\id 2TI  
\h 2 Timotius 
\toc1 Naiꞌ Paulus in surat no nuan neu in partei naiꞌ Timotius 2 Timotius 
\toc2 2 Naiꞌ Timotius 
\toc3 2Tim 
\mt2 Naiꞌ Paulus in surat no nuan  
\mt2 neu in partei naiꞌ Timotius  
\mt1 2 Timotius  
\c 1  
\s1 Tabe ma haan buseet  
\p
\v 1-2 Timotius, atoin reko!  
\p Surat reꞌ ia naꞌko au, naiꞌ Paulus kau, reꞌ Uisneno neikn On anruur kau he ꞌjair Yesus Kristus In haef. Sin nreek haefan kau he ꞌnao utoon rasi nmatoom nok ꞌmonit reꞌ batuur, reꞌ Uisneno nbaꞌan he nfee je neu areꞌ apirsait ein neun Yesus Kristus.  
\p Timotius! Ho on reꞌ au aanh aa kuuk. Onaim au ꞌonen he hit Amaꞌ Uisneno, ma hit Usiꞌ, Yesus Kristus, anneek ko, nakriraꞌ Sin neek reok goe neu ko, ma nfee ko ꞌmonit ambi mamut, rameꞌ es nok es, ma taininaꞌ.\x + \xo 1:1-2 \xt Haef ein sin Retaꞌ 16:1\x*   
\s1 Naiꞌ Paulus antoit makasi neu Uisneno  
\p
\v 3 Au ꞌonen fai-manas ma ꞌteek ko. Au ꞌtoit makasi piut-piut ꞌeu Uisneno, natuin ho mutuin Ee piut. Au ꞌtuthae Je nok neek akninuꞌ, on reꞌ hit beꞌi-naꞌi sin antuthae Je.  
\v 4 Au umnau, oras hit tbaits ok neno naan, ho mkae mpin-pinus. Etun au ꞌroim he uteef aꞌtein ꞌok ko, maut he au ꞌmariin.   
\p
\v 5 Au umnau neno naan, oras ho mmurai mpirsai batuur-batuur meu Usif Yesus. Rais pirsait human on reꞌ naan, naꞌuu ma naꞌbaaꞌ nain naꞌko ho beꞌi bi Luisa, ma ho ainaꞌ bi Yunika in nekan. Ma au aꞌtebes amsaꞌ ꞌak rais pirsait human on reꞌ naan anmoin et ho nekam amsaꞌ.\x + \xo 1:5 \xt Haef ein sin Retaꞌ 16:1\x*   
\s1 Naiꞌ Paulus antoit he naiꞌ Timotius anpaek manoef ma mahinif reꞌ Uisneno nfee ne sin  
\p
\v 6 Neno naan, oras au ꞌait au ꞌniimk ein ma ꞌtao sin ꞌeu ko, rarit au ꞌonen aꞌteek ko, oras naan Uisneno ntao ko manoef ma mahinif he ho bisa mmeup meu Ne. Onaim oras ia, au ꞌtoit ko he munaobaꞌ mufaniꞌ ho manoef ma mahinif naan.  
\v 7 Fin Uisneno In Asmanan ka nmoeꞌ kit fa he tjair amtaus. Mes In nmoeꞌ kit atjair tuaf-tuaf reꞌ naꞌbeiꞌ ma npirsai in tuan, reꞌ anmaneek nahiin, ma nafreu nahiin in tuan ee rek-reko.  
\v 8 Onaim kais mumaeb om he muꞌuab anmatoom hit Usiꞌ. Ma kais mumaeb om natuin anhukun kau et bui. Au ꞌtaam bui reꞌ ia, natuin au ꞌtuthae hit Usiꞌ. Onaim karu ho mutoon Rais Reko naan ate, ho ro he mubarab ho tuam aan he musaah susat-maꞌneꞌat on reꞌ hai. Karu ho mupein susat-maꞌneꞌat on reꞌ naan, Uisneno of anhaꞌtain ko.   
\q1
\v 9-10 Natuin Uisneno es ansoi nafetin naan kit naꞌko hit saant am penu sin.  
\q2 Ma In es anpiir naan kit he tjair In tuaf ein reꞌ atmoni kninuꞌ.  
