\id 1CO  - Aneme Wake NT [aby] -Papua New Guinea 1988 (DBL -2013) 
\h 1 Korinida 
\toc1 KORINIDA GOI OROUBAIRO BOKAI OWAOWA 
\toc2 1 Korinida 
\toc3 1 Kor 
\mt1 KORINIDA GOI OROUBAIRO BOKAI OWAOWA  
\c 1  
\p
\v 1 Godi Danu arararo uike na Foru Yesu Kerisonu afasoro mi we mune odikara ibake naini iyanu naiye Sosidinisi uwama yabairo arie wake weaisu.  
\v 2 Ya Godinu wake naukaisa Korinida goi orou yabake yewa owaowa uke odakune. Godima ya Yesu Kerisobairo demuiro ma dakaa uke odirieke yanu imuka ma irauaiai uike yae Danu orou sifone ibake we mune eka imusu odirie. Yaini i aboro aboro ibinisa imusu orouini emua Yesu Keriso iyanu Dai Waria Minu ibi we ma daiwere ukaisaba ibake Dawae emuaini iini emenu Dai Waria Mi.  
\v 3 Iyanu Babae Godini iyanu Dai Waria Mi Yesu Kerisoini Emuama ya unu koraada imukari ufisike emenu irau ukeka yabairo me mafisiro irauaiai ibifone ibake weakune.   
\s1 Foruma Godibairo we ma irauaiai ui wake  
\p
\v 4 Yae Yesu Kerisonu oroubake Godima ya imukari ukaada ya unu korakune ibake nama Dawabairo we ma irauaiai ukakune.  
\v 5 Godima ya unu korakune ibake yae irauaiai sine ibaada Godinu imukeka yaisina iwoka sinaisake Godinu wake yaisina weaisa.  
\v 6 Yaini ibaadae Yesu Kerisoma ya unu kofiakua wero i wake nauisa enaenari awoenae yabairo ukinu.  
\v 7 Yae iyanu Dai Minu fafeku odo yawokaisaie Godinu bunaini we ma irauaiai ukekaini i yaisina yabairo ibinu ibake awoenae Godinu waiya irauaiai ukaisa.  
\v 8 Yesu Kerisoma ya unu korakuneba enare ara ukaisaie yabairo merama ibe me. Ibake Yesu Keriso Dawa fafekuke kodo uraada ya fanisi da mafiaku.  
\v 9 Godima yaini Danu amara iyanu Dai Waria Mi Yesu Kerisoini awaawa ufone ibake odi. Dawae Danu imukeka ma owere dakaku. Dawa aneme weakuie enaenari ukaku ibake yama Danu wake naukenewaa ufone weakune.   
\s1 I sosi uwararo Godinu wake naukeibisa orou ma gagane imusu anisa wake  
\p
\v 10 Naiyemuku, iyanu Dai Waria Mi Yesu Kerisonu ibiro wemaro ya nauawe. Bebekuma urane rarane mediaweke imusu imusu da uawe. Ya yaisina demui imuka mane imuaweke Godinu waiya uawe.  
\v 11 I aweka danu ibiye Korou danu uwararo aine ibisa orouma nabairo eno weisa, Godinu wake naukaisa Korinida goi orouma emenu emenu bebekuma wake we makanaisaya eno weisaro naue.  
\v 12 Yae eno weaisa, moi mima nae Forunu umuro aneka miya eno weaku. Nono moi mi ama nae Aforasinu umuro aneka miya eno weaku. Nono moi mi ama nae Fidanu umuro aneka miya eno weaku. Nono moi mi ama nae Yesu Kerisonu umuro aneka miya eno weaku. Ide anemebake eno weada ma gagane ku imusu imusu uke ibaisa?  
\v 13 Eno da uawe. Yesu Keriso Danu mane ma gagane ku imusu imusu uke dakakuke Dawae keuwere mero Dawae demui. Na Forue yabake weroma korosiro ode dayaka. Na Forunu ibiro ya babadaido uke dauisaya nanu ararae yama demui imuka mane imukeka orou sifone ibake yewa wake yabairo weakune.   
\p
\v 14-15 Yabairoe Kurisifasini Geiasini emua mane nama babadaido uya. Nono moi emua orou babadaido uke dauiaba iyae Forunu ibiro babadaido uisia eno da wefeisa. Ibake nae awoena Godibairo we ma irauaiai ukakune.  
\v 16 O, na imukakuneie nae Sidefanasinu orou mane babadaido uya. Nono moi oroue nama babadaido uke dauya.  
\v 17 Yesu Kerisoma nae eme babadaido da umiake Danu wake mane wemane ibake na we odaikararo nama eme keu menaku mane babadaido uya. Yesu Kerisonu korosi bunawere wake ma merama unao umauro i wakenu buna medinao ufeisa ibake nae emenu bunawere wake we dakakuneke Yesu Kerisonu korosi bunawere wake mane weakune.   
\s1 Yesu Kerisoe Godinu buna ukeka miya wei wake  
\p
\v 18 I me sara feareka daabaro anaisa orouma i korosi wakeye me sara wakeya eno weaisa. Eno weaisaroma nono iya i wirokaisi orouma i korosi wakeye Godinu bunawere wakeya eno weaisi.  
\v 19 Godinu bukaroma ibake eno weaku,  
\li1 i iwoka daiwere orounu imukeka imusu imusu ma merama umauke emenu bunawere imukeka da imumauke medimaua,  
\m eno weaku.   
\p
\v 20 I iwoka daiwere orou emua aboro? I Mosesinu darawadu iwoka orou emua aboro? I wake daiwere we makanaisa orou, emua aboro? Godima emuabake eno weaku, i orounu iwokae irauaiai me. Ie me sara merama iwokaya eno weaku ibake eme yaisina iyae irauaiai me.   
\p
\v 21 Godinu iwokae imusuro nono emenu iwokae imusu. Emenu iwokae imusu ibake emuae Godi iwoka sine dakaisa. Enoba ibake iyanu weaisi korosi wake ie me sara wakeya eno weaisaroma nono Godima i me sara wakeya weaisa wakema i Godinu wake naukaisa orou ma wirokakune.  
\v 22 I Du orouma eno weaisa, i korosi wakeye buna meba ibake Godima buna daiwere ufekuro efeisiie i wake idua naufeisia eno weaisa. Nono i Guriki orouma eno weaisa, i korosi wakeye irau meba iyanu ararae irau imukeka imuka mane mune iyanu iwoka duboro odifeisia eno weaisa.  
\v 23 Nono iyamae eno weaisi, emema Yesu Kerisoe iyabake korosiro oisaya weaisiba ibake i Du orouma dino daiwere ukaisaro nono i Guriki oroumae i wakeye meo wakeya eno weaisa.  
\v 24 Nono Godinu we mune odirie orou, Du orouini Guriki orouini iya yaisinae eno weaisi, i wakeye Yesu Kerisonu wake. Godima Yesu Kerisobairo Danu bunaini iwoka yaisinaini iyabairo ma’iba ibake Yesu Keriso Dawae Godini demuiro ibinuro iyama ibai iwoka ukaada ibake eno weaisi.  
\v 25 Godinu imukekae me sara imukekaya weibaisaroma nono i Godinu imukekama emenu daiwere iwoka sineka ma berekeibaku. Godi Dawae buna meya weibaisaroma nono Godinu bunama emenu buna ma berekeibaku.   
\p
\v 26 Naiyemuku, imuke eawe! Godima ya we muneibirie i furoe yabairo moi iwoka daiwere orou meke nono yabairo moi buna daiwere orou meke nono yabairo moi ibi daiwere orou me.  
\v 27 Yae iwoka daiwere meke buna me orouroma nono Godima ya iwoka daiwere meke buna me orou Dawama ya ma wirokada we mune imusu odirieke i orofa akakaro Godinu wake nauke dakaisake iwoka daiwereke buna orou emuama ibai efisake maru sifiane ibake eno ui.  
\v 28 I Godinu wake nauke dakaisa orouma eno we imukaisa, Godinu eme ma wirokeka imukae irau meya eno we imukaisaroma nono Godima i imukekama i Godinu wake nauke dakaisa orounu imukeka daiwere ma merama ukaada nono Danu eme ma wirokeka imukae daiwere.  
\v 29 Eno ui ibake emema Godibairo nae iwoka daiwerea da wefisane ibake eno ui.  
\v 30 Godima yabake Yesu Keriso me mariero mukake Dawabairo ibinisa. Enoba ibake Yesue iyanu me ibene ibene ibekaini iwoka ukekaini ma irauaiai ukekaro me irau ibekaini ma gienabu uke Godinu ibooro ma enarekaini wirokekanu ubi mi sini.  
\v 31 Enoba ibake Godinu bukaroma eno weaku, ainama danu ararae wake daiwere wefine ukaadae iyanu Dai Waria Minu ukeibi sineibi i mane daiwere wefie weaku.   
\c 2  
\s1 Foruma i korosinu wake weibi  
\p
\v 1 Naiyemuku, adinaro yabairo fare ibaadae Godinu fe imukeka wake weadae yabairo imuke giena dakeka wakeroma we daueke Godinu wake aruro gienabu mane we.  
\v 2 Yabairo aare fareke Yesu Kerisonu wake, emema Dawa korosiro ure oisa, i wake mane wemane yabairo aare fare.  
\v 3-4 Yabairo ibaadae na buna mero ia iyarada iura mamaada emenu irau imukeka we daueke buna wake we daue. Nono Godinu Imumu Irauma na buna makara ibake wero ya nauisake ie Godinu wakeya eno weisa.  
\v 5 Ibake emenu imukekama yanu Godi imukeka ma ara uke dakakuroma nono Godinu buna ukekama yanu Godi imukeka ma ara ukaku.   
\s1 Godinu Imumu Irauma iyabairo iwoka makakuni wake  
\p
\v 6 Godinu wake naukenewaa ukaisa oroubairo ibaadae Godinu fe wake Godinu iwokaroma bunawere weakune. Nono nanu wakeye i dai yawokeka orounu wake ari eno me. I orou emua feafeisaie emenu wake idua me sifeku.  
\v 7 Iyanu wakeye Godinu wakeba ibake i wakeye iwoka ukeka wake. Godinu fema imukekabake weakune. Godima adinami nauwaroma i eraerabusa yaisina ubu uke me i furoma iya Danu irau ibeka ari ibifene ibake Danu fema imukeka imui.  
\v 8 I furo ibaadae i dai yawokeka orou yaisina Godinu iwoka sineka wake ma nuna ukeibisa. Nono i wake emua iwoka sifisaronae iyanu ureroma isare fari arakeka Dai Waria Mi korosiro da ure odifisane.  
\v 9 Godinu bukaroma Godinu iwokabake eno weaku,  
\li1 aina ainama Godibake imukari ukaisaie Godima emuabake irau ibeka uke bou ukaku. Eme yaisina i uke bou uibai ere dakaisake nauke dakaisake imukama imuke dakaisaya,  
\m eno weaku.  
\v 10 Nono Godima Danu Imumu Irau we odairo farike i uke bou uibai awoena iyabairo ma boroo yaraku. Dawae Godinu fema imukeka yaisina aneaneme ere iwoka sinakuke iyabairo we ma boroo yaraku.  
\v 11 Moi mima moi minu imukaro ibinu imukeka iwokaba me, Me. I minu imumu danu mane danu imukeka iwoka ukaku. Enaenari moi mima Godinu imukeka iwoka uke dakakuro nono Godinu Imumu Irauma Dawa mane Godinu imukeka iwoka ukakuke Godinu wake naukaisa oroubairo we ma iwoka ukakune.  
\v 12 Godi Dawae yewa dooro imusu imumu make dauikema nono Danu Imumu Irauma iyabairo we odairo isare aare ibaada Godinu irau wakeini Godima iyabairo ma’i buna imusu imusuini i yaisina iwoka ufene ibake we ma iwoka sinakuni.   
\p
\v 13 Yewa wakeye emema iyabairo we dauisaroma nono Godinu Imumu Irauma i wake iyabairo weiba ibake Godinu Imumu Irau ibaku oroubairo Godinu Imumu Iraunu imukeka we ma iwoka ufiane ukaadae Godinu Imumu Iraunu wake mane weaisi.  
\v 14 Godinu Imumu Irauma Danu buna make dakakuro Godinu wake nauke dakaisa orouma Godinu Imumu Irau we ma iwoka ukeka ma nuna ukaisake i we ma iwoka ukekae me sara ukaisaya eno we imukaisa. Godinu Imumu Irau ibaku orou emua mane Danu Irau wakenu ubi iwoka sinaisa.  
\v 15 Godinu Imumu Irau ibaku orou, emua yaisina gienabu imukaisake enaenari weaisaro nono i Godinu wake nauke dakaisa orouma Godinu wake naukaisa orou emenu imuka ma nuna ukaada wayai wefeisaie emenu wake Godima da naufeku.  
\v 16 Godinu bukaroma eno weaku,  
\li1 moi mima Godinu imukeka iwoka meba ibake dawae Godi we ma iwoka uke dakaku,  
\m eno weaku. Nono Yesu Kerisonu imukekae iyanuba ibake Danu imukaku i ari eno imukaisi.   
\c 3  
\s1 I sosiro waiya ukeka oroue Godinu waiya ukeka orou iduaya wei wake  
\p
\v 1 Naiyemuku, adinaro yabairo ibeibisara i furoe ya Godinu Imumu Irau yabairo ibe me orou ari sine ibeibisa. Nono adinaro yae Yesu Kerisonu wake dai menaku naukada yanu arara mane ukeibisa ibake yae amarananaku ariba ibake yabairo i wakenu ubi munekabai ara me nuda wake weibisara.  
\v 2-3 Nanu we wakeye ara mero nudawere moi awekanu ama iduda ari eno. Yae daiwere mebake ara wake, ba uruna ari yabairo we daueke nudawere wake mane i ama iduda ari wake mane yabairo we. Nono awoenae ya enaenari ukaisa. Godinu arara uke dakaisake yanu arara mane ukaisa. Yae dino ukaada urane rarane ukaisake imusu imusu ibaisaie Godinu arara uke dakaisake yanu arara mane ukaisa. Eno ukaisaba ibake yae i orofa akakaro Godinu wake nauke dakaisa orou ari eno sine ibaisa.   
\p
\v 4 Moi mima eno weaku, nae Forunu umuro aneka miya weakuro nono moi mima nae Aforasinu umuro aneka miya eno weaku. Ya eno weisaie ya gagane ku imusu imusu ukaisaba ibake yae Godinu wake nauke dakaisa orou ari eno sine ibaisa.  
