\id 1TI  
\h 1 Timotius 
\toc1 Naiꞌ Paulus in surat ahunut neu in partei naiꞌ Timotius 1 Timotius 
\toc2 1 Naiꞌ Timotius 
\toc3 1Tim 
\mt2 Naiꞌ Paulus in surat ahunut  
\mt2 neu in partei naiꞌ Timotius  
\mt1 1 Timotius  
\c 1  
\s1 Tabe ma haan buseet  
\p
\v 1-2 Timotius, atoin reko!  
\p Tabe ma haan buseet naꞌko au, naiꞌ Paulus kau. Uisneno npiir kau ꞌjair haef ꞌeu Yesus Kristus. Ma hit tharap ma tafneek teu Usif Yesus, reꞌ anfee kit aꞌhonis piut-piut tok Ne, natuin Uisneno nsoi nafetin anrair kit naꞌko hit sanat ma penu sin.  
\p Tius! Ho on reꞌ au aanh aa kuuk, natuin au ururuꞌ ꞌrair ranan he ho mpirsai meu Kristus. Au ꞌonen ꞌeu hit Amaꞌ Uisneno, ma hit Usiꞌ Yesus Kristus, he Sin nakriraꞌ Sin neek rekon ma rais kasian neu ko, maut he ho mmoni mbi mamut, rameꞌ es nok es, ma taininaꞌ.\x + \xo 1:1-2 \xt Haef ein sin Retaꞌ 16:1\x*   
\s1 Ampaant om muꞌko tuaf ein reꞌ nanoniꞌ nsanan  
\p
\v 3 Neon goes ii, hit nua kit tabua tbi kota Efesus. Oras au he ꞌnao ꞌeu propinsi Makedonia, au ꞌak ko he mubaar ambi kota Efesus. Oras naan, anmuiꞌ tuaf reꞌ ntakaꞌnanab Usif Yesus In too sraniꞌ, anpaek noniꞌ reꞌ ansaan ma nbeo. Onaim au ꞌtoit ko, he mnao mukainaꞌ sin, he sin kais nakonob sin noinꞌ ein naan.  
\v 4 On naan amsaꞌ, tuaf ein reꞌ naan anpoirn ein oras parsuum aah, karu sin nnaon ma nmakoin ein penit anbi rais reet poi ngguin. Ma sin nmasau fefan nokn ahaa mapeoꞌ uuf ma ꞌnaof reꞌ ka natfeek niit fa. Rasin on reꞌ naan, suma neik mansian ii nmatoen am anmabanan. Ma ka npaumakab sin fa neun Uisneno ma ka nhaꞌtain fa sin rais pirsait.   
\p
\v 5 Au ꞌfaineek ko he munoniꞌ apirsait ein neu Usif Yesus he nmonin nbin rais manekat nok neek akninuꞌ, tenab amneot, ma nbi neek akteeb kninuꞌ.   
\p
\v 6 Mes anmuiꞌ tungguru bian reꞌ sin ntebi nrarin, ma nait inporin fainekat naan. Rarit sin npoirn ein oras, ma nmasau fefan ma naꞌuab ein tafiꞌ-tafiꞌ.  
\v 7 Sin nakriraꞌ sin tuak ein am nak, sin reꞌ naan tunggurun reꞌ nanoniꞌ kaꞌo Musa in Atoorn ein. Sin natoon ok on reꞌ tunggur koꞌun, mes sin ka nahinin fa saaꞌ reꞌ sin nanoniꞌ sin naan.   
\p
\v 8 Hit arkit tahiin kaꞌo Musa in Atoorn ein naan, reko. Asar hit tanaobaꞌ sin natai nok Uisneno In sarit amneot.  
\v 9 Atoorn ein naan, ka ntui sin fa neu atoin amoeꞌ reko. Mes antui sin neu aꞌnaak fatus, araban aprenat, naꞌroo naꞌko Uisneno, atoin amaufinut, tuaf reꞌ ka nfairoir fa Uisneno, reꞌ anfareꞌ rasi kninuꞌ, aroor atoniꞌ, ma aroor mahoniꞌ.  
\v 10 Atoorn ein naan antui sin neu mansian reꞌ nmakonin tafiꞌ-tafiꞌ, reꞌ anmakoin atoniꞌ nok atoniꞌ, reꞌ anheek naꞌkoroꞌ tuaf he naꞌsekeꞌ tuaf bian he napein roit, reꞌ aputa-kriut, apoit, ma neu tuaf-tuaf reꞌ anraban rais noniꞌ amneot.  
\v 11 Noniꞌ reꞌ amneot ein, neman naꞌkon Uisneno In Rais Reko, reꞌ In nanaaꞌt ee neu kau. Ma Uisneno naan, Uis mapinaꞌ-makrahaꞌ. Mansian ii ro he ntunaꞌ naꞌrat-raatn Ee.   
\s1 Amtoit makasi meu Uisneno, natuin In neek arekot  
\p
\v 12 Au ꞌtoit makasi kouꞌ-koꞌu ꞌeu hit Usiꞌ, Yesus Kristus, natuin In npirsai kau, ma nfee kau ꞌbeꞌif maꞌtaniꞌ he unaob In mepu.  
\v 13-14 Te kaah, unuꞌ te, au es reꞌ ureuk Usiꞌ Yesus In kanan. Au ususab ma ꞌhaꞌmuiꞌ tuaf-tuaf reꞌ natuin In raan aꞌhonis amsaꞌ. Au ꞌteir hae sin. Au ꞌmaufiun on reꞌ naan, natuin oras naan, au ka uhiin ꞌaan fa saaꞌ reꞌ au ꞌmoeꞌ je reꞌ naan, ma au ka ꞌpirsai ꞌeu hit Usiꞌ Yesus Kristus fa feꞌ. Mes In ka nnikan kau fa. In nakriraꞌ In maneekn Ee neu kau.\x + \xo 1:13-14 \xt Haef ein sin Retaꞌ 8:3, 9:4-5\x* Saaꞌ anteniꞌ, In nakriraꞌ In neek reok goe neu kau piut. In nfee kau tetus-athoen he au bisa ꞌpirsai Je nok neek aꞌkiꞌit, ma au bisa ꞌneek sekau-sekau on reꞌ In nneek kau.   