\q1 In nakriraꞌ In nekan reok goe neu kit, natuin In nneek kit.  
\q2 Te kaah, hit ka tmoeꞌ tiit fa saaꞌ-saaꞌ es, he hit masoꞌik he ttoup In arekon.  
\q1 Uisneno ka nmoeꞌ pah-pinan ia fa feꞌ, mes In nafeek anrair he nreek Yesus Kristus neem,  
\q2 he nakriraꞌ In nekan arekot, ma nsoi nafetin kit.  
\q1 Rarit Yesus Kristus neem anrair, ma nfei nrair sarit naan,  
\q2 Ma In naseer rasi ꞌmaten in kuasan!  
\q2 Ia njair Rais Reko!  
\q1 Onaim sekau-sekau reꞌ anpirsai neu Yesus Kristus, ka nmate ntein fa goen, mes anmoin piut nok Uisneno.   
\p
\v 11 Etun Uisneno nait kau ꞌjair haef ꞌeu Yesus Kristus, he au utoon In Rais Reko, ma unoniꞌ sekau-sekau nbi mee-mee.\x + \xo 1:11 \xt 1 Naiꞌ Timotius 2:7\x*  
\v 12 Rasin reꞌ naan ok-okeꞌ nmoeꞌ kau mꞌes naꞌ au upein ꞌhaꞌmuꞌit et bui ia in nanan. Mes au ka umaeb ok fa! Natuin au uhiin sekau es reꞌ au ꞌpirsai. In es reꞌ Usif Yesus. Ma au uhiin namneo-namneo ꞌak In es reꞌ nanaꞌat kau mepu reꞌ ia, In es reꞌ anpafaꞌ ma npanat mepu reꞌ ia, ma In es reꞌ anhaꞌtain kau he au bisa unaob mepu reꞌ ia, tar antea In nkoen On anfain neem.  
\v 13 Onaim mutuin nai ꞌtopeꞌ nbi ꞌmonit naꞌko noniꞌ amneot, reꞌ au ukriraꞌ sin ꞌeu ko. Karu ho mpirsai piut-piut, ma mneek sekau-sekau, ho mutoon ma mukriraꞌ mak ho mmafuut mok Yesus Kristus.  
\v 14 Uisneno nanaꞌat anrair aꞌmuꞌif maꞌosaꞌ huum es et ho ꞌnimam, es reꞌ noniꞌ arekot amneot. Onaim ampanat murek-rekoꞌ aꞌmuꞌif reꞌ naan! Ampaek Uisneno In Asmaan Akninuꞌ reꞌ et hit nekak, maut he In nturun ma nbaab ko, he mpanat aꞌmuꞌif naan rek-reko.   
\s1 Naiꞌ Onisiforus anturun naiꞌ Paulus anbi bui  
\p
\v 15 Ho of amneen amrair nak naiꞌ Figelus ma naiꞌ Hermogenes, sin atoin sonaꞌ naꞌkon propinsi Asia\f + \fr 1:15 \ft Propinsi Asia naan, oras ia njair Pah Turki in pasaꞌ neon-teas.\f* sin nasaitan kau goen.  
\v 16-18 Mes naiꞌ Onisiforus ka on fa naan. In ka nasaitan kau fa. Ho muhiin kuum, oras au ꞌbi kota Efesus feꞌ, in nturun ma nbaab kau piut. Oras ia, in natua goen et kota Roma ia. Oras in neem antea, in naim kau neu-mneem anbi mee-mee. Namuni te, in nateef nok kau nbi bui. Mes in ka namaeb on fa. Fani-fani in neem anbi bui ia, ma nhaꞌtain au nekak.  
\p Onaim au ꞌonen ma ꞌbaiseun ꞌeu Uisneno he nakriraꞌ In nekan arekot neu naiꞌ Onisiforus nok nain in nonot-asar sin. Anbi neon amsoupt ii te, oras Uisneno nafeek mansian ein sin rasin, au ꞌharap ma ufneek he karu reko te, Uisneno nafeek rais arekot neu naiꞌ Onisiforus sin.   