\v 5 Aforasi dawa ainadeiro nono Foru dawa ainadei? Uwae Godinu demui waiya ukeka miyai. Godima uwabairo buna ma’uba ibake Danu wake weaisuro yae naukada ibake Godi imukaisa.  
\v 6 Nanu wakeye eno, nama Godinu wake weibisara ie yobai wawinao ukeibisara. Nono Aforasima ya we ma iwoka ukeibi ie yobairo adua yananao ukeibi. Uwama eno ukeibisuroma nono Godima yanu Godi imukeka imuka i kua ari ma warakeibi.  
\v 7 Enoba ibake i waweka miye daiwere mero nono i adua yanakeka miye daiwere me. Nono Godima yanu Godi imukeka imuka kua ari ma warakeibakuba ibake Dawae daiwere.  
\v 8 I waweka mini i adua yanakeka mini emenu waiyae demui. Iyae waiya imusu imusu ukaada iyanu moko imusu imusu Godibairoma munaisi.  
\v 9 Uwae Godinu waiya demuiro ukaisuro nono yae Godinu waiyaini uwara ari eno sine ibaisa.   
\s1 I sosiro waiya ukeka oroue uwara ma enareka orou ariya wei wake  
\p
\v 10 Godima nae uwara ma enareka mi ari we mune odikaraba ibake nae Danu irau uwara me enareka mi ari sineke i uwara seminidi kukubu yanae. Nama bokai yabairo Godinu wake weie uwara kukubu ari yanaeba ibake nono moi mima duboro nono uke ma soafeku. Aina ainama duboro ukaadae nono Godinu waiya me sarawere da ufoke ukenewaa ufone ibake weakune.  
\v 11 Nae Godinu waiya ukaada i uwara kukubu ari yanae i kukubunu ubiye Yesu Keriso idua. I kukubu kai demuiba nono moi mima imusu kukubu da yanafeku.  
\v 12 Nono i kukubu kai duboro imusu imusu ufeisa. Moi orouma Godinu waiya irauaiai ukaisaie emuae gorudini siriwaini weree weree omama munaada ma enaraisa i ari. Nono moi orouma Godinu waiya me sarawere ukaisaie emua me sara anaini odeini ururuini ima munaada ma enaraisa i ari eno.  
\v 13 Yesu Kerisoma fafekuke eme yaisina emenu ukeifeisa ibai irauba me ukaisa ibai fare efeku. I emenu ukekae ba ibifekuba yare me sifeku ari ibake inaama yafeku.  
\v 14 I odoro ainama i uwara kukubu duboro aneme eraerabusama ma enafeku ariba da yare me sifekuie i mi dawae danu moko muneka mufeku.  
\v 15 Nono ainanu ukeka yare me sifekuie i mima moko muneka da mufekuroma nono Godima i mi inaaroma mune ma wirofeku. Yewa wakenu ubiye aina ainama Godinu waiya irauaiai o me sarawere ufeisa enaenarinaku emenu moko munekae mufeisa.   
\s1 I Godinu wake naukaisa oroue Godinu iifa sosi uwara ariya wei wake  
\p
\v 16 Nanu wake imuke eawe! Ya yaisinae Godinu dai sosi uwara. Ide ya iwokaba me? Yae Godinu dai sosi uwaraba Godinu Imumu Irau Danu dai sosi uwara ubarena ari enoe yanu imuka ubarenaro ibinu. Ide ya iwoka sinaisaba me?  
\v 17 Enoba ainama Godinu dai sosi uwara ma merama ufekuie Godima dawa fanisi daiwere mafeku. Godinu dai sosi uwarae iifawere uwara. Nono yanu ofeye Godinu dai sosi uwara ari eno.   
\s1 Ba emenu ibi da we ma daiwere ufene wei wake  
\p
\v 18 Yanu mane we irukaisaya ibai mediawe! Ainama nae iwoka daiwere mi wefekuie danu imusu iwokama Godinu iwoka daaba dadau ufekuba ibake danu orounu iwoka daaba medifekuke emenu ibooro Godinu wake nauke dakaisa orouma i Godinu imukeka imukaku mi dawae gogore mi weaisa. I gogore mi ari sinao ufekuke nono iroma Godibairo ba iwoka daiwere mufeku.  
\v 19 Yewa orofa akakaro Godinu wake nauke dakaisa orounu iwokae sara meramawereya Godima eno weaku. Godinu bukaroma eno weaku, Godima i orounu iwoka munaada odakuba i orou emenu iwokama umuro ure gonagona unao ukakunero emua biruke isare urakunea weaku.  
\v 20 Godinu bukaroma nono eno weaku, Godima iwoka ukaku, i orounu iwokaini emenu imukekae ba me ibake me sarawere imukaisaya eno weaku.  
\v 21 Enoya emenu ibi we ma daiwere da uawe, Godima iwoka ukekaini imukekaini i yaisina ya mariea eno da uawe.  
\v 22 Godima na Foruini Aforasini Fidaini iya we mune demuiro odiiba iyae demui iyae yanu waiya ukeka orou. Godima yewa orofa akaka eraerabusa yaisina yabake marieke yanu me ibeka marieke yanu fearekaini marie. Dawae i awoena eraerabusa yaisina yabake marieke nono i dubuenaro fafeku eraerabusaini marieba i yaisinae yanu.  
\v 23 Nono yae Kerisonu orouro nono Keriso Dawae Godinu amara.   
\c 4  
\s1 Iyanu Dai Waria Mi Danu we mune odekaro waiya ukeka orou ma fiake imusu odakune wake  
\p
\v 1 Yama naini nanu orouini iya imumisaisaie emua Yesu Kerisonu waiya ukeka oroua eno we imuawe. Godima iyae Godinu fema imukeka we ma iwoka ukeka orou we mune odii.  
\v 2 I irau waiya ukeka orouma emenu dai orounu wake naukaisake enaenari ukenewaa ukaisa.  
\v 3 Nono nade irau waiya ukeka miba me? Yaini iini moi orouini nabake ae merama waiya ukeka miba irau waiya ukeka mi ariya wefoisaie nama i wake da naumau. Nae irau miba merama mi ari iwoka meba da wemau. Nanu mane i wake i ari eno da we nauke emau.  
\v 4 Nanu imukama ae meramawere uke meya wefekuie i dawa baya da wemau. Iyanu Dai Waria Mima Danu mane na erenewaa ufarakuke aneme aneme wefekuie i dawa ba.  
\v 5 Enoba uwaini eme yaisinabake yae merama waiya ukeka oroua eno da weawe. Yesu Dawama fafekuke Danu mane edoro daiwere ari edoro ufekuke iyanu ukeka sineka imukaroma imukeka yaisina i edororo odifekuro uwanu ukeka sineka anemerabubake waiya ukaisu ibai idua iwoka sifoisa. I odoro Godima eme yaisina emenu ukeifeisa ibai eraada emua enaenari we ma irauaiai ukeifiaku.   
\s1 Korinida goi oroue emenu mane emenu ibi we ma daiwere ukeibisa wake  
\p
\v 6 Yewa wakeye Aforasini naini uwabake weneba naufoisaie Godinu wake aneaneme ufoisake Godinu moi orou we ma daiwere da ufoisake Godinu moi minaku we ma okoanaku da ufone weakune. Yama eno wefoisaie Godinu wake naukenewaa uke dafoisa.  
\v 7 Ainama ya dai orou we odiriero anemebake yanu onaroubake iyae dai oroua weaisa? Godima yabake eraerarabusa yaisina marie. Ya ibai imukaisaba me? Godima ie me mariebairo nono anemebake iyanu bunaroma i eraerabusa yaisina munaisia eno weaisa?   
\p
\v 8 Yanu imukekae daiwereba ibake moi minu wake da naufoisa? Yabairo eraerabusa keuwere ibinu? Naini nanu orou iyae meba ibake yanu imusu mane dai yawokeka orou sinaisa? Eno weada imukaisa? Nanu ararae yama ba dai yawokeka orou sifoke yama eme yaisina yawokeiforo iyaini demuiro yawofiakine weakune.  
\v 9 Yae eno ukaisaroma nono Godima iya afasoro oroua weroma we ma daiwere uke dakakuni. Dakakunikema nono emenu derena enaro beneibeka orou ari eno we mune odii. Emema moi mi ma feafisane waure anaisaro moi orou yaisinama ere bauke faisa ukaisa. Iya afasoro oroue i feafeku mi ari eno. Iyae i orofa akaka orounu naisa ara ukeka orou ari eno. Emeini aneruini emua yaisina iya ere bauke faisa ukaisa.  
\v 10 Iya afasoro orou iyae Yesu Kerisobake gogore orou ari sikiroma nono yama yanu onaroubake iyae Yesu Kerisonu iwoka daiwere oroua eno weaisa. Iya afasoro orou iyae buna meroma nono yama yanu onaroubake iyae buna daiwere oroua weaisa. Emema ya Korinida goi orou yae irauaiaiya we imukaisake nono iya afasoro oroubake we irukada yo weibaisa.  
\v 11 Iyae urunaini aduaini ise mero desini bobo ibeibaisi. Iyabairo irau wau me ibake iu ureibakuni. Iyanu ba uwara mero emema we kuure dakakunisake meramawere uke yaraada medakunisaro me sara eneibaisi.  
\v 12 Iyae wanama waiya ukeibaisike iyanu moko eraerabusa muneibaisi. Emema iyabake wake merama weibaisaie iyama emuabake we ma irauaiai ukeibaisi. Nono emema iyaini uranaisaie emuaini moko urane dakaisike me ibaisi.  
\v 13 Eme moima moi oroubairo iyabake meomao weisaie dino uke dakaisike moko wake irauaiai mane weaisi. Iya afasoro oroue irauaiai me. I afasoro oroue i orofa akaka orounu kekeu ariya eme moimae eno we imukeibaisa.   
\s1 Korinida goiro Godinu wake naukaisa orounu ukeka Forunu ukeka ari ufisane wei wake  
\p
\v 14 Yewa wakeye ya naufoke maru sifiane we dakakune, yae nanu amaraku ari, nanu imuka yaisina yabairo ibinuba ibake ya we ma iwoka umiane ukaada ibake weakune.  
\v 15 Yabairo sisa orou keuwere ibaada Yesu Kerisonu wake weaisaroma nono emenu imuka yaisina yabairo ibe meba ibake emuae yanu babaemuku ari me. Yanu babaeye una demui, dawae na. Yabairo Yesu Kerisonu wake nako wero nauisake yanu imuka yaisina Yesubairo oisake awoena orou ari sikaba ibake nae yanu babae ari eno.  
\v 16 Enoya ibake nanu wake nauawe. Na aneaneme ukakune i ari yaini enaenari uawe.  
\v 17 Eno weakuneba yewa mi Dimodie, dawa nanu amara ubi ari eno, dawae Yesu Keriso imukenewaa ukaku. Nama dawa we odaimauro yabairo aafeku. Nanu ararae dawa nanu Godinu aboro aboro kuku uke ibaada Godinu wake naukaisa oroubairo weibakune wakeini nanu ukeka sinekaini yaisina yabairo wefine ibake we odaimauro yabairo aafeku.   
\p
\v 18 Yabairo moi orouma eno we imukaisa, Foru dawa iyabairo da fafekua eno we imukada fukeru ukaisa.  
\v 19 Godima nabairo wefekuie na yabairo idua famau. Iro famauke i fukeru ukaisa orou emua buna ukaada weaisaba ba me ibaada me sara weaisa ariba fare emiau.  
\v 20 Godi Danu yawokaku orofaro wake mane we dakakuke Dawae Danu yawokaku orofaro bunawere yawokeka wake mane weaku.  
\v 21 Yanu ararae aneme? Yabairo dino umauke usima umiane famauba ba yabake imukari umauke irauaiai wake mane wemane famau? Yabairo famauro yama aneme ufoisa ari ibake we nauke erakunia.   
\c 5  
\s1 Eme munekaini aweka muneka ibai Korinida goiro ma merama uisa wake  
\p
\v 1 Moi orouma yewa wake weaisaro naukakune. Yabairo ibinisa orouma moi orounu aruma aweka enare odaisaya eno weaisaro naukakune. Godinu wake nauke me orouma yewa wemane ukakune i meramawere ukeka wake uke dakaisa. I meramawere ukekae eno, moi mima danu babaenu moi aweka munakuke nauwaro waure anakua weaisaro naukakune.  
\v 2 Nono yae fukeru ukaada maru sine dakaisa. I mi meramawere uiba ibake buna wakeroma weawero yanu guriguri ukeibaisa iro da aafi weakune.  
\v 3-5 Nae yabairo ibe meroma nono i meramawere ukekabake daiwere imune. Nae eno imuneba ibake yabairo ibinao ukaada ibake nama i mibairo aneme umau ari ibai na iwoka sinaada Yesunu ibiro we ma boroo yamaro ya nauawe. Demuiro ku uaweke wake we naue eawero nanu imukeka yabairo ibifiro Yesu Kerisonu bunaro Godinu wake naukaisa oroubairoma i mi mune kebiro seidanima dawa yawofine odiawero seidanima i minu ofe ma merama ukeifi. Seidanima eno ukeifiroma nono i mima imukenewaa ukeifike danu merama imukeka medifike danu imuka ma owefi. Yesu sabu fafekuke i mini ma wirofekuba ibake eno ufone weakune.   
\s1 Korinida goi orou emuabairoma merama orou keuwere ure yowefiakane wei wake  
\p
\v 6-7 Yae irau oroua eno weaisaroma nono i wakeye irauaiai me. Yae iwoka, farauwa ubarenaro ure wawareka iraa yisidi dai menaku odaisaroma daiwere ure wawaraku, i ari eno enaenari i merama ukeka demuinakuma ya yaisina ma merama ufiakuba ibake i merama ukeka yisidi ari i rabunaku mune siafoke ya awoena yisidi me irauaiai farauwa ari sifoke me irauaiai ibifone ibake weakune. Yesu Kerisoe iyabake ma feaka. Dawae iyanu Godima i Isaraera orounu Idifiroma waure anaisake i banau isaada uraisa mamoe ari eno.  
\v 8 Enoba iya Godinu wake naukaisi orou iyama iyanu ba me ukeka medifeke Yesu Kerisonu ukeka ari mane ukeifene ibake weakune. I meramawere ukeka yaisina adina yisidi bobo buredi ari medifeke ba ukekaini irauaiai ukeka i mane awoena yisidi me irauaiai farauwa ari ukeifene ibake weada weakune.   
