramawere ukeka orou fanisi mafiakaisake nono i irauaiai ukeka orou emenu ibi we ma daiwere ufiakaisa enoya i darawadu yaisina ukenewaa uawe.  
\v 15 Moi orouma Godinu wakebake merama wake weaisa. Ibake Godi Danu ararae yama irauaiai uforo i awara buna me orouma ibai efisake emenu merama ukeka medifisane ibake eno imukaku.  
\v 16 I meramawere ukekama ya yawoke dakakunea me irauaiai mane ibiawe. Iyae ana ebaro ibeka orou ari eno mero irauaiai ibinisia wefoisake nono meramawere ufoisaie meramawere ufoisa. Enoya i ari eno da uaweke Godinu waiya ukeka orou ari sine ibiawe.  
\v 17 I eme yaisinabake iifa uaweke i Godi imukaisa orou yaisinabake imukari uke yayakawe. I Godibake iifa uaweke Danu weaku wake naukadama nauke me ari da uawe. I gaemani yawokeka dai mi iifa uke yaewe.   
\s1 Yesunu umuro anifeke Dawaini demuiro inimu waufene wei wake  
\p
\v 18 Nanu moi wakeye yewadoya eawe. Ya waiya ukeka oroue yanu eme ereka orou iifa ukaada emenu weifeisa wake naukenewaa uawe. I eme ereka orou yaisina, emua owainanaku yawokakuneka orouini i arawere yawokada wake keuwere weada yawokakuneka orouini emua yaisina emenu wake naukenewaa uawe.  
\v 19 Ainama meramawere uke dakakuro eme ereka mima fanisi me makakuro Godinu arara mane ufine ibake dino uke dakakuie Godima i mi we ma irauaiai ukeibaku.  
\v 20 Nono ainama meramawere ukakuro nono i eme ereka mima usima urakuro dino uke dakakuie ibaibake weroma Godima dawa we irauaiai da ufeku. Nono yama irauaiai ukaisaro eme ereka mima usima urakunero ibake weroma dino uke dakaisaie irauaiaiya Godima eno imukaku.  
\v 21 Enoba i meramawere uke meroma me sara oferi waurekae yanu waiya. I Yesu Kerisoma korosiro oferi wauriba ibake yama eno ukaisaie Godima wei enaenari ukaisa. Enoba Yesu Keriso Dawaini enaenari yabake oferi daiwere waureibiba ibake Dawae yanu erekarana ukeka ubiye idua. Enoya Danu umuro aniaweke enaenari uawe.  
\v 22 Yesu Keriso Dawae merama uke da uike meo wake we daui.  
\v 23 I moi orouma Dawabake merama wake weibisaro emuabake moko we dakeibi. Usima ureibisaie yae enaenari umiaua eno we daui. Godima kodo yaisina gienabu uraku ibake Yesu Kerisoma i Godi imukada moko uke daui.  
\v 24 Enoba Yesu Keriso Danu ararae iya iyanu meramawere ukeka ibake fanisi munike korosiro feari. Dawa usima ukaro biobao sini ibaima iya ma wiro’i.  
\v 25 Yae daaba imusu imusu me sara enaada mamoe abuma ukeibaisa i ari eno ukeibaisa. Enoba yae eno mane ukeebe nono awoenae iroma owekake iyanu Dai Yawokeka Mibairo ane faka. Ibake Dawama yanu imuka yaisina yawokakune.   
\c 3  
\s1 I emeakaini awekaboini mune makaneka wake  
\p
\v 1-2 Iyama iyanu dai orounu wake naukaisike enaenari ukaisi i ari enoe ya awekaboma yanu emeakanu wake naukenewaa uawe. I moi emeakama Godinu wake nauke dakaisaba ibake ya awekaboma yanu emeakunu wake naukenewaa ufoisaie yanu irau ukeka sineka emuama efeisake i Godi imufeisa. Nono yama emuabairo Godi imukeka wake da we ma iwoka ufiakaisaroma nono yanu iifa ukeka sineka ima yanu emeakanu imuka ma owefoisa.  