\c 2  
\s1 Hit reꞌ atuinaꞌ Kristus, ro he tmoin on reꞌ soraurs ein reꞌ natniin sin aꞌnakat  
\p
\v 1 Timotius, au aan nekaꞌ! Yesus Kristus naan, Atoin neek reko. Oras ia, ho mmafuut mok Ne, ma In nabarab he nhaꞌtain ho nekam. Onaim ho ro he mtoup goah!  
\v 2 Unuꞌ te, au unoniꞌ ko ꞌbi too mfaun ein sin humak ma sin matak anmatoom nok Uisneno In raan aꞌhonis reꞌ amneot. Onaim oras ia, au ꞌtoit ko, he areꞌ saaꞌ-saaꞌ reꞌ ho mneen amrair sin naꞌko kau, ho meik sin ma mnao munoniꞌ mtein sin meu tuaf-tuaf reꞌ mapirsaꞌi. Tuaf ein reꞌ naan, ro he nmanoen he nanoniꞌ ntein tuaf bian.   
\p
\v 3 Hit ar-arkit reꞌ ia, tahuum on reꞌ Yesus Kristus In soraurs ein. Onaim hit ar-arkit tsutai haꞌmuꞌit on reꞌ In. Natuin ho reꞌ naan, soraur reok goes, ho ro he msutai ho sapaam.  
\v 4 Sorarus reꞌ nanaob in mepu, ka nheu-heu gon fa neu urusan bian anteniꞌ. Nok ranan naan, in bisa nharineb in aꞌnakat.   
\p
\v 5 Tait iꞌtopeꞌ ꞌtetaꞌ naꞌko mariꞌut. Karu he tmariuꞌ tok, ro he tatuin mariꞌut naan in atoran. Mes karu ka tatuin fa te, of napoitan kit, ma ka tapein fa mnisat. On naan amsaꞌ, karu he tanaob Uisneno In mepu, ro he tatuin In atoran.   
\p
\v 6 Amkius atoin tani msaꞌ. In nmeup maꞌtaniꞌ anbi in rene. Onaim in es reꞌ annaben nahuun neu in reen je in afan.  
\v 7 Mutenab murek-rekoꞌ aꞌtoep ein feꞌe na. Uisneno of namnaub ma natoon sin aꞌmoufk ein neu ko.   
\p
\v 8 Mutenab murek-rekoꞌ Yesus Kristus. In reꞌ naan, usif naiꞌ Daut in sufan-kaꞌun. In nmaet, mes Uisneno namonib nafaniꞌ nrair Je. Naan anjair Rais Reko, reꞌ au ꞌeik je ma utoon ee nbi mee-mee.  
\v 9 Natuin au utoon Rais Reko naan, es naꞌ au upein maꞌneꞌat ia. Saaꞌ antein sin nfuut kau npaek korenit, nahuum on reꞌ au reꞌ ia atoin maufinu. Mes sin ka naꞌbeꞌin fa he nfutuꞌ ma nkorenit Uisneno In Rais Reko.  
\v 10 Onaim au ubarab au tuak ii he usaah kuuk maꞌneꞌat humaꞌ-humaꞌ. Asar Uisneno In tuaf ein reꞌ In npiir naan sin naan, napenin saok sanat ma rasi ꞌhonis. Fin Uisneno of nait naꞌratan sin piut, natuin sin antaam anjarin Yesus Kristus Iin na.  
\v 11 Uab ein reꞌ ia, ro batuur:  
\q1 “Karu hit ttoup tak, Kristus anmate nsenuꞌ ma nsekaꞌ kit,  
\q2 naan on reꞌ hit tmaet tasaitan ꞌmonit amnaaꞌ,  
\q2 Rarit hit of atmoin tabua tok Ne msaꞌ.   
\q1
\v 12 Karu hit taran ma ttahan atbi maꞌneꞌat,  
\q2 hit of atnaaꞌ aprenat tok Ne msaꞌ.  
\q1 Mes karu hit tasuan Ee,  
\q2 In of nasuan kit imsaꞌ.\x + \xo 2:12 \xt Naiꞌ Mateos 10:33, Naiꞌ Lukas 12:9\x*   
\q1
\v 13 Maski hit ka taꞌkiiꞌ fa,  
\q2 mes In naꞌkiiꞌ piut,  
\q3 natuin In ka bisa napoi fa. In naꞌuab saaꞌ ate, In nmoeꞌ natuin ee.”   