\p
\v 9 Adinaro owaowa yanakadae nama eno we, i moi orounu aruma aweka enare odaisa oroubairo awaawa da uawe eno we.  
\v 10 Na eno weie Godinu wake nauke dakaisa oroubake we daue. Na iwoka Godinu wake nauke me orouma moi orounu aruma aweka enare odaada, eraerabusa keuwere mufisane uke, waira uke, ba me godibairo ofereni ode sibore siane, eno ukeibaisa. Eno ukeibaisaba yanu ararae emuaini da ibifone imufoisaie yewa orofa akaka yaisina medifoisake aboro anifoisa?  
\v 11 Nanu wake wemaro nauawe. Godinu wake naukeifeku mi yanu naiyema, moi orounu aruma aweka enare ode, eraerabusa keuwere mune, ba me godibairo sibore siane, wake merama we, ara adua daiwere ise, waira uke, Godinu wake naukeka mima eno ufekuie dawabairo awoena da aniawe. Urunaini iini dawaini demuiro da ifone weakune.  
\v 12 Godinu wake nauke dakaisa orou kodo da umiau, i dawae nanu waiya me. Yanu waiyae i Godinu wake naukada merama ukaisa orou kodo ufiakane ibake weada weakune.  
\v 13 Godi Danu wake nauke dakaisa orou Dawama emua kodo ufiaku. Enoba i meramawere mi kodo uaweke we yoweawero dawa yabairoma imusu anifine ibake weakune.   
\c 6  
\s1 Godinu wake naukaisa orouma emenu naiyemuku kodo daufiakaisa wake  
\p
\v 1 Yabake nanu moi kodo ureka wake wemaro ya nauawe. Yabairo moi mima Godinu wake naukeifeku moi mibake wayai wefine ukaku ide anemebake Godinu wake nauke dakaisa oroubairo kodo ufine waure anaku? Anemebake Godinu wake naukaisa oroubairo kodo ure dakaku?  
\v 2 Moi dubuena kai odoro iya Godinu wake naukaisi orouma i orofa akakaro eme yaisina kodo yafeisike yawofiakiki. I dawa ya iwoka ukaisaba me? Eno ufeisibairoma i merama dai menaku anemebake yanu imusu kodo ure dakaisa?  
\v 3 Dubuenaro iya Godinu wake naukaisi orouma i aneruini kodo ufiakiki. I waiyae daiwereba ibake yanu aneme okoanaku meramaya wefoisaie ewa furo yanu imusu kodo ureifone weakune.  
\v 4 Anemebake i Godinu wake nauke dakaisa oroubairo kodo ufone weaisa?  
\v 5 Eno weaisa ibake maru uawe! Yabairo iwoka daiwere mi ibe meya eno we imukada ibake Godinu wake naukaisa orounu uraneka raraneka ma giena uke dakaisa?  
\v 6 Enoba moi Godinu wake naukaku mima moi Godinu wake naukeifeku mibake wayai wake wefekuie Godinu wake nauke dakaisa oroubairo anifekuro i wayai wake wefeku ibai yaisina weforafekuro naufeisa. Anemebake eno ukaisa?   
\p
\v 7 Ya Godinu wake naukaisa orouma wayai wake weaisa i dawae ba me. Imusu orouma ya weaisa ibai naukaisake yanu Godi imukeka imukae ba meya emuama eno weaisa. Moi mima yabairo meramawere ufekuie kodo da uaweke imuke mediawe. Moi Godinu wake naukeifeku mima yanu eraerabusa waira ufine ufekuie ere mediawe.  
\v 8 Nono ya yanu imusue yanu Godinu wake naukaisa oroubairo meramawere ukaisake emenu eraerabusa waira ukaisa, I dawae meramawere ukaisa.  
\v 9-10 I meramawere ukeibaisa orouma Godinu yawokaku orofaro da anifeisa. Yanu imusu yanu onarou da we iruawe. Nanu wake ewadoya erenewaa uawe. I moi orounu aruma aweka enare odaisa orou emua Godinu yawokaku orofaro da anifeisa. I ba me godibairo sibore sianaisa orouini awekabonu umuro anaisa orouini i fukeru ukeka awekaini eme unayai emenu emenu dodoo ukaisa orouini awekayai emenu emenu dodoo ukaisa orouini waira ukaisa orouini i eraerabusa keuwere mufisane ukaisa orouini wake buna weroma meo weibaisa orouini wake meramawere weibaisa orouini i meo wayai wake weaisa orouini i orou yaisina emua Godinu yawokaku orofaro da anifeisa.  
\v 11 Yabairo moi orou emua adinaro eno ukeibisa. Nono yae Yesu Keriso imuisaba ibake Godinu Imumu Irauma yanu imuka uroike ya we mune imusu Godibairo odiriero Godima Yesu Kerisoini Danu Imumu Irauini emenu ibiro yae irauaiai oroua eno wei.   
\s1 Iyanu ofema rooro ukaada Godinu ibi we ma daiwere ufene wei wake  
\p
\v 12 Yama eno weaisa, aneme ufene wefeisiie ufeisia eno weaisa. Eno weaisaie ba weaisaroma nono moi ukekae irauaiai meba ibake ima iya unu kore dakakuni. I me sara eraerabusama na da yawofokone weakune.  
\v 13 Yae eno weaisa, Godima iyanu boana ubu uike iyanu boanabake uruna maia eno weaisa. Eno weaisaya nanu moi wake wemaro nauawe. Moi odoro Godima wefekuro boanaini urunaini me sifeku. Iyanu ofe ubue moi minu aruma aweka enare odekabake mero iyanu ofe ubue iyanu Dai Waria Minu ofe ubu. Ibake Dawama iya yawokakuni.  
\v 14 Godi Danu bunama iyanu Dai Waria Mi feariroma nono ma uyariba ibake iyaini enaenari ma uyamisi.   
\p
\v 15 Imuke eawe! Yanu ofe ubu yaisinae Yesu Kerisonu ofe uburo odi ari eno eraerabusa. Ie iduaroma nono Yesu Kerisonu ofero eraerabusa mumauke i fukeruma imusu ari aruma awekabairo ane ma uraa umau? Me! Eno da umau.  
\v 16 Ainama i fukeruma imusu ari aruma awekabobairo anifekuie i mini i aweka o arumaini emua demui sifisisi. Ide ya iwoka sinaisaba me? Godinu bukaroma eno weaku, i mini i awekaini emua ofe ubu demui ari sifisisi weaku.  
\v 17 Nono ainama danu imuka yaisina iyanu Dai Waria Mi Yesu Kerisobairo odifekuie Yesuini dawaini emua demui sifisisi.  
\v 18 Enoya i meramawere moi minu aruma aweka enare odekae mediawe. Moi meramawere ukekae yanu ofe ubu okoanaku ma merama ukakuro nono moi minu aruma aweka enare odekama yanu ofe ubu daiwere ma merama ukaku.  
\v 19 Yanu ofeye Godinu Imumu Iraunu dai sosi uwara. Godima Danu Imumu Irau yabake marieba ibake Dawae yanu ofe ubarenaro ibinu. Ide ya iwoka sinaisaba me? Yanu ofe ubue yanu mero ie Godinu Imumu Iraunu ofe ubu.  
\v 20 Godi Danu moko daiwerema ya yanu meramawere ukeibisa iroma make murieba ibake yanu ofema irauaiai mane ukeibiawero emema eraada Godinu ibi we ma daiwere ukeifisa.   
\c 7  
\s1 Awekaini emeini emenu wake  
\p
\v 1 Adinaro yama nabairo owaowa yanake odaisada we nauke eka i owaowa nanu moko wake yewado, ainama aweka da mufekuie irauaiai.  
\v 2 Aweka amara uke mero moi minu aruma awekabake merama unao rabuba aweka una demui eme una demui mune makaneka i deima irau.  
\v 3 Emema danu awekabairo danu ofe dadau da ufiro nono awekama danu emebairo ofe dadau da ufiro emenu dodoo ukeka odo fareifekuie demuiro dodoo ukeifisi.  
\v 4 I awekama danu ofe yawoke dakakuro danu emeini yawokaku, enaenari emema danu ofe yawoke dakakuro danu awekaini yawokaku.  
\v 5 Aiyaka, ya yanu yanu ofe dadau da uke makawa. Yanu arara Godibairo moi odo odoro guriguri ukeifuanea imuka demui mane imuawake yanu ofe dadau uawake guriguri uawa. I guriguri me sifekuro ai dubuenama aiyaka sifisisi, seidanima danu merama imuka manao ufiakuba ibake nono owere demuiro ibifisisi.   
\p
\v 6 Nama emeaka yaisina aweka muawe eno we dakakunia. Ainama aweka mufine imufekuie mufi, nono ainama eme mufine imufekuie mufi eno weadama weakune.  
\v 7 Nanu ararae ya yaisina na ari, na aweka mune me i ari eno ufoisa. Na iwoka yanu imukekae imusu imusuba ibake na ari eno ufoisaba me ari. Godima buna imusu imusu marieba ibake moi orou eme mune aweka mune eno ukaisa. Nono Godima imusu buna marieba ibake moi orou eme mune me aweka mune mero emenu imusu me ibinisa.  
\v 8 I eme mune me aruarumaini i aweka mune me emeini i wabu awekaboini emuabake eno weakune, yae eme o aweka da mufoisaie na ari eno uke ibifoisaya eno weakune.  
\v 9 Nono yanu arara moi minu aruma aweka enare odifoisaie meramawere. Danu imuka inaa ari yanao ufekuba ibake eme mune aweka mune eno ufone weakune.   
\p
\v 10 I eme aweka munaisa oroubake yewa wake nanu wake mero i dawa iyanu Dai Waria Mi Yesu Kerisonu wake wemaro nauawe. Awekama danu eme da medifine weakune.  
\v 11 Moi awekama danu eme adinaro medifekuie nono dubuenaro danu arara moi eme mufine ufekuie imusu eme da mufike danu adina emebairo owere anifine weakune. Enaenari emema danu aweka da medifine yewa wake yabairo weakune.   
\p
\v 12 Nono yewae nanu wake, iyanu Dai Waria Minu wake me. I wakeye eno. Moi Godinu wake naukaku minu awekama Godinu wake nauke meroma nono danu emebairo ibifine wefekuie danu emema aweka da medifine weakune.  
\v 13 Enaenari moi Godinu wake naukeifeku awekanu emema Godinu wake nauke meroma nono danu awekabairo ibifine wefekuie danu eme da medifine weakune.  
\v 14 Moi Godinu wake naukeifeku awekanu emema Godinu wake da naukeifekuie dawa arara me danu aweka medeka ibake Godima i awekabake imukada danu emebairo irauaiai ufeku. Enaenari moi Godinu wake naukeifeku minu awekama Godinu wake nauke dakeifekuie dawa arara me danu eme medeka ibake Godima i mibake imukada danu awekabairo irauaiai ufeku. Eno meronae emenu amaraku imusu orou ari sifeisa. Godima eno ukakuba ibake emenu amaraku Godinu ibooro irauaiai ibinisa.  
\v 15 Nono i Godinu wake nauke dakeifeku eme o aweka danu arara Godinu wake naukeifeku eme o aweka danu arararo medifine wefekuie medifeku. Eno ufekuie Godinu wake naukeifeku eme o awekama dawa da we yodia ufekuke medifeku. Godi Dawa arara me Danu wake naukeibeka orouma urane rarane ukeka.  
\v 16 Moi awekaini danu eme Godinu wake nauke me ide demuiro ibifisisiro Godima i awekanu eme ma wiromifekuba me ari ibai danu aweka dawa iwoka me. Enaenari Godima i minu aweka Godinu wake nauke me ide ma wiromifekuba me ari ibai danu eme dawa iwoka me ibake demuiro ibifisisiie irauaiai.   
\s1 Godima iyabairo we ma iwoka ui iro eraada irauaiai weada ibifene wei wake  
\p
\v 17 Godinu wake naukaisa orou yaisinabake yewa wake weakune. Yanu adinaro anemedei uburo ibeibisaro Godima Danu bunaro ya we mune odirie enaenari Danu bunaro ukeibiawe.  
\v 18 Moi adinaro ofe kuureibisa Du orouma Godinu wake naufeisaie i ofe kuurekabake meya da imuawe. Nono moi ofe kuure me mima Godinu wake naufekuie ofe da umane kuufi.  
\v 19 Ainama i Du orounu bisara danu ofe kuurinuba ba ofe kuure me ari eno meya da imuawe. Nono ainama Godinu wake yaisina naufekuie idua irau.  
\v 20 Yama dawako ane ana ebaro ara waiya ari eno ukaada ibeibisaro Godima ya u weada we mune demuiro odiriero yae Godinu wake naukeka orou sika. Enoya i ana ebaro ara waiya ari da mediaweke enaenari ukaada ibeibiawe.  
\v 21 Ae moi minu ana ebaro ara waiya ari ukeka mi? I ara waiya medimau eno da imuake anu ana ebaro ara waiya ari gienabu ukeibiaro nono anu eme ereka dai mima a we yowemekuie idua, ania.  
\v 22 Imuke eawe! Ae moi minu ana ebaro ara waiya ari ukeka miroma nono iyana Dai Waria Mi Yesuma a u we muiyaike anu ba me merama ukekanu bunaroma a we mune imusu odiyai ibake ae i merama ukekanu waiya ukeka mi ari me. Nono a waiya ukaada oi munaku mi ae iyanu Dai Waria Mi Yesuma a u we muiyaike anu merama ukekanu bunaroma a we mune imusu odiyai ibake ae Danu waiya ukeka mi sini.  
\v 23 Yesu Kerisoma yanu moko makaada ya make murieba yae Danu oroua moi mibairo eno da weawe, ama iyanu dai mi siaro anu ana ebaro waiya ari eno me ufeke moko da mufe eno da weawe.  
\v 24 Naiyemuku, yewa wake i ari enoba moi mima aneme aneme waiya ukaada ibeebe Godinu wake naukeka mi sefekuie eno mane ibeifiro Godima dawa aine wai ure unu koreifi.   
\s1 Aweka mune me emebainu wake  
\p
\v 25 Iduaroma nono yanu moi we nauke ereka i wakenu moko wemaro ya nauawe. Eme mune me, aweka mune me i oroubake nanu wake wemaro ya nauawe. I dawa iyanu Dai Waria Minu imukeka me. Nama nanu imukeka wake me weakune. Iyanu Dai Waria Mima na unu korokunaraba ibake nanu wakeye ba weakune. Enoya nanu wake wemaro nauawe.   
\p
\v 26 Yanu awoena ibinisa i furo yabairo awe waa daiwere farakuba ibake eme o aweka da mune makafoisaie idua irauba da mune makafoisa.  