\v 3-4 Yanu ofe mane ma irauaiai ukekae idua me sifeku. I foumaro segina siane odekaini i wanaro sia wawekaini irau wau runekaini i mane irauaiai meroma nono yanu ma irauaiai ukekae i ari eno, irau imuka imukekaini imuka irauaiai ukeka ibake imukekaini imuka irau ukekaini i yaisinae yanu weree wereeye iduaya Godima eno imukaku.  
\v 5 Enoba i adinaro Godi imukeibisa awekaboma Godi imukada emenu weree eno ukeibisa, emenu emeakanu wake naukenewaa ukeibisaie i emenu weree dawa idua.  
\v 6 Sera dawa eno ukaada danu emebakeye nanu amaraini iyanu uwara yawokeka dai miya eno wei. I ari enoya enaenari ufoisake yanu emeakabake ia da sifoisaie ya Seranu aruaruma ari eno sifoisa.   
\p
\v 7 Ya emeakabake wake wemaro nauawe. Ya emeakama yanu awekabobairo irauaiai uke ibaada emua imukenewaa uawe. Ya emeakae bunawerero nono emuae buna meya emenu ofebake yama iifa uke yayakawe. Emuaini yaini Godinu irau unu koreka demuiro munaisaba ibake yama yanu awekabobairo meramawere ufoisaie Godima yanu guriguri ukeka da naufeku.   
\s1 Iya yaisina imuka demuiro imukada me irauaiai ibifene wei wake  
\p
\v 8 Nono ya emeakaini awekaboini ya yaisina yewa wake nauawe. Imuka demuiro imuawe. Imuka rooro bobo ibaada fukeru mero yanu yanu imuke makaeweke demuiro ibaada imukari uke makaewe.  
\v 9 Aina ainama yabake meramawere uke yafiakaisaie emuabake moko meramawere da uke yayakawe. Ainama yabake wake meramawere wefekuie dawabake nono moko merama wake da yaeweke yama dawabake we ma irauaiai uawe. Anemebake Godi Danu arara iyama emebake we ma irauaiai ufero nono Dawama iya we ma irauaiai umine ibake iya we mune odii.  
\v 10-11 I ari eno Godinu bukaroma eno weaku,  
\li1 ainama danu arara yewa ibekanu wirokekaini irauaiai ibifine ufekuie dawa wake ara da wefike meo da wefike dawa merama ukeka medifike irauaiai mane ufi. Dawa irau ukeka fou ufine yodia ufeku.  
\v 12 Enoba Godi Dawa irau orou eraada emenu guriguri ukeka naukakua irauaiai mane uawe. Dawa eno ukakuke nono i meramawere ukaisa oroubake dino ukakuke emua medakunea,  
\m i Godinu bukaroma eno weaku.   
\s1 Irau ukekabake oferi waufeisiie idua iraua wei wake  
\p
\v 13 Godima eno ukakuba ibake yama irauaiai ufoisaie ainama yabairo meramawere ufeku?  
\v 14-15 Nono yama irauaiai ufoisaro moi orouma yabake meramawere ufeisaie Godima ya we ma irauaiai ufiaku. Enoba i oroubake ia da siaweke Yesu Keriso imuka mane imukenewaa uaweke Dawae iyanu Dai Waria Miya we imukada Danu ibi we ma uyaewe. Aina ainama yanu Godinu we bou ukeka mufone koro ukeifoisa ibaibake we nauke efeisaie emuabake irauaiai ukaada owainanaku moko weawe.  
\v 16 Ure nudaroma weaweke iifa ukaada moko weawe. Yama irauaiai gienabu ukeka mane ukeibiawe. Eno ufoisaie i yabairo meramawere uke yafiakaisa i orouma iyanu Yesu Kerisonu irauaiai ukeka sineka ibake maru sifeisa.  
\v 17 Godima iya eraada imukakuroma nono eme moima iyanu irauaiai ukekabake iya fanisi mafeisaie i dawa Godinu ibooro iyanu merama mero ie iduaya Godima eno imukaku. Nono iyama meramawere ufeisiro eme moima iya fanisi mafeisaie i dawa yanu meramaya Godima eno imukaku.   