\s1 Ameput reꞌ Uisneno nboꞌis  
\p
\v 14 Tius! Mumnaub apirsait ein, he sin kais annikan rasin reꞌ ia ok-okeꞌ. Amreek sin ampaek Uisneno In kanan, he sin nasnasab uab ein reꞌ anmatoenaꞌ rasi nmatoom nok uab tuuk es in aꞌmoufun. Rasin naan ka maꞌafaꞌ fa. Suma nareꞌu haa aneent ein sin teenb ein.  
\v 15 Maim ranan rek-reko he mmoeꞌ ho tuam aan on reꞌ ameput reꞌ masoꞌik anbi Uisneno. Tuaf on reꞌ naan, kais namaeb on, natuin in nanaob in meup goe nok rek-reko. Ho ro he mjair tuaf reꞌ munoniꞌ namneo goah anmatoom nok Uisneno In Kabin ma Prenat. Fin In Kabin ma Prenat naan, ro namneo!  
\v 16 Muꞌrobaꞌ ho tuam aan muꞌko uab ein reꞌ ka maꞌuꞌu fa, ma muꞌko uab ein reꞌ ka neik fa hormaat neu Uisneno. Natuin rasin naan anmoeꞌ mansian ii nmaufiun piut-piut.  
\v 17 Sin uab maufiun ein naan annoman nahuum on reꞌ menas es, reꞌ anteek ee te nak, kanker. Naiꞌ Himenius ma naiꞌ Filetus sin uabk ein on reꞌ naan!  
\v 18 Sin noink ein ansanan. Sin nak, atoin amaets ein, anmonin nfain een. Mes naan ansaan! Nok ranan naan, sin nbeon nrarin naꞌkon noniꞌ amneot. Saaꞌ-saaꞌ reꞌ sin nanoniꞌ sin naan, nareuꞌ tuaf bian sin neek pirsait.   
\p
\v 19 Mes aꞌsukif reꞌ Uisneno nateke nrair je naan, namkeis. Anbi ꞌsukif naan matuꞌi mnak, “Uisneno nahiin narek-rekoꞌ In nonot-asar sin”, ma “Sekau-sekau reꞌ naꞌruriꞌ ma naꞌbees neu Uisneno, ro he naꞌrobaꞌ in tuan ee naꞌko maufinu.” Aꞌsukif naan, es reꞌ Uisneno Iin na.\x + \xo 2:19 \xt Surat Sensus 16:5\x*   
\p
\v 20-21 Tait iꞌtopeꞌ anbi atoin amuiꞌt ein sin uimn ee. Anbi naan, anmuiꞌ bareꞌ humaꞌ-humaꞌ. Bian anmoeꞌ sin naꞌkon noni mnatuꞌ ma bian naꞌkon noin mutiꞌ. Mes bian naꞌkon hau ma afu ꞌkere. Baerꞌ ein reꞌ mamasaꞌ, uim tuaf ee npaek sin nbin fesat koꞌu. Mes baerꞌ ein reꞌ ka mamasaꞌ fa, uim tuaf ee namaeb on karu in npaek sin nbin too mfaun ein sin maatk ein. On naan amsaꞌ mansian ii. Karu nmuiꞌ tuaf naꞌrobaꞌ in tuan ii naꞌko maufinu, in on reꞌ baer mamaas ein. Uim tuaf ee anmariin he npaek je, natuin in mapakeꞌ he nmeup reko humaꞌ-humaꞌ.   
\p
\v 22 Muinf ein bisa nmoufun rabah natuin sin neek roimt ein. Mes ho ro he mpanat ho tuam aan rek-reko, kais mutuin ho neek roimt aan. Maim meu ꞌmoeꞌ reko piut-piut. Ampirsai piut meu Uisneno. Ammoni mbi manekat, rais rameꞌ ma mamut mok tuaf bian. Areꞌ apirsait ein neu Uisneno, reꞌ anmonin nok neek akninuꞌ naan, sin nromin he nmoꞌen rais reko piut-piut. Onaim Timotius, ho ro he moes aan sin!  