\v 27 A aweka bobo mi? Anu aweka da media. A aweka me mi? Awoena aweka da mufane weakune.  
\v 28 Emema awoena aweka mufeisaie idua irau, i dawae merama me. Aruarumama eme awoena mufeisaie idua irau, i dawae merama me. Awoena eme mune aweka mune ukaisaba emenu ibeka arawere sifekuba ibake na arara me emenu arawere ibeka ibake nama yewa wake weakune.   
\p
\v 29-31 Naiyemuku, yewa wake imuke eawe. Yesu Kerisonu owere farekae fu sininu. Enoya i aweka bobo oroue i aweka me orounu ibeka ari ibifisake Yesu Keriso imukenewaa ukeifisane ibake weakune. I sorara ukeibaisa orouma sorora uke me orou ari Godinu waiya ukeifisane ibake weakune. I eraerabusa make oi munaisa orouma eraerabusa me orou ari Godinu waiya ukeifisane ibake weakune. Ureini dooini yaisina me sifekuba ibake i eraerabusa keuwere bobo orou emenu eraerabusabake da imukenewaa ufisane ibake yewa wake weakune.   
\p
\v 32 I wene eraerabusa yaisinabake da imufone ibake weakune. I aweka me mi danu ararae Godinu waiya ukeka. Godima dawae irauaiai miya wefine ibake eno imukaku.  
\v 33 Nono i aweka bobo mi danu awekanu ararae danu ba waiya ufiba o aneaneme ufibai imukada imuka imusu imusu imukakuke Godinu waiya adaadake imukenewaa dakaku.  
\v 34 Nono i eme me aruarumaini emua emenu ararae Godinu waiya mane ukeka. Enoba i eme me arumama iyanu Dai Waria Minu imukeka imukenewaa ukakuba ibake danu ofeini imukaini irauaiai sinaku. Nono i eme bobo awekama danu emenu wake naufine ufekuba ibake Godinu waiya adaadake ukenewaa da ufeku. Na arara me yanu Godi imukeka daaba ma ara ukeka.  
\v 35 Nanu ararae ya unu komiaro aneme aneme imuka moi imukadae i mane da imufoke Godinu waiya imukada ukenewaa ufone ibake yewa wake yabairo weakune.   
\p
\v 36 Ainama dawa mufine we bou ukaisa arumabake daiwere imukada danu imuka inaa ari yarakuro nono i arumaini danu unu eme una muneka mune makafisisike aiyaka sifisisie idua. Enoba merama me.  
\v 37 Nono ainama aweka da mufine danu imukaro imukenewaa ufekuie dawa mufekua we bou ukaisa arumabake daiwere imuke dakakuro danu imukaro inaa ari yare dakakuro dawa Godi imukeka imuka mane imukenewaa ukaada ibake dawa mufine we bou ukaisa aruma da mufekuie idua irauaiai.  
\v 38 Nono ainama dawa mufine we bou ufeisa aruma mufekuie idua irauaiai. Nono ainama dawa mufine we bou ufeisa aruma da mufekuie dawa Godi imukekae daiwere ibake dawae irauaiai me ibifeku.   
\p
\v 39 Awekanu eme feare mero me ibifekuie awekama danu eme da medifike dawabairo ibifeku. Danu eme feafekuie idua i aweka dawa eme meba ibake moi Godinu wake naukeifeku mi mufine imufekuie idua mufeku.  
\v 40 Na imukakune Godinu Imumu Irauma na unu koreibakunaraba ibake eno weakune, i wabu awekama eme da mufekuie dawa me irauaiai ibifekua eno weakune.   
\c 8  
\s1 I ba me godibairo ofereni oisa abubake wei wake  
\p
\v 1 I ba me godinu uruna odaada we banabana ukaisa wake wemaro nauawe. Yama eno weaisa, iyanu iwokae daiwereya eno weaisa. Ie na iwoka sinakuneroma nono i iwoka daiwerebake fukeru ukaisa. I fukeru ukeka ibai ba meroma nono i eme imukari ukekabai ima i emema Godi imukeka ibai ma ara ufiaku.  
\v 2 Ainama nae i yaisina iwoka sinakunea eno we imufekuie dawa iwoka daiwere me mi.  
\v 3 Ainama Godibake imukari ufekuie dawae Godinu naiye sifekuro Godima dawa iwoka ufeku.   
\p
\v 4 I ba me godinu uruna odaada we banabana ukaisa wakeye eno, I ba me godi emuabairo awara me. Iyanu Godiye una demuiro moi godiye ibe me, ibai iya yaisina iwoka sinaisi.  
\v 5 Moi orouma eno weaisa, ureini dooro eraerabusa keuwerebake iyanu godiya eno weaisa. Emuae iyanu dai oroua eno weaisa.  
\v 6 Eno weaisaie ba me weaisa. Godi Dawae una demui ibai iya yaisina iwoka sinaisi. Dawae iyanu Babae. Dawa mane Dai Waria Mi. Dawama i eraisi da eraisi eraerabusa yaisina ubu uike nono Danu orou sifene ibake iya ubu ui. Yesu Keriso Dawaini iini i yaisina ubu uike iyabake awoena me ibeka ma’iba ibake awoenaini me ibinisi.  
\v 7 Godinu wake naukaisa orou yaisina yewa wake emua iwoka sine dakaisa. Moi Godinu wake naukaisa orouma emenu babaemukunu bisara ibake eno imukaisa, i ba me godibairo ofereni odaisa uruna isaada ibai iyae i ba me godibairo guriguri ukaisi ariya eno we imukaisa. Eno we imukaisake emenu imukama irau imukeka ibai buna meba ibake i ba Godi imukenewaa uke dakaisa.  
\v 8 Uruna isaisikema ise dakaisi ibaibake weroma Godima imukeroma iyae irau oroua we dakaku. I uruna da ifeisiie irauaiai da ibifeisi. O i uruna ifeisiie ima iya ma merama da umiisi.  
\v 9 Yae Godinu wake daiwere naukaisa orou erenewaa uforo! I ba me godinu uruna odaada we banabana ufeisa uruna ifoisaie i Godinu wake daiwere nauke me mi efekuke danu Godinu wake naukeka daiwere da sinao ufekuro meramawere unao rabua i uruna da iawe.  
\v 10 Ya Godinu wake daiwere naukaisa orou i ba me godinu sosi uwara ubarenaro yaure ibeebe i ba me godinu we banabana uke odifeisa uruna ifoisaie moi Godinu wake daiwere nauke me mima efekuke emua eno ukaisaba naini eno umaua eno we imufekuke eno ufeku. Danu Godi imukeka imukae buna meba ibake eno ufekuie danu imuka merama sifeku.  
\v 11 Yama eno ufoisaro dawa efekuke enaenari ufekuie yanu iwoka daiwerema danu Godi imukeka imuka dai mebainaku ma merama ufeku. Yesu Keriso Dawae i mibake fearia ibai imuke eawe!  
\v 12 Eno ufoisaie yanu naiyemukubairo meramawere ufoisake emenu buna me imuka ma merama ufoisake Yesu Kerisobairoini iini meramawere ufoisa.  
\v 13 Enoba nanu naiyema nanu urunabake imuka meramawere unao ufekuro merama unao ufekuba ibake danu ibooro abu da imau. Eno uke imauro nanu naiyema Godi imukenewaa da unao ufekuba ibake nama i abu da imau.   
\c 9  
\s1 Foru dawa danu afasoro waiyanu moko mune dakeibi ibake rooro daiwere ukeibi wake  
\p
\v 1 Moi eme ereka mima na yawoke dakakunararo nanu mane nanu onami yawokakune. Nae Godinu afasoro mi. Ibake nae iyanu Dai Waria Mi Yesu Keriso Dawa ere. Nama Godinu irau wake wero nauisaba ibake yae nanu orou ari sika.  
\v 2 Moi orouma nae Godinu afasoro miya we imuke dakaisa. Nono nae Godinu wake yabairo wero nauisake Godinu wake naukeka orou sikaba ibake yama nae ba Godinu afasoro miya eno we imukaisa.  
\v 3 Moi orouma na eraada wake imusu imusu weaisaba emuabake moko wake ma owemake eno wemaro nauawe.  
\v 4-5 I wakeye eno, iyanu Godinu waiya yabairo ukaisiroma nono anemebake uruna me da mune ifoisa weaisa? Anemebake aweka da mufoisaya eno weaisa? I moi Godinu afasoro orouini iyanu Dai Waria Mi Danu naburakaini Fidaini i orouini emua aweka mukade nono anemebake yae aweka da mufoisaya weaisa?  
\v 6 Moi orouma yabairo Godinu waiya ukaadae uruna me mune isaisa. Nono Banabasini naini uwa mane yabairo uruna me mune ise dakaisuke oima make mune isaisu. I danu ubi anemebake eno weaisaro ukaisu?  
\v 7 Ainama ame waiya ufekuke danu oima anemebake eraerabusa yaisina mufeku? i ari eno meba eno da ufeku. Ainama waiya waifekuro warafeisake ba sine oya ure eno ufeisaro anemebake i waiya uruna da mune ifeku? i ari eno meba eno da ufekuke i uruna daufekuke mune ifeku. Ainama boromakau yawokada anemebake boromakaunu ama iduda da ifeku? I ari eno meba eno da ufekuke dawae i ama iduda ma dudare ifeku.  
\v 8-9 Yewa wakeye nanu awararo wake mane meroma nono Godinu darawadu wake enaenari weakuba me ari? Imuke eawe! Mosesinu darawaduma eno weaku, boromakau uidi deiro amune adiadi yafiro uidi kaibai dooro isafine ufekuie boromakaunu bebeku dadau da uawe weaku. Godima boromakau mane uruna ifine imukada ibake eno weaku?  
\v 10 Dawae iya Danu waiya ukeka oroubake weakuba me? Euwa, Dawae iyabake eno weaku. I waiya diru munaisa orouini uruna fira ukaisa orouini emua yaisina uruna mufisane we imukaisa ibake weaisake waiya ukaisa.  
\v 11 Uwama Godinu imukeka yanu orounu imuka ubarenaro oisuba uwanu urunaini eraerabusaini yabairo me mufukuie irauba me?  
\v 12 Moi orouma eno ukaisaie irauaiaiba nono uwama Godinu wake yabairo weaisuba uwaini iini enaenari ufukuba me? Uwae eno uke dakeibisu. Yama dino unao ufoisake Yesu Kerisonu irau wake nauke daunao ufoisa ibake eno uke dakeibisu.  
\v 13 I dai sosi uwararo waiya ukaisa orouma emenu uruna iro me munaisake isaisa. Ie ya iwoka sinaisaba me? Enaenari i dai sosi uwararo ofereni odaisa orofaro waiya ukaisa orouma i Godibake ofereni odaisa uruna me munaisake isaisa.   
\p
\v 14 Ibake Godima eno weaku, aina ainama Godinu irau wake weaisaie i Godinu wake naukaisa orouma emuabake urunaini eraerabusaini mayakawe weaku.  
\v 15 Nono nae eno uke dakeibisara. Eno umane ibake owaowa uke odakune eno imukaisa? I ari eno me. Na arara me i ari eno. Nanu ararae yabairo Godinu wake wemake moko da mumane ibake weakune. Na arara me yabairo eraerabusa muneka. Na arara me nanu bebeku ara ukeka wake isare ureka. Nae arara me yama nabairo uruna makeka ibake desinima feamauie irauaiaiba nono yabairo uruna da we mumau.  
\v 16 Godinu irau wake weakune ibake weroma nanu ibi ma daiwere da umau. Godima wei ibake Danu wake weakune. Da wemauie nanu imuka inimu ufekuro Godima na fanisi mafaraku.  
\v 17 Nanu arara mane ibake eno umauie nono Godibairo moko mumau. Nono nanu arararo eno uke dakakuneke Godima na Danu wake wemane we mune odikaraba ibake nanu arara mane uke dakaada Danu arara mane ukakune.  
\v 18 Enoba nanu moko munekae aneme rabu ari wemau? Ie i ari eno, Godinu wake rooro bobo weada nono oi moko mune dakakune. Nae Godinu afasoro mi ibake weroma aneme aneme me mumane weroma eno imuke uke dakakune.   
\s1 Foru dawae i orou yaisinanu waiya ukeka mi ari eno sine ibeibi wake  
\p
\v 19 Enoba moi mima na yawoke dakakunara. Nono nanu onami deima eme yaisinabake Godibairo wirofisane ibake emenu waiya ukeka mi ari sine.  
\v 20 Mosesinu darawaduma na yawoke dakakuroma nono nae i Du oroubairo ibaadae Godibairo wirofisane ibake i Du orou ari sine ibakune. Nono i Mosesinu darawadu imukaisa oroubairo ibaadae Godibairo wirofisane emua ari sine ibakune.  
\v 21 Nama Yesu Kerisobairo ibaada ibake nae Godinu wake imukenewaa ukakune. Eno imukakunekema nono nama i Mosesinu darawadu wake nauke dakaisa oroubairo ibaadae emua Godibairo wirofisane ibake emenu ibekari uke ibakuneke nono Godinu wake ma merama uke dakakune.  
\v 22 I imukeka buna me oroubairo ibaadae i orou Godibairo wirofisane ibake buna me mi ari sine ibakune. Moi orou Godibairo wirofisane ibake eme yaisina ari sine ibakune.  
\v 23 Emua emenu imuka yaisina Yesu Kerisobairo odifisane ibake Yesu Kerisonu irau wake emuabairo weada Yesu Kerisoma na we ma irauaiai ufariro naumane ibake eno imukada ukakune.   
\s1 Buna uke duramifeke bokairo fafeke i me muneka mufene wei wake  
\p
\v 24 Ya iwoka, eme keuwere durame anaisakema nono moi una demuima ma bereke soarakuke danu moko munaku. I ari eno yanu ukeka sinekae buna ukeibiawe.  
\v 25 I duramaisa orouini dodoo imusu imusu ukaisa orouma moi feafekuke yaufekunu moko mufisane ibake emenu ofe ubu yawokenewaa ukaisa. Nono yaini naini i feafekuke yaufekunu moko da mufeisiroma nono i me ibene ibene ibeka Godibairo mufene ibake Godinu waiya ukenewaa ukaisi.  
\v 26 Nae me sara durame ane me. Moi orouma i bokai fareka orofa erenewaa ukaada durame aneibaisa i ari eno nanu waiya ukenewaa ukakune. Moi orouma uranenewaa ukeibaisa i ari nanu waiya ukenewaa ukakune.  