\s1 Yesu Kerisoma iyanu merama ukeka mune imuke medifine ibake feari wake  
\p
\v 18 Yesu Keriso Dawa eme yaisinanu merama ukeka ibake fanisi wauri. Enoba Dawae meramawere mero Dawae irauaiai Miroma nono i irauaiai Mima i meramawere oroubake feari. Enoba Danu ararae iya yaisina Godibairo waure ane odimine ibake iyabairo idua feariro me siniba nono dubuenaro da feafeku. Danu ofeye yewa dooro feariro nono Danu me ibeka imumuma me ibene ibene ibinu.  
\v 19 Dawae Danu me ibeka imumuma i feaka orounu imumu yaisina ibeibisa orofaro anike Godinu wake emuabairo ane wei.  
\v 20 I ibeibisa orofaro imumu yaisinae ba ofe boboro adinaroe yewa dooro ibaada Godinu wake nauke medeibisaro Godima emuabake dino ukaada i furo nono fanisi make darieke yawokenewaa ukeibirie. I furo Noa danu boudi ubu ukeibi. Dawa i boudi ubu uke me siniro eme keuwere me eida mane (8) emuama i boudi ubarenaro amuisaba ibake aduama emua ma iyare darieke ma faufau yariero feare da uisa.  
\v 21 Enoya i wake imuke eawe! I adina ukekama i babadaido ukekanu ubi ma boroo yari. I babadaido ukekae iyanu wirokekanu daaba. Ibake ima iyanu ofe uroke dakaku. Enoba yae i babadaido ukaada Yesu Keriso Dawa fearekaroma nono uyaria eno imukaisake imukeka ino mero irauaiai mane imukaisake irauaiai sinaisake eno mane ibifeisia Godibairo eno weaisa.  
\v 22 Enoroma Yesu Keriso Dawa urero amuike ane ibinu. Enoba Dawae Godinu baena wana enaro yaure ibaada aneruini buna eraerabusa yaisina Dawama yawokakune.   
\c 4  
\s1 Oferi waufeisiie merama ukeka sineka idua medifeisia wei wake  
\p
\v 1-2 I Yesu Keriso Dawa Danu oferi waureibiba ibake i Danu oferi waureibibai imukenewaa uaweke yanu Godi imukeka imuka ma buna uawe. Imuke eawe. Ya oferi wauraisaie ba me merama ukekaini meramawere imukekaini medaisaba ibake i ba me ukekanu buna me sineibaku. Enoba yama ibaadae i ba me merama ukekaini meramawere imukeka imuke medifoke Godinu arara mane ukeifone ibake weakune. Yanu adinaro ibaadae i Godinu wake nauke me imusu orounu ukeibisa enaenari meramawere ukeibisaroma nono awoenae i meramawere ukeibisa ibai imuke mediawe.  
\v 3 Ya adinaro ibaadae eno ukeibisa, moi minu aruma aweka enare odeibisake merama ukekabake ararama imusu ari ukeibisake merama yaura ureibisake ara adua daiwere iseibisake ba me godibairo sibore sianeibisake eno mane ukeibisa.  
\v 4 Enoba nono yae awoena yanu Godi imuke daukeroma naiyemukunu merama ukeka sineka ari eno uke dakaisaba ibake emua imuka foria ukaisake yabairo wake merama weaisa.  
\v 5 Enoba Godi Dawae Danu kodo ureka daaba uke bou ukakuba ibake i fearaisa orouini me ibinisa oroubake kodo ufekuba ibake Dawae i oroubairo emenu meramawere ukekabake we nauke efekuro nono emua Dawabairo emenu merama ukeka sineka yaisina wefeisaro naufekuke Dawama emua fanisi mafiakuro emuama Dawabairo moko wake moi da wefeisa.  
\v 6 Enoya i feaka orou emua yaisina Godinu wake nauisa. Enoba i fearekae i orou emenu ofenu fanisi munekae iduaroma nono emuae i ari eno uke fanisi mafiaro ibake emuama nono emenu imumu Godi ari me ibifisane ibake Godinu wake emuabairo adinaro weiro nauisa.   