\p
\v 15 Biasa hit tneen uab am nak, “Yesus Kristus neem anrair jen anbi pah-pinan, he nsoi nafetin mansian asaant ein.” Batuur on naan! Naꞌko mansian asaant ein ok-okeꞌ, au es reꞌ amaufinut anneis-neis ji.  
\v 16 Maski au ꞌmaufiunk ii kah een, mes Uisneno nafeek he ka nhukun kau fa. Natuin In he npaek kau ꞌjari ꞌtopeꞌ he ukriraꞌ Yesus Kristus In sabaar ee neu atoniꞌ reꞌ maufiun ii maꞌtain besi on reꞌ au. Nok ranan naan, biak ein reꞌ nmoꞌen sanat amsaꞌ, bisa npirsain neu Ne, henatiꞌ sin bisa nmonin piut-piut nok Ne.   
\q1
\v 17 Pures-boꞌis neu Uisneno!  
\q2 Suma In es reꞌ Uisneno;  
\q3 ka tiit attein fa goen!  
\q1 Usif reꞌ naprenat nabar-baar.  
\q2 In nmoin nabar-baar.  
\q2 In ka nmaet fa.  
\q2 In reꞌ naan mansian ii ka niit Ee fa neik sin matak fuak ein.  
\q1 Areꞌ rais hormaat ma pures-boꞌis sin arahaa neu Ne!  
\q2 tar antea nabar-baar!  
\q3 Amin.   
\p
\v 18 Timotius, au aanh reko! Au he utoon ko saaꞌ-saaꞌ reꞌ ho ro he mmoeꞌ je ma ho mmeup goe. Areꞌ saaꞌ-saaꞌ reꞌ ia, natuin mafefaꞌ kninuꞌ Uisneno sin uabk ein anmatoom nok ho tuam naan. Karu ho mutuin murek-rekoꞌ uab ein naan, ho on reꞌ sorarus reꞌ amakeen reok goes, anraban amreꞌut.  
\v 19 Amnaaꞌ muher-heran ho rais pirsait meu Kristus. Ampanat ho neek akninuꞌ naan piut-piut. Tuaf bian ka nromin fa he natniin hanaf naꞌko sin neek aanꞌ-aanꞌ ee ntein, reꞌ nmoeꞌ sin neek pirsait ein naan namreꞌun, on reꞌ bnao oe, nasrae ma naꞌtutuꞌ niis on anbi faut puutk ein.  
\v 20 Naiꞌ Himenius ma naiꞌ Aleksander sin, aꞌmoeꞌk ein natai nok rasin reꞌ naan. Etun au unaꞌat sin ꞌeu niut reuꞌf ein sin aꞌnakat. Au ꞌmoeꞌ on reꞌ naan, he sin nanoin ein he kais naꞌreꞌuf antein Uisneno In kanan.   
\c 2  
\s1 Karu apirsait ein nabuan ate, ro hit tmoeꞌ on mee?  
\p
\v 1 Nahunu te, au ꞌtoit ki he hi mꞌonen amteek areꞌ too mfaun ein ok-okeꞌ. Karu hi mbaiseun Uisneno te, mtoit Je he In nturun areꞌ too mfaun ein anbin susat. Ma mtoit makasi msaꞌ, natuin In es reꞌ nmoeꞌ rais reko neu sin ok-okeꞌ.  
\v 2 Amteek ambi ꞌoen ein amsaꞌ anmatoom nok uisf ein ma ꞌnaakf ein. Nok ranan naan, hit arkit bisa tmoni tbi mamut, rameꞌ es nok es, ma taininaꞌ natuin Uisneno In romin, ma tmoni tbi raan amneot, on reꞌ tuaf-tuaf reꞌ naꞌbees neu Ne.  
\v 3 Amꞌonen on reꞌ naan ate, reko. Naan anharineb Uisneno reꞌ nsoi nafetin kit.  
\v 4 In nroim he areꞌ too mfaun ein ok-okeꞌ napenin aꞌhonis, ma nahinin mee ja es reꞌ amneot ma amnonot, esan reꞌ:   
\q1
\v 5 Uisneno meesꞌ aah.  
\q2 Ma nmuꞌi haa nete ranan meesꞌ aah, reꞌ narameꞌ Uisneno nok mansian arkit, es reꞌ Yesus Kristus.  
\q2 Naiꞌ Yesus naan, mansian batuur-batuur.   
\q1
\v 6 In nnonaꞌ In tuan ee he nsoi nafetin kit naꞌko hit saant ein ok-okeꞌ.  
\p Nateef nok in oors ate, Uisneno nfei rais reko naan kninuꞌ-kninuꞌ neu areꞌ too mfaun ein.  
\v 7 Rarit Uisneno npiir naan kau ꞌjair In haef, he ꞌnao utoon tuaf reꞌ ka atoin Yahudis fa aꞌbi mee-mee, ma unoniꞌ sin he sin npirsain neu Usif Yesus ma nmonin natuin raan amneot ma amnonot. Saaꞌ-saaꞌ reꞌ au utoon sin reꞌ ia, batuur on naan. Au ka upoi fa, tua!\x + \xo 2:7 \xt 2 Naiꞌ Timotius 1:11\x*   
\p
\v 8 Au ꞌroimk ii on nai: anbi mee-mee, karu hi mibua he mꞌonen ate, hi ro he mitaibaꞌ nekaf es nok es. Kais ammaktoꞌon. Kais ammatoe. Karu hi miꞌaitiꞌ hi ꞌnimam oras hi mꞌonen, hi neekm ein ro he kniunꞌ ein.   