\v 27 Eme keuwerebairo Godinu wake weibisarabaie nono Godima na medianao ufarakuro nanu i me muneka moko da munao umau ibake nanu umu wana ofe ubu yaisina yawokenewaa ukakuneke nanu ofenu arara uke dakakune.   
\c 10  
\s1 Ukeebe ere baunao ufiakaisaro isare unao ufiakuba erenewaa uforo wei wake  
\p
\v 1-2 Naiyemuku, iyanu adina orouma yao nauwaro eneiareibisa i wake wemaro nauawe. Iyanu akaemuku yaisina i ou wowonaro enaada i kokoi dawara ubarenaro fare anisa. Fare anisaroma nono i adua fofo emuabairo fofo ure darie. Eno ukeibisaie i dawa emenu babadaido ukeka ari. Godima emua ouini dawarama babadaido unao urieba ibake emuae Mosesinu oroua weibisa.  
\v 3-4 Godima emuabake Danu kawama urunaini aduaini mariero emua yaisina ise ake uisa. Godi Danu adua fareibi omama i orounu umuro aneibi. I omae Yesu Keriso. Dawama i omaroma emua adua makeibiriero i orou yaisina iseibisa.  
\v 5 Eno ukeibisaroma nono Godima moi oroubake dino ukaada i orou yao nauwaro ma feareibiriero fearada emenu ofe bou iro iro ooru uke odeibirieka.   
\p
\v 6 Godi Dawa arara me iya yaisina emua ari meramawere ukeka ibake ibaima iya we ma iifa ukakuni.  
\v 7 I orounu ba me godi sibore sianeibisa i ari eno da uawe. Godinu bukaroma emuabake eno weaku, i orouma urunaini aduaini ifisane yauka. Yaukake iseebe ise me sikake uyakake yaura ureibisaya eno weaku.  
\v 8 I orouma eno ukaada moi orounu aruma aweka dodoo uke yareibirieka. I ari eno da uawe. Emuabairo moi orouma emenu aruma aweka enare odeibisaba ibake i demui odoro eme keuwere duenidi diri dausini (23,000) eme feaka.  
\v 9 I orounu uke iruke ereka i ari eno da uawe. I orouma iyanu Dai Waria Godi uke iruke ereibisaba ibake waruma eme moibai akeibiriekaro feareibisa.  
\v 10 I orounu kamena weibisa i ari eno da weawe. I orouma Godibairo eno kamena weibisa ibake Godinu aneruma eme moibai ma feareibiriero feareibisa.   
\p
\v 11 I ukeka yaisina eno ukeibisaie Godi Dawa ima iya we ma iifa ukeibi. Nono awoenae Godima yewa doo imukaku odo me sifine ukakuro i dubuena kai odo idua fafine ukakuba ibake iya me ibinisi orouma ie efeke ibai iwoka sifene ukaada enaenari da ufeisi.   
\p
\v 12 Erenewaa uforo! Eno da ufone imufoisaie yanu imukeka yawokenewaa uawe, i ari eno ba me unao rabua.  
\v 13 Imuke eawe! I yabairo faraku ba me uke iruke erekae awoena me. I ba me uke iruke erekae eme yaisinabairo fareibaku. Godima ya da medifiakuke i ba me ukeka yaisina medifone ya ma buna ufiakuba ibake i ba me ukeka medifone imufoisaie idua mediawe.   
\s1 Godinu umuro anaadae me sara imumunu umuro da anifene wei wake  
\p
\v 14 Enoba, naiyemuku, i ba me godibairo sibore da siawe.  
\v 15 Yae awara buna oroua nanu wake imuke eaweke nanu wakeye meoba ba ariya eno weaweke iwoka siawe.  
\v 16 Yesuma i fanigini we ma irauaiai ui. Enoba awoenae iyama i fanigini we ma irauaiai ukaisike isaisiie Danu iwa ari isaisi ibake iyae demui orou ari eno. I buredi ma birabira yaraada isaisiie Danu ofe ari isaisi ibake iya yaisina Dawaini awaawa ukaada ofe demui mane sinaisi.  
\v 17 I buredie demuiba ibake i demui buredi ma birabira yaraisike isaisiie iyae demui orou, iyae ofe demui orou ari eno.   
\p
\v 18 I Du orounu bisara imuke eawe! Godinu dai sosi uwararo Godinua weada sibore sianaisa uruna isaisa orou, i uruna isaisaba ibake emuaini Godini demuiro ibaisa.  
\v 19-20 Aneaneme wemau? I ba me godiye me ibinua weakune? I ba me godibairo ofereni odekae irauaiaiya weakune? I ari eno me. I ba me godibairo ofereni odaisa orouma i ofereni Godibairo ode dakaisake seidaninu merama imumubairo odaisa ibake weakune. Ya orouma i ba me godinu we banabana ukaisa uruna isaisaie yaini seidaninu merama imumuini demui orou ari sinaisake ibaada iseibaisa. Eno da ufone ibake weakune.  
\v 21 Yama iyanu Dai Waria Minu we ma irauaiai ui faniginini iyanu Babaenu iwa isekaini seidaninu merama imumunu uruna isekaini yaisina isaisaie yae Godini demuiro ibe mero yae seidanini demuiro ibinisa.  
\v 22 Anemebake eno ukaisa? Yanu ararae iyanu Dai Waria Mima yaini dino ufine ibake eno ukaisa? Dawa buna mero yae buna daiwereya imukada ibake weada eno ukaisa?   
\s1 Aine wai ure Godinu ibi mane we ma daiwere ufene wei wake  
\p
\v 23 Yamae eno weaisa, aneme ufene imufeisiie enaenari ufeisia eno weaisa? Ba weaisaroma nono yanu moi ukekama yanu naiyemuku unu kore da ufiakuke emenu Godi imukaisa imuka ma ara uke da ufiaku.  
\v 24 Yanu mane da imufoke yanu naiyemuku imufoke unu kofiakane ibake weakune.   
\p
\v 25 Sidowa bobo oroubairo ane abu oima make munaadae ide ba me godinua weada we banabana ukaisa abuba me iyanu imuka ma merama ufeku ari eno da we nauke eakawe.  
\v 26 Godinu bukaroma eno weaku, i orofa akaka dooini omaini idina madina erawa naukawa yaisina, ie iyanu Dai Waria Minua eno weaku. Eno weakua i abubake da we nauke eakawe.   
\p
\v 27 Moi Godinu wake nauke me mima uruna nabairo iawe wefekuie nono yanu arara ifone wefoisaie iawe. I urunade aneme uruna da we nauke eakawe ukaada danu moko wakema yanu imuka ma merama unao ufekua.  
\v 28-29 Nono moi mima nabairo uruna iawe wefekuro nono moi mima eno wefeku, yewa urunae ba me godinu we banabana uisa urunaya wefekuie da iawe. Kukufoisake ifoisaie dawaini enaenari ifekuro danu imuka merama unao rabua i abu da iawe. I minu imukeka imukenewaa uaweke yanu moi imukeka da imuawe. Enoya i abu da iawe.  
\v 30 Nanu ararae i uruna imauke Godibairo we ma irauaiai umauie emenu ere weaisa wake anemebake imumane weaisa. Emenu imuka merama ufeisaie nanu merama me, anemebake eno weaisa?  
\v 31 Nanu wake wemaro ya nauawe. Uruna o adua isaisake aneaneme ukaisaie Godinu ibi we ma daiwere ukaada eno ufone ibake weakune.  
\v 32 I Du orouini Guriki orouini Godinu wake naukaisa orouini emua yaisinabairo yama meramawere da uyakawe. Eno ufoisaie emenu imuka ma merama unao ufoisaya.  
\v 33 Naini enaenari eno ukakune. Eme yaisinabairo irauaiai mane ukakune. Nanu arara uke dakakuneke i eme yaisina Godibairo wirofisane ibake irauaiai mane ukakune.   
\c 11  
\p
\v 1 Nae Yesu Kerisonu ukeka sineka eraada enaenari ukakunea yaini iini nanu ukakune sinakune ibai eraada enaenari eno ukeibiawe.   
\s1 Bokai idi dadau uke guriguri ukekabake wei wake  
\p
\v 2 Nanu we ma iwoka ukakunia i wake yaisina naukada ukaisake na imukakuneka ibake yae irauaiai ukaisaya eno weakune.  
\v 3 Nono yewa wake wemaro ya nauawe. Eme yaisina iyanu dai Waria Miye Yesu. Nono awekabo emenu dai oroue emenu emeaka. Nono Kerisonu dai miye Godi.  
\v 4 Enoba moi mima sosi uwararo guriguri ufine ukaada o Godinu wake wefine ukaada danu bokai idi dadau ufekuie dawa danu Dai Waria Mi Yesu Kerisobake iifa da uke yaraadama eno ufeku.  
\v 5 Nono yabairoe moi awekama sosi uwararo guriguri ufine o Godinu wake wefine ukaada danu bokai idi dadau da ufekuie dawa danu emebake dawae nanu dai mi meya weada ibake eno ufeku. Dawa eno ufekuie i sara daabaro eneibaisa awekaboma emenu bokai idi ubiro giriri uraisa i ari eno ufeku.  
\v 6 Moi awekama Godinu wake weada danu bokai idi dadau da ufekuie danu bokai idi ubiro giriri ufine ibake weakune. Dawa arara me danu bokai idi ubiro giriri ureka ibake dawa maru sifekubaie danu bokai idi dadau ufine ibake weakune.  
\v 7 Godima eme Dawa ari ubu urieba ibake emema guriguri ufisane o Godinu wake wefisane ukaadae emenu bokai idi Godibake omeara uke dakaisaie emenu ukeka sinekaroma Godinu bunaini arakeka ma boroo yaraisa. Nono i awekaboe emenu emeakabake omeara uke dakaisake emenu emeakanu bunaini arakeka enaenari ma boroo yaraisa.  
\v 8 Godima eme awekanu kaima ubu uke dauike Dawae aweka una emenu kaima ubu ui.  
\v 9 Nono Godima eme una ubu ukeroma aweka unabake make dauike Dawae aweka una ubu uike eme unabake mai.  
\v 10 Enoba aneruma ibai ereibaisaba ibake awekaboma sosi uwara ubarenaro guriguri ufisane ukaada o Godinu wake wefisane ukaadae emenu bokai idi dadau ufeisaie emenu emeakae iyanu dai oroua weada ibake eno ufeisa.  
\v 11 Imuke eawe! Godinu araraba ibake ya Godinu wake naukaisa awekaini emeaka yanu yanu irauaiai uke makewe.  
\v 12 I kawama aweka unae eme unabairoma fari, nono i odoroma ewae awekaboma eme yaisina dorakuneka. Ie baroma nono yaisinae Godibairoma faraisa.   
\p
\v 13 Yewabai imukenewaa uawe! Moi awekama danu bokai idi dadau da ufekuke Godibairo guriguri ufekuie irauaiaiba me?  
\v 14-15 Ya iwoka, emebai emua yafa bokai idi bobo ie ba me. Nono awekaboma yafa bokai idi bobo ie irauaiai. I yafa bokai idiye awekabo emenu bokai barukeka ari. Emema iyabake we meroma nono iyanu mane ibaie baya eno we iwoka sinaisi.  
\v 16 Nono moi mima yewa wakebake urane rarane ufekuie iyabairo moi guriguri ukeka meba moi wake we da dafeisike i wake mane wefeisi. Nono i Godinu wake naukaisa orou yaisina enaenari we ma iwoka uke makanaisa.   
\s1 Korinida goi orouma Dai Waria Minu iwa iseka ma merama uisa wake  
\p
\v 17 Nono yewa moi wake wemaro ya nauawe. Yae sosi uwara ubarenaro guriguri ufone ukaadae irauaiai uke dakaada yanu Godi imukeka imuka ma ara uke dakaisake yae meramawere ukaisaba ibake yewa wake yabairo weakune.  
\v 18 Ya Godinu wake naukaisa orou guriguri ufone fare ku sianadae ya imuka demui mane imuke dakaisake imuka imusu imusu imukada ku imusu imusu ukaisa. Moi orouma eno weaisaro naukakuneba ie baba meo aneaneme imumau?  
\v 19 Yabairo moi orouma Godibairo ba guriguri ukaisaro nono moibaima imuka imusu imusu imukada Godibairo ba guriguri uke dakaisa. Yae eno ukaada urane rarane ukaisaie iyama i ba guriguri ukaisa orouini i meo guriguri ukaisa orouini yanu ukaisa sinaisa ibairo eraada iwoka ukaisi.  
\v 20-21 Ya iyanu Dai Waria Minu iwa ifone fare ku sianaisaie iyanu Dai Waria Minu iwa ise dakaisake moi orou imuke dakaada yanu imusu mane uruna isaisa. Moi mi dawa uruna daiwere isakuro nono moi mi dawa desini uraku. Nono moi mi dawae ara adua keuwere isakuke gogore sinaku.  
\v 22 Yae anemebake eno ukaisa? Yae uwara ibe me ibake yanu uwararo uruna imusu imusu iro ise dakaisa? Ya eno ukaisaie Godinu uwara iifa uke dakaisake i uruna me orou ma merama ukakunekaro emua maru ukaisa. Ibake aneaneme wemau ari? Yae irau oroua wemane imukaisa? Me, eno da wemau.   
\s1 Iyanu Dai Waria Mima Danu iwoka ukeka orou iwa mariero isa wake  
\p
\v 23-24 Iyanu Dai Waria Minu iwa isekabake wei wake yabairo we enaenari nono wemaro ya nauawe. Diudiasima Yesu we forairo i odo dumuro Yesuma buredi munike Godibairo we ma irauaiai uike ma birabira yarike eno wei, yewae Nanu oferoma nono ya ifone ibake yabake ma birabira yarakuneya, ie isaada Na imukeibikowe eno wei.  
\v 25 Emenu i marie buredi ise me sikaro Yesuma i fanigini enaenari munike eno wei, yewa waini faniginie Nanu arararo uke makaneka. Nanu iwaroma nono isafekuba ie i awoena arararo uke makaneka enare ma ara ufeku. Yewa fanigini ifoisaie Na imukeibikowe eno wei.  
\v 26 Yama yewa buredini iwa fanigini iseifoisaie iyanu Dai Waria Mima iyabake fearia weifoisa. Iduaya ewadoma Danu owere fafeku odoroma enaenari eno ukeibiawe Yesuma eno wei.   