\v 23 Au utoon ufaniꞌ ko sin! Kais amseitn om he mnao mmatoenaꞌ rasi-rasi reꞌ ka maꞌuꞌu fa. Natuin rasin naan suma neik ki meu matoes ma mabanat.  
\v 24 Ameput neu Uisneno ka nabeiꞌ fa he njair amatoes. Mes sin ro he nneek maꞌnuran nok too mfaun, nanoniꞌ nahinin, ma nneek amnaun neu amatoes ein.  
\v 25 Sin ro he natuuk reko neu tuaf-tuaf reꞌ biasa nraban. Nok ranan naan, karu reko te, Uisneno naꞌbaniꞌ sin neek ein ma naꞌpisan, rarit sin ntoup saaꞌ-saaꞌ reꞌ arekot amneot.  
\v 26 Nok ranan naan, sin bisa naꞌteꞌun sin neek ein antein, rarit sin nasoitn ok naꞌko niut reuꞌf ein sin aꞌnaak kouꞌ goe, reꞌ anfuut sin he natuin in roimn ee.   
\c 3  
\s1 Anbi oras neon amsoput, mansian ii in aꞌmoin ii on reꞌ mee?  
\p
\v 1 Timotius! Oras antea pah-pinan ia in neon amsoupt ein ate, in suust ein amfaun ii kah een. Au utoon ꞌain ko on reꞌ naan.  
\v 2 Mansian ii of namnau nanesib sin tuak ein, ma nsinmaakn ahaa roit. Sin nabeꞌob sin tuak ein, ma nkanaꞌpaar biak ein, naꞌuab naꞌreꞌuf tuaf bian, ka nromin fa he natniin amahoint ein, ka ntoit nahinin fa makasi, ka atoup noniꞌ fa, ka nroim nain fa rais Uisneno,  
\v 3 ka nmaneek nahinin fa, ka nromin fa he naraem ok es nok es, sin nromin he naꞌmunuꞌ, ka ntahan nabeiꞌ fa sin tuak, maufinu bainesiꞌ, ka nromin fa rais reko,  
\v 4 anromin he naꞌsosaꞌ sin aok-biak ein, natenab paar aah, nmoeꞌ jok on ahinit, anromin he natuin sin neek romik anneis naꞌko Uisneno In romin.  
\v 5 Sin anmoeꞌ jok on reꞌ anaob rais pirsait, mes ruman. Uisneno In kuasan ka natua fa nbi sin neek ein. Kais mubnoon reko mok tuaf-tuaf on reꞌ naan!   
\p
\v 6 Tuaf-tuaf on reꞌ naan antaman neu es in umi, nok humaꞌ moeꞌ, he nfuir bifee neek aꞌoert ein, ma rabah ate napein kopoꞌ. Bifeen on reꞌ naan, sin aꞌmoink ein anroim ma nbaun sanat naꞌtuup, ma nmonin natuin sinmakat ma neek komat humaꞌ-humaꞌ.  
\v 7 Sin nneen tunggur feꞌu reꞌ neem nanoniꞌ rais feꞌu, ma sin natun-tuin ein aah. Mes sin ka ntai nahinin fa, mee es reꞌ antoom, ma mee es reꞌ ansaan.  
\v 8 Ho mumnau retaꞌ anmatoom nok naiꞌ Yanes ma naiꞌ Yamres,\f + \fr 3:8 \ft Kanaf ‘Yanes ma Yamres’ ka matuꞌi fa et Surat Manbaꞌan Amnaaꞌ. Mes anmuiꞌ atoin ahinit bian nak, of oniꞌ sin nua sin reꞌ naan, atoin araut naꞌko pah Masir reꞌ anraban kaꞌo Musa oras in neik too Israelas anpoin naꞌkon pah Masir. Amrees retaꞌ et surat \ft \+it Anpoin naꞌko Pah Masir\+it* 7:11.\f* aiꞌ kaah? Oras naan, sin nraban kaꞌo Musa. Tunggurun reꞌ oras ia, sin humaꞌ meseꞌ on reꞌ sin. Sin nraban noniꞌ-taruꞌ amneot. Sin teenb ein namreꞌun, ma sin pirsait ein, anbeon.  