\p
\v 9-10 Bifee ngguin on naan amsaꞌ. Au ꞌroim he sin nꞌator sin tuak ein te, suuk nahuum, ma npaken amsaꞌ seor nahuum. Kaisaꞌ nbagaya he biak ein antarun mataf neu sin, aꞌnaak fuun ein reꞌ ansoiꞌ ma nbuiꞌ sin humaꞌ-humaꞌ, aiꞌ npaken tai maꞌosaꞌ reꞌ ka natuin fa atoran, aiꞌ natoon ok bainesiꞌ nok sin npaken moroꞌ-mutiꞌ ma mutiara sin. Reꞌ nmoeꞌ bifee ngguin namasan naan, es reꞌ neek akninuꞌ, ma sin aꞌmoeꞌk ein rekon. Reꞌ naan es reꞌ natai neu bifee ngguin he naꞌbesan neun Uisneno.\x + \xo 2:9-10 \xt 1 Naiꞌ Petrus 3:3\x*  
\v 11 Karu too srain ein nabuan ma nnenan noniꞌ te, bifee ngguin ntook nokan ma nneen nokan rek-reko anmatoom nok noinꞌ ein naan. Kais taꞌseꞌo ma taꞌroot.  
\v 12 Anbi au te, ka reko fa karu bifee ji nait in tuan ma naprenat atoniꞌ, ma nanoniꞌ sin. Reko nneis bifee ngguin sin neek ein natean ma kais mafeef ein bainesiꞌ.  
\v 13 Fin Uisneno nmoeꞌ naiꞌ Adam nahuun. Rarit, naꞌ bi Hawa.\x + \xo 2:13 \xt Retaꞌ Ahun-hunut 2:7, 2:21-22\x*  
\v 14 Ma ka naiꞌ Adam fa es antoup uab poi nahuun naꞌko niut reuꞌf ein sin aꞌnakat, mes bifee. Anmurai oras naan, mansian ii ntanhai Uisneno In atoran.\x + \xo 2:14 \xt Retaꞌ Ahun-hunut 3:1-6\x*  
\v 15 Maski on naan amsaꞌ, mes bifee ngguin napenin aꞌhonis, natuin sin nahoin ein. Asar sin npirsain batuur-batuur neu Kristus, anmonin nbin rais manekat, anmuꞌin neek akninuꞌ, ma sin aꞌmoink ein pantas ma kais anbainesin.\f + \fr 2:15 \ft Atoin ahiint ein anmatoom nok Uisneno In Suur Akninuꞌ nak, “bifee ngguin napenin aꞌhonis, natuin sin nahoin ein” in aꞌmoufn ii esan reꞌ: 1) Anmuiꞌ naan riꞌaan es, es reꞌ Naiꞌ Yesus, reꞌ anfei ranan he areꞌ too mfaun ein napenin aꞌhonis; 2) bi Hawa reꞌ napein rais poi ma nmoꞌe nsaan, mes in es anjair beiꞌ-kaꞌo neu mansian pah-pinan amsaꞌ; 3) bifee reꞌ anmoin nok atoran ka nmaet fa oras nahoniꞌ (mes aꞌmoufuf reꞌ ia ka maꞌtaniꞌ fa).\f*   
\c 3  
\s1 Tuꞌin antoom neu aꞌnaak jemaꞌat  
\p
\v 1 Saaꞌ reꞌ biak ein naꞌuab sin naan batuur, nak, “Tuaf reꞌ he njair aꞌnaak jemaꞌat, in npiir naan kuun meup reok goes.”  
\v 2 Aꞌnaak jemaaꞌt ii, ro he tuaf reꞌ in kaan ee reko. In ro he naꞌkiꞌi nbi matsaos nok bifee meseꞌ. In ro he ntahan nahiin in tuan, in neekn ee ro natea, atoniꞌ anhormaat ee, antoup amnemat anbi in umi, ma nanoniꞌ nabeiꞌ tuaf bian.  
\v 3 Kais tua amauf raru, ma kais amabanat. Tuaf reꞌ batuur ii, es reꞌ: atoin neek maꞌnuraꞌ, naim nahiin rais haran nekaf, ma ka nsinmakan fa roit.  
\v 4 In ro he nꞌator nahiin in uim je nanan. In aanh ein ro he natniin ee ma nhormaat ee.  
\v 5 Fin karu in ka bisa nꞌator fa in uim je naan ee te, nok ranan mee he in bisa nꞌator Uisneno In jemaaꞌt ein?   
\p
\v 6 Reko nneis ampiir maan tuaf reꞌ in tenab, moꞌet ma taos namnasi nbi Kristus. Kais misaeb ma minaib maan aꞌnaak jemaꞌat naꞌko tuaf reꞌ feꞌ natuin Usif Yesus; kais-kaisaꞌ in naꞌnaeb on. Kais-kaisaꞌ Uisneno nteeꞌ je, on reꞌ Uisneno nteeꞌ niut reuꞌf ein sin aꞌnaak koꞌu.  
\v 7 Karu hi he misaeb tuaf es he njair aꞌnaak jemaꞌat, maim tuaf reꞌ atoniꞌ bian reꞌ ka npirsai fa nhormaat ee msaꞌ. Nok ranan naan, in ka namaeb on fa. Ma niut reuꞌf ein sin aꞌnaak kouꞌ goe, ka bisa nakreo namouf goe fa.\x + \xo 3:7 \xt Naiꞌ Titus 1:6-9\x*   
\s1 Tuaf reꞌ he nturun aꞌnaak jemaꞌat  
\p
\v 8 On naan amsaꞌ, neu tuaf reꞌ he nturun aꞌnaak jemaꞌat. Sin arsin reꞌ naan, ro he tuaf reꞌ kaan ee nfoo mein, tuaf reꞌ ka napoi nahiin fa, tuaf reꞌ ka nbukae fa raur mafu, ma kais tuaf reꞌ naah mateꞌ.  