\s1 Ainama Godinu iwa ma merama ukakuie dawabairo merama daiwere ibeibakua wei wake  
\p
\v 27 Ainama danu imukeka irau mero yewa buredini iyanu Dai Waria Minu iwa fanigini me sara ifekuie dawa iyanu Dai Waria Minu ofeini iwaini iifa da ufekuke ma merama ufekuke Yesu Kerisobake meramawere ufeku.  
\v 28 Ainama yewa buredini iwa fanigini ifine ukaadae imukenewaa ufiro danu imuka irauaiai ufekuie idua ifi. Nono ie sara da ifi.  
\v 29 Aina ainama iyanu Dai Waria Minu ofe da imufeisake i Godinu wake naukaisa orou yaisina emuaini Dawaini ofe demuiroma nono ma nuna ukaada yewa buredini iwa fanigini emuama me sara ifeisaie emenu ba me ukeka emuabairo ibeifekuro Godima emua fanisi mafiaku.  
\v 30 Yabairo moi orou emuae eno ukaisaba ibake eme keuwere arama ukaisa. Moi orouma i ari eno merama uisaba ibake feaka.  
\v 31 Yae yanu ukeka sineka imukenewaa ukaada gienabu ufoisaie Godima ya kodo da ufiakuke fanisi da mafiaku.   
\p
\v 32 Godima iya kodo uraada fanisi makakuniie iya ma gienabu umiro irauaiai daabaro anifero nono i Godinu wake nauke me orou i meramawere orofaro emenu mane anifisane ibake eno weadama weaku.  
\v 33-34 Iduaba, naiyemuku, iyanu Dai Waria Minu iwa ifone fare ku siafoisaie yanu yanu imukenewaa uke makaewe. Ainadei dawa desini ufekuie danu uwararo uruna ifikema aafi. Ya me sara fare ku siafoisaie fanisi munao ufoisaya yanu yanu imukenewaa uke makaewe. Yabairo famauke i moi riba wake wemauro naufoisa ibake weakune.   
\c 12  
\s1 Imumu Iraunu irau me makeka keuwere makaku wake  
\p
\v 1 Naiyemuku, Godinu Imumu Irauma buna iya yaisina makakuni wake ma nuna unao rabuba nanu wake wemaro nauawe.  
\v 2 Yae iwoka sine ibinisa, adinaroe ya Godinu wake nauke dakeibisaro imusu emema yabake we irukeibisaro yama i ba mero wake we me godibairo aneibisa.  
\v 3 Yewa wake nauawe. Godinu Imumu Irauma aina unu kofekuie i mima Yesu we ma merama da ufeku. Ainama Yesu Dawae nanu Dai Waria Miya eno wefekuie Godinu Imumu Irauma Dawa unu kofekuro ibake eno wefeku. I Imumu Irauma dawa unu kore dafekuie i ari eno da wefeku.  
\v 4 I Imumu Iraunu buna makekae imusu imusuro nono i buna imusu imusue Godinu Imumu Irauma makakuni.  
\v 5 I Godinu waiya ukekae imusu imusuro nono iyanu Godibairo waiya imusu imusu ukaisiroma nono i waiya ubi Miye una demui. Dawae iyanu Dai Waria Mi.  
\v 6 Godinu waiya imusu imusu ukaisiro nono Godi Dawae una demui. Dawa mane iya unu korakuniro ibake Danu waiya ukaisi.  
\v 7 Godinu wake naukaisi orou iya yaisina iyanu iyanu unu kore makafeke irauaiai mane ibifene ibake Godinu Imumu Irauma buna imusu imusu makakuni.  
\v 8 Godinu Imumu Irauma moi mibake buna makaada iwoka daiwere makakuro i mima emebairo enaenari we ma iwoka ukakune. Nono Godinu Imumu Irauma moi mibairo buna makakuba ibake i mima Godinu iwoka yaisina emebairo weaku.  
\v 9-10 Godinu Imumu Irauma moi mibairo buna makaku ibake i mima danu imuka yaisina Godibairo odenewaa ukaku. Nono Godinu Imumu Irauma moi mibairo buna makaku ibake i mima moi arama uke ibaisa orou ma wirokakune. Godinu Imumu Irauma buna imusu imusu makakune ibake moi mima buna ukeka ukakuro nono moi mima Godinu wake we bou ukakuro nono moi mima Godinu Imumu Iraunu imukekaini nono i imusu imusu imumunu imukekaini iwoka sinakuke ibake abo minu wakeye baro nono abo minu wakeye meo ibai emebairo we ma iwoka sinakuro emua yaisina naukaisa. Moi mima wake imusu imusu weakuro nono moi mima i wake imusu imusunu ubi we ma boroo yaraku.  
\v 11 Godinu Imumu Irau, Dawae una demui, Danu imusu mane Danu arararo ukaada i eme yaisina buna imusu imusu makaada unu korakunero ibake emenu waiya ukenewaa ukaisa.   
\s1 I ofe demuinu eraerabusae iyaya wei wake  
\p
\v 12 Iyanu ofe ubue demui ofe. Nono i ofero ibinisa eraerabusae keuwere. I eraerabusa yaisinama demui ofe sinaisa, i ari eno iya yaisinae Yesu Kerisonu ubu ofero eraerabusa ibake iyae Danu ubu ofe sinaisi.  
\v 13 Godinu Imumu Irau Danu imusu mane iya eme yaisina mune ofe demui mi ari eno uke odakuni. Ya Du orouini Guriki orouini imusu orouini moi orounu waiya ukeka orouini me eneibeka orouini Godinu Imumu Irauma iya yaisina babadaido ukaada Yesu Kerisonu ofero mune odiiro demui ofe siki ibake Dawama iyabairo ibenewaa ukaku.  
\v 14 I ofero demui erabunaku mane ibe mero i oferoe eraerabusa keuwere ibinisa.  
\v 15 I umuma eno wefeku, nae wana meba ibake nae ofenu moi feka me eno wefekuie i ofenu moi fekaba me? Euwa, ie i ofenu moi fekaya. I ofe feka mederoma danu imusu da ibifeku.  
\v 16 I omema eno wefeku, nae naisa meba ibake nae i ofenu moi feka me, eno wefekuie i ofenu moi fekaba me? Euwa ie i ofenu moi fekaya, i ofe feka mederoma danu imusu da ane ibifeku.  
\v 17 Imuke eawe! I ofero naisa mane ibifekude aneaneme naufeku? I ofero ome mane ibifekude aneaneme urumu naufeku?  
\v 18 Nono Godima iyanu ofe i ari eno ubu uke daui. Dawae Danu arararo uike iyanu ofero eraerabusa yaisina emenu orofa mama mamaro irauaiai odirie.  
\v 19 Iyabairo ofe feka demui mane ibifironae ba ofe farafa me.  
\v 20 Enoba Godima ofero eraerabusa keuwere ubu uike demui ofero odirie.  
\v 21 Naisama wanabake eno we dakaku, nae a medimauaneke nanu imusu waiya umaua eno we dakaku. Enaenari bokaima umubake eno we dakaku, nae a medimauaneke nanu imusu waiya umaua eno we dakaku.  
\v 22 Iyanu ofero eraerabusa moi imukenewaa uke ukaisikema nono iyanu ofero moi eraerabusa imukenewaa dakaisiroma nono ie iyanu imuka ubi ofero eraerabusa. I eraerabusa moi i ofero da ibifeisaie iyanu ofe irauaiai da ibifeku.  
\v 23-25 Iyanu ofero eraerabusa moiye irauaiai meya eno we imukadama ibake yawokenewaa ukaisi. Nono iyanu ofero eraerabusa moibake maru ukaisike ibake emua wauma oba ukaisike nono i ereka eraerabusae me odaisi. Godima i ofero irauaiai me eraerabusa imukenewaa ukaada ibake emenu ibeka irau orofaro ode anirie. I ofero eraerabusama urane rarane dafisake me irauaiai ibifisane ibake Godima eno ubu uke odirie.  
\v 26 I ofero demui ofe fekama oferi ukakuie i ofero eraerabusa yaisina demuiro oferi ukaisa. Ainama i ofero demui ofe fekanaku we ma daiwere ukakuie i ofero ibinisa eraerabusa yaisina emua rooro ukaisa.  
\v 27 Iduaroma nono ya yaisinae Yesu Kerisonu ofe ibake yae Danu ofero ibinu eraerabusa.  
\v 28 Godima Danu wake naukaisa oroubairoma moi orou mune bou uke odirie. Dawa eno we mune odirie, enoba i afasoro oroue emuako Dawama eno we mune odirie. Eno uike emenu umuro Dawa we bou ukeka orou we mune odirie. Eno uike emenu umuroe Dawa sisa orou we mune odirie. Eno uike emenu umuroe arama uke ibekaro ma wirokeka orou we mune odirie. Eno uike emenu umuroe buna ukeka orou we mune odirie. Eno uike emenu umuroe i eme unu koreka orouini eme ereka orouini emenu wake mero wake imusu imusu weeka orouini emua yaisina we mune demuiro odirie.  
\v 29-30 Eno uke we mune odirieba ibake eme yaisinae afasoro orou me. Eme yaisinae we bou ukeka orou me. Eme yaisinae sisa orou me. Eme yaisinae buna ukeka orou me. Eme yaisinae arama uke ibekaro ma wirokeka orou me. Eme yaisinae emenu wake mero wake imusu imusu weeka orou me. Eme yaisinae i emenu wake mero wake imusu imusunu ubi ma boroo yareka orou me.  
\v 31 Ibake nono yae, I dawako buna makeka mune eawe. Nanu ararae nanu wene ibai da wemauke nono moi irau buna wake ima daiwere wemauro ya naufoisa.   
\c 13  
\s1 Imuka ure nuda ukekabake wei wake  
\p
\v 1 I wakeye eno, nama Godinu wake emebairo emenu wake mero wake imusu imusuini anerunu wakeroma wemaukema nono emebake imukari da umiauie nanu weeka wake gorowere i dawa buma me sara uraisa i ari eno. Eno umauie bebeku mane we gagao ukeimau.  
\v 2 Nae we bou umauke arawere imukeka yaisina iwoka simauke daiwere imukenewaa ukaada oraarawere ekararo ania wemauro anifekuro eno umaukema nono dubuenaro emebake imukari da umiauie nae daiwere mero nae ba me mi ari eno simau.   
\p
\v 3 Nae nanu eraerabusa yaisina naka naka umauke Godinu wake emebairo weada nanu ofe inaama yafisane mamiaukema nono emebake imukari da umiau i dawa nanu ukeka irauaiai meba ibake Godibairo moko da mumau.   
\p
\v 4 Ainama emebake imukari ukaada danu moko wake sabu we dakakuke ure nuda wake weaku. Ainama emebake imukari ukaadae emua unu korakunekema nono emenu eraerabusa sara da mufine imukaku. Ainama emebake imukari ukaadae moi mibake wake merama da wefeku. Dawa danu onaminu ibi we ma daiwere uke dakaku.  
\v 5 Aina mi dawa emebake imukari ukaadae dawa fukero uke dakakuke emebake iifa ukaku. Aina mima emebake imukari ukaadae danu arara mane uke dakaku. Ainama emebake imukari ukaadae sabunaku ararua sine dakaku. Ainama emebake imuraki ukaadae emema dawabake merama ukeka imuke dakaku.  
\v 6 Aina mima emebake imukari ukaadae emenu merama ukekabake rooro uke dakakuke emenu ba irau ukekabake rooro ukaku.  
\v 7 Aina mima moi mibake imukari ukaadae dawa dino uke dakakuke dawa mede dakaku. Dawa mede dakakuke unu koraada demuiro daba mame ibaada irauaiai imukada ure nuda mane uke ibeibaku.   
\p
\v 8 I imukari ukekae da me sifekuke me ibene ibene ibeifeku. I we bou ukeka wakeye me sifeku. I wake imusu imusu weekae me sifeku. I iwoka ukekae me sifeku.  
\v 9 Iyanu iwoka ukekaini we bou ukekaini ie enaenari daiwere me.  
\v 10 Dubuenaro i irauaiai erabu fafekuke Danu umane kuufekuke imusu siafeku ibaie irauaiai mane sifekuba ibake i daiwere me eraerabusa me sifeisa.   
\p
\v 11 Na okoanakuro ibaadae amarananakunu wake weke i amarananakunu imukeka imueke ibake i amarananakunu imukeka ari eno wake we. Eno areare ukeebe nono dai sineie i amarananakunu imukekaini weeka ari ibai mede.  
\v 12 Awoenae iyama yaisina iwoka uke dakaisiie iya ba me aku edoro ariro ibai eraada iyanu iboo naisa erenewaa uke dakaisiroma nono dubuenaroe erenewaa ufeisi. Awoena na moi ena baruna mane iwoka sinakune. Nono dubuenaroe na i yaisina iwoka sinenewaa umau. Godima nanu ukeka sineka yaisina iwoka sinaku i ari eno Godinu imukeka yaisina iwoka simau.   
\p
\v 13 Idua, i imuka yaisina Godibairo odeka daabaini i Godinu fareka odo koro ukeibeka daabaini i ba imukari ukeka daabaini i daaba yaisinae idua ibeifeisa. Nono i daiwere imukari ukeka daaba i bokai daaba idua.   
\c 14  
\s1 Imumu Iraunu dawako me makekabake wei wake  
\p
\v 1 Yanu dawako ukekae emebake imukari ukeka. Iduaya emebake imukari ukenewaa uawe. Eno uaweke nono Godinu Imumu Iraunu buna makeka yaisina mune eaweke nono Godinu Imumu Iraubairo i we bou ukeka makeka ibake we naukenewaa uke eawe.  
\v 2 Ainama emenu wake mero imusu imusu weeka wakeroma weakuie emema danu weibaku wake nauke dakeibaisaro dawae Godi mane naukeibakuro weibaku. Dawa eno weibakuie Godinu Imumu Iraunu fema imukeka wake weibaku.  
\v 3-4 Aina mima Godinu wake we bou ukakuie dawa emenu Godi imukeka imuka ma ara ukakuke emua ma irauaiai ufiake emua ma aduadu ufiane ibake eno ukaku. Ainama emenu wake mero imusu imusu weeka wakeroma weibakuie danu Godi imukeka imuka mane ma ara ukaku. Nono Godinu wake we bou ukaku mi dawa Godinu sosi uwara ubarenaro yaure ibaada Godinu wake naukeibaisa orounu imuka ma ara ukeibakune.   