\v 9 Tunggur poi on reꞌ naan, ka neu he ntahan fa ꞌroo. Ka ꞌroo-ꞌroo fa te, too mfaun ii nahiin sin moonk ein! Nahuum on reꞌ unuꞌ te, too mfaun ein nahiin naiꞌ Yanes ma naiꞌ Yamres sin puta-kriu ngguin.   
\s1 Amnaaꞌ muher-heran noniꞌ-taruꞌ reꞌ ho mtoupu mrari  
\p
\v 10 Tius! Ho muhini mrair au ꞌmoink ii ok-okeꞌ. Ho muhini mrair areꞌ saaꞌ reꞌ au unoniꞌ sin. Ho muhiin au sarit. Ho muhiin saaꞌ reꞌ au ꞌpirsai. Ho miit kuum au neek sabaar ꞌeu too mfaun, ma au maneek ii ꞌeu sin. Ma ho muhini msaꞌ mak au ꞌaran ma ꞌsabaar au tuak ii.  
\v 11 Ho muhini msaꞌ mmak sin nteir-hae kau, ma nasahab kau haꞌmuꞌit ma maꞌneꞌat humaꞌ-humaꞌ. Au upein haꞌmuꞌit ma maꞌneꞌat on reꞌ naan, anbi kota Antiokia, Ikonium, ma Listra. Mes Uisneno nsoi nafetin kau naꞌko rasin naan.\x + \xo 3:11 \xt Haef ein sin Retaꞌ 13:14-52, 14:1-7,8-20\x*  
\v 12 Batuur, areꞌ apirsait ein neu Yesus Kristus reꞌ nromin he nmonin nok neek akninuꞌ natuin Uisneno In romin, ro tebes atoniꞌ of anhaꞌmuiꞌ sin.  
\v 13 Antutan ntein, amaufiunt ein ma aputa-kriu ngguin, anmoꞌen rais maufinu piut-piut. Sin napoi natupaꞌ biak ein. Te kaah, tuaf bian napoi naan sin imsaꞌ.   
\p
\v 14 Mes ho ro he mnaaꞌ muher-heran noniꞌ-taruꞌ reꞌ ho mtoup murair sin. Ma saaꞌ reꞌ ho mpirsai je naan, ro he mutuin ee piut. Natuin, naan es reꞌ amneot! Ho muhiin batuur, sekau es reꞌ nanoniꞌ ko rasin naan. Ho bisa mpirsai sin!\x + \xo 3:14 \xt 2 Naiꞌ Timotius 1:5, 2:2\x*  
\v 15 Anmurai naꞌko ho aanꞌ-anaꞌ feꞌ, ho mtoupu mrair noniꞌ naꞌko Uisneno In Suur Akniunꞌ ee in afan. Suur Akninuꞌ naan in afan, es reꞌ natoon raan aꞌhonis. Fin karu ho mpirsai meu Yesus Kristus, naan anfei ranan he ho bisa mmoni mmafuut mok Uisneno mbi sonaf neno tunan.  
\v 16 Areꞌ saaꞌ-saaꞌ reꞌ matuꞌi et Suur Akninuꞌ naan, ro tebes Uisneno kuun es nanaꞌat sin he mansian ii antui sin. Tuis ein reꞌ naan, mapakeꞌ he: nanoniꞌ tuaf anmatoom nok saaꞌ es reꞌ batuur, nakriraꞌ tuaf ein sin sanat, natuuk nafaniꞌ tua aseket neu raan amneot, ma nanoniꞌ mansian ii he nmonin neno-neno nbin Uisneno In romin.  
\v 17 Nok ranan naan, Suur Akniunꞌ ee, bisa nanokab ma namtisib Uisneno In tuaf ein nok aꞌbeꞌif ma manoef, he sin nanaob ein areꞌ kanan meup arekot.   