\v 9 Sin neek ein ro he kniunꞌ ein, ma sin ro he nnaaꞌ naher-heran noniꞌ reꞌ Uisneno nfee je ma nakriir ee neu kit, too apirsait ein.  
\v 10 Amparikas sin aꞌmoink ein ma sin meupk ein rek-reko. Karu ka mipein fa sin saant ein ate, naꞌ mait sin anjarin tuaf reꞌ he nturun aꞌnaak jemaaꞌt ein.   
\p
\v 11 On naan amsaꞌ sin feek ein.\f + \fr 3:11 \ft Uab Yunani nbi reꞌ ia, ntui nak, γυναῖκας (\ft \+it gunaikas\+it* naꞌko γυνή \+it gunei\+it*), in aꞌmoufn ii nak: 1) ‘sin feek ein’, aiꞌ 2) ‘bifee’. Atoniꞌ bian nak, uab naan in aꞌmoufn ii 3) bifee reꞌ naꞌnaaꞌ jemaꞌat. Mes aꞌmoufuf reꞌ no teun ii reꞌ ia, uab Yunani npaek kata es anteniꞌ (mkius \+it Roma\+it* 16:1).\f* Bifeen naan sin aꞌmoink ein ro he namneon ma namnonon. Kais bifee aroob-raꞌut reꞌ nareuꞌ biak ein sin kaan foo menin. Sin ro he ntahan nahiin sin tuak ein, ma tuaf bian anpirsai sin imsaꞌ.   
\p
\v 12 Tuaf reꞌ he nturun aꞌnaak jemaaꞌt ein, ro he atoniꞌ reꞌ naꞌkiiꞌ naheer anbi matsaos nok bifee meseꞌ. In ro he nꞌator nahiin in uim je naan ee nok reko, ma nanoniꞌ nahiin in aanh ein amsaꞌ.  
\v 13 Tuaf reꞌ njair atutaꞌ-abhaꞌet neu jemaꞌat rek-reko, ro tebe biak ein of anhormaat sin. Ma sin nabrain ma ka namtaun fa he naꞌuab ein anmatoom nok sin rais pirsait neu Yesus Kristus.   
\s1 Hit rais pirsait ii in aꞌsukin  
\p
\v 14-15 Tius! Au ꞌharap ma ufnekan he kreoꞌ goes anteniꞌ te, au ꞌeit iꞌmakius ko. Karu au uꞌbakeꞌ kreꞌo te, surat reꞌ ia of antea nahuun. Au ꞌtui surat ia, he utoon ko mꞌak, Uisneno In aasr ein ro he nmonin on reꞌ mee. Kais amnikan, Uisneno naan, Uis Amonit. Iin na nahuum on reꞌ umi reꞌ nahaek ee nbi fatu ꞌsukif ma nii ainaf reꞌ maꞌtaniꞌ. Nok ranan naan, sin ro he natnaat Uisneno In noniꞌ amneot.   
\p
\v 16 Uisneno nfei nrair rais maꞌnifaꞌ koꞌu naꞌko hit rais pirsait. In aꞌsuikn ii, on nai:  
\q1 Kristus neem anrair jen anbi pah-pinan ia,  
\q2 anpaek humaf ma masaf mansian on reꞌ hit.  
\q1 Uisneno In Asmaan ee msaꞌ nakriraꞌ bukti mnak,  
\q2 Naiꞌ Yesus naan, Tuaf neek amneꞌo ma amnonot.  
\q2 Ma Uisneno In ameupt ein sonaf neno tunan niit Ee msaꞌ.  
\q1 Uisneno nait nasaeb Ee ntaam neu sonaf neno tunan,  
\q2 rarit nanaib ma ntunaꞌ naꞌraatn Ee.  
\q1 In reetn ee nasiin on ma nabeon on anfuun am nateef uuf ma pah anbi pah-pinan ia msaꞌ.  
\q2 Anbin mee-mee anbi pah-pinan ia, tuaf anpirsain anrair Je goen.  
\p Hit tpirsai on reꞌ naan, tua!   
\c 4  
\s1 Ampaant om miꞌko tuaf-tuaf reꞌ nanoniꞌ fuareur goah neu too sraniꞌ  
\p
\v 1 Mes Uisneno In Asmaan ee natoon maat-maat am nak, too sraniꞌ bian of antitar saaꞌ reꞌ hit tpirsai. Rarit sin natuin asmanaf bian reꞌ nasekeb mansian, ma natuin niut reuꞌf ein sin noink ein.  
\v 2 Tuaf reꞌ neem ma nanoniꞌ on reꞌ naan, naꞌuab ate, nasuir nok ꞌmoꞌet. Puta-kriu gui in tuan! Tuaf ein naan sin nekak naank ein, nameisꞌook anrarin.  
\v 3 Sin nanoniꞌ bifee-atoniꞌ he kais anmatsaon. Sin nanunin amnahat humaꞌ-humaꞌ. Te kaah, Uisneno es reꞌ anmoeꞌ mnaaht ein naan. In nmoeꞌ mnaaht ein naan, he karu apirsait ein nbukaen, sin ntotin makasi neu Ne. Fin sin nahinin neu rais saaꞌ es reꞌ batuur.  
\v 4 Areꞌ saaꞌ-saaꞌ reꞌ Uisneno nmoeꞌ sin naan, ro reko. Onaim kais minuin humaꞌ-humaꞌ. Mansian ein ro he ntoup sin ma antotin makasi neu Uisneno.  