\p
\v 5 Nanu ararae ya yaisina emenu wake mero imusu imusu weeka wakeroma wefone ibake weakune. Nono ie yanu daiwere ukeka me. Yanu daiwere ukekae Godinu wake we bou ukeka idua. Godinu wake we bou ukaku mima i emenu wake mero imusu imusu weeka wakeroma weibaku mi ma berekaku. Nono moi mima emenu wake mero i imusu imusu weeka wakeroma weakuro moi mima i wakenu ubi ma boroo yarakuro i Godinu wake naukeibaisa orouma i wake naukada emenu Godi imukeka imuka ma ara ukaisaie i dawa i we bou ukekaini i emenu wake mero imusu imusu wakeroma weekaini emua demuie irauaiai.  
\v 6 Naiyemuku, yabairo famauke emenu wake mero imusu imusu weeka wakeroma wemauie yanu Godi imukaisa imuka aneaneme ma ara umau? Godima nabairo wei wake emenu wake mero imusu imusu weeka wakeroma weada ya we ma iwoka da umiau. Nono Godinu wake we bou uke Godinu wake we ma iwoka uke eno mane umiau i deima idua irau.   
\s1 Godinu wake iyanu ba wakeroma wefene wei wake  
\p
\v 7 Ya yaisina iwoka uke ibinisa, i wirori o kawiama wenewaa dakakuie eme emua adaadake naukenewaa dafeisa.  
\v 8 Nono ame mima danu kawia ari adaadake urenewaa dafekuie danu ame orou emua adaadake naukenewaa dafeisa ibake uranekabake da anifeisa.  
\v 9 Enaenari ya emenu wake mero imusu imusu weeka wakeroma wefoisaie eme moi yanu wake da naufeisake aneaneme i wakenu ubi iwoka sifeisa? Eno wefoisaie oyauma yanu wake ure wawanao ufekuro i wake me ari sifeku.  
\v 10 Na iwoka yewa orofa akakaro ba wake keuwere ibinisaro i imusu imusu wake weaisa orouma iwoka sinaisaba ibake i ba wake weaisa.  
\v 11 Nono moi mima nabake eme mero imusu weeka wakeroma wefekuro da naumauie dawaini naini uwa imusu imusu orou ari eno uke ibifuku.  
\v 12 Nanu wake wemaro nauawe! Yae Godinu Imumu Iraunu buna makeka yodia ukenewaa ukaisa. Enoba Danu buna daiwere makeka yaisina munenewaa ufoke Godinu wake naukaisa orounu Godi imukaisa imuka ma ara ukenewaa ufiane ibake yewa wake weakune.   
\p
\v 13 Enoba ainama emenu wake mero imusu imusu weeka wakeroma wefine ukaadae dawa Godibairo we nauke efiro Godima dawa ma iwoka ufiro i wakenu ubi Godinu wake naukaisa oroubairo we ma boroo yafi.  
\v 14 Nae emenu wake mero imusu weeka wakeroma wemauie nanu imumu mane guriguri ufekuro nono nanu imuka guriguri da ufeku.  
\v 15 Aneaneme eno umau? Nae i wakenu ubi mumane ibake nanu imumuini imukama guriguri umau. Nae enaenari imumuini imukama Godibairo ane wemau.  
\v 16 Yama i ari eno da ufoisaie nono yanu imumu mane Godibairo we ma irauaiai ukaada iduaya wefoisaroma nono emema yanu wake da naufeisaba ibake aneaneme yaini iini idua iraua wefeisa?  
\v 17 Yae yanu imumu mane guriguri ufoisaie Godibairo irauaiai ufoisakema nono Godinu wake naukaisa orounu Godi imukaisa imuka ma ara da ufoisa.  
\v 18 Nae ya orou yaisina ma berekada emenu wake mero imusu imusu weeka wake keuwere weakune ibake Godibairo we ma irauaiai ukakune.  
\v 19 Nae eno ukakuneroma nono nanu ararae sosi uwara ubarenaro nanu imukama wake kai deidemunanaku wemauke i Godinu wake naukaisa orounu Godi imukaisa imuka ma ara umiau. Na arara me emenu wake mero imusu weeka wake yafawere weekaro i orouma nauke dakeka.   
\p
\v 20 Naiyemuku, yama i amarananakunu imukeka ari eno da imuawe. I amaro ama iseibaisa amaranakunu imukekari eno ukaada nono i amaranaku ari eno meramawere uawekema nono i dai orounu imukeka ari eno imuawe.  
\v 21 Godinu bukaroma eno weaku,  
\li1 Godima eno wei, imusu orou we odimiauro Nanu wake imusu wakeroma wefeisaro Nanu moi orouma nono Nanu wake da naufeisaya eno weia  
\m Godinu bukaroma eno weaku.   
\p
\v 22 Iduaroma imuke eawe! I emenu wake mero wake imusu imusu weekae Godinu wake naukaisa orounu imukeka ma owere dakakuba ibake i dawa emenu nauke karana ukeka wake me. Nono Godinu wake nauke me orouma i wake weekabake Godi ibinua wefisaro naufisane ibake i dawae emenu nauke karana ukaisa wake idua. Nono Godinu wake we bou ukekae Godinu wake naukaisa orou unu korakuneke Godinu wake nauke me orou emua unu kore dakakune ibake i wakeye i Godinu wake naukaisa orounu nauke karana ukeka wake.   
\p
\v 23 Nono Godinu wake naukaisa orouma sosi uwara ubarenaro amufeisake emenu wake mero imusu imusu weeka wakeroma wefeisaro imusu orouini Godinu wake nauke dakaisa orouini emuama amufeisake naukada i oroue gogoreba aneme ukaisarie eno wefeisa.  
\v 24 Nono Godinu orou yaisina Godinu wake we bou ufeisaro Godinu wake nauke me mi o imusu orouma amufeisake i wake naufeisaro Godinu wakema emenu imukaro iyafekuro imuka foria ufeisake eno we imufeisa, nanu ukeka sineka ie meramawereya eno we imufeisa.  
\v 25 I imusu orouma imuka foria ufeisaro Godima i orounu fema imukeka imuka ma boroo yafiaku ibake i orouma imukenewaa ukaada iwoka idua sifeisake iboo yanakaisari eno ufeisake Godibairo guriguri ukaada Godiye yaini ibinua eno wefeisa.   
\s1 Sosi uwararo gienabu ukekabake weaku wake  
\p
\v 26 Naiyemuku, nanu wake wene ibaibake aneaneme ufoisa? Fare ku siafoisaie moi orouma Godibairo ane we, moi orou we ma iwoka uke, moi orou Godima emuabake wei wake we, moi orouma emenu wake mero imusu imusu weeka wakeroma we, nono moi orouma i wakenu ubi we ma boroo yare, eno mane ufoisa. Eno ufoisake eme yaisinanu Godi imukaisa imuka ma daiwere ufoisa i deima idua irau.  
\v 27 Emenu wake mero imusu imusu weeka wakeroma wefone ukaadae eme una raara o una buuba mane wake fu deidemu mane wefisaro moi mima i imusu imusu weeka wakenu ubi we ma boroo yafine ibake weakune.  
\v 28 Nono i wakenu ubi we ma boroo yareka mi meie nono i orouma i orou yaisinabairo da wefisake Godini emenu imusu mane mumuuroma wefisane ibake weakune.  
\v 29 Ya fare ku siafoisaie Godinu wake we bou ukeka orou una raara o una buuba ari mane weifisaro naufoke ya yaisina emenu wake imukenewaa ufone ibake weakune.  
\v 30 Godima moi mibairo imukeka moi mafekuie i dawako weifeku mima wake medifekuke wake muu ufekuro nono i Godima imukeka mafeku mima wake uyare wefeku.  
\v 31 Eno ufoisaie Godinu wake we bou ukeka orou yaisina una deidemu wake wefeisaro ya yaisina naufoisaro nono yanu Godi imukeka imuka daiwere sifeku.  
\v 32 Godinu wake we bou ukeka orouma i we bou ukeka yawokenewaa ukaada me sara da wefisane ibake yewa wake weakune.  
\v 33 Godi Dawae arara me imusu imusu me sara ukeka ibake weakune. Godi Danu ararae irauaiai ukeka. Sosi uwara yaisinaro eno ufeisi deima idua irau.   
\p
\v 34 I awekaboma sosi uwara ubarenaro wake da wefisane ibake weakune. Du orounu darawaduba i awekaboma wake wake da wefisake emeakanu wake naufisane ibake weakune.  
\v 35 Awekaboma aneaneme uke iwoka sifisane ufeisaie emenu emeakama uwararo wenewaa ufeisa wake enaenari naufeisake iwoka sifeisa. Awekaboma sosi uwara ubarenaro wake weekae ba meba ibake emua sosi uwara ubarenaro wake da wefisane weakune.   
\p
\v 36 Ya orouwere! Godinu wakeye yabairoma faria weaisa? Yanu onaroue Godinu wake naukada ibake eno ukaisa?  
\v 37 Aina mima yabairo ibaada Godinu wake we bou ukakuie dawama Godinu wake weaku. Dawae Godinu we bou ukeka miba ibake yewa yanakakune owaowa dawa iwokaya nanu weakune owaowae Godinu wakeya weada iwoka sinakuba ibake weakune. Dawae iwoka sinakuba ibake yabairo dawama weifine weakune.  
\v 38 Aina mima yewa wake da naufekuke medifekuie dawa idua mediawe.   
\p
\v 39 Enoya naiyemuku, Godinu wake we bou uaweke i emenu wake mero imusu imusu weeka wake weaisa oroubake i wake mediawe eno da weawe.  
\v 40 Godinu waiya me sara sara da uaweke gienabu mane uawe.   
\c 15  
\s1 Yesu Keriso fearike nono uyari wake  
\p
\v 1 Naiyemuku, yabairo Godinu wake we, enaenari nono wemau. Godinu wake yabairo wero naukenewaa ukaada Godibairo ibeibisa. Nono awoenae enaenari eno ukaisa.  
\v 2 Godinu wake yabairo wero nauisake Godi imukenewaa ukeibisa enaenari awoena eno ufoisaie i irau wakema ya ma wirofiaku. Nono yama i irau wake naukenewaa da ufoisaie i wakema ya da ma wirofiaku.   
\p
\v 3-4 Godinu wake weisaro naueke i wakeye Godinu bokai wake ibake yabairo wero nauisa. I wakeye i ari eno, Godinu bukaroma eno weaku wake enaenari Yesu Kerisoma iyabake feariro mune ooru uke oisaro odo buuba me siniro Godima Dawa nono ma uyari.  
\v 5 Yesu fearike nono uyarike Fidabairo fariro Fidama Dawa eri. Nono i moi Yesunu iwoka ukeka orou duerobairo (12) fariro emuama Dawa eka.  
\v 6 Nono dubuenae eme keuwere fai aderedibairo (500) fariro emuama Dawa eka. I Yesu eka orou keuwere ibinisaro nono moibai emuae feaka.  
\v 7 Yesu Dawa Deimisibairo fariro Deimisima Dawa eri. Nono Dawae i afasoro orou yaisinabairo fariro emuama Dawa eka.  
\v 8 I orou yaisina emuabairoko fariro ekaro nono dubuenaro nabairo fariro nama Dawa ere. Moi awekama amara doreka odo oidero sabunaku daraku I ari eno nae oideroma nono Dawae na afasoro mi na we mune odikara.  
\v 9 I afasoro oroubairo nae okoanaku. Nae Godinu wake naukeibisa orou keuwere merama uke yaya ibake nae maru ukakunara. Nae meramawere ukeibisara mi ibake emema nae afasoro miya da wefisane ibake weakune.  
\v 10 Nono Godima nabake imukari ukarake buna makaraba ibake nanu awoena ukeka sineka ukakune. Enoba nae awoena irauaiai ukeka mane ukakune. Nanu ukakune waiyama i afasoro orou yaisinanu ukaisa waiya ma berekakune. Nama eno uke meroma Godima nabake imukari ukaada unu korakunaraba ibake nanu waiya daiwere ukakune.  
\v 11 Nanu ukakune waiyaini i afasoro orounu ukeibaisa waiyaini ie demui. Aina afasoro mima waiya daiwere ukeifekuie imuka daiwere iro imukeka me. Iya yaisinama Godinu irau wake weaisiro yama naukaisaie idua irau.   
\s1 Feaka orou yaisina nono uyafeisa wake  
\p
\v 12 I feareroma nono uyarekanu wake wemaro ya nauawe. Yesu Keriso, Dawa fearikema nono uyaria eno weaisi. Yesu Kerisonu fearike uyari wakeye Godinu irau wake danu ubiye idua. Eno weaisiroma nono yabairo moi orouma anemebake feareroma uyareka ie ubi mero me sara weaisaya eno weaisa?  
\v 13 Feareroma nono uyareka meronae Godima Yesu Keriso feariroma nono da ma uyafine.  
\v 14 Yesu Keriso i feareroma da uyafironae iyanu weaisi wake ubi mero me sara wefene. I feareroma nono uyarekabai meronae yanu Godi imukaisa ibaie ubi mero me sara ukeifone.  
\v 15 I dawa ba ie iyama Godinu wake meo weaisi. Iyama eno weaisi, Godima Yesu Keriso feariroma nono ma uyaria weaisi. Nono i fearekaroma uyareka meronae awoena iyae meo weaisi. Godima Yesu Keriso fearekaroma nono da ma uyafironae eme yaisina fearada nono da uyareifisane.  
\v 16 Eme fearadama nono da uyareifeisaya eno weferonae Yesu Keriso Dawako feariroma nono da uyafine.  
\v 17 Yesu Keriso Dawa i feari iroma da uyafironae ya Godi imukaisa imuka ba me ufiro yanu ba me ukekaro ibifone.  
\v 18 Uyareka meya weada i Yesu Kerisobairo imuka yaisina odeibisa orou emuae me sara feareka daabaro anaada i meramawere oroforo feareibisa.  
\v 19 Nono yewa dooro ibaada Yesu Keriso imukaisikema nono i fearekaroma uyareka imuke dakaisiie enaenari me ibake i orou yaisinabairo iyanu ibekae dai meramawerero ibifene.   
\p
\v 20 Nono ie eno me. Godima Yesu Keriso feariro nono ma uyari. Ibake Dawako fearike nono uyariba ibake i Godinu wake naukeka orou emuama yaisina feafeisake nono uyafeisa.  
\v 21 Eme una demuima feariba ibake eme yaisinae feareibaisa. Nono eme una demuima fearekaroma uyariba ibake eme yaisina fearekaroma nono uyareibaisa.  
\v 22 Adamubake eme yaisina feareibaisa, enaenari Yesu Kerisobake eme yaisina uyafeisake me ibeifeisa.  