\s1 Godi Dawa aneaneme ukaku i ari eno Danu wake naukaisa orou emua enaenari ukaisaya wei wake  
\p
\v 7 Yewa orofa akakanu eraerabusa yaisina me sifine ukakuba ibake ya guriguri ufone ukaadae me sara da ibiaweke yanu onarou mane yawokenewaa uaweke imukenewaa uawe.  
\v 8 Nono yanu yanu imukari ukenewaa uke makaewe. Eno ufoisaie yanu naiyemukunu ba me ukeka eraada da imufoisa.  
\v 9 I yadai fareka oroubake dino da uaweke we erakuyakawero yaini demuiro ibifisa.  
\v 10 Godima iya yaisinabake buna imusu imusu ma’iro yawokaisaba ibake ima yanu yanu unu kore makaewe. Eno ufoisaie Godima ya marie bunama eme unu kofiakaisa.  
\v 11 Enoba moi minu buna makekae Godinu wake weeka, dawae Godinu bunama wenewaa ufeku. Nono moi minu buna ukekae eme unu koreka, dawae Godinu bunama eme unu korenewaa ufiaku. Enoba yae Yesu Kerisonu ibiro eno uawero emema ibai eraada Godinu ibi we ma daiwere ufisa. I buna yaisinaini arakeka yaisinaini Godibairo me ibene ibene idua ibeifeku. Nanu wake idua.   
\s1 Yesuini oferi demuiro waurekabake wei wake  
\p
\v 12 Naiyemuku, nanu moi wake yewadoya eawe. Ure yanakewere inaa waa ari ima yabairo fafekuke ya uke iruke efiakuie imuka foria da uawe. Ie kawama ukeka mero ie eme imusu imusubairo i ari eno ure yanakewere fareibaku.  
\v 13 Enoba i ure yanakewere ibake ia da siaweke rooro uawe. Yae Yesu Kerisonu wauri oferi demuiro waufoisaba ibake dubuenaro Danu arakekawere fafeku i furoe rooro daiwere ufoisa.  
\v 14 Enoba eme moima yanu Godi imukekabake yabairo wake merama wefeisaie rooro uawe. Godinu arakekawere Imumu Irauma yabairo bunawere fareifekua ibake rooro uawe.  
\v 15 Nono i eme ma fearekaini waira ukekaini merama ukekaini eno da uawe. I meramawere ukekabake ure yanakewere yabairo fafekuro mufoisaie irauaiai mero meramawereya eno da uawe.  
\v 16 Nono yanu Godi imukekabake ure yanakewere yabairo fafekuie maru da uawe. Yae Yesu Kerisobairo ibaada yama Danu ibi munaisaya maru da uaweke Godibairo we ma irauaiai ukeibiawe.   
\p
\v 17 Enoba i kodo ureka odoe idua farinu. Idua farinuba ibake Godima Danu we mune odirie orouko kodo ufiaku. Nono iya i Godinu we mune odii orouko kodo umiside nono i Godinu wake nauke dakaisa oroubake aneaneme uke yafiakuro emenu dubena ibeka anemedei meramawere mufeisa?  
\v 18 Godinu bukaroma eno weaku,  
\li1 i Godinu wake naukaisa orounu wirokeka arawerede nono i Godinu wake nauke dakaisake meramawere ukaisa orou da wirofeisaie aneaneme ufeisa?  
\m eno weaku.  
\v 19 Ibake Godinu aararo ainama danu imuka yaisina Godibairo odifekuro nono dawabairo meramawere fafeku ibake oferi waufekuie danu arararo uke dafekuroma nono Godinu ibiro eno ufeku ibake ie irauaiai. Ie irauaiaiba ibake dawae gienabu enaada dawa ubu ui Godibairo danu imuka yaisina Dawabairo odifekuro i we bou ukaku enaenari ukeibaku Godi Dawama i mi yawofeku.   
\c 5  
\s1 Ya dai orouma Godinu mamoe abu yawokenewaa uawe wei wake  
\p
\v 1 Ya sosi uwara yawokeka oroubake nanu wake wemaro nauawe. Naini iini nae sosi uwara yawokeka mi. Nae Yesu Kerisonu korosiro oferi waureibibai nanu naisama ereke nono Dawa Danu arakekawerero fafekuro Dawaini naini demuiro ibeifuku. Enoya nanu riba wake yewadoya eawe.  