\v 5 Fin hit tahiin tak Uisneno In Kabin ma Prenat, ma hit onen naan nakninuꞌ nain areꞌ bukaet ein naan.   
\s1 Usif Yesus In ameup rekon  
\p
\v 6 Tius! Mumnaubaꞌ rasin reꞌ ia meu hit aok-bian apirsait ein. Karu ho mmoeꞌ on naan, ho mjair Yesus Kristus In ameup reok goes. Uisneno In Kabin ma Prenat sin anmoeꞌ ko he ho mpirsai Je, ma nanoniꞌ ko he muhiin noniꞌ mee es reꞌ amneot. Ho mnaaꞌ muheer amrair Uisneno In Kabin ma Prenat sin. Naan on reꞌ bukaet reꞌ anhaꞌtain ho aom naan.  
\v 7 Kais muneuk oras he mpeo uab poi, reꞌ ka natuik ma natai fa nok Uisneno. Kais amtoe mutuin retaꞌ naꞌko aꞌnaef am fee mnasiꞌ reꞌ nanunin humaꞌ-humaꞌ. Reko nneis munoniꞌ ho tuam naan he mmoin mutuin Uisneno In roimn ee.   
\q1
\v 8 Muꞌtakaꞌ ho aom aan he naꞌbeiꞌ, naan reko.  
\q2 Mes in areokn ii, kreoꞌ goah.  
\q1 Mes munoniꞌ ho tuam aan anbi areꞌ kanan rasi, he mmoin mutuin Uisneno In romin,  
\q2 naan, in reokn ii kah een.  
\q1 Fin in areokn ii,  
\q2 ka arahaa fa neu oras tmoni tbi pah-pinan,  
\q3 mes nbi ꞌmonit neno amnemat amsaꞌ.   
\p
\v 9 Uab ein reꞌ ia, ro batuur! Onaim mumnau murek-rekoꞌ, ma kais amnikan sin.  
\v 10 Hit tharap ma tafneek teu Uisneno ꞌHonis. In es ansoi nafetin areꞌ mansian ok-okeꞌ, anneis-neis neu hit apirsait. Etun hit tmeup taheer ma taim ranan maꞌtaniꞌ.   
\p
\v 11 Munoniꞌ rasin ia ok-okeꞌ, ma mreun tuaf-tuaf he nmoeꞌ natuin noinꞌ ein naan.  
\v 12 Kais amkonan biak ein he nkanaꞌpaar ko, natuin ho munif ko feꞌ. Ho ro he mjari ꞌtopeꞌ meu too apirsait ein, oras ho muꞌuab, ho ꞌmoꞌem, ho manekat neu tuaf, ho neek pirsait meu Yesus Kristus, ma ho ꞌmonim akninuꞌ.  
\v 13 Oras hi mpao kau he au ꞌuum ate, kais amnikan he mrees Uisneno In Kabin ma Prenat neu too apirsait ein. Amhaꞌtain sin, ma munoniꞌ sin rek-reko.   
\p
\v 14 Ampaek ho manoem reꞌ Uisneno nanaꞌat ko goe jan, reꞌ ho mtoup goe oras aꞌnaak too sraniꞌ nꞌonen ma ntao ꞌniman neu ko. Oras naan, sin natoon Uisneno In romin amsaꞌ anmatoom nok ho ꞌmonim ma ho mepu. Onaim kais musaitan manoef reꞌ ho mtoup goe naan.  
\v 15 Ammakoe he munaobaꞌ rasin reꞌ naan! Maut he biak ein nitan nak, ho ꞌmonim ma ho mepu nanaob ok piut.  
\v 16 On reꞌ: mpanat ho tuam naan, he ho mmoin nok neek amneꞌo. Ma mpanat amsaꞌ he ho munoniꞌ rais amneot. Karu ho muheer ambi rasin naan, Uisneno of anfei ranan neu ko, ma neu too mfaun reꞌ nneen ma natniin ko, he hi mitsoi miꞌko rais amreuꞌt ein.   
\c 5  
\s1 Naiꞌ Timotius in taos ma moꞌet neu too sraniꞌ  
\p
\v 1 Kais mukain tuaf ein reꞌ namnasin nneis ko mpaek haan maꞌtaniꞌ. Mes ampaek uab maꞌnuraꞌ, on reꞌ ho muꞌuab meu ho aam honiꞌ. Ma neu muinf ein, muꞌhabaꞌ sin on reꞌ ho aom-bian sin.  
\v 2 On naan amsaꞌ, neu bifee mnais ein. Muꞌuab meu sin on reꞌ meu ho ain honiꞌ. Karu muꞌuab meu bifee muinf ein ate, mpanat sin on reꞌ sin ho fetoꞌ. Ho neekm aan ro he namneo ma nakninuꞌ.   
\s1 Anmatoom nok bifee baun ein  
\p
\v 3-5 Too sraniꞌ ro he nturun ma nbaab baun bifee ngguin, reꞌ sin ka nmuꞌin fa nonot-asar reꞌ he npairoir sin. Mes karu banuꞌ reꞌ anmuiꞌ anah-upuf feꞌe te, sin reꞌ naan ro he es anpairoir je. Munoniꞌ sin, he sin nbaras nahinin neu banuꞌ naan in maskeet ein. Nok ranan naan, sin ntuthae Uisneno, ma nharineb In nekan. Mes neu banuꞌ reꞌ nmoni nmes-mees, in ka nmuiꞌ fa tuaf antein he npairoir je. In arahaa nharap ma nafneek neu Uisneno. Fai-manas in nꞌonen ma ntoit turun-babat naꞌko Uisneno. Too srain ein ro he npairoir baun ein on reꞌ naan.   