\c 4  
\s1 Amnao mutoon Uisneno In Kabin ma Prenat  
\p
\v 1-2 Yesus Kristus of ankoen On anfain neem neu pah-pinan, he naprenat on reꞌ usif. Et amonit ma amates of anhaken nbin In matan, he In nafeek sin rasin. Natuin rasi naan, anbi Uisneno ma Yesus Kristus Sin humak ma Sin matak, au ꞌtoit batuur-batuur ꞌeu ko, he mnao mutoon Uisneno In Kabin ma Prenat. Muꞌneen om piut! Kais mutenab mak, oras reko, aiꞌ kaah. Mukriraꞌ sin, sin sanat, mes mukain sin nok neek sabaar. Amhaꞌtain sin neek ein meik noniꞌ-taruꞌ amneot.   
\p
\v 3 Fin of nokaꞌ-nmeu te, tuaf-tuaf ka nroim fa he nneen noniꞌ-taruꞌ amneot. Sin of naꞌbuaꞌ tunggurun reꞌ bisa naꞌuab ein natuin sin roimk ein, he nharineb sin oras sin nnenan.  
\v 4 Sin nkeeh natau sin ruik ein he ka natniin fa noniꞌ-taruꞌ amneot. Mes sin nneen neu rais retaꞌ ruum-ruum.   
\p
\v 5 Maski on mee-on mee msaꞌ, ho neekm aan ro he natea. Maran ambi haꞌmuꞌit. Amnao mutoon Rais Reko, he tuaf-tuaf anpirsain neun Yesus Kristus. Amtuthae tuaf-tuaf nok neek marine, tar antea mepu naan namsoup. Kais ammepu stenaꞌ-stenaꞌ.   
\p
\v 6 Anmatoom nok au tuak ii te, kais amfairoir kau, natuin au nuut ii he namsoup goen. Au on reꞌ oe nbi kraas, in natꞌoop am he oekꞌ een.\f + \fr 4:6 \ft Oras atoin Yahudis sin nabaarb ein fuaꞌ-turuꞌ anbi Uim Onen Uuf, anmuiꞌ naan fuaꞌ-turuꞌ huum es, reꞌ on reꞌ he nꞌoop ein tua min-kase nbi mei fuat. Naiꞌ Paulus anfee ꞌtopeꞌ nak, in aꞌmoin ee on reꞌ tua min-kase reꞌ natꞌoop anjair fuaꞌ-turuꞌ neu Uisneno.\f*  
\v 7 On reꞌ mnaent ii te, au ꞌaen ma ꞌtea ꞌrair nok reko. Au utuin piut ꞌeu Yesus Kristus, ma ka ꞌteib ꞌiit fa ꞌeu mee-mee.  
\v 8 Oras ia, au ꞌpao-pao rais jes feꞌ. Es reꞌ, kraa-mnatuꞌ reꞌ Usiꞌ napaar ee neu sekau-sekau reꞌ in aꞌmoin ee namneo ma namnoon. Hit Usiꞌ naan, afeek rasi amneot. In ka npiir fa humaf. Antea in oors ate, In of annonaꞌ kau kraa mnatuꞌ naan. Ka neu au ꞌmees fa, mes sekau-sekau reꞌ anneek Ee, ma anpa-pao Goe he nkoen On anfain neem, sin napein akraa mnatuꞌ on naan amsaꞌ.   
\s1 Naiꞌ Paulus anbaꞌan rasi humaꞌ-humaꞌ  
\p
\v 9 Tius! Reko te, uum amkius maan kau rabah feꞌ!  