\v 2 Godinu sosi uwararo Danu wake naukaisa orou yawokenewaa uawe. Mamoe abu yawokaisa orouma emenu mamoe abubake rau makaisa i ari eno yanu sosi uwararo Godinu wake naukaisa oroubairo Godinu wake uruna ari mayakawe. Yanu arara oi mufone ibake weroma yanu waiya da uaweke yanu imuka yaisina i waiyaro odiaweke i waiya ukaada ibai ukenewaa uawe.  
\v 3 Arawere da yawoyakaweke yaini iini irauaiai ukaadama weawero efisake yanu ufoisa enaenari ufisa.  
\v 4 Eno ukeifoisaro i bokai yawokeka Mi Dawa fafekuie Danu bunaini arakekawerero Dawaini demuiro ibifoisaie i dawa yanu weree uwafone mogoiso barukaisa i ari ie yanu moko muneka idua mufoisa.   
\s1 Iyanu onarou ma buna ufeke imukenewaa ufene wei wake  
\p
\v 5 Ya awoena orou, yama i adina bisara orounu wake nauaweke emua iifa uyakawe. Ya yaisina imuka fukeru da uaweke yanu yanu unu kore makaewe. Godinu bukaroma eno weaku, Godima i imukama fukeru ukaisa orou medakuneke i owainanaku ukaada imuka fukeru uke dakaisa orou emua unu korakunea eno weaku.  
\v 6 Enoba yae Godima iya Godinu bunawere yawokakuniba ibake ibai imukada imukama fukeru da uawero Dawama ya Danu fafeku odoro ma daiwere ufia.  
\v 7 I Godi Dawae ya yaisina eraada yawokakunea yanu imukanu inimuwere Dawabairo odiawero ibifi.   
\p
\v 8 Irauaiai koro uforo yaini wasai ukaku mi danu ibiye seidani dawa nauwaro awe kua ari eme ake ifiane yodia uke eneiaraku.  
\v 9 Enoba Dawa yabairo eno ufekuie yanu Godi imukeka imukama ma buna uaweke dawa ma bereawe. Ya iwoka, dawa i Godinu wake naukaisa oroubairo yaisina enaenari meramawere ukakuro ya yaisina iwoka sinaisa.   
\p
\v 10 Enoba ya eno uke oferi waufoisaie Godi Dawa i irau unu korekanu Babae. Enoba Dawama i wake we bou uiba ibake yaini Yesu Kerisoini demuiro ibaada Danu arakeka mufoisa. Yae oferi funaku waureifoisaie Godima ya mune ma gienabu ufiake ma enafiakuke ma buna ufiakuro me irauaiai ibeifoisa.  
\v 11 I buna daiwere Dawabairo ibeifekuba ibake Dawa i yaisina me ibene ibene ibaada yawokeifeku. Nanu wake idua.   
\s1 I dubuena kai arie wake  
\p
\v 12 Siweinasi dawama yewa owaowa waure aare yabairo mafiaku. Dawae irauaiai Godi imukaku mi. Enoba yewa owaowae nama weakunero Siweinasima owaowa yanake odakuro yanu imuka ma ara umiane ibake yewa wake weakune. I Godinu irau unu koreka wake yewado ba adaadake owaowa yanake odine. Enoba yewa wake erenewaa uaweke yanu Godi imukeka imuka ma ara uawe.   
\p
\v 13 I Babaronia goiro ibaada Godinu wake naukaisa orouini yaini yae Godima we mune odirie. I orouini nanu amara Makini emuama yabairo arie wake we odaisaisa.  
\v 14 Enoya yama i Godinu wake naukaisa orou fou ufiakaisaie wana mamaada arie wake weawe. Yae Yesu Kerisobairo ibinisaba ibake emema Godinu irauaiai ukeka yabairo ibeifiro me irauaiai ibeifone weakune. Nanu wake idua me sininu.