\p
\v 6 Mes neu banuꞌ reꞌ naminab sin tuak ein neikin rais marinet pah-pinan, maski in nmoin feꞌe msaꞌ, in ka masoꞌik fa heen, on reꞌ atupas sin.   
\p
\v 7 Mumnaub areꞌ rasin naan neu too srain ein, maut he biak ein ka naꞌuab naꞌreꞌuf fa sin kaank ein.   
\p
\v 8 Mes karu nmuiꞌ tuaf reꞌ ka nroim fa he npairoir kuuk sin nonot-asar, anneis-neis in uim je nanan, naan on reꞌ in nait inporin in rais pirsait neu Uisneno. In maufiun ii nneis naꞌko atoniꞌ reꞌ ka nahiin fa Uisneno.   
\p
\v 9 Karu mpiir banuꞌ he nturun aꞌnaak jemaaꞌt ein ate, in tuiꞌn ii on nai: in toon anmoin naan ii, kais ankuran naꞌko toon boꞌ nee; unuꞌ te, in naꞌkiiꞌ nbi matsaos nok atoniꞌ meseꞌ;  
\v 10 tuaf nahiin je mnak, natiꞌ te in nmoeꞌ reko neu tuaf bian; in npairoir nahiin in aanh ein nok reko; reꞌ ntuthae tuaf bian nok neek marine; reꞌ anturun ma nbaab too apirsait ein nok meup ba-baun; reꞌ anroim he nturun ma nbaab tuaf anbi susat; ma reꞌ nabarab in tuan ee piut-piut he nturun ma nbaab anbi rais reko.   
\p
\v 11 Kais ampiir banuꞌ reꞌ munif feꞌ he nturun aꞌnaak jemaaꞌt ein. Kais-kaisaꞌ sin neek romit he nmatsaon ntenin naan, ansiuꞌ napoitan sin rasi mnaut neu Kristus. Nok ranan naan, sin of ka napenin fa mainuan anteniꞌ he ntuthae too srain ein nok rek-reko.  
\v 12 Fin karu sin oras mainuan neu jemaaꞌt ii nrabuꞌ te, naan namnees nok sin nareuꞌ sin rais manbaꞌan anbi Uisneno In human ma In matan. Of atoniꞌ nasaan sin.  
\v 13 Kais-kaisaꞌ sin napehen, rarit antaisibun ma npoi-ntaman neu biak ein sin uimn ein, ma nareet ein rais ruum-ruum, ma naꞌuab naꞌreꞌuf biak ein sin kaank ein. Ma rais reuꞌf es anteniꞌ, es reꞌ sin nroim nanes-nesib he nhee-hee gok neu es in rasi, ma naꞌuab ein rasi reꞌ ka maꞌupaꞌ ma maꞌosaꞌ fa.  
\v 14 Reko nneis, baun ein reꞌ munif feꞌ, sin nsaon nteinꞌ ein, he reko te, sin nahoin ein, ma nꞌurus kuuk sin uim je nanan. Nok ranan naan, tuaf reꞌ anmusun kit, ka napenin fa ranan he nareuꞌ ma nkanaꞌpaar kit.  
\v 15 Anmuiꞌ baun munif bian reꞌ anseken nrarin. Sin natuin anrair niut reuꞌf ein sin aꞌnaak kouꞌ goe in ranan.   
\p
\v 16 Karu nmuiꞌ bifee reꞌ npirsai neu Usif Yesus, reꞌ nmuiꞌ nonot-asar banuꞌ te, bifee naan ro he nturun ma nbaab bifee banuꞌ naan. Kais amkonan jemaaꞌt ein he sin es ansutai je. Nok ranan naan, too srain ein bisa nturun ma nbaab banuꞌ bian, reꞌ batuurn ii sin ka nmuꞌi nteinꞌ ein fa tuaf bian he nsutai sin.   
\s1 Anmatoom nok aꞌnaak jemaꞌat ein  
\p
\v 17 Tuaf reꞌ naꞌnaak jemaꞌat nok reko, hi ro he mhormaat ee batuur-batuur, ma mbaen in kai je nok reko. Anneis-neis neu tuaf reꞌ anmeup maꞌtaniꞌ he naknutuꞌ Uisneno In Kabin ma Prenat, ma nanoniꞌ ki raan aꞌhonis arekot amneot.  
\v 18 Fin matuꞌi et Uisneno In Suur Akninuꞌ mnak, “Karu mpaek bijae he nteir namouf maak ee in fuan naꞌko in asrakon, kais amfuut muꞌtemeb in fefan, maut he in naah.” Ma matuꞌi nteniꞌ msaꞌ am nak, “Sekau nmepu te, ro he napein kai.”\x + \xo 5:18 \xt Surat reꞌ Naretaꞌ Nafaniꞌ Raan Aꞌhonis 25:4, Naiꞌ Mateos 10:10, Naiꞌ Lukas 10:7\x*   
\p
\v 19 Karu nmuiꞌ tuaf reꞌ nakuu aꞌnaak jemaꞌat ate, kais amtoup goe on ahaa reꞌ naan! Ro he nmuiꞌ tuaf nuaꞌ-teun reꞌ ansaksii ma naꞌuab humaꞌ meseꞌ, on naan ate, naꞌ hi bisa mꞌuurs ee.\x + \xo 5:19 \xt Surat reꞌ Naretaꞌ Nafaniꞌ Raan Aꞌhonis 17:6, 19:15\x*  
\v 20 Karu mukain amrair je nmes-mees, mes in nmoin feꞌ anbi sanat naan ate, naꞌ mukain ee nbi jemaꞌat sin humak ma sin matak. Nok ranan naan, tuaf bian of ka nabrain fa he nmoeꞌ natuin in sanat.   