\v 10 Oras ia, au ꞌmes-mees kuuk. Naiꞌ Kreskes annao nrair et propinsi Galatia. Ma naiꞌ Titus annao nrair et pah Dalmatia. Mes naiꞌ Demas nroim nanesib risan amreꞌut nbi pah-pinan ia, onaim in nnao nasaitan kau. In nnao et kota Tesalonika.\x + \xo 4:10 \xt Kolose 4:14, Naiꞌ Filmon 24, 2 Korintus 8:23, Galatia 2:3, Naiꞌ Titus 1:4\x*  
\v 11 Suma naiꞌ Lukas es reꞌ natua nok kau et ia. Maim maan naiꞌ Markus he nua ki iim buꞌ-buaꞌ. Natuin in bisa nturun ma nbaab kau nbi rasi humaꞌ-humaꞌ nbi ia.\x + \xo 4:11 \xt Kolose 4:14, Naiꞌ Filmon 24, Haef ein sin Retaꞌ 12:12,25, 13:13, 15:37-39, Kolose 4:10\x*  
\v 12 Au ꞌreek naiꞌ Tekikus nnao et kota Efesus.\x + \xo 4:12 \xt Haef ein sin Retaꞌ 20:4, Efesus 6:21-22, Kolose 4:7-8\x*  
\v 13 Karu ho uum ate, kais amnikan he mait meik maan kau au baur mainikin reꞌ au umaik ee et naiꞌ Karpus in umi, et kota Troas. Ma kais amnikan he mait meik au tuis ein naan, anneis-neis reꞌ au ꞌtui sin et pasu.\x + \xo 4:13 \xt Haef ein sin Retaꞌ 20:6\x*   
\p
\v 14 Naiꞌ Aleksander, atuut noin moroꞌ naan, anmoeꞌ maufinu neu kau fani-fani. Maut he nmoeꞌ. Uisneno of es anbaras neu ne, natai nok in aꞌmoꞌen naan.\x + \xo 4:14 \xt 1 Naiꞌ Timotius 1:20, Siit Pures-Boꞌis sin 62:12, Roma 2:6\x*  
\v 15 Ho ro he mpaant om muꞌko atoniꞌ reꞌ naan, natuin natiꞌ te in nraban hit uabk ein.   
\p
\v 16 Oras au ꞌhake ꞌbi afeek rasi he umneob au tuak, ka tiit tain fa tuaf es he nok kau. Sin arsin annaon nasaitan kau. Maut he on reꞌ naan. Maut he Uisneno nnikan nain sin saant ein.  
\v 17 Maski on naan amsaꞌ, mes Uisneno ka nasaitan kau fa. In nhaꞌtain kau, he au bisa unaob In Rais Reko, ma au ka ꞌkuran fa saaꞌ-saaꞌ. Au utoon ꞌeu atoin ein reꞌ ka Yahudis fa, he sin nneen niit Rais Reko naan. Ma Uisneno nafetin anrair kau naꞌko siraak koꞌu.  
\v 18 Ma In of nafetin kau naꞌko rais maufinun ok-okeꞌ. Ma In neik kau nok mamut, rarit nataam kau ꞌeu sonaf neno tunan. Anbi naan, In es reꞌ annaaꞌ aprenat.  
\p Uisneno naan, apinat ma akrahat! Au ꞌpures uꞌnaeb Ee ka natfeek niit fa, tua! Amin.   
\s1 Naiꞌ Paulus natuꞌub in surat  
\p
\v 19 Kais amnikan he mfee tabe ma haan buseet meu bi Priskila,\f + \fr 4:19 \ft Uab Yunani nbi ia, matuꞌi mnak, ‘Priska’. Priska ma Priskila, humaꞌ meseꞌ.\f* ma in mone, naiꞌ Akila. On naan amsaꞌ meu naiꞌ Onisiforus ma in nonot-asar sin ok-okeꞌ.\x + \xo 4:19 \xt Haef ein sin Retaꞌ 18:2, 2 Naiꞌ Timotius 1:16-17\x*  
\v 20 Naiꞌ Erastus natua et kota Korintus. Neon goes ii, au ꞌnao usaitan naiꞌ Trofimus anbi kota Miletus, natuin oras naan in nameen maꞌfenaꞌ.\x + \xo 4:20 \xt Haef ein sin Retaꞌ 19:22, Roma 16:23, Haef ein sin Retaꞌ 20:4, 21:29\x*  
\v 21 Maim ranan he karu reko te, ho uum amtea main ia, oras mainiik ii ka ntaam fa feꞌ. Hit aok-bian abitan ia, esan reꞌ: naiꞌ Ebulus, naiꞌ Pudes, naiꞌ Linus, ma bi Klaudia, ansoun ein tabe ma haan buseet neu ki. On naan amsaꞌ, neu hit aok-bian Kristen bian sin.   
\p
\v 22 Au ꞌharap ma ufneek he Uisneno nok ko piut-piut. Maut he In nakriraꞌ In nekan arekot neu ki arki.  
\q2 On reꞌ naan, tua,  
\q2 Au naiꞌ Paulus kau, tua.