\v 23 Emuae emenu mama mama uyafeisa. Yesu Keriso Dawako uyari. Nono dubuenaro Dawa owere fafekuro Danu we mufiaku orouma uyafeisa.  
\v 24 Emua yaisina eno ufeisaie Yesuma i Godibake ureini dooini wasai daiwere ukaisa orouini emenu buna ukeka yaisina mufekuke ma merama ufekuro me sifekuie Danu yawokeka Godibairo mafekuro i fearekaroma uyareka odo idua me sifeku.  
\v 25 Yesu Kerisoma yawokenewaa ukeifekuro nono Godima Dawaini i wasai ukeibaisa orou emuaini urafekuke emua ma berefiakuro i wasai ukaisa orou yaisina Danu umu wowonaro odifiakuro Yesu Danu yawokekabai idua me sifeku.  
\v 26 Enoba i dubuena kai wasai ukekanu ubiye feareka. Dawae feareka ma berefekuro idua i yaisina me sifeku.  
\v 27 I ari eno ukekabake Godinu bukaroma eno weaku, Godima i eraerabusa yaisinaini eme moini yaisina mufekuke Yesuma yawofine ibake mune Yesunu umu wowonaro odifekua eno weaku. I yaisina Danu umu wowonaro odifekua weakuie Godini iinibake we dakaku. Godima i eraerabusaini eme moini yaisina Yesunu umu wowonaro odifekuba ibake Godi Danu onami mane Yesunu umu wowonaro da anifeku.  
\v 28 Godima i yaisina Yesunu umu wowonaro odifekuro Yesuma i yaisina ma berefekuke Danu ararae Godima Yesu yawofine ibake ufeku. I odoro Godima Danu imusu mane i yaisina yawokeifeku.  
\v 29 Moi orouma emenu bisara ukaada i fearaisa oroubake imukada emuabake babadaido ukeka munaisa. I feafeisa iroma da uyafeisade anemebake eno ukeibaisa?  
\v 30 I feareroma uyareka meie moi orouma iyabake aine wai ure aneaneme waa ukaada meramawere ukaisake iya ma feafisane ukaada ukaisa?  
\v 31 Nanu adarawere yanu imuka yaisina Yesu Kerisobairo ibinuro yabake imuka daiwere imukakuneba ibake yewa wake wemaro ya naufone weakune. Nae fearekanu ibooro aine wai ure enare ibakune. Nae meo we me ba weakune.  
\v 32 Nanu imukekae eno imukakune, yewa orofaro moko mane mumauie anemebake i Efesa goi orou emuae waa abu ari emuaini uraneibakune? Feafeisike nono da uyafeisiie moi orounu weaisa wake enaenari ufeisi. Emenu meo wake eno weaisa, banauini ara adua ifeisake rooro ufeisia weaisa. Iyae wairo feafeisike nono fearekaroma da uyafeisiba ibake eno ufeisia weaisa.   
\p
\v 33 Eno weaisaroma nono i we irukaisa wake da nauawe. I we irukeka orouini yaure ibaada naufoisaie emua weifeisa enaenari ufoisa.  
\v 34 I me sara gogore imukeka yaisina mediaweke yanu imuka ma giena uawe. Moi orouma yaini ibaada emua Godi iwoka meya. Emua Godi iwoka meba ie yanu meramaya ibaibake imuaweke maru uawe.   
\s1 Feafeisike uyafeisi ofeye imusua wei wake  
\p
\v 35-36 Emema feafeisa iroma aneaneme uke uyafeisake anemedei ofe ari uke fafeisa? Moi orouma eno we nauke efeisaba ibake i wake gorowere weaisa orounu we nauke ereka moko wake wemaro nauawe. Aneme ana kai o mouwefe kaibai waifeisaie kukaubai yaufisaro nono awoena kua fare amufeisa.  
\v 37 I wawaisa eraerabusaini i warakaisake dai sinaisa eraerabusaini emuae demui mero imusu imusu. I wawaisa erabunakue kai demuinaku, ie konoura kai ari nono moi ana kai ari i ari eno.  
\v 38 Nono Godi Danu imusue i kai imusu imusu ofe imusu imusu marie. I kaibai emenu ofe imusu imusu enaenari imusu imusu marie.   
\p
\v 39 I me ibaisa eraerabusanu ofeye emenu mama mama ibinisa. Emenu ofeye imusuro abunu ofeye imusuro i gasiranu ofeye imusuro nono i adua abunu ofeye imusu.  
\v 40 I urero ibinisa orounu ofeye imusuro nono i dooro ibinisa orounu ofeye imusu.  
\v 41 I ewekanu arakekanu biake ibekae imusuro nono i manabenu biake ibekae imusuro i muinanu biake ibekae imusu. Moi muina kaini moi muina kaini emenu biake ibekae imusu imusu.   
\p
\v 42 I feareroma uyareka inu daabae i ari eno, Yewa me ibinisi ofeye feafekuke yaufekuroma nono i feafekuke uyafeku ofeye da feafekuke da yaufeku.  
\v 43 Yewa dooro ibeka ofeye meramawerero nono i feareroma uyareka ofeye amearubu. Yewa dooro ibeka ofeye buna mero nono i feareroma uyareka ofeye bunawere.  
\v 44 Yewa dooro ibeka ofeye ba ofe mane nono i feareroma uyareka ofeye urenu ofe. Yewa doonu ofe bobo ibinisi ibai iya iwoka sinaisike nono feafeisike uyafeisike urero imusu ofe mufeisi ibai iya iwoka sinaisi.  
\v 45 Godinu bukaroma i ari eno weaku, i dawako mi Adamu dawa ba eme sinia weaku. Nono i dubuena Adamu Dawae Imumu Irau makeka miba ibake i fearekaroma uyareka oroubake awoena me ibeka makakuni.  
\v 46 I urenu ofeye dawako mero nono yewa doo ofeye dawako nono i urenu ofeye dubuena.  
\v 47 I dawako mi, dawae yewa dooro ibeka mi, i danu ubiye Godima dawa dooma ubu ui. Nono i dubuena mi, Dawae ureroma fari.  
\v 48 Enoba i dooma ubu ui mini i dooro ibaisa orouini emuae demui. Enaenari i ureroma fari Mini i urero ibinisa orouini emuae demui.  
\v 49 Awoena iyae i dooma ubu ui mi ari eno orou. Nono dubuenaroe i ureroma fari mi ari eno sifeisi.   
\p
\v 50 Naiyemuku, moi wake wemaro ya nauawe. Iyanu ba ofeini iwaini Godinu yawokaku orofaro da anifeku. Yewa feareka ofema urero feare me ofe ari da sifeku.   
\p
\v 51 Naiyemuku, moi wake wemaro ya nauawe. Godinu fema imukakubai awoena weakune. Godinu wake naukeka orou moibai da feafeisa. Moibai feaka, nono moibai awoena fearaisa, moibai feafeisaroma nono moibai emua da feafeisaro Yesu Keriso fafeku i odoro Godinu wake naukeka orou yaisina iyama yewa dooro ofe medifeisike urero awoena ofe mufeisi.  
\v 52 Godinu dubuena kai kawia ufekuro iya naisa kinu unao ukaisi i ari eno sabu iyanu awoena ofe mufeisi. I dubuena kai kawia ufekuro i fearaisa orou ma uyafiakuro awoena ofe mufeisaro iya me ibinisi orouini iini awoena ofe mufeisi.  
\v 53 Yewa ba ofeye feareka ofeba medifeisike awoena ofema mufeisike iya feafeisi oroue feare me orou ari eno sifeisi.  
\v 54-55 I ba ofeye yaufekuro nono awoena ofema mufeisi. I awoena ofeye me ibene ibene ibeka ofe. I awoena ofe mufeisi odoro Godinu bukaroma weaku wake enaenari ufeku. I wakeye i ari eno Godinu buna ukekama feareka ma berekaku.  
\li1 Ibake feareka, ama iya aneaneme ma beremisi? Feareka, ama iya aneaneme yanamisi?  
\m Godinu bukaroma eno weaku.  
\v 56 Iyama meramawere ukeibaisiba ibake fearekama iya yanakakuniro fearaisi. Mosesinu darawaduma iyanu ba me ukeka ma boroo yarakuro iyae ibai iwoka ukaisi. Iyanu merama ukekaroma nono iyanu onarouma i merama ukeka medinao dakakuba ibake mede dakaisiba ibake merama ukeka enama bunawere ukeibaku.  
\v 57 Godima wei ibake iyanu Dai Waria Mima iya unu korakuniro i ba me merama ukekaini feareka ma berekaisi. Ibake Godibairo daiwere we ma irauaiai ukaisi.   
\p
\v 58 Enoba naiyemuku, buna ukaada enare ara uaweke imukeka owere owere da uaweke Godinu waiya ukenewaa uaweke i ari eno mane ukeibiawe. Godinu waiya ufoisaie irauaiaiba ibake Godima ya moko mafiaku.   
\c 16  
\s1 Godinu wake naukaisa orou unu koreka oferenibake wei wake  
\p
\v 1 I Diudia orofaro Godinu wake naukaisa oroubake i oi makeka wake wemaro ya yaisina nauawe. I Gareisia orofaro ibaisa oroubake we wake enaenari yabake nono weakune.  
\v 2 I wakeye eno, i fura kawama odo, Sanide odo odoro ya yaisina yanu ofereni odeka oi ode bou uawero ibifi. Godima ya unu korakunero yabairo oi ibinuba ibake ofereni oi i ari eno odiawero ibifi. Ewa furo eno ufoisaie na famauro oi da odifoisa.  
\v 3 Iro famauke owaowa yanamauke i owaowaini oini yanu imukaro imufoisaro enaenari sifekuro efoisa irau oroubairo mamiauke we odaimiauro i Derusaremu goiro Godinu wake naukaisa oroubairo i oi mafisane waure anifeisa.  
\v 4 Yanu arara naini anifene wefoisaie naini kowede anifeisi.   
\s1 Foru danu ararae anifike Korinida goi orou efiane wei wake  
\p
\v 5 Nama yabairo aareka wake wemaro ya yaisina nauawe. Nae Masadonia orofaro animane ibake weakune. Masadonia orofaro animauke iroma yabairo yadai fare aimauke animau.  
\v 6 Yabairo yadai famauke odo keuaisa ibimane wemauie buaru furo obi makeifeku manabe yaisina yabairo yaini demuiro ibifeisi. Yabairo ibeebe iroma medimauke animane wemauie yama na waure aare daabaro odaifokoisaro iroma moi oroofaro animau.  
\v 7 Na arara me yabairo odo demui o odo raara yaini iberoma fare aneka. Nanu ararae yabairo odo keuwere ibeka. Godima eno wefekuie enaenari eno umau.   
\p
\v 8 Yewado Efesa goiro ibimauro Godinu Imumu Irau fare isari i Fenidikosi weaisa odo me sifekuie ewadoma yabairo aamau.  
\v 9 Godima nanu waiya daaba yewado ma iwoka unaraba ibake Godinu wake wenewaa ukakunero yewa Efesa goi orou moibaima naukaisaroma nono ibaibake moi eme keuwerema naini wasai ukaisa.   
\p
\v 10 I moi mi Dimodi dawama yabairo fafekuie dawa Godinu waiya ukeka miya dawaini naini uwae demuiro waiya ukaisu enoya dawa we kuuawe.  
\v 11 I minu wake nauaweke dawa da mediawe. Dawae yabairo ibifekuro naini nanu naiyemukuini iyae dawa yawofeisiba ibake dawa yama aare daabaro odaiforo irauaiai aafine ibake weakune.   
\p
\v 12 Nama moi mi danu ibiye Aforasi dawabairo eno we, i Korinida goi oroubairo aini Godinu wake naukaisa orouini demuiro aniawe eno we. Eno weroma nono ie Godinu arara me ibake dawae yabairo aare daui. Nono dubuenaro danu aafine imufekuie yabairo idua aare fafeku.   
\s1 Dubuena kai we iifa ukekabake wei wake  
\p
\v 13 Erenewaa uforo! Yanu Godi imukeka imuka ma ara uaweke ia da siaweke buna uawe.  
\v 14 Aneme aneme ukaadae imukari ukaada ufone weakune.   
\p
\v 15 Naiyemuku, nanu wake nauawe. Ya iwoka Sidefanasini danu awekaini emenu amarakuini emuama Akeiya orofaro emuako Godinu wake nauke imuke eno ukeibisa. Enoba awoenae emua Godima we murie orou unu korakuneka, ibai ya iwoka sinaisa.  
\v 16 Emuae eno ukaisaba ibake nanu ararae emuaini i Godinu wake naukaisa orou emuaini i waiya demuiro ukaisa orouini emenu wake naufoke unu kofiakane ibake weakune.   
\p
\v 17 Sidefanasini Fodinasini Ekeikasini emuae nabairo fakaba ibake emuabake rooro ukakune. Ya Korinida goi orou yae nabairo fare mero iro ibinisaba ibake i orouma yanu ibeka orofa munaada na unu korakuneka.  
\v 18 I orouma ya Korinida goi oroubake unu koreibakuneka enaenari na unu korakunekaba ibake yaini naini iyanu imuka irauaiai sinaisi. Enoba yama i orou emuabake irauaiai oroua eno wefone weakune.   
\p
\v 19 I Eisia orofa imusu imusuro Godinu wake naufisane fare ku sianeibisa orou yaisina yabairo emuama arie wake we odaisaisa. Akuiraini danu aweka Fasiraini emenu uwararo fare Godinu wake naukaisa orouini emua yaisina iyanu Dai Waria Mi Yesu Kerisonu ibiroma arie wake yabairo weada we odaisaisa.  
\v 20 Yewado ibaada Godinu wake naukaisa orou yaisina emuae yabairo arie wake weada we odaisaisa. Enoba ya Godinu wake naukaisa orou yaisina fo ufiakaisaie arie wake weada emua wana mamiyakawe.   
\p
\v 21 Na, Foru, nama yewa arie wake nanu wanama owaowa yanake odakune.   
\p
\v 22 Aina mima iyanu Dai Waria Mi Yesu Keriso imukari dakakuke danu imuka yaisina iyanu Dai Waria Mibairo ibe dakakuie Godima dawa we ma merama ufeku. Nono nanu ararae iyanu Dai Waria Mi sabu fafine weakune.   
\p
\v 23 Iyanu Dai Waria Mi Yesu Kerisoma yabake imukari ukaada unu kofiane ibake weakune.   
\p
\v 24 Ya yaisinabake imukari ukakunero nanu imuka yaisina yabairo ibinu. Enoba i wakeye Yesu Kerisonu ibiroma weakune. Nanu wake idua me sininu.