\p
\v 21 Munaob areꞌ tuiꞌn ein reꞌ ia nbi jemaaꞌt ein ok-okeꞌ, ma kais ampiir humaf. Au unaꞌat mepu ia ꞌeu ho ꞌnimam ꞌbi Uisneno ma Yesus Kristus sin humak ma sin matak. Ameput sonaf neno tunan reꞌ Uisneno npiri nrair sin, anjarin saksii msaꞌ.   
\p
\v 22 Kais ammanaap he mpiir tuaf he njair aꞌnakat. Amtai ma mtae mirek-reokꞌ ee nahuun. Natuin karu hi mpiir maan tuaf es nok akraf-rafuꞌ, rarit tuaf naan anmoꞌe nsaan, hi misaah sanat naan amsaꞌ, natuin in aꞌmoꞌen. Ampanat ho ꞌmoꞌet ma taos he kninuꞌ piut.   
\p
\v 23 Au ꞌneen ate, feꞌ-feꞌ fa te ho taim aan nameen. Reko nneis, anmurai oras ia ho mseor tua min-kase kreꞌo, maut he njair reꞌu. Kais minu haa oe ruum-ruum.   
\p
\v 24 Amkius rek-reko! Anmuiꞌ tuaf reꞌ in saant ein nakriir ok. Sin ka ntea nanan fa feꞌ neu afeek raisn ein sin maatk ein te, too mfaun ein nahini nrarin. Mes anmuiꞌ tuaf bian amsaꞌ, reꞌ aꞌroo-ꞌroo te, naꞌ sin saant ein nakriir ok.  
\v 25 On naan amsaꞌ humaꞌ meseꞌ neu tuaf-tuaf reꞌ anmoꞌen reko. Bian nakriir ok nanin. Ma bian anteniꞌ nmoꞌen reko mes maꞌnifaꞌ. Maski on naan amsaꞌ, mes saaꞌ-saaꞌ reꞌ sin nmoeꞌ sin naan, aꞌroo-ꞌroo te, nakriir ok amsaꞌ. Ka bisa fa he taꞌkoroꞌ rais reko.   
\c 6  
\s1 Anmatoom nok usiꞌ ma ate  
\p
\v 1 Anmuiꞌ usif reꞌ sin aten anpirsain neun Usif Yesus. Sin ro he nhormaat sin usin, maut he biak ein kais napenin ranan he naꞌuab namouf Uisneno In kanan, ma nkanaꞌpaar hit noniꞌ.  
\v 2a Anmuiꞌ aten reꞌ sin uisn ee npirsai neu Usif Yesus. Aten naan sin kais ankanaꞌpaar sin usif naan, natuin in npirsai neu Usif Yesus. On mee-on mee msaꞌ, sin ro he ntuthae reko nneisi ntein neu sin usin naan, natuin sin arsin pirsait meseꞌ, ma sin ro he nmanekan es nok es.   
\s1 Noniꞌ reꞌ ansaan, ma upan arekot  
\p
\v 2b Tius! Munoniꞌ rasin reꞌ ia ok-okeꞌ, ma muꞌhabaꞌ too srain ein, he sin nmoeꞌ natuin sin ok-okeꞌ.  
\v 3 Hit noniꞌ ma taruꞌ reꞌ amneot naan, njari ꞌsukif naꞌko raan aꞌhonis reꞌ nharineb Uisneno In nekan. Mes tuaf reꞌ nanoniꞌ ꞌtetaꞌ naꞌko noniꞌ reꞌ ia, sin reꞌ naan antitar napasib Usif Yesus Kristus In noniꞌ reꞌ amneot.  
\v 4 Tuaf on reꞌ naan, naꞌnaeb in tuan, mes in ka maroneꞌ fa! Sin meens ii, es reꞌ nromin he namin rais matoes nok ahaa rais ruum-ruum. Rasin ia, anneek-menab tuaf bian, anmatoebaꞌ tuaf, nareuꞌ atoniꞌ bian sin kaank ein, ma anmaktiun ein ruum-ruum aah.  
\v 5 Tuaf human on reꞌ naan, anmoeꞌ rais taisibu piut-piut. Sin teenb ein namreꞌun. Sin ka nahini nteinꞌ ein fa, mee es reꞌ amneot ma amnonot. Sin natenab nak karu sin nmakoen nbin rais pirsait, sin bisa njarin atoin amuꞌit.   
\p
\v 6 Batuur, rais pirsait ii bisa nmoeꞌ mansian ii napeni mnisat koꞌu. Fin ꞌmonit reꞌ anharineb Uisneno In nekan, maseroꞌ nok rais tenab manokab anmatoom nok saaꞌ reꞌ sin nmuꞌi, naan ro rais pirsait batuur aa!   
\p
\v 7 Mimnau mirek-rekoꞌ! Oras nahoniꞌ kit, hit ka teik fa saaꞌ es attaam teu pah-pinan ia. Ma oras hit tmate msaꞌ, hit ka teik fa saaꞌ-saaꞌ tpoi taꞌko pah-pinan ia.  
\v 8 Onaim asar mnahat, mninut, ma pake-nohas nanokab ate, taꞌtenaꞌ hit teenb ii nai!   
\p
\v 9 Mes tuaf reꞌ anroim he njair atoin amuꞌit, maan aa fa te, in of napein rais furit humaꞌ-humaꞌ, ma nmoufu nbi kreot aꞌrii-ꞌneꞌu, natuin sin nateenb ahaa ꞌmuꞌif. Areꞌ kanan rasin naan of neik siraak ma nareuꞌ sin aꞌmoink ein.  
\v 10 Atneek tanesib roit ii te, naan anjair uuf neu rais maufinu humaꞌ-humaꞌ. Anmuiꞌ tuaf bian reꞌ sin naimn ahaa roit, tar antea sin ntanhai sin rais pirsait amneot. Nok ranan naan, sin neikn ok, nareuꞌ sin aꞌmoink ein.   
\s1 Amnaaꞌ muher-heran noniꞌ reꞌ ho mtoupu mrair je  
\p
\v 11 Timotius! Ho mjair Uisneno Iin ja ko. Onaim amtet-koit muꞌroo-ꞌroo muꞌko rais amreuꞌt ein ok-okeꞌ. Ammoin mok neek akninuꞌ. Ammoni mbi rasi reꞌ amharineb Uisneno In nekan anbi areꞌ kanan rasi. Ampirsai piut meu Yesus Kristus. Amneek sekau-sekau goah. Ho ro he mtahan ambi susat. Ammoin mok sekau-sekau goah amsaꞌ, ro he nok neek maꞌnuraꞌ.  
\v 12 Ammeup batuur-batuur, he munaob areꞌ noinꞌ ein reꞌ hit tpirsai sin. Uisneno noꞌen nataam ko meu rasi ꞌhonis abar-barat. Onaim amnaaꞌ ma mhoo muher-heran rasi ꞌhonis naan, kais mufetin. Ma ho mutoon amrair ho rais pirsait meu Usif Yesus anbi too mfaun ein sin humak ma sin matak.  
\v 13-14 Onaim oras ia, au ꞌtoit ko he muhakeꞌ rais manbaꞌan on nai: ammoeꞌ mutuin Usif Yesus In apreent ein ok-okeꞌ. Kais amtanhai prenat meseꞌ msaꞌ, maut he biak ein kais nitan ma napenin sanat naꞌko ko. Ammoeꞌ mutuin sin ok-okeꞌ nok batuur, tar antea hit Usiꞌ, Yesus Kristus, ankoen On anfain neem. Au ꞌtoit ko he muhakeꞌ rais manbaꞌan on naan anbi Uisneno In human ma In matan. In es reꞌ anfee snasaf neu areꞌ kanan amonit. Au ꞌtoit ko he ho muhakeꞌ rais manbaꞌan on reꞌ naan anbi Yesus Kristus In human ma In matan. In es reꞌ neikn On natoon nanon-noon anmatoom nok In tuan ee, nbi gubernur Pontius Pilatus in human ma in matan.\x + \xo 6:13-14 \xt Naiꞌ Yohanis 18:37\x*   
\q1
\v 15 Usif Yesus reꞌ maꞌtain reꞌuf naan, In es reꞌ annaaꞌ kuasat!  
\q2 In reꞌ naan, Uis Koꞌu nneis naꞌko areꞌ uisf ein.  
\q2 Ma In reꞌ naan, Aꞌnaak Koꞌu nneis naꞌko areꞌ kanan aꞌnaakf ein.  
\q1 Antea in oors ate,  
\q2 Uisneno of nakriraꞌ areꞌ kanan rasin ia.   
\q1
\v 16 Suma In kuun, es reꞌ ka nmaet fa ma nmoin nabar-baar.  
\q2 In nmoni nbi meꞌu reꞌ mansian ii ka nabeiꞌ fa he nkius ma nꞌere.  
\q3 Ka tiit tain fa tuaf es, reꞌ nabeiꞌ he nkius Goe.  
\q1 Areꞌ kanan rais hormaat nasaeb ok neu Ne!  
\q2 Areꞌ kanan kuasa et In aꞌniman tar antea nabar-baar!  
\q3 On reꞌ naan, tua! Amin!   
\s1 Anmatoom nok amuꞌit ein  
\p
\v 17 Tius! Mutoon meu amuiꞌt ein pah-pinan ia, he sin kais nabeꞌon, ma kais naꞌpanen sin aꞌmoink ein neu ꞌmuꞌif pah-pinan. Fin aꞌmuiꞌf ein naan of oekꞌ ein. Reko nneis sin naꞌpaen ok anbin Uisneno ꞌHonis. Fin In es reꞌ nathoeb kit saaꞌ-saaꞌ reꞌ hit tperluu sin, he hit bisa tnaben tiit ꞌmoint ii in mainonin.  
\v 18 Mutoon meu sin he sin npaek sin aꞌmuiꞌk ein he nmoꞌen rais reko. Sin ro he nmakoen nbin nmoeꞌ reko. Sin ro he nnonaꞌ sin aꞌniimk ein he nfiit ma nbaab tuaf, ma nroim he nfee athoen naꞌko Uisneno neu sin.  
\v 19 Nok ranan naan, sin nkikin ma nakbuaꞌ aꞌmuꞌif he njari ꞌsukif maꞌtaniꞌ neu sin aꞌmoink ein nokaꞌ-nmeu. Nok ranan naan amsaꞌ, sin nafenaꞌ rasi ꞌmonit reꞌ maꞌupaꞌ ma maꞌosaꞌ.   
\s1 Naiꞌ Paulus natuꞌub in surat  
\p
\v 20 Tius! Ampanat murek-rekoꞌ areꞌ kanan rasi reꞌ Uisneno nanaꞌat ko sin. Kais amseit-seitn om meu rais poi ruum-ruum. Kais amtuut mok ambi uab reuꞌf ein, reꞌ ka neik fa rais hormaat neu Uisneno. Mumnau, goo! Anmuiꞌ tuaf anpaas in aꞌbasan nak, in atoin ahinit. Te kaah, sin ‘hinit’ naan, ka nmuiꞌ fa ꞌsukif. Kais amnao he mmatuut-feef mok sin.  
\v 21 Anmuiꞌ tuaf bian reꞌ npirsai rais puta-kriu ngguin, tar antea sin ntebin naꞌkon sin rais pirsait reꞌ amneot ma amnonot neu Uisneno.  
\p Au ꞌtoit he Uisneno nakriraꞌ In neek arekot neu ki ok-okeꞌ.  
\q2 Saloom,  
\q2 Au naiꞌ Paulus kau, tua.